ដោយៈ វឌ្ឍនៈ

ភ្នំពេញៈ សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃកម្ពុជាបានបញ្ជាឱ្យអ្នកពាក់ព័ន្ធ ផ្អាកការធ្វើតេស្តរហ័សទៅលើពលរដ្ឋទូទាំងប្រទេស ដែលមិនមានការសង្ស័យពីជំងឺកូវីដ១៩។

ការធ្វើតេស្តរហ័សនេះ គឺចាំបាច់ធ្វើតែតំបន់ណា ដែលមានហានិភ័យនិងទៅលើពលរដ្ឋ ដែលមានការសង្ស័យរួចហើយ ត្រូវធ្វើការផ្ទៀងផ្ទាត់ជាមួយនឹងម៉ាស៊ីន PCR ទើបដឹងច្បាស់ពីលទ្ធផល។

សម្ដេចតេជោបានថ្លែងតាមសារអេឡិចត្រូនិកឱ្យដឹងទៀតថា ការធ្វើតេស្តរហ័សទៅលើមនុស្សទូទៅ គឺមិនអាចរៀនរស់ជាមួយកូវីដ១៩បានទេ ពីព្រោះផ្ដាសាយធម្មតាក៏ធ្វើតេស្តទៅឃើញវិជ្ជមាន ក្នុងពេលប្រជាជនអត់មានឈឺអីទាំងអស់ ដូច្នេះបើអ្នកមិនមានការសង្ស័យទៅលើកូវីដ១៩ មិនចាំបាច់ធ្វើតេស្តរហ័សជូនពួកគាត់ទេ ពីព្រោះបើធ្វើបែបនេះជាប្រចាំវាខ្ទេចច្រមុះអស់ហើយ។

សម្ដេចបន្តថា “នៅប្រទេសវៀតណាមគេធ្វើតេស្តរហ័ស ឃើញដល់ទៅ១៥ម៉ឺននាក់ តែគេអត់បូកបញ្ចូលទៅក្នុងបញ្ជីទេ”។

សម្ដេចតេជោបានបន្ថែមថា យើងមិនបោះបង់ការធ្វើតេស្តរហ័សទេ ប៉ុន្តែមិនមានសុខៗ ទៅឃ្លុំបេភូមិមួយហើយយកប្រជាជនមួយភូមិនោះ មកធ្វើតេស្តរហ័សនោះទេ យើងធ្វើតេស្តរហ័សចំពោះតែជន ដែលមានការសង្ស័យ ហើយបើសិនជាតេស្តឃើញនិងមានអាការស្រាលសូមជូនថ្នាំ ឱ្យគាត់និងយកសំណាក់ទៅផ្ទៀងផ្ទាត់ជាមួយម៉ាស៊ីនធំ។

សម្ដេចបន្តថា “សូមឈប់គិតតែរុកច្រមុះ រុកបំពង់ករួចហើយជូនថ្នាំឱ្យលេប ក្នុងពេ​លមនុស្សអត់មានឈឺអីសោះ អញ្ចឹងសូមផ្អាកពីរឿងរុកច្រមុះរុកបំពង់កនេះទៀតទៅ”។

សម្ដេចបន្ថែមថា ដំណើរឆ្ពោះទៅរកការបើកប្រទេសឡើងវិញ បើកសេដ្ឋកិច្ចឡើងវិញក៏ដូចជាការរៀនរស់នៅជាមួយកូវីដ១៩ ទើបយើងអាចដោះស្រាយបញ្ហាបាន បើមិនអញ្ចឹងគឺថាតិចៗបិទភូមិ បិទឃុំ ក្នុងពេលដែលគាត់មិនមានជំងឺ ដូច្នេះសូមស្នើឱ្យខេត្តនានាបញ្ឈប់ការរុករកនៅតាមភូមិ តាមឃុំ ដោយការធ្វើតេស្តរហ័ស ប៉ុន្តែ យើងនឹងធ្វើតេស្តរហ័ស នៅពេលដែលគាត់សង្ស័យខ្លួនគាត់ថាមានជំងឺនេះ និងស្មគ្រចិត្តមកធ្វើនៅទីតាំងដែលប្រចាំការ។

សម្ដេចបបញ្ជាក់ថា យើងត្រូវយកចិត្តទុកដាក់សំខាន់បំផុត ទៅលើការកត្តាមួយចំនួនដូចជាបើសិនជាមានរោគសញ្ញាកើតឡើង យើងត្រូវធ្វើតេស្តឱ្យគាត់និងព្យាបាល      ឱ្យគាត់ ហើយបើសិនជាមានជំងឺធ្ងន់ គឺរុញគាត់ចូលមន្ទីរ ដែលមានលក្ខណៈសម្បត្តិគ្រប់គ្រាន់ជួយសង្គ្រោះជីវិតគាត់។

សម្ដេចបន្តថា “យើងមានវ៉ាក់សាំងហើយសម្រាប់ចាក់ជូនពួកគាត់ ហើយពួកគាត់ក៏បានស្រែកថា គិតតែពីរុកច្រមុះទាំងដែលពួកគាត់អត់មានអាការៈអ្វីសោះ ដូច្នេះសូមផ្អាកចាប់ពីពេលនេះតទៅ”៕

ដោយៈសុខុម

ប៊ែកឡាំង: ដោយឃើញក្រុមហ៊ុនផលិតរថយន្តនានា ទូទាំងពិភពលោកសម្រុកងាកមកផលិតរថយន្តអគ្គិសនី យ៉ាងផុសផុសនៅមួយរយៈពេលចុងក្រោយនេះ ស្រាប់តែធ្លាយដំណឹងថា ក្រុមហ៊ុនផលិតរថយន្តប្រណីតលំដាប់សេដ្ឋី Rolls-Royce គ្រោងងាកមកផលិតរថយន្តអគ្គិសនីដូចគេដែរ។

ក្រុមហ៊ុនអង់គ្លេស Rolls-Royce បានប្រកាសកាលពីថ្ងៃពុធ ទី២៩ កញ្ញា ថា ខ្លួននឹងងាកមកផលិតរថយន្តអគ្គិសនី ទាំងស្រុងនៅត្រឹមឆ្នាំ២០៣០ ជាពិសេសក្រោយពីម៉ាកយីហោរថយន្តប្រណីតៗដូចជា Bentley របស់ក្រុមហ៊ុនអាល្លឺម៉ង់ Volkswagen និង Land Rover របស់ក្រុមហ៊ុនអង់គ្លេស Jaguar ត្រូវបានអភិវឌ្ឍទៅជារថយន្តអគ្គិសនី។

Rolls-Royce ដែលជាបុត្រសម្ព័ន្ធផ្ដាច់មុខរបស់ក្រុមហ៊ុន ផលិតរថយន្តអាល្លឺម៉ង់ BMW បានចេញសេចក្តីថ្លែងការណ៍ថា រថយន្តដំណើរការដោយថាមពលអគ្គិសនីសុទ្ធសាធដំបូងបង្អស់របស់ខ្លួន ដែលមានឈ្មោះថា Spectre នឹងមានដាក់លក់លើទីផ្សារនៅត្រីមាសទី៤ ឆ្នាំ២០២៣ ហើយការធ្វើតេស្តសាកល្បងនឹងចាប់ផ្តើមក្នុងពេលឆាប់ៗនេះ។

លោក Torsten Muller-Otvos នាយកប្រតិបត្តិក្រុមហ៊ុន Rolls-Royce បានបញ្ជាក់ថា ផលិតផលរថយន្ត Spectre គឺជាការចាប់ផ្ដើមរបស់ក្រុមហ៊ុនលោក ឆ្ពោះទៅកាន់ការផលិតរថយន្តអគ្គិសនីទាំងស្រុងនៅត្រឹមឆ្នាំ២០៣០។

ទោះជាយ៉ាងណា ក្រុមហ៊ុន BMW មិនបានកំណត់កាលបរិច្ឆេទបញ្ចប់ការផលិតរថយន្តដែលដំណើរការដោយឥន្ធនៈហ្វូស៊ីលនៅឡើយទេ។ ផ្ទុយមកវិញ ក្រុមហ៊ុននេះបានកំណត់គោលដៅផលិត រថយន្តអគ្គិសនីឱ្យបាន៥០%នៅត្រឹមឆ្នាំ២០៣០ ប៉ុន្តែក្រុមហ៊ុន Mini ដែលជាបុត្រសម្ព័ន្ធមួយរបស់ខ្លួនដែរនោះ បានប្រកាសកាលពីខែមីនាថា ខ្លួននឹងងាកមកផលិតរថយន្តអគ្គិសនីទាំងស្រុង នៅត្រឹមដំណាច់ទសវត្សរ៍នេះ។

ទន្ទឹមនេះ ម៉ាកយីហោ Land Rover របស់ Jaguar នឹងត្រូវអភិវឌ្ឍទៅជារថយន្តអគ្គិសនីទាំងស្រុង នៅត្រឹមឆ្នាំ២០២៥ ម៉ាកយីហោ Bentley របស់ Volkswagen នៅត្រឹមឆ្នាំ២០៣០ ហើយម៉ាកយីហោ Mercedes Benz របស់ក្រុមហ៊ុនអាល្លឺម៉ង់ Daimler នៅឆ្នាំ២០៣០ ប្រសិនបើស្ថានភាពទីផ្សារអំណោយផល៕ Reuters៕

ដោយៈសុជាតា

កម្ពុជាៈ កម្ពុជាបាននិងកំពុងបន្តក្លាយជាមូលដ្ឋានចែកចាយទំនិញ និងផលិតផលចំណីអាហាររបស់ប្រទេសថៃ កាន់តែសម្បូរបែប ជាក់ស្តែងនៅឆ្នាំ២០២១នេះ ទោះមានវិបត្តិកូវីដ ប៉ុន្តែក្រុមហ៊ុនលក់រាយជាច្រើនរបស់ថៃ បានហក់ចូលមកកាន់ទីផ្សារកម្ពុជា។

ក្រុមហ៊ុនលក់រាយដ៏ល្បីល្បាញរបស់ថៃ ដួចជា 7-Eleven, Mini Big C, និងក្រុមហ៊ុនលក់រាយធំៗមួយចំនួនទៀត បាននិងកំពុងចាប់យកឱកាស ពង្រីកពាណិជ្ជកម្មនៅកម្ពុជា។

យោងតាមព៍ត៌មាន Bangkok Post បានលើកឡើងថា ទីផ្សារនាំចេញដ៏សំខាន់ទាក់ទងនឹងវិស័យម្ហូបអាហារ សម្រាប់ប្រទេសថៃនៅឆ្នាំ ២០២១ គឺប្រទេសសហរដ្ឋអាមេរិច ប្រទេសជប៉ុន ប្រទេសកម្ពុជា និងប្រទេសចិនជាដើម។

វិស័យនេះ រំពឹងរក្សាកំណើននាំចេញប្រមាណ៣ ទៅ៥ភាគរយនៅឆ្នាំនេះ ដោយ សារតែភាពប្រសើរឡើង នៃសេដ្ឋកិច្ចដៃគូពាណិជ្ជកម្ម ការចុះខ្សោយនៃលុយបាត និងការរីកចំរើននៃការចាក់វាក់សាំង។

លោក Visit Limlurcha ប្រធានសមាគមម្ហូបអាហារថៃបាននិយាយថា សមាគមមានសុទិដ្ឋនិយមថា ការនាំចេញម្ហូបអាហារនឹងកំនើននៅអត្រា៣ ទៅ៥ភាគយ ធៀបនឹងទំហំនាំចេញសរុប១ ទ្រីលានបាតកាលពីឆ្នាំមុន។
កាលពីឆ្នាំ២០២០ ការនាំចេញម្ហូបអាហារបានធ្លាក់ចុះពី១ភាគរយផងដែរ ដោយ​សារវិបត្តិសេដ្ឋកិច្ចសកល។

យោងរបាយការណ៍របស់សមាគមដដែលបានលើកឡើងថា នៅរយៈពេលប្រាំបីឆ្នាំ២០២១នេះបានបង្ហាញថា ការនាំចេញខាងវិស័យម្ហូបអាហារ បានកើនឡើង៨ភាគរយ ដែលមានទឹកប្រាក់ប្រមាណ៨០៦ពាន់លានបាត។ ផលិតផលម្ហូបអាហារទាក់ទងកសិកមម្ម មានចំនែក៥៣ភាគរយ ដែលមានទឹកប្រាក់ប្រមាណ៤២៥ពាន់លានបាត។

ចំនែកផលិតផលកសិឧស្សហកម្ម តំណាងអោយ៤៧ភាគរយ ពោលគឺបង្កើនប្រាក់ចំណូល ៣៨១ពាន់លានបាតផងដែរ។

លោក Visit បាននិយាយថា ការនាំចេញម្ហូបអាហារ នៅតែប្រឈមមុខនឹងបញ្ហាជាច្រើន ដូចជា ការបន្តរាលត្បាតនៃមេរោគកូវីត ១៩ កង្វះការដឹកជញ្ចូនតាមទូកុងត័ន័រ ការកើនឡើងនៃតម្លៃវេចខ្ចប់ ជាពិសេសទាកទងកង្វះពលករផងដែរ។

ទន្ទឹមនឹងនោះដែរ រដ្ឋមន្រ្តីក្រសួងពាណិជ្ជកម្ម លោកJurin laksnanwisit បាននិយាយកាលពីថ្ងៃច័ន្ទថា ពិព័រណ៍ពាណិជ្ជកម្មដែលមានឈ្មោះថា Thaifex នៅឆ្នាំ ២០២១ ដែលចាប់ផ្តើមពីថ្ងៃនេះ រហូតដល់ថ្ងៃទី៣ ខែតុលា នឹងរំពឹងថាជួយពង្រឹងតម្លៃពាណិជ្ជកម្ម យ៉ាងហោចណាស់ប្រមាណ៨៣០លានបាតផងដែរ៕

ដោយៈគង់ សូរិយា

ភ្នំពេញៈ តើភស្តុភារកម្មបៃតងគឺជាអ្វី? ខណៈដែលអ្នកជំនាញ នៃទីភ្នាក់ងារសហប្រតិបត្តិការប្រទេសជប៉ុន បាននិងកំពុងជម្រុញការលើកកំពស់វិស័យនេះ ជាមួយរាជរដ្ឋាភិបាលកម្ពុជា។

ភស្តុភារកម្មបៃតង គឺផ្តោតសំខាន់ទៅលើស្ថេរភាពរបស់ភស្តុភារកម្ម ដែលជាស្នូលនៃប្រតិបត្តិការប្រព័ន្ធដឹកជញ្ជូនទំនើប និងការគ្រប់គ្រងលើបំលាស់ទីនៃការដឹកជញ្ជូន ជាមួយនឹងការធានាបាននូវធាតុផ្សំទាំងបីគឺ សេដ្ឋកិច្ច សង្គមកិច្ច និងបរិស្ថាន។

ជាមួយនឹងការយកចិត្តទុកដាក់លើបញ្ហានេះ រដ្ឋលេខាធិការក្រសួងសាធារណៈការ និងដឹកជញ្ជូន លោកជំទាវកុយ សុដានី ដឹកនាំកិច្ចប្រជុំស្តីពី ការពិនិត្យមើលឡើងវិញ នូវវឌ្ឍនភាពនៃការអនុវត្តគម្រោងធ្វើ ឱ្យប្រសើរឡើងនូវប្រព័ន្ធភស្តុភារកម្មកម្ពុជា របស់ក្រុមប្រតិបត្តិការងារ នៃគណៈកម្មការគ្រប់គ្រងគម្រោង (PMU)។

ការអនុវត្តគម្រោងធ្វើឱ្យប្រសើរឡើង នូវប្រព័ន្ធភស្តុភារកម្មកម្ពុជា របស់ក្រុមប្រតិ​បត្តិការងារ នៃគណៈកម្មការគ្រប់គ្រងគម្រោង (PMU) ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយ ពីថ្នាក់ដឹកនាំក្រសួងទទួលបន្ទុក ក្រុមជំនាញការនៃទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) និងក្រុមទីប្រឹក្សាជាតិនៃគម្រោងផងដែរ។

អង្គប្រជុំបានពិភាក្សាលើវឌ្ឍនភាពសកម្មភាពការងារ ក្នុងរយៈពេលមួយខែកន្លងមករបស់ក្រុមការងារភស្តុភារកម្មបៃតង (Green Logistics) ក្រុមការងារទទួលបន្ទុកមណ្ឌលភស្ដុភារកម្មប្រចាំតំបន់ (Regional Logistics Hub) ក្រុមការងារដឹកជញ្ជូនខ្សែសង្វាក់ត្រជាក់ (Cold Chain) ក្រុមការងារទំនើបកម្មរថយន្ដដឹកទំនិញ (Truck Modernization) ក្រុមការងារពិនិត្យតាមដាន និងវាយតម្លៃលើការអនុវត្តគម្រោង ក្រុមការងារសិក្សាចំពោះបណ្ដាញដឹកជញ្ជូនតាមព្រំដែន (Border Improvement) និងលទ្ធផលនៃការចុះអង្កេតនៅតំបន់ប៉ោយប៉ែត។

ថ្លែងទៅអង្គប្រជុំនាឱកាសនោះ លោកជំទាវរដ្ឋលេខាធិការ បានគូសបញ្ជាក់អំពីវ ឌ្ឃនភាពការងារសំខាន់ៗ នៃការអនុវត្តគម្រោងធ្វើឱ្យប្រសើរឡើង នូវប្រព័ន្ធភស្តុភារកម្មកម្ពុជារបស់ក្រុមប្រតិបត្តិការងារ នៃគណៈកម្មការគ្រប់គ្រងគម្រោង និងបានថ្លែងអំណរគុណយ៉ាងជ្រាលជ្រៅដល់ក្រុមជំនាញការជប៉ុន និងក្រុមការងាររបស់ក្រសួងសាធារណការ និងដឹកជញ្ជូន ដែលបានសហការគ្នាល្អ ក៏ដូចជាដែលបានខិតខំប្រឹងប្រែង បំពេញការងារប្រកដោយការទទួលខុសត្រូវខ្ពស់ ដើម្បីលើកកម្ពស់វិស័យដឹកជញ្ជូន និងភស្ដុភារកម្មនៅកម្ពុជាឱ្យមានភាពប្រទាក់ក្រឡាគ្នា ប្រកបដោយភាពប្រកួតប្រជែង និងចីរភាព។

ជាមួយគ្នានេះ លោកជំទាវ បានជំរុញលើកទឹកចិត្តឱ្យក្រុមការងារពាក់ព័ន្ធពិនិត្យកែសម្រួល និងពន្លឿនការរៀបចំគោលនយោបាយ និងផែនការយុទ្ធសាស្ត្រនានាដែលត្រូវបង្កើតនៅក្នុងគម្រោងនេះ ដើម្បីដាក់ជូនថ្នាក់ដឹកនាំក្រសួងពិនិត្យសម្រេច សំដៅធ្វើយ៉ាងណាឱ្យគោលនយោបាយ ផែនការយុទ្ធសាស្ត្រទាំងនោះ មានលក្ខណៈសមស្រប និងអាចអនុវត្តបានទៅតាមស្ថានភាពជាក់ស្តែង នាពេលអនាគតរបស់ក្រសួង និងស្ថាប័នពាក់ព័ន្ធ និងធានាបាននូវផលប្រយោជន៍របស់ភាគីពាក់ព័ន្ធ៕

        ដោយៈ សិរី ជេស៊ីកា

        ភ្នំពេញៈ មន្រ្តីជាន់ខ្ពស់នៃគណកម្មាធិការអូឡាំពិកកម្ពុជា បានលើកលើកឡើងថា រដ្ឋាភិបាលគ្រោង បើកសម្ភោធឲ្យប្រើប្រាស់ជាផ្លូវការ នូវវិមានពហុកីឡដ្ឋានមរតកតេជោ នៅចុងខែវិច្ឆិកានេះ។

មានប្រសាសន៍ក្នុងកិច្ចប្រជុំប្រចាំសប្តាហ៍របស់គណៈកម្មាធិការរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) លោកថោង ខុនប្រធានគណកម្មាធិការអូរឡាំពិកម្ពុជា និងជារដ្ឋមន្រ្តីក្រសួងទេសចរណ៍ បានលើកឡើងពីផែនការនេះ។

លោកបានពិភាក្សាអំពីផែនការ នៃការរៀបចំសម្ភោធជាផ្លូវការនៃកីឡដ្ឋាននេះឱ្យមានភាពអធឹកអធម និងអស្ចារ្យបំផុត ឱ្យសមទៅនឹងគុណតម្លៃនៃសមិទ្ធិផលជាប្រវត្តិ​សាស្រ្តនេះ ក៏ដូចជាបង្ហាញនូវចំណងមិត្តភាពដែកថែប នៃព្រះរាជាណាចក្រកម្ពុជា និងសាធារណរដ្ឋប្រជាមានិតចិន។

បើតាមការឱ្យដឹងនៅក្នុងកិច្ចប្រជុំនោះ ពិធីសម្ភោធដាក់ឱ្យប្រើប្រាស់ជាផ្លូវការ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិ CAMSOC បានឱ្យដឹងថា ពិធីសម្ភោធដាក់ឱ្យប្រើប្រាស់ជាផ្លូវការនេះ កំពុងស្ថិតក្នុងដំណាក់កាលសំណើរសុំការអនុញ្ញាតពីប្រមុខរាជរដ្ឋាភិបាល ត្បិតពិធីនេះក៏នឹងមានការប្រកួតជាលក្ខណៈមិត្តភាពនៃប្រភេទកីឡាណាមួយ រវាងកម្ពុជា និងចិនសម្រាប់ជាសក្ខីភាពផងដែរ។

ពហុកីឡដ្ឋានជាតិមរតកតេជោ បានប្រារព្ធពិធីប្រគល់ទទួលកាលពីថ្ងៃទី១២ ខែកញ្ញា ឆ្នាំ២០២១កន្លងទៅ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តី និងឯកឧត្តម វ៉ាង យី ទិប្រឹក្សារដ្ឋ និងជារដ្ឋមន្រ្តីការបរទេស បន្ទាប់ពីសំណង់ដ៏ប្រណិតនេះបានបញ្ចប់ការសាងសង់់ជាផ្លូវការ ក្នុងតម្លៃប្រមាណ ១៦០លានដុល្លារអាមេរិក ដែលជាជំនួយឥតសំណងនៃរដ្ឋាភិបាល និងប្រជាជននៃសាធារណរដ្ឋប្រជាមានិតចិន៕