ក្រុមហ៊ុនជីប ម៉ុងចូលរួមថែររក្សាខឿនអរិយធ៌មជាតិនៃកម្មវិធី ”មរតកមនុស្សរស់”

ដោយៈ ចំណាន

ភ្នំពេញៈ លោកជំទាវ ឡងឌី សាន់ណារ៉ា រដ្ឋលេខាធិការ ក្រសួងវប្បធម៌និងវិចិត្រសិល្បៈ អញ្ជើញចូលរួមកម្មវិធី “សប្តាហ៍មរតកមនុស្សរស់”។

លោកជំទាវឡងឌី សាន់ណារ៉ា រដ្ឋលេខាធិការ តំណាងដ៏ខ្ពង់ខ្ពស់ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញចូលរួមកម្មវិធី “សប្តាហ៍មរតកមនុស្សរស់” ព្រមទាំងទទួលថវិកាឧបត្ថម្ភ ពីក្រុមហ៊ុនកូនខ្មែរជីបម៉ុងដែលបានឧបត្ថម្ត ដល់ក្រសួងវប្បធម៌និងវិចិត្រសិល្បៈ ចំនួន៥០,០០០ដុល្លារអាមេរិក ក្នុងមួយឆ្នាំ(រយៈពេល៥ឆ្នាំ)។

កម្មវិធីនេះបានប្រព្រឹត្តទៅនៅ “ភូមិខ្មែរអ្នកធ្វើ” នៅទីតាំងផ្សារទំនើបជីបម៉ុង២៧១មេហ្គាម៉ល។

លោកជំទាវបានមានប្រសាសន៍បញ្ជាក់ថា ការចូលរួមឧបត្ថម្ភថវិកា ពីសំណាក់ ក្រុមហ៊ុនកូនខ្មែរជីបម៉ុង សរបញ្ជាក់យ៉ាងច្បាស់ពីទឹកចិត្តសប្បុរស និងស្មារតីទទួលខុសត្រូវចំពោះសង្គម ។ នេះគឺជាការគាំទ្រយ៉ាងសំខាន់ដល់ការអភិរក្ស លើកកម្ពស់ និងអភិវឌ្ឍវិស័យវប្បធម៌ជាតិ ព្រមទាំងជាគំរូដ៏ល្អ នៃភាពជាដៃគូរវាងវិស័យឯកជន និងស្ថាប័នរដ្ឋក្នុងការរួមចំណែក ដើម្បីផលប្រយោជន៍ជាតិ និងប្រជាជន។

ឆ្លៀតក្នុងឱកាសនោះដែរ លោកជំទាវបានរំលេចពីសកម្មភាពការងារ និងការជួយជ្រោមជ្រែងយ៉ាងសកម្ម របស់ក្រុមហ៊ុនកូនខ្មែរ ជីប ម៉ុង ក្នុងវិស័យវប្បធម៌ ដែលបានឆ្លុះបញ្ចាំងយ៉ាងច្បាស់ ពីការយកចិត្តទុកដាក់ចំពោះការអភិរក្ស លើកតម្កើង និងអភិវឌ្ឍបេតិកភណ្ឌវប្បធម៌ជាតិ ហើយក៏ជាគំរូដ៏ល្អមួយដែលបង្ហាញថា ភាពជោគជ័យក្នុងអាជីវកម្មអាចដើរទន្ទឹមគ្នា ជាមួយការរួមចំណែកដល់សង្គម និងប្រទេសជាតិ៕

សម្តេចធិបតីគ្រោងអញ្ជើញសម្ភោធកំណាត់ផ្លូវជាតិចំនួន៣នៅក្នុងខេត្តក្រចេះ ក្នុងចុងខែសីហានេះ

ដោយៈ ចំណាន

ភ្នំពេញៈ ក្រុមមន្រ្តីបានបើកកិច្ចប្រជុំ គណៈកម្មការរៀបចំពិធីសម្ពោធបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧៣ កំណាត់ផ្លូវខេត្តលេខ៣៧៧ និងផ្លូវខេត្ត៣៧៧A ស្ថិតនៅខេត្តក្រចេះ។

កិច្ចប្រជុំកាលពីម្សិលម៉ិញនេះ ដឹកនាំដោយលោកផែង សុវិជ្ជានោ រដ្ឋលេខាធិការ និងជាប្រធានគណៈកម្មការ បានអញ្ជើញដឹកនាំកិច្ចប្រជុំគណៈកម្មការរៀបចំពិធី សម្ពោធបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧៣ កំណាត់ផ្លូវខេត្តលេខ៣៧៧ និងផ្លូវខេត្ត៣៧៧A ស្ថិតនៅខេត្តក្រចេះ ក្រោមឥណទានសម្បទាន ពីធនគារពិភពលោក ដោយមានការអញ្ជើញ ចូលរួមពីថ្នាក់ដឹកនាំក្រសួង សមាជិក សមាជិកាគណៈកម្មការ អនុគណៈកម្មការត្រៀមរៀបចំពិធីសម្ពោធ មន្ត្រីជំនាញបច្ចេកទេសពាក់ព័ន្ធជាច្រើនរូបផងដែរ។

កិច្ចប្រជុំរៀបចំឡើង ដើម្បីពិនិត្យបន្ថែមទៅលើវឌ្ឍនភាពការងារ នៃការរៀបចំ របស់អនុគណៈកម្មការទទួលបន្ទុកនីមួយៗ ដែលបានត្រូវចាត់តាំងឱ្យបំពេញភារកិច្ចរៀងៗខ្លួន ដើម្បីពន្លឿនការងារពាក់ព័ន្ធឱ្យបានរួចរាល់ សំដៅធានាធ្វើយ៉ាងណាឱ្យដំណើរការ រៀបចំពិធីសម្ពោធនេះ ប្រព្រឹត្តទៅដោយរលូន និងទទួលលទ្ធផលខ្ពស់តាមផែនការដែលបានគ្រោងទុក។

កំណាត់ផ្លូវជាតិលេខ៧៣ កំណាត់ផ្លូវខេត្តលេខ៣៧៧ និងផ្លូវខេត្ត៣៧៧A ប្រវែងសរុប៩៨,៤០គីឡូម៉ែត្រ គ្រោងនឹងសម្ពោធបើកឱ្យប្រើប្រាស់ជាផ្លូវការ នាថ្ងៃទី២៥ ខែសីហា ឆ្នាំ២០២៦ ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

ក្រសួងពាណិជ្ជកម្មត្រៀមចុះបញ្ជី ”ក្តាមសេះកែប” ជាម៉ាកសម្គាល់ភូមិសាស្រ្តទំនិញ

ដោយៈ ចំណាន

ភ្នំពេញៈ លោកកឹម សុខុន រដ្ឋលេខាធិការក្រសួងពាណិជ្ជកម្ម អញ្ជើញជាអធិបតី ក្នុងពិធីបើកសិក្ខាសាលាផ្សព្វផ្សាយ “ការអនុវត្តគម្រោងកសាងកេរ្តិ៍ឈ្មោះម៉ាក និងការចុះបញ្ជី “ក្តាមសេះកែប” ជាម៉ាកសម្គាល់ភូមិសាស្ត្រទំនិញ”។

គោលបំណងនៃការរៀបចំសិក្ខាសាលាផ្សព្វផ្សាយនេះ គឺដើម្បីផ្ដល់ចំណេះដឹង និងផ្សព្វផ្សាយពីគម្រោងកសាងកេរ្តិ៍ឈ្មោះម៉ាក និងការចុះបញ្ជី “ក្តាមសេះកែប” ជាម៉ាកសម្គាល់ភូមិសាស្ត្រទំនិញ ព្រមទាំងការលើកកម្ពស់ ចំណេះដឹងផ្នែកកម្មសិទ្ធិបញ្ញា ជាពិសេសមូលដ្ឋានគ្រឹះនៃការរៀបចំម៉ាក សម្គាល់ភូមិសាស្ត្រទំនិញ និងការប្រមូលធាតុចូលពីអ្នកចូលរួម ដើម្បីរៀបចំជាសៀវភៅបន្ទុក ក្នុងការត្រៀមរៀបចំចុះបញ្ជី “ក្តាមសេះកែប” ជាម៉ាកសម្គាល់ភូមិសាស្ត្រទំនិញ។

ក្នុងឱកាសនោះដែរ លោករដ្ឋលេខាធិការបានគូសបញ្ជាក់ពីសារៈសំខាន់នៃវិស័យកម្មសិទ្ធិបញ្ញា ក្នុងការចូលរួមចំណែកពង្រឹង និងកសាងវិស័យពាណិជ្ជកម្ម និងសេដ្ឋកិច្ចជាតិ បង្កើតការងារក្នុងតំបន់ បង្កើនខ្សែច្រវាក់តម្លៃនៃផលិតផល ការទាក់ទាញភ្ញៀវទេសចរ បង្កើនស្តង់ដារអនាម័យ និងការលើកកម្ពស់កម្រិតជីវភាព របស់ប្រជាពលរដ្ឋនៅតាមជនបទ។

លោកបន្ថែមថា តាមរយៈបទពិសោធន៍ របស់ក្រសួងពាណិជ្ជកម្មក្នុងការជួយរៀបចំ ឱ្យមានម៉ាកសម្គាល់ភូមិសាស្ត្រទំនិញ និងម៉ាកសមូហភាពកន្លងមក ពិតជាបានផ្ដល់នូវលទ្ធផលវិជ្ជមានជាច្រើន ទាំងផ្នែកសេដ្ឋកិច្ច និងការអភិវឌ្ឍមូលដ្ឋាន ប៉ុន្តែត្រូវតែផ្សារភ្ជាប់ជាមួយការគ្រប់គ្រងម៉ាកសម្គាល់ភូមិសាស្ត្រទំនិញ ឬម៉ាកសមូហភាពឱ្យបានត្រឹមត្រូវ និងម៉ត់ចត់ ដើម្បីធានាបាននូវគុណភាព និងស្តង់ដារផលិតផល ស្របតាមស្មារតីនៃលក្ខន្តិកៈសមាគម និងសៀវភៅបន្ទុកផងដែរ។

លោករដ្ឋលេខាធិការ បានលើកទឹកចិត្តដល់សិក្ខាកាមទាំងអស់ឱ្យបន្តយកចិត្តទុកដាក់រៀនសូត្រ ពីមន្ត្រីជំនាញកម្មសិទ្ធិបញ្ញា និងសហការគ្នាផ្លាស់ប្ដូរយោបល់ជាមួយអ្នកជំនាញ ការម៉ាកសម្គាល់ភូមិសាស្ត្រទំនិញ ដើម្បីទទួលបានធាតុចូលសំខាន់ៗ ក្នុងការចងក្រងឯកសារពាក់ព័ន្ធនឹង “ក្តាមសេះកែប” ដើម្បីអាចឈានទៅរៀបចំជាម៉ាកសម្គាល់ភូមិសាស្ត្រទំនិញ “ក្តាមសេះកែប” ទទួលបានជោគជ័យនាពេលខាងមុខ៕

ខេត្តកំពតសក្តានុពលអចលនទ្រព្យដែលត្រូវការភាពអត់ធ្មត់ ជាមួយនឹងកំណើនភ្ញៀវទេសចរណ៍

ដោយៈ គង់ សូរិយា

កំពតៈ អ្នកជំនាញបាននិយាយថា ខេត្តកំពត ជាទីផ្សារអចលនទ្រព្យ រយៈពេលវែងដ៏ជោគជ័យមួយរបស់ប្រទេសកម្ពុជា ប៉ុន្តែវាស័ក្តិសមជាងសម្រាប់អ្នកវិនិយោគ ដែលអត់ធ្មត់ (៥-១០ ឆ្នាំ) ជាជាងអ្នកដែលស្វែងរកប្រាក់ចំណេញរហ័ស។

១. កំណើនទេសចរណ៍

ខេត្តកំពតបន្តទាក់ទាញភ្ញៀវទេសចរក្នុងស្រុក និងអន្តរជាតិ ដោយសារតែទីតាំងមាត់ទន្លេ ឆ្នេរក្បែរៗ ភ្នំ និងកន្លែងទាក់ទាញដូចជាឧទ្យានជាតិបូកគោ។

ទេសចរណ៍កាន់តែច្រើនគាំទ្រ ដល់តម្រូវការសណ្ឋាគារ ផ្ទះសំណាក់ ភោជនីយដ្ឋាន និងផ្ទះវិស្សមកាល។

២. ការកែលម្អហេដ្ឋារចនាសម្ព័ន្ធ

ផ្លូវជាតិដែលតភ្ជាប់ខេត្តកំពត ជាមួយរាជធានីភ្នំពេញ កែប និងខេត្តព្រះសីហនុ បានប្រសើរឡើងគួរឱ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។

ការដឹកជញ្ជូនកាន់តែប្រសើរឡើងជាទូទៅ បង្កើនតម្លៃដីធ្លីតាមពេលវេលា។

៣. ដីមានតម្លៃសមរម្យ

បើប្រៀបធៀបជាមួយរាជធានីភ្នំពេញ ឬខេត្តព្រះសីហនុ តម្លៃដីធ្លីនៅក្នុងតំបន់ជាច្រើន នៃខេត្តកំពត នៅតែទាបជាង ដែលផ្តល់ឱ្យវិនិយោគិននូវឱកាសកាន់តែច្រើន សម្រាប់ការកើនឡើងរយៈពេលវែង។

៤. ភាពទាក់ទាញនៃចំនួនប្រជាជន និងរបៀបរស់នៅ

ខេត្តកំពតបានក្លាយជាកន្លែងទាក់ទាញ សម្រាប់អ្នកចូលនិវត្តន៍ ជនបរទេស និងប្រជាជនកម្ពុជា ដែលកំពុងស្វែងរករបៀបរស់នៅស្ងប់ស្ងាត់ជាងមុន ដែលបង្កើតតម្រូវការសម្រាប់លំនៅដ្ឋាន និងការអភិវឌ្ឍចម្រុះ។

តើអចលនទ្រព្យប្រភេទណា ជាគំរោងវិនិយោគល្អបំផុត? ការវិភាគរបស់អ្នកជំនាញបានបង្ហាញថា ដីលំនៅដ្ឋាននៅជិតតំបន់ទីក្រុងដែលកំពុងពង្រីក។ អចលនទ្រព្យពាណិជ្ជកម្មមាត់ព្រែក (ប្រសិនបើមានតម្លៃសមរម្យ)។ ដីតាមបណ្តោយផ្លូវធំៗ ដែលមានសក្តានុពលពាណិជ្ជកម្មនាពេលអនាគត។

គម្រោងសណ្ឋាគារប៊ូទិកតូចៗ ឬអាផាតមិនសេវាកម្មដែលផ្តោតលើវិស័យទេសចរណ៍។

ទស្សនវិស័យដល់ឆ្នាំ ២០៣០យ៉ាងណា? ប្រសិនបើសេដ្ឋកិច្ចកម្ពុជាបន្តពង្រីក ហើយវិស័យទេសចរណ៍ងើបឡើងវិញបន្ថែមទៀត ខេត្តកំពត អាចសម្រេចបានលទ្ធផលល្អជាង ខេត្តបន្ទាប់បន្សំជាច្រើន។ ទោះជាយ៉ាងណាក៏ដោយ វាមិនទំនងជាត្រូវគ្នានឹងសាច់ប្រាក់ងាយស្រួល និងបរិមាណប្រតិបត្តិការរបស់ទីក្រុងភ្នំពេញទេ។

ដោយផ្អែកលើនិន្នាការបច្ចុប្បន្ន យើងអាចវាយតម្លៃសក្តានុពលអចលនទ្រព្យរយៈពេលវែងរបស់ខេត្តកំពតដូចខាងក្រោម ទី១ ការកើនឡើងនៃដើមទុនរយៈពេលវែង (៥-១០ ឆ្នាំ)។

ផលចំណេញពីការវិនិយោគត្រលប់ ចន្លោះ៦.៥ ទៅ៧ភាគរយប្រចាំឆ្នាំ និងការវិនិយោគរយៈពេលខ្លីចន្លោះពី៤ទៅ១០ឆ្នាំ។

សម្រាប់អ្នកវិនិយោគរយៈពេលវែង ដែលអាចរង់ចាំបានច្រើនឆ្នាំ ខេត្តកំពតគឺជាឱកាសទីផ្សារ បន្ទាប់បន្សំដ៏រឹងមាំបំផុតមួយរបស់ប្រទេសកម្ពុជា ជាពិសេសប្រសិនបើអ្នកផ្តោតលើទីតាំង ដែលមានហេដ្ឋារចនាសម្ព័ន្ធប្រសើរឡើង និងកំណើនទេសចរណ៍ប្រកបដោយចីរភាព។

ទោះជាយ៉ាងណា ខេត្តនេះក៏មានហានិភ័យ ដែលត្រូវពិចារណាមួយចំនួនផងដែរដូចជា តម្លៃអចលនទ្រព្យជាធម្មតាកើនឡើងយឺតជាងនៅភ្នំពេញ។ សេដ្ឋកិច្ចក្នុងស្រុកនៅតែមានកម្រិតទាប ដូច្នេះតម្រូវការអាចប្រែប្រួល។ ដីមួយចំនួនត្រូវបានរក្សាទុកសម្រាប់ការរំពឹងទុក មានន័យថាការកើនឡើងអាចចំណាយពេលច្រើនឆ្នាំ។

អ្វីដែលគួរប្រុងប្រយ័ត្នគឺ អ្នកវិនិយោគត្រូវតែផ្ទៀងផ្ទាត់ប័ណ្ណកម្មសិទ្ធិដីធ្លី តំបន់ និងផែនការហេដ្ឋារចនាសម្ព័ន្ធមុនពេលទិញ៕

សន្ទុះទីផ្សារលំនៅឋានរបស់ទីក្រុងហុងកុងរំពឹងថយចុះនៅឆមាសទី២

ដោយ: សហសេវិក
អន្តរជាតិ: សន្ទុះនៃទីផ្សារលំនៅឋានរបស់ទីក្រុងហុងកុងត្រូវបានគេរំពឹងថា នឹងថយចុះនៅក្នុងរយៈពេលប៉ុន្មានខែខាងមុខ បន្ទាប់ពីតម្លៃផ្ទះនៅឆមាសទី១ បានកើនឡើងខ្ពស់បំផុតមិនធ្លាប់មានក្នុងរយៈពេល៧ឆ្នាំ។

ទោះបីជាទីផ្សារមានការងើបឡើងវិញយ៉ាងខ្លាំងនាពេលថ្មីៗនេះ ប៉ុន្តែក្រុមអ្នកវិភាគបានព្រមានថា ទំនុកចិត្តលើទីផ្សារភាគហ៊ុនថយចុះ និងវិធានការកាន់តែតឹងរ៉ឹងរបស់ទីក្រុងប៉េកាំងលើការគ្រប់គ្រងលំហូរមូលធនចេញពីចិនដីគោក នឹងទប់ស្កាត់ការកើនឡើងនៅឆមាសទីពីរ។

យោងតាមទិន្នន័យបានបង្ហាញថា តម្លៃផ្ទះឯកជននៅក្នុងទីក្រុងហុងកុងបានកើនឡើង០,៣ភាគរយនៅក្នុងខែមិថុនា ឆ្នាំ២០២៦ បើធៀបនឹងខែឧសភា ដោយបន្តកើនឡើងរយៈពេល១៣ខែជាប់ៗគ្នា។

សន្ទស្សន៍តម្លៃផ្ទះរបស់ទីក្រុងហុងកុងបានកើនឡើង ៧,៩ ភាគរយក្នុងរយៈពេល៦ខែដំបូងនៃឆ្នាំ ២០២៦ ដែលជាកំណើនខ្ពស់បំផុតនៅឆមាសទី១ ចាប់តាំងពីឆ្នាំ ២០១៩។

តួលេខចុងក្រោយបំផុតបង្ហាញថា ទីផ្សារសម្រេចបានកំណើនស្របតាមការរំពឹងទុកនៅឆ្នាំនេះ ដោយអ្នកវិភាគរំពឹងថា តម្លៃផ្ទះនឹងមានស្ថេរភាពជាជាងបន្តកើនឡើងក្នុងល្បឿនដដែល។

លោក Eddie Kwok នាយកប្រតិបត្តិផ្នែកវាយតម្លៃ និងសេវាកម្មប្រឹក្សាយោបល់នៅ CBRE Hong Kong បានអះអាងថា តម្លៃផ្ទះបានកើនឡើងជាង៧ភាគរយរួចហើយនៅឆ្នាំនេះ ដូច្នេះមានឱកាសតិចតួចសម្រាប់ការកើនឡើងបន្ថែមទៀតនៅក្នុងឆមាសទី២។

លោករំពឹងថា ទីផ្សារនឹងថយចុះ និងមានស្ថិរភាព នៅពេលដែលអ្នកទិញ និងអ្នកលក់សម្របខ្លួនទៅនឹងការកើនឡើងនៃតម្លៃផ្ទះកាលពីឆមាសមុន៕

AIAI សន្យាចូលរួមជាមួយក្រសួងដើម្បីអភិវឌ្ឍន៍ទេសចរណ៍ថ្មី ចូលរួមអភិវឌ្ឍន៍ព្រលានយន្តហោះចាស់ និងការភ្ជាប់ជើងហោះហើរត្រង់

ដោយៈ ម៉ាណា

ភ្នំពេញៈ ក្រុមហ៊ុនAngkor International Airport Investment (AIAI)បានប្តេជ្ញាចូលរួមជាមួយ ក្រសួងទេសចរណ៍កម្ពុជា ដើម្បីជំរុញការអភិវឌ្ឍផលិតផលទេសចរណ៍ថ្មី គឺគម្រោងការទស្សនាប្រាសាទនាពេលរាត្រី។

ព័ត៌មាននេះត្រូវបានលើកឡើងកាលពីសប្តាហ៍មុន ក្នុងឱកាសលោកហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតដល់ លោកLu Wei ប្រធានក្រុមប្រឹក្សាភិបាលនៃក្រុមហ៊ុន Angkor International Airport Investment (Cambodia) Co., Ltd. ទទួលជួបពិភាក្សាការងារ ក្នុងការលើកកម្ពស់វិស័យទេសចរណ៍ ការតភ្ជាប់ផ្លូវអាកាស និងការវិនិយោគទេសចរណ៍នៅខេត្តសៀមរាប។

ក្នុងជំនួបនេះ លោកLu Wei បានជម្រាបជូនពីគោលបំណងនិងគម្រោងរបស់ក្រុមហ៊ុនចំនួន៣ រួមមាន៖

១. ការអភិវឌ្ឍផលិតផលទេសចរណ៍ទស្សនាអង្គរនាពេលរាត្រី

លោករដ្ឋមន្រ្តីបានគាំទ្រ ការអភិវឌ្ឍផលិតផលទេសចរណ៍ថ្មីៗនៅតំបន់អង្គរ ដើម្បីបង្កើនបទពិសោធន៍របស់ភ្ញៀវទេសចរ ពន្យាររយៈពេលស្នាក់នៅ និងបង្កើនការចំណាយរបស់ភ្ញៀវ។ ក្នុងនោះ រួមមានការរៀបចំសកម្មភាពទេសចរណ៍ពេលរាត្រី ការសម្តែងសិល្បៈ វប្បធម៌ កម្មវិធីពន្លឺ និងបច្ចេកវិទ្យាទំនើប ព្រមទាំងព្រឹត្តិការណ៍អន្តរជាតិនានា ដែលអនុវត្តស្រប តាមគោលការណ៍អភិរក្សបេតិកភណ្ឌ និងការអភិវឌ្ឍប្រកបដោយចីរភាព។

២. គម្រោងវិនិយោគ និងការអភិវឌ្ឍទីតាំងព្រលានយន្តហោះអន្តរជាតិសៀមរាបចាស់

ក្រុមហ៊ុនគ្រោងអភិវឌ្ឈន៍ ព្រលានយន្តហោះនេះ ឱ្យក្លាយជាតំបន់អភិវឌ្ឍពហុមុខងារ ដែលរួមបញ្ចូលសេវាទេសចរណ៍ ពាណិជ្ជកម្ម ការកម្សាន្ត និងសកម្មភាពសេដ្ឋកិច្ចផ្សេងៗ។

ចំពោះគម្រោងនេះ លោករដ្ឋមន្រ្តីហួត ហាក់ បានសម្តែងការគាំទ្រ និងស្នើភាគីក្រុមការងារសិក្សា និងរៀបចំផែនការលម្អិតប្រកបដោយចីរភាព និងបរិយាបន្ន។

៣. ការពង្រឹងកិច្ចសហប្រតិបត្តិការក្នុងការនាំភ្ញៀវទេសចរមកកម្ពុជា

ភាគីទាំងពីរបានឯកភាពពង្រឹង កិច្ចសហប្រតិបត្តិការលើការផ្សព្វផ្សាយគោលដៅទេសចរណ៍កម្ពុជា នៅក្នុងទីផ្សារអន្តរជាតិ ពិសេសទីផ្សារចិន តាមរយៈការសហការជាមួយក្រុមហ៊ុនទេសចរណ៍ និងដៃគូអន្តរជាតិ ក្នុងការបើកផ្លូវហោះហើរថ្មី បង្កើនប្រេកង់ជើងហោះហើរ រៀបចំយុទ្ធនាការផ្សព្វផ្សាយរួម និងទាក់ទាញភ្ញៀវទេសចរដែលមានគុណភាពខ្ពស់មកកម្ពុជា។

លើសពីនោះ លោករដ្ឋមន្ត្រី បានសម្តែងការកោតសរសើរចំពោះក្រុមហ៊ុនAIAI ដែលបានវិនិយោគលើហេដ្ឋារចនាសម្ព័ន្ធអាកាសចរណ៍ដ៏សំខាន់នៅកម្ពុជា និងបានបញ្ជាក់ថា ក្រសួងទេសចរណ៍នឹងបន្តធ្វើការយ៉ាងជិតស្និទ្ធជាមួយក្រុមហ៊ុន និងភាគីពាក់ព័ន្ធទាំងអស់ ដើម្បីអភិវឌ្ឍផលិតផលទេសចរណ៍ថ្មីៗ សម្របសម្រួលពង្រឹងការតភ្ជាប់ផ្លូវអាកាស និងលើកកម្ពស់ភាពប្រកួតប្រជែង របស់គោលដៅទេសចរណ៍កម្ពុជា សំដៅទាក់ទាញភ្ញៀវទេសចរអន្តរជាតិឱ្យកាន់តែច្រើន និងប្រកបដោយគុណភាព ស្របតាមទិសដៅនៃការអភិវឌ្ឍទេសចរណ៍ប្រកបដោយចីរភាព។

លោកហួត ហាក់បានបញ្ជាក់ថា ក្រសួងទេសចរណ៍នឹងបន្តធ្វើការយ៉ាងជិតស្និទ្ធជាមួយក្រុមហ៊ុន និងភាគីពាក់ព័ន្ធ ដើម្បីជំរុញការអនុវត្តគម្រោងអាទិភាពនានា ឱ្យទទួលបានលទ្ធផលជាក់ស្តែង។ ក្នុងន័យនេះ ឯកឧត្តមរដ្ឋមន្ត្រី បានចាត់តាំងក្រុមការងារបច្ចេកទេសរបស់ក្រសួងទេសចរណ៍ ឱ្យសហការយ៉ាងជិតស្និទ្ធ ជាមួយក្រុមការងាររបស់ក្រុមហ៊ុន AIAI ដើម្បីសិក្សាលម្អិតលើគម្រោងនីមួយៗ សម្របសម្រួលជាមួយស្ថាប័នពាក់ព័ន្ធ និងរៀបចំផែនការអនុវត្តជាជំហានៗ សំដៅជំរុញការអភិវឌ្ឍផលិតផលទេសចរណ៍ថ្មីៗ ការវិនិយោគទេសចរណ៍ និងការទាក់ទាញភ្ញៀវទេសចរអន្តរជាតិ មកកម្ពុជាឱ្យកាន់តែមានប្រសិទ្ធភាព និងប្រកបដោយចីរភាព៕

ផ្លូវជាតិលេខ១០ ហេដ្ឋារចនាសម្ព័ន្ធប្រវត្តិសាស្រ្តតភ្ជាប់តំបន់ពាយព្យទៅកាន់តំបន់ឆ្នេរជាលើកដំបូង

ដោយៈ គង់ សូរិយា

ភ្នំពេញៈ មានប្រវែងជិត២០០គីឡូម៉ែត្រ ហេដ្ឋារចនាសម្ព័ន្ធមួយនេះ បានវារកាត់វាលស្រែ ឆ្លងព្រៃ ឆ្លងជ្រោះ ចេញពីទឹកដីស្រុកសំឡូត នៃខេត្តបាត់ដំបង ទៅកាន់ខេត្តកោះកុង ជាតំបន់ឆ្នេរដ៏ស្រស់ស្អាតរបស់កម្ពុជា។

យោងតាមក្រសួងសាធារណការ និងដឹកជញ្ជូនបានឲ្យដឹងថា ផ្លូវជាតិលេខ១០ គឺជាហេដ្ឋារចនាសម្ព័ន្ធដ៏សំខាន់មួយ តភ្ជាប់ពីស្រុកសំឡូត ខេត្តបាត់ដំបង ឆ្លងកាត់ខេត្តពោធិ៍សាត់ តាមភូមិសាស្ត្រឃុំប្រមោយ និងឃុំអូរសោម ស្រុកវាលវែង រហូតដល់ក្រុងខេមរភូមិន្ទ ខេត្តកោះកុង មានប្រវែងសរុបជាង១៩៧គីឡូម៉ែត្រ។

ក្រសួងបញ្ជាក់ថា “ផ្លូវជាតិមួយខ្សែនេះ បានក្លាយជាសរសៃឈាមសេដ្ឋកិច្ចដ៏សំខាន់ សម្រាប់ជំរុញការដឹកជញ្ជូន ពាណិជ្ជកម្ម និងការតភ្ជាប់រវាងបណ្តាខេត្តតាមដងផ្លូវ”។

ជាមួយគ្នានេះ ក៏ជាច្រកសក្តានុពលថ្មី សម្រាប់វិស័យទេសចរណ៍ ដែលផ្តល់ជម្រើសបន្ថែមដល់អ្នកដំណើរ ក្នុងការធ្វើដំណើរកម្សាន្តតាមតំបន់ព្រៃភ្នំ ព្រៃព្រឹក្សា និងតំបន់ឆ្នេរសមុទ្រភាគនិរតីនៃប្រទេសកម្ពុជា។

ការអភិវឌ្ឍផ្លូវជាតិលេខ១០ គឺជាផ្នែកមួយដ៏សំខាន់នៃការអនុវត្តយុទ្ធសាស្ត្របញ្ចកោណ របស់រាជរដ្ឋាភិបាល នីតិកាលទី៧ ក្នុងគោលបំណងពង្រឹងហេដ្ឋារចនាសម្ព័ន្ធដឹកជញ្ជូន បង្កើនចរន្តសេដ្ឋកិច្ច បង្កើតឱកាសវិនិយោគ និងលើកកម្ពស់ជីវភាពប្រជាពលរដ្ឋ។

ផ្លូវជាតិដែលតភ្ជាប់ពីតំបន់ភាគពាយ័ព្យ ទៅកាន់ភាគនិរតីនៃប្រទេសកម្ពុជាមួយខ្សែនេះ បានឆ្លងកាត់តំបន់ភ្នំខ្ពស់ ទំនាប ជ្រោះជ្រង ជ្រលងដងអូរ-ស្ទឹង និងព្រៃព្រឹក្សាដ៏ខៀវស្រងាត់គ្រប់រដូវកាល។ ជាពិសេស ក៏មានស្ពានខ្ពស់ដ៏អស្ចារ្យ ភ្ជាប់កំពូលភ្នំពីម្ខាងទៅម្ខាង ឆ្លងកាត់ដងស្ទឹង បង្កើតបានជាទស្សនីយភាពធម្មជាតិ ដ៏ស្រស់ស្អាត និងទាក់ទាញយ៉ាងក្រៃលែង៕

“ទេសចរម្នាក់ ដើមឈើមួយដើម” ការផ្សារភ្ជាប់ការអភិរក្សបរិស្ថាន ជាមួយការអភិវឌ្ឍទេសចរណ៍បៃតង

ដោយៈ ចំណាន

សៀមរាបៈ “ទេសចរម្នាក់ ដើមឈើមួយដើម” ការផ្សារភ្ជាប់ការអភិរក្សបរិស្ថាន ជាមួយការអភិវឌ្ឍទេសចរណ៍បៃតង ប្រកបដោយចីរភាព។

ពាក្យស្លោកនេះ ត្រូវបានលើកឡើង ក្នុងឱកាសនៃពិធីចុះហត្ថលេខា លើអនុស្សរណៈនៃការយោគយល់គ្នា (MoU)រវាងក្រសួងទេសចរណ៍ និងក្រសួងកសិកម្ម រុក្ខាប្រមាញ់ និងនេសាទ ស្តីពី “កិច្ចសហប្រតិបត្តិការជំរុញខ្សែក្រវាត់បៃតងនៅតំបន់ទេសចរណ៍ និងពង្រឹងប្រសិទ្ធភាពខ្សែច្រវាក់ផលិតកម្មកសិកម្ម” លោកហួត ហាក់ រដ្ឋមន្ត្រីក្រសួងទេសចរណ៍ និងលោកឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកប្រាក់ សោភ័ណ អភិបាលនៃគណៈអភិបាលខេត្តសៀមរាប បានអញ្ជើញជាអធិបតីក្នុងការដាំដើមឈើប្រណិត ស្ថិតនៅបរិវេណសួនអាស៊ាន-កូរ៉េ (សួនក្រញ៉ូង) ខេត្តសៀមរាប។

សកម្មភាពដាំដើមឈើនេះ ជាផ្នែកមួយយ៉ាងសំខាន់ក្នុងការជំរុញការអភិវឌ្ឍ “ទេសចរណ៍បៃតង (Green Tourism)” នៅព្រះរាជាណាចក្រកម្ពុជា ដែលស្របទៅតាមនយោបាយ របស់រាជរដ្ឋាភិបាល ក្នុងការផ្សារភ្ជាប់ការអភិរក្សបរិស្ថាន និងធនធានធម្មជាតិ ទៅនឹងការអភិវឌ្ឍវិស័យទេសចរណ៍ប្រកបដោយចីរភាព។

ទន្ទឹមនឹងនេះ ក្រសួងទេសចរណ៍កំពុងបន្តជំរុញយុទ្ធនាការ“ទេសចរម្នាក់ ដើមឈើមួយដើម (One Tourist, One Tree) ដោយលើកទឹកចិត្តយ៉ាងសកម្ម ដល់ភ្ញៀវទេសចរជាតិ និងអន្តរជាតិ ឱ្យចូលរួមដាំដើមឈើ ក្នុងអំឡុងពេលទស្សនាកម្ពុជា។

គោលបំណងនៃយុទ្ធនាការនេះ គឺដើម្បីប្រែក្លាយរាល់ដំណើរកម្សាន្តរបស់ទេសចរ មិនត្រឹមតែជាការបន្សល់ទុកនូវអនុស្សាវរីយ៍ដ៏ប្រពៃប៉ុណ្ណោះទេ ប៉ុន្តែថែមទាំងជាការបន្សល់ទុកនូវ “មរតកបៃតង” សម្រាប់សហគមន៍មូលដ្ឋាន និងជំនាន់ក្រោយៗទៀត។

ការអនុវត្តយុទ្ធនាការនេះ ក៏ជាការចូលរួមចំណែកយ៉ាងធំធេងក្នុងការប្រែក្លាយកម្ពុជាឱ្យទៅជា “គោលដៅទេសចរណ៍បៃតង ស្អាត និងវៃឆ្លាត” ដែលផ្តល់ជូននូវបទពិសោធន៍ទេសចរណ៍ ប្រកបដោយគុណភាព ភាពទាក់ទាញ ព្រមទាំងរួមចំណែកថែរក្សាបរិស្ថាន ធនធានធម្មជាតិ និងធានាបាននូវនិរន្តរភាព នៃវិស័យទេសចរណ៍ជាតិជាប្រវត្តិសាស្ត្រ៕

រឿងសំខាន់ៗអ្វីខ្លះដែលបានកើតមានកាលពីសប្តាហ៍មុនទាក់ទងនឹងសេដ្ឋកិច្ច និងអចលនទ្រព្យនៅកម្ពុជា?

ដោយៈ ចំណាន

ភ្នំពេញៈ កាលពីសប្តាហ៍មុន មានការវិវត្តសំខាន់ៗទាក់ទងនឹងអចលនទ្រព្យ និងសេដ្ឋកិច្ចនៅកម្ពុជា ដែលព័ត៌មាននេះគិតនៅក្នុងចន្លោះថ្ងៃទី២៧ ខែកក្កដា ដល់ថ្ងៃទី២ខែសីហា ឆ្នាំ២០២៦។

១.រដ្ឋាភិបាលបានដាក់ចេញនូវគំនិតផ្តួចផ្តើម ភាពធន់ផ្នែកសេដ្ឋកិច្ចចំនួន១២៤៤លានដុល្លារអាមេរិក

កម្ពុជាបានប្រកាសពីកម្មវិធីចំនួន១២៤៤ ពាន់លានដុល្លារអាមេរិក ដែលមានគោលបំណងគាំទ្រដល់កំណើនសេដ្ឋកិច្ច ការងារ ប្រាក់ចំណូលគ្រួសារ និងហេដ្ឋារចនាសម្ព័ន្ធ។

ខណៈពេលដែលមិនមែនជាគោលនយោបាយ អចលនទ្រព្យទាំងស្រុងនោះទេ ប៉ុន្តែវាមានភាពវិជ្ជមាន សម្រាប់ទីផ្សារអចលនទ្រព្យ ពីព្រោះការងារ និងហេដ្ឋារចនាសម្ព័ន្ធកាន់តែរឹងមាំជាទូទៅបង្កើនតម្រូវការលំនៅដ្ឋាន និងទំនុកចិត្តរបស់វិនិយោគិន។

គំនិតផ្តួចផ្តើមនេះ ធ្វើតាមការពិគ្រោះយោបល់មាត្រាIV របស់ IMF ដែលផ្តោតសំខាន់ៗលើការងារអាទិភាពជាច្រើនរួមមាន ការបង្កើតការងារ និងការគាំទ្រជីវភាព។ ការបណ្តុះបណ្តាលបច្ចេកទេស និងវិជ្ជាជីវៈ ព្រមទាំងការវិនិយោគលើហេដ្ឋារចនាសម្ព័ន្ធទំនើប និងប្រកបដោយចីរភាព។

២. ហេដ្ឋារចនាសម្ព័ន្ធនៅតែជាកត្តាជំរុញដ៏សំខាន់ នៃការវិនិយោគលើអចលនទ្រព្យ

អ្នកវិភាគទីផ្សារបន្តកំណត់អត្តសញ្ញាណ ហេដ្ឋារចនាសម្ព័ន្ធ ជាពិសេសនៅជុំវិញអាកាសយានដ្ឋានអន្តរជាតិតេជោ ផ្លូវធំៗ និងច្រករបៀងភស្តុភារដែលកំពុងពង្រីក ជាកត្តាលីករខ្លាំងបំផុតសម្រាប់ការកើនឡើងតម្លៃដីធ្លី។

តំបន់ភាគខាងត្បូងនៃរាជធានីភ្នំពេញ និងផ្នែកខ្លះនៃខេត្តកណ្តាលបន្តទាក់ទាញចំណាប់អារម្មណ៍របស់អ្នកអភិវឌ្ឍន៍។
៣. ទីផ្សារខុនដូនៅតែងាយស្រួលសម្រាប់អ្នកទិញ

ក្នុងស្ថានភាពទីផ្សារមានកំណើនយឺត អ្នកអភិវឌ្ឍន៍នៅតែផ្តល់ជូនការបង់ប្រាក់កក់ទាប (ប្រហែល ១០-២០%) ផែនការបង់រំលស់ដែលអាចបត់បែនបាន ការលើកទឹកចិត្តផ្សព្វផ្សាយ ដែលនេះជាការឆ្លុះបញ្ចាំងពីការប្រកួតប្រជែងជាបន្តបន្ទាប់ ដោយសារតែការផ្គត់ផ្គង់ខុនដូច្រើនត្រូវបានគេរំពឹងទុកក្នុងឆ្នាំ ២០២៦។

៤. ពន្ធលើប្រាក់ចំណេញមូលធននៅតែត្រូវបានពន្យារពេល

ពន្ធលើប្រាក់ចំណេញមូលធន ដែលបានគ្រោងទុកលើការលក់អចលនទ្រព្យ នៅតែត្រូវបានគ្រោងនឹងចាប់ផ្តើម នៅក្នុងខែមករា ឆ្នាំ ២០២៧ ដែលផ្តល់ឱ្យវិនិយោគិន នូវពេលវេលាបន្ថែមក្រោមរបបពន្ធបច្ចុប្បន្ន។ នេះបន្តគាំទ្រដល់សកម្មភាពប្រតិបត្តិការក្នុងឆ្នាំ ២០២៦។

ការវាយតម្លៃរួមសម្រាប់សប្តាហ៍មុន។

លំហូរព័ត៌មានរួមមានភាពវិជ្ជមានមធ្យម ជាជាងបង្ហាញពីការរីកចម្រើនទីផ្សារដ៏សំខាន់។
កត្តាវិជ្ជមាន

កញ្ចប់គាំទ្រសេដ្ឋកិច្ចរបស់រដ្ឋាភិបាលដ៏ធំ ការវិនិយោគហេដ្ឋារចនាសម្ព័ន្ធបន្ត។ ទំនុកចិត្តប្រសើរឡើងពីផែនការអភិវឌ្ឍន៍ រយៈពេលវែង និងការផ្សព្វផ្សាយហិរញ្ញប្បទាន ដ៏ទាក់ទាញសម្រាប់អ្នកទិញ។
បញ្ហាប្រឈម

ក្នុងស្ថានភាពទីផ្សារ ដែលងើបតិចៗឡើងវិញ អ្វីៗក៏មានបញ្ហាប្រឈមជាច្រើនផងដែរ ដូចជា ការផ្គត់ផ្គង់លើសខុនដូនៅតែមាន អ្នកទិញនៅតែមានអំណាចចរចាខ្លាំង។ ការងើបឡើងវិញគឺមិនស្មើគ្នា ដោយទីតាំងសំខាន់ៗ មានដំណើរការល្អជាងទីផ្សារទូលំទូលាយ។

ដោយផ្អែកលើការវិវឌ្ឍកាលពីសប្តាហ៍មុន វិស័យដែលមានទស្សនវិស័យរយៈពេលមធ្យមខ្លាំងបំផុត នៅតែជាតំបន់នៅជុំវិញអាកាសយានដ្ឋានអន្តរជាតិតេជោ។ អចលនទ្រព្យឧស្សាហកម្ម និងភស្តុភារ។ និងគម្រោងលំនៅដ្ឋាន នៅក្នុងច្រករបៀងកំណើន ដែលភ្ជាប់ជាមួយហេដ្ឋារចនាសម្ព័ន្ធ ពិសេសការអភិវឌ្ឍចម្រុះ ដែលមានទីតាំងល្អនៅភ្នំពេញ៕

លោកយិន លាងគង់ ផ្ញើរសារគោរពជូនពរសម្តេចតេជោហ៊ុន សែនប្រធានព្រឹទ្ធសភា ក្នុងឱកាសខួបកំណើត

ដោយៈ ចំណាន

ភ្នំពេញៈ លោកយិន លាងគង់ សហស្ថាបនិកនិងជាអគ្គនាយកគេហទំព័រPropertyarea.asia &Cambodiafinancialtime.com ថ្នាក់ដឹកនាំ បុគ្គលិកទាំងអស់សូមផ្ញើរសារលិខិតគោរពជូនពរ សម្តេចអគ្គ មហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានឧត្តមក្រុមប្រឹក្សាផ្ទាល់ព្រះមហាក្សត្រ ក្នុងឱកាសដ៏មង្គលាភិរម្យថ្លៃថ្លា នៃឱកាស ខួបចម្រើនជន្មាយុគម្រប់៧៤ឆ្នាំ ឈានចូល៧៥ឆ្នាំ ខាងមុខនេះ។

ក្នុងឱកាសដ៏មានសេរីមង្គល វិបុលសុខនេះ លោកយិន លាងគង់ ថ្នាក់ដឹកនាំ និងបុគ្គលិកទាំងអស់ សូមបួងសួងគុណព្រះរតនត្រៃយ៍ ទេវតាថែររក្សាព្រះមហាស្វេតឆ័ត្រ និងអ្នកមានរិទ្ធីបារមីទាំងអស់ទូទាំងព្រះរាជាណាចក្រកម្ពុជា សូមតាមថែររក្សា ប្រស់ព្រំសព្វសារធុរកាពរដល់សម្តេចអគ្គមហាសេនាបតីតេជោហ៊ុន សែនប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បុត្រា បុត្រី ចៅប្រុស ចៅស្រី ជួបតែសេចក្តីចម្រើនរ៉ុងរឿងជានិច្ចនិរន្តរ៍ និងជួបប្រទះតែនឹងពុទ្ធពរទាំងបួនប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕

1...181920...3,337 Page 19 of 3,337