ប្រទេសG7 ប្រកាសគាំទ្រIMFដើម្បីផ្តល់ជំនួយហិរញ្ញវត្ថុជួយដល់ប្រទេសកំពុងអភិវឌ្ឍន៍

ដោយៈ ប៊ី
ភ្នំពេញៈ ប្រទេសអង់គ្លេសបានលើកឡើងកាលពីថ្ងៃសុក្រថា ប្រទេសដែលមានសេដ្ឋកិច្ចជឿនលឿនធំជាងគេទាំង៧របស់ពិភពលោក (G7) បានយល់ព្រមគាំទ្រការពង្រីកទុនបំរុងរបស់មូលនិធិរូបិយវត្ថុអន្តរជាតិ ដែលបង្កើតឡើងចាប់តាំងពីឆ្នាំ២០០៩។
ការគាំទ្ររបស់ប្រទេសG7 គឺជាជំហានមួយជួយប្រទេសកំពុងអភិវឌ្ឍន៍ ដើម្បីទប់ទល់នឹងវិបត្តិកូវីដ១៩។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២០ ខែមីនា ឆ្នាំ២០២១។
អង់គ្លេស ដែលជាប្រធានដឹកនាំកិច្ចប្រជុំG7នៅឆ្នាំនេះបានឱ្យដឹងថា រដ្ឋមន្រ្តីក្រសួងហិរញ្ញវត្ថុG7 បានយល់ព្រមក្នុងការគាំទ្រ ដល់ការបង្កើនទំហំទ្រព្យបម្រុងអន្តរជាតិ (SDRs) ដែលជារូបិយប័ណ្ណផ្ទៃក្នុងដែលប្រើប្រាស់ដោយIMF។

លោក Rishi Sunak រដ្ឋមន្រ្តីក្រសួងហិរញ្ញវត្ថុអង់គ្លេសបានមានប្រសាសន៍ថា “កិច្ចព្រមព្រៀងដ៏សំខាន់នាពេលបច្ចុប្បន្ននេះ ក្នុងចំណោមប្រទេសG7 បានត្រួសត្រាយផ្លូវសម្រាប់សកម្មភាពសំខាន់ និងរួមគ្នា ដើម្បីគាំទ្រដល់ប្រទេស ដែលមានប្រាក់ចំណូលទាបនៅលើពិភពលោក ដោយធានាថា ប្រទេសនានានឹងទទួលបានប្រយោជន៍ពីការងើបឡើងវិញនៃសេដ្ឋកិច្ចពិភពលោក”។
ដំណឹងនេះ ត្រូវបានស្វាគមន៍ដោយលោកស្រី Kristalina Georgieva នាយកគ្រប់គ្រងមូលនិធិ IMF ដែលបាននិយាយថា កិច្ចប្រជុំរបស់រដ្ឋមន្រ្តីហិរញ្ញវត្ថុ G7 គឺ “មានផ្លែផ្កាល្អ” ។
កាលពីឆ្នាំមុនIMF បាននិយាយថា ខ្លួនចង់ឱ្យមានការដាក់ចេញSDRs ដែលមានទំហំកើនឡើង៥០០ពាន់លានដុល្លារ ពី២៩៣ពាន់លានដុល្លារ ដែលបានព្រមព្រៀងនៅពេលនៃការពង្រីកចុងក្រោយក្នុងឆ្នាំ២០០៩ បន្ទាប់ពីមានវិបត្តិហិរញ្ញវត្ថុពិភពលោក។
ការពង្រីកនោះត្រូវបានជំទាស់ ដោយពេលនោះប្រធានាធិបតីអាមេរិកដូណាល់ ត្រាំ។ កាលពីខែមុនរដ្ឋមន្រ្តីក្រសួងហិរញ្ញវត្ថុអាមេរិកJanet Yellen បាននិយាយថា លោកចង់បានការពង្រីកមួយនេះ ប៉ុន្តែចង់បានតម្លាភាពកាន់តែខ្លាំង អំពីរបៀបដែលSDRs នឹងត្រូវបានប្រើប្រាស់ និងជួញដូរ។
ប្រភពនៅសហរដ្ឋអាមេរិក ដែលច្បាស់ពីកិច្ចពិភាក្សាG7 បាននិយាយថា ការបង្កើនទុនបម្រុង ប្រហែល៦៥០ពាន់លានដុល្លារអាមេរិកកំពុងត្រូវបានពិភាក្សា៕

តើអ្វីជាគុណសម្បត្តិ និងគុណវិបត្តិនៃការវិនិយោគលើអចលនទ្រព្យ?

ដោយៈវឌ្ឈនៈ

ភ្នំពេញៈ វិស័យអចលនទ្រព្យ ជាវិស័យមួយ ដែលមានការរីកចម្រើនយ៉ាងខ្លាំងនៅក្នុងប្រទេស កម្ពុជានាពេលបច្ចុប្បន្ននេះ។ ការវិនិយោគក្នុងវិស័យនេះ មានដូចជា ការវិនិយោគទៅលើផ្ទះ សម្បែង ដីធ្លី ជាដើម ហើយវាផ្តល់ផលចំណេញមកវិញខ្ពស់គួរសម ។

យ៉ាងណាក្ដីវិស័យនេះក៏មានហានិភ័យដែរ បើសិនជាការវិនិយោគមិនបានគិតគូរច្បាស់លាស់។ ហានិភ័យនៅក្នុងវិស័យនេះរួមមាន ការប៉ាន់ស្មានខុស វិបត្តិសេដ្ឋកិច្ចដែលអាចនឹងកើតមាន ធ្វើឲ្យតម្លៃអចលនទ្រព្យធ្លាក់ចុះ ខ្វះខាតសាច់ប្រាក់ក្នុង ករណីខ្ចីធនាគារមកទិញ ឬយកទៅវិនិយោគអ្វីផ្សេងទៀត ព្រោះអចលនទ្រព្យមិនងាយលក់ ចេញប្តូរជាប្រាក់ (Lack of liquidity)។

ប៉ុន្តែប្រសិនបើអ្នកមិនអាចលក់ចេញ ឬមានការធ្លាក់ចុះនូវតម្លៃអចលនទ្រព្យ អ្នកមានជម្រើស ក្នុងការដាក់ជួលទ្រព្យនោះជាបណ្តោះអាសន្ន ព្រោះនៅពេលដែលអ្នកវិនិយោគអ្នកបានទិញទ្រព្យទាំងនោះ ទុកជាកម្មសិទ្ធិរបស់អ្នករួចហើយ។

ជាសង្ខេប ការវិនិយោគជៀសមិនផុតពីការប្រថុយប្រថាននោះទេ តែកម្រិតនៃការ ប្រថុយនេះអាចកាត់បន្ថយបានច្រើន ប្រសិនបើអ្នកមានចំណេះដឹងផ្នែកហរិញ្ញវត្ថុ ជា ពិសេសទៅលើផ្នែកវិនិយោគនេះ។ ទោះជាយ៉ាងណា វិនិយោគិនគួរតែគិតគូរឲ្យបានច្បាស់ លាស់ និងត្រូវមានចិត្តនឹងនរនៅពេលដែលប្រឈមមុខនឹងបញ្ហាផងដែរ ។

នៅក្នុងវិបត្តិកូវីដ១៩ មានវិនិយោគិនជាច្រើន បានបង្វែរការវិនិយោគពីវិស័យផ្សេងមករកវិស័យអចលនទ្រព្យ ដែលធ្វើឱ្យសកម្មភាពទិញលក់លើវិស័យនេះ ជាពិសេសដីធ្លីកាន់តែច្រើន។

លោកធួន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាហ្វិកកម្ពុជា បានលើកឡើងថា ក្នុងពេលវិស័យទេសចរណ៍ មានការប៉ះពាល់ខ្លាំង ដោយសារតែកូវីដ១៩ ធ្វើឱ្យប្រតិបត្តិករទេសចរជាច្រើន បានងាកទៅវិនិយោគលើដីធ្លីវិញ ប៉ុន្តែពួកគេមិនបានគិតពីហានិភ័យដែលនឹងកើតមាន។ បើសិនជាមនុស្សជាច្រើន គិតតែវិនិយោគលើអចលនទ្រព្យ តើក្នុងពេលមានវិបត្តិបែបនេះ អ្នកមានលុយទិញអចលនទ្រព្យមានប៉ុន្មាន ។ យើងគួរវិនិយោគអ្វី ដែលជាតម្រូវការនៅពេលវិបត្តិវិញ ដើម្បីរកប្រាក់ចំណេញ ។

អ្នកជំនាញអចលនទ្រព្យជាច្រើន បានលើកឡើងស្រដៀងគ្នាថា ការវិនិយោគអ្វីសុទ្ធតែមានហានិភ័យ តែបើសិនជាយើងចេះគិតគូរច្បាស់លាស់ យើងនឹងអាចកាត់បន្ថយហានិភ័យ នៅកាន់តែតិចហើយឱកាសនៃចំណេញនឹងឡើងខ្ពស់ ៕

ឆ្នាំ២០២២ ផ្សារទំនើបចំនួន២ តម្លៃជាង ២៤០លានដុល្លារនឹងបង្ហាញរូបរាងនៅភាគខាងត្បូងរាជធានីភ្នំពេញ

ដោយៈ រ៉ាណេត

ភ្នំពេញៈ ជាមួយនឹងកំណើនផ្សារទំនើបបែបសហគមន៍ជាច្រើន បាននិងកំពុងតែរីកដុះដាលជាបន្តបន្ទាប់ នៅក្នុងរាជធានៅភ្នំពេញ និងនៅតាមតំបន់ជាយក្រុង នៅត្រឹមឆ្នាំ២០២២ខាងមុខនេះ ផ្សារទំនើបលំដាប់អន្តរជាតិធំៗចំនួន២ទៀត នឹងបង្ហាញវត្តមានដ៏អស្ចារ្យនៅស្របវិថីសម្ដេចតេជោ ហ៊ុន សែន ឬផ្លូវ៦០ម៉ែត្រ។

ខណៈវិបត្តិនៃជំងឺកូវីដកំពុងកើតមាន និងបន្តរាតត្បាតនៅក្នុងសហគមន៍នា បច្ចុប្បន្ននេះ បានធ្វើឲ្យគំរោងសាងសង់ផ្សារទាំងពីរនេះ ហាក់បន្ថយល្បឿន ប៉ុន្តែវាមិនមែនជាឧបសគ្គចម្បង ចំពោះគម្រោងអភិវឌ្ឍន៍ផ្សារទំនើបកម្រិតអន្តរជាតិ ដែលមានតម្លៃរាប់សិបលានដុល្លារ ចំនួន២ ស្ថិតនៅតាមដងវិថីសម្ដេចតេជោនោះទេ។

បើតាមគម្រោង និងផែនការដែលបានគ្រោងទុក នៅក្នុងឆ្នាំ២០២២ខាងមុខនេះ គម្រោងសាងសង់ផ្សារទំនើបទាំងពីរខាងលើនេះ រួមមាន ផ្សារទំនើបលំដាប់អន្តរជាតិ PH Diamond Place ដែលមានទុនវិនិយោគប្រមាណ ៦០លានដុល្លារ និងមណ្ឌលផ្សារទំនើប ជីបម៉ុង មេហ្គាម៉ល មានទុនវិនិយោគប្រមាណ ១៨០លានដុល្លារ នឹងបង្ហាញវត្តមានដាក់ចូលទៅក្នុងទៅទីផ្សាររួមជាមិនខាន។

– គម្រោងផ្សារទំនើបលំដាប់អន្តរជាតិ PH Diamond Place

ត្រូវបានអភិវឌ្ឍនៅលើផ្ទៃដី៦ហិកតា ស្ថិតនៅក្នុងគម្រោងបុរី ប៉េងហួត ដឹ ស្តា ដាយមិន ស្ថិតនៅតាមបណ្តោយមហាវិថី សម្តេចតេជោហ៊ុនសែនឬផ្លូវ៦០ម៉ែត្រនោះ ដែលសព្វថ្ងៃនេះ ក្រុមការងាររបស់ប៉េង ហួត សំណង់ កំពុងតែបន្តការសាងសង់ ដើម្បីបញ្ចប់ឱ្យរួចរាល់ក្នុងឆ្នាំ២០២២ខាងមុខនេះ ជាមួយនឹងទុនវិនិយោគប្រមាណ៦០លានដុល្លារ ដែលជាអភិវឌ្ឍដោយក្រុមហ៊ុន ប៉េងហួត គ្រុប និងទទួលខុសត្រូវដោយប៉េងហួត រីថែល។

ផ្សារទំនើបមួយនេះមានកម្ពស់៥ជាន់ និងមានផ្ទៃក្រឡាសម្រាប់ជួលប្រមាណ ៤០,០០០ ម៉ែត្រការ៉េ មានប្រមូលផ្តុំទៅដោយហាងល្បីៗជាង២០០ហាង ថែមទាំងមានវិសាលភាព ទីចំណតធំទូលាយអាចចតរថយន្ត និងម៉ូតូបាន២០០០គ្រឿង។ រឹតតែពិសេស គម្រោងផ្សារទំនើបនេះ ក៏បានទទួលពានរង្វាន់ផ្នែកស្ថាបត្យកម្ម លក់រាយល្អជាងគេ (Best Retail Architectural Design) ពីកម្មវិធី Cambodia Property Award ដែលរៀបចំឡើងដោយក្រុមហ៊ុន Property Guru ផងដែរ។

គម្រោងមណ្ឌលផ្សារទំនើបលំដាប់អន្តរជាតិ ជីបម៉ុង ២៧១មេហ្គាម៉ល

ជាការវិនិយោគ និងអភិវឌ្ឍន៍ដោយក្រុមហ៊ុន ជីប ម៉ុង រីថែល បានបញ្ចុះបឋមសិលាបើកការដ្ឋានសាងសង់កាលពីខែសីហា ឆ្នាំ២០១៨ កន្លងទៅ និងគ្រោងដាក់ឱ្យដំណើរការក្នុងឆ្នាំ២០២២ខាងមុខ។ វត្តមាននៃគម្រោងមណ្ឌលផ្សារទំនើប លំដាប់អន្តរជាតិមួយនេះ គឺជាផ្នែកមួយជួយធ្វើទំនើបកម្មឧស្សាកម្ម លក់រាយនៅតំបន់ភាគខាងត្បូងនៃរាជធានីភ្នំពេញកាន់តែមានភាពរសរវើក ។

រហូតមកដល់ពេលនេះ មណ្ឌលផ្សារទំនើបខ្នាតអន្តរជាតិ ដែលបានបណ្តាក់ទុនវិនិយោគប្រមាណ១៨០លានដុល្លារនេះ ក៏កំពុងបន្តដំណើរការសាងសង់របស់ខ្លួន ដែលមានទីតាំងស្ថិត នៅក្នុងគម្រោងអភិវឌ្ឍន៍អចលទ្រព្យ លើផ្ទៃដីទំហំ៤៣ហិកតា នៃគម្រោង លែនម៉ាក២៧១ របស់ក្រុមហ៊ុន ជីប ម៉ុង លែនដ៏៕

អ្នកសេដ្ឋកិច្ចៈទោះជាមានការរំខានដោយកូវីដ១៩ ប៉ុន្តែរាជរដ្ឋាភិបាលបន្តជំរុញការធ្វើពិពិធកម្មសេដ្ឋកិច្ច

ដោយៈ រ៉ាណេត

ភ្នំពេញៈ បើទោះជាមានការរំខានដោយបញ្ហារាលដាល នៃការឆ្លងជំងឺកូវីដនៅក្នុងសហគមន៍ ប៉ុន្តែគម្រោងធំៗដែលជាយុទ្ធវិធីនៃការជំរុញ និងពង្រីកទំហំពាណិជ្ជកម្ម ទ្រទ្រង់កំណើនសេដ្ឋកិច្ចកម្ពុជា ត្រូវបានរាជរដ្ឋាភិបាលយកចិត្តទុកដាក់យ៉ាងខ្លាំង ក្នុងការអនុវត្តដើម្បីធ្វើយ៉ាងអាចសម្រេចបាន ទៅតាមផែនការដែលបានគ្រោងទុក។

ស្ថិតនៅក្នុងផែនការយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច គម្រោងអភិវឌ្ឍន៍ធំៗជាច្រើន បាននិងកំពុងដំណើរការយ៉ាងរលូន ដែលក្នុងនោះ រួមមាន ការអភិវឌ្ឍលើហេដ្ឋារចនាសម្ព័ន្ធ នៅទូទាំងប្រទេសដូចជាផ្លូវជាតិសំខាន់ៗ គម្រោងសាងសង់អាកាសយានដ្ឋានទាំង៣ ការចុះកិច្ចព្រមព្រៀងពាណិជ្ជកម្មសេរី រួមជាមួយនឹងការធ្វើវិសោធនកម្មច្បាប់វិនិយោគថ្មី នៃព្រះរាជាណាចក្រកម្ពុជាផងដែរ។

អ្នកវិភាគនិងស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា លោកបណ្ឌិតហុង វណ្ណៈ បានមានប្រសាសន៍ប្រាប់ឱ្យដឹងនៅថ្ងៃចុងសប្ដាហ៍នេះថា គ្រប់គម្រោងទាំងអស់ដូច ដែលបានលើកឡើងខាងលើនេះ គឺជាយុទ្ធវិធីយ៉ាងសំខាន់របស់រាជរដ្ឋាភិបាលកម្ពុជាដែលបង្កើតឡើង និងកំពុងអនុវត្តទៅតាមជំហាន ដែលគ្រោងទុកក្នុងគោលបំណងកែប្រែ និងធ្វើពិពិធកម្មសេដ្ឋកិច្ចកម្ពុជាឱ្យមានភាពល្អប្រសើរ។

លោកបានបញ្ជាក់ថា “ដូចដែលយើងបានឃើញហើយថា នៅក្នុងយុទ្ធវិធី ក៏ដូចជាវិធីសាស្ត្ររបស់រាជរដ្ឋាភិបាល គឺធ្វើយ៉ាងណាអាចបង្កភាពងាយស្រួល ដល់បណ្តាវិនិយោគិនទាំងអស់ ដែលមានបំណងចងសម្ព័ន្ធ វិនិយោគពាណិជ្ជកម្មជាមួយកម្ពុជា តាមរយៈការយកចិត្តទុកដាក់ លើការសម្រួលដល់ច្បាប់វិនិយោគថ្មី។ ការកសាងហេដ្ឋារចនាសម្ព័ន្ធសម្រាប់ធ្វើដំណើរ និងដឹកជញ្ជូន ការចងសម្ព័ន្ធជាដៃគូយុទ្ធសាស្ត្រ ជាមួយបណ្តាប្រទេសនាននៅក្នុងតំបន់ ក៏ដូចជានៅលើសាកលលោក តាមរយៈកិច្ចព្រមព្រៀងពាណិជ្ជកម្មសេរី” ។

លោកបន្តថា នៅក្នុងឆ្នាំ២០២១នេះ ក្រៅពីកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសមួយចំនួន ដូចជា មហាអំណាចសេដ្ឋកិច្ចចិន កូរ៉េ ជប៉ុន ឥណ្ឌ ក៏ដូចជាចក្រភពអង់គ្លេង ជាពិសេសកិច្ចព្រមព្រៀងពាណិជ្ជកម្មដៃគូគ្រប់ជ្រុងជ្រោយ (RCEP) ដែលជាទីផ្សារដ៏ធំជាសាកល រាជរដ្ឋាភិបាលបាន និងកំពុងយកចិត្តទុកដាក់ លើការស្ថាបនាផ្លូវជាតិសំខាន់ៗជាច្រើន ដូចជា ផ្លូវជាតិលេខ៣ ផ្លូវជាតិលេខ៥ ផ្លូវជាតិលេខ១០ ផ្លូវជាតិលេខ៤៨ ផ្លូវជាតិលេខ៣៣ លេខ៤១ លេខ២ ក៏ដូចជាផ្លូវ៣៨ខ្សែនៅក្រុងសៀម និងស្ពានជាដើម។

បន្ថែមពីនេះនៅមានផ្លូវល្បឿនលឿនភ្នំពេញ -ព្រះសីហនុ គម្រោងផ្លូវល្បឿនលឿនភ្នំពេញ-បាវិត រួមជាមួយនឹងផ្លូវដែកឆ្លងប្រទេសផងដែរ។

លោកបណ្ឌិតហុង វណ្ណៈ បានបញ្ជាក់ឱ្យដឹងទៀតថា ក្រៅពីគម្រោងខាងលើនេះ បច្ចុប្បន្នរាជរដ្ឋាភិបាល ក៏កំពុងអភិវឌ្ឍន៍ពង្រីកវិសាលភាពរបស់ខ្លួន តាមរយៈការអភិវឌ្ឍគម្រោងអាកាសយានដ្ឋានជាច្រើនទីតាំង រួមមានអាកាសយានដ្ឋានភ្នំពេញអន្តរជាតិថ្មី អាកាសយានដ្ឋានអន្តរជាតិសៀមរាបអង្គរ ការពង្រីកវិសាលភាព និងលទ្ធភាពអាកាសយានដ្ឋានកងកេងក្រុងព្រះសីហនុ គម្រោងអាកាសយានដ្ឋានចំនួន២ នៅខេត្តកោះកុង គម្រោងអាកាសយាដ្ឋាននៅខេត្តបាត់ដំបង រួមជាមួយនឹងគម្រោងអាកាសយានដ្ឋានក្នុងតំបន់ខេត្តមណ្ឌលគីរី ដែលកំពុងទទួលសិទ្ធិសិក្សា ដោយក្រុមហ៊ុនចិននាពេលបច្ចុប្បន្ន។

លោកបន្តថា “គោលនយោបាយ និងផែនការអភិវឌ្ឍន៍ទាំងអស់នេះ គឺជាផ្នែកមួយនៃគម្រោងផែនការរបស់រាជរដ្ឋាភិបាល ក្នុងការធ្វើពិពិធកម្មសេដ្ឋកិច្ចឱ្យកាន់តែមានភាពល្អប្រសើរជាងពេលបច្ចុប្បន្ន” ៕

ក្រុមហ៊ុនអាកាសចរណ៍ British Airways គ្រោងលក់អគារការិយាល័យកណ្ដាលរបស់ខ្លួនដោយសារវិបត្តិកូវីដ-១៩

ដោយៈសុខុម

ក្រុងឡុងដ៍: ក្រុមហ៊ុនអាកាសចរណ៍អង់គ្លេស British Airways បានប្រកាសឱ្យដឹងថា ពេលនេះខ្លួនកំពុងពិចារណា លក់អគារការិយាល័យកណ្តាលរបស់ខ្លួន ដោយសារតែបុគ្គលិកប្តូរទៅធ្វើការពីផ្ទះច្រើន អំឡុងពេលឆ្លងរាតត្បាតវីរុសកូវីដ-១៩ ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី១៩ មីនា។

គម្រោងលក់អគារការិយាល័យកណ្ដាល ដែលត្រូវបានសារព័ត៌មាន Financial Times ចុះផ្សាយដំបូងគេនេះ អាចជួយស្រោចស្រង់បានខ្លះ ចំពោះស្ថានភាពហិរញ្ញវត្ថុរបស់ក្រុមហ៊ុនអាកាសចរណ៍នេះ ដែលបានរងផលប៉ះពាល់ធ្ងន់ធ្ងរ ដោយសារវិបត្តិកូវីដ-១៩ ។ អគារការិយាល័យកណ្ដាលនេះ ត្រូវបានសាងសង់រួចរាល់ជាស្ថាពរក្នុងឆ្នាំ១៩៩៨ ដោយចំណាយដើមទុនអស់ ២៧៩លានដុល្លារអាមេរិក។

ការផ្លាស់ប្តូររបស់បុគ្គលិកទៅធ្វើការងារពីផ្ទះ ក្នុងរយៈពេលមួយឆ្នាំមកនេះ បានធ្វើឱ្យក្រុមហ៊ុនមួយចំនួន ក្នុងចំណោមក្រុមហ៊ុនធំៗ បំផុតរបស់ប្រទេសអង់គ្លេស កាត់បន្ថយទំហំផ្ទៃការិយាល័យរបស់ខ្លួនឱ្យបានច្រើន តាមដែលអាចធ្វើទៅបាន។

តួយ៉ាងធនាគារដ៏ធំ Lloyds បាននិយាយថា ខ្លួននឹងកាត់បន្ថយទំហំផ្ទៃការិយាល័យរបស់ខ្លួនចំនួន២០% ក្នុងរយៈពេល៣ឆ្នាំ ហើយធនាគារ HSBC មានបំណងកាត់បន្ថយទំហំផ្ទៃការិយាល័យរបស់ខ្លួនរហូតដល់ទៅ ៤០%ផងដែរ។

អគារការិយាល័យកណ្ដាលនេះ មានទីតាំងស្ថិតនៅជិតអាកាសយានដ្ឋាន Heathrow នាភាគខាងលិចទីក្រុងឡុងដ៍។

ក្រុមហ៊ុននេះបានចេញសេចក្តីថ្លែងការណ៍ថា បុគ្គលិកជាច្រើនរបស់ខ្លួន ចូលចិត្តធ្វើការងារពីផ្ទះច្រើនជាង អំឡុងពេលឆ្លងរាតត្បាតវីរុសកូវីដ-១៩ ហើយគោលការណ៍របស់ក្រុមហ៊ុនសម្រាប់ថ្ងៃអនាគត ទំនងជាតម្រូវឱ្យបុគ្គលិកធ្វើការងារពីផ្ទះខ្លះ និងធ្វើការនៅការិយាល័យខ្លះ។

អ្នកនាំពាក្យក្រុមហ៊ុននេះ បានលើកឡើងតាមរយៈសេចក្ដីថ្លែងការណ៍ថា “យើងបានរៀបចំរចនាសម្ព័ន្ធ អាជីវកម្មរបស់យើងឡើងវិញ ដើម្បីងើបឱ្យផុតពីវិបត្តិនេះ ហើយកំពុងពិចារណាថា តើយើងនៅតែត្រូវការអគារការិយាល័យ កណ្ដាលធំបែបនេះទៀត ឬយ៉ាងណាក្នុងកាលៈទេសៈនេះ” ។

ដើម្បីរក្សាដំណើរការអាជីវកម្ម ឱ្យឆ្លងផុតវិបត្តិឆ្លងរាតត្បាតវីរុសកូវីដ-១៩ ក្រុមហ៊ុននេះ បានកាត់បន្ថយការចំណាយច្រើនក្នុងឆ្នាំ២០២០ ដែលរួមមានទាំងការជម្រុះបុគ្គលិកចោលរហូតដល់ជាង១០.០០០នាក់ផងដែរ ដោយទុកតែប្រហែល៣ម៉ឺននាក់ប៉ុណ្ណោះ។

ដោយសារបញ្ហាខ្វះខាតហិរញ្ញវត្ថុ ក្រុមហ៊ុននេះក៏បានប្រកាសលក់ស្នាដៃ វត្ថុសិល្បៈល្បីៗជាច្រើន ដែលធ្លាប់ព្យួរតាំក្នុងបន្ទប់រង់ចាំចេញដំណើរ សម្រាប់ភ្ញៀវ VIP របស់ខ្លួនផងដែរ៕

គម្រោងផ្លូវល្បឿនលឿនភ្នំពេញ បាវិតបញ្ចប់ការសិក្សា និងស្ថិតក្នុងដំណាក់កាលសិក្សាតម្លៃគម្រោងនិងប្រភពថវិកា

ដោយៈគង់ សូរិយា

ភ្នំពេញៈគម្រោងផ្លូវល្បឿនលឿនភ្នំពេញ-បាវិតបានបញ្ចប់ការសិក្សាសមិទ្ធិលទ្ឋ ភាព និងកំពុងស្ថិតក្នុងដំណាក់កាលពិភាក្សាលើតម្លៃនៃគម្រោង និងប្រភពថវិកា។នេះបើកតាមការឲ្យដឹងរបស់ក្រសួងសាធារណៈការនិងដឹកជញ្ជូន។

យោងតាមគេហទំព័រផ្លូវការរបស់ក្រសួងសាធារណៈការ និងដឹកជញ្ជូនបានឲ្យដឹងាផ្លូវល្បឿនលឿនភ្នំពេញ បាវិត ក៏ជាខ្សែផ្លូវថ្មីទាំងស្រុងដូចផ្លូវល្បឿលឿនភ្នំពេញ ព្រះសីហនុផងដែរ ដែលមានប្រវែងសរុបប្រហែល ១៣៥ គ.ម។ ផ្លូវនេះត្រូវសាងសង់ជា៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះ នឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។

យោងតាមរបាយការណ៍សិក្សារបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ផ្លូវល្បឿនលឿននេះ ជាប្រភេទផ្លូវលើអាកាស (Viaduct) ប្រវែងប្រហែល១២ គ.ម មានលូប្រអប់ (Box Culvert) ប្រវែងប្រហែល ២៨,៤ គ.ម និងជាប្រភេទ ផ្លូវលើកកម្ពស់ (Embankment) ប្រវែងប្រហែល ៨៥,៨ គ.ម។ ផ្លូវល្បឿនលឿន ភ្នំពេញ-បាវិត មានផ្លូវបំបែកប្តូរទិស (Inter-Change) ចំនួន៧កន្លែង កន្លែងឈប់សម្រាក៦កន្លែង និងច្រកទ្វារ ព្រំដែនថ្មីចំនួន១ផងដែរ។

ក្រសួងសាធារណការ និងដឹកជញ្ជូននៃព្រះរាជាណាចក្រកម្ពុជា និងក្រសួងដឹកជញ្ជូនរបស់ប្រទេសវៀតណាម ក៏បានចុះអនុស្សរណៈយោគយល់គ្នា ស្តីពីការជំរុញការសិក្សា និងសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបៃ រួចរាល់ផងដែរ។

តើអ្វីជាគោលបំណង នៃការសាងសង់ផ្លូវល្បឿនលឿននៅកម្ពុជា ក្រសួងសាធារណៈការនិងដឹកជញ្ជូនបានឲ្យដឹងថា គោលបំណងនៃគម្រោងសាងសង់ផ្លូវល្បឿនលឿននៅកម្ពុជា មានដូចជា ទីដើម្បីសមាហរណកម្មក្នុងតំបន់ (ទាំងក្នុងអាស៊ាន និងមហាអនុតំបន់ទន្លេមេគង្គ) ក៏ដូចជាពិភពលោកទាំងមូល ជួយតភា្ជប់បណ្តាញដឹកជញ្ជូនក្នុងតំបន់ពីប្រទេសមួយទៅប្រទេសមួយទៀត ដើម្បីលើកកម្ពស់សមត្ថភាពដឹកជញ្ជូនកម្ពុជាឲ្យសមស្រប ទៅតាមការអភិវឌ្ឍបែបសាកលភាវូបនីយកម្ម។

ទី២ បង្កើនតុល្យភាពនៃការអភិវឌ្ឍដែនដី ដោយផ្សារភ្ជាប់រាជធានីភ្នំពេញជាមួយនឹងទីរួមខេត្តនានា និងជាមាគ៌ាឆ្ពោះទៅកាន់ពិភពលោក ៖ បង្កើនសមត្ថភាពដឹកជញ្ជូននិងលើកកម្ពស់ប្រសិទ្ធភាពផ្នែកភស្តុភារនៅក្នុងប្រទេសពិសេស ពីភ្នំពេញទៅបណ្តាខេត្តនានា ដើម្បីធ្វើឲ្យនៅតាមខេត្តមានភាពរីកចម្រើនបានឆាប់រហ័ស។

ទី៣ ពង្រឹងនិងកែលម្អស្ថានភាពចរាចរណ៍នៅកម្ពុជា៖ផ្លូវល្បឿនលឿនមានសមត្ថភាពខ្ពស់ក្នុងការទទួលបន្ទុកយានយន្តធ្ងន់ៗបម្រើសេវាកម្មបានល្អនិងអាចទាក់ទាញយានយន្តនានាដែលចរាចរតាមផ្លូវជាតិ កត្តានេះនឹងជួយសម្រាលការខូចខាត ហើយកាត់បន្ថយស្ថានភាពមមាញឹកនៅតាមផ្លូវជាតិទៀតផង៕

សំណង់អគារថ្មីនៃក្រសួងព័ត៌មានសាងសង់សម្រេចបានជាង៦៥ភាគរយ

ដោយ ៖ រ៉ាណេត

ភ្នំពេញ ៖ អគារថ្មីនៃអគ្គនាយកដ្ឋានព័ត៌មាន និងសោតទស្សន៍ រួមនឹងអគារអគ្គនាយកដ្ឋានទីភ្នាក់ងារសារព័ត៌មានកម្ពុជា AKP នៃក្រសួងព័ត៌មាន សម្រេចសាងសង់បាន ៦៥ ភាគរយ ហើយគ្រោងនឹងបញ្ចប់ទាំងស្រុងនៅត្រឹមដើមឆ្នាំ២០២២ខាងមុខនេះ។

រដ្ឋមន្ត្រីក្រសួងព័ត៌មាន លោកខៀវ កាញារីទ្ធ បានមានប្រសាសន៍ក្នុងឱកាសអញ្ជើញពិនិត្យការដ្ឋានដំណើរការសាងសង់អគារថ្មីនៅថ្ងៃទី១៩ ខែមីនា ឆ្នាំ២០២១ថា អគារថ្មីនេះក្រោយពេលបញ្ចប់ការសាងសង់ និងដាក់ឱ្យប្រើប្រាស់ជាផ្លូវការនៅត្រឹមឆ្នាំ២០២២ខាងមុខនេះ នឹងជួយសម្រួលដល់ការបំពេញកិច្ចការងារដល់មន្ត្រីនៃអគ្គនាយកដ្ឋានព័ត៌មាន និងសោតទស្សន៍ និងនាយកដ្ឋានទីភ្នាក់ងារសារព័ត៌មានកម្ពុជាAKPបានយ៉ាងប្រសើរ។

ជាមួយគ្នានេះលោករដ្ឋមន្ត្រីក៏បានជំរុញលើកទឹកចិត្តដល់ក្រុមការងារសាងសង់ទាំងអស់ធ្វើយ៉ាងណាប្រឹងប្រែងកសាងអគារថ្មីទាំង២នេះ ឱ្យស្រមតាមបទដ្ឋានស្តង់ដារបច្ចេកទេសនៃសំណង់អគារឱ្យបានត្រឹមត្រូវ រឹងមាំ ដើម្បីប្រើបាស់បានយូរអង្វែង។

លោកបន្តថា តាមរយៈអគារថ្មីនេះនឹងធ្វើឱ្យថ្នាក់ដឹកនាំ និងមន្ត្រីរាជការនៃអគ្គនាយកដ្ឋានទាំងពីរកាន់តែល្អ ព្រោះថាពីមួយថ្ងៃទៅមួយថ្ងៃ សម្រាប់ក្រសួងព័ត៌មាន កាន់តែមានកិច្ចការងារជាច្រើន ដែលត្រូវបំពេញទាំងថ្នាក់ជាតិ និងអន្តរជាតិ ដើម្បីធ្វើយ៉ាងណាឱ្យវិស័យព័ត៌មាន និង សោតទស្សន៍កាន់តែរីកចម្រើន ស្របតាមការវិវត្តន៍នៃបច្ចេកវិទ្យាព័ត៌មាន វិទ្យា និងស្របតាមទិសស្លោក ប្លែក លឿន ទុកចិត្តបាន នៅទីណា ពេលណាក៏បាន។

បើតាមការបញ្ជាក់របស់គណៈកម្មការសាងសង់បានឱ្យដឹងថា អគារថ្មីនេះមានកំពស់ ១៤ ជាន់ បណ្តោយ ៦៥ ម៉ែត្រ ទទឹង ១៤ ម៉ែត្រ មានបន្ទប់បំពេញការងារជាង៣០០បន្ទប់។ អគារនេះសាងសង់ដោយក្រុមហ៊ុន ឃុន សៀ ឌីវីឡុបមីនគ្រុប សហការជាមួយក្រុមហ៊ុន BELLETONE ប្រទេសចិន ដោយគ្រោងហើយរួចរាល់ក្នុងរយៈពេល២៤ខែ បន្ទាប់ពីបានចាប់ដំណើរការបើកការដ្ឋានសាងសង់កាលថ្ងៃទី៤ ខែធ្នូ ឆ្នាំ២០១៩ ៕

ក្រុមហ៊ុនតៃវ៉ាន់Foxconnគ្រោងសហការវិនយោគជាមួយក្រុមហ៊ុនវៀតណាមលើការផលិតរថយន្តអគ្គិសនី

ដោយៈ សុខុម

តៃប៉ិ/ហាណូយ: ប្រភពពីរបានទម្លាយប្រាប់ទីភ្នាក់ងារព័ត៌មាន Reuters ថា ក្រុមហ៊ុន Foxconn របស់កោះតៃវ៉ាន់ កំពុងចរចាជាមួយក្រុមហ៊ុនផលិតរថយន្តវៀតណាម VinFast ដើម្បីចាប់ដៃសហការផលិតរថយន្តអគ្គិសនី។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី១៩ មីនា។

ប្រភពស្និទ្ធនឹងរឿងនេះបាននិយាយដោយសុំមិនបញ្ចេញអត្តសញ្ញាណ ដោយពួកគេមិនត្រូវបានអនុញ្ញាតឱ្យនិយាយជាមួយប្រព័ន្ធផ្សព្វផ្សាយដូច្នេះថា ក្រុមហ៊ុន Foxconn បានស្នើសុំទិញសង្វាក់ផលិតកម្មរថយន្តអគ្គិសនី (EV) របស់ក្រុមហ៊ុន VinFast។

ទោះជាយ៉ាងណា ក្រុមហ៊ុន VinFast បុត្រសម្ព័ន្ធរបស់ Vingroup JSC ដែលជាក្រុមហ៊ុនធំបំផុតនៅប្រទេសវៀតណាម ចង់ចាប់ដៃគូសហការជាជាងការលក់ ព្រោះចង់ផ្សព្វផ្សាយឱ្យពិភពលោកបានដឹងថា ខ្លួនជាក្រុមហ៊ុនផលិតរថយន្តដែលមិនបង្កផលប៉ះពាល់ដល់បរិស្ថាន ហើយណាមួយក៏ចង់រក្សាអាជីវកម្មផលិតរថយន្តអគ្គិសនីរបស់ខ្លួនផងដែរ។

ទាក់ទិនបញ្ហានេះ ក្រុមហ៊ុន Foxconn បានបដិសេធមិនធ្វើអត្ថាធិប្បាយនោះឡើយ។ ចំណែកឯអ្នកនាំពាក្យក្រុមហ៊ុន Vingroup បាននិយាយថា ក្រុមហ៊ុនគ្មានព័ត៌មានអំពីបញ្ហានេះទេ។
ក្រុមហ៊ុន Foxconn គឺក្រុមហ៊ុនម៉ៅការផលិតគ្រឿងអេឡិចត្រូនិកដ៏ធំបំផុក្នុងពិភពលោក ហើយក៏ជាអ្នកផ្គត់ផ្គង់របស់ក្រុមហ៊ុនសហរដ្ឋអាមេរិក Apple Inc ដែលផលិតទូរស័ព្ទ iPhone ដ៏ល្បីរន្ទឺផងដែរ។

ក្រុមហ៊ុននេះបានដាក់ចេញនូវផែនការដើម្បីក្លាយជាអ្នកផ្គត់ផ្គង់គ្រឿងបន្លាស់ និងសេវាកម្មដ៏ធំមួយនៅក្នុងទីផ្សាររថយន្តអគ្គិសនីទូទាំងពិភពលោក ហើយក្រោយឈានដល់កិច្ចព្រមព្រៀងណាមួយជាមួយក្រុមហ៊ុន VinFast ក្រុមហ៊ុន Foxconn នឹងចរចាកិច្ចព្រមព្រៀងជាមួយក្រុមហ៊ុនផលិតរថយន្តអ៊ីតាលី Fiat Chrysler និងក្រុមហ៊ុនផលិតរថយន្តអគ្គិសនីទើបតែចាប់ផ្ដើមថ្មីៗតាមក្រោយទៀត។

ក្រុមហ៊ុនអ្នកជំនាញក្នុងវិស័យនេះមើលឃើញថា មហិច្ឆិតាដ៏ធំរបស់ក្រុមហ៊ុនតៃវ៉ាន់ មួយនេះគំរាមធ្វើឱ្យកក្រើកឧស្សាហកម្មផលិតរថយន្តអគ្គិសនី៕

ក្រុមហ៊ុនជប៉ុនធំមួយគ្រោងវិនិយោគបុរីធំមួយនៅតាមបណ្តោយផ្លូវជាតិលេខ៣

ដោយៈស៊ីវ ម៉េង
ភ្នំពេញៈ ក្រុមហ៊ុនជប៉ុនធំមួយ គ្រោងបោះទុនវិនិយោគរាប់លានដុល្លារ ដើម្បីសាងសង់បុរីធំមួយ នៅតាមបណ្តោយផ្លូវជាតិលេខ៣ ដែលគម្រោងនេះនឹងចាប់ផ្តើមនៅពេលឆាប់ៗខាងមុខ។

ប្រភពពីថ្នាក់ដឹកនាំក្រុមហ៊ុននេះ បាននិយាយក្នុងលក្ខខ័ណ្ឌមិនបញ្ចេញឈ្មោះថា ក្រុមហ៊ុនជប៉ុននេះ បានបើកការិយាល័យនៅទីក្រុងភ្នំពេញរួចហើយ និងកំពុងត្រៀមសាងសង់គំរោងរបស់ខ្លួននៅលើផ្លូវជាតិលេខ៣ ដែលមានចម្ងាយប្រមាណ២០គីឡូម៉ែត្រពីកណ្តាលក្រុងភ្នំពេញ។លោកបន្តថា ក្រុមហ៊ុននេះជាក្រុមហ៊ុនធំ និងមានកេរ្ត៍ឈ្មោះល្បី នៅប្រទេសជប៉ុន ដែលមានជំនាញផ្នែកអភិវឌ្ឍន៍អចលនទ្រព្យ ពិសេសផ្នែកលំនៅដ្ឋាន។

លោកបន្តថា “ទោះជាយ៉ាងណាយើងមិនអាចប្រាប់ពីឈ្មោះបុរីនេះ នៅឡើយទេ ដោយសារវាជាគោលការណ៍ផ្ទៃក្នុងរបស់ក្រុមហ៊ុន”។

បច្ចុប្បន្នមានក្រុមហ៊ុនបរទេសជាច្រើន បានចាប់យកចំណែកទីផ្សារលំនៅដ្ឋាននៅកម្ពុជា ដោយសារផ្នែកលំនៅដ្ឋាននៅតែមានតម្រូវការខ្ពស់ និងមានផលចំណេញច្រើននៅក្នុងទីផ្សារនេះ។ បច្ចុប្បន្នមានក្រុមហ៊ុនកូរ៉េ BOOYOUNG Group ក្រុមហ៊ុនជប៉ុនARAKAWA, ក្រុមហ៊ុនGREED ក្រុមហ៊ុនMorganជាដើម សុទ្ឋតែបានចាប់ផ្តើមវិនិយោគលើបុរី លំនៅដ្ឋាននៅកម្ពុជា។

សេដ្ឋវិទូកម្ពុជា លោកបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ និងធ្វើការជិតស្និទ្ឋជាមួយក្រុមហ៊ុនជប៉ុនជាច្រើនបានមានប្រសាសន៍ថា ជប៉ុនបាននិងកំពុងក្រាលមូលដ្ឋាន ដើម្បីវិនិយោគរយៈពេលវែងនៅកម្ពុជារួចហើយ តាមរយៈគំរោងវិនិយោគជាច្រើនដូចជាមន្ទីរពេទ្យ ខុនដូ អាផាតម៉ិន ទីលានវាយកូនហ្គោល និងការហោះហើរត្រង់របស់ក្រុមហ៊ុនANA Airway បានធ្វើឲ្យអ្នកវិនិយោគជប៉ុនកាន់តែមានទំនុកចិត្តលើទីផ្សារកម្ពុជា។

លោកបន្តថា “ជប៉ុនមុនវិនិយោគនៅប្រទេសណាមួយ ពួកគេតែងតែវិនិយោគរយៈពេលវែង ប៉ុន្តែមុនពួកគេទៅវិនិយោគនៅប្រទេសណាមួយ ពួកគេបានសិក្សារយៈពេលយូរណាស់ មុនសម្រេចចិត្តចូលប្រទេសណាមួយ ហើយនៅពេលពួកគេចូលវិនិយោគ ពួកគេមិនងាយចាកចេញនោះទេ”។

ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូន លោកស៊ុន ចាន់ថុលបានមានប្រសាសន៍ថា ផ្លូវជាតិលេខ៣នឹងត្រូវបញ្ចប់ការស្ថាបនានាខែកញ្ញាខាងមុខនេះ ខណៈការស្ថាបនាពង្រីកផ្លូវនេះពីរាជធានីភ្នំពេញ ទៅកាន់ខេត្តកំពតសម្រេចបានប្រមាណជាង៨០ភាគរយរួចហើយ។

ផ្លូវជាតិលេខ៣ ត្រូវពង្រីកជាបួនគន្លងរថយន្តចាប់ពីរង្វង់មូលចោមចៅ រហូតដល់តំបន់បែកគូស (ចំណុចផ្លូវបំបែកកំពត កែប) និងចាប់ពីតំបន់បែកគូសដល់ខេត្តកំពត ត្រូវបានពង្រីកក្នុងទំហំ១២ម៉ែត្រ សម្រាប់រថយន្តទៅមក ដោយមិនមានសួនច្បារកណ្តាល ដូចពីតំបន់បែកគូស ចូលមកកាន់រាជធានីភ្នំពេញនោះទេ៕

មុនឆ្នាំ២០២២ កម្ពុជានឹងទទួលបានអគ្គិសនីអនុភាពរហូតដល់៤៥០មេហ្គាវ៉ាត់សម្រាប់ផ្គត់ផ្គង់នៅទូទាំងប្រទេស

ដោយ ៖ រ៉ាណេត
ភ្នំពេញ ៖ អនុវត្តទៅតាមផែនការមេ និងការកៀងគរឱ្យមានការចូលរួមវិនិយោគពីវិស័យឯកជនទៅលើវិស័យថាមពលនៅតាមបណ្តាខេត្តនានាទូទាំងប្រទេស នៅត្រឹមអំឡុងឆ្នាំ២០២២ខាងមុខនេះ កម្ពុជានឹងអាចមានលទ្ធភាពក្នុងការទទួលបានថាមពលអគ្គិសនីដែលមានអនុភាពសរុបមិនតិចជាង៤៥០មេហ្គាវ៉ាត់នោះទេសម្រាប់ផ្គត់ផ្គង់ការប្រើប្រាស់ និងចែកចាយទូទាំងប្រទេស។

រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា លោកកែវ រតនៈ បានប្រាប់ឱ្យដឹងនៅថ្ងៃទី១៩ ខែមីនា ឆ្នាំ២០២១នេះថា រដ្ឋាភិបាលកម្ពុជាបានប្ដេជ្ញាក្នុងការបង្កើនល្បាយថាមពលកកើតឡើងវិញ ជាថាមពលស្អាត ដែលផលិតចេញពីពន្លឺព្រះអាទិត្យឱ្យមានភាគរយកាន់តែច្រើន មានអនុភាពយ៉ាងតិច៤៥០មេហ្កាវ៉ាត់ មុនដាច់ឆ្នាំ២០២២ ដែលនេះគឺជាការឆ្លុះបញ្ចាំងឲ្យឃើញថា ផែនការអនាគតរបស់យើង គឺនឹងមានការដាក់ពង្រាយថាមពលស្អាតឲ្យបានកាន់តែច្រើនក្នុងប្រព័ន្ធបណ្តាញជាតិ។លោកបានបន្តថា ជាមួយគ្នានឹងការព្យាយាមពង្រីកវិសាលភាព និងសមត្ថភាពក្នុងការផលិតថាមពលអគ្គិសនីនេះ ជាលក្ខណៈសង្គម ក៏នឹងបានជួយបង្កើតការងាររាប់រយកន្លែងឲ្យបងប្អូនប្រជាពលរដ្ឋ មានលទ្ធភាពរកប្រាក់ចំណូលបានជាពិសេសក្នុងស្ថានភាពនៃជំងឺកូវីដ១៩ផងដែរ ហើយនេះគឺជាការចូលរួមចំណែកមួយក្នុងរយៈពេលចំពោះមុខហើយវែងឆ្ងាយ។ ជាក់ស្ដែងដូចជាស្ថានីយផលិតថាមពលដោយពន្លឺព្រះអាទិត្យកម្លាំង៦០មេហ្គាវ៉ាត់ស្ថិតនៅឃុំអន្លង់រុន ស្រុកថ្មគោល ខេត្តបាត់ដំបង ដែលដាក់ឱ្យដំណើរការដោយភ្ជាប់ទៅក្នុងបណ្តាញជាតិ ជាមួយនឹងអនុស្ថានីយតង់ស្យុងខ្ពស់ ២៣០/១១៥គីឡូវ៉ុល តាមរយៈខ្សែបញ្ជូនតង់ស្យុងខ្ពស់ ១១៥គីឡូវ៉ុល ប្រវែងប្រមាណ ២០គីឡូម៉ែត្រ តភ្ជាប់ពីស្ថានីយផលិតថាមពលនេះផ្ទាល់។
លោកបញ្ជាក់ថា “ស្ថានីយផលិតថាមពល ៦០មេហ្កាវ៉ាត់ថ្មីនេះ គឺជាផ្នែកមួយនៃផែនការក្នុងចំនួនសរុបប្រមាណ ៤៥០មេហ្កាវ៉ាត់ នៃការផលិតចេញពីពន្លឺព្រះអាទិត្យ ដែលជាថាមពលស្អាត ត្រូវតភ្ជាប់ទៅក្នុងបណ្តាញជាតិនៅក្នុងឆ្នាំ២០២២ ដែលមកដល់ពេលនេះបានដាក់ឲ្យដំណើការប្រមាណជាង ៣២០មេហ្គាវ៉ាត់ រួចហើយ”។

លោកបន្តថា “ថាមពលដើរដោយពន្លឺព្រឹះអាទិត្យ ៦០មេហ្កាវ៉ាត់ថ្មីនេះ មិនត្រឹមតែជួយផ្នែកផលិតថាមពលប៉ុណ្ណោះទេ គឺបានបញ្ជូនប្រភពផ្គត់ផ្គង់ទៅជិតតំបន់ប្រើប្រាស់ ដែលរួមមានស្រុកថ្មគោល ស្រុកបវេល និងបណ្តាទីប្រជុំជនជុំវិញផងដែរ ដែលអាចបង្កើននិរន្តរភាព និងគុណភាពនៃការផ្គត់ផ្គង់នឹងបានល្អជាងមុន ដែលបច្ចុប្បន្នកំពុងយកប្រភពពីកន្លែងឆ្ងាយ”៕