ដោយៈសុខុម

ភ្នំពេញ: ដោយមើលឃើញសក្ដានុពលដ៏ខ្លាំងក្លារបស់កម្ពុជា ប្រកបដោយចក្ខុវិស័យវែងឆ្ងាយ និងមុតស្រួច ក្រុមហ៊ុនចិន លំដាប់យក្ស Prince Holding Group ដែលបានបោះទុនវិនិយោគ ក្នុងទំហំទឹកប្រាក់រហូតដល់១០ពាន់លានដុល្លារអាមេរិក រួចមកហើយនៅកម្ពុជា គ្រោងបោះទុនវិនិយោគបន្ថែមទៀតនៅពេលអនាគតដ៏ខ្លីខាងមុខ។

ទុនវិនិយោគចំនួន១០ពាន់លានដុល្លារអាមេរិកនោះ បានចំណាយលើគម្រោងលំដាប់អន្តរជាតិធំៗចំនួន៤ នៅក្នុងរាជធានីភ្នំពេញ និងខេត្តព្រះសីហនុ។

ក្រុមហ៊ុនចិន មួយនេះមានបុត្រសម្ព័ន្ធជាច្រើននៅកម្ពុជា ដែលធ្វើការផ្តោតលើវិស័យស្នូលចំនួន៣ គឺការអភិវឌ្ឍវិស័យអចលនទ្រព្យ សេវាហិរញ្ញវត្ថុ និងសេវាអតិថិជន។

ក្រុមហ៊ុនបុត្រសម្ព័ន្ធសំខាន់ៗទាំងនោះ រួមមាន ក្រុមហ៊ុន Prince Real Estate Group ក្រុមហ៊ុន Prince Huan Yu Real Estate Group ធនាគារ Prince Bank ក្រុមហ៊ុនអាកាសចរណ៍ Cambodia Airways ក្រុមហ៊ុន Belt Road Capital Management ព្រមទាំងក្រុមហ៊ុន Awesome Global Investment Group ផងដែរ។

តាមរយៈក្រុមហ៊ុនបុត្រសម្ព័ន្ធរបស់ខ្លួន ក្រុមហ៊ុនមេ Prince Holding Group មានអាជីវកម្មជាង៨០ប្រភេទនៅកម្ពុជា ដែលកំពុងប្រតិបត្តិការលើការ អភិវឌ្ឍវិស័យអចលនទ្រព្យ ធនាគារ ហិរញ្ញវត្ថុ អាកាសចរណ៍ ទេសចរណ៍ ភ័ស្តុភារ បច្ចេកវិទ្យា ម្ហូបអាហារ និងភេសជ្ជៈ និងវិស័យមួយចំនួនទៀត។

ដោយមានការប្រើបណ្តាញក្រុមអ្នកជំនាញ ខាងឧស្សាហកម្មធុរកិច្ច និងហិរញ្ញវត្ថុទូទាំងទ្វីបអាស៊ី ក្រុមហ៊ុនមេ Prince Holding Group បានប្តេជ្ញាយ៉ាងមុតមាំចំពោះការអភិវឌ្ឍរយៈពេលវែងរបស់ប្រទេសកម្ពុជា។

ជាតឹកតាង ក្រុមហ៊ុន Prince Holding Group កំពុងអភិវឌ្ឍទីក្រុងរាម ដែលជាគម្រោងទេសចរណ៍ និងលំនៅដ្ឋាននៅលើផ្ទៃដីទំហំប្រមាណ៨៣៤ហិកតា ដែលនឹងក្លាយជាគម្រោងអចលនទ្រព្យ ប្រកបដោយនិរន្តរភាពឈានមុខគេមួយ នៅប្រទេសកម្ពុជា ក្នុងគោលបំណងធានាបាននូវការវិនិយោគ សម្រាប់តំបន់នេះ ក្នុងទំហំវិនិយោគសរុបប្រមាណ១៦ពាន់លានដុល្លារសហរដ្ឋអាមេរិក។

គម្រោងនេះ មានទីតាំងស្ថិតនៅក្នុងចម្ងាយ៨នាទី ពីអាកាសយានដ្ឋានអន្តរជាតិក្រុងព្រះសីហនុ ដែលមានគោលបំណងចូលរួមចំណែក ដល់ការស្តារសេដ្ឋកិច្ចនៅខេត្តព្រះសីហនុ ឡើងវិញ។

ក្រុមហ៊ុន Prince Holding Group នឹងបន្តបោះជំហានទៅមុខ ក្នុងការស្វែងរកឱកាស ដើម្បីដើរតួនាទីយ៉ាងសំខាន់នៅកម្ពុជា តាមរយៈការធ្វើការក្នុងភាពជាដៃគូ ឬការវិនិយោគដោយផ្ទាល់ ក្នុងឧស្សាហកម្មសំខាន់ៗ ដើម្បីនាំមកនូវភាពប្រសើរឡើងសម្រាប់ប្រជាជនកម្ពុជា និងសេដ្ឋកិច្ចក្នុងតំបន់។

ក្រៅពីការពង្រីកអាជីវកម្ម ដើម្បីបង្កើនប្រាក់ចំណេញ ក្រុមហ៊ុន Prince Holding Group ក៏បានបង្កើតមូលនិធិព្រីនស៍ (Prince Foundation) ដើម្បីធ្វើសកម្មភាពមនុស្សធម៌ផងដែរ ដោយបានចំណាយប្រាក់ជាច្រើនលានដុល្លារអាមេរិក ជួយដល់សង្គមកម្ពុជា។

គិតរហូតមកទល់ពេលនេះ មូលនិធិព្រីនស៍ បានរៀបចំសកម្មភាពមនុស្សធម៌ជាង២៥០សកម្មភាព ចែកប្រាក់ និងគ្រឿងបរិក្ខារផ្សេងៗ សរុបជាទឹកប្រាក់ជាង១៤លានដុល្លារអាមេរិក ដើម្បីជួយដល់ពលរដ្ឋខ្មែរ ប្រមាណ ៥០០.០០០នាក់។

មិនតែប៉ុណ្ណោះ ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងយុទ្ធនាការប្រយុទ្ធប្រឆាំងវីរុសកូវីដ-១៩ ក្រុមហ៊ុនក៏បានបរិច្ចាគប្រាក់៣លានដុល្លារអាមេរិក ចំនួន២លើកដើម្បីជួយកម្ពុជាផងដែរ។ លើសពីនេះ ក្រុមហ៊ុនក៏បានផ្ដល់អាហារូបករណ៍ដល់និស្សិតកម្ពុជា ជាច្រើននាក់សម្រាប់រយៈពេល៧ឆ្នាំ ជាមួយនឹងទំហំចំណាយជាង២លានដុល្លារអាមេរិកផងដែរ៕

ដោយៈកុសមា

ភ្នំពេញៈ វិស័យអចលនទ្រព្យនៅកម្ពុជា មានការរីកចំរើនខ្លាំង ដូចនេះអ្នកគួរយល់ដឹង ដើម្បីធ្វើយ៉ាងណាទិញ អោយចំគោលដៅវានឹងអាចហុចផលអោយខ្ពស់ នៃការធ្វើវិនិយោគរបស់លោកអ្នក ដែលអាចទទួលបានប្រាក់ចំនេញច្រើន។

យោងតាម សៀវភៅ “វិថីអចលនទ្រព្យ“ របស់ លោក គាម សៀកឡុងអគ្គនាយកក្រុមហ៊ុន Century21 Dream Property បានអោយដឹងថា ដើម្បីទទួលបានប្រាក់ចំនេញ ខ្ពស់ពីអចលនទ្រព្យ យើងគួរយល់ដឹងពីកត្តាសំខាន់ៗមួយចំនួន។

១ ដឹងពីផែនការមេរបស់រាជរដ្ឋាភិបាល
ព័ត៌មានគឺជាបេះដូងនៃការវិនិយោគ ប្រសិនបើយើងមានប្រភពព័ត៌មាន ដែលគួរ ឲ្យទុកចិត្តបាន ពីផែនការមេរបស់រាជរដ្ឋាភិបាល ឬទីក្រុងរណប ឬគម្រោងអភិវឌ្ឍន៍នានា នោះយើងមានឱកាសមុនគេ នឹងទទួលបានប្រាក់ចំណេញ ពីការវិនិយោគលើអចលនទ្រព្យ ព្រោះថាអចលនទ្រព្យតែងតែឡើងថ្លៃ នៅពេលដែលមានការអភិវឌ្ឍ នៅជុំវិញតំបន់នោះឡើងថ្លៃទី1 នៅពេលប្រកាសគម្រោង ទី2 នៅពេលកំពុងធ្វើ ទី3 នៅពេលធ្វើរួច។

២ ទិញនៅតម្លៃគេលក់បន្ទាន់ឬតម្លៃទាបជាងទីផ្សារ
ក្នុងករណីត្រូវការប្រាក់ ដើម្បីប្រើប្រាស់ជាចាំបាច់ ដូចជាព្យាបាលជំងឺ លែងលះគ្នា រឺទៅរស់នៅបរទេស ត្រូវការប្រាក់ ដើម្បីចាក់ចូលក្នុងអាជីវកម្ម ដែលកំពុងជួបបញ្ហា ឬបញ្ហានានាជាច្រើនទៀត ជាពេលដែលម្ចាស់អចលនទ្រព្យដាក់លក់បន្ទាន់ ក្នុងតម្លៃក្រោមទីផ្សារ។​ ដូចនេះយើងជាអ្នកទិញ នឹងទទួលបានប្រាក់ចំណេញ តាំងពីពេលទិញមកម្លេះ មិនចាំបាច់ទៅរង់ចាំ ឲ្យឡើងថ្លៃនៅពេលលក់ទៅវិញនោះទេ ទិញបានគឺចំណេញរួចទៅហើយ។

៣ ទិញអចលនទ្រព្យកំពុងជួលឬទុកជួល
សម្រាប់អ្នកដែលចង់បាន ចំណូលអកម្មប្រចាំខែ គឺគាត់ទិញជាអាគារឃ្លាំង ឬផ្ទះអាជីវកម្ម ឬផ្ទះសម្រាប់រស់នៅ ឬខុនដូនៅតំបន់ ដែលមានសក្ដានុពលខ្ពស់ ក្នុងការជួលឬទិញពីគម្រោង ដែលមានធានាជួលត្រឡប់ គឺគាត់បានចំណូលអកម្មប្រចាំខេត្តផង ងាយស្រួលក្នុងការទទួលបានប្រាក់កម្ចី ពីធនាគារសម្រាប់ចូលទៅវិនិយោគ លើអចលនទ្រព្យផ្សេងទៀត នឹងអាចលក់អចលនទ្រព្យនោះក្នុងតម្លៃខ្ពស់ផង។

៤ ទិញអចលនទ្រព្យដែលអាចកែលំអថ្មី
នេះក៏ជាជំនាញមួយ របស់អ្នកវិនិយោគ អចលនទ្រព្យផងដែរ គឺគាត់ទិញផ្ទះឬអគារចាស់ៗ ឬនៅទុកចោល​ ដែលមិនទាន់កែលំអរយកទៅកែលម្អថ្មី ហើយលក់ចេញទៅវិញបានចំណេញ ក្នុងរយៈពេលខ្លីមុនវិបត្តិកូវីដ19 មានក្រុមហ៊ុនបរទេសមួយជំនាញខាងទិញផ្ទះចាស់ៗ ដូចជានៅម្ដុំផ្សារចាស់ ផ្សារកណ្ដាល សម្រាប់ជួសជុលនិងដាក់លក់ទៅវិញ។

៥ ទិញពេលគម្រោងបើកលក់ដំបូង
គម្រោងដែលទើប ចាប់ផ្ដើមសម្ភោធ លក់តែងមានការបញ្ចុះតម្លៃពិសេស ជាមួយនឹងលក្ខខណ្ឌ បង់ប្រាក់បត់បែន ដូចនេះជាឱកាសសម្រាប់ យើងជាអ្នកវិនិយោគផងដែរ តែត្រូវជាគម្រោង ដែលអាចជឿទុកចិត្តបាន។

៦ ទិញដើម្បីអភិវឌ្ឍរឺសាងសង់
សម្រាប់អ្នកមានសមត្ថភាព និងមានធនធានគឺពួកគាត់ជ្រើសរើសយក វិនិយោគអចលនទ្រព្យ ដោយការសាងសង់ រឺអភិវឌ្ឍ មិនបានទិញដីទុកឲ្យដីឡើងថ្លៃលក់យកចំណេញទេ គឺគាត់ទិញរួច ធ្វើអោយដីឡើងថ្លៃតែម្ដង តាមរយៈការអភិវឌ្ឍរបស់គាត់ ហើយមហាសេដ្ឋី និងសេដ្ឋីអចលនទ្រព្យជាច្រើន នៅក្នុងប្រទេសកម្ពុជា គឺជាអ្នកអភិវឌ្ឍន៍អចលនទ្រព្យ។ ប្រសិនបើយើងមិនមានសមត្ថភាព ឬលទ្ធភាពបែបនេះទេយើងអាចក្លាយជាអ្នកមានយកមួយរូបនៅក្នុងគម្រោងរបស់គាត់៕

ដោយៈសិរី ជេស៊ីកា

ភ្នំពេញៈ យោងតាមការសិក្សាថ្មីមួយរបស់ក្រុមហ៊ុន CBRE Cambodiaបានរកឃើញថា ទីផ្សារខុនដូបានធ្លាក់ចុះនូវតម្លៃជួល និងតម្លៃលក់ជាមូលដ្ឋានរបស់ខ្លួន។

របាយការណ៍ដែលទើបបានចេញផ្សាយ កាលពីល្ងាចថ្ងៃទី១៣ តុលានេះបានឲ្យដឹងថា ទីផ្សារខុនដូនៅកម្ពុជាក្នុងអំឡុងត្រីមាសទី៣ ឆ្នាំនេះ បានបន្តរងសម្ពាធពីវិបត្តិកូវីដ១៩ ដោយតម្លៃលក់ និងតម្លៃជួបធ្លាក់ចុះគួរឱ្យកាត់សម្គាល់បើធៀបនឹងត្រីមាសមុន។

យោងតាមរបាយការណ៍របស់ CBRE Cambodia បានឲ្យដឹងទៀតថា តម្លៃលក់បាន​ធ្លាក់ចុះ១,៨ភាគរយ ៣ភាករយ ២,១ភាគរយរៀងៗគ្នា សម្រាប់ខុនដូប្រភេទតម្លៃសមរម្យ ប្រភេទមធ្យម និងលំដាប់ខ្ពស់។ ទន្ទឹមនឹងនេះ តម្លៃជួលក៏បានធ្លាក់ចុះចន្លោះពី៧,៨ភាគរយ និង៥,៦ភាគរយរៀងៗគ្នា ដែលសម្រាប់ប្រភេទខុនដូទាំង៣ខាងលើ។

ការផ្គត់ផ្គង់លើសតម្រូវការ ការសាងសង់ចប់ក្រោយផែនការ និងកង្វះអ្នកទិញបរទេស នៅតែជា៣កត្តាធំៗ ទាញទីផ្សារខុនដូនៅកម្ពុជាឱ្យមាននិន្នាការធ្លាក់ចុះ។

ក្នុងកំឡុងត្រីមាសទី៣ មានការបញ្ចប់គម្រោងថ្មីចំនួន២ និងបើកលក់គម្រោងថ្មីចំនួន២ ដែលធ្វើឱ្យការផ្គត់ផ្គត់សរុបមានដល់ជាង ៣០,០០០យូនីត កើន៥,៦ភាគរយ បើធៀបនឹងត្រីមាសមុន។ នៅចុងឆ្នាំ ២០២១ ការផ្គត់ផ្គង់គឺអាចឈានដល់៣៥,០០០ យូនីត ប៉ុន្តែគម្រោងខ្លះនឹងត្រូវពន្យារពេល។

គម្រោងធំៗចំនួន២ ដែលត្រូវបានបញ្ចប់ការសាងសង់គឺ The Peak និង The Gateway ដោយបន្ថែមចំនួន១.៥៨៦ យូនីតទៅការផ្គត់ផ្គង់ខុនដូលំដាប់ខ្ពស់។ ទន្ទឹមនឹងនេះ គម្រោងដែលបើកលក់ថ្មីគឺ គម្រោង Odom Tower និងគម្រោង Residence H Sen Sok ដោយគម្រោងទាំងពីរនឹងត្រូវបញ្ចប់នៅឆ្នាំ ២០២៤។

អ្នកជំនាញផ្នែកទីផ្សារខុនដូលោកខន គង្គាអគ្គនាយកក្រុមហ៊ុនERA Cambodiaបានលើកទឹកចិត្តដល់អ្នកវិនិយោគ គួរវិនិយោគអំឡុងពេលនេះ ដោយលោកបានមានប្រសាសន៍ថា ការវិនិយោគខុនដូនាពេលនេះ ទទួលបានផលចំណេញច្រើន ព្រោះអ្នកអភិវឌ្ឍន៍បានធ្វើការបញ្ចុះតម្លៃ ហើយអតិថិជនមានអាទិភាពច្រើនក្នុងការចចារ។

លោកបន្តថា “វាជាឱកាសមាស ដែលពេលវេលាបែបនេះ១០ឆ្នាំមានតែម្តងប៉ុណ្ណោះ”៕

ដោយៈ សុផារី

ភ្នំពេញៈ ការទិញលក់លំនៅដ្ឋានក្នុងក្រុងភ្នំពេញ បានចាប់ផ្តើមមានសញ្ញាល្អប្រ​សើរឡើងវិញ រាប់ចាប់តាំងពីខែទី៦ រហូតដល់ត្រីមាសទី៣ ឆ្នាំ២០២១ ដោយសង្គេតឃើញថា មានគម្រោងថ្មីចំនួន២២ បើកដំណើរការក្នុងកំឡុងពេលនេះ។

ទោះយ៉ាងណាក៏ដោយ មានការកើនឡើងនៃការប្រកួតប្រជែងយ៉ាងខ្លាំង ដែលអាចបង្កើនហានិភ័យនៅក្នុងវិស័យនេះ ជាពិសេសសម្រាប់វិនិយោគ ដែលមានអានុភាពខ្ពស់។ នេះបើយោងតាមរបាយការណ៍របស់ CBRE Cambodia នៅថ្ងៃទី ១៤ ខែតុលានេះ។

របាយការណ៍របស់ CBRE Cambodia បានឱ្យដឹងថា នៅក្នុងត្រីមាសទី៣ ឆ្នាំ២០២១នេះ ការផ្គត់ផ្គង់អចលនទ្រព្យសរុប មានចំនួន៩២,៩៦២ ឯកតា ដែលកើនឡើង ០.៥% បើធៀបនឹងត្រីមាសទី២ ឆ្នាំ២០២១។ នាចុងឆ្នាំនេះ មានការរំពឹងថានឹងកើនឡើងដល់ រហូតដល់៩៨,២៦១ឯកតា ។ ខណៈមើលឃើញថា ទីផ្សារអចលនទ្រព្យនៅតែមានភាពទាក់ទាញ ជាពិសេសក្នុងចំណោមអ្នកវិនិយោគ ដែលកំពុងស្វែងរកប្រាក់ចំណេញ។

នៅក្នុងត្រីមាសទី៣ ឆ្នាំ២០២១នេះ សម្បូរទៅដោយការសម្ភោធគម្រោង ដែលមានតម្លៃមធ្យមនិងតម្លៃសមរម្យ ដែលឆ្លុះបញ្ចាំងពីតម្រូវការក្នុងស្រុកភាគច្រើ ស្របពេលដែលវិនិយោគកំពុងរង់ចាំឱ្យកូវីដ ១៩ ធូរស្បើយឡើងវិញ។
តាមរបាយការណ៍ដដែលនេះបានឱ្យដឹងថា គេរំពឹងថានិន្នាការអភិវឌ្ឍនេះ នឹងបន្តរហូតដល់ឆ្នាំ២០២២។

អាស្រ័យលើឱកាសផលិតភាពនិងទីតាំង លំនៅដ្ឋានធម្មតាក្នុងមួយឯកតា មានតម្លៃចាប់ពី ១២៧,៧៦៦ ដុល្លារទៅ ២៥៦,៤០៤ ដុល្លារ។ វីឡាទោលមានតម្លៃជាមធ្យមខ្ពស់ជាង៥៥៧,៥៩៩ដុល្លារក្នុងមួយឯកតា ដែលនេះឆ្លុះបញ្ចាំងពីកម្លាំងទិញរបស់អ្នកមាននៅក្នុងក្រុងភ្នំពេញ៕

ដោយៈស៊ីវ ម៉េង

ភ្នំពេញៈ ក្រុមហ៊ុនលំដាប់យក្សក្នុងស្រុក OCIC បាននិងកំពុងវិនិយោគទីក្រុងរណបធំៗចំនួនបី ដែលស្ថិតនៅចំណុចសំខាន់បំផុតនៃរាជធានីភ្នំពេញ ដែលជាទីក្រុងមានភាព​រីកចម្រើនយ៉ាងឆាប់រហ័ស។

ក្នុងចំណោមទីក្រុងរណបទាំងបី ទីក្រុងទី១ បានលេចចេញជារូបរាង និងមានសកម្មភាពពាណិជ្ជកម្ម ខណៈគំរោងទី២ បាននិងកំពុងចាប់ផ្តើមសកម្មភាពអភិវឌ្ឍន៍ជាបន្តបន្ទាប់ផងដែរ ចំណែកទីក្រុងរណបទី៣ កំពុងកសាហហេដ្ឋារចនាសម្ព័ន្ឋរបស់ខ្លួន។

ទីក្រុងកោះពេជ្រ
​​​ទីក្រុងកោះពេជ្របាន និងកំពុងបន្តរីកចម្រើន ដោយបច្ចុប្បន្ន ទីក្រុងនេះបានលេចឡើងជាទីក្រុងស៊ីវិល័យមួយ ដោយមានទាំងមជ្ឈមណ្ឌលពាណិជ្ជកម្ម លំនៅដ្ឋានសហកម្មសិទ្ឋ ឬខុនដូ អាផាតម៉ិន សាលសន្និសីទ សាលារៀនអន្តរជាតិ ភោជនីយដ្ឋានជាតិ និងអន្តរជាតិជាដើម។

ប៉ុន្តែផ្ទៃក្រឡារបស់កោះ ដែលមានទំហំជាង១០០ហិកតានេះ បាននិងកំពុងប្រើប្រាស់អស់៥០ភាគរយប៉ុណ្ណោះ ខណៈការអភិវឌ្ឍនៅតែបន្ត ហើយទីក្រុងនេះនឹងមានផ្លូវថ្មើជើង និងផ្សាររាត្រព័ទ្ឋជុំវិញនាពេលអនាគត។

បើតាមលោកទូច សំណាងអគ្គនាយករងក្រុមហ៊ុន OCIC បានឲ្យដឹងថា នាពេលអនាគតសាលពិព៌ណ និងសន្និបាតកោះពេជ្រ នឹងរើ​ចេញទៅកាន់ទីក្រុងរណបជ្រោយចង្វារ ប៉ុន្តែបច្ចុប្បន្នស្ថិតនៅក្នុងការសិក្សានៅឡើយទេ។

ទីក្រុងរណបជ្រោយចង្វារ
“ទីក្រុងនៃអនាគត” ជាពាក្យស្លោករបស់ទីក្រុង ដែលមានទំហំជាង១០០ហិកតានេះ ទីក្រុងនេះផែនការដំបូងឡើយ គ្រោងវិនិយោគទឹកប្រាក់តែ២៦០០លានដុល្លារប៉ុណ្ណោះ ប៉ុន្តែក្រោយមកត្រូវបានរៀបចំផែនការពង្រីក រហូតដល់ទំហំ៦០០០លានដុល្លា​រអាមេរិក។

បច្ចុប្បន្នទីក្រុងរណប ដែលមានភូមិសាស្រ្តដ៏ទាក់ទាញ ដោយមានទន្លេនៅព័ទ្ឋជុំវិញនេះ កំពុងមានសកម្មភាពរសរវើកបណ្តើរៗហើយទាំងពេលថ្ងៃ និងពេលរាត្រី ជាមួយសួនកំសាន្តដាយនូស័រ ហាងអាហារ ភោជនីយដ្ឋាន ផ្សារពាក់កណ្តាលទំនើប ហាងលក់សម្លៀកបំពាក់ កន្លែងលក់រថយន្តជាដើម។

បើតាមលោកទូច សំណាងបានឲ្យដឹងថា ក្រុមហ៊ុនបានរៀបចំទីក្រុងនេះ ជាទីក្រុងឆ្លាតវៃមួយ ដែលបំពេញនូវលក្ខខ័ណ្ឌពិសេសៗជាច្រើន ដូចជា បែងចែករវាងប្រព័ន្ឋទឹកលូ និងទឹកភ្លៀងដាច់ពីគ្នា បំពាក់អំពូល LED បង្កើតតំបន់បៃតងជាដើម។

បច្ចុប្បន្នទីក្រុងនេះ កំពុងសាងសង់ស្ពានយោង ដោយខ្សែកាបដ៏ស្រស់ស្អាតមកកាន់ផ្លូវជាតិលេខ៥ ដែលបច្ចុប្បន្នការសាងសង់សម្រេចបាន ប្រមាណ៥០ភាគរយហើយ។

ទីក្រុងរណបកោះនរា
ទីក្រុងនេះចាប់ផ្តើមប្រតិស្ថានបណ្តើរហើយ ខណៈការចាក់ដីបំពេញនឹងបញ្ចប់នៅចុងឆ្នាំនេះ ដោយចំណាយទុនរហូតដល់២៥០០លានដុល្លារអាមេរិក បើបូកទាំងហេដ្ឋារចនាសម្ព័ន្ឋដូចជា ស្ពាន បណ្តាញទឹកស្អាត អគ្គិសនី និងបណ្តាញផ្លូវគមនាគមន៍។

តាមផែនការទីក្រុង ដែលមានទំហំ១២៥ហិកតានេះ នឹងសាងសង់អាគារកប់ពពក​មួយនាពេលឆាប់ៗខាងមុខនេះ ខណៈរូបរាងរបស់អាគារនេះបានបង្ហាញរួចហើយ ដោយគេហទំព័រ Propertyarea.asia ជាគេហទំព័រព៌តមានឈានមុខគេនៅកម្ពុជា។

លោកទូច សំណាង បានមានប្រសាសន៍ឲ្យដឹងថា តាមផែនការទីក្រុងនេះ នឹងរៀបចំទស្សនទាន នៃការអភិវឌ្ឍស្រដៀងគ្នា នឹងទីក្រុងកោះពេជ្របច្ចុប្បន្ន ខណៈហេដ្ឋារចនាសម្ព័ន្ឋ ពិសេសស្ពានតភ្ជាប់ពីទីក្រុងកោះពេជ្រ ទៅកាន់ទីក្រុងកោះនរា និងស្ពានចេញពីទីក្រុងនេះ តភ្ជាប់ជាមួយផ្លូវជាតិលេខ១ សម្រេចបានប្រមាណ២០ភាគរយហើយ។

លោកបន្តថា ទោះជាយ៉ាងណាក៏ដោយការរីករាលដាលជំងឺកូវីដ១៩ នៅកម្ពុជា ក៏ដូចជាទូទាំងសកលលោក បាននិងកំពុងធ្វើឲ្យល្បឿន និងផែនការកសាងទីក្រុងរណបនេះ មានដំណើ​រកាយយឺតយ៉ាវជាងមុន។ លោកបន្តថា បច្ចុប្បន្នក្រុមហ៊ុនកំពុងរៀបចំសាងសង់មជ្ឈមណ្ឌលពាណិជ្ជកម្មជាលើកដំបូង ដែលបោះទុនវិនិយោគប្រមាណ៣០លាន​ដុល្លារអាមេរិក នៅលើទីក្រុងកោះនរាផងដែរ។

លោកទូច សំណាងបានបន្តឲ្យដឹងថា “ទោះជាសកម្មភាពសាងសង់យឺតយ៉ាវ ប៉ុន្តែយើងនៅតែឆ្ពោះទៅមុខ”៕