ដោយៈសុខុម

ភ្នំពេញ: ក្រុមហ៊ុននៅសហរដ្ឋអាមេរិក Oak Sourcing & Logistics (OSL) ដែលជាក្រុមហ៊ុនផ្គត់ផ្គង់ និងដឹកជញ្ជូនបានប្រកាស កាលពីថ្ងៃទី៥ ដើមខែសីហា ថា ខ្លួនបានបរិច្ចាគសណ្ឋានគ្រូពេទ្យជាង២លាន សម្រាប់ដល់ប្រទេសកម្ពុជា ដែលមានប្រជាជនប្រមាណជាង១៥លាននាក់។ នេះបើយោងតាមការចុះផ្សាយរបស់សារព័ត៌មាន PRNewswire។

ការបរិច្ចាគទាំងនេះ ធ្វើឡើងស្របពេលករណីឆ្លងវីរុសកូវីដ-១៩ កើនឡើងនៅទូទាំងប្រទេស។

យោងតាមទំព័រ Facebook ផ្លូវការរបស់ក្រសួងសុខាភិបាលកម្ពុជាបង្ហាញថា គិតត្រឹមថ្ងៃទី១៩ សីហា ឆ្នាំ២០២១ ប្រទេសកម្ពុជា មានករណីឆ្លងសរុប៨៨.២៤២ករណី ករណីឆ្លងថ្មី៥១៩ករណី ករណីជាសះស្បើយសរុប៨៣.៨៥១ករណី (ថ្មី=៥៥៣ករណី) ករណីស្លាប់សរុប១.៧៦២ករណី (ថ្មី=១៥ករណី) ករណីនាំចូលពីក្រៅប្រទេសសរុប១៣.៨០៤ករណី (ថ្មី=១៨៥ករណី)។

លោក Brian Berkenbile នាយកគ្រប់គ្រងក្រុមហ៊ុន OSL មានប្រសាសន៍ថា “យើងរីករាយនឹងបរិច្ចាគឯកសណ្ឋាន ការពារកម្រិតខ្ពស់ (PPE) ដ៏ចាំបាច់ និងដ៏មានសារៈសំខាន់ទាំងនេះដល់ប្រទេសកម្ពុជា ខណៈប្រទេសនេះ កំពុងប្រឹងប្រែងដោះស្រាយការកើនឡើងករណីឆ្លង ករណីឆ្លងធ្ងន់ធ្ងរ និងករណីស្លាប់”។

លោកមានប្រសាសន៍បន្ថែមទៀតថា “ឯកសណ្ឋានគ្រូពេទ្យទាំងនេះ នឹងផ្តល់ជូនមន្ទីរពេទ្យនិងគ្លីនិកនានានូវសុវត្ថិភាពខ្ពស់ជាងមុន សម្រាប់ក្រុមគ្រូពេទ្យ ក្នុងពេលបំពេញការងារប្រយុទ្ធប្រឆាំងនឹងវីរុសកូវីដ-១៩”។

លោកវេជ្ជបណ្ឌិតស៊ូ ស៊ីផាន់ណា ប្រធានប្រតិបត្តិសមាគមគ្រូពេទ្យស្ម័គ្រចិត្តសម្តេចតេជោ (TIDA) មានប្រសាសន៍ថា យើងសូមថ្លែងអំណរគុណក្រុមហ៊ុន Oak Sourcing & Logistics យ៉ាងជ្រាលជ្រៅ ចំពោះការបរិច្ចាគប្រកបដោយមនុស្សធម៌ ដល់ប្រទេសរបស់យើង ខណៈយើងកំពុងតែបន្តប្រឹងប្រែងប្រយុទ្ធប្រឆាំងនឹងវីរុសកូវីដ-១៩។

លោកវេជ្ជបណ្ឌិតបញ្ជាក់ថា “ឯកសណ្ឋានគ្រូពេទ្យទាំងនេះ មិនត្រឹមតែជួយឱ្យយើងមានលទ្ធភាព ផ្ដល់ការព្យាបាលកាន់តែប្រសើរ ជូនប្រជាពលរដ្ឋរបស់យើង ដែលកំពុងទទួលរងគ្រោះ ដោយការកើនឡើងនូវការរីករាលដាលវីរុសកូវីដ-១៩ ប៉ុណ្ណោះទេ ប៉ុន្តែថែមទាំងជួយការពារសុវត្ថិភាព របស់ក្រុមគ្រូពេទ្យយើងផងដែរ ពេលពួកគាត់ចុះចាក់វ៉ាក់សាំងជូនប្រជាពលរដ្ឋ”។

សមាគមគ្រូពេទ្យស្ម័គ្រចិត្តយុវជនសម្តេចតេជោ (TIDA) ត្រូវបានបង្កើតឡើងនៅថ្ងៃទី២៧ ខែធ្នូ ឆ្នាំ២០១២ ក្រោមការផ្តួចផ្តើមគំនិតពីឯកឧត្តមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៕

ដោយៈវឌ្ឈនៈ

ភ្នំពេញៈ គម្រោងស្ពានអាកាសនិងផ្លូវក្រោមដីចោមចៅ ដែលបើកការដ្ឋានសាងសង់កាលពីចុងខែមិថុនា២០១៨រហូតមកដល់នេះ ត្រឹមថ្ងៃទី២០ សីហា សម្រេចបាន៨០ភាគរយហើយ និងគ្រោងនឹងបញ្ចប់នៅចុងខែមីនា២០២២ ។នេះបើតាមការឲ្យដឹងពីលោកសាំ ពិសិដ្ឋប្រធានមន្ទីរសាធារណការ និងដឹកជញ្ជូនរាជធានីភ្នំពេញ។

លោកបន្តថា “នៅពេលគម្រោងនេះបានបញ្ចប់ទាំងស្រុង វានឹងអាចកាត់បន្ថយបានការកកស្ទះចរាចរណ៍បាននៅតំបន់នោះបានច្រើន។ ស្ពាននេះទទួលម៉ៅការសាងសង់ដោយក្រុមហ៊ុនវិនិយោគទុនអានិកជនកម្ពុជា(OCIC) ដោយប្រើប្រាស់ការសាងសង់ក្នុងរយៈពេល៣០ខែ និងចំណាយថវិកាសាងសង់ប្រមាណ២២លានដុល្លាអាមេរិក”។

លោកពិសិដ្ឋបានបន្តថា តាមកម្មវិធីការងារការដ្ឋាននេះ នឹងបញ្ចប់ការសាងសង់នៅចុងខែមីនាឆ្នាំ២០២២ខាងមុខ ខណៈស្ពានអាកាស និងផ្លូវក្រោមដីនេះក៏ត្រូវបានបើកអោយដំណើរជាបណ្តោះអាសន្ន នៃផ្នែកខ្លះហើយដែរ ដើម្បីសម្រួលចរាចរណ៍ជូនប្រជាពលរដ្ឋ។

សម្តេចតេជោ ហ៊ុន សែន កាលពីថ្ងៃទី២៦ ខែតុលា ឆ្នាំ២០២០កន្លងមកនេះ បានប្រកាសដាក់ដំណើរការផ្លូវក្រោមដី នៅរង្វង់មូលចោមចៅ ជូនប្រជាពលរដ្ឋបានធ្វើចរា​ចរណ៍ជាបណ្តោះអាសន្ន ហើយក្រោយពីដាក់ឱ្យដំណើរការផ្លូវក្រោមដី ជូនប្រជាពលរដ្ឋបានធ្វើចរាចរណ៍ជាបណ្តោះអាសន្នឃើញថា ស្ថានភាពចរាចរណ៍ពីផ្លូវជាតិលេខ៤ មកផ្លូវសហព័ន្ធរុស្ស៊ី មានលក្ខណៈល្អប្រសើរ ។ ផ្លូវក្រោមដីនេះ ជាផ្លូវតភ្ជាប់ចរាចរពីផ្លូវជាតិលេខ៤ មកមហាវិថីសហព័ន្ធរុស្ស៊ី មានប្រវែងសរុប ៤៧០ម៉ែត្រ ទទឹង៨,៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត៕

ដោយៈ តារា

ភ្នំពេញៈ នៅវេលាម៉ោង៦ល្ងាច ថ្ងៃទី២០ ខែសីហានេះ សាសនាទាំងអស់នៅក្នុងព្រះរាជាណាចក្រកម្ពុជា បានរួមគ្នាបន្លឺសំឡេងស្គរ និងជូងកងរំពង ដើម្បីឧទ្ទិសឲ្យពិភពលោកបានរួចផុតពីជំងឺរាតត្បាតកូវីដ-១៩ និងអំពើជួញដូរមនុស្ស។

ក្រសួងធម្មការ និងសាសនាបានឲ្យដឹងថា ជារៀងរាល់ឆ្នាំ ចាប់ពីឆ្នាំ២០១៧មក គណៈកម្មាធិការជាតិ ប្រយុទ្ធប្រឆាំងការជួញដូរមនុស្ស (គ.ជ.ប.ជ) តែងបានសហការជាមួយក្រសួងធម្មការ មេដឹកនាំសាសនាធំៗនៅកម្ពុជា រៀបចំកម្មវិធីអន្តរសាសនាប្រឆាំងការជួញដូរមនុស្ស ក្នុងគោលបំណងបួងសួងឲ្យប្រជាជនកម្ពុជា ក៏ដូចជាប្រជាជនលើពិភ​ពលោក ទទួលបានសេចក្តីសុខ ចៀសផុសពីការរំលោភបំពាន និងអំពើជួញដូរមនុស្ស ដែលជាទាសភាពសម័យទំនើប។

ថ្លែងបើកកម្មវិធីនេះ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា កម្ពុជាបានផ្អាកការជួបជុំទ្រង់ទ្រាយធំ កាលពីឆ្នាំ២០២០កន្លងទៅ ដើម្បអនុវត្តនូវវិធានការបង្ការ ទប់ស្កាត់ និងដោះស្រាយបញ្ហា នៃការរាតត្បាតជំងឺកូវីដ១៩ចូលក្នុងសហគមន៍។ នៅឆ្នាំ២០២១នេះ វិបត្តិកូវីដ១៩ នៅតែបន្តឆ្លងរាតត្បាត ចំណែកការជួញដូរមនុស្ស និងឧក្រិដ្ឋកម្មឆ្លងដែននានា ក៏កំពុងត្រូវបានជនឆ្លៀតឱកាស ប្រើប្រាស់គ្រប់មធ្យោបាយ ទាញយកផលចំណេញពីស្ថានភាពដ៏លំបាកនេះ ។

សម្ដេចតេជោបញ្ជាក់ថា “រាជរដ្ឋាភិបាលបាននឹងកំពុងអនុវត្តយ៉ាងសកម្ម តាមរយៈដៃម្ខាងរក្សាការពារសន្តិសុខសណ្ដាប់ធ្នាប់ និងស្ថិរភាពសង្គម ដើម្បីទ្រទ្រង់ជីវភាពប្រជាជន និងរក្សាស្ថិរភាពម៉ាក្រូសេដ្ឋកិច្ច និងដៃម្ខាងទៀតប្រយុទ្ធប្រឆាំង ជំងឺរាតត្បាតសកលកូវីដ១៩ តាមគ្រប់រូបភាព ទាំងការបង្ការទប់ស្កាត់ ការព្យាបាល និងការស្ដារនីតិសម្បទាជនរងគ្រោះ និងសហគមន៍ដែលទទួលរងនូវផលប៉ះពាល់”។

សម្ដេចតេជោបន្តថា ដូច្នេះការដាក់ប្រជាពលរដ្ឋ ឬអ្នកត្រឡប់មកពីតំបន់មានហានិភ័យ ឲ្យស្ថិតក្នុងការធ្វើចត្តាឡីស័ក ឬការបិទខ្ទប់តំបន់ ដែលមានអត្រាឆ្លង ឬចរន្តនៃការឆ្លងខ្ពស់ ឬការផ្អាកឆ្លងដែនខុសច្បាប់ នៅក្នុងដំណាក់កាលនៃការរឹតបន្តឹងវិធានការការពា​រសុវត្ថិភាព មិនមានន័យថា ជាការបិទសិទ្ធិសេរីភាពឬការរើសអើង ដូចជនអគតិបង្កបញ្ហាមួយក្រុមដែលមាននិន្នាការប្រឆាំងផ្កាប់មុខ បាននិងកំពុងតែឃោសនាមួលបង្កាច់ បំបាក់ស្មារតីប្រជាពលរដ្ឋ ប៉ុន្តែនេះគឺជាវិធានការការពារសិទ្ធិរស់រានមានជីវិត សិទ្ធិទទួលបាននូវកិច្ចការពារ ចៀសផុតពីជំងឺឆ្លងរាតត្បាត ប្រកបដោយប្រសិទ្ធភាព។

សម្ដេចតេជោនាយករដ្ឋមន្ត្រី ថ្លែងបន្តថា ទន្ទឹមនេះ បន្ទាប់ពីចាក់វ៉ាក់សាំងជូនប្រជាពលរដ្ឋជិតសម្រេចតាមផែនការជាស្ថាពរ រាជរដ្ឋាភិបាលប្ដេជ្ញាចិត្តសម្រេចឲ្យបាននូវគោលដៅ ចាក់វ៉ាក់សាំងជូនកុមារ យុវវ័យពីអាយុ១២ឆ្នាំ ដល់ក្រោម១៨ឆ្នាំ ឲ្យបានមុនដំណាច់ឆ្នាំ២០២១ ដើម្បីបង្កើតភាពសាំ កាត់បន្ថយការចម្លងក្នុងសហគមន៍ ធ្វើឲ្យប្រជាជនយើងមានជីវភាពប្រក្រតីឡើងវិញ ដើម្បីស្ដារសេដ្ឋកិច្ចគ្រួសារ និងសង្គមជាតិ។

នាឱកាសនេះ សម្ដេចតេជោ ថ្លែងអំណរគុណ ចំពោះស្មារតីសាមគ្គី និងការជួយគ្នាក្នុងគ្រាលំបាក នៃបណ្ដាប្រទេសជាមិត្ត ដែលបានផ្ដល់វ៉ាក់សាំងទាន់ពេលវេលា ជាពិសេ​សសាធារណប្រជាមានិតចិន ជាប្រទេសឈានមុខគេក្នុងការផ្ដល់វ៉ាក់សាំង ទាំងជំនួយមនុស្សធម៌ ទាំងការបញ្ជាទិញ ក៏ដូចជាប្រទេសជប៉ុន អង់គ្លេស និងអាមេរិក ដែលធ្វើឲ្យកម្មវិធីចាក់វ៉ាក់សាំង ប្រព្រឹត្តទៅលឿនជាការគ្រោងទុក។

សម្តេចតេជោក៏បានថ្លែងអំណរគុណ ដល់អង្គការដៃគូរអភិវឌ្ឍអន្តរជាតិ និងស្ថានតំណាងពីប្រទេសនានា ក្នុងសកលលោក ព្រមទាំងវិនិយោគិនបរទេស និងក្នុងស្រុកតែងតែនៅជាមួយកម្ពុជា សហការក្នុងស្ថានភាពដ៏លំបាកនេះ ។ ថ្លែងអំណរគុណដល់មន្ត្រីរាជការ កងកម្លាំង ក្រុមគ្រូពេទ្យ និងវិស័យនានា ជួយជ្រោមជ្រែងរាជរដ្ឋាភិបាលដោះស្រាយគ្រប់បញ្ហា និងគ្រប់ដំណាក់កាល ។

សម្ដេចតេជោបានអំពាវនាវជនរួមជាតិនៅបន្តរក្សា និងអនុវត្តនូវគោលការណ៍បង្កា​រទប់ស្កាត់ និងវិធានការសុខាភិបាល “៣កុំ ៣ការពារ” ឲ្យបានខ្ជាប់ខ្ជួន កុំធ្វេសប្រហែស ហើយត្រូវនាំគ្នាទៅចាក់វ៉ាក់សាំងការពារកូវីដ១៩ ដែលរាជរដ្ឋាភិបាលផ្ដល់ជូនដោយឥតគិតថ្លៃឲ្យបានគ្រប់ៗគ្នា ដើម្បីបង្កើតភាពសាំ ចៀសផុតពីការឆ្លងនៃជំងឺរាតត្បាតដ៏កាច់សាហាវនេះ៕