ដោយៈគង់ សូរិយា

ភ្នំពេញៈ ជាមួយទស្សនទាននៃការអភិវឌ្ឍថ្មី គំរោងផ្សារជីស៊ី អូរឬស្សីបាននិងកំពុងផ្តល់ជូននូវលំនៅដ្ឋាន និងមជ្ឈមណ្ឌលពាណិជ្ជកម្មទំនើបស៊ីវិល័យ តាមបែបផែននៃការអភិវឌ្ឈក្នុងយុគសម័យថ្មី។

បើនិយាយអំពីប្រភេទនៃអចលនទ្រព្យក្នុងប្រទេសកម្ពុជា មានគម្រោងជាច្រើនដែលផ្ដោតទៅលើផ្សារលក់រាយ និងលំនៅឋាន។ នៅក្នុងការប្រកាសថ្មីៗនេះ ពីសំណាក់ GCC គ្រុប ក្រុមហ៊ុនអភិវឌ្ឍលំនៅឋានមួយនេះ បានផ្លាស់ប្ដូរយុត្តិសាស្រ្តរបស់ខ្លួន ដែលបង្ហាញថា ពួកគេបានរកឃើញនូវមហា សមុទ្រថ្មីសម្រាប់ខ្លួនឯង ដោយការបង្កើតនូវផ្សារបោះដុំនៅក្នុងស្រុកថ្មីមួយ ដែលស្នងនូវមរតកនៃស្ថាបត្យកម្មបែបប្រពៃណី និងចំណេះដឹងនៃការធ្វើពាណិជ្ជកម្មរបស់ប្រជាជនកម្ពុជា។

ជាច្រើនលើកមកហើយ ដែលអ្នកអភិវឌ្ឍគម្រោងបង្កើតនូវ ផ្សារទំនើបជាមួយនឹងប្រេនផលិតផលល្បីៗ ដើម្បីទាក់ទាញអតិថិជន។ ផ្សារជីស៊ី អូរឫស្សីមានភាពខុសប្លែកពីអចលនទ្រព្យពាណិជ្ជកម្មទាំងអស់ ដែលមិនធ្លាប់បានបង្កើតឡើងពីសំណាក់ម្ចាស់គម្រោងណាមួយឡើយ នៅក្នុងមួយទស្សវត្សន៍ចុងក្រោយនេះ។ ផ្សារមួយនេះនឹងផ្ដោតសំខាន់ទៅលើផ្សារបោះដុំ និងលក់រាយក្នុងស្រុក។

អ្នកនាង កុលហ្សានិក ប្រធានផ្នែកលក់នៃគម្រោងផ្សារជីស៊ី អូរឫស្សីមានប្រសាសន៍ថា “ខុសប្លែកពីការអភិវឌ្ឍ អចលនទ្រព្យបែបពាណិជ្ជកម្មផ្សេងទៀត ផ្សារជីស៊ី អូរឫស្សីបាននាំមកជូននូវមុខងារ សំខាន់ៗជាច្រើនសម្រាប់ម្ចាស់តូប ទាំងអស់”។

ផ្សារជីស៊ី អូរឫស្សីត្រូវបានបង្កើតឡើង ព្រមជាមួយនឹងរចនាបទបែប ទំនើបលាយជាមួយនឹងរចនាបទបែបខ្មែរបុរាណ ផ្សារជីស៊ីអូរឫស្សីគឺជា ស្ថាបត្យកម្មដែលមានរួម បញ្ចូលនូវស្ថាបត្យកម្មប្រវត្តិសាស្ត្រ រួមបញ្ចូលជាមួយនឹងការ រចនាបែបប្រពៃណីទំនើប។ ផ្សារមួយនេះបង្កើតឡើងដោយផ្ដោតសំខាន់លើ បរិបទនៃតំបន់ អាកាសធាតុ និងឥរិយាបថ របស់អ្នកប្រើប្រាស់ផ្ទាល់ ហើយការរចនាវិញក៏រៀបចំឡើង ដើម្បីសម្រួលដល់លំហូរខ្យល់ធម្មជាតិ និងពន្លឺធម្មជាតិឲ្យ បានល្អបំផុតដែលទាំងនេះគឺជាកត្តា សំខាន់នៃប្រទេសក្នុងតំបន់អាកាសធាតុត្រូពិច ព្រមជាមួយការរក្សានូវម្លប់ និងការការពារទឹកភ្លៀងសម្រាប់ផ្នែកខាងក្នុង។

ផ្សារជីស៊ី អូរឫស្សីរួមមានតូប ដែលលើកទឹកចិត្តឲ្យម្ចាស់ពាណិជ្ជកម្មទាំងអស់ អាចតុបតែងតូបរបស់ខ្លួនទៅតាម អត្តចរិត ស្តង់ដារ និងផលិតផល។ តូបនៅក្នុងផ្សារទាំងអស់អាចរចនាបំពេញ ទៅតាមបំណងប្រាថ្នានៃអាជីវករទាំងអស់ ទាំងការព្យួរ ការតម្រៀបធ្នើរ ធ្វើយ៉ាងណា អាចបំពេញតម្រូវការនៃអ្នកប្រើប្រាស់ទាំងអស់ ហើយតូបក៏មានភ្ជាប់មក ជាមួយនូវឃ្លាំង សម្រាប់ដាក់ឥវ៉ាន់នៅលើដំបូលផងដែរ។

ក្រៅអំពីតូប អាជីវករទាំងអស់ក៏ទទួលបាន នូវគេហទំព័រe-commerce សម្រាប់លក់ឥវ៉ាន់ដែលអាចប្រើប្រាស់ បានដោយម្ចាស់តូបទាំងអស់នៅក្នុងផ្សារជីស៊ី អូរឫស្សី។ អ្នកនាងកុលហ្សានិកបានបន្ថែមថា “គេហទំព័រ e-commerce ធានាថាម្ចាស់តូបទាំងអស់អាចលក់នូវផលិតផលនៅគ្រប់ទីកន្លែងទាំងអស់។ យើងបាននឹកឃើញគំនិត បង្កើតនូវ គេហទំព័រ e-commerce ដោយសារតែយើងមើលឃើញថា នៅក្នុងអំឡុងពេលការរាលដាលនៃជម្ងឺកូវីដ 19 ផ្សារក្នុងស្រុកភាគច្រើនត្រូវបានបិទ ជាហេតុធ្វើឲ្យពួកយើងចាប់ផ្ដើមស្វះស្វែងរកវិធីធ្វើយ៉ាងណាឲ្យម្ចាស់តូបទាំងអស់ អាចលក់ផលិតផលរបស់ពួកគេនៅគ្រប់កាលៈទេសៈទាំងអស់។

នៅជាន់លើបំផុតនៃផ្សារជីស៊ី អូរឫស្សី មាននូវកន្លែងសម្រាប់ផ្សាយផ្ទាល់ដែលអាចប្រើប្រាស់បានដោយម្ចាស់ តូបទាំងអស់ដើម្បីអាចឲ្យពួកគេ ធ្វើការផ្សព្វផ្សាយផ្ទាល់អំពីផលិតផលរបស់ពួកគេ ដោយប្រើប្រាស់ជាមួយនឹងប្រព័ន្ធ ឌីជីថល ជាមួយនឹងបន្ទប់ស្ទូឌីយ៉ូដែលមានឧបករណ៍គ្រប់គ្រាន់។

នៅទីនេះ ក៏រួមមានកន្លែងសម្រាប់ដឹកជញ្ជូនឥវ៉ាន់ សម្រាប់ឲ្យម្ចាស់តូបទាំងអស់អាចធ្វើការដឹកជញ្ជូនទំនិញ ចាប់ពីជាន់ផ្ទាល់ដីរហូតដល់ដំបូល។ រាល់សេវាកម្មទាំងអស់ នឹងរាប់បញ្ចូលទៅក្នុងតម្លៃ លើការគ្រប់គ្រងដែលទាបបំផុតសម្រាប់ផ្សារក្នុងស្រុក។

អ្នកនាងបានបន្ថែមថា “យើងក៏បានបង្កើតឡើងនូវដំណោះស្រាយហិរញ្ញវត្ថុ ព្រមជាមួយនឹងការសម្រាកពីការបង់ ប្រាក់ប្រចាំខែមួយរយៈសម្រាប់ម្ចាស់តូប ដែលជួបប្រទះនូវគ្រោះថ្នាក់រហូតដល់បាត់បង់ជីវិត ឬក៏ពិការភាព”។ អ្នកនាងបន្តថា “ជាជាងការធ្វើត្រឹមតែជាផ្សារបោះដុំ ផ្សារជីស៊ី អូរឫស្សីក៏ជាទីតាំង ដែលរក្សាទុកនូវគុណតម្លៃផ្ទាល់ខ្លួនរបស់ប្រជាជន កម្ពុជាគ្រប់រូប”។

យើងរក្សាទុកនូវអត្តចរិក ឥរិយាបថ ជំនឿ និងវប្បធម៌ពីបុរាណកាលមកបច្ចុប្បន្នកាលទៅកាន់ អនាគតកាល។ យើងជឿជាក់ថាម្នាក់ៗ អាចបន្តនូវចំណេះដឹង អាជីវកម្ម និងការតាំងចិត្តរបស់ខ្លួនទៅកាន់មនុស្ស ជំនាន់ក្រោយថែមទៀត”។

សម្រាប់ព័ត៌មានបន្ថែមអំពីផ្សារជីស៊ី អូរឫស្សីសូមចូលទៅកាន់គេហទំព័រហ្វេសប៊ុក របស់យើង GC Orussey Market – ផ្សារជីស៊ីអូរឫស្សី: https://www.facebook.com/gc.orusseymarket ឆានែលតេឡេក្រាម – https://t.me/GCOrusseyMarket ។ លេខទូរស័ព្ទ និងតេឡេក្រាម: 099 331015, 098 33101។

ក្រុមហ៊ុន GCC គឺជាក្រុមហ៊ុនវិនិយោគ ដែលមានទីស្នាក់ការកណ្ដាលនៅទីក្រុងហុងកុង ដែលមានជំនាញលើ វិស័យ អភិវឌ្ឍអចលនទ្រព្យ វិនិយោគដីធ្លី និងសេវាកម្មហិរញ្ញវត្ថុ (trust and fund management)។ ចក្ខុវិស័យដ៏ធំបំផុតនៃ GCC គឺក្លាយជាអ្នកអភិវឌ្ឍអចលនទ្រព្យ ផ្តល់ជូនសេវាកម្មពេញលេញ360० នៅក្នុងប្រទេសកម្ពុជា។ បច្ចុប្បន្ននេះ GCC មានក្រុមហ៊ុនបុត្រសម្ព័ន្ធចំនួន 7 ទៀត រួមមាន GC City, GC Land, GC Empire, GC Realty, GC Design, GC Management និង GC Credit ។ គម្រោងបច្ចុប្បន្នរបស់ GCC រួមមាន៖ បុរី ណាឌី ដោយជីស៊ី ស៊ីធី, CEO Wyndham Residence ផ្សារជីស៊ី អូរឫស្សី GC Residence ជ្រោយចង្វារ និង Lixin Century Innovation Park។

រៀបរៀងដោយការិយាល័យទីផ្សារ GCC សម្រាប់ព័ត៌មានបប្រធានផ្នែកទីផ្សារ
លេខទំនាក់ទំនង: +855 96 820 6822 Email: [email protected]
លោកង៉ែត ឧត្តមមុន្នី ប្រធានត្រួតពិនិត្យទីផ្សារ លេខទំនាក់ទំនង: +855 98 831 868 Email: [email protected]៕

ដោយៈសុខុម

អាមេរិកៈ ក្រុមហ៊ុន Blackstone Group Inc កំពុងជិតឈានដល់ការចុះកិច្ចព្រមព្រៀងទិញយកក្រុមហ៊ុនអភិវឌ្ឍន៍ អគារការិយាល័យចិន Soho China។ បើឈានដល់ការចុះកិច្ចព្រមព្រៀង នេះជាការវិនិយោគធំបំផុត ក្នុងវិស័យអចលនទ្រព្យក្នុងប្រទេសចិន។ នេះបើយោងតាមសារព័ត៌មាន Bloomberg News បានចុះផ្សាយកាលពីថ្ងៃអង្គារ ទី១៥ មិថុនា។

សារព័ត៌មានដដែលបានបញ្ជាក់ថា ក្រុមហ៊ុន Soho China ដែលបានចុះបញ្ជីនៅក្រុងហុងកុង អាចមានតម្លៃប្រហែល៣ពាន់លានដុល្លារអាមេរិក នៅក្នុងកិច្ចព្រមព្រៀងដែលអាចនឹងប្រកាសនៅចុងសប្តាហ៍នេះ។

ទោះជាយ៉ាងណា ក្រុមហ៊ុនគ្រប់គ្រងការវិនិយោគរបស់សហរដ្ឋអាមេរិក Blackstone Group Inc បានបដិសេធមិនធ្វើអត្ថាធិប្បាយឡើយ ជុំវិញដំណឹងនេះ ចំណែកឯក្រុមហ៊ុន Soho China ក៏មិនបានឆ្លើយតបទីភ្នាក់ងារព័ត៌មាន Reuters ដែលសុំការបំភ្លឺនោះដែរ។

ដំណឹងនេះបែកធ្លាយមួយថ្ងៃ ក្រោយពីភាគហ៊ុនរបស់ក្រុមហ៊ុន Soho China ត្រូវបានផ្អាកមិនឱ្យធ្វើការជួញដូរ តាមសំណើរបស់ក្រុមហ៊ុន ដោយរង់ចាំសេចក្តីប្រកាសមួយស្ថិតក្រោមច្បាប់របស់ក្រុងហុងកុង ស្តីពីការកាន់កាប់ និងការច្របាច់បញ្ចូលគ្នា។

យោងតាមទិន្នន័យរបស់ក្រុមហ៊ុន Refinitiv ដែលជាក្រុមផ្ដល់ទិន្នន័យទីផ្សារហិរញ្ញវត្ថុនិងហេដ្ឋារចនាសម្ព័ន្ធទូទាំងពិភពលោកបង្ហាញថា ក្រុមហ៊ុននេះមានតម្លៃទីផ្សារ២,៥៥ពាន់លានដុល្លារអាមេរិក បើគិតត្រឹមពេលបិទការជួញដូរលើកចុងក្រោយ។

ភាគហ៊ុន៦៤%នៃក្រុមហ៊ុន Soho China កាន់កាប់ដោយលោក Pan Shiyi ដែលជាប្រធានក្រុមហ៊ុន និងភរិយាគឺលោកស្រី Zhang Xin ដែលជានាយកប្រតិបត្តិ។

បង្កើតឡើងក្នុងឆ្នាំ១៩៩៥ ដោយលោក Pan Shiyi និងលោកស្រី Zhang Xin ក្រុមហ៊ុនSoho China បានចុះបញ្ជីជាសាធារណៈនៅក្រុងហុងកុង ក្នុងឆ្នាំ២០០៧ ហើយក្រុមហ៊ុនមានឈ្មោះល្បីល្បាញយ៉ាងខ្លាំង ខាងសាងសង់អគារការិយាល័យ បែបថ្ងៃអនាគតនៅចិនដីគោក៕

ដោយៈ គៀតឈូ

ភ្នំពេញៈ រដ្ឋាភិបាលថៃរំពឹងថា ទំហំវិនិយោគនៅច្រករបៀងសេដ្ឋកិច្ច នៅភាគខាងកើត (EEC) នឹងកើនឡើងដល់៣០០ពាន់លានបាត (ប្រមាណ៩,៦ពាន់លានដុល្លារ) នៅឆ្នាំនេះ តាមការរំពឹងទុករបស់ខ្លួន។ នេះបើយោងតាមការចេញផ្សាយរបស់កាសែតបាងកកប៉ុស្តិ៍ នៅថ្ងៃទី១៦ ខែមិថុនា ឆ្នាំ២០២១។

យោងតាមលោក Kanit Sangsubhan អគ្គលេខាធិការការិយាល័យតំបន់ EEC បានឱ្យដឹងថា ការវិនិយោគឯកជននឹងកើនឡើងនៅឆ្នាំនេះ ដែលត្រូវបានជំរុញដោយការងើបឡើងវិញនៃសេដ្ឋកិច្ចសកល និងការកើនឡើងនៃពាណិជ្ជកម្មពិភពលោក។

លោកKanit មានប្រសាសន៍ថា “ការវិនិយោគជាក់ស្តែងនាពេលបច្ចុប្បន្ន មានកម្រិតទាបណាស់កាលពីឆ្នាំមុន ដោយសារវិនិយោគិនមានការស្ទាក់ស្ទើរ ក្នុងការបោះទុនវិនិយោគ ដោយសារវិបត្តិកូវីដ១៩។ ប៉ុន្តែ វិនិយោគិនត្រូវបានរំពឹងថានឹងបង្កើនការវិនិយោគវិញនៅឆ្នាំនេះ”។

កាលពីឆ្នាំមុន ការវិនិយោគជាក់ស្តែងនៅក្នុងតំបន់ EEC មានទំហំទឹកប្រាក់សរុប៩៦ពាន់លានបាត ស្មើនឹង៤៦% នៃពាក្យសុំវិនិយោគសរុបដែលបានដាក់ចេញ តាមរយៈក្រុមប្រឹក្សាវិនិយោគថៃ (BoI)។
ជាមួយគ្នានេះដែរ តំបន់ EEC គឺជាតំបន់យុទ្ធសាស្ត្រមួយរបស់រដ្ឋាភិបាល ក្នុងការធ្វើឱ្យប្រទេសថៃឆ្ពោះទៅរកសេដ្ឋកិច្ចឌីជីថលទំនើប។

តំបន់នេះ លាតសន្ធឹងលើផ្ទៃដីរួមប្រមាណ៣០.០០០រ៉ៃ នៅខេត្តឈុនបូរី ខេត្តរ៉ាក់យ៉ង និងឆាឆេងសៅ (Chachoengsao) ដើម្បីទទួលការវិនិយោគនៅក្នុងវិស័យឧស្សាហកម្ម ដែលភាគច្រើនផ្តោតសំខាន់លើបច្ចេកវិទ្យាជឿនលឿន។

តំបន់ EEC នឹងរៀបចំជាតំបន់ផ្តោតលើឧស្សាហកម្មគោលដៅចំនួន១២ រួមមានរថយន្ត អេឡិចត្រូនិកឆ្លាតវៃ ទេសចរណ៍សុខាភិបាល និងសុខភាព កសិកម្មនិងជីវបច្ចេកវិទ្យា ចំណីអាហារ មនុស្សយន្តសម្រាប់ឧស្សាហកម្ម ភ័ស្តុភារ និងអាកាសចរណ៍ ជីវឥន្ធនៈនិងជីវគីមី ឌីជីថល សេវាវេជ្ជសាស្រ្ត ការពារនិងអភិវឌ្ឍការអប់រំ។

រដ្ឋាភិបាលថៃកំពុងផ្តល់ជូននូវលើកទឹកចិត្តជាច្រើន សម្រាប់ការវិនិយោគនៅក្នុងតំបន់នេះ ដែលរាប់បញ្ចូល ការកាត់បន្ថយលើផ្នែកពន្ធរយៈពេល៥ទៅ១០ឆ្នាំ អាស្រ័យលើប្រភេទវិនិយោគ ការលើកលែងពន្ធលើប្រាក់ចំណូលក្រុមហ៊ុន សម្រាប់រយៈពេល២ឆ្នាំបន្ថែម និងការកាត់បន្ថយពន្ធក្រុមហ៊ុន៥០ភាគរយ សម្រាប់រយៈពេល៣ឆ្នាំ សម្រាប់ការវិនិយោគ និងគម្រោងទាក់ទងនឹងការអភិវឌ្ឍធនធានមនុស្ស៕

ដោយៈ ម៉ាណេត

ភ្នំពេញៈ សភាពាណិជ្ជកម្មកម្ពុជា នឹងដាក់ការិយាល័យតំណាងនៅទីក្រុងតូក្យូ នៅពេលឆាប់ៗខាងមុខនេះ ដើម្បីទាក់ទាញវិនិយោគិនជប៉ុនមកកាន់កម្ពុជាបន្ថែមទៀត។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ ឱ្យដឹងនៅថ្ងៃទី១៦ ខែមិថុនា ឆ្នាំ២០២១ ដើម្បីបង្កើនភាពទាក់ទាញដល់អ្នកវិនិយោគជប៉ុនមកកាន់កម្ពុជាបន្ថែម សភាពាណិជ្ជកម្មកម្ពុជា នឹងមានការិយាល័យតំណាងសភាពាណិជ្ជកម្មកម្ពុជានៅទីក្រុងតូក្យូ ក្នុងពេលខាងមុខឆាប់ៗនេះ។

លោកឧកញ៉ាបានថ្លែងថា “យើងបានប្រជុំគ្នារួចហើយ ដោយយើងនឹងមានការចាត់តាំងតំណាង សភាពាណិជ្ជកម្មប្រចាំនៅជប៉ុនតែម្តង ហើយយើងមិនបោះឆ្នោតទេ ដោយភាគីជប៉ុន នឹងចាត់ឱ្យតំណាងគាត់មក ហើយយើងនឹងចាត់តាំងតំណាងសភាពាណិជ្ជកម្ម”។លោកបន្តថា “ក្នុងនាមអ្នកតំណាងនេះ យើងជ្រើសរើសអ្នកដែលជាសមាជិករបស់សភាពាណិជ្ជកម្មកម្ពុជា ដែលខាងភាគីជប៉ុនស្នើសុំមក”។

លោកឧកញ៉ាលឹម ហេងបានឱ្យដឹងថា អ្នកដែលតំណាងឱ្យយើង ភាគច្រើនគឺជាក្រុមហ៊ុនជប៉ុន ដែលមានអាជីវកម្មនៅកម្ពុជា ឬស្គាល់ពីកម្ពុជាច្បាស់ ហើយយើងនឹងធ្វើ ឱ្យកាន់តែជិតស្និតជាមួយសភាពាណិជ្ជកម្ម និងក្រសួងពាណិជ្ជកម្ម ដើម្បីធ្វើការផ្សព្វផ្សាយជាមួយនឹងគោលនយោបាយផ្សេងៗ ការលើកទឹកចិត្ត និងច្បាប់វិនិយោគ ក្នុងការទាក់ទាញអ្នកវិនិយោគមកពីប្រទេសជប៉ុនបន្ថែម។

លោកឧកញ៉ាបានថ្លែងបន្តថា “កិច្ចការរៀបចំតំណាងនេះ នឹងអាចធ្វើទៅបានលឿន ដោយសារគ្រាន់តែរងចាំការស្នើដាក់តំណាងពីភាគីជប៉ុន ហើយយើងនឹងរៀបចំឯកសារ ដើម្បីបញ្ជូនទៅស្ថានទូតយើងនៅជប៉ុន ដោយមានអនុព័ន្ធពាណិជ្ជកម្មនៅទីនោះ ហើយអាចធ្វើការជាមួយគ្នាបានតែម្តង”។

វិនិយោគិនជប៉ុនបាន និងកំពុងវិនិយោគស្ទើតែគ្រប់វិស័យនៅកម្ពុជា ប៉ុន្តែអ្វីដែលយើងមើលឃើញភាគច្រើន វិនិយោគិនជប៉ុនវិនិយោគលើផ្នែកអេឡិចត្រូនិក និងគ្រឿងបង្គំរថយន្ត ហើយបច្ចុប្បន្នយើងឃើញ វិនិយោគក៏បានឈានជើង ចូលមកវិនិយោគលើវិស័យអចលនទ្រព្យ មជ្ឈមណ្ឌលពាណិជ្ជកម្ម និងកសិកម្មនៅកម្ពុជាផងដែរ៕

ដោយៈ ម៉ាណេត

ភ្នំពេញៈ កម្ពុជាឈរនៅលំដាប់ទី២ ដែលទទួលបានទុនវិនិយោគច្រើនបំផុតពីវៀតណាម បន្ទាប់ពីសហរដ្ឋអាមេរិក។ នេះបើយោងតាមការចេញផ្សាយរបស់សារព័ត៌មាន VNA ដែលដកស្រង់ទិន្នន័យចេញពីក្រសួងផែនការ និងវិនិយោគរបស់វៀតណាមនៅថ្ងៃទី១៥ ខែមិថុនា ឆ្នាំ២០២១។

ក្រសួងបានឱ្យដឹងថា ក្នុងចំណោមប្រទេសចំនួន១៥ បានទទួលការវិនិយោគពីប្រ​ទេសវៀតណាមរយៈ៥ខែ គិតពីខែមករាដល់ខែឧសភា ឆ្នាំ២០២១នេះ សហរដ្ឋអាមេរិកជាប្រទេសទទួលបានទឹកប្រាក់វិនិយោគច្រើនជាងគេ ពីវៀតណាមចំនួន៣០៣លានដុល្លារ ស្មើនឹង៥៥,៤% នៃការបោះទុនសរុបរបស់វៀតណាមនៅប្រទេស។

បន្ទាប់មក ប្រទេសកម្ពុជាឈរនៅលំដាប់លេខ២ ដែលទទួលបានទុនវិនិយោគប្រមាណ៨៩,១លានដុល្លារ ឬ១៦,៣% នៃការបោះទុនសរុបរបស់វៀតណាមនៅប្រទេស។ ជាមួយគ្នានេះដែរ វៀតណាមបោះទុនវិនិយោគប្រមាណ៣២,១លានដុល្លារ នៅកាណាដា និង៣២លានដុល្លារនៅបារាំង។

ការវិនិយោគនៅប្រទេសរបស់វៀតណាម ភាគច្រើនត្រូវបានចាក់ចូលក្នុងវិស័យវិទ្យាសាស្ត្រ និងបច្ចេកវិទ្យាដែលស្មើនឹង៤៩.៥% នៃចំនួនទុនសរុប វិស័យលក់ដុំ និងលក់រាយមានប្រមាណ២៧% ហើយបន្ទាប់ពីវិស័យកសិកម្ម និងសេវាកម្មផ្សេងៗ។

ក្រុមហ៊ុនវៀតណាមជាច្រើន បានបង្កើនការវិនិយោគក្រៅប្រទេស ក្នុងរយៈពេលប៉ុន្មានឆ្នាំចុងក្រោយនេះ ដើម្បីជំរុញការវិនិយោគរបស់ខ្លួនលើពិភពលោក។

គិតត្រឹមថ្ងៃទី២០ ខែឧសភា ឆ្នាំ២០២១ វៀតណាមមានគម្រោងចំនួន១.០២២ដែលមានសុពលភាពនៅក្រៅប្រទេស ក្រោមទុនវិនិយោគសរុបជិត២២ពាន់លានដុល្លារ ផ្តោតភាគច្រើនផ្តោតលើវិស័យរ៉ែ ដែលរួមចំណែក៣៦,៤% នៃទុនវិនិយោគសរុប ខណៈកសិផល-នេសាទមាន ១៥,៣ភាគរយ៕