ដោយៈគង់ សូរិយា

ភ្នំពេញៈ ទេសរដ្ឋមន្រ្តី រដ្ឋមន្រ្តីសាធារណៈការ និងដឹកជញ្ជូន លោកស៊ុន ចាន់ថុលកំពុងចុះពិនិត្យវឌ្ឈនភាពផ្លូវ ទាំង៣៨ខ្សែនៅក្រុងសៀមរាប ដែលដំណើរការសាងសង់កំពុងតែមានភាពសកម្ម។

នៅរសៀលថ្ងៃទី២៨ មិថុនានេះ លោកស៊ុន ចាន់ថុលនិងក្រុមមន្រ្តីជំនាញកំពុងចុះពិនិត្យផ្លូវ និងផ្តោតលើការពង្រឹងគុណភាពផ្លូវទាំង៣៨ខ្សែផងដែរ ដើម្បីធានាឲ្យប្រាកដថាផ្លូវនេះសាងសង់ចប់តាមផែនការ និងជាផ្លូវមានទាំងសោភ័ណភាព និងគុណភាពខ្ពស់។

ការស្ថាបនា និងកែលំអរស្ទឹងសៀមរាប គ្រោងចំណាយថវិកាប្រមាណ២០០លានដុល្លារ ដែលជាថវិកាជាតិ។
អ្នកជំនាញនានាបានមើលឃើញថា បន្ទាប់ពីផ្លូវទាំង៣៨ខ្សែស្ថាបនារួច នឹងជួយលើកកំពស់មុខមាត់ កិត្យានុភាព និងទាក់ទាញទេសចរណ៍ និងវិនិយោគិនជាតិ អន្តរជាតិផងដែរ ពិសេសការវិនិយោគលើវិស័យសំណង់ និងអចលនទ្រព្យ ខណៈខេត្តនេះនៅតែមានសក្តានុពលទាក់ទាញទេសចរណ៍យ៉ាងខ្លាំង។

គេហទំព័រដ៏ល្បីល្បាញលើពិភពលោកTripadvisor បានចាត់ចំណាត់ថ្នាក់ ក្រុងសៀមរាប ជាគោលដៅទេសចរណ៍លំដាប់លេខ១ នៅលើពិភពលោកជាថ្មីម្តងទៀត សំរាប់ឆ្នាំ២០២១នេះ។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា ហេដ្ឋារចនាសម្ព័ន្ឋ ប្រៀបដូចជាមេដែកឆក់មួយ ដែលស្រូបទាញការវិនិយោគជាតិ និងអន្តរជាតិ ពិសេសជម្រុញឲ្យវិស័យអចលនទ្រព្យឡើងថ្លៃបន្ថែមទៀត សំរាប់ខេត្តដ៏ល្បីល្បាញនេះ។

លោកបន្តថា “យ៉ាងណាក៏ដោយអ្នកវិនិយោគ គួរសិក្សាពីទីផ្សារឲ្យបានច្បាស់លាស់ផងដែរ ដោយសារអំណាចនៃការទិញ របស់ប្រជាពលរដ្ឋនៅខេត្តនេះ នៅមានកម្រិតនៅឡើយ”។លោកបន្តថា “ខេត្តសៀមរាបមានការរីកចម្រើនខ្លាំងនៅទីក្រុង ប៉ុន្តែបើគិតពីប្រជាជនក្នុងខេត្តទាំងមូល ខេត្តមួយនេះជាខេត្តដែលមានប្រជាជនក្រីក្រជាងគេ នៅក្នុងចំណោមរាជធានី ខេត្តទាំង២៥នៅកម្ពុជា”៕

ដោយៈគង់ សូរិយា

ភ្នំពេញៈ អាជ្ញាធររាជធានីភ្នំពេញបានស្នើឲ្យប្រជាពលរដ្ឋ ដែលមិនទាន់ចាក់វ៉ាក់សាំង សូមរួសរាន់ ខណៈការចាក់នៅរាជធានីភ្នំពេញ នឹងបញ្ចប់នៅសប្តាហ៍ទី១ខែកក្កដាខាងមុខនេះ។

យោងតាមសេចក្ដីជូនដំណឹង របស់រដ្ឋបាលរាជធានីភ្នំពេញ ដែលបានចេញផ្សាយកាលពីចុងសប្តាហ៍មុនបានឲ្យដឹងថា យុទ្ធនាការនៃការចាក់វ៉ាក់សាំងនៅរាជធានីភ្នំពេញ ដែលមានកិច្ចសហការពីក្រុមគ្រូពេទ្យ នៃកងយោធពលខេមរភូមិន្ទ ក្រសួងការពារជាតិ ក្រុមគ្រូពេទ្យស្ម័គ្រចិត្តសម្ដេចតេជា (TYDA) ក្រុមគ្រូពេទ្យស្ម័គ្រចិត្តលោក ទៀ បាញ់ ក្រុមគ្រូពេទ្យស្ម័គ្រចិត្ត ស.ស.យ.ក. និងក្រុមគ្រូពេទ្យស្ម័គ្រចិត្តផ្សេងទៀត បានដំណើរការទៅយ៉ាងរលូន។

សេចក្ដីជូនដំណឹងនេះឱ្យដឹងថា មានពលរដ្ឋអាយុចាប់ពី ១៨ ឆ្នាំឡើងទៅបានចូលរួមចាក់វ៉ាក់សាំងយ៉ាងសស្រាក់សស្រាំ តាមគោលដៅនៃខណ្ឌនីមួយៗ ដែលគិតមកទល់ថ្ងៃទី ២៣ មិថុនា គឺមាន ពលរដ្ឋនៅរាជធានី១,៦៦២,៣៥៦នាក់ បានចាក់ដូសទី១ និងចំនួន១,៤៩៨,៧៨៧នាក់បានចាក់ដូសទី២រួចរាល់។

រដ្ឋបាលរាជធានីភ្នំពេញបញ្ជាក់ថា នៅមានពលរដ្ឋមួយចំនួនតូច មិនទាន់បានមកទទួលវ៉ាក់សាំងនៅឡើយ។ ដូច្នេះដើម្បីឱ្យដំណើរការចាក់វ៉ាក់សាំងបានជោគជ័យ ១០០ ភាគរយ សាលារាជធានីភ្នំពេញ សូមអំពាវនាវដល់ប្រជាពលរដ្ឋដែលកំពុងរស់នៅ ស្នាក់នៅប្រកបអាជីវកម្មមុខរបរផ្សេងៗ នៅក្នុងភូមិសាស្ត្ររាជធានីភ្នំពេញ ដែលពុំទាន់ទទួលបានការចាក់វ៉ាក់សាំងសូមអញ្ជើញ រួសរាន់មកចាក់វ៉ាក់សាំងចាប់ពីថ្ងៃទី ២៧ ខែមិថុនា ដល់ថ្ងៃទី ៨ ខែកក្កដា ឆ្នាំ ២០២១ កុំបីខាន។

ជាមួយនឹងការអំពាវនាវដល់ប្រជាពលរដ្ឋ ដែលមិនទាន់ទទួលបានការចាក់វ៉ាក់សាំងឱ្យប្រញាប់ទៅចាក់នោះ រដ្ឋបាលរាជធានីភ្នំពេញក៏បានក្រើនរំឭកផងដែរថា ក្នុងករណីដែលប្រជាពលរដ្ឋមានការខកខាន ក្រោយពីបិទបញ្ចប់នឹងមិនទទួលខុសត្រូវ ក្នុងការចាក់វ៉ាក់សាំងជូនទៀតឡើយ៕

ដោយៈគង់ សូរិយា

ភ្នំពេញៈ គំរោងបើកឲ្យដំណើរការ និងការសាងសង់ព្រលានយន្តហោះថ្មីចំនួនពីរទៀតបាននិងកំពុងជាប់គាំង ដោយសារវិបត្តិកូវីដ១៩កំពុងរីករាលដាលកាន់តែធ្ងន់ធ្ងរ។

ជាមួយនឹងវិបត្តិនេះ សេដ្ឋកិច្ចកម្ពុជានឹងជួបភាពមិនច្បាស់់លាស់ ខណៈសេនារីយោមួយរបស់ធនាគារពិភពលោក គឺសេដ្ឋកិច្ចកម្ពុជាអាចសម្រេចបានកំនើនប្រមាណ១ភាគរយប៉ុណ្ណោះ។

អ្នកនាំពាក្យ និងជាអនុរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិលលោកស៊ិន ចាន់សិរីវុត្ថា បានមានប្រសាសន៍ឲ្យដឹងកាលពីពេលថ្មីៗនេះថា គំរោងបើកដំណើរការព្រលានយន្តហោះតារាសាគរ ខេត្តកោះកុងត្រូវបានពន្យាពេល និងអាចពន្យាពេលយូរថែមទៀត ដោយសារជំងឺកូវីដ១៩៩ ខណៈព្រលានយន្តហោះនេះបានបញ្ចប់ការសាងសង់រួចហើយ នៅរង់ចាំតែក្រុមការងារបច្ចេកទេសធ្វើតេស្តការហោះហើរប៉ុណ្ណោះ។

លោកបន្តថា “អ្នកជំនាញអន្តរជាតិមិនទាន់ធ្វើដំណើរមកកម្ពុជាបាន ដោយសារបារម្ភពីជំងឺកូវីដ១៩ ប៉ុន្តែព្រលាននេះសាងសង់រួចហើយ”។

លោកស៊ិន ចាន់សិរីវុត្ថាបានបន្តឲ្យដឹងទៀតថា ចំណែកព្រលានយន្តហោះក្រុងបាត់ដំបង ដែលគ្រោងស្តារឡើងវិញ ក្រុមការងារក៏បានផ្អាកផងដែរ ដោយសារវិបត្តិជំងឺនេះ ហើយការចាប់ផ្តើមសិក្សានាពេលណាឡើងវិញ ស្ថិតក្នុងភាពមិនច្បាស់លាស់នៅឡើយ។

រីឯព្រលានយន្តហោះខេត្តមណ្ឌលគិរី ក្រុមការងារបច្ចេកទេសបានចុះសិក្សាផងដែរ ប៉ុន្តែការសិក្សាបានដំណើរការយឺតជាងការគ្រោងទុក ដោយសារវិបត្តិជំងឺនេះផងដែរ។នេះបើតាមការឲ្យដឹងពីលោកស៊ិន ចាន់សិរីវុត្ថា។

លោកបន្តថា ព្រលានយន្តហោះខេត្តមណ្ឌលគិរី ជាព្រលានខ្នាតតំបន់ឬខ្នាតអន្តរជាតិនេះ គ្រោងចំណាយទឹកប្រាក់វិនិយោគប្រមាណ១០០លានដុល្លារអាមេរិក។

ទោះជាព្រលានទាំងបីនេះមានបញ្ហាក្តី ប៉ុន្តែការសាងសង់ព្រលានយន្តហោះអន្តរជាតិភ្នំពេញ និងព្រលានយន្តហោះអន្តរជាតិថ្មី ខេត្តសៀមរាបនៅតែដំណើរការយ៉ាងសកម្ម និងបញ្ចប់តាមផែនការគ្រោងទុក៕

ដោយៈ ប៊ី

ភ្នំពេញៈ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ អះអាងថា ប្រទេសកម្ពុជានឹងទទួលបានគ្រប់ចំនួននូវវ៉ាក់សាំងកូវីដ១៩ ចំនួន២០លានដូស មុនផែនការកំណត់ ដែលវ៉ាក់សាំងទាំងអស់នឹងមកដល់កម្ពុជាត្រឹមខែសីហាឆ្នាំ២០២១។

ដូចនេះបញ្ហាបន្ទាប់នោះគឺការពន្លឿន ការចាក់វ៉ាកសាំងឱ្យបានលឿន ដែលរំពឹងថា ការចាក់វ៉ាក់សាំងសម្រាប់មនុស្ស១០លាននាក់ នឹងបញ្ចប់ ត្រឹមខែតុលា ឬ វិច្ឆិកា ឆ្នាំ២០២១ខាងមុនេះ។

លោកវង្ស៊ី វិសុទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និង ហិរញ្ញវត្ថុ បានថ្លែងដូច្នេះប្រាប់អ្នកសារព័ត៌មាននៅព្រលានយន្តហោះអន្តរជាតិភ្នំពេញ នាព្រឹកថ្ងៃទី២៦ ខែ មិថុនា ឆ្នាំ២០២១ ក្នុងឱកាសអញ្ជើញទទួលការមកដល់នៃវ៉ាក់សាំងស៊ីណូវ៉ាក់ចំនួន១លានដូសបន្ថែមទៀត ដែលរាជរដ្ឋាភិបាលបានបញ្ជាទិញពីក្រុមហ៊ុនស៊ីណូវ៉ាក់ របស់សាធារណរដ្ឋប្រជាមានិតប្រទេសចិន។

លោករដ្ឋលេខាធិការបានបន្តថា តាមការគ្រោងទុក វ៉ាក់សាំងចំនួន២០លានដូស នឹងត្រូវបានដឹកមកដល់ កម្ពុជាគ្រប់ចំនួននៅត្រឹមខែសីហាខាងមុខនេះ ដូចនេះយើងនឹងខិតខំពន្លឿនការចាក់វ៉ាក់សាំង ជូនប្រជាពលរដ្ឋឱ្យបានលឿន ហើយបើសិនជាមិនមានការប្រែប្រួលទេ ការមកដល់នៃវ៉ាក់សាំងត្រឹមខែសីហានេះ។

លោកបានថ្លែងបន្តថា យើងជឿជាក់ថា ក្នុងអំឡុងពេលខែតុលាឬខែវិច្ឆិកា យើងអាចចាក់វ៉ាក់សាំងជូនប្រជាពលរដ្ឋរបស់យើងចំនួន១០លាននាក់។ ជាមួយនេះ រាជរដ្ឋាភិបាល ក៏បានកំពុងគិតគូរផងដែរទៅលើការចាក់វ៉ាក់សាំងដល់កុមារអាយុពី១២ឆ្នាំ ទៅ១៨ ឆ្នាំ និងការចាក់វ៉ាក់សាំងបង្ការជំងឺកូវីដ-១៩ សម្រាប់ដូសទី៣ផងដែរ។

លោកវង្ស៊ី វិសុទ្ធក៏បានឱ្យដឹងផងដែរថា ដោយសារវ៉ាក់សាំងមកលឿនមុនផែនការកំណត់ ដូច្នេះ ផែនការ ចាក់វ៉ាក់សាំងនឹងត្រូវកែសម្រួល ហើយបើមិនមានការប្រែប្រួលទេ នៅសប្តាហ៍ក្រោយនេះ ឯកឧត្ដម ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នឹងបើកកិច្ចប្រជុំដើម្បីធ្វើការកែសម្រួល ផែនការចាក់វ៉ាក់សាំង ដែលយើងបានកំណត់នៅក្នុង «យុទ្ធនាការជាតិចាក់វ៉ាក់សាំងបង្ការជំងឺកូវីដ-១៩ នៅតំបន់ អាទិភាពខ្ពស់ សំដៅបង្កើតឱ្យបាននូវភាពស៊ាំសង្គមសេដ្ឋកិច្ចនៅកម្ពុជានៅក្នុងឆ្នាំ២០២១»។

លោកបានលើកឡើងថា ការដែលកម្ពុជាទទួលបានវ៉ាក់សាំងចំនួន២០លានដូសមុនកាលកំណត់ នេះ គឺមិនអាចកាត់ផ្តាច់ចេញពីការដឹកនាំ ប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជា សម្តេចអគ្គ មហាសេនាបតីតេជោ ហ៊ុន សែន នោះទេ។

លោបានបន្តថា ជាការពិតវាផ្អែកលើទំនាក់ទំនងល្អជាមួយប្រទេស ចិនក៏ពិតមែន ក៏ប៉ុន្តែមានប្រទេសជាច្រើនក៏មានទំនាក់ទំនងល្អជាមួយចិនដូចកម្ពុជាដែរ ចុះហេតុអ្វីគេមិនទទួល បានវ៉ាក់សាំងទាន់ពេលវេលាដូចកម្ពុជា។ ចំណុចនេះអាចវាយតម្លៃបានថា សម្តេចតេជោ ហ៊ុន សែន មានភាព ប៉ិនប្រសប់ក្នុងការទំនាក់ទំនង និងការចរចា ភាពឈ្លាសវៃមិនងាប់ក្រឡា ទើបយើងទទួលបានជោគជ័យក្នុង ការទិញវ៉ាក់សាំងនេះ។

លោកបានថ្លែងបន្តថា រាជរដ្ឋាភិបាលបានប្រើយុទ្ធសាស្ត្ររុលទៅមុខ គឺយើងមិន រងចាំតែរន្ធមួយនោះទេ គឺបានន័យថារន្ធមួយចូលមិនបាន រុលទៅរន្ធមួយទៀត។

លោកក៏បានឱ្យដឹងផងដែរថា វ៉ាក់សាំងបង្ការជំងឺកូវីដ-១៩ ចំនួន២០លានដូសនេះ កម្ពុជា ទទួលបានពីយន្តការកូវ៉ាក់ចំនួនជាង៣សែនដូស (ក្នុងចំនួនជាង៧ លានដូសដែល កូវ៉ាក់បង្ហាញសញ្ញាផ្តល់ឱ្យកម្ពុជា)។ ជំនួយរបស់សាធារណរដ្ឋប្រជាមានិតចិនចំនួន២,២លានដូស (វ៉ាក់សាំងស៊ីណូហ្វាម ) និងក្រៅ ពីនោះគឺរាជរដ្ឋាភិបាលទិញដោយថវិកាផ្ទាល់ ដែលមានប្រមាណ១៧០លានដុល្លារអាម៉េរិក។

មកដល់ពេលនេះ កម្ពុជាមានវ៉ាក់សាំងបង្ការជំងឺកូវីដ-១៩ ចំនួនជាង១០លានដូសហើយ ដើម្បីចាក់ជូនប្រជាពលរដ្ឋ។ បើគិតចាប់ពីថ្ងៃទី១០ ខែកុម្ភៈ ដល់ត្រឹមថ្ងៃទី២៥ ខែមិថុនាឆ្នាំ២០២១ កម្ពុជាបាន ចាក់វ៉ាក់សាំងជូនប្រជាពលរដ្ឋបានចំនួនជាង ៣លាន៨សែននាក់ ស្មើនឹងជាង៣៨ភាគរយហើយ។ ក្រៅតែពីរាជធានីភ្នំពេញ បច្ចុប្បន្នរាជរដ្ឋាភិបាលកម្ពុជា បាននិងកំពុងពង្រីកការចាក់វ៉ាក់សាំងទៅកាន់ ខេត្តកណ្តាល ព្រះសីហនុ កោះកុង កំពង់ស្ពឺ និងតាកែវផងដែរ៕