ដោយៈ សាវុធ

ភ្នំពេញៈ រដ្ឋមន្ត្រីក្រសួងកសិកម្មបានលើកឡើងថា កិច្ចសហប្រតិបត្តិការក្នុងក្រប ខ័ណ្ឌមេគង្គ-ឡានឆាង មានគោលបំណងចូលរួមចំណែកអភិវឌ្ឍសេដ្ឋកិច្ច និងសង្គមរបស់ប្រទេសជាសមាជិក រួមមានចិន មីយ៉ាន់ម៉ា ថៃ ឡាវ កម្ពុជា និងប្រទេសវៀតណាម។

លោកវេង សាខុនរដ្ឋមន្ត្រីក្រសួងកសិកម្ម រុក្ខា ប្រមាញ់និងនេសាទបានឱ្យដឹងកាលពីថ្ងៃ២២ ខែកក្កដា ឆ្នាំ២០២១ថា កិច្ចសហប្រតិបត្តិការក្នុងក្រប ខ័ណ្ឌមេគង្គ-ឡានឆាង មានគោលបំណងចូលរួមចំណែកអភិវឌ្ឍសេដ្ឋកិច្ច និងសង្គមរបស់ប្រទេសជាសមាជិក រួមមាន ចិន មីយ៉ាន់ម៉ា ថៃ ឡាវ កម្ពុជា និងប្រទេសវៀតណាម។

លោកបានបន្តថា “កិច្ចសហប្រតិបត្តិការនេះ គាំទ្រដល់ការកសាងសហគមន៍អាស៊ាន និងកិច្ចសហប្រតិបត្តិការអាស៊ាន-ចិន ជាពិសេសធ្វើសមាហរណកម្មនិងបំពេញ បន្ថែម ជាមួយគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន និងជាយន្តការអនុតំបន់មេគង្គដើម្បីកសាង “សហគមន៍នៃអនាគតសន្តិភាព និងវិបុលភាពរួមគ្នា” ក្នុងចំណោមប្រទេសជាសមាជិក”។

លោកបានបន្តថា កិច្ចសហប្រតិបត្តិការមេគង្គ-ឡានឆាង ផ្តោតសំខាន់លើកិច្ចសហប្រតិបត្តិការក្នុងវិស័យអាទិភាពចំនួន៥ ដែលនៅក្នុងនោះក្រសួងកសិកម្ម រុក្ខាប្រមាញ់ និងនេសាទ ជាប្រធាននៃវិស័យអាទិភាពទី៥ ស្តីពី កសិកម្ម និងការកាត់បន្ថយភាពក្រីក្រ។

ក្រោមក្របខ័ណ្ឌនៃកិច្ចសហប្រតិបត្តិការ បានរៀបចំបង្កើតក្រុមការងារបច្ចេកទេស ស្តីពីកិច្ចសហប្រតិបត្តិការមេគង្គ-ឡានឆាង លើវិស័យកសិកម្ម។ កិច្ចប្រជុំក្រុមការងារបានរៀបចំឡើងចំនួន៣លើករួចមកហើយ ដោយមានការចូលរួមពីក្រុមការងារ នៃសមាជិកតាមប្រទេសនីមួយៗ។

-កិច្ចប្រជុំក្រុមការងារចម្រុះលើកទី១ នៃកិច្ចសហប្រតិបត្តិការមេគង្គ-ឡានឆាងលើវិស័យកសិកម្ម បានប្រព្រឹត្ត ទៅនៅថ្ងៃទី១១ ខែកញ្ញា ឆ្នាំ២០១៧ នៅទីក្រុងណាន នីង ខេត្តក្វាងស៊ី ប្រទេសចិន រៀបចំដោយក្រសួងកសិកម្ម និងកិច្ចការជនបទ នៃសាធារ ណរដ្ឋប្រជាមានិតចិន។

– កិច្ចប្រជុំក្រុមការងារចម្រុះលើកទី២ នៃកិច្ចសហប្រតិបត្តិការមេគង្គ-ឡានឆាងលើវិស័យកសិកម្ម បានប្រព្រឹត្ត ទៅចាប់ពីថ្ងៃទី១២ ដល់ថ្ងៃទី ១៣ ខែមិថុនា ឆ្នាំ២០១៩ នៅខេត្តសៀមរាប ប្រទេសកម្ពុជា រៀបចំដោយក្រសួងកសិកម្ម រុក្ខាប្រមាញ់ និងនេសាទនៃប្រទេសកម្ពុជា។

– កិច្ចប្រជុំក្រុមការងារចម្រុះលើកទី៣ នៃកិច្ចសហប្រតិ បត្តិការមេគង្គ-ឡានឆាងលើវិស័យកសិកម្ម បានប្រព្រឹត្ត ទៅចាប់ពីថ្ងៃទី២០ ខែតុលា ឆ្នាំ២០២០ តាមរយៈប្រព័ន្ធវីដេអូ រៀបចំដោយក្រសួងកសិកម្ម និងព្រៃឈើនៃប្រទេសឡាវ។

លោកវេង សាខុនបានបន្តទៀតថា តាមរយៈនៃកិច្ចសហប្រតិបត្តិការមេគង្គ-ឡានឆាង បានបង្កើតជាមូលនិធិពិសេស នៃកិច្ចសហប្រតិបត្តិការមេគង្គ- ឡានឆាងកម្ពុជាទទួលបានគម្រោងអនុវត្តចំនួន៥៥គម្រោង មានថវិកាសរុប ២១ លានដុល្លារអាមេរិក ក្នុងនោះក្រសួងកសិកម្ម រុក្ខាប្រមាញ់ និងនេសាទ បានទទួលអនុវត្តគម្រោងចំនួន៦មានថវិកាអនុវត្តសរុបចំនួនជាង២,៦លានដុល្លារអាមេរិក៕

ដោយៈគង់ ម៉ាលីន

ភ្នំពេញៈ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានប្រកាសតាមបណ្តាញព័ត៌មានផ្លូវការ Fresh Newsជូនជនរួមជាតិឲ្យបានជ្រាបថា សម្តេចតេជោអនុ​ញ្ញាតឲ្យបើកយុទ្ធនាការ ចាក់វ៉ាក់សាំងស៉ីណូវ៉ាក់ជូនកុមារ និងយុវវ័យ ចាប់ពីអាយុ១២ឆ្នាំ ដល់ ១៧ឆ្នាំ នៅថ្ងៃទី០៦ ខែសីហា ឆ្នាំ២០២១ខាងមុខ។

មានប្រសាសន៍ប្រាប់លោកលឹម ជាវុត្ថា អគ្គនាយកបណ្តាញព័ត៌មាន Fresh News នៅរសៀលថ្ងៃសុក្រទី២៣ កក្កដានេះ សម្តេចតេជោបានឲ្យដឹងទៀតថា សម្តេចនឹងធ្វើជាអធិបតីភាពក្នុងពិធីបើកយុទ្ធនាការចាក់វ៉ាក់សាំងជូនកុមារ និងយុវវ័យ នៅមន្ទីរពេទ្យកាល់ម៉ែត ដោយសម្តេចនឹងនាំយកចៅៗរបស់សម្តេចទាំងអស់ ដែលមានអាយុ១២-១៧ឆ្នាំ ទៅទទួលវ៉ាក់សាំងនៅថ្ងៃនោះតែម្តង ហើយក្រៅពីចៅរបស់សម្តេចក៏នៅមានចៅៗ របស់ថ្នាក់ដឹកនាំសំខាន់ៗជាច្រើនទៀតទៅទទួលវ៉ាក់សាំងផងដែរ។

នាពេលកន្លងទៅថ្មីៗនេះសម្តេចតេជោ ហ៊ុន សែននាយករដ្ឋមន្ត្រីកម្ពុជា បានប្រកា​សដាក់ចេញផែនការចាក់វ៉ាក់សាំងជំងឺកូវីដ១៩ ជូនដល់ក្មេងចាប់ពីអាយុ១២ឆ្នាំ ដល់ ១៧ឆ្នាំ ដើម្បីបង្កើតភាពសាំក្នុងសង្គម និងឈានទៅដល់ការបើកសកម្មភាពសង្គមឱ្យកាន់តែទូលាយ ជាពិសេសការបើកសាលារៀនឡើងវិញ។

សម្តេចតេជោ ហ៊ុន សែន បានបញ្ជាក់ថា ការចាក់វ៉ាក់សាំងជូនក្មេងអាយុចាប់ពី ១២ឆ្នាំ ទៅ១៧ឆ្នាំនេះ ជាចំណុចពិសេសក្នុងការបើកដំណើរការសង្គមឡើងវិញ ជាពិសេ​សការសិក្សានៅតាមសាលារៀន ដែលយ៉ាងហោចណាស់ ចាប់ពីថ្នាក់អនុវិទ្យាល័យឡើង។ ការចាក់វ៉ាក់សាំងនេះ នៅតែឈរលើគោលការណ៍ស្ម័គ្រចិត្ត។

សម្តេចសង្ឃឹមថា តាមការយល់ដឹង និងស្មារតីចូលរួមរបស់ប្រជាពលរដ្ឋនាពេលបច្ចុប្បន្ននេះ គឺមាតាបិតា និងអាណាព្យាបាល នឹងនាំកូនៗទៅទទួលវ៉ាក់សាំង។

បើទោះបីជាយ៉ាងណាសម្តេចតេជោនាយករដ្ឋមន្ត្រី ក៏នៅតែបន្តអំពាវនាវដល់ប្រជាពលរដ្ឋទាំងអស់ ឱ្យបន្តស្មារតីប្រយុទ្ធប្រឆាំង និងទប់ស្កាត់ការចម្លងជំងឺកូវីដ១៩ ដោយអនុវត្តតាមវិធានសុខាភិបាល ជាពិសេសវិធាន “៣ការពារ និង៣កុំ”៕

ដោយៈ ម៉ាណេត

ភ្នំពេញៈ ការដ្ឋានសាងសង់ស្ពានឫស្សីកែវ ឆ្លងកាត់ទន្លេសាប សម្រេចលទ្ឋផលបាន៥០% គិតត្រឹមថ្ងៃទី២៣ខែកក្កដាឆ្នាំ២០២១ ហើយតាមផែនការ គម្រោងនឹងបញ្ចប់ការសាងសង់ទាំងស្រុងនៅខែមីនា ឆ្នាំ២០២៣។ នេះបើយោងតាម មន្ទីរសាធារណការ និងដឹកជញ្ជូនរាជធានីភ្នំពេញនៅថ្ងៃទី២៣ ខែកក្កដា ឆ្នាំ២០២១។

មន្ទីរសាធារណការរាជធានីភ្នំពេញបានឱ្យដឹងទៀតថា គម្រោងស្ពាននេះនឹងបង្កើ​ត​លំហូរចរាចរថ្មី តភ្ជាប់ពីផ្លូវជាតិលេខ៥នៃខណ្ឌឫស្សីកែវ និងផ្លូវជាតិលេខ៦នៃខណ្ឌជ្រោ​យចង្វារ ហើយក៏ជាការបង្កើតផ្លូវថ្មីតភ្ជាប់ចរាចរ ក្នុងទីក្រុងទៅពហុកីឡដ្ឋានជាតិមរតកតេជោ ដែលកម្ពុជានឹងទទួលរៀបចំធ្វើជាម្ចាស់ផ្ទះ នៃព្រឹត្តិការណ៍ប្រកួតកីឡា SEA GAME 2023 នាពេលខាងមុខ។

ស្ពានបេតុង ដែលស្ថាបនានៅអម ជាមួយស្ពានបាឡេ នៅមុខឃ្លាំងសាំងនេះមានប្រវែង៩២២ម៉ែត្រ ទទឹង២០,៥ម៉ែត្រ។ ចិញ្ចើមស្ពាន សម្រាប់ថ្មើរជើងមានទទឹង១,២៥ម៉ែត្រសងខាង កម្ពស់សរសរស្ពានសម្រាប់ព្យួរខ្សែកាបធៀប នឹងកម្រាលស្ពានប្រវែង៣៤ម៉ែត្រ។

សរសរសម្រាប់ព្យួរ ខ្សែកាបមានសរសរចំនួន៤ គន្លងខ្សែយានយន្ត ទទឹង៣.៧៥ម៉ែត្រ គន្លងធ្វើចរាចរ២ខ្សែទៅ ២ខ្សែមក កម្ពស់នាវាចរក្រោមស្ពានអតិបរមានៅរដូវវស្សា១០.៥ម៉ែត្រ កម្ពស់នាវាចរ ក្រោមស្ពាន អប្បរមា នៅរដូវប្រាំង ២០,៥ម៉ែត្រ បំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរ។

ស្ពាននេះ សាងសង់ដោយក្រុមហ៊ុនOCIC ដោយប្រើរយៈពេល២៨ខែ និងប្រើប្រាស់ថវិកាសាងសង់ចំនួន៣៥លានដុល្លារអាមេរិក។ ស្ពាននេះមានតួនាទីសំខាន់ក្នុងការរួមមចំណែក រំដោះចរាចរលើផ្លូវជាតិលេខ៦ និងផ្លូវជាតិលេខ៥ ក៏ដូចជាច្រកចេញចូលរាជធានីភ្នំពេញនិងជាសមិទ្ធផលថ្មីមួយទៀត ជាចំណងដៃសម្រាប់រាជធានីភ្នំពេញ​៕

ដោយៈគង់ សូរិយា

ព្រះសីហនុៈលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិ គ្រប់គ្រងនិងអភិវឌ្ឍ តំបន់ឆ្នេរសមុទ្រកម្ពុជា(គ.អ.ឆ.ក.) បានចុះពិនិត្យដំណើរការស្ថានីយប្រព្រឹត្តិកម្មទឹកកខ្វក់ទី១ និងទី២ និងការពិនិត្យទីតាំងសម្រាប់ស្ថាបនាស្ថានីយ៍ប្រព្រឹត្តិកម្មទឹកកខ្វក់ទី៣ ស្ថិតនៅជាប់ស្ពានពយអូរឈើទាល ដែលមានសមត្ថភាពប្រព្រឹត្តកម្មទឹកកខ្វក់ ២០,០០០ ម៉ែត្រគូបក្នុងមួយថ្ងៃ នៅខេត្តព្រះសីហនុ។

ក្នុងពិធីចុះត្រួតពិនិត្យនាថ្ងៃទី២៣ កក្កដានេះ មានការចូលរួមពីសំណាក់ លោក ថោង ខុន រដ្ឋមន្រ្តីក្រសួងទេសចរណ៍ និងជាអនុប្រធានអចិន្រ្តៃយ៍ គ.អ.ឆ.ក., លោក សាយ សំអាល់ រដ្ឋមន្រ្តីក្រសួងបរិស្ថាន និងជាអនុប្រធាន គ.អ.ឆ.ក, លោក គួច ចំរើន អភិបាលខេត្តព្រះ សីហនុ រួមទាំងមន្រ្តីជំនាញជារូបផងដែរ។

នាឱកាសនោះដែរ ឧបនាយករដ្ឋមន្ត្រី ជា សុផារ៉ា ព្រមទាំងថ្នាក់ដឹកនាំផ្សេងៗទៀត បានបន្តពិនិត្យការស្ថាបនាផ្លូវពយតាមូង និងទីតាំងស្ថាបនាបដិមាព្រះស្កន្ទទ្រង់លើក្ងោក ស្ថិតនៅចំណុចប្រសព្វត្រីកោណ។

ស្ថានីយប្រព្រឹត្តិកម្មទឹកកខ្វក់ទី១ មានសមត្ថភាព ប្រព្រឹត្តិកម្មទឹកកខ្វក់៥,២០០ម៉ែត្រគូប ក្នុង១ថ្ងៃ ឯស្ថានីយប្រព្រឹត្តិកម្មទឹកកខ្វក់ទី២ មានសមត្ថភាពប្រព្រឹត្តិកម្មទឹកកខ្វក់៧,២០០ម៉ែត្រគូបក្នុង១ថ្ងៃ។

គម្រោងសាងសង់ស្ថានីយប្រព្រឹត្តិកម្មទឹកកខ្វក់ទាំងពីរ នៅក្នុងខេត្តព្រះសីហនុនេះ ដើម្បីដោះស្រាយការបង្ហូរទឹកកខ្វក់ ចូលទៅក្នុងសមុទ្រ ដោយប្រើបច្ចេកវិទ្យាចុងក្រោយបំផុត៕

ដោយៈ ប៊ី

ភ្នំពេញៈ គម្រោងមជ្ឈមណ្ឌលណាហ្គា៣ (Naga3) ដែលជាមជ្ឈមណ្ឌលកម្សាន្តចំរុះដ៏ធំ និងល្បីល្បាញបំផុតរបស់ប្រទេសកម្ពុជា បាននិងកំពុងដំណើរការសាងសង់យ៉ាងសកម្ម ខណៈនេះគម្រោងនេះ នឹងអាចក្លាយជាអាគារខ្ពស់ជាងគេនៅកម្ពុជា បន្ទាប់ពីការសាងសង់បញ្ចប់។

យោងតាមទិដ្ឋភាពជាក់ស្តែង រហូតខែកក្កដា ឆ្នាំ២០២១ ក្រុមការងារគេហទំព័រ Propertyarea.asia បានសង្កេតឃើញថា សកម្មភាពនៅការដ្ឋានសាងសង់គម្រោងមជ្ឈមណ្ឌលណាហ្គា៣ មានភាពមមាញឹក ដោយមានគ្រឿងម៉ាស៊ីនធំៗ រាប់ចាប់ពីម៉ាស៊ីនដងស្ទួច រហូតម៉ាស៊ីនបុកគ្រឹះធំ បាននិងកំពុងដំណើរការក្នុងការសាងសង់។

នេះបញ្ជាក់ថា ទោះស្ថិតកូវីដ១៩ក៏ដោយ ក្រុមហ៊ុនណាហ្គា នៅតែបន្តការសាងសង់គម្រោងមជ្ឈមណ្ឌលណាហ្គា៣ ទៅតាមគម្រោងរបស់ខ្លួន។

ក្រុមហ៊ុនធ្លាប់បានបញ្ជាក់ថា កាលពីខែមករា ក្រុមកម្មករ បានចាប់ផ្តើមបុកគ្រឹះ សម្រាប់គម្រោងដ៏ធំមួយនេះ។ ផ្អែកលើការគម្រោងរចនា លក្ខណៈពិសេសរបស់ណាហ្គា៣នឹងជាប៉មសណ្ឋាគារកម្ពស់៧៥ជាន់។

ក្រុមហ៊ុនអភិវឌ្ឍគម្រោងនេះ បានឲ្យដឹងថា “គម្រោងនេះ នឹងក្លាយជាអាគារខ្ពស់ជាងគេ នៅកម្ពុជា នៅពេលបញ្ចប់ការសាងសង់”។

គម្រោង ដែលមានទំហំគិតជាទឹកប្រាក់ ចំនួន៣,៥ពាន់លានដុល្លារ ដែលស្ថិតនៅសង្កាត់ទន្លេបាសាក់ រាជធានីភ្នំពេញ ក៏នឹងរួមបញ្ចូលទាំងប្លុកអគារសណ្ឋាគារកម្ពស់៥២ជាន់ចំនួនពីរផងដែរ។

នៅក្នុងបរិវេណនោះ នឹងមានប្លុកវេទិកាពហុមុខងារចំនួន១៧ជាន់ (ផលិតផលរចនាបថជីវិត សួនឧទ្យានបច្ចេកវិទ្យាខ្ពស់ ការកម្សាន្ត បន្ទប់ប្រជុំ ការលើកទឹកចិត្ត មជ្ឈ​មណ្ឌលសន្និសីទ និងកន្លែងតាំងពិព័រណ៍នានា (MICE) ជាដើម)។ ជាមួយគ្នានេះដែរ ក៏មានជាន់ក្រោមដីចំនួន៤ជាន់សម្រាប់ចំណតរថយន្ត និងសេវាគាំទ្រផ្សេងៗទៀតផងដែរ​។

Naga3 នឹងបន្ថែមបន្ទប់សណ្ឋាគារ និងបន្ទប់ប្រណីតជិត៣.០០០ ទៅលើមជ្ឈម ណ្ឌលណាហ្គាវើលដ៍ ដែលមានស្រាប់ផងដែរ។ ផ្ទៃដីសរុប សម្រាប់គម្រោងមានចំនួន៥០០ ០០០ម៉ែត្រការ៉េ។ អ្នកអភិវឌ្ឍន៍ អ្នកម៉ៅការ និងអ្នករចនា សម្រាប់គម្រោងនេះ នឹងសាងសង់ ស្របតាមស្តង់ដារអន្តរជាតិ៕