តើខណ្ឌទួលគោកមានសក្តានុពលអ្វីខ្លះដែលបាននិងកំពុងចាប់យកចំណែកទីផ្សារសំណង់អគារខ្ពស់ៗ?

ដោយ៖ ប៊ី

ភ្នំពេញ៖ តំបន់ទួលគោក កំពុងមានការអភិវឌ្ឍលើសំណង់អគារខ្ពស់ៗ ដូចជាខុនដូ អគារការិយាល័យ និងផ្សារទំនើបជាដើម ក្នុងរយៈពេលប៉ុន្មានឆ្នាំចុងក្រោយនេះ ក្នុងនោះគម្រោងធំៗមួយចំនួនក៏បាននិងកំពុងសាងសង់ និងអភិវឌ្ឍន៍បណ្ដើរៗ ទោះស្ថិតនៅក្នុងវិបត្តិយ៉ាងណាក្ដី។

អ្នកជំនាញអចលនទ្រព្យជាច្រើនបានឱ្យដឹងថា ទួលគោក គឺជាតំបន់ទាក់ទាញមួយសម្រាប់អភិវឌ្ឍន៍ខុនដូ និងអគារខ្ពស់ៗ បន្ទាប់ពីតំបន់បឹងកេងកង។

ប្រធានសមាគមអចលនទ្រព្យសកលលោកសំ សុខនឿន បានប្រាប់កាលពីថ្មីៗនេះថា ពីមុនបើនិយាយពីខុនដូ គឺគេសំដៅលើតំបន់បឹងកេងកេង តែបច្ចុប្បន្ននេះគេ ឃើញថា តំបន់ផ្សេងៗក៏ទាក់ទាញនូវគម្រោងខុនដូ និងអគារពាណិជ្ជកម្ម ក្នុងនោះទួលគោកក៏ជាតំបន់ ដែលមានការអភិវឌ្ឍខុនដូច្រើនជាងគេមួយ នៅរាជធានីភ្នំពេញ។

លោកបានថ្លែងទៀតថា កត្តា ដែលធ្វើឱ្យតំបន់ទួលគោក ទាក់ទាញការវិនិយោគលើខុនដូ គឺតម្លៃដីនៅមានកម្រិតបើធៀបនឹងតំបន់ដែលមានសក្ដានុពលនៃការអភិវឌ្ឍខុនដូ ហើយទួលគោកក៏ប្រៀបបាននឹងតំបន់កណ្ដាលក្រុងមួយ ងាយស្រួលក្នុងការធ្វើដំណើរទៅគ្រប់ទិសនៃរាជធានីភ្នំពេញ ដូច្នេះហើយទើបវិនិយោគិនចាប់អារម្មណ៍លើការអភិវឌ្ឍខុនដូនៅតំបន់ទួលគោក។

លោកបានថ្លែងបន្តថា “ទួលគោកជាតំបន់មួយ ដែលមានការអភិវឌ្ឍលឿន ក្នុងនោះមានសាលារៀន ផ្សារទំនើប មន្ទីរពេទ្យ និងអាជីវកម្មចម្រុះ”។

លោកបន្តថា នៅក្នុងចំណុចវិជ្ជមានក៏មានចំណុច ហើយអវិជ្ជក៏មានសម្រាប់វិស័យខុនដូ ក្នុងតំបន់ទួលគោកនេះ ព្រោះវិនិយោគិនអភិវឌ្ឍន៍ខុនដូភាគច្រើន គឺផ្ដោតតែលើជនបរទេស និងអ្នកមានចំណូលខ្ពស់ មានន័យថា ខុនដូ ភាគច្រើននៅទួលគោក គឺមានតម្លៃខ្ពស់ ដែលធ្វើឱ្យអ្នកមានជីវភាពមធ្យម មិនមានលទ្ធភាពទិញ ជាក់ស្ដែង នៅពេលមានបញ្ហាដោយសារតែកូវីដ១៩ ធ្វើឱ្យការលក់ខុនដូ សម្រាប់ជនបរទេស និងអ្នកមាន គឺជួបបញ្ហាប្រឈមដូច្នេះ។

លោកបណ្ឌិតគីម ហ៊ាងប្រធានក្រុមហ៊ុន KW Cambodia ធ្លាប់មានប្រសាសន៍ថា ការអភិវឌ្ឍនៅកម្ពុជា នៅតែមានសក្ដានុពល បើធៀបនឹងប្រទេសជិតខាងក៏ដូចជាប្រទេសក្នុងតំបន់។ អ្វី ដែលគេមាននៅពេលនេះ កម្ពុជានៅមិនទាន់មាននៅឡើយ ដូច្នេះ៥ឆ្នាំ ឬ១០ឆ្នាំក្រោយ កម្ពុជានឹងមានដូចគេដែរ ហើយការអភិវឌ្ឍផ្សេងៗ នឹងដើរទៅតាមក្រោយជាបន្តបន្ទាប់៕

ផ្លូវជាតិលេខ៧ ត្បូងឃ្មុំ-ក្រចេះ នឹងត្រូវស្ថាបនាកែលម្អឡើងវិញក្រោមជំនួយហិរញ្ញប្បទានរបស់ធនាគារពិភពលោក

ដោយ ៖ រ៉ាណេត

ភ្នំពេញ ៖ កំណាត់ផ្លូវជាតិលេខ៧ (ខេត្តត្បូងឃ្មុំ-ក្រចេះ) ដែលមានប្រវែងសរុប១៦៤ គីឡូម៉ែត្រ ដោយលើកកម្ពស់គុណភាពផ្លូវពីកៅស៊ូពីរស្រទាប់ស្តើង (DBST) ទៅជាបេតុងកៅស៊ូ បែងចែកជាបីការដ្ឋានធំៗ ប្រើប្រាស់រយៈពេលសាងសង់ចំនួន១៨ខែ និងរយៈពេលថែទាំចំនួន៣៦ ខែ សាងសង់ដោយក្រុមហ៊ុនចិន ត្រួតពិនិត្យលក្ខណៈបច្ចេកទេសដោយក្រុមហ៊ុនកូរ៉េ និងចំណាយថវិកាសរុបប្រមាណ ៣៦.៤៥៦.០៦៤,៧៥ដុល្លារអាមេរិកក្រោមហិរញ្ញប្បទានរបស់ធនាគារពិភពលោក។

លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីរសៀលថ្ងៃទី១៥ ខែកុម្ភៈ ឆ្នាំ២០២១ម្សិលមិញនេះ បានអញ្ជើញដឹកនាំគណៈប្រតិភូក្រសួងចូលរួមកិច្ចប្រជុំការងារគម្រោងជួសជុល និងសាងសង់ផ្លូវជាតិលេខ៧(ត្បូងឃ្មុំ-ក្រចេះ) ដោយក្នុងនោះក៏មានកិច្ចប្រជុំពីគម្រោងសាងសង់ និងកែលម្អផ្លូវជាតិលេខ៣(កំពត-វាលរេញ)ផងដែរ ក្រោមហិរញប្បទានរបស់ធនាគារពិភពលោក នៅទីស្តីការ ក្រសួងសេដ្ឋកិច្ច និងហិរញ្ញវត្ថុ ក្រោមអធិបតីភាពឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

លោកទេសរដ្ឋមន្ត្រីបានបញ្ជាក់ថា កិច្ចប្រជុំនេះធ្វើឡើងក្នុងគោលបំណងរាយការណ៍ ពិគ្រោះយោបល់ ក៏ដូចជាស្នើសុំអនុសាសន៍ដ៏ខ្ពង់ខ្ពស់ពីសំណាក់ឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្ត្រី ដើម្បីរិះរកនីតិវិធីជួសជុល និងសាងសង់ផ្លូវទាំងពីរខ្សែ គឺផ្លូវជាតិលេខ៣(កំពត-វាលរេញ) និងផ្លូវជាតិលេខ៧(ត្បូងឃ្មុំ-ក្រចេះ)។

លោកបានបញ្ជាក់ថា “ក្រសួងបានសម្រេចដកបុគ្គលិករបស់ក្រុមហ៊ុនទីប្រឹក្សាបច្ចេកទេសចំនួន៨រូប ព្រមទាំងបានដាក់បន្ថែមមន្ត្រីបច្ចេកទេសពីក្រសួងសាធារណការ និងដឹកជញ្ជូន ដើម្បីតាមដានការងារបច្ចេកទេសសាងសង់របស់ក្រុមហ៊ុនទាំងពីរ សំដៅឱ្យការសាងសង់ប្រព្រឹត្តទៅស្របតាមបទដ្ឋានបច្ចេកទេស និងកិច្ចសន្យាសាងសង់”។

ជាមួយគ្នានោះផងដែរ លោកទេសរដ្ឋមន្ត្រីក៏បានស្នើស្នើសុំអនុសាសន៍ពីឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្ត្រី ក៏ដូចជាមតិយោបល់ពីអង្គប្រជុំទាំងមូល ដើម្បីរិះរកនីតិវិធីជួសជុល និងសាងសង់ផ្លូវ ទាំងពីរខ្សែនេះឱ្យមានគុណភាពរឹងមាំអាចប្រើប្រាស់បានយូរអង្វែង។

គម្រោងសាងសង់ធ្វើឱ្យប្រសើរឡើងផ្លូវជាតិលេខ៧មានប្រវែងសរុប ១៦៤ គីឡូម៉ែត្រ ដោយលើកកម្ពស់គុណភាពផ្លូវពីកៅស៊ូពីរស្រទាប់ស្តើង (DBST) ទៅជាបេតុងកៅស៊ូ បែងចែកជាបីការដ្ឋានធំៗ ប្រើប្រាស់រយៈពេលសាងសង់ចំនួន១៨ខែ និងរយៈពេលថែទាំចំនួន៣៦ ខែ សាងសង់ដោយក្រុមហ៊ុនចិន ត្រួតពិនិត្យលក្ខណៈបច្ចេកទេសដោយក្រុមហ៊ុនកូរ៉េ និងចំណាយថវិកាសរុបប្រមាណ ៣៦.៤៥៦.០៦៤,៧៥ដុល្លារអាមេរិក។

ដោយឡែកគម្រោងថែទាំ និងពង្រឹងគុណភាពកំណាត់ផ្លូវជាតិលេខ៣ (ទីរួមខេត្តកំពត-វាលរេញ) មានប្រវែង៥៤,៣០គីឡូម៉ែត្រ ត្រូវបានជួសជុល និងក្រាលបេតុងកៅស៊ូ ស្ថិតក្នុងភូមិសាស្ត្រខេត្តកំពត និងខេត្តព្រះសីហនុ ដោយប្រើប្រាស់រយៈពេល៥៤ខែ ចំណាយថវិកាប្រមាណ ១២.០៦១.៦៨៨,០៥ ដុល្លារ ក្រោមគម្រោងឥណទាន IDA Credit លេខ.៥៧៨៩-Kh៕

ប្រទេសចិនវ៉ាដាច់សហរដ្ឋអាមេរិក ក្លាយជាដៃគូពាណិជ្ជកម្មធំបំផុតរបស់សហភាពអឺរ៉ុប

ដោយៈសុខុម

ព្រុសសែល: ទីភ្នាក់ងារស្ថិតិ Eurostat របស់សហភាពអឺរ៉ុប បានបញ្ជាក់កាលពីថ្ងៃច័ន្ទ ទី១៥ កុម្ភៈថា ប្រទេសចិន កាលពីឆ្នាំមុនបានវ៉ាដាច់សហរដ្ឋអាមេរិក ដោយបានក្លាយជាដៃគូពាណិជ្ជកម្មធំបំផុតរបស់សហភាពអឺរ៉ុប។ នេះបើយោងតាមសារព័ត៌មាន CNA ចុះផ្សាយក្នុងថ្ងៃដដែល។

ទីភ្នាក់ងារនេះលើកឡើងទៀតថា សហរដ្ឋអាមេរិក បានធ្លាក់មកត្រឹមជាដៃគូពាណិជ្ជកម្មធំបំផុតទី២ របស់សហភាពអឺរ៉ុប ហើយប្រទេសអង់គ្លេស ដែលបានចាកចេញពីសហភាពអឺរ៉ុប ទៅហើយនោះគឺជាដៃគូពាណិជ្ជកម្មធំបំផុតទី៣ ។

ការវ៉ាដាច់សហរដ្ឋអាមេរិកនេះបានកើតឡើង ក្រោយសេដ្ឋកិច្ចរបស់ប្រទេសចិន ទទួលរងផលប៉ះពាល់ខ្លាំង ដោយសារការឆ្លងរាតត្បាតវីរុសកូវីដ-១៩ អំឡុងត្រីមាសទី១ ប៉ុន្តែបានងើបឡើងវិញយ៉ាងឆាប់រហ័ស ដោយនៅដំណាច់ឆ្នាំ២០២០ តម្រូវការប្រើប្រាស់បានកើនឡើងលើសកម្រិតក្នុងឆ្នាំ២០១៩ ទៅទៀត។

កត្តានេះបានជួយជំរុញការលក់ផលិតផលអឺរ៉ុប ជាពិសេសនៅក្នុងវិស័យរថយន្ត និងទំនិញប្រណីត ខណៈការនាំចេញរបស់ប្រទេសចិន ទៅកាន់អឺរ៉ុប ទទួលផលពីតម្រូវការឧបករណ៍វេជ្ជសាស្ត្រ និងគ្រឿងអេឡិចត្រូនិកកើនឡើងខ្លាំង។

ការធ្លាក់តំណែងរបស់សហរដ្ឋអាមេរិក ពីឋានៈជាដៃគូពាណិជ្ជកម្មធំបំផុតរបស់សហភាពអឺរ៉ុប កើតមានឡើង ខណៈសហភាពអឺរ៉ុប និងប្រទេសចិន កំពុងស្វះស្វែងផ្ដល់សច្ចានុមតិ (អនុម័ត) កិច្ចព្រមព្រៀងវិនិយោគរយៈពេលវែងមួយ ដែលនឹងជួយឱ្យក្រុមហ៊ុននានារបស់សហភាពអឺរ៉ុប ចូលមកក្នុងទីផ្សារចិនកាន់តែទូលំទូលាយ។

ទីភ្នាក់ងារស្ថិតិ Eurostat និយាយថា ទំហំពាណិជ្ជកម្មជាមួយចិន បានឈានដល់ ៥៨៦ ពាន់លានអឺរ៉ូ (៧១១ ពាន់លានដុល្លារអាមេរិក) ក្នុងឆ្នាំ២០២០ បើធៀបនឹងទំហំពាណិជ្ជកម្មជាមួយសហរដ្ឋអាមេរិក ដែលមានត្រឹម៥៥៥ពាន់លានអឺរ៉ូ (៦៧៣ ពាន់លានដុល្លារអាមេរិក) ។

ទីភ្នាក់ងារនេះបានបន្តថា ការនាំចេញរបស់សហភាពអឺរ៉ុប បានកើនឡើង២,២% ដល់២០២,៥ពាន់លានអឺរ៉ូ (២៤៥,៥ ពាន់លានដុល្លារ) ហើយទន្ទឹមនេះការនាំចូលពីប្រទេសចិន បានកើនឡើង៥,៦% ដល់ ៣៨៣,៥ ពាន់លានអឺរ៉ូ (៤៦៥ ពាន់លានដុល្លារអាមេរិក) ។

ការនាំចេញរបស់សហភាពអឺរ៉ុប ទៅកាន់សហរដ្ឋអាមេរិក បានធ្លាក់ចុះ ១៣,២% ក្នុងរយៈពេលដូចគ្នា ហើយការនាំចូលធ្លាក់ចុះ៨,២% ។

ទីភ្នាក់ងារស្ថិតិ Eurostat និយាយថា ពាណិជ្ជកម្មជាមួយប្រទេសអង់គ្លេស បានធ្លាក់ចុះខ្លាំងក្នុងឆ្នាំ២០២០ ជាឆ្នាំដែលប្រទេសអង់គ្លេស បានចាកចេញពីសហភាពអឺរ៉ុប ជាផ្លូវការ ប៉ុន្តែត្រូវស្ថិតក្នុងរយៈពេលអន្តរកាលរហូតដល់ថ្ងៃទី៣១ ធ្នូ។ ការនាំចេញរបស់សហភាពអឺរ៉ុប ទៅកាន់ប្រទេសអង់គ្លេស បានធ្លាក់ចុះ១៣,២% ចំណែកឯការនាំចូលឆ្លងព្រែកជីកអង់គ្លេស បានធ្លាក់ចុះ ១៣,៩% ៕

Bluebell ក្រុមហ៊ុនផ្សារទំនើបបែបគ្រួសារបានត្រៀមឈានជើងចូលទីផ្សារកម្ពុជា

ដោយស៊ីវ ម៉េង

ភ្នំពេញៈ ក្រុមហ៊ុនផ្សារទំនើបបែបលក្ខណៈគ្រួសារ Bluebell បាននិងកំពុងឈានជើងចូលទីផ្សារកម្ពុជា ជាមួយនឹងការត្រៀមផ្តល់សេវាកម្មផ្សារទំនើប នៃគំរោងមជ្ឈមណ្ឌលពាណិជ្ជកម្មធំមួយនៅក្រុងភ្នំពេញ។

គំរោងមជ្ឈមណ្ឌលពាណិជ្ជកម្មនេះ ដំបូងឡើយគ្រោងសហការជាមួយក្រុមហ៊ុនផ្សារទំនើបដ៏ល្បីនៅសឹង្ហបុរី The Capital ប៉ុន្តែការសហការនេះទំនងជាបានលុបចោល ដោយសារគម្រោងនេះ បានពន្យាពេលសាងសង់ ដោយមិនបញ្ចប់តាមផែនការ។

យ៉ាងណាក៏ដោយ ក្រុមហ៊ុន Bluebell Group ទោះជាក្រុមហ៊ុនមានលក្ខណៈគ្រួសារក្តី ប៉ុន្តែត្រូវបានគេទទួលស្គាល់ថា ជាក្រុមហ៊ុនឈានមុខគេមួយ នៅក្នុងវិស័យអាជីវកម្មផ្សារទំនើប រយៈពេលជាង៦០ឆ្នាំមកហើយ។ តាមរយៈការដាក់ដំណើរការ នូវផលិតផលម៉ាកប្រណីតៗ ជាលក្ខណៈសកល ១៥០ម៉ាក និងស្របតាមរបៀបរស់នៅបែបស៊ីវិល័យ នៅទូទាំងទ្វីបអាស៊ី ទាំងក្នុងវិស័យអាជីវកម្មផ្សារទំនើបក្នុងស្រុក និងវិស័យអាជីវកម្មផ្សារទំនើប ដែលបម្រើការដល់ការធ្វើដំណើរនានា និងលើគ្រប់ប្រភេទផលិតផលផងដែរ។

នាយកប្រតិបត្តិនៃក្រុមហ៊ុន Bluebell Group លោក Ashley Micklewright បានឱ្យដឹងថា បណ្ដូលអាជីវកម្មស្នូលរបស់ខ្លួន ក្នុងនាមជាអ្នកថែរក្សា និងប្រតិបត្តិ គឺស្ថិតនៅលើការយកចិត្តទុកដាក់ស្គាល់ពីពេលវេលា ទីកន្លែង វិធីសាស្ត្រ និងតម្រូវការរបស់អតិថិជន។

លោកបន្តថា រួមជាមួយការទាញចូលនូវបណ្ដាម៉ាក ផលិតផលចំបងៗជាលក្ខណៈសាកលចូលមកក្នុងទ្វីបអាស៊ី និងបទពិសោធន៍ក្នុងការគ្រប់គ្រងម៉ាកទាំងនេះ អស់រយៈពេលជាង៦ទសវត្សរ៍កន្លងទៅ លើផ្សារទំនើបចំនួន១០ ៕

អ្នកជំនាញ៖ ខេត្តចំនួន៥ នៅតែបន្តមានតម្រូវការទីផ្សារដីធ្លីក្នុងស្ថានភាពវិបត្តិ Covid-19

ដោយៈ រ៉ាណេត

ភ្នំពេញៈ ទោះជាកំពុងស្ថិតនៅក្នុងស្ថានភាព នៃវិបត្តិជំងឺ Covid-19 យ៉ាងណាក៏ដោយ សម្រាប់ខេត្តក្រុងចំនួន៥រួមមាន ខេត្តកែប កំពត កោះកុង កំពង់ស្ពឺ និងខេត្តមណ្ឌលគីរី នៅតែបន្តមានតម្រូវការទីផ្សារដីធ្លី និងមានសកម្មភាពទិញលក់ដដែល ខណៈដែលនៅក្នុងរាជធានីភ្នំពេញកំពុងជួបភាពស្ងប់ស្ងាត់។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍នៅរសៀលថ្ងៃទី៨ ខែធ្នូ ឆ្នាំ២០២០នេះថា ទោះជាមានបញ្ហាប្រឈម ទៅនឹងព្រឹត្តិការណ៍ជាច្រើន ប៉ុន្តែសម្រាប់សកម្មភាពនៃការទិញលក់ដីធ្លីនៅតាមតំបន់ជាយក្រុង ជាពិសេសនៅខេត្តគោលដៅទេសចរណ៍មួយចំនួន ដែលកំពុងមានគម្រោងអភិវឌ្ឍន៍ ពីវិស័យឯកជននៅតែមានសកម្មភាព គ្រាន់តែមិនសូវមមាញឹកខ្លាំង។

លោកស្រីបានបន្តថា “សម្រាប់នៅរាជធានីភ្នំពេញ ហាក់មានភាពស្ងប់ស្ងាត់បន្តិច ប៉ុន្តែនៅតាមខេត្តមួយចំនួន ដូចជា កំពត កែប កោះកុង កំពង់ស្ពឺ ក៏ដូចជាមណ្ឌលគីរី គឺនៅបន្តសកម្មភាពទិញលក់ ប៉ុន្តែមិនសូវមមាញឹកខ្លាំងដូចដើមឆ្នាំនោះទេ ហើយភាគច្រើនអ្នកទិញគឺជាអ្នកអភិវឌ្ឍន៍គម្រោងនានា ដូចជាគម្រោងតំបន់កម្សាន្តជាដើម” ។

លោកស្រីបានបន្តថា ខេត្តទាំងអស់នេះ គឺមានសក្ដានុពលដូចគ្នា ទៅលើផ្នែកទេសចរណ៍ ដូច្នេះការទិញភាគច្រើន គឺសម្រាប់អភិវឌ្ឍន៍ជាតំបន់កម្សាន្ត ផ្ទះលំហែរ ឬបឹងហ្គាឡូជាដើម ប៉ុន្តែសម្រាប់តម្លៃហាក់មិនមានការឡើងនោះទេ” ។

ជាមួយគ្នានេះ អគ្គនាយកក្រុមហ៊ុនភ្នាក់ងារអចលនទ្រព្យ Century21 Fortuna Investment លោក វ៉ា វីរៈ បានប្រសាសន៍ថា “តាមការមើលឃើញរបស់ខ្ញុំ ក្នុងតំណាក់កាលនេះ ទាំងនៅក្នុងរាជធានីភ្នំពេញ ទាំងនៅតាមបណ្តាខេត្តនានា គឺមានភាពស្ងប់ស្ងាត់បន្តិច លើកលែងតែខេត្តក្រុងដែលជាគោលដៅទេសចរណ៍ ដែលនៅមានបន្តការទិញលក់” ។

លោកបានបន្តថា សកម្មភាពនៃការទិញលក់នេះទៀតសោត ក៏មិនមានទំហំធំដុំនោះដែរ ដោយសារតែចរន្តនៃការវិនិយោគទ្រង់ទ្រាយ ធំពីសំណាក់អ្នកវិនិយោគ និងអភិវឌ្ឍន៍បរទេសត្រូវបានកាត់បន្ថយ ជាពិសេសការអវត្តមានក្រុមហ៊ុនវិនិយោគចិនដែលបណ្តាលមកពីវិបត្តិនៃជំងឺដែលកំពុងកើតមាន។

លោក វ៉ា វីរៈ បានមានប្រសាសន៍ថា “នៅពេលដែលមានអ្នកវិនិយោគធំៗចុះទិញដីធ្លីសម្រាប់អភិវឌ្ឍន៍ក្នុងគម្រោងណាមួយ វានឹងបន្តជះឥទ្ធិពលល្អ ដល់អ្នកវិនិយោគបន្ទាប់ដែលមានទំហំតូចជាង ប៉ុន្តែនៅពេលដែលអវត្តមានក្រុមហ៊ុនធំ ដូច្នេះការទិញលក់មួយចំនួនទៀតការត្រូវបានកាត់បន្ថយ” ។ លោកបន្តថា “ប៉ុន្តែសម្រាប់ខេត្តទាំង៥ដូចដែលបានលើកឡើងខាងលើនេះ ភាគច្រើនជាការវិនិយោគដោយក្រុមហ៊ុនក្នុងស្រុក សម្រាប់ រយៈពេលវែងតែប៉ុណ្ណោះ” ៕

តើស្ថាបត្យកម្មសំណង់រចនាបទខ្មែរមានការវិវត្ត និងរីកចម្រើនយ៉ាងដូចម្តេច?

ដោយគង់ សូរិយា

ភ្នំពេញៈ ស្ថាបត្យកម្មខ្មែរ គឺមានការវិវត្តនិងរីកចម្រើនឥតឈប់ឈរ ពីសម័យមួយទៅសម័យមួយ អាស្រ័យលើបរិបទសេដ្ឋកិច្ច សង្គម លក្ខខ័ណ្ឌអាកាសធាតុ និងការយល់ដឹងរបស់ប្រជាពលរដ្ឋ។

លោកបណ្ឌិតសភាចារ្យ ស៊ុំ ឈុំប៊ុន នាយកមជ្ឈមណ្ឌលសិក្សាស្រាវជ្រាវអាស៊ីនៃរាជបណ្ឌិត្យសភាកម្ពុជា នៅក្នុងសិក្ខាសាលាស្តីពីការវិវត្តន៍ នៃសំណង់ស្ថាបត្យកម្មប្រាសាទខ្មែរថា ស្ថាបត្យករខ្មែរ គឺមានទេពកោសល្យខ្ពង់ខ្ពស់បំផុត ក្រៅពីទេពកោសល្យខាងការផ្សែផ្សំ ធ្វើសំយោគពីសិល្បៈបរទេស និង សិល្បៈខ្មែរ ជំនាន់មុនស្ថាបត្យករខ្មែរ បានបង្កើតចេញនូវសិល្បៈថ្មីមួយទៀត ដែលមានទម្រង់ជាសិល្បៈខ្មែរ ស្របតាមទស្សនៈខ្មែរសុទ្ធសាធ។

លោកបន្តថា ជាការពិតក្នុងបរិបទសាកលភាវូបនីយកម្ម សំណង់និងស្ថាបត្យកម្មខ្មែរសម័យទំនើប ចាប់តាំងពីសម័យអាណានិគមនិយមបារាំង សម័យសង្គមរាស្ត្រនិយម រហូតមកដល់សម័យបច្ចុប្បន្ន ខ្មែរតែងតែផ្សារភ្ជាប់ទៅនឹងស្ថាបត្យកម្ម និង ក្បាច់រចនាបែបបុរាណខ្មែរ ដែលបានបន្សល់ទុកជាមរតកដ៏វិសេសវិសាល តាំងពីសម័យចក្រភពអង្គរ បង្កើតបានជាតម្លៃដ៏ពិសិដ្ឋរបស់ប្រជាជាតិខ្មែរ ដែលពុំអាចកាត់ថ្លៃបាន។

ជាមួយគ្នានេះ លោកព្រឹទ្ធាចារ្យឡោ សាន វីរៈសិល្បករនៃក្រសួងវប្បធម៌ និងវិចិត្រសិល្បៈបានគូសបញ្ជាក់អំពីទេពកោសល្យដ៏វិសេសវិសាល របស់បុព្វបុរសខ្មែរ នៅក្នុងវិស័យស្ថាបត្យកម្មខ្មែរបុរាណ និងការវិវត្ត និងរីកចម្រើនឥតឈប់ឈរនៃស្ថាបត្យកម្មខ្មែរ ពីសម័យមួយទៅសម័យមួយ ដែលបានឆ្លុះបញ្ចាំងអំពីទេពកោសល្យ ដ៏ខ្ពង់ខ្ពស់របស់ស្ថាបត្យករខ្មែរបុរាណ។

លោកបណ្ឌិតបន្តថា “ក្រៅពីទេពកោសល្យខាងការផ្សែផ្សំ ធ្វើសំយោគពីសិល្បៈបរទេស និងសិល្បៈខ្មែរជំនាន់មុនៗ ស្ថាបត្យករខ្មែរបានបង្កើតចេញនូវសិល្បៈថ្មីមួយទៀតដែលមានទម្រង់ជាសិល្បៈខ្មែរ ស្របតាមទស្សនៈខ្មែរសុទ្ធសាធទៀតផង” ។

លោកព្រឹទ្ធាចារ្យឡោ សាន បានគូសបញ្ជាក់បន្ថែម ដោយបានលើកឡើងជាឧទាហរណ៍ថា នៅសម័យភ្នំដា ខ្មែរបានលុងភ្នំធ្វើជាប្រាសាទតាមទម្រង់ នៃសិល្បៈឥណ្ឌា តែក្រោយមកស្ថាបត្យករខ្មែរ បានច្នៃប្រឌិតពីជំនឿគោរពនៅលើទីខ្ពស់ ដូចជាភ្នំធម្មជាតិមកជំនួស ដោយការកសាងប្រាសាទភ្នំនៅលើដីរាបទៅវិញ ជាក់ស្តែងការសាងសង់ប្រាសាទនៅសម័យឧដុង្គ។

ជាការពិតណាស់ ទស្សនគោរពទីខ្ពស់នេះខ្មែរមានរួចមកហើយ តាំងពីបុរេប្រវត្តិមកម្ល៉េះ ហើយលុះដល់ពេលដែលឥណ្ឌាចូលមកដល់ស្រុកខ្មែរ ក៏ជំរុញឱ្យទស្សនៈទាំងពីរដែលស្របគ្នានេះ រឹតតែមានឥទ្ធិពលខ្លាំងឡើងថែមទៀត ហើយវប្បធម៌ដែលខ្មែរបានបង្កើត គឺជាការច្នៃប្រឌិតទាញយកអរិយធម៌បរទេស ដែលមានលក្ខណៈប្រហាក់ប្រហែលអាចច្របាច់បញ្ចូលគ្នាបាន មកធ្វើការកែច្នៃនិងបង្កើតថ្មី ឱ្យលក្ខណៈជាព្រលឹងនៃវប្បធម៌ខ្មែរតាមបែបខ្មែរ។

រាជបណ្ឌិតសភានៃកម្ពុជា បានសិក្ខាសាលានេះបានផ្សព្វផ្សាយ ជាអត្ថបទពិគ្រោះយោបល់ និងបានជាអនុសាសន៍ រួមវិភាគទានដ៏មានតម្លៃ សម្រាប់ជាប្រយោជន៍ ទៅដល់ស្ថាបត្យករ ខ្មែរឱ្យមានទេពកោសល្យ ការច្នៃប្រឌិតខ្ពស់មានទេព កោសល្យខាងការផ្សែផ្សំធ្វើសំយោគពីសិល្បៈបរទេស និងសិល្បៈខ្មែរជំនាន់មុនៗ ដើម្បីបង្កើតចេញនូវសិល្បៈថ្មីមួយ ដែលមានទម្រង់ជាសិល្បៈខ្មែរ ជាប្រទីបបំភ្លឺផ្លូវសង្គមកម្ពុជា ឱ្យមានការអភិវឌ្ឍឥតឈប់ឈរ ប្រកបដោយវឌ្ឍនភាពរីកចម្រើន និងសេចក្ដីរុងរឿងជានិរន្តរ៍៕

ក្រុមហ៊ុនអចលនទ្រព្យលំដាប់អន្តរជាតិមួយ នឹងបង្ហាញនូវការព្យាករណ៍ពីទស្សនវិស័យអចលនទ្រព្យសម្រាប់ឆ្នាំ២០២១

ដោយគង់ សូរិយា

ភ្នំពេញៈ ក្រុមហ៊ុនអចលនទ្រព្យលំដាប់ពិភពលោក CBRE Cambodia នឹងបង្ហាញរបាយការណ៍ស្តីពី ទស្សនវិស័យអចលនទ្រព្យកម្ពុជា សម្រាប់ឆ្នាំ២០២១នៅថ្ងៃទី១៧ កុម្ភៈខាងមុខនេះ។

លោកស្រី អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១៥ កុម្ភៈកន្លងមកថា ពិតហើយក្រុមហ៊ុននឹងបង្ហាញនូវការព្យាករណ៍ និងការវិភាគមួយចំនួនស្តីពីទស្សនវិស័យ សំរាប់វិស័យអចលនទ្រព្យកម្ពុជា និងថ្នាក់តំបន់នៅថ្ងៃពុធខាងមុខនេះ។ លោកស្រីបន្តថា របាយការណ៍ស្តីពីទស្សនវិស័យ និងការព្យាករណ៍ពីស្ថានភាពអចលនទ្រព្យឆ្នាំនេះ នឹងមានសូចនាករសំខាន់ៗ ដែលនឹងត្រូវលើកមកបង្ហាញ ខណៈទីផ្សារកម្ពុជាទោះបីមានភាពរងគ្រោះដោយវិបត្តិកូវីដ១៩ ប៉ុន្តែកម្ពុជានៅមានភាពល្អប្រសើរ បើធៀបជាមួយបណ្តាប្រទេសក្នុងតំបន់់។

ក្រុមហ៊ុន CBRE Cambodia តែងតែធ្វើការសិក្សា និងវិភាគពីស្ថានភាពទទីផ្សារអចលនទ្រព្យនៅតាមបណ្តាប្រទេសនានា ជារៀងរាល់ឆ្នាំជាមួយនឹងអ្នកជំនាញអចលនទ្រព្យលំដាប់អន្តរជាតិ។

លោកស្រី អាន សុធីតា ធ្លាប់បានមានប្រសាសន៍ឲ្យដឹងថា “ទោះបីជាកម្ពុជាមានភាពរងគ្រោះ ប៉ុន្តែទីផ្សារនេះនឹងឆាប់ងើបឡើងវិញពីវិបត្តិ លឿនជាងបណ្តាប្រទេសមួយចំនួនក្នុងតំបន់” ។ លោកស្រីបន្តថា “ការវិនិយោគអចលនទ្រព្យនៅកម្ពុជា មានផលចំណេញខ្ពស់ពីការវិនិយោគ ដោយអត្រាចំណេញប្រចាំឆ្នាំស្ថិតក្នុងរង្វង់៧ភាគរយ ខណៈប្រទេសក្នុងតំបន់ដូចជាប្រទេសថៃ ម៉ាឡេស៊ី ឥណ្ឌូនេស៊ីជាដើមមានផលចំនេញពីការវិនិយោគក្នុងរង្វង់៤ភាគរយប៉ុណ្ណោះ” ៕

គំរោងសួនកំសាន្តតម្លៃ ៦០លានដុល្លារ ចាប់ផ្តើមបើកឲ្យសាធារណៈជនចូលទស្សនាកំសាន្តបណ្តើរៗ

ដោយស៊ីវ ម៉េង

ភ្នំពេញៈ សួនកំសាន្ត EURO Park តម្លៃ ៦០លានដុល្លារអាមេរិក ដែលវិនិយោគដោយក្រុមហ៊ុនបុរីប៉េង ហួត ស្ថិតនៅតាមបណ្តោយផ្លូវជាតិលេខ១ បានបើកឲ្យសាធារណៈជនចូលទស្សនាកំសាន្តបណ្តើរៗហើយ ប៉ុន្តែការសម្ភោធបើកដំណើរការជាផ្លូវការមិនទាន់កំណត់ពេលជាក់លាក់ទេ។

អគ្គនាយកក្រុមហ៊ុនបុរីប៉េង ហួត គ្រុបលោកឧកញ៉ា ថៃ ម៉េងលី បានឲ្យដឹងតាមអ៊ីម៉េលកាលពីពេលថ្មីៗនេះថា គំរោងអភិវឌ្ឍន៍នេះសួនកំសាន្តលំដាប់ អន្តរជាតិនេះ ត្រូវបានអភិវឌ្ឍនៅលើផ្ទៃដីជិត៨ហិកតា ជាមួយនិងអគារសាលប្រជុំ ឬសាលសំរាប់រៀបចំអាពាហ៍ពិពាហ៍។

សួនកំសាន្តនេះត្រូវបានរចនាឡើងតាមបែបអឺរ៉ុប ដែលមានសំណង់អគារពិសេសប្លែកៗ និងលំអរទៅដោយសួនដើមដើមឈើធំៗ សងខាងទន្លេដែលអាចជិះទូកបាន និងមានស្ពានស្អាតៗឆ្លងទន្លេចំនូនបី ភ្ជាប់គ្នាពីតំបន់មួយទៅតំបន់មួយទៀត។ ចំពោះការរៀបចំតំបន់ទៀតសោត យើងបានរៀបចំជាតំបន់អឺរ៉ុបផ្សេងៗគ្នាចំនួន ដូចជា តំបន់ទី១ មានអគាររចនាបថបែបប្រទេសស្កត់ឡែន និងអាឡឺម៉ង់មជ្ឈិមសម័យ។

ចំណែកតំបន់ទី២ មានអគាររចនាបថបែបហូឡង់ និងបារាំងសម័យកាលរស់ឡើងវិញនៃអរិយធម៌រុងរឿង តំបន់ទី៣ មានអគាររចនាបថបែបអ៊ីតាលីនៃទន្លេវេនីស និងតំបន់ផ្សេងៗទៀត។ អាគារនីមួយៗ ស្ថិតនៅក្បែរមាត់ទន្លេនេះ នឹងត្រូវបានគេប្រើប្រាស់ជាភោ ជនីយដ្ឋាន សម្បូរបែប មានអាហារអឺរ៉ុប ចិន ជប៉ុន ខ្មែរ។ល។ អ្នកទស្សនាអាចសម្រាកលំហែ និងពិសារអាហារដ៏មានឱជារស់គ្រប់ប្រភេទបាននៅទីនេះ។

លោកឧកញ៉ា ថៃ ម៉េងលី ធ្លាប់បានបន្តថា ដោយសារភាពច្នៃប្រឌិតខ្ពស់ និងធ្វើឡើងដោយវិស្វករ និងស្ថាបត្យករជាតិ និងអន្តរជាតិ បានធ្វើឲ្យគំរោងនេះទទួលបានពានចំនួនពីរ គឺពានរង្វាន់ផ្នែកស្ថាបត្យកម្មឌិហ្សាញសួនលំហែរ ដែលលជាងគេលំដាប់ផ្កាយប្រាំនៅឆ្នាំ២០១៦ និងពានរង្វាន់ផ្នែកអភិវឌ្ឍសួនលំហែរ ដែលល្អជាងគេនៅកម្ពុជា ប្រចាំឆ្នាំ២០១៧ ក្នុងកម្មវិធីពានរង្វាន់អចលនទ្រព្យអន្តរជាតិ ដែលមានការិយាល័យនៅ ប្រទេសអង់គ្លេស។

លោកបន្តថា “គំរោងនេះនឹងបើកដំណើរការស្វាគមន៍ អ្នកដែលរស់នៅក្នុងបុរីប៉េងហួត និងសាធារណៈជនទូទៅ ដែលស្វែងរកកន្លែងសម្រាកលំហែរ និងញ៉ាំអាហារប្រកបដោយផាសុកភាព។ លោកឧកញ៉ាបន្តថា “ក្រុមហ៊ុនចាប់អារម្មណ៏ក្នុងការវិនិយោគឡើងគឺក្នុងគោលបំណង ផ្ដល់ទីកន្លែងស្អាតសំរាប់លំហែកំសាន្ត ញ៉ាំអាហារដល់អ្នករស់នៅក្នុងបុរីប៉េងហួត និងសាធារណៈជនទូទៅ និងជាពិសេសគឺដើម្បីចូលរូមអភិវឌ្ឍទីក្រុងភ្នំពេញ ដោយនាំមកនូវគំរោងថ្មីស្អាត ដែលមិនដែលធ្លាប់មាននៅស្រុកខ្មែរពីមុន ជូនដល់ភ្ញៀវជាតិនិងអន្តរជាតិ។

ចំពោះការចូលមកទស្សនា និងកំសាន្ត ក្នុងគំរោងនេះនឹងមិនតម្រូវឲ្យមានការទិញសំបុត្រទេ។

អ្នកនាង Grace Rachny Fong នាយិកាគ្រប់គ្រងទូទៅនៃ Century21 Cambodia បានថ្លែងថា កាលពីពេលថ្មីៗនេះ អ្នកនាងបាននាំអ្នកអភិវឌ្ឍន៍មកពីអូស្ត្រាលី ចូលមកមើលបុរីនេះ ហើយពួកគេមានការភ្ញាក់ផ្អើលនឹងហេដ្ឋារចនាសម្ព័ន្ឋ ដែលបានរៀបចំយ៉ាងល្អរបស់បុរីប៉េង ហួត។ ដូច្នេះនៅពេលពួកគេវិនិយោគសួនកំសាន្តបន្ថែមក្នុងបុរីនេះ នឹងធ្វើឲ្យបុរីនេះកាន់តែមានភាពទាក់ទាញ និងផ្តល់ផាសុខភាពក្នុងការររស់នៅដល់អតិថិជន ដែលបានទិញលំនៅដ្ឋានក្នុងគំរោងនេះ។

អ្នកនាងបន្តថា “ការវិនិយោគលើសួនកំសាន្តនេះ ជាយុទ្ឋសាស្ត្ររបស់ម្ចាស់បុរីនេះ ដើម្បីបង្កើនភាពទាក់ទាញ ហើយពេលអនាគតខ្ញុំជឿថា តម្លៃលំនៅដ្ឋានក្នុងបុរីនេះនឹងបន្តកើនឡើងបន្ថែមទៀត” ៕

កម្ពុជាមិនទាន់មានក្រុមហ៊ុនអាកាសចរណ៍ប្រកាសក្ស័យទុននៅឡើយ

ដោយៈ រ៉ាណេត

ភ្នំពេញៈ ក្នុងរយៈពេលជិត១ឆ្នាំ ដែលកើតមានវិបត្តិសេដ្ឋកិច្ច ជាសាកលដោយសារតែការរីករាលដាលនៃជំងឺ១៩ ដែលប៉ះពាល់ដល់ប្រតិបត្តិការអាកាសចរណ៍គ្រប់ប្រទេសនោះ ប៉ុន្តែក្រុមហ៊ុនអាកាសចរណ៍នៅកម្ពុជា នៅមិនទាន់មានក្រុមហ៊ុនណាមួយប្រកាសពីការដួលរលំ ឬក្ស័យទុននៅឡើយនោះទេ។

លោកស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា បានមានប្រសាសន៍ប្រាប់ឱ្យដឹងនៅថ្ងៃដើមសប្ដាហ៍នេះថា នៅក្នុងអំឡុងប្រឈមនឹងវិបត្តិកូវីដ១៩ រាជរដ្ឋាភិបាលកម្ពុជាដែលមានសម្ដេចតេជោ ហ៊ុន សែន ជាប្រមុខដឹកនាំបានធ្វើកិច្ចអន្ដរាគមន៍ដល់ក្រុមហ៊ុន ដែលប្រកបរបរលើវិស័យអាកាសចរណ៍ បើទោះជាការអន្ដរាគមន៍នេះនៅមានកម្រិតកដោយ។

លោកបន្តថា “យើងមិនទាន់ឃើញមានក្រុមហ៊ុនអាកាសចរណ៍មួយណា ប្រកាសពីការក្ស័យធនរបស់ខ្លួនឡើយ ពោលគឺមានតែវិធីសាស្ត្រកាត់បន្ថយបុគ្គលិក កាត់បន្ថយប្រាក់ខែបុគ្គលិក ដើម្បីសម្រាលការលំបាករបស់ខ្លួន” ។ លោកបានបន្តថា “មើលពីស្ថានភាពជាក់ស្ដែងកម្រិតម៉ាក្រូសេដ្ឋកិច្ចរបស់កម្ពុជា នៅមានកម្រិតនៅឡើយ ដូច្នេះប្រសិនបើ រដ្ឋាភិបាលផ្តល់ទំនុកបម្រុងលើវិស័យឯកជនទាំងអស់ កម្ពុជានឹងប្រឈមការខ្វះខាត និងជួបបញ្ហាជាច្រើន” ។

លោកបន្តថា ថ្វីត្បិតបែបនេះក៏ពិតមែន ប៉ុន្ដែរាជដ្ឋាភិបាលកម្ពុជា មិនលែងដៃនោះទេ ដោយបានផ្ដល់អន្ដរាគមន៍មួយចំនួន ដែលអាចឱ្យក្រុមហ៊ុនឯកជនទាំងអស់ទទួលយកបាន។

លោកស៊ិន ចាន់សិរីវុត្ថាបានបញ្ជាក់ទៀតថា យើងដឹងហើយថាក្នុងវិបត្តិកូវីដ១៩នេះ រាជរដ្ឋាភិបាលបានផ្ដល់កិច្ចអន្តរាគមន៍ ចំពោះក្រុមហ៊ុនដែលទទួលរង ផលប៉ះពាល់នៅក្នុងវិស័យអាកាសចរណ៍នេះ ប៉ុន្តែសម្រាប់ការអន្តរាគមន៍នេះ គឺនៅមានកម្រិតនៅឡើយ ដោយសារប្រទេសយើងនៅមានកម្រិត។ ជាទូទៅយើងមិនទាន់ឃើញមានក្រុមហ៊ុនណាប្រកាសក្ស័យធននៅឡើយ ប៉ុន្តែយើងឃើញមានការលំបាករបស់ក្រុមហ៊ុន ដូចជាកាត់បន្ថយបុគ្គលិក កាត់បន្ថយប្រាក់ខែ មានបំណុលច្រើនជាមួយអ្នកផ្ដល់សេវាគាំទ្រផ្សេងៗជាមួយគាត់ ប៉ុន្តែមិនទាន់ក្ស័យធន និងកំពុងមានការលំបាកក្នុងការធ្វើអាជីវកម្ម។

តាមតួលេខរបស់រដ្ឋលេខាធិការដ្ឋានអាកាសចរស៊ីវិល (SSCA) បានឱ្យដឹងថា អ្នកដំណើរឆ្លងកាត់ តាមអាកាសយានដ្ឋានអន្តរជាតិចំនួន៣របស់កម្ពុជា ក្នុងឆ្នាំ២០២០កន្លងទៅ សរុបមានចំនួន២លាន១សែននាក់ ធ្លាក់ចុះ៧៩ភាគរយបើប្រៀបធៀប នឹងរយៈពេលដូចគ្នាកាលពីឆ្នាំ២០១៩ ។

អាកាសយានដ្ឋានអន្តរជាតិភ្នំពេញ ទទួលបានអ្នកដំណើរ១,៣លាននាក់ ធ្លាក់ចុះ៧៦ភាគរយ។ អាកាសយានដ្ឋានអន្តរជាតិសៀមរាប ទទួលបានអ្នកដំណើរចំនួន ៦១៨,៦៦៣នាក់ ធ្លាក់ចុះ៨៣ភាគរយ និងអាកាសយានដ្ឋានអន្តរជាតិក្រុងព្រះសីហនុ ទទួលបានអ្នកដំណើរចំនួន២១៤,៩៦៩នាក់ ធ្លាក់ចុះ៨៦.៣ភាគរយ៕

ក្រសួងឧស្សាហកម្មចាប់ផ្តើមប្រកាសទទួលពាក្យស្នើសុំបញ្ជាក់គុណភាពទំនិញ

ដោយ: គង់ សូរិយា

ភ្នំពេញ: ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ចាប់ផ្តើមទទួលពាក្យស្នើសុំបញ្ជាក់គុណភាព សុវត្ថិភាពផលិតផលរបស់ម្ចាស់រោងចក្រ សហគ្រាស សិប្បកម្ម ចាប់ពីពេលនេះតទៅដោយមិនគិតថ្លៃសេវា។

យោងតាមសេចក្តីជូនដំណឹងស្តីពី ការដាក់ឱ្យប្រើប្រាស់សញ្ញាផលិតផលកម្ពុជាមានគុណភាព ចុះថ្ងៃទី១៥ ខែកុម្ភះ ឆ្នាំ២០២១នេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ធ្វើការជម្រាបដល់ម្ចាស់រោងចក្រ សហគ្រាស និងសិប្បកម្មនៅទូទាំងប្រទេសកម្ពុជាថា ដើម្បីជំរុញលើកកម្ពស់ផលិតផលក្នុងស្រុក តាមរយះការពង្រឹងគុណភាព សុវត្ថិភាពផលិតផលអនុលោមតាមស្តង់ដារ ក្នុងគោលបំណងការជ្រៀតចូលទីផ្សារទំនើប ផ្តល់ទំនុកចិត្តដល់អ្នកប្រើប្រាស់ និងអតិថជន។

សេចក្តីប្រកាសដដែលបានបន្តថា ពាក្យស្នើសុំ និងឯកសារភ្ជាប់ មានចែកជូនម្ចាស់រោងចក្រ សហគ្រាស សិប្បកម្ម នៅច្រកចេញ ចូលតែមួយរបស់ក្រសួងឧស្សាហកម្ម ដែលមានទីតាំងស្ថិតនៅបណ្តោយផ្លូវព្រះនរោត្តម ខណ្ឌដូនពេញ រាជធានីភ្នំពេញ។ ហើយការស្នើសុំបញ្ជាក់ផលិតផលកម្ពុជា មានគុណភាព និងសុវត្ថិភាព ជាសេវាស្ម័គ្រចិត្ត។

ក្រសួងឧស្សាហកម្ម បានស្នើរម្ចាស់រោងចក្រ សហគ្រាស សិប្បកម្មទាំងអស់មេត្តារួសរាន់មកដាក់ពាក្យសុំ សញ្ញាផលិតផលកម្ពុជាមានគុណភាព ដើម្បីក្រសួងពិនិត្យសម្រេចផ្តល់និមិត្តសញ្ញានិតិវិធី ដូចបានជូនភ្ជាប់មកជាមួយ សម្រាប់យកទៅបោះពុម្ពលើសំបកវេចខ្ចប់ផលិតផល និងចរាចរផលិតផលនៅលើទីផ្សារទំនើប ដើម្បីបម្រើសេចក្តីត្រូវការរបស់អតិថិជន និងអ្នកប្រើប្រាស់៕