ដោយៈ ម៉ាណេត

ភ្នំពេញៈ ក្រុមហ៊ុនគ្រប់គ្រងមូលនិធិហេដ្ឋារចនាសម្ព័ន្ធស្វ៊ីស SUSI Partners ប្រមូលទុនវិនិយោគបាន៨១លានដុល្លារ ដើម្បីធ្វើការវិនិយោគលើវិស័យថាមពលកកើតឡើងវិញ ដែលកំពុងមានការរីកចម្រើន យ៉ាងឆាប់រហ័សនៅអាស៊ីអាគ្នេយ៍ ខណៈទិសដៅវិនិយោគរបស់ខ្លួនរួមមានកម្ពុជា និងបណ្តាប្រទេសចំនួន៥ទៀត។ នេះបើយោងតាមចេញផ្សាយរបស់សារព័ត៌មាន PV Tech។

លោក Marius Dorfmeister នាយកប្រតិបត្តិរបស់ SUSI Partners បានថ្លែងថា ក្រុមហ៊ុន SUSI Partners បានប្រកាសនៅថ្ងៃទី២៦ ខែឧសភាកន្លងមកថា ខ្លួនបានប្រមូលទុនវិនិយោគចំនួន៨១លានដុល្លារអាមេរិក នៅក្នុងការបិទលើកដំបូង នៃមូលនិធិផ្លាស់ប្តូរថាមពលអាស៊ី (SAETF) ដែលត្រូវបានបង្កើតឡើង ដើម្បីពន្លឿនការកសាងហេដ្ឋារចនាសម្ព័ន្ធថាមពល ប្រកបដោយចីរភាពនៅក្នុងតំបន់ ដែលជាកត្តាសំខាន់ កត្តាក្នុងការសម្រេចបាន នូវគោលដៅអាកាសធាតុសកលលោក។

មូលនិធិ SAETF នឹងត្រូវបានប្រើដើម្បីវិនិយោគ ក្នុងការផលិតថាមពលស្អាត ប្រសិទ្ធភាពថាមពលការផ្ទុកថាមពល និងបណ្តាញខ្សែចែកចាញ។ វិនិយោគិនបានចាត់ទុកប្រទេសឥណ្ឌូនេស៊ី ថៃវៀតណាម ហ្វីលីពីន ម៉ាឡេស៊ី កម្ពុជា និងឡាវជាទិសដៅអាទិភាពសម្រាប់ការវិនិយោគរបស់ខ្លួន។

លោកបានបន្តថា “គោលដៅចុងក្រោយរបស់ក្រុមហ៊ុន ប្រមូលមូលនិធិឱ្យបាន២៥០លានដុល្លារ ក្នុងការបង្កើនការវិនិយោគលើវិស័យថាមពលនេះ”។

ក្រុមហ៊ុនគ្រប់គ្រងមូលនិធិ ទទួលបានការវិនិយោគ ពីធនាគារនានានៅក្នុងពិភពលោកជាបន្ត បន្ទាប់ រួមមាន ធនាគារវិនិយោគហេដ្ឋារចនាសម្ព័ន្ធអាស៊ី(AIIB) ធនាគារអភិវឌ្ឍន៍ហូឡង់ FMO និងស្ថាប័នហិរញ្ញវត្ថុណ័រឌីស Norfund និង Swedfund ក៏ដូចជាវិនិយោគិនស្ថាប័ន ដែលមានការិយាល័យកណ្តាល នៅប្រទេសអាល្លឺម៉ង់ និងសិង្ហបុរី។

លោក Marco van Daele សហនាយកប្រតិបត្តិបានមានប្រសាសន៍ថា ការបញ្ជូនថាមពលមិនប៉ះពាល់បរិស្ថាន និងថាមពលថ្មី ជាគោលដៅរបស់រដ្ឋាភិបាលនានា ហើយជាលទ្ធផលនៃការវិនិយោគ លើប្រព័ន្ធថាមពលថ្មីធ្វើឱ្យអាស៊ីអាគ្នេយ៍ ក្លាយជាទីផ្សារទាក់ទាញសម្រាប់វិនិយោគិន។

លោកបានមានប្រសាសន៍ថា “អាជីវកម្មរបស់SUSI នៅក្នុងប្រទេសសិង្ហបុរី នឹងពង្រីកការវិនិយោគរបស់ក្រុមហ៊ុន និងអនុញ្ញាតឱ្យពង្រីកបន្ថែមទៀតទៅក្នុងទីផ្សារ ដែលមានកំណើនខ្ពស់នៅអាស៊ី”៕

ដោយៈគង់ ម៉ាលីន

ភ្នំពេញៈ លោក Ren Zhengfei អគ្គនាយក និងជាស្ថាបនិកក្រុមហ៊ុនHuawei ដែលជាក្រុមហ៊ុនលំដាប់យក្សរបស់ចិន បានអំពាវនាវឲ្យមានការជំរុញអស់ពីសមត្ថភាព ដើម្បីកាត់បន្ថយការរងសំពាធពីអាមេរិក។

កំណត់ហេតុផ្ទៃក្នុង ដែលត្រូវបានមើលឃើញកាលពីថ្ងៃអង្គារបានឲ្យដឹងថា ប្រធានក្រុមហ៊ុនយក្សទូរគមនាគមន៍ Huawei របស់ប្រទេសចិន បានអំពាវនាវឲ្យមានការជំរុញឲ្យអស់ពីសមត្ថភាពដែលអាចធ្វើទៅបានទៅក្នុងសូហ្វវែរជាផ្នែកមួយនៃការបង្កើនល្បឿនការធ្វើពិពិធកម្មផលិតកម្ម សំដៅដោះស្រាយការដាក់ទណ្ឌកម្មរបស់អាមេរិក។

អគ្គនាយក និងជាស្ថាបនិកក្រុមហ៊ុនHuawei លោកRen Zhengfeiបានប្រាប់ទៅក្រុមនិយោជករបស់ខ្លួនថា “ដោយសារតែនៅក្នុងវិស័យសូហ្វវែរ អាមេរិកនឹងគ្រប់គ្រងតិចតួចបំផុត ជុំវិញការអភិវឌ្ឍនៅពេលអនាគតរបស់យើង ហើយយើងមានស្វ័យភាពច្រើន”។

សេចក្ដីណែនាំរបស់លោក Ren ដែលមានអាយុ៧៦ឆ្នាំរូបនេះ បង្ហាញសញ្ញាចុងក្រោយបំផុត នៃការផ្ដោតការយកចិត្តទុកដាក់ជាយុទ្ធសាស្ដ្រដ៏សំខាន់ ដែលបណ្ដាលមកពីសម្ពាធពីអាមេរិក ដែលមើលឃើញក្រុមហ៊ុន Huawei ថា ជាការគំរាមកំហែងសន្ដិសុខដែលអាចកើតមាន។

កាលពីខែមេសា ក្រុមហ៊ុន Huawei បានប្រកាសផែនការក្នុងការធ្វើការងារជាមួយក្រុមហ៊ុនផលិតរថយន្តរបស់ប្រទេសចិន ដើម្បីផលិតរថយន្តវៃឆ្លាត និងបានប្ដេជ្ញាចិត្តថា នឹងបង្កើនការអភិវឌ្ឍប្រព័ន្ធ ប្រតិបត្តិការទូរស័ព្ទស្មាតហ្វូនរបស់ខ្លួន បន្ទាប់ពីត្រូវបានកាត់ផ្ដាច់ចេញពីកម្មវិធី Android របស់ក្រុមហ៊ុន Google ដោយការទប់ស្កាត់របស់អាមេរិក។

ក្រុមហ៊ុន Huawei កាលពីថ្ងៃអង្គារបានបង្ហាញការផ្សព្វផ្សាយ លើការណែនាំខ្លីដាច់ដោយឡែកមួយ នៅលើបណ្ដាញសង្គម ដែលចង្អុលបង្ហាញថា ប្រព័ន្ធប្រតិបត្តិការដែលហៅថា HarmonyOS នឹងត្រូវដាក់ឲ្យដំណើរការទូទាំងពិភពលោក នៅថ្ងៃទី ២ ខែមិថុនា។

ជាក្រុមហ៊ុនផ្គត់ផ្គង់ឧបករណ៍បណ្ដាញ ទូរគមនាគមន៍ឈានមុខគេរបស់ពិភពលោកមួយនេះ ពេលថ្មីៗនេះជាក្រុមហ៊ុនផ្គត់ផ្គង់ទូរស័ព្ទស្មាតហ្វូន ឈានមុខគេទី៣ រួមជាមួយនឹងក្រុមហ៊ុន Apple និងក្រុមហ៊ុន Samsung ក្រុមហ៊ុនHuawei បានប្រកាសកាលពីមុន អំពីការធ្វើពិពិធកម្មទៅក្នុងសហគ្រាស និងខ្លោដកុំព្យូទ័រ និងបណ្ដាញអាជីវកម្មដែលជាប់ទាក់ទងនឹងការមកដល់នៃបណ្ដាញ 5G ។

ក្រុមហ៊ុនមួយនេះបានលក់ Honor ជាយីហោទូរស័ព្ទស្មាតហ្វូនតម្លៃទាប របស់ខ្លួនកាលពីចុងឆ្នាំមុន ប៉ុន្តែបានប្ដេជ្ញាចិត្តថា នឹងរក្សាផលិតផលទូរស័ព្ទស្មាតហ្វូនទំនើបរបស់ខ្លួន៕

ដោយៈ ម៉ាណេត

ភ្នំពេញៈ ក្រុមហ៊ុនLS ELECTRIC របស់កូរ៉េខាងត្បូងបានអញ្ជើញឯកអគ្គរដ្ឋទូតមកពីប្រទេសអាស៊ាន ដើម្បីបង្ហាញពីបច្ចេកវិទ្យារោងចក្រឆ្លាតវៃរបស់ខ្លួន និងពិចារណាវិធីដើម្បីពង្រីកអាជីវកម្មរបស់ខ្លួន និងចូលរួមក្នុងកិច្ចសហប្រតិបត្តិការបច្ចេកវិទ្យា ជាមួយបណ្តាប្រទេសប្រទេសអាស៊ាន។ នេះបើយោងតាមការចេញផ្សាយរបស់សារព័ត៌មាន Korea Times កាលពីម្សិលមិញ។

ក្រុមហ៊ុនបានឱ្យដឹងថា ក្រុមហ៊ុន កាលថ្ងៃអង្គារ បានអញ្ជើញឯកអគ្គរដ្ឋទូតអាស៊ានចំនួន១០រូប ទៅធ្វើទស្សកិច្ចរោងចក្ររបស់ខ្លួននៅទីក្រុង Cheongju ភាគខាងជើងខេត្ត Chungcheong ដែលជារោងចក្រឆ្លាតលំដាប់ធំមួយរបស់ប្រទេស ដើម្បីពិភាក្សាអំពីកិច្ចសហប្រតិបត្តិការបច្ចេកវិទ្យា និងអាជីវកម្មនៅក្នុងតំបន់អាស៊ាន។
អាស៊ានមានសមាជិកអាស៊ានទាំង១០ រួមមាន ព្រុយណេ កម្ពុជា ឥណ្ឌូនេស៊ី ឡាវម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។ ដំណើរទស្សនកិច្ចរោងចក្រនេះរវាងក្រុមហ៊ុន និងឯកអគ្គរដ្ឋទូតអាស៊ាន បានធ្វើឡើងដើម្បីជួយរិះរកមធ្យោបាយ ដើម្បីលើកកម្ពស់កិច្ចសហប្រតិបត្តិការទៅវិញទៅមក។

លោក Koo Ja-kyun ប្រធានរបស់ក្រុមហ៊ុន LS Electric បានឱ្យដឹងថា តាមរយៈការធ្វើសមាហរណកម្មបច្ចេកវិទ្យា និងស្វ័យប្រវត្តិកម្មវាអនុញ្ញាតឱ្យផលិតកម្ម ទ្រង់ទ្រាយធំ ឬផលិតកម្មច្រើន ប៉ុន្តែក៏មានសមត្ថភាពធ្វើការផលិត ដែលអាចបត់បែនបានតាមតម្រូវការផងដែរ។

លោកបានបន្តថា “យើងចង់ឲ្យប្រព័ន្ធប្រព័ន្ធបច្ចេកវិទ្យា រោងចក្រឆ្លាតវៃពង្រីកដល់បណ្តាប្រទេសអាស៊ាន”។

បើតាមការបញ្ជាក់របស់លោកប្រធានក្រុមហ៊ុន LS Electric ក្រោយពីរោងចក្រនេះត្រូវបានបង្កើតឱ្យដំណើរការតាមប្រព័ន្ធវ័យឆ្លាត ពេលវេលាផលិតកម្មរបស់គ្រឿងម៉ាស៊ីនត្រូវកាត់បន្ថយដល់ពាក់កណ្តាល ហើយផលិតកម្មកើនឡើងរហូតដល់៦០% រីឯការប្រើប្រាស់ថាមពលក្នុងផលិតកម្មថយចុះ៦០% ហើយអត្រាផលិតផល ដែលមានការខូចខាតក្នុងដំណើរការផលិត កាត់បន្ថយមកនៅត្រឹមតែ៧ឯកតាប៉ុណ្ណោះ ក្នុង១លានឯកតាផលិត។ លទ្ធផលដូចនេះបញ្ជាក់ថា ការតម្លើងរោងចក្របែបឆ្លាតវៃនេះ មានអត្ថប្រយោជន៍ដល់ទៅ៣ ប្រៀបបានទៅនឹងការបាញ់ព្រួញ១ត្រូវចាបដល់ទៅ៣ឯណោះ។

ក្រុមហ៊ុន LS Electric នេះជាក្រុមហ៊ុន និងរោងចក្រមួយក្នុងចំណោមរោងចក្រមួយចំនួនតូចប៉ុណ្ណោះ ក្នុងប្រទេសកូរ៉េខាងត្បូង ដែលដំណើរការតាមប្រព័ន្ធបច្ចេកវិទ្យាវ័យឆា្លត ហើយដែលកន្លងមកតាំងពីឆ្នាំ២០១១ បានបោះទុនវិនិយោគដល់ទៅ ២០ប៊ីលានវ៉ុន ដើម្បីបង្កើតជាខ្សែផលិតកម្មបែបវ័យឆ្លាតនេះ។

រោងចក្ររបស់ក្រុមហ៊ុន LS Electric នេះផលិតនូវឧបករណ៍បំបែកសៀគ្វី និងកុង តាក់ភ្លើង ហើយមានទំហំផលិតកម្មប្រចាំឆ្នាំដល់ទៅ២.៦លានគ្រឿងឯណោះ ដែលឧបករណ៍ទាំងនេះ អាចប្រើប្រាស់បានសម្រាប់ជាមុខងារ ប្រព័ន្ធបច្ចេកវិទ្យាតម្លើងរោងចក្រ និងក៏ដូចជា ឧបករណ៍ដទៃទៀត ដែលពឹងផ្អែកលើប្រព័ន្ធបច្ចេកវិទ្យាទំនើប ដូចជា Cyber Physical System (CPS), ប្រព័ន្ធ Internet of Things (IoT) និងប្រព័ន្ធ Internet of Service (IoS) ជាដើម៕

ដោយៈគង់ សូរិយា

ភ្នំពេញៈ រាជរដ្ឋាភិបាលកម្ពុជាបានបង្កើតនូវយន្តការ ស្វែងរកដំដោះស្រាយចំណោទបញ្ហា ដោយផ្តល់ឱកាសដល់ធុរកិច្ចថ្មី ក្នុងវិស័យបច្ចេកវិទ្យាជួយដោះស្រាយ ក្នុងនោះប្រសិនដំណោះស្រាយទទួលបានជោគជ័យ នឹងត្រូវយកទៅអនុវត្តន៍នៅតាមបណ្តាក្រុមហ៊ុននានា និងក្លាយជាយុទ្ធសាស្រ្តក្នុងការអភិវឌ្ឍអាជីវកម្មដ៏សំខាន់ផងដែរ។

នៅក្នុងកម្មវិធីប្រកួតប្រជែងដណ្តើមជ័យលាភី ”ថ្ងៃបទបង្ហាញឆ្ពោះទៅមុខ” នៅព្រឹកថ្ងៃទី២៦ ខែឧសភា ឆ្នាំ២០២១នេះតាមប្រព័ន្ធអនឡាញ លោកឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ បានមានប្រសាសន៍ថា នេះជាកម្មវិធីដំបូង ដែលរដ្ឋាភិបាលបានផ្តល់ឱកាសដល់ក្រុមហ៊ុនធំៗ លើកឡើងសម្រាប់បញ្ហាដែលកំពុងប្រឈម ទៅដល់នវានុវត្តន៍ជន ដើម្បីរកដំណោះស្រាយ។

លោកឲ្យដឹងទៀតថា “ការប្រើប្រាស់ប្រព័ន្ធទូទាត់សាច់ប្រាក់ ការវេរសាច់ប្រាក់ តាមប្រព័ន្ធអេឡិចត្រូនិច និងការប្រើប្រាស់ប្រព័ន្ធបច្ចេកវិទ្យាផ្សេងៗទៀត បានកើនឡើងយ៉ាងខ្លាំងនៅក្នុងតម្រូវការប្រើប្រាស់ ដូច្នេះតាមរយៈនៃកម្មវិធីនវានុវត្តន៍បញ្រ្ចាស គឺជាការស្វែងរកដំដោះស្រាយចំណោទបញ្ហា ដោយផ្តល់ឱកាសដល់ធុរកិច្ចថ្មី ក្នុងវិស័យបច្ចេកវិទ្យាជួយដោះស្រាយ”។

ជាមួយគ្នានេះ លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជាបានបញ្ជាក់ថា កម្មវិធីនេះគឺជាការជម្រុញឲ្យនិស្សិតធុរកិច្ចថ្មី អាចបង្ហាញនូវសមត្ថភាព និងការបង្កើតនូវផលិតផល សេវាកម្មឬដំណោះស្រាយអាជីវកម្មផ្សេងៗ ជាពិសេសគ្រឹះស្ថាន ដែលជាសមាជិករបស់សមាគមធនាគារនៅកម្ពុជា នឹងក្លាយជាចំណែកមួយក្នុងការលើកកម្ពស់វិសាលភាពធុរកិច្ចថ្មី សហគ្រាសធុនតូចនិងមធ្យម ក៏ដូចជា ពង្រីកផលិតផលការងារឲ្យកាន់តែប្រសើរ ខណៈបច្ចេកវិទ្យាឌីជីថល ដែលបានកំពុងក្លាយជាប្រធានបទសម្រាប់ដោះស្រាយរាល់បញ្ហា ជាពិសេសលើផ្នែកអាជីវកម្ម និងជាកាលានុវត្តន៍ថ្មី ដែលកម្ពុជាកំពុងក្តោបយក។

អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោកគង់ ម៉ារីមានប្រសាសន៍ថា បន្ទាប់ពីការអនុវត្តន៍កម្មវិធីខាងលើ នៅឆ្នាំ២០២១នេះ មជ្ឈមណ្ឌលបណ្តុះធុរកិច្ចតេជោ និងរៀបចំកម្មវិធីថ្នាលបណ្តុះបណ្តាលថ្មីៗថែមទៀត ដើម្បីបង្កើនភាពរស់រវើកនៃប្រព័ន្ធអេកូឡូស៊ីធុរកិច្ចថ្មីៗ ដូចជា ការរៀបចំកម្មវិធីពន្លឿនអាជីវកម្មតេជោ ដែលកម្មនេះនឹងទទួលយកធុរកិច្ចថ្មីដែលកំពុងមានប្រតិបត្តិការ ដើម្បីពន្លឿនការលូតលាស់របស់ពួកគេ តាមរយៈការផ្តល់បុរេមូលនិធិបណ្តុះអាជីវកម្ម ការណែនាំ និងការភ្ជាប់ទំនាក់ទំនងជាមួយវិនិយោគិន និងការរៀបចំអភិវឌ្ឍន៍ថ្នាលឌីជីថលធុរកិច្ចថ្មីកម្ពុជា ដោយថ្នាលនេះនឹងភ្ជាប់អ្នកពាក់ព័ន្ធទាំងអស់នៅក្នុងប្រព័ន្ធអេកូឡូស៊ីធុរកិច្ចជាមួយគ្នា ក្នុងនោះអ្នកពាក់ព័ន្ធនានានឹងអាចស្វែងរក និងភ្ជាប់ទំនាក់ទំនងជាមួយអ្នកផ្សេង ដែលគេត្រូវការនៅក្នុងឌីជីថលថ្មីនេះ៕

ដោយៈសុខុម
ក្រុងញូយ៉កៈ បណ្ដាធនាគារកណ្តាល គឺជាកំពូលវីរបុរសនៅក្នុងដំណាក់កាលដំបូងនៃវិបត្តិឆ្លងរាតត្បាតវីរុសកូវីដ-១៩ ដោយធនាគារទាំងនោះបានចាត់វិធានការភ្លាមៗដើម្បីជួយសង្គ្រោះសេដ្ឋកិច្ច និងទីផ្សារហិរញ្ញវត្ថុកុំឱ្យរលំរលាយ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី២៥ ឧសភា។

ឥឡូវនេះ នៅពេលការងើបឡើងនៃសេដ្ឋកិច្ច កំពុងតែចាប់ផ្តើមបង្កើនល្បឿន វាបានក្លាយជាហានិភ័យដ៏ធំមួយសម្រាប់បណ្ដាវិនិយោគិន។

*តើមានអ្វីដែលកំពុងកើតឡើង
រង្វាស់ចុងក្រោយនៅលើសន្ទស្សន៍ Back-to-Normal Index (សន្ទស្សន៍ត្រលប់ទៅរកភាពប្រក្រតីវិញ) ពីសារព័ត៌មាន CNN Business បង្ហាញថា សេដ្ឋកិច្ចរបស់សហរដ្ឋអាមេរិក វិលទៅរកភាពប្រក្រតីវិញបាន៩០%ហើយ។ ប៉ុន្តែដោយសង្កេតឃើញទិន្នន័យដ៏ល្អបែបនេះ និងអតិផរណាកំពុងកើនឡើង បណ្ដាវិនិយោគិនព្រួយបារម្ភកាន់តែខ្លាំងឡើងថា ធនាគារកណ្ដាលអាមេរិក Federal Reserve នឹងសាងកំហុសឆ្គងដ៏ធំមួយ នៅពេលការងើបឡើងឆាប់រហ័សពេក ឬមិនយកចិត្តទុកដាក់ ចំពោះការព្រួយបារម្ភកាន់តែខ្លាំងឡើង គឺបណ្ដោយរហូតទាល់តែយឺតពេល។

នៅក្នុងការស្ទង់មតិរបស់ធនាគារ Deutsche Bank ធ្វើឡើងទៅលើអ្នកជំនាញខាងទីផ្សារចំនួន៦២០នាក់ ដែលបានចេញផ្សាយនៅសប្តាហ៍នេះបង្ហាញថា ចំនួន៣៩%នៃអ្នកឆ្លើយសំណួរបានចុចយក “កំហុសឆ្គងក្នុងគោលនយោបាយរបស់ធនាគារកណ្តាល”ថា “ជាហានិភ័យមួយក្នុងចំណោមហានិភ័យធំៗបំផុតទាំង៣ ចំពោះស្ថិរភាពទីផ្សារ ដោយកើនឡើងពី២១%កាលពីខែមុន”។

ការភ័យខ្លាចស្រដៀងគ្ននេះ ត្រូវបានឆ្លុះបញ្ចាំងនៅក្នុងការស្ទង់មតិ ធ្វើឡើងទៅលើអ្នកគ្រប់គ្រងមូលនិធិទូទាំងពិភពលោក ដែលធនាគារអាមេរិក Bank of America បានបង្ហោះកាលពីសប្តាហ៍មុន។
ហានិភ័យទី២ ដែលស្ថិតនៅពីក្រោយអតិផរណាគឺ “Taper Tantrum” ដោយសំដៅទៅលើសេណារីយ៉ូមួយ ដែលបណ្ដាធនាគារកណ្តាលបន្ធូរបន្ថយ លើការទិញសញ្ញាប័ណ្ណ ជាហេតុធ្វើឱ្យទិន្នផលកើនឡើង និងបង្កការភ័យស្លន់ស្លោនៅក្នុងទីផ្សារ។

មើលឱ្យទូលំទូលាយ:
បណ្ដាវិនិយោគិនបានចាប់អារម្មណ៍លើប្រាក់ ដែលទទួលបានដោយងាយស្រួលពីបណ្ដាធនាគារកណ្តាលដូចធនាគារកណ្តាលអាមេរិក Federal Reserve ជាដើម ដែលបានសម្រេចកាត់បន្ថយអត្រា ការប្រាក់ដល់កម្រិតទាបបំផុតមិនធ្លាប់មាន និងទិញយកមូលបត្របំណុលរហូត ដល់ទៅរាប់រយពាន់លានដុល្លារ ដែលបានជួយជំរុញឱ្យទីផ្សារងើបឡើងវិញយ៉ាងឆាប់រហ័ស បន្ទាប់ពីផ្ទុះវិបត្តិកូវីដ-១៩ ដំបូង។

ទោះជាយ៉ាងណា គោលនយោបាយបែបនេះ ក៏បានផ្តល់អំណាចយ៉ាងធំដល់បណ្ដាធនាគារកណ្តាលផងដែរ នៅក្នុងការកំណត់លទ្ធផលទីផ្សារ ដែលធ្វើឱ្យពួកគេកាន់តែពិបាកបត់បែនតាម។

*ចំណុចគួរផ្ដោតអារម្មណ៍
យោងតាមរបាយការណ៍ថ្មីមួយបង្ហាញថា តារាងតុល្យការ (Balance Sheet) របស់ធនាគារកណ្តាលអាមេរិកFederal Reserve បានកើនឡើងដល់៧,៤ទ្រីលានដុល្លារកាលពីឆ្នាំមុន ដែលជាកម្រិតខ្ពស់បំផុតមិនធ្លាប់មាន។ ធនាគារកណ្ដាលនេះបានព្យាករថា នៅត្រឹមឆ្នាំ២០២៣ តារាងតុល្យការនេះអាចកើនដល់៩ទ្រីលានដុល្លារ។

ចំនួននេះគឺស្ទើរតែស្មើ GDP ប្រចាំឆ្នាំបូកបញ្ចូលគ្នារបស់ប្រទេសជប៉ុន និងប្រទេសអាល្លឺម៉ង់ ហើយនោះមានន័យថា អ្នកធ្វើគោលនយោបាយមិនអាចសាង កំហុសឆ្គងបានឡើយ។

សម្រាប់ពេលនេះ ធនាគារកណ្តាលអាមេរិក បន្តរក្សាជំហររបស់ខ្លួនយ៉ាងម៉ឺងម៉ាត់ថា ខ្លួនកំពុងឃ្លាំមើលហានិភ័យនានា ប៉ុន្តែគ្មានបំណងចាត់វិធានការ ក្នុងពេលដ៏ខ្លីខាងមុខនេះឡើយ សូម្បីតែតម្លៃកំពុងកើនឡើងក៏ដោយ។

*អ្វីជាតារាងតុល្យការ (Balance Sheet)?
តារាងតុល្យការ ជារបាយការណ៍មួយដែលបង្ហាញ ពីស្ថានភាពហិរញ្ញវត្ថុរបស់ក្រុមហ៊ុនឬប្រទេស ក្នុងខណៈពេលណាមួយជាក់លាក់។ តារាងតុល្យការបង្ហាញអំពីទ្រព្យសកម្ម បំណុល និងមូលធនម្ចាស់។ ទ្រព្យសកម្មគឺជាធនធានសេដ្ឋកិច្ច ដែលជាកម្មសិទ្ធិរបស់អង្គភាពអាជីវកម្ម ឬប្រទេសណាមួយដែលគេរំពឹងថា ទ្រព្យសកម្មទាំងនោះអាចបង្កើតផលចំណូលបាន តាមរយៈការប្រើប្រាស់នៅក្នុងប្រតិបត្តិការរបស់អាជីវកម្ម៕