អ្នកឧកញ៉ាពុង ឃាវសែៈយុវជនកម្ពុជាគួរងាកទៅរកការសិក្សាជំនាញបច្ចេកទេសដើម្បីសម្រេចគោលដៅ

ដោយៈវឌ្ឍនៈ

ភ្នំពេញៈ ប្រទេសកំពុងអភិវឌ្ឍន៍ គឺត្រូវការធនធានជំនាញបច្ចេកទេស ហើយតម្រូវការជាក់ស្ដែងនាពេលបច្ចុប្បន្ននេះដែរ ក៏ជាជំនាញបច្ចេកទេសដែរ ដូច្នេះយុវជនកម្ពុជាគួរងាកទៅរកការសិក្សាជំនាញបច្ចេកទេស ជាជាងជំនាញក្នុងការិយាល័យ ដើម្បីសម្រេចទៅតាមផែនការរបស់រាជរដ្ឋាភិបាល ក្លាយជាប្រទេសចំណូលខ្ពស់នៅឆ្នាំ២០៥០។

អ្នកឧកញ៉ាពុង ឃាវសែប្រធានអគ្គនាយកធនាគារកាណាឌីយ៉ាមានប្រសាសន៍ក្នុង​កម្មវិធីមួយកាលពីចុងសប្តាហ៍មុនថា ប្រទេសកំពុងអភិវឌ្ឍន៍ គេត្រូវជំនាញបច្ចេកទេសច្រើន ជាក់ស្ដែងក្រុមហ៊ុនជាច្រើននៅកម្ពុជា បានមកវិនិយោគនៅកម្ពុជា ហើយពួកគេត្រូវការជំនាញបច្ចេកទេស គឺអត់មានផ្ដល់ជូនគេ ពីព្រោះយុវជនកម្ពុជាជាច្រើន ចូលចិត្តរៀនតែជំនាញធ្វើការក្នុងការិយាល័យដូចជា ជំនាញគណនេយ្យ អ្នកគ្រប់គ្រង ធនាគារ និងហិរញ្ញវត្ថុ និងភាសាបរទេសទៅវិញ ហើយមិនសូវមានអ្នករៀនបច្ចេកទេសទេ។

អ្នកឧកញ៉ាបន្តថា ជំនាញបច្ចេកទេសនេះនារីៗ ក៏អាចសិក្សារៀនសូត្របានដែរហើយសាលាបច្ចេកទេសមួយចំនួន ក៏បានលើកទឹកចិត្តដល់នារី ដោយបញ្ចុះតម្លៃសិក្សាជូននារីច្រើនផងដែរ ហើយក៏ជាការជួយបំពេញបន្ថែម សម្រាប់ជំនាញបច្ចេកទេសនៅក្នុងប្រទេសកម្ពុជា។

អ្នកឧកញ៉ាពុង ឃាវសែបានបន្តថា “ក្រុមហ៊ុនជាច្រើនបានប្រាប់ខ្ញុំថាគេពិបាករកជំនាញបច្ចេកទេសដើម្បីធ្វើការណាស់ ដូច្នេះគេត្រូវជួលធនធានមនុស្សពីខាងក្រៅប្រទេ​សមកធ្វើការ ហើយជនបរទេសធ្វើការក្នុងប្រទេសយើង ក៏មិនបានជាប់លាប់ដែរ”។អ្នកឧកញ៉ាបានបន្តថា “អ្នកខ្លះនឹកស្រុកសុំតែទៅស្រុកវិញ ក្នុងមួយឆ្នាំពីរបីដង តែបើសិនយើងមានអ្នកចេះបច្ចេកទេសច្រើន គេអាចជួលយើងធ្វើការបានពេញដៃពេញជើង ហើយប្រាក់ចំណូលក៏បានយើងទាំងអស់ដែរ”។

ជាមួយគ្នានេះ លោកប៊ុន ភារិន នាយកសាលាវិទ្យាស្ថានជាតិពហុបច្ចេកវិទ្យាកម្ពុជា ក៏បានឱ្យដឹងមកថា ក្នុងមួយឆ្នាំៗ សាលាមិនអាចផ្គត់ផ្គង់បុគ្គលិក តាមតម្រូវការស្នើសុំរបស់ក្រុមហ៊ុន ដែលចង់បានសិស្សពីសាលាទៅធ្វើការនោះទេ ហើយសិស្សខ្លះទៀតរៀនមិនទាន់ចប់ផង ក៏មានការងាររួចបាត់ទៅហើយ។ ទាំងនេះ គឺឆ្លុះបញ្ចាំងពីតម្រូវការជំនាញបច្ចេកទេស នៅទីផ្សារការងារខាងក្រៅពិតជាច្រើនណាស់ ។

បើតាមគណៈគ្រប់គ្រងសាលាបច្ចេកទេសដុនបូស្កូ ក៏បានឱ្យដឹងផងដែរថា រៀងរាល់ឆ្នាំ មុនពេលមានវិបត្តិកូវីដ១៩ នៅពេលសិស្សជិតបញ្ចប់ការងារ តែងមានក្រុមហ៊ុនមកសម្ភាសន៍រើសបុគ្គលិកនៅសាលាផ្ទាល់ ហើយហើយក្នុងមួយឆ្នាំៗសាលាក៏អត់មានលទ្ធភាពបណ្ដុះបណ្ដាលសិស្សច្រើនដែរ ព្រោះចំនួនមានកណត់។ ម្យ៉ាងវិញទៀតការបណ្ដុះបណ្ដាលជំនាញបច្ចេកទេស ត្រូវការអភិវឌ្ឍផ្ទាល់ៗ មិនមែនរៀនតែទ្រឹស្ដីមួយដូចជំនាញ ដែលធ្វើការក្នុងការិយាល័យនោះឡើយ៕

ដំណឹងរីករាយៈបរវរកញ្ញាជប៉ុនកំពុងជួយផ្សព្វផ្សាយផលិតផលគ្រាប់ស្វាយចន្ទីររបស់កម្ពុជា

ដោយៈ សាវុធ

ភ្នំពេញៈ ក្រសួងកសិកម្ម រុក្ខាប្រមាញ់ និង នេសាទ បានបញ្ជាក់នាពេលថ្មីៗនេះថា កញ្ញា រូរី សាជី ( Ruri Saji) Miss Grand Japan 2020របស់ជប៉ុន កំពុងជួយផ្សព្វផ្សាយផលិតផលគ្រាប់ស្វាយចន្ទីរបស់កម្ពុជា ដល់ប្រជាជនជប៉ុននៅក្នុងទីផ្សារប្រទេសជប៉ុន។

លោកវេង សាខុនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានសម្តែងក្តីសង្ឃឹមថា គ្រាប់ស្វាយចន្ទីរបស់កម្ពុជា នឹងកាន់តែមានប្រជាប្រិយភាព នៅលើទីផ្សារប្រទេសជប៉ុន បន្ទាប់ពីបានការជួយផ្សព្វផ្សាយ ពីបវកញ្ញាជប៉ុនសម្រាប់កម្មវិធី Miss Grand Japan 2020 ។

លោកបញ្ជាក់ថា “សកម្មភាពផ្សព្វផ្សាយផលិផល គ្រាប់ស្វាយចន្ទីកម្ពុជា កំពុងធ្វើឡើងនៅក្នុងប្រព័ន្ធទីផ្សារជប៉ុន ដោយបរវរកញ្ញាជប៉ុន ឆ្នាំ២០២០ កញ្ញា រូរី សាជី” ។ កញ្ញា រូរី សាជី កំពុងព្យាយាមអស់ពីសមត្ថភាព ដើម្បីជូនព័ត៌មានអំពីសក្តានុពល រស់ជាតិ គ្រាប់ស្វាយចន្ទីកម្ពុជា ដល់ប្រជាជនជប៉ុន”។

កញ្ញា រូរី សាជី កាលពីខែមីនា គឺជាបវកញ្ញាជប៉ុន ដែលបានឈ្នះពានរង្វាន់លើផ្នែកសម្លៀកបំពាក់ជាតិល្អបំផុត ក្នុងកម្មវិធីប្រកួត Miss Grand International ឆ្នាំ ២០២០ ដែលរៀបចំឡើងនៅប្រទេសថៃផងដែរ។

ចាប់ពីខែមករា ដល់ខែមិថុនា ប្រទេសកម្ពុជាបាននាំចេញគ្រាប់ស្វាយចន្ទីសរុបចំនួន៨៤៣ ២៤៣តោន ដោយភាគច្រើនទៅប្រទេសវៀតណាម ថៃ និងចិន បន្ទាប់មកទៅកាន់ប្រទេសជប៉ុន ឥណ្ឌា កូរ៉េខាងត្បូង ឡាវ អារ៉ាប់រួម ជាដើម។

នាពេលថ្មីៗនេះ គ្រាប់ស្វាយចន្ទីកម្ពុជា ដែលត្រូវបានសាកល្បងដោយជនជាតិជប៉ុន បានបង្ហាញថាគ្រាប់ស្វាយចន្ទីកម្ពុជា មានរសជាតិឆ្ងាញ់ជាងគ្រាប់ស្វាយចន្ទីមកពីប្រទេសនានា ដូចជា វៀតណាម ឥណ្ឌា និងអាហ្រ្វិក ប៉ុន្តែជាទូទៅគុណភាព អនាម័យ ការផលិត ការប្រើប្រាស់បច្ចេកវិទ្យា ដាំដុះ និងការកែច្នៃផលិតផលស្វាយចន្ទី គឺនៅមានកម្រិតនៅឡើយ ហើយកត្តាអវិជ្ជមានទាំងនេះ ធ្វើឱ្យពិបាកក្នុងការស្វែងរកទីផ្សារនៅជប៉ុន។

ពាក់ព័ន្ធនឹងបញ្ហានេះ ក្រោមក្របខ័ណ្ឌនៃជំនួយឥតសំណង ខ្នាតតូចរបស់រដ្ឋាភិបាលជប៉ុន កញ្ចប់ជំនួយឥតសំណងតម្លៃ១៦៩,៧២០ ដុល្លារត្រូវបានផ្តល់ ដើម្បីពង្រឹងស ង្វាក់ និងតម្លៃគ្រាប់ស្វាយចន្ទីនៅខេត្តកំពង់ធំ។
ជាលទ្ធផល គ្រាប់ស្វាយចន្ទីកែច្នៃចំនួន៧,៦តោន ដែលជាផលិតផលសម្រេចរបស់សិប្បកម្មកែច្នៃគ្រាប់ស្វាយចន្ទីជ័យសំបូរ ដែលមានទីតាំងនៅខេត្តកំពង់ធំ ត្រូវបានដឹកជញ្ជូនដោយផ្ទាល់ទៅកាន់ប្រទេសជប៉ុនកាលពីខែមិថុនា។

ក្នុងឆ្នាំ២០២០ ការដាំដុះស្វាយចន្ទីនៅកម្ពុជា គ្របដណ្តប់លើផ្ទៃដី២៥៨.៩៨៤ ហិកតា នៅក្នុងនោះ ផ្ទៃដីប្រមូលផលមានប្រមាណ១៦២.២៩៤ ហិកតា ជាមួយនឹងទិន្នផលជាមធ្យម ១.៤៩ តោនក្នុងមួយហិកតា៕

តើស្ថានភាពវិស័យសំណង់នៅខេត្តព្រះសីហនុមានសភាពដូចម្តេច ខណៈការដ្ឋានសាងសង់៦២៤បានបន្តផ្អាកសកម្មភាពសាងសង់

ដោយៈគង់ សូរិយា

ព្រះសីហនុៈ មេឃមិនទាន់ស្រឡះទេ នៅខេត្តព្រះសីហនុ ខណៈសកម្មភាពសាងសង់សំណង់នានា បានបន្តផ្អាកសកម្មភាពជាច្រើន ដោយបច្ចុប្បន្ននេះមានការដ្ឋានសំណ​ង់រហូតដល់ចំនួន៦២៤ គ្មានសកម្មភាពសាងសង់បន្ត។

យោងតាមរបាយការណ៍របស់មន្ទីររៀបចំដែនដី នគរូបនីយកម្មនិងសំណង់ ដែលបានផ្តល់ជូនដោយ អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ កាលពីថ្ងៃទី១៥ សីហាកន្លងមកបានឲ្យដឹងថា គិតត្រឹមដំណាច់ឆមាសទី១ឆ្នាំ២០២១នេះ ខេត្តព្រះសីហនុមានសំណង់ ដែលបានសាងសង់រួច គ្មានសកម្មភាព និងផ្អាកការសាងសង់មានចំនួន១៥៨០គំរោង ក្នុងនោះ៤ការដ្ឋានបានរុះរើនិងទុកដីទំនេរ ៦២៤ការដ្ឋានគ្មានសកម្មភាព ការដ្ឋានសំណង់ចំនួន៥២៧កំពុងបន្តសកម្មភាពសាងសង់។

របាយការណ៍ដដែលបានឲ្យដឹងថា ក្នុងចំណោមសំណង់ទាំង១៥៨០ មានសំណង់ចំនួន១៥៣បានសាងសង់រួច និងកំពុងប្រកបអាជីវកម្ម។ ១០៦ការដ្ឋានបានសាងសង់រួច តែគ្មានសកម្មភាពអាជីវកម្ម និង១៦៦ការដ្ឋានបានសាងសង់រួច តែមិនមានបញ្ជាក់ពីសកម្មភាពអាជីវកម្ម។

លោកឃាង ភារ្យបានមានប្រសាសន៍ឲ្យដឹងថា អ្វីជាការងារអាទិភាព ដែលអាជ្ញាធរខេត្តកំពុងជំរុញខ្លាំង គឺបង្កើនការចាក់វ៉ាក់សាំងជូនប្រជាពលរដ្ឋទូទាំងខេត្ត និងបន្តការអនុវត្តតាមបទបញ្ជារបស់ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា។

លោកបន្តថា “ក្នុងស្ថានភាពនេះ យើងពិបាកនិយាយពីកំនើននៃការសាងសង់ និងការវិនិយោគណាស់ ស្របពេលវិស័យអាកាសចរណ៍ ក៏មិនទាន់មានសញ្ញាល្អប្រសើរនៅឡើយទេ”៕

អ្នកជំនាញៈវិស័យអចលនទ្រព្យនៅខេត្តបាត់ដំបងបន្តរីកចម្រើន ខណៈពេលគំរោងធំៗមួយចំនូនកំពុងបង្ហាញខ្លួន

ដោយៈសុជាតា

បាត់ដំបងៈ បើទោះបីជាវិបត្តិ covid 19 បានធ្វើអោយតម្លៃអចនទ្រព្យនៅខេត្តពាយ័ព្យមួយនៅទ្រឹងក៏ពិតមែន ក៏គម្រោងអភិវឌ្ឍលំនៅដ្ឋាន កំពុងសាងសង់យ៉ាងមម៉ាញឹក ក្នុងតំបន់ក្រុងបាត់ដំបង ហើយគម្រោងធំៗជាច្រើនបានបន្តកើនឡើង។

លោកកែវ សារ៉ន ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តបាត់់ដំបងបានប្រាប់ Property Area Asia កាលពីចុងសប្តាហ៍មុនថា បើយើងក្រលេកមើលតម្លៃដីធ្លី នៅតំបន់ជាយក្រុង កាលពីប្រាំឆ្នាំមុន ត្រឹមតែ១ទៅ៥ដុល្លារក្នុងមួយម៉ែត្រការ៉េ ប៉ុន្តែពេលបច្ចុប្បន្ន ប្រជាជនដែលគាត់រំពឹងទុកលើការចំណេញពីវិស័យនេះបានបន្តវិនិយោគ ដោយទិញដីទុក ធ្វើអោយតម្លៃដីក្នុងក្រុងកើនឡើងចន្លោះពី៥០ ដុល្លារ ទៅ១០០ដុល្លារនៅក្នុងមួយម៉ែត្រការ៉េ។

គម្រោងធំៗមាន ដូចជា គម្រោងអភិវឌ្ឍទីក្រុងរណបថ្មី ការអភិវឌ្ឍនៅតំបន់ភូ ពុយ គម្រោងអភិវឌ្ឍបុរី រំចេក បុរី រស្មីបាត់ដំបង បុរី ស្តាវិឡា បុរីរតនៈ បុរីរោងចក្រ បុរី បាត់ដំបងឃ្វែរជាដើមកំពុងពង្រីកមូលដ្ឋានសក្តានុពលរបស់ខេត្តនេះ។

លោកកែវ សារ៉នបានបន្ថែមទៀត គម្រោងអភិវឌ្ឍព្រលានយន្តហោះ ការអភិវឌ្ឍផ្លូវថ្មីរវាងខេត្តសៀមរាប ទៅបាត់ដំបង និងគម្រោងផ្លូវកំពុងសាងសង់ផ្លូវពីខេត្តបាត់ដំបងទៅដល់ខេត្តកោះកុង បានអោយធ្វើអោយតម្លៃដីធ្លីក្នុងខេត្តនេះ បានបន្តកើនឡើងជាបន្តបន្ទាប់ ក្នុងអត្រាកំណើន៥០ភាគរយជាប្រចាំឆ្នាំ។ ភាគច្រើនអ្នកទិញដីធ្លី ជាអ្នកវិនិយោគក្នុងស្រុក ដោយមិនទាន់មានអ្នកវិនិយោគពីបរទេសច្រើននោះទេ។

លោកបន្តថា ចំពោះតំបន់ផ្លូវក្រវាត់ក្រុង ស្ថិតនៅតាមបណ្តោយផ្លូវជាតិ៥ ជាផ្លូវហាយវ៉េអាស៊ានលេខមួយ មានការពុះដីឡូលក់ និង បង្កើតបុរីមួយចំនួនផងដែរ ធ្វើអោយតម្លៃដីតំបន់នោះកើនឡើងក្នុង១ ម៉ែត្រ១០០ដុល្លារផងដែរ។

លោកបន្ថែមទៀត ចំពោះគម្រោងអភិឌ្ឍធំចុងក្រោយ ដូចជា គម្រោងលំហែកាយបែបទេសចរណ៍របស់ឧកញ៉ា ឡេង ណាត្រា ក្នុងទំហំដី៥០០ហិចតា និងគម្រោងអភិវឌ្ឍវាយកូនគោលរបស់ឧកញ៉ា ហេងតុលា លើផ្ទៃដី៧០ហិចតា និងផែនការអភិវឌ្ឍន៍របស់ក្រុមហ៊ុនឯកជនដទៃទៀត កំពុងធ្វើឲ្យតម្លៃដីធ្លីកើនឡើងជាប្រចាំ ទោះបីមានបញ្ហាជំងឺកូវីដ១៩ក្តី។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា ជាមួយនឹងចក្ចុវិស័យច្បាស់លាស់របស់ប្រមុខរដ្ឋាភិបាល ដែលបានដាក់ចេញនូវផែនការអភិវឌ្ឍន៍ជាច្រើននៅក្នុងខេត្តនេះ រួមមានការសាងសង់ផ្លូវជាតិលេខ១០ ផែនការស្តារព្រលានយន្តហោះឡើងវិញ និងផែនការសាងសង់ផ្លុវជាតិតភ្ជាប់ពីខេត្តសៀមរាប​ មកកាន់​ខេត្តបាត់ដំបងបាននិងកំពុងជំរុញក្រុមហ៊ុនឯកជនធំៗមួយចំនួន កំពុងពង្រីកផែនការវិនិយោគរបស់ពួកគេ ដូចជាគំរោងវិនិយោគរបស់អ្នកឧកញ៉ាឡេង ណាវ៉ាត្រាជាដើម។

លោកបន្តថា “ការហូរចូលនូវការវិនិយោគពីវិស័យឯកជន និងផែនការអភិវឌ្ឍន៍ខេត្តនេះជាមណ្ឌលសំរាប់់ភ្ញៀវទេសចរណ៍អន្តរជាតិ នឹងធ្វើឲ្យខេត្តនេះក្លាយជាមូលដ្ឋាននៃកំនើនសេដ្ឋកិច្ចដ៏សំខាន់មួយ នៃភូមិភាគពាយ័ព្យប្រទេស”៕

ក្រុមហ៊ុនFacebookនិងAmazonរង់ចាំការបើកភ្លើងខៀវពីរដ្ឋាភិបាលអាមេរិកដើម្បីដំណើរការបណ្ដាញខ្សែកាបក្រោមបាតសមុទ្រ

ដោយៈ សុខុម

វ៉ាស៊ីនតោន: ក្រុមហ៊ុន Facebook Inc និងក្រុមហ៊ុន Amazon.com Inc បានស្នើសុំការអនុម័តពីរដ្ឋាភិបាលអាមេរិក ដើម្បីដំណើរការបណ្ដាញខ្សែកាបទិន្នន័យក្រោមបាតសមុទ្រថ្មីមួយរវាងហ្វីលីពីន និងរដ្ឋកាលីហ្វ័រញ៉ា បន្ទាប់ពីក្រុមហ៊ុនចិន China Mobile បានយល់ព្រមដកខ្លួនចេញពីផែនការនេះ។ នេះបើយោងតាមសារព័ត៌មាន CNA ចុះផ្សាយនៅថ្ងៃសៅរ៍ ទី១៤ សីហា នេះ។

ក្រុមហ៊ុនទាំងពីរបានប្រាប់គណៈកម្មាធិការទូរគមនាគមន៍សហព័ន្ធ (Federal Communications Commission (FCC)) ថា ពួកគេមានបំណងចាប់ផ្តើមដំណើរការអាជីវកម្មនៅចុងឆ្នាំ២០២២ ហើយបានគូសបញ្ជាក់ថា ការតភ្ជាប់ទិន្នន័យថ្មីនេះពិតជាមានសារៈសំខាន់ណាស់ ខណៈតម្រូវការកើនឡើងប្រកបដោយនិរន្តរភាពក្នុងមួយឆ្នាំៗ។

ក្រុមហ៊ុនទាំងនេះបានលើកឡើងរួមគ្នាថា បណ្ដាញខ្សែកាបថ្មីនេះនឹងជួយគាំទ្រដល់កម្មវិធីនានារបស់ក្រុមហ៊ុន Facebook ហើយនឹងធ្វើឱ្យក្រុមហ៊ុន Amazon និងបុត្រសម្ព័ន្ធរបស់ក្រុមហ៊ុននេះមានសមត្ថភាពគាំទ្រសេវាកម្ម Cloud របស់ Amazon និងភ្ជាប់ទៅមជ្ឈមណ្ឌលទិន្នន័យរបស់ខ្លួន។

អ្នកនាំពាក្យក្រុមហ៊ុន Facebook និយាយថា គម្រោងដែលគូភាគីបានព្រមព្រៀងគ្នានេះគឺជា “ផ្លូវដ៏ល្អបំផុតឆ្ពោះទៅបញ្ចប់ការសាងសង់ជាស្ថាពរ និងដាក់ឱ្យដំណើរការប្រព័ន្ធខ្សែកាបនេះដើម្បីរៀបចំរចនាសម្ព័ន្ធឡើងវិញនូវកម្មសិទ្ធិលើប្រព័ន្ធនេះ ដែលផ្ដល់លទ្ធភាពឱ្យគូភាគីតភ្ជាប់ទៅកាន់មនុស្ស និងតំបន់កាន់តែច្រើនបន្ថែមទៀត”។

ទោះជាយ៉ាងណា ភ្លាមៗក្រុមហ៊ុន Amazon និងក្រុមហ៊ុន China Mobile មិនបានឆ្លើយបំភ្លឺឡើយជុំវិញបញ្ហានេះ។

សហរដ្ឋអាមេរិក តែងតែសម្តែងការព្រួយបារម្ភម្តងហើយម្តងទៀតចំពោះតួនាទីរបស់ប្រទេសចិន នៅក្នុងគ្រប់គ្រងចរាចរបណ្តាញខ្សែកាប ដោយខ្លាចមហាយក្សចិន លួចយកការណ៍សម្ងាត់របស់ពិភពលោក។ ប្រព័ន្ធខ្សែកាបក្រោមបាតសមុទ្រប្រហែល៣០០បង្កើតបានជាឆ្អឹងខ្នងដ៏រឹងមាំនៃអ៊ីនធឺណិត ដែលផ្ទុក៩៩%នៃចរាចរទិន្នន័យរបស់ពិភពលោកនាពេលបច្ចុប្បន្ន៕

រដ្ឋាភិបាលប្រសិទ្ធនាមផ្លូវពយតាមូងទៅផ្លូវលេខ៥០២នៅក្រុងព្រះសីហនុជា “វិថីតេជោ”

ដោយៈ ប៊ី

ភ្នំពេញៈ រាជរដ្ឋាភិបាលកម្ពុជាប្រសិទ្ធនាមផ្លូវពយតាមូងតភ្ជាប់ពីវិថី ២ធ្នូ ចំណុចឆ្នេរសុខា ទៅផ្លូវលេខ៥០២ ចំណុចឆ្នេរអូរឈើទាលជា «វិថីតេជោ» និងស្ថាបនាបដិមាព្រះស្ថន្ទទ្រង់លើក្ងោក ស្ថិតនៅចំណុចប្រសព្វត្រីកោណ ដូចមានក្នុងប្លង់បង្ហាញទីតាំងភ្ជាប់ជាមួយ នៅក្រុងព្រះសីហនុ។

នេះបើយោងតាមលិខិតរបស់ទីស្តីការគណៈរដ្ឋមន្ត្រី ដែលចេញផ្សាយ នៅថ្ងៃទី១៤ ខែសីហា ឆ្នាំ២០២១នេះ។

ជាមួយគ្នានេះដែរ បើតាមលិខិតរបស់ទីស្តីការគណៈរដ្ឋមន្ត្រីដដែល បានឱ្យដឹងថា រាជរដ្ឋាភិបាលបានអនុញ្ញាតជូន គ.អ.ឆ.ក. ចាត់ចែងស្ថាបនាស្ថានីយប្រព្រឹត្តកម្មទឹកកខ្វក់ទី៣។

គម្រោងនេះមានសមត្ថភាពធ្វើប្រព្រឹត្តកម្មទឹកកខ្វក់ក្នុងបរិមាណ ២០,០០០ម៉ែត្រគូប ក្នុងមួយថ្ងៃ ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ត្រង់ចំណុចជាប់ស្ពានពីយអូរឈើទាល ដោយប្រើប្រាស់កញ្ចប់ថវិកាដែលរាជរដ្ឋាភិបាល បានសម្រេចផ្តល់ជូនរួចចំនួន២០លានដុល្លារអាម៉េរិក បានពីការអនុវត្តគម្រោងទេសចរណ៍នាគរាជ៕

តើទីផ្សារលំនៅដ្ឋាននៅទីក្រុងណាមួយនៃចក្រភពអង់គ្លេសមានតម្លៃខ្ពស់បំផុតនាពេលបច្ចុប្បន្ន?

ដោយៈ សុខុម

ក្រុងឡុងដ៍: នៅពេលសួរថា តើទីក្រុងមួយណាដែលជាទីផ្សារលំនៅដ្ឋានមានតម្លៃថ្លៃបំផុតប្រចាំប្រទេសអង់គ្លេស? ភាគច្រើនប្រាកដជាស្មានថាទីក្រុងឡុងដ៍ ដ៏ល្បីល្បាញដែលជារាជធានីនៃប្រទេសនេះ ប៉ុន្តែតាមពិតគឺមិនមែននោះទេ។

យោងតាមធនាគារអង់គ្លេស Halifax ឱ្យដឹងថា ទីក្រុង Winchester ដែលស្ថិតក្នុងតំបន់ Hampshire គឺជាទីក្រុងដែលជាទីផ្សារលំនៅដ្ឋានមានតម្លៃខ្ពស់បំផុតប្រចាំប្រទេសនេះ។ នេះបើយោងតាមសារព័ត៌មាន BBC ចុះផ្សាយកាលពីថ្ងៃទី១២ សីហា។

ផ្អែកតាមតួលេខរបស់ធនាគារខាលើបង្ហាញថា ការទិញផ្ទះមួយក្នុងតំបន់ Hampshire គឺខ្ពស់ជាងប្រាក់ចំណូលជាមធ្យមរបស់ពលរដ្ឋដល់ទៅ១៤ដងឯណោះ ខណៈការទិញផ្ទះនៅក្នុងទីក្រុងឡុងដ៍ ខ្ពស់ជាងប្រាក់ចំណូលជាមធ្យមរបស់ពលរដ្ឋចំនួន១១ដង។ នេះមានន័យថា ពលរដ្ឋដែលមានជីវភាពត្រឹមមធ្យមគឺគ្មានលទ្ធភាពទិញផ្ទះសម្រាប់រស់នៅឡើយ។

លោក Russell Galley នាយកគ្រប់គ្រងធនាគារ Halifax បានលើកឡើងថា តម្លៃផ្ទះជាទូទៅបានបន្តហក់ឡើងមិនឈប់ គឺខ្ពស់ជាងឆ្ងាយបើធៀបនឹងកំណើនប្រាក់ឈ្នួលអប្បបរមារបស់ពលរដ្ឋ។

ទីក្រុង Winchester បានវ៉ាឈ្នះទីក្រុង Oxford ដ៏ល្បីល្បាញក្លាយជាទីក្រុងដែលជាទីផ្សារលំនៅដ្ឋានមានតម្លៃខ្ពស់បំផុតនៅក្នុងការស្ទង់មតិប្រចាំឆ្នាំ ហើយអ្វីដែលកាន់តែគួរឱ្យភ្ញាក់ផ្អើលជាងនេះទៅទៀតនោះ គឺទីក្រុងឡុងដ៍ បែរជាក្លាយជាទីផ្សារលំនៅដ្ឋានដែលមានតម្លៃធូរថ្លៃបំផុតរយៈពេល៣ឆ្នាំជាប់គ្នាទៅវិញ។

ក្នុងរយៈពេលមួយឆ្នាំចុងក្រោយនេះ ធនាគារ Halifax បានរកឃើញថា តម្លៃផ្ទះជាមធ្យមនៅតាមទីក្រុងនានារបស់អង់គ្លេស បានកើនឡើង១០,៣%។

ការវិភាគរបស់ធនាគារនេះទៅលើតួលេខរបស់ការិយាល័យជាតិស្ថិតិបង្ហាញថា ប្រាក់ចំណូលជាមធ្យមសម្រាប់ពលរដ្ឋដែលរស់នៅ និងធ្វើការក្នុងទីក្រុងនានាបានកើនឡើងត្រឹមតែ២,១%ប៉ុណ្ណោះក្នុងរយៈពេលដូចគ្នានេះ។

តម្លៃផ្ទះជាមធ្យមក្នុងទីក្រុងបានកើនឡើងដល់៤០០.០០០ដុល្លារអាមេរិក ខណៈប្រាក់ចំណូលជាមធ្យមបានកើនឡើងដល់ត្រឹមតែ៥០.០០០ដុល្លារអាមេរិក ក្នុងមួយឆ្នាំ៕

រាជរដ្ឋាភិបាលសម្រេចអនុញ្ញាតឱ្យកែលម្អឆ្នេរភក់ទៅជាឆ្នេរខ្សាច់នៅខេត្តកែបដើម្បីទាក់ទាញទេសចរ

ដោយៈ វឌ្ឍនៈ

ភ្នំពេញ ៖យោងតាមសេចក្តីប្រកាសព័ត៌មានរបស់គណៈកម្មាធិការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា កាលពីពេលថ្មីនេះឱ្យដឹងថា រាជរដ្ឋាភិបាលបានអនុញ្ញាតឱ្យគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា អនុវត្តគម្រោងកែលម្អឆ្នេរភក់ទៅជាឆ្នេរខ្សាច់កម្សាន្តសាធារណៈកម្រិតខ្បៃ់ប្រវែង២៧០០ម៉ែត្រ ចាប់ពីផ្សារក្ដាមទៅដល់ព្រៃកោងកាងស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប ។

សេចក្តីប្រកាសបានឱ្យដឹងថាឆ្នេរនេះ នឹងត្រូវរៀបចំកែលម្អទៅជាឆ្នេរខ្សាច់កម្សាន្តសាធារណកម្រិតខ្ពស់តាមបណ្ដោយឆ្នេរសមុទ្រដែលមានទទឹងប្រវែងយ៉ាងតិច៣០ម៉ែត្រ និងបណ្ដោយប្រវែង២៧០០ម៉ែត្រ ដោយការរៀបចំគ្រឹះនិងចាក់ខ្សាច់សល្អ សម្រាប់ជាឆ្នេរខ្សាច់កម្សាន្តសាធារណៈ រៀបចំសួនច្បារសាធារណៈ និងដាំដើមឈើនៅលើចំណី ឆ្នេរសមុទ្រដែលមានទទឹងប្រវែង៥០ម៉ែត្រ និងបណ្ដោយប្រវែង២៧០០ម៉ែត្រ ដោយរៀបចំគ្រឹះនិងចាក់ដីមានជីវជាតិល្អ សម្រាប់សួនច្បារ និងការដាំដើមឈើ ថវិកាសម្រាប់រៀបចំកែលម្អឆ្នេរខ្សាច់កម្សាន្តសាធារណៈ សួនច្បារសាធារណៈនិងដាំដើមឈើនៅលើដីចំណីឆ្នេរសមុទ្រជាការចូលរួមរបស់ម្ចាស់អាជីវកម្មជាថ្នូរនឹងការទទួលបានដីប្រវែង៥០ម៉ឺនបន្តពីព្រំដីកម្មសិទ្ធិឆ្ពោះទៅសួនច្បារ។

គម្រោងនេះនឹងពង្រីកឆ្នេរខ្សាច់កាន់តែធំទូលាយបន្តពីសួនច្បារសំដៅលើកម្ពស់សោភណភាព និងបរិស្ថានប្រែក្លាយពីតំបន់ដែលមិនមានការអភិវឌ្ឍទៅជាតំបន់ទេសចរណ៍ដ៏ពិសិដ្ឋ មានវិសាលភាពធំទូលាយ ទាក់ទាញទេសចរបង្កើតមុខរបរជូនប្រជាពលរដ្ឋនៅមូលដ្ឋាន ចូលរួមកាត់បន្ថយភាពក្រីក្ករ និងការរួចំណែកក្នុងការអភិវឌ្ឍសេដ្ឋកិច្ចក្នុងតំបន់ក៏ដូចជាសេដ្ឋកិច្ចជាតិ។

ខេត្តកែបជាខេត្តទទួលបានភ្ញៀវទេសចរច្រើនជាងគេមួយផងដែរក្នុងចំណោមខេត្តនានាទូទាំងប្រទេសនៅក្នុងបរិបទកូវីដ១៩នេះហើយខេត្តនេះក៏មានផ្លូវតភ្ជាប់ពីភ្នំពេញកាន់តែស្រួលផងដែរ ដោយបានកសាងជិតរួចរាល់ទាំងស្រុងហើយ ។

ម្យ៉ាងទៀត រដ្ឋាភិបាលក៏បានប្រកាសសាងសង់ផ្លូវជាតិសំខាន់ៗទៅកាន់ខេត្តដើម្បីជួយសម្រួល់ទេសចរធ្វើដំណើរទៅកម្សាន្តនិងត្រលប់មកវិញ និងរំពឹងថាខេត្តនេះនឹងកាន់តែទទួលបានភ្ញៀវទេសចរកាន់តែច្រើនឡើងថែមទៀតពេលចប់វិបត្តិកូវីដ១៩៕

តើរយៈពេល៥ឆ្នាំខាងមុខ ទីផ្សារភាគហ៊ុនកម្ពុជានឹងក្លាយជាកន្លែងវិនិយោគដ៏ពេញនិយម?

ដោយៈគង់ ម៉ាលីនណា

ភ្នំពេញៈ នៅប្រាំឆ្នាំខាងមុខ សហគ្រាសខ្នាតមធ្យម និងខ្នាតធំ នឹងត្រូវរៀបចំខ្លួនចូលទីផ្សារភាគហ៊ុន ដើម្បីចូលក្នុងទីផ្សារភាគហ៊ុន ដើម្បីទទួលបាននូវភាពប្រកួតប្រជែង និងអភិវឌ្ឍន៍ខ្លួនជាមួយមូលធន ដែលមិនមែនជាបំណុល និងការចែករំលែកហានិភ័យ។

ផ្សារមូលបត្រកម្ពុជា ក៏នឹងអាចមានការចុះបញ្ជីនូវក្រុមហ៊ុនល្អៗ ពីបរទេសតាមរយៈការចុះបញ្ជីឆ្លងដែន ឬវិនិយោគិនអាចឆ្លងកាត់តាមផ្សារមូលបត្រកម្ពុជា ដើម្បីជួញដូរភាគហ៊ុននៅបរទេសដោយផ្ទាល់។ ការជួញដូរនៅផ្សារមូលបត្រកម្ពុជា ក៏នឹងមានភាពងាយស្រួលជាងមុន ដោយអាចជួញដូរតាមទូរសព្ទដោយខ្លួនឯង និងអាចជួញដូរពេលរសៀលបាន។

នៅប្រាំឆ្នាំខាងមុខ វិនិយោគិននឹងអាចមានចំណេះដឹងគ្រប់គ្រាន់ ហើយការវិនិយោគទៅលើអចលនទ្រព្យ អាចនឹងមិនមានភាពអំណោយផល ដូចបច្ចុប្បន្ន ដូចកាលពីប៉ុន្នានឆ្នាំមុន ហើយអត្រាការប្រាក់នៅធនាគារ ក៏នឹងប្រហែលជាអាចធ្លាក់ដល់៣ឬ៤%ក្នុងមួយឆ្នាំតែប៉ុណ្ណោះ។ ដូចនេះ ការវិនិយោគទៅលើភាគហ៊ុន នឹងកាន់តែទទួលប្រជាប្រិយភាព។

វិនិយោគិនស្ថាប័ន និងវិនិយោគិនបរទេសធំៗ ក៏នឹងក្លាយជាកត្តាជំរុញភាពរីកចម្រើ​ននៃទីផ្សារភាគហ៊ុនផងដែរ​ ដោយការវិនិយោគិនក្នុងទឹកប្រាក់ចំនួនធំ មកលើទីផ្សារ ព្រោះពេលនោះហេដ្ឋារចនាសម្ព័ន្ធទីផ្សារមានគ្រប់គ្រាន់។
ការវិនិយោគទៅលើមូលនិធិ (Fund) ក៏នឹងអាចក្លាយជាជម្រើសដ៏ល្អសម្រាប់វិនិយោគិន និងជួយឱ្យទីផ្សារមានការអភិវឌ្ឍន៍ ឱ្យមានការរីកចម្រើនប្រកបដោយស្ថេភាព។

ទីផ្សារមូលបត្រកម្ពុជា នឹងមានការរីកចម្រើនៅប៉ុន្មានឆ្នាំខាងមុខ ប៉ុន្តែសាធារណជនត្រូវចាប់អារម្មណ៍មកលើទីផ្សារ និងចាប់ផ្តើមវិនិយោគ (ក្នុងទឹកប្រាក់តិច) ពីពេលនេះ ដើម្បីទទួលបានបទពិសោធន៍ និងយុទ្ធសាស្ត្រក្នុងការវិនិយោគ។ ការចាប់ផ្តើមរៀនសូត្រ និងវិនិយោគ នៅពេលដែលទីផ្សារមានការរីកចម្រើន អាចនឹងធ្វើឱ្យយើងជួបនឹងហានិភ័យខ្ពស់៕

បន្ទាប់ពីភ្លៀងមេឃស្រលះ !តម្លៃផ្ទះនៅក្រុងហុងកុងហក់ឡើងខ្ពស់មិនធ្លាប់មាន

ដោយៈសុខុម

ហុងកុង: តម្លៃផ្ទះនៅទីក្រុងហុងកុង បានហក់ឡើងខ្ពស់មិនធ្លាប់មាន ខណៈទីផ្សារអចលនទ្រព្យផ្សេងៗទៀតទូទាំងពិភពលោក ក៏កំពុងហក់ឡើងថ្លៃ ដោយសារអត្រាការប្រាក់ទាបសម្រាប់កម្ចីទិញផ្ទះ និងតម្រូវការកើនឡើង ស្របពេលវិបត្តិកូវីដ-១៩ ថមថយបន្តិចម្តងៗ។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃសុក្រ ទី១៣ សីហា។

ផ្អែកតាមទិន្នន័យរបស់ក្រុមហ៊ុនអចលនទ្រព្យ Centaline Property Agency Ltd ដែលបានចាប់ផ្តើមតាមដាន អត្រាតម្លៃផ្ទះក្នុងទីក្រុងនេះតាំងពីឆ្នាំ១៩៩៣ បង្ហាញថា តម្លៃផ្ទះលក់បន្តបានហក់ឡើង០,៦៥% សម្រាប់សប្តាហ៍គិតត្រឹមថ្ងៃទី៨ សីហា ឆ្នាំនេះ។ តម្លៃហក់ឡើងខ្ពស់ មិនធ្លាប់មានលើកចុងក្រុង ដែលក្រុមហ៊ុននេះបានកត់ត្រានៅពាក់កណ្តាលឆ្នាំ២០១៩ ជាពេលដែលចាប់ផ្តើមផ្ទុះការតវ៉ាប្រឆាំងរដ្ឋាភិបាលហុងកុង។ តម្លៃអចល​ន​ទ្រព្យប្រភេទលំនៅដ្ឋាន បានហក់ឡើង៨,៦%ចាប់តាំងពីដើមឆ្នាំនោះមក។

តម្រូវការខ្ពស់ ការផ្គត់ផ្គង់មានកម្រិត និងអត្រាការប្រាក់ទាប សម្រាប់កម្ចីទិញផ្ទះបានធ្វើឱ្យទីផ្សារអចលនទ្រព្យថ្លៃបំផុត របស់ពិភពលោកមួយនេះ កាន់តែហក់ឡើងថ្លៃ សូម្បីអំឡុងពេលមានការព្រួយបារម្ភ អំពីអនាគតរបស់ទីក្រុង ដែលមជ្ឈមណ្ឌលហិរញ្ញវត្ថុអន្តរជាតិ បន្ទាប់ពីផ្ទុះបាតុកម្មតវ៉ា និងការដាក់ចេញច្បាប់សន្តិសុខជាតិ ពីសំណាក់ចិនប៉េកាំង ក្នុងឆ្នាំ២០២០ ក្ដី។

ភាពសម្បូរហូរហៀរនៃសាច់ប្រាក់ក្នុងទីផ្សារ ក៏បានជំរុញឱ្យតម្លៃហក់ឡើងនៅក្នុងមជ្ឈមណ្ឌលហិរញ្ញវត្ថុធំៗដទៃទៀត នៅទូទាំងពិភពលោកផងដែរ។ តម្លៃអចលនទ្រព្យប្រភេទលំនៅដ្ឋាននៅសហរដ្ឋអាមេរិក កាលពីខែមេសា បានហក់ឡើងខ្លាំងបំផុតសម្រាប់រយៈពេល៣០ឆ្នាំមកនេះ ដោយនៅតំបន់ជាយក្រុង និងតំបន់ជនបទកាន់តែហក់ឡើងខ្ពស់ថែមទៀត។

តម្លៃផ្ទះនៅនូវែលសេឡង់ ដែលស្ថិតក្នុងចំណោមទីផ្សារ ដ៏ទាក់ទាញបំផុតរបស់ពិភពលោកបានហក់ឡើងថ្លៃរយៈពេល៣១ខែជាប់ៗគ្នាផងដែរ។

ការឡើងថ្លៃនេះក៏ជាសញ្ញាបង្ហាញថា ការធ្វើសម្រុកធ្វើចំណាកស្រុករបស់ពលរដ្ឋហុងកុ ទៅរស់នៅប្រទេសអង់គ្លេស ក្រោមកម្មវិធីទិដ្ឋាការថ្មីមួយ មិនបានជះផលប៉ះពាល់ដល់ទីផ្សារអចលនទ្រព្យនៅក្រុងហុងកុងឡើយ។
បន្ថែមពីលើតម្រូវការខ្លាំងពីអ្នកទិញក្នុងស្រុក ក្រុមវិនិយោគិនមកពីចិនប៉េកាង ក៏កំពុងជំរុញឱ្យទីផ្សារនេះហក់ឡើងថ្លៃផងដែរ។

យោងតាមក្រុមហ៊ុនអចលនទ្រព្យ Midland Realty ឱ្យដឹងថា វិនិយោគិនចិនប៉េកាំង មានចំណែក១១,២% នៃការទិញផ្ទះសរុបក្នុងរយៈពេល៤ខែដើមឆ្នាំ២០២១ បើធៀបនឹង១០.៥%ក្នុងរយៈពេលដូចគ្នាកាលពីឆ្នាំមុន។
តាមការរំពឹងទុក តម្លៃផ្ទះនឹងបន្តហក់ឡើង។ ក្រុមហ៊ុនអចនលទ្រព្យ Cushman & Wakefield រំពឹងថា តម្លៃផ្ទះនឹងហក់ឡើង៥%ទៀតនៅឆមាសទី២ ចុងឆ្នាំ២០២១ នេះ៕