មន្ត្រីជំនាញខេត្តកំពង់ឆ្នាំងព្រមានប្រជាពលរដ្ឋប្រយ័ត្នទិញដីឡូតិ៍ដែលគ្មានលិខិតស្នាមត្រឹមត្រូវ

ដោយ ៖ រ៉ាណេត

កំពង់ឆ្នាំង ៖ ដោយមើលឃើញពីសកម្មភាពប្រាសចាកពីច្បាប់មួយចំនួនទៅលើការប្រកាសដាក់លក់ដីឡូតិ៍គ្មានច្បាប់ដែលកំពុងកើតមាននៅតាមតំបន់មួយចំនួនក្នុងខេត្តកំពង់ឆ្នាំង រដ្ឋបាលខេត្តកំពង់ឆ្នាំតាមរយៈមន្ទីររៀបចំដែនដីនគរូបនីយកម្ម សំណង់ និងសូរិយោដី សូមក្រើនរំលឹកដល់ប្រជាពលរដ្ឋដែលទិញគម្រោងដីឡូតិ៍ត្រូវពិនិត្យមើលរាល់ឯកសារដែលពាក់ព័ន្ធស្របច្បាប់ជាមុនជៀសវាងចាញ់បោកជនខិលខូច។

មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ឆ្នាំងនៅថ្ងៃទី២១ ខែមីនា ឆ្នាំ២០២១ម្សិលមិញនេះបាន ចេញសេចក្តីប្រកាសព័ត៌មានបន្ទាន់មួយច្បាប់បន្ទាប់ឃើញមានការបង្ហោះវីដេអូផ្សព្វផ្សាយតាមបណ្ដាញទំនាក់ទំនងសង្គមពីគម្រោងលក់ដីឡូតិ៍ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំងដែលមិនមានច្បាប់អនុញ្ញាតនៅឡើយ។

តាមរយៈសេចក្ដីប្រកាសដដែលនេះ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ឆ្នាំង សូមជម្រាបជូនសាធារណជនមេត្តាជ្រាបថា៖ ថ្មីៗនេះមានករណីបង្ហោះវីដេអូផ្សព្វផ្សាយតាមបណ្ដាញទំនាក់ទំនងសង្គមហ្វេសប៊ុកឈ្មោះ” តារាបញ្ញា អចនទ្រព្យ” ជាបន្តបន្ទាប់អំពីគម្រោងដីឡូតិ៍ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង តាមការពិនិត្យលើវីដេអូផ្សព្វផ្សាយនេះ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ឆ្នាំង សូមបញ្ជាក់ជូនថាៈ

-គំរោងដីឡូ ឬការអភិវឌ្ឍដីដែលកំពុងផ្សព្វផ្សាយសម្រាប់ធ្វើអាជីវកម្មនេះ ពុំមានសុំលិខិតអនុញ្ញាតត្រឹមត្រូវស្របតាមប្រកាសលេខ ០៨៧ ដ.ន.ស ប្រក/នក ចុះថ្ងៃទី១១ ខែឧសភា ឆ្នាំ២០១៨ របស់ក្រសួងរៀបចំដែនដី នគរូបនីយកម្ម និងសំណង់ នោះទេ។
-ទីតាំងដីឡូតិ៍ដែលបានផ្សព្វផ្សាយធ្វើអាជីវកម្មក្នុងបណ្ដាញទំនាក់ទំនងសង្គមខាងលើនេះពុំទាន់មានវិញ្ញាបនប័ត្រសម្គាល់អចលនវត្ថុ(ប័ណ្ណកម្មសិទ្ធិ)ទេ។
-ទីតាំងនេះស្ថិតក្នុងតំបន់ ២ នៃអាជ្ញាធរបឹងទន្លេសាប និងសារាចរណែនាំលេខ ០២ សរណន ចុះថ្ងៃទី២៧ ខែមីនា ឆ្នាំ២០១៣ របស់រាជរដ្ឋាភិបាល។
អាស្រ័យដូចបានជម្រាបជូនខាងលើ សូមសាធារណជន អាជ្ញាធរមូលដ្ឋានពាក់ព័ន្ធមេត្តាជ្រាបជាព័ត៌មានកុំឱ្យមានការភាន់ច្រឡំ និងប៉ះពាល់ដល់ផលប្រយោជន៍ ឬអាចមានបញ្ហាទំនាស់ផ្សេងៗកើតឡើងដោយសារតែការផ្ដល់ព័ត៌មានមិនបានត្រឹមត្រូវច្បាស់លាស់។

មន្ត្រីមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តកំពង់ឆ្នាំង បានលើកឡើងថា សកម្មភាពអភិវឌ្ឍន៍គម្រោងដីឡូតិ៍នៅក្នុងខេត្តកំពង់បច្ចុប្បន្នកំពុងមានភាពផុសផុល ដែលក្នុងនោះមានគម្រោងខ្លះអនុវត្តស្របតាមច្បាប់កំណត់ត្រឹមត្រូវ ប៉ុន្តែក៏មានឈ្មួញខិលខូចខ្លះប្រកាសលក់ដីខ្យល់ដែលមិនមែនជាកម្មសិទ្ធិរបស់ខ្លួននោះឡើយ។ ដូច្នេះ ដើម្បីបង្ការនូវភាពខាតបង់ទ្រព្យសម្បត្តិ ឬផលប្រយោជន៍ សម្រាប់គម្រោងដីឡូតិ៍គឺត្រូវស្នើសុំលិខិតអនុញ្ញាធ្វើអាជីវកម្មឱ្យបានត្រឹមត្រូវ និងគ្រប់គ្រាន់ ដោយឡែកសម្រាប់អ្នកទិញក៏ត្រូវពិនិត្យទៅលើឯកសារពាក់ព័ន្ធនឹងផ្លូវច្បាប់នៃគម្រោងឱ្យបានរួចរាល់មុនពេលសម្រេចចិត្តទិញ៕

គម្រោងNaga3ដែលគ្រោងចាយទុន៣,៥ពាន់លានដុល្លារនឹងក្លាយអាគារខ្ពស់ជាងគេនៅកម្ពុជា

ដោយៈ ប៊ី

ភ្នំពេញៈ ក្រុមអ្នកអភិវឌ្ឍន៍អះអាងថា គម្រោងNaga3 ដែលគ្រោងចំណាយទុនវិនិយោគប្រាក់៣,៥ពាន់លានដុល្លារនឹងក្លាយអាគារខ្ពស់ជាងគេនៅកម្ពុជា ខណៈការដ្ឋានសាងសង់មជ្ឈមណ្ឌលកម្សាន្តចំរុះដ៏ធំនេះបានចាប់ផ្តើមជាផ្លូវការហើយ។

យោងតាមការសេចក្តីប្រកាសព័ត៌មានរបស់ក្រុមហ៊ុនអភិវឌ្ឍន៍គម្រោងនេះកាលពីថ្មីៗនេះបានឱ្យដឹងថា ក្រុមកម្មករ បានចាប់ផ្តើមបុកគ្រឹះ សម្រាប់គម្រោងដ៏ធំមួយនេះនៅក្នុងខែមករា។ ផ្អែកលើការគម្រោងរចនា លក្ខណៈពិសេសរបស់ណាហ្គា៣ នឹងជាប៉មសណ្ឋាគារកម្ពស់៧៥ជាន់។

ក្រុមអ្នកអភិវឌ្ឍគម្រោងនេះបានបញ្ជាក់ថា “គម្រោងនេះ នឹងក្លាយជាអាគារខ្ពស់ជាងគេ នៅកម្ពុជា នៅពេលបញ្ចប់ការសាងសង់”។
គម្រោង ដែលមានទំហំគិតជាទឹកប្រាក់ចំនួន៣,៥ពាន់លានដុល្លារ ដែលស្ថិតនៅសង្កាត់ទន្លេបាសាក់ រាជធានីភ្នំពេញ ក៏នឹងរួមបញ្ចូលទាំងប្លុកអគារសណ្ឋាគារកម្ពស់ ៥២ ជាន់ ចំនួនពីរផងដែរ។

នៅក្នុងបរិវេណនោះ នឹងមានប្លុកវេទិកាពហុមុខងារ ចំនួន ១៧ ជាន់ (ផលិតផលរចនាបថជីវិត សួនឧទ្យានបច្ចេកវិទ្យាខ្ពស់ ការកម្សាន្ត បន្ទប់ប្រជុំ ការលើកទឹកចិត្ត មជ្ឈមណ្ឌលសន្និសីទ និងកន្លែងតាំងពិព័រណ៍នានា (MICE) ជាដើម)។ ជាមួយគ្នានេះដែរ ក៏មានជាន់ក្រោមដី ចំនួន ៤ជាន់ សម្រាប់ចំណតរថយន្ត និងសេវាគាំទ្រផ្សេងៗទៀតផងដែរ។

ណាហ្គា៣ នឹងបន្ថែមបន្ទប់សណ្ឋាគារ និងបន្ទប់ប្រណីតជិត ៣.០០០ ទៅលើមជ្ឈមណ្ឌលណាហ្គាវើលដ៍ ដែលមានស្រាប់ផងដែរ។ ផ្ទៃដីសរុប សម្រាប់គម្រោង មានចំនួន ៥០០ ០០០ ម៉ែត្រការ៉េ។ អ្នកអភិវឌ្ឍន៍ អ្នកម៉ៅការ និងអ្នករចនា សម្រាប់គម្រោងនេះ នឹងសាងសង់ ស្របតាមស្តង់ដារអន្តរជាតិ។

ការរចនាកំពុងត្រូវបានគ្រប់គ្រងដោយក្រុមហ៊ុនអន្ដរជាតិ ដែលទទួលបានពានរង្វាន់ចំនួនពីរ គឺក្រុមហ៊ុន Steelman & Partners និងក្រុមហ៊ុន Skidmore, Ownings & Merrill LLP (SOM) ។

សេចក្តីថ្លែងការណ៍មួយរបស់ក្រុមហ៊ុន SOM បានឲ្យដឹងថា “ណាហ្គា ៣ នឹងក្លាយជាទីតាំងសម្គាល់ ដែលលិចធ្លោរបំផុត សម្រាប់ទីក្រុងភ្នំពេញ នាពេលអនាគត។ ជាមួយនឹងចំណុចខ្ពស់បំផុតនៃប៉មប៉ែកខាងជើង អាចឲ្យឃើញនូវទិដ្ឋភាព ដែលគ្មានគូប្រៀបនៃទីក្រុងភ្នំពេញ និងតំបន់ជុំវិញនេះ”៕

ក្រុមហ៊ុនលំដាប់យក្សរបស់កាណាដាទិញយកក្រុមហ៊ុនផ្លូវដែកសហរដ្ឋអាមេរិកក្នុងតម្លៃ ២៥ពាន់លានដុល្លារ

ដោយៈ ឧត្តម

កាណាដាៈ ក្រុមហ៊ុនផ្លូវដែកលំដាប់យក្សប្រទេសកាណាដា ឈ្មោះ Canadian Pacific Railway Ltd បានប្រកាសកាលពីថ្ងៃអាទិត្យ ទី២១ មីនាថា ខ្លួនបានព្រមព្រៀងទិញយកក្រុមហ៊ុនផ្លូវដែករបស់សហរដ្ឋអាមេរិក Kansas City Southern ក្នុងតម្លៃរហូតដល់ទៅ២៥ពាន់លានដុល្លារ។

ក្នុងកិច្ចព្រមព្រៀងទិញលក់ នឹងទូទាត់ជាសាច់ប្រាក់ និងភាគហ៊ុន ដើម្បីបង្កើតបណ្តាញផ្លូវដែកដំបូងបង្អស់ ដែលភ្ជាប់សហរដ្ឋអាមេរិក ប្រទេសម៉ិកស៊ិក និងប្រទេសកាណាដា។ នេះបើយោងតាមការចុះផ្សាយរបស់សារព័ត៌មាន CNA។

ក្រុមហ៊ុនទាំង២បានចេញសេចក្តីថ្លែងការណ៍រួមគ្នាថា ម្ចាស់ភាគហ៊ុននៃក្រុមហ៊ុន Canadian Pacific Railway Ltd នឹងទទួលបានភាគហ៊ុនដែលមានតម្លៃ ០,៤៨៩ ក្នុងមួយភាគហ៊ុននៅក្នុងក្រុមហ៊ុន Canadian Pacific Railway Ltd និងសាច់ប្រាក់៩០ដុល្លារ សម្រាប់ភាគហ៊ុននីមួយៗ ដែលខ្លួនកាន់កាប់នៅក្នុងក្រុមហ៊ុនដដែលនេះ។

កិច្ចព្រមព្រៀងនេះ ធ្វើឡើងចំពេលមានការរំពឹងទុកថា ពាណិជ្ជកម្មរវាងសហរដ្ឋអាមេរិក និងប្រទេសម៉ិកស៊ិក នឹងមានសន្ទុះកើនឡើង ក្រោយលោកចូ បៃឌិន ឡើងកាន់តំណែងជាប្រធានាធិបតីសហរដ្ឋអាមេរិក ជំនួសលោក ដូណាល់ ត្រាំ។

ក្រុមប្រឹក្សាភិបាលនៃក្រុមហ៊ុន Kansas City Southern បានអនុម័តការដេញថ្លៃនេះរួចហើយ ខណៈក្រុមហ៊ុន២ក៏បានជូនដំណឹងជាផ្លូវការ ដល់ក្រុមប្រឹក្សាដឹកជញ្ជូន (STB) នៃរដ្ឋាភិបាលសហរដ្ឋអាមេរិក រួចហើយដែរ ដែលរង់ចាំតែការអនុម័តរបស់ក្រុមប្រឹក្សាដឹកជញ្ជូនលើកិច្ចព្រមព្រៀងនេះប៉ុណ្ណោះ។

ក្រុមហ៊ុន Canadian Pacific Railway Ltd គឺជាក្រុមហ៊ុនប្រតិបត្តិករផ្លូវដែកធំបំផុតទី២ របស់ប្រទេសកាណាដា ចំណែកឯក្រុមហ៊ុនធំបំផុតទី១ គឺក្រុមហ៊ុនផ្លូវ Canadian National Railway Co Ltd ដែលមានតម្លៃទីផ្សាររហូតដល់ទៅ ៥០,៦ ពាន់លានដុល្លារ។

ក្រុមហ៊ុននេះកាន់កាប់ និងធ្វើប្រតិបត្តិការផ្លូវដែកដឹកទំនិញឆ្លងទ្វីប ក្នុងប្រទេសកាណាដា និងសហរដ្ឋអាមេរិក។ ការដឹកជញ្ជូនទំនិញគ្រាប់ធញ្ញជាតិ រកចំណូលបានរហូតដល់ទៅប្រមាណ២៤% នៃប្រាក់ចំណូលដឹកទំនិញសរុបរបស់ក្រុមហ៊ុននេះ កាលពីឆ្នាំ២០២។

ក្រុមហ៊ុន Kansas City Southern មានប្រតិបត្តិការផ្លូវដែកទាំងក្នុងស្រុក និងអន្តរជាតិនៅទ្វីបអាមេរិកខាងជើង ដោយផ្តោតលើច្រករបៀងដឹកទំនិញភាគខាងជើង និងភាគខាងត្បូង ភ្ជាប់ទីផ្សារពាណិជ្ជកម្ម និងឧស្សាហកម្មនៅកណ្តាលសហរដ្ឋអាមេរិក ជាមួយទីក្រុងឧស្សាហកម្មនានាក្នុងប្រទេសម៉ិកស៊ិក។

ការប៉ុនប៉ងលើកចុងក្រោយនេះ របស់ក្រុមហ៊ុន Canadian Pacific Railway Ltd ដើម្បីពង្រីកអាជីវកម្មរបស់ខ្លួននៅអាមេរិក ធ្វើឡើងក្រោយខ្លួនទម្លាក់ចោលការដេញថ្លៃយកក្រុមហ៊ុនផ្លូវដែក សហរដ្ឋអាមេរិក Norfolk Southern Corp ក្នុងតម្លៃ ២៨,៤ ពាន់លានដុល្លារ នៅខែមេសា ឆ្នាំ២០១៦ ។

ការចរចាច្របាច់បញ្ចូលគ្នា របស់ក្រុមហ៊ុន Canadian Pacific Railway Ltd ជាមួយក្រុមហ៊ុនផ្លូវដែកសហរដ្ឋអាមេរិក CSX Corp ដែលកាន់កាប់បណ្ដាញផ្លូវដែកមួយភាគធំនៅសហរដ្ឋអាមេរិក ភាគខាងកើតបានបរាជ័យក្នុងឆ្នាំ២០១៤ ។

ការដេញថ្លៃរបស់ក្រុមហ៊ុនផ្លូវដែក Canadian National Railway Co ដើម្បីទិញយកក្រុមហ៊ុនផ្លូវដែកសហរដ្ឋអាមេរិក Burlington Northern Santa Fe របស់កំពូលមហាសេដ្ឋី Warren Buffett ក៏ត្រូវបានអាជ្ញាធរសហរដ្ឋអាមេរិក រារាំងផងដែរក្នុងឆ្នាំ១៩៩៩ និងឆ្នាំ២០០០ ៕

សេដ្ឋវិទូៈ វិស័យសំណង់ និងអចលនទ្រព្យនឹងរួមចំណែកស្តារសេដ្ឋកិច្ចកម្ពុជាឱ្យងើបឡើងវិញបានឆាប់រហ័ស

ដោយៈ ម៉ាណេត

ភ្នំពេញៈ វិស័យសំណង់ និងអចលនទ្រព្យ នឹងរួមចំណែកស្តារសេដ្ឋកិច្ចកម្ពុជា ឱ្យងើបឡើងវិញបានឆាប់រហ័ស បន្ទាប់ពីវិបត្តិកូវីដ១៩ ខណៈក្នុងមួយឆ្នាំៗ វិស័យនេះបានស្រូបទាញទុនវិនិយោគរាប់ពាន់លានដុល្លារ និងបង្កើតការងាររាប់ពាន់កន្លែងដល់ប្រជាជន។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានថ្លែងប្រាប់កាលចុងសប្តាហ៍កន្លងមកនេះថា វិស័យសំណង់និងអចលនទ្រព្យ រួមជាមួយនឹងវិស័យសំខាន់ៗជាច្រើន នឹងរួមចំណែកស្តារសេដ្ឋកិច្ចកម្ពុជា ឱ្យងើបឡើងវិញបានឆាប់រហ័ស។

លោកបានឱ្យដឹងទៀតថា ជាមួយគ្នានេះដែរ វិស័យទេសចរណ៍នៅតែបន្តរងផលប៉ះពាល់ខ្លាំងជាងគេ ដែលមិនទាន់អាចចូលរួមចំណែក ជួយដល់ការជំរុញកំណើនសេដ្ឋកិច្ច ប៉ុន្តែវិស័យដែលយើងរំពឹងទុកថា នឹងជួយដល់កំណើនសេដ្ឋកិច្ចកម្ពុជា រួមមាន វិស័យសំណង់និងអចលនទ្រព្យ ព្រោះថាវិស័យទាំងអស់នេះ មិនសូវជារងផលប៉ះពាល់ពីវិបត្តិនេះទេ។

ទាក់ទងនឹងការទម្លាក់កញ្ចប់ថវិកា ៨០០លានដុល្លារ ដើម្បីស្តារសេដ្ឋកិច្ចឡើងវិញ លោកបណ្ឌិតបានថ្លែងថា កញ្ចប់ថវិកាសង្គ្រោះសេដ្ឋកិច្ចនេះ គឺផ្នែកមួយដែលនឹងជំរុញកំណើនសេដ្ឋកិច្ចបន្ថែម ប៉ុន្តែត្រូវផ្តោតលើការជំរុញវិស័យអទិភាពដូចជា វិស័យសំណង់និងអចលនទ្រព្យ វិស័យឧស្សាហកម្ម និងវិស័យកសិកម្មជាដើម។

ប្រទេសកម្ពុជានៅតែជាទីកន្លែង ដែលស្រូបទាញការវិនិយោគច្រើន ក្នុងវិស័យសំណង់ ដោយទុនវិនិយោគប្រមាណ ៧៧០០លានដុល្លារ ត្រូវបានអនុម័តដោយក្រសួងរៀបចំដែនដីកាលពីឆ្នាំមុន។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា ក្នុងឆ្នាំ២០២០កន្លងទៅ កម្ពុជាទទួលបានគម្រោងសាងសង់ សំណង់ទូទាំងប្រទេសចំនួន៤.៨៤១គម្រោង មានផ្ទៃក្រឡាកម្រាលសំណង់សរុប ចំនួនជាង២៩លានម៉ែត្រក្រឡា និងមានតម្លៃប៉ាន់ស្មាន៧,៧៥ពាន់លានដុល្លារអាមេរិក ថយចុះប្រមាណ៣២,២១ភាគរយ បើធៀបនឹងឆ្នាំ២០១៩ ។

លោកវង្សី វិស្សុត រដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានថ្លែងកាលពីដើមឆ្នាំនេះថា វិស័យសំណង់ និងអចលនទ្រព្យត្រូវបានចាត់ទុកជា ចន្ទល់ដ៏រឹងមាំរបស់កម្ពុជា ក្នុងការគាំទ្រសេដ្ឋកិច្ច ក្នុងអំឡុងពេលនៃការធ្លាក់ចុះដោយសារតែវិបត្តិកូវីដ១៩ ។

លោកបានថ្លែងថា “ខ្ញុំគិតថាមកដល់ពេលនេះ វិស័យអចលនទ្រព្យ និងវិស័យសំណង់ ជាចន្ទល់សេដ្ឋកិច្ចមួយ ដែលមានភាពរឹងមាំគួរសម ដែលធ្វើឲ្យវិស័យសេដ្ឋកិច្ចកម្ពុជាធ្លាក់ចុះយឺត” ។ លោកបន្ថែមថា “សេដ្ឋកិច្ចកម្ពុជាអាចធ្លាក់ជាងនេះ ប៉ុន្ដែជាក់ស្ដែងធ្លាក់ចុះត្រឹម-៣.១ភាគរយប៉ុណ្ណោះ។ ចំពោះវិស័យសំណង់ធ្លាក់ចុះពី-១៣ភាគរយ មកត្រឹម-២.៤៥ភាគរយ ហើយអចនលទ្រព្យងើបឡើងវិញពី-៥ភាគរយ មកត្រឹម-៤ភាគរយ” ។

លោកបានបន្ដថា “ជាគោលយោបាយត្រូវថែទាំវិស័យនេះ ដោយសារតែវិស័យទាំង២នេះ ជាចន្ទល់សេដ្ឋកិច្ចមួយនៅពេលមានវិបត្តិ។ រដ្ឋក៏មានគោលនយោបាយមិនយកពន្ធ ចំពោះអចលនទ្រព្យក្រោម៧ម៉ឺនដុល្លារ ដូច្នេះការលក់ដូរអចលនទ្រព្យ តម្លៃក្រោម៧ម៉ឺនដុល្លារកើនឡើង ចំណែកឯវិស័យខុនដូ និងផ្ទះមានតម្លៃថ្លៃធ្លាក់ចុះ” ៕

ការផ្ដល់នូវការចាក់វ៉ាក់សាំងដោយឥតគិតថ្លៃរបស់រដ្ឋាភិបាល ជាមូលដ្ឋានគ្រឹះសំខាន់ធ្វើឱ្យសកម្មភាពសេដ្ឋកិច្ចឱ្យងើបឡើងវិញ

ដោយៈ សាវុធ

ភ្នំពេញៈ អ្នកជំនាញសេដ្ឋកិច្ចលើកឡើងថា ការផ្ដល់នូវការចាក់វ៉ាក់សាំង ដោយឥតគិតថ្លៃរបស់រដ្ឋាភិបាលកម្ពុជា មានសារៈសំខាន់ ដើម្បីបង្កើតឲ្យមានទំនុកចិត្ដដល់បុគ្គលម្នាក់ៗ ក្នុងការទាក់ទាញវិនិយោគ និងស្ដារសេដ្ឋកិច្ចឡើងវិញ បន្ទាប់ពីរដ្ឋាភិបាលប្រកាសផ្ដល់ការចាក់វ៉ាក់សាំង ដោយឥតគិតថ្លៃជូនដល់ប្រជាជជន។

លោកបណ្ឌិតឆេង គីមឡុង នាយកមជ្ឈមណ្ឌលនវានុវត្តន៍ ផ្នែកអភិបាលកិច្ច និងប្រជាធិបតេយ្យ របស់វិទ្យាស្ថានចក្ខុវិស័យអាស៊ី បានបានថ្លែងកាលពីថ្មីៗនេះថា ការផ្ដល់នេះពិតជាត្រឹមត្រូវ និងមានសារៈសំខាន់ ក្នុងការបង្កើតឲ្យមានទំនុកចិត្ដ សម្រាប់បុគ្គលម្នាក់ៗ ក្នុងការទាក់ទាញវិនិយោគ ដើម្បីស្ដារសេដ្ឋកិច្ចឡើងវិញ។

លោកបានថែ្លងថា “ការចាក់វ៉ាក់សាំង គឺជាការទប់ស្កាត់ នូវការរីករាលដាលជំងឺឆ្លងកូវីដ-១៩ ដែលមានសារៈសំខាន់ ក្នុងការផ្ដល់នូវប្រព័ន្ធការពាររាងកាយ ដល់ប្រជាជនកម្ពុជា និងជនបរទេស ដែលរស់នៅក្នុងប្រទេសកម្ពុជា” ។

តាមបទអន្ដរាគមន៍របស់ប្រមុខដឹកនាំ ក៏ដូចជាក្រសួងពាក់ព័ន្ធ ជនបរទេសរស់នៅកម្ពុជា ក៏អាចទទួលបាននូវវ៉ាក់សាំងដែរ ដូច្នេះ បញ្ជាក់អំពីការចូលរួមរបស់រដ្ឋាភិបាល ក្នុងការទប់ស្កាត់ជំងឺកូវីដ-១៩ មិនគ្រាន់តែប្រជាជនកម្ពុជាប៉ុណ្ណោះទេ ថែមទាំងជួយការពារ ដល់ជនបរទេសនៅកម្ពុជាផងដែរ។

លោកបណ្ឌិតឆេង គីមឡុងបានថ្លែងថា “វ៉ាក់សាំង គឺជាការធានាឲ្យបាននូវការកាត់បន្ថយការឆ្លងរីករាលដាលនៃជំងឺកូវីដ-១៩ ទាំងដល់សហគមន៍ ទាំងដល់បុគ្គលម្នាក់ៗ ក្នុងន័យការពារ និងរក្សានូវសន្ដិសុខ សុខភាពសាធារណៈរបស់ប្រជាជន” ។

លោកបណ្ឌិតបានបន្តថា តាមរយៈការផ្ដល់នូវវ៉ាក់សាំង ដល់ប្រជាជន គឺបង្កើតឲ្យមានទំនុកចិត្ដ សម្រាប់បុគ្គលម្នាក់ៗ ទំនុកចិត្ដរបស់ប្រជាជនទូទៅ។ ទំនុកចិត្ដនេះ មានសារៈសំខាន់ណាស់ ព្រោះថានៅពេលដែលប្រជាជន មានទំនុកចិត្ដ គាត់អាចមានទំនុកចិត្ដ ក្នុងការប្រកបមុខរបរអាជីវកម្មឡើងវិញ។

លោកបានឱ្យដឹងថា ក្នុងដំណាក់កាលរាជរដ្ឋាភិបាល អាចគ្រប់គ្រង នៃការរីករាលដាលជំងឺកូវីដ-១៩បាន ប្រទេសជាតិ អាចបើកនូវសេដ្ឋកិច្ចជាតិឡើងវិញ ដែលស្ថិតនៅក្នុងកម្រិតគន្លងថ្មី។

លោកឆេង គឹមឡុងបានថ្លែងថា ពេលនោះមិនគ្រាន់តែទំនុកចិត្ដ របស់ប្រជាជននោះទេ វាផ្ដល់ទំនុកចិត្ដរបស់វិស័យឯកជនទូទៅ ទំនុកចិត្ដរបស់ស្ថាប័នសាធារណៈ ដែលបង្កនូវមូលដ្ឋាន គ្រឹះសំខាន់ ដល់សកម្មភាពសង្គម សកម្មភាពវប្បធម៌ សកម្មភាពសេដ្ឋកិច្ច-ពាណិជ្ជកម្មទូទៅឲ្យងើបឡើងវិញ។

ការងើបឡើងវិញ ដែលជំរុញដោយទំនុកចិត្ដរបស់ប្រជាជន ទំនុកចិត្ដរបស់វិស័យឯកជន និងស្ថាប័នរដ្ឋ គឺជាការធានា ឲ្យមានសកម្មភាព ពាណិជ្ជកម្មសេដ្ឋកិច្ច ងើបឡើងវិញ ដែលនេះជាចលករ ក្នុងការជំរុញនូវការងើបឡើងវិញ នៃសេដ្ឋកិច្ច។

លោកបណ្ឌិតឆេង គីមឡុងបានឱ្យដឹងថា នៅពេលដែលរាជរដ្ឋាភិបាលកម្ពុជា ផ្ដល់វ៉ាក់សាំងជូនដល់ប្រជាជន បានប្រមាណ៧០ភាគរយ ក្នុងចំណោមនៃប្រជាជនសរុបនោះ ប្រព័ន្ធការពារ ជាសហគមន៍របស់កម្ពុជា នឹងសម្រេចបាន ហើយការសម្រេចបាននេះ នឹងកាត់បន្ថយបានច្រើន នូវលទ្ធភាពការឆ្លងរីករាលដាលជំងឺកូវីដ-១៩ ។

លោករំពឹងថា កម្ពុជានឹងសម្រេចបាននៅដំណាច់ឆ្នាំ២០២២ ក្នុងការចាក់វ៉ាក់សាំង ជូនប្រជាជន។ នៅពេលដែលកម្ពុជា ចាក់វ៉ាក់សាំងជូនប្រជាពលរដ្ឋ បានច្រើនហើយនោះ លោកគិតថា ទាំងទេសចរណ៍អន្ដរជាតិ ទាំងទេសចរណ៍ក្នុងស្រុក នឹងឈានដល់ចំណុចមួយ មានសន្ទុះកើនឡើង ទាំងលំហូចូលធុរកិច្ចអ្នកវិនិយោគិន ពីក្រៅស្រុក ក៏នឹងអាចធ្វើដំណើរមកវិញផងដែរ។

ការផ្ដល់វ៉ាក់សាំង នៅព្រមពេលគ្នា លើប្រទេសជុំវិញពិភពលោក នឹងជាចំណុចល្អមួយ សម្រាប់ការស្ដារសេដ្ឋកិច្ច នៅក្នុងពិភពលោក ដែលសេដ្ឋកិច្ចពិភពលោក នៅក្នុងតំបន់ ក៏នឹងជួយសេដ្ឋកិច្ចក្នុងស្រុកដែរ។

លោកឆេង គឹមឡុងបានបន្តថា “ការផ្ដល់វ៉ាក់សាំងក្នុងស្រុក និងការផ្ដល់វ៉ាក់សាំង របស់រដ្ឋាភិបាលប្រទេសផ្សេងៗ ដល់ប្រជាជននៅក្នុងប្រទេសវៀងៗខ្លួន គឺជាមូលដ្ឋានគ្រឹះ សម្រាប់ធានានូវសន្ដិសុខ ប្រជាជន សន្ដិសុខសាធារណៈ និងជំរុញការស្ដារ នៃការងើបឡើងវិញនៃសេដ្ឋកិច្ច និងពាណិជ្ជកម្ម នៅក្នុងពិភពលោក” ៕

តើលំនៅដ្ឋានខ្មែរសាងសង់ឡើងត្រូវប្រកាន់គោលការណ៍អ្វីខ្លះ?

ដោយៈ គង់ សូរិយា

ភ្នំពេញៈ ការសាងសង់លំនៅដ្ឋានរបស់ខ្មែរ ពិតជាមានក្បូនខ្នាតត្រឹមត្រូវ និងច្បាស់លាស់ ព្រោះការសាងសង់មិនត្រឹមត្រូវតាមក្បូនខ្នាត មិនត្រឹមតែគ្មានសោភ័ណភាពនោះទេ តែក៏អាចនាំគ្រោះដល់ម្ចាស់ផ្ទះផងដែរ។

លោកសាស្ត្រាចារ្យទួស សាភឿន អគ្គលេខាធិការរងនៃគណស្ថាបត្យករកម្ពុជា និងជាស្ថាបត្យករអាស៊ានបានមានប្រសាសន៍ឲ្យដឹងថា ពីដើមដូនតាខ្មែរយើងសង់ផ្ទះ មានតំណមបីសំខាន់ ការសង់ផ្ទះបែរទិសផ្ទះទៅតាមរាសីម្ចាស់ផ្ទះ ការប្រើប្រាស់គ្រឿងឈើ យកមកសង់ អោយត្រូវរៀបតាមក្បួនខ្នាត ការៀបប្លង់បាតអោយត្រូវកន្លែងទីតាំង តំណម។

លោកបន្តថា ក្រៅពីតំណមតាមក្បួន ជាងក៏ត្រូវសិក្សាផ្ចិតផ្ចង់យកចិត្តទុកដាក់បន្ថែមទៀត ទាំងសោភណ៌ភាពផ្ទះ រួមទាំងការស្គាល់ និងចេះជ្រើសយកសម្ភារះសំណង់ណា មានគុណភាព ជាពិសេសត្រូវដឹងពីជំងឺរបស់ផ្ទះ ជៀសវាងការជួសជុសរំខានជាញឹកញាប់។

ជាមួយគ្នានេះ លោកក៏បានចែករំលែកទាក់ទងនឹងទិសផ្ទះផងដែរ ដែលជាទិសផ្តល់សិរីល្អដល់ការរស់នៅផងដែរ។

លោកសាស្ត្រាចារ្យទួស សាភឿន បានបន្តថា ទិសដែលខ្មែរនិយមជាងគេគឺទិសខាងកើត ទិសខាងត្បូង និងទិសខាងជើង។ ចំណែកទិសខាងលិច គេមិនសូវនិយមនោះទេ ដោយសារខ្មែរមានជំនឿថា ជា ”ទិសលិច” ឬជាទិសថ្ងៃលិច ប៉ុន្តែទិសខាងកើតជាទិសព្រះអាទិត្យរះ ដែលតែងតែទទួលពន្លឺព្រះអាទិត្យស្ទើរពេញមួយព្រឹក ដែលអ្នកមានជំនឿគិតថាវាជាទិសនៃសិរីល្អ។

រីឯទិសខាងត្បូង និងខាងជើងក៏ជាទិសល្អ ដែផ្តល់ឲ្យការរស់នៅមានសិរីល្អ និងត្រូវបានប្រជាពលរដ្ឋខ្មែរ និយមជ្រើសរើសសម្រាប់ការរស់នៅផងដែរ៕

ការសិក្សាថ្មីៈ គម្រោងវិនិយោគធំៗរបស់ចិនបានរួមចំណែកដល់ការអភិវឌ្ឍសេដ្ឋកិច្ចនៅកម្ពុជា

ដោយៈ ប៊ី

ភ្នំពេញៈ វិទ្យាស្ថានចក្ខុវិស័យអាស៊ី (AVI) បានសិក្សាស្រាវជ្រាវលើគម្រោងវិនិយោគរបសក្រុមហ៊ុនចិនធំៗនៅកម្ពុជា ហើយបានរកឃើញថា គម្រោងទាំងនេះបាននិងកំពុងចូលរួមចំណែក ដល់ការអភិវឌ្ឍប្រកបដោយចីរភាពនៃសេដ្ឋកិច្ចជាតិ និងសង្គមនៅកម្ពុជា។

យោងតាមលោកបណ្ឌិត កែវ ពិសិដ្ឋ ប្រធានមជ្ឈមណ្ឌលការសិក្សាការអភិវឌ្ឍប្រកបដោយចីរភាព នៃវិទ្យាស្ថានចក្ខុវិស័យអាស៊ី ក្នុងកិច្ចសម្ភាសន៍តាមវីដេអូ ជាមួយអ្នកសារព័ត៌មានកាលពីថ្មីៗនេះបានឱ្យដឹងថា វិទ្យាស្ថានចក្ខុវិស័យអាស៊ី បានសិក្សាស្រាវជ្រាវទៅលើក្រុមហ៊ុនចិន និងក្រុមហ៊ុនសហការវិនិយោករួមគ្នារវាងចិន និងកម្ពុជាធំៗនៅកម្ពុជា មានដូចជា ក្រុមហ៊ុនសាងសង់ផ្លូវ ស្ពាន ធនាគារ ក្រុមហ៊ុនទំនិញរួចពន្ធ វារីអគ្គិសនី ដែលសុទ្ធសឹងជាក្រុមហ៊ុន ដែលនាំមុខក្នុងវិស័យវិនិយោគនៅកម្ពុជា។

របាយការណ៍ស្រាវជ្រាវដែលចំណងជើងថា “អភិវឌ្ឍន៍ប្រកបដោយចីរភាពនៃសហគ្រាសចិននៅកម្ពុជា” បានបង្ហាញថា ការវិនិយោគរបស់ក្រុមហ៊ុនចិន បានចូលរួមចំណែកក្នុងការអភិវឌ្ឍនៅកម្ពុជា តាមរយៈការលើកកម្ពស់ជីវភាព ការលើកស្ទួយសេដ្ឋកិច្ច កិច្ចការពារបរិស្ថាន ការងារសង្គម និងកិច្ចការមនុស្សធម៌ដែលបានជួយកម្ពុជាកន្លងមកនេះ។

លោកបណ្ឌិតកែវ ពិសិដ្ឋ បានបន្តថា បានការសិក្សាស្រាវជ្រាវរបស់វិទ្យាស្ថានចក្ខុវិស័យអាស៊ី បានចាប់ផ្ដើមពីសីហា ដល់ខែតុលា បានសិក្សាទៅលើក្រុមហ៊ុនចិន និងក្រុមហ៊ុនសហការវិនិយោករួមគ្នារវាងចិន និងកម្ពុជាចំនួន៦ រួមមានក្រុមហ៊ុនវារីអគ្គីសនីសេសានក្រោម២ ក្រុមហ៊ុន China duty-free group ក្រុមហ៊ុន China Gezhouba Group Corporation, ធនាគារចិន Bank of China Phnom Penh Branch ក្រុមហ៊ុន China road and bridge corporation និងក្រុមហ៊ុន Yunann construction Investment Holding Group។ ក្នុងនោះក្រុមហ៊ុនវារីអគ្គីសនីសេសានក្រោម២ មាន China Huaneng Groupជាម្ចាស់ភាគហ៊ុនធំ និងក្រុមហ៊ុនរ៉ូយ៉ាល់គ្រុបជាម្ចាស់ភាគហ៊ុនធំទីពីរ។

លោកបណ្ឌិតបានឱ្យដឹងទៀតថា ប្រទេសចិន គឺជាប្រទេសមួយដែលមានការវិនិយោគច្រើនជាងគេនៅកម្ពុជា បើគិតពីឆ្នាំ១៩៩៤ ដល់ឆ្នាំ២០១៩ តួលេខទំហំវិនិយោគរបស់ក្រុមហ៊ុន ចិនមានប្រមាណ១ភាគ៥ នៃចំនួនទឹកប្រាក់វិនិយោគសរុបនៅកម្ពុជា។ បន្ទាប់ពីប្រទេសចិន គីក្រុមហ៊ុនវិនិយោគ ដែលមកពីសាធារណៈរដ្ឋកូរ៉េ អង់គ្លេស ម៉ាឡេ ជប៉ុន និងវៀតណាម។

បច្ចុប្បន្នរដ្ឋាភិបាលចិន មិនត្រឹមតែជាដៃគូផ្តល់ជំនួយឥតសំំណង និងកម្ចីសប្បទានធំជាងគេនៅកម្ពុជាប៉ុណ្ណោះទេ ប៉ុន្តែចិនក៏ជាអ្នកវិនិយោគធំជាងគេនៅកម្ពុជា ដូចជាវិស័យឧស្សាហកម្មវាយណភ័ណ្ឌកាត់ដេរ និងស្បែកជើង វិស័ងសំណង់និងអចលនទ្រព្យ វិស័យគមនាគមន៍ វិស័យថាមពលអគ្គិសនីជាដើម។

លោកយិន លាងគង់ សហស្ថាបនិក និងជាអគ្គនាយកនៃគេហទំព័រ Propertyareaបានមានប្រសាសន៍ថា ចំណងមិត្តភាបដូចដែកថែបរវាងប្រមុខរដ្ឋាភិបាលចិន ជាមួយអតីតសម្តេចព្រះបរមរតនកោដិ នាពេលកន្លងមក និងការត្រួសត្រាយផ្លូវជាថ្មីដោយសម្តេចតេជោហ៊ុន សែននាយករដ្ឋមន្ត្រីនៃកម្ពុជា បានធ្វើឲ្យកម្ពុជានិងចិនក្លាយជាមិត្តដែកថែប ដែលមិនអាចកាត់ផ្តាច់បាន តាមរយៈការដាក់ចេញយុទ្ឋសាស្ត្រគ្រប់ជ្រុងជ្រោយរវាងប្រមុខរដ្ឋាភិបាលប្រទេសទាំងពីរ និងការកសាងបង្កើតសហគមន៍ពីរ វាសនាតែមួយ។

លោកបន្តថា “វត្តមានចិន ជាការនាំមកនូវវិបុលភាពកម្ពុជា និងជាការជំរុញឲ្យកម្ពុជាឆ្ពោះទៅមុខ ការរិះគន់ការវិនិយោគរបស់ចិននៅកម្ពុជា ជាទង្វើរបស់ពួកមនុស្សអគតិប៉ុណ្ណោះ” ៕

ដំណឹងល្អៈ ក្រុមហ៊ុន OCIC នឹងរៀបចំផ្លូវថ្មើរជើង និងផ្សាររាត្រីជុំវិញទីក្រុងកោះពេជ្រ

ដោយស៊ីវ ម៉េង

ភ្នំពេញៈ ក្រុមហ៊ុន OCIC បាននិងកំពុងរៀបចំតំបន់កំសាន្តពេលរាត្រី និងផ្លូវថ្មើជើងនៅជុំវិញទៅក្រុងរណបកោះពេជ្រ ដែលកំពុងរីកចម្រើននិងបង្ហាញនូវវត្តមានអាគារខ្ពស់ៗកាន់តែច្រើន។

អគ្គនាយករងក្រុមហ៊ុន OCIC លោកទូច សំណាង បានមានប្រសាសន៍ឲ្យដឹងតាមទូរស័ព្ទកាលពីពេលថ្មីៗនេះថា បច្ចុប្បន្នទីក្រុងកោះពេជ្រកំពុងមានការអភិវឌ្ឍយ៉ាងលឿន ហើយយើងកំពុងរៀបចំតំបន់កំសាន្តនាពេលរាត្រី និងផ្លូវថ្មើជើងនៅជុំវិញទីក្រុងនេះ ព្រោះក្នុងផែនការមេអភិវឌ្ឍន៍ គឺទីក្រុងនេះនឹងមានផ្លូវថ្មើជើងនិងផ្សាររាត្រីព័ទ្ឋជុំវិញ។

លោកបន្តថា “បច្ចុប្បន្នការអភិវឌ្ឍផ្ទៃដីលើទីក្រុងទាំងមូល ទើបសម្រេចបានប្រមាណ៥០ភាគរយប៉ុណ្ណោះ ខណៈសាលសន្និសីទដែលមានពេលបច្ចុប្បន្ននេះ នឹងផ្លាស់ប្តូរទៅតំបន់ទីក្រុងរណបជ្រោយចង្វារនាពេលអនាគត” ។

លោកទូច សំណាង បានបន្តថា យ៉ាងណាក៏ដោយផែនការមេអភិវឌ្ឍន៍ទីក្រុងនេះ កំពុងដើរតាមលំអានត្រឹមត្រូវហើយ ដោយបច្ចុប្បន្នមានផ្នែកជាច្រើនបាន និងកំពុងបញ្ចប់ការរៀបចំផ្លូវថ្មើជើង និងមានភោជនីយដ្ឋានចម្រុះដែលបំរើឲ្យការកំសាន្តនាពេលរាត្រី។

តំបន់កោះពេជ្រ និងជុំវិញបាននិងកំពុងប្រែមុខមាត់ ជាមជ្ឈមណ្ឌលពាណិជ្ជកម្មលំដាប់់អន្តរជាតិ ដោយបច្ចុប្បន្នវត្តមានអាគារពាណិជ្ជកម្មធំៗកំពុងរីកដុះដាល ព្រោងព្រាត ដែលនឹងធ្វើឲ្យតំបន់នេះក្លាយជាតំបន់ដើរទិញទំនិញមួយ នាពេលអនាគត។

បច្ចុប្បន្នផ្សារទំនើបជាច្រើនបាននិងកំ ពុងពង្រីកវត្តមាននៅតំបន់នេះ ដូចជា ផ្សារក្នុងអាគារ The Bridge, AEON MALL1, ផ្សារ One Mall, ផ្សារ The Capital ស្ថិតក្នុងគំរោង The PeAk ជាដើម៕

គម្រោងបុរីលំនៅដ្ឋានទំនើបទាន់សម័យ កៀនស្វាយផាក ប្រកាសបើកលក់ជាផ្លូវការ និងអបអរសាទរខួប៦ឆ្នាំនៃក្រុមហ៊ុនអចលនទ្រព្យ KFA

ដោយ ៖ រ៉ាណេត

ភ្នំពេញ ៖ បុរីកៀនស្វាយផាក ដែលជាគម្រោងលំនៅដ្ឋានបែបទំនើបប្រកបដោយប្រណីតភាពគួរជាទីទាក់ទាញ ជាមួយនឹងតម្លៃក្រោម៦ម៉ឺនដុល្លារស្ថិតនៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល ដែលជាតំបន់ជាយក្រុងកំពុងមានពីសក្ដានុពល ក្រោមកាបណ្តាក់ទុនវិនិយោគ និងអភិវឌ្ឍន៍ដោយក្រុមហ៊ុនអចលនទ្រព្យ Khmer Foundation Appraisal សរុបប្រមាណ១០លាដុល្លារបានប្រកាសដាក់លក់ជាផ្លូវការហើយ។

នៅក្នុងឱកាសនៃការប្រាកាសលក់ជាផ្លូវការ និងជាការអបអរសាទរខួបឆ្នាំទី៦របស់ក្រុមហ៊ុនអចលនទ្រព្យ Khmer Foundation Appraisal ក្រុមហ៊ុនបានផ្តល់ជូនកាន់តែពិសេស ដោយគ្រប់អតិថិទាំងអស់នឹងទទួលបានផលចំណេញកាន់តែច្រើន ដែលក្រៅពីទទួលបានការបញ្ចុះតម្លៃពិសេសភ្លាមៗ និងសម្ភារៈតុបតែងលម្អ ក៏ដូចជាសម្ភារៈប្រើប្រាស់ប្រចាំថ្ងៃដែលរៀបចំរួចជាស្រេចនៅក្នុងលំនៅដ្ឋានហើយនោះ ថែមទាំងមានភាពងាយស្រួលក្នុងការក្លាយជា ម្ចាស់លំនៅដ្ឋាននៅក្នុងបុរីមួយនេះដោយគ្រាន់តែបង់ត្រឹម១០ភាគរយលើកដំបូងតែប៉ុណ្ណោះក៏អាចចូលរស់នៅបានយ៉ាងពេញសិទ្ធិ។

លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal ដែលជាអ្នកវិនិយោគ និងអភិវឌ្ឍន៍លើគម្រោងនេះដោយផ្ទាល់បានមានប្រសាសន៍នៅថ្ងៃទី២០ ខែមីនា ឆ្នាំ២០២១ថា លំនៅដ្ឋាននេះ គឺមានលក្ខណៈល្អប្រសើរក្នុងការរស់នៅ ដោយសារតែវាជាតំបន់ដែលកំពុងតែមានការអភិវឌ្ឍខ្លាំង។ ដោយឡែកចំពោះលំនៅដ្ឋាន ក៏ដូចជាបរិស្ថានជុំវិញ ក៏ត្រូវបានក្រុមហ៊ុនរៀបចំធ្វើឡើងគោរពតាមមាត្រដ្ឋានរបស់ក្រសួង ទាំងការរៀបចំធ្វើផ្លូវ ខាងក្នុងមានទំហំ៨ម៉ែត្រ នៅសល់ខាងមុខផ្ទះទំហំ៤ម៉ែត្រ ដើម្បីបង្កភាពងាយស្រួលក្នុងការធ្វើចរាចរណ៍ និងមានសុវត្ថិភាពក្នុងការទុកដាក់យាន្តជំនិះ។

លោកឧកញ៉ាបន្តទៀតថា “នៅក្នុងគម្រោងអភិវឌ្ឍន៍បុរី កៀនស្វាយ ផាក ត្រូវសាងសង់លំនៅដ្ឋានបែបទំនើប និងទាន់សម័យសរុបជិត២០០ខ្នង ស្ថិតនៅតំបន់ដែលមានសក្ដានុពលជាប់ផ្លូវក្រវាត់ទី៣ និងបញ្ជប់ការសាងសង់ទាំងស្រុងត្រឹមរយៈពេល២៤ខែតែប៉ុណ្ណោះ ដោយផ្តល់ជូននូវលក្ខខណ្ឌពិសេសៗជាច្រើនចំពោះអតិថិជនដែលចង់ក្លាយម្ចាស់លំនៅដ្ឋានជាមួយនឹវិធីសាស្ត្រនៃការទិញដោយបង់រំលស់ផងដែរ ដោយគ្រាន់តែបង់ត្រឹម១០ភាគរយលើកដំបូង អាចចូលរស់នៅក្នុងលំនៅដ្ឋានដ៏ទាន់សម័យនេះបានបន្ទាប់ពីសាងសង់រួចរាល់ ហើយនៅសល់៩០ភាគរយទៀត អតិថិជនអាចបង់រំលស់ជាមួយក្រុមហ៊ុនទៅតាមដំណាក់កាល ឬជាមួយធនាគារដៃគូរហូតដល់២០ឆ្នាំក្នុងអត្រាការប្រាក់ដ៏សមរម្យ ដោយមានការកាត់ឈ្មោះប្រគល់ជូនប្លងរឹងស្របច្បាប់យ៉ាងត្រឹមត្រូវ”។

បច្ចុប្បន្ននេះគម្រោងបុរីលំនៅដ្ឋានទាន់សម័យ និងទំនើបតម្លៃសមរម្យ កៀនស្វាយផាក កំពុងមានសកម្មភាពយ៉ាងមមាញឹកក្នុងការសាងសង់ដើម្បីបញ្ចប់តាមផែនការក្នុងរយៈពេលប៉ុន្មានខែខាងមុខនេះ ខណៈដែលការលក់គិតត្រឹមខែមីនា ឆ្នាំ២០២១នេះ ទទួលបានប្រមាណ៦០ភាគរយនៃគម្រោងក្នុងដំណាក់កាលដំបូង។ ដោយឡែកសម្រាប់បណ្តាញហេដ្ឋារចនាសម្ព័ន្ធនានាដូចជា ផ្លូវថ្នល់ បណ្តាញទឹកស្អាតបណ្តាញអគ្គិសនី និងបណ្តាញបង្ហូរទឹកស្របតាមបទដ្ឋានដែលក្រសួងបានកំណត់ត្រូវបានរៀបចំរួចរាល់។

សម្រាប់អតិថិជនដែលទិញ ដោយការបង់ផ្តាច់ជាមួយក្រុមហ៊ុននឹងទទួលបានការបញ្ចុះតម្លៃកាន់តែច្រើនពីក្រុមហ៊ុនភ្លាមៗ រួមជាមួយនឹងការទទួលបានកាដូពិសេសផងដែរដូចជា ទូរតាំង១ឈុត ទូរដាក់ទូរសទស្សន៍ដ៏ស្រស់ស្អាត១ឈុត ទូចង្ក្រានបាយ១ឈុត និងទូរសម្លៀកបំពាក់ចំនួន១ឈុត ដែលមានតម្លៃសរុបជាង៦០០០ដុល្លារផងដែរ។

ផ្អែកតាមការអះអាងរបស់អ្នកជំនាញផ្នែកវិស័យអចលនទ្រព្យបានលើកឡើងថា តំបន់ជាប់ផ្លូវក្រវ៉ាត់ក្រុង ដែលមានចម្ងាយប្រមាណ២០–៣០ គីឡូម៉ែត្រពីរាជធានីភ្នំពេញគឺសុទ្ធតែមានសក្ដានុពល ជាពិសេសស្ថិតនៅតំបន់ក្រវាត់ក្រុងទី៣តភ្ជាប់ផ្លូវជាតិលេខ១ ដែលនឹងមានភាពលេចធ្លោក្នុងពេលដ៏ខ្លី ដោយសារតែវាមានវិសាលភាពផ្ទៃដីនៅទូលាយ តម្លៃនៅមានកម្រិត ហើយជាពិសេស ជាតំបន់ដែលស្ថិតនៅក្នុងគម្រោងអភិវឌ្ឍន៍មជ្ឈមណ្ឌលសេដ្ឋកិច្ច។

នៅតំបន់នេះមានហ៊ុមព័ទ្ធទៅដោយមណ្ឌលពាណិជ្ជកម្មជាច្រើន ដូចជាកំពង់ផែភ្នំពេញ តំបន់សេដ្ឋពិសេស មជ្ឈមណ្ឌលកម្សាន្ត The Prince Maner Resort តំបន់ឧស្សាហកម្មក្រុមហ៊ុនវឌ្ឍនៈ កន្លែងវាយហ្គោល (Vattanac Golf Course) ផ្លូវក្រវ៉ាត់ក្រុងទី៣ដែលជាខ្សែបណ្តាញសេដ្ឋកិច្ចយ៉ាងសំខាន់របស់កម្ពុជា និងមានផ្លូវជាច្រើនខ្សែងាយស្រួលឆ្ពោះទៅកាន់ព្រលានយន្ដហោះអន្តរជាតិភ្នំពេញថ្មីទៀតផង។ សម្រាប់ព័ត៌មានលម្អិតពីគម្រោងអាចទាក់ទងបានតាមទូរស័ព្ទលេខ ៖ ០៧៧ ៩៩ ៧៨ ៨៨ / ០១៧ ៧៩ ៦៦ ៣៣ .

ក្រុមហ៊ុនអចលនទ្រព្យនៅHollywood បោះទុនពង្រីកស្ទូឌីយោថតកុនតម្លៃ៥០០លានដុល្លាររបស់ខ្លួននៅអង់គ្លេស

ដោយៈសុខុម

ក្រុងឡុងដ៍: ក្រុមហ៊ុនអចលនទ្រព្យ ដែលជួយគាំទ្រដល់ផលិតកម្មភាពយន្ត ហូលីវូដ (Hollywood) ដ៏ល្បីរន្ទឺរបស់សហរដ្ឋអាមេរិក បានប្រកាសថា ពេលនេះខ្លួនកំពុងប្រមូលទុនឱ្យបាន៧០លានដុល្លារបន្ថែមទៀត ដើម្បីពង្រីកគម្រោងស្ទូឌីយោកុនតម្លៃ ៥០០លានដុល្លាររបស់ខ្លួននៅក្រុងឡុងដ៍ ភាគខាងកើតប្រទេសអង់គ្លេស។ នេះបើយោងតាមគេហទំព័រ Cityam ចុះផ្សាយកាលពីថ្ងៃសុក្រ ទី១៩ មីនា។

ក្រុមហ៊ុន Hackman Capital Partners (HCP) ដែលស្ទូឌីយោរបស់ខ្លួនបានផលិតស្នាដៃខ្សែភាពយន្តជាច្រើន រួមទាំងរឿង Citizen Kane និងរឿង Gone With the Wind ជាដើមខាងលើនេះ បានដំណើរការសាងសង់ស្ទូឌីយោ Eastbrook Studios ជាមជ្ឈមណ្ឌលខ្សែភាពយន្ត និងទូរទស្សន៍ថ្មីមួយរបស់ខ្លួន ដែលគ្រោងនឹងបើកដំណើរការនៅតំបន់ Dagenham ក្នុងទីក្រុងឡុងដ៍។

ថ្នាក់ដឹកនាំក្រុមហ៊ុននេះ បាននិយាយកាលពីម្សិលមិញថា ខ្លួនបានព្រមព្រៀងជាមួយក្រុមប្រឹក្សាមូលដ្ឋាន ដើម្បីជួលឃ្លាំងចំនួន២រយៈពេល១០ឆ្នាំ ហើយនឹងប្រែក្លាយឃ្លាំងទាំងនោះទៅជាស្ទូឌីយោបន្ថែមទៀត។

ការបង្កើនស្ទូឌីយោពីចំនួន១២ ដល់១៨នេះ នឹងធ្វើឱ្យចំនួនសរុបនៃការវិនិយោគលើគម្រោងទាំងមូលឡើង កើនដល់ប្រមាណ៥០០លានដុល្លារអាមេរិក។

តាមការរំពឹងទុក ស្ទូឌីយោទាំងនេះ នឹងបើកនៅទល់មុខស្ទូឌីយោធំ Eastbrook Studios នឹងត្រៀមរួចរាល់សម្រាប់ការថតភាពយន្ត នៅដើមរដូវស្លឹកឈើជ្រុះឆ្នាំនេះ។

គម្រោងពង្រីកបន្ថែម ដែលនឹងក្លាយជាស្ទូឌីយោធំបំផុត នៅទីក្រុងឡុងដ៍ នេះត្រូវបានរំពឹងថានឹងចូលរួមចំណែក ដល់សេដ្ឋកិច្ចក្នុងមូលដ្ឋានយ៉ាងតិច ក៏ប្រមាណ៥០លានដុល្លារដែរក្នុងមួយឆ្នាំៗ ហើយនឹងជួយបង្កើតការងារបានជាង១.៨០០ កន្លែង៕