ដោយៈស៊ីវ ម៉េង
កំពង់ចាម ត្បុងឃ្មុំៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជា នឹងអញ្ជើញចូលរួមជាអធិបតី ក្នុងពិធីបើកការដ្ឋានសាងសង់ផ្លូវជាតិលេខ៧១C ដែលជាផ្លូវមូយតភ្ជាប់ច្រករបៀងភាគខាងកើត និងខាងជើងប្រទេស។
តើផ្លូវជាតិដ៏សំខាន់ថ្មីមួយនេះ តភ្ជាប់ពីតំបន់ណាទៅតំបន់ណា? លោកវ៉ាស៊ីម សូរិយាអនុរដ្ឋលេខាធិការ និងជាអ្នកនាំពាក្យក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៥ វិច្ឆិកានេះថា សម្តេចតេជោហ៊ុន សែននាយករដ្ឋមន្រ្តីនៃកម្ពុជា នឹងអញ្ជើញបើកការដ្ឋានសាងសង់ផ្លូវជាតិដ៏សំខាន់នេះ ជាមួយនឹងការសម្ភោធបើកដំណើរការស្ពានមិត្តភាពកម្ពុជា ចិនតភ្ជាប់រវាងស្រុកក្រូចឆ្មារ ខេត្តត្បូងឃ្មុំ និងស្រុកស្ទឹងត្រង់ ខេត្តកំពង់ចាមនៅថ្ងៃទី២៣ វិច្ឆិកាខាងមុខនេះ។
លោកបន្តថា “ផ្លូវជាតិលេខ៧១C នឹងតភ្ជាប់ពីផ្លូវជាតិលេខ៧ ត្រង់ចំណុចប្រធាតុ ក្នុងស្រុកពញ្ញាក្រែក មកកាន់ស្រុកក្រូចឆ្មារ ឆ្ពោះទៅស្រុកស្ទឹងត្រង់ ចំការលើ ខេត្តកំពង់ចាម និងបន្តតភ្ជាប់ទៅកាន់ខេត្តកំពង់ធំ ដែលជាចំណុចកណ្តាលនៃប្រទេស។លោកបន្តថា “ផ្លូវជាតិនេះមានប្រវែង១១៥គីឡូម៉ែត្រ និងចំណាយថវិកាសាងសង់ទំហំ១៣០លានដុល្លារអាមេរិក ដែលជាហិរញ្ញប្បទានរបស់មិត្តចិន”។
លោកវ៉ាស៊ីម សូរិយាបានបន្តថា ផ្លូវជាតិនេះ នឹងតភ្ជាប់ជាមួយស្រុកក្រូចឆ្មារ តាមរយៈឃុំឈូក ដែលតំបន់នេះជាតំបន់លិចទឹកនៅខែវស្សា ដែលទាមទារឲ្យមានការលើកទំនប់កាន់តែខ្ពស់ ដើម្បីបញ្ចៀសការលិចទឹកនៅពេលរដូវធ្លាក់ភ្លៀងចូលមកដល់។
រាជរដ្ឋាភិបាលកម្ពុជាបាន និងកំពុងវិនិយោគលើហេដ្ឋារចនាសម្ព័ន្ឋយ៉ាងច្រើន ដើម្បីធ្វើសមាហរណកម្មផ្ទៃក្នុងកម្ពុជាផង តភ្ជាប់ជាមួយប្រទេសក្នុងតំបន់ផង ដើម្បីពង្រីកនូវកាលានុវត្តន៍ភាពសេដ្ឋកិច្ចកម្ពុជា។
សេដ្ឋវិទូម៉ី កល្យាណទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា ហេដ្ឋារចនាសម្ព័ន្ឋជាបញ្ហាប្រឈមមួយ ក្នុងការប្រកួតប្រជែងរបស់កម្ពុជា ជាមួយប្រទេសក្នុងតំបន់ ហេតុនេះទើបរដ្ឋាភិបាលបាននិងកំពុងខិតខំ ដើម្បីជម្រុញការវិនិយោគក្នុងវិស័យនេះ ទោះបីជាចំណាយប្រាក់ច្រើនយ៉ាងណាក្តី។
លោកបន្តថា “ដើម្បីឲ្យសេដ្ឋកិច្ចជាតិរីកចម្រើនបន្ថែមទៀត រដ្ឋាភិបាលត្រូវតែវិនិយោគលើហេដ្ឋារចនាសម្ព័ន្ឋ”៕
