ដោយៈសុខហេង
តាខ្មៅៈ ក្រោយពីស្ថានភាពនៃជម្ងឺកូវីត១៩បានថមថយ នៅថ្ងៃទី១៧ ខែឧសភា ឆ្នាំ២០២១ បានចាប់ផ្តើមបើកដំណើរការឡើងវិញហើយ ដោយទទួលភ្ញៀវចាប់ពីម៉ោង6:30នាទីព្រឹក ដល់ម៉ោង3:30រសៀល ជាមួយរសជាតិអាហារសុខភាព និងប្រើប្រាស់ផលិតផលសរីរាង្គ គ្មានជាតិគីមី។
ម្ចាស់អាហារដ្ឋានដីដុះ អ្នកស្រី មុន ម៉ូលីយ៉ាន បានមានប្រសាសន៍អោយដឹងកាលពីព្រឹកថ្ងៃទី១៧ ឧសភាកន្លងមកថា ការបើកដំណើរការឡើងវិញ នូវដីដុះអាហារដ្ឋាននេះក្រោយកូវីតបានថមថយចុះជាងមុនច្រើន ម្យ៉ាងអ្នកស្រីក៏បានរៀបចំការស្កេនកំដៅ និងបាញ់អាកុល នៅមុខហាងមុនភ្ញៀវចូលពិសារអាហារព្រឹក និងថ្ងៃត្រង់ ស្របទៅតាមវិធាន៣ការពារ និង៣កុំរបស់រដ្ឋាភិបាលកម្ពុជា។
ដីដុះអាហារដ្ឋានមានទីតាំងស្ថិតនៅភូមិតាខ្មៅ ឃុំតាខ្មៅ ក្រុងតាខ្មៅ ពោលគឺនៅទល់មុខនឹងមន្ទីររៀបចំដែនដី នគរូបនីយកម្មនិងសំណង់ និងមន្ទីរជំនាញជាច្រើនទៀត។
អ្នកស្រីបន្តថា ការបើកដំណើរឡើងវិញនៅថ្ងៃដំបូង អាហារដ្ឋាននេះទទួលបានភ្ញៀវចូលគួរសម ដោយសារមានមុខម្ហូបពិសេសៗជាច្រើនរួមមាន៖ បាយមាន់, គុយទាវខគោ, ខគោនំប័ង, អាហារសម្រន់ និងបាយសម្លរដែលមានសម្លរដូចជា៖ ឆាបន្លែគ្រប់មុខ, សម្លរម្ជួរយួន, ពងទាត្រីប្រម៉ា,ឆាមាន់ចេកខ្ចី,និងសម្លរខ្មែរជាច្រើនមុខទៀត។ ក្រៅពីបាយ គុយទាវ នៅមានអាហារជាច្រើនមុខដូចជា៖ ស៊ីវម៉ាយ, ហាកាវ, គាវស្នូលស្ពៃក្តោប, នំប៉ាវសាអ៊ីវ, នំប៉ាវអត់ស្នូល, ស៊ីម៉ាយកោប្រាយ, នំប៉ាវរូបជ្រូកស្នូលពងមាន់, នំប៉ាវមានស្នូលពងទាប្រៃ,នំប៉ាវរូបឃ្មុំស្នូលពងមាន់, នំប៉ាវស្នូលឃ្វីនស្នូលឈូក។
ក្រៅពីបាយ អាហារសម្រន់ ដីដុះអាហារដ្ឋានក៏មានលក់ភេសជ្ជៈធម្មជាតិ៦មុខចម្រាញ់ដោយម្ចាស់ហាងផ្ទាល់ មានដូចជា៖ ទឹកល្ពៅ, ទឹកការ៉ុត, ទឹកម្ពូរព្រឹក, ទឹកពោត, ទឹកសណ្តែកស,ទឹកសណ្តែកខៀវ ដែលមានតម្លៃសមរម្យ និងជំនួយដល់សុខភាពបានយ៉ាងល្អ។
ដីដុះអាហារដ្ឋានមានបីជាន់ ជាន់ខាងក្រោម និងឡាវតឿ កន្លែងសម្រាប់ភ្ញៀវពិសារអាហារ ដោយនៅជាន់ទី១ មានបន្ទប់ប្រជុំVIP៥បន្ទប់ ដែលអាចប្រជុំលក្ខណៈជាក្រុមបាន ដោយបំពាក់ជូនឧបករណ៍បំបងសម្លេង និងអាចមើលទេសភាពពីលើបានយ៉ាងស្អាត, និងជាន់ទី២ និងទី៣ មានបន្ទប់ប្រជុំធំទូលាយ អាចជួបប្រជុំគ្នាបាន១០០នាក់។ វាកាន់តែងាយស្រួល សម្រាប់អ្នកមុខអ្នកការដែលត្រូវការកន្លែងប្រជុំ ហើយមានអាហារ និងភសេជ្ជៈនៅកន្លែងតែមួយ ដែលអាចនិយាយបានថាចំណេញពេលវេលាបានច្រើន។
ដីដុះអាហារដ្ឋានយើងខ្ញុំក៏មានលក់ផងដែរនូវ អាហារបំប៉នសុខភាព និងអាហារបំប៉នស្បែកសក់បានយ៉ាងមានប្រសិទ្ធភាពដែលមាន ដូចជា ថ្នាំដុះធ្មេញ, ថ្នាំជួយបណ្តុះសក់, តែស្រូវសាឡី, ថ្នាំបំបាត់សក់ស្កូវ, ខូឡូជែនជំនួយក្រពះពោះវៀន។
សម្រាប់លោក-អ្នក ដែលមិនទាន់បានភ្លក់ស្នាដៃក៏ដូចជាមិនទាន់បានស្គាល់ដីដុះអាហារដ្ឋានសូមអញ្ជើញមកភ្លក់រសជាតិថ្មី ជាមួយនិងសេវាកម្មរហ័សទាន់ចិត្ត ។ ដីដុះអាហារដ្ឋានមានទីតាំងស្ថិតនៅភូមិតាខ្មៅ ឃុំតាខ្មៅ ក្រុងតាខ្មៅ ខេត្តកណ្តាល ឬអាចទំនាក់ទំនងតាមលេខ 087 841 841/011 434 383៕
ដីដុះអាហារដ្ឋានចាប់បើកដំណើរការឡើងវិញ ជាមួយរសជាតិអាហារសុខភាព និងប្រើប្រាស់ផលិតផលធម្មជាតិ
កម្ពុជានិងអូស្ត្រាលីជំរុញការអភិវឌ្ឍវិស័យពាណិជ្ជកម្មដើម្បីបង្កើនកិច្ចសហប្រតិបត្តិការរវាងប្រទេសទាំងពីរ
ដោយៈ ប៊ី
ភ្នំពេញៈ កម្ពុជា និងអូស្ត្រាលីជំរុញការពង្រឹងកិច្ចសហប្រតិបត្តិការលើវិស័យពាណិជ្ជកម្មអន្តរជាតិរវាងកម្ពុជានិងអូស្រ្តាលី និងជាពិសេសការបន្តជួយគំាទ្ររបស់អូស្រ្តាលីក្នុងការអភិវឌ្ឍពាណិជ្ជកម្មកម្ពុជា ក្នុងបរិបទទ្វេភាគី តំបន់ និងពហុភាគី។
ការជំរុញការអភិវឌ្ឍនេះ ត្រូវបានធ្វើឡើងក្នុងកិច្ចពិភាក្សារវាងលោកប៉ាន សូរស័ក្ដិរដ្ឋមន្រ្ដីក្រសួងពាណិជ្ជកម្ម និងលោក Pablo Kang ឯកអគ្គរាជទូតអូស្ត្រាលី ប្រចាំព្រះរាជាណាចក្រកម្ពុជា តាមរយៈប្រព័ន្ធវីដេអូនៅព្រឹកទី១៨ ខែឧសភា ឆ្នាំ២០២១។
ក្នុងក្របខ័ណ្ឌទ្វេភាគី ភាគីទាំងពីរបានធ្វើការផ្លាស់ប្តូរយោបល់ និងពិភាក្សាលើការបន្តអនុវត្តគម្រោងអភិវឌ្ឍន៍ពាណិជ្ជកម្មក្រោមជំនួយរបស់អូសា្រលី រួមមាន ការពង្រឹងនិងការកសាងសមត្ថភាពមន្រ្តីពាណិជ្ជកម្ម ការអភិវឌ្ឍ និងកសាងបទដ្ឋានគតិយុត្តពាក់ព័ន្ធវិស័យពាណិជ្ជកម្ម ការបន្តអនុវត្តកម្មវិធីខ្សែសង្វាក់តំលៃកសិកម្មកម្ពុជា-អូស្ត្រាលី (CAVAC) និងការជំរុញការធ្វើពាណិជ្ជកម្មតាមប្រព័ន្ធអេទ្បិចត្រូនិក ជាដើម។
លោករដ្ឋមន្រ្ដីក្រសួងពាណិជ្ជកម្ម បានថ្លែងថា អូស្រ្តាលីបានបន្តគាំទ្រ និងចូលរួមចំណែកយ៉ាងសំខាន់ក្នុងការអភិវឌ្ឍវិស័យពាណិជ្ជកម្មកម្ពុជា និងវិស័យពាក់ព័ន្ធនានា។ ជាមួយគ្នានេះដែរ ភាគីទាំងពីរ បានបញ្ជាក់សារជាថ្មីនូវការប្តេជ្ញាចិត្ត បង្កើនទំហំពាណិជ្ជកម្មទ្វេភាគី លើកម្ពស់កិច្ចសហប្រតិ្តការលើវិស័យពាណិជ្ជកម្ម និងគ្រប់វិស័យពាក់ព័ន្ធ ជាពិសេសទំនាក់ទំនងជិតស្និទ្ធរវាងប្រទេសទាំងពីរ។
ក្នុងក្របខ័ណ្ឌតំបន់ ឯកឧត្តម ឯកអគ្គរាជទូតបានជម្រាបជូនថា អូស្ត្រាលីនឹងចាប់ផ្តើមដាច់ចេញនូវគំនិតផ្តួចផ្តើមជំរុញ ការប្រើប្រាស់ឯកសារពាណិជ្ជកម្មតាមប្រព័ន្ធអេឡិចត្រូនិក ក្រោមក្របខណ្ឌកិច្ចព្រមព្រៀងពាណិជ្ជកម្មសេរីអាស៊ាន-អូស្ត្រាលី-ណូវែលហ្សេឡង់ (AANZFTA) ដើម្បីសម្រួលឱ្យការធ្វើពាណិជ្ជកម្មជាមួយអូស្ត្រាលី ឱ្យកាន់តែមានភាពងាយស្រួល និងកាត់បន្ថយការចំណាយ សំដៅលើកកម្ពស់ភាពធន់នៃខ្សែច្រវាក់ពាណិជ្ជកម្ម និងជំរុញកំណើនពាណិជ្ជកម្មក្នុងតំបន់ ជាពិសេសក្នុងបរិការណ៍នៃវិបត្តិជំងឺឆ្លងកូវីដ-១៩ និងក្រោយវិបត្តិនេះ៕
កម្ពុជានិងរដ្ឋជាសមាជិកអាស៊ានប្តេជ្ញាធ្វើឲ្យប្រសើរឡើងនូវការដឹកជញ្ជូនក្នុងតំបន់
ដោយៈគង់ សូរិយា
ភ្នំពេញៈ ប្រទេសកម្ពុជា និងបណ្តារដ្ឋជាសមាជិកអាស៊ាន ប្តេជ្ញាធ្វើឱ្យប្រសើរឡើងនូវការដឹកជញ្ជូនក្នុងតំបន់ ខណៈពេលវិស័យនេះកំពុងទទួលរង ផលប៉ះពាល់យ៉ាងធ្ងន់ធ្ងរពីការរាតត្បាតនៃជំងឺកូវីដ-១៩។
យោងតាមកិច្ចប្រជុំសម្របសម្រួល ការដឹកជញ្ជូនអាស៊ានលើកទី៤០ តាមរយៈប្រព័ន្ធវីដេអូពីចម្ងាយ ដែលកម្ពុជាបានធ្វើជាម្ចាស់ផ្ទះកាលពីថ្ងៃទី ២៣-២៤ ខែមីនា ឆ្នាំ២០២១ នាពេលថ្មីៗកន្លងទៅនេះ ប្រទេស កម្ពុជា និងប្រទេសជាសមាជិកអាស៊ាន បានប្តេជ្ញាធ្វើឱ្យប្រសើរឡើងនូវការដឹកជញ្ជូនក្នុងតំបន់ ខណៈ ពេលវិស័យនេះកំពុងទទួលរងផលប៉ះពាល់យ៉ាងធ្ងន់ធ្ងរពីការរាតត្បាតនៃជំងឺកូវីដ-១៩។
បច្ចុប្បន្ននេះសមាជិកអាស៊ានទាំងអស់ កំពុងពិភាក្សារកវិធីសម្របសម្រួលការដឹកជញ្ជូនឱ្យមានភាពប្រសើរឡើង ដោយក្នុងនោះមានកិច្ចព្រមព្រៀង ក្របខ័ណ្ឌអាស៊ានចំនួន៤បានចាប់ផ្តើមអនុវត្តជាជំហានៗ ដើម្បីស្តារការដឹកជញ្ជូនក្នុងតំបន់ឡើងវិញ ប៉ុន្តែដោយសារតែបញ្ហានៃការរាតត្បាតជំងឺកូវីដ-១៩ ការអនុវត្ត កិច្ចព្រមព្រៀងទាំងនេះបានជួបប្រទះនូវបញ្ហារអាក់រអួល។
ជាមួយគ្នានេះផងដែរ ភាគីកម្ពុជាកំពុងខិតខំប្រឹងប្រែងធ្វើការ ជាមួយភាគីថៃក្នុងការរិះរកនីតិវិធីបើកច្រកទ្វារ ព្រំដែនអន្តរជាតិស្ទឹងបត់-បានណងអៀន ជាបណ្ដោះអាសន្ន ដើម្បីសម្រួលដល់ការដឹកជញ្ជូនទំនិញ ឆ្លងកាត់ច្រកទ្វារព្រំដែនរវាងប្រទេសទាំងពីរ និងធ្វើការជាមួយភាគីវៀតណាម ដើម្បីបើកច្រកទ្វារព្រំដែនព្រៃវល្លិ៍-ព្រែកចាកផងដែរ។
ប្រសិនបើច្រកទ្វារទាំងនេះត្រូវបានបើកដំណើរការ វានឹងជួយសម្រួលដល់ការដឹក ជញ្ជូនទំនិញ ជំរុញកំណើនពាណិជ្ជកម្ម ទេសចរណ៍ បើកឱកាសយ៉ាងទូលំទូលាយដល់កិច្ចសហប្រតិបត្តិ ការអន្តរជាតិ ការវិនិយោគ ការធ្វើពាណិជ្ជកម្មឆ្លងដែន ការបង្កើតការងារធ្វើ និងការទាក់ទាញភ្ញៀវទេសចរសំដៅលើកកម្ពស់សេដ្ឋកិច្ចគ្រួសារ និងសង្គមជាតិផងដែរ។
ជាងនេះទៅទៀត កម្ពុជាបាននិងកំពុងខិតខំប្រែងប្រែងពង្រីក និងបង្កើនចំនួនគន្លងផ្លូវដឹកជញ្ជូននៅច្រក ទ្វារព្រំដែនបាវិត ព្រំដែនកម្ពុជា-វៀតណាម ដើម្បីកាត់បន្ថយការកកស្ទះចរាចរណ៍ សម្រួលដល់ការដឹកជញ្ជូនទំនិញឱ្យបានឆាប់រហ័សទៅមកជាមួយភាគីវៀតណាម។
ទោះជាយ៉ាងណាក៏ដោយ ការដឹកជញ្ជូនទំនិញនៅក្នុងតំបន់អាស៊ាន នៅតែមានភាពល្អប្រសើរជាទូទៅ ទោះបីជាមានឧបសគ្គខ្លះក្នុងកំឡុងពេលមានជំងឺរាលដាល។ ការដឹកជញ្ជូនរបស់បណ្តាប្រទេសអាស៊ាន ត្រូវបានរាំងស្ទះដោយសារតែសមាជិកអាស៊ានបានរឹតបន្តឹងសន្តិសុខផ្ទៃក្នុងរបស់ខ្លួនរៀងៗខ្លួន ក្នុងនោះ ប្រទេសនីមួយៗរបស់អាស៊ានបានរឹតបន្ដឹងការឆ្លងកាត់ដោយសារតែវិបត្តិជំងឺកូវីដ-១៩។
ឧទាហរណ៍ពីមុន គេអាចដឹកទំនិញបានក្នុងមួយថ្ងៃ ប៉ុន្តែឥឡូវត្រូវចំណាយពេលពី២ទៅ៣ថ្ងៃទើបអាចធ្វើទៅបាន។ ចំពោះ ការដឹកជញ្ជូនទ្វេភាគីនៅតែមានភាពរលូនបន្ទាប់ពីមានវិបត្តិកូវីដ-១៩ អស់រយៈពេលជាង មួយឆ្នាំកន្លង ទៅ។
កាលពីថ្ងៃទី០៧ ខែមេសា ឆ្នាំ២០២១ លេខាធិការដ្ឋានអាស៊ាន បានរៀបចំសិក្ខា សាលាលើកទីមួយលើកសាងសមត្ថភាព ថ្នាក់តំបន់តាមប្រព័ន្ធវីដេអូពីចម្ងាយ ក្រោមប្រធានបទ “ការ រក្សាការតភ្ជាប់សម្រាប់ខ្សែសង្វាក់ផ្គត់ផ្គង់ ប្រកបដោយប្រសិទ្ធភាព និងភាពធន់” សហការជាមួយអង្គការUNESCAP និងវេទិកាដឹកជញ្ជូនអន្តរជាតិ(ITF) ដើម្បីប្រមូលធាតុចូល និងស្វែងរកដំណោះស្រាយចំពោះបញ្ហា នៃការដឹកជញ្ជូនរបស់អាស៊ានក្នុងអំឡុងពេល នៃការឆ្លងរាតត្បាតជំងឺកូវីដ-១៩ ដោយមានការចូលរួមពីតំណាងរដ្ឋជាសមាជិកអាស៊ានទាំងអស់ នៅទីក្រុងJakarta ប្រទេសឥណ្ឌូនេស៊ី។
ដោយឡែក បច្ចុប្បន្ននេះប្រទេសកម្ពុជា កំពុងរិះរកវិធានការអនុវត្តប្រកបដោយប្រសិទ្ធភាព និងគ្រប់ជ្រុងជ្រោយ ដើម្បីចូលរួមកាត់បន្ថយចំណាយ លើសេវាដឹកជញ្ជូនទំនិញនៅកម្ពុជា និងជំរុញការអនុវត្តគោលនយោបាយ កិច្ចសម្រួលពាណិជ្ជកម្មរបស់រដ្ឋាភិបាល និងលើកកម្ពស់ឧត្តមភាពប្រកួតប្រជែងរបស់កម្ពុជា នៅក្នុងស្ថានភាពនៃការផ្ទុះរីករាលដាលនៃជំងឺកូវិដ-១៩៕
ឧកញ៉ាផន វណ្ណិតៈទ្រឹស្តីព្រះពុទ្ឋសាសនាមានតម្លៃគ្រប់សម័យកាលសំរាប់តំរង់ ផ្លូវជីវិតយុវជន
ដោយៈ សហសេវិក
ភ្នំពេញៈ លោកឧកញ៉ា ផន វណ្ណិតអតីតព្រះសង្ឃមួយអង្គ ដែលមានការសិក្សាជ្រៅជ្រះខ្ពង់ខ្ពស់នៅបរទេស និងជាសាស្រ្តាចារ្យមួយរូបបានបង្ហើបពីវិធីសាស្រ្ត ដើម្បីលើកកំពស់គុណភាពជីវិតតាមទ្រឹស្តីពុទ្ឋសាសនា ដល់យុវជនកម្ពុជាដើម្បីសិក្សារៀនសូត្រ។
លោកឧកញ៉ាបានមានប្រសាសន៍ថា មនុស្សជាច្រើនកំពុងដើរតាមអាជីពរបស់ខ្លួនដោយទទួលបាននូវភាពជោគជ័យ ប៉ុន្តែក៏មានមនុស្សមួយចំនួន ដែលមិនបានជោគជ័យជាមួយអាជីពរបស់ខ្លូន ហើយបានបោះបង់ក្តីស្រមៃចោល។ បញ្ហាចោទមួយទៀត គឺនៅពេលបើកអាជីកម្មឲ្យកាន់តែរីកចម្រើន គឺត្រូវដឹកនាំមនុស្សក៏ជារឿងដ៏សំខាន់ផងដែរ។
លោកឧកញ៉ាផន វណ្ណិត បានលើកឡើងថា “ខ្លួនក្រ ខ្វះប្រាក់ មិនមែនជាឧបសគ្គក្នុងការរស់នៅនោះទេ។ ហេតុដូច្នេះ ប្រសិនបើយើងនៅតែក្រចំណេះ ក្រសកម្មភាព ក្រគោលដៅ លទ្ធផលចុងក្រោយគឺនៅតែក្រដដែល។លោកបន្តថា “យើងត្រូវតែមានផែនទីជីវិតដើម្បីបង្ហាញផ្លូវឲ្យច្បាស់លាស់ ទើបទទួលបានជោគជ័យក្នុងឆាកជីវិត”។
លោកឧកញ៉ាក៏បានបើកកកាយនូវទ្រឹស្តី របស់ព្រះពុទ្ធសាសនា ដែលអ្នកវិនិយោគ ឬអ្នកការប្រកបការងារក្នុងជីវិត គួរតែសិក្សាគោលការណ៍ឥទ្ធិបាទធម៌៤ របស់ព្រះពុទ្ធដើម្បីទទួលបានជោកជ័យដូចជា
ទី១ ឆន្ទ: ដើម្បីជោគជ័យក្នុងការធ្វើកិច្ចការណាមួយ ទោះបីការសិក្សាក្តី ការប្រកមុខជំនួញផ្សេងៗក្តី អ្នកត្រូវតែមានឆន្ទ:មោះមុត និងបំណងច្បាស់លាស់ ក្នុងការធ្វើកិច្ចការទាំងនោះ។
ទី២ វីរិយ: កិច្ចការទាំងអស់ បើមិនមានការព្យាយាមប្រឹងប្រែងបំពេញទេ សូម្បីតែបានមកដល់ដៃអ្នកហើយ ក៏អាចបាត់បង់ទៅវិញបានដែរ។ ជីវិតរបស់យើងនឹងដើរថយក្រោយ គ្មានជំហានឈានទៅរកភាពជោគជ័យបានឡើយ។ ដូចនេះបើមានឆន្ទ:មុះមុតហើយតែគ្មានការប្រឹងប្រែងព្យាយាមធ្វើទេ អ្នកមិនអាចសម្រេចនូវជោគជ័យ ក្នុងជីវិតបានឡើយ។
ទី៣ ចិត្ត: ការយកចិត្តទុកដាក់លើកិច្ចការងារ។ ការងារមួយចំនួនទោះបីអ្នកមានការស្ទាត់ជំនាញក៏ដោយ បើខ្វះការយកចិត្តទុកដាក់ផ្ចិតផ្ចង់ ធ្វើដោយប្រថុយប្រថានមិនច្បាស់លាស់ ប្រាកដណាស់ថាកិច្ចការនោះនឹងមិនអាចធ្វើបានល្អឡើយ។
ទី៤ វិមំសាៈ បញ្ញាដែលពិចារណាធ្វើយ៉ាងណា ទើបការងារនោះដើរទៅមុខបាន។ ការងារទាំងអស់ មិនមែនសម្រេចបានដោយសារមានតែកម្លាំងបាយទេ គឺទាល់តែមានប្រាជ្ញាឈ្លាសវៃ ទើបសម្រេចបានផលបានល្អ។ ដូច្នេះ ដើម្បីបំពេញកិច្ចការណាមួយឲ្យបានជោគជ័យ អ្នកត្រូវមានឆន្ទ: សេចក្តីព្យាយាម ការយកចិត្តទុកដាក់លើកិច្ចការនោះ និងចុងក្រោយត្រូវមានបញ្ញា ប្រើយុទ្ធសាស្រ្តឲ្យបានត្រឹមត្រូវ។
លោកឧកញ៉ាផន វណ្ណិតបញ្ជាក់ថា “ប្រសិនបើអ្នកជំនួញ ឬអ្នកកំពុងប្រកបការងារ យល់ពីទ្រឹស្តីរបស់ព្រះពុទ្ធដែលមានតម្លៃគ្រប់សម័យកាលសម្រាប់អនុវត្តហើយ ភាពជោគជ័យដ៍អស្ចារ្យប្រាកដជាកើតមាន”។ លោកបន្ថែមថា “លោកថាចំណេះកើតគំនិត ការប្រព្រឹត្តិកើតជាផល”៕
ដំណឹងល្អៈផលិតផលមៀនប៉ៃលិននឹងអាចនាំចេញទៅទីផ្សារចិននាពេលខាងមុខ
ដោយៈតារា
ភ្នំពេញៈ ផលិតផលមៀនប៉ៃលិន នឹងអាចនាំចេញទៅកាន់ទីផ្សារចិន ក្នុងពេលខាងមុខ បន្ទាប់ពីការរៀបចំរបាំងមិនមែនពន្ធដូចជា អនាម័យ ភូតគ្គាមអនាម័យ លើការវេចខ្ចប់ដើម្បីបម្រើទីផ្សារនាំចេញ ខណៈការចរាចរចុះកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន ត្រូវបានបើកចំហររួចជាស្រេច។
អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម ប៉ែន សុវិជាតិបានមានប្រសាសន៍ឲ្យដឹងនាព្រឹកថ្ងៃទី១៨ ឧសភានេះថា ការដាំដុះដំណាំឈើរហូបផ្លែ កម្ពុជាបានចាត់ទុកជាដំណាំសម្រាប់បម្រើទីផ្សារនាំចេញ ដូចជា ការនាំចេញទីទីផ្សារចិន និងទីផ្សារកូរ៉េជាដើម ដោយឡែកមៀនប៉ៃលិនគឺជាដំណាំអទិភាពមួយ ដែលកន្លងមកយើងបាននាំចេញទៅកាន់ប្រទេសចិនរួចហើយ តាមរយៈការឆ្លងកាត់តាមប្រទេសថៃ ។
លោកបន្តថា “យើងនឹងនាំកសោផលនេះ ទៅកាន់ទីផ្សារចិន បន្ទាប់ពីការនាំចេញផ្លែចេក និងផ្លៃស្វាយ គឺដល់ការរៀបចំនាំចេញមៀនប៉ៃលិននេះហើយ”។លោកបន្ថែមថា “ ប៉ុន្តែអ្វីៗទាំងអស់ដែលជារបាំងមិនមែនពន្ធដូចជា អនាម័យ ភូតគ្គាមអនាម័យ គឺវាអាស្រ័យការចរារចរណ៍ រវាងក្រុមហ៊ុន ដែលចង់វិនិយោគនៅលើផ្នែកនេះ ជាមួយក្រសួងកសិកម្ម រុក្ខាប្រមាញ់ និងនេសាទ ក្នុងការវេចខ្ចប់ ដើម្បីបម្រើទីផ្សារនាំចេញ”។
ជាមួយគ្នានេះ លោកវ៉េង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ថ្លែងថា ការនាំចេញមៀននេះ គឺយើងមិនទាន់អាចនិយាយអ្វីទាំងអស់ មុនពេលនៃការចុះពិធីសាររវៀងប្រទេសទាំងពីរថា តើភាគីកម្ពុជា រួមមានទាំងក្រសួងកសិកម្ម រុក្ខាប្រមាញ់ និងនេសាទ កសិករ និងភាគីក្រុមហ៊ុន ត្រូវមានការបំពេញល័ក្ខខ័ណ្ឌតម្រូវនៃភូតគាមអនាម័យយ៉ាងដូចម៉្តេច មុនការអនុញ្ញាតឲ្យនាំចូលទៅកាន់ប្រទេសចិននោះ។
ចំណែលលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានស្នើរដល់ក្រសួងកសិកម្ម រុក្ខាប្រមាញ់ និងនេសាទ ជួយជំរុញការចរចាជាមួយភាគីចិន លើពិធីសារអំពីលក្ខខណ្ឌតម្រូវភូតគាមអនាម័យ សម្រាប់ការនាំចេញមៀនប៉ៃលិនស្រស់ និងក្លាសេទៅកាន់ប្រទេសចិន តាមរយៈការសំណើសុំ របស់អ្នកផលិត និងប្រមូលទិញមៀនប៉ៃលិន ដែលបានស្នើសុំឱ្យរដ្ឋាភិបាលពិនិត្យលទ្ធភាព ជួយជំរុញការបើកច្រកទីផ្សារសម្រាប់ការនាំចេញមៀនដោយផ្ទាល់ ពីកម្ពុជាទៅកាន់ប្រទេសចិន ជាពិសេសនៅក្នុងឱកាសដែលកម្ពុជា និងពិភពលោកកំពុងទទួលរងនូវឥទ្ធិពលអវិជ្ជមាន ពីការរាតត្បាតនៃជំងឺកូវីដ១៩។
ប្រធានសហគមន៍កសិកម្មផលិតផលមៀនប៉ៃលិន លោក សួស ស៊ីយ៉ាត បានមានប្រសាសន៍ថា បច្ចុប្បន្នមៀនប៉ៃលិន មានសមាជិកជាច្រើនបានដាំដុះ នៅក្នុងខេត្តចំនួន៣ គឺខេត្តប៉ៃលិន បាត់ដំបង និងខេត្តពោធិ៍សាត់ ដែលការដាំនេះអាចឆ្លើយតបតាមតម្រូវការផ្គត់ផ្គង់នៃការនាំចេញទីផ្សារនាំចេញ ទៅកាន់ទីផ្សារក្រៅស្រុកបាន ខណៈដែលកន្លងមក ការនាំចេញផលិតផលមៀន តាមទីផ្សារប្រទេសថៃក្នុងមួយឆ្នាំចន្លោះ៣០ម៉ឺន ទៅ៤០ម៉ឺនតោនផងដែរ៕
ខេត្តត្បូងឃ្មុំទាក់ទាញក្រុមហ៊ុនអភិវឌ្ឍន៍អចលនទ្រព្យចន្លោះពីក្រុ១៥ទៅ២០និងកំពុងមានការកើនឡើង
ដោយៈរតនៈ
ត្បូងឃ្មុំៈ បើទោះជាខេត្តត្បូងឃ្មុំជាខេត្តកូនពៅក៏ពិតមែន ប៉ុន្តែវិស័យអចលនទ្រព្យក៏មានសន្ទុះខ្លាំងផងដែរ ដែលរហូតមកដល់ពេលនេះ មានក្រុមហ៊ុនចន្លោះពី ១៥ទៅ២០ហើយបានវិនិយោគលើគម្រោងសង់បុរី ផ្ទះល្វែង និងពុះដីឡូត៍លក់នៅទីនោះ។
អភិបាលខេត្តត្បូងឃ្មុំ លោក ជាម ច័ន្ទសោភ័ណ បានប្រាប់ Propertyarea នៅថ្ងៃទី១៨ ខែឧសភានេះថា បន្ទាប់ពីបង្កើតឡើងនូវខេត្តត្បូងឃ្មុំ រដ្ឋបាលខេត្តបានធ្វើកិច្ចការជាច្រើន ដើម្បីឲ្យខេត្តមួយនេះរីកចម្រើន និងទាក់ទាញអ្នកមករស់នៅ និងមកកម្សាន្ត ក្នុងនោះការសង់លំនៅឋាន គឺជាកត្តាចាំបាច់មួយដើម្បីឲ្យខេត្តថ្មីនេះមានកំនើនប្រជាជនចូលរស់នៅច្រើន និងទាក់ទាញការវិនិយោគ។
លោកបន្តថា “បើទោះជាក្នុងបរិបថដែលមានផ្ទុះជំងឺកូវីដក្តី ប៉ុន្តែក្រុមហ៊ុនអចលនទ្រព្យ នៅតែបន្តមកវិនិយោគក្នុងខេត្តត្បូងឃ្មុំផងដែរ ដែលរហូតមកដល់ពេលនេះមានប្រមាណ១៥ទៅ២០ក្រុមហ៊ុនហើយ”។លោកបន្តថា “ចំនួននេះមិនគិតទាំងការលក់ជាឯកជនដែលមិនមែនជាលក្ខណៈក្រុមហ៊ុននោះទេ”។
លោក ជាម ច័ន្ទសោភ័ណ ឥឡូវនេះយើងសង្កេតឃើញថាអាចមាន(ការវិនិយោគអចលនទ្រព្យ)នៅស្រុកត្បូងឃ្មុំ ក្រុងសួងរបស់យើង ហើយនិងជុំវិញបុរីរដ្ឋបាលខេត្ត ហើយស្រុកពញាក្រែក និងស្រុកមេមត់ ដែលធ្វើឲ្យបងប្អូនយើងមានការពុះឡូត៍លក់អីចឹងទៅ ឬក៏រៀបចំតំបន់អភិវឌ្ឍន៍ជាដើម។
លោកបន្តថា “ស្របពេលដែលមានការវីនិយោគកាន់តែច្រើន លើវិស័យអចលនទ្រព្យក្នុងខេត្ត អាជ្ញាធរខេត្ត ក៏បាននិងកំពុងរៀបចំហេដ្ឋារចនាសម្ព័ន្ធ ប្រព័ន្ធលូ ទឹកស្អាត និងភ្លើងដើម្បីផ្គត់ផ្គង់ឲ្យបានកាន់តែល្អផងដែរ”។
ខេត្តត្បូងឃ្មុំ ត្រូវបានចេញប្រកាសបង្កើតឡើងនៅដើមខែមករា ឆ្នាំ២០១៤ មានផ្ទៃដី៤៩២៨គីឡូម៉ែត្រការ៉េ។
ខេត្តដែលមានប្រវត្តិចំណាស់មួយនេះ ត្រូវបានបង្កើតឡើងដោយកាត់យកក្រុងចំនួន១ និងស្រុកចំនួន៦ ពីខេត្តកំពង់ចាមគឺ ក្រុងសួង ស្រុកត្បូងឃ្មុំ ស្រុកអូររាំងឪ ស្រុកក្រូចឆ្មារ ស្រុកតំបែរ ស្រុកពញាក្រែក និងស្រុកមេមត់។ ខេត្តមានព្រំប្រទល់ជាប់ខេត្តកំពង់ចាមនៅខាងលិច ក្រចេះនៅខាងជើង ព្រៃវែងនៅខាងត្បូង និង មានព្រំដែនអន្តរជាតិរួមជាមួយវៀតណាមនៅខាងកើត៕
វិនិយោគិនក្នុងស្រុកនឹងចាប់ផ្ដើមស្វែងរកការវិនិយោគអចលនទ្រព្យឡើងវិញ នៅពេលឆាប់ៗនេះ
ដោយៈវឌ្ឈនៈ
ភ្នំពេញៈ វិបត្តិកូវីដ១៩ ក្នុងឆ្នាំ២០២១នេះជាពិសេសចាប់តាំងពីកម្ពុជាបានជួបប្រទះនឹងការឆ្លងរាលដាលក្នុងសហគមន៍២០កុម្ភៈ មកសកម្មភាពវិនិយោគនានាត្រូវបានថយចុះ ស្ទើរតែគ្រប់វិស័យក្នុងនោះដែរវិស័យអចលនទ្រព្យ ក៏ត្រូវបានមើលឃើញថាមានបញ្ហាផងដែរ។
អ្នកជំនាញអចលនទ្រព្យបានព្យាករនិងរំពឹងថា វិនិយោគិនស្រុកនឹងអាចចាប់ផ្ដើមស្វែងរកការវិនិយោគអចលនទ្រព្យឡើងវិញ ក្នុងពេលឆាប់ៗនេះ ខណៈពេលប៉ុន្មានថ្ងៃចុងក្រោយនេះ អ្នកឆ្លងថ្មីនៃកូវីដបានថយចុះ ហើយអ្នកជាកើនឡើង។
លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ក្នុងកិច្ចសម្ភាសន៍កាលពីថ្ងៃទី១៧ ឧសភាកន្លងមកថា តាមរយៈតួលេខនៃអ្នកជំងឺកូវីដ១៩កើតថ្មី និងអ្នកជាសះស្បើយប៉ុន្មានថ្ងៃមកនេះ បានឃើញថាអ្នកជាសះស្បើយពីជំងឺកូវីដ១៩ចាប់ផ្ដើមកើនឡើង និងច្រើនជាងអ្នកកើតថ្មី។
លោកបន្តថា “វាជាសញ្ញាល្អប្រសើរមួយ សម្រាប់វិស័យអចលនទ្រព្យហើយរំពឹងថា វិស័យអចលនទ្រព្យនឹងកើនឡើងវិញ”។ លោកបន្តថា “វិនិយោគិនក្នុងស្រុកនឹងចាប់ផ្ដើមចេញស្វែងរកការវិនិយោគ លើអចលនទ្រព្យឡើងវិញ ក្រោយពេលពួកគាត់បានស្ងប់ស្ងាត់មួយរយៈដោយការបិទទីក្រុង និងរឹតបន្តឹងការធ្វើដំណើរឆ្លងកាត់ពីខេត្តមួយទៅកាន់ខេត្តមួយទៀត”។
លោកច្រឹក សុខនីមបានបន្តថា នៅពេលមានការធ្វើដំណើររបស់វិនិយោគិន វានឹងមានការដោះដូរគម្រោង ដោះដូរដីធ្លី និងគម្រោងអចលនទ្រព្យផ្សេងទៀត។ ថ្វីត្បិតតែវិបត្តិនៃជំងឺកូវីដ១៩ បានធ្វើឱ្យប៉ះពាល់ដល់ផ្នែកខ្លះនៃសេដ្ឋកិច្ច និងអចលនទ្រព្យតែបើធៀបនឹងវិបត្តិក្នុងឆ្នាំ២០០៧ រហូតដល់ដើមឆ្នាំ២០០៩ ឃើញថាវិបត្តិក្នុងអំឡុងពេលនោះ បានប៉ះពាល់ខ្លាំងដល់សេដ្ឋកិច្ចនិងអចលនទ្រព្យ ព្រោះវិបត្តិនោះជាវិបត្តិហិរញ្ញវត្ថុ ដែលធ្វើឱ្យដួលរលំនៃស្ថាប័នហិរញ្ញវត្ថុធំៗ នៅលើសកលលោក។
តែបើក្រលេកមកមើលវិបត្តិ ក្នុងឆ្នាំ២០២០និង២០២១ ជាវិបត្តិជំងឺមិនទាន់មានការដួលរលំនៃសេដ្ឋកិច្ចនៅឡើយ តែយើងទទួលស្គាល់ថារងផលប៉ះពាល់ មួយចំនួនធំទៅលើការប្រកបអាជីវកម្ម ព្រោះប្រជាពលរដ្ឋមិនអាចធ្វើដំណើរបាន ដូច្នេះពួកគាត់ត្រូវយកទុនបម្រុងដែលរក្សាទុកមកប្រើប្រាស់វិញ។
លោកបន្ថែមថា នៅក្នុងវិបត្តិឆ្នាំ ២០២០ និង២០២១ ក្រុមហ៊ុនអចលនទ្រព្យជាច្រើនពិតជាមានផលប៉ះពាល់គ្រាន់តែតិចនិងច្រើន តែមិនមានក្រុមហ៊ុនណាមួយបិទទ្វារព្រោះតែវិបត្តិនេះនោះទេ ព្រោះថាទោះបីជាមានការរឹតត្បិតការជួបជុំ ក្រុមហ៊ុនទាំងនោះក៏បានរកវិធីផ្ដល់សេវាកម្មតាមអនឡាញ ប្រឹក្សារយោបល់ដល់អតិថិជនតាមរយៈអនឡាញ និងអាចទទួលបានកម្រៃខ្លះៗពីការងារទាំងនេះ។
ជាមួយគ្នានេះ លោកសំ សុខនឿនប្រធានសមាគមអចលនទ្រព្យសកលក៏បានឱ្យដឹងផងដែរថា ក្រោយពេលរដ្ឋាភិបាល ចាប់ផ្ដើមបើកដំណើរការឡើងវិញ នូវការធ្វើដំណើរឆ្លងខេត្ត និងបិទបញ្ចប់ការបិទខ្ទប់រាជធានី យើងមើលឃើញថា សកម្មភាពនៃការចេញធ្វើដំណើររបស់វិនិយោគិន បានចាប់ផ្ដើមឡើងវិញបន្តិច ជាពិសេសការធ្វើដំណើរទៅកាន់បណ្ដាខេត្ត ដើម្បីស្វែងរកដីធ្លីសម្រាប់វិនិយោគនៅពេលឆាប់ៗនេះ៕
ការរស់នៅបែបឯករាជ្យរបស់ប្រជាពលរដ្ឋខ្មែរបានចូលរួមលើកកំពស់វិស័យ លំនៅដ្ឋាននៅកម្ពុជា
ដោយៈគង់ សូរិយា
ភ្នំពេញៈ និន្នាការរស់នៅបែបឯកជនភាពរបស់ប្រជាពលរដ្ឋខ្មែរ បានធ្វើឲ្យចំនួនគ្រួសារថ្មីៗកើនឡើងជាប្រចាំ បន្ទាប់ពីយុវជនចូលដល់វ័យរៀបការបានចូលរោងការ ហើយពួកគេក៏បានបែកពីឳពុក ម្តាយ អាណាព្យាបាលទៅបង្កើតគ្រួសារថ្មី និងស្វែងរកទិញលំនៅដ្ឋានថ្មី។
នេះជានិន្នាការរស់នៅបែបឯកជនភាព របស់ប្រជាពលរដ្ឋខ្មែរ ដែលជាកត្តាលីករយ៉ាងសំខាន់ ក្នុងការជំរុញ ការរីកចម្រើននៃវិស័យលំនៅដ្ឋាន ដែលមានកំនើនជាមធ្យម ៥០,០០០ខ្នងផ្ទះក្នុងមួយឆ្នាំៗ។
យោងតាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា តម្រូវការលំនៅដ្ឋាននៅកម្ពុជានឹងកើនឡើងដល់ជាង៨០ម៉ឺនខ្នងនៅចន្លោះឆ្នាំ២០១៥ ២០៣០ ហើយប្រជាពលរដ្ឋរស់នៅតាមទីក្រុង ទីប្រជុំជន និងរាជធានីភ្នំពេញ នឹងអាចកើនទៅដល់៧លាននាក់នៅឆ្នាំ២០៣០ខាងមុខ។
កត្តាទាំងអស់នេះហើយបានធ្វើឲ្យក្រុមហ៊ុនវិនិយោគក្នុងស្រុក និងក្រៅស្រុកបោះទុនវិនិយោគលើលំនៅដ្ឋានជាបុរី កើនឡើងជាង២៦០ក្រុមហ៊ុន ជាក់ស្តែងនៅដើមឆ្នាំ២០២១នេះ គំរោងបុរីថ្មីៗចំនួនជាង២០បានសាងសង់ ដើម្បីឆ្លើយតបនឹងតម្រូវការរបស់អតិថិជន។
យោងតាមរបាយការណ៍ជុំរឿនរបស់ក្រសួងផែនការបានបង្ហាញថា ជាមួយនឹងអត្រាកំណើន ១.៤៦ ភាគរយ ក្នុងមួយឆ្នាំ វិទ្យាស្ថានជាតិស្ថិតិ បានប៉ាន់ប្រមាណថា ចំនួនប្រជាជនសរុបនៅព្រះរាជាណាចក្រកម្ពុជា មានចំនួន១៤.៦៨ លាននាក់ ក្នុងឆ្នាំ២០១៣។
អង្គការសហប្រជាជាតិប៉ាន់ប្រមាណថា ចំនួនប្រជាជនសរុបមានចំនួន១៥.៥៨ លាននាក់ នៅឆ្នាំ២០១៥ ខណៈប្រជាជន៧៨ភាគរយ រស់នៅទីជនបទ។ ប្រជាជន២/៣ ស្ថិតក្នុងវ័យប្រកបការងារ(១៥-៦៤ឆ្នាំ) ក្នុងនោះប្រហែល២៩ភាគរយ មានអាយុក្រោម១៥ឆ្នាំ និងប្រហែល៥ភាគរយ មានអាយុចាប់ពី៦៥ឆ្នាំឡើងទៅ។
ដោយមើលឃើញនិន្នាការនេះ បុរីគីម ស័ងបានធ្វើការអភិវឌ្ឈន៍លំនៅដ្ផាននៅលើផ្ទៃដីទំហំជាង៥ហិកតា បាននិងកំពុងសាងសង់យ៉ាងសកម្ម ដើម្បីឆ្លើយតបទៅតាមតម្រូវការរបស់ប្រជាពលរដ្ឋ។
ក្រុមព្រឹក្សារភិបាល បុរី គីម ស័ង បានមានប្រសាសន៍ឲ្យដឹងផងដែរថា ជាមួយនឹងល្បឿននៃការអភិវឌ្ឍរបស់រាជធានីភ្នំពេញ និងកំនើនប្រជាពលរដ្ឋកាន់តែកើនឡើងពីមួយថ្ងៃទៅមួយថ្ងៃ បានធ្វើឲ្យ បុរី គីម
ស័ងសម្រេចចិត្តវិនិយោគលំនៅដ្ឋានដ៏ប្រណីត ដែលស្របនឹងបណ្តោយផ្លូវថៃ ហ្គ័រ បុរី នេះមានផ្ទៃដី៥ ហិកតា និងកំពុងដាក់លក់ផ្ទះបីប្រភេទ ដូចជា Shop House, វីឡាកូនកាត់ និងវីឡាភ្លោះ ដែលមានតម្លៃចាប់ពី១៣ម៉ឺន ទៅដល់២៣ម៉ឺនដុល្លារអាមេរិក។
ក្រុមប្រឹក្សាភិបាលនៃ បុរី គីម ស័ង មានប្រសាសន៍ បន្តទៀតថា “បុរី បានផ្តោតទៅលើគុណភាព សុវត្តិភាព ប្រណិតភាព និងផាសុខភាពដល់អ្នករស់នៅ តាមរយៈការរៀបចំហេដ្ឋារចនាសម្ព័ន្ឋធំទូលាយ មានសួនច្បារនិងដាំដើមឈើ ឲ្យក្លាយជាដំបន់បៃតងមួយ ដើម្បីរស់នៅក្នុងបរិបទជីវិតបែបសុវិល័យ”៕
សូមអញ្ជើញចូលទស្សនាផ្ទះគំរូពិត និងទទួលយកព័ត៌មានលម្អិត 078 915 999 /086 915 999
ទីតាំងគម្រោង៖ផ្លូវលេខ114(ផ្លូវថៃហ្គ័រ) ខណ្ឌ ច្បារអំពៅ រាជធានីភ្នំពេញ៕
https://goo.gl/maps/KzpJBe1mvyMywny88
@Borey Kimsoing !!!
រស់នៅក្នុងបរិបទ ជីវិតបែបស៊ីវិល័យ!
Khan Chbar Ampov (https://goo.gl/maps/KzpJBe1mvyMywny88)
Phnom Penh, Cambodia
ក្រុមហ៊ុនចិនធំៗជាច្រើននឹងផ្លាស់ប្តូរទីតាំងផលិតកម្មមកកាន់កម្ពុជា
ដោយៈ ម៉ាណេត
ភ្នំពេញៈ ក្រុមអ្នកសង្កេតការណ៍បានលើកឡើងថា ខណៈភាពតានតឹងរវាងសហរដ្ឋអាមេរិក និងចិនមិនបង្ហាញសញ្ញានៃភាពថមថយ ក្រុមហ៊ុនធំរបស់ប្រទេសទាំងពីរកំពុងផ្តោតការយកចិត្តទុកដាក់ ក្នុងការផ្លាសប្តូរការវិនិយោគរបស់ខ្លួន មកកាន់អាស៊ីអាគ្នេយ៍។
ក្រុមអ្នកសង្កេតការណ៍បានលើកឡើងទៀតថា ការលំបាកទាក់ទងនឹងការចូលទីផ្សារលោកខាងលិច ការកើនឡើងថ្លៃដើមនៅក្នុងប្រទេស ចិននិងសំណូមពរពីអតិថិជនបានជំរុញឱ្យក្រុមហ៊ុនរបស់ចិន ផ្តោតលើការវិនិយោគនៅបណ្តា ប្រទេសអាស៊ីអាគ្នេយ៍ដែលមានការអភិវឌ្ឍតិចតួច ដូចជាប្រទេសកម្ពុជា។
ប្រទេសអាស៊ានទាំង១០បានមើលឃើញថា ការវិនិយោគផ្ទាល់ពីបរទេស (FDI) ធ្លាក់ចុះ៣១ភាគរយ ក្នុងឆ្នាំ ២០២០។ ទោះជាយ៉ាងណាក៏ដោយ ប្រទេសចិនបានបង្កើនការវិនិយោគរបស់ខ្លួននៅក្នុងប្លុកនេះ មានទំហំទឹកប្រាក់ប្រមាណ១៤,៣៦ពាន់លានដុល្លារក្នុងឆ្នាំ២០២០ កើនឡើង៥១ភាគរយ ដែលជាសញ្ញាបង្ហាញពីសារសំខាន់របស់ប្រទេសចិនបច្ចុប្បន្ននៅក្នុងតំបន់។
អាស៊ានត្រូវបានចាត់ទុកថាជាទីផ្សារធំលំដាប់ទី៣ នៅអាស៊ី បន្ទាប់ពីចិននិងឥណ្ឌា ហើយមានប្រជាជន៦៦០លាននាក់ ខណៈចំនួនក្រុមគ្រួសារមានកម្រិតមធ្យកំពុងកើនឡើង។
បច្ចុប្បន្ននេះ ប្រទេសចិនគឺជាប្រភពឈានមុខគេ នៃការវិនិយោគផ្ទាល់ពីបរទេសចូលមកប្រទេសកម្ពុជា ដោយមានទឹកប្រាក់ជិត៩០០លានដុល្លារ បានចាក់បញ្ចូលទៅក្នុងសេដ្ឋកិច្ចកម្ពុជាកាលពីឆ្នាំ២០២០។
លោក Xu Ningning នាយកប្រតិបត្តិនៃក្រុមប្រឹក្សាធុរកិច្ចចិន-អាស៊ានបានមានប្រសាសន៍កាលពីថ្មីៗថា ការវិនិយោគរបស់ចិននៅអាស៊ីអាគ្នេយ៍ អាចត្រូវបានបែងចែកជាវិស័យធំៗចំនួន៥ ដូចជា ហេដ្ឋារចនាសម្ព័ន្ធ ក្រោមគំនិតផ្តួចផ្តើមខ្សែក្រវ៉ាត់និងផ្លូវ វិស័យផលិតកម្ម វិស្វកម្ម អចលនទ្រព្យ និងe-commerce / សេដ្ឋកិច្ចឌីជីថល។
លោក Xu បានលើកឡើងថា ប្រទេសកម្ពុជាជាមូលដ្ឋានផលិតកម្មក្នុងតំបន់ដ៏ទាក់ទាញសម្រាប់ក្រុមហ៊ុនចិន។ ក្រុមហ៊ុន ដែលសម្រេចចិត្តផ្លាស់ប្តូរទីលំនៅ មកប្រទេសកម្ពុជាអាចចៀសវាងពន្ធគយ និងទណ្ឌកម្មដែលដាក់លើក្រុមហ៊ុនចិន ដែលនាំចេញទៅសហគមន៍អឺរ៉ុប និងសហរដ្ឋអាមេរិក។
លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជា បានថ្លែងប្រាប់កាលពីថ្ងៃទី១៧ ខែឧសភា ឆ្នាំ២០២១នេះថា កម្ពុជាទទួលបានភាពអនុគ្រោះពន្ធពីអឺរ៉ុប ក៏ដូចGSP ពីអាមេរិក និងទទួលប្រព័ន្ធGSP ពីអង់គ្លេស ហើយក៏បានចុះកិច្ចព្រមព្រៀងពាណិជ្ជកម្មសេរីជាមួយច្រើនជាបណ្តាប្រទេសមួយចំនួន។
លោកឧកញ៉ាបានថ្លែងថា ទាំងអស់នេះ ជាកត្តាដែលទាក់ទាញវិនិយោគប្រទេសកម្ពុជា ស្របពេលដែលអាមេរិក និងចិនដំឡើងពន្ធលើគ្នាទៅវិញទៅមក ក្នុងសង្រ្គាមពាណិជ្ជកម្ម ដូច្នេះវាធ្វើឱ្យមានប្រទេសណា ដែលមានភាពអនុគ្រោះពន្ធ ដូចជាប្រទេសកម្ពុជា គឺគេសម្លឹងឃើញហើយ។
លោកឧកញ៉ាបានថ្លែងបន្តទៀតថា ដើម្បីអាចឱ្យក្រុមហ៊ុនអាមេរិកនាំចេញទៅចិនងាយស្រួល គឺមានក្រុមហ៊ុនមកផលិតនៅកម្ពុជា ព្រោះមានភាពអនុគ្រោះ ហើយដើម្បីងាយស្រួលក្នុងការនាំចេញអាមេរិក ចិននឹងមកផលិតនៅកម្ពុជាផងដែរ ដោយសារកម្ពុជាទទួលបានប្រព័ន្ធអនុគ្រោះពន្ធGSPនាំចេញទៅអាមេរិក។
លោកឧកញ្ញ៉ាបានបន្ថែមទៀតថា ដូច្នេះភាពទាក់ទាញទាំងនេះហើយ ដែលធ្វើឱ្យទាំងក្រុមហ៊ុនអាមេរិក និងចិនកំពុងសម្លឹងឃើញកម្ពុជាយើង ហើយមិនត្រឹមតែក្រុមហ៊ុនអាមេរិក និងចិនប៉ុណ្ណោះទេ ប៉ុន្តែថែមទាំងក្រុមហ៊ុនពីប្រទេសផ្សេងៗ ដែលមានបំណងចង់នាំចេញទៅប្រទេសមហាអំណាចសេដ្ឋកិច្ចទាំងពីរនេះ ក៏សម្លឹងរកប្រទេសកម្ពុជាជាទីតាំងផលិតផងដែរ៕
បុរី ប៉េង ហួត បញ្ចេញ កំណែទម្រង់ជំនាន់ថ្មី លើកម្មវិធីទូរសព្ទដៃ Mobile App របស់ខ្លួន
បច្ចុប្បន្ននេះ ជាយុគសម័យទំនើប ដូច្នេះហើយទើបទូរសព្ទដៃបានក្លាយជាឧបករណ៍សំខាន់មួយ សម្រាប់ទំនាក់ទំនង និងស្វែង រកព័ត៌មានផ្សេងៗ បានយ៉ាងងាយស្រួល។ ក្នុងនោះផងដែរ កម្មវិធីលើទូរសព្ទដៃ ក៏កំពុងតែអភិវឌ្ឍអោយស្រប ទៅនឹងអ្វីដែលថ្មី និងសម្បូរបែបដើម្បីឆ្លើយតបទៅនឹងការប្រើប្រាស់ និងការចង់បានរបស់សាធារណជន។
ដូចគ្នានេះដែរ កម្មវិធីទូរសព្ទដៃ Borey Peng Huoth Mobile App (ផ្តោតលើផ្នែកអចលនទ្រព្យ)ដែលបានបង្កើតឡើងដំបូងគេបង្អស់ ក្នុងប្រទេសកម្ពុជា តាំងពីឆ្នាំ២០១៦ មក បានធ្វើកំណែទម្រង់ជំនាន់ថ្មី ទាំងទូរសព្ទប្រើប្រាស់ប្រព័ន្ធ IOS និងប្រព័ន្ធ Android ដែលនឹងផ្តល់ជូនអតិថិជន នូវបទពិសោធន៍នៃការប្រើប្រាស់ជាមួយ បច្ចេកវិទ្យាកាន់តែទំនើប និងសម្បូរបែប។
សម្រាប់កំណែទម្រង់ជំនាន់ថ្មីនេះ មានមុខងារជាច្រើន ដែលអាចផ្តល់ជូនអតិថិជនក្នុងការស្វែងរកបាននូវព័ត៌មានកាន់តែលម្អិត និងរហ័សទាន់ចិត្ត ក្នុងការណែនាំ ពីប្រភេទលំនៅដ្ឋាន ប្រភេទគម្រោង និងព័ត៌មានផ្សេងៗដូចជា ព័ត៌មានកម្ចីធនាគារដែលជាដៃគូ ការគណនាប្រាក់កម្ចីបង់រំលស់ លេខទូរសព្ទសង្គ្រោះបន្ទាន់ ដំណឹងជ្រើសរើសបុគ្គលិក និង ព័ត៌មានអចលនទ្រព្យថ្មីៗចុងក្រោយ ។ល។ អ្វីដែលកាន់តែពិសេសជាងនេះទៅទៀត កម្មវិធីទូរស័ព្ទដៃនេះ បានផ្តល់ជូននូវការបញ្ចុះតម្លៃយ៉ាងច្រើន សន្ធឹកសន្ធាប់ពីដៃគូរសហការដល់អតិថិជនបុរី ប៉េង ហួត ដោយគ្រាន់តែបង្ហាញពីអត្តសញ្ញាណនៃកាតសមាជិករបស់បុរី ប៉េង ហួត តែប៉ុណ្ណោះ។
ចង់ជ្រាបច្បាស់ថា តើកម្មវិធីទូរសព្ទដៃ Borey Peng Huoth Mobile App ផ្លាស់ប្តូរទម្រង់បែបណា លោកអ្នកអាចទាញយកកម្មវិធី បុរី ប៉េង ហួត Mobile Application ដោយគ្រាន់តែធ្វើតាមការណែនាំតាមរយៈតំណរភ្ជាប់នេះ https://bit.ly/2rD9FnY
សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 Email: [email protected]ឬចូលទៅកាន់គេហទំព័រ Facebook: www.facebook.com/boreypenghuoth
