Balactan៖ ផលិតផលម្សៅទឹកដោះគោគ្មានជាតិសណ្តែកដំបូងបង្អស់នៅកម្ពុជា ជួយដល់ការលូតលាស់ដល់សតិបញ្ញា ស្មារតីកូនលោកអ្នក

ដោយៈគង់ សិរីជេស៊ីកា

ភ្នំពេញៈ ផលិតផលម្សៅទឹកដោះគោ ជាអាហារសំខាន់ណាស់សំរាប់ផ្តល់ការលូតលាស់ដល់សតិបញ្ញា ស្មារតីរបស់ទារកនិងកុមារ ហេតុនេះការជ្រើសរើសផលិតផលត្រឹមត្រូវមានសារៈសំខាន់ណាស់។

ផលិតផ្តោតលើគុណភាពនិងក្តីស្រលាញ់ចំពោះទារកនិងកុមារ Balactan ជាផលិតផលទឹកដោះគោ ដែលផលិតនៅសហគមន៍អឺរ៉ុនិងត្រូវបាននាំចូលមកដោយក្រុមហ៊ុន MTSL Investment Co., Ltd ជាផលិតផលទឹកដោះគោដែលគ្មានជាតិសណ្តែកដំបូងបង្អស់នៅកម្ពុជា។

តើផលិតផលម្សៅទឹកដោះគោ គ្មានជាតិសណ្តែកផ្តល់ផលប្រយោជន៍ បែបណាដល់កុមារ?

តាមការស្រាវជ្រាវរបស់ស្ថាប័នអន្តរជាតិមួយបានរកឃើញថា ទឹកដោះគោដែលគ្មានជាតិសណ្តែកអាចឲ្យកុមារមានជំងឺអង់ហ្សីម និងជំងឺស្លេកស្លាំងអាចទទួលទានបាន។ ការសិក្សាបានឲ្យដឹងថា នៅពេលទារកកើតមកភ្លាម គ្រូពេទ្យតែងតែជោះកែងជើង បើសិនជាទារកមានជំងឺអង់ហ្សីម គ្រូពេទ្យតែងតែប្រាប់មាតាបិតាគ្រប់រូបពីបុត្រធីតារបស់ពួកគេ ថាកូនរបស់ពួកគេមិនអាចញាំ ឬទទួលទានផលិតផលដែលមានជាតិសណ្តែកឡើយ។

លើសពីនេះ Balactan បានបន្ថែមសារធាតុ DHA សម្រាប់ផលិតផលថ្មីរបស់យើង ដែលសារធាតុនេះ ជួយដល់ការអភិវឌ្ឍលូតលាស់ខួរក្បាលក្មេងឲ្យចងចាំបានល្អ រៀនសូត្រចាប់បានលឿន រហ័ស និងចងចាំបានយូរ។ ពិសេសពួកគាត់អាចប្រើប្រាស់ខួរក្បាលបានល្អ។

លោកប៊ូ ខេមរិន្រ្ទ ប្រធានផ្នែកលក់និងទីផ្សាក្រុមហ៊ុនMTSL Investment Co., Ltd បានមានប្រសាសន៍ថា “អ្វីកាន់តែពិសេសពេលកុមារទទួលបានសារធាតុDHA បានច្រើនរហូតដល់អាយុ៦ឆ្នាំ ធ្វើឲ្យពួកគាត់រៀនសូត្របានចេះចាំលឿន ពិសេសពេលពួកគាត់ចាស់ទៅក៏មិនមានភាពរង្វេងផងដែរ”។ លោកបន្តថា “នៅកម្ពុជាមានផលិតផលទឹកដោះគោ ដែលមានសារធាតុ DHA ផងដែរ ប៉ុន្តែគេលក់តម្លៃថ្លៃ តែសារធាតុ DHA នៅមានកម្រិត បើធៀបនឹងផលិតផលរបស់យើង”។

ផលិតផលទឹកដោះគោ Balactan បាននិងកំពុងចរាចរណ៍លើទីផ្សារយ៉ាងទូលំទូលាយនៅកម្ពុជា និងកំពុងទទួលបានការគាំទ្រច្រើនពីសំណាក់មាតាបិតា អាណាព្យាបាលកុមារនៅទូទាំងប្រទេស។

អគ្គនាយិការងក្រុមហ៊ុន MTSL Investment Co., Ltd លោកជំទាវ ថេង សុខលី បានមានប្រសាសន៍ថា ដោយសារមាននិស្ស័យស្រលាញ់កុមារ ទើបលោកជំទាវបានសម្រេចជ្រើសរើសផលិតផលម្សៅទឹកដោះគោប្រកបដោយភាពសំរិតសំរាំងយកមកចែកចាយនៅកម្ពុជា ព្រោះចង់ឃើញទារកនិងកុមារនៅកម្ពុជាមានសុខភាពល្អ និងបញ្ញាឆ្លាតវៃ ដូចកុមារនៅតាមបណ្តាប្រទេសជឿនលឿនមួយចំនួន។

លោកជំទាវមានប្រសាសន៍ថា “ហេតុនេះមុនសម្រេចចិត្តជ្រើសរើសផលិតផលណាមួយ សំរាប់ទារកនិងបុត្រធីតារបស់លោកអ្នក សូមពិចារណាទៅលើសារធាតុផ្សំនិងជាផលិតផលលំដាប់ ISO ដូចជា Balactan”។ លោកជំទាវបន្តថា “ការសំរិតសំរាំងផលិតផលមានគុណភាព សុវត្ថិភាព ជាការជ្រើសរើសក្តីស្រលាញ់សំរាប់បុត្រ ធីតារបស់ខ្លួន ដែលនាងខ្ញុំផ្ទាល់ក៏បានជ្រើសរើសBalactan សំរាប់កូនរបស់ខ្ញុំផងដែរ”៕

គន្លឹះក្នុងការជ្រើសរើសភ្នាក់ងារអចលនទ្រព្យឱ្យបានត្រឹមត្រូវ

ដោយ: ម៉ាលីស

ភ្នំពេញ៖ ភ្នាក់ងារអចលនទ្រព្យមានតួនាទីសំខាន់ណាស់នៅក្នុងការចរចា សម្របសម្រួល អន្តរាគមន៍ និងបម្រើសេវាកម្មដ៏ល្អឥតខ្ចោះមួយ ទៅដល់ភាគីទាំងសងខាង ទាំងអតិថិជន និងម្ចាស់អចលនទ្រព្យ។ លោក អ៊ួន សារ៉ាត់ បានចែករំលែកគន្លឹះក្នុងការជ្រើសរើសឱ្យបានភ្នាក់ងារអចលនទ្រព្យក៏ល្អ យោងតាមសៀវភៅ “ភាពឆ្លាតវៃក្នុងរឿងអចលនទ្រព្យ” ដោយពិចារណាទៅដល់ចំណុចមួយចំនួនដូចជា៖

១. ត្រូវមើលទៅលើភាពល្បីល្បាញនៃក្រុមហ៊ុន

ជាទូទៅ ក្នុងប៉ុន្តែមានភាពល្បីល្បាញភាគ៣ បានបង្ហាញអំពីស្នាដៃមានសមត្ថភាពសមិទ្ធផលរបស់ពួកគេមានភាពរីកចម្រើនយើងអាចនិយាយថាបើ វាមិនរីកចម្រើនគឺមិនល្បីឡើយ ហើយបើមិនរីកចម្រើន គឺវាបញ្ជាក់ថាអ្វីអន់ៗ ដូចជាសេវាកម្មអន់ ការទំនាក់ទំនងអន់ សមត្ថភាពអន់ និងលទ្ធផលក៏អន់ដែរ បើសិនជាអ្វីក៏អន់ អញ្ចឹងដូច្នេះនោះមិនមែនជាក្រុមហ៊ុនឬភ្នាក់ងារត្រឹមត្រូវ ដែលអ្នកគួរជ្រើសរើសនោះទេ។

២. ភាពស្របច្បាប់
ក្រុមហ៊ុនឬភ្នាក់ងារអចលនទ្រព្យនោះត្រូវតែមានភាពស្របច្បាប់ទទួលបានការអនុញ្ញាតពីក្រសួងមន្ទីរឬស្ថាប័នដែលមានការពាក់ព័ន្ធ ហើយការទទួលស្គាល់នោះមិនមែនតែជាការនិយាយនោះទេគឺត្រូវតែមានការលិខិតបញ្ជាក់ច្បាស់លាស់ត្រឹមត្រូវទោះយ៉ាងណា យើងត្រូវពិនិត្យអង្កេតនិងស្រាវជ្រាវឲ្យបានហ្មត់ចត់ អំពីហត្ថលេខា ចំណារនិងត្រាពីព្រោះថាជាបទពិសោធន៍ក្នុងនោះ មានការបន្លំហត្ថលេខាចំណារនិងការដែលធ្វើឲ្យមានផលប៉ះពាល់អវិជ្ជមាននិងការខាតបង់ផលប្រយោជន៍របស់អតិថិជនជាច្រើន។

៣. ការទទួលស្គាល់
ការទទួលស្គាល់សំដៅទៅលើការទទួលស្គាល់គុណភាពឬស្នាដៃ ដែលមានការវាយតម្លៃពី ក្រសួងស្ថាប័នដែលមានកិត្តិនាមទាំងក្នុងថ្នាក់ជាតិនិងអន្តរជាតិ។ យើងអាចអាចមើលទៅលើលិខិត សារលិខិត ពានរង្វាន់ដែលក្រុមហ៊ុននោះទទួលបាន ហើយបើកក្រុមហ៊ុននោះទទួលបានកាន់តែច្រើន កាន់តែប្រសើរ។ ជាទូទៅមនុស្សស្ថាប័ន ណាមួយ ផ្តល់ពានរង្វាន់ ដល់ក្រុមហ៊ុនណាមួយ ឬបុគ្គលណាមួយ គេសុទ្ធតែឆ្លងកាត់ ការវាយតម្លៃជាច្រើនដំណាក់កាល ដើម្បីមានភាពសុក្រឹត ពីព្រោះគេក៏មិនចង់ឱ្យស្ថាប័នរបស់គេអាប់មាត់ដែរ ទោះជាយ៉ាងណាក៏ដោយក៏វានៅតែពុំគ្រប់គ្រាន់ក្នុងការថ្លឹងថ្លែង ប្រកបដោយសុភវិនិច្ឆ័យនោះដែរ។ យើងត្រូវស្វែងយល់ពីកត្តាពាក់ព័ន្ធផ្សេងៗទៀតតាមដែលអាចធ្វើបាន។

៤. រយៈពេលដែលឈរជើង
រយៈពេលដែលមានសារៈសំខាន់ ក្នុងការឆ្លុះបញ្ចាំងការពិតពីព្រោះវាឆ្លងកាត់នូវបទពិសោធន៍ ពេលវេលា គឺជាបទពិសោធន៍ ក្រុមហ៊ុនណាដែលអាចឈរជើងបានយូរបញ្ជាក់ថា ក្រុមហ៊ុនឆ្លងកាត់បទពិសោធន៍កាន់តែច្រើនជួបរឿងច្រើន ជួបមនុស្សច្រើនជួបអចលនទ្រព្យច្រើនដឹងរឿងច្រើន មានគំនិតច្រើន មានបទពិសោធន៍ច្រើន មានចំណេះដឹងច្រើន។ ដែលល្មមបញ្ជាក់ឲ្យយល់ដឹងអំពីសមត្ថភាពពិតប្រាកដរបស់ក្រុមហ៊ុននោះ ភាគច្រើនក្រុមហ៊ុនដែលមានរយៈពេល ឈរជើងកាន់តែយូរគេអាចបម្រើសេវាកម្មបានកាន់តែល្អ៕

មេដឹកនាំអាស៊ាន សម្រេចបានសេចក្តីថ្លែងការណ៍៩ចំណុចក្នុងកិច្ចប្រជុំកំពូលអាស៊ានលើកទី៣៨-៣៩

ដោយ៖ សុផារី

អាស៊ាន៖ កិច្ចប្រជុំកំពូលអាស៊ានលើកទី៣៨ និងលើកទី៣៩ ក្រោមប្រធានបទ « យើងយកចិត្តទុកដាក់ យើងរៀបចំត្រៀមលក្ខណៈ យើងរីកចម្រើនទៅមុខ‍‍‍‌‌» បានប្រារព្វពិធីបើកជាផ្លូវការនៅព្រឹកថ្ងៃទី២៦តុលានេះហើយ តាមរយ:ប្រព័ន្ធវីដេអូអនឡាញ ដែលព្រះរាជាណាចក្រប៊្រុយណេដារុសសាឡាម ធ្វើជាម្វាស់ផ្ទះនៃកិច្ចប្រជុំកំពូលនេះ។
ប្រមុខមេដឹកនាំនៃប្រទេសអាស៊ានទាំងអស់ លើកលែងតែមេដឹកនាំ នៃសហភាពមីយ៉ាន់ម៉ា បានយាងនិងអញ្ជើញចូលរួមកិច្ចប្រជុំកំពូលប្រចាំឆ្នាំរបស់ខ្លួន ដើម្បីពិនិត្យពិភាក្សា ទៅលើរបៀបវារៈដែលគ្រោងទុក និងក្រោមកិច្ចដឹកនាំផ្ទាល់ពី ព្រះចៅស៊ុលតង់ ហាជី ហាសាណាល់ ប៊ុលគីយ៉ា ប្រធានអង្គប្រជុំ។

នៅក្នុងកិច្ចប្រជុំកំពូលអាស៊ានលើកទី៣៨ មេដឹកនាំអាស៊ាន បានធ្វើការពិភាក្សាទៅលើរបៀបវារៈសំខាន់ៗ ចំនួន២ ក្នុងនោះរួមមានទី១ ការកសាងសហគមន៍អាស៊ាន និងទី២ ការឆ្លើយតបនឹងជំងឺកូវីដ-១៩។

ដោយឡែកនៅក្នុងកិច្ចប្រជុំកំពូលអាស៊ានលើកទី៣៩ មេដឹកនាំ អាស៊ាន បានធ្វើការពិភាក្សាទៅលើរបៀបវារៈសំខាន់ៗចំនួន២ ទី១ទំនាក់ទំនងខាងក្រៅ និងមជ្ឈភាពអាស៊ាន, ទី២ការផ្លាស់ប្តូរទស្សនៈ ស្តីពីបញ្ហាតំបន់និងអន្តរជាតិ។

មកដល់ពេលនេះយើងអាចវាយតម្លៃបានថា អាស៊ាននឹងឈានទៅរកការគ្រប់គ្រងការរីករាលដាលនៃជំងឺនោះបានប្រកបដោយប្រសិទ្ធភាព នាពេលដ៏ខ្លីខាងមុខ។ ជាទិសដៅទៅមុខ ការងារសំខាន់បន្តនិងបន្ទាប់ គឺការស្តារនិងការអភិវឌ្ឍន៍វិស័យសង្គម សេដ្ឋកិច្ចឡើងវិញ តាមរយ:ការធានាប្រក្រតីភាព នៃលំហូរពាណិជ្ជកម្ម ការធ្វើដំណើរ និងការធ្វើសេរីភាវូបនីយកម្មពាណិជ្ជកម្ម សេវាកម្ម និងការវិនិយោគ។

នៅក្នុងកិច្ចប្រជុំកំពូលដ៏មានសារសំខាន់នោះ មេដឹកនាំអាស៊ាន បានឯកភាពគ្នាចេញនូវសេចក្តីថ្លែងការណ៍របស់មេដឹកនាំអាស៊ាន ស្តីពីការ លើកកម្ពស់ពហុភាគីនិយម មាន៩ចំណុច ក្នុងនោះ

១-រំលឹកឡើងវិញពីតម្រូវការរបស់អាស៊ាន ក្នុងការរក្សាសាមគ្គីភាព ភាពស្អិតរមួត និង ភាពរឹងមាំ ក្នុងការលើកកម្ពស់គោលបំណង និងគោលការណ៍របស់ខ្លួន ដូចមានចែងក្នុងធម្មនុញ្ញអាស៊ាន ក្នុងការគាំទ្រពហុភាគីនិយម។

២-បញ្ជាក់ពីការប្តេជ្ញាចិត្តរួមគ្នារបស់អាស៊ាន ដើម្បីរក្សានិងលើកកម្ពស់សន្តិភាព សន្តិសុខ និងស្ថិរភាពនៅក្នុងតំបន់ ក៏ដូចជាការដោះស្រាយ ជម្លោះដោយសន្តិវិធី រួមទាំងការគោរពយ៉ាងពេញលេញ ចំពោះដំណើរការផ្នែកច្បាប់និងការទូត ដោយមិនប្រើប្រាស់ការគំរាមកំហែង ឬ ការប្រើប្រាស់កម្លាំង ដោយអនុលោមតាមគោលការណ៍ ដែលទទួលស្គាល់ជាសកលនៃច្បាប់អន្តរជាតិ រួមទាំងសន្ធិសញ្ញាអង្គការសហប្រជា ជាតិស្តីពីច្បាប់សមុទ្រ (UNCLOS) ឆ្នាំ១៩៨២។

៣-ពង្រឹងមជ្ឈភាពនិងឯកភាពអាស៊ាន នៅក្នុងការចូលរួមប្រកបដោយស្ថាបនារបស់ អាស៊ាន ជាមួយដៃគូខាងក្រៅរបស់ខ្លួន តាមរយៈយន្តការដឹកនាំដោយអាស៊ាន ក្នុងការកសាងភាពជឿជាក់និងការទុកចិត្តគ្នាទៅវិញទៅមក ព្រមទាំងពង្រឹងនិម្មាបនកម្មតំបន់ដែលបើកចំហ មានតម្លាភាព បរិយាបន្ន និងផ្អែកលើវិធានការច្បាប់ ដោយមានអាស៊ាននៅចំកណ្តាល។

៤-បញ្ជាក់ជាថ្មីអំពីគោលបំណង និងគោលការណ៍នៃទស្សនវិស័យអាស៊ាន ស្តីពីឥណ្ឌូ-ប៉ាស៊ីហ្វិក (AOIP) ដែលផ្តល់ជាមគ្គទេសក៏ សំរាប់ការ ចូលរួមរបស់អាស៊ាន ក្នុងទំនាក់ទំនងនៅក្នុងតំបន់អាស៊ីប៉ាស៊ីហ្វិក និងតំបន់មហាសមុទ្រឥណ្ឌា។

៥- រំលឹកឡើងវិញអំពីការគាំទ្រដ៏រឹងមាំ របស់អាស៊ាន ចំពោះប្រព័ន្ធពាណិជ្ជកម្មពហុភាគីដែលបើកចំហ មានតម្លាភាព គ្មានការរើសអើង និងផ្អែកលើវិធានច្បាប់ រួមទាំងតាមរយៈ ការចូលជាធរមានឲ្យបានឆាប់ នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងការអនុវត្តន៍ឲ្យបានពេញលេញ នូវកិច្ចព្រមព្រៀងពាណិជ្ជកម្មសេរីរបស់អាស៊ានបូកមួយ។

៦-លើកកម្ពស់ការបន្ស៊ីគ្នា ការបំពេញបន្ថែម និងការរួមបញ្ចូលគ្នាលើការ ដោះស្រាយ បញ្ហាអន្តរវិស័យដូចជា សកម្មភាពផ្នែកអាកាធាតុ ការការពារបរិស្ថាន និងសន្តិសុខតាមប្រព័ន្ធអ៊ីនធើណែត ដើម្បីដោះស្រាយ ផលប៉ះពាល់រួម និងផលវិបាកនៃបញ្ហាប្រឈម ដែលមានទំនាក់ទំនងរវាងគ្នានេះ។

៧- ពង្រឹងកិច្ចសហប្រតិបត្តិការឆ្ពោះទៅរកការកែលម្អ នៃប្រព័ន្ធសុខភាពសាធារណៈសកលរបស់យើង និងឆ្ពោះទៅរកការធានាឲ្យបាននូវការទទួលបានថ្នាំប្រកបដោយសមធម៌ សម្រាប់ការ ព្យាបាលជំងឺកូវីដ-១៩ ដោយធ្វើឲ្យវ៉ាក់សាំងកូវីដ-១៩ ជាទំនិញសាធារណៈសកល អាចរកបាន និងមានតម្លៃ សមរម្យសម្រាប់មនុស្ស ទូទៅ។

៨- លើកទឹកចិត្តឲ្យមានកិច្ចសហប្រតិបត្តិការបន្ថែមទៀត ក្នុងសសរស្តម្ភទាំងបី នៃសហគមន៍អាស៊ាន និងសម្រាប់ភាគីពាក់ព័ន្ធ ទាំងអស់ ដើម្បីបន្តកិច្ចខិតខំប្រឹងប្រែង ក្នុងការធ្វើឲ្យប្រសើរឡើង នូវការសម្របសម្រួលបញ្ហាអន្តរវិស័យ និងឆ្លងសសរស្តម្ភ ឆ្ពោះទៅ សម្រេចបាននូវចក្ខុវិស័យសហគមន៍អាស៊ាន២០២៥ និងការអភិវឌ្ឍន៍ទស្សនវិស័យអាស៊ានក្រោយឆ្នាំ២០២៥ និងពង្រឹងស្ថាប័ននានា របស់អាស៊ាន ដោយគាំទ្រដល់ស្ថាប័ន និងយន្តការសម្របសម្រួល ដែលមានស្រាប់ ដើម្បីពង្រឹងកិច្ចខិតខំប្រឹងប្រែងកសាងសហគមន៍ នៅក្នុងអាស៊ាន និងជាមួយដៃគូខាងក្រៅ ហើយព្រមទាំងគូសបញ្ជាក់បន្ថែមទៀត អំពីមជ្ឍភាពនិងឯកភាពអាស៊ាន ដែលនឹងធ្វើឲ្យ ទំនាក់ទំនងនយោបាយ សេដ្ឋកិច្ច និងសង្គមរបស់អាស៊ាន នៅក្នុងតំបន់និងក្រៅតំបន់ឲ្យកាន់តែស៊ីជម្រៅថែមទៀត៕

កម្ពុជាគ្រោងនឹងអនុវត្តន៍ផែនការវិនិយោគទេសចរណ៍ធម្មជាតិខ្នាតតូចចំនួន៥នៅឧទ្យានជាតិព្រះមុនីវង្សបូកគោ

ដោយ ៖វឌ្ឍនៈ

ភ្នំពេញ៖ ប្លង់មេនិងផែនការអភិវឌ្ឍន៍វិនិយោគទេសចរណ៍ធម្មជាតិខ្នាតតូចចំនួន៥ ស្ថិតនៅក្នុងឧទ្យានជាតិព្រះមុនីវង្សបូកគោ ភូមិសាស្ត្រសង្កាត់ព្រែកត្នោតក្រុងបូកគោខេត្តកំពត ត្រូវបានដាក់ឆ្លងនិងអនុម័តនៅក្នុងកិច្ចប្រជុំពិនិត្យកាលពីថ្ងៃទី២៥ ខែតុលា២០២១ ដើម្បីជួយលើកម្ពស់ជីវភាព ប្រជាពលរដ្ឋ ។នេះបើតាមលោកនេត្រ ភក្ត្រា រដ្ឋលេខាធិការនិងជាអ្នកនាំពាក្យក្រសួងបរិស្ថានថ្លែងប្រាប់អ្នកសារព័ត៌មាននៅថ្ងៃទី២៦តុលា២០២១នេះ ។

លោកជឿជាក់ថា គម្រោងវិនិយោគអភិវឌ្ឍន៍ទេសចរណ៍ធម្មជាតិខ្នាតតូចនេះ នឹងចូលរួមបង្កើតសក្តានុពលទេសចរណ៍កាន់តែខ្លាំង និងមានជម្រើសកាន់តែច្រើន ចូលរួមបង្កើតការងារ និង បង្កើនជីវភាព ប្រជាពលរដ្ឋនៅជុំវិញតំបន់នោះ។

លោកបន្តថា ទេសចរណ៍ធម្មជាតិជាផ្នែកមួយយ៉ាងសំខាន់ នៃទេសចរណ៍កម្ពុជា ហើយតំបន់ការពារធម្មជាតិ និងរបៀងអភិរក្សចម្រុះដែលកំពុងត្រូវបានការពារបាន យ៉ាងល្អប្រសើរ បានដើរតួនាទីយ៉ាងសំខាន់ ក្នុងការជំរុញវិស័យទេសចរណ៍នៅក្នុងបរិការណ៍នៃការ ឆ្លងរីករាលដាលនៃជំងឺកូវីដ១៩ នេះ។ ក្នុងរយៈពេលចុងក្រោយនេះ ពលរដ្ឋខ្មែរបានដើរកម្សាន្តច្រើន នៅតាមរមណីយដ្ឋាន និងតំបន់ទេសចរណ៍ធម្មជាតិនានាក្នុងប្រទេសកម្ពុជា និងបាននាំចូលសេដ្ឋកិច្ចជាច្រើនទៅមូលដ្ឋាន និងបង្កើតការងារថ្មីជូនពលរដ្ឋ ដែលជាផ្នែកមួយនៃការចូលរួមពង្រឹងលើកិច្ចការពារនិងអភិរក្សធនធានធម្មជាតិ។

លោកបានបន្ថែមថា ប្រជាពលរដ្ឋខ្មែរកាន់តែច្រើនឡើង បានផ្តល់តម្លៃខ្ពស់ដល់តំបន់ទេសចរណ៍ធម្មជាតិ និងមានមោទកភាពចំពោះសម្បត្តិ ធនធានរបស់កម្ពុជា ជាពិសេសតាមរយៈដំណើរកម្សាន្តនៅតាមរមណីយដ្ឋានទេសចរណ៍ធម្មជាតិនានា រូបភាព និងទេសភាពធម្មជាតិដ៏ស្រស់ត្រកាលនៃប្រទេសកម្ពុជាត្រូវបានចែករំលែកយ៉ាងទូលំទូលាយនៅតាមបណ្តាញទំនាក់ទំនងសង្គមនិងប្រព័ន្ធផ្សព្វផ្សាយនានា ដែលបានចូលរួមកាន់តែខ្លាំងថែមទៀត ក្នុងការបណ្តុះស្មារតីស្រឡាញ់បរិស្ថាន និងធនធានធម្មជាតិក្នុងចំណោមប្រជាពលរដ្ឋខ្មែរ និងបានចូលរួមថែរក្សាការពារនូវទេសភាព និងសម្បត្តិធម្មជាតិទាំងនេះ សម្រាប់មនុស្សរាប់ជំនាន់តទៅមុខទៀត។

ជាការកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុង វិបត្តិកូវីដ១៩នេះ ភ្ញៀវទេសចរទៅកម្សាន្តនៅខេត្តកំពតកាន់តែច្រើននិងមានចំនួនច្រើនជាងគេក្នុងចំណោមខេត្តទាំងអស់របស់កម្ពុជា។ តាមរយៈកំណើនភ្ញៀវទៅកម្សាន្តនៅខេត្តកំពតនេះ បានធ្វើឱ្យការវិនិយោគនៅក្នុងខេត្តកំពតកាន់តែទទួលបានបានច្រើនឡើងទៅលើវិស័យទេសចរណ៍ ដូចជាសណ្ឋាគារ រមណីយដ្ឋាន និងផ្ទះលំហែជាដើម៕

ការហក់ឡើងតម្លៃភាគហ៊ុនរបស់ Tesla រហូតដល់១ទ្រីលានដុល្លារជាលើកដំបូង ធ្វើឱ្យតម្លៃភាគហ៊ុនរបស់ Elon Musk កើនឡើងទ្វេដង

សុខុម

សិង្ហបុរី: ការហក់ឡើងតម្លៃភាគហ៊ុនរបស់ក្រុមហ៊ុន Tesla លើសពី១ទ្រីលានដុល្លារអាមេរិក ជាលើកដំបូងកាលពីថ្ងៃច័ន្ទ ទី២៥ តុលា បានធ្វើឱ្យតម្លៃភាគហ៊ុនរបស់កំពូលមហាសេដ្ឋី Elon Musk ដែលជានាយកប្រតិបត្តិក្រុមហ៊ុននេះកើនឡើងទ្វេដង ហើយលោកគឺជាម្ចាស់ភាគហ៊ុនធំបំផុតររបស់ក្រុមហ៊ុននេះ។ នេះបើយោងតាមសារព័ត៌មាន CNA ដែលបានចុះផ្សាយនៅថ្ងៃអង្គារ ទី២៦ តុលា នេះ។

ភាគហ៊ុនរបស់ក្រុមហ៊ុនផលិតរថយន្តអគ្គិសនីខាងលើនេះ បានហក់ឡើង១២,៧%ភ្លាមៗក្រោយពីធ្លាយដំណឹងថា ក្រុមហ៊ុន Tesla ទទួលបានការបញ្ជាទិញរថយន្តអគ្គិសនីធំបំផុតមិនធ្លាប់មានពីក្រុមហ៊ុនផ្ដល់សេវាកម្មជួលរថយន្ត Hertz គឺរហូតដល់ទៅ១០០.០០០គ្រឿង។

ខណៈភាគហ៊ុនរបស់ក្រុមហ៊ុន Tesla បានហក់ឡើងខ្ពស់បំផុតមិនធ្លាប់មានរហូតដល់ទៅជិត១.០២៤,៨៦ដុល្លារអាមេរិក ក្នុង១ភាគហ៊ុននោះ ភាគហ៊ុន២៣%របស់លោក Elon Musk នៅក្នុងក្រុមហ៊ុន Tesla ដែលទើបតែមានតម្លៃលើទីផ្សាររហូតដល់១ទ្រីលានដុល្លារអាមេរិក នាពេលនេះបានឈានដល់ប្រមាណ២៣០ពាន់លានដុល្លារអាមេរិក។ នេះបើយោងតាមការឱ្យដឹងពី Refinitiv ដែលជាក្រុមហ៊ុនផ្ដល់ទិន្នន័យទីផ្សារហិរញ្ញវត្ថុពិភពលោក។

លើសពីនេះ លោក Elon Musk ក៏ជាម្ចាស់ភាគហ៊ុនធំ និងជានាយកប្រតិបត្តិក្រុមហ៊ុនផលិតរ៉ុក្កែត SpaceX ជាក្រុមហ៊ុនឯកជនមួយដែលមានតម្លៃ១០០ពាន់លានដុល្លារអាមេរិក ផងដែរគិតត្រឹមខែតុលា នេះ។ នេះបើយោងតាមការចុះផ្សាយរបស់សារព័ត៌មាន CNBC។

ក្នុងឋានៈជានាយកប្រតិបត្តិ លោក Elon Musk មិនទទួលបានប្រាក់ខែទេនៅក្រុមហ៊ុន Tesla។ ទោះជាយ៉ាងណា លោកទទួលបានលក្ខខណ្ឌពិសេសដែលអនុញ្ញាតឱ្យលោកទិញយកភាគហ៊ុនក្រុមហ៊ុន Tesla ក្នុងតម្លៃត្រឹមតែ៧០ដុល្លារអាមេរិក ក្នុង១ភាគហ៊ុន ដែលជាការបញ្ចុះតម្លៃរហូតដល់ទៅជាង៩០%បើធៀបនឹងតម្លៃភាគហ៊ុនបច្ចុប្បន្នរបស់ក្រុមហ៊ុននេះ។

យោងតាមសន្ទស្សន៍មហាសេដ្ឋី Bloomberg Billionaires Index បង្ហាញថា ទ្រព្យសម្បត្តិសរុបរបស់លោក Elon Musk បានកើនឡើងរហូតដល់២៨៨,៦ពាន់លានដុល្លារអាមេរិក គិតត្រឹមថ្ងៃច័ន្ទ ទី២៥ តុលា ដោយកើនឡើង៣៦,២ពាន់លានដុល្លារអាមេរិក ក្រោយពីការហក់ឡើងតម្លៃភាគហ៊ុននេះ។

ក្រុមអ្នកវិភាគនៅក្រុមហ៊ុនផ្ដល់សេវាហិរញ្ញវត្ថុអាមេរិក Morgan Stanley បានព្យាករកាលពីសប្ដាហ៍មុនថា លោក Elon Musk ដែលបច្ចុប្បន្នជាកំពូលមហាសេដ្ឋីមានទ្រព្យសម្បត្តិច្រើនជាងគេបំផុតលើពិភលោក ជាមួយទ្រព្យសម្បត្តិប្រមាណ២៤២ពាន់លានដុល្លារអាមេរិក នឹងក្លាយជាកំពូលមហាសេដ្ឋីទ្រីលានដុល្លារ (Trillionaire) ដំបូងគេបង្អស់របស់ពិភពលោក៕ Reuters៕

ច្រកស្ទឹងបត់-បាណងអៀន៖ ច្រកអន្តរជាតិថ្មីមួយភ្ជាប់សេដ្ឋកិច្ចកម្ពុជានិងថៃ នឹងបើក ឱ្យដឹកជញ្ជូនទំនិញ នៅក្នុងខែមករា ឆ្នាំ២០២២

ដោយ៖ សុផារី

បន្ទាយមានជ័យ៖ ច្រកស្ទឹងបត់-បាណងអៀន ស្ថិតក្នុងក្រុងប៉ោយប៉ែត ខេត្តបន្ទាយមានជ័យ នឹងបើកឱ្យដំណើរការដឹកជញ្ជូនទំនិញឆ្លងកាត់ព្រំដែនកម្ពុជា-ថៃ នៅក្នុងខែមករា ឆ្នាំ២០២២ខាងមុខនេះ។ ការប្រកាសនេះធ្វើឡើងបន្ទាប់ពីជំនួបរវាងលោក សុខ សុក្រឹត្យា ទីប្រឹក្សាផ្ទាល់របស់សម្តេចតេជោ ហ៊ុន សែន និងលោក ជូរិន ឡាក់សាណាវីសិត ឧបនាយករដ្ឋមន្ត្រី រដ្ឋមន្ត្រីក្រសួងពាណិជ្ជកម្មថៃ កាលពីថ្ងៃទី២៥ ខែតុលា ឆ្នាំ២០២១ ក្នុងគោលបំណង ពន្លឿនដល់ការបើកច្រកនេះ។

ច្រកស្ទឹងបត់-បាណងអៀន គឺជាច្រកអន្តរជាតិថ្មីមួយ ដែលកម្ពុជា និងថៃ បានឯកភាពកសាងឡើង ដើម្បីបម្រើដល់ការដឹកជញ្ជូនទំនិញឆ្លងកាត់ព្រំដែនប្រទេសទាំងពីរ ហើយច្រកព្រំដែនអន្តរជាតិប៉ោយប៉ែត ទុកសម្រាប់បម្រើការធ្វើដំណើររបស់អ្នកទេសចរ។ ដើម្បីបម្រើដល់ដំណើរការច្រកព្រំដែនអន្តរជាតិនេះ កម្ពុជានិងថៃបានសាងសង់ស្ពានឆ្លងកាត់ព្រំដែនមួយខ្សែ ហើយបានសាងសង់អគាររដ្ឋបាលផ្សេងៗសម្រាប់ផ្តល់សេវានៅច្រកមួយនេះ។

បច្ចុប្បន្នទាំងភាគីកម្ពុជា និងថៃ កំពុងពន្លឿនការសាងសង់អគារ និងហេដ្ឋារចនាសម្ព័ន្ធនានា ដើម្បីផ្តល់សេវាលើការដឹកជញ្ជូនទំនិញឆ្លងកាត់ព្រំដែនប្រទេសទាំងពីរ។ ការសាងសង់បានរួចរាល់ស្ទើរតែទាំងស្រុងហើយផងដែរ។
ការបើកច្រកទ្វារព្រំដែនអន្តរជាតិស្ទឹងបត់-បាណងអៀនថ្មីនេះ គឺជាការបើកឡើងនូវទំព័រប្រវត្តិសាស្ត្រថ្មីមួយសម្រាប់សម្រួលដល់ការធ្វើពាណិជ្ជកម្មឆ្លងកាត់ព្រំដែនរវាងកម្ពុជា-ថៃ និងដើម្បីជំរុញលើកកម្ពស់ប្រព័ន្ធភស្តុភារកម្មនៅកម្ពុជាផងដែរ។

ភាគីថៃបានស្នើកម្ពុជាដើម្បីត្រៀមរៀបចំកុងតេនឺនិងសមត្ថកិច្ចពាក់ព័ន្ធ ដើម្បីសម្រួលដល់ការបើកច្រកអន្តរជាតិស្ទឹងបត់-ណងអៀនជាផ្លូវការនៅក្នុងខែមករា ឆ្នាំ២០២២។

ការបើកច្រកស្ទឹងបត់-បាណងអៀននេះ ត្រូវបានគេរំពឹងថា នឹងធ្វើឱ្យតំបន់ប៉ោយប៉ែតប្រែក្លាយជាតំបន់អភិវឌ្ឍមួយយ៉ាងខ្លាំង ជាមជ្ឈមណ្ឌលស្តុក និងចែកចាយទំនិញ និងជាតំបន់សេដ្ឋកិច្ចពិសេស ដែលបង្កើតជាសក្តានុពលរូបវ័ន្តដ៏រឹងមាំសម្រាប់ទ្រទ្រង់ដល់គម្រោងវិនិយោគនានាក្នុងស្រុក និងក្នុងប្រទេសនៃមហាអនុតំបន់ទន្លេមេគង្គ៕

ហាងឆេងដីធ្លីក្នុងក្រុងបាងកក នៅតែបន្តហក់ឡើងថ្លៃក្នុងត្រីមាសទី៣ ទោះជាសេដ្ឋកិច្ចធ្លាក់ចុះក្ដី

ដោយ សុខុម

បាងកក: មជ្ឈមណ្ឌលព័ត៌មានអចលនទ្រព្យ (REIC) របស់ថៃ បានទម្លាយឱ្យដឹងថា ហាងឆេងដីធ្លីក្នុងទីក្រុងបាងកក ប្រទេសថៃ នៅតែបន្តហក់ឡើងក្នុងត្រីមាសទី៣ ប៉ុន្តែមានសន្ទុះយឺតជាងអត្រាជាមធ្យមក្នុងរយៈពេល៥ឆ្នាំមកនេះ។ នេះបើយោងតាមកាសែត Bangkok Post ចុះផ្សាយកាលពីថ្ងៃទី២៥ តុលា។

លោក Vichai Viratkapan អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យបានថ្លែងថា ហាងឆេងដីធ្លីបានហក់ឡើងតែ០.៥%ប៉ុណ្ណោះក្នុងត្រីមាសទី៣ គឺទាបជាងឆ្ងាយបើធៀបទៅនឹងអត្រាកំណើនជាមធ្យម៤,១%សម្រាប់រយៈពេល៥ឆ្នាំអំឡុងឆ្នាំ២០១៥ ដល់ឆ្នាំ២០១៩។

លោកបានបន្ថែមទៀតថា “តម្លៃដីធ្លីនៅតែបន្តហក់ឡើងទោះបីជាសេដ្ឋកិច្ចធ្លាក់ចុះក្ដី។ ប៉ុន្តែអត្រាកំណើនទាបជាងអត្រាជាមធ្យមរយៈពេល៥ឆ្នាំសម្រាប់រយៈពេល៣ត្រីមាសជាប់ៗគ្នា ឬចាប់តាំងពីត្រីមាសទី១ ដើមឆ្នាំ២០២១ ដោយសារការធ្លាក់ចុះសេដ្ឋកិច្ច”។

ទន្ទឹមនឹងនេះដែរ ការហក់ឡើងប្រចាំឆ្នាំនៃសន្ទស្សន៍តម្លៃដីនៅកណ្ដាលក្រុងបាងកក គឺ៧,៦%ក្នុងត្រីមាសទី៣ ដែលស្ទើរតែពាក់កណ្តាលនៃអត្រាកំណើនជាមធ្យម១៤,៨%សម្រាប់រយៈពេល៥ឆ្នាំនៅមុនពេលផ្ទុះវិបត្តិកូវីដ-១៩។

លោក Vichai Viratkapan បានគូសបញ្ជាក់ថា មូលហេតុចម្បងមួយនៅពីក្រោយកំណើនយឺតនៃសន្ទស្សន៍តម្លៃដីនេះ គឺមកពីម្ចាស់ដីមួយចំនួនផ្អឹបដីទុកមិនព្រមលក់ចេញ ដោយរង់ចាំសេដ្ឋកិច្ចងើបឡើងវិញ ខណៈអ្នកខ្លះទៀតបង្ខំចិត្តលក់ដីចេញដើម្បីយកលុយទៅទ្រទ្រង់ដល់អាជីវកម្មស្នូលរបស់ពួកគេដែលរងផលប៉ះពាល់ដោយសារវិបត្តិកូវីដ-១៩។

ដីធ្លីដែលហាងឆេងហក់ឡើងខ្ពស់ជាងគេគឺនៅដែលស្ថិតនៅក្នុងទីតាំងជិតបណ្ដាញផ្លូវដែក តំបន់ជុំវិញស្ថានីយផ្លូវដែកជាពិសេសក្នុងសង្កាត់ Nong Khaem និងសង្កាត់ Bang Kae។ តម្លៃដីនៅក្នុងតំបន់ទាំងនេះបានហក់ឡើងខ្ពស់ជាងគេរយៈពេល៤ត្រីមាសជាប់ៗគ្នា៕ Bangkok Post ៕

ដំណឹងល្អៈរដ្ឋាភិបាលគ្រោងបោះផ្សាយលក់សញ្ញាប័ណ្ណតម្លៃ៣០០លានដុល្លារនៅឆ្នាំ២០២២

ដោយៈគង់ សូរិយា

ភ្នំពេញៈ រាជរដ្ឋាភិបាលកម្ពុជា គ្រោងនឹងបោះផ្សាយលក់មូលបត្របំណុលរដ្ឋ (government bond) ជាលើកដំបូងក្នុងទំហំទឹកប្រាក់សរុប៣០០លានដុល្លារ ដើម្បីរកថវិកាមកគាំទ្រគម្រោងវិនិយោគសាធារណៈ សំដៅលើស្ទួយកំណើន និងផលិតភាពសេដ្ឋកិច្ច។

យោងតាមខ្លឹមសារសង្ខេបនៃសេចក្តីព្រាងច្បាប់ហិរញ្ញវត្ថុ ២០២២ របស់ក្រសួងសេដ្ឋកិច្ច និងហិរញ្ញវត្ថុ ដែលប្រកាសកាលពីថ្ងៃទី២២ ខែតុលា កន្លងទៅបានឲ្យដឹងថា ការលក់សញ្ញាប័ណ្ណ ឬមូលប័ត្របំណុលរបស់រដ្ឋាភិបាលនេះ បើពន្យល់និយាយឱ្យងាយយល់ គឺស្រដៀងគ្នានឹងរដ្ឋខ្ចីលុយពីអ្នកវិនិយោគដូច្នោះដែរ តែធ្វើឡើងក្នុងទ្រង់ទ្រាយជាការវិនិយោគ។

រដ្ឋខ្ចីលុយពីអ្នកវិនិយោគ និងសងក្នុងអត្រាការប្រាក់ណាមួយ។ អ្នកវិនិយោគភាគច្រើនចូលចិត្តទិញមូលប័ត្រ ដោយសារតែហានិភ័យទាបជាងទិញភាគហ៊ុន ហើយការប្រាក់ខ្ពស់ជាងដាក់លុយនៅធនាគារ។

ជាក់ស្ដែង ការលក់មូលបត្របំណុលរបស់រដ្ឋាភិបាល គឺវិធីសាស្រ្តពេញនិយមមួយ ដែលប្រទេសផ្សេងៗប្រើប្រាស់ដើម្បីរកថវិកាមកអភិវឌ្ឍប្រទេសជាតិ ប៉ុន្តែកម្ពុជានៅមិនទាន់ធ្វើនៅឡើយ។ UNDP ក៏ធ្លាប់បានណែនាំថា កម្ពុជាគួរបោះពុម្ពមូលបត្របំណុលរដ្ឋជាប្រាក់រៀលផងដែរ ដើម្បីពង្រីកប្រភពហិរញ្ញវត្ថុ។

យោងតាមក្រសួងសេដ្ឋកិច្ច ការលក់មូលបត្របំណុលរដ្ឋលើកដំបូងនេះ គឺជាការសាកល្បង ហើយសង្ឈឹមថា វានឹងជាការចូលរួមកាត់បន្ថយកម្ចីឥណទាន ពីក្រៅប្រទេស ដោយរាជរដ្ឋាភិបាល នឹងផ្តោតលើការគៀងគរប្រភពហិរញ្ញប្បទាន ពីខាងក្នុងប្រទេសវិញ។

ហិរញ្ញប្បទានពីការបោះផ្សាយមូលបត្ររដ្ឋ នឹងយកទៅប្រើបន្ថែមលើផែនការកម្ចីពីដៃគូឆ្នាំ២០២២ ក្នុងកម្រិត១៦០០លាន SDR (កញ្ចប់ថវិកាអន្តរជាតិរបស់ IMF) ឬប្រមាណ២.២០០លានដុល្លារ ដើម្បីគាំទ្រគម្រោងវិនិយោគ សាធារណៈប្រមាណ៣៥គម្រោង។

ក្រសួងសេដ្ឋកិចុ្ច និងហិរញ្ញវត្ថុបាមបញ្ជាក់ថា ការបោះពុម្ពផ្សាយលក់មូលបត្ររដ្ឋលើកដំបូង និងការខ្ចីក្នុងទំហំខាងលើនេះ នឹងមិនបង្កើតជាបន្ទុកបំណុលវ័ណ្ឌករដល់កម្ពុជាទេ៕

តើសេវាកម្មបីប្រភេទនៃអចលនវត្ថុគ្របដណ្តប់លើផ្នែកអ្វីខ្លះ?

ដោយៈ ម៉ាលីស

ភ្នំពេញៈនៅកម្ពុជាសព្វថ្ងៃ គេបែងចែក ប្រភេទសេវាកម្មអចនវត្ថុជា៣ប្រភេទ ដែលបាននិងកំពុងដំណើរការយ៉ាងសកម្មនៅកម្ពុជា។

យោងតាមសៀវភៅ “វិថីអចលនទ្រព្យ” របស់ លោក គាម សៀកឡុង បានអោយដឹងថា ប្រភេទសេវាកម្ម អចលនវត្ថុ នីមួយៗមានដូចជា

១ សេវាកម្មវាយតម្លៃ:
សំដៅដល់សេវាកម្ម ដែលធ្វើការវាយតម្លៃ ដើម្បីកំណត់តម្លៃលើទ្រព្យ និងអត្ថប្រ​យោ​ជន៍ផ្សេងៗ ដែលតាំងនៅជាប់នឹងទ្រព្យនោះ ការវាយតម្លៃធ្វើឡើងដោយគោរពទៅតាមលក្ខខណ្ឌ ដូចមានកំណត់ ក្នុងលិខិតដែលផ្តល់អណត្តិតាមរយៈ ការចេញជារបាយការណ៍លាយលក្ខណ៍អក្សរដោយមាន បញ្ជាក់អំពីមតិយោបល់ របស់អ្នកវាយតម្លៃ ទៅលើលទ្ធផល នៃការវាយតម្លៃនោះ។

គោលបំណងនៃការវាយតម្លៃរួមមាន ទិញ លក់ គិតពន្ធ ទទួលប្រាក់កម្ចីពីធនាគារសំណង នៅពេល រដ្ឋដកហូតវិនិយោគនិងទទួលបន្ត។

២ សេវាកម្មភ្នាក់ងារអចលនវត្ថុ:
សំដៅដល់សេវាកម្ម ដែលធ្វើប្រតិបត្តិការលើអចលនវត្ថុ មានការទិញលក់ និងជួលអចលនវត្ថុ។

៣ សេវាកម្មគ្រប់គ្រងអចលនវត្ថុ:
សំដៅដល់សេវាកម្មដែលធ្វើការ គ្រប់គ្រងត្រួតពិនិត្យនិង ធ្វើប្រតិបត្តិការជួលអច​លនវត្ថុទាំងឡាយណា ដែលមានលក្ខណៈដូចជា អគារស្នាក់នៅរួម បុរី អគារសហកម្មសិទ្ធិ និងអគារនឬមជ្ឈមណ្ឌលពាណិជ្ជកម្មជាដើម ក្នុងនាមនិងឬជំនួសម្ចាស់កម្មសិទ្ធិ អចលនវត្ថុនោះ ដែលទទួលបានមកវិញនូវថ្លៃសេវាវិជ្ជាជីវៈ។ ការគ្រប់គ្រងនេះ មិនរាប់បញ្ចូលការគ្រប់គ្រងលើអចលនវត្ថុ ដែលត្រូវធ្វើអាជីវកម្ម ជាសណ្ឋាគារ ផ្ទះសំណាក់ រោងចក្រកំពង់ផែ កន្លែងវាយកូនគោល ការដ្ឋានយកថ្ម រោងភាពយន្តពហុកីឡាដ្ឋាន មជ្ឈម​ណ្ឌលកីឡាមន្ទីរពេទ្យឡើយ។

ឧទាហរណ៍ ផ្ដល់សេវាគ្រប់គ្រងអគារសហកម្មសិទ្ធិ (ដែលយើងនិយមហៅថាខុនដូ) ណាមួយ រួមមានសេវាសន្តិសុខ ថែរទាំ និងសម្អាតចំណែករួម (ជណ្ដើរយន្ត កន្លែងហាត់ប្រាណ អាងហែលទឹក) និងប្រមូលប្រាក់ឈ្នួលប្រចាំខែ។ល៕

តើអាកាសយានដ្ឋានធំបំផុតទាំង១០ក្នុងពិភពលោកប្រចាំឆ្នាំ២០២១ ស្ថិតក្នុងប្រទេសណាខ្លះ?

ដោយៈសុខុម

អន្តរជាតិ: អ្នកណាក៏ដឹងដែរថា អាកាសយានដ្ឋានគឺជាកន្លែងសម្រាប់យន្តហោះចុះចត ឬហោះឡើងទៅកាន់គោលដៅនានា។ ខណៈអាកាសយានដ្ឋានខ្លះ សម្រាប់ទទួលជើងហោះហើរក្នុងស្រុក អាកាសយានដ្ឋានខ្លះទៀត សម្រាប់ទទួលទាំងជើងហោះហើរក្នុងស្រុក និងជើងហោះហើរអន្តរជាតិដែលហោះឆ្លងប្រទេស ឬសូម្បីឆ្លងទ្វីប។

ប៉ុន្តែអ្នកដឹងទេថា តើអាកាសយានដ្ឋានដែលធំជាងគេបំផុតទាំង១០ ក្នុងពិភពលោ​កប្រចាំឆ្នាំ២០២១ ស្ថិតនៅក្នុងប្រទេសណាខ្លះ ហើយមានទំហំប៉ុណ្ណា? សូមអានព៌តមានខាងក្រោមនេះ។

*ចំណាត់ថ្នាក់លេខ១០
អាកាសយានដ្ឋានអន្តរជាតិ សុវណ្ណភូមិមានទំហំ៣២,៤គីឡូម៉ែត្រការ៉េ អាកាសយានដ្ឋានអន្តរជាតិសុវណ្ណភូមិ (Suvarnabhumi International Airport) ដែលស្ថិតនៅក្នុងទីក្រុងបាងកក ត្រូវបានគេដឹងថាជាអាកាសយានដ្ឋានអន្តរជាតិ ធំជាងគេប្រចាំប្រទេសថៃ។

ដោយបើកដំណើរការក្នុងឆ្នាំ២០០៦ អាកាសយានដ្ឋាននេះ បច្ចុប្បន្នវាជាមជ្ឈមណ្ឌ​លអាកាសចរណ៍សំខាន់ សម្រាប់ក្រុមហ៊ុន Thai Airways ក្រុមហ៊ុន Thai Smile ក្រុមហ៊ុន Bangkok Airways និងក្រុមហ៊ុន Thai VietJet។ អាកាសយាដ្ឋាននេះ មាន៣ចំណត (Terminal) ដោយចំណតលេខ១ និងចំណតលេខ២ សម្រាប់ជើងហោះហើរអន្តរជាតិ ចំណែកឯចំណតលេខ៣ សម្រាប់តែជើងហោះហើរក្នុងស្រុកប៉ុណ្ណោះ។

*ចំណាត់ថ្នាក់លេខ៩- អាកាសយានដ្ឋានអន្តរជាតិក្រុងគែរ ~ ៣៦.៣គីឡូម៉ែត្រការ៉េ
អាកាសយានដ្ឋានអន្តរជាតិក្រុងគែរ (Cairo International Airport) បានចាប់ផ្តើមដំណើរការក្នុងឆ្នាំ១៩៤៥។ វាជាអាកាសយានដ្ឋានដែលមមាញឹកបំផុត ក្នុងប្រទេសអេហ្ស៊ីប និងជាមជ្ឈមណ្ឌលអាកាសចរណ៍ ដ៏សំខាន់របស់ក្រុមហ៊ុន Egypt Air និងក្រុមហ៊ុន Nile Air។ វាមាន៤ចំណត ដោយ៣ចំណត សម្រាប់ជើងហោះហើរអន្តរជាតិ និងមួយចំណតសម្រាប់ជើងហោះហើរក្នុងស្រុក។

*ចំណាត់ថ្នាក់លេខ៨- អាកាសយានដ្ឋានអន្តរជាតិសៀងហៃ ភូតុង ~៣៩,១គីឡូម៉ែត្រការ៉េ
អាកាសយានដ្ឋានអន្តរជាតិសៀងហៃ ភូតុង (Shanghai Pudong Airport) បានចាប់ផ្ដើមដំណើរការក្នុងឆ្នាំ១៩៩៩។ វាជាមជ្ឈមណ្ឌលអាកាសចរណ៍ ដ៏សំខាន់សម្រាប់ក្រុមហ៊ុន Shanghai Airlines និងក្រុមហ៊ុន China Eastern Airlines។ វាមាន២ចំណតសំខាន់សម្រាប់ជើងហោះហើរក្នុងស្រុក និងអន្តរជាតិ ដោយចំណតទី៣ ត្រូវបានគ្រោងឡើងតាំងពីឆ្នាំ២០១៥។

*ចំណាត់ថ្នាក់លេខ ៧ – អាកាសយានដ្ឋានអន្តរជាតិ George Bush Intercontinental Airport ~ ៤០,៥គីឡូម៉ែត្រការ៉េ
អាកាសយានដ្ឋាននេះ ត្រូវបានបើកដំណើរការក្នុងឆ្នាំ១៩៦៩ និងជាមជ្ឈមណ្ឌលអាកាសចរណ៍ធំបំផុតទី២ នៅសហរដ្ឋអាមេរិក ជាមួយនឹង៥ចំណតសម្រាប់ជើងហើរក្នុងស្រុក និងអន្តរជាតិ។

*ចំណាត់ថ្នាក់លេខ៦- អាកាសយានដ្ឋានអន្តរជាតិ Beijing Daxing International Airport ~៤៧គីឡូម៉ែត្រការ៉េ
អាកាសយានដ្ឋាននេះ បានបើកដំណើរការក្នុងឆ្នាំ២០១៩ ហើយបានក្លាយជាមជ្ឈ​មណ្ឌលអាកាសចរណ៍ដ៏សំខាន់ សម្រាប់ក្រុមហ៊ុនអាកាសចរណ៍ចិន ធំៗចំនួន៣រួមមានក្រុមហ៊ុន Air China ក្រុមហ៊ុន China Southern Airlines និងក្រុមហ៊ុន China Eastern Airlines។ វាមានចំណតតែមួយប៉ុណ្ណោះ ប៉ុន្តែចំណតនេះគឺជាចំណតតែមួយគត់ដែលធំបំផុតក្នុងពិភពលោក។

*ចំណាត់ថ្នាក់លេខ៥- អាកាសយានដ្ឋានអន្តរជាតិ Orlando International Airport – ៥០,៩គីឡូម៉ែត្រការ៉េ
អាកាសយានដ្ឋាននេះ បានចាប់ផ្ដើមដំណើរការក្នុងឆ្នាំ១៩៨១ និងជាមជ្ឈមណ្ឌលអាកាចរណ៍ដ៏សំខាន់សម្រាប់ក្រុមហ៊ុន JetBlue ក្រុមហ៊ុន Southwest Airlines និងក្រុមហ៊ុន Spirit Airlines និងមាន២ចំណត។

*ចំណាត់ថ្នាក់លេខ៤- អាកាសយានដ្ឋានអន្តរជាតិ Washington Dulles International Airport ~ ៥២,៦គីឡូម៉ែត្រការ៉េ
ជាទូទៅ វាត្រូវបានគេស្គាល់ថាជាអាកាសយានដ្ឋាន Dulles International Airport ដែលបានដំណើរការក្នុងឆ្នាំ១៩៦២។ វាជាមជ្ឈមណ្ឌលអាកាសចរណ៍ដ៏សំខាន់ដំបូងសម្រាប់សហរដ្ឋអាមេរិក ហើយវាមានចំណតធំ១ និងចំណតតូច២។

*ចំណាត់ថ្នាក់លេខ៣- អាកាសយានដ្ឋានអន្តរជាតិ Dallas/Fort Worth International Airport ~ ៦៩,៥គីឡូម៉ែត្រការ៉េ
អាកាសយានដ្ឋាននេះ បានចាប់ផ្ដើមដំណើរការក្នុងឆ្នាំ១៩៧៤ និងជាមជ្ឈមណ្ឌលអាកាសចរណ៍ដ៏សំខាន់មួយ សម្រាប់ក្រុមហ៊ុនអាកាសចរណ៍ American Airlines និងមាន៥ចំណត។

*ចំណាត់ថ្នាក់លេខ២- អាកាសយានដ្ឋានអន្តរជាតិ Denver International Airport – ១៣៥,៧គីឡូម៉ែត្រការ៉េ
អាកាសយានដ្ឋាននេះ បានចាប់ផ្ដើមដំណើរការក្នុងឆ្នាំ១៩៩៥ និងជាមជ្ឈមណ្ឌលអាកាសចរណ៍សម្រាប់ក្រុមហ៊ុន United Airlines និងក្រុមហ៊ុន Frontier Airlines ហើយក៏ជាមូលដ្ឋានសម្រាប់ក្រុមហ៊ុន Southwest Airlines ផងដែរ។ អាកាសយានដ្ឋាននេះមានចំណតធំ១ និងមានចំណតតូច៣។

*ចំណាត់ថ្នាក់លេខ១- អាកាសយានដ្ឋានអន្តរជាតិ King Fahd International Airport – ៧៧៦គីឡូម៉ែត្រការ៉េ
អាកាសយានដ្ឋាន ដែលគេស្គាល់ថា Dammam Airport ដែរនេះត្រូវបានបើកដំណើរការក្នុងឆ្នាំ១៩៩៩ និងជាមជ្ឈមណ្ឌលអាកាសចរណ៍សម្រាប់ក្រុមហ៊ុន Saudia ក្រុមហ៊ុន SaudiGulf Airlines និងក្រុមហ៊ុន Flynas ហើយមាន៣ចំណត៕ AeroTime៕