ដោយៈវឌ្ឍនៈ

ភ្នំពេញៈ ក្រុមហ៊ុនវិនិយោគរបស់អ្នកវិនិយោគចិន នៅក្នុងប្រទេសកម្ពុជា ព្រីនស៍រៀលអ៊ីស្ទេតគ្រុប ដែលមានក្រុមហ៊ុនបុត្រសម្ព័ន្ធជាច្រើន បានបណ្ដាក់ទុនទឹកប្រាក់ជាច្រើនមកដល់សព្វថ្ងៃនេះ។

ជាពិសេសក្រុមហ៊ុននេះបានវិនិយោគ លើគម្រោងអចលនទ្រព្យធំៗនៅក្នុងប្រទេ​សកម្ពុជា គឺបានក្ដោបក្ដាប់ដោយក្រុមហ៊ុនមួយនេះផងដែរ ។ ថ្មីៗនេះក្រុមហ៊ុនវិនិយោគមួយនេះបានបណ្ដាក់ទុនវិនិយោគ នៅក្នុងខេត្តព្រះសីហនុ លើគម្រោងអភិវឌ្ឍទីក្រុងរាម និងបានប្ដេជ្ញាថា នឹងជំរុញការវិនិយោគគម្រោងមួយនេះ ឱ្យបានដល់១៦ពាន់លានដុល្លារអាមេរិក។

យោងតាមសេចក្តីប្រកាសព័ត៌មានរបស់ក្រុមហ៊ុន វិនិយោគលើគម្រោងអភិវឌ្ឍន៍ទីក្រុងរាមបានឱ្យដឹងថា ព្រីនស៍ ហូលឌីង គ្រុបកំពុងអភិវឌ្ឍន៍ទីក្រុងរាម ដែលជាគម្រោងទេសចរណ៍ និងលំនៅដ្ឋាននាពេលខាងមុខ ដែលនឹងក្លាយជាគម្រោងអចលនទ្រព្យប្រកបដោយនិរន្តរភាពឈានមុខគេមួយ នៅប្រទេសកម្ពុជាក្នុងគោលបំណង ធានាបាននូវការវិនិយោគ សម្រាប់តំបន់នេះសរុបប្រមាណ១៦ ពាន់លានដុល្លារសហរដ្ឋអាមេរិក។

គម្រោងនេះ មានទីតាំងស្ថិតនៅក្នុងចម្ងាយ១០នាទី ពីអាកាសយានដ្ឋានអន្តរជាតិក្រុងព្រះសីហនុ ដែលមានគោលបំណងរួមចំណែក ដល់ការស្តារសេដ្ឋកិច្ចនៅខេត្តព្រះសីហនុ។

នាពេលខាងមុខនេះ ព្រីនស៍ ហូលឌីង គ្រុបកំពុងតែបោះជំហានទៅមុខដោយបន្តស្វែងរកឱកាសដើរតួនាទីយ៉ាងសំខាន់ នៅកម្ពុជាតាមរយៈភាពជាដៃគូ ឬការវិនិយោគដោយផ្ទាល់ទៅក្នុងវិស័យសំខាន់ៗ ដើម្បីភាពប្រសើរឡើងរបស់ប្រជាជនកម្ពុជា និងសេដ្ឋកិច្ចក្នុងតំបន់ ។
លោក Liu Guodong អ្នកគ្រប់គ្រងផ្នែកទីផ្សារនៃក្រុមហ៊ុនព្រីនស៍ហ័នយូជាបុត្រសម្ព័ន្ធមួយរបស់ក្រុមហ៊ុនព្រីនស៍គ្រុបបានឱ្យដឹងថា ទោះបីជាស្ថិតនៅក្នុងដំណាក់កាលកូវីដ១៩ក្ដី តែក្រុមហ៊ុនព្រីនស៍នៅតែបន្តបោះទុន វិនិយោគប្រកបដោយភាពជឿជាក់ ពីព្រោះក្រុមហ៊ុនផ្នែកមានហិរញ្ញវត្ថុរឹងមាំ និងមិនងាយមានវិបត្តិហិរញ្ញវត្ថុឡើយ។

លោកបន្តថា “នៅក្នុងវិបត្តិយើងក៏បានអភិវឌ្ឍន៍គម្រោងថ្មីៗ ជាបន្តបន្ទាប់ ដើម្បីបំពេញតម្រូវការនៅពេលនេះផង នៅនៅពេលអនាគតផង”។

លោកបន្តថា នៅក្នុងវិបត្តិកូវីដ១៩នេះ វាជាឱកាសមួយសម្រាប់អ្នកចង់ទិញអច​លនទ្រព្យ ពីព្រោះពួកគេមានអាទិភាព ក្នុងការចរចា និងទទួលបានការបញ្ចុះតម្លៃពិសេសៗជូន ។

លោកLiu Guodorngបានបន្តជឿជាក់ថា “នៅក្នុងពេលអនាគតប្រទេសកម្ពុជានឹងមានការរីកចម្រើន ដូចនឹងប្រទេសជិតខាងនៅពេលនេះផងដែរ ពីព្រោះសក្ដានុពលវិនិយោគនៅក្នុងប្រទេសកម្ពុជា ក៏មិនខុសពីស្ថានភាពប្រទេសជិតខាង កាលពីអតីតកាលនោះទេ”៕

ដោយៈសុជាតា

ភ្នំពេញៈ ក្រសួងពាណិជ្ជកម្ម និងស្ថានទូតអូស្រ្តាលីនៅកម្ពុជាបានសិក្សា និងបង្ហា​ញលទ្ឋផលនៃការសិក្សាលើផលិតផលកសិកម្ម ដែលមានតម្លៃខ្ពស់ចំនួន៩មុខ ដែលលទ្ឋផលនេះបានដាក់ឲ្យប្រើប្រាស់ជាផ្លូវការនាព្រឹកថ្ងៃទី២៥ សីហានេះ។

រដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិ បានមានប្រសាសន៍ក្នុងពិធីប្រកាសដាក់ឱ្យប្រើប្រាស់ជាផ្លូវការនូវ លទ្ធផលនៃការសិក្សាស្រាវជ្រាវស្តីពី “ទីផ្សារសម្រា​ប់ផលិតផលកសិ​កម្មដែលមានតម្លៃខ្ពស់របស់កម្ពុជា តាមប្រព័ន្ឋវីដេអូថា កម្មវិធីនេះត្រូវបានរៀបចំឡើងក្នុងគោលបំណង ដើម្បីផ្សព្វផ្សាយអំពីលទ្ធផល នៃការសិក្សាស្រាវជ្រាវ របស់កម្មវិធីខ្សែច្រវ៉ាក់ តម្លៃកសិកម្មកម្ពុជា-អូស្រ្តាលី (CAVAC) ក្រោមការឧបត្ថម្ភរបស់រដ្ឋាភិបាលអូស្រ្តាលី។

លទ្ឋផលនៃការសិក្សានេះ បានបង្ហាញអំពីផលិតផលកសិកម្ម ដែលមានតម្លៃខ្ពស់របស់កម្ពុជាចំនួន៩មុខ រួមមាន ផ្លែស្វាយ មៀន ស្វាយចន្ទី ម្ទេស ដំឡូងជ្វា  ផ្លែបឺរ ល្ងរ ស្ករត្នោត និងចេកក្រៀម សម្រាប់ផ្សព្វផ្សាយដល់សាធារណៈជន កសិករ អ្នកកែច្នៃ និងភាគីពាក់ព័ន្ធនឹងផលិតផលកសិកម្មកម្ពុជាដែលមានតម្លៃខ្ពស់ទាំងនេះ អំពីកាលានុវត្តភាពនៃផលិតផល និងទីផ្សារនៅក្នុងប្រទេសអូស្ត្រាលី ណូវែលហ្សេឡង់ អឺរ៉ុប ចិន អាស៊ាន និងបណ្ដាទីផ្សារសក្តានុពល ដែលមានតម្រូវការទីផ្សារខ្ពស់ផ្សេងទៀត ដើម្បីជាព័ត៌មានក្នុងការសម្រេចចិត្តលើការវិនិយោគ ជាពិសេសការពង្រីកអាជីវកម្ម ឱ្យបានកាន់តែប្រសើរ សំដៅរួមចំណែក ក្នុងការអភិវឌ្ឍន៍ពាណិជ្ជូបនីយកម្មនៅកម្ពុជា ប្រកបដោយបរិយាប័ន្ន ដែលនឹងជួយរួមចំណែកគាំទ្រ ដល់គោលនយោបាយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រ និងអភិវឌ្ឍន៍សេដ្ឋកិច្ចជាតិ។

លោករដ្ឋមន្រ្តី ក៏បង្ហាញអំពីសមិទ្ធផលនិងផែនការការងារ ដែលក្រសួងពាណិជ្ជកម្មសម្រេចបាននិងកំពុងអនុវត្ត រួមមាន ការបញ្ចប់និងចុះហត្ថលេខាលើកិច្ចព្រមព្រៀងពាណិជ្ជកម្មសេរី រួមមាន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ កិច្ចព្រមព្រៀងពាណិជ្ជកម្មសេរីកម្ពុជា-ចិន កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ការងារអនុវត្តគោលនយោបាយអភិវឌ្ឍន៍ វិស័យឧស្សាហកម្មកម្ពុជា ឆ្នាំ២០១៥-២០២៥ ការងាររៀបចំយុទ្ធសាស្រ្តទាញយកអត្ថប្រយោជន៍ជាអតិបរមា ពីការអនុវត្តកិច្ចព្រមព្រៀងពាណិ​ជ្ជកម្មសេរី និងការងារអាទិភាពផ្សេងទៀត សំដៅកាត់បន្ថយភាពក្រីក្រ និងលើកកម្ពស់សេដ្ឋកិច្ចជាតិក្នុងអំឡុងពេលនិងបន្ទាប់ពីវិបត្តិកូវីដ-១៩។

ជាមួយគ្នានេះដែរ លោក Pablo Kang ឯកអគ្គរដ្ឋទូតនៃប្រទេសអូស្ត្រាលីប្រចាំព្រះរាជាណាចក្រកម្ពុជា បានមានប្រសាសន៍ផងដែរថា វិស័យកសិកម្មបានផ្តល់ឱ្យកម្ពុជានូវស្ថិរភាព ដែលត្រូវការជាចាំបាច់ក្នុងកំឡុងពេលកូវីដ-១៩ និងជាចំណុចកណ្តាលនៃការស្តារសេដ្ឋកិច្ចឡើងវិញ។

លោកបន្តថា ការសិក្សារបស់ “CAVAC” លើផលិតផលកសិកម្មដែលមានតម្លៃខ្ពស់របស់កម្ពុជានេះ ជាមគ្គុទេសន៍ថ្មីមួយ សម្រាប់ការរីកចម្រើននាពេលអនាគត តាមរយៈការលើកទឹកចិត្តវិស័យឧស្សាហកម្ម ក្នុងការធ្វើពិពិធកម្មខ្សែច្រវ៉ាក់ផ្គត់ផ្គង់ការនាំចេញ ទៅជាប្រភេទដំណាំប្រកបដោយភាពច្នៃប្រឌិត ដូចជា ផ្លែប័រ និងគ្រាប់ស្វាយចន្ទី។ ទាំងនេះនឹងជួយធ្វើឱ្យវិស័យកសិកម្មមានភាពធន់និងការប្រកួតប្រជែង៕

ដោយៈវឌ្ឈនៈ

ភ្នំពេញៈ នៅក្នុងខែសីហា២០២១នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន១២ គិតជាទឹកប្រាក់ជិត៨០លានដុល្លារអាមេរិក និងបានផ្ដល់កំលាំងពលកម្ម ដល់ពលរដ្ឋកម្ពុជាជាច្រើននាក់ផងដែរ ។ នេះបើយោងតាមសេចកក្តីប្រកា​សរបស់ក្រុមប្រឹក្សាអភិវឌ្ឍន៍កម្ពុជា ចេញផ្សាយជាបន្តបន្ទាប់នៅក្នុងខែសីហានេះ។

គម្រោងវិនិយោគទាំង១២ ដែលក្រុមប្រឹក្សាអភិវឌ្ឍន៍កម្ពុជាសម្រេចចុះបញ្ជីវិនិយោគជាផ្លូវការរួមមាន ទី១ គម្រោងបង្កើតរោងចក្រកែច្នៃអាលុយមីញ៉ូម ដែក និងទង់ដែង ស្ថិតនៅភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្ដាល មានទុនវិនិយោគប្រមាណ ៣លានដុល្លារអាមេរិក បង្កើតការងារបានចំនួន ៧៥នាក់។

ទី២ គម្រោងបង្កើតស្ថានីយផលិតថាមពលអគ្គិសនី ដើរដោយពន្លឺព្រះអាទិត្យអានុ​ភាព៥មេហ្កាវ៉ាត់ មានទីតាំងស្ថិតនៅភូមិសំបួរ ឃុំពពក ស្រុកស្ទោង ខេត្តកំពង់ធំ មានទុនវិនិយោគប្រមាណ៤,៧លានដុល្លារអាមេរិក បង្កើតការងារបានចំនួន៥៤នាក់។ ទី៣ គម្រោងបង្កើតរោងចក្រផលិតថាមពលអគ្គិសនី ដើរដោយប្រេងខ្មៅ អានុភាព២៣មេហ្កាវ៉ាត់ ស្ថិតនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៨,៥លានដុល្លារអាមេរិកផ្ដល់ការងារ៤៦នាក់។

ទី៤ គម្រោងបង្កើតរោងចក្រផលិតជីវគីមី ដែលមានទីតាំងវិនិយោគស្ថិតនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ មានទុនវិនិយោគ៩,១លានដុល្លារអាមេរិក ផ្ដល់ការងារ៧២នាក់។ ទី៥. គម្រោងបង្កើតកសិដ្ឋានចិញ្ចឹមសត្វ  ដែលមានទីតាំងវិនិយោគស្ថិតនៅភូមិខ្នារ ឃុំក្រាំងធ្នង់ ស្រុកបាទី ខេត្តតាកែវ មានទុនវិនិយោគប្រមាណ ១១,១លានដុល្លារអាមេរិក ផ្ដល់ការងារ ៩២នាក់។

ទី៦ គម្រោងបង្កើតរោងចក្រកែច្នៃផ្លែឈើ (ដំណាប់ស្វាយ, ម្នាស់, មៀន, ខ្នុរ និងស្វាយចន្ទី) ស្ថិតនៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ មានទុនវិនិយោគប្រមាណ ១១,២លានដុល្លារអាមេរិក បង្កើតការងារ១៥៤នាក់ ទី៧. គម្រោងបង្កើតរោងចក្រកែច្នៃដែកគ្រប់ប្រភេទ ដែលមានទីតាំងវិនិយោគស្ថិតនៅភូមិស្ដុកល្ពៅ ឃុំក្សេ​មក្សាន្ត ស្រុកឧដុង្គ ខេត្តកំពង់ស្ពឺ មានទុនវិនិយោគប្រមាណ ១៥,៩លានដុល្លារអាមេរិក និងអាចបង្កើតការងារបានចំនួន ៣៧៤នាក់។

ទី៨.គម្រោងរោងចក្រផលិតគ្រឿងបន្លាស់អេឡិចត្រូនិក ស្ថិតនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន ៣៨០កន្លែង។ ទី៩- គម្រោងបង្កើតរោងចក្រផលិតគ្រឿងបន្សំកាបូប និងគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិថ្លើក ឃុំពើក ស្រុកអង្គស្នួល ខេត្តកណ្តាល មានទុនវិនិយោគប្រមាណ ២,២លានដុល្លារអាមេរិក និងអាចបង្កើតការងារបានចំនួន ២០៦កន្លែង។

ទី១០ គម្រោងបង្កើតរោងចក្រកាត់ដេរសម្លៀកបំពាក់សុវត្ថិភាព ផលិតកាបូប និងឧបករណ៍សម្ភារៈសម្រាប់បោះជំរំគ្រប់ប្រភេទ ដែលមានទីតាំងវិនិយោគស្ថិតនៅភូមិពេជចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ មានទុនវិនិយោគប្រមាណ ៣,៣លានដុល្លារអាមេរិក និងអាចបង្កើតការងារបានចំនួន ១.០២១កន្លែង។ ទី១១ គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិចំបក់ផ្អែម ឃុំរលាំងគ្រើល ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៤,១លានដុល្លារអាមេរិក និងអាចបង្កើតការងារបានចំនួន៤០៣កន្លែង។

ទី១២ គម្រោងបង្កើតរោងចក្រផលិតកាបូបគ្រប់ប្រភេទ និងគ្រឿងបន្ទាប់បន្សំកាបូ​ប ដែលមានទីតាំងវិនិយោគស្ថិតនៅភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល មានទុនវិនិយោគប្រមាណ៤,៤លានដុល្លារអាមេរិក និងអាចបង្កើតការងារបានចំនួន ១.១៧១កន្លែង៕

ដោយៈ វឌ្ឍនៈ

ភ្នំពេញៈ ដើម្បីកាត់ផ្ដាច់នូវការឆ្លងរីករាលដាលនៃជំងឺកូវីដ១៩ នៅក្នុងសហគមន៍ រាជរដ្ឋាភិបាលកម្ពុជា បានស្រេចដាក់ចេញនូវគោលនយោបាយ វ៉ាក់សាំងកូវីដ១៩ ដូសជំរុញសម្រាប់ចាក់ជូនប្រជាពលរដ្ឋ។

យោងតាមសេចក្តីប្រកាសរបស់រាជរដ្ឋាភិបាលកម្ពុជា ចេញផ្សាយនៅថ្ងៃទី២៥ សីហា២០២១នេះថា រាជរដ្ឋាភិបាលបានចាត់ទុកគោនយោបាយ ចាក់វ៉ាក់សាំងកូវីដ១៩ គឺជាយុទ្ធសាស្ត្រគន្លឹះដ៏សំខាន់មួយ និងជាខ្សែក្រវ៉ាត់ការពារទី១សំខាន់ជាងគេ ដើម្បីការពារអាយុជីវិតប្រជាជន ក៏ដូចចាដើម្បីបង្កើតឱ្យបាននូវភាពស៊ាំ ក្នុងសហគមន៍ទប់ទបស់នឹងមេរោគកូវីដ១៩ សំដៅឈានឆ្ពោះទៅបើកដំណើរការប្រទេសជាតិ ពេញលេញឡើងវិញលើគ្រប់វិស័យ និងការរស់នៅជាមួយនឹងជំងឺនេះតាមគន្លងប្រក្រតីភាពជាថ្មី។

គិតរហូតមកដល់ពេលនេះ យុទ្ធនាការជាតិចាក់វ៉ាក់សាំងកូវីដ១៩ ជូនប្រជាជនដោយឥតគិតថ្លៃ និងតាមគោលការណ៍ស្ម័គ្រចិត្ត សម្រេចបាននូវវឌ្ឍនភាពយ៉ាងល្អប្រសើ​រ ដែលមានប្រជាពលរដ្ឋអាយុចាប់ពី១៨ឆ្នាំឡើងទៅ ចំនួនប្រមាណ៨៨ភាគរយធៀបនឹងគោលដៅចំនួន១០លាននាក់  ហើយកុមារនិងយុវជនអាយុចាប់ពី១២ឆ្នាំទៅ ក្រោម១៨ឆ្នាំចំនួនប្រមាណ៥៦ភាគរយ ធៀបនឹងគោលដៅចំនួនប្រមាណជិត២លាននាក់ បានទទួលការចាក់វ៉ាក់សាំងកូវីដ១៩ ។

សេចក្ដីប្រកាសដដែលឱ្យដឹងថា ការចាក់វ៉ាក់សាំងកូវីដ១៩បានឆាប់រហ័ស និងទាន់ពេលវេលា បានជួយសង្គ្រោះ អាយុជីវិតប្រជាជនកម្ពុជាជាច្រើន តាមរយៈការកាត់បន្ថយករណីឆ្លង ករណីធ្លាក់ខ្លួនឈឺធ្ងន់ធ្ងរ និងករណីស្លាប់ដោយជំងឺកូវីដ១៩ និងបានបញ្ចៀសកម្ពុជាពីគ្រោះមហន្តរាយ ដែលបណ្ដាលមកពីជំងឺកូវីដ១៩នេះ ព្រមតាំងធ្វើឱ្យសភាពការណ៍ បច្ចុប្បន្ននៃការឆ្លងរាលដាលនៃជំងឺកូវីដ១៩ ស្ថិតនៅក្នុងកម្រិតមួយដែលអាចគ្រប់គ្រង។

ប៉ុន្តែការរកឃើញជាបន្តបន្ទាប់ ក្នុងសហគមន៍នៃមេរោគកូវីដ១៩ បំប្លែងខ្លួនថ្មីដែលតា បាននាំមកនូវបញ្ហាប្រឈមថ្មីមួយទៀតសម្រាប់ប្រទេសកម្ពុជា ក្នុងការប្រយុទ្ធប្រឆាំងនឹងជំងឺកូវីដ១៩ ដោយសារមេរោគបំប្លែងខ្លួនប្រភេទថ្មីនេះ មានសមត្ថភាពចម្លងលឿនជាងមុន និងមានកម្រិតគ្រោះថ្នាក់ធ្ងន់ធ្ងរ ព្រមទាំងអាចកាត់បន្ថយប្រសិទ្ធភាពនៃវ៉ាក់សាងបាន ។

ផ្អែកលើវឌ្ឍនផាពដ៏ប្រសើរនេះ និងដោយសារតែមានការគាំទ្រ និងចូលរួមយ៉ាងសកម្ម និងទូលំទូលាយពីសំនាក់ប្រជាជននៅគ្រប់មជ្ឈដ្ឋាន យុទ្ធនាការជាតិចាក់វ៉ាក់សាំងកូវីដ១៩ជុំទី១នេះ ត្រូវបានរំពឹងថានឹងអាចបញ្ចប់នូវចុងខែតុលា ឬដើមខែវិច្ឆិកា ២០២១ខាងមុខនេះ មុនផែនការដែលបានគ្រោងទុក ហើយនឹងអាចបើកដំណើរការសេដ្ឋកិច្ចទូលំទូលាយឡើងវិញបានឆាប់ៗផងដែរ។

វិនិយោគិន ធុរជន និងអាជីវករកម្ពុជាជាច្រើនក៏បានរំពឹងថា ក្រោយពេលរដ្ឋាភិបាលកម្ពុជាចាក់វ៉ាក់សាំង បានកាន់តែច្រើននិងគ្រប់គ្នានោះ នឹងធ្វើឱ្យដំណើរការអាជីវកម្មពាណិជ្ជកម្ម និងសកម្មភាពវិនិយោគរបស់ពួកគេត្រលប់មកប្រក្រតីឡើងវិញផងដែរ៕

ដោយៈសុខុម

ក្រុងព្រីតូរីយ៉ា: អត្រាគ្មានការងារធ្វើនៅប្រទេសអាហ្វ្រិកខាងត្បូង បានហក់កើនឡើងដល់កម្រិតខ្ពស់បំផុត ក្នុងចំណោម៨២ប្រទេសដែលឃ្លាំមើល និងស្រង់ទិន្នន័យដោយសារព័ត៌មាន Bloomberg។ នេះបើយោងតាមសារព័ត៌មាន Aljazeera ចុះផ្សាយកាលពីថ្ងៃអង្គារ ទី២៤ សីហា។

យោងតាមរបាយការណ៍ ដែលវិទ្យាស្ថានជាតិស្ថិតិរបស់អាហ្វ្រិកខាងត្បូង បានបញ្ចេញពីថ្ងៃអង្គារបានបង្ហាញថា អត្រាគ្មានការងារធ្វើ បានកើនឡើងដល់៣៤,៤%នៅក្នុងត្រីមាសទី២ បើធៀបនឹង៣២,៦%ក្នុងត្រីមាសទី១។

អត្រាគ្មានការងារធ្វើនេះ ទំនងជាកើនឡើងកាន់តែខ្ពស់នៅត្រីមាសទី៣ ដោយសាររដ្ឋាភិបាលបានចេញវិធានការរឹតបន្តឹង ការទប់ស្កាត់ការរីករាលដាលវីរុសកូវីដ-១៩ ខណៈពេលប្រទេសនេះ កំពុងប្រឈមនឹងការឆ្លងវីរុសកូវីដ-១៩ រលកទី៣ ដែលធ្វើឱ្យរាំងស្ទះ ដល់កិច្ចប្រឹងប្រែងស្ដារឡើងវិញនូវសេដ្ឋកិច្ច ដែលបានដាំក្បាលចុះ៧%កាលពីឆ្នាំមុន។

ទន្ទឹមនេះ ក៏មានករណីផ្ទុះកុបកម្មដ៏កក្រើកមួយកាលពីខែកក្កដា នៅក្នុងខេត្ត Gauteng និងខេត្ត KwaZulu-Natal ដែលជាមជ្ឈមណ្ឌលសេដ្ឋកិច្ចសំខាន់ៗផងដែរ។ កុបកម្មនេះ បានបណ្ដាលឱ្យមនុស្ស៣៥៤នាក់បាត់បង់ជីវិត ហើយអាជីវកម្មរាប់ពាន់កន្លែងត្រូវបានចោរចូលលួច និងបិទទ្វារ។ ស្ថានការណ៍ចលាចលនេះ បានធ្វើឱ្យកាតខាតបង់គិតជាទឹកប្រាក់ រហូតដល់ទៅ៣,៣ពាន់លានដុល្លារ និងធ្វើឱ្យការងារយ៉ាងតិច១៥០.០០០កន្លែងប្រឈមនឹងការបាត់បង់។ នេះបើយោងតាមការឱ្យដឹងពីសមាគមម្ចាស់អចលនទ្រព្យអាហ្វ្រិកខាងត្បូង។

អត្រាគ្មានការងារធ្វើក្នុងសេដ្ឋកិច្ច ឧស្សាហកម្មនៅអាហ្វ្រិក បានរក្សាកម្រិតខ្ពស់លើស២០% រយៈពេលយ៉ាងហោចណាស់២ទសវត្សរ៍មកហើយ ទោះបីជាទិន្នផលសេដ្ឋកិច្ចបានកើនឡើង៥% ឬច្រើនជាងនេះ ក្នុងមួយឆ្នាំនៅដើមទសវត្សរ៍ឆ្នាំ២០០០ ក៏ដោយ។

*តួលេខបាត់បង់ការងារតាមវិស័យសំខាន់ៗ៖

ឧស្សាហកម្មហិរញ្ញវត្ថុបាត់បង់ការងារចំនួន២៧៨.០០០កន្លែង

សេវាកម្មសង្គម សហគមន៍បាត់បង់ការងារចំនួន១៦៦.០០០កន្លែង

ផលិតកម្មបាត់បង់ការងារចំនួន៨៣.០០០កន្លែង

សំណង់បាត់បង់ការងារចំនួន១៤៣.០០០កន្លែងបន្ថែមទៀត

កសិកម្មបាតបង់ការងារចំនួន៦៩.០០០កន្លែងបន្ថែមទៀត៕