ដោយៈសុខុម

ភ្នំពេញ: ក្រុមហ៊ុនផលិតទឹកដោះគោស្រស់ Vinamilk មានមហិច្ឆតាបន្តពង្រីកខ្លួនទូទាំងពិភពលោក ដើម្បីបម្រើសេចក្ដីត្រូវការក្នុងទីផ្សារអន្តរជាតិ ឱ្យបានកាន់តែច្រើន ដោយក្នុងនោះរួមទាំងទីផ្សារកម្ពុជាផងដែរ។ នេះបើយោងតាមសារព័ត៌មាន PR Newswire ចុះផ្សាយកាលពីថ្ងៃទី២៣ សីហា។

Vinamilk ដែលជាក្រុមហ៊ុនផលិតទឹកដោះគោស្រស់ធំបំផុត នៅប្រទេសវៀតណាម បានប្រកាសការបណ្ដាក់ទុនរួមគ្នាជាមួយ Del Monte ដែលជាក្រុមហ៊ុនផលិត និងចែកចាយផលិតផលចំណីអាហារ & ភេសជ្ជៈឈានមុខគេនៅប្រទេសហ្វីលីពីន។

ក្រុមហ៊ុននេះនិយាយថា ការបណ្ដាក់ទុនរួមគ្នា ក្នុងឧស្សាហកម្មផលិតទឹកដោះគោស្រស់នេះ ដើម្បីធានាផ្ដល់ជូនអតិថិជនហ្វីលីពីន នូវផលិតផលទឹកដោះគោស្រស់ និងភេសជ្ជៈដែលមានផលល្អ សម្រាប់សុខភាពជាមួយរសជាតិឆ្ងាញ់ ហើយតម្លៃសមរម្យ។ តាមការរំពឹងទុក ផលិតផលរបស់ក្រុមហ៊ុនបណ្តាក់ទុនរួមគ្នាខាងលើនេះ នឹងទៅដល់ដៃអតិថិជនហ្វីលីពីន នៅខែកញ្ញា ឆ្នាំ២០២១ ដ៏ខ្លីខាងមុខនេះ។

ក្រុមហ៊ុន Vinamilk មានរោងចក្រចំនួន៣កន្លែង នៅក្រៅប្រទេសដូចជាសហរដ្ឋអាមេរិក នូវែលសេឡង់ និងកម្ពុជា ព្រមទាំងកសិដ្ឋានចិញ្ចឹមគោ យកទឹកដោះមួយនៅប្រទេ​សឡាវផងដែរ។ តាមការរំពឹងទុក ដំណាក់កាលសាងសង់ទី១ នៃកសិដ្ឋានចិញ្ចឹមគោ៨.០០០ក្បាល ដែលអាចផលិតទឹកដោះ បានប្រមាណ៤៤.០០០តោនក្នុងមួយឆ្នាំៗនេះ អាចនឹងដាក់ឱ្យដំណើរការនៅត្រីមាសទី១ ដើមឆ្នាំ២០២២។

បង្កើតឡើងក្នុងឆ្នាំ១៩៧៦ បច្ចុប្បន្នក្រុមហ៊ុន Vinamilk មានរោងចក្រសរុបចំនួន១៦កន្លែង និងកសិដ្ឋានចិញ្ចឹមគោចំនួន១៣កន្លែង នៅប្រទេសវៀតណាម និងនៅបរទេស៕

ដោយៈគង់ សូរិយា

ភ្នំពេញៈ អភិបាលខេត្តកណ្តាល លោក​ គង់​ សោភ័ណ្ឌ​បាន​​ឱ្យ​ដឹង​ថា​ ​ផ្លូវ​រត់​ទី​១​ (Runway1) ​ព្រលាន​យន្តហោះ​ថ្មី​ នៅ​​ស្រុក​កណ្ដាល​​​ស្ទឹង នឹង​បញ្ចប់​ការ​​ស្ថាបនា​​ឱ្យ​បាន​​មុន​​ត្រីមាស​ទី​​១ ឆ្នាំ​២០២៣​​​​ខាងមុខ ដោយផ្លូវ​រត់​នេះមាន​ទទឹង១០០ម៉ែត្រ បណ្ដោយ៤០០០ម៉ែត្រ ប្រើ​ប្រាស់​ផ្ទៃ​ដីចំនួន៤០ហិកតា​។ ​

លោកគង់ សោភ័ណ្ឌបានមានប្រសាសន៍ឲ្យដឹងបែបនេះ ក្នុង​​ឱកាស​​ផ្ដល់វិញ្ញាប​នបត្រ​សំគល់​ម្ចាស់​អចលនវត្ថុ ជូន​ដល់​ប្រជាពលរដ្ឋស្ម័គ្រចិត្តដូរដី ក្នុង​គម្រោង​ស្ថាប​នា អាកា​សយានដ្ឋាន​អន្តរជាតិភ្នំពេញថ្មី ​ចំនួន១៦នាក់ នា​​​​ព្រឹក​ថ្ងៃ​ទី​២៥ ខែ​សីហា ឆ្នាំ​២០២១​នេះ​។

លោកបន្ត​ថា “ការ​បង្កើត​​គម្រោងសាង សង់អាកាសយានដ្ឋានអន្តរជាតិភ្នំពេញថ្មី គឺ​ជា​គោលការណ៍​សម្រេច របស់រាជរដ្ឋាភិបាលលើផ្ទៃដី២៦០០ហិកតា ក្នុងនោះស្ថិតក្នុងខេត្តកណ្តាល ទំហំ២៤២៦ហិកតា និងខេត្តតាកែវ១៧៤ ហិកតា”។លោក​​បាន​បន្ថែម​​ថា​ “ការសម្រេចរបស់រាជរដ្ឋាភិបាល ក្នុងការសាងសង់ព្រលានយន្តហោះនេះ គឺជាមោទនភាពរបស់ខេត្តកណ្តាល ជាពិសេសសម្រាប់ស្រុកកណ្តាលស្ទឹង ដែលនឹង​មាន​ព្រលាន​យន្តហោះខ្នាតអន្តរជាតិ កើត​មាន​ឡើង​នៅ​លើ​ទឹកដីកំណើតរបស់ខ្លួន”។

អាកាសយានដ្ឋាន​អន្តរជាតិ​ភ្នំពេញ​ថ្មី ​វិនិយោគ​ក្នុង​ទឹកប្រាក់​ប្រមាណ​១,៥០០​លាន​ដុល្លារ​។ អាកាស​យានដ្ឋាន​​នេះ សាងសង់​ឡើងលើ​ផ្ទៃដី​ទំហំ​២,៦០០​ហិកតា គ្រោង​​បញ្ចប់​ការសាងសង់​នៅ​ក្នុង​ឆ្នាំ​២០២៣​ខាងមុខ​។ សមត្ថភាព​ប្រលាន​នេះ​ អាច​ទទួល​អ្នក​ដំណើ​រ​បាន​ប្រមាណ​១៣​លាន​នាក់ ​នៅក្នុង​ឆ្នាំ​២០២៣, ៣០​លាន​នាក់​នៅក្នុង​ឆ្នាំ​២០៣០ និង​៥០​លាន​នាក់​នៅក្នុង​ឆ្នាំ​២០៥០​។​

អ្នកឧកញ៉ា ពុង ឃាវសែ ប្រធាន​ក្រុមប្រឹក្សាភិបាល​នៃ​កាណាឌីយ៉ា​គ្រុប និង OCIC ធ្លាប់​បានមានប្រសាសន៍ថា គម្រោង​អាកាសយានដ្ឋាន​អន្តរជាតិ​ភ្នំពេញ​ថ្មី​ ចេញ​ប្លង់​សាងសង់​ដោយ​ក្រុមហ៊ុន ​Foster & Partners ដែលជា​ក្រុមហ៊ុន​ល្បីល្បាញ​មួយ​នៅលើ​ពិភពលោក​។ អាកាស​យានដ្ឋាន​ថ្មី​នេះ ត្រូវបាន​រចនា​ឡើង​លំដាប់ថ្នាក់ 4F ជា​អាកាសយានដ្ឋាន​ធំ​បំផុត​លំដាប់​ទី​៩ នៅក្នុង​ពិភពលោក ដែល​ស្ថិតនៅ​លំដាប់​ពីក្រោយ​អាកាសយានដ្ឋាន Chicago O’Hare និង​លំដាប់​មុខ​អាកាស​យានដ្ឋាន​អន្តរជាតិ ​ទីក្រុង​ប៉េកាំង​របស់​ប្រទេស​ចិន​។​

ក្រោយ​ពេល​សាងសង់​ចប់ អាកាសយានដ្ឋាន​ថ្មី​នេះ ​នឹង​សមត្ថភាព​ទទួល​យន្តហោះ​ដឹកជញ្ជូន​ធុន​ធ្ងន់​ផ្លូវ​ឆ្ងាយ ព្រមទាំង​មាន​សមត្ថភាព​ទទួល​អ្ន​ក​ដំណើរ​បាន​ចំនួន​៣០​លាន​នាក់​នៅ​ឆ្នាំ​២០៣០ និង​នៅ​ឆ្នាំ​២០៥០ វា​នឹង​អាច​ទទួល​អ្នកដំណើរ​រហូតដល់៥០​លាន​នាក់​ស្របតាម​ផែនការមេ៕​

​​​​​​

ដោយៈសុខុម

ក្រុងអូតាវ៉ា: នាយករដ្ឋមន្ត្រីកាណាដាJustin Trudeauបានសន្យាថា នឹងដាក់ចេញបម្រាមមិនឱ្យជនបរទេសទិញផ្ទះរយៈពេល២ឆ្នាំ ដើម្បីដោះស្រាយវិបត្តិលំនៅដ្ឋានឡើងថ្លៃខ្ពស់នៅក្នុងប្រទេសនេះ ប្រសិនបើលោកជាប់ឆ្នាំមួយអាណត្តិទៀត។ នេះបើយោងតាមសារព័ត៌មាន South China Morning Post ចុះផ្សាយនៅថ្ងៃទី២៥ សីហា នេះ។

ការសន្យារឹតបន្តឹងទីផ្សារអចលនទ្រព្យ ប្រភេទលំនៅដ្ឋាននេះ គឺដើម្បីទប់តម្លៃផ្ទះដែលហក់ឡើងខ្ពស់ យ៉ាងរហ័សអំឡុងវិបត្តិកូវីដ-១៩។ ការឡើងថ្លៃផ្ទះ បានក្លាយជាបញ្ហាដ៏សំខាន់មួយ ក្នុងយុទ្ធនាការឃោសនារកសំឡេងគាំទ្រ សម្រាប់ការបោះឆ្នោតថ្ងៃទី២០ ខែកញ្ញា ឆ្នាំនេះដែលលោក ទ្រូដូ សង្ឃឹមថា នឹងទទួលបានសំឡេងគាំទ្រភាគច្រើន នៅក្នុងសភា ព្រោះគណបក្សធំៗទាំង៣សុទ្ធតែសន្យាថានឹងរឹតបន្តឹងទីផ្សារលំនៅដ្ឋាន។

នៅឯព្រឹត្តិការណ៍ធ្វើយុទ្ធនាការឃោសនា រកសំឡេងគាំទ្រនៅក្រុង Hamilton ក្នុងខេត្ត Ontario លោក ទ្រូដូ បានថ្លែងថា “បងប្អូនមិនគួរចាញ់សង្គ្រាមដេញថ្លៃ ទិញផ្ទះរបស់បងប្អូនក្រោមកណ្ដាប់ដៃឈ្មួញ ទិញផ្ទះទុកចំណេញឡើយ”។ លោកបន្តថា “ទ្រព្យសម្បត្តិរបស់ជនបរទេស លែងអាចយកមកបង្កប់ទុកក្នុងផ្ទះ ដែលមនុស្សគួររស់នៅទៀតហើយ”។

ប្រជាពលរដ្ឋកាណាដា មានការមិនសប្បាយចិត្តយ៉ាងខ្លាំង ចំពោះទីផ្សារលំនៅ     ដ្ឋាន ដែលហក់ឡើងថ្លៃកាន់តែខ្ពស់ ដោយសារអ្នកទិញជាជនបរទេស ជាពិសេសនៅទីក្រុង Vancouver ដែលទីផ្សារលំនៅដ្ឋានត្រូវប៉ាន់ខ្លាំង ក្នុងចំណោមជនជាតិចិន ទៅពីក្រុងហុងកុង និងចិនប៉េកាំង ដែលមិនមែនជាអ្នករស់នៅអចិន្រ្តៃយ៍។

ការលក់ផ្ទះបន្តឱ្យទៅម្ចាស់ថ្មីបានធ្លាក់ចុះ ក្នុងរយៈពេលប៉ុន្មានខែចុងក្រោយនេះ បន្ទាប់ពីសកម្មភាពលក់ដូរផុសផុលខ្លាំង ប៉ុន្តែតម្លៃនៅតែខ្ពស់ខ្លាំងដដែល។

យោងតាមសមាគមអចលនទ្រព្យកាណាដា (CREA) ឱ្យដឹងថា តម្លៃផ្ទះជាមធ្យមមួយខ្នងលក់ ក្នុងតម្លៃ៦៦៩.២០០ដុល្លារកាណាដា (៥២៩.៨៤០ដុល្លារអាមេរិក) ក្នុងខែកក្កដា ដោយកើនឡើងដល់ទៅ១៦% បើធៀបទៅនឹងឆ្នាំ២០២០។

ក្រុមមន្ត្រីមកពីគណបក្សសេរីនិយម (Liberal Party) ក៏កំពុងស្នើឱ្យមានបម្រាមលើការដេញថ្លៃកំបាំងមុខ គណនីសន្សំរួចពន្ធសម្រាប់អ្នកទិញផ្ទះដំបូង និងការត្រួតពិនិត្យបន្ថែមទៀត លើឧស្សាហកម្មអចលនទ្រព្យផងដែរ ដើម្បីប្រយុទ្ធប្រឆាំងនឹងការលាងលុយកខ្វក់។ ពួកគេក៏ប្តេជ្ញាបន្ថែម ឬជួសជុលផ្ទះចំនួន១,៤លានខ្នងទៀត សម្រាប់ទីផ្សារលំនៅដ្ឋានក្នុងរយៈពេល៤ឆ្នាំខាងមុខនេះផងដែរ។

លោក ទ្រូដូ បានថ្លែងក្នុងពិធីធ្វើយុទ្ធនាការឃោសនារកសំឡេងគាំទ្រថា “វាមិនមែនជារឿងធម្មតាឡើយ ដែលសហគមន៍ដែលបងប្អូនទាំងអស់គ្នាធំដឹងក្ដី មិនមែនជាកន្លែង ដែលបងប្អូនអាចកសាងជីវិតរស់នៅ ចិញ្ចឹមគ្រួសារ ឬរស់ដល់ចាស់បាន។ នោះក៏ព្រោះតែអ្នកទាំងអស់គ្នា បាត់បង់ឱកាសក្នុងរូបភាពអយុត្តិធម៌”៕