ដោយៈ លក្ខិណា

ភ្នំពេញ ៖ បន្ទាប់ពីមានការរីករាលដាលនៃជំងឺកូវីដ១៩នៅក្នុងប្រទេសកម្ពុជាមក រដ្ឋាភិបាលបានសម្រេចចាត់វិធានការរឹតបន្តឹងចំពោះការជួបជុំការធ្វើដំណើររហូតដល់មានការបិទខ្ទប់រាជធានីភ្នំពេញទាំងមូល និងក្រុងតាខ្មៅនៃខេត្តកណ្ដាល និងតំបន់មួយចំនួនតាមបណ្ដាខេត្តផងដែរ។

ការបិទខ្ទប់នេះធ្វើឱ្យសកម្មភាពនៃអាជីវកម្ម និងសកម្មភាពនៃការវិនិយោគក៏ត្រូវអាក់ខាន តែក្រោយពេលរដ្ឋាប្រកាសបញ្ចប់ការបិទខ្ទប់ អ្នកជំនាញអចលនទ្រព្យរំពឹងថាការទិញលក់ និងសកម្មភាពនៃវិស័យអចលនទ្រព្យអាចនឹងងើបឡើងវិញ។

លោកសំ សុខនឿនប្រធានសមាគមអចលនទ្រព្យសកល បានមានប្រសាសន៍នៅថ្ងៃទី៤ ខែឧសភា ឆ្នាំ២០២១ថា ការបញ្ចប់ការបិទខ្ទប់រាជធានីភ្នំពេញ និងក្រុងតាខ្មៅ គឺជាលទ្ធផលមួយល្អប្រសើរ សម្រាប់វិស័យសេដ្ឋកិច្ចព្រោះពេលនោះ អ្វីៗនឹងអាចវិលមកប្រក្រតី ហើយរាល់អាជីវកម្មទាំងឡាយអាចសកម្មឡើងវិញ ជាមួយនឹងសកម្មភាពនៃការវិនិយោគជាដើម។

លោកបានថ្លែងថា “ការLockdown នៅកម្ពុជាគឺមានរយៈពេល៣សប្ដាហ៍កន្លងទៅហើយ ហើយបើនិយាយពីការប៉ះពាល់ដល់សេដ្ឋកិច្ច និងវិស័យអចលនទ្រព្យគឺមានផលប៉ះពាល់ខ្លះ”។

លោកបានបន្តថា នៅពេលរដ្ឋាភិបាលប្រកាសបើកឡើងវិញនៅថ្ងៃទី៦ ខែឧសភា ២០២១ខាងមុខនេះ សេដ្ឋកិច្ចកម្ពុជានឹងអាចវិលត្រលប់ទៅសភាពដើមវិញ ប្រជាពលរដ្ឋអាចធ្វើដំណើរពីតំបន់មួយទៅតំបន់មួយឡើងវិញ ដែលអាចធ្វើឱ្យចរន្ត នៃការទិញលក់អចលនទ្រព្យនឹងត្រលប់ទៅសភាពដើមវិញ ប៉ុន្តែការរីកចម្រើន ឬមិនរីកចម្រើននោះ ក៏មិនអាចព្យាករបានដែរ។

លោកបន្ថែមថា ទោះបីជាកម្ពុជាបានសម្រេចបិទខ្ទប់តំបន់មួយចំនួនក៏ពិតមែន តែការចរចានៃការបង្កើតគម្រោងវិនិយោគនៅក្នុងប្រទេសនៅតែមាន ដោយធ្វើទៅតាមប្រព័ន្ធអនឡាញ តែការសម្រេចចិត្ត ឬភាពជោគជ័យនៃការចរចានោះមិនមាននោះឡើយ ព្រោះតែពួកគេមិនអាចជួបគ្នា ដើម្បីជជែកលម្អិតពីគម្រោងនីមួយៗឡើយ។

លោកលឹម រដ្ឋាភ្នាក់ងារអចលនទ្រព្យមួយរូបប្រចាំខេត្តកំពតនិងខេត្តកែបបាននិយាយថា សកម្មភាពទិញនៃការទិញលក់អចលនទ្រព្យ ក្នុងអំឡុងពេលបិទខ្ទប់រាជធានីភ្នំពេញ និងការរាលដាលនៃកូវីដ១៩ គឺធ្វើឡើងតាមរយៈការជួបតាមទូរសព្ទ និងតាមប្រព័ន្ធអនឡាញ ដូច្នេះការសម្រេចចិត្តរបស់អ្នកទិញគឺនៅមានភាពស្ទាក់ស្ទើរ និងមានអ្នកលក់ខ្លះចង់ទៅទីតាំងដីធ្លី ឬអចលនទ្រព្យភ្លាម តែមិនអាចធ្វើបាន ព្រោះតែបម្រាមរបស់អាជ្ញាធរ។

លោកបានបន្តថា ភ្ញៀវទិញដីនៅកំពត និងកែបភាគច្រើនជាភ្ញៀវមកពីភ្នំពេញ ហើយនៅពេលភ្នំពេញបិទខ្ទប់ ពួកគាត់ក៏មិនអាចចេញពីផ្ទះ ដើម្បីទៅមើលទីតាំងបាន ដូច្នេះនៅពេលដែលរដ្ឋាភិបាលប្រកាសបញ្ចប់ការបិទខ្ទប់ លោករំពឹងថា ការទិញលក់អចលនទ្រព្យនឹងអាចដូចដើមវិញ ដោយសារតែពួកគេអាចធ្វើដំណើរចេញពីផ្ទះ និងអាចឆ្លងពីខេត្តមួយទៅខេត្តមួយបានទៀតផង៕

          ដោយៈលក្ខិណា

ភ្នំពេញៈ ភ្នាក់ងារអចលនទ្រព្យទាំងអស់ មិនមែនសុទ្ធតែជោគជ័យទាំងអស់នោះទេ មានខ្លះក៏ជោគជ័យខ្លះក៏បរាជ័យ ហេតុទើបមានការផ្ដល់ជាទស្សនៈនិងគំនិតមួយថា ជាភ្នាក់ងារអចលនទ្រព្យថ្មី ត្រូវមើលនិងតាមដានសកម្មភាព ហើយត្រូវទៅកៀកឱ្យជិតនឹងភ្នាក់ងារអចលនទ្រព្យរៀបច្បង។

ឧកញ៉ាម៉ាន់ ច័ន្ទឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានចងក្រងជាសៀវភៅមួយក្បាល ដែលនិយាយពីគន្លឹះសំខាន់ៗ សម្រាប់ភ្នាក់ងារអច​លនទ្រព្យ បានបង្ហាញពីគន្លឹះនៃការស្វែងរកភ្នាក់ងារអចលនទ្រព្យរៀមច្បង ដែលអាចជួយតម្រង់ទិស ភ្នាក់ងារអចលនទ្រព្យថ្មីបានឆាប់រហ័ស។

តើហេតុអ្វីទើបមានភាពចាំបាច់ ស្វែងរកភ្នាក់ងារអចលនទ្រព្យរៀមច្បងក្នុងការជួយតម្រង់ទិស ?

១.ជួយភ្នាក់ងារអចលនទ្រព្យថ្មី កាត់បន្ថយការរៀន

ជាភ្នាក់ងារអចលនទ្រព្យត្រូវរៀនជាប្រចាំ ហើយអ្នកតម្រង់ទិសយើងគាត់នឹងបើកចំហ ក្នុងការចែករំលែកយុទ្ធសាស្ត្ររៀនដល់យើង។ យើងត្រូវស្វែងរកអ្នកតម្រង់ទិសណាដែលគាត់មានបទពិសោធន៍និងវិជ្ជាជីវៈ ព្រមជាមួយវិធីសាស្ត្របង្រៀនល្អៗ ដែលអាចជួយយើងឱ្យរីកចម្រើន។

២. ជួយបង្រៀនយើងទាំងការអនុវត្តនិងបង្កើនសមត្ថភាពជំនាញ

អ្នកតម្រង់ទិសរបស់យើងគឺជាបុគ្គល ដែលជួយបង្រៀនឱ្យយើងទទួលបានជោគ​ជ័យ ក្នុងវិស័យអចលនទ្រព្យ។ គាត់ត្រូវមានបទពិសោធន៍ ដូចជា ការធ្វើបទបង្ហាញអចល​នទ្រព្យ ការយកអចលនទ្រព្យមកលក់ ហើយពួកគាត់ក៏ត្រូវមានជំនាញពិសេសផ្សេងៗ ដូចជាការដោះស្រាយបញ្ហាលក់ និងការចរចា សម្របសម្រួលរវាងអ្នកលក់និងអ្នកទិញ ជាដើម។

៣. ជួយយើងឱ្យជៀសផុតពីអន្ទាក់

យើងត្រូវរកអ្នកតម្រង់ទិញណា ដែលអាចជួយឱ្យយើងប្រសើរឡើងវិញ ពីរបួសស្នាម ដែលយើងបានទទួលរងគ្រោះពីមុនមក នៅក្នុងវិស័យអចលនទ្រព្យនេះ ដូចជាពេលខ្លះ យើងក្លាយទៅជាអ្នកប្រមូលព័ត៌មានឱ្យភ្នាក់ងារផ្សេងទៀត ដោយមិនដឹងខ្លួនជាដើម។ គាត់អាចជួយយើងឱ្យជៀសផុតពីកំហុសទាំងឡាយ ដែលអាចកើតឡើងក្នុងអំឡុងពេលប្រកបអាជីពនេះ។

អ្វីដែលសំខាន់មួយទៀត គឺត្រូវរកអនកតម្រង់ទិសនៅក្នុងតំបន់ ដែលយើងកំពុងប្រកបអាជីព ហើយប្រសិនបើយើងចូលរួមក្នុងក្រុមណាមួយ ត្រូវរកអ្នកតម្រង់ទិសនៅក្នុងក្រុមនោះតែម្ដង។

នៅក្នុងពេលបច្ចុប្បន្ននេះ មានអ្នកជោគជ័យក្នុងវិស័យអចលនទ្រព្យជាច្រើន បានកើតចេញពីការដើរតាមអ្នកជោគជ័យ ក្នុងវិស័យអចលនទ្រព្យដូចគ្នា ហើយក៏ទទួលបានជោគជ័យចង់លើសអ្នកមុនផង ដែលអាចនិយាយបានរលកក្រោយច្រានរលកមុខ៕

          ដោយៈបញ្ញា

ភ្នំពេញៈ ក្រោយពីស្ថានការណ៍នៃការបិទខ្ទប់ត្រូវបានបន្ធូរ និងបញ្ចប់ វិស័យអច​ល​នទ្រព្យកម្ពុជានឹងងើបឡើងវិញភ្លាមៗ និងខ្ពស់ហួសពីការរំពឹងទុក ជាពិសេសតាមបណ្តាតំបន់ក្បែរនឹង វត្តភ្នំ (វត្តភ្នំតូច) ជិតផ្លូវជាតិលេខ៥១ ជាផ្លូវក្រវ៉ាត់ក្រុងសំខាន់ទី៤។

តំបន់នេះជាប៉ូលសេដ្ឋកិច្ចខ្លាំងសំខាន់ ត្បិតបណ្ដុំដោយឧស្សាហកម្ម រោងចក្រ សហគ្រាសធំៗ នេះជាការលើកឡើងដោយអ្នកជំនាញអចលនទ្រព្យក្នុងស្រុក។

តំបន់ខាងលើនេះ​ ស្ថិតនៅខាងលិចជាប់រាជធានីភ្នំពេញ ជា​តំបន់​ខ្ពង់រាប​មិន​លិច​ទឹក សម្រូលដល់ការអភិវឌ្ឍ និងមានរួចជាស្រេច នូវផ្លូវសរសៃឈាមសេដ្ឋកិច្ចសំខាន់ តភ្ជាប់គ្នារវាងផ្លូវជាតិលេខ៣ លេខ៤ និងលេខ៥ ផ្ដល់ភាពងាយស្រួលក្នុងការធ្វើដំណើរ ការដឹកជញ្ជូនទំនិញទៅមក ពីកំពង់ផែអន្តរជាតិព្រះសីហនុ និងចំណេញពេលវេលាច្រើន។

ទីតាំងតំបន់ដ៏មានសក្ដានុពល និងជាតំបន់កំពុងអភិវឌ្ឍនេះ បានជះឥទិ្ធពលខ្លាំងទៅលើ តម្លៃអចលនទ្រព្យអោយនៅតែមានលំនឹង និងបន្តកំណើនឡើងជាបន្តបន្ទាប់ បើទោះណាសេដ្ឋកិច្ចបាន និងកំពុងត្រូវបានជាប់គាំង ដោយវិបត្តិជំងឺរាតត្បាតជាសកល ជំងឺកូវីដ-១៩ក្តី។

អ្នកជំនាញរូបនេះបានបន្តថា តាមយុទ្ធសាស្ត្រ និងផែនការពង្រីករាជធានីនៃរដ្ឋាភិបាលដែលបានដាក់ចេញកន្លងមក  បាននិងបន្តជះឥទ្ធិពលវិជ្ជមាន និងខ្លាំងដល់បណ្តាតំបន់ជាយៗ ឱ្យមានការអភិវឌ្ឍជាបណ្តើរៗ ដែលក្នុងនោះ បណ្តាតំបន់ជាប់នឹង វត្តភ្នំ (វត្តភ្នំតូច) នឹងក្លាយជាអាទិភាពចំបង អំណោយផលខ្លាំង ត្បិតបាននិងកំពុងទាក់ទាញបាននូវ វិនិយោគិនជាតិ និងអន្តរជាតិ មកវិនិយោគលើវិស័យរោងចក្រ សហគ្រាស ឃ្លាំងស្ដុកទំនិញ អគារពាណិជ្ជកម្ម និងលំនៅដ្ឋានជាដើម។

ម្យ៉ាងវិញទៀត ភាពអ៊ូអរនៃទីប្រជុំជន តាមរយះលំហូរប្រជាជនមករស់នៅក្នុងមូលដ្ឋានជិតៗ សម្រួលដល់កំណើនមុខរបរតូចៗផ្សេងៗ ញាំងឲ្យតំបន់ជាយក្រវ៉ាត់ក្រុងផ្លូវលេខ៥១មួយនេះ កាន់តែមានពន្លឿនភាព នៃការអភិវឌ្ឍបន្ថែមមួយកំរិតទៀត។ គោលនយោបាយអភិវឌ្ឍន៏ ជាទល្ហីករណ៏មួយពន្លឿនសេដ្ឋកិច្ច នៅតាមតំបន់នានាជិតៗឲ្យកាន់តែមានកំណើនវិវឌ្ឍន៏ឥតឈប់ឈរផងដែរ ដោយគោលនយោបាយនោះ មានជាការរផ្លាស់ប្ដូរទីតាំង រោងចក្រ សហគ្រាស ឃ្លាំងស្ដុកទំនិញ និងយានដ្ឋានជួសជុលរថយន្តធំៗ ពីតំបន់រាជធានី​ទៅកាន់តំបន់នេះឆាប់ៗខាងមុខ។ 

ការណ៍នេះ រួមផ្សំនឹងកត្តាបិទខ្ទប់ ដើម្បីការពារការឆ្លងរីករាលដាលនៃជំងឺកូវីដ-១៩ អាចធ្វើយើងមើលឃើញថា វាក៏ជាឱកាសដ៏វិសេសវិសាល សម្រាប់អ្នកដែលចង់ទិញ អចលនទ្រព្យ ដើម្បីទុកលក់ចំនេញក្រោយវិបត្តិត្រូវបានបញ្ចប់។

តាមទស្សនៈរបស់លោក ការស្វែងរក និងធ្វើជាម្ចាស់អចលនទ្រព្យថ្មីអំឡុងវិបត្តិកូវីដ-១៩ ជាឱកាស​សម្រាប់បងប្អូន ដែលមានជីវភាពកម្រិតមធ្យម និងក្រោមមធ្យមអាចទទួលបានផលជំនិញ ឬអាចទទួលបាននូវផ្ទះសមប្រកបសម្រាប់រស់នៅ និងបើកអាជីវកម្មប្រចាំថ្ងៃទៀតផង៕