ទីផ្សារអចលនទ្រព្យនៅតំបន់អឺរ៉ុបត្រូវប៉ាន់ដោយសារពលរដ្ឋហុងកុង សម្រុកភៀសខ្លួនពីការបាតុកម្ម

ដោយៈសុខុម

ហុងកុង: ក្រុមហ៊ុនច្បាប់មួយដែលមានមូលដ្ឋាននៅក្រុងហុងកុង និយាយថា ពល​រដ្ឋហុងកុង ដែលភៀសខ្លួនទៅក្រៅប្រទេស បានទិញអចលនទ្រព្យដែលគិតជាតម្លៃសរុបយ៉ាងតិច១០០លានដុល្លារអាមេរិក ចាប់តាំងពីឆ្នាំ២០១៩ ជាឆ្នាំដែលផ្ទុះចលាចលសង្គមមិនធ្លាប់មាន។ នេះបើយោងតាមកាសែត Bangkok Post ចុះផ្សាយកាលពីថ្ងៃទី១១ សីហា។

ក្រុមហ៊ុនច្បាប់ Harvey Law Group (HLG) បានរកឃើញថា គោលដៅភៀសខ្លួនដ៏ពេញនិយមសម្រាប់ពលរដ្ឋហុងកុង មានដូចជា សហរដ្ឋអាមេរិក អង់គ្លេស អូស្ត្រាលី នូវែលសេឡង់ និងកាណាដា។ ពលរដ្ឋហុងកុង បានសម្រុកស្វែងរកទិញលំនៅដ្ឋាននៅក្រៅប្រទេស ដើម្បីទទួលបានសញ្ជាតិតាមរយៈការវិនិយោគ ហើយនិន្នាការនេះបានកើនឡើង៤ដងក្នុងរយៈពេល២ឆ្នាំចុងក្រោយនេះ។

លោក Jean-Francois Harvey ដែលជានាយកគ្រប់គ្រងទូទាំងពិភពលោក និងជាស្ថាបនិកនៃក្រុមហ៊ុនច្បាប់ខាងលើនេះបានថ្លែងថា “ពីអតិថិជនរបស់យើងទូទាំងពិភពលោកចាប់តាំងពីឆ្នាំ២០១៩ ពួកគេបានទិញអចលនទ្រព្យប្រមាណ១ពាន់លានដុល្លារអាមេរិក ក្រោមកម្មវិធីផ្ដល់សិទ្ធិជ្រកកោន ឬផ្ដល់សញ្ជាតិតាមរយៈការវិនិយោគ ហើយហុងកុង មានចំណែកប្រហែល១០%នៃចំនួននោះ”។

ចាប់តាំងពីឆ្នាំ១៩៩២ ក្រុមហ៊ុនHLG ដែលមានការិយាល័យចំនួន១៨នៅទូទាំងពិភពលោក បានបម្រើសេវាជូនអតិថិជន និងគ្រួសារប្រមាណ១២.០០០នាក់/គ្រួសារដែលបានទិញអចលនទ្រព្យ តាមរយៈកម្មវិធីផ្ដល់សិទ្ធិជ្រកកោន ឬផ្ដល់សញ្ជាតិ។

លោកបានលើកឡើងទៀតថា “តម្រូវការនេះនៅតែបន្តកើតមាន ដែលនៅមុនឆ្នាំ១៩៩៧ យើងទទួលបានអតិថិជនជាពលរដ្ឋហុងកុងក្នុងចំនួនតិចតួច ប៉ុន្តែនៅឆ្នាំ២០១៩ យើងទទួលបានច្រើនគួរឱ្យភ្ញាក់ផ្អើល គឺកើនឡើងដល់ទៅ៤ដងឯណោះ”។

រាល់ពេលដែលទីក្រុងនេះ ប្រឈមមុខនឹងវិបត្តិនយោបាយ ចំនួនពលរដ្ឋហុងកុង ដែលសាកសួរព័ត៌មាន ទិញអចលនទ្រព្យនៅក្រៅប្រទេស តែងតែមានការកើនឡើងគួរ ឱ្យកត់សម្គាល់។

ចំនួនពលរដ្ឋហុងកុង ដែលស្វែងរកលិខិតឆ្លងដែនទី២ ឬសិទ្ធិជ្រកកោននៅក្រៅប្រទេសក៏មានការកើនឡើងដែរ ក្នុងរយៈពេលប៉ុន្មានឆ្នាំមកនេះ។

តាមពិតទៅ លិខិតឆ្លងដែនហុងកុង គឺមានតម្លៃណាស់ ដោយអ្នកកាន់លិខិត​ឆ្លងដែននេះ អាចធ្វើដំណើរចេញចូលប្រទេសនានា ជុំវិញពិភពលោកដោយសេរី។ ទោះជាយ៉ាងណា ជម្រើសលិខិតឆ្លងទី២ កាន់តែពេញនិយមខ្លាំងឡើងៗ សម្រាប់ពលរដ្ឋហុងកុង បន្ទាប់ពីរដ្ឋាភិបាលក្រុងប៉េកាំង បានដាក់ចេញនូវច្បាប់សន្តិសុខជាតិ ដែលមជ្ឈដ្ឋានទូទៅមើលឃើញថា ជាការរំលោភលើសិទ្ធិស្វ័យភាពរបស់ហុងកុង និងសទ្ធិសេរីភាពពេញលេញដែលពលរដ្ឋហុងកុង ធ្លាប់តែទទួលបានក្រោមសន្ធិសញ្ញាចិន-អង់គ្លេស។ ហុងកុង កាលពីមុន ធ្លាប់ស្ថិតក្រោមនឹមអាណានិយមរបស់អង់គ្លេស។

កម្មវិធីផ្ដល់សិទ្ធិជ្រកកោន និងកម្មវិធីផ្ដល់សញ្ជាតិ តាមរយៈការវិនិយោគនៅក្រៅប្រទេស ក៏បានធ្វើឱ្យទីផ្សារអចលនទ្រព្យប្រភេទលំនៅដ្ឋាន នៃប្រទេសជាគោលដៅទទួលបានកំណើនគួរឱ្យកត់សម្គាល់ផងដែរ ព្រោះការទិញអចលនទ្រព្យ ជាវិធីតែមួយគត់ដើម្បីទទួលបានការអនុញ្ញាតឱ្យស្នាក់នៅក្នុងប្រទេសមួយ។

ពលរដ្ឋហុងកុង ប្រមាណ៥០.០០០នាក់ បានជ្រើសរើសចាកចេញពីទីក្រុងហុងកុងជាអចិន្ត្រៃនៅក្នុងឆ្នាំ២០២០។ នេះបើយោងតាមក្រុមហ៊ុនមានមូលដ្ឋាន នៅប្រទេសអង់គ្លេស ឈ្មោះ Astons ដែលជួយអតិថិជនទិញអចលនទ្រព្យ និងទទួលបានសិទ្ធិជ្រកកោន និងសញ្ជាតិតាមរយៈការវិនិយោគ៕

កំពង់ផែទេសចរណ៍កោទន្សាយខេត្តកែបតម្លៃជាង១លានដុល្លារនឹងជួយជំរុញកំណើនសេដ្ឋកិច្ច

ដោយៈ ម៉ាណេត

ភ្នំពេញៈ អភិបាលខេត្តកែប បានជំរុញការសាងសង់កំពង់ផែទេសចរណ៍កោះទន្សាយ ដើម្បីផ្តល់កំណើនដល់សេដ្ឋកិច្ចក្នុងមូលដ្ឋាន និងជីវភាពរស់នៅរបស់ប្រជាពលរដ្ឋនៅក្នុងខេត្តកែប។

លោកសោម ពិសិដ្ឋ អភិបាលខេត្តកែប មានថ្លែងនៅរសៀលថ្ងៃទី១២ ខែសីហា ឆ្នាំ២០២១ នេះថា គម្រោងការសាងសង់កំពង់ផែទេសចរណ៍កោះទន្សាយ បានបើកដំណើរការសាងសង់ កាលពីចុងឆ្នាំ២០១៨ កន្លងមក សម្រាប់បម្រើដល់វិស័យទេសចរណ៍ ដែលមានលទ្ធភាព អាចទទួលចតនាវាដែលអាចផ្ទុក អ្នកដំណើរបានក្រោម៣០០នាក់ ចំពោះទំនិញផ្សេងៗ អាចដឹកបានតែតិចតួចប៉ុណ្ណោះ ព្រោះកំពង់ផែនេះមិនអាចទទួលនាវាលើសពី១៥តោនបាននោះទេ។

លោកមបញ្ជាក់ថា “គម្រោងសាងសង់កំពង់ផែកោះទន្សាយ មិនបានពន្យារពេលនោះទេ គឺបន្តការសាងសង់តាមដំណាក់កាល និងពេលវេលា ដែលមាននៅក្នុងគម្រោងថវិកាជាតិយ៉ាងត្រឹមត្រូវ”។

លោកបានថ្លែងបន្តថា សម្រាប់ការសាងសង់កំពង់ផែទេសចរណ៍កោះទន្សាយ គឺស្ថិតនៅលើ ទីតាំងផែចាស់ ស្ថិតក្នុង ភូមិកែប សង្កាត់កែប ក្រុងកែប ខេត្តកែប ដែលមានសណ្ឋានជា រូបក្តាម មានចម្ងាយ ពីដីគោក ចូលទៅក្នុងសមុទ្រប្រមាណ៣០៦ម៉ែត្រ ទទឹង ៦៨ម៉ែត្រ មានផ្ទៃក្រឡា សរុបប្រមាណជិត៥ពាន់ម៉ែត្រការ៉េ ប្រើប្រាស់ថវិកាសាងសង់សរុបជិត៥ពាន់លានរៀល (១,២លានដុល្លារ)។

លោកបន្តថា កំពង់ផែកោះទន្សាយនេះ ជាសមិទ្ធផលថ្មីមួយទៀត របស់រាជរដ្ឋាភិបាលដែលអនុវត្តន៌គម្រោងសាងសង់ដោយក្រសួងសាធារណៈការ និងដឹកជញ្ជូន ដោយសង្ឃឹមថា នឹងអាចផ្តល់កំណើនដល់សេដ្ឋកិច្ចក្នុងមូលដ្ឋាន និងជីវភាពរស់នៅរបស់បងប្អូនប្រជាពលរដ្ឋនៅក្នុងខេត្តកែបផងដែរ។ កំពងផែទេសចរណ៍កោះទន្សាយ សាងសង់បានប្រមាណជា ៧០% ហើយនិងអាចដាក់អោយប្រើប្រាស់ជាបណ្ណោះអាសន្ន ក្នុងរយៈពេល៣ខែទៀត ក្នុងឆ្នាំ២០២១នេះ។

លោកអភិបាលខេត្តកែប បានជំរុញដល់ក្រុមហ៊ុនដែលទទួលការសាងសង់ ត្រូវព ន្លឿនការសាងសង់ កំពង់ផែទេសចរណ៍កោះទន្សាយនេះ អោយបានទាន់ពេលវេលា និងត្រូវចូលរួមអនុវត្តវិធានការ៣កុំ ៣ការពារ អោយបានជាប់ជាប្រចាំ៕

តើការបង្កើតក្រុងរណបជួយអ្វីខ្លះដល់វិស័យអចលនទ្រព្យ?

ដោយៈ ប៊ី

ភ្នំពេញៈ ការអភិវឌ្ឍន៍ទីក្រុងរណប មានការរីកចម្រើនយ៉ាងខ្លាំងណាស់ នៅក្នុងប្រទេសយើង ពិសេសក្នុងទីក្រុងភ្នំពេញ ដោយគម្រោងទាំងនេះមានចំណុចល្អច្រើន ស្ទើរតែទាំងអស់ ទាំងផ្នែកហេដ្ឋារចនាសម្ព័ន្ធដែលចូលរួមអភិវឌ្ឍន៍ ជាមួយរដ្ឋាភិបាលបានមួយផ្នែកធំ ការចូលរួមលើកកម្ពស់នៅក្នុងវិស័យសំណង់ និងអចលនទ្រព្យ ក៏ដូចជាការចូលរួមទៅលើផ្នែកបច្ចេកវិទ្យានៃសំណង់សម័យថ្មីផងដែរ។

គម្រោងទីក្រុងរណប ត្រូវបានគាំទ្រដោយរាជរដ្ឋាភិបាល ដើម្បីកាត់បន្ថយនូវភាពកកកុញនៃចំនួនមនុស្សដែលរស់នៅផ្តុំគ្នា ដោយគម្រោងអភិវឌ្ឍន៍ទីក្រុងរណបនីមួយៗ បានធ្វើឡើងដើម្បីបង្កើនភាពទាក់ទាញ និងចាប់អារម្មណ៍ ឱ្យមានមនុស្សចូលទៅរស់នៅកាន់តែច្រើន ក្រៅពីមានលក្ខណៈប្រសើរនៃហេដ្ឋារចនាសម្ព័ន្ធ មានផាសុកភាពខ្ពស់ក្នុងការរស់នៅជាមួយនឹងធម្មជាតិ នៅក្នុងគម្រោងក៏ត្រូវមានរួមបញ្ចូល នូវការអភិវឌ្ឍន៍តំបន់ពាណិជ្ជកម្ម អគាររដ្ឋបាល តំបន់កម្សាន្ត មជ្ឈមណ្ឌលពាណិជ្ជកម្ម ផ្សារទំនើប ក្លឹបហាត់បា្រណ សួនឧស្សាហកម្ម សាលារៀន មន្ទីរពេទ្យ និងសេវាសាធារណៈផ្សេងៗទៀត។

ការបង្កើតទីក្រុងរណបនៅតាមបណ្តាជាយក្រុង គឺជាការរួមចំណែកយ៉ាងប្រសើរ ជាមួយរាជរដ្ឋាភិបាល ដែលអាចជួយសម្រួល និងលើកកម្ពស់ដល់នគរូបនីយកម្មបានមួយចំណែកធំ។

អ្នកជំនាញបានលើកឡើថា ការដែលរាជរដ្ឋាភិបាលកម្ពុជា បានសម្រេចចិត្តបង្កើតឲ្យមានការអភិវឌ្ឍទីក្រុងរណប នៅជុំវិញរាជធានីភ្នំពេញនេះឡើង គឺជាជំនួយដ៏ល្អប្រសើរបំផុត ដើម្បីកាត់បន្ថយការកកស្ទះចរាចរណ៍នៅកណ្តាលរាជធានីភ្នំពេញ។

នៅពេលដែលមានការបែងចែក តំបន់ក្រុងផ្សេងគ្នាកាន់តែច្រើន វានឹងចូលរួមសម្រួលដល់សង្គមកាន់តែច្រើន ជាក់ស្ដែងដូចជាបញ្ហាកកស្ទះចរាចរណ៍ ត្រូវបានកាត់បន្ថយច្រើន ដោយសារតែនៅក្នុងទីក្រុងរណប ភាគច្រើនសុទ្ធតែមានបង្កើតជាតំបន់ពា ណិជ្ជកម្មទាំងអស់ ដែលអ្នករស់នៅអាចធ្វើការបង្វែរគោលដៅទីតាំងអាជីវកម្ម ក៏ដូចជាកន្លែងការងារជាដើម។

គ្រប់គម្រោងទីក្រុងរណប ក្ដាប់មូលហេតុហេតុធំ ដើម្បីបញ្ចៀសបញ្ហាប្រឈមនៅថ្ងៃអនាគត ក្រុមហ៊ុនអភិវឌ្ឍន៍ ត្រូវតែមានផែនការមេឱ្យបានច្បាស់លាស់ ទាំងការអភិវឌ្ឍន៍នៅពេលបច្ចុប្បន្ន ក៏ដូចជាបន្តទៅថ្ងៃអនាគតក្នុងរយៈពេលវែង ដែលក្រៅពីគិតទៅលើការកសាងហេដ្ឋារចនាសម្ព័ន្ធ ត្រូវគិតទៅលើការបង្កើត និថែរក្សាតំបន់បៃតងឱ្យបានច្រើន ដែលជាចំណែកមួយយ៉ាងសំខាន់ក្នុងការរស់នៅ។

នាពេលបច្ចុប្បន្ន មានទីក្រុងរណបលេចធ្លោមួយចំនួន ដូចជា ទីក្រុងរណបកាំកូស៊ីធី ទីក្រុង ទីក្រុងរណបកោះពេជ្រ ទីក្រុងរណបជ្រោយចង្វារ «ទីក្រុងនៃអនាគត» ទីក្រុងរណប អ៊ឹង ស៊ីធី (ING City)ជាដើម៕

សូចនាករៈសិក្សាលើមូលដ្ឋានទាំងនេះមុនចាប់ផ្តើមវិនិយោគលើសំណង់ និងអចលនទ្រព្យដទៃទៀត

ដោយៈស៊ីវ​ ម៉េង

ភ្នំពេញៈ ការឈានជើងចូលប្រឡូកក្នុងវិស័យអចលនទ្រព្យ ទាំងការអភិវឌ្ឍន៍សំណង់នានា និងផ្នែកដទៃទៀតនៃអចលនទ្រព្យ ទាមទារនូវចំណេះដឹងមូលដ្ឋានមួយច្បាស់លាស់ ដើម្បីបញ្ចៀសហានិភ័យនាពេលអនាគត។

ព្រោះការវិនិយោគក្នុងវិស័យមួយនេះ មានហានិភ័យខ្ពស់ ហេតុនេះអ្នកជំនាញអន្តរជាតិបានស្នើ ឲ្យអ្នកដែលត្រៀមប្រឡូក ឬបោះទុនវិនិយោគលើ វិស័យនេះត្រូវមើលលើចំណុចសំខាន់ៗចំនូន៩។

លោកស្រីអាន សុធីតា អ្នកជំនាញផ្នែកអចលនទ្រព្យ លំដាប់អន្តរជាតិ បានចែករំលែកថា មុននឹង សម្រេចចិត្តរកស៊ីលើអចលនទ្រព្យទ្រង់ទ្រាយធំ ឬតូច អ្នកវិនិយោគត្រូវសិក្សាលើចំណុចសំខាន់ៗទាំង៩នេះដូចជា

ទី១  ជ្រើសរើសក្រុមអ្នកច្បាប់
មេធាវិគឺជាបុគ្គលដែលសំខាន់ ជាពិសេសមេធាវី ដែលធ្វើការផ្នែកអចលនទ្រព្យតែម្ដង ព្រោះថាមិន មែនមេធាវីណា ក៏អាចផ្ដល់ប្រឹក្សាអំពីការវិនិយោគ លើវិស័យអចលនទ្រព្យបាននោះទេ។ ម្យ៉ាងទៀតមេធាវី ដែលជំនាញខាងអចលនទ្រព្យអាច ចងក្រងកិច្ចសន្យាមួយ ដែលការពារអត្ថប្រយោជន៍ អ្នកវិនិយោគ។

ទី២  ជ្រើសរើសក្រុមការងារផ្នែកគណនេយ្យ និងពន្ឋដា
បច្ចុប្បន្នពន្ធលើអចលនទ្រព្យគឺជារឿងសំខាន់មួយ ព្រោះវាមានភាពស្មុគស្មាញដែលទាមទារឲ្យផ្នែកគណនេយ្យ គិតគូរឲ្យបានច្បាស់លាស់ ធ្វើយ៉ាងណាសន្សំ សំចៃផ្នែកពន្ធឲ្យអស់តិចបំផុត។

ទី៣ គឺជ្រើសរើសអ្នកជំនាញស្រាវជ្រាវទីតាំងដី
អ្នកជំនាញស្រាវជ្រាវទីតាំងដី គឺអាចជួយឲ្យអ្នក វិនិយោគបានដឹងថា អចលនទ្រព្យដែលត្រូវវិនិយោគ នោះមានហានិភ័យឬទេ ហើយអ្នកជំនាញក៏អាចជួយ អ្នកវិនិយោគពិនិត្យអគារថាតើអគារ ដែលវិនិយោគ ហើយនោះអាចប្រើប្រាស់បាន ដោយមិនមានបញ្ហា ឬយ៉ាងណា។

ម្យ៉ាងទៀតអ្នកជំនាញស្រាវជ្រាវដី ក៏អាចដឹថាដីដែល វិនិយោគ នោះអាចប្រើប្រាស់បានទៅលើអ្វីខ្លះ ឧទាហរណ៍ដូចជា សង់អគារ ធ្វើកសិកម្ម។ល។

ទី៤ ភ្នាក់ងារអចលនទ្រព្យ
ភ្នាក់ងារអចលនទ្រព្យ គឺអាចជួយវិនិយោគិន ក្នុងការសិក្សាពីតម្លៃអចលនទ្រព្យថាតើការទិញមកថ្លៃពេកទេ លក់ទៅវិញថោក ឬថ្លៃពេកជាងទីផ្សារពេកទេ។ជាមួយគ្នានេះភ្នាក់ងារអចលនទ្រព្យ អាចវាយតម្លៃ ពីតម្រូវការអចលនទ្រព្យថា អតិថិជនត្រូវការ អចលនទ្រព្យប្រភេទណា?។ តើការផ្គត់ផ្គង់   ឬលើសតម្រូវការនៅក្នុង​ទីផ្សារ។
ចំនុចសំខាន់មួយទៀត ភ្នាក់ងារអចលនទ្រព្យ អាចវាយតម្លៃបានថា ការវិនិយោគនោះបានប្រាក់ ចំនេញឆ្លើយតបជាមួយអ្នកវិនិយោគឬទេ។

ទី៥ ស្ថាបត្យករ
អ្នកវិនិយោគគឺទាមទារជ្រើសរើសស្ថាបត្យករ ដែលមានជំនាញច្បាស់លាស់ អាចរចនាម៉ូត អគារដែលត្រូវជាមួយទីផ្សារ ដែលត្រូវនឹង រសនិយមរបស់អតិថិជន ព្រមទាំងងាយស្រួល ដល់វិស្វករ។

ទី៦ វិស្វករ
ការងាររបស់វិស្វករគឺជាការងារ ដែលអ្នកវិនិយោគ មិនអាចមើលឃើញ ដូចជាប្រព័ន្ធទឹក ប្រព័ន្ធភ្លើង ប្រព័ន្ធលូ ព្រោះថាការរស់នៅក្នុងអគារ ឬសំណង់ មួយប្រព័ន្ធទាំងអស់នេះគឺពិតជាសំខាន់។

ទី៧ ការជ្រើសរើសក្រុមហ៊ុនសំណង់
ក្រុមហ៊ុនសំណង់គឺមានជំនាញខុសៗគ្នា ខ្លះជំនាញ សង់អគារខ្ពស់ ខ្លះជំនាញសង់​ផ្ទះល្វែង ដូច្នេះត្រូវចេះ ជ្រើសរើសក្រុមហ៊ុនសំណង់ណា ដែលត្រូវនឹង គម្រោងដែលវិនិយោគ។

ទី៨ ផ្នែកធនាគារជាដៃគូ
អ្នកវិនិយោគត្រូវសិក្សាថា តើធនាគារណាដែលផ្ដល់ កម្ចីងាយស្រួល ដល់អ្នកវិនិយោគជាមួយនឹងការប្រាក់ សមរម្យ និងមានភាពបត់បែនលើលំហូរឥណទាន របស់ពួកគេ។

ទី៩ ក្រុមហ៊ុនធានារ៉ាប់រង
អ្នកវិនិយោគត្រូវជ្រើសក្រុមហ៊ុនបែបណា ដែលមានទំនួលខុសត្រូវខ្ពស់ ហើយត្រូវដឹងថាតើអគារ ដែល យើងសាងសង់នោះ ទាមទារធានារ៉ាប់រងអ្វីខ្លះ និង ចំណាយបែបណា ដើម្បីយកមកប្រៀបធៀបគ្នាពីតម្លៃ នៃការទិញធានារ៉ាប់រង ព្រោះគម្រោងដែលមានការ ធនារ៉ាប់រងច្បាស់លាស់ ជាគំរោងដែលតែងតែ ផ្តល់ទំនុកចិត្តដល់អតិថិជន៕

តើអ្នកណាជាស្ថាបត្យករសំណង់ផ្សារធំថ្មីកណ្ដាលរាជធានីភ្នំពេញ?

ដោយៈវឌ្ឍនៈ

ភ្នំពេញៈ ស្ថាបត្យកម្មផ្សារធំថ្មី (Central Market) មានលក្ខណៈពិសេសបំផុត បើគិតពីភាពច្នៃប្រឌិត និងសំណង់ស្ថាបត្យកម្ម ប៉ុន្តែមនុស្សមិនច្រើនទេ ដែលបានដឹងថាតើអ្នកណាជាអ្នកគូរប្លង់ផ្សារ ដ៏មានកិត្យានុភាពនេះ។

សំណង់ផ្សារធំថ្មីអាចចាត់ទុកជាបេតិកភ័ណ្ឌប្រវត្តិសាស្រ្តមួយ ដែលបានកសាងតាំងពីជំនាន់កម្ពុជា ស្ថិតនៅក្រោមអាណានិគមបារាំង គឺអំឡុងឆ្នាំ១៩៣៥ ហើយគិតមកដល់ពេលនេះ វាមានអាយុកាលជិត៩០ឆ្នាំហើយយ តែនៅតែមានលក្ខណៈរឹងមាំ មិនចាញ់សំណង់ថ្មីៗទើបកសាងឡើយ។

តើស្ថាបត្យករ ដែលបានគូរប្លង់អគារដ៏ល្អេកមួយនេះអ្នកណា? ទើបធ្វើឱ្យសំណង់មួយនេះបានក្លាយជាទីចាប់អារម្មណ៍រហូតមកដល់ពេលនេះ?។

យោងតាមសៀវភៅប្រវត្តិសាស្ត្រមួយ ដែលបានកត់ទុកបានបញ្ជាក់ថា សំណង់ផ្សារធំថ្មី ត្រូវបានកសាងឡើងនៅក្នុងអំឡុងបារាំងត្រួតត្រាកម្ពុជា ហើយទីតាំងសំណង់មួយនេះ គឺជាបឹងដ៏ធំមួយ ដែលគេហៅឈ្មោះថា “បឹងតេជោ” ដែលពលរដ្ឋជំនាន់នោះ បានជីកយកទៅចាក់បំពេញ នៅតំបន់ជុំវិញវត្តភ្នំឱ្យបានខ្ពស់ និងចាក់បំពេញនៅព្រះបរមរាជវាំងឱ្យរាបស្មើកុំឱ្យទឹកលិច។ ក្រោយមកបារាំង បានចាក់ដីលុបទាំងស្រុងទៅលើទីតាំងបឹងនោះ ដើម្បីសាងសង់ផ្សារធំថ្មីនេះ ។

ក្នុងឯកសារប្រវត្តិសាស្ត្រ បានសរសេរថាសំណង់ផ្សារធំថ្មី ត្រូវបានសាងសង់ឡើងដោយស្ថាបត្យករ ជនជាតិបារាំងមួយរូបគឺលោកសង់ ដឺប៊រស៍ (Jean Desbois )។ លោក Jean Desbois បានកើតនៅថ្ងៃទី២៥ ខែសីហា ឆ្នាំ១៨៩១ នៅប្រទេសបារាំង ។

លោកបានសិក្សាជំនាញឯកទេស ពីស្ថាបត្យករដ៏ល្បីឈ្មោះ គឺលោកល្វីសបឺញេ និងលោកអេម៉ាណូអេល ប៉ុនត្រេម៉ូលី នៅទីក្រុងបារីសប្រទេសបារាំង រហូតបានបញ្ចប់ការសិក្សានៅក្នុងឆ្នាំ១៩២០ និងធ្លាប់ទទួលបានមេដាយរចនាប្លង់ ក្នុងជ័យលាភីលេខ ២។

លោកបានបំពេញការងារជាស្ថាបត្យករ នៅក្នុងទីក្រុងបារីសចាប់ពីឆ្នាំ១៩២០ ដល់ឆ្នាំ១៩២២ បន្ទាប់មកលោកបានដាក់ពាក្យធ្វើការនៅតំបន់ឥណ្ឌូចិន ក្ន្នងផ្នែកសាធារ​ណ​ការ តាមសំណើរទីភ្នាក់ងារសេដ្ឋកិច្ច នៃអគ្គទេសាភិបាលឥណ្ឌូចិន ប្រចាំទីក្រុងបារីស ។

នៅថ្ងៃទី១០ មីនា១៩២២ លោកបានចុះមកធ្វើការនៅប្រទេសកម្ពុជា ហើយនៅអំឡុងពេលលោកធ្វើការក្នុងប្រទេសកម្ពុជា លោករចនាប្លង់សំណង់ផ្សារធំថ្មី មុនពេលលោកផ្លាស់ចេញ ទៅធ្វើការនៅប្រទេសអាណាម (ប្រទេសវៀតណាមបច្ចុប្បន្ន ) ។

ផ្សារធំថ្មី ត្រូវបានជនជាតិបរទេសនិយមហៅថា Central Market តែមិនមែនផ្សារកណ្ដាលនៅក្បែរវត្តឧណ្ណាឡោមនោះទេ ។ ផ្សារនេះ បានក្លាយជាកន្លែងទេសចរណ៍របស់ជនបរទេសផង និងក្លាយជាមជ្ឈមណ្ឌលពាណិជ្ជកម្មដ៏សំខាន់មួយ នៅរាជធានីភ្នំពេញផងដែរ ។

កាលពីអំឡុងឆ្នាំ២០១០ផ្សារនេះ ក៏ត្រូវបារាំងជួយជួសជុលឡើងវិញ ដើម្បីកែលម្អសោភ័ណភាព ឱ្យស្រស់ស្អាតនិងដើម្បីទាក់ទាញ ភ្ញៀវទេសចរជាតិនិងអន្តរជាតិ និងដាក់ដំណើរការឡើងវិញ នៅអំឡុងឆ្នាំ២០១១ ។ រហូតមកដល់បច្ចុប្បន្ន (មុនពេលមានវិបត្តិកូវីដ) ផ្សារធំថ្មីមានភាពអ៊ូរអរមានសកម្មភាពមមាញឹក មនុស្សម្នាចេញចូលទិញ ទំនិញនិងទស្សនាបីដូចជាផ្សារទំនើបអ៊ីចឹងដែរ៕

លោកយិន លាងគង់ៈអ្នកអានព៌តមាន និងសៀវភៅជាប្រចាំ ជាអ្នកតែងតែលេចធ្លោជាងគេក្នុងសង្គម

ដោយៈគង់ សូរិយា

ភ្នំពេញៈ អ្នកដែលនិយមះអានព៌តមាន និងសៀវភៅប្រចាំថ្ងៃ តែងតែជាបុគ្គលលេចធ្លោក្នុងការងារ ក្នុងមុខជំនួញ ក៏ដូចជានៅទិដ្ឋភាពផ្សេងទៀតនៃសង្គម។ នេះបើតាម​ការអះអាងរបស់លោកយិន លាងគង់។

ជាសហស្ថាបនិកនិងជាអគ្គនាយក នៃគេហទំព័រ Propertyarea.asia និងគេហទំព័រ Cambodiafinancialtimes.com លោកយិន លាងគង់បានមានប្រសាសន៍៍ឲ្យដឹងកាលពីរសៀលថហងៃទី១២ សីហាកន្លងមកថា ដោយសារមានចំណូលចិត្តស្រលាញ់់ការអាន និងការតែងនិពន្ឋ លោកយល់ថា “គុណតម្លៃនៃជីវិត គឺការផ្តល់ និងចែករំលែកចំណេះដឹង ដល់ប្រជាពលរដ្ឋរួមជំនាន់ និងជំនាន់ក្រោយ”។

លោកបន្តថា “មនុស្សចូលចិត្តអានសៀវភៅ អានព៌តមានប្រចាំាំថ្ងៃ គឺជាមនុស្សពោរពេញដោយភាពច្នៃប្រឌិត និងជាមនុស្សមានចំណេះដឹងទូលំទូលាយ និងពោរពេញដោយគតិបណ្ឌិត”។លោកបន្តថា “មនុស្សចូលចិត្តអានព៌តមាន អានសៀវភៅ ក៏ជាមនុស្សដែលមានការគិត វិភាគ ពិចារណាគ្រប់ជ្រុងជ្រោយ (critical thinking) ផងដែរលើបញ្ហាអ្វីមួយ”។

លោកយិន លាងគង់បានបន្តដោយលើកជាឧទាហរណ៍៍ថា ជនជាតិអ៊ីស្រាអ៊ែលជាជនជាតិ ដែលគេចាត់ទុកជាមនុស្សឆ្លាតបំផុតលើពិភពលោក មូលហេតុដោយសារពួកគេ​ចូលចិត្តអានសៀវភៅ ហើយអំណោយដែលពួកគេជូនគ្នាទៅវិញទៅមកគឺជាសៀវភៅ។លោកបន្តថា មេដឹកនាំអ៊ីស្រាអ៊ែលបាននិយាយថា ជនជាតិណាទិញជនជាតិអ៊ីស្រាអ៊ែលម្នាក់បាន លោកនឹងឲ្យប្រទេសអ៊ីស្រាអ៊ែលទាំងមូល។

ដោយប្រឡូកក្នុងអាជីពសារព៌តមានរយៈពេលជាង២០ឆ្នាំ លោកយិន លាងគង់ មិនត្រឹមតែជាអ្នកនិពន្ឋផ្នែកសារព៌តមាននោះទេ ប៉ុន្តែលោកជាអ្នកនិពន្ឋមួយរូបផងដែរ ដោយលោកធ្លាប់និពន្ឋប្រលោកលោករឿង “ថ្ងៃរះពីទិសខាងលិច” ជាប់លេខ៤ទូទាំងប្រ​ទេ​ស ក្នុងពានរង្វាន់៧មករា លោកនិពន្ឋល្ខោននិយាយ” រឿងរកាខ្នុរ​ចំណោទស្នេហ៍” រឿង “អូនជាស្រមោលបង”ដែលបានចាក់ផ្សាយក្នុងវិទ្យុ FM99Mzh វិទ្យុជាតិកម្ពុជាជាដើម។

លោកបានថ្លែងថា “សារៈប្រយោជន៍នៃការអានសៀវវភៅ និងការសិក្សាពីមនុស្សជុំវិញខ្លួន ពិតធ្វើឲ្យជីវិតរបស់អ្នកមានមានគុណវុឌ្ឍិ និងស៊ីវិល័យ ដោយ​សារអ្នកបានរួមចំណែកយ៉ាងច្រើនដើម្បីជួយខ្លួនឯង និងសង្គម”។ លោកបន្តថា “មនុស្សជោគជ័យ និងមានគុណតម្លៃជីវិតពិតប្រាកដ គឺជាអ្នកអានច្រើន ស្រាវជ្រាវច្រើន ចែករំលែកដល់សង្គមច្រើន មិនមែនមានលុយច្រើនតែម្យ៉ាងនោះទេ”។

លោកបន្តថា “ហេតុនេះការអានច្រើន ស្តាប់ច្រើន សង្កេតច្រើន និងសិក្សាពីបរិស្ថានជំវិញខ្លួន នឹងធ្វើឲ្យអ្នកមានមូលដ្ឋានពិចារណាគ្រប់ជ្រុងជ្រោយ ធ្វើឲ្យអ្នកអាចឈានឡើ​ងនិងលេចមុខក្នុងសង្គម និងអាចមានឳកាសច្រើនចែករំលែកចំណេះដឹង បទពិសោធន៍ទៅអ្នកជំនាន់ក្រោយរបស់អ្នក។

តើពេញចិត្តនឹងជីវិតមានគុណតម្លៃ និងភាពស៊ីវិល័យឬទេ សូមចាប់់ផ្តើមអាន ស្រ​លាញ់ការអាន និងស្តាប់ឲ្យបានច្រើនតាមដែលអាចធ្វើទៅបាន ជាជាងយកពេលវេលាទៅអង្គុយនិយាយពីអ្នកណាម្នាក់ ដែលអ្នកមិនចូលចិត្ត។លោកយិន លាងគង់បញ្ជាក់៕

លោកវង្សី វិស្សុតៈ កម្ពុជាដាក់ចេញគោលដៅរយៈពេល១៥ឆ្នាំដើម្បីសម្រេចឱ្យបាននូវសង្គមឌីជីថល

ដោយៈ ប៊ី

ភ្នំពេញៈ ការប្រើប្រាស់បច្ចេកវិទ្យាក្នុងវិស័យសេដ្ឋកិច្ចនៅកម្ពុជាទាំងឯកជន និងរដ្ឋនៅមានកម្រិតទាបនៅឡើយ ខណៈកម្ពុជាបានដាក់គោលដៅ រយៈពេល១៥ឆ្នាំ ដើម្បីសម្រេចឱ្យបាននូវសង្គមឌីជីថល។ នេះបើយោងតាមការលើកឡើងរបស់លោកបណ្ឌិតវង្សី វិស្សុតរដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១២ ខែសីហា ឆ្នាំ២០២១នេះ។

លោកបណ្ឌិតវង្សី វិស្សុតបានលើកឡើងដូច្ននេះ ក្នុងការអញ្ជើញចូលរួមថ្លែងបាឋកថាពិសេស ស្ដីពី “យុវជន និងសង្គមឌីជីថល” ក្នុងកម្មវិធី ជជែកដេញដោល យុវជនថ្នាក់ជាតិ២០២១ ដែលរៀបចំដោយក្រសួងអប់រំ យុវជន និងកីឡា នាព្រឹកថ្ងៃទី១២ ខែសីហា ឆ្នាំ២០២១នេះ តាមរយៈប្រព័ន្ធអនឡាញ។

លោកបណ្ឌិតបានបញ្ជាក់ថា ការប្រើប្រាស់បច្ចេកវិទ្យា ក្នុងវិស័យសេដ្ឋកិច្ច សម្រាប់រដ្ឋាភិបាល មានក្នុងកម្រិតទាប ជាពិសេសក្នុងវិស័យធុរកិច្ច ហេតុអីមិនប្រើប្រាស់បច្ចេកវិទ្យា […] តិចមែនទែន វិស័យសេដ្ឋកិច្ចនៅកម្ពុជា ដែលប្រើប្រាស់បច្ចេកវិទ្យា រដ្ឋក៏ដូចគ្នាតិចមែនទែន។

លោកបណ្ឌិតបានលើកឡើងថា បញ្ហានេះ គឺជាបញ្ហាក្របខណ្ឌគោលនយោបាយ និងបរិយាកាសសង្គម ដែលកម្ពុជាត្រូវរកគន្លឹះ គាស់ឲ្យឃើញថា តើអ្វីទៅជាគន្លឹះ ដើម្បីឲ្យរដ្ឋ និងវិស័យឯកជន វិស័យធុរកិច្ច ប្រើប្រាស់បច្ចេកវិទ្យា។

លោកបណ្ឌិតបានឲ្យដឹងទៀតថា ដើម្បីសម្រេចឲ្យបាននូវបញ្ហានេះ រាជរដ្ឋាភិបាលត្រូវតែដើរតួរនាទីដ៏សំខាន់ ក្នុងការដឹកមុខនាំមុខគេ ក្នុងការកសាងរដ្ឋាភិបាលឌីជីថល ដើម្បីឲ្យមានវឌ្ឍនភាព ក្នុងការទទួលយកនូវការអនុម័តវិស័យឌីជីថល ក្នុងវិស័យទាំងអស់។

មន្ដ្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ឲ្យដឹងថា សង្គមឌីជីថល គឺជាសង្គមស៊ីវិល័យ ដែលមានបច្ចេកវិទ្យាឌីជីថល ដើរតួរសំខាន់ ក្នុងសេដ្ឋកិច្ច ធុរកិច្ច មុខរបរ ការងារ ក៏ដូចជាការប្រាស្រ័យទាក់ទងសង្គម និងការទទួលបាននូវសេវាសាធារណៈផ្សេងៗ ពាក់ព័ន្ធនឹងជីវិត និងការងារ។

លោកបណ្ឌិតបានឲ្យដឹងដូច្នេះថា “កម្ពុជាបានដាក់គោលដៅ រយៈពេល១៥ឆ្នាំ ដើម្បីសម្រេចឲ្យបាននូវសង្គមឌីជីថល ប៉ុន្ដែលោកគិតថា កម្ពុជាត្រូវការពេល យូរជាងនេះ ដោយមិនតិចជាង៣០ឆ្នាំទេ ដើម្បីដើរដល់សង្គមឌីជីថល ក្នុងកម្រិតខ្ពស់”។

ទន្ទឹមគ្នានេះ លោកបណ្ឌិតបានបញ្ជាក់ដែរថា កម្ពុជាមិនមែនចាប់ផ្ដើមពីសូន្យឡើយ ក្នុងការកសាងសង្គមឌីជីថន ដោយកម្ពុជា បានចាប់ផ្ដើមក្នុងកម្រិតមួយហើយ។

លោកបណ្ឌិតវង្សី វិស្សុតបានឱ្យដឹងថា ក្នុងសង្គមកម្ពុជា នាពេលបច្ចុប្បន្ន មានអ្នកប្រើទូរស័ព្ទជាង១០០ភាគរយ និងអ្នកប្រើប្រាស់សេវាអ៊ីនធឺណែន ប្រមាណ៨០ភាគរយ ប៉ុន្ដែភាគច្រើន ប្រើប្រាស់អ៊ីនធឺណែន ក្នុងការលេងកំសាន្ដ ដោយមិនមែនប្រើប្រាស់សម្រាប់ធ្វើការងារ និងសេវាកម្មអ្វីមួយនោះឡើយ៕

អ្នកឧកញ៉ាគិត ម៉េងបង្ហាញមូលដ្ឋានគ្រឹះចំនួនបីដើម្បីធ្វើឱ្យអាជីវកម្មដំណើរការទៅមុខ

ដោយៈ សាវុធ

ភ្នំពេញៈ អ្នកឧកញ៉ាគិត ម៉េងប្រធានសភាពាណិជ្ជកម្មកម្ពុជា និងជាអគ្គនាយកក្រុមហ៊ុន រ៉ូយ៉ាល់ គ្រុប នៅថ្ងៃនេះ ចែករំលែកបទពិសោធន៍ និងមូលដ្ឋានគ្រឹះចំនួនបី ដើម្បីធ្វើឱ្យអាជីវកម្មដំណើរការទៅមុខ។

អ្នកឧកញ៉ា បានរៀបរាប់លើបណ្តាញសង្គម នៅថ្ងៃទី១២ ខែសីហា ឆ្នាំ២០២១នេះថា “ថ្ងៃនេះ ខ្ញុំសូមចែករំលែកបទពិសោធន៍តិចតួចរបស់ខ្ញុំ។ ការចាប់ផ្តើមអាជីវកម្មអាចជាបទពិសោធន៍ដ៏ពិបាក ប៉ុន្តែខ្ញុំជឿជាក់លើមូលដ្ឋានគ្រឹះចំនួនបី ដើម្បីធ្វើឱ្យអាជីវកម្មដំណើរការទៅមុខ – ចក្ខុវិស័យ ការផ្តល់ឱ្យ និងភាពជឿទុកចិត្ត។

១. ចាប់ផ្តើមជាមួយចក្ខុវិស័យ – ជារឿងល្អដែលមានក្តីសុបិនខ្ពស់ និងការប្រាថ្នាធំ ហើយគិតឱ្យបានជ្រៅ។ ចក្ខុវិស័យរបស់អ្នកមិនត្រឹមតែសំដៅលើការរកប្រាក់ចំណេញប៉ុណ្ណោះទេ ប៉ុន្តែក៏ជាចក្ខុវិស័យមួយដើម្បីសម្រួល ឬធ្វើឱ្យជីវិតអ្នកដទៃប្រសើរឡើង។

ជិត៣០ឆ្នាំមុន ក្នុងនាមខ្ញុំជាយុវជនខ្មែរ ខ្ញុំបានត្រលប់មកប្រទេសកម្ពុជាវិញ ជាមួយនឹងក្តីសុបិនដ៏មានមហិច្ឆតាមួយ ដើម្បីជួយលើកស្ទួយជីវភាពប្រជាជនកម្ពុជា។ ថ្ងៃនេះខ្ញុំមានទស្សនៈដូចគ្នា ហើយនៅតែបន្តខិតខំធ្វើឱ្យវាក្លាយជាការពិត។

២. រក្សាការសន្យា – សុចរិតភាពគឺជាលក្ខណៈយ៉ាងសំខាន់និងចាំបាច់។ សូមចងចាំថាការចាប់ផ្តើមអាជីវកម្មរបស់អ្នកត្រូវបានបង្កើតឡើងដោយការជឿទុកចិត្ត គុណធម៌ ទំនាក់ទំនង និងការប្រាស្រ័យទាក់ទងគ្នាដែលជាគ្រឹះសំខាន់ក្នុងការផ្តល់នូវអ្វីដែលយើងបាននិយាយថាយើងនឹងផ្តល់ឱ្យទៅដៃគូអាជីវកម្មរបស់យើង។ សូមចាប់ផ្តើមដោយការផ្តល់នូវអ្វីដែលអ្នកបានសន្យា។

៣. សន្សំភាពជឿទុកចិត្ត – ការធ្វើបានល្អនៅក្នុងអាជីវកម្មមួយនឹងជួយអ្នកឱ្យទទួលបានភាពជឿទុកចិត្តនៅក្នុងអាជីវកម្មបន្តបន្ទាប់ដែលអ្នកចង់បង្កើតទៀត។ អ្នកអាចទទួលបានភាពជឿទុកចិត្តរបស់អ្នក មិនត្រឹមតែពីអតិថិជនប៉ុណ្ណោះទេ ប៉ុន្តែពីស្ថាប័នហិរញ្ញវត្ថុ និយ័តករ និងវិនិយោគិនរបស់អ្នកទៀតផង។ ភាពជឿទុកចិត្តនឹងជួយឱ្យអាជីវកម្មរបស់អ្នកមាននិរន្តរភាពក្នុងរយៈពេលវែង។
“ខ្ញុំមិនបញ្ឈប់នៅចំណុចនេះទេ ខ្ញុំតែងតែលើកទឹកចិត្តខ្លួនឯងឱ្យខិតខំប្រឹងប្រែងបន្ថែមទៀត”៕

ចំណេះដឹងផ្នែកសុខភាពៈរឿងបួនយ៉ាងដែលអ្នកត្រូវតម ក្រោយពេលចាក់ វ៉ាក់សាំងដូសទី៣

ដោយៈគង់ សូរិយា

ភ្នំពេញៈ អ្នកជំនាញសុខាភិបាល បានលើកឡើងថា ដើម្បីជួយឱ្យប្រព័ន្ធភាពស៊ាំនៃរាងកាយមានភាពរឹងមាំ អាចប្រឆាំងនឹងជំងឺបានល្អកាន់តែខ្លាំង មិនថាក្រោយពីចាក់វ៉ាក់សាំងដូសទី១​​​ ទី២ ឬទី៣ នោះទេ  អ្នកត្រូវតមរឿង៤យ៉ាងជាចាំបាច់។

ទី១ ស្រា

គ្រូពេទ្យជំនាញអាមេរិកាំងព្រមាន ហាមផឹកស្រាដាច់ខាតមុនឬក្រោយពេលចាក់វ៉ាក់សាំងកូវីដ-១៩ ព្រោះវាមិនងាយបង្កើតអង់ទីគ័រការពារខ្លួន និងនាំឱ្យប្រព័ន្ធភាពស៊ាំចុះខ្សោយ និងធ្វើឱ្យងាយកើតជំងឺផ្តាសាយតូច ជំងឺផ្តាសាយធំ ឬជំងឺឆ្លងផ្សេងទៀត។

ដោយសារតែរាងកាយត្រូវការពេល២សប្តាហ៍ ដូចគ្នាទៅនឹងការចាក់វ៉ាក់សាំងដូសទី២ដែរ ដើម្បីបង្កើតអង់ទីគ័រ ដូច្នេះការទទួលទានសុរាច្រើនមុន ឬក្រោយពេលចាក់ដូសទី៣ សុទ្ធតែអាចពន្យារពេលមិនឱ្យប្រព័ន្ធភាពស៊ាំ ធ្វើការងាររបស់វាបានខ្លាំងឡើយ។

ទី២. បារី

ប្រភពពីអង្គការ UNICEF បានចេញបំរាមសម្រាប់អ្នក ដែលត្រូវចាក់វ៉ាក់សាំងថ្មីចាស់ទាំងអស់ បូករួមនឹងអ្នកចាក់ដូសជំរុញ គួរចៀសវាងឱ្យបាននូវការជក់បារី ដើម្បីទុកឱកាសឱ្យវ៉ាក់សាំងធ្វើការបានល្អ។

លទ្ធផលសិក្សាបានមកពីអង្គការ យូនីសេហ្វ បានរកឃើញថា ការប្រើថ្នាំជក់ឬបារី កំលុងពេលចាក់វ៉ាក់សាំង មានផលប៉ះពាល់ដល់ប្រសិទ្ធភាពនៃថ្នាំបង្ការកូវីដ-១៩។ នេះក៏ដោយសារតែនៅក្នុងថ្នាំជក់ឬបារី មានកម្រិតសារធាតុញៀន ដែលអាចបង្អាក់ដំណើរការនៃវ៉ាក់សាំងជ្រាបចូល ទៅពង្រឹងប្រព័ន្ធភាពស៊ាំក្នុងសរីរាង្គ។

ក្នុងករណីនេះ មិនមែនហាមប្រាមតែអ្នកចាក់វ៉ាក់សាំងពីរដូសនោះទេ តែអ្នកចាក់ដូសទី៣គ្រប់គ្នា ក៏ត្រូវចៀសវាងផងដែរ។

ទី៣. អាហារហឹរ

ពាក់ព័ន្ធនឹងបញ្ហានេះ លោកស្រីវេជ្ជបណ្ឌិត ឱ វណ្ណឌីន អ្នកនាំពាក្យនិងជារដ្ឋលេខាធិការក្រសួងសុខាភិបានមានប្រសាសន៍ថា ការញ៉ាំហឹរច្រើនជ្រុល ចំពោះអ្នកចាក់វ៉ាក់សាំង គួរតែត្រូវត្រណម។ លោកស្រីបញ្ជាក់ថា សម្រាប់ការទទួលទានហឹរតិចៗ មិនជាបញ្ហាអ្វីនោះទេ ប៉ុន្តែករណីអ្នកចំណូលអាហាររសជាតិហឹរខ្លាំង ឬនិយមញ៉ាំម្ទេសច្រើនៗក្នុងរបបអាហារជាប្រចាំ មិនត្រូវបានលើកទឹកចិត្តឱ្យញ៉ាំឡើយ។

ការទទួលទានហឹរឬ​ហូបម្ទេសច្រើនខ្លាំង ត្រូវបានអ្នកជំនាញហាមឃាត់ទាំងអ្នកចាក់១ដូស ២ដូស និង៣ដូស ព្រោះដើម្បីទុកឱកាសឱ្យប្រព័ន្ធភាពស៊ាំបណ្ដុះអង់ទីគ័របានពេញលេញ។

ទី ៤. ការងារធ្ងន់

សកម្មភាពមួយចំនួនក្នុងទម្រង់ធ្ងន់ៗ ឬប្រើកម្លាំងសាច់ដុំខ្លាំង ក្រោយពីចាក់វ៉ាក់សាំកូវីដ-១៩ទាំង៣ដូស គប្បីផ្អាកសកម្មភាពសិន ព្រោះអាចនាំឱ្យប្រសិទ្ធភាពរបស់វ៉ាក់សាំងដំណើរការមិនបានល្អ។ ការលើកវត្ថុធ្ងន់ៗ ឬហាត់ប្រាណខ្លាំងៗដូចជា ជិះកង់ លើដុំដែក ហែលទឹក។ល។

អាចធ្វើឱ្យប្រើកម្លាំងហួសកម្រិត នាំឱ្យប៉ះពាល់ដល់សាច់ដុំ ចង្វាក់ចរន្តឈាមបេះលោតខុសចង្វាក់ និងប៉ះពាល់ដល់សន្លាក់ឆ្អឹងថែមទៀតផង។  ដូច្នេះអ្នកទើបតែចាក់វ៉ាក់សាំងរួចថ្មីៗ អាចនឹងការអាការៈឈឺចាប់ ឬអាចនឹងដកដ្ហើមខ្លីៗ ​ដែលអាចបង្កគ្រោះថ្នាក់ដល់ជីវិតក៏មាន​។

ក្រោពីនេះ អាហារផ្អែមៗ អាហារកែច្នៃ អាហារផ្អាប់ និងភេសជ្ជៈប៉ូវកម្លាំងជាដើម គួរផ្អាកទទួលទានយ៉ាងហោច២សប្ដាហ៍សិន ដើម្បីទុកពេលឱ្យវ៉ាក់សាំងបញ្ចេញសមត្ថភាពក្នុងការផលិតអង់ទីគ័រការពារវីរុសបានល្អប្រសើរ៕

 

ស្ថានភាពផ្លូវជាតិលេខ៣កាន់តែមានភាពទាក់ទាញវិនិយោគិនខណៈការសាងសង់ ជិតរួចទាំងស្រុង

ដោយៈវឌ្ឈនៈ

ភ្នំពេញៈ ក្នុងពេលផ្លូវជាតិលេខ៣ បានបង្ហាញពីសម្រស់ដ៏ទាក់ទាញ ដោយរដ្ឋាភិបាលបានជួសជុលស្ថាបនា និងពង្រីកធំជាងមុន ធ្វើឱ្យផ្លូវនេះកាន់តែមានភាពទាក់ទាញដល់បណ្ដាវិនិយោគិនជាច្រើន ជាពិសេសវិនិយោគិនក្នុងស្រុកតែម្ដង។

បើតាមការឱ្យដឹងពីអ្នកជំនាញនៃវិស័យអចលនទ្រព្យបានឱ្យដឹងថា ទីណាមានការអភិវឌ្ឍហេដ្ឋារចនាសម្ព័ន្ធ ទីនោះនឹងទទួលបានការទាក់ទាញ វិនិយោគពីវិនិយោគិនជាបន្តបន្ទាប់ ដូច្នេះហើយទើបរដ្ឋាភិបាល បានខិតខំកសាងហេដ្ឋារចនាសម្ព័ន្ធជាបន្តបន្ទាប់ តភ្ជាប់ពីភ្នំពេញទៅបណ្ដាខេត្តនានា និងហេដ្ឋារចនាសម្ព័ន្ធផ្លូវនៅក្នុងខេត្ត ដែលមានសក្ដានុពលទាក់ទាញវិនិយោគិនផងដែរ ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ថា ផ្លូវជាតិលេខ៣ វានឹងកាន់តែទាក់ទាញនៅពេលវាសាងសង់បានរួច១០០ភាគរយ ហើយវិនិយោគិននឹងចាប់ផ្ដើមដំណើរការវិនិយោគ ទៅលើគម្រោងរបស់ខ្លួនបណ្ដើៗ ដូចជា ឃ្លាំងរោងចក្រសម្រាប់ជួល និងសំណង់អគាររោងចក្រជាដើម ព្រោះផ្លូវនេះវាមានសក្ដានុពលខ្ពស់ ទៅលើការអភិវឌ្ឍឧស្សាហកម្មរោងចក្រតែម្ដង។

លោកបន្តថា “ជាទូទៅទីណាមានការអភិវឌ្ឍហេដ្ឋារចនាសម្ព័ន្ធ ទីនោះនឹងមានការទាក់ទាញ ទៅលើការវិនិយោគជាក់ជាមិនខាន ជាក់ស្ដែងដូចបានឃើញស្រាប់ហើយ តំបន់មួយចំនួននៅជាយរាជធានីភ្នំពេញ ដែលមានការអភិវឌ្ឍលើហេដ្ឋារចនាសម្ព័ន្ធច្រើនតំបន់នោះ ក៏ទទួលបានគម្រោងវិនិយោគច្រើនដែរ”។

សម្រាប់តំបន់ផ្លូវជាតិលេខ៣វិញ វាក៏ជាការជំរុញសក្ដានុពលខេត្តមួយចំនួន ជាពិសេសខេត្តកំពតនិងកែបជាដើម ដែលនឹងទាក់ទាញឱ្យវិនិយោគិន ចុះសិក្សាស្រាវជ្រាវរកការវិនិយោគរបស់ខ្លួនផងដែរ ។

ជាមួយគ្នានេះ លោកប៉ូ អ៊ាវគង់ អគ្គនាយកនៃក្រុមហ៊ុនអចលនទ្រព្យ Advance បានឱ្យដឹងថា ផ្លូវជាតិលេខ៣លេខ២ និងផ្លូវជាតិ៤ ជាផ្លូវដែលមានសក្ដានុពលក្នុងការអភិវឌ្ឍឧស្សាហកម្ម ដោយសារតែផ្លូវនេះវាងាយស្រួល ក្នុងការភ្ជាប់ទៅកំពង់ផែទឹកជ្រៅនៃខេត្តព្រះសីហនុ ដែលងាយស្រួលក្នុងការដឹកជញ្ជូនទំនិញទៅកាន់កំពង់ផែ និងពីកំពង់ផែមកកាន់ទីតាំងផលិតវិញ ។

នៅតំបន់ផ្លូវជាតិលេខ៣ បច្ចុប្បន្ននេះក៏មានគម្រោងអភិវឌ្ឍន៍លំនៅឋានជាបន្តបន្ទាប់ចាប់ផ្ដើមរីកដុះដាលជាបន្តបន្ទាប់ និងការសង់រោងចក្រ ឃ្លាំងកាន់តែច្រើនខណៈរោងចក្រមួយចំនួន ក៏ចាប់ផ្ដើមរើចេញពីទីក្រុងភ្នំពេញ និងរកទីតាំងថ្មី។ ការអភិវឌ្ឍផ្លូវជាតិលេខ៣នេះដែរ ក៏បានធ្វើឱ្យតម្លៃដីធ្លីនៅតាមបណ្ដោយផ្លូវនេះ មានហាងឆេងនិងតម្លៃជាងមុនផងដែរ។ នេះបើតាមការលើកឡើងរបស់អ្នកវាយតម្លៃអចលនទ្រព្យជាច្រើនកន្លងមក៕