ដោយ: ម៉ាលីស

ភ្នំពេញៈ ប្រមុខរាជរដ្ឋាភិបាលកម្ពុជា សម្តេចតេជោហ៊ុន សែន នឹងអញ្ជើញជាអធិ​បតីដ៏ខ្ពង់ខ្ពស់ នៅក្នុងពិធីរាប់ថយក្រោយ៥០០ថ្ងៃ នៅពហុកីឡដ្ឋានជាតិមរតកតេជោ នាថ្ងៃទី១៨ ខែធ្នូ ឆ្នាំ២០២១ នៃដំណើរឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម-អាស៊ាន ប៉ារ៉ាហ្គេម ឆ្នាំ២០២៣។

លោក វ៉ាត់ ចំរើន អគ្គលេខាធិការ គណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានមានប្រសាសន៍ឲ្យដឹងក្រោយបញ្ចប់កិច្ច ប្រជុំប្រចាំសប្តាហ៍ នៅព្រឹកថ្ងៃទី៣០ ខែវិច្ឆិកា ឆ្នាំ២០២១ ក្រោមវត្តមានលោកបណ្ឌិត ថោង ខុន អនុប្រធានអចិន្ត្រៃយ៍ គណៈកម្មាធិការជាតិ CAMSOC។

លោក វ៉ាត់ ចំរើន អគ្គលេខាធិការ CAMSOC បញ្ជាក់ថា នៅក្នុងពិធីរាប់ថយក្រោយ ៥០០ថ្ងៃនេះ ក៏មានការអញ្ជើញចូលរួមពីឯកអគ្គរដ្ឋទូតចិន តំណាងឱ្យរដ្ឋាភិបាលចិន ក្រោ​ម អធិបតីសម្តេចតេជោនាយករដ្ឋមន្ត្រី ហ៊ុន សែន ដោយគ្រោងនឹងរៀបចំកម្មវិធី៣បញ្ចូលគ្នាដូចជា ទី១-ការបើកសម្ពោធដាក់ឱ្យប្រើប្រាស់ជាផ្លូវការ នូវវិមានកីឡដ្ឋានជាតិមរតកតេជោ ទី២ ពិធីអបអរសាទរពិធីរាប់ថយក្រោយ៥០០ថ្ងៃ និងទី៣. ការប្រកាសយុទ្ធនាការជាតិផ្សព្វផ្សាយឆ្ពោះទៅ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ របស់កម្ពុជា។ ដូច្នេះចាប់ពីថ្ងៃទី១៨ ខែធ្នូ ឆ្នាំ២០២១ ការផ្សព្វផ្សាយនឹងត្រូវចាប់ផ្តើម ដោយត្រូវរួមគ្នាគ្រប់សមាសភាពក្រសួងស្ថាប័នបូក ជាមួយការងារបរទេស ការងារកីឡា កាទូតក្រៅប្រទេសនឹងត្រូវផ្គុំគ្នា ក្នុងសំឡេងតែមួយជួយគាំទ្រ ឆ្ពោះទៅការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ក្រោមប្រធានបទ “កីឡារស់ក្នុងសន្តិភាព”។

លោកអគ្គលេខាធិការបន្ថែមថា ទាំងអស់នេះ គឺជាកំណត់ត្រាប្រវត្តិសាស្ត្រថ្មីសម្រា​ប់ ការកត់ត្រាក្នុងដំណើរឆ្ពោះទៅធ្វើម្ចាស់ផ្ទះ ឆ្នាំ២០២៣ផង និងជាកំណត់ត្រាមួយប្រចាំឱ្យប្រវត្តិ ក្នុងការសាងសាង់ពហុកីឡដ្ឋានជាតិមរតកតេជោផង។

នៅក្នុងកម្មវិធីដ៏ធំនាថ្ងៃទី១៨ ខែធ្នូ ឆ្នាំ២០២១ គឺមានកម្មវិធីច្រើន ដូចជា ការកាត់ខ្សែបូរសម្ពោធ ការបង្ហាញកីឡា ការសម្តែង សិល្បៈវប្បធម៌ បង្ហាញអំពីចំណងមិត្តភាពដែកថែប កម្ពុជា-ចិន និងមានបទ ចម្រៀងក្នុងកម្ម វិធីអបអរនេះផងដែរ។

លោកបណ្ឌិត ថោង ខុន បានឯកភាពនូវគម្រោងសម្រាប់ការចូលរួម ក្នុងកម្មវិធីនេះ មានចំនួន១៥០០០នាក់ ដោយដាក់ចេញនូវវិធានការសុខាភិបាល ដើម្បីបង្ការជំងឺកូវីដ-១៩។

ក្នុងចំនួននេះ គឺមានជាង១០០០នាក់ ជាសិល្បករ សិល្បការិនី និងកីឡាករ កីឡាការិនី ដែលត្រូវសម្តែងបង្ហាញ នៅលើទីលានបាល់ទាត់នៃវិមានកីឡដ្ឋាន ដោយទិដ្ឋភាពនេះនឹង បង្ហាញចេញនូវភាពអស្ចារ្យ ជាពិសេសគឺការផ្សព្វផ្សាយដោយផ្ទាល់ពី បណ្តាញ​ទូរទស្សន៍ទាំងអស់នៅកម្ពុជា។

លោកវ៉ាត់ ចំរើន បញ្ជាក់ជូនថា លោកបណ្ឌិត ថោង ខុនដែលជាថ្នាក់ដឹកនាំមានបទពិសោធន៍ខ្ពស់ ក្នុងព្រឹត្តិការណ៍ធំៗទាំងទេសចរណ៍ ទាំងកីឡា គឺលោកបណ្ឌិតតែងតែចង្អុលបង្ហាញពីភាពល្អិតល្អន់បំផុត នូវតួនាទីភារកិច្ចចាប់ពីចំណុចសូន្យ ដល់ចំណុចបញ្ចប់។ ដូច្នេះអ្វីដែលលោកបណ្ឌិត ថោង ខុន បានដាក់ចេញគឺគ្រប់សមាស ភាពពាក់ព័ន្ធទាំងអស់ ប្តេជ្ញាចិត្តធ្វើឱ្យបាន ដើម្បីធ្វើឱ្យកម្មវិធីជាប្រវត្តិសាស្ត្រថ្មីឆ្ពោះ ទៅធ្វើ ម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ មានដំណើរការល្អប្រកប ដោយប្រសិទ្ធភាពខ្ពស់ ដើម្បីឱ្យស័ក្តិសមនឹងវិមានកីឡដ្ឋានដ៏មហិមា និងឱ្យស័ក្តិសមនឹងការចំណាយទឹកប្រាក់ដ៏ច្រើនសន្ធឹកសន្ធាប់របស់រដ្ឋាភិបាលសាធារណរដ្ឋប្រជាមានិតចិនជូនកម្ពុជា៕

ដោយៈ សុផារី

ភ្នំពេញៈ ស្របពេលដែលរាជធានីភ្នំពេញ កំពុងតែរីកដុះដាលកាន់តែធំ សម្រាប់អ្នកវិនិយោគ ដែលសម្លឹងរកទីតាំងសម្រាប់ការអភិវឌ្ឍ ឬការវិនិយោគនៅក្នុងនិងជុំវិញរាជធានីភ្នំពេញ អ្នកជំនាញវិស័យអចលនទ្រព្យណែនាំ អំពីសក្តានុពលទិសទាំង៤ នៃក្រុងភ្នំពេញនិងទីតាំងដែលមានសក្តានុពលខ្ពស់។

លោកឧកញ៉ាគីម ហ៊ាង ប្រធានក្រុមហ៊ុន KW Cambodia បានមានប្រសាសន៍ថា “ទិសទាំងបួននេះ ខាងណាក៏ល្អដែរ សំខាន់ថាតើគោលបំណងអ្វី ចង់វិនិយោគឬអភិវឌ្ឍន៍។ វិនិយោគសំដៅលើការទិញដើម្បីលក់ចំណេញ។ ចំណែកអភិវឌ្ឍន៍សំដៅលើការពុះដីឡូត៍លក់ សាងសង់បុរី ខុនដូ ឬសាងសង់អ្វីម្យ៉ាង”។

សម្រាប់ទិញខាងលិចមានសក្តានុពលល្អ ប្រសិនបើគេចង់បានដី ដើម្បីសាងសង់​ផ្ទះទុកជួលឱ្យកម្មករ កម្មការនី ក្នុងតម្លៃចន្លោះ៤០ ទៅ៥០ដុល្លារ ព្រោះទិសខាងលិចជាតំបន់ដែលមានរោងចក្រច្រើន។

លោកឧកញ៉ាមានប្រសាសន៍ថា “ខ្ញុំអាចនិយាយបានថា ប្រជាជនដែលរស់នៅភាគខាងលិច ភាគច្រើនជាអ្នកជួលផ្ទះគេនៅ។ ទិសខាងលិចជាតំបន់ឧស្សាហកម្មផង លំនៅដ្ឋានផង ប៉ុន្តែភាពច្រើនទាក់ទងនឹងរោងចក្រតែម្តង”។លោកបន្តថា “ទិសខាងលិច ប្រសិនបើយើងសាងសង់ផ្ទះជួល ប៉ុន្មានក៏មានអ្នកជួលដែរ ប៉ុន្តែប្រសិនបើសាងសង់ផ្ទះវីឡា៥ម៉ឺន ១លានដុល្លា ប្រហែលពិបាកលក់”។

លោកឧកញ៉ាបានបញ្ជាក់ពីសក្តានុពល របស់តំបន់ភាគខាងត្បូងថា “ប្រសិនបើចង់បានដីធ្លីធំៗ ហើយរីកចម្រើនខ្លាំង ប្រហែលជា៥ឆ្នាំក្រោយ ខ្ញុំមើលទៅទិសខាងត្បូង”។ លោកបន្តថា “សម្រាប់រយៈពេល៥ ទៅ១០ឆ្នាំ ក្រោយទិសដែលខ្លាំងគឺទិញខាងត្បូង ព្រោះជាតំបន់ដែលរាជរដ្ឋាភិបាលកម្ពុជាកំណត់ថា ជាតំបន់ដែលមានប្រលានយន្តហោះថ្មី អញ្ចឹងជាតំបន់អភិវឌ្ឍន៍ថ្មី។ជាតំបន់ល្អ ប៉ុន្តែវាត្រូវការពេលវេលា។ ប្រសិនបើចង់ទិញដីទុកលក់នៅ៥ ទៅ១០ ឆ្នាំក្រោយ ទិសខាងត្បូងល្អ”។

ប្រសិនបើចង់អភិវឌ្ឍអ្វីម្យ៉ាង ធ្វើអ្វីមួយភ្លាមៗ ទិញដីទុកលក់ភ្លាម រយៈពេល២ទៅ៣ឆ្នាំ ឬចង់សាងសង់ផ្ទះសម្រាប់រស់នៅលក្ខណៈស៊ីវីល័យ ទំនើប គឺទិសខាងជើង។ តំបន់ទិសខាងជើង ជាពិសេសខណ្ឌសែនសុខ ជាតំបន់ដែលប្រមូលផ្តុំទៅដោយមជ្ឈមណ្ឌ​លនានា មានដូចជា ផ្សារទំនើបអ៊ីអនម៉ល២ ផ្សារក្លូបល ផ្សារម៉ាក្រូ ផ្សារជីប ម៉ុង និងបុរីជាច្រើន។

លោកឧកញ៉ាគីម ហ៊ាងបានបន្តថា អ្នកមានខ្លាំងក្រោយឆ្នាំ១៩៧៩ ភាគច្រើនមានដីមានផ្ទះនៅតំបន់បឹងកេងកងទី១ ប៉ុន្តែពួកគាត់រស់នៅទួលគោក ដែលសព្វថ្ងៃនេះតម្លៃដីធ្លីមានចន្លោះពី២៥០០ ទៅ៣០០០ ដុល្លារក្នុងមួយម៉ែត្រការ៉េ។

លោកឧកញ៉ាសង្គេតឃើញថា អ្នកមានជំនាន់ថ្មី ដែលឱពុកម្តាយរបស់គាត់ជាអ្នកមាន ហើយចង់បានជីវិតរស់នៅទំនើប ស៊ីវិល័យ សម្បូរហាងទំនិញ សម្បូរកន្លែងដើរលេង សម្បូរ shopping mall រស់នៅក្នុងតំបន់សម្បូរវីឡា អ្នកមានរស់នៅច្រើន គឺភាគខាងជើង ដោយគេសង្កេតឃើញមាន មហាវិថីឈ្នះឈ្នះ ក្រសួងដែនដី នគរូបនីយកម្ម និងសំណង់ហ្គ្រេនភ្នំពេញ និងបុរីជាច្រើន។

លោកឧកញ៉ាប្រៀបធៀប តំបន់បឹងកេងកង ទៅនឹងមនុស្សស្រីអាយុ៣៥ ចូល៤០ឆ្នាំ។ ទួលគោកទៅនឹងមនុស្សស្រីអាយុ៣០ឆ្នាំ ភ្នំពេញថ្មីប្រៀបដូចជាមនុស្សស្រីអាយុ២៥ ឆ្នាំ ប៉ុន្តែទិសខាងជើងដែលមានបុរីសាងសង់ថ្មីច្រើន ប្រៀបដូចជាមនុស្សស្រីអាយុ២០ ទៅ២៥ឆ្នាំ។

សម្រាប់អ្នកដែលមិនសូវមានលទ្ធភាព លោកណែនាំតំបន់់ទិសខាងកើត ជាតំបន់ដែលសងខាងដងផ្លូវមានទន្លេ ចាប់ពីច្បារអំពៅទៅ។ លោកថា តំបន់ទិសខាងកើត ជា “តំបន់លំនៅដ្ឋាននិងទេសចរណ៍ពណ៌បៃតង”។

ប្រសិនបើធ្វើដំណើរពីភ្នំពេញ តាមស្ពានព្រះមុនីវង្ស ទៅកាន់ច្បារអំពៅ ទិញខាងកើតទៅអ្នកលឿង កៀនស្វាយក្រៅ ម្តុំបឹងស្នោ មានអាកាសធាតុត្រជាក់ជាធម្មតា តាមសងខាងគឺមានទន្លេ ហើយម្តុំកៀនស្វាយ ជាតំបន់មានអាកាសធាតុត្រជាក់ ជាងទិសផ្សេងៗទៀត។

ចំណែកលោកឧកញ៉ាសំ សុខនឿន ប្រធានសមាគមអចលនទ្រព្យសកល (GRA) និងជាប្រធានក្រុមហ៊ុន សេម អេស អិន បានមានប្រសាសន៍ថា គ្រប់ទិសទាំងបួនជុំវិញរាជធានីភ្នំពេញ សុទ្ធតែមានការរីកចម្រើន ដោយយើងសង្កេតឃើញថា រាជធានីភ្នំពេញកាន់តែរីកចម្រើនបន្តទៀត ដែលនាំឱ្យអចលនវត្ថុទាំងអស់ ដែលនៅក្នុងកាំរង្វង់៣០គីឡូ​ម៉ែត្រជុំវិញរាជធានីភ្នំពេញសុទ្ធ តែមានសក្តានុពលនិងមានការរីកចម្រើន។

ប្រសិនបើយើងក្រឡេកទៅមើលតំបន់ ដែលមានសក្តានុពលជាងគេ ក្នុងរយៈពេល៥ទៅ១០ឆ្នាំក្រោយ លោកសង្គេតឃើញថា តំបន់ធំៗពីរ ដែលលោកមើលឃើញថាមានសក្តានុពល ទី១ ស្ថិតក្នុងតំបន់ប្រលានយន្តហោះថ្មី ដែលស្ថិតក្នុងស្រុកកណ្តាលស្ទឹង ខេត្តកណ្តាល ប៉ែកខាងត្បូងនៃរាជធានីភ្នំពេញ ដែលកំពុងតែទាក់ទាញអ្នកវិនិយោគទាំងនៅក្នុងស្រុកនិងក្រៅស្រុក មកបោះការវិនិយោគនៅក្នុងតំបន់នេះ។

កត្តាដែលបណ្តាលឱ្យតំបន់នេះ មានសក្តានុពលខ្ពស់ ព្រោះមានការអភិវឌ្ឍន៍ប្រលានយន្តហោះថ្មី ដែលជាបណ្តុំពាណិជ្ជកម្ម តំបន់ស្នាក់នៅនិងមានភាពកុះករ ដែលនាំឱ្យមានការអភិវឌ្ឍគ្រប់វិស័យទាំងអស់ ជាពិសេសវិស័យអចលនទ្រព្យ។

ទី២ តំបន់ប៉ែកខាងជើងនៃរាជធានីភ្នំពេញ ដូចជាតំបន់បឹងទំនប់កប់ស្រូវ គឺជាតំបន់ដែលទទួលបានការចាប់អារម្មណ៍ខ្លាំងដែរ ព្រោះតំបន់នេះមិននៅឆ្ងាយពីតំបន់ពាណិជ្ជកម្មនាពេលបច្ចុប្បន្ន ជាក់ស្តែង ផ្សារទំនើបអ៊ីអនម៉ល២ ក្នុងខណ្ឌសែនសុខ ដែលនាំឱ្យដីធ្លីក្នុងខណ្ឌនេះមានការឡើងថ្លៃ រហូតដល់១៥០០ទៅ២០០០ដុល្លាអាមេរិក ក្នុងមួយម៉ែត្រការ៉េតាមដងផ្លូវសំខាន់ៗ។

លោកបន្តថា “ការណ៍នេះបណ្តាលឱ្យតំបន់នេះ មានការរីកដុះដាលយ៉ាងខ្លាំងលើផ្នែក លំនៅដ្ឋានបែបស៊ីវិល័យ អគារខុនដូក៏បាននិងកំពុងតែរីកបណ្តើរៗផងដែរ”។លោកឧកញ៉ាព្យាករណ៍ថា “មិនយូរមិនឆាប់ទេ បឹងតាមោកនិងតំបន់ក្បែរបឹងតាមោក នឹងក្លាយជាតំបន់ពាណិជ្ជកម្មមួយ ឬការស្នាក់នៅយ៉ាងល្អប្រសើរខ្លាំងមែនទែន សម្រាប់ការវិនិយោគក្នុងតំបន់នេះ”។

បន្ថែមលើសនេះ តំបន់មួយទៀតដែលលោកឧកញ៉ាមើលឃើញថា ជាតំបន់មានសក្តានុពលផងដែរនោះគឺតំបន់ផ្លូវលី យ៉ុងផាត់ ដែលមានទីតាំងមិនឆ្ងាយពីបឹងតាមោកនោះទេ និងស្ថិតក្នុងប៉ែកខាងជើង ឆៀងខាងកើតនៃរាជធានីភ្នំពេញ។

លោកជឿជាក់ថា តំបន់នេះមានសក្តានុពល ទាក់ទាញវិនិយោគិនខ្លាំង នឹងក្លាយទៅជាតំបន់អភិវឌ្ឍន៍លំនៅដ្ឋាន យ៉ាងល្អប្រសើរបំផុត ដោយយើងសង្គេតឃើញមាន ស្តាតសម្តេចតេជោហ៊ុនសែន មហាវិថីឈ្នះ ឈ្នះ ការអភិវឌ្ឍបុរី ខុនដូខ្លះៗ។

លោកឧកញ៉ាសំ សុខនឿនបានបញ្ជាក់ថា “តំបន់ពីរនេះ ជាតំបន់ដែលខ្ញុំគិតថា កំពុងតែទាក់ទាញវិនិយោគិន ចូលមកវិនិយោគក្នុងប្រទេសកម្ពុជា។ បើខ្ញុំព្យាករណ៍ ពីឥលូវរហូតដល់១០ ឆ្នាំ តំបន់២នេះនឹងក្លាយជាតំបន់ក្តៅគគុក មានតម្រូវការខ្ពស់”៕