ដោយៈ ចំណាន

   ភ្នំពេញៈ លោកឧបនាយករដ្ឋមន្រ្តីកើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានគណៈកម្មាធិការ សម្របសម្រួលថ្នាក់ជាតិ ប្រ​ឆាំ​ងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ (គ.ស.ហ.) អញ្ជើញដឹកនាំកិច្ចប្រជុំជាមួយក្រសួង ស្ថាប័នពាក់ព័ន្ធ ដើម្បីពិនិត្យ និងពិភាក្សាលើវឌ្ឍនភាពនៃការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទាន ដល់ការរីកសាយភាយអាវុធមហាប្រល័យរបស់កម្ពុជា។

កិច្ចប្រជុំនេះ ក៏ផ្តោតជាពិសេសការងារប្រឆាំង ការសម្អាតប្រាក់ពាក់ព័ន្ធនឹងបទល្មើស ឆបោកតាមប្រព័ន្ធបច្ចេកវិទ្យា ព្រមទាំងការលើកទិសដៅការងារបន្ត។

កិច្ចប្រជុំនេះមានការអញ្ជើញចូលរួមពីសំណាក់ លោកស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា, ឯកឧត្តមកិត្តិនីតិកោលសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ លោកសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រី និងជាប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោកនេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា ព្រមទាំងថ្នាក់ដឹកនាំនិងមន្ត្រីជំនាញ នៃក្រសួង ស្ថាប័នពាក់ព័ន្ធផ្សេងទៀត៕

ដោយៈ ចំណាន

   ភ្នំពេញៈ ក្រុមមន្រ្តីបានបើកកិច្ចប្រជុំច្រកចេញ-ចូលតែមួយ” លើកទី៩ ក្នុងឆ្នាំ២០២៦ ត្រូវបានរៀបចំឡើងដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគ មានលក្ខណៈសម្បត្តិគ្រប់គ្រាន់ចំនួន៦គម្រោង។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំ​ណើសុំចុះបញ្ជីគម្រោងវិនិយោគ មានលក្ខណៈសម្បត្តិគ្រប់គ្រាន់ចំនួន ៦គម្រោង ក្រោមអធិបតីភាព លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការអញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាលខេត្តពាក់ព័ន្ធ។

គម្រោងវិនិយោគទាំងនេះ មានទុនវិនិយោគសរុបប្រមាណ៨៩លានដុល្លារអាម៉េរិក ដែលអាចបង្កើតឱកាសការងារ បានប្រមាណជាង ១.០០០កន្លែង និងមានមុខសញ្ញាវិនិយោគ ក្នុងវិស័យដូចខាងក្រោម៖
– វិស័យកសិកម្ម និងកសិ-ឧស្សាហកម្មចំនួន២គម្រោង រួមមាន១. គម្រោងបង្កើតរោងចក្រកែច្នៃកៅស៊ូ។ ២. គម្រោងបង្កើតកសិដ្ឋានចិញ្ចឹ​មមាន់ និងរោងចក្រកែច្នៃ។ ៣- វិស័យឧស្សាហកម្មចំនួន១គម្រោង គឺគម្រោងបង្កើតរោងចក្រផលិតសម្ភារៈ ប្រើប្រាស់ក្នុងផ្ទះពីលោហធាតុ។

៤. វិស័យទេសចរណ៍ចំនួន ១គម្រោង គឺគម្រោងបង្កើតរមណីយដ្ឋានទេសចរណ៍ថ្នាក់កែច្នៃ និងសិប្បកម្មផលិតវត្ថុសិល្បៈ។ ៥. វិស័យហេដ្ឋារចនាសម្ព័ន្ធចំនួន ២គម្រោង រួមមាន៖ ៦. គម្រោងអភិវឌ្ឍន៍ស្ថានីយផលិតអគ្គិសនី ដើរដោយថាមពលពន្លឺព្រះអាទិត្យ អានុភាព១០០មេហ្គាវ៉ាត់។ ៧. គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព២៧មេហ្គាវ៉ាត់៕

ដោយៈ ចំណាន

ប្រទេសចិនៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូនកម្ពុជា ឡាវបានពិភាក្សាលើប្រធានបទចំនួន៣ សម្រាប់កិច្ចសហប្រតិបត្តិការនាពេលអនាគត។

ក្នុងជំនួបរវាងលោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងលោក Leklai Sivilay រដ្ឋមន្ត្រីក្រសួងសា​ធារណការ និងដឹកជញ្ជូននៃ សាធារណរដ្ឋប្រជាធិបតេយ្យប្រជាមានិតឡាវភាគីទាំងពីរបានពិភាក្សា លើប្រធានបទចំនួន៣ សំខាន់ៗរួមមាន៖ (១) ការពិនិត្យលទ្ធភាពពង្រីកខ្សែផ្លូវតភ្ជាប់កម្ពុជា-ឡាវ តាមផ្លូវជាតិលេខ៧ (កម្ពុជា) ទៅផ្លូវជាតិលេខ១៣ (ឡាវ) ឬផ្លូវអាស៊ានហាយវេ AH11។

(២) ការសិក្សាទីតាំង និងស្វែងរកកញ្ចប់ថវិកាសាងសង់ស្ពានទន្លេរពៅ (កម្ពុជា) -សេឡាំផាវ (ឡាវ) និងផ្លូវតភ្ជាប់ និង (៣) ការតភ្ជាប់ខ្សែផ្លូវដែករវាងកម្ពុជា-ឡាវ។ ផ្សារ​ភ្ជាប់ទៅនឹងចំណុចពិភាក្សាខាងលើ ភាគីទាំងពីរបានឯកភាពគ្នាបង្កើតក្រុមការងាររួម ដើម្បីសម្រេ​ចបានលទ្ធផលជាក់ស្តែងឆាប់ៗ ដូចការរំពឹងទុក៕

ជំនួបពិភាក្សាទ្វេភាគីនេះ ធ្វើឡើងក្នុងឱកាសរដ្ឋមន្រ្តីទាំងពីរទស្សនកិច្ចនៅ​ប្រទេសចិន៕

ដោយៈ ជំនាញ

   ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា គ្រោងនឹងអញ្ជើញជាអធិបតី ក្នុងពិធីសម្ភោធដាក់ឲ្យប្រើប្រាស់ផ្លូវជាតិលេខ១០ នាថ្ងៃទី១ តុលាខាងមុខនេះ។

ព័ត៌មាននេះ ត្រូវបានលើកឡើងក្នុងកិច្ចប្រជុំ គណៈកម្មការរៀបចំពិធីសម្ពោធបើកឱ្យប្រើប្រាស់ជាផ្លូវការ ផ្លូវជាតិលេខ១០ ពីសំឡូត (ខេត្តបាត់ដំបង) វាលវែង (ខេត្តពោធិ៍សាត់) ទៅដល់ក្រុងខេមរភូមិន្ទ (ខេត្តកោះកុង)។

កិច្ចប្រជុំនេះដឹកនាំដោយលោកម៉ា ស៊ុនហួត អនុរដ្ឋលេខាធិការ តំណាង លោកខាន់ ម៉ាណេរ រដ្ឋលេខាធិការ និងជាប្រធានគណៈកម្មការ បានអញ្ជើញដឹកនាំកិច្ចប្រជុំគណៈកម្មការរៀបចំ ពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ១០ ក្រោមក្របខ័ណ្ឌហិរញ្ញប្បទានសហប្រតិបត្តិការពីរដ្ឋាភិបាល នៃសាធារណរដ្ឋប្រជាមានិតចិន និងក្របខ័ណ្ឌថវិកាជាតិ ដោយមានការអញ្ជើញចូលរួមពីថ្នាក់ដឹកនាំក្រសួង សមាជិក សមាជិកាគណៈកម្មការ អនុគណៈកម្មការត្រៀមរៀបចំពិធីសម្ពោធ មន្ត្រីជំនាញបច្ចេកទេសពាក់ព័ន្ធជាច្រើនរូបផងដែរ ។

កិច្ចប្រជុំរៀបចំឡើង ដើម្បីពិនិត្យបន្ថែមទៅលើវឌ្ឍនភាពការងារ នៃការរៀបចំ របស់អនុគណៈកម្មការទទួលបន្ទុកនីមួយៗ ដែលបានត្រូវចាត់តាំងឱ្យបំពេញភារកិច្ចរៀងៗខ្លួន ដើម្បីពន្លឿនការងារពាក់ព័ន្ធឱ្យបានរួចរាល់ សំដៅធានាធ្វើយ៉ាងណាឱ្យដំណើរការ រៀបចំពិធីសម្ពោធនេះ ប្រព្រឹត្តទៅដោយរលូន និងទទួលលទ្ធផលខ្ពស់តាមផែនការដែលបានគ្រោងទុក។

ផ្លូវជាតិលេខ១០ ពីសំឡូត (ខេត្តបាត់ដំបង) វាលវែង (ខេត្តពោធិ៍សាត់) ទៅដល់ក្រុងខេមរភូមិន្ទ (ខេត្តកោះកុង) ប្រវែងសរុប ១៩៨,៥១ គីឡូម៉ែត្រ គ្រោងនឹងសម្ពោធបើកឱ្យប្រើប្រាស់ជាផ្លូវការ នាថ្ងៃទី១ ខែតុលាឆ្នាំ២០២៦ ខាងមុខនេះ៕

ដោយៈ ចំណាន

   វៀងច័ន្ទៈ ក្រុមមន្រ្តីជំនាញកម្ពុជា ឡាវបានបើក កិច្ចប្រជុំរួមក្រុមអ្នកជំនាញ ស្តីពីការធ្វើផែនការអាងទន្លេមេគង្គ ទិន្នន័យ ម៉ូដែល និងការព្យាករណ៍សម្រាប់ការធ្វើផែនការតំបន់បែបសកម្ម។

ភាគីគម្ពុជាដឹកនាំដោយលោកហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានចូលរួមកិច្ចប្រជុំរួមក្រុមអ្នកជំនាញ ស្តីពីការធ្វើផែនការអាងទន្លេមេគង្គ ទិន្នន័យ ម៉ូដែល និងការព្យាករណ៍សម្រាប់ការធ្វើផែនការ តំបន់បែបសកម្ម។

កិច្ចប្រជុំនេះមានគោលបំណងសំខាន់ ក្នុងការពិនិត្យ និងពិភាក្សាលើរបាយការណ៍ព្រាង ដែលបានធ្វើបច្ចុប្បន្នភាពស្តីពី ការវាយតម្លៃសេណារីយ៉ូអភិវឌ្ឍន៍ជម្រើស និងផែនការអាងទន្លេដែលអាចសម្របខ្លួនបានដំបូង ព្រមទាំងប្រមូលមតិយោបល់ និងសំណើពីក្រុមអ្នកជំនាញ និងប្រទេសសមាជិក។ ជាពិសេសកិច្ចប្រជុំបានពិភាក្សា អំពីគម្រោងរួម និងសកម្មភាពគាំទ្រ ដែលត្រូវការកិច្ចសហប្រតិបត្តិការ កម្រិតតំបន់ ដើម្បីបំពេញតម្រូវការ ដែលមិនអាចដោះស្រាយ បានត្រឹមតែកម្រិតជាតិ។

សម្រាប់កម្ពុជា ការចូលរួមក្នុងកិច្ចប្រជុំនេះ មានសារៈសំខាន់ក្នុងការចែករំលែកបទពិសោធន៍ និងបង្ហាញពីតម្រូវការរបស់កម្ពុជា ពាក់ព័ន្ធនឹងការអភិវឌ្ឍ និងការតភ្ជាប់ផ្លូវទឹក ការគ្រប់គ្រងធនធានទឹក ការចែករំលែកទិន្នន័យ ការព្យាករណ៍ស្ថានភាពទឹក និងការសហប្រតិបត្តិការក្នុងតំបន់។

កិច្ចប្រជុំនេះក៏ជាឱកាសដ៏មានសារៈសំខាន់ សម្រាប់កម្ពុជាក្នុងការពង្រឹងកិច្ចសហប្រតិបត្តិការ ជាមួយប្រទេសសមាជិក និងដៃគូពាក់ព័ន្ធ ដើម្បីរួមចំណែកដល់ការគ្រប់គ្រង និងអភិវឌ្ឍអាងទន្លេមេគង្គប្រកបដោយប្រសិទ្ធភាព ចីរភាព និងអាចសម្របខ្លួនទៅនឹងការប្រែប្រួលនាពេលអនាគត​៕