ក្រុមហ៊ុន Country Garden Holding ជាអ្នកអភិវឌ្ឍអចលនទ្រព្យធំបំផុតនៅម៉ាឡេស៊ីនៅតែរក្សាស្ថេរភាពប្រាក់ចំណេញ

ដោយ សុជាតា

ម៉ាឡេស៊ីៈ យោងតាមរបាយការណ៍បណ្តោះអាសន្នរបស់ក្រុមហ៊ុន Country Gardenr Holding ដែលជាក្រុមហ៊ុនវិនិយោគអលចលនទ្រព្យ Forest City នៅប្រទេសម៉ាឡេស៊ី បានបង្ហាញអោយដឹងថា នៅឆមាសទីមួយ ឆ្នាំ២០២១នេះ កំណើនៃការលក់បានកើនឡើងជាលំដាប់។

ជាមួយគ្នានេះ អាត្រាបំណុលសុទ្ធ និងការចំណាយហិរញ្ញវត្ថុរបស់ក្រុមហ៊ុននេះបានធ្លាក់ចុះ ព្រមទាំងការគ្រប់គ្រងហិរញ្ញវត្ថុប្រព្រឹត្តិទៅយ៉ាងរលួន។

ក្នុងរបាយការណ៍ដដែលនេះ ក្រុមហ៊ុន Country Garden បានសម្រេចកិច្ចសន្យាលក់ ក្នុងការបែងចែកទៅភាគហ៊ុននិក ក្រុមហ៊ុនមានប្រមាណ៤៦ពាន់លានដុល្លារ ពោលគឺកើនឡើង១៤ភាគរយ ។ប្រាក់ចំណូលបានកើនឡើង២៧ភាគរយ រហូតដល់៣៦ពាន់លានដុល្លារ ហើយប្រាក់ចំណេញបានកើនឡើងជាប្រចាំទៅកាន់ភាគហ៊ុននិក។

ជាមួយនឹងប្រតិបត្តិការយ៉ាងរលូន និងការគ្រប់គ្រងហិរញ្ញវត្ថុយ៉ាងមានស្ថេរភាព ក្រុមហ៊ុន Country Gardent បានទទួលស្គាល់ការគាំទ្រពីភ្នាក់ងារឥណទាន និងស្ថាប័នហិរញ្ញវត្ថុធំៗ។ នាពេលបច្ចុប្បន្ននេះ ទាំង ភ្នាក់ងារវាយតម្លៃឥណទាន moody and Fitch បានផ្តល់អត្រា វិនិយោគមួយ ខណៈដែរ ភ្នាក់ងារ Standard និង poor បានដាក់អត្រា វិជ្ជមាន ដែលជាអត្រាខ្ពស់បំផុតដោយក្រុមហ៊ុន ឯកជននៅក្នុងប្រទេសចិន។

ការទទួលស្គាល់ និង ការគាំទ្របានអនុញ្ញាតអោយក្រុមហ៊ុននេះ ទទួលបានទំនុកចិត្តពីអ្នកវិនិយោគ។ ជាក់ស្តែងនៅឆមាសទីមួយ ឆ្នាំ២០២១ ការចំណាយប្រាក់កម្ចី ជាមធ្យមក្រុមហ៊ុន បានធ្លាក់ចុះ៥.៣៩ ភាគរយ។

លោក Mo Bin អគ្គនាយក ក្រុមហ៊ុន Country Garden Holding បាននិយាយថា ការបន្តនៃកិច្ចប្រឹងប្រែងរបស់ប្រទេស ដើម្បីទប់ស្កាត់ហានិភ័យ ព្រមទាំងសុខភាពទីផ្សារអលចនទ្រព្យរឹងមាំ។

ឧស្សាហកម្មអចលនទ្រព្យនៅក្នុងប្រទេសចិន បានចូលទៅក្នុងដំណាក់កាលថ្មីនៃការអភិវឌ្ឍ។ ក្រុមហ៊ុន Country Garden មានជំនឿទុកចិត្តថា ផលិផលល្អ និងសេវាកម្មគឺជាមូលដ្ឋាន នៃការអភិវឌ្ឍយ៉ាងរលូននៃក្រុមហ៊ុន។ ក្រុមហ៊ុននឹងបន្តយកចិត្តទុកដាក់ទៅលើគោលការណ៍អតិថិជន គឹជាសេ្តចសម្រាប់គម្រោងទាំងមូល នៅក្នុងផែនទីបង្ហាញផ្លូវ។

ជាងនេះទៀត ក្រុមហ៊ុននឹងធ្វើអោយប្រសើរឡើង ភាពប្រកួតប្រជែងសម្រាប់វដ្ឋការអភិវឌ្ឍទាំងមូល ព្រមទាំងបង្កើតកិច្ចប្រឹងប្រែង ក្នុងការកសាងបច្ចេកវិទ្យាចំរុះ ដែលបង្កើតជីវិតរីករាយសម្រាប់ពិភពលោក៕

តើអគារកប់ពពកខ្ពស់បំផុតក្នុងពិភពលោក Burj Khalifa មានទំហំទុនវិនិយោគប៉ុន្មាន និងមានលក្ខណៈពិសេសបែបណាខ្លះ?

ដោយៈសុខុម

ឌូបៃ: មនុស្សជាច្រើនប្រហែលជាបានស្គាល់រួចមកហើយ នូវអគារកប់ពពក ដែលខ្ពស់ជាងគេបំផុត ក្នុងពិភពលោកនោះគឺអគារ Burj Khalifa ប៉ុន្តែអ្នកដឹងទេថាតើអគារ ដែលស្ថិតនៅទីក្រុងឌូបៃ ប្រទេសអារ៉ាប់រួមអេមីរ៉ាត មួយនេះមានទុនវិនិយោគធំកម្រិតណា មានទំហំធំប៉ុនណា និងមានលក្ខណៈពិសេសបែបណាខ្លះ?។

អគារកម្ពស់៨២៩,៨ម៉ែត្រ ដែលបានចាបផ្ដើមដំណើរការសាងសង់នៅថ្ងៃទី៦ មករា ឆ្នាំ២០០៤ និងបញ្ចប់នៅថ្ងៃទី១ តុលា ឆ្នាំ២០០៩ ហើយបើកសម្ពោធនៅថ្ងៃទី៤ មករា ឆ្នាំ២០១០ នេះមានផ្ទៃក្រឡាសរុប៣០៩.៤៧៣ម៉ែត្រការ៉េ។

នៅខែមីនា ឆ្នាំ២០០៩ លោក Mohamed Ali Alabbar ប្រធានក្រុមហ៊ុន Emaar Properties ដែលជាអ្នកអភិវឌ្ឍន៍គម្រោងនេះបានលើកឡើងថា តម្លៃផ្ទៃការិយាល័យនៅអគារ Burj Khalifa បានឈានដល់៤៣.០០០ដុល្លារអាមេរិក ក្នុងមួយម៉ែតការ៉េ ហើយផ្ទះប្រណីតបែបអ៊ីតាលី Armani Residences ដែលស្ថិតនៅក្នុងអគារនេះដែរ លក់បានថ្លៃដល់ទៅជាង៣៧.៥០០ដុល្លារអាមេរិក ក្នុងមួយម៉ែត្រការ៉េ។

ប្រធានក្រុមហ៊ុនរូបនេះ បានប៉ាន់ប្រមាណថា ទុនវិនិយោគសរុបសម្រាប់សំណង់អគារកប់ពពកនេះអា ចមានទំហំសរុបប្រមាណ១,៥ពាន់លានដុល្លារអាមេរិក។ អគារនេះមានកម្ពស់១៥៤ជាន់បូកបន្ថែម៩ជាន់ទៀត ដែលជាជាន់សម្រាប់ជួសជុលថែទាំអគារ សរុបគឺ១៦៣ជាន់។

*អគារកប់ពពក Burj Khalifa គ្រងកំណត់ត្រាពិភពលោកជាច្រើនរួមមានដូចខាងក្រោម៖ ​
– ជាសំណង់អគារខ្ពស់បំផុត៖ ៨២៩.៨ម៉ែត្រ
– អគារដែលមានជាន់ច្រើនបំផុត៖ ១៦៣ជាន់
– ការដំឡើងជណ្តើរយន្តខ្ពស់បំផុតរបស់ពិភពលោក
– ជណ្តើរយន្តវែងបំផុតក្នុងពិភពលោក កំពស់៥០៤ម៉ែត្រ
– ការបាញ់បេតុងបញ្ឈរខ្ពស់បំផុត (សម្រាប់អគារ)៖ ៦០៦ម៉ែត្រ
– អគារខ្ពស់បំផុតរបស់ពិភពលោក ដែលរួមបញ្ចូលទាំងកន្លែងស្នាក់នៅ
– ការដំឡើងអាលុយមីញ៉ូម និងកញ្ចក់នៅផ្នែកខាងមុខ នៃអគារខ្ពស់បំផុតរបស់ពិភពលោក៖ ៥១២ម៉ែត្រ។
– ក្លឹបកម្សាន្តខ្ពស់បំផុតរបស់ពិភពលោក៖ ជាន់ទី១៤៤
– ភោជនីយដ្ឋានខ្ពស់បំផុតរបស់ពិភពលោក៖ ជាន់ទី១២២ ក្នុងរយៈកម្ពស់៤៤២ម៉ែត្រ។
– ការបាញ់កាំជ្រួចឆ្លងឆ្នាំថ្មីខ្ពស់បំផុតរបស់ពិភពលោក
– ការបាញ់ភ្លើង និងប្រព័ន្ធសំឡេងដ៏ធំបំផុតរបស់ពិភពលោក នៅលើអាគារតែមួយ៕

អ្នកវិនិយោគចិនមានគំរោងនៅក្រុងព្រះសីហនុចាប់ផ្តើមវិលត្រលប់មកវិញបណ្តើរៗហើយ

ដោយៈស៊ីវ ម៉េង

ភ្នំពេញៈ ក្រុមអ្នកវិនិយោគចិន ដែលមានគំរោងអភិវឌ្ឍន៍នៅក្រុងព្រះសីហនុ បាននិងកំពុងត្រលប់មកកាន់ខេត្តនេះបណ្តើរៗឡើងវិញហើយ។ នេះបើតាមការឲ្យដឹងពីលោកឃាង ភារម្យអ្នកនាំពាក្យរដ្ឋបាលខេត្តព្រះសីហនុ។

លោកបានមានប្រសាសន៍ឲ្យដឹងកាលពីដើមសប្តាហ៍នេះថា អ្នកវិនិយោគចិនបានវិលត្រលប់មកវិញបណ្តើរៗហើយ ប៉ុន្តែមិនទាន់មានចំនួនច្រើននោះទេ ស្របពេលវិស័យអាកាសចរណ៍មានសកម្មភាពឡើងវិញបណ្តើរៗ ប៉ុន្តែសកម្មភាពហោះហើរមិនកើនឡើងខ្លាំងនោះឡើយ។

លោកបន្តថា “រដ្ឋបាលខេត្តបាន និងកំពុងបន្តពង្រឹងការទប់ស្កាត់ជំងឺកូវីដ១៩ ពិ​សេ​សមេរោគប្រភេទ Delta ដែលកំពុងរាតត្បាតជាសកល”។លោកបន្តថា “ក្រុងព្រះសីហនុនឹងវិលមកកាន់ភាពល្អប្រសើរវិញ ប្រសិនជាជំងឺកូវីដ១៩ត្រូវបានគ្រប់គ្រងបានល្អប្រសើរ ហើយថ្នាក់ដឹកនាំខេត្តកំពុងប្រឹងប្រែងលើការងារនេះ”។

ខេត្តព្រះសីហនុ ក្នុងរយៈពេល៥ឆ្នាំចុងក្រោយនេះ ទាក់ទាញលំហូរទុនវិនិយោគជាង៧០០០លានដុល្លារអាមេរិក លើវិស័យសំណង់ និងអចលនទ្រព្យ ដែលធ្វើឲ្យមុខមាត់ទីក្រុងនេះផ្លាស់ប្តូរទាំងស្រុង ដោយគិតរហូតមកទល់ពេលនេះ អគារកំពស់ចាប់ពី៥ជាន់ដល់៥៣ជាន់បានកើនឡើងដល់៦០៤អាគារ។

អ្នកតាមដាននិងវិភាគពីមូលដ្ឋានភូមិសាស្រ្តនយោបាយ និងទំនាក់ទំនងអន្តរជាតិ ឯករាជ្យ លោកយិន លាងគង់បានមានប្រសាសន៍ថា ការមានទំនាក់ទំនងល្អប្រសើររវាងមេដឹកនាំចិន និងកម្ពុជា បាននិងកំពុងក្លាយជាមូលដ្ឋាន នៃការផ្សារភ្ជាប់ភាពជាមិត្តភាពដែកថែក ទៅជាសះកមន៍ពីរវាសនាតែមួយ។

លោកបន្តថា ក្នុងកម្រិតមិត្តភាព នៃយុទ្ឋសាស្រ្តគ្រប់ជ្រុងជ្រោយមិនគ្រប់នោះទេ សម្រាប់ប្រទេសទាំងពីរ ប៉ុន្តែមេដឹកនាំទាំងពីរបានផ្តល់ផលប្រយោជន៍ និងគាំទ្រគ្នាទៅវិញទៅមកលើឆាកអន្តរជាតិ ហេតុនេះការជម្រុញឲ្យអ្នកវិនិយោគចិន មកវិនិយោគនៅកម្ពុជា គឺជាផលនៃការលើកកំពស់កម្រិតទំនាក់ទំនងនយោបាយផង ផលប្រយោជន៍ផង។

លោកបន្តថា “គ្មានផលប្រយោជន៍ចំពោះគ្នា មេដឹកនាំប្រទេសណាក៏ដោយ ក៏មិនផ្តល់នូវលំហូរទុនវិនិយោគ ដល់ប្រទេសដៃគូរបស់ខ្លួននោះទេ”។ លោកបន្ថែមថា “ហេតុនេះក្នុងទំនាក់ទំនងអន្តរជាតិ គឺមានតែផលប្រយោជន៍ ហើយក្នុងភូមិសាស្រ្តនយោបាយ មានតែការបោះដៃគាំទ្រគ្នាទៅវិញទៅមកប៉ុណ្ណោះ”៕

ស្ពានកាត់ជ្រោះដ៏ធំមួយនៃគម្រោងផ្លូវល្បឿនលឿនភ្នំពេញ ព្រះសីហនុត្រៀមលេចរូបរាង

ដោយៈគង់ សូរិយា

ភ្នំពេញៈ ស្ពានកាត់ជ្រោះមួយ នៃគំរោងផ្លូវល្បឿនលឿនភ្នំពេញ ព្រះសីហនុប្រវែងជាង២០០ម៉ែត្របានលេចចេញរូបរាងបណ្តើរៗហើយ ខណៈគំរោងផ្លូវប្រចែងជាង១៩០គីឡូម៉ែត្រនេះ ត្រៀមបញ្ចប់នាឆ្នាំ២០២២ខាងមុខ។

យោងតាមផេកផ្លូវការរបស់ក្រុមហ៊ុនចិន ដែលកំពុងសាងសង់ផ្លូវល្បឿនលឿន បានឱ្យដឹងកាលពីម្សិលម៉ិញនេះថា ស្ពានធំជាងគេដែលមានប្រវែងរហូតដល់២២៥ម៉ែត្រ នៃផ្លូវល្បឿនលឿនភ្នំពេញ-ព្រះសីហនុ បានលេចចេញបណ្ដើរៗហើយ។

ស្ពាននេះ ស្ថិតនៅត្រង់ចំណុចគីឡូម៉ែត្រលេខ១៧៨ ដែលជាស្ពានកាត់ទទឹងទឹកជ្រោះក្បាលឆាយ ខណៈបច្ចុប្បន្នក្រុមការងារ សម្រេចការសាងសង់សសរធ្នឹមស្ពានខ្ពស់ទីមួយ រួចរាល់ហើយ។

ការសាងសង់ផ្លូវល្បឿនលឿន ភ្នំពេញ-ព្រះសីហនុ គិតត្រឹមខែកក្កដា ឆ្នាំ២០២១ សម្រេចការសាងសង់បាន ៦៤% ហើយ ដោយគ្រោងនឹងបញ្ចប់នៅខែកញ្ញា ឆ្នាំ២០២២ ខាងមុខ ដែលជាការបញ្ចប់មុនផែនការ។

គម្រោងសាងសង់ផ្លូវល្បឿនលឿនភ្នំពេញ -ក្រុងព្រះសីហនុ នេះមានប្រវែងសរុបជាង ១៩០គីឡូម៉ែត្រ ភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ។

គម្រោងផ្លូវល្បឿនលឿន នៃគំនិតផ្តួចផ្តើមខ្សែក្រវ៉ាត់១ ផ្លូមួយរបស់ចិននេះ គ្រោងចំណាយថវិកាសាងសង់សរុបប្រមាណ ២ពាន់លានដុល្លារអាមេរិក ដោយកំពុងសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd.៕

ប្រទេសកម្ពុជាជំរុញបង្កើនទំនាក់ទំនងពាណិជ្ជកម្មទ្វេភាគីរវាង កម្ពុជា និងសឹង្ហបុរី

ដោយៈសុធា

ភ្នំពេញៈ រដ្ឋាភិបាលកម្ពុជា និងសឹង្ហបុរីកំពុងជម្រុញការពង្រីកទំហំពាណិជ្ជកម្មរវាងប្រទេសទាំងពីរ ដើម្បីសម្រេចវិបុលភាពរួមគ្នានាពេលអនាគត។

លោកប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជា បានជំនួបពិភាក្សាជាមួយរដ្ឋមន្រ្តីពាណិជ្ជកម្ម និងឧស្សាហកម្ម សិង្ហបុរីដោយ បានផោ្តតសំខាន់លើការពង្រឹងទំនាក់ទំនង ពាណិជ្ជកម្មនិងវិនិយោគកម្ពុជា-សិង្ហបុរី វឌ្ឍនភាពនៃដំណើរការផ្តល់សច្ចាប័ន លើកិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយតំបន់ (RCEP) រវាងអាស៊ាន និងបណ្តាប្រទេសជាភាគីសមាជិក និងជាពិសេ​ស​ការត្រៀមខ្លួនរបស់កម្ពុជា ក្នុងការរៀបចំទទួលធ្វើជាប្រធានអាស៊ាន និងការត្រៀមរៀបចំកិច្ចប្រជុំនានានៅឆ្នាំ២០២២ ខាងមុខ។

លោកបានជម្រាបជូនអំពីទំនាក់ទំនងពាណិជ្ជកម្ម និងវិនិយោគកម្ពុជា-សិង្ហបុរី និងកិច្ចសហប្រតិបត្តិការ ដែលភាគីទាំងពីរគួរផ្តោតលើ ក្នុងការស្តារទ្បើងវិញនូវសេដ្ឋកិច្ចសង្គម រួមមាន ការបន្តធានានូវលំហូរទំនិញ ការផ្គូរផ្គងធុរកិច្ច ការពង្រឹងវិស័យពាណិជ្ជកម្មអេឡិចត្រូនិក ការកសាងខ្សែច្រវាក់ផ្គត់ផ្គង់តំបន់ និងការបង្កើនការវិនិយោគរបស់សិង្ហបុរីនៅកម្ពុជា។

ជាមួយគ្នានេះផងដែរ លោកប៉ាន សួរស័ក្តបានជម្រាបជូនអំពីវឌ្ឍនភាពក្នុងការរៀបចំការងារសំខាន់ៗ និង ទិសដៅការងារក្នុងការត្រៀមរបស់កម្ពុជា ក្នុងនាមជាប្រធានអាស៊ានឆ្នាំ២០២២ ជាពិសេសក្រោមសសរស្តម្ភ សហគមន៍សេដ្ឋកិច្ចអាស៊ាន ក្នុងនោះរួមមាន ការចងក្រងឯកសារគន្លឹះ ស្តីពីសមិទ្ធផលអាទិភាពសេដ្ឋកិច្ចសំខាន់ៗជាដើម។

លោករដ្ឋមន្រ្តី បានបន្ដធ្វើបច្ចុប្បន្នភាព លើដំណើរការផ្តល់សច្ចាប័នលើកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងបានជម្រាបអំពីសារៈសំខាន់នៃការចូលជាធរមាននៃកិច្ចព្រមព្រៀងនេះ នៅដើមឆ្នាំ២០២២ ដើម្បីអាចទាញយកផលប្រយោជន៍ពីកិច្ចព្រមព្រៀងនេះ ស្របពេលនឹងកិច្ចខិតខំប្រឹងប្រែងស្តារទ្បើងវិញនូវសេដ្ឋកិច្ចសង្គម។

ជាការឆ្លើយតប រដ្ឋមន្ត្រីពាណិជ្ជកម្មនិងឧស្សាហកម្មសិង្ហបុរី បានបញ្ជាក់ពីការប្តេ ជ្ញាចិត្ត ក្នុងការពង្រឹងកិច្ចសហប្រតិបត្តិការ ពាណិជ្ជកម្មនិងវិនិយោគកម្ពុជា-សិង្ហបុរី ព្រមទាំងគាំទ្រយ៉ាងពេញលេញ ក្នុងការផ្តល់កិច្ចសហប្រតិបត្តិការយ៉ាងជិតស្និទ្ធ ដើម្បីជួយគាំទ្រកម្ពុជា ឱ្យទទួលបានជោគជ័យ នាពេលដែលកម្ពុជាធ្វើជាប្រធានអាស៊ាន ជាពិសេសក្នុងការរៀបចំកិច្ចប្រជុំ ថ្នាក់រដ្ឋមន្រ្តីសេដ្ឋកិច្ចអាស៊ាន និងកិច្ចប្រជុំពាក់ព័ន្ធក្រោមសសរស្តម្ភសហគមន៍សេដ្ឋកិច្ចអាស៊ានក្នុងឆ្នាំ២០២២៕

ចំណេះដឹងហិរញ្ញវត្ថុៈតើការជំពាក់ធនាគារជាការជំរុញទឹកចិត្តខិតខំធ្វើការនិងរកស៊ី?

ដោយៈវឌ្ឍនៈ

ភ្នំពេញៈ ពាក្យថាខំណាស់ ក៏ព្រោះតែធនាគារ និងមិនចង់ឱ្យធនាគារមកសួរសុខទុក្ខដល់ផ្ទះ ជាសំដៅលើអ្នកដែលប្រើប្រាស់កម្ចីរបស់ធនាគារ ឬមីក្រូហិរញ្ញវត្ថុក្នុងការប្រើប្រាស់ក្រោមរូបភាពផ្សេងៗ។

ក្នុងនោះមានអ្នកខ្លះប្រើប្រាស់ ដើម្បីបើកអាជីវកម្ម ខ្លះទៀតដើម្បីទិញអចលនទ្រព្យដូចជាផ្ទះដីធ្លី និងខ្លះទៀតប្រើប្រាស់ក្នុងការទិញ សម្ភារៈប្រើប្រាស់ផ្សេងៗជាដើម ។ តើការជំពាក់ធនាគារជាការជំរុញទឹកចិត្ត ឱ្យខំធ្វើការរឬរកស៊ី ដើម្បីយកលុយសងធនាគារវិញឬយ៉ាងណា?។

អ្នកជំនាញ ហិរញ្ញវត្ថុជាច្រើនបានលើកឡើងថា ការយកកម្ចីពីធនាគារឬមីក្រូហិរញ្ញវត្ថុមកប្រើប្រាស់ចំគោលដៅ វានឹងមិនធ្វើឱ្យមានបំណុលវ័ន្តកនោះឡើយ ប៉ុន្តែបើសិនជាយកបំណុលនោះ មកប្រើប្រាស់មិនចំគោលដៅ វានឹងនាំឱ្យមានបំណុលវ័ន្តកឬវិបត្តិហិរញ្ញវត្ថុជាក់ជាមិនខាន។

មានមនុស្សជាច្រើនបានយកកម្ចីពីធនាគារ ឬមីក្រូហិរញ្ញវត្ថុមកសាងសង់ផ្ទះហើយត្រូវធ្វើការ ឬរកស៊ី ដើម្បីយកលុយនោះសងទៅធនាគារ ឬមីក្រូហិរញ្ញវត្ថុជាប្រចាំខែ ជាមួយនឹងការចាយវាយត្បិតត្បៀត ក៏ព្រោះតែមិនចង់ឱ្យធនាគារមករឹបអូសទ្រព្យបញ្ចាំរបស់ខ្លួន។

បុគ្គលប្រភេទនេះ គេសង្កេតឃើញថា តែងតែទទួលបានជោគជ័យ និងជីវភាពធូរធារ នៅពេលគេបានសងត្រលប់ទៅធនាគារ ឬមីក្រូហិរញ្ញវត្ថុរួចរាល់ ។ ការយកកម្ចីមកប្រើប្រាស់របៀបនេះ ក៏ឃើញថាបានជួយច្រើនដល់អ្នកប្រើប្រាស់ក្នុងផ្លូវត្រូវ ពីព្រោះបើរង់ចាំឱ្យពួកគេសន្សំលុយពីការរកស៊ីឬធ្វើការ គ្រប់ចំនួនគឺនឹងមិនមានផ្ទះ សមរម្យសម្រាប់ស្នាក់នៅ ហើយលុយដែលរកបាននោះ ក៏មិនប្រកដថាទុកសម្រាប់គោលដៅអ្វីមួយដែរ ពីព្រោះថា លុយហើយនឹងមនុស្ស គឺមិនខុសអីសាច់ហើយនឹងខ្លានោះឡើយ ។

យ៉ាងណាក្ដី ស្ថាប័នផ្ដល់កម្ចីនានាក៏បានចុះសិក្សាពីលទ្ធភាព ក្នុងការសងត្រលប់របស់អតិថិជិនមុន នឹងផ្ដល់កម្ចីជូនសម្រាប់ប្រើប្រាស់ផងដែរ និងបញ្ជាក់ថាតើអតិថិជនអាចយកទំហំឥណទានកម្រិតណា អាចមានលទ្ធភាពសងត្រលប់មកវិញ។ ការធ្វើបែបនេះ ជាការជួយដល់អតិថិជនមិនឱ្យមានបំណុលកាន់តែច្រើន និងឈានដល់វិបត្តិហិរញ្ញវត្ថុនិងនាំឱ្យវេទនាដល់ខ្លួន ។ ប៉ុន្តែការប្រើប្រាស់កម្ចីក្រៅផ្លូវការគេឃើញថា អតិថិជនតែងតែមានវិបត្តិនឹងនាំឱ្យផុងខ្លួនក្នុងបំណុលកាន់តែធ្ងន់ធ្ងរផងដែរ៕

សកលវិទ្យាល័យថៃ ស្រូបទាញនិស្សិតអន្តរជាតិបានយ៉ាងច្រើនពីប្រទេសនានា រួមទាំងរួមកម្ពុជាផង

ដោយៈសុខុម

ភ្នំពេញ: សកលវិទ្យាល័យល្បីៗនៅប្រទេសថៃ ជាពិសេសសលវិទ្យាល័យឯកជនទាក់ទាញនិស្សិតអន្តរជាតិបានយ៉ាងច្រើន ពីប្រទេសនានារួមមានប្រទេសចិន និងបណ្ដាប្រទេស CLMV (កម្ពុជា ឡាវ មីយ៉ាន់ម៉ា វៀតណាម) តាមរយៈការពង្រឹងសមត្ថភាពរបស់និស្សិត។  នេះបើយោងតាមកាសែត Bankok Post ចុះផ្សាយនៅថ្ងៃទី៧ កញ្ញា នេះ។

ការិយាល័យគណៈកម្មការឧត្តមសិក្សា (OHEC)  របស់ថៃ បានរាយការណ៍ថា ចំនួ​ននិស្សិតអន្ដរជាតិ ដែលសិក្សានៅតាមសកលវិទ្យាល័យឯកជននានា ក្នុងប្រទេសថៃ បានកើនឡើងពី៨.២៥៥នាក់ក្នុងឆ្នាំ២០១៥ ដល់៩.៨៤០នាក់ក្នុងឆ្នាំ២០១៦ និងដល់១១.៥១២នាក់នៅឆ្នាំ២០១៧។

ការិយាល័យដដែលបានបន្ថែមថា និស្សិតអន្តរជាតិភាគច្រើននៅក្នុងឆ្នាំ២០១៧ មកពីប្រទេសចិន កម្ពុជា ឡាវ មីយ៉ាន់ម៉ា និងវៀតណាម។ សាកលវិទ្យាល័យ Dhurakij Pundit University បានចាប់ផ្ដើមកម្មវិធីពិសេសមួយជាមួយប្រទេសចិន កាលពី១៥ឆ្នាំមុន ហើយផ្តល់កម្មវិធីសិក្សា២ភាសា និង៣ភាសាសម្រាប់និស្សិតចិន។

លោកស្រី Darika Lathapipat ប្រធានសកលវិទ្យាល័យ Dhurakij Pundit University បានលើកឡើងថា “យើងបានចាប់ផ្តើមធ្វើទីផ្សារក្នុងបណ្ដាប្រទេស CLMV ក៏ដូចជាប្រទេសចិនកាលពីច្រើនឆ្នាំមុន”។ លោកស្រីបន្តថា “បន្ទាប់ពីប្រទេសចិន បានផ្តួចផ្តើមគោលនយោបាយបើកចំហ និស្សិតចិន ជាច្រើនបានមកសិក្សានៅប្រទេសថៃ ដោ​យសារពួកគេចូលចិត្តប្រទេសថៃ ហើយមានអារម្មណ៍ស្រួលនៅទីនេះ”។

ទន្ទឹមនេះ សាស្ត្រាចារ្យ Sompong Jitradup ដែលជាអ្នកជំនាញមួយរូបផ្នែកអប់រំនៅមូលនិធិអប់រំសមធម៌ Equitable Education Fund (EEF)និងជាអតីតសាស្ត្រាចារ្យ​នៅសកលវិទ្យាល័យ Chulalongkorn University បានថ្លែងថា សកលវិទ្យាល័យឯកជននានាគួរតែវិនិយោគលើបច្ចេកវិទ្យាឱ្យបានច្រើន។

សាស្ត្រាចារ្យរូបនេះបានគូសបញ្ជាក់ថា “ក្រៅពីការទទួលយកនិស្សិតអន្តរជាតិ សក​លវិទ្យាល័យឯកជននានា គួរតែវិនិយោគលើកម្មវិធីសូហ្វវែរ និងបច្ចេកវិទ្យាថ្មីៗ ដើម្បីឱ្យខ្លួនមានវគ្គសិក្សា ទាក់ទងនឹងបច្ចេកវិទ្យាទំនើបជាងសាកលវិទ្យាល័យរដ្ឋ។ បន្ទាប់មកពួកគេគួរតែជួលសាស្ត្រាចារ្យ ពីបណ្ដាសកលវិទ្យាល័យកំពូលៗ ដើម្បីឱ្យនិស្សិតមានអារម្មណ៍ចង់សិក្សាជាពិសេសនៅទីនោះ”៕

អ្នកជំនាញលើកឡើងពីឱកាសទទួលបានផលចំណេញពីការវិនិយោគលើដី កសិកម្មនៅកម្ពុជា

ដោយៈលក្ខិណា

ភ្នំពេញៈ កម្ពុជាជាប្រទេសមួយពឹងលើវិស័យកសិកម្ម និងមានប្រជាជនរហូតដល់៨៥ភាគរយប្រកបរបរកសិកម្ម ហើយដីកសិកម្មកម្ពុជាមកដល់នេះ នៅតែមានទំហំធំ បើទោះបីជាដីកសិកម្មមួយចំនួន ពីមុននោះត្រូវបានបម្លែង ទៅជាដីលំនៅឋាននិងឧស្សាហកម្មក្ដី។

យ៉ាងណាមកពេលនេះ វិនិយោគិននៅតែមានជម្រើសច្រើន ក្នុងការវិនិយោគលើដីសម្រាប់កសិកម្មនៅកម្ពុជា។

លោកឧកញ៉ាចេង ខេង អគ្គនាយកក្រុមហ៊ុនស៊ីភីអិលបានមានប្រសាសន៍ឲ្យដឹង​តាមទូរស័ព្ទនាថ្ងៃទី៧ កញ្ញានេះថា ប្រទេសកម្ពុជាអំណោយផល ទៅលើដីដែលយើងអាចបង្កបង្កើនផលលើដំណាំកសិកម្ម ជាដីដែលមានជីវជាតិល្អ មានទឹកគ្រប់គ្រាន់ និងអាចយកទៅដាំដុះដំណាំគ្រប់ប្រភេទដូចជា ស្រូវ ពោត សណ្ដែក ហើយមិនតែប៉ុណ្ណោះដីកម្ពុជាក៏អាចវិនិយោគទៅលើដំណាំឧស្សាហកម្មដែលពិភពលោកកំពុងមានតម្រូវការខ្ពស់ដូចជាកៅស៊ូ ដើមឈើម៉ៃសាក់ជាដើម ដែលធ្វើឱ្យទទួលផលចំណេញច្រើន។

លោកឧកញ៉ាបន្តថា “យើងមានជម្រើសច្រើន ក្នុងការរកប្រាក់ចំនេញ ទៅលើការវិនិយោគដីកសិកម្ម ដោយដំបូងយើងត្រូវធ្វើការ ជ្រើសរើសដែលមានជីវជាតិ ហើយបន្ទាប់មកយើងត្រូវសិក្សា ទៅលើដំណាំណាដែលអាចសមប្រកបនឹងដី ដែលយើងបានជ្រើសរើសនោះ”។ លោកបន្តថា “នៅពេលដែលយើងជ្រើសរើសដីបានហើយ យើងត្រូវមើលទៅលើដំណាំ ដែលយើងប្រុងនឹងដាំដុះ សម្រាប់រកប្រាក់ចំនេញត្រលប់មកវិញ ឬមួយក៏យើងអាចយកដី ដែលយើងមាននោះទៅជួលឱ្យអ្នកផ្សេង ដើម្បីទទួលកម្រៃជាប្រចាំខែឬក៏ប្រចាំឆ្នាំជាដើម”។

លោកឧញ៉ាបន្ថែមថា អ្នកដែលមានដីកសិកម្ម អាចធ្វើការវិនិយោគដោយខ្លួនឯងក៏បាន ឬក៏ជួលទៅជនបរទេសដែលមិនមានសិទ្ធិទិញដីធ្លី សម្រាប់អភិវឌ្ឍន៍ដំណាំ ឬក៏ផលិតស្បៀងអាហារ ដើម្បីលក់ក្នុងស្រុក ឬក៏នាំចេញទៅកាន់ទីផ្សារអន្តរជាតិផងដែរ។ចំណុចមួយទៀតដែល អាចធ្វើបានគឺការរួមសហការគ្នា ជាមួយវិនិយោគិនបរទេស ដែលមានជំនាញលើវិស័យកសិកម្ម ដើម្បីរកប្រាក់ចំណេញ ពីការវិនិយោគដីកសិកម្មនេះផងដែរ ។

លោកឧកញ៉ាចេង ខេងបានបន្តថា “យើងត្រូវចាំច្បាស់ថាតម្រូវការស្បៀងនៅលើពិភពលោកនេះ គឺមានជារៀងរាល់ថ្ងៃ ហើយកើនឡើងជាបន្តបន្ទាប់ ដូច្នេះការវិនិយោគទៅលើស្បៀងអាហារដូចជាការដាំដុះបន្លែ ស្រូវ ពោត សណ្ដែកគឺនឹងនាំមកនូវប្រាក់ចំណេញសម្រាប់អ្នកវិនិយោគ”។

លោកស្រីGrace Rachny Fongនាយិកាក្រុមហ៊ុនអចលនទ្រព្យ Century 21 Cambodia បានមានប្រសាសន៍ថា សម្រាប់ក្រុមហ៊ុនស្រី មុននឹងណែនាំដល់វិនិយោគដាក់ទុនលើដីកសិកម្ម ទៅលើដំណាំមួយនេះ គឺមានក្រុមអ្នកជំនាញចុះ ធ្វើតេស្តដីនោះថាវាត្រូវនឹងដំណាំ ដែលវិនិយោគិនចង់វិនិយោគដែរឬទេ។

លោកស្រីបន្តថា “ជាក្រុមហ៊ុនវាយតម្លៃដីធ្លី យើងមិនត្រឹមតែវាតម្លៃលើតែដីទេ តែយើងក៏បានវាយតម្លៃ ទៅលើសក្ដានុពល និងចង់ឱ្យវិនិយោគិន ដែលប្រើសេវារបស់យើងទទួលបានជោគជ័យលើការវិនិយោគរបស់ពួកគេផងដែរ”៕

មហាវិថីសហព័ន្ធរុស្ស៊ីចាប់ផ្តើមបង្ហាញគំរោងអភិវឌ្ឍន៍ធំៗលំដាប់អន្តរជាតិ

ដោយៈសុជាតា

ភ្នំពេញៈ មហាវិថីសហព័ន្ធរុស្ស៊ី គឺជាផ្លូវដ៏សំខាន់មួយ ដែលភ្ជាប់ពីរាជធានីភ្នំពេញទៅកាន់ព្រលានយន្តហោះពោចិនតុង ខណៈបច្ចុប្បន្នគំរោងវិនិយោគធំៗលំដាប់អន្តរជាតិបានចាប់ផ្តើមបង្ហាញខ្លួន។

អ្នកជំនាញអចលនទ្រព្យបានលើកឡើងថា នៅពេលអនាគតដ៏ខ្លីខាងមុខនេះ យើ​ងនឹងឃើញមុខមាត់ថ្មី របស់មហាវិថីសហព័ន្ធរុស្ស៊ី ជាមួយនឹងការសម្ភោធជាផ្លូវការរបស់ភ្នំពេញមេហ្គាលម៉ល ដែលជាការទន្ទឹងរង់ចាំជាយូរមកហើយ រួមជាមួយសណ្ឋាគារនិងការិយាល័យធនាគារ កន្លែងលក់រាយដែលជាទីតាំងដ៏ល្អបំផុត នៅតាមបណ្តោយមហាវិថីមួយនេះ។

ចំណែកឯការអភិវឌ្ឍន៍នាពេលអនាគតនោះ គឺគម្រោងអភិវឌ្ឍអចលនទ្រព្យ ប៊ូយ៉ុង និងគម្រោងរបស់Prince International Plaza ដែលបណ្ដាលឲ្យតំបន់នេះ មានសភាព មមាញឹកនូវការទិញលំនៅដ្ឋានប្រណីតៗ និងអគារពាណិជ្ជកម្មលំដាប់កំពូល ដូចជាកន្លែ​ងធ្វើអាជីវកម្ម កន្លែងកម្សាន្ត កន្លែងសម្រាកអង្គុយលេង និងការដើរទិញឥវ៉ាន់នៅកន្លែងតែមួយ។

លោកសំ សុខនឿន ប្រធានសមាគមអចលនទ្រព្យពិភពលោក (Global Real Estate Association )បានប្រាប់ Property Asia Area នៅថ្ងៃទី៧ ខែកញ្ញាថា តម្លៃអចលនទ្រព្យ តាមបណ្តោយផ្លូវសហព័ន្ធរូស៊ី បានកើនឡើងចន្លោះពី២០០០ដុល្លារទៅ ៤០០០ដុល្លារក្នុងមួយម៉ែត្រការ៉េ ដោយគម្រោងអភិវឌ្ឍខុនដូ ផ្សារទំនើប អាគារពាណិជ្ជកម្ម បានធ្វើអោយតំបន់នេះ ពេញណែនតាន់តាប់ដោយគ្មានដី សម្រាប់គម្រោងអភិវឌ្ឍធំៗបន្តទៀត។

គម្រោងធំៗដែលនឹងបន្តសាងសង់ មានដូចជា គម្រោងអភិវឌ្ឍរបស់ Royal Group  ផ្សារទំនើប Phnom Penh mega mall និង គម្រោងអភិវឌ្ឍរបស់ធនាគារជីប ម៉ុងជាដើម។

ជាមួយគ្នានេះ លោក ឃាង ពុទ្ធី ប្រធានក្រុមប្រឹក្សាសមាគមអ្នកជំនាញអចលនទ្រព្យបានពន្យល់ថា  ជាផ្លូវដ៏ធំទូលាយ ដែលមានមហាវិទ្យាល័យ និងសាកលវិទ្យាល័យ បណ្តុំអគារការិយាល័យទំនើបៗ ដែលកំពុងតែផុសឡើង ដែលស្ថិតនៅជិតអាកាសយានដ្ឋានអន្តរជាតិភ្នំពេញ ហើយក៏ផ្ដល់ភាពងាយស្រួល ក្នុងការធ្វើដំណើរទៅទីប្រជុំជនធំៗផ្សេងទៀតផងដែរ។

កត្តាទាំងនេះហើយ ដែលធ្វើឱ្យមហាវិថីសហព័ន្ធរុស្ស៊ី ស្ថិតក្នុងចំណោមទីតាំងដែលមានសក្ដានុពល សម្រាប់ការអភិវឌ្ឍន៍អគារពាណិជ្ជកម្ម និងលំនៅដ្ឋាននៅរាជធានីភ្នំពេញ។ ប៉ុន្តែគម្រោងអភិវឌ្ឍបានបន្តពេញណែន ធ្វើអោយដីតំបន់នោះ លែងមានដីទំនេរអភិវឌ្ឍធំៗទៀតហើយ។ ជំនួសមកវិញ ផ្លូវជាតិ៦០ម៉ែត្រ ដែលជាមហាវិថីធំភ្ជាប់ទៅកាន់ព្រលានយន្តហោះអន្តរជាតិថ្មី ដែលកំពុងសាងសង់ បានក្លាយទៅជាតំបន់សក្តានុពលថ្មីសម្រាប់អ្នកវិនិយោគសំលឹងមើលឱកាស។

អ្នកជំនាញដីធ្លី បានព្យាករណ៍ថា ក្នុងរយៈពេលប៉ុន្មានឆ្នាំខាងមុខ នៅពេលមុខមាត់មហាវិថីសហព័ន្ធរុស្ស៊ីកំពុងត្រូវបានផ្លាស់ប្តូរ អ្នកអភិវឌ្ឍន៍នឹងទទួលបានអត្ថប្រយោជន៍ច្រើនបំផុតពីឱកាសនេះ ដើម្បីអភិវឌ្ឍគម្រោង ដែលនឹងឆ្លើយតបទៅនឹងតម្រូវការ ដែលកំពុងកើតមានសម្រាប់អ្នកទិញ៕

លោកស្រីអាន សុធីតាលើកឡើងពីបញ្ហាប្រឈមរបស់ស្រ្តីក្នុងវិស័យអចលនទ្រព្យ?

ដោយៈវឌ្ឍនៈ

ភ្នំពេញៈ បើនិយាយពីអ្នកដែលប្រឡូក ក្នុងវិស័យអចលនទ្រព្យកាលពីមុនៗ គេសង្កេតឃើញថា ភាគច្រើនគឺជាបុរស និងមិនសូវមានស្ត្រី ជាអ្នកចូលរួមប្រឡូកឬប្រកបអាជីពក្នុងវិស័យនេះប៉ុន្មានទេ។

ប៉ុន្តែក្រោយមកដោយសារតែកំណើននេះ កាន់តែមានភាពរីកចម្រើនក៏ឃើញថាមានស្ត្រី កាន់តែច្រើនបានចូលប្រឡូកក្នុងវិស័យអចលនទ្រព្យ ។ តើស្ត្រីត្រូវជួបឧបសគ្គអ្វីខ្លះ នៅក្នុងការប្រឡូកជាមួយវិស័យអចលនទ្រព្យនេះ?។

លោកស្រី អាន សុធីតា ជាអ្នកជំនួញស្ត្រីមួយរូបក្នុងវិស័យអចលនទ្រព្យជាយូរមកហើយនោះ បានថ្លែងនៅក្នុងកិច្ចសម្ភាសន៍ ជាមួយគេហទំព័រ Property area ឱ្យដឹងថា នៅក្នុងវិស័យអចលនទ្រព្យ វាមិនមែនសំដៅទៅលើតែការទិញលក់ មួយប៉ុណ្ណោនោះទេ ។ នៅក្នុងវិស័យនេះ វាមានច្រើនផ្នែក តួយ៉ាងដូចជាសេវាកម្មខាងវាយតម្លៃ ដែលតម្រូវឱ្យបុគ្គលិកចុះទៅវាយតម្លៃផ្ទាល់ៗ នៅតាមខេត្ត មិនថាអចលនទ្រព្យប្រភេទអ្វីក៏ដោយ មិនថាកសិកម្មឬឧស្សាហកម្មផ្សេងៗឡើយ ។

លោកស្រីបន្តថា ពេលខ្លះបុគ្គលិកជាស្ត្រីរបស់យើង ក៏ចុះទៅតាមខេត្តដោយធ្វើដំណើរជាមួយបុរសៗភាគច្រើន ឬទៅជួបជាមួយនឹងភ្ញៀវដែលមិនស្គាល់មុខ តែនៅមានឧបសគ្គមួយចំនួនទៀត ដែលបុគ្គលិកផ្នែកអចលនទ្រព្យជាស្ត្រី ត្រូវប្រឈមដូចជាចុះទៅតាមការដ្ឋានសំណង់ដែលកំពុងសាងសង់ ដែលជាហានិភ័យសម្រាប់ស្ត្រីទាក់ទងនឹងគ្រោះថ្នាក់ ហើយអ្វីដែលប្រឈមបំផុតសម្រាប់ស្ត្រី ក្នុងវិស័យអចលនទ្រព្យនោះ គឺទាក់ទងនឹងផ្នែកទិញលក់។

លោកអាន សុធីតាស្រីនិយាយថា “ជាទូទៅតែងមានគេនិយាយថា ដើម្បីលក់អច​លនទ្រព្យបានគឺត្រូវតែហ៊ានលះបង់ ដូចជា ការទៅញ៉ាំកាហ្វេជាមួយភ្ញៀវ ញ៉ាំបាយជាមួ​យភ្ញៀវមិនថាបាយថ្ងៃត្រង់ ឬបាយល្ងាច និងធ្វើឱ្យភ្ញៀវសប្បាយចិត្ត “។លោកស្រ្តីបន្តថា “ជាទស្សនៈខ្ញុំគិតថាវាខុសទាំងស្រុង ពីព្រោះថាបើសិនជាធ្វើបែបនេះ គឺវាខុសនឹងក្រមសីលធម៌ហើយ ។ ការទិញលក់មិនចាំបាច់ទាល់តែ ធ្វើឱ្យភ្ញៀវស្រវឹងទើបសម្រេចការទិញលក់នោះទេ”។

លោកស្រីបន្ថែមថា បើសិនយើងគិតថាជាឧបសគ្គនោះ វានឹងក្លាយជាឧបសគ្គតែបើយើងគិតងាយៗ យើងមិនចាំបាច់ធ្វើដល់ថ្នាក់នោះឡើយ ។ បើត្រឹមតែយើងញ៉ាំកាហ្វេជជែកជាមួយភ្ញៀវ ពិភាក្សាជាមួយនិងពន្យល់ភ្ញៀវពីសេវាកម្ម និងផលិតផលនោះវាមិនមានអ្វីជាឧបសគ្គសម្រាប់ស្ត្រី ក្នុងជំនួញអចលនទ្រព្យនោះទេ។ អ្វីដែលស្ត្រីក្នុងជំនួញអចលនទ្រព្យត្រូវដឹងនោះ គឺស្គាល់ពីផលិតផលឱ្យច្បាស់ និងស្គាល់ភ្ញៀវ ហើយសំខាន់បំផុតនោះគឺស្វែងរកដំណោះស្រាយជូនភ្ញៀវ ។

ជាការកត់សម្គាល់ក្នុងវិស័យអចលនទ្រព្យកម្ពុជានេះ ស្ត្រីកាន់តែច្រើនបានប្រឡូកក្នុងវិស័យអចលនទ្រព្យ ក្នុងនោះរាប់តាំងពីការលក់ដីឡូត៏ លក់ផ្ទះ លក់ខុនដូ និងមានស្ត្រីជាច្រើនទៀត បានក្លាយជាអ្នកដឹកនាំ ក្នុងក្រុមហ៊ុនអចលនទ្រព្យ និងកំពុងទទួលបានការគាំទ្រពីវិនិយោគិន និងសាធារជនក្នុងប្រទេសកម្ពុជាផងដែរ៕