កូរ៉េខាងត្បូងចុះកិច្ចព្រមព្រៀងជាមួយក្រុមហ៊ុន Pfizer ដើម្បីទិញវ៉ាក់សាំងកូវីដ-១៩ ចំនួន៣០លានដូស

ដោយៈសុខុម

សេអ៊ូល: ប្រទេសកូរ៉េខាងត្បូង បានប្រកាសកាលពីថ្ងៃសុក្រ ទី១៣ សីហាថា ខ្លួនបានចុះកិច្ចព្រមព្រៀង ជាមួយក្រុមហ៊ុនឱសថអាមេរិក Pfizer Inc ដើម្បីទិញវ៉ាក់សាំងកូវីដ-១៩ ចំនួន៣០លានដូសនៅឆ្នាំក្រោយ ហើយអាចនឹងកុម្ម៉ង់៣០លានដូសតាមក្រោយបន្ថែមទៀត។ នេះបើយោងតាមការចុះផ្សាយរបស់សារព័ត៌មាន Korea Times។

យោងតាមទីភ្នាក់ងារត្រួតពិនិត្យ និងបង្ការជំងឺកូរ៉េ (KDCA) ឱ្យដឹងថា កិច្ចព្រមព្រៀងនេះ ជាផ្នែកមួយនៃផែនការរបស់រដ្ឋាភិបាលក្រុងសេអ៊ូល ដើម្បីទិញវ៉ាក់សាំងឱ្យបានចំនួន៥០លានដូស សម្រាប់យុទ្ធនាការចាក់ដូសទី១ ឱ្យពលរដ្ឋប្រមាណ៥២លាននាក់ក្នុងប្រទេសនេះនៅឆ្នាំក្រោយ។

ទីភ្នាក់ងារ KDCA និយាយថា ការផ្គត់ផ្គង់វ៉ាក់សាំង Pfizer ចំនួន៣០លាននឹងចាប់ផ្តើមនៅត្រីមាសទី១ ដើមឆ្នាំ២០២២ ហើយអាចនឹងកុម្ម៉ង់ទិញ៣០លានដូសបន្ថែមទៀតនៅពេលចាំបាច់។ ទីភ្នាក់ងារដដែលបានបញ្ជាក់ថា ខ្លួននឹងពិចារណាកុម្ម៉ង់ទិញវ៉ាក់សាំង៣០លានដូសបន្ថែមទៀត សម្រាប់ឆ្នាំក្រោយក្នុងគោលបំណង ប្រយុទ្ធប្រឆាំងការរីករាលដាលនៃវីរុសកូវីដ-១៩ ដូចជាវីរុសបំប្លែងថ្មី Delta ជាដើម។

ទីភ្នាក់ងារនេះនិយាយថា ខ្លួននឹងពិចារណាលើកត្តាផ្សេងៗ ដូចជា ការសិក្សាចុងក្រោយស្តីពីប្រសិទ្ធភាពនៃវ៉ាក់សាំង ប្រឆាំងវីរុសបំប្លែងខ្លួនថ្មីនានា មុននឹងសម្រេចចិត្តទិញវ៉ាក់សាំងថ្នាំបន្ថែម។

កាលពីខែមិថុនា ប្រទេសនេះបានចាប់ផ្ដើមត្រៀមលក្ខណៈ​ ដើម្បីទិញវ៉ាក់សាំងបន្ថែមទៀតសម្រាប់ឆ្នាំក្រោយ នៅពេលការរីករាលដាលនៃវីរុសកូវីដ-១៩ ក្នុងប្រទេសនេះត្រូវបានរំពឹងថានឹងបន្តកើតមាន សូម្បីក្រោយសម្រេចបានភាពសាំ​ ក្នុងសហគមន៍នៅចុងឆ្នាំនេះក្ដី។

ចាប់តាំងពីប្រទេសនេះ បានចាប់ផ្តើមកម្មវិធីចាក់វ៉ាក់សាំងរបស់ខ្លួន កាលពីចុងខែកុម្ភៈកន្លងមក ពលរដ្ឋចំនួន២១.៩៨លាននាក់ ឬស្មើនឹង៤២.៨%នៃប្រជាជនសរុបចំនួន៥១.៣៤លាននាក់របស់ប្រទេសនេះ បានទទួលការចាក់វ៉ាក់សាំងដូសទី១ របស់ខ្លួន។

យោងតាមទីភ្នាក់ងារ KDCA ឱ្យដឹងថា ប្រហែល១៧,៤%ឬស្មើនឹងពលរដ្ឋចំនួន៨,៩៣លាននាក់បានចាក់វ៉ាក់សាំងគ្រប់ដូស។

ប្រទេសនេះ​មានគោលបំណងចាក់វ៉ាក់សាំងឱ្យពលរដ្ឋ បានចំនួន៣៦លាននាក់ ឬស្មើនឹង៧០% ឱ្យបានយ៉ាងតិចម្នាក់មួយដូសនៅត្រឹមខែកញ្ញា ដោយសង្ឃឹមថានឹងសម្រេចបានភាពសាំក្នុងសហគមន៍នៅខែវិច្ឆិកាចុងឆ្នាំនេះ។
រហូតមកដល់ពេលនេះ ប្រទេសកូរ៉េខាងត្បូង បានចុះកិច្ចព្រមព្រៀងទិញវ៉ាក់សាំងជាង១០០លានដូស ដូចជា វ៉ាក់សាំង Pfizer វ៉ាក់សាំង AstraZeneca និងវ៉ាក់សាំង Moderna ជាដើម ខណៈប្រទេសនេះកំពុងតែប្រឈម នឹងការរីករាលដាលវីរុសកូវីដ-១៩ រលកទី៤ ដោយសារការកើនឡើងនូវករណីឆ្លងវីរុសបំប្លែងថ្មី។

ទីភ្នាក់ងារ KDCA និយាយថា កាលពីថ្ងៃសុក្រ ទី១៣ សីហា ប្រទេសនេះបានកត់ត្រាករណីឆ្លងថ្មីចំនួន១.៩៩០ករណី ដោយករណីឆ្លងនៅរក្សាខ្ទង់២.០០០ករណីរយៈពេល៣ថ្ងៃជាប់ៗគ្នា។ ចំនួនឆ្លងសរុបក្នុងប្រទេសនេះ បានកើនឡើងដល់២២០.១៨២ករណី៕

តើរដ្ឋាភិបាលកំណត់យកប៉ូលទេសចរណ៍សំខាន់ៗនៅទីតាំងណាខ្លះក្នុងខេត្តមណ្ឌលគីរី

ដោយៈសុជាតា

មណ្ឌលគិរីៈ រដ្ឋាភិបាលបានសម្រេចអនុម័តដាក់អោយប្រើប្រាស់ជាផ្លូវការនូវផែនការមេ អភិវឌ្ឍវិស័យទេសចរណ៍ ខេត្តមណ្ឌលគីរី សម្រាប់ឆ្នាំ ២០២១រហូតដល់ ២០៣៥ និងកំណត់តំបន់សំខាន់ៗមួយចំនួន សម្រាប់ខេត្តដ៏ស្រស់ស្អាតមួយនេះ។

ផែនការមេ ដែលបានចុះហត្ថលេខាដោយសម្តេចតេជោហ៊ុន សែន នាយករដ្ឋមន្រ្តីកម្ពុជា បានលើកឡើងថា រដ្ឋាភិបាលឯកភាព ក្នុងការកំណត់អាទិភាពសំខាន់ៗចំនួន៥ ក្នុងការតំបន់ទាំងនេះអោយបានច្បាស់លាស់រួមមាន ទី១ តំបន់របៀងអេកូទេសចរណ៍ និង ទេស​ចរណ៍ធម្មជាតិ នៃដែនសត្វព្រៃទាំង៥ ទី២ តំបន់របៀងទេសចរណ៍វប្បធម៌ និងអេកូទេសចរណ៍ ប៊ូស្រា ដាក់ដាំ ៣ ក្រុងសែនមនោរម្យ ៤ តំបន់ស្រុកអូររាំងភ្ជាប់ជាមួយនឹងអភិវឌ្ឍអាកាសយានដ្ឋានខេត្តមណ្ឌលគីរី ៤ តំបន់ទីប្រជុំជននៃស្រុកកោះញែក និងទី៥តំបន់ទេសចរណ៍សមាហរ័ណតាមច្រកព្រំដែន។

ជាមួយនឹងលក្ខណៈអំណោយផល នៃអាកាសធាតុខ្យល់បរិសុទ្ធទេសភាពធម្មជាតិនៃទាក់ទាញ វាលស្មៅបៃតង ព្រមទាំងធនធានធម្មជាតិដ៏សម្បូរបែប ផែនការអភិវឌ្ឍវិស័យទេសចរណ៍ខេត្តមណ្ឌលគីរី ដើម្បីជាត្រីវិស័យចង្អុលបង្ហាញយន្តការ និងទិសដៅយុទ្ធសាស្រ្តសំខាន់សម្រាប់អភិវឌ្ឍវិស័យទេសចរណ៍ខេត្តមណ្ឌលគីរី ឆ្លើយតបទៅនឹងចក្ខុវិស័យអភិវឌ្ឍន៍ ក្នុងរយៈពេល២០២១ទៅ២០៣៥ និងបណ្តាឆ្នាំខាងមុខ។

ខេត្តមណ្ឌលគីរីនឹងត្រូវរាជរដ្ឋាភិបាល រៀបចំជាខេត្តដ៏សំខាន់ក្នុងការផ្គត់ផ្គង់ផ្កា បន្លែ និង សាច់សម្រាប់បំពេញតម្រូវការក្នុងប្រទេស និង ឈានទៅដល់ការនាំចេញទៅផ្សារក្រៅប្រទេស។

ដើម្បីសម្រេចអោយបានជោគជ័យ និងផ្លែផ្កានៃការអនុវត្តផែនការមេ អាស្រ័យទៅលើការចូលរួម និងសហការរវាងរដ្ឋឯកជន ប្រជាពលរដ្ឋ និងដៃគូអភិវឌ្ឍ។

តាមរយៈលិខិតរបស់ ទីស្តីការគណៈរដ្ឋមន្រ្តី លេខ ៤២៨ សជណ ចុះថ្ងៃទី១២ ខែសីហា ឆ្នាំ២០២១ ខណៈសម្តេចតេជោនាយករដ្ឋមន្រ្តី បានផ្តល់ហត្ថលេខាលើអារម្ភកថា នៃផែនការមេនេះផងដែរ ដើម្បីបង្ហាញពីការគាំទ្រយ៉ាងពេញលេញ ដល់ការអនុវត្តផែនកា​រមេដ៏មានសារៈសំខាន់នេះ។

ផែនការមេអភិវឌ្ឍន៍ទេសចរណ៍ ខេត្តមណ្ឌលគិរី (២០២១-២០៣០) នេះ ត្រូវបានសិក្សារៀបចំដោយគណៈកម្មការអន្តរក្រសួង ដឹកនាំដោយលោក ថោង ខុន រដ្ឋមន្ត្រីក្រសួងទេសចរណ៍ និងមានលោក ថោង រដ្ឋសក្តិ អគ្គនាយកអភិវឌ្ឍទេសចរណ៍ និងសហប្រតិបត្តិអន្តរជាតិ ជាប្រធានក្រុមការងារបច្ចេក និងលោកជុក ជំនោរ ប្រធាននាយកដ្ឋានអភិវឌ្ឍផលិតផលទេសចរណ៍ និងជាប្រធានលេខាធិការដ្ឋានគណៈកម្មាធិការជាតិ អភិវឌ្ឍទេសចរណ៍ ជាប្រធានលេខាធិការដ្ឋាន។

លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង បានដឹកនាំការងារនេះជាប្រចាំ និងម៉ត់ចត់ និងបានផ្តល់ជាអនុសាសន៍គន្លឹះសំខាន់ៗជាច្រើន។

ផែនការមេនេះ បានចាប់ផ្តើមដំណើរការរៀបចំនៅអំលុងខែសីហា ឆ្នាំ២០២០ និងបានបញ្ចប់ក្នុងខែសីហា ឆ្នាំ២០២១ ដោយមានការចូលរួម និងពិគ្រោះយោបល់យ៉ាងទូលំទូលាយទាំងនៅថ្នាក់ជាតិ និងថ្នាក់ក្រោមជាតិ និងក្នុងក្របខណ្ឌអន្តរក្រសួង។

ផែនការមេនេះក៏ត្រូវបានការគាំទ្រ និងជំរុញយ៉ាងសកម្ម និងជាប្រចាំពីសំណាក់អគ្គបណ្ឌិតសភាចារ្យអូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការជាតិអភិវឌ្ឍន៍ទេសចរណ៍ ចាប់តាំងពីដំណាក់កាលចាប់ផ្តើមរហូតទទួលបានការអនុម័តពីរាជរដ្ឋាភិបាល។

រាជរដ្ឋាភិបាលបានបង្កើតគណៈកម្មការអន្តរក្រសួង ដើម្បីសិក្សារៀបចំផែនការមេអភិវឌ្ឍន៍វិស័យទេសចរណ៍នៅខេត្តកែប និងខេត្តមណ្ឌលគិរី តាមរយៈលិខិតលេខ ០១ សសរ ចុះថ្ងៃទី១៥ ខែមករា ឆ្នាំ២០២០ ដែលមានលោកថោង ខុន រដ្ឋមន្ត្រីក្រសួងទេសចរណ៍ជាប្រធាន៕

ចំណេះដឹងអចលនទ្រព្យៈតើប័ណ្ណកម្មសិទ្ឋមានសារៈសំខាន់បែបណាខ្លះ?

ដោយៈគង់ សូរិយា

ភ្នំពេញៈ ការចុះបញ្ជីដីធ្លី នឹងផ្តល់ដល់កម្មសិទ្ធិករនូវសិទ្ធិពេញលេញ ក្នុងការប្រើប្រាស់ អាស្រ័យផល និងចាត់ចែងលើដីនោះ។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា ការផ្តល់បណ្ណកម្មសិទ្ធិ​(វិញ្ញាបនបត្រសម្គាល់ម្ចាស់អចលនវត្ថុ) ជូនប្រជា​ពល​រដ្ឋ នឹងចូលរួមធានាសុវត្ថិភាពនៃការកាន់កាប់ដី បញ្ចៀសវិវាទ លើកតម្លៃសេដ្ឋកិច្ចនៃដី និងបង្កើតជាទុនសម្រាប់ការអភិវឌ្ឍទៀតផង។

បណ្ណកម្មសិទ្ធិ ក៏ចូលរួមចំណែកធ្វើឱ្យម្ចាស់ដី មានភាពនឹងនរចិត្ត និងអាចធ្វើការសម្រេចចិត្តក្នុងការប្រើប្រាស់ និង/ឬអភិវឌ្ឍដីរបស់ខ្លួនបានច្បាស់លាស់ និងជឿជាក់ជាងមុន។

ឯកសារដដែលបានបញ្ជាក់ថា លើសពីនេះ ការចុះបញ្ជីដីក៏ជួយដល់រដ្ឋ ក្នុងការគ្រប់គ្រងការប្រមូលពន្ធប្រថាប់ត្រា និងពន្ធលើអចលនវត្ថុ បង្កើនប្រាក់ចំណូលដល់ថវិកាជាតិផងដែរ៕

ប្រធានសមាគសណ្ឋាគារកម្ពុជារំពឹងថាវិស័យនេះនឹងងើបឡើងវិញនៅដើមឆ្នាំក្រោយ

ដោយៈវឌ្ឈនៈ

ភ្នំពេញៈ ចាប់តាំងពីមានការរីករាលដាលនៃជំងឺកូវីដ១៩ នៅលើពិភពលោកមក វិស័យបដិសណ្ឋារកិច្ចនៅកម្ពុជា បានរងផលប៉ះពាល់ធ្ងន់ធ្ងរជាងគេ ក្នុងចំណោមវិស័យដែលប៉ះពាល់ជាច្រើនទៀត ដោយសារតែចំនួនភ្ញៀវទេសចរបរទេស ចូលមកកម្ពុជាបានធ្លាក់ចុះយ៉ាងគំហុក។

តែទោះជាយ៉ាងប្រធានសមាគមសណ្ឋាគារកម្ពុជា លោក ឌិន សុមេធារឹទ្ធ បានរំពឹងថា វិស័យសណ្ឋាគារនឹងងើបឡើងវិញនៅដើមឆ្នាំ២០២២នេះ ។

លោកបានបន្តថា “តាមពិតរាជរដ្ឋាភិបាលកម្ពុជាយើង ចង់បើកទូលាយប្រទេសឡើងវិញនៅអំឡុងខែតុលា២០២១នេះ ដោយអនុញ្ញាតឱ្យភ្ញៀវទេសចរ ដែលចាក់វ៉ាក់សាំង២ដូសរួចហើយអាចចូល និងមិនចាំបាច់ធ្វើចត្តាឡីស័កនោះទេ បើសិនជាធ្វើតេស្ត មិនមានវិជ្ជមានកូវីដ១៩”។

ប៉ុន្តែដោយសារតែថ្មីៗនេះ បានរកឃើញមេរោគកូវីដ១៩បំប្លែងថ្មីដែលតា ដូច្នេះផែនការនេះអាចពន្យារបន្តិចនេះ ក៏ជាការប្រុងប្រយ័ត្នមួយរបស់រាជរដ្ឋាភិបាល ។

លោកឌិន សុមេធារិទ្ឋបានបន្តថា នៅដើមឆ្នាំ២០២២ខាងមុខ អំឡុងពាក់កណ្ដាលខែមករា កម្ពុជាគ្រោងនឹងរៀបចំវេទិកាទេសចរណ៍អាស៊ាន នៅខេត្តព្រះសីហនុ ហើយវាក៏ជាការបើកសាកល្បងនូវវិស័យទេសចរណ៍ឡើងវិញ ។

យ៉ាងណាបើសិនជាមេរោគ ដែលតានេះអាចគ្រប់គ្រងបាន លោករំពឹងថាវេទិកានឹងប្រព្រឹត្តិទៅដោយរលូន ហើយពេលនោះទេសចរបរទេស នឹងចាប់ផ្ដើមកម្រើកឡើងវិញ ដែលជំរុញឱ្យវិស័យសណ្ឋាគារអាចនឹងប្រសើរឡើងវិញផងដែរ។

លោកបន្តថា “បើយើងក្រលេកមកបម្រាមគោរចរ របស់រាជធានីភ្នំពេញវិញក៏បានបន្ធូរបន្ថយទៅដល់ម៉ោង១០យប់ ដែលជាសញ្ញាថាស្ថានភាពមេរោគ ដែលតានេះធូរស្រាលជាមុន ដូច្នេះយើងនៅតែរំពឹងថា វានឹងប្រសើរនៅពេលឆាប់ៗខាងមុខនេះ”។

លោកឌិន សុមេធារិទ្ឋបានបន្ថែមថា រាជរដ្ឋាភិបាលកម្ពុជាក៏បានយកចិត្តទុកដាក់ដោយមានការផ្ដល់កម្ចី ដល់វិស័យសណ្ឋាគារ និងទេសចរណ៍ទាំងមូល ដើម្បីយកកម្ចីមកស្ដារវិស័យទាំងនេះឡើងវិញ ដែលជាការជួយជ្រោមជ្រែង ធ្វើឱ្យវិស័យទេសចរណ៍ប្រសើរឡើងវិញ ។

ជាមួយគ្នានេះ លោកជំទាវ ឆាយ ស៊ីលីវ ប្រធានសមាគមទីភ្នាក់ងារទេសចរណ៍កម្ពុជាក៏បានឱ្យដឹងផងដែរ នៅដើមឆ្នាំ ២០២២ខាងមុខនេះ វេទិកាទេសចរណ៍អាស៊ាន នៅខេត្តព្រះសីហ នុគឺជាការបើកទំព័រ និងទូងស្គរដាស់វិស័យទេសចរណ៍ឱ្យងើបឡើងវិញ ខណៈវាបានរងគ្រោះអស់រយៈពេលជិត២ឆ្នាំមកហើយ ។

លោកជំទាវរំពឹងថា បើគ្មានការរំខានពីមេរោគដែលតានោះទេ វេទិកានេះនឹងក្លាយជាវេទិកាទាក់ទាញទេសចរ មកកម្ពុជាឡើងវិញហើយពេលនោះដែរ វានឹងជួយដល់ប្រតិបត្តិករទេសចរនានា ដែលរងគ្រោះកន្លងមកទទួលបានចំណូលឡើងវិញ ដូចជាសណ្ឋាគារ ភោជនីយដ្ឋាន និងអ្នកបម្រើសេវាកម្មទេសចរណ៍ផ្សេងទៀត៕

ក្រសួងប្រៃសណីយ៍គ្រោងនឹងបង្កើតកម្មវីធីបណ្តុះបណ្តាលក្លាយទៅជាអ្នកជំនាញ ខាងផលិតមាតិកាYoutube

ដោយៈ សុជាតា

ភ្នំពេញៈ ក្រសួងប្រៃសណីយ៍ និងទូរគមនាគមន៍គ្រោងនឹង រៀបចំសិក្ខាសាលាក្រោមប្រធានបទ “ក្លាយជាអ្នក ជំនាញផលិតមាតិកា YouTube ដើម្បីជំរុញឱ្យមានការផលិតមាតិកាវីដេអូកាន់តែមានប្រយោជន៍សម្រាប់អ្នកទស្សនា។

យោងតាមសេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍នបាន   ឱ្យដឹងថា ដោយមានកិច្ចសហការជាមួយ ក្រុមហ៊ុនGoogle និង YouTube ក្រសួងនឹងរៀបចំសិក្ខាសាលាក្រោមប្រធានបទ “ក្លាយជាអ្នកជំនាញផលិតមាតិកា YouTube (Be Professional YouTubers)” តាមរយៈប្រព័ន្ធវីដេអូ (Google Meet) ដែលនឹងប្រព្រឹត្តទៅនៅថ្ងៃទី២០ ខែសីហា ឆ្នាំ ២០២១ វេលាម៉ោង ៩:០០ នាទីព្រឹក ក្រោមអធិបតីភាព ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងលោក Jean Jacque Sahel អ្នកគ្រប់ គ្រងជាន់ខ្ពស់ផ្នែកកិច្ចការរដ្ឋាភិបាល និងគោលនយោបាយសាធារណៈរបស់ក្រុមហ៊ុន Google ព្រមទាំងមាន ការអញ្ជើញចូលរួមពីវាគ្មិនជំនាញរបស់ក្រុមហ៊ុន Google និង YouTube និងអ្នកផលិតមាតិកា YouTube ល្បីៗនៅក្នុងនិងក្រៅប្រទេស។

សិក្ខាសាលានេះ រៀបចំឡើងក្នុងគោលបំណងរួមមាន ទី១ ជំរុញឱ្យមានការផលិតមាតិកាវីដេអូ កាន់តែមានប្រយោជន៍សម្រាប់អ្នកទស្សនា ជាពិសេសលើកស្ទួយដល់ការផលិតមាតិកាវីដេអូប្រកបដោយគំនិតច្នៃប្រឌិត មិនចម្លងពីអ្នកដទៃ ទី២ ផ្តល់ឱកាសឱ្យអ្នកចូលរួមជួបដោយផ្ទាល់ ជាមួយថ្នាក់ដឹកនាំក្រសួង និងតំណាង YouTube ដើម្បីស្វែងយល់កាន់តែច្បាស់អំពីស្តង់ដារ និងលក្ខខណ្ឌសម្រាប់ការផលិតមាតិកា ដែលអាចរកចំណូលបាន និងទី៣ ទទួលបានការចែករំលែកបទពិសោធល្អៗ ពីអ្នកផលិតមាតិកា YouTube ល្បីៗ ដែលមានអ្នកគាំទ្រ (Subscriber) ច្រើន នៅក្នុងនិងក្រៅប្រទេស៕

រដ្ឋាភិបាលកំពុងវាយតម្លៃ រ៉ុករកបច្ចេកវិទ្យាថ្មីៗដើម្បីដាក់បញ្ចូលក្នុងផែនការមេអភិវឌ្ឍន៍ ខេត្តព្រះសីហនុ

ដោយៈគង់ សូរិយា

ភ្នំពេញៈ  រដ្ឋាភិបាល តាមរយៈក្រសួងបរិស្ថានកំពុងវាយតម្លៃ និងសិក្សារ៉ុករកប    ច្ចេកវិទ្យាថ្មីៗ ដើម្បីយកទៅប្រើប្រាស់ ធ្វើឱ្យផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង អនុវត្តទៅដោយរលូន មានប្រសិទ្ធភាព និងមិនប៉ះពាល់ដល់បរិស្ថាន ។

អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព នៃក្រសួងបរិស្ថាន លោកវ៉ាន់ មុនីនាថ បានមានប្រសាសន៍ឲ្យដឹងកាលពីដើមសប្តាហ៍នេះថា គម្រោងនេះនឹងជួយពង្រឹងសមត្ថភាពធនធានមនុស្ស ក៏ដូចជារិះរកដំណោះស្រាយ និងបច្ចេកវិទ្យថ្មីៗនានា ដើម្បីធ្វើឱ្យការអភិវឌ្ឍ ចំណេញដល់សេដ្ឋកិច្ច បរិស្ថាន វប្បធម៌ និងសង្គម។

លោកបន្តថា “ផែនការសកម្មភាព នឹងផ្តោតសំខាន់ លើការកាត់បន្ថយឥទ្ធិពលអវិ​ជ្ជមានដល់បរិស្ថាន ដោយគ្រប់គ្រងយ៉ាងម៉ត់ចង់លើ វិស័យថាមពលដំណើរការឧស្សា​ហកម្ម ការប្រើប្រាស់ទឹក ការបញ្ចេញសំណល់ និងការងារផ្សេងៗទៀត ក្នុងគ្រប់ដំណើរការអភិវឌ្ឍខេត្តព្រះសីហនុ”។

លោកបន្តថា និយាយជារួម ផែនការមេដ៏ធំមួយនេះ ត្រូវតែធ្វើឡើងដោយមានភាពបៃតង និងផ្ដល់ប្រយោជន៍ដល់គ្រប់ផ្នែក។

ផែនការមេជំរុញឱ្យខេត្តព្រះសីហនុ ក្លាយជាតំបន់សេដ្ឋកិច្ចពិសេសគំរូពហុបំណង ត្រូវបានរដ្ឋាភិបាលប្រកាសមួយរយៈធំមកហើយ។

កាលពីខែមិថុនា កន្លងមកនេះ សម្ដេចតេជោនាយករដ្ឋមន្រ្តី ហ៊ុន សែន បានសម្រេចចេញអនុក្រឹត្យថ្មីមួយ បង្កើតគណៈកម្មធិការបច្ចេកទេសអន្តរក្រសួង ដាក់រដ្ឋមន្រ្តីជើងចាស ៣រូប ធ្វើការរួមគ្នាពន្លឿនការងារនេះ៕

បច្ចុប្បន្ន គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ក៏កំពុងប្រមូលរូបថតពីលើអាកាស នៅខេត្តព្រះសីហនុហើយ ដើម្បីប្រើប្រាស់ជាឯកសារជំនួយក្នុងពេលរៀបចំផែនការមេផងដែរ៕

 

តំណាងអង្គការសុខភាពពិភពលោកប្រចាំកម្ពុជាបន្តព្រមានអ្នកចាក់វ៉ាក់សាំងរួច មិនឲ្យធ្វេសប្រហែស

ដោយៈគង់ សូរិយា

ភ្នំពេញៈ អង្គការ​សុខភាព​ពិភពលោក បាន​ក្រើនរំឭក​ដល់​ពលរដ្ឋ​កម្ពុជា​ តាមរយៈ​អត្ថបទ​មួយ​មាន​ចំណងជើង​ថា “ការ​ចាក់​វ៉ាក់សាំង​បង្ការ​ជំងឺ​កូវីដ១៩ គឺ​ជាយុទ្ធសាស្ត្រ​ដ៏​ខ្លាំង​មួយ ប៉ុន្តែ​វា​មិនមែន​ជា​ដំណោះស្រាយ​វេទមន្ត ដើម្បី​បញ្ចប់​ជំងឺ​រាតត្បាត​កូវីដ១៩ នោះទេ”។

អង្គការ​នេះ​បាន​គូស​បញ្ជាក់​ថា “សុទិដ្ឋិនិយម​ចំពោះ​វ៉ាក់សាំង អាច​បង្ក​គ្រោះថ្នាក់”។ កាល​ដែល​បាន​ចាក់​វ៉ាក់សាំងរួច​ហើយ មិន​មាន​ន័យថា​អ្នក​គួរ​តែ​ឈប់​ អនុវត្តន៍​វិធានការ​បង្ការ​ផ្សេង​ទៀត​ ដូចជា ​ការពាក់ម៉ាស់​នៅ​ទីសាធារណៈ ការ​រក្សាគម្លាត​សុវត្ថិភាព និង​ចៀសវាង​ការ​ជួបជុំ ឬ​ប្រមូលផ្ដុំ​មនុស្ស​ជាដើម​នោះទេ”។

កិច្ច​ខិតខំ​ប្រឹងប្រែង​យ៉ាង​សកម្ម​របស់​រាជរដ្ឋាភិបាល រួមទាំង​ក្រសួង​សុខាភិបាល កន្លងមក​បាន​កំពុង​តែ​ធានា ​នូវ​ការ​មកដល់​នៃ​វ៉ាក់សាំង​ការពារ​ជំងឺ​កូវីដ១៩ កាន់តែ​ច្រើន ធានា​ថា​ពលរដ្ឋ​បាន​ចាក់​វ៉ាក់សាំង និង​ធានា​ឱ្យ​មាន​ការ​គ្របដណ្តប់ នៃ​ការ​ចាក់​វ៉ាក់សាំង​គ្រប់គ្រាន់​នៅ​ក្នុង​ប្រទេស​កម្ពុជា ជា​ពិសេស​ក្នុង​ចំណោម​ប្រជាជន​ដែល​ងាយ​រងគ្រោះ ក្នុងចំណោម​ក្រុម​មនុស្ស​ដែល​មាន​ហានិភ័យ​ខ្ពស់ និង​ដែល​រស់​នៅ​តំបន់​ដាច់ស្រយាល។

អង្គការ​សុខភាព​ពិភពលោក កោត​សរសើរ​យ៉ាង​ខ្លាំង​ចំពោះ​រាជរដ្ឋាភិបាល​កម្ពុជា ដែល​សម្រេច​បាន​នូវ​ជោគជ័យ​ដ៏ធំធេង​មួយ ក្នុង​ការ​ចាក់​វ៉ាក់សាំង​ដល់​ពលរដ្ឋ​បាន​ជាង៨លាននាក់ ឬ​ស្មើ​នឹង​ជាង៨០ភាគរយ នៃ​គោលដៅ១០លាននាក់។

ទោះជាយ៉ាងណា អង្គការ​សុខភាព​ពិភពលោក​បាន​លើកឡើង​ថា ​ការ​ចាក់​វ៉ាក់សាំង​តែ​មួយ​មុខ មិនមែន​ជា​ដំណោះស្រាយ​វេទមន្ត​នោះទេ វា​គ្រាន់តែ​ជា​ឧបករណ៍​មួយ​ក្នុង​ចំណោម​ឧបករណ៍​ដ៏សំខាន់​ជាច្រើន ​នៅ​ក្នុង​ការ​ប្រយុទ្ធ​នឹង​ជំងឺ​កូវីដ១៩ ដោយ​វា​ជួយ​កាត់​បន្ថយ​មិន​ឱ្យ​ឈឺ​ជំងឺ​ធ្ងន់ធ្ងរ ជួយ​កាត់បន្ថយ​ការ​ចូល​សម្រាក​នៅ​មន្ទីរពេទ្យ និង​កាត់បន្ថយ​ការស្លាប់។

អង្គការ​សុខភាព​ពិភពលោក​បាន​គូស​បញ្ជាក់ថា យើង​អាច​ទប់ស្កាត់​ការចម្លង​ជំងឺ​កូវីដ ១៩ បាន លុះត្រាតែ​យើងបន្ត​អនុវត្ត​អន្តរាគមន៍ ​សុខភាព​សាធារណៈ មិនមែន​ឱសថ​ចំគោលដៅ​បាន​យ៉ាង​តឹងរ៉ឹង និង​ប្រកប​ដោយ​ប្រសិទ្ធភាព គួបផ្សំ​នឹង​ការ​ចាក់​វ៉ាក់សាំង​ការពារ​ជំងឺ​កូវីដ ១៩ ផងដែរ”។

លោកស្រី​វេជ្ជបណ្ឌិត Li Ailan តំណាង​អង្គការ​សុខភាព​ពិភពលោក​ប្រចាំ​កម្ពុជា មាន​ប្រសាសន៍​ថា “ភាព​ក្លាហាន ការ​យល់ចិត្ត និង​សេចក្តី​ស្រលាញ់ ​ដែល​រដ្ឋាភិបាល និង​ប្រជាជន​កម្ពុជា ​មានចំពោះ​ប្រទេសជាតិ និងមនុស្ស​ជាទីស្រលាញ់​របស់ខ្លួន តែងតែ​ជំរុញ​ចិត្តខ្ញុំ”។ លោកស្រីបន្តថា “ជាមួយ​នឹង​សកម្មភាពបុគ្គល និង​សមូហភាព យើង​នឹង​យក​ឈ្នះនៅ​ក្នុង​ការ​ប្រយុទ្ធ​នឹង​ជំងឺ​កូវីដ១៩ បាន”។

លោកស្រី​បាន​បន្ត​ថា ជំងឺ​រាតត្បាត​កូវីដ១៩ នៅឆ្ងាយ​ពី​ទីបញ្ចប់។ ខណៈ​ដែល​មាន​សញ្ញា​នៃ​ការ​ថយចុះ​នូវ​ការចម្លង និង​ការ​ស្លាប់​នៅតាម​ខេត្ត​ខ្លះ ហានិភ័យ​នៃការ​កើនឡើង​នៃ​ករណី​កូវីដ ១៩ ដោយ​សារ​វីរុស​កូវីដ ១៩ បំប្លែង​ថ្មីប្រភេទ​ដែលតា គឺ​ខ្ពស់​ណាស់ ជាពិសេស​ប្រសិន​បើ​យើង​ឆាប់​បន្ធូរបន្ថយ ហើយ​នឹង​បន្ធូរបន្ថយ​ការ​អនុវត្ត​អន្តរាគមន៍សុខភាព​សាធារណៈ​មិនមែន​ឱសថ​លឿនពេក៕

 

ប្រទេសសិង្ហបុរីចម្រោះទឹកសម្អុយ យកមកប្រើប្រាស់ឡើងវិញដល់ទៅ៤០ភាគរយ

ដោយៈសុខុម

សិង្ហបុរី:  ដ្បិតតែមានផ្ទៃដីតូច សិង្ហបុរី ត្រូវបានទទួលស្គាល់ជាអន្តរជាតិថាជាខ្លាសេដ្ឋកិច្ចនៅអាស៊ី ព្រោះប្រទេសដែនកោះមួយនេះគឺជាមជ្ឈមណ្ឌលហិរញ្ញវត្ថុអន្តរជាតិ និងជាមជ្ឈមណ្ឌលដឹកជញ្ជូនទំនិញ តាមជើងទឹកដ៏សំខាន់នៅក្នុងតំបន់។

ប៉ុន្តែតើដឹងទេថា រដ្ឋាភិបាលរបស់ប្រទេសនេះ បានចម្រោះទឹកសម្អុយយកមកប្រើប្រាស់ឡើងវិញដល់ទៅ៤០%?។

យោងតាមសារព័ត៌មាន South China Morning Post ចុះផ្សាយកាលពីថ្ងៃទី១១ សីហា ឱ្យដឹងថា ប្រទេសនេះ មានរោងចក្រធ្វើប្រព្រឹត្តិកម្មទឹកដ៏ធំមួយ សម្រាប់ចម្រោះទឹកសម្អុយយកមកប្រើប្រាស់ឡើងវិញ ដើម្បីកាត់បន្ថយការនាំចូលទឹកសាប និងកាត់បន្ថយការបំពុលបរិស្ថានទឹកសមុទ្រ។

ដោយសារតែគ្មានធនធានទឹកធម្មជាតិ ពោលគឺទឹកសាបសម្រាប់ប្រើប្រាស់ ប្រទេ​សតូចដែលមានតែទីក្រុងនេះ ត្រូវពឹងផ្អែកខ្លាំងលើការនាំចូលទឹកសាបពីម៉ាឡេស៊ី ដែលជាប្រទេសក្បែរខាងរបស់ខ្លួន។

ដើម្បីកាត់បន្ថយការពឹងផ្អែកលើការនាំចូលទឹកសាប រដ្ឋាភិបាលប្រទេសនេះបានបង្កើតប្រព័ន្ធដ៏ជឿនលឿនមួយ សម្រាប់ធ្វើប្រព្រឹត្តកម្មទឹកសម្អុយ (ចម្រោះទឹកស្អុយទៅជាទឹកស្អាត)។ ប្រព័ន្ធនេះ រួមមាន បណ្ដាញផ្លូវក្រោមដី និងរោងចក្រធ្វើប្រព្រឹត្តកម្មដែលបំពាក់បច្ចេកវិទ្យាទំនើប។

រដ្ឋាករទឹករបស់ប្រទេសនេះបញ្ជាក់ថា បច្ចុប្បន្នទឹកសម្អុយ ដែលត្រូវបានធ្វើប្រព្រឹត្តកម្មអាចបំពេញបាន៤០% នៃតម្រូវការទឹកសាបសរុបក្នុងប្រទេសនេះ ហើយតាមការរំពឹងទុកថា តួលេខនេះនឹងកើនឡើងដល់៥៥%នៅត្រឹមឆ្នាំ២០៦០។

ខណៈភាគច្រើននៃទឹកដែលធ្វើប្រព្រឹត្តរួច ត្រូវបានប្រើប្រាស់សម្រាប់គោលបំណងឧស្សាហកម្ម ទឹកខ្លះទៀតសម្រាប់ផ្គត់ផ្គង់ទឹកផឹក ដល់ប្រជាជនប្រមាណ៥,៧លាននាក់ក្នុងប្រទេសនេះ។

ប្រព័ន្ធនេះជួយកាត់បន្ថយការបំពុលបរិស្ថានសមុទ្រ ព្រោះទឹកដែលត្រូវបានធ្វើប្រព្រឹត្តកម្មរួច ក្នុងបរិមាណតិចតួចប៉ុណ្ណោះដែលហូរចាក់ចូលទៅក្នុងសមុទ្រ។

នេះគឺផ្ទុយគ្នាស្រឡះ ពីប្រទេសភាគច្រើនដែល៨០% នៃទឹកសម្អុយហូរចាក់ចូលទៅក្នុងប្រព័ន្ធអេកូឡូស៊ី ដោយគ្មានការធ្វើប្រព្រឹត្តកម្ម ឬប្រើប្រាស់ឡើងវិញ។ នេះបើយោងតាមការប៉ាន់ប្រមាណរបស់អង្គការសហប្រជាជាតិ៕

តើការសាងសង់ព្រលានយន្តហោះអន្តរជាតិទាំងបីរបស់កម្ពុជាកំពុងវិវត្តន៍បែបណា?

ដោយៈវឌ្ឍនៈ

ភ្នំពេញៈ ទោះស្ថិតនៅក្នុងវិបត្តិដោយសារតែជំងឺកូវីដ១៩ រាលដាលក្នុងសហគមន៍និងកាន់តែមានសភាពធ្ងន់ធ្ងរ ជាងកាលពីឆ្នាំ២០២០ក៏ដោយ តែគម្រោងអភិវឌ្ឍន៍ជាច្រើននៅកម្ពុជានៅតែបន្តដំណើរការសាងសង់ដោយរលូន។

គេសង្កេតឃើញថាគម្រោងធំៗរបស់រដ្ឋាភិបាល បាននិងកំពុងបន្តសាងសង់ក្នុងពេលមានវិបត្តិកូវីដ១៩នេះដែរ ដូចជាព្រលានយន្តហោះភ្នំពេញថ្មី ព្រលានយន្តហោះអន្តរជាតិសៀមរាបថ្មី និងព្រលានយន្តហោះអន្តរជាតិតារាសាគរខេត្តកោះកុង ។

តើរហូតមកដល់ពេលនេះ គម្រោងអភិវឌ្ឍន៍ព្រលានយន្តហោះទាំងនេះ មានដំណើរការមកដល់ដំណាក់កាលណាហើយ ក្នុងកាលៈទេសៈដែលកម្ពុជាកំពុងប្រឈមខ្លាំងនឹងជំងឺរាតត្បាតនេះ?។

លោកស៊ិន ចាន់សិរីវត្ថា អ្នកនាំពាក្យ និងជាអនុរដ្ឋលេខាធិការ នៃរដ្ឋលេខាធិការ    ដ្ឋានអាកាសចរស៊ីវិល បានមានប្រសាសន៍ឲ្យដឹងក្នុងសប្តាហ៍នេះថា បើទោះបីជាកម្ពុជាជួបប្រទះនឹងបញ្ហាកូវីដ១៩ក្ដី តែដំណើរការសាងសង់ព្រលានយន្តហោះអន្តរជាតិទាំងបីរបស់កម្ពុជា ពុំមានការប្រែប្រួលនោះទេ ពោលគឺនៅតែបន្តដំណើរការសាងសង់ដដែល។

លោកបន្តថា “រហូតមកដល់ពេលនេះ វឌ្ឍនភាពនៃការកសាងព្រលានយន្តហោះទាំងបីរបស់កម្ពុជា គឺនៅតែដំណើរការសាងសង់ជាជំហានៗដដែល ជាក់ស្ដែងសម្រាប់ព្រលានយន្តហោះអន្តរជាតិភ្នំពេញថ្មីមកដល់ពេលនេះ សម្រេចការសាងសង់បានជិត២០ភាគរយ ហើយវានឹងដាក់ដំណើរការនៅពាក់កណ្ដាលឆ្នាំ២០២៣”។

លោកស៊ិន ចាន់សិរីវុត្ថាបានបន្តថា សម្រាប់យន្តហោះផ្សេងទៀត ដូចជាព្រលានយន្តហោះ សៀមរាបអង្គរថ្មី ក៏សម្រេចប្រមាណ៤៣ភាគរយ ហើយព្រលានយន្តហោះ នេះ គ្រោងនឹងបញ្ចប់រួចរាល់នៅខែកញ្ញាឆ្នាំ២០២២ នឹងដាក់ដំណើរការនៅចុងត្រីមាសទី១ឆ្នាំ២០២៣។ ចំណែកព្រលានយន្តហោះអន្តរជាតិតារាសាគរ ខេត្តកោះកុង មកដល់ពេលនេះ សម្រេចបានប្រមាណជាង៩១ភាគរយ ហើយវានឹងបញ្ចប់ទាំងស្រុងនៅខែធ្នូឆ្នាំនេះ និងដាក់ដំណើរការនៅពាក់កណ្ដាលឆ្នាំ២០២២។

លោកបន្ថែមថា ព្រលានយន្តហោះទាំងបី ដែលកំពុងដំណើរការសាងសង់នេះ ជាប្រភេទព្រលានយន្តហោះ ដែលអនុញ្ញាតឱ្យយន្តហោះធំៗចុះចតបាន ដូចជា យន្តហោះAirbus340 Airbus350 និងប្រភេទយន្តហោះ ប៊ូអ៊ីង៤០០ ប៊ូអ៊ីង៧៤៧ និងយន្តហោះប្រភេទប៊ូអ៊ីង៧៧៧ជាដើម ។

ទោះជាយ៉ាងណាលោកទទួលស្គាល់ថា ព្រលានយន្តហោះ មួយចំនួនមានភាពយឺតយ៉ាវបន្តិចដូចជាព្រលានយន្តហោះអន្តរជាតិ ភ្នំពេញថ្មីជាដើម ប៉ុន្តែយើងត្រូវទទួលស្គាល់រាល់ការដ្ឋានសំណង់ បាតគ្រឹះត្រូវការពេលវេលាយូរបន្តិចហើយ ព្រោះត្រូវការចាក់បំពេញដីបង្ហាប់គ្រឹះឱ្យមាំ តែនៅពេលដែលបានឡើងជាសរសេរមកលើហើយ វាប្រៀបដូចជាផ្សិតអញ្ចឹងដែរ គឺនឹងរីកលឿនហើយប្លែកពីមួយថ្ងៃទៅមួយថ្ងៃ ។

កម្ពុជារំពឹងថា នឹងទទួលបានអ្នកដំណើរឆ្លងកាត់ ព្រលានយន្តហោះទាំងបីរបស់ខ្លួនកាន់តែច្រើនឡើងៗពីមួយឆ្នាំទៅមួយឆ្នាំ នៅពេលព្រលានយន្តហោះទាំងបីនេះ រួច​រាល់ជាស្ថាពរនឹងវានឹងរកចំណូលបន្ថែមសម្រាប់កម្ពុជាផងដែរ៕

FDIហូរចូលប្រទេសថៃក្នុងឆមាសទី១ មានទំហំទឹកប្រាក់រហូតដល់១២ពាន់ លានដុល្លារអាមេរិក

ដោយៈសុខុម

បាងកក: លំហូរទុនវិនិយោគពីបរទេស(FDI)ហូរចូលប្រទេសថៃ ក្នុងឆមាសទី១ ឆ្នាំ២០២១ ទំហំនៃការដាក់ពាក្យសុំវិនិយោគនៅប្រទេសថៃ បានកើនឡើង១៤%ទាក់ទងនឹងចំនួនគម្រោង បើធៀបនឹងរយៈពេលដូចគ្នាកាលពីឆ្នាំ២០២០ និងកើនឡើង១៥៨%បើគិតពីតម្លៃសរុប។ នេះបើយោងតាមកាសែត Bangkok Post ចុះផ្សាយកាលពីដើមសប្ដាហ៍នេះ។

ក្រុមប្រឹក្សាវិនិយោគថៃ (BOI) និយាយថា កំណើននេះ ទទួលបានដោយសារការកើនឡើងនូវការវិនិយោគផ្ទាល់ពីបរទេស(FDI) ជាកំណើនប្រកបដោយនិរន្តភាពក្នុងឧស្សាហកម្ម ដែលមានគោលដៅវិនិយោគជាច្រើន ពីវិនិយោគិនបរទេសជាចច្រើន រួមមាន វិស័យអេឡិចត្រូនិក និងវិស័យវេជ្ជសាស្ត្រ ព្រមទាំងនៅក្នុងការផលិតថាមពលផងដែរ។

គិតពីពីខែមករា ដល់ខែមិថុនា វិនិយោគិនក្នុងស្រុក និងក្រៅស្រុកបានដាក់ពាក្យសុំវិនិយោគសរុបចំនួន៨០១គម្រោង ដែលមានតម្លៃសរុប៣៨៦,២ពាន់លានបាត (១២ពាន់លានដុល្លារអាមេរិក) បើធៀបនឹង៧០៤គម្រោង ដែលមានតម្លៃសរុប១៤៩,៨ពាន់លានបាត (៤,៥ពាន់លានដុល្លារអាមេរិក) ក្នុងរយៈពេលដូចគ្នានៃឆ្នាំ២០២០។

លោកស្រី Duangjai Asawachintachit អគ្គលេខាធិការនៃក្រុមប្រឹក្សាវិនិយោគថៃ (BOI) បានលើកឡើងថា “យើងពិតជារីករាយណាស់ ដែលវិនិយោគិនបរទេសជាច្រើន រួមទាំងវិនិយោគិនថ្មីៗជាច្រើន បានជ្រើសរើសមកវិនិយោគនៅក្នុងប្រទេសថៃ ក្នុងគ្រាដែលបរិយាកាសវិនិយោគពិភពលោក នៅតែមានបញ្ហាប្រឈមនៅឡើយ ដោយសារផលប៉ះពាល់នៃការរីករាលដាលវីរុសកូវីដ-១៩”។លោកស្រីបន្តថា “កំនើននេះឆ្លុះបញ្ចាំងពីទំនុកចិត្តរបស់វិនិយោគិន ចំពោះភាពខ្លាំងរបស់ប្រទេសថៃ នៅក្នុងឧស្សាហកម្មសំខាន់ៗដូចជាអេឡិចត្រូនិក ការផ្គត់ផ្គង់ផ្នែកវេជ្ជសាស្ត្រ និងបច្ចេកវិទ្យាជីវសាស្ត្រ”។

ខណៈពេលចំនួន នៃពាក្យសុំគម្រោងវិនិយោគផ្ទាល់ពីបរទេស ក្នុងរយៈពេល៦ខែនេះបានធ្លាក់ចុះ៦% មកនៅត្រឹម៤០៣គម្រោង តម្លៃវិនិយោគនៃគម្រោងទាំងនេះបានកើនឡើងជិត៤ដង ដល់២៧៨,៧ពាន់លានបាត (៨,៣៧ពាន់លានដុល្លារអាមេរិក) បើធៀបនឹង៤៣០គម្រោង ដែលមានតម្លៃសរុប៧១,៩ពាន់លានបាត (២,១៦ពាន់លានដុល្លារអាមេរិក)។

ក្រុមហ៊ុនវិនិយោគបរទេសចូលទៅកាន់ប្រទេសថៃ គឺក្រុមហ៊ុនជប៉ុនជាប់ចំណាត់ថ្នាក់លេខ១ ជាមួយនឹង៨៧គម្រោង ដែលមានតម្លៃ៤២,៨ពាន់លានបាត (១,២៨ពាន់លានដុល្លារអាមេរិក) សហរដ្ឋអាមេរិក ជាប់ចំណាត់ថ្នាក់លេខ២ ជាមួយនឹង១៨គម្រោងដែលមានតម្លៃសរុប២៤,១ពាន់លានបាត (៧២៤លានដុល្លារអាមេរិក) ហើយប្រទេសចិន ជាប់ចំណាត់ថ្នាក់លេខ៣ ជាមួយ៦៣គម្រោងដែលមានតម្លៃសរុប១៨,៦ពាន់លានបាត (៥៥៩លានដុល្លាអារមេរិក)។

ពាក្យស្នើសុំវិនិយោគផ្ទាល់ពីបរទេស (FDI) មានចំនួនពាក់កណ្តាលនៃចំនួនគម្រោងវិនិយោគសរុប ហើយស្មើនឹង៧២%នៃតម្លៃវិនិយោគសរុប ដែលបានដាក់ពាក្យស្នើសុំអំឡុងពេលពីខែមករា ដល់មិថុនា នេះ៕