ដោយៈស៊ីវ ម៉េង

         ភ្នំពេញៈ រយៈពេលពីរទសវត្សរ៍ចុងក្រោយនេះ រាជធានីភ្នំពេញ និងក្រុងព្រះសីហនុបានផ្លាស់ប្តូរមុខមាត់ទាំងស្រុង ដោយសារការចាក់បញ្ចូលនូវមូលធនប្រមាណ១០ពាន់លានដុល្លារក្នុងវិស័យអចលនទ្រព្យ និងសំណង់។

ការរីកចម្រើន និងផ្លាស់ប្តូរមុខមាត់យ៉ាងឆាប់រហ័សនេះ ដោយសារកំនើនសេដ្ឋកិច្ចសម្រេចបានជាង៧ភាគរយ មុនពេលវិបត្តិកូវីដ១៩មកដល់ និងគោលនយោបាយដាក់ចេញដ៏ត្រឹមត្រុវ និងមានផែបទីចង្អុលបងង្ហាញផ្លូវច្បាស់លាស់ ពីប្រមុខរាជរដ្ឋាភិបាលកម្ពុជា សម្តេចតេជោហ៊ុន សែនជានាយករដ្ឋមន្រ្តី។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកឧកញ៉ាឃាង ពុទ្ឋី បានមានប្រសាសន៍ឲ្យដឹងនាព្រឹកថ្ងៃទី១ ធ្នូនេះថា ស្ថានភាពទីផ្សារអចលនទ្រព្យហាក់មានភាពឆ្អែតបន្តិចហើយ នៅក្នុងផ្នែកខ្លះដូចជាដីឡូត៍ លំនៅដ្ឋាន ដែលមិនអាចសាងសង់ឬប្រកាសលក់ភ្លាម លក់ដាច់អស់នោះទេ។

លោកបន្តថា “ទីផ្សារអចលនទ្រព្យ ចាប់ផ្តើមមានភាពប្រកួតប្រជែងជាងមុន ខណៈ​សេវាកម្មដទៃទៀតដូចជាចំណីអាហារ កសិកម្ម សុខាភិបាលមានភាពរីកចម្រើន”។លោកបន្តថា “ការរីកចម្រើនវិស័យទេសចរណ៍ បច្ចេកវិទ្យា ឧស្សាហកម្ម នឹងងាកបកជួយជំរុញទីផ្សារអចលនទ្រព្យឡើងវិញ”។

ជាមួយគ្នានេះ ផ្នែកដទៃទៀតក៏បាននិងកំពុងមានភាពឆ្អែកផងដែរ នោះគឺផ្សារទំនើប។

អ្នកស្រីអាន សុធីតាអគ្គនាយិកាក្រុមហ៊ុន​ PropNex Cambodiaបានមានប្រសា​សន៍ថា ផ្សារទំនើបនៅកម្ពុជារវាងការផ្គត់ផ្គង់ និងតម្រូវការ គឺការផ្គត់ផ្គង់លើសតម្រូវការហើយ ដោយសារការកើនឡើងនូវការវិនិយោគ វិបត្តិកូវីដ១៩ ដែលធ្វើឲ្យអ្នកលក់តាមស្តង់នានាមិនអាចរកប្រាក់បង់ថ្លៃបាន និងការកើនឡើងនូវ E- Commerce។

អ្នកស្រីបន្តថា “ការរីកចម្រើននៃទីផ្សារក្នុងក្រុងភ្នំពេញ និងអំណាចនៃការទិញកើនឡើង ប៉ុន្តតែស្ថិតក្នុងកម្រិតមួយ ខណៈផ្សារមួយចំនួនបានបើក ប៉ុន្តែទីតាំងមិនសមស្រប​នោះទេ”។

ទោះជាយ៉ាងណា លោកឧកញ៉ាបណ្ឌិតគីម ហ៊ាងប្រធាន KW Cambodiaបានមានប្រសាសន៍ឲ្យដឹងផងដែរថា ទីផ្សារអចលនទ្រព្យនៅកម្ពុជា មិនទាន់មានភាពចាស់ទុំឬឆ្អែតនៅឡើយទេ ប៉ុន្តែទីផ្សារមួយចំនួនបានឆ្អែកដូចជា ខុនដូដែលមានតម្លៃខ្ពស់ ខណៈទីផ្សារខុនដូតម្លៃមធ្យម និងក្រោមមធ្យមនៅមានភាពស្រេកឃ្លាននៅឡើយ។

លោកបន្តថា “បើនិយាយពីទីផ្សារបុរីទាំងមូលមិនមានបញ្ហានោះទេ ប៉ុន្តែសំរាប់បុគ្គលមួយចំនួនគឺមានបញ្ហា ដោយសារពួកគេទិញយកចំណេញ ហើយលក់មិនចេញគឺ​មានបញ្ហាហើយ”។លោកបន្តថា “ម្ចាស់គំរោងពួកគេលក់ ប្រមូលលុយបានអស់មិនបញ្ហាទេ អ្នកដែលរងបញ្ហាគឺអ្នកទិញហើយលក់មិនចេញ”៕

 ដោយៈស៊ីវ ម៉េង

         ភ្នំពេញៈ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា អ្នកឧកញ៉ាលី ហួរបានថ្លែងថា ការទិញផ្ទះទុកលក់យកចំណេញ អាចជាហានិភ័យ នៅពេលដែលផ្ទះពួកគេលក់មិនដាច់ ហើយមិនមានប្រាក់បង់។

អ្នកឧកញ៉ាបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី៣០ វិច្ឆិកាម្សិលម៉ិញនេះថា ការទិញលំនៅដ្ឋានទុកលក់យកចំណេញ អាចមានហានិភ័យ បើសិនជាពួកគេលក់ផ្ទះមិនដាច់ ប៉ុន្តតែបើទិញយកមករស់នៅមិនមានបញ្ហាអ្វីនោះទេ។

អ្នកឧកញ៉ាបានបន្តថា “សមាគមបានណែនាំពីបញ្ហានេះ និងឲ្យសិក្សាឲ្យបានច្បាស់លាស់មុនធ្វើអ្វីមួយផងដែរ”។អ្នកឧកញ៉ាបានបន្តថា “ទោះជាយ៉ាងណាសមាជិកសមាគមមិនមានបញ្ហាអ្វីនោះទេ ដោយសារពួកគេសុទ្ឋតែជាអ្នកអភិវឌ្ឍន៍ធំៗ ឬសុទ្ឋតែ ជាជើងខ្លាំងនៅក្នុងវិស័យនេះ”។

អ្នកឧកញ៉ាលី ហួរបានបន្តថា ទោះជាយ៉ាងណាទីផ្សារលំនៅដ្ឋាន នៅតែមានតម្រូវការច្រើន ដោយសារអ្នកមានលទ្ឋភាពបានបន្តទិញទុក សម្រាប់កូនចៅរបស់ពួកគេ ដែលត្រូវរៀបការហើយបែកចេញពីគ្រួសារ ស្របពេលបច្ចុប្បន្ននេះ អ្នកវិនិយោគធំៗជាច្រើនបាននិងកំពុងចាប់ផ្តើមសាងសង់គំរោងធំៗរបស់ពួកគេឡើងវិញ។

កាលពីពេលថ្មីៗនេះ បុរីពិភពថ្មីបានចេញសេចក្តីប្រកាសមួយ ដោយកំណត់ឲ្យអតិ​ថិជនម្នាក់ៗអាចទិញផ្ទះបានតែ១ប៉ុណ្ណោះ និងមិនអាចលក់ចេញក្នុងរយៈពេល២ឆ្នាំឡើយ ខណៈបុរីនេះមួយចំនួនមានអ្នកទិញ ដើម្បីទុកលក់យកចំណេញច្រើន ហើយផ្ទះរបស់ពួកគេមិនមានការស្នាក់នៅពីប្រជាពលរដ្ឋនោះឡើយ៕

ដោយៈ វឌ្ឍនៈ

ភ្នំពេញៈ បណ្ដាវិនិយោគិនក្នុង និងក្រៅប្រទេស ជាពិសេសវិនិយោគិនមកពីប្រទេសចិន បានចាប់ផ្ដើមសម្លឹងរកទីតាំងវិនិយោគរបស់ខ្លួន បន្ទាប់ពីរាជរដ្ឋាភិបាលកម្ពុជាបានប្រកាសបើកប្រទេសឡើងវិញ និងអនុញ្ញាតឱ្យអ្នកដំណើរបរទេសចូលមកកម្ពុជាដោយមិនចាំបាច់ធ្វើចត្តាឡីស័កទៀតនោះទេ។

ប្រធានសមាគមអចលនទ្រព្យសកល លោកឧកញ៉ាសំ សុខនឿនបានមានប្រ​សា​សន៍ឱ្យដឹងតាមទូរស័ព្ទនាព្រឹកថ្ងៃទី១ ធ្នូនេះថា ក្រោយពីរាជរដ្ឋាភិបាលកម្ពុជាបានបើកប្រទេសឡើងវិញ យើងឃើញថាបណ្ដាវិនិយោគិនជាច្រើនទាំងក្នុង និងក្រៅប្រទេសចាប់ផ្ដើមបញ្ចេញសកម្មភាព លើគំរោងវិនិយោគរបស់ខ្លួនឡើងវិញបណ្ដើរៗហើយ ក្នុងនោះវិនិយោគិនបរទេសជាពិសេសចិន បាននិងកំពុងសម្លឹងរកការវិនិយោគលើតំបន់សេដ្ឋកិច្ចពិសេសថ្មីៗបន្តបន្ទាប់ទៀតនៅក្នុងប្រទេសកម្ពុជា ។

លោកបន្តថា “ពេលនេះចិនកំពុងក្ដាប់យកឱកាស ក្នុងការសាងសង់តំបន់សេដ្ឋកិច្ច ដើម្បីត្រៀមទទួលក្រុមហ៊ុនវិនិយោគថ្មីៗជាបន្តបន្ទាប់ ដែលអាចនឹងចូលមកកម្ពុជានៅពេលឆាប់ៗខាងមុខនេះ”។

លោកឧកញ៉ាបន្តថា តំបន់ដែលមានសក្ដានុពល ក្នុងការអភិវឌ្ឍតំបន់សេដ្ឋកិច្ចពិ​សេ​​ស គឺនៅតំបន់ណាដែលមានភាពងាយស្រួល ក្នុងការដឹកជញ្ជូនទៅកាន់កំពង់ផែទឹកជ្រៅ ក្នុងនោះមានតំបន់តាមបណ្ដោយផ្លូវជាតិលេខ៤ គឺជាតំបន់ដែលមានសក្ដានុពលខ្ពស់មួយសម្រាប់ការវិនិយោគលើតំបន់សេដ្ឋកិច្ចពិសេស ។

លោកបន្ថែមថា អ្វីដែលយើងសង្កេតមើលឃើញនាពេលកន្លងមក ទីណាដែលមានការអភិវឌ្ឍឧស្សាហកម្ម ឬតំបន់សេដ្ឋកិច្ចពិសេសទីនោះ ក៏នឹងទទួលបានការវិនិយោគទៅលើលំនៅឋាន និងមានមនុស្សរស់នៅកាន់តែច្រើន ដោយមានការងារសម្រាប់ប្រជាពលរដ្ឋកាន់តែច្រើនផងដែរ ។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា នាពេលកន្លងមកបានបង្ហាញថា មានក្រុមហ៊ុននិងគម្រោងជាច្រើន បានបណ្ដាក់ទុនវិនិយោគនៅក្នុងតំបន់សេដ្ឋកិច្ចពិសេសនានាក្នុងប្រទេសកម្ពុជា ដែលបង្ហាញថាតំបន់សេដ្ឋកិច្ចពិសេស បានរួមចំណែ​កសំខាន់ក្នុងការជំរុញកំណើនសេដ្ឋកិច្ចកម្ពុជា ជាតំបន់ដែលផ្ដល់ការងារជូនប្រជាពលរដ្ឋកម្ពុជាច្រើន និងជាទីតាំងផលិតទំនិញ ដ៏មានសក្ដានុពលសម្រាប់នាំចេញទៅកាន់ទីផ្សារអន្តរជាតិ។

ជាការកត់សម្គាល់ខេត្ត ដែលទទួលបានការវិនិយោគលើតំបន់ សេដ្ឋកិច្ចពិសេសរួមមានខេត្ត កំពង់ស្ពឺ ខេត្តព្រះសីហនុ ខេត្តកោះកុង ខេត្តបន្ទាយមានជ័យ ខេត្តស្វាយរៀង និងរាជធានីភ្នំពេញ ហើយក្នុងតំបន់ទាំងនោះ ក៏នៅតែបន្តទាក់ទាញ លើវិស័យឧស្សាហកម្មជាច្រើនទៀតផងដែរ គិតមកដល់ពេលបច្ចុប្បន្ននេះ។

លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានមានប្រសាសន៍ឲ្យដឹងផងដែរថា រហូតមកទល់ពេលនេះ ចិនបាននិងកំពុងចូលមកវិនិយោគបណ្តើរៗនៅកម្ពុជាហើយ បន្ទាប់ពីកិច្ចព្រមព្រៀងពាណិជ្ជកម្មសេរី និងការជួបប្រជុំតាមប្រព័ន្ឋវីដេអូរវាងសម្តេចតេជោហ៊ុន សែន និងលោកនាយករដ្ឋមន្រ្តីចិន លឺ ឃឺឈាងកាលពីពេលថ្មីៗនេះ ដែលប្រមុខរដ្ឋទាំងពីរ បានប្តេជ្ញាជម្រុញកំនើនទំហំពាណិជ្ជកម្ម ឲ្យកើនឡើងដល់១០ពាន់លានដុល្លារអាមេរិក។

លោកបន្តថា “ការចូលជាធរមាននៃកិច្ចព្រមព្រៀងពាណិជ្ជកម្មសេរី រវាងប្រទេសទាំងពីរ នឹងធ្វើឲ្យអ្នកវិនិយោគចិន អឺរ៉ុប អាមេរិកមកវវិនិយោគកាន់តែច្រើននៅកម្ពុជា ដើម្បីនាំចេញទំនិញដោយរួចពន្ឋទៅកាន់ប្រទេសចិន”៕

ដោយៈសុខុម

សឹង្ហបុរី: អាជ្ញាធរនាវាចរណ៍ និងកំពង់ផែសិង្ហបុរី (MPA) បានប្រកាសកាលពីថ្ងៃអង្គារ ទី៣០ វិច្ឆិកា ថា ចំណតនាវា២ដំបូងនៃដំណាក់កាលទី១ ក្នុងគម្រោងកំពង់ផែដ៏ធំសម្បើម Tuas Port របស់សិង្ហបុរី គ្រោងនឹងដាក់ឱ្យដំណើរការ នៅត្រឹមដំណាច់ឆ្នាំ២០២១ នេះ។

យោងតាមការចុះផ្សាយរបស់សារព័ត៌មាន CNA ឱ្យដឹងថា ដំណើរការសាងសង់កំពង់ផែនេះ បានចាប់ផ្ដើមកាលពីប្រមាណ៦ឆ្នាំមុន។ អាជ្ញាធរ MPA បានចេញសេចក្ដីប្រកាសព័ត៌មានថា គម្រោងកំពង់ផែនេះ មានទាំងអស់៤ដំណាក់កាល ហើយទាំង៤ដំណាក់កាលនេះ នឹងបញ្ចប់ជាស្ថាពរនៅទសវត្សរ៍ឆ្នាំ២០៤០។

អាជ្ញាធរ MPA បានបន្ថែមទៀតថា នៅពេលសាងសង់បញ្ចប់ជាស្ថាពរ កំពង់ផែនេះនឹងលាតសន្ធឹង លើផ្ទៃដីសរុបរហូតដល់ទៅប្រមាណ១.៣៣៧ហិកតា។ កំពង់ផែនេះនឹងបំពាក់បច្ចេកវិទ្យាទំនើបៗជាច្រើន ដូចជា ដងស្ទូចដែលដំណើរការដោយស្វ័យប្រវត្តិ និងយានដំណើរការស្វ័យប្រវត្តិ ដោយគ្មានអ្នកបើកបរ សម្រាប់ដឹកជញ្ជូនកុងតឺន័រនៅកំពង់ផែនេះជាដើម។

រដ្ឋមន្ត្រីក្រសួងដឹកជញ្ជូនប្រទេសនេះ លោក S Iswaran បានថ្លែងថា “ការបញ្ចប់ដំណាក់កាលទី១ សម្រាប់កំពង់ផែ Tuas Port គឺជាព្រឹត្តិការណ៍ដ៏សំខាន់មួយ ដែលឆ្លុះបញ្ចាំងពីភាពធន់ទ្រាំរបស់យើង អំឡុងស្ថានការណ៍ដ៏អាក្រក់ និងបញ្ជាក់ពីឋានៈស័ក្ដិសមរបស់ប្រទេសសិង្ហបុរី ក្នុងនាមជាមជ្ឈមណ្ឌលកំពង់ផែពិភពលោក ដែលបណ្ដាដៃគូអាចជឿទុកចិត្តបាន”។

រដ្ឋមន្ត្រីរូបនេះបានគូសបញ្ជាក់ថា ការប្រើប្រាស់ “វិធីសាស្រ្តសាងសង់ប្រកបដោយភាពច្នៃប្រឌិត និងនិរន្តរភាព” បានធ្វើឱ្យអាជ្ញាធរ MPA សន្សំសំចៃការចំណាយបានរហូតដល់ជាង១ពាន់លានដុល្លារ សម្រាប់ដំណាក់កាលទី១។
នៅក្នុងព្រឹត្តិការណ៍ដដែលនេះ លោក Niam Chiang Meng ប្រធានអាជ្ញាធរ MPA បានថ្លែងថា ខណៈដំណាក់កាលទី១បានបញ្ចប់ ការងារសម្រាប់ដំណាក់កាលទី២ នៃកំពង់ផែដ៏ធំសម្បើមនេះ ក៏កំពុងដំណើរការ ហើយក៏កំពុងត្រៀមផែនការ សម្រាប់ដំណាក់កាលទី៣ផងដែរ៕