ដោយៈសុខុម

សេអ៊ូល: ក្រុមហ៊ុន LG Display Co Ltd បានប្រកាសនៅថ្ងៃអង្គារ ទី១៧ សីហា នេះថា ខ្លួនមានគម្រោងបោះទុនវិនិយោគចំនួន៣.៣ទ្រីលានវ៉ុន (២.៨ពាន់លានដុល្លារអាមេរិក) ដើម្បីសាងសង់រោងចក្រផលិតទូរស័ព្ទ និងទូរទស្សន៍។

យោងតាមការចុះផ្សាយរបស់សារព័ត៌មានCNA ឱ្យដឹងថា ក្រុមហ៊ុនផលិតអេក្រង់ទូរស័ព្ទ និងទូរទស្សន៍របស់កូរ៉េខាងត្បូង មួយនេះបាននិយាយថា ការវិនិយោគនេះនឹងធ្វើឡើងចាប់ពីខែសីហា ឆ្នាំ២០២១ នេះរហូតដល់ខែមីនា ឆ្នាំ២០២៤។

អ្នកនាំពាក្យក្រុមហ៊ុននេះបានគូសបញ្ជាក់ថា ការវិនិយោគនេះ នឹងធ្វើឡើងនៅក្នុងប្រទេសកូរ៉េខាងត្បូង សម្រាប់ការផលិតអេក្រង់ OLED ជំនាន់ទី៦ ហើយតាមការរំពឹងទុករោងចក្រនេះ នឹងចាប់ផ្តើមដំណើរការនៅឆ្នាំ២០២៤។ ទោះជាយ៉ាងណា អ្នកនាំពាក្យដដែលមិនបានបញ្ជាក់លម្អិតបន្ថែមទៀតនោះទេ។

ក្រុមអ្នកវិភាគបានលើកឡើងថា យុទ្ធសាស្រ្តរបស់ក្រុមហ៊ុន LG Display នៅក្នុងការពង្រីកការផលិតអេក្រង់ OLED បានធ្វើឱ្យខ្លួនទទួលបានប្រាក់ចំណេញ ប្រតិបត្តិការប្រសើរជាងការរំពឹងទុកនៅក្នុងត្រីមាសទី២ ដល់៧០១ពាន់លានវ៉ុន (៦០៧លានដុល្លារអាមេរិក)។

អេក្រង់ OLED ជាប្រភេទអេក្រង់ ដែលផ្ដល់គុណភាពរូបភាពច្បាស់ល្អ ម៉ត់ និងត្រជាក់ភ្នែក ហើយមានតែទូរទស្សន៍ស៊េរីថ្មីៗ របស់ក្រុមហ៊ុន LG និងក្រុមហ៊ុន Sony ប៉ុណ្ណោះដែលបំពាក់អេក្រង់ OLED៕

ដោយៈតារា

កំពតៈ ប្រជាពលរដ្ឋរស់នៅក្នុងរដ្ឋបាលក្រុងបូកគោ បានបង្ហាញក្តីសប្បាយរីករាយ ក្រោយពេលបានទទួលដំណឹងស្តីពី ការដាក់ឲ្យដំណើរការរដ្ឋបាលក្រុងបូកគោជាផ្លូវការកាលពីថ្ងៃទី១២ ខែសីហាកន្លងមកនេះ ។

ពួគគាត់ជឿជាក់ថា ភូមិដ្ឋានរបស់គាត់ នឹងមានការអភិវឌ្ឍន៍លឿនជាងមុន ហើយការងាររកស៊ីទទួលទាន និងការទទួលសេវាផ្សេងៗពីរដ្ឋ កាន់តែងាយស្រួល និងប្រសើរជាងមុនដែរ។

អាជីវករលក់ដូរគ្រឿងអលង្ការ និងសម្លៀកបំពាក់នៅផ្សារត្រពាំងរពៅ ក្នុងសង្កាត់ព្រែកត្នោត ក្រុងបូកគោ លោកស្រី ច្រិបបានឲ្យដឹងនាព្រឹកថ្ងៃទី១៧ សីហានេះថា គ្រាន់តែបានឭដំណឹងថា រដ្ឋបាលក្រុងបូកគោ ត្រូវបានប្រកាសដាក់ឲ្យដំណើរការ លោកស្រីមានសេចក្តីត្រេកអរ សប្បាយចិត្តណាស់ ព្រោះពេលភូមិដ្ឋានរបស់ខ្លួន ត្រូវបានកាត់បញ្ចូលជាក្រុង អ្នកវិនិយោគប្រាកដជាមកច្រើនជាងមុន ទាំងវិស័យទេសចរណ៍ និងក្រុមហ៊ុនឧស្សាហកម្មផ្សេងៗ ធ្វើឲ្យមនុស្សមកច្រើន ការលក់ដូរដាច់ ជីវភាពក៏ប្រសើរជាងមុន។

ម្យ៉ាងទៀតកន្លែងទទួលសេវាផ្សេងៗពីរដ្ឋ ក៏នៅជិតផ្ទះ មិនពិបាកធ្វើដំណើរទៅឆ្ងាយដូចមុនឡើយ។

លើកឡើងស្រដៀងគ្នានេះ លោក ស្រីឈុន ផេងណាយ រស់នៅសង្កាត់ព្រែកត្នោត ក្រុងបូកគោ បានប្រាប់ឲ្យដឹងដែរថា គ្រាន់តែខេត្តប្រកាសដាក់ឲ្យដំណើរការក្រុងបូកគោភ្លាម ក្រុមហ៊ុនវិនិយោគជាច្រើនបានចាប់ផ្តើមដាក់គ្រឿងចក្រ ដំណើរការសាងសង់ទីស្នាក់ការក្រុមហ៊ុនខ្លួន នៅខាងមុខផ្ទះក៏មាន ក្រោយផ្ទះក៏មាន។

ពលរដ្ឋទាំងនោះជឿជាក់ថា ក្នុងពេលដ៏ខ្លីខាងមុខនេះ ភូមិដ្ឋានរបស់ពួកគេ ក៏ដូចជាក្រុងបូកគោទាំងមូល  និងមានការអភិវឌ្ឍន៍ រីកចម្រើនលើគ្រប់វិស័យ មិនចាញ់ក្រុងកំពតឡើយ។

ក្រុងបូកគោមានបីសង្កាត់ ក្នុងនោះសង្កាត់បឹងទូក មាន៣ភូមិ, សង្កាត់កោះតូច មាន៤ភូមិ និងសង្កាត់ព្រែកត្នោត មានភូមិចំនួន៤ មានប្រជាជន៥.០២៤គ្រួសារ ស្មើនឹង ២៣.៣១៦នាក់។

អគ្គនាយកក្រុមហ៊ុនអភិវឌ្ឍន៍ដីឡូត៍បូកគោលែនដ៏ លោកCoolor Tanបានមានប្រសាសន៍ថា ទីក្រុងបូកគោនឹងមានការរីកចម្រើនលឿន ដោយសារវាជាទីក្រុងដែលមាន​ទស្សនទានអភិវឌ្ឍន៍ជាទីក្រុងបៃតង ដែលផ្តល់ការគាំពារដល់បរិស្ថាន ពិសេសទីក្រុងនេះបានទាក់ទាញអ្នកអភិវឌ្ឍន៍ជាច្រើនរួចមកហើយ និងកំពុងបន្ត ដើម្បីអភិវឌ្ឍន៍នៅទីក្រុងនេះស្របតាមផែនការនិងចក្ខុវិស័យរបស់ប្រមុខរាជរដ្ឋាភិបាល។

លោកបន្តថា “ដោយសារទីតាំងមានភាពអំណោយផល លើលក្ខខ័ណ្ឌអាកាសធាតុ សណ្ឋានដី និងទេសភាពព្រៃភ្នំ តម្លៃដីធ្លីនៅទីក្រុងបូកគោ នឹងកើនឡើងលឿននាពេលខាងមុខ”៕

ដោយៈគង់ សូរិយា

ភ្នំពេញៈ ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកបណ្ឌិតអូន ព័ន្ឋមុនីរ័ត្នថ្លែងថា កម្ពុជារំពឹងសម្រេចបានកំនើនសេដ្ឋកិច្ច៤,០ភាគរយនៅឆ្នាំ​២០២០ ប៉ុន្តែព្រឹត្តិការណ៍សហគមន៍២០កុម្ភៈ  រួមនឹងវត្តមានវីរុសបំប្លែងថ្មីDelta បានធ្វើឲ្យកំណើនកម្ពុជានៅឆ្នាំនេះ អាចសម្រេចបានកំនើនមកនៅត្រឹម២,៤ភាគរយ។

លោកអគ្គបណ្ឌិតសភាចារ្យបានថ្លែងក្នុងសិក្ខាសាលា ស្វែងយល់អំពីការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងហិរញ្ញវត្ថុសាធារណៈឆ្នាំ២០២២ ជាមួយគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភាតាមរយៈវីដេអូZoomនាព្រឹកថ្ងៃទី១៧ សីហានេះថា ដូចបណ្តាប្រទេសនានានៅលើសកលលោក ដែលឆ្នាំ២០២០ ជាឆ្នាំដែលស្ថានភាពម៉ាក្រូសេដ្ឋកិច្ចកម្ពុជា ជួបការលំបាកបំផុតជាប្រវត្តិសាស្រ្តធ្វើឲ្យកំណើនសេដ្ឋកិច្ច បានធ្លាក់ចុះក្នុងអត្រា-៣,១ភាគរយ ដោយសារការធ្លាក់ចុះតម្រូវការសកល ការបង្អាក់ដល់ខ្សែច្រវាក់ផលិតកម្មសកល ដែលបង្ករឡើងដោយជំងឺកូវីដ១៩។

លោកអគ្គបណ្ឌិតសភាចារ្យ អូន ព័ន្ធមុនីរ័ត្នបានបន្តថា នៅក្នុងការប្រយុទ្ធប្រឆំាងជំងឺកូវីដ១៩នេះ រដ្ឋាភិបាលបានបញ្ចេញថវិកាអន្តរាគមន៍ ក្នុងទំហំប្រមាណ៧១៩លានដុល្លារ ក្នុងយុទ្ធនាការការពារអាយុជីវិតពលរដ្ឋ រក្សាលំនឹងជីវភាពប្រជាពលរដ្ឋ និងការទ្រទ្រង់សកម្មភាពអាជីវកម្ម  ប៉ុន្តែដោយសារមានព្រឹត្តិការណ៍២០កុម្ភៈ  ទំហំថវិកាសម្រាប់អន្តរាគមន៍កូវីដ១៩ អាចមានដល់១.៤៥៤លានដុល្លារ។

លោកបន្តថា “ការដែលមានថវិកាប្រើប្រាស់នៅគ្រាអាសន្ន មិនមែនជាការដៃដន្យនោះទេ ប្រាក់សន្សំនេះកើតចេញពីការគិតគូរ ប្រកបដោយភាពមធ្យ័តប្រកបដោយចក្ខុវិស័យវែងឆ្ងាយរបស់រាជរដ្ឋាភិបាល”។

ជាមួយគ្នានេះ លោកជំទាវកិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា តំណាងដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភាបានថ្លែងថា ទោះបីជាក្នុងរយៈពេលពីរឆ្នាំចុងក្រោយនេះ  កម្ពុជាយើងប្រឈមនឹងវិបត្តិជំងឺរាតត្បាតកូវីដ១៩  ធ្វើឱ្យប៉ះពាល់យ៉ាងធ្ងន់ធ្ងរ ដល់សុខភាពសាធារណៈ សេដ្ឋកិច្ច សង្គម និងជីវ​ភាពរស់នៅរបស់ប្រជាពលរដ្ឋយ៉ាងណាក្តី  ក្រោមការដឹកនាំរបស់រាជរដ្ឋាភិបាលយើងនៅតែអាចរក្សាបាននូវស្ថិរភាពម៉ាក្រូសេដ្ឋកិច្ច និងហិរញ្ញវត្ថុ និងបានកាត់បន្ថយផល់ប៉ះពាល់ដល់សង្គម និងសេដ្ឋកិច្ចឱ្យស្ថិតក្នុងកម្រិតទាប។

លោកជំទាវបន្តថា “អ្វីដែលពិសេស និងគួរឱ្យកត់សម្គាល់នោះគឺ ក្នុងកាលៈទេសៈនៃវិបត្តិជំងឺកូវីដ-១៩  រាជរដ្ឋាភិបាលបានប្តេជ្ញាចិត្តយ៉ាងមោះមុត ក្នុងការសង្គ្រោះ ការពារអាយុជីវិត និងសុខុមាលភាពរបស់ប្រជាពលរដ្ឋ ដែលទទួលរងដោយសារជំងឺនេះ ដោយមិនទុកឱ្យនរណាម្នាក់ស្លាប់ ដោយមិនបានទទួលការព្យាបាល បានថែទាំងអ្នកកើតជំងឺកូវីដដោយមិនគិតថ្លៃ និងបានប្តេជ្ញាចិត្តចាក់វ៉ាក់សាំងការពារជំងឺកូវីដ ជូនប្រជាជនឱ្យបានយ៉ាងតិច១០លាននាក់នៅក្នុងឆ្នាំនេះ”។

លោកជំទាវឃួន សុដារីបានបន្តថា យុទ្ធសាស្ត្រវ៉ាក់សាំងនេះ បានទទួលជោគ ជ័យគួរឱ្យកត់ សម្គាល់ក្នុងការប្រយុទ្ធប្រឆាំង ទៅនឹងជំងឺរាតត្បាតនេះ ដោយសារតែមានការដឹកនាំដ៏ឈ្លាសវៃ និងចក្ខុវិស័យវែងឆ្ងាយរបស់សម្តេចនាយករដ្ឋមន្ត្រី និងដោយមានការចូលរួមគាំទ្រពីប្រទេសជាមិត្ត សហគមន៍អន្តរជាតិ ដៃគូអភិវឌ្ឍន៍ វិស័យឯកជន និងបងប្អូនប្រជាពលរដ្ឋរបស់យើង៕

ដោយៈសុខុម

សិង្ហបុរី: ការលក់ផ្ទះឯកជនថ្មីៗនៅសិង្ហបុរី មានសន្ទុះកើនឡើងខ្ពស់រហូតដល់ទៅ៨២,២%ក្នុងខែកក្កដា ទោះជាបីមានវិធានការយ៉ាងតឹងរ៉ឹង ដើម្បីទប់ស្កាត់ការរីករាលដាលវីរុសកូវីដ-១៩យ៉ាងណាក្ដី ហើយការកើនឡើងនេះកើតមានឡើង ក្រោយពីធ្លាក់ចុះ  រយៈពេល៣ខែជាប់គ្នា។

យោងតាមទិន្នន័យដែលបានចេញដោយអាជ្ញាធរអភិវឌ្ឍន៍ទីក្រុង (Urban Redevelopment Authority) កាលពីថ្ងៃច័ន្ទ ទី១៦ សីហា បង្ហាញថា ក្រុមហ៊ុនអភិវឌ្ឍន៍នានាលក់ផ្ទះ បានរហូតដល់ទៅ១.៥៨៩យូនីតក្នុងខែកក្កដា បើធៀបទៅនឹងចំនួន៨៧២យូនីតដែលលក់បានក្នុងខែមិថុនា ដោយនេះមិនទាន់ទាំងរាប់បញ្ចូលខុនដូ Executive Condominium (ប្រភេទខុនដូសម្រាប់អ្នកមានវណ្ណៈកណ្ដាល) ផងទេ។

ទំហំនៃកំនើននេះបានធ្វើឱ្យខែកក្កដា ក្លាយជាខែដែលលក់ផ្ទះបានច្រើន បំផុតទី២ ប្រចាំឆ្នាំ២០២១ បន្ទាប់ពីផ្ទះចំនួន១.៦៣៣យូនីត បានលក់ដាច់ក្នុងខែមករា ដើមឆ្នាំនេះ។

ការអភិវឌ្ឍលំនៅដ្ឋាននៅតំបន់ជាយក្រុង បានទាក់ទាញអ្នកទិញច្រើនបំផុតនៅក្នុងខែកក្កដា ដោយក្រុមហ៊ុនអភិវឌ្ឍន៍នានា លក់ផ្ទះបានចំនួន១.០១២យូនីតនៅតំបន់ Outside Central Region លក់បាន៤៣៨យូនីតនៅតំបន់ Rest of Central Region និងលក់បាន១៣៩យូនីតនៅតំបន់ Core Central Region។

*ការបារម្ភខ្លាចផ្ទះឡើងថ្លៃខ្ពស់

ក្រុមអ្នកវិភាគបានលើកឡើងថា តម្រូវការខ្ពស់នៅខែកក្កដា ត្រូវបានជំរុញដោយកត្តាផ្សេងៗគ្នា រួមមាន ទាំងក្រុមហ៊ុនអភិវឌ្ឍន៍ចង់លក់ ដាក់ឱ្យបានច្រើនបន្ថែមទៀតនៅមុនរដូវកាលសែនឆេងម៉េង ចូលមកដល់ ព្រមទាំងអ្នកទិញបារម្ភខ្លាចផ្ទះហក់ឡើងថ្លៃខ្ពស់ផងដែរ។

ការលក់ផ្ទះដែលមានសន្ទុះកើនឡើងខ្ពស់នេះ បានកើតមានឡើយគួរឱ្យសាទរ ទោះបីជារដ្ឋាភិបាល បានដាក់ចេញវិធានការរឹតបន្តឹងនានា ដើម្បីទប់ស្កាត់ការរីករាលដាលវីរុសកូវីដ-១៩ ដែលបានចូលជាធរមានចាប់ពីថ្ងៃទី២២ ខែកក្កដាយ៉ាងណាក្ដី។

លោកស្រី Christine Sun អនុប្រធានជាន់ខ្ពស់ផ្នែកសិក្សាស្រាវជ្រាវ និងវិភាគមកពីក្រុមហ៊ុនអចលនទ្រព្យ OrangeTee & Tie’s senior បានលើកឡើងថា “វិធានការរឹតបន្តឹងនានាហាក់មិនធ្វើឱ្យប៉ះពាល់ ដល់ទីផ្សារអចលនទ្រព្យច្រើនឡើយ។ ការលក់បានកើនឡើងក្នុងគម្រោងជាច្រើន នៅពេលអ្នកទិញសម្រុកទិញលំនៅដ្ឋានឯកជន”។

ទន្ទឹមនេះ លោក Ismail Gafoor នាយកប្រតិបត្តិក្រុមហ៊ុនអចលនទ្រព្យ PropNex Realty ក៏បានលើកឡើងដែរថា “ដំណឹងអំពីហាងឆេងដីឡើងថ្លៃខ្លាំង បានធ្វើឱ្យមនុស្សជាច្រើនដឹងថា តម្លៃផ្ទះនៅថ្ងៃអនាគតទំនងជាហក់ឡើងបន្ថែមទៀត ទើបបានជាពួកគេសម្រុ​កទិញទាន់តម្លៃនៅល្អ”៕

ដោយៈ មុនីរិទ្ឋ

ភ្នំពេញៈ ការទទួលបានការជាសះស្បើយពីជំងឺកូវីដ១៩ ជាពរជ័យមួយ ដែលគួរតែត្រេកអរ និងខិតខំការពារខ្លួនកុំឲ្យឆ្លងជំងឺនេះសាជាថ្មីម្តងទៀត។

យោង​តាម​ពិធីសារ​ស្តី​ពី​ការ​ធ្វើ​រោគវិនិច្ឆ័យ និង​ការ​ព្យាបាល​ជំងឺ COVID-19 ​របស់​ក្រសួង​សុខាភិបាល​កម្ពុជាបាន​ឲ្យ​ដឹង​ថា អ្នក​ជំងឺ​ត្រូវ​មាន​លក្ខណៈ​គ្រប់​គ្រាន់ ​ស្របតាម​លក្ខខណ្ឌ​ដើម្បី​ចេញ​ពី​មន្ទីរពេទ្យ​ និង​ត្រូវបំពេញ​លក្ខខណ្ឌ​មួយ​ចំនួន​ទៀត​បន្ទាប់​ពី​ចេញ​ពី​មន្ទីរពេទ្យ។ អ្នកជំងឺដែលបានជាសះស្បើយ សូមអនុវត្តន៍តាមវិធានទាំងបួននេះ ដូចជា​ទី១ ត្រូវតាម​ដាន​ស្ថាន​ភាព​សុខភាព​ផ្ទាល់​ខ្លួន​ ដោយ​នៅ​ដាច់​ដោយ​ឡែក​រយៈ​ពេល​១៤​ថ្ងៃ​។ ទី២. ត្រូវពាក់​ម៉ាស និង​អនុវត្ត​អនាម័យ​​ឲ្យ​បាន​ទៀង​ទាត់។

ទី៣ ស្នាក់​នៅ​បន្ទប់​ម្នាក់​ឯង មាន​ខ្យល់​ចេញ​ចូល​បាន​ល្អ កាត់​បន្ថយ​ការ​ទាក់ទង​ជិត​ស្និទ្ធ​ជាមួយ​សមាជិក​គ្រួសារ បរិភោគ​អាហារ​ដោយ​ឡែក​ពី​គ្នា និងទី៤ ត្រលប់​ទៅ​តាមដាន​សុខភាព​វិញ​នៅ​ចន្លោះ​ពី​២-៤​សប្តាហ៍​បន្ទាប់​ពី​ចេញ​ពី​មន្ទីរពេទ្យ។

អ្នក​នាំ​ពាក្យ​ក្រសួង​សុខាភិបាល លោក​ជំទាវ ឱ វណ្ណឌីនបានមានប្រសាសន៍ឲ្យដឹងថា  អ្នក​ជំងឺ​ដែល​ជា​សះ​ស្បើយ​ពី COVID-19 អាច​នឹង​លាប់ ឬឆ្លង​ឡើង​វិញ​គ្រប់​ពេល ប្រសិន​បើ​បុគ្គល​នោះ​ធ្វេស​ប្រហែស មិន​បាន​ការពារ​ខ្លួន​ឲ្យ​បាន​ត្រឹម​ត្រូវ​។

លោកជំទាវបន្តថា “មិន​ថា​ខ្លួន​ឯង​លែង​មាន COVID-19 មិន​បាច់​ការពារ​ទេ គឺ​អត់អ៊ីចឹង​ទេ ត្រូវ​តែ​ការពារ​ខ្លួន”អ្នក​ជំងឺ​ដែល​ជា​សះ​ស្បើយ​ពី​ជំងឺ COVID-19 តម្រូវ​ឲ្យតាម​ដាន​សុខភាព និងមាន​វិធានការ​ការពារ​ខ្លួន ហើយ​បើ​មាន​បញ្ហា​សុខភាព ត្រូវ​ប្រញាប់​ទៅ​ជួប​គ្រូពេទ្យ”៕

ដោយៈសុខុម

អន្តរជាតិ: ការដួលរលំនៃរដ្ឋាភិបាលគាំទ្រដោយសហរដ្ឋអាមេរិក ក្នុងប្រទេសអាហ្វហ្គានីស្ថាន ក្រោមស្នាដៃរបស់ក្រុមសកម្មប្រយុទ្ធតាលីបង់ (Taliban) បានកើតឡើងក្នុងពេលតែមួយប៉ប្រិចភ្នែក ដែលសូម្បីរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងកាប៊ុល នឹងស្មានមិនដល់។

នៅរសៀលថ្ងៃអាទិត្យ ទី១៥ សីហា ឆ្នាំ២០២១ ប្រធានាធិបតីអាហ្វហ្គានីស្ថាន គឺលោក Ashraf Ghani បានរត់ភៀសខ្លួនចេញពីមាតុប្រទេស ហើយក្រុមសកម្មប្រយុទ្ធតាលីបង់ ជិតដណ្ដើមបានការកាន់កាប់ប្រទេសទាំងមូលជាថ្មីឡើងវិញនោះ ប្រធានាធិបតីសហរដ្ឋអាមេរិក លោកចូ បៃឌិន បានបញ្ជាឱ្យបញ្ជូនកងទ័ពបន្ថែមរាប់ម៉ឺននាក់បន្ថែមដើម្បីជួយជម្លៀសមន្ត្រីការទូតអាមេរិក និងមនុស្សសំខាន់ៗផ្សេងទៀតចេញពីរដ្ឋធានីកាប៊ុល ដោយសុវត្ថិភាព។

ក្រោយពេលដកចេញអស់ ក្រុមសកម្មប្រយុទ្ធតាលីបង់ ក៏បានចូលកាន់កាប់ប្រ​ទេសអាហ្វហ្គានីស្ថាន ទាំងមូលយ៉ាងស្រួល ក្រោយការប៉ះទង្គិចគ្នាផ្នែកប្រដាប់អាវុធរប៉េះរប៉ោះ។ ព្រឹត្តិការណ៍នេះបានធ្វើឱ្យពលរដ្ឋខ្មែរ នឹកឃើញដល់ព្រឹត្តិការណ៍ថ្ងៃទី១៧ មេសា ឆ្នាំ១៩៧៥ ជាពេលដែលកងទ័ពខ្មែរក្រហម បានចូលកាន់កាប់ក្រុងភ្នំពេញ និងឈានទៅដល់ការសម្លាប់រង្គាលពលរដ្ឋខ្មែរ អស់រាប់លាននាក់ មុនមានការរំដោះថ្ងៃទី៧ មករា ឆ្នាំ១៩៧៩។

ងាកមកអាហ្វហ្គានីស្ថានវិញ សង្គ្រាមរបស់សហរដ្ឋអាមេរិក ប្រឆាំងនឹងក្រុមសកម្មប្រយុទ្ធតាលីបង់ និងក្រុមភេរវកម្មអាល់កៃដា (Al-Qaeda) នៅក្នុងប្រទេសនេះបានចាប់ផ្ដើមកាលពីប្រមាណ២០ឆ្នាំមុន។

រយៈពេល២០ឆ្នាំមិនមែន២០ថ្ងៃនោះឡើយ តែចុងក្រោយ ប្រទេសអាហ្វហ្គានីស្ថាន នៅតែធ្លាក់ចូលក្នុងកណ្ដាប់ដៃរបស់ក្រុមសកម្មប្រយុទ្ធតាលីបង់ ដែលធ្វើឱ្យប្រទេសនេះធ្លាក់ចូលក្នុងយុគអន្ធកាល ដែលអាចមានវាសនាដូចកម្ពុជាក៏ថាបាន។ កត្តានេះបានធ្វើឱ្យមជ្ឈដ្ឋានទូទៅចោទជាសំណួរថា តើការឈរជើងរបស់កងទ័ពអាមេរិក នៅអាហ្វហ្គានីស្ថាន រយៈពេល២០ឆ្នាំមកនេះ ដើម្បីជួយពង្រឹងវិស័យយោធា ឬដើម្បីលួចធនធានធម្មជាតិរបស់ប្រទេសនេះ? តើប្រមូលយកធនធានធម្មជាតិ ក្នុងប្រទេសនេះអស់ហើយ ទើបសហរដ្ឋអាមេរិក សម្រេចដកទ័ពចេញឬយ៉ាងណា?។

មតិមួយចំនួនលើកឡើងថា ប្រសិនបើសហរដ្ឋអាមេរិក ពិតជាមានបំណងជួយប្រ​ទេសនេះ និងខិតខំពង្រឹងសមត្ថភាពប្រយុទ្ធរបស់កងទ័ពអាហ្វហ្គានីស្ថាន ឱ្យអស់ពីចិត្តពីថ្លើមក្នុងរយៈពេល២០ឆ្នាំមកនេះប្រាកដមែន ម្លេះកងទ័ពជាតិនៃប្រទេសនេះ មានសមត្ថភាពខ្លាំងមិនធម្មតាឡើយ ដែលក្រុមសកម្មប្រយុទ្ធ និងក្រុមភេរវកម្មមិនអាចវាយដណ្ដើមកាន់កាប់ប្រទេសបាន ដោយងាយស្រួលដូចបកចេកបែបនេះឡើយ។

មតិបានលើកឡើងទៀតថា សហរដ្ឋអាមេរិក ប្រហែលមិនមែនចូលធ្វើសង្គ្រាមដើម្បីការពារប្រជាជន និងទឹកដីអាហ្វហ្គានីស្ថាន ដោយសុចរិតនោះឡើយ ពោលគឺមានបំណងផ្សេងតាំងពីដំបូង នោះគឺដើម្បីប្រមូលយកផលប្រយោជន៍ ព្រោះប្រទេសនេះសម្បូរទៅដោយធនធានធម្មជាតិ។ ហើយនេះប្រហែលជាសហរដ្ឋអាមេរិក សម្រេចដកទ័ពចេញ ក្រោយពីលួចយកធនធានធម្មជាតិរបស់ប្រទេសនេះអស់ក៏មិនដឹង។

យោងតាមការស្រាវជ្រាវបង្ហាញថា ប្រទេសនេះសម្បូរដោយធនធានធម្មជាតិ ជាពិសេសធនធានរ៉ែសំខាន់ៗ ដូចជា រ៉ែមាស រែទង់ដែង រ៉ែដែក រ៉ែស័ង្កសី ថ្មម៉ាប ត្បូង និងធនធានរ៉ែជាច្រើនទៀតរាប់មិនអស់។

ទោះជាយ៉ាងណា ការដួលរលំនៃរដ្ឋាភិបាលអាហ្វហ្គានីស្ថាន បានធ្វើឱ្យសហរដ្ឋអាមេរិក រងភាពអាម៉ាស់ និងសោកស្ដាយមិនតិចនោះឡើយ ហើយជាពិសេសគឺការរិះគន់ធ្ងន់ៗចំពោះប្រធានាធិបតីអាមេរិក លោក ចូ បៃឌិន។

*ការសន្យារបស់លោក ចូ បៃឌិន ថានឹងដកទ័ពចេញពីអាហ្វហ្គានីស្ថាន

ចំពោះអ្នករិះគន់លោកយល់ថា ការសម្រេចរបស់ប្រធានាធិបតីរូបនេះ នៅក្នុងការបញ្ចប់សង្គ្រាមក្នុងប្រទេសនេះ ដែលជាសង្គ្រាមអូសបន្លាយវែងបំផុត របស់សហរដ្ឋអាមេរិក បានបំផ្លាញការខិតខំប្រឹង និងការបូជាលះបង់រយៈពេល២០ឆ្នាំមកនេះ ហើយបានត្រួសត្រាយផ្លូវនាំទៅរកមហន្តរាយផ្នែកមនុស្សធម៌ ដោយពួកគេបានចោទសួរថា តើគួរជឿទុកចិត្តសហរដ្ឋអាមេរិក បានដោយរៀបណា?។

ប៉ុន្តែសម្រាប់មនុស្សជាច្រើន ដែលដឹងច្បាស់ពីសង្គ្រាមនេះ ពោលគឺពលរដ្ឋអាហ្វហ្គានីស្ថាន ទាហាន និងរដ្ឋបុរសមានមន្ទិលជាយូរមកហើយ ចំពោះទស្សនៈរបស់លោក ចូ បៃឌិន ដែលយល់ថា រដ្ឋាភិបាលក្រុងកាប៊ុល មានសមត្ថភាពគ្រប់គ្រាន់នៅក្នុងការការពារសន្តិសុខរបស់ប្រទេសដោយខ្លួនឯង ព្រោះលោកធ្លាប់បានលើកឡើងជាយូរមកហើយថា សហរដ្ឋអាមេរិក គួរតែដកទ័ពចេញពីប្រទេសនេះ តាំងពីលោកកាន់តំណែងជាអនុប្រធានាធិបតីម៉្លេះ។

សរុបមក ការសម្រេចចិត្តរបស់លោក នៅក្នុងការដកទ័ពចេញពីប្រទេសនេះគឺគ្មានអ្វីគួរឱ្យភ្ញាក់ផ្អើលឡើយ។ កាលពីកាន់តំណែងជាអនុប្រធានាធិបតីក្រោមលោក បារ៉ាក់ អូបាម៉ា លោកតែងតែទទូចថា សង្គ្រាមក្នុងប្រទេសនេះ គួរតែត្រូវបានកំណត់ក្នុងបេសកកម្មរបស់ខ្លួន ពោលគឺមិនត្រូវពង្រីកពាសពេញផ្ទៃប្រទេសឡើយ។

កាលពីនៅជាសមាជិកព្រឹទ្ធសភា នៅក្នុងរដ្ឋ Delaware ក្នុងឆ្នាំ២០០១ លោកបានចូលរួមការបោះឆ្នោតជាឯកច្ឆន្ទ ដើម្បីអនុម័តការប្រើប្រាស់កម្លាំងយោធា នៅអាហ្វហ្គានីស្ថាន។ ប៉ុន្តែលោកជំទាស់នឹងការដាក់ពង្រាយកងទ័ពបន្ថែមទៀត ដែលលោក អូបាម៉ា បានអនុញ្ញាតក្នុងឆ្នាំ២០០៩។

លោក Brett Bruen អតីតមន្ត្រីការទូតបានប្រាប់សារព័ត៌មាន BBC ថា “លោក ចូ បៃឌិន ពិតជាមានភាពច្បាស់លាស់ ចំពោះបញ្ហាប្រទេសអាហ្វហ្គានីស្ថាន។ លោកបាននិយាយហើយថា យើងគួរតែដកខ្លួនចេញពីទីនោះ (អាហ្វហ្គានីស្ថាន)”។

*មហាយក្សចិន គាំទ្រក្រុមតាលីបង់

មជ្ឈដ្ឋានមួយចំនួនយល់ថា មូលហេតុដែលក្រុមតាលីបង់ អាចវាយដណ្ដើមកាន់កាប់ប្រទេសអាហ្វហ្គានីស្ថាន បានយ៉ាងឆាប់រហ័សស្របពេលសហរដ្ឋអាមេរិក សម្រេចដកទ័ពចេញនេះ គឺដោយសារមហាយក្សចិន ជាខ្នងបង្អែកដ៏រឹងមាំរបស់ក្រុមសកម្មប្រយុទ្ធនេះ។

កាលពីថ្ងៃទី១៤ សីហា ទីភ្នាក់ងារព័ត៌មាន Reuters បានចុះផ្សាយរូបភាពមួយសន្លឹកដ៏គួរឱ្យភ្ញាក់ផ្អើល។ រូបថតមួយសន្លឹកដែលផ្សាយកាលពីខែមុន ដោយប្រព័ន្ធផ្សព្វ​ផ្សាយរដ្ឋរបស់ចិន នេះបង្ហាញពីលោក វ៉ាង យី(Wang Yi) រដ្ឋមន្រ្តីក្រសួងការបរទេសចិន ឈរប្រកៀកស្មាជាមួយមន្ត្រីជាន់ខ្ពស់ នៃក្រុមសកម្មប្រយុទ្ធតាលីបង់។

ចាប់តាំងពីពេលនោះមក មជ្ឈដ្ឋានអន្តរជាតិយល់ថា មហាយក្សចិន ប្រហែលជាបានចាប់ផ្ដើមត្រៀមលក្ខណៈជាសម្ងាត់ ដោយប្រាប់ឱ្យពលរដ្ឋចិន ទទួលយកការពិតថា    រដ្ឋាភិបាលក្រុងប៉េកាំង នឹងត្រូវទទួលស្គាល់ក្រុមសកម្មប្រយុទ្ធតាលីបង់ ជារបបស្របច្បាប់ក្នុងពេលឆាប់ៗខាងមុខ៕