អ្នកជំនាញណែនាំឱ្យមានការទិញ-លក់អចលនទ្រព្យតាមភ្នាក់ងារដើម្បីកុំឱ្យខាតបង់ផលប្រយោជន៍

ដោយៈ រ៉ាណេត

ភ្នំពេញៈ អ្នកជំនាញបានលើកទឹកចិត្ត ដល់ស្វែងរកទិញ-លក់ក្នុងវិស័យអចលនទ្រព្យគួរជ្រើសរើសយកភ្នាក់ងារក្នុងការចចារ និងរៀបចំឯកបទដ្ឋានគតិយុត្តិ ដើម្បីជៀសវាងហានិភ័យ និងមានសុវត្ថិភាពទាំងគូរភាគី ខណៈការវិនិយោគលើវិស័យនេះ ត្រូវប្រើប្រាស់ធនធានយ៉ាងធំ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម ពន្យល់ថា ភ្នាក់ងារអចលនវត្ថុ គឺជាអ្នកប្រឹក្សាយោបល់ដល់អ្នកលក់ និងអ្នកទិញដើម្បីឱ្យមានយល់ដឹងកាន់តែច្បាស់ពីវិស័យអចលនទ្រព្យ និងដឹកពីព័ត៌មានក្នុងអចលនទ្រព្យព្រមទាំងដឹងពីប្រភពអចលនទ្រព្យ និងប្រភពមូលនិធិ ដែលនឹងយកមកប្រើប្រាស់ក្នុងវិស័យអចលនទ្រព្យ ។

លោកបន្តថា“ភ្នាក់ងារអចលនទ្រព្យមានព័ត៌មានសម្បូរបែប ហើយអាចទទួលយកបានតាមរយៈ ការផ្តល់នូវព័ត៌មាន និងឱកាសវិនិយោគប្រកបដោយចីរភាព” ។ ម្យ៉ាងទៀត ភ្នាក់ងារអចលនទ្រព្យ គឺជាបុគ្គលដែលមានសក្តានុពលក្នុងការចចារ ពីព្រោះពួគេធ្វើការដោយផ្ទាល់ជាមួយនឹងអ្នកលក់ ហើយដឹងពីលក្ខខណ្ឌនៃតម្រូវការ ជាក់ស្តែងនៃអ្នកលក់ ជាការលក់ប្រញាប់ លក់ធម្មតា ឬ លក់ក្នុងកម្រិតក្នុងការទទួលយកប្រាក់ចំណូលខ្ពស់” ។

លោកច្រឹក សុខនីមបានបន្ថែមថា ជាមួយគ្នានេះ ភ្នាក់ងារអចលនវត្ថុជាបុគ្គលកណ្តាល ក្នុងរៀបចំកិច្ចសន្យាទិញ-លក់ និងការធ្វើឱ្យមានស្របច្បាប់ សម្រាប់អ្នកលក់នៅក្នុងដំណើរការនៃទិញ-លក់។ បន្ថែមពីនេះ ភ្នាក់ងារក៏ជាអ្នកធ្វើការយ៉ាងជិតស្និតជាមួយនឹងធនាគារ ដែលអាចជួលសម្រប់សម្រួលដល់អ្នកទិញ ដែលមានបំណងខ្ចីនៅក្នុងលក្ខខណ្ឌណាមួយ។

លោកច្រឹក សុខនីម បានអំពាវនាវ និងលើកទឹកចិត្តដល់អ្នកទិញ-អ្នកលក់អចលនវត្ថុ ប្រើប្រាស់ភ្នាក់ងាររបស់សមាគម ដែលមានជាង១០០ក្រុមហ៊ុន និងភ្នាក់ងារជាង ៣០០០នាក់ ដែលកំពុងបំរើនៅក្នុងទីផ្សារ និងមានវិជ្ជាជីវៈដោយរងចាំជួយសម្របសម្រួល ដើម្បីជៀសផុតពីហានិភ័យដែលកើតឡើងជាយថាហេតុណាមួយ៕

ពាណិជ្ជកម្មរវាងកម្ពុជា-បណ្តាប្រទេសសមាជិកអាស៊ានសម្រេចបានទំហំទឹកប្រាក់ជាង ១១ពាន់លានដុល្លារ

ដោយ៖ ប៊ី

ភ្នំពេញ៖ ពាណិជ្ជកម្មរវាងកម្ពុជា និងបណ្តាប្រទេសសមាជិកអាស៊ាន សម្រេចបានទំហំទឹកប្រាក់ជាង១១ពាន់លានដុល្លារកាលពីឆ្នាំ២០២០ ខណៈទំហំពាណិជ្ជកម្មនេះនៅតែមានការកើនឡើង ធៀបនឹងឆ្នាំ២០១៩ បើទោះបីជាមានវិបត្តិកូវីដ១៩ ដែលធ្វើឱ្យមានការរឹតបន្តឹងលើការធ្វើដំណើរតាមច្រកព្រំដែនក៏ដោយ។

ពាណិជ្ជកម្មទ្វេភាគីរវាងកម្ពុជា និងបណ្តាប្រទេសសមាជិកអាស៊ានមានទំហំទឹចំនួន ១១,៣៣ពាន់លានដុល្លារ កើនឡើង ២២,៤២ភាគរយ ធៀបនឹង ៩,២៥ពាន់លានដុល្លារកាលពីឆ្នាំ២០១៩។ នេះបើយោងតាមទិន្នន័យចុងក្រោយបានពីក្រសួងពាណិជ្ជកម្មកម្ពុជា។

យោងតាមរបាយការណ៍បានឱ្យដឹងថា ការនាំចេញសរុបរបស់កម្ពុជា ទៅកាន់បណ្តាប្រទេសសមាជិកអាស៊ានទាំងអស់ សម្រេចបានទំហំទឹកប្រាក់ប្រមាណ ៣,៧២ពាន់លានដុល្លារ កើនឡើង ១៨៦ភាគរយ ខណៈដែលការនាំចូលរបស់ពីកម្ពុជា មានទំហំទឹកប្រាក់ ៧,៦០ពាន់លានដុល្លារ ធ្លាក់ចុះ៤,៣៣ភាគរយ។

បើទោះបីជាទិន្នន័យបង្ហាញថា ពាណិជ្ជកម្មនៅតំបន់អាស៊ាននៅតែមានកំណើន ប៉ុន្តែសេដ្ឋកិច្ចក្នុងតំបន់នេះ មានការថមថយ ដោយសារវិបត្តិកូវីដ១៩ ដែលបណ្តាលឱ្យសេដ្ឋកិច្ចពិភពលោក មានការធ្លាក់ចុះ។

អាស៊ាន កាលពីចុងឆ្នាំមុន បង្ហាញគោលដៅរួមគ្នា ក្នុងការពង្រឹងប្រសិទ្ធភាពស្ថាប័ន ការប្រយុទ្ធប្រឆាំងនឹងការរាតត្បាតនៃជំងឺកូវីដ-១៩ ការស្តារ និងងើបឡើងវិញនៃសង្គម-សេដ្ឋកិច្ច។

ការបង្ហាញគោលដៅរួមគ្នានេះ ត្រូវបានធ្វើឡើង ក្នុងកិច្ចប្រជុំកំពូលអាស៊ាន លើកទី៣៧ និងកិច្ចប្រជុំកំពូលពាក់ព័ន្ធ ដែលបានចាប់ផ្តើមដំណើរការកិច្ចប្រជុំ កាលចុងឆ្នាំមុន តាមរយៈប្រព័ន្ធវីដេអូ។

យោងតាមសេចក្តីប្រកាសព័ត៌មាន របស់ក្រសួងសេដ្ឋកិច្ច បានបញ្ជាក់ថា កិច្ចប្រជុំកំពូលនេះ ត្រូវបានរៀបចំឡើងដោយផ្តោតការពិភាក្សា ទៅលើផលប៉ះពាល់ទៅលើវិស័យសុខភាពសាធារណៈ និងសង្គម-សេដ្ឋកិច្ចរបស់ប្រទេសនៅក្នុងតំបន់ ដែលបណ្តាលមកពីការឆ្លងរីករាលដាលនៃជំងឺកូវីដ-១៩ ការកំណត់ទិសដៅបន្ទាប់ក្នុងការស្តារ និងរក្សាស្ថិរភាពសង្គម-សេដ្ឋកិច្ចរបស់ប្រទេសជាសមាជិក និងតំបន់ នៅពេលដែលវិបត្តិនេះត្រូវបញ្ចប់៕

រដ្ឋាភិបាលសម្រេចគាំទ្រ និងអនុម័តលើគម្រោងវិនិយោគថ្មីៗចំនួន ៣ទៀត មានទុនវិនិយោគសរុបប្រមាណ៧០លានដុល្លារ

ដោយ ៖ រ៉ាណេត

ភ្នំពេញ ៖ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) បានសម្រេចគាំទ្រ និងអនុម័តលើគម្រោងវិនិយោគថ្មីៗចំនួន៣ទៀត ដែលមានទុនវិនិយោគសរុបប្រមាណ៧០លានដុល្លារ និងអាចបង្កើតការងារជិត២០០០កន្លែង។

តបតាមការស្នើសុំវិនិយោគពីវិស័យឯកជន នៅព្រឹកថ្ងៃទី១៣ ខែកុម្ភៈ ឆ្នាំ២០២១នេះ គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រ ចុះបញ្ជីជាស្ថាពរ ជូនដល់ក្រុមហ៊ុនចំនួន៣ដូចខាងក្រោម៖

១៖ ONION MOBILITY CO., LTD គម្រោងបង្កើតរោងចក្រផ្គុំតម្លើងទោចក្រយានយន្ត និងត្រីចក្រយានយន្ត ប្រើដោយថាមពលអគ្គិសនី ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ខេត្តកណ្តាល, មានទុនវិនិយោគប្រមាណ២០លានដុល្លារអាមេរិក និងអាចបង្កើតការងារ បានចំនួន៣៨០កន្លែង។

២៖ SHANE (CAMBODIA) FURNITURE CO., LTD គម្រោងបង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត ខេត្តស្វាយរៀង, មានទុនវិនិយោគប្រមាណ ៤៧.៧លានដុល្លារអាមេរិក និងអាចបង្កើតការងារ បានចំនួន៨២០កន្លែង។

៣ ៖ ក្រុមហ៊ុន XIN JELLY INDUSTRY AND TRADING CO., LTD គម្រោងបង្កើតរោងចក្រកាត់ដេរសម្លៀកបំពាក់ និងក្រណាត់ទ្រនាប់សម្លៀកបំពាក់មានទីតាំងវិនិយោគស្ថិតនៅភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២.៦លានដុល្លារអាមេរិក និងអាចបង្កើតការងារបានចំនួន ៧៦៤កន្លែង៕

អ្នកជំនាញ ៖ លំនៅឋានតម្លៃក្រោម ៣០ម៉ឺនដុល្លារ នៅតែមានទីផ្សារខ្ពស់

ដោយ ៖ រ៉ាណេត

ភ្នំពេញ ៖ មិនថាស្ថិតនៅក្នុងបរិបថនាពេលបច្ចុប្បន្ន ឬបន្តក្នុងរយៈពេល ១០ឆ្នាំទៅមុខទៀត ទីផ្សារលំនៅឋានប្រណីតដែលមានតម្លៃក្រោម ៣០ម៉ឺនដុល្លារស្ថិតនៅក្នុងតំបន់ទីប្រជុំជននៅតែមានតម្រូវការ ខណៈដែលចំនួននៃការផ្គត់ផ្គង់នៅមានកម្រិតនៅឡើយ។

លោក ឡុង គីមសួគ៌ អគ្គនាយកក្រុមហ៊ុនភ្នាក់ងារអចលនទ្រព្យ Century 21 Advance បានមានប្រសាសន៍ប្រាប់ឱ្យដឹងនៅព្រឹកថ្ងៃទី១៣ ខែកុម្ភៈ ឆ្នាំ២០២១នេះថា តាមការស្រាវជ្រាវលើតម្លៃលំនៅឋាននៅក្នុងប្រទេសកម្ពុជារបស់ក្រុមហ៊ុនរបស់លោក បានបង្ហាញថា នាពេលបច្ចុប្បន្ន លំនៅឋានដែលមានតម្លៃក្រោម ៣០ម៉ឺនដុល្លារចុះ គឺមានទីផ្សារខ្ពស់ ប៉ុន្តែបើតម្លៃលើសពីនេះ គឺមិនទាន់មាននៅឡើយនោះទេ។

ទោះជាយ៉ាងលោក គីមសួគ៌បញ្ជាក់ថា តម្លៃលំនៅឋាននៅក្នុងទំហំកម្រិតនេះ ក៏មិនទាន់មានសន្ទុះខ្លាំងដូចពីឆ្នាំ២០១៩ នោះដែរ ដោយសារប្រជាពលរដ្ឋកម្ពុជាភាគច្រើនចាយក្នុងកម្រិតត្បិតត្បៀតបំផុត ប៉ុន្តែមិនយូរនោះទេ វានឹងមានសន្ទុះឡើងវិញនៅចុងឆ្នាំ២០២១នេះ ។

លោកឡុង គីមសួគ៌បានបញ្ជាក់ថា “ប្រពលរដ្ឋខ្មែរមួយចំនួនបាននឹងកំពុងជួបប្រឈមទៅនឹងវិបតិ្តបញ្ហាចំណូល និងមិនទាន់រឹងមាំងផ្នែកចំណូល ដូច្នេះហើយបានជាពលរដ្ឋយើងគាត់ទិញទៅតាមកម្រិតចំណូលរបស់ពួកគាត់។

លោកម៉ាន់ ច័ន្ទឌី អគ្គនាយកក្រុមហ៊ុន Premium Group បានឱ្យដឹងថា សកម្មភាពនៃលក់គម្រោងលំនៅឋាននៅតែមានដំណើរការ ហើយវានឹងកាន់តែប្រសើរមួយកម្រិតទៀត បន្ទាប់ពីកម្ពុជាបានចាក់វ៉ាក់សាំងការពារ និងប្រឆាំងនឹងកូវីដ ១៩ ។

លោកបន្ថែមថា “សម្រាប់ទីផ្សារទិញ-លក់ហាក់មានសញ្ញាថមថយបន្តិច ប៉ុន្តែតម្លៃលំនៅឋានវិញ គឺមិនមានការធ្លាក់ចុះនោះទេ ជាពិសេសលំនៅឋានដែលមានតម្លៃសមរម្យចាប់ពី ៥ម៉ឺនដុល្លារ ដល់ ៨ ម៉ឺនដុល្លារអាមេរិក។ ការពង្រីកគម្រោងអភិវឌ្ឍន៍លំនៅឋាន ទាំងតម្លៃសមរម្យ និងកម្រិតខ្ពស់ នឹងនៅតែបន្តពង្រីកទៅតាមជាយក្រុងថែមទៀត ស្របពេលដែលទីក្រុងភ្នំពេញ មានភាពមមាញឹកចរាចរណ៍ និងបរិយាកាសបរិស្ថានមិនសូវមានអំណោយផលផងដែរ” ។

លោកបញ្ជាក់ថា ទោះក្នុងកាលៈទេសៈបែបណា តម្រូវការលំនៅឋាន នៅតែបន្តមានពីសំណាក់ពលរដ្ឋកម្ពុជា ហើយបញ្ហាតម្លៃនឹងកាន់តែបន្តឡើងខ្ពស់ ខណៈដែលអ្នកអភិវឌ្ឍន៍ បាននិងកំពុងបន្តសម្រុកសកម្មភាពអភិវឌ្ឍន៍គម្រោងរបស់ខ្លួនយ៉ាងសកម្មដើម្បីផ្គត់ផ្គង់តម្រូវការជាក់ស្ដែងប្រមាណ ៥ម៉ឺនខ្នងនៅក្នុងមួយឆ្នាំ៕

កម្ពុជានឹងទទួលបានអត្ថប្រយោជន៍យ៉ាងច្រើនពីកិច្ចព្រមព្រៀងពាណិជ្ជកម្មសេរីអាស៊ាន-ហុងកុង

ដោយ៖ ម៉ាណេត

ភ្នំពេញ៖ អ្នកនាំចេញ ត្រូវបានជម្រុញឱ្យប្រើសិទ្ធិបន្ថែមទៀត ក្រោមកិច្ចព្រមព្រៀងពាណិជ្ជកម្មសេរីអាស៊ាន-ហុងកុង (AHKFTA) ខណៈដែលប្រទេសកម្ពុជាគ្រោងបានចូលរួមក្នុងកិច្ចព្រមព្រៀងនេះ ដែលនឹងចាប់ផ្តើមនៅថ្ងៃទី១២ ខែកុម្ភៈ ឆ្នាំ២០២១ ។ នេះបើយោងតាមការចេញផ្សាយរបស់កាសែតបាងកកប៉ុស្តិ៍។

យោងតាមអ្នកស្រី Aramram Supthaweethum អគ្គនាយក នៃនាយកដ្ឋានចរចាពាណិជ្ជកម្មថៃ បានឱ្យដឹងថាប្រទេសកម្ពុជាគឺជាសមាជិកអាស៊ានតែមួយគត់ ដែលមិនបានអនុវត្តលក្ខខណ្ឌនៃកិច្ចព្រមព្រៀងនេះ។

អ្នកស្រីបានថ្លែងថា ថ្មីៗនេះប្រទេសកម្ពុជា បានជូនដំណឹងដល់លេខាធិការដ្ឋានអាស៊ានថា ខ្លួនបានត្រៀមខ្លួនរួចរាល់ ដើម្បីអនុវត្តតាមកិច្ចព្រមព្រៀង AHKFTA មានន័យថា កិច្ចព្រមព្រៀងនេះគ្របដណ្តប់លើប្រទេសជាសមាជិកអាស៊ានទាំងអស់ចាប់ពីថ្ងៃទី១២ ខែកុម្ភៈនេះ តទៅ។

កិច្ចព្រមព្រៀង AHKFTA ត្រូវបានចុះហត្ថលេខា កាលពីខែវិច្ឆិកា ឆ្នាំ២០១៧ និងអនុវត្ត កាលពីខែមិថុនា ឆ្នាំ២០១៩ សម្រាប់ទីក្រុងហុងកុង និងសមាជិកអាស៊ានមួយចំនួន។

អ្នកជំនាញបានឡើងផងដែរថា អ្នកនាំចេញអាស៊ាន រួមទាំងកម្ពុជា នឹងទទួលបានអត្ថប្រយោជន៍ជាច្រើន ពីកិច្ចព្រមព្រៀងនេះ ជាពិសេសសម្រាប់ពាណិជ្ជកម្មទំនិញ ដែលហុងកុងបានលើកលែងពន្ធគយរួចហើយ។ ប្រការនេះធ្វើឱ្យការនាំចេញរបស់បណ្តាប្រទេសអាស៊ាន ទៅកាន់ហុងកុង នឹងមានការកើនឡើង។

ជាមួយគ្នានេះដែរ អ្នកស្រី Auramon បានថ្លែងថា សម្រាប់ពាណិជ្ជកម្មសេវាកម្ម ហុងកុងបានបើកវិស័យសេវាកម្មដល់សមាជិកអាស៊ានច្រើនជាងប្រទេសនានា ដែលបានប្តេជ្ញាចិត្តចំពោះអង្គការពាណិជ្ជកម្មពិភពលោក ជាពិសេសសម្រាប់ផលិតកម្មមាតិកាសម្រាប់កម្មវិធីផ្សាយវិទ្យុ និងទូរទស្សន៍នៅហុងកុង។

អ្នកស្រី Auramon បាននិយាយថា ជាលទ្ធផល ប្រតិបត្តិករថៃ ត្រូវបានអនុញ្ញាតឱ្យកាន់កាប់ភាគហ៊ុន១០០% លើអាជីវកម្មសេវាកម្មនៅហុងកុង។

លើសពីនេះ លោកស្រីបាននិយាយថា ទីក្រុងហុងកុង បានបង្កើតការិយាល័យសេដ្ឋកិច្ច និងពាណិជ្ជកម្មហុងកុងនៅប្រទេសថៃកាលពីខែកុម្ភៈ ឆ្នាំ២០១៩ ដែលជាការិយាល័យទី៣ នៅអាស៊ាន បន្ទាប់ពីប្រទេសសិង្ហបុរី និងឥណ្ឌូនេស៊ី ដើម្បីជំរុញទំនាក់ទំនងសេដ្ឋកិច្ច និងពាណិជ្ជកម្មកាន់តែស៊ីជម្រៅរវាងហុងកុង និងអាស៊ាន៕

ជប៉ុនបានបណ្តាក់ទុនវិនិយោគជិត ៣០០០លានដុល្លារនៅកម្ពុជា

ដោយ ៖ រ៉ាណេត

ភ្នំពេញ៖ គិតត្រឹមដំណាច់ខែមករា ឆ្នាំ២០២១កន្លងទៅនេះ កម្ពុជាតាមរយៈក្រុមប្រឹក្សាអភិវឌ្ឍន៍កម្ពុជា (CDC) បានចុះបញ្ជីគម្រោងវិនិយោគ មានលក្ខណៈសម្បត្តិគ្រប់គ្រាន់របស់ជប៉ុនចំនួន ១៤៤គម្រោង ក្នុងទុនវិនិយោគសរុបប្រមាណ ២.៧៩ពាន់លានដុល្លារអាមេរិក។

យោងតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាស្ដីពីកិច្ចប្រជុំលើកទី២១ នៃគណៈកម្មាធិការ ចម្រុះកម្ពុជា-ជប៉ុន នៅថ្ងៃចុងសប្ដាហ៍នេះបានឱ្យដឹងថា គម្រោងវិនិយោគជប៉ុន ទាំង១៤៤ខាងលើនេះ ក្នុងនោះមានគម្រោងវិនិយោគចំនួន ៦៦គម្រោង បានបោះទីតាំងវិនិយោគក្នុងតំបន់សេដ្ឋកិច្ចពិសេស ដែលមានទុនវិនិយោគសរុបប្រមាណ៣ ៤០លានដុល្លារអាមេរិក។

ក្នុងចំណោមគម្រោងវិនិយោគធំៗរបស់ជប៉ុននៅកម្ពុជា មានគម្រោងវិនិយោគដែលលេចធ្លោរួមមានគម្រោងផ្សារទំនើប AEON គម្រោងវិនិយោគមន្ទីរពេទ្រ សាន់រាយស៍ គម្រោងវិនិយោគ Arakawa និងគម្រោងវិនិយោគជាច្រើនផ្សេងទៀត ដែលបានផ្តល់ឱកាសការងារធ្វើដល់ពលរាប់ពាន់កន្លែង ។

លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) បានកោតសរសើរ និងវាយតម្លៃខ្ពស់ចំពោះការចូលរួមយ៉ាងសកម្មរបស់សហគមន៍ធុរកិច្ចជប៉ុននៅកម្ពុជា ដែលជានិច្ចកាលបានបន្តជំរុញសកម្មភាពវិនិយោគរបស់ខ្លួននៅកម្ពុជា ឲ្យមានសកម្មភាពរស់រវើក ទោះបីមានការរំខានពីការរាតត្បាតនៃជំងឺកូវីដ-១៩ក៏ដោយ។

លោកថា នេះជាសក្ខីភាពមួយ ដែលអ្នកវិនិយោគជប៉ុនបានបង្ហាញពីការប្តេជ្ញាចិត្ត បន្តការវិនិយោគរបស់ខ្លួននៅកម្ពុជា និងផ្តល់ជំនឿទុកចិត្តយ៉ាងមុតមាំ ចំពោះរាជរដ្ឋាភិបាលកម្ពុជា ក្រោមការដឹកនាំប្រកបដោយបញ្ញាញាណដ៏ឈ្លាសវៃ និងប៉ិនប្រសប់របស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

លោក Masahiro MIKAMI ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា បានកោតស្ញប់ស្ញែងចំពោះការដឹកនាំ ដ៏មោះមុតរបស់រាជរដ្ឋាភិបាលកម្ពុជា ជាពិសេសបញ្ញាញាណដ៏ឈ្លាសវៃ និងប៉ិនប្រសប់របស់សម្តេចតេជោនាយករដ្ឋមន្ត្រីក្នុងការទប់ទល់នឹងការញាំញី នៃជំងឺរាតត្បាតកូវីដ-១៩ ដោយរក្សាបាននូវឧត្តមភាពប្រកួតប្រជែងរបស់កម្ពុជាក្នុងតំបន់។

លោកឯកអគ្គរដ្ឋទូត ក៏បានថ្លែងអំណរគុណយ៉ាងជ្រាលជ្រៅ ជូនចំពោះក្រុមប្រឹក្សាអភិវឌ្ឍន៍កម្ពុជា និងក្រសួង-ស្ថាប័នពាក់ព័ន្ធទាំងអស់ ដែលតែងតែខិតខំប្រឹងប្រែង ប្រកបដោយស្មារតីទទួលខុសត្រូវខ្ពស់ ក្នុងការសម្របសម្រួល និងចាត់វិធានការឆ្លើយតបប្រកបដោយប្រសិទ្ធភាព៕

សម្តេចតេជោ ហ៊ុន សែន សម្រេចបង្កើតគណៈកម្មារអន្តរក្រសួង ដើម្បីជំរុញការសាងសង់អាកាសយានដ្ឋានថ្មី ខ្នាត់តំបន់ នៅខេត្តមណ្ឌលគិរី

ដោយ៖ ប៊ី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចបង្កើតគណៈកម្មារអន្តរក្រសួង ដើម្បីដឹកនាំ សម្របសម្រួល និងជំរុញការអនុវត្តគម្រោងហេដ្ឋារចនាសម្ព័ន្ធអាកាសយានដ្ឋានថ្មី ខ្នាត់តំបន់ នៅខេត្តមណ្ឌលគិរី។

សេចក្តីសម្រេចនេះ ដែលបានចេញផ្សាយនៅថ្ងៃទី១២ ខែកុម្ភៈ ឆ្នាំ២០២១ ត្រូវបានចុះហត្ថលេខា ដោយសម្តេចតេជោ កាលពីថ្ងៃទី១០ ខែកុម្ភៈ ឆ្នាំ២០២១នេះ។

រដ្ឋាភិបាល កាលពីថ្មីៗនេះ បានសម្រេចជ្រើសរើសក្រុមហ៊ុន Powerchina International Group ជាដៃគូឯកជនក្នុងការសិក្សា និងអភិវឌ្ឍន៍សំណើរគំរោងសាងសង់អាកាសយាន ដ្ឋានថ្មីខ្នាតតំបន់ នៅខេត្តមណ្ឌលគិរី។

ជាមួយគ្នានេះ រដ្ឋាភិបាលក៏បានអនុញ្ញាតឲ្យរដ្ឋលេខាធិការដ្ឋានអាកាសចរណ៍ស៊ីវិល ដឹកនាំរៀបចំកិច្ចព្រមព្រៀងក្របខ័ណ្ធ Framework Agreement ជាមួយក្រុមហ៊ុន Powerchina International Group តាមនិតិវិធីជាធរមានដូចបានអនុវត្តន៍កន្លងមក សម្រាប់គម្រោងផ្លូវល្បឿនលឿនភ្នំពេញ-ព្រះសីហនុ និងគំរោងផ្លូវល្បឿនលឿនភ្នំពេញ-បាវិតផងដែរ។

ខេត្តមណ្ឌលគិរី ជាខេត្តភូមិភាគឦសាន ដែលមានសក្តានុពលខ្ពស់លើផ្នែកទេសចរណ៍ និងកសិកម្ម។ រាជរដ្ឋាភិបាល ធ្លាប់បានកំណត់ខេត្តតំបន់ភូមិភាគឦសានជាប៉ូលសេដ្ឋកិច្ចទី៤របស់កម្ពុជា៕

ក្រុមហ៊ុនចិនធំៗចំនួនពីរប្រកាសបោះទុនរួមគ្នាវិនិយោគលើគម្រោងផ្ទះវីឡាទំនើបនៅកម្ពុជា

ដោយៈ លក្ខិណា

ភ្នំពេញៈ ក្រុមហ៊ុនវិនិយោគទុនមកពីប្រទេសចិនចំនួនពីរ បានរួមគ្នាបង្កើតគម្រោងអភិវឌ្ឍន៍វីឡាមួយ នៅក្នុងប្រទេសកម្ពុជា ដើម្បីផ្គត់ផ្គង់ទៅលើទីផ្សារក្នុងប្រទេសកម្ពុជា ខណៈជំនាញលើកឡើងថា ការផ្គត់ផ្គង់លំនៅឋានក្នុងប្រទេសកម្ពុជា មិនទាន់ឆ្លើយតបនឹងតម្រូវការនៅឡើយ។

យោងតាមសេចក្តីប្រកាសព៌តមាន របស់ក្រុមហ៊ុនអភិវឌ្ឍន៍អចលនទ្រព្យទាំងពីរនេះបានឱ្យដឹងថា ការបង្កើតផ្ទះវីឡា រួមគ្នា រវាងក្រុមហ៊ុន Morgan Group និងក្រុមហ៊ុន Javan Group និងការបង្កើតគម្រោងនេះឡើង ក្នុងឱកាសបុណ្យចូលឆ្នាំចិននេះ គឺដើម្បីសម្រេចនូវក្ដីប្រាថ្នារបស់មនុស្សគ្រប់រូប ទាំងប្រជាជនកម្ពុជា និងប្រជាជនបរទេសរស់នៅក្នុងប្រទេសកម្ពុជាផងដែរ។

សេចក្តីប្រកាសដដែលនេះបានឱ្យដឹងថា គម្រោងដែលនឹងបង្កើតនៅក្នុងប្រទេសកម្ពុជានេះមានឈ្មោះថា Morgan Park Villa ស្ថិតនៅប៉ែកខាងកើត នៃរាជធានីភ្នំពេញ និងស្ថិតនៅតំបន់មាត់ទឹក នៃដងទន្លេមេគង្គដែលជាតំបន់ពេញនិយម សម្រាប់អភិវឌ្ឍន៍លំនៅឋានទំនើប។

លោក Ding JoungJun អគ្គនាយកក្រុមហ៊ុន Morgan Group បានលើកឡើងថា ទោះស្ថិតនៅក្នុងស្ថានភាពនៃវិបត្តិកូវីដ១៩ និងធ្វើឱ្យសេដ្ឋកិច្ចរង្គោះរង្គើក្ដី តែសម្រាប់ក្រុមហ៊ុនអភិវឌ្ឍន៍អចលនទ្រព្យមួយនេះ នៅតែបន្តអភិវឌ្ឍន៍គម្រោង ដែលនៅសេសសល់ និងបង្កើតគម្រោងថ្មីៗបន្តបន្ទាប់ទៀត ដើម្បីផ្ដល់ជូននូវអតិថិជន ប្រជាពលរដ្ឋកម្ពុជា និងប្រជាជនសាសន៍ដទៃទៀត ដែលចូលមករស់នៅ និងវិនិយោគនៅក្នុងប្រទេសកម្ពុជា។

លោកបានថ្លែងបន្តថា ជាក់សម្ដែងគម្រោង Morgan មួយស្ថិតនៅទីក្រុងរណបកោះពេជ្រ បានបញ្ចប់ការសាងសង់ និងបន្តអភិវឌ្ឍន៍គម្រោង Morgan នៅតំបន់ជ្រោយចង្វារនេះ ដើម្បីបញ្ចប់ទៅតាមគម្រោងដែលបានសន្យា ជាមួយអតិថិជនកាលពីដើមឡើយ។

លោកនៅតែមានសុទិដ្ឋិនិយមខ្ពស់ ចំពោះការវិនិយោគនៅក្នុងប្រទេសកម្ពុជា ដោយសារតែរដ្ឋាភិបាលបានគ្រប់គ្រងបានល្អនូវការរាតត្បាតជំងឺកូវីដ១៩ ដែលធ្វើអោយវិនិយោគិនដទៃ នៅតែបន្តដាក់ទុន និងត្រៀមដាក់ទុននៅក្នុងឆ្នាំ២០២១នេះបន្តទៀត។

លោកបន្ថែមថា ក្រុមហ៊ុន MORGAN គ្រុប ជាក្រុមហ៊ុនកម្រិតអន្តរជាតិ ដែលមានបទពិសោធន៍ដប់បីឆ្នាំក្នុងវិស័យមួយនេះ គោរពលើគំនិតអភិវឌ្ឍន៍ ការបង្កើតថ្មីសម្រាប់ជីវភាពរស់នៅឥតដែនកំណត់ បានអភិវឌ្ឍន៍លើវិស័យអចលនទ្រព្យ ក្នុងប្រទេសកម្ពុជា អស់រយៈពេលយូរមកហើយ បានចូលរួមបង្កើតគម្រោងកម្រិតទីតាំងគំរូជាច្រើន ដែលមានឈ្មោះបោះសម្លេង និងមានឥទ្ធិពលខ្លាំងក្នុងប្រទេសកម្ពុជា មានដូចជា MORGAN Tower, MORGAN EnMaison, MORGAN New City Walk និងសំណង់ទីតាំងគំរូក្នុងរាជធានីផ្សេងទៀត ដែលទទួលបានការគាំទ្រយ៉ាងពេញទំហឹងលើពិភពលោក។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា តំបន់ប៉ែកខាងកើតរាជធានីភ្នំពេញ ត្រូវបានគេមើលឃើញថា មានការចាប់អារម្មណ៍ខ្លាំងពីសំណាក់វិនិយោគិនក្នុង និងក្រៅប្រទេស ជាពិសេសទៅលើអភិវឌ្ឍន៍លំនៅដ្ឋានទំនើប ដូចជាខុនដូ និងបុរីលំនៅដ្ឋាន ដែលមានដូចជាវីឡានិងផ្ទះល្វែងជាដើម៕

តើបុណ្យចូលឆ្នាំប្រពៃណីជាតិចិនមានឥទ្ធិពលយ៉ាងដូចម្តេចនៅលើពិភពលោក?

ដោយៈ ប៊ី

ភ្នំពេញៈ បុណ្យចូលឆ្នាំចិន ឬហៅម្យ៉ាងទៀតថា បុណ្យនានិទាឃរដូវ ដែលជាថ្ងៃឈប់សំរាកដ៏សំខាន់បំផុត សម្រាប់ជនជាតិចិន ត្រូវប្រារព្ធលើឡើងជារាងរាល់ឆ្នាំ ខណៈមានប្រជាជនមួយចំនួន ជាពិសេសជនជាតិចិននៅក្រៅប្រទេស បានហៅពិធីបុណ្យនេះថា បុណ្យចូលឆ្នាំច័ន្ទគតិថ្មី។

ជាប្រពៃណីពិធីបុណ្យនេះ ចាប់ផ្ដើមនៅថ្ងៃទីមួយ នៃខែទីមួយតាមច័ន្ទគតិ ក្នុងប្រតិទិនចិន ហើយបញ្ចប់ទៅវិញ នៅថ្ងៃទី១៥ ដែលគេហៅថ្ងៃនេះថា ពិធីបុណ្យបង្ហោះគោម។ ពេលល្ងាច នៅថ្ងៃបុណ្យចូលឆ្នាំចិន ត្រូវគេឲ្យឈ្មោះថា ជូស៊ី ហើយពាក្យជូស៊ី សម្រាប់ប្រើក្នុងប្រទេសតៃវ៉ាន់។ ពាក្យនេះមានន័យថា “ពេលល្ងាចឆ្លងឆ្នាំ” ។

ពិធីបុណ្យនេះត្រូវប្រារព្ធឡើង នៅតំបន់ដែលមានចំនួនប្រជាជន ដ៏ច្រើនសន្ធឹកសន្ធាប់ ដូចជាប្រទេសកម្ពុជា យើងជាដើម។ ពិធីបុណ្យចូលឆ្នាំចិន ត្រូវបានចាត់ទុកជាថ្ងៃដ៏មានសារៈសំខាន់ សម្រាប់ប្រជាជនចិន ហើយវាក៏មានឥទ្ធិពល ទៅលើពិធីបុណ្យចូលឆ្នាំថ្មី របស់ប្រទេសជិតខាងផងដែរ ជាពិសេសចំណងវប្បធម៌ ជាមួយប្រជាជន ដែលជនជាតិចិនធ្វើអន្តរកម្មជាមួយ។

ប្រទេសទាំងនោះ រួមមាន ប្រជាជនដើមនៃជនជាតិតៃវ៉ាន់ ជនជាតិកូរ៉េ ជនជាតិម៉ុងហ្គោល ជនជាតិនេប៉ាល់ ជនជាតិប៊ូតង់ ជនជាតិយួន និងអតីតជនជាតិជប៉ុន នៅមុនឆ្នាំ១៨៧។ ពិធីបុណ្យចូលឆ្នាំចិន ក៏បានប្រារព្ធធ្វើផងដែរ នៅក្នុងប្រទេសសិង្ហបុរី ឥណ្ឌូនេស៊ី ម៉ាឡេស៊ី ភីលីពីន ថៃ កម្ពុជា ក៏ដូចជាប្រទេសដទៃទៀត ដែលមានប្រជាជនចិនរស់នៅដោយស្របច្បាប់ ភាគច្រើន គឺប្រទេសស្ថិតនៅក្បែរសមុទ្រចិន។

ពិធីបុណ្យនេះ នឹងត្រូវផ្លាស់ប្ដូរកំរិត ហើយក្លាយទៅជាផ្នែកមួយ នៃវប្បធម៌ប្រពៃណី របស់ប្រទេសទាំងនោះ។ នៅក្នុងប្រទេសកាណាដា ទោះបីជាពិធីបុណ្យចូលឆ្នាំចិន មិនមែនជាថ្ងៃឈប់សំរាកជាផ្លូវការក៏ដោយ ក៏ប្រជាជនចិនជាច្រើន នៅតែប្រារព្ធពិធីនេះ យ៉ាងទូលំទូលាយ ហើយប្រៃសណីយយ៍នៃប្រទេសកាណាដា បានចែកចាយតែមសម្រាប់ប្រើនៅឆ្នាំថ្មី នៅតាមគេហដ្ឋាននីមួយៗផងដែរ។

ជាទំនៀមទំលាប់ ទោះបីជាប្រតិទិនចិន មិនបានបង់លេខឆ្នាំបន្តក៏ដោយ ក៏ឥលូវឆ្នាំរបស់វាត្រូវបានគេរាប់បញ្ចូល ចាប់ពីរជ្ជកាលនៃស្ដេច ហ៊ូងឌី នៅក្រៅប្រទេសចិន។ ប៉ុន្តែឥលូវនេះការរាប់បីឆ្នាំខុសគ្នាយ៉ាងតិច ជាលេខ១ ត្រូវអ្នកនិពន្ធនីមួយៗ យកទៅប្រើប្រាស់ ពីព្រោះតែឆ្នាំចាប់ផ្ដើមនៅឆ្នាំ២០០៨ គឺឆ្នាំ៤៧០៦ ៤៧០៥ ឬ៤៦៤៥ ។

ប្រតិទិនចិនតាមច័ន្ទគតិ និងសុរិយគតិ ដែលគេប្រើប្រាស់ជាគោលមួយ សម្រាប់កំណត់កាលបរិច្ឆេទ នៃបុណ្យចូលឆ្នាំចិន។ ប្រតិទិននេះ ក៏ត្រូវបានប្រើនៅក្នុងប្រទេស ដែលយល់ព្រមទទួល ឬក៏បានទទួលឥទ្ធិពលពីវប្បធម៌ នៃជនជាតិហាន (ជាពិសេស ប្រជាជនតៃវ៉ាន់ ជនជាតិកូរ៉េ ជនជាតិជប៉ុន និងជនជាតិយួន) ហើយប្រហែលជាមានពូជពង្សដ៏សមញ្ញមួយ ជាមួយនឹងពិធីបុណ្យចូលឆ្នាំ ស្រដៀងគ្នាដែរ នៅក្រៅតំបន់អាស៊ីខាងកើត (ដូចជា ប្រទេសអ៊ីរ៉ង់ និងក្នុងប្រវត្តិសាស្ត្រនៃទឹកដីនៃប៊ុលកា)។

នៅក្នុងប្រតិទិនគ្រីកូរី (ប្រតិទិនដែលប្រើក្នុងប្រទេសកម្ពុជាយើង និងនៅប្រទេសមួយចំនួនធំទៀត) បុណ្យចូលឆ្នាំចិន ស្ថិតនៅថ្ងៃខុសៗគ្នារៀងរាល់ឆ្នាំ គឺនៅចន្លោះថ្ងៃទី២១ ខែមករា ដល់ថ្ងៃទី២០ ខែកុម្ភៈ។ នេះមានន័យថា ជានិច្ចកាល ថ្ងៃបុណ្យស្ថិតនៅថ្ងៃទីពីរកើត (កំរ៉នឹងថ្ងៃទីបីណាស់) បន្ទាប់ពីថ្ងៃដែលខ្លីជាងគេប្រចាំឆ្នាំ។ នៅក្នុងវប្បធម៌ប្រពៃណីចិន លីចុន គឺជាពេលវេលាសម្រាប់ព្រះអាទិត្យ ចាប់ផ្ដើមនិទាឃរដូវ ដែលកើតឡើងនៅថ្ងៃទី៤ ខែកុម្ភៈ។

កាលបរិច្ឆេទថ្ងៃបុណ្យចូលឆ្នាំចិន ចាប់ពីឆ្នាំ១៩៩៦ ដល់ឆ្នាំ ២០១៩ (តាមប្រតិទីនគ្រីកូរី) នៅខាងស្ដាំដៃនេះ គឺធ្វើទៅតាមចក្ររាសី នៃឆ្នាំរបស់សត្វនៅក្នុងតំរាទាំង១២ និងមែកធាងលោកិយរបស់វា។ ឈ្មោះនៃមែកធាងលោកិយ មិនមែនជាការបកប្រែឈ្មោះសត្វជាភាសាចិនទេ។ នៅក្បែររង្វង់១២ឆ្នាំ នៃចក្ររាសីសត្វក្នុងតំរា មានរង្វង់១០ឆ្នាំនៃមែកធាងឋានសួគ៌។

មែកធាងនីមួយៗ នៃមែកធាងឋានសួគ៌ទាំងដប់ ត្រូវបានបញ្ចូលគ្នាជាមួយធាតុមួយ ក្នុងចំណោមធាតុទាំង៥នៃហោរាសាស្ត្រចិន ដែលមានដូចជា ធាតុឈើ ធាតុភ្លើង ធាតុដី ធាតុដែក និងធាតុទឹក។

ធាតុទាំងនោះ ត្រូវបង្វិលចុះឡើង ក្នុងរយៈពេលពីរឆ្នាំម្ដង នៅពេលដែលការចូលរួមមួយនៃធាតុញី និងធាតុឈ្មោល ឆ្លាស់គ្នារៀងរាល់ឆ្នាំ។ ធាតុប្លែកៗ រួមមាន៖ ធាតុឈើឈ្មោល ធាតុឈើញី ធាតុភ្លើងឈ្មោល ធាតុភ្លើងញី ជាដើម។ ធាតុទាំងអស់នេះ បង្កើត ឲ្យមានរង្វង់រួមផ្សំមួយ ដែលកើតឡើងរៀងរាល់៦០ឆ្នាំម្ដង។

ជាឧទាហរណ៍ ឆ្នាំជូតធាតុភ្លើង “ឈ្មោល” កើតឡើងនៅឆ្នាំ១៩៣៦ និងនៅឆ្នាំ ១៩៩៦ ដែលមានគំលាតគ្នា៦០ឆ្នាំ។

មានភាពភាន់ច្រឡំជាច្រើន ជាមួយឆ្នាំកំណើតចិន នឹងឆ្នាំកំណើតគ្រីកូរី (តាមប្រតិទិនគ្រីកូរី)។ ពេលដែលបុណ្យចូលឆ្នាំចិន ចាប់ផ្ដើម នៅចុងខែមករា ដល់ពាក់កណ្ដាលខែកុម្ភៈ កាលបរិច្ឆេទឆ្នាំចិន ពីថ្ងៃទី១ ខែមករា រហូតដល់ថ្ងៃនៅក្នុងឆ្នាំគ្រីកូរីថ្មី នៅសល់ ពីឆ្នាំគ្រីកូរីឆ្នាំមុន ដែលមិនអាចផ្លាស់ប្ដូរបាន។

ជាឧទាហរណ៍ ឆ្នាំរោង ត្រូវនឹងឆ្នាំ១៩៨៩ ចាប់ផ្ដើមនៅថ្ងៃទី៦ ខែកុម្ភៈ ឆ្នាំ ១៩៨៦ ។ ប្រជាជនខ្លះ បានចាត់ទុកឆ្នាំ១៩៩០ជាឆ្នាំមមី។ យ៉ាងណាក៏ដោយ ឆ្នាំ១៩៨៩ ដែលជាឆ្នាំជូត ត្រូវបញ្ចប់ជាផ្លូវការ នៅថ្ងៃទី២៦ ខែមករា ឆ្នាំ ១៩៩០ ។

វាមានន័យថា ការពិតអ្នកណា ដែលកើតនៅចន្លោះថ្ងៃទី១ ខែមករា ដល់ថ្ងៃទី ២៥ខែមករា ឆ្នាំ១៩៩០ គឺពួកគេកើតក្នុងឆ្នាំរោង មិនមែនកើតក្នុងឆ្នាំមមីទេ៕ Wikipedia៕

រដ្ឋបាលខេត្តដាក់ចេញផែនការចំនួន៤ ដើម្បីកែលំអរស្ទឹងសៀមរាបឲ្យមានភាពស្រស់បំព្រងនិងមិនបំពុលបរិស្ថាន

ដោយគង់ សូរិយា

ភ្នំពេញៈ រដ្ឋបាលខេត្តសៀមរាបបានដឹកនាំប្រជុំពិនិត្យវឌ្ឍនភាព និដាក់ចេញផែន ការចំពោះមុខចំនួន៧ ដើម្បីលើកកំពស់សោភ័ណភាព និងកាត់បន្ថយការបំពុលបរិស្ថានក្នុងស្ទឹង។

កិច្ចប្រជុំពិភាក្សាលើរបាយការណ៍ វាយតម្លៃហេតុប៉ះពាល់បរិស្ថាន និងសង្គមដំបូង (IESIA) សម្រាប់ គម្រោងកែលម្អស្ទឹងសៀមរាបជំហាន២ ដែលបានធ្វើឡើងកាលពីថ្ងៃទី១០ កុម្ភៈកន្លងមក បានដឹកនាំដោយលោក ង៉ាន់ ភិរុណ អភិបាលរង តំណាងដ៏ខ្ពង់ខ្ពស់ឯឧត្តម ទៀ សីហា អភិបាល នៃគណៈអភិបាលខេត្ត។

ការពិភាក្សាយ៉ាងយកចិត្តទុកដាក់រួចមក អង្គប្រជុំបានឯកភាពនូវចំណុចមួយចំនួនដូចជា ទី១-ម្ចាស់គម្រោងត្រូវរៀបចំដាំស្តារដើមឈើ សងខាងស្ទឹងសៀមរាបឡើងវិញ ក្រោយពីបញ្ចប់គម្រោងកែលម្អស្ទឹងសៀមរាប ទី២ ត្រូវរៀបចំធ្វើផ្លូវសងខាងស្ទឹងសម្រាប់ទុកជាចំណត ផ្លូវថ្មើជើង ផ្លូវជិះកង់ និងផ្លូវសម្រាប់ជនពិការ ទី៣-ត្រូវរៀបចំប្រព័ន្ធលូរទឹកកខ្វក់ និងប្រព័ន្ធលូរទឹកភ្លៀង កុំឱ្យហូរចូលក្នុងស្ទឺងសៀមរាប ឱ្យបានត្រឹមត្រូវតាមលក្ខណៈបច្ចេកទេស។

៤-មន្ទីរសាធារណការ និងដឹកជញ្ជូនខេត្ត ត្រូវសហការជាមួយមន្ទីររៀបចំដែនដី នគរូបីយកម្ម សំណង់ និងសុរិយោដីខេត្ត ដើម្បីរៀបចំប្លង់មេឱ្យបានត្រឹមត្រូវ និងរៀបចំឱ្យគម្រោងនេះបន្សីគ្នាជាមួយគម្រោងស្តារស្ទឹងសៀមរាបរបស់រាជរដ្ឋាភិបាល៕