ដោយៈគង់ ម៉ាលីន

ភ្នំពេញៈ ផលចំណេញពីការវិនិយោគដីធ្លីនៅកម្ពុជា នៅតែមានអត្រាខ្ពស់បើធៀបនឹងការវិនិយោគលើផ្នែកដទៃទៀត ខណៈទីផ្សារដីធ្លីបានចាប់ផ្តើម មានភាពសកម្មឡើងវិញ។

លោកស្រីអាន សុធីតាអ្នកជំនាញអចលនទ្រព្យអន្តរជាតិបានមានប្រសាសន៍ឲ្យដឹងតាមទូរស័ព្ទកាលពីសប្តាហ៍មុនថា ផលចំណេញពីការវិនិយោគដីធ្លីក្នុងរយៈពេល១០ឆ្នាំចុងក្រោយនេះ ស្ថិតក្នុងរង្វង់១២ភាគរយប្រចាំឆ្នាំ ខណៈបណ្តាខេត្តនានាមានកំនើនផងដែរ ប៉ុន្តែតិចឬច្រើនអាស្រ័យលើសក្តានុពលតំបន់និមួយៗ។

លោកស្រីបន្តថា “ផលចំណេញពីការវិនិយោគផ្នែកដីធ្លី នៅតែមានភាពល្អប្រសើរ សំរាប់រយៈពេល១០ឆ្នាំខាងមុខ ដោយសារកម្ពុជាមានការអភិវឌ្ឍលឿន មានការវិនិយោគច្រើនលើហេដ្ឋារចនាសម្ព័ន្ឋពីរដ្ឋាភិបាល”។

ជាមួយគ្នានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រាសាសន៍ឲ្យដឹងផងដែរថា ផលចំណេញពីការវិនិយោគដីធ្លីនៅរាជធានីភ្នំពេញខ្ពស់ ដោយសារគោលនយោបាយអភិវឌ្ឍន៍របស់រដ្ឋាភិបាល ការពង្រីកទីក្រុងជាបន្តបន្ទាប់ តម្លៃដីធ្លីនៅកម្ពុជាមានកម្រិតទាប ធៀបជាមួយបណ្តាប្រទេសក្នុងតំបន់អាស៊ាន។

លោកបន្តថា “ដីធ្លីនៅទីក្រុងនឹងកើនឡើង៥ដងទៀតនាពេលអនាគត ហើយតម្លៃដីនៅជាយក្រុងនឹងកើនឡើងកាន់តែច្រើនជាងនេះ អាស្រ័យលើទីតាំង និងសក្តានុពលរបស់តំបន់និមួយៗ”៕

ដោយគង់ សូរិយា

ភ្នំពេញៈ ប្រធានសមាគមអ្នកជំនាញអចលនទ្រព្យកម្ពុជា បានមើលឃើញថា ខណ្ឌចំនួន២នៅភាគខាងត្បូង នៃទីក្រុងភ្នំពេញនាពេលបច្ចុប្បននេះ បាននឹងកំពុងសក្តានុពល និងរីកចំរើនខ្លាំង លើវិស័យសំណង់ និងអចលនទ្រព្យ បើធៀបជាមួយនឹងបណ្តាទិសផ្សេ​ងទៀត។

លោកស្រីចេវ សុឃុនអតីតៈប្រធានសមាគមអ្នកជំនាញអចលនទ្រព្យកម្ពុជា បានមានប្រសាសន៍ប្រាប់គេហទំព័រ Propertyarea.asia កាលពីពេលថ្មីៗនេះបានឱ្យដឹងថា ខណ្ឌចំនួនពីរ ដែលលោកស្រី មើលឃើញដែលកំពុងមានសក្តានុពល លើវិស័យអចលនទ្រព្យនេះ គឺខណ្ឌមានជ័យ និង ខណ្ឌដង្កោរ របស់រាជធានីភ្នំពេញ។

លោកស្រីថ្លែងថា “តំបន់ដែលមានសក្តានុពលខ្លាំង នាពេលបច្ចុប្បន្ននេះយើ​ងឃើ​ញនៅតំបន់ភាគខាងត្បូងមានសន្ទុះខ្លាំង ជាពិសេសនៅខាងខណ្ឌដង្កោរ ក៏ដូចជានៅខាងងខណ្ឌមានជ័យ នៅតំបន់គម្រោងផ្សារទំនើបអេអន៣ (តំបន់ផ្លូវ៦០ម៉ែត្រ) ដែលអ្នកអភិវឌ្ឍន៍មួយចំនួនកំពុងអនុវត្តគម្រោងធំៗរបស់ខ្លួន”។

លោកស្រីបន្ថែមថា នៅតំបន់នេះ មានគម្រោងអភិវឌ្ឍន៍ធំៗជាច្រើន ដែលបាននិងកំពុងដុះឡើង និងកំពុងអភិវឌ្ឍន៍ ដែលនឹងជួយឱ្យវិស័យអចលនទ្រព្យ កាន់តែមានសន្ទុះរីកចំរើនកាន់តែខ្លាំង តែយ៉ាងណានៅតំបន់ផ្សេងៗ ទៀតក៏មានការរីកចំរើនផងដែរ។

ជាមួយគ្នានេះ លោកស្រីតាំង ហ៊ួរ នាយិការក្រុមហ៊ុនអចលនទ្រព្យ Amatak Property Service ធ្លាប់បានឱ្យដឹងដែរថា តំបន់ភាគខាងត្បូងនៃរាជធានីភ្នំពេញបាន និងកំពុងរីកចំរើនខ្លាំង លើវិស័យអចលនទ្រព្យច្រើន ជាងបណ្តាជាយក្រុងនានា ជាពិសេសតំបន់ផ្លូវ៦០ម៉ែត្រ ឬមហាវិថីសម្តេចតេជោហ៊ុនសែន ដោយសារមានគម្រោងធំៗជាច្រើនទៅកាន់ទីនោះ។

លោកស្រីបន្តថា “តំបន់ផ្លូវ៦០ម៉ែត្រ ហាក់មានសកម្មភាពរស់រវើកខ្លាំងជាង ដោយ​សារតែតំបន់នេះ មានគម្រោងធំៗជាច្រើន កំពុងរីកដុះដាល់នៅតំបន់នេះ ជាពិសេសមានគម្រោងផ្សារទំនើប AEON Mall៣ ដោយពេលខ្លះ អ្នកវិយោគស្វែងរកទិញនៅតំបន់នេះមិនបាន ព្រោះវាមានតម្លៃខ្ពស់”។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា ការរីកចម្រើនភាគខាងត្បូងក្រុងភ្នំពេញ មិនមែនជារឿងចៃដន្យនោះទេ ប៉ុន្តែវាកើតឡើងដោយលក្ខខ័ណ្ឌមួយចំនូនដូចជា ការរីកចម្រើននៃនគរូបនីយកម្ម ការកើនឡើងនូវចំនួនប្រជាពលរដ្ឋចូលមករស់នៅក្រុងភ្នំពេញ (កត្តាប្រជាសាស្រ្ត) ការវិនិយោគលើហេដ្ឋារចនាសម្ព័ន្ឋធំៗរបស់រដ្ឋាភិបាល ដូចជា ព្រលានយន្តហោះអន្តរជាតិភ្នំពេញថ្មី ផ្លូវក្រវ៉ាត់ក្រុងទី៣ ជាពិសេសតំបន់ភាគខាងត្បូងទីក្រុងភ្នំពេញ មានហេដ្ឋារចនាសម្ព័ន្ឋតភ្ជាប់ទៅ​កាន់បណ្តាញផ្កូវជាតិធំៗជាច្រើន ដូចជាផ្លូវជាតិលេខ២ ផ្លួវជាតិលេខ៣ ផ្លូវជាតិលេខ៤ជាដើម។

លោកបន្តថា “ការរីកចម្រើននៃសេដ្ឋកិច្ចជាតិ ដោយសារកត្តាសុខសន្តិភាព ពិតជាតម្លៃស្នូលមិនអាចខ្វះបាន ដែលជំរុញឲ្យប្រទេសកម្ពុជា មានការរីកចម្រើនយ៉ាងឆាប់រហ័​ស និងឈានទៅកាន់លំដាប់ថ្មីមួយទៀត”៕

ដោយៈ ប៊ី

ភ្នំពេញៈ វិស័យអចលនទ្រព្យនៅខេត្តកំពង់ស្ពឺ ខេត្តកណ្ដាល និងផ្នែកខ្លះនៃខេត្តព្រៃវែងនឹងទទួលបានផលវិជ្ជមាន ពីការអភិវឌ្ឍផ្លូវក្រវាត់ក្រុងទី៣ និងទី៤ ដែលនឹងផ្ដល់សក្ដានុពលខ្ពស់ នៃការអភិវឌ្ឍន៍នៃទាំងសេដ្ឋកិច្ច និងវិស័យអចលនទ្រព្យ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីម បានថ្លែងនៅចុងសប្តាហ៍កន្លងមកនេះថា ផ្លូវក្រវាត់ក្រុងទី៣និងទី៤ និងការអភិវឌ្ឍន៍មុំ ៣៦០ឌឺក្រេនៃទីក្រុងភ្នំពេញ នឹងផ្ដល់សក្ដានុពលខ្ពស់ នៃការអភិវឌ្ឍនៃសេដ្ឋកិច្ច និងវិស័យអចលនទ្រព្យតំបន់៣នេះ រួមមានខេត្តកំពង់ស្ពឺ ខេត្តកណ្ដាល និងផ្នែកខ្លះនៃខេត្តព្រៃវែងជាដើម។

លោកបានថ្លែងថា “អ្នកវិនិយោគក្នុងវិស័យអចលនទ្រព្យ គួរវិនិយោគនៅតំបន់ជាយក្រុងភ្នំពេញ និងតាមបណ្ដាខេត្តមួយចំនួនទៀត ដែលកំពុងផ្សារជាប់ជាមួយរាជធានីភ្នំពេញ ដូចជាខេត្តកំពង់ស្ពឺ ខេត្តកណ្ដាល ផ្នែកខ្លះនៃខេត្តព្រៃវែង ដែលជាតំបន់ និងខេត្តមានសក្ដានុពលខ្ពស់ ព្រមទាំងអភិវឌ្ឍន៍លឿន”។

លោកបានបន្ថែមថា “ដោយសារតែខេត្ត និងតំបន់ទាំងនេះជាកន្លែង ដែលផ្សារជាប់ដោយផ្លូវក្រវាត់ក្រុងទី៣ ទី៤ និងការអភិវឌ្ឍន៍មុំ ៣៦០ឌឺក្រេនៃរាជធានីភ្នំពេញ ដូច្នេះតំបន់ទាំងអស់នេះនឹងផ្ដល់សក្ដានុពលខ្ពស់ នៃការអភិវឌ្ឍន៍នៃសេដ្ឋកិច្ច និងវិស័យអច​លនទ្រព្យ”។

ជាមួយគ្នានេះដែរលោកបានឱ្យដឹងថា ក្រៅអំពីរាជធានីភ្នំពេញ និងខេត្តព្រះសីហនុ ដែលបាន និងកំពុងមានសក្ដានុពលខ្ពស់ទាំងផ្នែកអចលនទ្រព្យ និងវិស័យទេសចរណ៍ គឺមានខេត្តកែប សៀមរាប និងខេត្តកំពត ដែលជាខេត្តដែលមានសក្ដានុពលខ្ពស់ និងជាខេត្តដែលទាក់ទាញភ្ញៀវទេសចរ និងជំរុញដល់វិស័យអចលនទ្រព្យ។

លោកសុខនីមបានបន្ដថា នៅក្នុងខេត្តកែប មានការអភិវឌ្ឍន៍លំនៅដ្ឋានមួយចំនួនធំ ពិសេសរីស៊តតូចៗ កំពុងមានវឌ្ឍនភាព រីឯខេត្តកំពតក៏ចាប់ផ្ដើមឡើងពីកំពង់ផែ ជាផ្នែកតូចមួយ សម្រួលការដឹកជញ្ជូន។ ចំណែកខេត្តសៀមរាប ជាខេត្តដែលផ្ដល់សក្ដានុពលខ្ពស់ ក្នុងការទទួលភ្ញៀវទេសចរ រាប់លាននាក់ក្នុងមួយឆ្នាំៗ។

លោកបានឱ្យដឹងទៀតថា មានកត្តាជាច្រើនធ្វើឲ្យខេត្តទាំងនេះ មានសក្ដានុពលខ្ពស់លើវិស័យទេសចរណ៍ ខេត្តសម្បូរដោយធនធានធម្មជាតិ មានប្រាសាទដែលជាកេរ្ដិ៍តំណែលពីដូនតា៕

ដោយស៊ីវ ម៉េង

ត្បូងឃ្មុំៈ ដោយមើលឃើញសក្តានុពលនៃតំបន់មួយ ស្ថិតនៅក្បែរទីរួមខេត្តត្បូងឃ្មុំ លោកឧកញ៉ាតេង រិទ្ធីអគ្គ បានសម្រេចចិត្តបោះទុនវិនិយោគ ជាង៣០លានដុល្លារសាងសង់បុរី Krek City Garden។

បុរីដែលផ្តោតចម្បង លើសំណង់ស្ថាបត្យកម្មបែបឆ្លាតវៃ ដែលផ្តល់នូវផាសុខភាពដល់អ្នករស់នៅ ជាមួយនឹងសំណង់ប្រកបដោយសោភ័ណភាព ទាក់ទាញ និងផាសុខភាព។

លោកឧកញ៉ាតេង រិទ្ធីម្ចាស់បុរី Krek City Gardden និងជាស្ថាបត្យករ ដែលបានបញ្ចប់ការសិក្សាលើជំនាញស្ថាបត្យកម្ម នៅក្រៅប្រទេសបានមានប្រសាសន៍៍ឲ្យដឹងថា ការសាងសង់បុរីដែលមានផ្ទៃដីជិត២០ហិកតា នាពេលបច្ចុប្ប​ន្ននេះ យើងផ្តោតសំខាន់លើគុណភាព សោភ័ណភាព និងផាសុខភាពដល់ការរស់នៅរបស់អ្នករស់នៅក្នុងបុរីនេះ។

លោកបន្តថា “បុរីនេះផ្តោតសំខាន់លើសំណង់ជាពិសេស ដោយផ្តោតលើលំហរនៃការប្រើប្រាស់ក្នុងការរស់នៅ លំហណាមិនប្រើប្រាស់ យើងមិនផលិតវាឡើងនោះទេ។ ឧទាហរ​ណ៍ផ្ទះអាជីវកម្មរបស់យើង យើងមិនធ្វើឡៅតឿនោះទេ ដោយសារវាមិនមានលំហរគ្រប់គ្រាន់ ដែលមើលទៅមានសភាពចង្អៀត និងមិនមានខ្យល់ចេញចូលគ្រប់គ្រាន់”។ លោកបន្តថា “ជំនួសជាន់ឡៅតឿ យើងបានធ្វើឡើងមួយជាន់ទៀត ពិសេសទំហំផ្ទះយើងសាងសង់ទទឹង៤,៥ម៉ែត្រ ដើម្បីមានលំហគ្រប់គ្រាន់ ធ្វើឲ្យផ្ទះមានភាពទូលាយ និងធ្វើឲ្យបរិ​យាកាសក្នុងផ្ទះត្រជាក់ និងមានភាពសុខដុម”។

ជាមួយគ្នានេះ ជណ្តើរផ្ទះក៏យើងមិនធ្វើចោទខ្លាំងនោះទេ ហេតុនេះទើបយើងធ្វើជណ្តើរមិនឲ្យមានការបាំងផ្ទះ ដែលកាំនិមួយៗមានកំពស់ល្មម និងមិនហត់ និងងាយស្រួលឡើងចុះ មិនលំបាកចោទខ្លាំងធ្វើឲ្យមានគ្រោះថ្នាក់នោះឡើយ។

លោកបណ្ឌិតតេង រិទ្ឋីបានបញ្ជាក់ថា “ហេតុនេះនៅក្នុងប្លង់ស្ថាបត្យកម្ម យើងមិនគិ
តតែពីផលចំណេញមួយមុខទេ ប៉ុន្តតែយើងគិតដល់គុណភាពជីវិត ធ្វើយ៉ាងណាឲ្យអ្នករស់នៅមានភាពងាយស្រួល កក់ក្តៅ ប្រកបដោយផាសុខភាព និងសុខដុមរមនាក្នុងលំ​នៅដ្ឋាន”។លោកបន្តថា “យើងផ្តោតលើអ្វីដែលស្អាត និងប្រើប្រាស់មានភាពងាយស្រួល​ ព្រោះអ្វីយើងផ្តោតលើស្ថាបត្យកម្មមានភាពងាយស្រួល ប៉ុន្តែអ្នកសាងសង់ខ្លះមិនផ្តោតលើពន្លឺក្នុងផ្ទះនោះទេ ដោយធ្វើបង្អួចតូចៗ ដែលមិនផ្តល់ពន្លឺនិងខ្យល់អាកាសចេញ​ចូលបានស្រួលឡើយ”។

ផ្ទះខ្លះយើងបានសាងសង់ចិញ្ចើមមុខផ្ទះ នៅសល់១៥ម៉ែត្រ ខ្លះ៣៥ម៉ែត្រ ដែលមានសួនច្បារ និងដាំដើមឈើខៀវស្រងាត់ ពិសេសមានផ្លូវថ្មើជើង កន្លែងហាត់ប្រាណ និងផ្សារដែលមានស្តង់ទំហំធំៗចាប់ពី៣ម៉ែត្រ គុណនឹង៣ម៉ែត្រ និងទំហំ៤ម៉ែត្រ គុណនឹង​៤ម៉ែត្រ ដោយផ្តោតលើភាពស្អាត អនាម័យជាមួយមុខទំនិញសម្បូរបែប ដោយបើកលក់ពេលព្រឹក ថ្ងៃត្រង់ រហួតដល់ពេលរាត្រី។

លោកបណ្ឌិតតេង រិទ្ឋីបានបន្តឲ្យដឹងទៀតថា ជាមួយនឹងផ្តោតការលើបរិយាកាសនៃ​ការរស់នៅ បែបផែនជីវិតសម័យថ្មី បរិបទនៃការប្រែប្រួលអាកាសធាតុ ស្ថាបត្យកម្មសំណង់បុរី Krek City Garden ក៏បានគិតពីពីបែបផែនសំណង់ស្ថាបត្យកម្ម ដែលឆ្លើយតប​នឹងលក្ខខ័ណ្ឌភូមិសាស្រ្ត នគរូបនីយកម្ម និងលក្ខខ័ណ្ឌអាកាសាធាតុផងដែរ។លោកបន្តថា ជាមួយនឹងការគិតគូយ៉ាងចម្បងនេះ ការសាងសង់លំនៅដ្ឋានក្នុងបុរីនេះ បានធ្វើកំពស់រហូតដល់៦ម៉ែត្រ គិតពីជាន់ក្រោមដល់ជាន់ទី១ ដែលធ្វើឲ្យអ្នករស់នៅដកដង្ហើមស្រួល សម្រាកលំហែរ នេះជាអ្វីដែលប្រជាពលរដ្ឋចង់បាន។

លោកបន្តថា “នេះជាភាពច្នៃប្រឌិត និងទស្សនវិស័យវែងឆ្ងាយ ដែលធ្វើឲ្យយើងមានផលចំណេញតិច ប៉ុន្តែយើងគិតពីជីវិត ព្រោះយើងមិនចង់ឲ្យប្រជាជនដកដង្ហើមក្នុងប្រអប់ទេ វាមានគ្រោះថ្នាក់់ណាស់ដល់សុខភាព ហើយប្រជាជនយើងបច្ចុប្បន្នកំពុងប្រឈ​មបញ្ហានេះ”។ លោកបន្តថា “បន្ទប់ទឹកក៏ជាប្រភពនៃបញ្ហាផងដែរ ព្រោះវាយើងរៀបចំមិនបានល្អ វានឹងធ្វើឲ្យសាយភាយខ្យល់កខ្វក់ និងសាយភាយមេរោគ ដែលប៉ះពាល់ដល់សុខភាពដល់អ្នករស់នៅ”។

លោកបណ្ឌិតតេង រិទ្ឋីបានបន្តទៀតថា គំរោងធំៗដែលលោកបានចូលរួមដេញថ្លៃកន្លងមក គឺយើងឈ្នះលើ Master Plan ហ្នឹងតែម្តង ដោយយើងបានឌីសាញផ្លូវនិមួយៗមានទំហំធំ ផ្លូវមិនទាល់ ជាក់ស្តែងនៅបុរី Krek City Garden មានផ្លូវព័ទ្ឋជុំវិញ មិនទាល់ឡើយ ហើយមានផ្លូវរំដោះចរា​ចរណ៍ ករណីមានអគ្គិភ័យនៅប្លុកណាមួយកើតឡើង។ លោកបន្តថា ពីផ្លូវមួយទៅផ្លូវមួយពីអាគារមួយ ទៅអាគារមួយមានប្រវែង៥០ម៉ែត្រ ដែលធ្វើឲ្យបរិយាកាស នៃការរស់នៅមានខ្យល់ចេញចូល ដែលផ្ទះខ្លះមានមុខផ្ទះចន្លោះ១៥ ទៅ៣៥ម៉ែត្រ។

លោកបន្តថា “ខ្ញុំចង់ផ្តល់បរិយាកាសរស់នៅ ដូចនៅប្រទេសជឿនលឿននានាដូចជាអាមេរិក បារាំងជាដើម ជាក់ស្តែងទីក្រុងឌូបៃពីអាគារមួយ ទៅអាគារមួយជាមួយផ្លូវកាត់ទទឹងមានប្រវែង២០០ម៉ែត្រ”។ លោកបន្ថែមថា “ហេតុនេះទើបខ្ញុំសង់ផ្លូវធំៗ ព្រោះទស្សនរបស់ខ្ញុំ មានផ្លូវធំ គឺមានក្តីសង្ឃឹមធំ”៕

ដោយៈគង់ សូរិយា

កណ្តាលៈ បណ្តារោងចក្រ សហគ្រាសជាច្រើនបាន និងកំពុងបង្ហាញវត្តមាននៅលើផ្លូវជាតិលេខ៥១ ស្ថិតក្នុងស្រុកពញ្ញាឮ និងស្រុកអង្គស្នូល ខេត្តកណ្តាល ជាតំបន់ដែលមន្រ្តីជាន់ខ្ពស់ក្រសួងសាធារណៈការបង្ហើបថា ផ្លូវក្រវ៉ាត់ក្រុងទី៤អាចចាប់ផ្តើមចេញពីតំបន់នេះ។

ទីប្រឹក្សាសមាគមអចកនទ្រព្យសកល លោកយិន លាងគង់បានមានប្រសាសន៍ឲ្យដឹងកាលពីថ្ងៃទី២០ មិថុនាកន្លងមកថា ដោយសាររដ្ឋបាលរាជធានីភ្នំពេញ បានដាក់ចេញគោលនយោបាយថ្មី ដោយរុញរោងចក្រ សហគ្រាសចេញពីរាជធានីភ្នំពេញ បានធ្វើឲ្យរោងចក្រ សហគ្រាសនានាបានចាប់យកទីតាំងផ្លូវជាតិលេខ៥១ ផ្លូវជាតិលេខ៤១ និងផ្លូវជាតិលេខ៤៤ជាមូលដ្ឋានផលិតកម្មរបស់ពួកគេជំនួសវិញ។

លោកបន្តថា “មូលដ្ឋានផលិតកម្មនៃរោងចក្រ សហគ្រាសនៅលើផ្លូវសំខាន់ៗទាំងនេះ ពិតជាមិនមែនជារឿងចៃដន្យនោះទេ ប៉ុន្តែផ្លូវសំខាន់ៗទាំងនេះបានក្លាយជាច្រកចេញសំខាន់ ទៅកាន់ផ្លូវជាតិសំខាន់ៗជាច្រើន ដូចជា ផ្លូវជាតិលេខ៣ លេខ៤ ផ្លូវល្បឿនលឿនភ្នំពេញ ព្រះសីហនុជាដើម”។

លោកយិន លាងគង់បានបន្តថា ការណ៍នេះហើយ បានធ្វើឲ្យតម្លៃដីធ្លីនៅលើផ្លូវជាតិសំខាន់ៗទាំងនេះ កើនឡើងក្នុងរង្វង់៥ដង ក្នុងរយៈពេល៣ឆ្នាំចុងក្រោយនេះ ដោយ​បច្ចុប្បន្នដីនៅលើបណ្តោយផ្លូវនេះ មានតម្លៃចន្លោះពី៣៥ ទៅ១៥០ដុល្លារក្នុងមួយម៉ែត្រការ៉េ គិតជាមធ្យម អាស្រ័យលើទីតាំង ទំហំដី និងសក្តានុពលនៃតំបន់និមួយៗ។

បច្ចុប្បន្នតំបន់ជុំវិញភ្នំឧត្តុង តំបន់ស្របតាមផ្លូវជាតិលេខ៥១ ស្ថិតក្នុងស្រុកពញ្ញាឮតម្លៃដីបានកើនឡើងយ៉ាងគំហុក ស្របពេលរោងចក្រ សហគ្រាសថ្មីៗកំពុងបង្ហាញខ្លួនត្រៀមត្រា ប៉ុន្តែបញ្ហាកង្វះកម្មករអាចក្លាយជាចំណោទមួយផងដែរនាពេលអនាគត។

លោកវ៉ី សំណាងអភិបាលខេត្តកំពង់ស្ពឺ បានមានប្រសាសន៍ឲ្យដឹងកាលពីសប្តាហ៍មុនផងដែរថា បច្ចុប្បន្នរដ្ឋបាលខេត្តជម្រុញការអភិវឌ្ឍ នៅលើផ្លូវជាតិសំខាន់ៗចំនួន៣ គឺផ្លូវជាតិលេខ៤១ ផ្លូវជាតិលេខ៥១ និងផ្លូវជាតិលេខ៤៤ ដោយសារតំបន់នេះបានក្លាយជាមូលដ្ឋានចាប់អារម្មណ៍ខ្ពស់ពីអ្នកវិនិយោគជាតិ និងអន្តរជាតិ។

លោកបន្តថា “ការរៀបចំសន្តិសុខ សណ្តាប់ធ្នាប់របៀបរៀបរយ មានសារៈសំខាន់ណាស់ ដើម្បីធ្វើយ៉ាងណាឲ្យតំបន់នេះកាន់តែទាក់ទាញការវិនិយោគ”៕

ដោយៈ វឌ្ឍនៈ

ភ្នំពេញៈ ទោះបីជាស្ថានភាពនៃជំងឺកូវីដ១៩ នៅក្នុងប្រទេសកម្ពុជានៅតែមានស្ថានភាពធ្ងន់ធ្ងរក្ដី តែបើក្រលេកទៅមើលស្ថានភាពអាជីវកម្ម ចរាចរណ៍ និងការធ្វើមុខជំនួញនានា បានចាប់ផ្ដើមប្រសើរឡើងវិញ ក្នុងនោះ អ្នកស្វែងទិញដីធ្លីទាំងសម្រាប់ការវិនិយោគ ឬអភិវឌ្ឍន៍ក៏បានចាប់ផ្ដើមឡើងវិញជាមួយគ្នានេះដែរ។

ជាមួយគ្នានេះដែរ សកម្មភាពនៃការទិញលក់ដីធ្លីនៅក្នុងពេលនេះក៏ឃើញថា ចាប់ផ្ដើមមានកំណើនឡើងវិញផងដែរ។ ជាក់ស្ដែងបើតាមភ្នាក់ងារលក់ដីធ្លីជាច្រើនបានបង្ហាញថា ខ្លួនចាប់ផ្ដើមមានការមមាញឹកឡើងវិញហើយ បន្ទាប់ពីស្ងប់ស្ងាត់រយៈពេលជាង២ខែ ដោយសារតែការបិទខ្ទប់រាជធានីភ្នំពេញ និងក្រុងតាខ្មៅ។

លោកជិន ណារិនភ្នាក់ងារអចលនទ្រព្យមួយរូបបានឱ្យដឹងនៅថ្ងៃទី១៩ ខែមិថុនា ឆ្នាំ២០២១នេះថា កាលពីពេលដែលរដ្ឋាភិបាលបិទខ្ទប់រាជធានីភ្នំពេញ និងក្រុងតាខ្មៅ រូបលោកក៏ដូចជាក្រុមការងារដទៃទៀត មិនបានចេញទៅណាមកណា ឬជូនភ្ញៀវមើលដីធ្លីនោះឡើយ ព្រោះពេលនោះភ្ញៀវក៏មិនហ៊ានចេញដែរ ព្រោះខ្លាចខុសបម្រាមរដ្ឋាភិបាល តែនៅពេលរដ្ឋាភិបាលប្រកាសបើកចរាចរណ៍ និងសកម្មភាពអាជីវកម្មឡើងវិញ រូបលោក និងក្រុមការងារផ្សេងទៀតក៏បានចេញធ្វើសកម្មភាពស្វែងរកដីធ្លី សម្រាប់ផ្ដល់ព័ត៌មានជូនភ្ញៀវអ្នកទិញ។

កាលពីពេលថ្មីៗនេះ សាលារាជធានីភ្នំពេញក៏បានប្រកាសឱ្យអាជីវកម្មទាំងអស់នៅតាមផ្សាររដ្ឋនានាទូទាំងរាជធានីភ្នំពេញបើកដំណើរការឡើងវិញ ជាមួយនឹងវិធានការពាររបស់ក្រសួងសុខាភិបាល ដែលការបើកអាជីវកម្មទាំងនេះឡើងវិញ ធ្វើឱ្យអាជីវករ ដែលបាត់បង់ចំណូលកាលពីបិទខ្ទប់នោះ បានទទួលចំណូលត្រលប់មកវិញខ្លះៗ។

ប្រធានសមាគមសេដ្ឋកិច្ចឯករាជ្យក្រៅប្រព័ន្ធ លោកវន់ ពៅបានឱ្យដឹងថា ការបើកដំណើរការ អាជីវកម្មឡើងវិញគឺជារឿងល្អប្រសើរ សម្រាប់អាជីវករ ដែលពឹងលើអាជីវកម្មតែមួយមុខ ដែលអាចឱ្យពួកគេទទួលបានចំណូលត្រលប់មកវិញ តែយ៉ាងណាអាជ្ញាធរគួរតែមានវិធីក្នុងការទប់ស្កាត់ការឆ្លង និងចម្លងកូវីដ១៩បន្តទៀត ដើម្បីកុំឱ្យប៉ះពាល់ដល់អាជីវកម្មរបស់ពលរដ្ឋបន្តទៅទៀត។

យ៉ាងណាក៏ដោយបើក្រលេកមកមើលចំនួនអ្នកឆ្លងកូវីដ១៩នៅក្នុងប្រទេសកម្ពុជានៅពេលបច្ចុប្បន្ននេះ នៅតែមានតួលេខខ្ពស់ ហើយអ្នកស្លាប់ក៏មានជារៀងរាល់ថ្ងៃ តែរដ្ឋាភិបាលនៅតែបន្តអនុញ្ញាតឱ្យអាជីវកម្មមួយចំនួនបើកដំណើរការវិញនិងតម្រូវឱ្យមានការ ការពារត្រឹមត្រូវជាក់លាក់ បើពុំទេ បើសិនជាមានការឆ្លងកាន់តែមានទ្រង់ទ្រាយធំបន្តទៀត អាជីវកម្មអាចនឹងត្រូវរឹតបន្តឹងសាជាថ្មី ៕