ដោយៈគង់ តារា

ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបានបង្ហើបឲ្យដឹងថា គំរោងស្ថាបនានិងលើកកំពស់ផ្លូវជាតិលេខ៤៨ ពីចំណុចប្រសព្វផ្លូវជាតិលេខ៤ ទៅកាន់ក្រុងខេមរភូមិន្ទ ខេត្តកោះកុង ត្រូវបានកំណត់ពេលវេលាជាក់លាក់ហើយ។

លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ និងលើកកម្រិតគុណភាពផ្លូវជាតិលេខ៤៨ នឹងចាប់ផ្ដើមអនុវត្តដំណើរការសាងសង់នៅចុងឆ្នាំនេះ ក្រោមហិរញ្ញប្បទានសម្បទាន ពីសាធារណរដ្ឋកូរ៉េ ។ គម្រោងនេះ នឹងត្រូវអនុវត្តការសាងសង់ ក្នុងរយៈពេល៣២ខែ ដោយចាប់ផ្ដើមដំណើការសាងសង់នៅថ្ងៃទី១ ខែវិច្ឆិកា ឆ្នាំ២០២១ខាងមុខ និងគ្រោងបញ្ចប់នៅដើមខែក ក្កដា ឆ្នាំ ២០២៤។

លោកបានបញ្ជាក់ថា ផ្លូវជាតិលេខ៤៨ ពីស្រុកស្រែអំបិល ទៅទីរួមខេត្តកោះកុងនេះ មានចម្ងាយប្រហែល១៥០គីឡូម៉ែត្រ ដែលជាផ្លូវកៅស៊ូពីរស្រទាប់ស្តើង ដែលបានប្រើប្រាស់កម្ចីពីប្រទេសថៃ សម្រាប់ការសាងសង់ផ្លូវ ប៉ុន្តែស្ពាន៤កន្លែង គឺជាជំនួយឥតសំណងរបស់ថៃ។

លោកបន្តថា ដោយសារតែបច្ចុប្បន្ននេះផ្លូវនេះ មានសកម្មភាពធ្វើដំណើរច្រើន ហើយជាច្រកសេដ្ឋកិច្ចផងនោះ ក្រសួងនឹងរៀបចំស្តារកម្រិតគុណភាពផ្លូវនេះ ឱ្យក្លាយទៅជាផ្លូវAC ដោយពង្រីកទៅជា៤គន្លង២គន្លងទៅ ២គន្លងមក ដើម្បីធានាបង្កើនសុវត្ថិភាព និងសម្រួលក្នុងការធ្វើដំណើរ។

លោកបន្តថា “ខ្ញុំទើបចុះហត្ថលេខាកុងត្រា សាងសង់កាលពីពេលថ្មីៗនេះ ដូច្នេះបើកការដ្ឋានយើង មិនអាចបើកពេលខែភ្លៀងនោះទេ អ៊ីចឹងប្រហែលជាចុងឆ្នាំនេះ យើងបើកការដ្ឋាន”។

កាលពីថ្ងៃទី ២៣ ខែសីហា ឆ្នាំ២០២១ ក្រសួងសាធារណការ និងដឹកជញ្ជូន និងក្រុមហ៊ុន ILSUNG & HANIL Joint Venture បានចុះហត្ថលេខាលើកិច្ចសន្យាសាងសង់ និងលើកកម្រិតគុណភាពផ្លូវជាតិលេខ៤៨នេះ ដែលគ្រោងចំណាយថវិកាប្រមាណជាង៧៨លានដុល្លារ។ គម្រោងនេះ នឹងត្រូវអនុវត្តសាងសង់ដោយក្រុម ហ៊ុនសាងសង់កូរ៉េ ILSUNG & HANIL Joint Venture និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេស KCI & KECC Joint Venture។

គម្រោងនេះត្រូវបានគេរំពឹងថា នឹងធ្វើឱ្យប្រសើរឡើងទាំងសុវត្ថិភាព នៃការធ្វើចរា​ចរណ៍ទៅមករបស់អ្នកដំណើរ កាត់បន្ថយពេលវេលា និងថ្លៃធ្វើដំណើរ និងដឹកជញ្ជូនតាមរយៈការបំពាក់គ្រឿងបរិក្ខារសុវត្ថិភាពនៅលើដងផ្លូវ ការកែសម្រួលចំណោតខ្លាំងរបស់ផ្លូវ ជំរុញសក្តានុពលតំបន់ទេសចរណ៍ និងបង្កើនការអភិវឌ្ឍសេដ្ឋកិច្ចក្នុងតំបន់៕

ដោយៈសុជាតា

ភ្នំពេញៈ ស្របពេលដែលការដាក់អោយដំណើរការផ្លូវជាតិលេខ៥ ហាយវេអាស៊ានពីស្រុកសេរីសោភណ្ឌ ទៅទីរួមខេត្តបាត់ដំបងប្រវែង៨៤គីឡូម៉ែត្រ ដំណាក់កាលទីមួយ បានធ្វើអោយទីប្រជុំជននៅស្រុកថ្មគោល ខេត្តបាត់ដំបង បានក្លាយទៅជាតំបន់លេចឆ្លោជាងគេ។

នៅក្នុងភូមិភាគពាព្យពីព្រោះថា តំបន់នេះ ក្រៅរោងម៉ាស៊ីនកិនស្រូវដ៏ធំប្រចាំភូមិភាគពាយ័ព្យ តំបន់នេះបានកំពុងអភិវឌ្ឍជាបន្តបន្ទាប់ ដែលអ្នកវិនិយោគក្នុងស្រុកបានដាក់ទុនវិនិយោគសាងសង់ទៅលើគម្រោងបុរី ដីឡូ និងគម្រោងផ្សារលក់ដូរទំនិញផេ្សងៗផងដែរ។

លោក កែវ សារ៉ន ប្រធានគ្រប់គ្រងអចលនទ្រព្យ Century 21 zillion ប្រចាំខេត្តបាត់ដំបងបានបញ្ជាក់ប្រាប់ Propery Area Asia នៅថ្ងៃទី២៧ ខែកញ្ញាថា គេសង្កេតឃើញគម្រោងអភិវឌ្ឍធំៗមួយចំនួន ស្ថិតនៅតំបន់ស្រុកថ្មគោលនេះ ស្របពេលផ្លូវជាតិលេខ៥បានដាក់អោយដំណើរការជាផ្លូវការ ។ នៅក្នុងនោះដែរ មានគម្រោងអភិវឌ្ឍអចល នទ្រព្យរបស់ឧកញ្ញា ឡេង ណាវ៉ាត្រានៅផ្ទៃដី៥០០ហិចតា នៅស្រុកថ្មគោល គម្រោងអភិវឌ្ឍផ្សារសហគមន៍ និងលំនៅដ្ឋាននៅតំបន់ស្ពានអូតាគីជាដើម។

លោកបន្ថែមទៀតថា “សម្រាប់ពេលបច្ចុប្បន្ននេះ វិស័យអចលនទ្រព្យក្នុងខេត្តបាត់ដំបង ជាពិសេសក្នុងស្រុកថ្មគោលមានសញ្ញាល្អ ប៉ុន្តែតម្រូវការនៅមានកម្រិតផងដែរ”។លោកបន្តថា “ចំនែកតម្លៃដីធ្លីនៅតំបន់ស្រុកថ្មគោលនេះ គឹចន្លោះពី១ម៉ឺនដុល្លារ ទៅ៥ ម៉ឺនដុល្លារក្នុងមួយហិតតា និងតម្លៃដីនៅតំបន់ទីប្រជុំជន គឺមានចន្លោះពី៣៥ដុល្លារ ទៅ ៥០ដុល្លារក្នុងមួយម៉ែត្រការ៉ផងដែរ”។

បើតាមលើកឡើងពីសំណាក់អ្នកវិនិយោគ ក្នុងស្រុកនៅតំបន់នេះ បានលើកឡើងថា ការសាងសង់ផ្លូវអាស៊ាន៦០ម៉ែត្រ នៅតំបន់ទីប្រជុំជននេះ បានធ្វើអោយតម្លៃដីធ្លីនៅតំបន់នេះ មានហាងឆេងជាងមុន ដោយសារតែសាលាខេត្តបាត់ដំបង មានប្លង់មេសម្រាការអភិវឌ្ឍច្បាស់លាស់៕

ដោយៈសុជាតា

ព្រះសីហនុៈ រដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្មនិងសំណង់បាន សម្រេចអនុម័តទៅលើប្លង់គោលប្រើប្រាស់ដីក្រុងព្រះសីហនុ ចក្ខុវិស័យឆ្នាំ២០៣៨។

ប្លង់គោលប្រើប្រាស់ដីធ្លីនេះ ត្រូវបានរៀបចំឡើងដោយប្រមូលសិក្សា និងវិភាគទិន្នន័យរូបវន្ត ទិន្នន័យសេដ្ឋកិច្ច ទិន្នន័យសង្គម និងទិន្នន័យបរិស្ថាន ទិន្នន័យប្រជាសាស្រ្ត និងការស្រង់មតិ សមស្របតាមគោលនយោបាយជាតិស្តីពី ការរៀបចំដែនដីនៃព្រះរាជាណាចក្រកម្ពុជា គោលនយោបាយដីធ្លី សៀវភៅដីធ្លី អនុក្រឹតស្តីពីនគរូបនីយកម្ម រាជធានីភ្នំពេញ ក្រុង និងទីប្រជុំជន និង សេចក្តីសម្រេចស្តីពីនីតិលម្អិត នៃការរៀបចំប្លង់គោលប្រើប្រាស់ដី និង ផែនការប្រើប្រាសដីថ្នាក់ក្រុង  ស្រុក ខណ្ឌ។

បើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញអោយដឹងថា វិសាលភាពនៃសិក្សាប្លង់គោលប្រើប្រាស់ដី ក្រុងព្រះសីហនុមានផ្ទៃដី៨៣គីឡូម៉ែត្រក្រឡា គ្របដណ្តប់លើស្រុកព្រៃនប់ មានផ្ទៃដី១០០,៨២គីឡូក្រឡា  និងគ្របណ្ដប់លើ ស្រុកស្ទឹងហាវមានផ្ទៃដី៩៥, ១២គីឡូម៉ែត្រក្រឡា។

សូចនាករសំខាន់ៗ សម្រាប់អភិវឌ្ឍក្រុងព្រះសីហនុ និងតំបន់ជុំវិញដែលបានធ្វើការព្យាករណ៍ និងគ្រោងសម្រេចបានត្រឹមឆ្នាំ ២០៣៨រួមមាន

-ប្រជាជនសម្រាប់ក្រុងព្រះសីហនុ និងតំបន់ជុំវិញនៅឆ្នាំ២០១៩ មានចំនួន១៧៨,​២៩១១នាក់ នឹងកើនឡើងដលចំនួនកើនឡើង ២៣២,១២១នាក់នៅឆ្នាំ២០៣៨។

-ភ្ញៀវទេសចរអន្តរជាតិនៅឆ្នាំ២០១៨ មានចំនួន៤៨១,០០០ នាក់  នឹងកើនឡើងទៅដល់ ២,៥លាននាក់នៅឆ្នាំ២០៣៨។ ភ្ញៀវទេសចរជាតិនៅឆ្នាំ ២០១៨មានចំនួនប្រមាណ១លាននាក់ នឹងកើនឡើងដល់ចំនួនប្រមាណ៥លាននាក់នៅឆ្នាំ ២០៣៨។

-ហេដ្ឋារចនាសម្ពន្ធក្នុងក្រុងព្រះសីហនុ និងតំបន់ជុំវិញ

ផ្លូវក្រាលកៅស៊ូបេតុឆ្នាំ ២០១៨ មានចំនួន ២០.៥ ភាគរយនឹងកើនឡើងដល់ ១០០ភាគរយនៅឆ្នាំ ២០៣៨។

ការផ្គត់ផ្គង់ទឹកស្អាតនៅឆ្នាំ២០១៨ មានចំនួន៣២ភាគរយ នឹងកើនឡើងដល់ ១០០ ភាគរយនៅឆ្នាំ២០៣៨។

ភស្តុភារម្មឆ្នាំ២០១៨ មានចំនួន៤,៩លានតោន នឹងកើនឡើងដល់ចំនួន៣៧លា​ន​តោននៅឆ្នាំ២០៣៨។

តំបន់លំនៅដ្ឋាននៅឆ្នាំ២០១៩ មានផ្ទៃដី១៦៣១ហិចតា នឹងកើនឡើងដល់ ៦០២ ហិកតា។

តំបន់ឧស្សាហកកម្មនៅឆ្នាំ ២០១៩ មានផ្ទៃដី៨២៩ហិចតា នឹងកើនឡើងដល់ផ្ទៃដី១៦០២ ហិចតានៅឆ្នាំ២០២៣៨។

តំបន់លម្ហសាធារណៈ និងផ្ទៃបៃតងសម្រាប់មនុស្សម្នាក់នៅឆ្នាំ២០១៩ មានផ្ទៃដី ០.៥១គីឡូម៉ែត្រក្រឡា សម្រាប់មនុស្សម្នាក់នឹងកើនឡើងដល់ផ្ទៃដី១០ ម៉ែត្រក្រឡាសម្រាប់ម្នាក់នៅឆ្នាំ ២០៣៨៕

        ដោយៈតារា

ភ្នំពេញៈ អគ្គនាយកដ្ឋានពន្ធដារ ប្រកាសសល់រយៈពេល៣ថ្ងៃទៀតប៉ុណ្ណោះ នឹងត្រូវបិទបញ្ចប់ការបង់ពន្ធលើអចលនទ្រព្យ និងពន្ធលើដីធ្លីមិនបានប្រើប្រាស់ ក្នុងនោះចំពោះករណីខកខាន មិនបានបំពេញកាតព្វកិច្ចបង់ពន្ធប្រភេទនេះ ម្ចាស់អចលនទព្យនឹងទទួលរងនូវទោសទណ្ឌតាមច្បាប់ជាធរមាន។

អគ្គនាយកដ្ឋានពន្ធដារ ប្រកាសជូនដំណឹងលើការប្រកាសបង់ពន្ធ លើអចលនទ្រព្យ និងពន្ធលើដីធ្លីមិនបានប្រើប្រាស់សម្រាប់ឆ្នាំ២០២១ ដែលការបង់ពន្ធប្រភេទនេះ នៅសល់តែរយៈពេល៣ថ្ងៃទៀត តែប៉ុណ្ណោះនឹងត្រូវបិទបញ្ចប់ ក្នុងនោះចំពោះម្ចាស់អចលនទ្រព្យ ដែលមានអចលនទ្រព្យនៅរាជធានីភ្នំពេញ និងនៅតាមបណ្តាខេត្តទាំងអស់ នឹងនៅតាមបណ្តាដែលត្រូវបំពេញកាតព្វកិច្ចបង់ពន្ធ សូមមកបង់ពន្ធលើអចលនទ្រព្យ និងការបង់ពន្ធលើដីមិនបានប្រើប្រាស់សម្រាប់ឆ្នាំ២០២១ឲ្យបានរួសរាន់ ដោយការបង់ពន្ធលើផ្នែកនេះ នឹងត្រូវបិតបញ្ចប់នៅត្រឹមថ្ងៃទី៣០ ខែកញ្ញា ឆ្នាំ២០២១ ខាងមុខ។

ជុំវិញការបង់ពន្ធលើផ្នែកអចលនទ្រព្យនេះ អគ្គនាយកដ្ឋានពន្ធដារ បានបញ្ជាក់ថា មកដល់ពេលនេះ នៅមានម្ចាស់អចលនទ្រព្យមួយចំនួន មិនទាន់បំពេញកាតព្វកិច្ចប្រកា​សបង់ពន្ធប្រភេទនេះនៅឡើយ ដើម្បីជម្រុញការប្រមូលប្រមូលពន្ធលើអចលនទ្រព្យសម្រាប់ឆ្នាំ២០២០ឲ្យអស់លទ្ធភាព ប្រកបដោយប្រសិទ្ធភាព សម្រាប់ម្ចាស់អចលនទ្រព្យ ដែលមិនទាន់បង់ពន្ធ សូមមកប្រកាសបង់ពន្ធទាំងអស់គ្នា ឲ្យបានមុនការកំណត់របស់អគ្គនាយកដ្ឋានពន្ធដារ ។

ប្រសិនម្ចាស់អចលនទ្រព្យ ខកខានមិនបានដាក់លិខិតប្រកាសបង់ពន្ធ ទាន់ពេលវេលាតាមការកំណត់ខាងលើ ម្ចាស់អចលនទ្រព្យនឹងត្រូវរងនូវទោសទណ្ឌ តាមច្បាប់ធរមាន។

នៅក្នុងឆ្នាំ២០២០ កន្លងមកនេះ អគ្គនាយកដ្ឋានពន្ធដារ ប្រមូលបានមានចំនួនជាង ១១ ៧០០ ប៊ីលានរៀល ត្រូវប្រមាណ២៨៨៩លានដុល្លារអាមេរិក ស្មើជាង ១០១% នៃផែនការប្រចាំឆ្នាំ ក្នុងនោះការប្រមូលពន្ធលើ អ្នកជាប់ពន្ធធំបានចំនួនជាង៨ ៥០០ប៊ីលានរៀល, អ្នកជាប់ពន្ធមធ្យមជាង១ ៧០០ប៊ីលានរៀល និងអ្នកជាប់ពន្ធតូចជាង៥៥ ប៊ីលានរៀល។ ដោយឡែកការប្រមូលពន្ធលើការឈ្នួលផ្ទះ ពន្ធអចលនទ្រព្យ និងពន្ធផ្សេងៗ បានចំនួនប្រមាណជាង១ ៣០០ ប៊ីលានរៀល ត្រូវប្រមាណជិត១២% នៃការប្រមូលចំណូលពន្ធសរុបផងដែរ៕

ដោយៈសហការី

        ភ្នំពេញៈ នៅក្នុងរយៈពេលជាង១០ឆ្នាំចុងក្រោយនេះ គេសង្កេតឃើញថាវិស័យអចលនទ្រព្យ នៅប្រទេសកម្ពុជា បានស្គាល់នូវភាពរីកចម្រើនឥតឈប់ឈរ ហើយមនុ​ស្សមួយចំនួនបានក្លាយជាអ្នកមាន ដោយសារពួកគេចេះវិនិយោគ ប្រកបដោយភាពឆ្លាតវៃនៅក្នុងវិស័យមួយនេះ។

តើធ្វើដូចម្ដេចទើបវិនិយោគប្រកបដោយភាពឆ្លាតវៃ ហើយតើគួរវិនិយោគលើអច​លនទ្រព្យប្រភេទមួយណា ទើបទទួលបានផលចំណេញខ្ពស់ នៅក្នុងពេលបច្ចុប្បន្ននេះ?ទាក់ទិននឹងសំណួរខាងលើ អ្នកជំនាញអចលនទ្រព្យ បានផ្ដល់នូវដំបូន្មានដ៏មានសារៈប្រយោជន៍មួយចំនួន សម្រាប់អ្នកដែលចង់វិនិយោគលើវិស័យនេះ ដើម្បីទទួលបានផលចំណេញពីការវិនិយោគ។

អ្នកស្រី តាំង ហួរ អគ្គនាយិការក្រុមហ៊ុន Amatak Property Service Co.,Ltd. មានប្រសាសន៍ថា បើនិយាយពីការវិនិយោគ មិនថាវិនិយោគទៅលើដី ផ្ទះ ឫខុនដូនោះទេ គឺសុទ្ធតែទទួលបានអត្ថប្រយោជន៍ និងផលចំណេញផ្សេងៗគ្នា។

ទោះជាយ៉ាងណា អ្នកស្រីបានបញ្ជាក់ថា ប្រសិនបើវិនិយោគទៅលើដីធ្លី គេនឹងអាចទាញបានផលចំណញ ច្រើនជាងការវិនិយោគទៅលើអចលនទ្រព្យប្រភេទផ្សេងៗ ព្រោះថា ការទិញដីយើងអាចទិញយកមកដាក់ជួលបន្ត ទុកលក់ចំណេញនៅថ្ងៃក្រោយ ពុះជាដីឡូតិ៍លក់ និងអាចអភិវឌ្ឍជាបុរី ផ្ទះល្វែង អាផាមិន ឃ្លាំង រោងចក្រ និងអគារពាណិជ្ជកម្មជាដើម។

ការវិនិយោគទៅលើអចលទ្រព្យដីធ្លី គឺនៅតែមានប្រជាប្រិយភាព សម្រាប់ប្រជាជនកម្ពុជា ដោយសារតែដីគឺជាអចនវត្ថុដែលមានកំណត់ ងាយស្រួលទិញ មិនចាំបាច់ថែទាំ និងមិនសូវមានការប្រកួតប្រជែកច្រើន ដូចប្រភេទអចលនទ្រព្យដទៃទៀតនោះទេ។

អ្នកស្រីតាំង ហួរ បានបន្តថា “ប្រសិនបើយើងចង់វិនិយោគទៅលើដីធ្លី យើងត្រូវមើលទៅលើទីតាំងណា ដែលកំពុងមានសក្ដានុពលខ្លាំង និងមានសន្ទុះនៃការអភិវឌ្ឍន៏លឿនបំផុត”។ ជាក់ស្ដែង តំបន់ជាយក្រុងនៃរាជធានីភ្នំពេញ កំពុងតែមានសន្ទុះនៃការអភិវឌ្ឍគម្រោងលំនៅឋានជាច្រើន បូករួមនឹងគម្រោងហេដ្ឋារចនាសម្ពន័នានារបស់រដ្ឋាភិបាលផងនោះ បានធ្វើអោយតំបន់ទាំងនោះ កាន់តែមានសក្ដានុពលខ្លាំង ហើយតំបន់ដង្ហើមនៃសេដ្ឋកិច្ចដ៏អស្ចារ្យ ដែលយើងគួរតែវិនិយោគនោះ គឺតំបន់ផ្លូវជាតិលេខ១ ៣ ៤ និងផ្លូវជាតិលេខ៦”។

ស្របពេលជាមួយគ្នានេះ លោកសុខ​ គឹមអេង​ អ្នកគ្រប់គ្រងទូទៅនៃក្រុមហ៊ុនអចល​នទ្រព្យ Sovannaphum Real Estate Investment Co.,Ltd. ក៏បានលើកឡើងដែរថា ការវិនិយោគលើដី មានវិសាលភាពចំណេញច្រើនជាងផ្ទះ ឫអចលនទ្រព្យផ្សេងទៀត  ដោ​យសារតែដី ក្នុងតំបន់មួយចំនួននៅមានតម្លៃធូរថ្លៃនៅឡើយ ដែលយើងអាចមានលទ្ធភាពទិញបាន ជាពិសេសនៅតំបន់ជាយក្រុង ឬទីរួមខេត្តមួយចំនួនដែលជាប់រាជធានីភ្នំពេញ។

លោកបានបន្តថា “ការវិនិយោគលើដីធ្លីមួយចំនួន អាចនឹងត្រូវការពេលវែងបន្តិចក៏ពិតមែន តែក៏មានឱកាសនៃការចំណេញខ្ពស់ផងដែរ”។

បើតាមបទពិសោធន៍របស់លោកនៅក្នុងវិស័យនេះ ទាំងការវិនិយោគទៅលើដីធ្លី ឬផ្ទះ សុទ្ធតែមានឱកាសដើម្បីទទួលបានផលចំណេញ ដោយអាស្រ័យទៅធនធានហិរញ្ញវត្ថុដែលយើងមាន ថាតើយើងមានលទ្ធភាពកម្រិតណា ហើយចង់វិនិយោគទៅលើអចលនទ្រព្យប្រភេទណាមុន។

ជាក់ស្ដែង ដោយសារតែវិបត្តិនៃការរីករាលដាលនៃជំងឺកូវីដ១៩ អចលនទ្រព្យដីធ្លីមួយចំនួន ត្រូវបានដាក់លក់ក្រោមទីផ្សារ១០ទៅ២០ភាគរយ ហើយនេះគឺជាឱកាសល្អសម្រាប់អ្នកវិនិយោគ ដែលមានធនធានគ្រប់គ្រាន់ដើម្បីចាប់យកក្នុងកំឡុងពេលនេះ។

អំពីសេវាកម្ម ឬចម្ងល់ផ្សេងៗសូមទំនាក់ទំនងទៅកាន់៖ +855 967876902 (Telegram)/ +855 66886633 ។ ប្រភព៖ Harbor Property ៕

        ដោយៈវឌ្ឍនៈ

ភ្នំពេញៈ មានមនុស្សមិនច្រើនទេ ដែលទទួលបានជោគជ័យក្នុងមុខជំនួញ និងជាអ្នកផ្ដើមចេញពីការងារតូចតាចប្រាក់ខែតិចតួច ប៉ុន្តែថ្ងៃនេះគេហទំព័រProperty Area នឹងលើកយកអ្នកជំនួញអចលនទ្រព្យ ជាស្ត្រីម្នាក់នៅក្នុងប្រទេសកម្ពុជា ដែលបានផ្ដើមចេញពីប្រាក់ខែត្រឹមតែ៤៥ដុល្លារអាមេរិកប៉ុណ្ណោះ។

លោកអ្នកដែលប្រឡូកក្នុងវិស័យអចលនទ្រព្យ ប្រាកដជាបានដឹងពីឈ្មោះនិងតួនាទីស្ត្រីមួយរូបនេះ ដែលជាអ្នកគ្រប់គ្រងក្រុមហ៊ុនអចលនទ្រព្យ យីហោអន្តរជាតិល្បីឈ្មោះលើពិភពលោក គឺលោកស្រី Grace Rachny នាយិកាក្រុមហ៊ុនCentury 21 Cambodia ដែលក្រុមហ៊ុននេះ ជាក្រុមហ៊ុនបង្កើតឡើងនៅសហរដ្ឋអាមេរិក និងមានអាយុកាលជាង៥០ឆ្នាំមកហើយ។

ក្រុមហ៊ុន Century 21  បានមកដល់ប្រទេសកម្ពុជា ក្នុងអំឡុងឆ្នាំ២០១២ ពោលគឺនៅក្នុងពេលដែលវិស័យអចលនទ្រព្យកម្ពុជា កំពុងមានសន្ទុះងើបឡើងពីវិបត្តិហិរញ្ញវត្ថុពិភពលោកក្នុងឆ្នាំ ២០០៨ឬ២០០៩ ។

ពេលនេះ យើងមកស្គាល់លោកស្រីGrace Rachny ដែលជាអ្នកគ្រប់គ្រងក្រុមហ៊ុនអចលនទ្រព្យលំដាប់ពិភពលោកមួយនេះ តើលោកហ្គ្រេស រចនីជាអ្នកណាទើបមកកាន់កាប់ក្នុងក្រុមហ៊ុនធំបែបនេះនៅកម្ពុជា។

លោកស្រី ហ្គ្រេស រចនីបានមានប្រសាសន៍ ក្នុងកិច្ចសម្ភាសន៍មួយកាលពីថ្ងៃទី២៧ កញ្ញា២០២១នេះថា នៅឆ្នាំ២០០២ លោកស្រីបានចាប់ផ្ដើមបម្រើការងារនៅក្នុងក្រុមហ៊ុនលក់អំពូលភ្លើងមួយ មកពីប្រទេសសិង្ហបុរី ហើយក្នុងអំឡុងឆ្នាំនោះ ជាឆ្នាំដែលលោកស្រីបញ្ចប់ការសិក្សា នៅសកលវិទ្យាល័យជាតិគ្រប់គ្រង ដោយចាប់ផ្ដើមធ្វើការងារជាមួ យប្រាក់ខែត្រឹមតែ៤៥ដុល្លារអាមេរិកប៉ុណ្ណោះ ។

អំឡុងពេលប្រឡូកការងារផ្នែកលក់នេះហើយ ដែលលោកស្រីបានជួបជាមួយលោកFillip Fong ជាជនជាតិសឹង្ហបុរី និងបានរៀបអាពាហ៍ពិពាហ៍ជាមួយគ្នា ដោយទទូល​បានបុត្រីចំនួន២នាក់។

លោកស្រីបន្តថា ជាបិទពិសោធន៍ និងឱកាសល្អសម្រាប់លោកស្រី ដែលបានចាប់ផ្ដើមធ្វើការដំបូង ជាមួយនឹងក្រុមហ៊ុនធំមួយ និងមានសាខាទូទាំងពិភពលោក ។ ការធ្វើការជាមួយក្រុមហ៊ុនធំបែបនេះ បានជំរុញឱ្យលោកស្រីអភិវឌ្ឍន៍ខ្លួនជាបន្តបន្ទាប់ និងបានភ្ជាប់បណ្តាញអគ្គិសនី ទៅផ្ទះវីឡាធំៗនៅក្នុងប្រទេសកម្ពុជា ពីព្រោះអំពូលភ្លើងរបស់ក្រុមហ៊ុនលោកស្រីធ្វើការ គឺមានតម្លៃខ្ពស់និងសម្រាប់អ្នកមានជីវភាពធូរធារ។

ក្នុងការងារជាបុគ្គលិកក្នុងក្រុមហ៊ុនអំពូលភ្លើងនេះដែរ បាននាំលោកស្រីទៅស្គាល់ជាមួយអ្នកវិនិយោគម្ចាស់ទ្រព្យធំៗ នៅកម្ពុជា។

លោកស្រីGrace Rachnyបានបន្ថែមថា នៅក្នុងអាជីវកម្មផ្ទាល់ខ្លួនបានធ្វើឱ្យលោកស្រីបានស្គាល់ ជាមួយនឹងវិនិយោគិនបរទេសជាច្រើនមកកម្ពុជា ដូចជា មកពីប្រទេសសឹង្ហបុរី ហុងកុង ម៉ាឡេស៊ី ដើម្បីវិនិយោគនៅកម្ពុជា ហើយជាពេលវេលាមួយដែលលោកស្រី បានយល់ដឹងកាន់តែច្បាស់ ពីវិស័យអចលនទ្រព្យ បានដើរតួនាទីសំខាន់ក្នុងសេដ្ឋកិច្ច ពីព្រោះថានៅពេលវិនិយោគិនចូលមក វិនិយោគនៅក្នុងប្រទេសកម្ពុជា វាមិនត្រឹមតែនាំប្រាក់ចំណេញដល់វិនិយោគិនប៉ុណ្ណោះទេ តែវាក៏បានផ្ដល់ឱកាសការងារដល់ប្រាក់បៀវត្សរ៍ដល់ប្រជាជនកម្ពុជាផងដែរ ។

ប្រឡូកក្នុងការងារចាស់ រហូតដល់ឆ្នាំ២០១២ គឺជាឆ្នាំដ៏ល្អរបស់លោកស្រី ដែលបានស្គាល់Group Chairman នៃក្រុមហ៊ុនអចលនទ្រព្យធំមួយ និងបាននាំប្រែននៃក្រុមហ៊ុនអចលនទ្រព្យដ៏ធំរបស់សហរដ្ឋអាមេរិក ចូលមកកាន់ប្រទេសកម្ពុជា។ ក្រុមហ៊ុន Century 21 មកដល់សព្វថ្ងៃនេះ មានវត្តមាននៅរហូតដល់៨៧ប្រទេស នៅលើពិភពលោកនិងមានអាយុកាលរហូតដល់៥០ឆ្នាំ។

ជីវិតផ្លាស់ប្តូរជាមួយនឹងទស្សនវិស័យច្បាស់លាស់ និងការអភិវឌ្ឍខ្លួនឯងជាបន្តបន្ទាប់ តាមរយៈការចូលរួមវគ្គបណ្តុះបណ្តាលនៅកម្រិតអន្តរជាតិ បានធ្វើឲ្យបែបផែន​ការងារ តួនាទី ឋានៈរបស់លោកស្រីបានGrace Rachnyផ្លាស់ប្តូរទាំងស្រុង។

ដោយមើលឃើញទេពកោសល្យ ជំនាញទំនាក់ទំនង និងភាពជាអ្នកដឹកនាំ លោកស្រីGrace Rachnyត្រូវបានតែងតាំងឲ្យដឹកនាំ ក្រុមហ៊ុនលំដាប់អន្តរជាតិខាងលើនេះ ជាមួយនឹងទំនុកចិត្តពីសម្ព័ន្ឋថ្នាក់ដឹកនាំ និងអ្នកនាំយកយីហោអន្តរជាតិនេះចូលមកកាន់ទីផ្សារកម្ពុជា។

លោកស្រីបានបញ្ជាក់ថា ក្នុងមុខតំណែងជាថ្នាក់ដឹកនាំ នៃក្រុមហ៊ុនអន្តរជាតិមួយនេះ លោកស្រីបានកសាងប្រែនខ្លួនឯង កសាងទំនាក់ទំនងជាមួយវិនិយោគិន ជាមួយម្ចាស់ភាគហ៊ុន និងជាឱកាសដែលធ្វើឱ្យលោកស្រី បានដើរជុំវិញពិភពលោកជាមួយនឹងក្រុមហ៊ុនCentury 21 brand និងជាមួយសមាជិករបស់ក្រុមហ៊ុន Century 21 Cambodia ។

លោកស្រីថា “ទោះបីជាខ្ញុំមានបទពិសោធន៍ជិត២០ឆ្នាំក្ដី តែនាងខ្ញុំនៅបន្តសិក្សានិងរៀនពីអ្វីដែលថ្មីបន្តទៀត ដោយអភិវឌ្ឍន៍ខ្លួនឱ្យកាន់តែរីកចម្រើនបន្ថែមទៀត ដើម្បីជួយដល់សង្គមជាតិរបស់យើង”។

ជាលទ្ឋផលរយៈពេល៩ឆ្នាំ ក្រុមហ៊ុនCentury21 Cambodiaបានពង្រីកសាខាយ៉ាងច្រើនទូទាំងប្រទេស ដែលបច្ចុប្បន្នសម្ព័ន្ឋក្រុមហ៊ុននេះមានបុគ្គលិក១០០០នាក់នៅរាជធានីភ្នំពេញ និងបានកំពុងពង្រីកសេវាកម្មទៅដល់ឃុំ សង្កាត់ទាំង១៦៤៦ទីទាំង២៥រាជធានី ខេត្តទូទាំងប្រទេស ជាមួយនឹងគោលដៅបន្ថែមបុគ្គលិក ដែលមានការបណ្តុះបណ្តាលត្រឹមត្រូវ ប្រកបដោយមូលដ្ឋានវិជ្ជាជីវៈជំនាញលំដាប់អន្តរជាតិ៕