Kien Svay Park បន្ត​ឆ្ពោះទៅមុខ​ជាមួយនឹង​លក្ខ​ខ័​ណ្ឌ​បង់ប្រាក់​ងាយស្រួល​ដល់​អតិថិជន

ដោយៈ គង់ ម៉ា​លីន

ភ្នំពេញៈ ជាមួយនឹង​ទំនុកចិត្ត​លើ​ទីផ្សារ និង​មូលធន​គ្រប់គ្រាន់ បុរី Kien Svay Park បាននិងកំពុង​បន្ត​សាងសង់​យ៉ាងសកម្ម ដើម្បី​ឆ្លើយតប​ការ​គាំ​ាំ​ទ្រ​ពី​អតិថិជន ជាមួយនឹង​ការផ្តល់ជូន​នូវ​លក្ខ​ខ័​ណ្ឌ​បង់ប្រាក់​កាន់តែ​ទាក់ទាញ។

អគ្គនាយក​ក្រុមហ៊ុន KFA ដែល​បាននិងកំពុង​វិនិយោគ​លើ​គំរោង​បុរី Kien Svay Park លោក​ឧកញ៉ា​នួន រិ​ទ្ឋី​បាន​មាន​មានប្រសាសន៍​ឲ្យ​ដឹង​កាលពីពេល​ថ្មី​នេះ​ថា នៅក្នុង​ឱកាស​នៃ​ការប្រកាស​លក់​នេះ ក្រុមហ៊ុន​មាន​កញ្ចប់​ពិសេស សម្រាប់​អតិថិជន​ចំនួន២៧នាក់​ដំបូង  ជាមួយនឹង​ការទទួលបាន​ទឹកប្រាក់ នៃ​ការ​បញ្ចុះតម្លៃ​ចំនួន១០០០ដុល្លារភ្លាមៗនាពេល​បើក​ការដ្ឋាន​បុកគ្រឹះ​ជា​លើកដំបូង​កន្លងមក។

លោក​ឧកញ៉ា​បន្តថា “អតិថិ​ទាំងអស់​នឹង​ទទួលបាន​ជម្រើស​ជាច្រើន ដែល​ផ្តល់​ដោយ​ក្រុមហ៊ុន ហើយ​ក្រៅពី​ទទួលបាន​ការបញ្ចុះ​តម្លៃ​ពិសេស អតិថិជន​បង់​ត្រឹម១០ភាគរយ​ដំបូង នឹង​ក្លាយជា​ម្ចាស់​លំនៅឋាន​ដ៏​ទាន់សម័យ ដែល​បំពាក់​ទៅដោយ​សម្ភារៈ​បរិក្ខា​យ៉ាង​ប្រណីត ទំនើប មាន​គុណភាព​ខ្ពស់​នាំចូល​មកពី​បរទេស” ។

លក្ខខណ្ឌ​ពិសេស នៃ​ការទិញ​ដោយ​បង់​រំលស់​ផងដែរ​ថា “សម្រាប់​ការទិញ និង​ក្លាយជា​ម្ចាស់​លំនៅដ្ឋាន​ក្នុង​បុរី កៀនស្វាយ ផាក គឺ​គ្រាន់តែ​បង់​ត្រឹម១០ភាគរយ​ដំបូង ហើយ​នៅសល់៩០ភាគរយ អតិថិជន​អាច​បង់​រំលស់​រហូតដល់២០ឆ្នាំ នៅក្នុង​អត្រា​ការប្រាក់​ដ៏​សមរម្យ។

លោក​ឧកញ៉ា​នួន រិ​ទ្ធី ​បាន​បន្តថា “អ្វីដែល​រឹតតែ​បង្កើន​ការទុកចិត្ត និង​ផ្តល់​ភាពងាយស្រួល រាល់​អតិថិជន​ទាំងអស់​អាចធ្វើ​ការបង់​រំលស់ ដោយផ្ទាល់​ជាមួយ​ក្រុមហ៊ុន ឬ​អាច​បង់​រំលស់​ជាមួយ​ធនាគារ​ក៏បាន ជាមួយនឹង​ការទទួលបាន​ប័ណ្ណកម្មសិទ្ធិ​ប្លង់រឹង” ។

បុរី​កៀនស្វាយ ផាក មាន​ទីតាំង​ស្ថិត​នៅជាប់​ផ្លូវ​ក្រវ៉ាត់​ក្រុង​ទី៣ ដែលជា​តំបន់​មាន​សក្ដានុពល​យ៉ាងខ្លាំង​លើ​ផ្នែក​សេដ្ឋកិច្ច និង​អចលនទ្រព្យ​នៅ​ជាយក្រុង ស្ថិតនៅ​ក្នុងភូមិ​ស្រែអំពិល ឃុំ​ឈើទាល ស្រុក​កៀនស្វាយ ខេត្តកណ្តាល ចម្ងាយ​ប្រមាណ២៥គីឡូម៉ែត្រ ពី​រាជធានី​ភ្នំពេញ៕

ធនាគារ​ហត្ថា​នៅតែ​រក្សាបាន​សុខភាព​ហិរញ្ញវត្ថុ​រ៉ឹង​មាំ​ជាមួយនឹង​កំនើន​ប្រាក់ចំណេញ​ល្អប្រសើរ

ដោយៈ​គង់ សូរិយា

ភ្នំពេញៈ ធនាគារ​ហត្ថា​បាន​បន្ត​ប្រៀប​ខ្លាំង​របស់ខ្លួន​ដដែល ដោយ​សុខភាព​ហិរញ្ញវត្ថុ​របស់​ស្ថាប័ន​នេះ នៅតែមាន​ភាព​រ៉ឹង​មាំ​ាំ​ជាមួយនឹង​កំនើន​ប្រាក់​ច​ចំណូល និង​ប្រាក់ចំណេញ​ខ្ពស់​នៅ​ត្រីមាស​ទី១ឆ្នាំនេះ បើទោះបី​កម្ពុ​ជាមាន​បញ្ហា​ជំងឺ​កូ​វីដ​ក្តី។

យោងតាម​របាយការណ៍​របស់​ធនាគារ​នេះ​បាន​ឲ្យ​ដឹងថា នៅ​ត្រីមាស​ទី១ ឆ្នាំ២០២១នេះ ធនាគារ ហត្ថា​រក​ចំណូល បាន​ប្រមាណ​ជាង៥២លាន​ដុល្លារ កើនឡើង​ជាង១៩% បើ​ធៀប​រយៈពេល​ដូចគ្នា ឆ្នាំ២០២០ មាន​ចំនួន​ទឹកប្រាក់​ប្រមាណ៤៤លាន​ដុល្លារ។

របាយការណ៍​ដដែល​បាន​បន្តថា នៅ​ត្រីមាស​ទី១ ឆ្នាំ២០២១នេះ ធនាគារ​ហត្ថា​ចំណេញ​សុទ្ធ​ចំនួន​ជាង១១លាន​ដុល្លារ កើតឡើង៦៣% បើ​ធៀប​នឹង​រយៈពេល​ដូចគ្នា ឆ្នាំ២០២០ ធនាគារ​នេះ​រកបាន​ប្រាក់ចំណេញ​ចំនួន​ជិត៧លាន​ដុល្លារ​ប៉ុណ្ណោះ។ គិត​ត្រឹម​ត្រីមាស​ទី១ ឆ្នាំ២០២១នេះ ធនាគារ​ហត្ថា មានទ្រព្យ​សកម្ម​សរុប​ប្រមាណ១៧០០លាន​ដុល្លារ​អាមេរិក។

ធនាគារ​ហត្ថា ម.ក បាន​ឲ្យ​ដឹងថា ខ្លួន​បានសម្រេច​លទ្ធផល​គួរ​ជាទី​គាប់ចិត្ត ក្នុង​ត្រីមាស​ទី១ ឆ្នាំ២០២១នេះ រួមមាន​ផលប័ត្រ​ឥណទាន បាន​កើន​ឡើងដល់​ចំនួន១ ៤១២ លាន​ដុល្លារ​អាមេរិក ដោយបាន​កើនឡើង៧% បើ​ធៀប​នឹង​ត្រីមាស​មុន​សមតុល្យ​ប្រាក់​បញ្ញើ​សន្សំ បាន​កើន​ឡើងដល់​ចំនួន៨២១លាន​ដុល្លារ​អាមេរិក ដោយ​កើនឡើង៤% បើ​ធៀប​នឹង​ត្រីមាស​មុន ហើយ​ឥណទាន​មិន​ដំណើរការ គឺ០.៩០% ដោយសារ​ផលប៉ះពាល់​ពី​ជំងឺ​កូ​វីដ១៩ ។

នៅ​ដំណាច់ត្រីមាស​ទី១ ធនាគារ ហត្ថា ម.ក បានផ្តល់​ការគាំទ្រ​ដល់​អតិថិជន​តាម  រយៈ​ការរៀបចំ​ឥណទាន​សារ​ឡើងវិញ ជូន​ដល់​អតិថិជន​ជាង១៤០០០នាក់ ស្មើនឹង​ចំនួន​ទឹកប្រាក់​ប្រហែល​ជិត១៤០លាន​ដុល្លារ​អាមេរិក ហើយ​ធនាគារ​ក៏បាន​ធ្វើ​ទំនើបកម្ម​លើ​សេវា​ធនាគារ​ចល័ត​របស់ខ្លួន ដោយ​ទទួលបាន​ចំនួន៤៥% ស្មើនឹង​ចំនួន​អ្នកប្រើប្រាស់​ជាង២៣,០០០ នាក់៕

 

CEO នៃ​គេហទំព័រ Propertyarea នឹងចូលរួម​ចែករំលែក​ទស្សនទាន​នៅ​វេទិកា​អន្តរជាតិ​ធំ​មួយ​ស្តីពី​សេដ្ឋកិច្ច​និង​អចលនទ្រព្យ​នៅ​កម្ពុជា

ដោយៈ ប៊ី

ភ្នំពេញៈ  វេទិកា Rainmaking Cambodia 2021 រៀបចំ​ដោយ​ស្ថាប័ន​អន្តរជាតិធំៗ នឹង​ប្រព្រឹត្ត​ទៅនា​ថ្ងៃទី២៥ ខែឧសភា ឆ្នាំ២០២១ខាងមុខ ដើម្បី​ពិភាក្សា​ពី​ការអភិវឌ្ឍ​សេដ្ឋកិច្ច និង​អចលនទ្រព្យ​នាពេល​អនាគត​នៅ​កម្ពុជា។

ព្រឹត្តិការណ៍​នេះ នឹងមាន​ការចូលរួម​ពី CEO នៃ​គេហទំព័រ Propertyarea.asia លោក​យិន លាង​គង់ ដែល​នឹង​បញ្ចេញ​ទស្សនទាន​លើ​ស្ថានភាព​សេដ្ឋកិច្ច និង​អចលនទ្រព្យ​ចុងក្រោយ​នៅ​កម្ពុជា​ផងដែរ។

ព្រឹត្តិការណ៍ Rainmaking Cambodia ត្រូវបាន​រៀបចំឡើង​ដោយ Good City Foundation and InvesHK និង​នាយកដ្ឋាន​វិនិយោគទុន​ផ្ទាល់​បរទេស នៃ​រដ្ឋបាល​ស្វយ័ត​ហុងកុង ក្នុង​កម្ម​ពិធី StartmeupHK នាពេល​ខាងមុខនេះ​ចាប់ពី​ថ្ងៃទី២៤ ដល់​ថ្ងៃទី២៨ ខែឧសភា និង​មានការ​គាំទ្រ​ពី​តំណាង និង​សមាជិក​នៃ​វេទិកា​ផ្លាស់ប្តូរ​ទីក្រុង និង​ទីក្រុង នៃ​វេទិកា​សេដ្ឋកិច្ចពិភពលោក​នៅ​ប្រទេស​ចិន និង​អាស៊ាន (loT and Urban Transformation Platform of the World Economic Forum in China and ASEAN)។

កម្ម​ពិធី​សហការ​បង្កើត​តម្លៃ​រួម នៃ​អចលនទ្រព្យ​ប្រកបដោយ​និរន្តរភាព​នៅ​កម្ពុជា (Co-Creating Common Values of Sustainable Real Estate in Cambodia) នឹង​ដើរតួនាទី​ជា​ប្រធានបទ​សំខាន់​នៃ Rainmaking Cambodia 2021 ដែល​ព្រឹត្តិការណ៍​នេះ​នឹង​ផ្តោតលើ​កិច្ចពិភាក្សា​កម្រិត​ខ្ពស់​ស្តីពី និន្នាការ​អភិវឌ្ឍន៍​ម៉ាក្រូសេដ្ឋកិច្ច​ចុងក្រោយ​របស់​ប្រទេស​កម្ពុជា។

កម្ម​ពិធី​នេះ ក៏​នឹង​ស្វែងយល់​ពី​ការអភិវឌ្ឍ​អចលនទ្រព្យ នាពេល​អនាគត ដូចជា​ការវិនិយោគ​អចលនទ្រព្យ​ឆ្លាត​វៃ និង​ហិរញ្ញប្បទាន​ប្រកបដោយ​ចីរភាព និង​វិធី​ដែល​អ្នកពាក់ព័ន្ធ​អាចធ្វើ​អន្តរ​កម្ម និង​ចង្អុលបង្ហាញ​ពី​បញ្ហា​ប្រឈម និង​ដំណោះស្រាយ តាមរយៈ​ការអភិវឌ្ឍ​ប្រកបដោយ​ចីរភាព និង​ភាព​ធន់​នៃ​ទីក្រុង​កាន់តែ​ប្រសើរ សម្រាប់​ប្រទេស​កម្ពុជា ក្នុង​បរិបទ​ទីក្រុង​កំពុង​រីកចម្រើន។

វគ្គ​ទី២ នឹងមាន​កម្មវិធី​បង្ហា​ញ​អំពី​បច្ចេកវិទ្យា សម្រាប់​ទីក្រុង​ល្អ ដើម្បី​អនុញ្ញាតឱ្យ​ក្រុមហ៊ុន/សាជីវកម្ម ដែលមាន​សក្តានុពល បង្ហាញ​អាជីវកម្ម/គម្រោង​របស់​ពួកគេ ដល់​បណ្តាញ​វិនិយោគិន​របស់​យើង និង​ឱកាស​ដើម្បី​ទទួលបានរ​ធនធាន នាពេល​អនាគត​ពី​ទីក្រុង​ហុងកុង និង​តំបន់ Greater Bay Area នៃ​ប្រទេស​ចិន។

មូលនិធិ​ទីក្រុង​ល្អប្រសើរ (Good City Foundation) គឺជា​អង្គការ​អភិវឌ្ឍន៍​ក្រៅ     រដ្ឋាភិបាល​មិន​រកប្រាក់​ចំណេញ ដែល​ត្រូវបាន​បង្កើតឡើង ក្នុង​ឆ្នាំ២០១៦ ដោយ​ក្រុម​អ្នកសិក្សា និង​សហគ្រិន​ហុងកុង ដែលមាន​ចក្ខុវិស័យ​ក្នុង​ការកសាង​ភាព​ធន់ នៃ​ទីក្រុង​ល្អប្រសើរ១០០ទីក្រុង នៅក្នុង​តំបន់​អាស៊ី និង​អាហ្វ្រិក​ដែល​កំពុង​រីកចម្រើន។

បេសកកម្ម​មូលនិធិ​នេះ ដើម្បី​ជំរុញ​ការច្នៃប្រឌិត​សាធារណៈ និង​ភាពជា​ដៃគូ​ឯកជន​ក្នុងចំណោម​យុវជន​ជំនាន់​ក្រោយ នៅក្នុង​ទីក្រុង​ដែល​កំពុង​រីកចម្រើន ហើយ​បាន​ទាក់ទាញ​ការចាប់ផ្តើម​ថ្មី​ប្រកបដោយ​ភាព​ច្នៃប្រឌិត ការិយាល័យ​គ្រួសារ អ្នកបង្កើត​គោលនយោបាយ​វ័យក្មេង និង​សាជីវកម្ម ដើម្បី​ស្វែងរក​ការអភិវឌ្ឍ​ចុងក្រោយ នៃ​ការកសាង​ទីក្រុង សេដ្ឋកិច្ច បច្ចេកវិទ្យា និង​ការច្នៃប្រឌិត និង​ស្វែងរក​ភាពជា​ដៃគូ។

បច្ចុប្បន្ន​មូលនិធិ​នេះ គឺជា​ដៃគូ​ស្ថាប័ន​នៃ​សម្ព័ន្ធភាព​ទីក្រុង​វៃឆ្លាត ជាស​កល​ជី២០ (G20 Global Smart Cites Alliance) និង​សម្ព័ន្ធ​ឯកជន​នៃ​បណ្តាញ​អាស៊ាន​ស៊ី​ធី​ថ​ល (Private Sector Commitee of ASEAN Smart City Network) ក្នុងនាម​ប្រទេស​ថៃ និង​បម្រើការ​ជា​ក្រុមការងារ​មិន​ស្វែងរក​ប្រាក់ចំណេញ នៃ​វេទិកា​សេដ្ឋកិច្ចពិភពលោក (ចិន និង​អាស៊ាន) ។

ដើម្បី​ធ្វើឱ្យ​ព្រឹត្តិការណ៍​កាន់​ស៊ីជម្រៅ មូលនិធិ​ទីក្រុង​ល្អប្រសើរ​នេះ បាន​ចុះហត្ថលេខា​លើ​អនុស្សារណៈ​យោគយល់ ជាមួយ​សហគ្រាស​ខ្មែរ (Khmer Enterprise) ដែលជា​អង្គភាព​អនុវត្តន៍ មូលនិធិ​អភិវឌ្ឍន៍​សហគ្រិនភាព នៃ​ក្រសួង​សេដ្ឋកិច្ច​និង​ហិរញ្ញវត្ថុ ដើម្បី​បង្កើត​ទំនាក់ទំនង​សហប្រតិបត្តិការ​ជាមួយគ្នា ដោយ​ជំរុញ​ប្រព័ន្ធ​អេកូឡូស៊ី និង​បច្ចេកវិទ្យា និង​ដើម្បី​ស្វែងរក​កិច្ចសហការ​ជា​យុទ្ធសាស្ត្រ​ស្តីពី លំហូរ​កិច្ចព្រមព្រៀង​វិនិយោគ​រួមគ្នា និង​គម្រោង​ផ្តល់​មូលនិធិ​រវាង​ប្រទេស​កម្ពុជា និង​បណ្តាញ​វិនិយោគិន ដែលមាន​ឥទ្ធិពល​នៅ​ហុងកុង និង​តំបន់ Greater Bay Area នៃ​ប្រទេស​ចិន៕

ក្រុមហ៊ុន​ផ្សារ​ទំនើប​នៅ​ថៃ​នៅតែ​បន្ត​វិធានការ​សង្គ្រោះ​ដើម្បី​ជួយ​ស្រោចស្រង់​អាជីវករ

ដោយៈ​សុខុម

បាងកក: ក្រុមហ៊ុន​ប្រតិបត្តិ​ករ​គ្រប់គ្រង​ផ្សារ​ទំនើប​ជាច្រើន បាន​បន្ត​វិធានការ​សង្គ្រោះ​របស់ខ្លួន ដើម្បី​ជួយ​ឱ្យ​អាជីវករ ដែលជា​អ្នក​ជួល​តូប​របស់ខ្លួន អាច​បន្តដំណើរ​លក់ដូ​រ​អំឡុង​វិបត្តិ​កូ​វីដ-១៩ ដែល​កាន់តែ​ធ្ងន់ធ្ងរទៅ។  នេះ​បើ​យោងតាម​សារព័ត៌មាន Bangkok Post ចុះផ្សាយ​កាលពី​ថ្ងៃទី១៨ ឧសភា។

តួយ៉ាង លោក Somphol Tripopnart នាយក​គ្រប់គ្រង​អាជីវកម្ម​ផ្សារ​ទំនើប​នៅ​ក្រុមហ៊ុន MBK Plc ដែលជា​ក្រុមហ៊ុន​ប្រតិបត្តិ​ករ​ផ្សារ​ទំនើប MBK ផ្សារ​ទំនើប Paradise Park និង​ផ្សារ​ទំនើប The Nine Rama 9 បានលើកឡើង​ក្នុង​សប្តាហ៍​នេះ​ថា ក្រុមហ៊ុន​បានចាប់ផ្តើម​ជួយ​អា​ជីករ ដែល​ជួល​តូប​របស់ខ្លួន​កាលពី​ថ្ងៃទី២៦ ខែមេសា តាមរយៈ​ការមិន​យក​ថ្លៃឈ្នួល​ស្តង់ សម្រាប់​អ្នក​ជួល​ដែល​ជួប​ការលំបាក​ខ្លាំង​បំផុត ដោយ​យកតែ​ថ្លៃ​ទឹក​ភ្លើង​ប៉ុណ្ណោះ។

កាលពី​ដើមខែ​នេះ ក្រុមហ៊ុន​នេះ​បាន​បន្ត​វិធានការ​សង្គ្រោះ ដើម្បី​ជួយ​ដល់​អ្នក​ជួល​តូចផ្សេងៗទៀត នៅ​ផ្សារ​ទំនើប​ទាំង៣របស់ខ្លួន តាមរយៈ​ការបញ្ចុះ​ថ្លៃឈ្នួល​តូប​ចន្លោះ​ពី៣០%ទៅ៧០% ក្នុង​បំណង​ជួយ​សម្រាល​ផលប៉ះពាល់ ដែល​បង្កឡើង​ដោយ​ការឆ្លង​រាតត្បាត​វីរុស​កូ​វីដ-១៩ រលក​ថ្មី​ទៅលើ​អាជីវករ។

យោងតាម​លោក Somphol Tripopnart ឱ្យដឹងថា ក្រុមហ៊ុន​ក៏បាន​បង្កើត​បណ្តាញ​លក់ផ្សេងៗផងដែរ ដើម្បី​ជួយ​បង្កើន​ឱកាស​លក់​របស់​អ្នក​ជួល​តូប និង​ទទួលបាន​អតិថិជនថ្មីៗ សម្រាប់​ជួយ​ទប់​ការធ្លាក់ចុះ​ប្រាក់ចំណូល​រេ​បស់​ពួកគេ។ កាលពីពេលថ្មីៗនេះ ក្រុមហ៊ុន បាន​បើកហាង​របស់ខ្លួន​ដែលមាន​ឈ្មោះថា MBK Center@Lazada សម្រាប់​ជួយ​អ្នក​ជួល​តូប​លក់​ផលិតផល​របស់ខ្លួន​តា​ម​អន​ឡាញ។

លើសពីនេះ​ទៀត នៅ​រៀងរាល់ថ្ងៃ​ពុធ ក្រុមហ៊ុន​នឹងធ្វើ​ការ Live លក់​តាម​បណ្ដាញ​ទំនាក់ទំនង​សង្គម​ហ្វេ​ស​ប៊ុ​ក ក្រោម​ផេ​កមួយ​ដែលមាន​ឈ្មោះថា MBK Live Market។  ទន្ទឹមនឹង​នេះដែរ ក្រុមហ៊ុន​កំពុង​យក​ស្តង់​មួយចំនួន​មកវិញ ជាបណ្ដើរៗនៅពេល​កិច្ចសន្យាជួល​ផុត​សុពលភាព​នៅ​ឆ្នាំនេះ ដើម្បី​ត្រៀម​ប្ដូរ​ទៅ​ទីតាំង​ផ្សារ​របស់ខ្លួន។

នៅក្នុង​គម្រោង​អភិវឌ្ឍន៍ ដែល​ពាក់ព័ន្ធ​មួយ​ផ្សារ​ទំនើប MBK គ្រោង​បើកសម្ពោធ​ផ្សារ​ទំនើប​ថ្មី​របស់ខ្លួន​ដែលមាន​ឈ្មោះថា The Nine Center Tiwanon នៅ​ពាក់កណ្តាល​ខែក្រោយ​ផងដែរ៕

សិក្សា​លើ​មូលដ្ឋានគ្រឹះសំខាន់ៗមុននឹង​សម្រេច​វិនិយោគ​លើដី​ធ្លី​តំបន់​ណាមួយ

ដោយៈ​វ​ឌ្ឈ​នៈ

ភ្នំពេញៈ ការវិនិយោគ​លើ​វិស័យ​ដីធ្លី បើ​ចង់ឱ្យ​ចំណេញ​ឆាប់​និង​ចំណេញ​ច្រើន អ្នកវិនិយោគ ត្រូវ​ដឹង​ពី​ចំណុចគោលៗមួយចំនួន មុននឹង​សម្រេចចិត្ត​បណ្ដាក់ទុន​វិនិយោគ​ដើម្បី​កុំឱ្យ​ខាត​ពេល​ខាត​វេលា និង​ថវិកា។

ព្រោះ​បើសិនជា​ការវិនិយោគ​លើ​វិស័យ​មួយ​នេះ ដោយ​គ្មាន​ចំណេះដឹង​មូលដ្ឋាន ខ្លះៗនោះទេ ទោះបី​មាន​ទុន​ច្រើន​យ៉ាងណា ក៏​ពិបាក​ក្នុងការ​ទទួលបាន​ផល​ចេញ​ក្នុង​រយៈពេល​ខ្លី​នោះដែរ។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក​ច្រឹ​ក សុខ​នី​ម​បាន​មានប្រសាសន៍​ឲ្យ​ដឹង​កាលពី​ម្សិល​ម៉ិ​ញ​ថា ការវិនិយោគ​ដីធ្លី​បើសិនជា​អ្នកវិនិយោគ​មាន​មូលដ្ឋានគ្រឹះ​មួយចំនួន នឹង​អាច​ទទួលបាន​ផលចំណេញ​មកវិញ​បាន​លឿន និង​ប្រើ    រយៈពេល​ខ្លី ។

លោក​និយាយថា “អ្នកខ្លះ​ហ៊ាន​សម្រេច​ទិញ​ដីធ្លី នៅ​តំបន់​ដែល​ឆ្ងាយ អត់​ប្រព័ន្ធ​ទឹក ភ្លើង និង​ផ្លូវ​ទៅដល់​ទេ តែ​គេ​បានដឹង​រួចទៅហើយ ពី​គម្រោង​អ្វីមួយ​នៅ​តំបន់​នោះ ថា​នឹងមាន​ការអភិវឌ្ឍ​ឱ្យទៅជា​អ្វីមួយ។ ដូច្នេះ​អ្នក​ដែល​ឆ្លាត​គេ នឹង​ទិញ​ដី​នោះ​ទុក​សម្រាប់​យកចំណេញ​នៅពេលដែល​គម្រោង​ចាប់ផ្ដើម​អនុវត្តន%” ។

លោក​បន្តថា មុននឹង​សម្រេចចិត្ត​វិនិយោគ​លើដី​ធ្លី នៅ​តំបន់​ណាមួយ​នោះ គឹ​ត្រូវ​សិក្សា និង​ស៊ើប​មើល​ពី​គម្រោង​ប្លង់​មេ​របស់​រដ្ឋបាល​រាជធានី ខេត្ត រឺ​ផែនការ​អភិ​វ​ឌ្ឈ​ន៍​របស់​រដ្ឋាភិបាល​ទាំងមូល ហើយ​បណ្ដាក់ទុន​នៅ​តំបន់​នោះ នឹងមិន​ខុស​នោះទេ ។សម្រាប់​ព័ត៌មាន​នេះ គេ​អាច​នឹង​ពិបាក​ក្នុងការ​ស្វែងរក​ប្រភព តែ​គេ​អាច​ព្យាយាម​រក ហើយ​បើសិនជា​រកបាន នោះ​វា​នឹងធ្វើ​ឱ្យគេ​អាច​ទទួលបាន​ឱកាស​ក្នុងការ​វិនិយោគ​មុន ។

លោក​សុខ​នី​ម​បាន​បញ្ជាក់ថា “ដីធ្លី​នៅក្នុង​ប្រទេស​កម្ពុជា នឹង​ឡើងថ្លៃ​ជា​បន្តបន្ទាប់ គ្រាន់តែ​តំបន់​ខ្លះ​ឡើង​មុន តំបន់​ខ្លះ​ឡើង​តាម​ក្រោយ ព្រោះថា​រដ្ឋាភិបាល​ច្បាស់​ជាមាន​គម្រោង​ប្លង់​មេ​រួចរាល់​ហើយ តែ​ត្រូវធ្វើ​ទៅតាម​ម្ដង​មួយជំហាន” ។

លោក​ឧកញ៉ា គីម ហ៊ាង ប្រធាន​ក្រុមហ៊ុន​អចលនទ្រព្យ​ខ្មែរ​រៀល​អ៊ី​ស្ទេ​ត មានប្រសាសន៍​ឲ្យ​ដឹងផង​ដែរ​ថា តាមពិត​ការអភិវឌ្ឍ​ដីធ្លី និង​អចលនទ្រព្យ​នៅក្នុង​ប្រទេស​កម្ពុជា បើ​ធៀប​នឹង​ប្រទេស​រីកចម្រើន​ក្នុង​តំបន់ យើង​ដើរ​ក្រោយ​គេ​ច្រើន ប្រទេស​ខ្លះ​គេ​ដើរ​មុន​កម្ពុជា១០ឆ្នាំ ខ្លះ២០ឆ្នាំ និង​ខ្លះទៀត​ដើរ​មុន​កម្ពុជា រហូតដល់៣០ឆ្នាំ​ក៏មាន ដូច្នេះ​អ្វីដែល​គេ​មាននៅ​ពេលនេះ កម្ពុជា​យើង​នឹងមាន​ដូច​គេ​នៅ​រយៈពេល១០ ឬ២០ឆ្នាំ​ខាងមុខ​ទៀត ។

លោក​បន្តថា “ការសម្រេច​ទិញ​ដីធ្លី​ទុក​វា​មិន​ខុស​នោះទេ ព្រោះ​យើង​ដឹង​ហើយ​ថា​មនុស្ស​កើត​រាល់ថ្ងៃ​តែ​ដី​មិនកើត​នោះទេ ដូច្នេះ​តម្លៃ​ដី​នឹង​ឡើងជា​បន្តបន្ទាប់ ពីមួយ​ឆ្នាំទៅ​មួយឆ្នាំ” ៕

អ្នកជំនាញ​អន្តរជាតិៈ ទីផ្សារ​លំនៅដ្ឋាន​នៅ​កម្ពុជា​នឹង​ងើបឡើង​វិញ​យ៉ាង​រហ័ស​ជាងគេ

ដោយៈ ម៉ា​ណេ​ត

ភ្នំពេញៈ អ្នកជំនាញ​អន្តរជាតិ​បាន​លើកឡើងថា ទីផ្សារ​លំនៅដ្ឋាន​ត្រូវបាន​រំពឹងថា​នឹង​ងើបឡើង​វិញ​យ៉ាង​ឆាប់រហ័ស​ជាងគេ បើ​ធៀប​នឹង​ផ្នែក​ផ្សេង នៃ​វិស័យ​អចលនទ្រព្យ បន្ទាប់ពី​មានការ​រំខាន​ដោយ​វិបត្តិ​កូ​វីដ១៩ ។

លោក James Hodge នាយក​ជាន់ខ្ពស់​ក្រុមហ៊ុន CBRE Cambodia បាន​ថ្លែងប្រាប់​គេហទំព័រ Propertyarea.asia នៅ​ថ្ងៃទី១៨ ខែឧសភា ឆ្នាំ២០២១ន​ធា ទីផ្សារ​លំនៅដ្ឋាន​ត្រូវបាន​រំពឹងថា នឹង​ងើប​ឡើងវិញ​យ៉ាង​ឆាប់រហ័ស ដែល​គាំទ្រ​ដោយ​ការធ្វើឱ្យ​ប្រសើរឡើង​នូវ​លក្ខខណ្ឌ​ប្រាក់កម្ចី និង​ការទូទាត់​ពី​ធនាគារ និង​អ្នក​អភិវឌ្ឍន៍។

លោក​បាន​ថ្លែងថា “យើង​រំពឹងថា សកម្មភាព​នៃ​ការលក់ នឹងមាន​ភាពប្រសើរឡើង​ទាំង​ផ្នែក​ខុន​ដូ និង​ផ្នែក​អចលនទ្រព្យ​ជាប់​ដី (ផ្ទះ) នៅ​ត្រីមាស​ទី៣ ឆ្នាំ២០២១ ខណៈ     រយៈពេល​នៅសល់​នៃ​ត្រីមាស​ទី២ សកម្មភាព​ទិញ​លក់​ហាក់ ដូចជា​នៅ​ភាពយឺត​នៅឡើយ” ។

ការរំខាន​ពី​ការឆ្លង​ជំងឺ​កូ​វីដ១៩ចូលក្នុង​សហគមន៍ ទំនងជា​នឹង​រុញច្រាន​ការ​ស្ទុះ​ឡើងវិញ​ក្នុង​វិស័យ​អចលនទ្រព្យ​យឺត​ផង ដូច្នេះ​ស្ថានភាព​ទីផ្សារ​ប្រសើរ​ឡើងវិញ គឺ​ពឹង​ផ្អែកលើ​ល្បឿន និង​ប្រសិទ្ធភាព​នៃ​ការចាក់​វ៉ាក់សាំង ដើម្បី​បង្កើត​សន្ទុះ និង​បង្កើន​ភាពជឿជាក់​លើ​ការវិនិយោគ​អចលនទ្រព្យ។

ទីផ្សារ​អចលនទ្រព្យ​កំពុង​ប្រឈមមុខ នឹង​បញ្ហា​ប្រឈម​ជាច្រើន ដែល​ចាំបាច់​ត្រូវ​ដោះស្រាយ រួមមាន​កង្វះ​ទំនុកចិត្ត​របស់​អ្នកទិញ អំឡុង​ការកើនឡើង​នៃ​ភាពមិនច្បាស់លាស់ និង​ការផ្គត់ផ្គង់​លើស​តម្រូវការ​ទីផ្សារការងារ ដែល​ប៉ះពាល់​ដល់​ចំណូល​ជួល។

ទោះបីជា​យ៉ាងណាក៏ដោយ លោក James Hodge បានឱ្យដឹងថា យើង​រំពឹងថា សកម្មភាព​ទិញ​លក់​នឹង​កើន​ឡើងវិញ ព្រោះ​កម្មវិធី​ចាក់​វ៉ាក់សាំង នឹង​ជួយ​ដល់​ការគ្រប់គ្រង​ជំងឺ​កូ​វីដ១៩ និង​អនុញ្ញាតឱ្យ​ប្រទេស​កម្ពុជា​បើក​ព្រំដែន និង​បន្ធូរ​ការ​រឹតត្បិត​មួយចំនួន ប៉ុន្តែ​នៅតែ​មិនទាន់​ដឹង​ទំហំ នៃ​ការកើនឡើង​វិញ​កម្រិត​ណា​នោះទេ។

លោក​បាន​ថ្លែងបន្តថា យើង​រំពឹងថា ទីផ្សារ​លំនៅដ្ឋាន​នឹង​កើនឡើង​យ៉ាង​ឆាប់រហ័ស ជាពិសេស​សម្រាប់​វិស័យ​លំនៅដ្ឋាន(បុរី) បន្ទាប់មក​វិស័យ​ខុន​ដូ។ ទីផ្សារ​អាគារ​ពាណិជ្ជក​ម្ម​ទំនងជា​នឹង​ធ្លាក់ចុះ​រយៈពេល ក្នុង​រយៈពេល​យូរ​ជាង​នេះ ប៉ុន្តែ​ក៏​អាច​មើលឃើញ​សកម្មភាព​ប្រសើរឡើង នៅពេលដែល​ស្ថេរភាព និង​កំណើនសេដ្ឋកិច្ច​រឹងមាំ​ត្រូវបាន​ធានា។

កម្មវិធី​ចាក់​វ៉ាក់សាំង​របស់​រដ្ឋាភិបាល​កម្ពុជា បាន​កើន​លើស​ប្រទេសផ្សេងៗទៀត​នៅក្នុង​អាស៊ាន ហើយនឹង​ក្លាយជា​មធ្យោបាយ​មួយ​ដ៏​សំខាន់ ក្នុង​ការផ្តល់​ទំនុកចិត្ត​ដល់ទី​ផ្សារ​វិនិយោគ។

លោក James Hodge បានឱ្យដឹងថា ដៃគូ​វិនិយោគ​ដែល​ក្រុមហ៊ុន CBRE បាន​ពិភាក្សា​ជាមួយ បាន​សំដែង​ការកោតសរសើរ​ចំពោះ​វិធានការ ដែល​បាន​អនុវត្ត​កន្លងមក ហើយ​ពួកគេ​មាន​ជំនឿ​ចិត្ត​ថា ការ​ព​ន្លឿ​ន​ការចាក់​វ៉ាក់សាំង​បែបនេះ នឹង​ជួយ​ឱ្យ​ប្រទេស​កម្ពុជា​ងើបឡើង​វិញ ពី​វិបត្តិ​ជំងឺ​រាតត្បាត​លឿន​ជាង​ប្រទេស​ប្រកួតប្រជែង៕

តើ​អគារ​ប្រភេទ​ដូចម្តេច ទើប​អាច​កំណត់​ជា​អគារ​សហកម្មសិទ្ធិ?

ដោយៈ​គង់ សូរិយា

ភ្នំពេញៈ ជាទូទៅ​គេ​តែង​កត់សម្គាល់ថា អគារ​មួយ​ដែលមាន​បន្ទប់​ច្រើន មាន​អ្នករស់នៅ​ច្រើន​គ្រួសារ ហៅថា​អគារ​សហកម្មសិទ្ធិ​ហើយ ប៉ុន្តែ​ការ​អោយនិយមន័យ​បែបនេះ មិន​ត្រឹមត្រូវ​នោះទេ។

យោងតាម​ឯកសារ​របស់​ក្រសួង​ដែនដី​បាន​ឲ្យ​ដឹងថា ថ្វីត្បិតតែ​ប្រទេស​កម្ពុជា​យើង ផ្នែក​នេះ​ហាក់​នៅ​ថ្មី​ក្នុង​វិស័យ​មួយ​នេះ ក៏ពិតមែន ប៉ុន្តែ​រហូតមក​ដល់ពេលនេះ យើង​ក៏មាន​ច្បាប់ និង​បទបញ្ញត្តិ​មួយចំនួន ដែលជា​មូលដ្ឋាន​ក្នុងការ​គ្រប់គ្រង និង​បកស្រាយ​ទៅលើ វិស័យ​ដ៏​ក្មេងខ្ចី​មួយ​នេះ​មានដូចជា៖ ច្បាប់​ភូមិបាល ឆ្នាំ២០០១ អនុក្រឹត្យ​ស្តីពី​ការគ្រប់គ្រង និង​ប្រើប្រាស់​អគារ​សហកម្មសិទ្ធិ ចេញ​នៅ​ឆ្នាំ ២០០៩ ។

ច្បាប់​ស្តីពី ការផ្តល់​សិទ្ធិកម្មសិទ្ធិ​លើ​ចំណែក​ឯក ជន​នៃ​អគារ​សហកម្ម សិទ្ធិ​ដល់​ជនបរទេស ប្រកាស​អោយប្រើ​ឆ្នាំ២០១០ អនុក្រឹត្យ​ស្តីពី​ការគ្រប់គ្រង​បុរី និង​អនុក្រឹត្យ​ស្តីពី ការកំណត់​ចំនួន​សមាមាត្រ និង​របៀប​គិតគូរ​ចំណែក​ឯកជន ដែល​អាចជា​កម្មសិទ្ធិរ​បស់​ជនបរទេស​នៅ ក្នុង​អគារ​សហកម្មសិទ្ធិ​ឆ្នាំ២០១០ ដោយ​ច្បាប់ និង​បទបញ្ញត្តិ​ទាំងនេះ មានចែង​ពី​និយមន័យ យន្តការ​និង​ការគ្រប់គ្រង​អគារ​សហកម្មសិទ្ធិ​នៅ​កម្ពុជា។

អាគារ​សហកម្ម​សិ​ទ្ឋ​សំដៅ​ដល់​អាគារ​ខុន​ដូ ដែលមាន​អ្នក​អភិវឌ្ឍន៍​តែ​ម្នាក់​ច្រើន​នាក់ និង​បាន​បែងចែក​យូ​នី​ត​លើ​អាគារ​រូ​ម​ច្រើន និង​លក់​ជូន​ដល់​អតិ​ជន​ទាំង​ជនជាតិខ្មែរ និង​ជនបរទេស​ចម្រុះ​ជាតិ​សាសន៍៕

ខេត្តព្រះសីហនុមានផ្លូវក្រោមដីសម្រាប់អ្នកថ្មើជើងជាលើកដំបូង ដែលត្រៀម បញ្ចប់ការសាងសង់

ដោយៈគង់ សូរិយា
​ភ្នំពេញៈ ខេត្តព្រះសីហនុមានផ្លូវក្រោមដីជាលើកដំបូង ដែលគ្រោងបញ្ចប់ការស្ថាបនានៅក្នុងខែឧសភានេះ ដែលនេះជាសមិទ្ឋផលថ្មីមួយនៃការលើកកំពស់សោភ័ណភាពផក្រុងព្រះសីហនុ។

ផ្លូវក្រោមដីសម្រាប់អ្នកដំណើរថ្មើរជើងចំនួន២កន្លែង ស្ថិតនៅតាមបណ្តោយផ្លូវជាតិលេខ៤ ខេត្តព្រះសីហនុ។ នេះបើយោងតាមរយៈវីដេអូរបស់កងវិស្វកម្មសម្តេចតេជោ ហ៊ុន សែន កាលពីពេលថ្មីៗនេះ។
ផ្លូវក្រោមដីនីមួយៗមានប្រវែង៥៣ម៉ែត្រ ទទឹង៧ម៉ែត្រ និងកម្ពស់៣,២មែត្រ ដោយមួយកន្លែងស្ថិតនៅចំពីមុខវិទ្យាល័យ ហ៊ុនសែន ឃ្លាំងលើ និងមួយកន្លែងទៀតស្ថិតនៅទីប្រជុំជនរោងចក្រ។
ផ្លូវនេះធ្វើឡើងសម្រាប់សិស្សានុសិស្ស និងកម្មករ កម្មការិនីឆ្លងកាត់ ក្នុងគោលបំណងដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ ដែលអាចកើតឡើងជាយថាហេតុណាមួយ។
លោកឧត្តមសេនីយ៍ទោ វង់ សំអាត មេបញ្ជាការរង កងកម្លាំងវិស្វកម្មសម្តេចតេជោ ហ៊ុន សែនបានឱ្យដឹងផងដែរថា ផ្លូវថ្មើរជើងក្រោមដីចំនួន២កន្លែងនេះ ត្រូវបានបើកការដ្ឋានជាផ្លូវការកាលពីថ្ងៃទី១៤ ខែកុម្ភៈ ឆ្នាំ២០២០។
តាមផែនការគ្រោងទុក គំរោងនេះគ្រោងបញ្ចប់ការដ្ឋានសាងសង់ នៅបំណាច់ខែសីហា ឆ្នាំ២០២១ ប៉ុន្តែដោយមានការតាំងចិត្តខ្ពស់ គម្រោងនេះនឹងបញ្ចប់នៅក្នុងខែឧសភានេះ ដើម្បីជាចំណងដៃជូនពលរដ្ឋខេត្តព្រះសីហនុ ក៏ដូចជាភ្ញៀវទេសចរជាតិ។
តាមព៌តមានបានឲ្យដឹងថា ក្រៅពីសមិទ្ធិផលផ្លូវថ្មើរជើងក្រោមដីទាំង២កន្លែងនេះ កងវិស្វកម្មសម្តេចតេជោ ហ៊ុន សែន សៀមរាបក៏បានស្ដារ និងស្ថាបនាឡើងវិញនេះ នៅហេដ្ឋារចនាសម្ព័ន្ធផ្លូវជាតិលេខ៤ ប្រវែង៦,៧០០ម៉ែត្រ ទទឹង២៩ម៉ែត្រ ចន្លោះពីគីឡូម៉ែត្រ២១៦ ដល់គីឡូម៉ែត្រលេខ២២២-៧០០ ដែលជាគម្រោងដ៏មានអាទិភាព និងសក្តានុពលរបស់ខេត្តព្រះសីហនុ៕

គម្រោងសាងសង់ផ្លូវជាតិលេខ១០ឆ្លងកាត់បាត់ដំបង – ពោធិ៍សាត់ – កោះកុង សម្រេចបាន៤៨,៧៧ភាគរយហើយ

          ដោយៈ ម៉ាណេត

ភ្នំពេញៈ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងផ្លូវជាតិលេខ១០ លោកប៊ុង ប៊ុនហួនបានអះអាងថា ការសាងសង់ផ្លូវជាតិលេខ១០ សម្រេចបានជិត៤៩ភាឡរយហើយ។

ក្នុងឱកាសដឹកនាំក្រុមការងារជំនាញ ចុះត្រួតពិនិត្យលក្ខណៈបច្ចេកទេស និងតាមដានវឌ្ឍនភាពការងារសាងសង់ផ្លូវជាតិដ៏សំខាន់នេះ លោករដ្ឋលេខាធិការបានឲ្យដឹងថា  ជាលទ្ធផល ការសាងសង់ផ្លូវនេះសម្រេចបាន៤៨,៧៧% ហើយគិតត្រឹមពាក់កណ្តាលខែឧសភា ឆ្នាំ២០២១ ហើយបច្ចុប្បន្នក្រុមហ៊ុនសាងសង់ កំពុងបន្តការងារសាងសង់របស់ខ្លួនយ៉ាងសស្រាក់សស្រាំ ទោះបីកម្ពុជាកំពុងជួបប្រទះនៃការឆ្លងរីករាលដាលជំងឺកូវីដ១៩យ៉ាងណាក៏ដោយ។

ផ្លូវជាតិលេខ១០មានប្រវែង១៩៧,៣៦ គីឡូម៉ែត្រ លាតសន្ធឹងកាត់ស្រុកសំឡូត ខេត្តបាត់ដំបង ពោធិ៍សាត់ រហូតដល់ខេត្តកោះកុង ហើយផ្លូវនេះមិនត្រឹមតែផ្តល់អត្ថប្រ​យោជន៍ក្នុងការធ្វើដំណើរឆ្លងកាត់ប៉ុណ្ណោះទេ ប៉ុន្តែវាអាចជាផ្នែកមួយទាក់ទាញ អ្នកទេស​ចរណ៍ដែលចូលចិត្តធ្វើដំណើរកម្សាន្ត អាចគយគន់ធម្មជាតិដ៏ស្រស់ត្រកាល ដោយសារផ្លូវនេះមានតំបន់ធម្មជាតិជាច្រើន ជាពិសេសព្រៃឈើ ក្រាស់ៗយ៉ាងស្រស់ស្អាត។

លោកប៊ុង ប៊ុនហួន បានជំរុញឱ្យក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេក​ទេស បន្តយកចិត្តទុកដាក់លើកិច្ចការងារសាងសង់ ប្រកបដោយការទទួលខុសត្រូវខ្ពស់ និងស្រប តាមស្តង់ដារបច្ចេកទេសត្រឹមត្រូវ ដើម្បីធានាការប្រើប្រាស់បានយូរអង្វែង និងចូលរួមអនុវត្តន៍ ឱ្យបាននូវវិធានការរបស់រាជរដ្ឋាភិបាល ៣កុំ ៣ការពារ ទាំងអស់គ្នាដើម្បីបញ្ជៀសការឆ្លងជម្ងឺកូវីដ-១៩៕

អ្នកជំនាញៈ ការវិនិយោគលើវិស័យដីធ្លីនៅកម្ពុជានឹងនៅតែទទួលបានផល ចំណេញខ្ពស់នាពេលអនាគត

ដោយៈ ប៊ី

ភ្នំពេញៈ អ្នកជំនាញលើកឡើងថា ការវិនិយោគលើវិស័យដីធ្លីនៅកម្ពុជា នឹងនៅតែទទួលបានឱកាស ដើម្បីទទួលបានផលចំណេញខ្ពស់នាពេលអនាគត ដោយសារប្រទេ​សកម្ពុជានឹងបន្តមានការអភិវឌ្ឍន៍លឿន ដែលរុញច្រានឱ្យគ្រប់វិស័យមានរីកចម្រើន ពិសេសវិស័យអចលនទ្រព្យ។

លោកច្រឹក សុខនីមប្រធានសមាគមអ្នកវាយតម្លៃ និងអចលនវត្ថុកម្ពុជា បានថ្លែងប្រាប់កាលពី១៧ ខែឧសភា ឆ្នាំ២០២១នេះថា កម្ពុជាគឺជាប្រទេសមួយក្នុងតំបន់អាស៊ាន ដែលមានចំណុចសក្តានុពល ក្នុងការធ្វើការងារទំនាក់ទំនង ទៅកាន់បណ្តាប្រទេសផ្សេងៗទៀតនៅក្នុងតំបន់អាស៊ាន ខណៈវិស័យអចលនទ្រព្យ នៅប្រទេសមានរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ពិសេសវិស័យដីធ្លី។

លោកបានលើកឡើងថា “វិស័យដីធ្លីនៅកម្ពុជា គឺជាឱកាសសម្រាប់ការវិនិយោគ ហើយតាមរយៈបទពិសោធន៍របស់យើង ការវិនិយោគនៅក្នុងវិស័យដីធ្លី ផ្តល់ចំណេញខ្ពស់ ដោយប្រទេសកម្ពុជាយើង ពិសេសរាជធានីភ្នំពេញ មានការអភិវឌ្ឍន៍លឿនណាស់ ហើយការអភិវឌ្ឍន៍ត្រូវបានពង្រីកទៅគ្រប់ទិសទីនៃទីក្រុង ដែលធ្វើឱ្យការវិនិយោគលើដីធ្លីទទួលបានផលចំណេញខ្ពស់”។

លោកបានថ្លែងថា ទី១ យើងត្រូវសិក្សាពីផែនការអភិវឌ្ឍន៍មេ របស់សាលាក្រុងភ្នំពេញថា តើផែនការនឹងត្រូវពង្រីកទៅតំបន់ណាមុនគេ ទី២ យើងត្រូវមើលពីទិន្នន័យក្បាលដី ដូច្នេះយើងនឹងដឹងពីប្រព័ន្ធអភិវឌ្ឍន៍ផ្លូវធំ ឬតូច ហើយយើងទទួលបានផលយ៉ាងឆាប់រហ័ស ដោយសារតែយើងមានប្រព័ន្ធផ្លូវនៅក្នុងផែនការអភិវឌ្ឍន៍មេ បោះបីជាយើងមិនទាន់ឃើញមានការអភិវឌ្ឍ លេចចេញជារូបរាងក៏ដោយ ពីព្រោះថានៅពេលគេចាប់ផ្តើមសាងសង់ផ្លូវភ្លាម ដីធ្លីនឹងឡើងថ្លៃភ្លាម។

លោកបានលើកឡើងបន្តថា តើយើងអាចទទួលបានព័ត៌មាន ទាក់ទងនឹងផែនការអភិវឌ្ឍន៍បានដោយរបៀបណា? អ្នកវិនិយោគ ដែលចង់បំណងចង់វិនិយោគលើវិស័យដីធ្លី គួរតែមកទាក់ទងនឹងភ្នាក់ងារអចលនទ្រព្យ ដែលពួកគាត់ដឹងច្បាស់ពីផែនការអភិវឌ្ឍន៍ទាំងអស់នេះ។ លោកបន្តថា យើងអាចទៅស្នើសុំឯកកសារទាក់ទង នឹងផែនការអភិវឌ្ឍនេះតាមរយៈសូរិយោដី សម្រាប់តាមបណ្តាខេត្ត ហើយយើងអាចទៅស្នើសុំព័ត៌មានទាំងនេះពីក្រសួងដែនដី នគរូបនិយកម្ម និងសំណង់ជាដើម៕