ហានិភ័យៈមេរោគកូវីដDelta ឆ្លងតាមរយៈខ្យល់ និងមានល្បឿនលឿនគួរឲ្យខ្លាច ខណៈអង្គការWHOព្រមាន

ដោយៈគង់ ម៉ាលីន

ភ្នំពេញៈ វីរុសកូវីដ១៩ បំប្លែងខ្លួន “Delta” ដែលត្រូវបានរកឃើញដំបូងនៅប្រទេសឥណ្ឌា អាចឆ្លងលឿន និងខ្លាំងបំផុតប្រើពេលត្រឹមតែ៥ ទៅ១០វិនាទីប៉ុណ្ណោះ។

លោកស្រីវេជ្ជបណ្ឌិត Kerry Chant ប្រធានផ្នែកសុខាភិបាលនៃរដ្ឋ New South Wales បានចង្អុលបង្ហាញថា ករណីនេះកើតឡើងនៅឯផ្សារទំនើប Westfield Bondi Junction នៅជាយក្រុងស៊ីដនី បន្ទាប់ពីមនុស្ស២នាក់ដើរកាត់គ្នា និងក្បែរគ្នារយៈពេលពីរបីវិនាទី ពេលកំពុងដើរទិញឥវ៉ាន់ ។

ជាមួយគ្នានេះ លោកស្រី Lara Herrero អ្នកឯកទេសខាងរោគល្អិតនៃសាកលវិទ្យាល័យ Griffith បាននិយាយថា វីរុសនេះអាចស្ថិតនៅក្នុងខ្យល់បានយូរល្មម ហើយនៅពេលមនុស្សដកដង្ហើមចូល វានឹងឆ្លងតែម្ដង ។ ផ្អែកលើព័ត៌មានដែលមាននាពេលបច្ចុប្បន្ននេះ បានចង្អុលបង្ហាញថា វីរុសបំប្លែងខ្លួនឥណ្ឌា ហាក់ដូចជាប្រភេទវីរុសដែលសាហាវ និងរាតត្បាតខ្លាំងបំផុត។

លោកស្រីបន្តថា“អ្នកចាំទេ នៅពេលរោគរាតត្បាតកូវីដ១៩ ចាប់ផ្តើម ខ្ញុំបាននិយា​យអំពីទំនាក់ទំនងជិតស្និទ្ធ រយៈពេល១៥នាទី គឺជាក្តីបារម្ភ ប៉ុន្តែឥឡូវនេះវាហាក់ដូចជាចំណាយពេលត្រឹមតែ៥ ទៅ១០ វិនាទីប៉ុណ្ណោះ”។លោកស្រីបន្តថា “នេះជាការព្រួយបារម្ភ ហើយឥឡូវនេះហានិភ័យ គឺខ្ពស់ជាងឆ្នាំមុនទៅទៀត”។

ទន្ទឹមនោះ លោកវេជ្ជបណ្ឌិត Mike Ryan នាយកមជ្ឈមណ្ឌលសង្គ្រោះបន្ទាន់របស់ WHO បាននិយាយថា វីរុសបំប្លែងខ្លួននេះ អាចមានប្រសិទ្ធភាពខ្ពស់ ក្នុងការឆ្លងចូលកោសិកា ហើយយើងកំពុងត្រូវការការសិក្សាបន្ថែមទៀត ដើម្បីកំណត់ចំនួនករណីឆ្លងវីរុសនេះ ។

ចំណែកលោក Tedros Adhanom Ghebreyesus ប្រធាន WHO បានចេញការព្រមានក្នុងទិសដៅតែមួយថា វីរុសបំប្លែងខ្លួនឥណ្ឌា “Delta” គឺជាប្រភេទវីរុសបំប្លែងខ្លួនងាយឆ្លងបំផុត ។

លោកបញ្ជាក់ថា “ឥឡូវនេះវាបានរីករាលដាល នៅក្នុងប្រទេសយ៉ាងហោចណាស់ចំនួន៩៦ ជាពិសេសនៅក្នុងប្រទេសក្រីក្រ ដែលខ្វះខាតវ៉ាក់សាំង ហើយវានឹងរីករាលដាលកាន់តែធ្ងន់ធ្ងរឡើងថែមទៀត ប្រសិនបើមិនមានវ៉ាក់សាំងគ្រប់គ្រាន់”៕

 

ព្រឹទ្ធសភាកម្ពុជាសម្រេចអនុម័តគម្រោងវិនិយោគលើវិស័យថាមពលតម្លៃជិត១ពាន់លានដុល្លារ

ដោយៈ ប៊ី

ភ្នំពេញៈ ព្រឹទ្ធសភាកម្ពុជាបានគាំទ្រនូវសំណើសេចក្តីព្រាងច្បាប់ចំនួន៤ របស់រាជរដ្ឋាភិបាល ចំពោះការធានាទូទាត់លើគម្រោងវិនិយោគវិស័យថាមពលអគ្គិសនី ដែលមានតម្លៃសរុបជិត១ពាន់លានដុល្លារអាមេរិក។ នេះបើយោងតាមការចេញផ្សាយរបស់សារព័ត៌មានរដ្ឋនៅថ្ងៃទី២ ខែកក្កដា ឆ្នាំ២០២១។

យោងតាមសេចក្តីព្រាងច្បាប់ ដែលត្រូវបានព្រឹទ្ធសភាអនុម័ត ក្រោយពីបានពិភាក្សានិងឱ្យយោបល់ ក្រោមការដឹកនាំរបស់សម្តេចវិបុលសេនាភក្តីសាយ ឈុំប្រធានព្រឹទ្ធសភា នៅព្រឹកថ្ងៃទី២ ខែកក្កដានេះ មានដូចជាៈ – ការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ខ្សែបណ្តាញបញ្ជូនអគ្គិសនីតង់ ស្យុង៥០០គីឡូវ៉ុល ពីខេត្ត បាត់ដំបងទៅកាន់ព្រំដែនកម្ពុជា-ថៃ។

– ការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីរាជធានីភ្នំពេញទៅកាន់ព្រំដែនកម្ពុជា-ឡាវ។

– ការធានាទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុនអគ្គិសនីវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម និងការ ធានាទូទាត់របស់រាជរដ្ឋាភិ បាលកម្ពុជា ឱ្យក្រុមហ៊ុន ឆាយណា ណេសិនណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍន៍វារីអគ្គិសនីស្ទឹងតាតៃលើអានុភាព១៥០មេហ្កាវ៉ាត់ ខេត្តកោះកុង។

គម្រោងវិនិយោគចំនួន៣ ក្រៅពីការធានាលើការទិញថាមពលអគ្គិសនីពីប្រទេសវៀតណាម គឺស្ថិតក្នុងរូបភាពសាងសង់ អាជីវកម្ម ផ្ទេរ(BOT) ក្នុងទុនសរុបជិត១.០០០លានដុល្លារអាមេរិក ក្នុងនោះគម្រោងអភិវឌ្ឍន៍វារីអគ្គិសនីស្ទឹងតាតៃលើអានុភាព១៥០មេហ្កាវ៉ាត់ ខេត្តកោះកុង មានតម្លៃជាង ៣៨៩លានដុល្លារ ក្នុងរយៈ ពេលសម្បទាន៣៩ ឆ្នាំ។

ចំណែក គម្រោងអភិវឌ្ឍន៍ខ្សែបណ្តាញបញ្ជូនអគ្គិសនីតង់ស្យុង ៥០០គីឡូវ៉ុល ពីខេត្តបាត់ដំបងទៅកាន់ព្រំដែនកម្ពុជា-ថៃ មានតម្លៃសរុបជាង ១១០លានដុលារ ក្នុងរយៈ ពេលសម្បទាន២៧ឆ្នាំ ខណៈគម្រោងអភិវឌ្ឍន៍ខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីរាជធានីភ្នំពេញទៅកាន់ព្រំដែនកម្ពុជា-ឡាវ មានទុនសរុបជាង៣៣០លានដុល្លារ ក្នុងរយៈពេលសម្បទាន២៨ឆ្នាំ។

លោកស៊ុយ សែមរដ្ឋមន្ត្រីក្រសួងរ៉ែ និងថាមពល បានបញ្ជាក់ថា គម្រោងវិនិយោគទាំង៤នេះ ត្រូវបានរាជរដ្ឋាភិបាលកម្ពុជា ធ្វើកិច្ចសន្យាធានាការទូទាត់ឱ្យទៅក្រុមហ៊ុនវិនិយោគ ក្នុងករណីអគ្គិសនីកម្ពុជាមិនទទួលទិញថាមពលអគ្គិសនីក្រោយពីផលិតបាន ការបញ្ចប់គម្រោងវិនិយោគ ឬ ប្រធានសក្តិណាមួយផ្នែកនយោបាយដែលរាំងស្ទះដល់ការអភិវឌ្ឍ ក្នុងរយៈពេលនៃការផ្តល់សិទ្ធិសម្បទាន។

រាជរដ្ឋាភិបាលកម្ពុជា បានអនុញ្ញាតឱ្យក្រុមហ៊ុនទីប្រឹក្សាមកពីប្រទេសជប៉ុន សហការជាមួយគណៈកម្មការអន្តរ ក្រសួង ដែលដឹកនាំដោយក្រសួងរ៉ែ និងថាមពល ធ្វើការសិក្សានិងរៀបចំផែនការមេអភិវឌ្ឍវិស័យថាមពលសម្រាប់ឆ្នាំ២០២០ ដល់ឆ្នាំ២០៣០ និងសម្រាប់រយៈពេលវែងពីឆ្នាំ២០២០ ដល់ឆ្នាំ២០៤០ ដើម្បីបំពេញឱ្យបានតាមតម្រូវការប្រើប្រាស់អគ្គិសនីផង និងក្នុងស្មារតីប្រុងប្រយ័ត្នខ្ពស់ ដែលអាចធានាបានថា ការអភិវឌ្ឍវិស័យថាមពលស្ថិតក្នុងកម្រិតសមស្រប។

តាមការវិភាគ និងព្យាករណ៍របស់អ្នកជំនាញ ប្រសិនបើពុំមានអ្វីប្រែប្រួលទេ កំណើននៃសេចក្តីត្រូវការអគ្គិសនីនៅកម្ពុជា នឹងបន្តកើនឡើងខ្ពស់ក្នុងរយៈពេលប៉ុន្មានឆ្នាំទៅមុខ មុននឹងថយចុះបន្តិចវិញមកក្បែរអត្រាកំណើនប្រហាក់ប្រហែលប្រទេសជិតខាង៕

ក្រុមហ៊ុនCentury21 Zillion Holdingចាប់ផ្តើមពង្រីកភ្នាក់ងារអចលនទ្រព្យ រហូតដល់មូលដ្ឋានឃុំទូទាំងប្រទេស

ដោយៈគង់ សូរិយា

ភ្នំពេញៈ ក្រុមហ៊ុនCentury21 Zillion holdingបាននិងកំពុងពង្រីកឱកាសការងារដល់ប្រជាពលរដ្ឋ រហូតដល់បណ្តាឃុំ សង្កាត់ទាំង១៦៤៦នៅទូទាំងប្រទេស។

លោកស្រីGrace Rachny Fongនាយិកាក្រុមហ៊ុនCentury21 Zillion Holdingបានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី២ កក្កដានេះថា បច្ចុប្បន្នក្រុមហ៊ុនបាននិងកំពុងផ្តល់ការងារអចលនទ្រព្យ ដល់ប្រជាពលរដ្ឋ ពិសេសយុវជននៅតាមបណ្តាឃុំ សង្កាត់ទូទាំងប្រទេស ជាមួយនឹងការបណ្តុះបណ្តាលត្រឹមត្រូវ ជាមួយនឹងប្រព័ន្ឋការ​ងារច្បាស់លាស់ និងការងារប្រកបដោយទំនុកចិត្ត និងក្រមសីលធ៌មវិជ្ជាជីវៈ។

លោកស្រីបន្តថា “ការពង្រីកសេវាកម្មដល់មូលដ្ឋាន ដើម្បីជួយគាត់អាចពង្រីកអាជី​វកម្ម ពិសេសការងារដីធ្លី និងលើកកំពស់សក្តានុពលនៅតាមមូលដ្ឋាន របស់គាត់ឲ្យមានការអភិវឌ្ឍកាន់តែឆាប់រហ័ស”។ លោកស្រីបន្តថា “យើងចង់ជួយបង្កើនប្រាក់ចំណូល​ដល់ប្រជាពលរដ្ឋរបស់យើង និងជំរុញល្បឿននៃការអភិវឌ្ឍនៅតាមមូលដ្ឋាន និងបង្ហាញពីសក្តានុពលនៅតាមមូលដ្ឋាននិមួយៗ ដើម្បីទាក់ទាញការវិនិយោគ”។

លោកស្រីGrace Rachny Fongបានបន្តថា នៅតាមមូលដ្ឋានជាច្រើន មានសក្តានុពលក្នុងការអភិវឌ្ឍ ហេតុននេះភ្នាក់ងារនៅតាមមូលដ្ឋាន ពិតជាមានឱកាសក្នុងការបង្ហាញពីឱកាសវិនិយោគ បង្ហាញពីឱកាសរីកចម្រើន និងទាក់ទាញគំរោងអភិវឌ្ឍន៍នានាទៅកាន់ភូមិ ឃុំរបស់ខ្លួន ដែលនេះជាបេសកកម្មរបស់យើង ដើម្បីពង្រីកនិងជំរុញល្បឿននៃការអភិវឌ្ឍន៍ជាតិ ស្របតាមគោលនយោបាយរបស់រដ្ឋាភិបាលកម្ពុជា៕

ក្រុមហ៊ុនតៃវ៉ាន់បោះទុនជាង៤៧លានដុល្លារបង្កើតរោងចក្រផលិតគ្រឿងសង្ហារឹមនៅកម្ពុជា

ដោយៈ ម៉ាណេត

ស្វាយរៀងៈ ក្រុមហ៊ុន Shane (Cambodia) Furniture Co., Ltd ដែលវិនិយោគដោយក្រុមហ៊ុនពីតៃវ៉ាន់ បានមកបណ្តាក់ទុនវិនិយោគប្រមាណ៤៧.៧លានដុល្លារអាមេរិក នៅកម្ពុជាក្នុងឆ្នាំ២០២១ ដើម្បីបង្កើតរោងចក្រផលិតគ្រឿងសង្ហារឹមគ្រប់ប្រភេទ ដោយប្រើប្រាស់វត្ថុធាតុដើមនាំចូល។

ការបង្កើតរោងចក្រផលិតគ្រឿងសង្ហារឹមត្រូវបានធ្វើឡើង លើផ្ទៃដីទំហំ៣៥ហិកតា នៅក្នុងតំបន់សេដ្ឋកិច្ចពិសេសស៊ីន បាវិត ស្ថិតនៅក្រុងបាវិត ខេត្តស្វាយរៀង ដែលអាចបង្កើតការងាររហូតដល់ជាង២០០០កន្លែង។ នេះបើយោងតាមសេចក្តីប្រកាសព័ត៌មានរបស់CDC កាលពីម្សិលមិញ។

នៅក្នុងឱកាសបំពេញទស្សនកិច្ចនៅទីតាំងរោងចក្ររបស់ក្រុមហ៊ុនទាំងពីរនេះ លោកសុខ ចិន្តាសោភារដ្ឋមន្ត្រីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី១ ខែកក្កដា ឆ្នាំ២០២១ បានសម្តែងការស្វាគមន៍គម្រោងវិនិយោគ របស់ក្រុមហ៊ុនដែលនឹងចូលរួមចំណែក ដល់ការធ្វើពិពិធកម្មសេដ្ឋកិច្ចកម្ពុជា។

ជាមួយគ្នានេះដែរ លោករដ្ឋមន្ត្រី បានស្នើឱ្យក្រុមហ៊ុន Shane (Cambodia) Furniture Co., Ltd ពិចារណាទិញវត្ថុធាតុដើមក្នុងស្រុក ព្រោះការប្រើប្រាស់វត្ថុធាតុដើមក្នុងស្រុកនឹងធ្វើឱ្យក្រុមហ៊ុនអាចនាំចេញដោយបង់ពន្ធក្រោមអត្រា ០% ឬអត្រាទាប។

បន្ថែមពីនេះ លោករដ្ឋមន្ត្រីក៏បានសំណូមពរក្រុមហ៊ុន ធ្វើយ៉ាងណាចៀសវាងឱ្យខាងតែបាននូវផលប៉ះពាល់បរិស្ថាន តាមរយៈការសាងសង់អាងប្រព្រឹត្តិកម្មទឹកកខ្វក់ ក៏ដូចជាការធ្វើប្រព្រឹត្តិកម្មសំណល់គ្រប់ប្រភេទ និងសហការជាមួយគ្រប់គ្រឹះស្ថានអប់រំ នៅក្នុងខេត្តស្វាយរៀង ជាពិសេស សាកលវិទ្យាល័យស្វាយរៀង និងវិទ្យាស្ថានពហុបច្ចេកទេសភូមិភាគតេជោសែនស្វាយរៀង ដើម្បីផ្តល់ឱកាសការងារដល់ក្មួយៗនិស្សិត។

លោករដ្ឋមន្ត្រីបានប្រាប់ឱ្យក្រុមហ៊ុនបានដឹងថា ដើម្បីលើកទឹកចិត្តដល់វិនិយោគិន សេចក្តីព្រាងច្បាប់ស្តីពីវិនិយោគថ្មី ដែលនឹងត្រូវគោរពដាក់ ជូនកិច្ចប្រជុំពេញអង្គគណៈរដ្ឋមន្ត្រីពិនិត្យ និងពិភាក្សានៅថ្ងៃទី៩ ខែកក្កដា ឆ្នាំ២០២១ ខាងមុខនេះ នឹងផ្តល់ការលើកទឹកចិត្តដល់វិនិយោគិន តាមរយៈការអនុញ្ញាតឱ្យកាត់កងចំណាយរហូតដល់១៥០% ពីមូលដ្ឋានគិតពន្ធ ចំពោះការចំណាយលើមធ្យោបាយដឹកជញ្ជូន ប្រកបដោយផាសុកភាពដល់កម្មករនិយោជិត, ការសាងសង់កន្លែងស្នាក់នៅ, កន្លែងបរិភោគអាហារ, ឬអាហារដ្ឋានដែលមានតម្លៃសមរម្យ ជាដើម។

តំណាងក្រុមហ៊ុនទាំងពីរ បានថ្លែងអំណរគុណរាជរដ្ឋាភិបាល ក្រសួង ស្ថាប័នពាក់ព័ន្ធ ជាពិសេស CDC និងអាជ្ញាធរដែនដី ដែលបានផ្តល់ការគាំទ្រគម្រោងវិនិយោគរបស់ក្រុមហ៊ុន និងបានចុះមកពិនិត្យ ទីតាំងរោងចក្រជាក់ស្តែងនាថ្ងៃនេះ។

ទន្ទឹមនឹងនេះដែរ តំណាងក្រុមហ៊ុនបានសម្តែងការស្វាគមន៍សេចក្តីព្រាងច្បាប់ស្តីពីវិនិយោគថ្មី និងបានសន្យាថានឹងយកចិត្តទុកដាក់ក្នុងការចាត់វិធានការការពារបរិស្ថាន និងលើកកម្ពស់សុខុមាលភាពរបស់បងប្អូនកម្មករនិយោជិត។ ជាក់ស្តែង ក្រុមហ៊ុនបានឱ្យដឹងថា ក្រុមហ៊ុនកំពុងសាងសង់កន្លែងស្នាក់នៅរបស់កម្មករនិយោជិត៕

ដំណឹងល្អៈសម្តេចតេជោបញ្ចប់ការធ្វើចត្តាឡីស័ក១៤ថ្ងៃជាមួយលទ្ឋផលអវិជ្ជមាន ពីជំងឺកូវីដ១៩

ដោយៈគង់ សូរិយា

ភ្នំពេញៈ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ប្រកាសពីការបញ្ចប់ការធ្វើចត្តាឡីស័ករយៈពេល១៤ថ្ងៃ នៅរសៀលថ្ងៃទី០២ ខែកក្កដា ឆ្នាំ២០២១នេះ ជាមួយលទ្ធផលអវិជ្ជមានជំងឺកូវីដ១៩។

សម្ដេចតេជោ ហ៊ុន សែន បានបញ្ជាក់នៅលើ Facebook យ៉ាងដូច្នេះថា “ថ្ងៃនេះក្រុមគ្រូពេទ្យបានមកយកសំណាកខ្ញុំ ទៅធ្វើតេស្តជាលើកចុងក្រោយ បន្ទាប់ពីការធ្វើចត្តាឡីស័ករយៈពេល១៤ថ្ងៃ។ លទ្ធផលពីមន្ទីរពិសោធន៍ បានបញ្ជាក់ថា ខ្ញុំអវិជ្ជមានពីកូវីដ-១៩ ដែលខ្ញុំត្រូវបញ្ចប់ការធ្វើចត្តាឡីស័កត្រឹមល្ងាចថ្ងៃទី០២ ខែកក្កដា ឆ្នាំ២០២១នេះ”។

ក្នុងចំណោមមេដឹកនាំអាស៊ាន ប្រហែលមានតែខ្ញុំម្នាក់ទេ ដែលធ្វើចត្តាឡីស័កច្រើនជាងគេរហូតដល់ទៅ៣ដង ក្នុងរយៈពេល៨ខែ។ ខ្ញុំសង្ឃឹមថា នឹងពុំមានលើកទី៤ទៀតទេ។
“ដើម្បីធានាថាពុំមានលើកទី៤ មនុស្សដែលត្រូវជួបខ្ញុំ ត្រូវបានធ្វើតេស្តជាមុនយ៉ាងហោចណាស់ គឺការធ្វើតេស្តរហ័ស និងកាន់តែធានាសម្រាប់ទាំងអស់ គឺការមិនជួបគ្នាដោយផ្ទាល់ និងជំនួសដោយការជួបគ្នាតាមប្រព័ន្ធបច្ចេកវិទ្យាព័ត៌មានវិញ”។

សម្តេចតេជោ ហ៊ុន សែន កាលពីថ្ងៃទី១៩ ខែមិថុនា ឆ្នាំ២០២១ បានប្រកាសសម្រេចលុបចោលកម្មវិធីជួបជុំទាំងអស់ ដែលបានគ្រោងទុក ដោយសារតែសម្តេច បានជាប់ពាក់ព័ន្ធ ដោយប្រយោលជាមួយអ្នកជំងឺកូវីដ១៩ គ្រូពេទ្យតម្រូវឲ្យធ្វើតេស្ត និងធ្វើច ត្តាឡីស័ករយៈពេល១៤ថ្ងៃជាចាំបាច់៕

 

រដ្ឋាភិបាលអូស្ត្រាលីជើសរើសខេត្តព្រះសីហនុដើម្បីអភិវឌ្ឍន៍ជាទីក្រុងឆ្លាតវៃក្រោមគម្រោង3iតម្លៃជាង៣៣លានដុល្លារ

ដោយៈ ម៉ាណេត

ភ្នំពេញៈ រដ្ឋាភិបាលអូស្ត្រាលី តាមរយៈស្ថានទូតអូស្រ្តាលីប្រចាំកម្ពុជាជ្រើសរើសខេត្តព្រះសីហនុ ដើម្បីគាំទ្រការអភិវឌ្ឍគម្រោងទីក្រុងឆ្លាតវៃ ជាមួយកម្មវិធីវិនិយោគក្នុងវិស័យហេដ្ឋារចនាសម្ព័ន្ធ (3i) ជាមួយថវិកា៤៩លានដុល្លារអូស្ត្រាលី (៣៣,៦លានដុល្លារអាមេរិក)។ នេះបើយោងតាមការលើកឡើងរបស់ស្ថានទូតអូស្ត្រាលី។

លោក Anthony Samson លេខាទី២ នៅស្ថានទូតអូស្រ្តាលី កាលចុងខែមិថុនា កន្លងទៅ បានធ្វើសុន្ទរកថាបើកសិក្ខាសាលាតាមអ៊ីនធឺណេត ស្តីពី “ការជ្រើសរើសគម្រោងអាទិភាព សម្រាប់ហេដ្ឋារចនាសម្ព័ន្ធទីក្រុងឆ្លាតវៃ” ។ សិក្ខាសាលានេះត្រូវបានរៀបចំឡើងដោយ កម្មវិធីវិនិយោគក្នុងវិស័យហេដ្ឋារចនាសម្ព័ន្ធ (3i) ជាមួយថវិកា៤៩លានដុល្លារអូស្ត្រាលីរបស់យើង រួមជាមួយនឹងរដ្ឋបាលខេត្តព្រះសីហនុ។

លោកគង់ វិតាណៈអភិបាលរងខេត្តព្រះសីហនុ បានធ្វើការបើកសិក្ខាសាលា ដែលផ្តោតលើការជ្រើសរើស និងផ្តល់អាទិភាព ដល់គំនិតផ្តួចផ្តើមសម្រាប់ហេដ្ឋារចនាសម្ព័ន្ធទីក្រុងឆ្លាតវៃ ដើម្បីធ្វើការត្រួសត្រាយនៅក្នុងទីក្រុងនេះ ដែលជាផ្នែកមួយនៃការគាំទ្ររបស់យើងតាមរយៈកម្មវិធី3i ។

លោក Anthony Samson បាននិយាយថា “ការជ្រើសរើសគម្រោងទីក្រុងឆ្លាតវៃ គឺជាជំហានដ៏សំខាន់មួយ នៅក្នុងកិច្ចសហប្រតិបត្តិការទីក្រុងឆ្លាតវៃរបស់យើង ក៏ដូចជាកិច្ចខិតខំប្រឹងប្រែងរបស់អូស្រ្តាលីក្នុងការគាំទ្រដល់ប្រទេសកម្ពុជា ធ្វើការឆ្លើយតបប្រកបដោយប្រសិទ្ធភាព លើជំងឺរាតត្បាតនេះ”។

យោងតាមស្ថានទូតអូស្ត្រាលី បានឱ្យដឹងថា ដូចដែលលោកឯកអគ្គរាជទូតរបស់យើងបានលើកឡើង ក្នុងជំនួបជាមួយលោកអភិបាលខេត្តព្រះសីហនុ ថាការប្រកាន់យកនូវវិធីសាស្ត្រដ៏ឆ្លាតវៃក្នុងការអភិវឌ្ឍទីក្រុង ធ្វើឱ្យការផ្តល់សេវាប្រកបដោយនិរន្តរភាព និងប្រសិទ្ធភាពលើការចំណាយ បានកាន់តែប្រសើរឡើង”៕

ហេតុផលដែលធ្វើឲ្យការវិនិយោគលើគម្រោងបុរី ណាឌីស្មើរនឹង “ការវិនិយោគសម្រាប់អនាគត”

ធ្លាប់ចាំបានពីពេលដែលអ្នកបានឮគេនិយាយថា “ទួលគោកនៅឆ្ងាយ” ដែរឬទេ។ នេះគឺជារឿង ធម្មតាមួយសម្រាប់អ្នកដែលវិនិយោគក្នុងវិស័យអចលនទ្រព្យ។ នៅពេលដែលអ្នកទិញអចលនទ្រព្យ មិនថាសម្រាប់រស់នៅ ឬសម្រាប់វិនិយោគនោះទេ អ្នកត្រូវតែមើលឃើញការទិញនេះជាការវិនិយោគ រយៈពេលវែង។ តំបន់ជុំវិញ និងទីតាំងក៏ជាកត្តាដែលកំណត់ពីប្រសិទ្ធិភាពនៃការវិនិយោគលើ លំនៅឋានថ្មីរបស់អ្នកផងដែរ។ តំបន់ជុំវិញ និងហេដ្ឋារចនាសម្ពន្ធ័ដ៏ល្អ គឺជាកត្តាសំខាន់ពីរដែលជម្រុញ ឱ្យការទិញគេហដ្ឋានថ្មីរបស់អ្នកទទួលបានផលចំណេញខ្ពស់ពីការវិនិយោគ។

នៅបុរីណាឌីយើងជ្រើសរើសទីតាំងពិសេសបំផុតនៅរាជធានីភ្នំពេញសម្រាប់លោកអ្នក និងពេលអនាគត។ ស្ថិតនៅចម្ងាយត្រឹមតែ 10 នាទីពីពហុកីឡដ្ឋានមរតកតេជោ អ្នករស់នៅក្នុងបុរី ណាឌីនឹងអាចរីករាយជាមួយនឹងព្រឹត្តិការណ៍កីឡាជាច្រើនរាប់បញ្ចូលទាំងព្រឹត្តិការណ៍កីឡា SEAGAME ដែលប្រារព្ធឡើងជាលើកដំបូងបង្អស់នៅក្នុងប្រទេសកម្ពុជាផងដែរ។ ពហុកីឡដ្ឋាននេះ ស្ថិតក្នុងចំណោមទីតាំងសំខាន់គួរឲ្យកត់សម្គាល់ជាច្រើនដែលនៅក្បែរនឹងបុរី ណាឌី។ តាំងពីដើមមក យើងសង្កេតឃើញថាទីក្រុងនានាដែលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមដូចជា ចាកាតា សិង្ហបុរី ហាណូយ និងកូឡាឡាំពួ មិនត្រឹមតែផ្តល់ផលប្រយោជន៍សេដ្ឋកិច្ចដល់ប្រទេសនោះជាមួយនឹង ចំនួនអ្នកទេសចរកើនឡើងទ្វេដងតែប៉ុណ្ណោះទេ ក៏បង្កើនសន្ទុះនៃតម្លៃអចលនទ្រព្យនៅជុំវិញតំបន់ ស៊ីហ្គេមផងដែរ ។

អ្នករស់នៅក្នុងបុរី ណាឌីក៏អាចរីករាយនឹងការចេញទៅលេងនៅ សួនសត្វភ្នំពេញសាហ្វារី ដោយចំណាយពេលត្រឹមតែ 5 នាទីពីផ្ទះរបស់ពួកគេ។ សាកស្រម៉ៃអំពីដំណើរកម្សាន្តនៅថ្ងៃសៅរ៍ ទៅកាន់សួនសត្វភ្នំពេញសាហ្វារីដ៏ធំបំផុតនៃទីក្រុងភ្នំពេញ ជាមួយក្រុមគ្រួសាររបស់អ្នក ខណៈពេល ដែលលោកអ្នកក៏អាចរីករាយនឹងដំណើរកម្សាន្តជាមួយក្រុមគ្រួសារនៅថ្ងៃអាទិត្យមួយទៀតទៅកាន់សួនទឹកអន្តរជាតិតែមួយគត់ដែលស្ថិតនៅចម្ងាយតែ 5 នាទីពីគេហដ្ឋានរបស់អ្នក។ ប្រាកដណាស់ បុរី ណាឌីបានធ្វើឲ្យរឿងទាំងអស់នេះអាចទៅរួចដោយរក្សាទុកទីតាំងល្អបំផុតសម្រាប់ជាគេហដ្ឋានថ្មីរបស់អ្នក។

ដូចដែលអ្នកបានឃើញពីភាពទាក់ទាញនៃទីតាំងរបស់យើង បុរី ណាឌីតែងតែបោះជំហាន ទៅមុខមុនមួយជំហានជានិច្ច។ ទីតាំងបុរី ណាឌីមានដងវិថីជាច្រើនភ្ជាប់ទៅដល់ទីប្រជុំជនភ្នំពេញ។ ការស្ថាបនាស្ពានថ្មីនៅខណ្ឌឬស្សីកែវដែលតភ្ជាប់ទៅនឹងខណ្ឌជ្រោយចង្វារនឹងត្រូវបានរៀបចំរួចរាល់នៅពេលដែលម្ចាស់ផ្ទះគ្រប់គ្នានៅបុរី ណាឌីទទួលបានកូនសោរផ្ទះថ្មីរបស់ពួកគេ។  ស្ពានថ្មីនេះនឹងបន្ថែម ផ្លូវមួយខ្សែទៀតជំនួយឲ្យការចូលទៅកាន់ខណ្ឌឬស្សីកែវក៏ដូចជាខណ្ឌដទៃទៀត ឲ្យកាន់តែមានភាព ងាយស្រួលនិងលឿនជាងមុន។

ហាងទំនិញ និងផ្សារទំនើបកំពុង រីកដុះដាលកាន់តែច្រើនឡើងនៅខណ្ឌជ្រោយចង្វារ ផ្សារទាំង នេះនឹងផ្តល់ភាពងាយស្រួលដល់ប្រជាជនទាំងអស់ អាចបំពេញតម្រូវការដោយមិនចាំបាច់ ធ្វើដំណើរ ទៅម្ខាងទៀតនៃទីក្រុងព្រោះផ្សារទំនើបទាំងនេះ មានភាពល្បីល្បាញ និងពេញនិយមក្នុងចំណោម ប្រជាជនក្នុងស្រុក។ យីហោអន្ដរជាតិក៏កំពុងឈានជើងចូលមកដល់ ខណ្ឌជ្រោយចង្វារ ដែលរួមមាន Papa John, 7/Eleven, Starbucks និង យីហោរជាច្រើនទៀត ដែលនឹងមកដល់នៅពេលពហុកីឡដ្ឋានថ្មី ដំណើរការ។

ជាមួយនឹងបរិក្ខាររស់នៅ ក៏ដូចជាហេដ្ឋារចនាសម្ព័ន្ធដ៏សម្បូរបែបនាពេលអនាគត បុរី ណាឌី នឹងក្លាយជាការអភិវឌ្ឍលំនៅដ្ឋានដ៏មានសក្ដានុពលបំផុត នៅពេលការសាងសង់បញ្ចប់។ វិនិយោគិន ក្នុងស្រុក និងម្ចាស់គេហដ្ឋានថ្មីទាំងអស់ មិនគួរខកខានឱកាសនេះ ដូចជាការខកខានវិនិយោគ អចលនទ្រព្យនៅទួលគោកនោះទេ។

សម្រាប់អ្នកដែលកំពុងស្វែងរកគេហដ្ឋានដ៏ពិសិដ្ឋក៏ដូចជាការវិនិយោគដែលផ្ដល់ផលចំណេញ ខ្ពស់លើអចលនទ្រព្យ នេះគឺជាឱកាសដ៏ល្អឥតខ្ចោះសម្រាប់អ្នកនាពេលបច្ចុប្បន្ននេះ ខណៈបុរី ណាឌី កំពុងផ្តល់ជូននូវលក្ខខណ្ឌនៃការផ្ដល់ជូន និងជម្រើសបង់ប្រាក់ដ៏អស្ចារ្យក្នុងឱកាសសម្ពោធបើកការដ្ឋាន សាងសង់របស់ខ្លួន។ វិនិយោគសម្រាប់ពេលអនាគត វិនិយោគលើបុរី ណាឌី។
សម្រាប់ព័ត៌មានបន្ថែមអំពីបុរី ណាឌីសូមចូលទៅកាន់គេហទំព័រហ្វេសប៊ុក របស់យើង៖

បញ្ចប់

ក្រុមហ៊ុន GCC គឺជាក្រុមហ៊ុនវិនិយោគ ដែលមានទីស្នាក់ការកណ្ដាលនៅទីក្រុងហុងកុង ដែលមានជំនាញលើ វិស័យ អភិវឌ្ឍអចលនទ្រព្យ  វិនិយោគដីធ្លី និងសេវាកម្មហិរញ្ញវត្ថុ (trust and fund management)។ ចក្ខុវិស័យដ៏ធំបំផុតនៃ GCC គឺក្លាយជាអ្នកអភិវឌ្ឍអចលនទ្រព្យ ផ្តល់ជូនសេវាកម្មពេញលេញ 360० នៅក្នុងប្រទេសកម្ពុជា។ បច្ចុប្បន្ននេះ GCC មានក្រុមហ៊ុនបុត្រសម្ព័ន្ធចំនួន 7 ទៀត រួមមាន GC City, GC Land, GC Empire, GC Realty, GC Design, GC Management និង GC Credit ។ គម្រោងបច្ចុប្បន្នរបស់ GCC រួមមាន៖ បុរី ណាឌី ដោយជីស៊ី ស៊ីធី, CEO Wyndham Residence ផ្សារជីស៊ី អូរឫស្សី GC Residence ជ្រោយចង្វារ  និង Lixin Century Innovation Park។

រៀបរៀងដោយការិយាល័យទីផ្សារ GCC

សម្រាប់ព័ត៌មានបន្ថែម សូមទំនាក់ទំនង

អ្នកនាង Leong Ka Yen

ប្រធានផ្នែកទីផ្សារ

លេខទំនាក់ទំនង: +855 96 820 6822  Email: [email protected]

 

លោក ង៉ែត ឧត្តមមុន្នី

ប្រធានត្រួតពិនិត្យទីផ្សារ

លេខទំនាក់ទំនង: 089 648 770/ 098 831 868 , Email: [email protected]

 

ក្រុមហ៊ុនសឹង្ហបុរីដ៏ធំមួយដែលកំពុងវិនិយោគនៅកម្ពុជាចុះកិច្ចព្រមព្រៀងលក់ដីមួយកន្លែងក្នុងតម្លៃ១០០លានដុល្លារ

ដោយៈ ប៊ី

សិង្ហបុរីៈ ក្រុមហ៊ុនបុត្រសម្ព័ន្ធរបស់ក្រុមហ៊ុនអភិវឌ្ឍន៍អចលនទ្រព្យ Oxley Holdings ដែលកំពុងវិនិយោគនៅកម្ពុជា រួមមានគម្រោង The Bridge និង The Peak បានចុះកិច្ចព្រមព្រៀងដើម្បីលក់ដីមួយកន្លែងរបស់ខ្លួននៅក្រៅប្រទេសក្នុងតម្លៃប្រមាណ១០០លានដុល្លារ។ នេះបើយោងតាមការបញ្ជាក់របស់ក្រុមហ៊ុនបាននិយាយកាលពីថ្ងៃពុធ ទី៣០ ខែមិថុនា ឆ្នាំ២០២១។

អចលនទ្រព្យ (ដី) នេះមានតម្លៃប្រហែល៦០លានដុល្លារ ដោយផ្អែកលើរបាយការណ៍ហិរញ្ញវត្ថុរបស់ក្រុមហ៊ុនគិតថ្ងៃទី៣០ ខែមិថុនាឆ្នាំមុន ហើយចំណូលពីការលក់នឹងរួមចំណែកវិជ្ជមានដល់លំហូរសាច់ប្រាក់របស់ក្រុមហ៊ុន។

ទោះបីជាយ៉ាងណាក៏ដោយ ក្រុមហ៊ុនមិនបានបញ្ជាក់ពីទីតាំងដី ដែលខ្លួននឹងលក់ ឬបញ្ចេញអត្តសញ្ញាណអ្នកទិញនោះទេ។

ក្រុមហ៊ុន Oxley រំពឹងថាការលក់ ប្រសិនបើបញ្ចប់នៅថ្ងៃទី៣០ ខែមិថុនាឆ្នាំក្រោយ នឹងមានការបង្កើនប្រាក់ចំណូលដែលរំពឹងទុក ក្នុងមួយហ៊ុន របស់ក្រុមហ៊ុន សម្រាប់ឆ្នាំហិរញ្ញវត្ថុ ដែលបញ្ចប់នៅថ្ងៃទី៣០ ខែមិថុនាឆ្នាំ២០២២ ។

ក្រុមហ៊ុនបានឱ្យដឹងថា ប្រាក់តម្កល់១០ភាគរយនៃថ្លៃលក់ត្រូវបានបង់ ហើយប្រាក់នៅសល់នឹងត្រូវបង់នៅពេលបញ្ចប់ការលក់ ដែលមានលក្ខខណ្ឌ នៅពេលទទួលបានការយល់ព្រមពីបទប្បញ្ញត្តិ ដើម្បីអនុញ្ញាតឱ្យមានការអភិវឌ្ឍតំបន់នេះ ក្នុងរយៈពេល១២ ខែគិត ចាប់ពីថ្ងៃកិច្ចសន្យា៕

ក្រុមហ៊ុនហុងក្រុងFirst Goldជួយផ្សព្វផ្សាយពីគេទំព័ Property Area Asia ក្នុងសៀវភៅរំលឹកខួបលើកទី៣០ឆ្នាំរបស់ខ្លួន

ដោយៈ ម៉ាណេត

ភ្នំពេញៈ ក្រុមហ៊ុន Prestige Homes Cambodia មានមោទនភាពសូមប្រកាសថា ដៃគូអាជីវកម្មរបស់យើង ក្រុមហ៊ុន First Asia Merchants Bullion Limited (First Gold) ជាអ្នកចាប់ផ្តើមដំបូងលើលោហៈធាតុមានតម្លៃ (មាស) នៅហុងកុង នឹងប្រារព្ធខួបលើកទី៣០ឆ្នាំ របស់ខ្លួននៅឆ្នាំនេះ។

ដើម្បីប្រារព្ធព្រឹត្តិការណ៍ប្រវត្តិសាស្ត្រនេះ ក្រុមហ៊ុន First Gold នឹងបោះពុម្ពសៀវភៅរំលឹកខួបលើកទី៣០ឆ្នាំ (សៀវភៅផ្សព្វផ្សាយពាណិជ្ជកម្ម)។

យើងសូមអញ្ជើញគេទំព័រ Property Area Asia ដើម្បីចូលរួមអបអរសាទរខួបអនុស្សាវរីយ៍ និងចែករំលែកភាពជោគជ័យរបស់ក្រុមហ៊ុន First Gold ដោយផ្តល់ឱ្យការផ្សាយពាណិជ្ជកម្មពាក់កណ្តាលទំព័រដោយឥតគិតថ្លៃនៅក្នុងសៀវភៅរំលឹកខួបអនុស្សាវរីយ៍នេះ។

សៀវភៅរំលឹកខួបនេះផ្តល់នូវបណ្តាញឱកាសដ៏ល្អសម្រាប់ក្រុមហ៊ុនរបស់លោកអ្នក ដើម្បីឈានដល់ការបង្ហាញជាសកលចំពោះសាជីវកម្មពហុជាតិ។ តាមរយៈការផ្សាយពាណិជ្ជកម្ម អ្នកអាចផ្សព្វផ្សាយអាជីវកម្ម និងផលិតផលរបស់អ្នកដល់អតិថិជនជាច្រើនរបស់យើងនៅជុំវិញពិភពលោក។

ទោះបីជាក្រុមហ៊ុន First Gold នៅតែមានឫសគល់យ៉ាងជ្រៅនៅក្នុងទីក្រុងហុងកុង ក្នុងរយៈពេលជាង៣០ឆ្នាំនៃប្រវត្តិសាស្រ្តរបស់ខ្លួនក៏ដោយ ក៏ក្រុមហ៊ុនបានពង្រីកវិសាលភាពអាជីវកម្មរបស់ខ្លួនបន្តិចម្តងៗ ទៅក្នុងវិស័យអន្តរជាតិ ជាពិសេសនៅក្នុងតំបន់អាស៊ីអាគ្នេយ៍ និងកំពុងអភិវឌ្ឍយ៉ាងជិតស្និទ្ធនូវទំនាក់ទំនងកិច្ចសហប្រតិបត្តិការទៅវិញទៅមកជាមួយភាគីឈានមុខជាច្រើន ដើម្បីលើកកម្ពស់ទីផ្សារមាសលើពិភពលោក។

យើងសង្ឃឹមថានឹងបង្កើតទំនាក់ទំនងបរិយាកាសពាណិជ្ជកម្មហិរញ្ញវត្ថុប្រកបដោយវិជ្ជាជីវៈ និងអាចទុកចិត្តបាននាពេលអនាគតរវាងអ្នកនិង First Gold៕

តើក្រុមហ៊ុនស្ថាបត្យកម្មធំបំផុតក្នុងពិភពលោកមានឈ្មោះអ្វី និងមានប្រវត្តិបែបណា?

ដោយៈសុខុម

អន្តរជាតិៈ ដូចដែលយើងបានដឹងហើយថា វិស្វករគឺជាអ្នកទទួលបន្ទុកផ្នែកសាងសង់ ចំណែកឯស្ថាបត្យករគឺជាអ្នកគូរប្លង់អគារ។ ប៉ុន្តែអ្នកដឹងទេថា តើក្រុមហ៊ុនណាជាក្រុមហ៊ុនស្ថាបត្យកម្ម ឬគូរប្លង់អគារធំបំផុតក្នុងពិភពលោកប្រចាំឆ្នាំ២០២១?។

ដើម្បីជ្រាបច្បាស់ថា តើក្រុមហ៊ុននោះមានឈ្មោះអ្វី ស្ថិតនៅប្រទេសណា និងមានប្រវត្តិបែបណា សូមមកស្វែងយល់ទាំងអស់គ្នាដូចខាងក្រោម។

យោងតាមការចុះផ្សាយរបស់សារព័ត៌មាន The Urban Developer ឱ្យដឹងថា ក្រុមហ៊ុន Gensler នៅសហរដ្ឋអាមេរិក គឺជាក្រុមហ៊ុនស្ថាបត្យកម្មធំបំផុត ក្នុងពិភពលោកប្រចាំឆ្នាំ២០២១។ ក្រុមហ៊ុននេះមានការិយាល័យចំនួន៤៩ទីតាំង នៅទូទាំងពិភពលោកជាមួយនឹងបុគ្គលិកជាង៦.០០០នាក់ និងទទួលបានប្រាក់ចំណូលចន្លោះពី១ពាន់លានដុល្លារ ទៅ១,៥ពាន់លានដុល្លារ។

*ប្រវត្តិក្រុមហ៊ុន
លោក Art Gensler ដែលជាស្ថាបត្យកររួមជាមួយភរិយារបស់លោក គឺលោកស្រី Drue Gensler ព្រមទាំងសហការីម្នាក់ឈ្មោះ James Follett បានរួមគ្នាបង្កើតក្រុមហ៊ុន Gensler ក្នុងឆ្នាំ១៩៦៥ ពោលគឺកាលពី៥៦ឆ្នាំមុន។ ដំបូងឡើយ ពួកគាត់បានផ្ដោតលើការរចនាផ្ទៃខាងក្នុង នៃអគារការិយាល័យដែលសាងសង់រួចថ្មីៗ រួមមាន ទាំងអគារកម្ពស់១២០ជាន់ Alcoa Building (ឆ្នាំ១៩៦៧) និងអគារធនាគារអាមេរិក Bank of America Building (ឆ្នាំ១៩៦៩) ដែលសុទ្ធតែស្ថិតនៅក្នុងទីក្រុងសានហ្វ្រានស៊ីស្កូ។

ចាប់តាំងពីនោះមក ក្រុមហ៊ុននេះបានអភិវឌ្ឍស្ថាបត្យកម្ម និងការឌីហ្សាញជាច្រើនទម្រង់យ៉ាងសម្បូរបែប រួមមានទាំងអគារការិយាល័យជួល មជ្ឈមណ្ឌលលក់រាយ អាកា​សយានដ្ឋាន គ្រឹះស្ថានសិក្សា កន្លែងកម្សាន្ត ការធ្វើផែនការ និងការឌីហ្សាញប្លង់ទីក្រុង ការពិគ្រោះយោបល់ ការឌីហ្សាញម៉ាកយីហោ (Brand) និងវិស័យផ្សេងៗទៀត។

ក្រុមហ៊ុននេះ មានភាពរីកចម្រើនយ៉ាងឆាប់រហ័ស ដោយបើកការិយាល័យនៅទូទាំងសហរដ្ឋអាមេរិក ក្នុងទសវត្សរ៍ឆ្នាំ១៩៧០ និង១៩៨០ ហើយបន្ទាប់មកបានពង្រីកខ្លួនទៅបរទេសនៅក្នុងទសវត្សរ៍ឆ្នាំ១៩៨០ និង១៩៩០។ ក្រុមហ៊ុននេះ បានបន្តពង្រីកខ្លួនទៅដល់ទីក្រុងឡុងដ៍ ប្រទេសអង់គ្លេស ក្រុងតូក្យូ ប្រទេសជប៉ុន ក្រុងហុងកុង ក្រុងសៀងហៃ ប្រទេសចិន និងប្រទេសជាច្រើនទៀតរហូតឈានដល់៤៩ទីតាំង នាពេលបច្ចុប្បន្ន។

*គម្រោងធំៗគួរឱ្យកត់សម្គាល់ដែលក្រុមហ៊ុននេះសម្រេចបាន
– ពហុកីឡដ្ឋាន Banc of California Stadium នៅឡូសអែនជើឡេស កាលីហ្វ័រញ៉ា ឆ្នាំ២០១៨។
-អគារមជ្ឈមណ្ឌលពាណិជ្ជកម្ម The Avenues ដំណាក់កាលទី៥ នៅកូវែត ឆ្នាំ២០១៨
– អគារទីស្នាក់ការកណ្ដាល NVIDIA Corporate Campus នៅកាលីហ្វ័រញ៉ា ឆ្នាំ២០១៨
– សាលសន្និសីទ Costa Rica Convention Center នៅកូស្តារីកា ឆ្នាំ២០១៨
– សណ្ឋាគារកម្ពស់៣៧ជាន់ Fairmont Austin នៅរដ្ឋតិចសាស ឆ្នាំ២០១៨
– អគារ Johnson Controls HQ Asia Pacific នៅក្រុងសៀងហៃ ប្រទេសចិន ឆ្នាំ២០១៧។
– អគារការិយាល័យ E. & J. Gallo Winery Dry Creek Building នៅកាលីហ្វ័រញ៉ា ឆ្នាំ២០១៧។
– សណ្ឋាគារ៤រដូវកាល Burj Alshaya Four Seasons នៅកូវែត ឆ្នាំ២០១៧
– អគារទីស្នាក់ការកណ្ដាល Hyatt Headquarters នៅឈីកាហ្គោ ឆ្នាំ២០១៧
– អគារទីស្នាក់ការកណ្ដាលក្រុមហ៊ុនកូកាកូឡា Coca-Cola Company Headquarters នៅរដ្ឋ Georgia ឆ្នាំ២០១៦។
– អគារស្នាក់ការកាសែត The Washington Post នៅវ៉ាស៊ីនតោនឌីស៊ី ឆ្នាំ២០១៦
– អគារសណ្ឋាគារ Westin DEN and Transit Center នៅរដ្ឋខូឡូរ៉ាដូ ឆ្នាំ២០១៥
– អាកាសយានដ្ឋាន Jackson Hole Airport នៅរដ្ឋ Wyoming ឆ្នាំ២០១៥
– អគារទីស្នាក់ការកណ្ដាល Condé Nast Headquarters នៅញូវយ៉ក ឆ្នាំ២០១៥
– អគារ Shanghai Tower នៅក្រុងសៀងហៃ ប្រទេសចិន ឆ្នាំ២០១៥
– អគារ៣២ជាន់ The Tower at PNC Plaza នៅរដ្ឋ Pennsylvania ឆ្នាំ២០១៤
– អគារព្រះវិហារគ្រិស្ត Gratz Center នៅឈីកាហ្គោ ឆ្នាំ២០១២
– អាកាសយានដ្ឋានអន្តរជាតិ San Francisco International Airport ក្រុងសានហ្វ្រានស៊ីស្កូ ឆ្នាំ២០១១។
– សណ្ឋាគារប្រណីត The Ritz-Carlton Hotel & Residences and JW Marriott នៅឡូសអែនជើឡេស កាលីហ្វ័រញ៉ា ឆ្នាំ២០១០។
– អាកាសយានដ្ឋាន John F. Kennedy International Airport នៅញូវយ៉ក ឆ្នាំ២០០៨
– អគារ 2000 Avenue of the Stars នៅឡូសអែនជើឡេស កាលីហ្វ័រញ៉ា ឆ្នាំ២០០៧
– អគារ The Gate មជ្ឈមណ្ឌលហិរញ្ញវត្ថុអន្តរជាតិក្រុងឌូបៃ អារ៉ាប់រួមអេមីរ៉ាត ឆ្នាំ២០០៤៕