ដោយ សុជាតា

ភ្នំពេញ៖ នៅព្រឹកថ្ងៃទី១៣ ខែកញ្ញា ឆ្នាំ២០២១ ក្នុងដំណើរទស្សនកិច្ចរបស់រដ្ឋមន្ត្រីការបរទេសនៃសាធារណរដ្ឋប្រជាមានិតចិន លោក ហោ ណាំហុងឧបនាយករដ្ឋមន្ត្រីនៃព្រះរាជាណាចក្រកម្ពុជាបានជំរុញឱ្យរដ្ឋាភិបាលចិនបន្តអនុគម្រោងអភិវឌ្ឍន៍ហេដ្ឋារចនាសម្ព័ន្ធ បន្ទាន់នៅគម្ពុជា ដើម្បីរួមចំណែកដល់ការអភិវឌ្ឍសេដ្ឋកិច្ចកម្ពុជា ។

រំលឹកអំពីការអនុវត្តគម្រោងនានាជាបន្ទាន់ក្រោយពីប្រជុំគណៈកម្មាធិការសម្របសម្រួលអន្ដររដ្ឋាភិបាលកម្ពុជា-ចិន កាលពីថ្ងៃទី១៦ មិថុនា ២០២០ បញ្ជីគម្រោងដែលត្រូវអនុវត្តន៍បន្ទាន់(To Do List)  លោកឧបនាយករដ្ឋមន្ត្រី បានលើកឡើងនូវកសាងហេដ្ឋារចនាសម្ព័ន្ធដូចជា គម្រោងសាងសង់ផ្លូវជាតិលេខ71C  គម្រោងពង្រីក និងលើកកម្រិតផ្លូវជាតិលេខ41 លេខ33 លេខ31 និងផ្លូវជាតិលេខ3 គម្រោងប្រព័ន្ធទឹកកខ្វក់ក្រុងព្រះសីហនុ ព្រមទាំងការកសាងខ្សែកាប្លិ៍អុបទិកក្រោមបាតសមុទ្ររវាងទីក្រុងព្រះសីហនុ-ទីក្រុងហុងកុង ដើម្បីពន្លឿនប្រព័ន្ធអ៊ីនធឺណេតនៅកម្ពុជា។

លោកឧបនាយករដ្ឋមន្ត្រី បានលើកថា ផែនការសកម្មភាពរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដើម្បីបង្កើតសហគមន៍វាសនារួមកម្ពុជា-ចិន(២០១៩-២០២៣) ដែកទាក់ទងគ្រប់ស្ថាប័នរួមទាំងគណបក្សប្រជាជនកម្ពុជា និងនីតិប្បញ្ញត្តិ  តើគួរប្រជុំថ្នាក់អគ្គលេខាធិការគណៈកម្មាធិការសម្របសម្រួលអន្ដររដ្ឋាភិបាល ឬទេ ដើម្បីធ្វើបច្ចុប្បន្នភាពកិច្ចការអនុវត្តន៍បន្ដ។

ក្នុងឱកាសនោះដែរ លោកឧបនាយករដ្ឋមន្ត្រី ក៏បានលើកថាគួរពិចារណារកពេលសមស្របរៀបចំការតាំងពិពណ៌អំពីពាណិជ្ជកម្ម និងវិនិយោគរវាងប្រទេសយើងទាំងពីរ ទន្ទឹមនឹងនេះ លោកឧបនាយករដ្ឋមន្ត្រី ក៏បានស្នើបញ្ចូលក្រសួងបរិស្ថាន និងក្រសួងប្រៃសណីយ៍ និងទូរគមនាគមន៍ ក្នុងគណៈកម្មាធិការសម្របសម្រួលអន្ដររដ្ឋាភិបាលខាងកម្ពុជា។

លោកឧបនាយករដ្ឋមន្ត្រី ក៏បានថ្លែងអំណរគុណផងដែរចំពោះ រដ្ឋាភិបាលចិនដែលបាននាំចូលកសិផលកម្ពុជាយ៉ាងច្រើន ជាពិសេសអង្ករបានចំនួន615.612តោន ចេកបានចំនួន272.023តោន និងស្វាយបានចំនួន211តោន នាពេល8ខែកន្លងមក ដែលជាការរួមចំណែកដ៏ធំធេងដល់ប្រជាកសិករកម្ពុជា ជាពិសេសបានរួមចំណែកដល់សេដ្ឋកិច្ចកម្ពុជា ក្នុងពេលជំងឺកូវីដ-19 នឹងជួយដល់ពលករដែលត្រលប់មកពីប្រទេសថៃបានប្រកបការងារកសិកម្ម។ទន្ទឹមនេះលោកឧបនាយករដ្ឋមន្ត្រី ក៏បានសំណូមពរអោយចិនជួយទិញកសិផលកម្ពុជាបន្ថែមទៀត ជាពិសេសផ្លែមៀនប៉ៃលិន ម្រេច ទុរេន និងស្ករ។

ក្នុងឱកាសនោះដែរឯកឧត្តម វ៉ាង យី បានឆ្លើយតបជម្រុញការសាងសង់ផ្លូវជាតិលេខ71C និងយកចិត្តទុកដាក់ និងជម្រុញបន្ថែមទៀតលើគម្រោងខ្សែកាបិ៍អុបទិកក្រោមបាតសមុទ្ររវាងទីក្រុងព្រះសីហនុ-ទីក្រុងហុងកុង និង បញ្ជូនអ្នកបច្ចេកទេសមកសិក្សាផ្លូវជាតិលេខ3 ដែលមានការខូចខាតប្រវែង20Km និងស្នើអោយសមត្ថកិច្ចកម្ពុជាជួយគ្រប់គ្រងCasino online ដើម្បីកុំប៉ះពាល់ទំនាក់ទំនងរវាងប្រទេសយើងទាំងពីរ។

ដោយៈគង់ សូរិយា

ភ្នំពេញៈ ក្នុងគោលដៅលើកកំពស់ផលិតផលជាតិ សម្រាប់ជាអត្តសញ្ញាណជាតិមួយ Temple Paint ត្រូវបានផលិតឡើង ដើម្បីបង្ហាញពីសមិទ្ឋផលតំណាងឲ្យគុណតម្លៃ និងមោទនភាពជាតិ។

លោកធូន ស៊ីណាន អគ្គនាយកក្រុមហ៊ុន IMCT ដែលកំពុងផលិតថ្នាំលាបម៉ាក Temple Paint បានមានប្រសាសន៍ឱ្យដឹងកាលពីពេលថ្មីៗនេះថា សម្រាប់ថ្នាំលាប Temple Paint ដែលប្រើប្រាស់រូបមន្តចុងក្រោយបង្អស់ នៃបច្ចេកវិទ្យាទំនើប មានការគាំទ្រពីសំណាក់អតិថិជនជាច្រើន ដោយសារគុណភាព និងរយៈពេលប្រើប្រាស់បានយូឆ្នាំ។ ជាពិសេសទៅទៀតនោះគឺបរិមាណ ហើយអត្ថប្រយោជន៍មួយទៀតនោះ គឺគ្មានក្លិនប៉ះពាល់ដល់សុខភាពទៀតផង និងធ្វើឱ្យគេហដ្ឋានរបស់លោកអ្នក មានភាពស្រស់ស្អាត និងគួរឱ្យទាក់ទាញ។

លោកបន្តថា “ដោយសារយើងផ្តោតលើគុណភាព និងការលើកកំពស់បរិស្ថាន ទើបយើងប្រើប្រាស់ថ្នាំលាបនេះ ជាផលិតផលបៃតងដែលរួមចំណែកដល់ការលើកកំពស់មោទនភាពជាតិ”។លោកបន្តថា “យើងបានស្នើសុំទទៅកាន់ក្រសួងពាណិជ្ជកម្ម ជាមួ​យសំណើរដាក់អច្ចឆរិយៈវត្ថុខ្មែរលើថ្នាំលាបនេះ ព្រោះយើងចង់ឲ្យផលិតផលនេះមានគុណតម្លៃស័ក្តិសមនឹងរូបសញ្ញារបស់ខ្លួន”។

ផលិតផលថ្នាំលាប ថេមភល ផេន (Temple Paint) របស់ក្រុមហ៊ុន IMCT Co., Ltd ដែលជាផលិតផលបង្កើតឡើងដោយស្នាដៃកូនខ្មែរ បាននិងកំពុងទទួលបានការគាំទ្រយ៉ាងខ្លាំងពីសំណាក់អតិថិជន ដោយសារគុណភាព និងការបង្កើនសោភ័​ណភាពគេហដ្ឋាន។

លោកធួន ស៊ីណានបានបន្តថា “ផលិតផលនេះបានផលិតតាមរូបមន្ត ផ្សំចុងក្រោយបង្អស់នៃបច្ចេកវិទ្យាទំនើប ដែលមានសមត្ថភាពខ្ពស់ ក្នុងការការពារផ្ទៃជញ្ជាំងឱ្យមានភាពរឹងមាំ និងរលោង”។

ជាងនេះទៅទៀត វាជាប្រភេទថ្នាំ ដែលធន់នឹងទឹក និងអាចលាងសម្អាត ដើម្បីធ្វើឱ្យផ្ទៃជញ្ជាំងទាំងមូលរក្សានូវភាពស្អាត និងរឹងមាំបានយូរអង្វែង ហើយគ្មានធាតុផ្សំ APEO ដែលបង្កផលប៉ះពាល់ទៅដល់បរិស្ថាន។

ក្រុមហ៊ុន IMCT Co., Ltd បានទទួលការអនុញ្ញាតិ ពីរាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីបានប្រើឈ្មោះប្រាសាទអង្គរវត្ត ជាទីគោរពសក្ការៈ នៅក្នុងម៉ាកយីរហោ ផលិតផលថ្នាំលាប របស់ក្រុមហ៊ុន IMCT Co., Ltd៕

ដោយៈសុខុម

បាងកក: ក្រុមហ៊ុនដឹកជញ្ជូនទំនិញតាមផ្លូវដែកជប៉ុន Japan Freight Railway Co បានបើកការិយាល័យតំណាងនៅទីក្រុងបាងកក ដើម្បីពង្រីកការសិក្សាសមិទ្ធលទ្ធភាពអំពីឱកាសអាជីវកម្មក្នុងប្រទេសថៃ។ នេះបើយោងតាមកាសែត Bangkok Post ចុះផ្សាយកាលពីថ្ងៃទី១០ កញ្ញា។

ក្រុមហ៊ុននេះអះអាងថា ខ្លួនទទួលបានការអនុម័តពីរដ្ឋាភិបាលថៃ នៅថ្ងៃទី០២ កញ្ញា សម្រាប់ការបើកការិយាល័យតំណាងក្នុងសង្កាត់ Wattana ក្រុងបាងកក ដែលជាការិយាល័យដំបូងរបស់ខ្លួន នៅខាងក្រៅប្រទេសជប៉ុន។ ការិយាល័យតំណាងនេះ មានបុគ្គលិក២នាក់ រួមទាំងបុគ្គលិកក្នុងស្រុកម្នាក់ផងដែរ។

ក្រុមហ៊ុន Japan Freight Railway បាននិងកំពុងផ្តល់ការគាំទ្រដល់សេវាកម្មដឹកជញ្ជូនទំនិញតាមផ្លូវដែក ក្នុងស្រុកចាប់តាំងពីឆ្នាំ២០១៥ ក្រោមកិច្ចព្រមព្រៀងមួយរវាងអាជ្ញាធរដឹកជញ្ជូនជប៉ុន និងអាជ្ញាធរដឹកជញ្ជូនថៃ ខណៈកំពុងស្វែងរកកន្លែងឈរជើងដ៏រឹងមាំនៅក្នុងប្រទេសក្បែរខាងរបស់កម្ពុជាមួយនេះ។

ការិយាល័យតំណាងថ្មីនេះ នឹងផ្ដល់លទ្ធភាពឱ្យក្រុមហ៊ុនខាងលើ ប្រមូលព័ត៌មាន និងធ្វើសកម្មភាពផ្សេងៗទៀត កាន់តែទូលំទូលាយជាងមុន តាមរយៈការទាញយកអត្ថប្រយោជន៍ ពីចំណេះជំនាញរបស់ខ្លួនផ្នែកដឹកជញ្ជូន និងដំណើរការជួសជុលថែទាំ។

រដ្ឋាភិបាលថៃ កំពុងពិចារណាផ្តល់សម្បទានប្រតិបត្តិការ ដល់ស្ថាប័នឯកជននានា ខណៈកំពុងជួសជុលកែលម្អ ហេដ្ឋារចនាសម្ព័ន្ធរបស់ខ្លួនឱ្យកាន់តែល្អប្រសើរ ខណៈខ្លួនមានគម្រោងរៀបចំរចនាសម្ព័ន្ធប្រព័ន្ធផ្លូវដែក ដែលគ្រប់គ្រងដោយរដ្ឋ ហើយនេះជាចំណាត់ការមួយ ដែលអាចជួយត្រួសត្រាយផ្លូវ សម្រាប់ការពង្រីកអាជីវកម្មដ៏ធំដោយក្រុមហ៊ុន Japan Freight Railway៕

ដោយៈលក្ខិណា

ភ្នំពេញៈ រដ្ឋបាលតាមបណ្ដាខេត្តមួយចំនួន បានចាប់ផ្ដើមប្រកាសពីការបិទបញ្ចប់យុទ្ធនាការចាក់វ៉ាក់សាំងជូនប្រជាពលរដ្ឋ ដែលមានន័យប្រជាពលរដ្ឋ ក្នុងខេត្តទាំងនោះបានទទួលវ៉ាក់សាំងគ្រប់គ្នាឬស្ទើរតែគ្រប់គ្នាអស់ទៅហើយ។

ការបិទបញ្ចប់យុទ្ធនាការនេះ គឺជាសញ្ញាវិជ្ជមានសម្រាប់ការបើកឡើងវិញនៃសេដ្ឋកិច្ច និងសង្គមកម្ពុជា បន្ទាប់ពីបានរឹតបន្តឹងវិធានការ អស់រយៈពេលជិត១ឆ្នាំមកហើយជាពិសេសចាប់តាំងពីព្រឹត្តិការណ៍២០កុម្ភៈ ២០២១ ។

យោងតាមសេចក្តីប្រកាសព័ត៌មាន របស់រដ្ឋបាលខេត្តកែបឱ្យដឹងថា ខេត្តកែបបានបិទបញ្ចប់ នូវយុទ្ធនាការចាក់វ៉ាក់សាំងជូនពលរដ្ឋ អាយុចាប់ពី១៨ឆ្នាំឡើងជាស្ថាពរ ដោយបានចាក់ជូនពលរដ្ឋ សរុបដូសទី២ប្រមាណ៩៦ភាគរយ ឬស្មើនឹងចំនួន២៦.៩២០នាក់ ។ ចំណែកការចាក់វ៉ាក់សាំងសម្រាប់កុមារ និងយុវវ័យអាយុពី១២ឆ្នាំ ដល់ក្រោម១៨ឆ្នាំមានចំនួន៤.៧៨៣នាក់ ឬស្មើនឹង៧៦ភាគរយ។

ងាកទៅមើលខេត្តប៉ៃលិនវិញ ក៏បានប្រកាសបិទបញ្ចប់យុទ្ធនាការផងដែរ ក្នុងនោះលោកស្រីបាន ស្រីមុំ អភិបាលខេត្តប៉ៃលិនបានឱ្យដឹងថា ប្រជាពលរដ្ឋទូទាំងខេត្តប៉ៃលិន អាយុ១៨ឆ្នាំឡើង បានចាក់វ៉ាក់សាំងដូសទី១ បានចំនួន៤២,០៥៣ ស្មើនឹង១០២,៥៧ភាគរយ កុមារអាយុចាប់ពី១២ឆ្នាំ ដល់ក្រោម១៨ឆ្នាំ បានចាក់វ៉ាក់សាំងដូសទី១ បានចំនួន ៨,៦១៣នាក់ ស្មើនឹង៨៦,០៥ភាគរយ។

ជាមួយគ្នានេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានគូសបញ្ជាក់ថា ការបង្កើតឱ្យមាន នូវភាពស៊ាំក្នុងសហគមន៍ទប់ទល់ ទៅនឹងជំងឺកូវីដ-១៩ ជាយុទ្ធសាស្ត្រសំខាន់របស់រាជរដ្ឋាភិបាល ក្នុងការឈានទៅបើកដំណើរការជាប្រប្រតីឡើងវិញលើគ្រប់វិស័យ ហេតុនេះយុទ្ធនាការចាក់វ៉ាក់សាំងបង្ការជំងឺកូវីដ-១៩ ដែលរាជរដ្ឋាភិបាលបានប្រកាស ផ្តល់ជូនប្រជាពលរដ្ឋនៅទូទាំងប្រទេស កាលពីដើមខែកុម្ភៈ ឆ្នាំ២០២១ ពេលនេះសម្រេចបាន ប្រមាណជាង៩០%ហើយ នៅទូទាំងប្រទេស ដែលនេះ បង្ហាញឲ្យឃើញពីកិច្ចខិតខំប្រឹងប្រែងរបស់ ប្រមុខរាជរដ្ឋាភិបាល ក្នុងការគិតគូរពីសុខុមាលភាព និងជីវភាពរស់នៅរបស់ ប្រជាពលរដ្ឋទូទាំងប្រទេស៕

ដោយៈសុជាតា

ប្រទេសថៃៈ ក្រុមហ៊ុន Big C Supercenter Plc មានផែនការបង្កើនការវិនិយោគក្នុងការពង្រីកអាជីវកម្មលក់រាយ នៅទីផ្សារកម្ពុជាសម្រាប់រយៈពេល៥ឆ្នាំខាងមុខ នេះបើយោងតាមការចេញផ្សាយដោយសារព័ត៌មាន Bangkok Post។

លោក Gary Hardy ប្រធានមន្រ្តីប្រតិបត្តិការ មានប្រសាសន៍ឲ្យដឹងកាលពីសប្តាហ៍មុនថា ជាមួយនឹងផែនការអាជីវកម្មប្រាំឆ្នាំរបស់យើង ក្រុមហ៊ុនមានគោលបំណងក្នុងការក្លាយទៅជាអ្នកលក់រាយលំដាប់លេខ១ នៅប្រទេសកម្ពុជា នៅក្នុងតម្លៃ ទំហំ និងភាគរយក្នុងចំណោមអតិថិជនកម្ពុជា។

លោកបញ្ជាក់ថា ក្រុមហ៊ុននឹងបើកហាង Big C រាប់រយនៅទំហំ និងទម្រង់ខុសៗគ្នា នៅរាជធានីភ្នំពេញ និងទីក្រុងធំៗដូចជាសៀមរាប និងបាត់ដំបង ដោយខ្នាតជា HyperMarkets ទីផ្សារទំនើប និង Big C ខ្នាតតូច។
ខណៈដែរតួលេខវិនិយោគ មិនត្រូវបង្ហាញជាសាធារណៈ លោកនិយាយបន្ថែមទៀតថា ការពង្រីកទីផ្សារតាមរយៈការលក់ Franchise ជាបន្តបន្ទាប់នៅថ្ងៃអនាគត។

ជាកស្តែង ក្រុមហ៊ុនបានពង្រីកអាជីវកម្ម នៅទីផ្សារកម្ពុជាលើកដំបូង នៅតាមបណ្តោយព្រំដែនអន្តរជាតិ ប៉ោយប៉ែតកាលពីប៉ុន្មានឆ្នាំមុន។

នាពេលបច្ចុប្បន្ននេះ ផ្សារទំនើប Big C បានបើកផ្សារ Mni Big C នៅផ្សារដេប៉ូតាមបណ្តោយមហាវិថី Nehru នៅរាជធានីភ្នំពេញផងដែរ។

លោក Hardy បានបញ្ជាក់ថា “ប្រទេសកម្ពុជា ប្រទេសទីបីនៅក្នុងតំបន់អាស៊ីអាគ្នេយ៍ ដែលក្រុមហ៊ុនបានពង្រីកទៅដល់ បន្ទាប់បើកជោគជ័យនៅក្នុងប្រទេសឡាវ និងថៃ។ យើមានសុទិដ្ឋិនិយម ថាការបើកហាងនៅទីផ្សារកម្ពុជា នៅក្នុងអំឡុងវិបត្តិសកលនេះ ដោយសារតែសំឡឹងមើលសក្តានុពលទីផ្សាររយៈពេលវែង”។

សម្រាប់ប្រជាជនកម្ពុជាដែលមាន១៦លាននាក់ និងទីតាំងតំបន់ពាណិជ្ជកម្ម ដូចជា រាជធានីភ្នំពេញ ដែលផ្តល់អោយនូវរសជាតិផលិផលតដូចគ្នា សម្រាប់ប្រជាជនកម្ពុជា និង ថៃ ដែលកត្តាទាំងនេះ ផ្តល់ឱកាសវិនិយោគសម្រាប់ក្រុមហ៊ុន Big C ក្នុងការពង្រីកផលិតផល និងស្លាកសញ្ញា ដូចជា Happy Price និង Besico ផងដែរ។
ចំពោះការដឹកជញ្ជូន និងចង្វាក់់ផ្គត់ផ្គង់ ត្រូវបានអភិវឌ្ឍជាបន្តបន្ទាប់ដោយឆ្លងកាត់ព្រំដែនពីទីក្រុងបាងកក ទៅដល់ទីក្រុងប៉ោយប៉ែត និងប្រទេសវៀតណាម ទៅប្រទេសកម្ពុជាផងដែរ។

លោក Hardy មានប្រសាសន៍បន្ថែមទៀតថា ក្រុមហ៊ុនរំពឹងថានឹងពង្រីកអាជីវកម្មនៅទីផ្សារកម្ពុជា ដោយមិនគ្រាន់តែផ្តល់ចំណេះដឹង ទាក់ទងវិស័យលក់រាយប៉ុណ្ណោះនោះ​ទេ ប៉ុន្តែក្រុមហ៊ុននឹងផ្តល់ឱកាសការងារ រាប់ពាន់កន្លែងសម្រាប់រយៈពេល៥ឆ្នាំខាងមុខ។

សម្រាប់ទីផ្សារលក់រាយនៅកម្ពុជា គឹមានការទាក់ទាញខ្លាំងដោយការអភិវឌ្ឍទីផ្សារនេះ ដូចគ្នានឹងប្រទេសថៃកាលពី២០ឆ្នាំមុន ពេលដែលប្រជាជនបានផ្លាស់ប្តូរទម្លាប់ពីដើរទំនិញតាមទីផ្សារប្រពៃណី ទៅជាដើរទិញទំនិញតាមទីផ្សារទំនើបលក់រាយវិញ។

ក្រុមហ៊ុន Big C មានផ្សារទំនើបខ្នាតធំ (hypermarket) ប្រមាណ១៥២ហាង ផ្សារទំនើបខ្នាតមធ្យមប្រមាណ៦១ហាង និងផ្សារខ្នាតតូចប្រមាណ១២៥៩ហាង និងហាងឱសថប្រមាណ១៤៤ហាងផងដែរ៕

ដោយៈគង់ សុរិយា

ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រ​សាសន៍ឲ្យដឹងថា អ្នកវិនិយោគចិនបានមកកម្ពុជាបណ្តើរៗហើយ ដោយយើងសង្ឃឹមថា ក្រោយដំណើរទស្សនកិច្ចរបស់លោកវ៉ាង យីមកកម្ពុជា អ្នកវិនិយោគចិននឹងមកកាន់កម្ពុជាកាន់តែច្រើនថែមទៀត។

លោកឧកញ៉ាបានមានប្រសាសន៍ឲ្យដឹង តាមប្រព័ន្ឋតេឡេក្រាម កាលពីរាត្រីថ្ងៃទី១០ កញ្ញាកន្លងមកថា ដំណើរទស្សនកិច្ចរបស់លោកវ៉ាង យីទីប្រឹក្សារដ្ឋនិងជារដ្ឋមន្រ្តីក្រសួងការបរទេសចិន មកទស្សនកិច្ចនៅកម្ពុជាចាប់ពីថ្ងៃទី១២ ដល់១៣កញ្ញាខាងមុខនេះ មានភាពស្របគ្នាល្អណាស់ ដែលសភាជាតិរបស់កម្ពុជា បានអនុម័តកិច្ចព្រមព្រៀងពាណិជ្ជកម្មសេរីកម្ពុជា​ ចិន ដែលនឹងដាក់ឲ្យប្រើប្រាស់ ក្រោយព្រះមហាក្សត្រឡាយ ព្រហស្ថលេខា វាជារឿងអបអរសាទរមួយហើយ។

ទី២ ការអញ្ជើញមកទស្សនកិច្ចរបស់ឯកឧត្តម គឺគាត់អញ្ជើញមកប្រគល់សំណង់អាគារពហុកីឡដ្ឋានមរតកតេជោជូនកម្ពុជា ដែលជាអំណោយដ៏ថ្លៃថ្លាមិនអាចកាត់ថ្លៃបានពីមិត្តចិន ដល់កម្ពុជា ដែលនឹងរៀបចំធ្វើម្ចាស់ផ្ទះកីឡស៊ីហ្គេម នាឆ្នាំ២០២៣ខាងមុខនេះ វាជាកិត្តិយសមួយទៀតសម្រាប់កម្ពុជា ដែលលើកមុខមាត់កម្ពុជានាពេលខាងមុខនេះ។

លោកឧកញ៉ាលឹម ហេងបានបន្តថា “ចំណងមិត្តភាពដូចដែកថែបរបស់កម្ពុជា និងភាពជាដៃគូយុទ្ឋសាស្រ្តគ្រប់ជ្រុងជ្រោយរវាងកម្ពុជា ចិន ដែលមិត្តចិនបានគាំទ្រកម្ពុជាទាំងផ្នែកសេដ្ឋកិច្ច និងនយោបាយនេះ ក៏ជាការបង្ហាញឲ្យវិនិយោគចិនបរទេស ពិសេសវិនិយោគិន​ចិនកាន់តែមានទំនុកចិត្តមកវិនិយោគនៅកម្ពុជា”។ លោកបន្តថា “ខ្ញុំគិតថាដំណើរទស្សន​កិច្ចនេះ ជាផលចំណេញដ៏ធំសំរាប់កម្ពុជា ជាប្រទេសតូចមួយ ដែលមហាអំណាចដ៏ធំយក​ចិត្តទុកដាក់ក្នុងភាពជាដៃគូស្មើមុខ ស្មើមាត់លើកិច្ចសហប្រតិបត្តិការអន្តរជាតិ”។

ជាមួយគ្នានេះ លោកឃាង ភារម្យអ្នកនាំពាក្យរដ្ឋបាលខេត្តព្រះសីហនុបានមានប្រ​សាសន៍ឲ្យដឹងកាលពីសប្តាហ៍មុនថា អ្នកវិនិយោគចិន ដែលបានវិនិយោគគំរោងនៅកម្ពុជា បានចាប់ផ្តើមវិលត្រលប់មកកាន់ ក្រុងព្រះសីហនុបណ្តើរៗឡើងវិញហើយ ខណៈជើងហោះហើររបស់អាកាសចរណ៍កាន់តែមានភាពសកម្មជាងមុន។
លោកបន្តថា “វត្តមានរបស់អ្នកវិនិយោគចិន ពិតជាបានឈានជើងមកកាន់ក្រុងព្រះសីហនុហើយ ពិសេសអ្នកវិនិយោគ ដែលបានបោះទុនវិនិយោគនៅខេត្តមួយនេះ”៕