ដោយៈគង់ សូរិយា

ភ្នំពេញៈ ខេត្តចំនួនពីរស្ថិតនៅស្របតាមដងទន្លេមេគង្គ បានទទួលខ្សែបញ្ជូនអគ្គសនីថ្មីពីអគ្គិសនីកម្ពុជា ដែលបានបើកដំណើរការខ្សែបញ្ជូន១១៥គីឡូវ៉ុល មានប្រវែងប្រមាណ១០០គីឡូម៉ែត្រ។

ការដាក់ដំណើរការនេះ ធ្វើឡើងព្រមជាមួយនឹង អនុស្ថានីយអគ្គិសនីព្រែកប្រសព្វ ១១៥/២២០គីឡូវ៉ុល កម្លាំង៥០មេហ្គាវ៉ាត់ នៅក្នុងឃុំព្រែកប្រសព្វ នៃស្រុកព្រែកប្រសព្វនេះផងដែរ។

បណ្តាញខ្សែបញ្ជូន និងអនុស្ថានីយថ្មីនេះ ជាផ្នែកមួយនៃគម្រោងកិច្ចសហប្រតិបត្តិការ រវាងកម្ពុជា និងប្រទេសបារាំង តាមរយៈទីភ្នាក់ងារអភិវឌ្ឍន៍បារាំង (ADF) ដែលបានផ្តល់ឥណទានសម្បទានដល់អគ្គិសនីកម្ពុជា ដើម្បីបង្កើនវិសាលភាព នៃការផ្គត់ផ្គង់អគ្គិសនី។

អគ្គិសនីកម្ពុជា ក៏កំពុងសាងសង់អនុស្ថានីយ១១៥/២២គីឡូវ៉ុល កម្លាំង៥០MVA ថែមមួយទៀត នៅក្នុងទីរួមស្រុកស្ទឹងត្រង់ ដើម្បីបង្កើនការផ្គត់ផ្គង់ទៅស្រុកស្ទឹងត្រង់ ចំការលើ និងបន្តមកស្រុកក្រូចឆ្មារ។

តំបន់ទាំងនេះ កំពុងមានការអភិវឌ្ឍន៍ខ្លាំង ជាពិសេសការដាំដុះដំណាំ កសិឧស្សា​ហកម្ម ដែលនឹងទាក់ទាញអ្នកវិនិយោ គកាន់តែច្រើនថែមទៀត និងជាការជួយបង្កើនចំណូលប្រជាពលរដ្ឋ និងជំរុញកំណើនសេដ្ឋកិច្ចជាតិ ដូច្នេះការតភ្ជាប់អគ្គិសនីគឺជារឿងចាំបាច់៕

ដោយៈ ច្រាយ ចំណាន

ភ្នំពេញៈ រដ្ឋបាលខេត្តសៀមរាប បានរៀបចំកិច្ចប្រជុំផ្សព្វផ្សាយអំពីបទដ្ឋានគតិយុត្តបច្ចុប្បន្នភា ពវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា សម្រា​ប់សេវាកម្មស្នាក់នៅទេសចរណ៍ ភោជនីយដ្ឋាន-អាហារដ្ឋានទេសចរណ៍ សហគមន៍-អេកូទេសចរណ៍ និងរមណីយដ្ឋានទេសចរណ៍។

កិច្ចប្រជុំនេះបានដឹកនាំដោយ ពៅ ពិសិដ្ឋ អភិបាលរងនៃគណៈអភិបាលខេត្តសៀមរាប និងជាប្រធានក្រុមការងារត្រួតពិនិត្យតាមដាន ការអនុវត្តវិធានសុវត្ថិភាពទេស​ចរណ៍ក្នុងខេត្តសៀមរាប ព្រមទាំងមានការចូលរួមពីសមាជិក ក្រុមការងារត្រួតពិនិត្យតាមដានការអនុវត្តវិធានសុវត្ថិភាពទេសចរណ៍ ក្នុងខេត្តសៀមរាប និងមន្រ្តីពាក់ព័ន្ឋជាច្រើនទៀត។

អង្គប្រជុំបានធ្វើការផ្សព្វផ្សាយនូវប្រកាស និងសេចក្តីណែនាំ ទាក់ទងនឹងសេវាកម្មស្នាក់នៅទេសចរណ៍ សេវាកម្មភោជនីយដ្ឋាន និងអាហារដ្ឋានទេសចរណ៍ និងប្រកាស និងសេចក្តីណែនាំសម្រាប់រមណីយដ្ឋាន និងសហគមន៍-អេកូទេសចរណ៍ ។

លោកពៅ ពិសិដ្ឋ អភិបាលរងខេត្ត បានប្រគល់ភារកិច្ចដល់ក្រុមការងារ ដូចជា ទី១- អាជីវកម្ម សេវាកម្មទេសចរណ៍ និងសហគមន៍ទេសចរណ៍ ដែលកំពុងបើកដំណើរការទាំងអស់ត្រូវប្រត្តិបត្តិការអាជីវកម្មរបស់ខ្លួនឱ្យស្របតាមប្រកាស និងសេចក្តីណែនាំស្តីពីវិធានសុវត្ថិភាពទេសចរណ៍ និងស្តង់ដារអប្បរមា ដែលបានដាក់ចេញដោយក្រសួងទេស​ចរណ៍ ទី២- ក្រុមការងារត្រូវចុះផ្សព្វផ្សាយដោយផ្ទាល់ ដល់ប្រតិបត្តិករទេសរណ៍ទាំងអស់ក្នុងខេត្តឱ្យយល់ដឹង និងអនុវត្តនូវប្រកាស និងសេចក្តីណែនាំរបស់ក្រសួងទេសចរណ៍ ស្របតាម “គន្លងប្រក្រតីភាពថ្មី”។

ទី៣- សម្រាប់រមណីយដ្ឋាន និងសហគមន៍ទេសចរណ៍ ត្រូវកំណត់ឱ្យបាននូវសមត្ថភាពផ្ទុកអតិបរមា ដែលអាចទទួលភ្ញៀវក្នុងពេលតែមួយ ដោយអនុលោមតាមស្តង់ដាគម្លាតសុវត្ថិភាព និងត្រូវធ្វើការចុះឈ្មោះភ្ញៀវចូលទស្សនាជាប្រចាំជាពិសេសអនុវត្តឱ្យបាននូវការស្កេន QR Code ទប់ស្កាត់កូវីដ-១៩ ។

ទី៤- គ្រប់អាជីវកម្មសេវាកម្មទេសចរណ៍ទាំងអស់ ដែលបើកដំណើរការនឹងទទួលបាននូវឡាប៊ែលបញ្ជាក់ពីសុវត្ថិភាព បន្ទាប់ការចុះវាយតម្លៃរបស់ក្រុមការងារ អំពីការអនុវត្តនូវប្រកាស និងសេចក្តីណែនាំរបស់ក្រសួងទេសចរណ៍ ស្របតាម “គន្លងប្រក្រតីភាពថ្មី” ៕

ដោយៈសុខុម

គូឡាឡាំពួ: ក្រុមហ៊ុនទូរគមនាគមន៍ម៉ាឡេស៊ី Telekom Malaysia Bhd (TM) កំពុងចាប់ដៃគូសហការ ជាមួយក្រុមហ៊ុនទូរគមនាគមន៍ឥណ្ឌា Tata Communications Ltd ដើម្បីផ្តល់សេវា IP Transit សម្រាប់ការតភ្ជាប់អ៊ីនធឺណិតល្បឿនលឿន ដល់បណ្តាប្រទេសនានាក្នុងតំបន់អាស៊ាន។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី៧ កញ្ញា។

ក្រុមហ៊ុន TM បានចេញសេចក្តីថ្លែងការណ៍ក្នុងថ្ងៃដដែលថា ការចាប់ដៃគូសហការគ្នានេះ ធ្វើឡើងដើម្បីផ្តល់ការតភ្ជាប់អ៊ីនធឺណិត ល្បឿនលឿនដែលមានស្ថិរភាព និងអាចទុកចិត្តបាននៅក្នុងតំបន់ និងបើកចំហទៅកាន់ក្រុមហ៊ុនសហគ្រាសទូទាំងពិភពលោក។

សេចក្ដីថ្លែងការណ៍នេះមានខ្លឹមសារដូច្នេះថា “កិច្ចសហការនេះនឹងធ្វើឱ្យអ្នកផ្តល់សេវាកម្ម ប្រតិបត្តិករបណ្តាញទូរស័ព្ទចល័ត និងអ្នកផ្តល់សេវាកម្មអ៊ីនធឺណិតនានា ក្នុងតំបន់មានលទ្ធភាពឆ្លើយតប ទៅនឹងកំណើនតម្រូវការតភ្ជាប់ទិន្នន័យ របស់អតិថិជនខ្លួន តាមរយៈការផ្ដល់ច្រកចូល ទៅកាន់បណ្តាញ Internet Protocol (IP) លំដាប់លេខ១ របស់ពិភពលោក”។

សេចក្ដីថ្លែងការណ៍បានបន្តថា “កិច្ចសហការនេះ នឹងជួយផ្ដល់សេវា IP Transit (IPT) លំដាប់លេខ១ ជាសេវាតភ្ជាប់អ៊ីនធឺណិត ដែលធ្វើឱ្យអ្នកប្រើប្រាស់អាចចូលទៅកាន់គ្រប់វេបសាយ និងមាតិការព័ត៌មាន (Content) លើបណ្ដាញអ៊ីនធឺណិត។ វានឹងជួយជំរុញបន្ថែមទៀតនូវវិស័យនានា ដូចជា E-commerce កម្មវិធីកម្សាន្តតាមមអនឡាញ ការលក់រាយ ប្រតិបត្តិការធនាគារតាមអនឡាញ និងសេវាដឹកជញ្ជូនជាដើមដែលមានសន្ទុះកើនឡើងលឿនខ្លាំង នៅមួយរយៈពេលចុងក្រោយនេះ”។

ក្រុមហ៊ុន TM បានលើកឡើងបន្ថែមទៀតថា កិច្ចសហការនេះ ក៏នឹងជួយឱ្យក្រុមហ៊ុន Tata Communications មានលទ្ធភាពធ្វើឱ្យប្រសើរឡើង នូវការតភ្ជាប់របស់ក្រុមហ៊ុន TM ក្នុងតំបន់អាស៊ាន តាមរយៈបណ្តាញខ្សែកាបលើដីគោក និងខ្សែកាបក្រោមបាតសមុទ្រទៅកាន់បណ្ដាប្រទេសក្បែរខាង។

បណ្ដាញខ្សែកាបក្រោមបាតសមុទ្រនេះ រួមបញ្ចូលទាំងបណ្ដាញខ្សែកាបក្រោមបា​តសមុទ្រម៉ាឡេស៊ី-កម្ពុជា-ថៃ សម្រាប់តភ្ជាប់ទៅកាន់ឥណ្ឌូចិន ព្រមទាំងបណ្ដាញខ្សែកាបក្រោមបាតសមុទ្រ Nusantara Gateway សម្រាប់ការតភ្ជាប់ទៅកាន់ប្រទេសឥណ្ឌូនេស៊ី ផងដែរ៕ The Edge Markets៕

ដោយៈវឌ្ឈនៈ

ភ្នំពេញៈ ដោយសារតែវិបត្តិកូវីដ១៩ នៅតែបន្តរីករាលដាលនៃជំងឺកូវីដ១៩ នៅឆមាសទី១នៃឆ្នាំ ២០២១នេះ កម្ពុជាមិនមានការចុះហត្ថលេខាលើកិច្ចព្រមព្រៀងខ្ចីឥណទានសម្បទានថ្មីទេ។

ដោយសារតែកម្មវិធី គម្រោងអភិវឌ្ឍន៍ថ្មីទាំងនោះ កំពុងស្ថិតនៅក្នុងដំណាក់កាលសិកក្សា និងរៀបចំហើយត្រូវបានពន្យារពេល ។ នេះបើតាមស្ថិតិបំណុលសាធារណៈកម្ពុជា របស់ក្រសួងសេដ្ឋកិច្ច និងហិរញ្ញវត្ថុ ចេញផ្សាយនៅដើមខែកញ្ញា២០២១នេះ ។

របាយការណ៍ដដែលនេះបានបញ្ជាក់ថា បើគិតពីឆ្នាំ១៩៩៣ ដល់ដំណាច់ឆមាសទី១ឆ្នាំ២០២១នេះ រាជរដ្ឋាភិបាលបានចុះកិច្ចព្រមព្រៀង ខ្ចីឥណទានសម្បទានជាមួយដៃគូអភិវឌ្ឍន៍នានាសរុប ទឹកប្រាក់ចំនួន១៤,៨៤ពាន់លានដុល្លារអាមេរិក ក្នុងនោះវិស័យហេដ្ឋារចនាសម្ព័ន្ធរូបវន្ត គ្របដណ្ដប់ច្រើនជាងគេរហូតដល់៨៤ភាគរយ និងវិស័យអាទិភាពចំពោះមុខផ្សេងទៀតប្រមាណ១៦ភាគរយ។

របាយការណ៍បង្ហាញថានៅក្នុងឆមាសទី១ឆ្នាំ២០២១នេះ រាជរដ្ឋាភិបាលបានដកសាច់ប្រាក់ពីដៃគូអភិវឌ្ឍន៍ យកមកប្រើប្រាស់ជាក់ស្ដែង សរុបចំនួន៥៤៥,៩៦លានដុល្លារអាមេរិក ក្នុងនោះក្របខ័ណ្ឌទ្វេភាគី មានចំនួនប្រមាណ៧៨ភាគរយ ស្មើនឹងទឹកប្រាក់៤២៦,៣៩លានដុល្លារអាមេរិក និងក្របខ័ណ្ឌពហុភាគីមានចំនួន ប្រមាណ២២ភាគរយត្រូវនឹង១១៩,៥៧លានដុល្លារអាមេរិក។

បើគិតតាំងពីឆ្នាំ១៩៩៣ មកដល់ដំណាក់ឆមាសទី១ ឆ្នាំ២០២១នេះ រាជរដ្ឋាភិបាលបានដកប្រាក់ប្រាក់ ពីដៃគូអភិវឌ្ឍន៍យកមកប្រើប្រាស់ជាក់ស្ដែង ប្រមាណ១០,០៥ពាន់លានដុល្លារអាមេរិក ស្មើនឹង៦៨ភាគរយនៃទំហំឥណទាំនសម្បទានសរុប ដែលបានចុះកិច្ចព្រមព្រៀងខ្ចីឥណទានសម្បទានខាងលើ ក្នុងនោះ៨១ភាគរយត្រូវបានប្រើប្រាស់ដើម្បីហិរញ្ញប្បទាន លើគម្រោងវិនិយោគសាធារណៈ ក្នុងវិស័យហេដ្ឋារចនាសម្ព័ន្ធរូបវន្ត និងប្រមាណ១៩ភាគរយទៀត ក្នុងវិស័យអាទិភាពចំពោះមុខផ្សេងទៀត៕

ដោយៈគង់ សូរិយា

ភ្នំពេញៈ ទីប្រឹក្សារដ្ឋ និងជារដ្ឋមន្រ្តីក្រសួងការបរទេសចិន លោកវ៉ាង យី នឹងអញ្ជើ​ញមកទស្សនកិច្ចកម្ពុជា និងប្រទេសមួយចំនួនទៀត នៅចន្លោះថ្ងៃទី១០ដល់១៥ កញ្ញាខាងមុខនេះ។

ស្ថានទូតចិនប្រចាំនៅកម្ពុជា នៅថ្ងៃទី៨ ខែកញ្ញា ឆ្នាំ២០២១នេះ បានប្រកាសអំពីដំណើរទស្សនកិច្ចរបស់ លោក វ៉ាង យី ទីប្រឹក្សារដ្ឋ និងជារដ្ឋមន្រ្តីការបរទេសចិន មកកាន់ប្រទេសកម្ពុជា និងប្រទេសជាមិត្តចំនួន៣ផ្សេងទៀត រួមមាន ប្រទេសវៀតណាម សិង្ហបុរី និងកូរ៉េខាងត្បូងផងដែរ។

ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ លោក Pham Binh Minh ឧបនាយករដ្ឋមន្ត្រីវៀតណាម និងលោក Bui Thanh Son រដ្ឋមន្រ្តីការបរទេសវៀតណាម, លោកឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា, លោក Vivian Balakrishnan រដ្ឋមន្ត្រីការបរទេសសិង្ហបុរី និងលោក Chung Eui-yong រដ្ឋមន្ត្រីការបរទេសកូរ៉េខាងត្បូង។

តាមរយៈហ្វេសបុករបស់ខ្លួន ស្ថានទូតចិនបានបញ្ជាក់ថា លោក Wang Yi នឹងអញ្ជើញដឹកនាំកិច្ចប្រជុំលើកទី១៣ នៃគណៈកម្មាធិការបញ្ជាការ កិច្ចសហប្រតិបត្តិការទ្វេរភាគីចិន-វៀតណាម ជាមួយ លោក Pham Binh Minh។

ប្រទេសវៀតណាម កម្ពុជា សិង្ហបុរី និងកូរ៉េខាងត្បូង សុទ្ធតែជាប្រទេសជិតខាង និងជាដៃគូកិច្ចសហប្រតិបត្តិការដ៏សំខាន់របស់ចិន។ ប្រឈមមុខជាមួយជំងឺវីរុសកូវីដ-១៩ ចិន និងប្រទេសជិតខាងបានជួយគ្នាទៅវិញទៅមក រួមសុខរួមទុក្ខជាមួយគ្នា បានបោះជំហានទៅមុខ ក្នុងកិច្ចទប់ស្កាត់ជំងឺវីរុសជាសកល និងការស្តារជាថ្មីក្រោយពីបញ្ចប់ជំងឺវីរុសកូវីដ។

ដំណើរទស្សនកិច្ចរបស់ លោក Wang Yi បានបង្ហាញពីការយកចិត្តទុកដាក់ខ្ពស់ និងទឹកចិត្តដ៏ស្មោះ របស់ភាគីចិនជូនចំពោះប្រទេសទាំង៤ ក្នុងការលើកកម្ពស់ចំណងមិត្តភាព និងជំរុញកិច្ចសហប្រតិបត្តិការយ៉ាងស៊ីជម្រៅ និងការផ្តល់អត្ថប្រយោជន៍ទៅវិញទៅមក»។ នេះបើតាមការបញ្ជាក់របស់ស្ថានទូតចិន។

ស្ថានទូតចិនបានបន្តថា ក្នុងឱកាសនៃការបំពេញទស្សនកិច្ច លោក Wang Yi នឹងពិភាក្សាយុទ្ធសាស្រ្តកាន់តែស៊ីជម្រៅ ជាមួយបណ្ដា​ភាគីជំរុញអនុវត្តន៍ កុងសុងស៊ីស​សំខាន់ៗ ដែលបានឯកភាពគ្នាដោយលោកប្រធានាធិបតីចិន Xi Jinping និងថ្នាក់ដឹកនាំនៃប្រទេសទាំងបួន ផ្តោតសំខាន់លើកិច្ចប្រយុទ្ធប្រឆាំងជំងឺវីរុស និងកិច្ចសហប្រតិបត្តិ​ការអភិវឌ្ឍន៍ជំរុញកិច្ចផ្ទៀងផ្ទាត់ រវាងផែនការអភិវឌ្ឍន៍ថ្មី ដែលបង្កើតឡើងដោយចិន និងយុទ្ធសាស្រ្តអភិវឌ្ឍន៍របស់បណ្ដាប្រទេស លើកកម្ពស់​កិច្ចសហប្រតិបត្តិការ “ខ្សែក្រវាត់និងផ្លូវ”និងកិច្ចកសាងសហគមន៍វាសនារួម សម្រាប់មនុស្សជាតិកាន់តែស៊ីជម្រៅ។

ភាគីចិនរីករាយសហការជាមួយប្រទេសទាំងបួន ជំរុញទំនាក់ទំនងទ្វេភាគីឱ្យទទួ​លបានសមិទ្ធផលផ្លែផ្កាថ្មីៗឥតឈប់ឈរ រួមគ្នាការពារពហុភាគីនិយម និងយុត្តិធម៌សច្ចធម៌លើឆាកអន្តរជាតិ បញ្ចូលថាមពលវិជ្ជមាន កាន់តែច្រើនដល់សន្តិភាព ស្ថិរភាព វិបុលភាព និងការអភិវឌ្ឍន៍ក្នុងតំបន់រហូតដល់លើពិភពលោក។

អញ្ជើញជាអធិតបីប្រគល់ពហុកីឡដ្ឋានមរតកតេជោជូនកម្ពុជា
លោក វ៉ាង យី ទីប្រឹក្សារដ្ឋ និងជារដ្ឋមន្រ្តីក្រសួងការបរទេសចិន នឹងអញ្ជើញមកបំពេញទស្សនកិច្ចផ្លូវការនៅកម្ពុជា រយៈពេល២ថ្ងៃ នៅថ្ងៃទី១២-១៣ ខែកញ្ញា ឆ្នាំ២០២១ ខាងមុខនេះ។

អំឡុងបំពេញទស្សនកិច្ចផ្លូវការនេះ សម្តេតេជោ ហ៊ុន សែន នាយករដ្ឋមន្រ្តីនៃកម្ពុជា និងលោក វ៉ាង យី នឹងអញ្ជើញជាអធិបតីភាព ក្នុងធ្វើពិធីប្រកាសប្រគល់ និងទទួល ពហុកីឡដ្ឋានជាតិមរតកតេជោ ដែលប្រទេសចិនបានផ្តល់ជំនួយ ក្នុងការសាងសង់ជូនដល់ប្រទេសកម្ពុជា ដែលពិធីនេះនឹងធ្វើឡើងនៅល្ងាចថ្ងៃទី១២ ខែកញ្ញា ឆ្នាំ២០២១។

ពហុកីឡដ្ឋានជាតិមរតកតេជោ ត្រូវបានបើកការដ្ឋានសាងសង់ ដំណាក់កាលទី១ កាលពីថ្ងៃទី១២ ខែមេសា ឆ្នាំ២០១៣ ដោយគ្រោងចំណាយថវិកាសាងសង់ចន្លោះពី ១០០លាន ទៅ ២០០លានដុល្លារអាមេរិក ដែលថវិកាមួយភាគធំ ជាជំនួយឥតសំណងរបស់រដ្ឋាភិបាលចិន។

កីឡដ្ឋានធំ (Main Stadium) នៃពហុកីឡដ្ឋានជាតិមរតកតេជោ ដែលជាជំនួយឥតសំណងរបស់រដ្ឋាភិបាលចិន បានសាងសង់រួចរាល់ទាំងស្រុង កាលពីចុងខែសីហា កន្លងទៅនេះ។ ពហុកីឡដ្ឋានជាតិមរតកតេជោ ស្ថិតនៅសង្កាត់សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ដែលមានចម្ងាយ ១២គីឡូម៉ែត្រ ពីវត្តភ្នំ សាងសង់លើផ្ទៃដីទំហំជាង ៨៥ហិកតា។ ពហុកីឡដ្ឋានជាតិមរតកតេជោ គឺជាពហុកីឡដ្ឋានដ៏ទំនើបមួយរបស់កម្ពុជា ដែលសាងសង់ឡើង ត្រៀមធ្វើជាម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។

កាលពីឆ្នាំ២០២០ កន្លងទៅ លោក វ៉ាង យី ទីប្រឹក្សារដ្ឋ និងជារដ្ឋមន្រ្តីក្រសួងការបរទេសនៃសាធារណរដ្ឋប្រជាមានិតចិន ក៏ធ្លាប់បានដឹកនាំគណៈប្រតិភូ មកបំពេញទស្សកិច្ចផ្លូវការនៅកម្ពុជា រយៈពេល២ថ្ងៃ ផងដែរ គឺថ្ងៃទី១១ និងថ្ងៃទី១២ ខែតុលា ឆ្នាំ២០២០ ដើម្បីចុះហត្ថលេខា លើកិច្ចព្រមព្រៀងពាណិជ្ជកម្មសេរីកម្ពុជា-ចិន និងឯកសារ៣ទៀត ក៏ដូចជាពង្រឹង និងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការគ្រប់ជ្រោងជ្រោយជាមួយកម្ពុជាផងដែរ៕