ដោយៈសុជាតា
ភ្នំពេញៈ ការរីកចំរើននៃសេដ្ឋកិច្ចប្រទេសកម្ពុជា ក្នុងរយៈពេលជាង២ទសវត្សនេះបានធ្វើអោយវិស័យអចលនទ្រព្យនៅកម្ពុជា បានរីកដុះដាលដូចផ្សិត ជាពិសេសនៅរាជធានភ្នំពេញ ក៏ដូចជាបណ្តាខេត្តធំៗមួយចំនួនផងដែរ។
ការរីកចំរើននៃវិស័យអចលនទ្រព្យនៅកម្ពុជា បានផ្តល់ឱកាសអោយអ្នកវិនិយោគបានក្លាយទៅជាអ្នកមានដ៏លឿនរហ័ស តាមរយៈការវិនិយោគវៃឆ្លាត និងក្តោបក្តាប់ស្ថានការណ៍បានល្អ។
ប៉ុន្តែសំណួរបានលេចឡើង ក្នុងចំណោមប្រភេទអចលនទ្រព្យបែបណា ដែលអ្នកវិនិយោគទទួលបានប្រាក់ចំណេញខ្ពស់ សម្រាប់រយៈពេលខ្លី និងរយៈពេលវែង។ តើវាជាប្រភេទអចលនទ្រព្យខាងដីធ្លី ខុនដូរ និង ផ្ទះសំបែងដែលជាជម្រើសដ៏ប្រសើរសម្រាប់អ្នកវិនិយោគនៅកម្ពុជា។
យោងតាមអ្នកជំនាញខាងដីធ្លីបានបញ្ជាក់អោយដឹងថា គ្រប់ការវិនិយោគអចលនទ្រព្យទាំងអស់មិនថា ដីធ្លី និង ផ្ទះសំបែង និង ខុនដូរ មានសក្តានុពលខ្ពស់ ក្នុងការទទួលផលចំនេញ។ ប៉ុន្តែការវិនិយោគនៅលើផ្នែកដីធ្លី គឺមានឱកាសខ្ពស់ក្នុងការទទួលផលចំណេញ ពីព្រោះផ្នែកដីធ្លី គឺបានបែងចែកនៅក្នុងដីធ្លី និងប្រើប្រាស់ជាប្រភេទដីធ្លីសម្រាប់កសាងបុរី ខុនដូ និង មជ្ឍមណ្ឌលពាណិជ្ជកម្មជាដើម។
នាពេលបច្ចុប្បន្ននេះ អចលនទ្រព្យខាងផ្នែកដីធ្លី គឹមានប្រជាប្រិយក្នុងចំណោមប្រជាជនកម្ពុជា ពីព្រោះវាមានភាពងាយស្រួលទិញលក់ និងមិនសូវមានភាពប្រកួតប្រជែងដូចប្រភេទអចលនទ្រព្យផ្សេងៗទៀត។
បើតាមពន្យល់ពីសំណាក់លោក ឌីត ចាន់ណា ប្រធានក្រុមហ៊ុនLucky real estate បានបញ្ជាក់ប្រាប់ថា ការវិនិយោគទៅលើដីធ្លី គឺគេពិនិត្យទៅលើទីតាំង ដែលមានសក្តានុពល និងល្បឿននៃការអភិវឌ្ឍនៅក្នុងតំបន់នោះផងដែរ។ នាពេលបច្ចុប្បន្ននេះ ផ្នែកជាយក្រុងភ្នំពេញ គឺទទួលបានការអភិវឌ្ឍគេហដ្ឋានជាច្រើន ជាមួយនឹងអភិវឌ្ឍហេដ្ឋារចនាសម្ពន្ធគាំទ្ររបស់រដ្ឋាភិបាលផងដែរ។
ភាគច្រើនអចលនទ្រព្យ នៅផ្នែកដីធ្លីនៅតំបន់ផ្លូវជាតិ១ លេខ៣ និង ផ្លូវជាតិ ៦បានទាក់ទាញអភិវឌ្ឍអចលនទ្រព្យខ្លាំងផងដែរ។
លោកបញ្ជាក់បន្ថែមទៀតថា “ទោះបីជាការវិនិយោគដីធ្លី ទាមទាំររយៈពេលយូរក៏ដោយ ប៉ុន្តែឱកាសបង្កើតប្រាក់ចំណេញ គឺអត្រាខ្ពស់ផងដែរ”។ លោកបន្ថែមថា “ផ្អែកទៅលើបទពិសោធន៍ជាក់ស្តែង ការវិនិយោគទៅលើដីធ្លី ផ្ទះ និង ខុនដូ អាចទទួលផលចំណេញខុសគ្នា អាស្រ័យទៅលើធនធានហិរញ្ញវត្ថុរបស់ពួកគេ”។
នាពេលបច្ចុប្បន្ននេះ ការរាលត្បាតវិបត្តិ Covid 19 បានធ្វើអោយប៉ះពាល់ទៅដល់ កំណើនសេដ្ឋកិច្ចជាតិ បានធ្វើអោយការទិញលក់ ដីធ្លី បានធ្លាក់ចុះក្រោមទីផ្សារចន្លោះពី ១០ភាគរយ ទៅ២០ភាគរយ ដែលជាឱកាសសម្រាប់អ្នកមានលទ្ធភាពគ្រប់គ្រាន់ក្នុងទិញ និង លក់ចេញសម្រាប់ផលចំណេញខ្ពស់ផងដែរ។
ជាមួយគ្នានេះ លោកស្រីGrace Rachny Fongនាយិកាក្រុមហ៊ុនCentury21 Cambodiaបានមានប្រសាសន៍ឲ្យដឹងផងដែរថា ហេតុផលដែលទីផ្សារដីធ្លីមានការវិនិយោគច្រើននៅកម្ពុជា ដោយសារការវិនិយោគដីធ្លី មានអត្រាចំណេញខ្ពស់ធៀបនឹងផ្នែកផ្សេងទៀតនៃវិស័យអចលនទ្រព្យ។ ជាការវិនិយោគដែលមើលឃើញផលចំណេញមានភាពច្បាស់លាស់ ដោយយើងឃើញថា ទោះបីមានបញ្ហាសេដ្ឋកិច្ចដោយសារវិបត្តិជំងឺកូវីដ១៩ក្តី ប៉ុន្តែចរន្តទិញ លក់ដីធ្លីនៅតែបន្តមាន និងចំណុចពិសេសមួយទៀត ការវិនិយោគដីធ្លី ជាការវិនិយោគដែលមានផលចំណេញរយៈពេលវែង៕
