ដោយៈគង់ សូរិយា

ភ្នំពេញៈ លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា បានគូសបញ្ជាកថា ការទទួលបានតួនាទីជាប្រធានអាស៊ាន នៅឆ្នាំ២០២២ ខាងមុខនេះ គឺជាឱកាសសម្រាប់ប្រទេសកម្ពុជា ក្នុងការបង្ហាញមុខមាត់ និងសមត្ថភាពនៃការត្រួសត្រាយផ្លូវដើម្បីរក្សាឯកភាព សាមគ្គីភាព ភាពធន់ និងមជ្ឈភាពរបស់អាស៊ាន។ នេះយោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិនារសៀលថ្ងៃទី៨ កញ្ញានេះ។

លោកឧបនាយករដ្ឋមន្រ្តី បានលើកឡើងបែបនេះ ក្នុងពិធីបើកកម្មវិធីកម្រងបាឋ​កថាស្តីពី “Cambodia & ASEAN and Cambodia as ASEAN Chairmanship 2022”ដែលរៀបចំដោយ វិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ តាមរយៈប្រព័ន្ធវីដេអូ នៅថ្ងៃទី៨ ខែកញ្ញា ឆ្នាំ២០២១នេះ។

កម្រងបាឋកថាខាងលើមានទិសដៅសំខាន់ចំនួនបី ដូចជា ទី១ លើកកម្ពស់ការយល់ដឹងអំពីទំនាក់ទំនង​រវាងកម្ពុជា-អាស៊ាន ទី២ ផ្សព្វផ្សាយនូវតួនាទី និងការត្រៀមខ្លួនរបស់កម្ពុជាក្នុងនាមជាប្រធានប្តូរវេន អាស៊ានឆ្នាំ២០២២ និងទី៣ ចែករំលែកនូវឱកាស និងបញ្ហាប្រឈមសម្រាប់កម្ពុជា ក្នុងនាមជាប្រធានប្តូរវេនអាស៊ានឆ្នាំ២០២២ ជាពិសេសនៅក្នុងបរិបទនៃជំងឺកូវីដ-១៩។

ក្រសួងការបរទេស បានបញ្ជាក់ដូច្នេះថា “ថ្លែងក្នុងពិធីបើកកម្រងបាឋកថានេះ ឯកឧត្តមឧបនាយករដ្ឋមន្រ្តី បានគូសបញ្ជាក់ពីតួនាទីដ៏សំខាន់ របស់កម្ពុជាក្នុងការក្លាយជាប្រធានអាស៊ាននៅក្នុងឆ្នាំ២០២២ ខាងមុខនេះ ដោយវាជាឱកាសសម្រាប់កម្ពុជាក្នុងការបង្ហាញមុខមាត់ និងសមត្ថភាពនៃការត្រួសត្រាយផ្លូវដើម្បីរក្សានូវឯកភាព សាមគ្គីភាព ភាពធន់ និង មជ្ឈភាពរបស់អាស៊ាន”។

ជាមួយគ្នានេះ លោកឧបនាយករដ្ឋមន្រ្តី ប្រាក់ សុខុន ក៏បានលើកឡើងនូវបញ្ហាប្រឈមសម្រាប់កម្ពុជា ក្នុងការរួមចំណែកដោះស្រាយបញ្ហាក្នុងតំបន់ និងអន្តរជាតិ និងជាពិសេសក្នុងស្ថានភាពដ៏តានតឹង នៃការប្រកួតប្រជែងឥទ្ធិពលភូមិសាស្រ្តនយោបាយ រវាងប្រទេសមហាអំណាច និងបញ្ហាចំពោះមុខដែលបាន និងកំពុងកើតឡើងនាពេលបច្ចុប្បន្ន​។

លោកក៏បានចង្អុលបង្ហាញអំពីគុណសម្បត្តិ អាស៊ានដោយបន្សល់នូវនិម្មាបនកម្មតំបន់សំខាន់ៗជាច្រើន ដែលជាមាគ៌ាធានា និងរក្សាបាននូវស្ថិរភាព និងវិបុលភាពតំបន់។

ឆ្លៀតក្នុងឱកាសនោះ ប្រមុខការទូតកម្ពុជា ក៏បានបញ្ជាក់នូវការប្តេជ្ញាចិត្តរបស់កម្ពុជា ក្នុងការបន្តខិតខំប្រឹងប្រែងលើកកម្ពស់យន្តការនានា ដែលផ្តោតសំខាន់លើការពង្រឹងសកម្មភាពរួមគ្នាជាក់ស្តែង ដោយឈរជាមូលដ្ឋានលើភាពបើកចំហ ស្មោះត្រង់ សុចរិត សុឆន្ទៈ សាមគ្គីភាព និងភាពសុខដុមរមនានៅក្នុងអាស៊ាន ដើម្បីដោះស្រាយប្រកបដោយប្រសិទ្ធភាពនូវបញ្ហាប្រឈមរួម ទាំងបញ្ហាប្រឈមមិនប្រពៃណី ដែលមានស្រាប់និងកំពុងលេចឡើងមួយចំនួនទៀត ដែលអាស៊ានកំពុងជួបប្រទះ ក៏ដូចជាការស្តារឡើងវិញនូវសេដ្ឋកិច្ច-សង្គមក្រោយវិបត្តិជំងឺកូវីដ-១៩៕

ដោយៈសុជាតា

ហុងកុងៈ ទីក្រុងហុងកុងបានបញ្ចប់ការស្ថាបនារបស់ខ្លួន កាលពីថ្ងៃអង្គារ ស្របពេលដែលទីក្រុង ធ្លាប់ត្រូវកាត់ផ្តាច់ពីការចរាចរអ្នកដំណើរអន្តរជាតិ ដោយសារវិបត្តិនយោបាយកាលពីឆ្នាំ ២០១៩។

លោក Carrie lam មេដឹកនាំទីក្រុងហុងកុង បានថ្លែងនៅក្នុងការប្រារព្ធនេះថា ការបញ្ចប់ស្ថាបនាផ្លូវរត់ប្រវែងជិត៤គីឡូម៉ែត្រ បានយកពេលសាងសង់ប្រមាណ៥ឆ្នាំ ដើម្បីធ្វើផ្លូវរត់ថ្មីនេះ។

ដោយសារតែទីតាំង និងលក្ខខណ្ឌចូលងាយស្រួល បានធ្វើអោយទីក្រុងហុងកុងបានក្លាយទៅជាព្រលានយន្តហោះមួយ ក្នុងចំណោមព្រលានយន្តហោះមមាញឹកបំផុតរបស់ពិភពលោក។ ប៉ុន្តែព្រលានយន្តហោះ បានប្រឈមមុខនឹងការប្រកួតប្រជែងពីប្រ​ទេសក្នុងតំបន់ ដូចជា ប្រទេសសិង្ហបុរី ព្រមទាំងការពង្រីកយ៉ាងឆាប់រហ័សនៅទីក្រុងចិនដីគោក។

ព្រលានយន្តហោះនេះ ត្រូវបានផ្អាកជាបណ្តោះអាសន្ន ស្របពេលដែលភាពចលចលនយោបាយកើនឡើងកាលពីឆ្នាំ ២០១៩ កន្លងទៅនេះ។ ហើយបច្ចុប្បន្ននេះ ព្រលានយន្តហោះ នៅតែមិនទាន់ដំណើរការពេញលេញ ដោយសារតែវិបត្តិរាតត្បាតកូវីត ១៩ ដែលទាមទារវិធានការតឹងតែង។

ការសាងសង់ផ្លូវរត់ថ្មីនេះ នឹងប្រឈមមុខការប្រឆាំងយ៉ាងខ្លាំង ពីសំណាក់ក្រុមបរិស្ថាននៅបស្ងឹមប្រទេស ប៉ុន្តែមានការតវ៉ាតិចតួចប៉ុណ្ណោះ។

ពីមុនវិបត្តិ កូរូណា ផ្លូវរត់ចំនួនពីរ បានត្រៀមរួចរាល់ក្នុងការទទួលអ្នកដំណើរចេញចូលប្រមាណ៤២០,០០០ជើងហោះហើរ ក្នុងមួយឆ្នាំ។ ហើយផ្លូវរត់នឹងរំពឹងថា ចាប់ផ្តើមប្រតិបត្តិការនៅឆ្នាំ ២០២២ ខាងមុខនេះ។

ទីក្រុងនេះ ត្រូវគេមើលឃើញថា មានអត្រាចាក់វាក់សាំងប្រឆាំងCovid 19 ទាបជាងគេហើយរដ្ឋាភិបាល មិនផ្តល់ព័ត៌មានលំអិតពីពេលវេលា ក្នុងការរស់នៅជាមួយនឹងមេរោគថ្មីនេះ។

អ្នកជំនួញអន្តរជាតិ បានលើកឡើងថា ការព្រមានចំពោះអ្នកតាំងទីលំនៅ ដែលអាចប្រឈមុខនឹងបញ្ហាវិបត្តិនេះគ្មានទីបញ្ចប់។

កាលពីសប្តាហ៍មុន លោក Lamបានសំដែងការព្រួយបារម្ភ ចំពោះគោលនយោ បាយ Zero Covid  ដោយនិយាយថា ទីក្រុងហុងកុង នឹងបើកចំពោះអ្នកដំណើរជនជាតិចិន ដែលមានសារៈសំខាន់ជាជាងផ្នែកដទៃទៀតនៅក្នុងពិភពលោក៕

ដោយៈវឌ្ឍនៈ

ភ្នំពេញៈ បើតាមការគ្រោងទុកនៅថ្ងៃទី ៩កញ្ញា២០២១ស្អែកនេះ ក្រុមហ៊ុនមួយនៃបុត្រសម្ព័ន្ធ Royal Group របស់អ្នកឧកញ៉ាគិតម៉េង នឹងបោះផ្សាយមូលបត្រក្នុងតម្លៃ២០លានដុល្លារអាមេរិកនោះ គឺក្រុមហ៊ុនEZECOM /Telcotech ។ នេះបើតាមសេចក្តីប្រកាសព័ត៌មានរបស់គណៈកម្មការមូលបត្រកម្ពុជា។

តាមការគ្រោងទុកពិធីនេះ នឹងធ្វើឡើងតាមប្រព័ន្ធ Video Conference ដោយមានការចូលរួមពីលោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនិយតករមូលបត្រកម្ពុជា លោក ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃផ្សារមូលបត្រកម្ពុជា និងអ្នកឧកញ៉ា គិត ម៉េង អភិបាលនៃក្រុមហ៊ុន Telcotech រួមទាំងមន្ត្រីពាក់ព័ន្ធមួយចំនួនទៀត។

សេចក្តីប្រកាសព័ត៌មានរបស់ Ezecom កាលពីពេលថ្មីៗនេះបានឱ្យដឹងថា មូលបត្របំណុលក្នុងតម្លៃទឹកប្រាក់២០លានដុល្លារ ដែលត្រូវបោះផ្សាយដោយក្រុមហ៊ុន Ezecom/Telcotech ត្រូវបានគ្រប់គ្រងដោយទីភ្នាក់ងារធានាឥណទាន Credit Guarantee and Investment Facility (CGIF) ដែលបង្កើតឡើង ដោយធនាគារអភិវឌ្ឍន៍អាស៊ី (ADB) និងសមាជិកអាស៊ាន+៣ រួមមានជប៉ុន កូរ៉េខាងត្បូង និងចិន។

ក្រុមហ៊ុន Ezecom ឬ Telcotech គឺជាក្រុមហ៊ុនផ្តល់សេវាអ៊ិនធឺណិតលំដាប់ខ្ពស់ ដែលបម្រើតម្រូវការទីផ្សារសេវាអ៊ិនធឺណិត សម្រាប់ក្រុមហ៊ុន សហគ្រាស និងតាមលំនៅដ្ឋានក្នុងប្រទេសកម្ពុជា។ ក្រុមហ៊ុន Ezecom ត្រូវបានបង្កើតឡើងក្នុងឆ្នាំ២០០៨ ដោយក្រុមហ៊ុន Royal Group ជាក្រុមហ៊ុនតែមួយគត់នៅកម្ពុជា ដែលមានបណ្តាញហេដ្ឋានរចនាសម្ព័ន្ធខ្សែហ្វាយប៊ើអុបទិកធំបំផុត និងកាន់កាប់ភាគហ៊ុន ក្នុងបណ្តាញខ្សែកាប្លិ៍បាតសមុទ្រ Asian American Gateway (AAG) និងបណ្តាញខ្សែកាប្លិ៍បាតសមុទ្រ ម៉ាឡេស៊ី កម្ពុជា ថៃ (MCT)។

ក្រុមហ៊ុន Ezecom នឹងប្រើប្រាស់ទឹកប្រាក់ បានពីការបោះផ្សាយមូលបត្របំណុលនេះ ដើម្បីវិនិយោគបន្ថែមទៀត លើប្រព័ន្ធអេកូឡូស៊ីឌីជីថលរបស់កម្ពុជា។ ក្រុមហ៊ុន Ezecom បានដើរតួនាទីដ៏សំខាន់មួយ ក្នុងឌីជីថលូបនីយកម្មរបស់កម្ពុជា ហើយនឹងបន្តធ្វើកិច្ចការទាំងនេះ ឆ្ពោះទៅមុខបន្តទៀតតាម រយៈបដិវត្តន៍ឧស្សាហកម្មទី៤ (IR 4.0)។

អ្នកឧកញ៉ា គិត ម៉េង បានថ្លែងសេចក្តីប្រកាសព័ត៌មានថា “ក្រុមហ៊ុន Ezecom រួមជាមួយនឹងក្រុមហ៊ុន Telcotech គឺជាក្រុមហ៊ុនខ្មែរ១០០% ដែលធ្វើការងារផ្តោតលើការផ្តល់ ជូននូវវិសាលភាពគ្របដណ្តប់ និងការតភ្ជាប់អ៊ិនធឺណិតប្រកបដោយគុណភាព និងប្រសិទ្ធភាពខ្ពស់សម្រាប់ប្រជាជនកម្ពុជា”។

អ្នកឧកញ៉ាបន្ថែមថា ការបោះផ្សាយមូលបត្របំណុលនេះ នឹងផ្តល់លទ្ធភាពឱ្យយើងបន្តដឹកនាំឆ្ពោះទៅមុខបន្តទៀត ក្នុងការបង្កើតអនាគតឌីជីថលរបស់កម្ពុជា តាមរយៈការវិនិយោគលើបច្ចេកវិទ្យាទំនើបៗ និងយុទ្ធសាស្រ្តឌីជីថល។ CGIF មានលក្ខខណ្ឌតម្រូវ និងស្តង់ដារខ្ពស់ នៅពេលដែលចេញផ្សាយការធានាឥណទាននេះ។

លោកបន្តថា “ខ្ញុំមានមោទនភាពយ៉ាងខ្លាំង ចំពោះក្រុមហ៊ុន Ezecom ដែលជាក្រុ​មហ៊ុនខ្មែរសុទ្ធសាធដំបូងគេបង្អស់ ដែលមានគ្រប់លក្ខខណ្ឌគ្រប់គ្រាន់ និងលើសកម្រិតស្តង់ដារ ដែលបានទាមទារក្នុងការឆ្លើយតប និងស្តង់ដារកម្រិតខ្ពស់ទាំងនេះ”៕

ដោយៈ ខេត្តកោះកុងដែលពីមុនជាខេត្តឆ្ងាយដាច់អាល័យ បានត្រៀមស្វាគមន៍តំបន់វិស្សមកាលទំហំជាង១០០០ហិកតាជាលើកដំបុង ដែលគំរោងនេះនឹងរៀបចំឡើង​ដោយក្រសួងការពារជាតិ។

តាមប្រភពព៌តមានពីមន្រ្តីក្រសួងការពារជាតិ បានឲ្យដឹងកាលពីពេលថ្មីៗនេះថា គំរោងនេះ នឹងចាប់ផ្តើមស្ថាបនា តំបន់អភិវឌ្ឍន៍សម្តេចពិជ័យសេនា លើដីជាង១០០០ហិកតា នៅខេត្តកោះកុងនាពេលឆាប់ៗខាងមុខនេះ បន្ទាប់ពីបានកំណត់ព្រំដីនៃគម្រោងត្រូវបានធ្វើឡើងរួចរាល់ហើយ។

យោងតាមសេចក្តីប្រកាសរបស់រដ្ឋបាលខេត្តកោះកុងបានឲ្យដឹងកាលពីសប្តាហ៍មុនថា ការចុះពិនិត្យទីតាំងដី ត្រូវបានធ្វើឡើងកាលពីថ្មីៗនេះ ក្រោមការដឹកនាំរបស់លោកសុខ សុទ្ធី អភិបាលរងខេត្តកោះកុង និងនាយឧត្តមសេនីយ៍ឯកសឿន រឿតទីប្រឹក្សាសម្តេចពិជ័យសេនា ទៀ បាញ់ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិ។

លោកសុខ សុទ្ធីបានមានប្រសាសន៍ឲ្យដឹងថា ការចុះពិនិត្យទីតាំង គឺដើម្បីចង្អុលបង្ហាញ និងអនុញ្ញាតឱ្យគ្រឿងចក្រ នៃកងវិស្វកម្មក្រសួងការពារជាតិ ចាប់ផ្តើមឈូសឆាយព្រំដី និងបោះបង្គោលព្រំដីតាមនិយាមកាដែលបានកំណត់រួចហើយ៕

តំបន់អភិវឌ្ឍរមណីយដ្ឋានវិស្សមកាលនេះ មានទីតាំងស្ថិតនៅ ឃុំជ្រោយប្រស់ ស្រុកកោះកុង ខេត្តកោះកុង៕