សុខុម

ហុងកុង: តម្លៃផ្ទះមួយទឹកក្នុងក្រុងហុងកុង នៅពេលនេះបានឈានដល់កម្រិតប្រហាក់ប្រហែលនឹងកម្រិត ក្នុងសម័យមុនពេលផ្ទុះមហាបាតុកម្ម ហើយអាចនឹងហក់ឡើងខ្ពស់បំផុតមិនធ្លាប់មាន នៅរយៈពេល២ខែក្រោយ។ នេះបើយោងតាមទិន្នន័យដែលត្រូវបានបញ្ចេញកាលពីថ្ងៃព្រហស្បតិ៍ ទី២៧ ឧសភា។

សារព័ត៌មាន South China Morning Post បានចុះផ្សាយក្នុងថ្ងៃដដែលថា តម្លៃផ្ទះមួយទឹកបានហក់ឡើងខែទី៤ ជាប់គ្នាកាលពីខែមេសា ក្នុងអត្រាខ្ពស់បំផុតចាប់តាំងពីខែកក្កដា ឆ្នាំ២០១៩ ហើយនេះឆ្លុះបញ្ចាំងពីការងើបឡើងវិញ នៅក្នុងទីផ្សារលំនៅដ្ឋាន និងសេដ្ឋកិច្ចរបស់ក្រុងនេះ។

ការហក់ឡើងនេះ ស្ថិតក្នុងអត្រាប្រមាណ១,៥% នៃអត្រាខ្ពស់ជាប្រវត្តិសាស្ត្រ ដែលត្រូវបានកត់ត្រាក្នុងខែឧសភា ឆ្នាំ២០១៩ មុនពេលផ្ទុះមហាតុកម្មប្រឆាំងរដ្ឋាភិបាល។

លោក Derek Chan ប្រធានផ្នែកស្រាវជ្រាវនៅក្រុមហ៊ុនអចលនទ្រព្យ Ricacorp Properties បានលើកឡើងថា “ប្រសិនបើការហក់ឡើងក្នុងខែឧសភា លើសពី១,៥% [សន្ទស្សន៍តម្លៃផ្ទះមួយទឹក] ពិតជាអាចបំបែកកំណត់ត្រានោះបាន”។ លោកបន្ថែមទៀតថា “ការហក់ឡើងនៅខែមិថុនា ដ៏ខ្លីខាងមុខនេះ ពិតជាអាចបំបែកបំណត់ត្រានោះបាន “ប្រសិនបើសន្ទុះនេះនៅដដែលដោយមិនផ្លាស់ប្តូរ”។

ប្រធានផ្នែកស្រាវជ្រាវរូបនេះមានសុទិដ្ឋិនិយម ដោយសារកត្តាមួយចំនួនដូចជា ក្រុងហុងកុង មានសមត្ថភាពអាចគ្រប់គ្រងការឆ្លងរាតត្បាតវីរុសកូវីដ-១៩ សេដ្ឋកិច្ចរបស់ក្រុងនេះកំពុងងើបឡើងជាលំដាប់ កំណើនផលិតផលសរុបក្នុងស្រុក (GDP) របស់ក្រុងនេះមានសន្ទុះលឿន ហើយអត្រាគ្មានការងារធ្វើ បានធ្លាក់ចុះរយៈពេល២ខែជាប់គ្នា។ ការឆ្លើយតបទៅនឹងគម្រោងថ្មីៗក្នុងខែនេះ ក៏ទទួលបានលទ្ធផលគួរឱ្យពេញចិត្តផងដែរ។

សន្ទស្សន៍តម្លៃផ្ទះមួយទឹកបានកើនឡើង០,៤% ដល់៣៩០,៨ពិន្ទុក្នុងខែមេសា បើធៀបនឹង៣៨៩,១ពិន្ទុក្នុងខែមីនា និងប្រមាណ១.៥%ដែលត្រូវបានកត់ត្រា ក្នុងខែឧសភា ឆ្នាំ២០១៩។

លោកDerek Chan គូសបញ្ជាក់ថា លោករំពឹងថា ការឡើងថ្លៃក្នុងខែនេះនឹងឈានដល់១,៥% ឬ១,៦%ដែលមានន័យថា សន្ទស្សន៍នេះស្ទើរតែបំបែកកំណត់ត្រា បានទៅហើយ។ ហើយប្រសិនបើសន្ទស្សន៍នេះ កើនឡើងប្រហែល១%ក្នុងខែមិថុនា វានឹងឡើងដល់៤០០ពិន្ទុដែលជាកម្រិតខ្ពស់បំផុតមិនធ្លាប់មាន។

ការអត្ថាធិប្បាយរបស់លោក Derek Chan បានបន្ទរតាមការព្យាករមួយមុននេះដោយទីភ្នាក់ងារអចលនទ្រព្យ Centaline Property Agency ដែលនិយាយថា តម្លៃផ្ទះអាចនឹងបំបែកកំណត់ត្រានៅពាក់កណ្តាលឆ្នាំ២០២១ នេះ។

លោក Louis Chan នាយកប្រតិបត្តិផ្នែកលំនៅដ្ឋាន និងជាអនុប្រធានទីភ្នាក់ងារអចលនទ្រព្យ Centaline Property Agency ប្រចាំតំបន់អាស៊ី-ប៉ាស៊ីហ្វិក បានលើកឡើងថា “ទីផ្សារលំនៅដ្ឋាន បានឈានចូលដល់ដំណាក់កាលឡើងថ្លៃឥតឈប់ឈរ ក្នុងត្រីមាសទី២ ដោយតម្លៃផ្ទះអាចនឹងបំបែកកំណត់ត្រានៅខែក្រោយ”។ ទីភ្នាក់ងារនេះរំពឹងថា តម្លៃផ្ទះនឹងកើនឡើង១៥%នៅឆ្នាំនេះ៕

ដោយៈ រតនៈ

ភ្នំពេញៈ វិបត្តិកូវីត១៩ បានធ្វើឲ្យប៉ះពាល់ដល់សេដ្ឋកិច្ច សង្គមកិច្ច និងការអភិវឌ្ឍជាច្រើនមែន តែទោះជាយ៉ាងណាវិបត្តិមួយនេះ បានបង្រៀនប្រជាពលរដ្ឋខ្មែរឱ្យចេះរស់នៅតាមបែបសម័យទំនើប ដោយប្រើប្រាស់បច្ចេកវិទ្យា ខណៈវិស័យអចលនទ្រព្យក៏បាននិងកំពុងប្រើប្រាស់បច្ចេកវិទ្យាដើម្បីបម្រើឱ្យវិស័យខ្លួនផងដែរ។

ក្នុងកិច្ចសម្ភាសន៍ជាមួយ គេហទំព័រ Propertyarea កាលពីថ្ងៃទី២៧ ខែឧសភានេះលោកសំ សុខនឿនប្រធានសមាគមអចលនទ្រព្យសកលហៅកាត់ (GRA) មានប្រសាសន៍ថា មកដល់ពេលនេះអាជីវកម្មប្រមាណ៨០ភាគរយបានបើកដំណើរការឡើងវិញ ប៉ុន្តែអាជីវកម្ម២០ភាគរយផ្សេងទៀតគឹបានបិទទ្វា។

លោកបន្តថា ក្នុងអំឡុងពេលការបិទខ្ទប់ក៏ដូចជាមុននោះ ក៏រងផលប៉ះពាល់ដោយសារវិបត្តិកូវីត១៩រាតត្បាតនៅកម្ពុជា។ ទោះជាយ៉ាងណាលោកថា អាជីវកម្មដែលនៅឈរជើងបាន គឺបង្ហាញពីភាពរឹងមាំរបស់ខ្លួនដោយប្រើយុទ្ធសាស្ត្រផ្សេងៗ។

លោកបានបន្តថា ពីដើមមកគឺការប្រាស្រ័យទាក់ទងគ្នា មិនថាតែការទាក់ទងគ្នាឯកជន ឬក៏ការរកស៊ីអ្វីនោះទេ ប្រជាពលរដ្ឋខ្មែរចូលចិត្តទាក់ទងគ្នា ដោយជួបផ្ទាល់នៅកន្លែងណាមួយ បើការបញ្ជាទិញវិញគឺភាគច្រើនវេចខ្ចប់ និងទៅដល់កន្លែងតែម្ដង ពោលគឺមិនសូវមានការបញ្ជាទិញតាមអនឡាញនោះទេ ប៉ុន្តែក្នុងអំឡុងវិបត្តិកូវីតនេះ គឺប្រជាពលរដ្ឋខ្មែរចាប់ផ្ដើមទទួលស្គាល់ការលក់ ឬទិញ តាមប្រព័ន្ធអ៊ីនធើណេត ឬ ហៅថា Digital Marketing ។ ការណ៍នេះធ្វើឲ្យក្រុមហ៊ុនមួយ ឬអាជីវករមួយចំនួន បើទោះជាខ្លួនមិនចេះធ្វើទីផ្សាតាមប្រព័ន្ធនេះក្តី ក៏ត្រូវតែរៀន និងធ្វើជាបណ្ដើរៗរហូតក្រុមហ៊ុន ឬអាជីវករមួយចំនួនមានភាពល្បីល្បាញតាមប្រព័ន្ធអនឡាននេះ។

លោកបានបន្ថែមថា មិនថាតែអាជីវករឬ ក្រុមហ៊ុននោះទេដែលចាប់ផ្ដើមធ្វើការ និងជួញដូរផ្សេងៗតាមប្រព័ន្ធអនឡាញ សូមបីតែអ្នកធ្វើការជាមន្ត្រីរាជការ ឬបុគ្គលិកក្រុមហ៊ុនមួយចំនួនធំក៏ងាកមកធ្វើការតាមប្រព័ន្ធDigital នេះផងដែរ។

លោកសៀង ថៃអ្នកនាំពាក្យក្រសួងពាណិជ្ជកម្ម មានប្រសាសន៍ថា ក្នុងកំឡុងពេលនៃជំងឺកូវីដ-១៩ ការធ្វើអាជីវកម្មតាមអនឡាញមានការរីកចម្រើនគួរឲ្យកត់សម្គាល់។

លោកបានថ្លែងថា នៅពេលអាជីវកម្មតាមអនឡាញកាន់តែរីកចម្រើន វានឹងជួយសម្រួលដល់ប្រតិបត្តិការអាជីវកម្មបានឆាប់រហ័សជាង កាត់បន្ថយនូវចំណាយផ្សេងៗ។ល។ និងជួយរុញកំណើនសេដ្ឋកិច្ចជាតិផងដែរ។ ដើម្បីគ្រប់គ្រងប្រតិបត្តិការអាជីវកម្មតាមអនឡាញ កម្ពុជាមានច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក មានអនុក្រឹត្យ និងប្រកាសរបស់ក្រសួងទទួលបន្ទុកអនុវត្ត។

ថ្មីៗនេះ ក្រសួងពាណិជ្ជកម្មបានប្រកាសជូនដំណឹងស្ដីពី ការផ្ដល់លិខិតអនុញ្ញាត ឬអាជ្ញាប័ណ្ណតាមប្រព័ន្ធអេឡិចត្រូនិក សំដៅគ្រប់គ្រងសកម្មភាពអាជីវកម្មអនឡាញ និងការពារផលប្រយោជន៍អ្នកប្រើប្រាស់៕

ដោយៈគង់ សូរិយា

ភ្នំពេញៈ ក្រុមអ្នកវិភាគទីផ្សារបានមើលឃើញថា ការពង្រីកនិងស្តារឡើងវិញនូវផ្លូវជាតិលេខ២ បាននិងកំពុងធ្វើឲ្យមានភាពទាក់ទាញ ការវិនិយោគកាន់តែច្រើនពីអ្នកអភិវ ឌ្ឈន៍លំនៅដ្ឋាន និងតំបន់ឧស្សាហកម្មជាច្រើនទៀត។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍៍ឲ្យដឹងកាលពីពេលថ្មីៗនេះថា ការពង្រីកផ្លួវជាតិលេខ២ ដែលបច្ចុប្បន្នសម្រេចបានប្រមាណ៤០ភាគរយ កំពុងទាក់ទាញការវិនិយោគគំរោងលំនៅដ្ឋាន បុរី និងតំបន់ឧស្សាហកម្មជាច្រើនទៀតនាពេលអនាគត ដោយសារផ្លូវនេះបានតភ្ជាប់ជាមួយផ្លូវជាតិសំខាន់ៗ ដូចជាផ្លូវជាតិលេខ២ ផ្លូវក្រវ៉ាត់ក្រុងទី៣ជាដើម។

លោកបន្តថា “បច្ចុប្បន្នយើងឃើញមានបុរីជាច្រើនរួមហើយ កំពុងលេចរូបរាងនៅតាមផ្លូវជាតិលេខ២ ហេតុនេះពេលផ្លូវនេះស្ថាបនារួច វានឹងទាក់ទាញការវនិយោគបន្ថែមទៀត”។

បច្ចុប្បន្នបុរីពិភពលថ្មី បានបង្ហាញខ្លួនរួចហើយនៅតំបន់នេះ ខណៈបុរីកាំង ម៉េងបាននិងកំពុងសាងសង់ និងបុរីជាច្រើនទៀតបង្ហាញវត្តមានផងដែរ។ ចំណែកតំបន់ឧស្សាហកម្មលើផ្លូវនេះ ក៏មានចំនួនច្រើនផងដែរនាពេលអនាគត។

ជាមួយនឹងល្បឿននៃការស្ថាបនាហេដ្ឋារចនាសម្ព័ន្ឋ ដូចជាព្រលានយន្តហោះអន្តរជាតិភ្នំពេញថ្មី គំរោងផ្លូវក្រវ៉ាត់ក្រុងទី៣ ដែលសម្រេចបានជាង៥០ភាគរយ និងការពង្រីកហេដ្ឋារចនាសម្ព័ន្ឋជាច្រើនទៀត បាននិងកំពុងធ្វើឲ្យតម្លៃដីនៅជាយក្រុងភ្នំពេញកើនឡើងយ៉ាងគំហុក។

ជាមួយគ្នានេះ លោកសន សៀមស្ថាបនិក និងជានាយកក្រុមហ៊ុនKey Real Estate ដែលជាអ្នកឯកទេសវាយតម្លៃដីធ្លីបានឲ្យដឹងផងដែរថា តំបន់ផ្លូវក្រវ៉ាត់ក្រុងទី៣ និងតំបន់អភិវឌ្ឍន៍មួយចំនួនទៀត នៅតែទាក់ទាញការទិញលក់ ហើយតម្លៃដីបានបន្តកើនឡើងក្នុងឆ្នាំនេះ បើទោះបីជាវិបត្តិសេដ្ឋកិច្ចបណ្តាលមកពីជំងឺកូវីដបន្តញាំញីក្តី។

លោកបន្តថា “ការអភិវឌ្ឈនៅតំបន់ភាគខាងត្បូងរាជធានីភ្នំពេញ បាននិងកំពុងដើរលឿន ជាមួយនឹងមហិច្ឆតាអភិវឌ្ឍន៍ ហេដ្ឋារចនាសម្ព័ន្ឋរបស់រដ្ឋាភិបាលកម្ពុជា”។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាធ្លាប់បានមានប្រសាសន៍ថា ផ្លូវជាតិលេខ២ ពិសេសខេត្តតាកែវមានសក្តានុពល និងស័ក្តសមជាតំបន់សំរាប់អភិវឌ្ឍវិស័យឧស្សាហកម្ម៕

ដោយៈ ម៉ាណេត

ភ្នំពេញៈ អ្នកជំនាញបានលើកឡើងថា ផ្លូវ២០០៤ ដែលភាគច្រើនគេថាផ្លូវ ម៉ៃដា និងបំបែកចេញពីផ្លូវ២៧១ ទៅដល់ព្រលានយន្តហោះ នឹងក្លាយជាតំបន់អភិវឌ្ឍន៍ចម្រុះ ខណៈខណៈការអភិវឌ្ឍលំនៅដ្ឋាន និងការអភិវឌ្ឍន៍អចលនទ្រព្យផ្សេងៗ បានចាប់ផ្តើមអភិវឌ្ឍន៍ទៅតាមផ្លូវសំខាន់មួយនេះ។

លោកប៉ូ អ៊ាវគង់អគ្គនាយកក្រុមហ៊ុនអ៊ែតវ៉ានស៍ រៀលអ៊ីស្ទេត បានថ្លែងប្រាប់នៅថ្ងៃទី២៨ ខែឧសភា ឆ្នាំ២០២១ ផ្លូវ២០០៤ ដែលភាគច្រើនគេថាផ្លូវ ម៉ៃដា និងបំបែកចេញពីផ្លូវ២៧១ ទៅដល់ព្រលានយន្តហោះ នឹងក្លាយជាតំបន់អភិវឌ្ឍន៍ចម្រុះ ខណៈតំបន់នេះចាប់ផ្តើមមានការអភិវឌ្ឍបែបចម្រុះរាប់ចាប់តាំងពីលំនៅដ្ឋាន រហូតដល់អាគារពាណិជ្ជកម្ម និងខុនដូជាដើម។

លោកបានបន្តថា តំបន់នេះភាគច្រើនសម្បូរដោយការអភិវឌ្ឍន៍អចលនទ្រព្យសម្រាប់ប្រជានមានកម្រិតមធ្យមឡើងទៅ ដោយសារតែជាក់ស្តែងតម្លៃអចលនទ្រព្យនៅតាមបណ្តោយផ្លូវនេះមានតម្លៃខ្ពស់គួរសម ហើយទម្រង់នៃការអភិវឌ្ឍន៍ក្នុងតំបន់នេះគឺផ្តោតលើការអភិវឌ្ឍន៍លំនៅដ្ឋានកម្រិតមធ្យមឡើងទៅ។

លោកបានឱ្យដឹងទៀតថា ដីនៅតាមបណ្តោយផ្លូវ២០០៤នេះ មានទំហំធំៗសម្រាប់ការអភិវឌ្ឍ ហើយសម្រាប់អ្នកអភិវឌ្ឍន៍ គឺគាត់ចង់បានធំៗសម្រាប់ការអភិវឌ្ឍគម្រោងរបស់ពួកគាត់

រយៈពេល២ ឬ៣ឆ្នាំចុងក្រោយនេះ ការអភិវឌ្ឍប្រព័ន្ធហេដ្ឋរចនាសម្ព័ន្ធចាប់ផ្តើមមានប្រសើរឡើងជាបណ្តើរៗ ដែលជាផ្នែកមួយ ក្នុងការទាក់ទាញអ្នកអភិវឌ្ឍន៍ និងវិនិយោគិន ចូលទៅវិនិយោគនៅតំបន់នេះ ខណៈផ្លូវនេះមានការភ្ជាប់ទៅផ្លូវជាសំខាន់ៗជាច្រើន ដូចជាផ្លូវ២៧១ និងផ្លូវតភ្ជាប់ទៅព្រលានអន្តរជាតិភ្នំពេញជាដើម។

យោងតាមលោកប៉ូ អ៊ាវគង់ បានឱ្យដឹងថា បច្ចុប្បន្ន តម្លៃដីនៅក្នុងឡូតិ៍ធំៗ តាមបណ្តោយផ្លូវ២០០៤នេះមានតម្លៃចន្លោះពី១០០០ ទៅដល់១៥០០ដុល្លារក្នុងមួយម៉ែត្រការ៉េ ហើយតម្លៃដីខ្នាតតូចៗ មានតម្លៃចាប់ពី២០០០ ទៅដល់ជាង៣០០០ដុល្លារក្នុងមួយម៉ែត្រការ៉េ។ ចំណែកលំនៅដ្ឋាន (ផ្ទះល្វែង) វិញ មានតម្លៃចាប់ពី២៥ម៉ឺន ដល់៤០ម៉ឺនដុល្លារ។

តម្លៃដីនៅតាមដងផ្លូវ២០០៤ មានកើនឡើងខ្លាំងពេក សម្រាប់ការសាងសង់រោចចក្រសម្រាប់ជួល។ នេះបើយោងតាមរបាយការចុងក្រោយរបស់ក្រុមហ៊ុន CBRE Cambodia។

ដូច្នេះ ទីតាំងឧស្សាហកម្មនៅតំបន់ត្រូវបានផ្លាស់ប្តូរទៅខាងក្រៅក្រុងវិញ ខណៈការអភិវឌ្ឍលំនៅដ្ឋាន និងការអភិវឌ្ឍន៍អចលនទ្រព្យផ្សេងៗ ត្រូវបានមើលឃើញថាបង្វែទិសទៅតាមផ្លូវសំខាន់មួយនេះវិញ។

កាលពីខែមេសា ឆ្នាំ២០២១ រដ្ឋាភិបាល យកនាមរបស់សម្តេច គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជរាជវាំង ធ្វើជាឈ្មោះថ្មីនៃផ្លូវ២០០៤ ឬ ផ្លូវម៉ៃដា។ ឈ្មោះថ្មីនេះ ហៅជាផ្លូវការថា «មហាវិថី សម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល»។ ប៉ុន្តែប្រជាជននៅតែទម្លាប់ហៅផ្លូវនេះ ផ្លូវ២០០៤។

ផ្លូវ២០០៤ មានទទឹង២០ម៉ែត្រ និងបណ្តោយប្រមាណ៤៤៥០ម៉ែត្រ ហើយស្ថិតក្នុងខណ្ឌសែនសុខនិងខណ្ឌពោធិ៍សែនជ័យ។ ផ្លូវ២០០៤ គឺមានចំណុចចាប់ពីមហាវិថីខេមរភូមិន្ទ ឬផ្លូវ២៧១ រហូតដល់ចំណុចមហាវិថីសហព័ន្ធរុស្ស៊ី៕