ដោយៈ ប៊ី

ភ្នំពេញៈ ជប៉ុនបានសម្រេចជាស្ថាពរលើនីតីវិធីផ្តល់សច្ចាប័ន លើកិច្ចព្រមព្រៀងពាណិជ្ជកម្មធំបំផុតលើលោក (RCEP) ដែលរួមមានទាំងចិន និងអាស៊ាន នៅក្នុងនោះក៏មានកម្ពុជាផងដែរនៅថ្ងៃសុក្រនេះ។ នេះបើតាមការចេញផ្សាយរបស់សារព័ត៌មាន Kyodo News នៅល្ងាចថ្ងៃសុក្រ ទី២៥ ខែមិថុនា ឆ្នាំ២០២១។

ជប៉ុន គឺជាប្រទេសទី៣ ដែលបានបញ្ចប់នីតីវិធីផ្តល់សច្ចាប័នកិច្ចព្រមព្រៀងRCEPនេះ។ វានឹងជាកិច្ចព្រមព្រៀងពាណិជ្ជកម្មលើកដំបូងរបស់ជប៉ុន ដែលពាក់ព័ន្ធជាមួយចិនផង និងកូរ៉េខាងត្បូងផង ខណៈមួយជាដៃគូពាណិជ្ជកម្មធំបំផុតរបស់ខ្លួន និងមួយទៀតជាដៃគូពាណិជ្ជកម្មធំលំដាប់ទី ៣។

លោក Hiroshi Kajiyama រដ្ឋមន្រ្តីសេដ្ឋកិច្ច-ពាណិជ្ជកម្មជប៉ុន បានថ្លែងយ៉ាងដូច្នេះថា “កិច្ចព្រមព្រៀងនេះ នឹងពង្រឹងចំណងទាក់ទងរវាងជប៉ុន និងតំបន់អាស៉ី-ប៉ាស៉ីហ្វិក ដែលជាមជ្ឈមណ្ឌលនៃកំណើនសេដ្ឋកិច្ចរបស់ពិភពលោក ហើយវាក៏នឹងចូលរួមចំណែកយ៉ាងវិជ្ជមាន ចំពោះកំណើនសេដ្ឋកិច្ចជប៉ុន នៅពេលចូលជាធរមានផងដែរ”។

កិច្ចព្រមព្រៀង RCEP ត្រូវបានចុះហត្ថលេខាកាលពីខែវិច្ឆិកា ឆ្នាំ២០២០ ដោយប្រទេសចំនួន ១៥ ក្នុងនោះរួមមានអាស៊ាន ចិន ជប៉ុន អូស្រ្តាលី នូវែលសេឡង់ និងកូរ៉េខាងត្បូង។ វានឹងចូលជាធរមាននៅរយៈពេល៦០ថ្ងៃ ក្រោយទទួលបានការផ្តល់សច្ចាប័នពីសំណាក់ សមាជិកអាស៊ានយ៉ាងហោច ០៦ និងប្រទេសហត្ថលេខី ៣ទៀត។ សម្រាប់ប្រទេសសិង្ហបុរី និងចិន បានបញ្ចប់នីតិវិធីផ្តល់សច្ចាប័នរៀងៗខ្លួនរួចរាល់ហើយ គឺមុនជប៉ុនទៅទៀត៕

ដោយៈ វឌ្ឍនៈ

ភ្នំពេញៈ រាជរដ្ឋាភិបាលក៏គ្រោងនឹងចំណាយ១៦០លានដុល្លារអាមេរិកបន្ថែមទៀត សម្រាប់គម្រោងសាច់ប្រាក់ពលកម្មសម្រាប់ទ្រទ្រង់ដល់សេដ្ឋកិច្ចពីវិបត្តិកូវីដ១នៅឆ្នាំ២០២១នេះ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។

ក្នុងជំនួបជាមួយលោកស្រី Victoria Kwakwaអនុប្រធានធនាគារពិភពលោកប្រចាំតំបន់អាស៊ីខាងកើត និងប៉ាស៊ីហ្វិក តាមប្រព័ន្ធអនឡាញ នៅថ្ងៃទី២៤ ខែមិថុនា ឆ្នាំ២០២១ លោកអូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ដើម្បីរក្សាលំនឹងសេដ្ឋកិច្ច និងជីវភាពរបស់ប្រជាជន កម្ពុជាបានបង្កើនថវិកាចំណាយពីលើច្បាប់ហិរញ្ញវត្ថុ។

លោកបានបន្តថា ជាក់ស្ដែងរដ្ឋាភិបាលក៏បានដាក់ចេញនូវវិធានការអន្តរាគមន៍ជាច្រើនជុំ ហើយវិធានការជុំទី៩ ស្ដីពីការស្ដារនិងជំរុញកំណើនសេដ្ឋកិច្ចកម្ពុជា ក្នុងអំឡុង និងក្រោយពីវិបត្តិកូវីដ១៩ ក៏នឹងដាក់ចេញបន្ថែមទៀតនៅក្នុងពេលខាងមុខនេះ។

លោកបន្តថា កញ្ចប់អន្តរាគមន៍ជាក់ស្ដែងទាំងនោះ រួមមាន ១. ចំណាយលើការទប់ស្កាត់ និងព្យាបាលជំងឺកូវីដ១៩តាមរយៈក្រសួងសុខាភិបាល ២. ចំណាយលើការបណ្ដុះបណ្ដាលជំនាញ និងឧបត្ថម្ភកម្មករពេលព្យួរកិច្ចសន្យាការងារ តាមរយៈក្រសួងការងារនិងបណ្ដុះបណ្ដាលវិជ្ជមានជីវៈ ៣. គម្រោងសាច់ប្រាក់ពលកម្មចំនួន១០០លានដុល្លារ នៅឆ្នាំ២០២០ និង១៦០លានដុល្លាអាមេរិកនៅឆ្នាំ ២០២១នេះ ៤. កម្មវិធីឧបត្ថម្ភសាច់ប្រាក់ជូនគ្រួសារក្រ-១ ក្រ-២ និងជនងាយរងគ្រោះ ៥ ចំណាយផ្នែកសន្តិសុខស្បៀង និងការជំរុញចលនាផលិតស្បៀងនិងចំណាយផ្សេងៗ និង៦ ចំណាយអន្តរាគមន៍ផ្នែកសេដ្ឋកិច្ចជួយដល់សហគ្រាសធុនតូច និងមធ្យមតាមរយៈធនាគារអភិវឌ្ឍន៍ជនបទ និងកសិកម្ម និងធនាគារសហគ្រាសធុនតូច និងមធ្យម និងក្រុមហ៊ុនសាជីវកម្មធានាឥណទាននៅកម្ពុជា។

លោកស្រី Victoria Kwakwaអនុប្រធានធនាគារពិភពលោកប្រចាំតំបន់អាស៊ីខាងកើត និងប៉ាស៊ីហ្វិក បានបញ្ជាក់ពីជំហរគាំទ្រយ៉ាងពេញទំហឹង របស់ធនាគារពិភពលោក ក្នុងការរួមចំណែកគាំទ្ររាជរដ្ឋាភិបាល ក្នុងការអនុវត្តផែនការស្ដារសេដ្ឋកិច្ចឡើងវិញក្រោយវិបត្តិកូវីដ១៩នេះ ដោយសន្យាពិនិត្យឡើងវិញ និងកែសម្រួលឯកសារក្របខ័ណ្ឌនៃភាពជាដៃគូរវាងរាជរដ្ឋាភិបាល ជាមួយធនាគារពិភពលោកឱ្យឆ្លើយតបទៅនឹងបរិកាណ៍បច្ចុប្បន្ននៃជំងឺកូវីដ១៩ និងស្របតាមផែនការស្ដារសេដ្ឋកិច្ចឡើងវិញក្រោយវិបត្តិកូវីដ១៩ឆ្នាំ២០២១-២០២៣របស់រាជរដ្ឋាភិបាល។

វិបត្តិកូវីដដ១៩ បានធ្វើឱ្យការចំណាយរបស់រដ្ឋាភិបាលកើនឡើងជាងឆ្នាំមុនជាក់ស្ដែងកាលពីឆ្នាំ២០២០កន្លងទៅ រដ្ឋាភិបាលចំណាយបន្ថែម១០០លានដុល្លារសម្រាប់គម្រោងសាច់ប្រាក់ពលកម្មសម្រាប់ទ្រទ្រង់ដល់សេដ្ឋកិច្ចពីវិបត្តិកូវីដ១៩៕

ដោយៈ ម៉ាណេត

ភ្នំពេញៈ អ្នកជំនាញអះអាងថា កំណើនសេដ្ឋកិច្ច និងកំណើនប្រជាសាស្ត្រ នឹងទាមទារឱ្យមានការពង្រីកទំហំទីរាជធានីភ្នំពេញកាន់ធំបន្ថែមទៀត ខណៈទីក្រុងភ្នំពេញគឺជាបណ្តុំនៃសេដ្ឋកិច្ច ហើយជាចំណុចកណ្តាលមួយ ដែលទាក់ទាញការវិនិយោគ និងការធ្វើពាណិជ្ជកម្មខ្លាំងជាងគេនៅកម្ពុជា។

លោកយិន លាងគង់ទីប្រឹក្សាសមាគមអ្នកអភិវឌ្ឍនដីឡូតិ៍កម្ពុជា បានថ្លែងប្រាប់នៅថ្ងៃទី២៥ ខែមិថុនា ឆ្នាំ២០២១នេះថា កំណើននៃការរីកចម្រើនទីក្រុង ការកើនឡើងកត្តាប្រជាសាស្ត្រ និងការវិនិយោគលើហេដ្ឋារចនាសម្ព័ន្ធធំៗរបស់រដ្ឋាភិបាល បាននិងកំពុងធ្វើឱ្យរាជធានីភ្នំពេញ កាន់តែពង្រីកខ្លួនកាន់តែធំ។

លោកបានថ្លែងថា ដើម្បីជំរុញគោលនយោបាយបង្ខិតទីក្រុង និងតំបន់ជនបទ កាន់តែខិតជិតគ្នា ទើបរៀងរាល់៥ឆ្នាំម្តង រាជរដ្ឋាភិបាលតែងតែពិនិត្យមើលឡើងវិញនូវផែនការពង្រីកទីក្រុង ដើម្បីជំរុញការរីកចម្រើននៅតាមតំបន់ជនបទ ដើម្បីលើកកម្ពស់ជីវភាពរបស់ប្រជាពលរដ្ឋ ក៏ដូចធ្វើឱ្យសេដ្ឋកិច្ចកម្ពុជាមានប្រសើរឡើង។

លោកបានឱ្យដឹងទៀតថា ការរីកចម្រើននៃរាជធានីភ្នំពេញក្នុងរយៈពេល២០ឆ្នាំចុងក្រោយ បានធ្វើឱ្យទីក្រុងនេះលេចមុខមាត់ ហើយត្រូវបានទទួលស្គាល់នៅលើឆាកអន្តរជាតិ។

លោកបានបន្តថា ប្រទេសកម្ពុជាបានក្លាយជាប្រទេសមួយស្ថិតក្នុងក្រសែរភ្នែករបស់អ្នកវិនិយោគអន្តរជាតិ និងប្រៀបដូចកូនក្រមុំមួយ ដែលមានសម្រស់ដ៏ស្រស់ស្អាត ប៉ុន្តែការមានសម្រស់ដ៏ស្រស់ ឬមានសក្តានុពល ក៏ត្រូវមានការផ្សារភ្ជាប់ទៅនឹងគោលនយោបាយរបស់រាជរដ្ឋាភិបាលផងដែរ ព្រោះប្រសិនបើគោលនយោបាយរបស់រាជរដ្ឋាភិបាលមិនមានការបើកចំហរ មិនមានភាពបត់បែន និងមិនមានការផ្តល់បរិយាកាសវិនិយោគកាន់តែប្រសើរទេ ក៏មិនអាចទាក់ទាញការវិនិយោគបានរាប់ពាន់លានដុល្លារក្នុងមួយឆ្នាំៗផងដែរ។

លោកបានថ្លែងដូច្នេះថា “លំហូរទុនវិនិយោគពីបរទេស ឬFDI នេះហើយនេះ ដែលធ្វើឱ្យរាជធានីភ្នំពេញកាន់រីកធំ កាន់តែមានសក្តានុពល និងកាន់តែរីកចម្រើនពីមួយថ្ងៃទៅមួយថ្ងៃ ដូច្នេះការពង្រីកទីក្រុងបន្ថែមទៀតជាទិសដៅត្រឹមត្រូវមួយរបស់រាជរដ្ឋាភិបាល”។

លោកសាស្ត្រាចារ្យទួស សាភឿនអគ្គលេខាធិការរងនៃគណៈស្ថាបត្យករកម្ពុជាធ្លាប់ថ្លែងប្រាប់ថា ភ្នំពេញគឺជាបណ្តុំនៃសេដ្ឋកិច្ច ហើយជាចំណុចកណ្តាលមួយ ដែលមានការវិនិយោគ ការរស់នៅ និងការធ្វើពាណិជ្ជកម្មច្រើន ដូច្នេះតម្រូវការទីផ្សារខ្ពស់។

លោកបានថ្លែងថា “យើងគិតថា ទីក្រុងភ្នំពេញមានទំហំធំ ប៉ុន្តែសម្រាប់ខ្ញុំគិតថា វាមិនធំនោះទេ។ ពីមួយថ្ងៃទៅមួយថ្ងៃ ឥទ្ធិពលនៃទីក្រុងភ្នំពេញ បានរីកសាយទៅតំបន់ជិតខាង ដែលនឹងធ្វើឱ្យទីក្រុងភ្នំពេញ ត្រូវការពង្រីកខ្លួនបន្ថែម ដើម្បីឆ្លើយតបនឹងតម្រូវការទាំងអស់ទាំងនេះ”។ លោកលើកបែបនេះ សំដៅកាន់តម្រូវការទីផ្សារ កំណើនប្រជាជន និងកំណើនសេដ្ឋកិច្ច។

លោកបានថ្លែងទៀតថា ក្នុងរយៈពេលចុងក្រោយនេះ ការសាងសង់អាគារខ្ពស់ៗ បានកើតឡើងច្រើន ហើយទោះបីជាមានវិបត្តិកូវីដ១៩ សាងសង់អាគារខ្ពស់ៗ នៅតែកើតឡើង ប៉ុន្តែមិនច្រើន ដូចមុនសម័យកូវីដនោះទេ។
អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិតហុង វណ្ណៈធ្លាប់បានលើកឡើងដែរថា សម្រាប់ផែនការនៃការបង្កើតខណ្ឌថ្មី បានផ្តល់ផលប្រយោជន៍សំខាន់ៗជាច្រើន ដែលក្នុងនោះរួមមានការពង្រីករដ្ឋបាលសាធារណៈ វិស័យសេដ្ឋកិច្ចនៅក្នុងតំបន់ ក៏ដូចជាវិស័យទេសចរណ៍ផងដែរ។

លោកបានបន្តទៀតថា “តំបន់ដែលស្ថិតនៅក្នុងគម្រោងអភិវឌ្ឍន៍របស់រដ្ឋាភិបាលនេះ ជាតំបន់ដែលមានសក្ដានុពលខ្លាំង ដែលអាចបម្រើនូវផលប្រយោជន៍ជាច្រើន”។ លោកបន្តថា “ក្រោយពេលមានស្ពានឆ្លងកាត់ ខណ្ឌថ្មីនេះនឹងមានសកម្មភាពលើវិស័យផ្សេងៗជាច្រើន ជាពិសេសបម្រើដល់វិស័យដឹកជញ្ជូនទាំងផ្លូវគោក និងផ្លូវទឹកផងដែរ”។

លោកបន្តទៀតថា នៅពេលមានការអភិវឌ្ឍ នឹងទាក់ទាញមនុស្សឱ្យចូលទៅរស់នៅកាន់តែច្រើន ដែលអាចនឹងអភិវឌ្ឍន៍ទៅជាទីក្រុងរណបថ្មីមួយទៀត ស្របទៅនឹងគោលដៅរបស់រដ្ឋាភិបាល៕

ដោយៈ គៀតឈូ

វ៉ាស៊ីនតោនៈ សេដ្ឋកិច្ចសហរដ្ឋអាមេរិកកើនឡើងក្នុងអត្រា៦,៤%ក្នុងរយៈពេល៣ខែដំបូង ឆ្នាំនេះ ដែលធ្វើឱ្យអ្នកសេដ្ឋកិច្ចជឿថា វាអាចជាឆ្នាំមួយល្អប្រសើរបំផុតសម្រាប់សេដ្ឋកិច្ចអាមេរិកក្នុងរយៈពេលប្រហែល៧ទសវត្សរ៍ចុងក្រោយនេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៥ ខែមិថុនា ឆ្នាំ២០២១។

ក្រសួងពាណិជ្ជកម្មបានឱ្យដឹងកាលពីថ្ងៃទី២៤ ខែមិថុនានេះថា កំណើននៃផលិតផលក្នុងស្រុកសរុប ទំនិញ និងសេវាកម្មមិនមានការផ្លាស់ប្តូរ ពីការប៉ាន់ស្មានចំនួនពីរ លើកមុន ដែលជាការកើនឡើង ពី៤,៣%នៃត្រីមាសទី៤ ឆ្នាំមុន។

សេដ្ឋវិទូជឿជាក់ថា កំណើនសេដ្ឋកិច្ចបានបន្តបង្កើនល្បឿននៅក្នុងត្រីមាសបច្ចុប្បន្ន ដែលបញ្ចប់នៅខែនេះខណៈការចាក់វ៉ាក់សាំងកាន់តែទូលំទូលាយ ហើយជនជាតិអាមេរិក ដែលចង់ចេញទៅខាងក្រៅ ត្រូវបានស្វាគមន៍ដោយអាជីវកម្ម ដែលត្រូវបានអនុញ្ញាតឱ្យបើកឡើងវិញ។ ការកើនឡើងនូវសកម្មភាពពីអ្នកប្រើប្រាស់កំពុងត្រូវបានជម្រុញមួយផ្នែក ដោយកញ្ចប់ថវិកា៣ទ្រីលានដុល្លារក្នុងការគាំទ្រផ្នែកហិរញ្ញវត្ថុ ដែលរដ្ឋាភិបាលបានអនុម័តចាប់តាំងពីខែធ្នូ កន្លងទៅនេះ។

ទិន្នន័យសេដ្ឋកិច្ចបានបន្ថែមថា ការចេញផ្សាយកាលពីថ្ងៃព្រហស្បតិ៍ ក៏បានចង្អុលបង្ហាញពីប្រជាជាតិមួយដែលកើនឡើងយ៉ាងលឿន បន្ទាប់ពីត្រូវបានវាយប្រហារដោយជំងឺរាតត្បាតកូវីដ១៩។

លោកLydia Boussourអ្នកសេដ្ឋកិច្ចអាមេរិកផ្នែកសេដ្ឋកិច្ចOxford បានមានប្រសាសន៍ថា “រដូវក្តៅនេះនឹងមានស្ថានភាពល្អសម្រាប់សេដ្ឋកិច្ចអាមេរិក។ នៅពេលដែលស្ថានភាពសុខភាពបន្តប្រសើរឡើង អតិថិជនមានប្រាក់សន្សំច្រើន នឹងផ្តល់ការជំរុញលើសេវាកម្ម និងបង្កើនលើការចំណាយបន្ថែម”។

លោកBoussour បានព្យាករថា កំណើនGDPនៅត្រីមាស ខែមេសា-មិថុនា នឹងកើនឡើងដល់អត្រាប្រចាំឆ្នាំ ១២% ហើយកំណើនសម្រាប់ពេញមួយឆ្នាំនឹងកើនឡើងដល់៧,៥%។ នោះគឺជាការដំណើរការសេដ្ឋកិច្ចប្រចាំឆ្នាំល្អបំផុត ចាប់តាំងពីឆ្នាំ១៩៥១។

សូម្បីតែអ្នកសេដ្ឋកិច្ច ដែលេធ្លាប់ព្យាករពីកំណើនសេដ្ឋកិច្ចសម្រាប់ឆ្នាំ២០២១ក្នុងអត្រាពី៦ភាគរយ ទៅ៧ភាគរយជឿថា កំណើននៅឆ្នាំនេះនឹងកើនឡើងដល់៧,២% គិតចាប់ពីឆ្នាំ១៩៨៤ នៅពេលសហរដ្ឋអាមេរិកកំពុងងើបឡើងពីវិបត្តិសេដ្ឋកិច្ច៕

ដោយៈ វឌ្ឍនៈ

ភ្នំពេញៈ ទោះបីជាកម្ពុជាជាប់ដៃប្រយុទ្ធប្រឆាំងនឹងជំងឺកូវីដ១៩ក្ដី តែកម្ពុជាក៏មិនភ្លេចក្នុងការអភិវឌ្ឍប្រទេសរបស់ខ្លួនដែរ និងបានត្រៀមខ្លួនក្នុងការទទួលស្វាគមន៍វិនិយោគិន នៅពេលចប់វិបត្តិកូវីដ១៩ខាងមុខនេះ ជាក់ស្តែង ខេត្តព្រះសីហនុក៏បានត្រៀមខ្លួនរួចជាស្រេចក្នុងការទទួលស្វាគមន៍វិនិយោគិនជាតិ និងអន្តរជាតិ។

លោកឃាង ភារម្យអ្នកនាំពាក្យសាលាខេត្តព្រះសីហនុបានថ្លែងប្រាប់នៅថ្ងៃ២៤ ខែមិថុនា ឆ្នាំ២០២១នេះថា ទោះបីជាស្ថានភាពកូវីដ១៩ នៅតែបង្កជាបញ្ហាដល់ខេត្តសម្រាប់ដោះស្រាយក្ដី តែយើងក៏មិនភ្លេចពីការអភិវឌ្ឍខេត្ត ដើម្បីស្វាគមន៍ដល់វិនិយោគិនជាតិ និងអន្តរជាតិមកបណ្ដាក់ទុនរកស៊ី នៅពេលចប់វិបត្តិកូវីដ១៩នោះទេ។

លោកបានថ្លែងបន្តថា ហេដ្ឋារចនាសម្ព័ន្ធរូបវ័ន្តនៅក្នុងខេត្ត គឺជាកត្តាទាក់ទាញមួយដល់វិនិយោគិនជាតិ និងអន្តរជាតិ សម្រាប់មកបណ្ដាក់ទុននៅពេលខាងមុខឆាប់នេះ ខណៈហេដ្ឋារចនាសម្ព័ន្ធតភ្ជាប់ពីរាជធានីក៏កំពុងតែស្ថាបនាយ៉ាងមមាញឹក ដើម្បីសម្រួលដល់បណ្ដាអ្នកវិនិយោគ ដែលមានបំណងមកកាន់ខេត្តព្រះសីហនុ។

លោកបានបន្តថា “ក្នុងខេត្តព្រះសីហនុ យើងមានផ្លូវជាច្រើនខ្សែខ្វាត់ខ្វែង ដែលជាការទាក់ទាញទេសចរជាតិនិងអន្តរជាតិ ចូលមកកាន់ខេត្តព្រះសីហនុ ខណៈនៅខេត្តនេះក៏មានព្រលានយន្តហោះអន្តរជាតិអាចតភ្ជាប់ជើងហោះហើរពីក្រុងព្រះសីហនុទៅកាន់គោលដៅប្រទេសជាច្រើនទៀតលើពិភពលោក។ ទាំងនេះ សុទ្ធសឹងតែអ្វីដែលយើងបានត្រៀមចំពោះការទទួលស្វាគមន៍វិនិយោគិនចូលមកបណ្ដាក់ទុន”។

លោកបន្ថែមថា អ្វីដែលសំខាន់នោះ ខេត្តព្រះសីហនុក៏បាននិងកំពុងជំរុញការចាក់វ៉ាក់សាំងប្រឆាំងកូវីដ១៩ជូនប្រជាពលរដ្ឋឱ្យបានកាន់តែច្រើន និងអាចឱ្យអាជីវកម្មនិងសកម្មភាពសេដ្ឋកិច្ចនៅក្នុងខេត្តនេះវិលទៅរកប្រក្រតីភាពឡើងវិញនៅពេលខាងមុខឆាប់នេះ។

លោកបានបន្តថា ទោះបីជាយើងបានចាក់វ៉ាក់សាំងជូនពលរដ្ឋនៅក្នុងខេត្តព្រះសីហនុរួចហើយក្ដី ក៏យើងត្រូវតែអនុវត្តន៍តាមវិធានការរបស់ក្រសួងសុខាភិបាលក៏ដូចជាប្រមុខរាជរដ្ឋាភិបាលគឺ៣កុំ ៣ការពារ ដើម្បីទប់ស្កាត់ការឆ្លងរីករាលនៃជំងឺនេះនៅក្នុងខេត្តក៏ដូចជាក្នុងប្រទេសកម្ពុជា។

លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា ក៏បានឱ្យដឹងថាទោះបីជាកូវីដ១៩មិនទាន់បញ្ចប់មែនក្ដី តែយើងក៏ត្រូវតែត្រៀមខ្លួនឱ្យរួចរាល់ ដើម្បីស្វាគមន៍វិនិយោគិនបរទេសដែលនឹងត្រលប់មកកម្ពុជាវិញនៅពេលឆាប់ៗខាងមុខនេះ។

លោកបានថ្លែងបន្តថា ការត្រៀមខ្លួនមិនមែនទាល់តែវិបត្តិចប់នោះទេ គឺត្រូវត្រៀមចាប់ពីពេលនេះឱ្យរួចរាល់។ អ្វីដែលយើងត្រូវត្រៀមនោះ គឺធនធានមនុស្សទៅតាមវិស័យនីមួយៗនិងភាពស្របច្បាប់នៃការរកស៊ីនៅក្នុងប្រទេសកម្ពុជា៕