សារព៌តមានអន្តរជាតិៈទោះជាមានបញ្ហាប្រឈមជាច្រើនក្ដី ក៏កម្ពុជានៅតែមានសុទិដ្ឋិនិយមអំឡុងសម័យកូវីដ-១៩

ដោយៈសុខុម

ភ្នំពេញៈ វីរុសកូវីដ-១៩ កំពុងតែឆ្លងរាលដាលយ៉ាងពេញទំហឹង ក្នុងតំបន់អាស៊ីអាគ្នេយ៍នៅពាក់កណ្តាលឆ្នាំ២០២១នេះ។យោងតាមអង្គការសុខភាពពិភពលោក (WHO) ឱ្យដឹងថា វីរុសកូវីដ-១៩ បំប្លែងថ្មី Delta ដែល “ឆ្លងលឿនបំផុត និងសាហាវបំផុត” កំពុងតែបង្កអន្តរាយក្នុងតំបន់។

បច្ចុប្បន្ន ប្រទេសឥណ្ឌូនេស៊ី ដែលមានប្រជាជនច្រើនបំផុតក្នុងតំបន់អាស៊ានបានក្លាយជាចំណុចផ្ទុះវីរុសបំប្លែងខ្លួនថ្មីនេះ។

ដោយឡែក សម្រាប់ពេលនេះប្រទេសកម្ពុជា មានស្ថានភាពហាក់ល្អប្រសើរជាងបណ្ដាប្រទេសជិតខាងរបស់ខ្លួន។ នេះបើយោងតាមសារព័ត៌មាន California News Times ចុះផ្សាយនៅថ្ងៃទី៣០ កក្កដា នេះ។

*ការឆ្លើយតបទាន់ពេលវេលា និងរឹងមាំរបស់រដ្ឋាភិបាល

យោងតាមទំព័រហ្វេសប៊ុកផ្លូវការ របស់ក្រសួងសុខាភិបាលកម្ពុជាបានឱ្យដឹងថា កំណើនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី២៩ ខែកក្កដា ឆ្នាំ២០២១ មាន៧១,៣១% (ជាង៧លាននាក់) បើធៀបជាមួយចំនួនប្រជាជនគោលដៅ១០លាននាក់។ ចំនួនប្រជាជនកម្ពុជា ដែលបានទទួលវ៉ាក់សាំងពេញលេញ ពោលគឺគ្រប់ចំនួន២ដូស ក៏មានការកើនឡើងជាលំដាប់ផងដែរ។

សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានសន្យាថានឹងឱ្យកុមារដែលមានអាយុពី១២ ដល់១៧ឆ្នាំទទួលការចាក់វ៉ាក់សាំង ដែលយុទ្ធនាការថ្មីនេះនឹងចាប់ផ្ដើមពីថ្ងៃទី១ សីហា តទៅ។

លទ្ធភាពអាចទៅរួចដែលថា សាលារៀននានានៅទូទាំងប្រទេស នឹងបើកដំណើរការពេញលេញឡើងវិញនៅខែកញ្ញា ខាងមុខ។ ប្រទេសកម្ពុជា អាចនឹងសម្រេចបាននូវភាពស៊ាំក្នុងសហគមន៍ (Community Resilience) នៅត្រឹមដើមឆ្នាំ២០២២។

រដ្ឋាភិបាលកម្ពុជា ក៏កំពុងស្វះស្វែងទិញវ៉ាក់សាំងបន្ថែមផងដែរ ដើម្បីពន្លឿនការចាក់ឱ្យទាន់តាមគោលដៅដែលបានកំណត់។

ទោះជាយ៉ាងណា ពលរដ្ឋក្រីក្រ ជាអ្នករងផលប៉ះពាល់ធ្ងន់ធ្ងរខ្លាំងជាងគេ អំឡុងវិបត្តិកូវីដ-១៩ ជាពិសេសផ្នែកសេដ្ឋកិច្ច។

ជាសំណាងល្អ រដ្ឋាភិបាលកម្ពុជា បានបញ្ចេញកញ្ចប់ថវិកាយ៉ាងច្រើនសន្ធឹកសន្ធាប់ក្នុងយុទ្ធនាការប្រយុទ្ធប្រឆាំងវិបត្តិកូវីដ-១៩ និងសម្រាប់បើកប្រាក់ឧបត្ថម្ភ ដើម្បីជួយសម្រាកទុក្ខលំបាករបស់ពលរដ្ឋក្រីក្រ។

យោងតាមធនាគារអភិវឌ្ឍន៍អាស៊ី (ADB) ឱ្យដឹងថា ប្រទេសកម្ពុជា បានចំណាយប្រាក់ចំនួន១.៣៦ពាន់លានដុល្លារអាមេរិក ដើម្បីប្រយុទ្ធប្រឆាំងនឹងវីរុសកូវីដ-១៩ ដែលស្មើនឹងប្រមាណ៥.១% នៃផលិតផលក្នុងស្រុកសរុប (GDP) របស់ប្រទេស។ ហើយឆ្នាំនេះ រដ្ឋាភិបាលទំនងជាចំណាយបន្ថែមទៀតដើម្បីទប់ទល់នឹងវិបត្តិនេះ។

*តើភាពស៊ាំក្នុងសហគមន៍ជាអ្វី ហើយហេតុអ្វីបានជាវាសំខាន់ម៉្លះ?

ភាពស៊ាំក្នុងសហគមន៍ ដែលគេស្គាល់ថាជាភាពស៊ាំជាសហគមន៍ គឺនៅពេលដែលមនុស្សគ្រប់គ្រាន់ នៅក្នុងតំបន់មួយក្លាយទៅជាភាពស៊ាំ ទៅនឹងជំងឺឆ្លងនេះ ដែលអាចរារាំង ក្នុងការឆ្លងពីមនុស្សម្នាក់ទៅមនុស្សម្នាក់ទៀត។ ដោយសារតែវិធីនេះសហគមន៍ទាំងមូលត្រូវបានការពារ មិនត្រឹមតែមនុស្សដែលមានភាពស៊ាំប៉ុណ្ណោះទេ។ វាជារបៀបដែលយើងបញ្ឈប់ការរីករាលដាល នៃជំងឺដូចជាជំងឺខួរឆ្អឹង និងជំងឺកញ្ជ្រិលអញ្ចឹងដែរ។

ភាពស៊ាំក្នុងសហគមន៍គឺមានសារៈសំខាន់ណាស់ ព្រោះវាការពារមនុស្សដែលមិនអាចចាក់វ៉ាក់សាំងបានដូចជាទារក និងកុមារតូចៗ។ វាក៏ជួយដល់មនុស្សមួយចំនួនដែលមិនអាចទទួលយកវ៉ាក់សាំងផងដែរ ដូចជាអ្នកដែលមានប្រព័ន្ធភាពស៊ាំខ្សោយ៕

កញ្ញាងួន ច័ន្ទចរិយាត្រូវបានតែងតាំងជាទូតសុឆន្ទៈរបស់បុរីGB Residence

ដោយៈគង់ ម៉ាលីន

ភ្នំពេញៈ ជាតារាសម្តែងមានទេពកោសល្យមួយរូប និងមានចំណេះដឹងផ្នែកអចលនទ្រព្យ កញ្ញាងួន ច័ន្ទចរិយាត្រូវបានតែងតាំងជាទូតសុឆន្ទៈរបស់បុរីGB Residence ជាបុរីមួយដែលបានបោះទុនវិនិយោគ៦២លានដុល្លារអាមេរិក។

កញ្ញាងួន ច័ន្ទចរិយាក៏៏ជាទូតសុឆន្ទៈនៃគេហទំព័រPropertyarea.asiaផងដែរ ដែលកញ្ញាបាននិងកំពុងដើរតួនាទីសំខាន់ លើការជួយផ្សព្វផ្សាយពីគេហទំព័រនេះ។

អ្នកនាងគ្រុយ ស្រីខួចអគ្គនាយិកាក្រុមហ៊ុនCMC Real Estateដែលជាក្រុមហ៊ុនទទួលបានសិទ្ឋលក់ផ្តាច់មុខបុរីGB Residenceបានមានប្រសាសន៍ឲ្យដឹង នារសៀលថ្ងៃទី២៩ កក្កដានេះថា ដោយសារជាតារាមានប្រជាប្រិយភាពមួយរូប មានចំណេះដឹងផ្នែកអចលនទ្រព្យ និងកំពុងធ្វើការងារលើវិស័យនេះ បុរីGB Residenceសម្រេចតែងតាំងកញ្ញា ដើម្បីជួយលើកកំពស់ការផ្សព្វផ្សាយ និងជំរុញការលក់គម្រោងនេះឲ្យទទួលបានជោគជ័យ។

អ្នកនាងបន្តថា ”ដោយសារកញ្ញាចរិយាជាអ្នកលក់អចលនទ្រព្យផង និងជាមនុស្សមានទំនាក់ទំនងល្អក្នុងសង្គមផង ទើបក្រុមហ៊ុនអភិវឌ្ឍន៍បុរីGB សម្រេចតែងតាំងកញ្ញាជាទូតសុឆន្ទៈ និងរំពឹងកញ្ញានឹងជួយជំរុញការលក់ឲ្យមានលទ្ឋផលប្រសើរ”។

ជាមួយនឹងស្នាមញញឹម កញ្ញាងួន ច័ន្ទចរិយាបានមានប្រសាសន៍ថា វាពិតជាកិត្តយសណាស់សម្រាប់កញ្ញា ដែលបានទទួលការតែងតាំងនេះ ដែលងារជាទូតសុឆន្ទៈពិតជាសំខាន់ ដែលនឹងធ្វើឲ្យកញ្ញាមានកំលាំងចិត្ត ដើម្បីជួយដល់ការលក់គំរោងនេះឲ្យទទួលបានលទ្ឋផលជាទីពេញចិត្ត។

កញ្ញាបន្តថា “ខ្ញុំយល់ឃើញថាគំរោងGB Residence ជាគំរោងស្ថិតនៅទីតាំងល្អ ដោយសារស្ថិតនៅក្បែរផ្លូវក្រវ៉ាត់ក្រុងទី៣ និងក្បែរព្រលានយន្តហោះអន្តរជាតិភ្នំពេញថ្មី ដែលនឹងបញ្ចប់នៅឆ្នាំ២០២៣”។កញ្ញាបន្តថា “ខ្ញុំជឿជាក់ថាអ្នកវិនិយោគគំរោងនេះ នឹងទទួលបានផលចំណេញលឿននាពេលអនាគត ហើយគំរោងនេះនឹងទទួលបានជោគជ័យ”៕

អ្នកជំនាញសេដ្ឋកិច្ចៈ ការបិទខ្ទប់ខេត្តចំនួន៨នឹងបង្កផលប៉ះពាល់តិចតូចដល់សេដ្ឋកិច្ច

ដោយៈ តារា

ភ្នំពេញៈ អ្នកជំនាញសេដ្ឋកិច្ចបានលើកឡើងថា ការបិទខ្ទប់ខេត្តចំនួន៨ ដើម្បីទប់ស្កាត់ការឆ្លងរាល់ដាលនៃមេរោគកូវីដ១៩ របស់រាជរដ្ឋាភិបាល អាចនឹងបង្កផលប៉ះពាល់ដល់វិស័យសេដ្ឋកិច្ចបន្តិចបន្ទួច ខណៈលំហូរទំនិញឬការធ្វើអាជីវកម្មនៅក្រៅតំបន់បិទខ្ទប់នៅដំណើរការជាធម្មតា។

ទាក់ទងនឹងការបិទខ្ទប់ភូមិសាស្រ្ត ខេត្តចំនួន៨ ដើម្បីទប់ស្កាត់ការឆ្លងរាល់ដាលក្នុងសហគមន៍នៃមេរោគកូវីដ-១៩ ប្រភេទ Delta លោកបណ្ឌិតគី សេរីវឌ្ឍន៍អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា ថ្លែងលើកឡើង នៅថ្ងៃទី៣០ ខែកក្កដា ឆ្នាំ២០២១ នេះថា ពាក់ព័ន្ធនឹងការបិទខ្ទប់របស់រាជរដ្ឋាភិបាល ចំពោះខេត្តដែលនៅជាប់ព្រំដែនថៃ និងខេត្តមួយចំនួនដែលប៉ះពាល់ គឺជាការបិទខ្ទប់ចំពោះការចរាចរមនុស្ស ជាពិសេសប្រជាពលរដ្ឋដែលធ្វើការឆ្លងកាត់ពីប្រទេសថៃចូលមកកម្ពុជា ក្នុងនោះចំពោះការបិទខ្ទប់នេះ អាចនឹងបិទតំបន់មួយចំនួន ក្នុងរណីរកឃើញការឆ្លង ដោយអនុវត្តន៍ទៅតាមតំបន់លឿង តំបន់ក្រហម និងតំបន់លឿងទុំ។

លោកបណ្ឌិត បានថ្លែងបន្តថា តាមការសង្កេតមើលជាក់ស្តែង ប្រជាពលរដ្ឋដែលមកពីប្រទេសថៃ ពួកគាត់ភាគច្រើនរស់នៅតាមតំបន់ជនបទ ប្រសិនក្នុងករណីរកឃើញការឆ្លង អាជ្ញាធរអាចនឹងបិទខ្ទប់តែតំបន់ទាំងនោះ ដូច្នេះចំពោះតំបន់មិនមានការប៉ះពាល់ ការប្រកបរបរអាជីវកម្មរបស់បងប្អូនប្រជាពលរដ្ឋនៅតាមមូលដ្ឋាន ឬតាមទីប្រជុំជននៅដំណើរការជាធម្មតា ក្នុងនោះចំពោះលំហូរទំនិញ ឬការដឹកជញ្ជូនទំនិញផ្សេងៗពីមូលដ្ឋាន ឬពីព្រំដែន សម្រាប់ផ្គត់ផ្គង់នៅតាមទីផ្សារ នឹងចរាចរជាធម្មតា ក្នុងករណីមិនមានការឆ្លងនៃជម្ងឺកូវីដ-១៩ នេះ។

ការបិទខ្ទប់ភូមិសាស្ត្រខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តសៀមរាប ដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ-១៩ ប្រភេទដែលតា (Delta) គឺជាការសម្រេចរបស់អភិបាលនៃគណៈអភិបាលខេត្តនៃខេត្តដែលត្រូវបានបិទខ្ទប់ ការកំណត់ភូមិសាស្ត្រណាមួយក្នុងតំបន់បិទខ្ទប់ជា “តំបន់ក្រហម”, “តំបន់លឿងទុំ” ឬ “តំបន់លឿង”។

ក្នុងនោះចំពោះភូមិសាស្ត្រ ដែលមានការឆ្លងរាលដាលក្នុងសហគមន៍នៃមេរោគកូវីដ-១៩ ប្រភេទដែលតា (Delta) ឬភូមិសាស្ត្រដែលមានការផ្ទុះឆ្លងរាលដាលលឿនខុសពីប្រក្រតី ឬមានការសង្ស័យពាក់ព័ន្ធនឹងមេរោគកូវីដ-១៩ប្រភេទដែលតា (Delta), អភិបាលនៃគណៈអភិបាលខេត្ត នៃខេត្តដែលត្រូវបានបិទខ្ទប់ ត្រូវកំណត់ភូមិសាស្ត្រនោះជា “តំបន់ក្រហម” ឬ “តំបន់លឿងទុំ” អាស្រ័យទៅតាមកម្រិតនៃការឆ្លងរាលដាលនៃមេរោគប្រភេទដែលតា (Delta) នេះ។

គណៈអភិបាលខេត្តនៃខេត្តដែលត្រូវបានបិទខ្ទប់ នឹងដាក់ចេញនូវវិធានការ ហាមឃាត់ ឬវិធានការរឹតត្បិត ជាអាទិ៍ ទាក់ទងនឹងការធ្វើដំណើរក្នុងភូមិសាស្ត្របិទខ្ទប់ ឬការធ្វើដំណើរចេញ-ចូល ឆ្លងកាត់ព្រំប្រទល់ភូមិសាស្ត្រខេត្តដែលត្រូវបានបិទខ្ទប់, ការជួបជុំ ឬការប្រមូលផ្តុំមនុស្ស, សកម្មភាពការងារ មុខរបរ ឬអាជីវកម្ម និងបម្រាមគោចរនានាជាដើម ៕

គម្រោងព្រលានយន្តហោះអន្តរជាតិថ្មីទំាង៣របស់កម្ពុជានៅតែបន្តដំណើរការទៅមុខទោះស្ថិតក្នុងវិបត្តិសកល

ដោយៈ តារា

ភ្នំពេញៈ មន្ត្រីជាន់ខ្ពស់អាកាចរស៊ីវិល បានបញ្ញាក់ថា ទោះស្ថិបរិបទនៃជំងឺកូវីដ១៩ ការសាងសង់ព្រលានយន្តហោះអន្តរជាតិថ្មីទំាង៣កន្លែងរបស់កម្ពុជា រួមមានព្រលានយន្តហោះអន្តរជាតិភ្នំពេញថ្មី ព្រលានយន្តហោះអន្តរជាតិសៀមរាបអង្គរថ្មី និងព្រលានយន្តហោះអន្តរជាតិតារាសាគរខេត្តកោះកុងនៅដំណើរការធម្មតា។

លោកស៊ីន ចាន់សិរីវុត្ថាអនុរដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរស៊ីវិល បានថ្លែងប្រាប់កាលពីថ្មីៗថា បច្ចុប្បន្ននេះស្ថានភាពការសាងព្រលានយន្តហោះអន្តរជាតិទំាង៣កន្លែងរបស់កម្ពុជា គឺនៅតែដំណើរកសាង ពុំមានដំណើរការប្រែប្រួលដោយសារជំងឺរាតត្បាតកូវីដ-១៩ទេ។

លោកបានបន្តថា រហូតមកដល់ពេលនេះ វឌ្ឍនភាព នៃការកសាងព្រលានយន្តហោះទំាង៣កន្លែងរបស់កម្ពុជា គឺនៅដំណើរជាជំហានៗដដែល ជាក់ស្តែងសម្រាប់ព្រលានយន្តហោះអន្តរជាតិភ្នំពេញថ្មី មកដល់ពេលនេះគឺសម្រេចការកសាងបានប្រមាណជា១៨,០៥% ហើយព្រលាននេះនឹងកសាងរួចរាល់នៅដើមឆ្នាំ២០២៣ ដែលគ្រោងដាក់ឱ្យដំណើរការនៅពាក់កណ្តាលឆ្នាំ២០២៣។

លោកបានបន្តទៀតថា ចំណែកព្រលានយន្តហោះអន្តរជាតិសៀមរាបអង្គរថ្មី មកដល់ពេលនេះដូចគ្នា គឺសម្រេចការកសាងបានប្រមាណជា៤៣,៥៣% ហើយព្រលាននេះនឹងកសាងរួចរាល់នៅខែកញ្ញាឆ្នាំ២០២២ ដែលគ្រោងនឹងដាក់ឱ្យដំណើរនៅខែមីនាឆ្នាំ២០២៣។

លោកបានបន្ថែមថា ដោយឡែកសម្រាប់ព្រលានយន្តហោះអន្តរជាតិតារាសាគរខេត្តកោះកុង គឺមកដល់ពេលនេះសម្រេចការកសាងបានប្រមាណជា៩១,០៥% ហើយព្រលាននេះនឹងកសាងរួចរាល់នៅខែធ្នូឆ្នាំ២០២១នេះ ដែលគ្រោងនឹងដាក់ឱ្យដំណើរការនៅពាក់កណ្តាលឆ្នាំ២០២២ ហើយការកសាងព្រលានយន្តហោះអន្តរជាតិទំាង៣កន្លែងក្នុងដំណាក់កាលដំបូងនេះ គឺជាព្រលានយន្តហោះលំដាប់លេខកូដ E ដែលធានាបាននូវផ្លូវរត់សម្រាប់ប្រភេទយន្តហោះ Air Bus 340, Air Bus 350 និងប្រភេទយន្តហោះ Booing 400, Booing 747 និងយន្តហោះ Boing 777 ជាដើម។

សម្រាប់ព្រលានយន្តហោះអន្តរជាតិភ្នំពេញថ្មី គ្រោងចំណាយថវិកាប្រមាណ១៥០០លានដុល្លារ, ចំណែកព្រលានយន្តហោះអន្តរជាតិសៀមរាបអង្គរថ្មី គ្រោងចំណាយថវិកាជាង៨០០លានដុល្លារ និងព្រលានយន្តហោះអន្តរជាតិតារាសាគរខេត្តកោះកុង គ្រោងចំណាយថវិកាជាង២០០លានដុល្លារ៕

សម្តេចតេជោៈ ជំនួយវ៉ាក់សាំង Johnson & Johnson ជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិកចំពោះប្រជាជនកម្ពុជានិងនៅក្នុងតំបន់

ដោយៈ ប៊ី

ភ្នំពេញៈ វ៉ាក់សាំងកូវីដ-១៩ Johnson & Johnson ដែលជាជំនួយរបស់រដ្ឋាភិបាល និងប្រជាជនអាមេរិក តាមរយៈមជ្ឈមណ្ឌលកូវ៉ាក់ បានដឹកមកដល់ប្រទេសកម្ពុជាយើងហើយ នៅថ្ងៃទី៣០ ខែកក្កដា ឆ្នាំ២០២១នេះ។

នៅលើបណ្តាញទំនាក់ទំនងសង្គមហ្វេសប៊ុកផ្លូវការ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឱ្យដឹងថា តាមរយៈមជ្ឈមណ្ឌលកូវ៉ាក់ សហរដ្ឋអាមេរិក បានប្រកាសផ្តល់វ៉ាក់សាំងចំនួន ១លានដូសដល់រាជរដ្ឋាភិបាល និងប្រជាជនកម្ពុជា។ វ៉ាក់សាំងដែលមកដល់ថ្ងៃនេះ មានចំនួន ៥០ម៉ឺនដូស ដោយឡែកចំនួន ៥០ម៉ឺនដូស នឹងដឹកមកដល់នៅថ្ងៃទី០២ ខែសីហាខាងមុខ។

សម្តេចតេជោ បានបញ្ជាក់ថា “អំណោយនេះ គឺជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិក ចំពោះប្រជាជនកម្ពុជា និងនៅក្នុងតំបន់ ក្នុងពេលកំពុងតែប្រឹងងើបចេញពីជំងឺរាតត្បាតយ៉ាងធ្ងន់ធ្ងរនេះ”។

វ៉ាក់សាំង គឺជាឧបករណ៍ដ៏សំខាន់មួយក្នុងការប្រយុទ្ធប្រឆាំងនឹងជំងឺកូវីដ១៩ ដែលកំពុងរីករាលដាលលើពិភពលោក។ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខនោះ ក៏បានដាក់ចេញផែនការផ្តល់វ៉ាក់សាំងជូនប្រជាពលរដ្ឋ ជាផែនការយុទ្ធសាស្ត្រមួយក្នុងការប្រយុទ្ធប្រឆាំងនឹងជំងឺកូវីដ-១៩។

កម្ពុជា ក៏បានស្វះស្វែងយ៉ាងខ្លាំងក្នុងការរកវ៉ាក់សាំងមកចាក់ជូនប្រជាពលរដ្ឋ។ មកដល់ពេលពេលបច្ចុប្បន្ននេះ រកបានវ៉ាក់សាំងជាង ១៧លានដូសហើយ ដែលក្នុងនោះមានទាំងការផ្តល់ជំនួយ និងការបញ្ជាទិញ។

ដើម្បីចូលរួមប្រយុទ្ធប្រឆាំងនឹងការរាតត្បាតជំងឺកូវីដ១៩នៅកម្ពុជា មានប្រទេសជាមិត្តចំនួន៤ហើយ បានផ្តល់ និងប្រកាសផ្តល់ជំនួយវ៉ាក់សាំងមកកម្ពុជា។ ប្រទេសដែលបានផ្តល់ និងបានប្រកាសផ្តល់រួមមាន៖ ចិន ផ្តល់វ៉ាក់សាំងជាង ២លានដូស ជប៉ុន ១លានដូស អាមេរិក ១លានដូស និងអង់គ្លេស ៤១ម៉ឺន ៥ពាន់ដូស៕

កីឡដ្ឋានធំនៃពហុកីឡដ្ឋានជាតិមរតកតេជោតម្លៃប្រមាណ២០០លានដុល្លារនឹងសម្រេចជាស្ថាពរនាខែសីហា

ដោយៈ ប៊ី

ភ្នំពេញៈ ការសាងសង់កីឡដ្ឋានធំ (Main Stadium) ឬកីឡដ្ឋានធំនៃពហុកីឡដ្ឋានជាតិមរតកតេជោបានសម្រេចជាស្ថាពរគ្រប់លក្ខណៈសម្បត្តិទាំងអស់ នាខែសីហា ឆ្នាំ២០២១។ នេះបើតាមការបញ្ជាក់របស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍កាលពីម្សិលមិញ។

នេះបើតាមការបញ្ជាក់តាមប្រព័ន្ធអនឡាញរបស់លោកវ៉ាត់ ចំរើនអគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) ដែលបានបង្ហាញវឌ្ឍនភាពការសាងសង់កីឡដ្ឋានធំនៃពហុកីឡដ្ឋានជាតិមរតកតេជោ ដោយពេលនេះ ឯកឧត្តមទទួលបន្ទុកនាយបេសកកម្មកម្ពុជា កំពុងដឹកនាំក្រុមប្រតិភូ-អត្តពលិកកម្ពុជា ចូលរួមប្រកួតកីឡាអូឡាំពិក ឆ្នាំ២០២០ នៅទីក្រុងតូក្យូ ប្រទេសជប៉ុន។

លោកបានបញ្ជាក់ថា “មកដល់ពេលនេះ សំណង់នេះបានលេចចេញជាសមិទ្ធផលពេញគ្រប់លក្ខណៈសម្បត្តិទាំងអស់ មានន័យថា កាលពីពេលមុន យើងនៅសេសសល់ការបំពាក់កៅអីខ្លះៗ ទីលានរត់អត្តពលកម្ម និងទីលានបាល់ទាត់ ប៉ុន្តែឥឡូវនេះគឺធ្វើរួចរាល់ទាំងស្រុងហើយ”។

លោកបានថ្លែងបន្តថា ចំពោះអាងទឹក ជុំវិញវិមានកីឡដ្ឋាន ដែលជាតំណាងកស្សិណអង្គរក៏បានដាក់បង្ហូរទឹកបំពេញអាង និងប្រព័ន្ធភ្លើង អំពូល ភ្លើងបំភ្លឺអាង រួមទាំងប្រព័ន្ធសំឡេង (Sound System) នៅផ្នែកខាងក្នុង ក៏បានបំពាក់រូចរាល់ដូចគ្នាផងដែរ។

លោកបានឱ្យដឹងទៀតថា ដូច្នេះ គ្រប់ការសាងសង់ ការបំពាក់ឧបករណ៍ រួមទាំងការងារផ្សេងទៀត សម្រាប់កីឡដ្ឋានធំនេះ ត្រូវបានធ្វើរួចរាល់ជាស្ថាពរ។ ក្រៅពីនេះ គឺនៅសល់ការរៀបចំតុបតែង នៅផ្នែកទីធ្លាខាងក្រៅបន្តិចបន្តួចប៉ុណ្ណោះ។ ជារួម គឺក្រុមហ៊ុនសាងសង់បានបើកភ្លើងបំភ្លឺសាកល្បង ដោយត្រូវប្រើប្រាស់ ថាមពលអគ្គិសនីដ៏ច្រើនសន្ធឹកសន្ធាប់។ អ្វីដែលនៅសេសសល់បន្តិចបន្តួចនោះ គឺការងារទីធ្លាខាងក្រៅ រួមទាំងការបោសសម្អាត។

ជាមួយគ្នានេះដែរ លោកអគ្គលេខាធិការក៏បានសង្កត់ធ្ងន់ដែរថា កិច្ចការត្រួតពិនិត្យវឌ្ឍនភាពការសាងសង់កីឡដ្ឋានធំនេះត្រូវបានឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC តែងតែបានយកចិត្តទុកដាក់ខ្ពស់ និងហ្មត់ចត់បំផុតឲ្យតាមដានជាប់ជាប្រចាំ។ ក្រោយពីបញ្ចប់ការសាងសង់ គឺយើងត្រូវបន្តការថែទាំ បន្ទាប់ពីក្រុមហ៊ុនសាងសង់របស់ភាគីចិននឹងប្រគល់ជូនដល់ CAMSOC។

លោកបានបន្ថែមថា សម្រាប់ការថែទាំនេះយើងកំពុងស្នើសុំការផ្តល់ធនធានមនុស្ស អ្នកបច្ចេកទេស សន្តិសុខ សណ្តាប់ធ្លាប់ អនាម័យ ដើម្បីបន្តការថែទាំវិមានពហុកីឡដ្ឋានជាតិមរតកតេជោ ដែលជាមរតកដ៏ធំមហាសាលរបស់កម្ពុជា សម្រាប់ការទាក់ទាញ និងក្លាយជានិមិត្តរូបថ្មីនៃព្រះរាជាណាចក្រកម្ពុជា។

ពហុកីឡដ្ឋានជាតិមរតកតេជោ គឺជាកន្លែងប្រារព្ធពិធីបើក-បិទជាផ្លូវការនៃព្រឹត្តិការណ៍កីឡា ស៊ីហ្គេម លើកទី៣២ និងការប្រកួតកីឡាជនពិការ អាស៊ានប៉ារ៉ាហ្គេម លើកទី១២ ឆ្នាំ២០២៣ ដែលជាព្រឹត្តិការណ៍ប្រកួតពហុកីឡាដ៏ធំប្រចាំតំបន់អាស៊ីអាគ្នេយ៍ ដែលព្រះរាជាណាចក្រកម្ពុជា កំពុងសម្រួចគោលដៅយ៉ាងយកចិត្តទុកដាក់ប្រកបដោយក្តីសង្ឃឹម និងភាពជឿជាក់ក្នុងការទទួលរៀបចំធ្វើម្ចាស់ផ្ទះជាលើកដំបូងជាប្រវត្តិសាស្ត្រ។

ពហុកីឡដ្ឋានជាតិមរតកតេជោ ត្រូវបានបើកការដ្ឋានសាងសង់ដំណាក់កាលទី១ កាលពីថ្ងៃទី១២ ខែមេសា ឆ្នាំ២០១៣ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។ ពហុកីឡដ្ឋានជាតិមរតកតេជោ គ្រោងចំណាយថវិកាសាងសង់ចន្លោះពី ១០០លាន ទៅ ២០០លានដុល្លារអាមេរិក ដែលថវិកាមួយភាគធំ ជាជំនួយឥតសំណងរបស់រដ្ឋាភិបាលចិន៕

ក្រុមហ៊ុន Hyundai Motor និង LG Energy Solution បោះទុនវិនិយោគរួមគ្នាជាង១ពាន់លានដុល្លារ ដើម្បីសង់រោងចក្រនៅឥណ្ឌូនេស៊ី

ដោយ សុខុម

សេអ៊ូល: ក្រុមហ៊ុនកូរ៉េខាងត្បូង ចំនួនពីរគឺក្រុមហ៊ុនផលិតរថយន្ត Hyundai Motor Group និងក្រុមហ៊ុន LG Energy Solution បានចេញសេចក្ដីថ្លែងការណ៍រួមកាលពីថ្ងៃព្រហស្បតិ៍ ទី២៩ កក្កដា ថា ខ្លួននឹងបង្កើតការបណ្តាក់ទុនរួមគ្នាមួយនៅប្រទេសឥណ្ឌូនេស៊ី ដើម្បីសាងសង់រោងចក្រផលិតអាគុយសម្រាប់រថយន្តអគ្គិសនី (EV)។

យោងតាមការចុះផ្សាយរបស់សារព័ត៌មាន The Edge Markets ឱ្យដឹងដឹងថា គម្រោងវិនិយោគនេះមានទំហំ១,១ពាន់លានដុល្លារ ដោយភាគីនីមួយៗកាន់កាប់ចំណែកពាក់កណ្ដាលម្នាក់នៃអាជីវកម្មបណ្ដាក់ទុនរួមគ្នានេះ។

ការបណ្ដាក់ទុនរួមគ្នានេះនឹងជួយឱ្យក្រុមហ៊ុន Hyundai និងក្រុមហ៊ុនជាសាខា Kia Corp ទទួលបានការផ្គត់ផ្គង់ដោយស្ថិរភាព នូវអាគុយរថយន្តអគ្គិសនីក្នុងតម្លៃសមរម្យសម្រាប់រថយន្តអគ្គិសនីរបស់ពួកគេ។

ក្រុមហ៊ុន LG Energy Solution ដែលជាបុត្រសម្ព័ននៃក្រុមហ៊ុន LG Chem Ltd និងក្រុមហ៊ុន Hyundai បានចុះអនុស្សរណៈនៃការយោគយល់គ្នា (MoU) មួយជាមួយរដ្ឋាភិបាលឥណ្ឌូនេស៊ី ដើម្បីសាងសង់រោងចក្រនៅក្នុងប្រទេសដែលជាសមាជិកអាស៊ាន មួយនេះ។

ដំណឹងនេះកើតមានឡើង ស្របពេលបណ្ដាក្រុមហ៊ុនផលិតរថយន្តទូទាំងពិភពលោកផ្អើលងាកទៅផលិតរថយន្តអាគុយដោយសង្ឃឹមថានឹងបង្កើនការលក់ដោយសារតែទទួលបានការឧបត្ថម្ភធន និងកូតាពិសេសពីរដ្ឋាភិបាលនានាទូទាំងពិភពលោក ដែលកំពុងស្វះស្វែងកាត់បន្ថយការបញ្ចេញឧស្ម័នកាបូន។

ក្រុមហ៊ុនទាំងពីរនិយាយថា ដំណើរការសាងសង់រោងចក្រនេះគ្រោងនឹងចាប់ផ្តើមនៅក្នុងត្រីមាសទី៤ ចុងឆ្នាំ២០២១ នេះ ហើយនឹងបញ្ចប់ជាស្ថាពរនៅពាក់កណ្តាលឆ្នាំ២០២៣។

បច្ចុប្បន្នប្រទេសឥណ្ឌូនេស៊ី កំពុងជំរុញលើកកម្ពស់ការអភិវឌ្ឍរថយន្តអគ្គិសនី និងការផលិតអាគុយក្នុងស្រុក៕

ចំណេះដឹងផ្សារហ៊ុន! តើការរក្សាទុកមូលបត្រគីជាអ្វីនិងមានអត្ថប្រយោជន៍អ្វីខ្លះ?

ដោយៈ សាវុធ

ភ្នំពេញៈ ប្រតិបត្តិកររក្សាទុកមូលបត្រសំដៅដល់កន្លែងសម្រាប់ដាក់ផ្ញើមូលបត្រ។ ការដាក់ផ្ញើមូលបត្រគីជាដំណើរការនៃការផ្ទេរកម្មសិទ្ធិករមូលបត្រ តាមរយៈការផ្ទេររវាងគណនី (Book Entry) (ការកត់ត្រាឥណទាន/ឥណពន្ធ ក្នុងសៀវភៅគណនីរបស់សមាជិក និងអ្នកចូលរួម) ដោយគ្មានចរន្ដនៃការផ្ទេរមូលបត្ររូបវ័ន្ដ។

អត្ថប្រយោជន៍
នៅពេលមូលបត្រមានការជួញដូររវាងវិនិយោគិន ប្រតិបត្តិកររក្សាទុកមូលបត្រធើ្វការទូទាត់នូវប្រតិបត្តិការទាំងនោះតាមរយៈការផ្ទេររវាងគណនី (Book Entry)ដោយគ្មានការផ្ទេរមូលបត្ររូបវ័ន្ត។ ដូច្នេះហានិភ័យចំពោះការបាត់ និងការលួចមូលបត្រត្រូវបានជៀសវាងទាំងស្រុង។
សមាជិក អ្នកចូលរួម និងអតិថិជន ដែលបានដាក់ផ្ញើមូលបត្រនៅ ផ.ម.ក. មិនចាំបាច់ដកមូលបត្រទៅវិញ នៅពេលដែលត្រូវអនុវត្តសិទ្ធិកម្មសិទ្ធិករឡើយ។

ការបើកគណនី
បុគ្គលដែលអាចបើកគណនីមូលបត្រនៅប្រតិបត្តិកររក្សាទុកមូលបត្ររួមមាន ក្រុមហ៊ុនមូលបត្រ និងក្រុមហ៊ុនចុះបញ្ជីលក់មូលបត្រ។ បុគ្គលដែលមានបំណងបើកគណនីមូលបត្រត្រូវបំពេញបែបបទបើកគណនីមូលបត្រនៅប្រតិបត្តិកររក្សាទុកមូលបត្រ។ គ្រប់គណនីមូលបត្រទាំងអស់ រួមមានគណនីមូលបត្ររបស់សមាជិក ឬ អតិថិជនត្រូវបានបង្កើតឡើងក្នុង ប្រព័ន្ធ Ledger (ledger system) របស់ ផ.ម.ក. ដែលផ្ទុកផងដែរនូវទិន្នន័យលម្អិតនៃប្រតិបត្តិការរបស់សមាជិក និងអតិថិជន ព្រមទាំងទិន្នន័យលម្អិតនៃបញ្ជីភាគហ៊ុនិក។

ការដាក់ផ្ញើមូលបត្រ
ដើម្បីដាក់ផ្ញើមូលបត្រនៅប្រតិបត្តិកររក្សាទុកមូលបត្រ បុគ្គលដែលដាក់ផ្ញើត្រូវផ្ដល់ព័ត៌មានដូចខាងក្រោមដល់ប្រតិបត្តិកររក្សាទុកមូលបត្រ : ប្រភេទមូលបត្រ ចំនួននៃការបោះផ្សាយ ឈ្មោះមូលបត្រ អក្សរកូដ ចំនួនមូលបត្រសរុប កាលបរិចេ្ឆទបោះផ្សាយ កាលបរិចេ្ឆទចុះបញ្ជី និងព័ត៌មានផេ្សងទៀតពាក់ព័ន្ធនឹងកម្មសិទ្ធិភាពមូលបត្រ៕

វិស័យអចលនទ្រព្យតំបន់ជាប់រាជធានីភ្នំពេញមួយកំពុងបង្ហាញសក្តានុពលសម្រាប់ការវិនិយោគ

ដោយៈ ប៊ី

ភ្នំពេញៈ វិស័យអចលនទ្រព្យកម្ពុជាបង្ហញសក្តានុពលដោយទាញបានបណ្តាវិនិយោគិនជាច្រើនទាំងក្នុង និងក្រៅស្រុក ដើម្បីការអភិវឌ្ឍន៍លើវិស័យអចលនទ្រព្យ ជាក់ស្តែងខេត្តកណ្តាលជាខេត្តមួយក្នុងចំណោមខេត្តមានឥទ្ធិពលលើវិស័យអចលនទ្រព្យ កំពុងតែបង្ហាញពីសក្តានុពលរបស់ខ្លួនតាមរយៈការអភិវឌ្ឍន៍នានាក្នុងខេត្តដែលមានព្រំប្រទល់ជាប់នឹងរាជធានីភ្នំពេញ។

អ្នកជំនាញអចលនទ្រព្យបានលើកឡើងថា តំបន់នៅខេត្តកណ្ដាល ដែលជាប់ព្រំប្រទល់ជាប់ ឬក្បែរទីក្រុងភ្នំពេញ កំពុងមានសក្តានុពលខ្លាំងលើវិស័យអចលនទ្រព្យ ដែលនឹងទាក់ទាញការវិនិយោគលំនៅដ្ឋានបែបទំនើបកាន់តែច្រើនក្នុងតំបន់នោះនាពេលខាងមុខ។

លោកច្រឹក សុខនីមប្រធានសមាគមអ្នកវាយតម្លៃ និងអចលនវត្ថុកម្ពុជាបានថ្លែងនៅថ្ងៃទី២៩ ខែកក្កដា ឆ្នាំ២០២១ ថា ចប្ចុប្បន្ន នៅចន្លោះផ្លូវជាតិលេខ៥ និងផ្លូវជាតិលេខ៦អា (6A) កំពុងតែទាក់ទាញគម្រោងវិនិយោគលំនៅដ្ឋានជាច្រើន ទាំងគម្រោងវិនិយោគរបស់រដ្ឋាភិបាល និងគម្រោងធំៗរបស់វិស័យឯកជងផងដែរ ដែលវាបានជះឥទ្ធិពលដល់តំបន់ក្បែរៗនោះ ជាពិសេសគឺស្រុកមុខកំពូលនេះតែម្ដង ដែលធ្វើឱ្យតំបន់នេះក្លាយជាតំបន់ដែលមានសក្តានុពលខ្លាំងលើវិស័យអចលនទ្រព្យនាពេលខាងមុខ។

លោកគង់ សោភ័ណ្ឌអភិបាលខេត្តកណ្តាលក៏បានលើកឡើងដែរថា ស្ទើរតែគ្រប់តំបន់ក្នុងខេត្តកណ្ដាល ដែលព័ន្ធជុំវិញរាជធានីភ្នំពេញមានភាពរីកចម្រើនខ្លាំង ហើយលំនៅដ្ឋានកម្រិតមធ្យមបាននឹងកំពុងដើរតួរយ៉ាងសំខាន់ស្របពេលដែលចំនួនប្រជាជនក្នុងខេត្តនេះបានកើនឡើងដល់ជាង១លាននាក់។

ខេត្តកណ្ដាល គឺជាខេត្តមួយ ដែលព័ន្ធជុំវិញរាជធានីភ្នំពេញ ហើយលើសពីនេះ បាននិងកំពុងទទួលបានគម្រោងវិនិយោគជាច្រើនរាប់ចាប់តាំងពីគម្រោងអភិវឌ្ឍន៍អចលនទ្រព្យ និងគម្រោងបង្កើតរោងចក្រនានាជាដើម៕

តើអចលនទ្រព្យសំខាន់ៗប៉ុន្មានប្រភេទដែលកំពុងពេញនិយមវិនិយោគនៅកម្ពុជា?

ដោយៈ ម៉ាណេត

ភ្នំពេញៈ ការវិនិយោគលើវិ័យអចលនទ្រព្យត្រូវបានទទួលបានថាជាការវិនិយោគមួយ ដែលទទួលបានផលចំណេញខ្ពស់ ប៉ុន្តែប្រជាជនកម្ពុជាមួយចំនួនមិនដឹងច្បាស់ថា តើអ្នកដឹងទេអចលនទ្រព្យសំខាន់ៗមានប៉ុន្មានប្រភេទនោះទេ។

អ្នកជំនាញក្នុងវិស័យអចលនទ្រព្យបានលើកឡើងថា អចលនទ្រព្យសំខាន់ៗត្រូវបានបែងចែកជា៤ប្រភេទ ក្នុងនោះរួមានអចលនទ្រព្យពាណិជ្ជកម្ម អចលនទ្រព្យឧស្សាហកម្ម អចលនទ្រព្យជាដី និងអចលនទ្រព្យលំនៅដ្ឋាន ។

១) អចលនទ្រព្យជាដី៖ ដីជាប្រភេទអចលនទ្រព្យប្រើប្រាស់ដីក្នុងការសាង់សង់ផ្ទះ ឬអគារពាណិជ្ជកម្មផ្សេងៗ ដីក៏ត្រូវបានប្រើប្រាស់ក្នុងគោលបំណងសម្រាប់កសិកម្មដូចជាការប្រើប្រាស់ដីសម្រាប់ការដាំដំណាំ និងចិញ្ចឹមសត្វជាដើម។

២) អចលនទ្រព្យពាណិជ្ជកម្ម៖ (commercial real estate)៖ អចលនទ្រព្យប្រភេទនេះមានដូចជា ផ្សារទំនើប,ហាងលក់រាយ, អគារការិយាល័យ, សណ្ឋារគារនិងកាស៊ីណូ, មន្ទីពេទ្យឯកជន និងគ្រឹះស្ថានអប់រំ។ ប្រភេទអចលនទ្រព្យពាណិជ្ជកម្មនេះ មានមុខងារច្រើនជាងអចលនទ្រព្យលំនៅឋាន។ មិនតែប៉ុណ្ណោះ អចលនទ្រព្យពាណិជ្ជកម្មអាចធ្វើឱ្យមានស្ថេរភាពលំហូរសាច់ប្រាក់ច្រើនជាង ព្រោះអគារពាណិជ្ជកម្មនីមួយៗមានបន្ទប់ច្រើនបើធៀបនឹងផ្ទះល្វែង ហើយបន្ថែមពីនេះការដាក់ជួលមានរយៈពេលវែងរហូតដល់ ៥ទៅ១០ឆ្នាំឯណោះ។

៣) អចលនទ្រព្យឧស្សាហកម្ម៖ ជាប្រភេទអចលនទ្រព្យដែលសំដៅលើរោងចក្រឧស្សាហកម្ម និងឃ្លាំងស្តុកទំនិញជាដើម។

៤) អចលនទ្រព្យលំនៅដ្ឋាន (residential real estate)៖ ជាប្រភេទអចលនទ្រព្យដែលប្រើប្រាស់សម្រាប់ការរស់នៅមានដូចជាផ្ទះ ខុនដូ និង អាផាតមិន ជាដើម។ ជាទូទៅ គេអាចវិនិយោគលើអចលនទ្រព្យប្រភេទនេះតាមរយៈការទិញចូលតម្លៃទាប ហើយលក់ចេញយកផលចំណេញ ឬដាក់ជួលបង្កើតបានជាលំហូរសាច់ប្រាក់ទៀងទាត់។

អ្នកជំនាញក្នុងវិស័យអចលនទ្រព្យ បានលើកឡើងថា អចលនទ្រព្យទាំង៤ទាំងនេះមិនត្រឹមតែមាននិយមសម្រាប់ការវិនិយោគនៅបណ្តាប្រទេសផ្សេងៗប៉ុណ្ណោះទេ នៅកម្ពុជា វិនិយោគិនក៏និយមក្នុងការវិនិយោគលើប្រភេទអចលនទ្រព្យទាំងនេះផងដែរ៕

1...1,8131,8141,815...3,264 Page 1,814 of 3,264