មហាវិថីព្រះសីហនុជាប់ឈ្មោះជាផ្លូវមេអាជីវកម្ម ក្នុងចំណោមផ្លូវសំខាន់ៗនៅរាជធានីភ្នំពេញ

ដោយៈ រ៉ាណេត

ភ្នំពេញៈ មហាវិថីព្រះសីហនុ ដែលគិតចាប់ពីត្រឹមម្តុំអាងទឹកអូឡាំពិក រហូតមកដល់ចំណុចបំបែកផ្លូវសុធារស់ ត្រូវបានអ្នកជំនាញបញ្ជាក់ប្រាប់ថា គឺជាផ្លូវដ៏សំខាន់មួយ និងមានតម្លៃអចលនទ្រព្យខ្ពស់ មិនចាញ់មហាវិថីអាជីវកម្មចម្រុះដទៃទៀត នៅក្នុងរាជធានីភ្នំពេញនោះឡើយ ហើយមានផ្ទះល្វែងខ្លះ អាចមានតម្លៃរហូតដល់ជាង១លានដុល្លារក៏មានដែរ។

នៅក្នុងរាជធានីភ្នំពេញ ចំពោះមហាវិថី និងផ្លូវសំខាន់ៗមួយចំនួនដែលត្រូវបានអ្នកជំនាញ ក៏ដូចជាបណ្តាអ្នកវិនិយោគលើវិស័យអចលនទ្រព្យ ចាត់ទុកថាជាផ្លូវមេផ្នែកអាជីវកម្មរួមមានដូចជា ផ្លូវកម្ពុជាក្រោម ផ្លូវព្រះមុនីវង្ស ផ្លូវម៉ៅសេទុង មហាវិថីព្រះនរោត្តម រួមជាមួយនឹងផ្លូវហ្សាឌឺហ្គោលនោះ សម្រាប់មហាវិថីព្រះសីហនុ ក៏ជាផ្លូវមួយដែលស្ថិតនៅក្នុងចំណោមផ្លូវសំខាន់ៗទាំងអស់ខាងលើនេះផងដែរ។

នាយិកាក្រុមហ៊ុន AMATAK Property Service លោកស្រី តាំង ហួរ បានមានប្រសាសន៍ប្រាប់តាមរយៈទូរស័ព្ទកាលពីពេលថ្មីៗនេះថា មហាវិថីព្រះសីហនុ ក៏ត្រូវបានចាត់ជាផ្លូវ ដែលមានសក្ដានុពល ក្នុងការប្រកបអាជីវកម្មចម្រុះផងដែរ ហើយនៅតាមបណ្តោយផ្លូវមួយខ្សែនេះ ក៏មិនសូវមានដីធំៗ និងទំនេរ សម្រាប់ធ្វើការអភិវឌ្ឍជាមជ្ឍមណ្ឌលពាណិជ្ជដែលមានទំហំធំនោះដែរ។

លោកស្រីបន្តថា “ភាគច្រើននៅតាមបណ្តោយផ្លូវនេះ ជាប្រភេទផ្ទះល្វែងទាំងអស់ ហើយក៏សុទ្ធតែមានបើកអាជីវកម្មទាំងអស់។ ដោយសារតែតំបន់នេះ មិនសូវមានផ្ទៃដីទំនេរ ហើយជាទីតាំងអំណោយផលដល់ ការប្រកបមុខជំនួញផងដែរនោះ បានធ្វើឱ្យតម្លៃអចលនទ្រព្យមានការកើនឡើងជារៀងរាល់ឆ្នាំ” ។

អ្នកជំនាញផ្នែកវាយតម្លៃអចលនទ្រព្យ រូបនេះបានបន្តឱ្យដឹងទៀតថា តម្លៃអចលនទ្រព្យ ដែលស្ថិតនៅតាមបណ្តោយមហាវិថីមួយនេះ គឺមិនស្មើគ្នានោះទេ ដែលវាក៏អាស្រ័យទៅតាំមទីតាំង តំបន់ ជាពិសេសគឺទំហំ និងប្រវែង។ ចំពោះផ្ទះល្វែងខ្លះដែលមានប្រវែងខ្លី និងមានជាន់តិច អាចលក់ក្នុងចន្លោះក្រោមមួយលាន ប៉ុន្តែផ្ទះខ្លះមានប្រវែង (Eo, E1, E2) អាចលក់បានជាង១លានដុល្លារ ឬអាចលើសពីនេះ ប្រសិនបើជាប្រភេទលំនៅដ្ឋានដែលមានម្ចាស់ច្រើនគ្នា។

យ៉ាងណាក៏ដោយ នាយិកាក្រុមហ៊ុន AMATAK Property Service លោកស្រី តាំង ហួរ ក៏បានបញ្ជាក់ផងដែរថា ចំពោះតម្លៃទាំងនេះ នៅមិនទាន់ឈានដល់ចំណុចកំពូលនៅឡើយនោះទេ ដែលវានៅមានឱកាសឡើងខ្ពស់ជាងនេះបន្តិចទៀតនៅឆ្នាំបន្ទាប់។

ចំណែកលោកវ៉ា វីរៈ នាយកក្រុមហ៊ុនអចលនទ្រព្យលំដាប់អន្តរជាតិ Century21 Fortuna Investment បានមានប្រសាសន៍ឱ្យដឹង តាមរយៈទូរស័ព្ទផងដែរថា មហាវិថីព្រះសីហនុ គឺត្រូវបានបែងចែកចេញតំបន់ផ្សេងគ្នា ដូចជាចាប់ពីចំណុចស្តុបមន្ទីរពេទ្យចិន (ស្តុបអាគារ៤២ជាន់) រហូតមកដល់ចំណុចម្ដុំរង្វង់មូលវិមានឯករាជ្យ ដែលស្ថិតនៅក្នុងសង្កាត់បឹងកេង គឺមានតម្លៃថ្លៃ។

លោកបន្តថា ទីតាំងខ្លះអាចថ្លៃលើសតម្លៃដី ដែលស្ថិតនៅក្នុងសង្កាត់បឹងកេងកង១(ផ្លូវខាងក្នុង) ថែមទៀតផង ដោយសារតែវាស្ថិតនៅលើមហាវិថី ដែលអាចក្នុងតម្លៃជាង ៦,០០០ ដុល្លារ ឡើងទៅក្នុងមួយម៉ែត្រការ៉េ” ។

ដោយឡែកចាប់ពីចំណុចខាងក្រោយ វិទ្យាល័យព្រះយុគន្ធរ រហូតដល់ចំណុចស្តុបវត្តមហាមន្ត្រី ដែលស្ថិតនៅក្នុងសង្កាត់បឹងព្រលឹត ខណ្ឌ៧មករា អាចមានតម្លៃទាប អាចក្នុងចន្លោះ ៤,៥០០ ទៅ៥,០០០ដុល្លារក្នុងមួយម៉ែត្រការ៉េ ព្រោះនៅតំបន់នេះភាគច្រើនលំនៅដ្ឋាន ដែលមានអាជីវកម្មលក្ខណៈគ្រួសារច្រើន។ ប៉ុន្តែចាប់ពីស្តុបវត្តមហាមន្ត្រីរហូតដល់តំបន់ស្តុបអាងទឹកអូរឡាំពិក ដែលស្ថិតក្នុងសង្កាត់អូរឡាំពិក អាចមានតម្លៃថ្លៃបន្តិចឡើងវិញ៕

ចំណោះដឹងវិនិយោគៈ តើការទិញដីឡូតិ៍ ឬលំនៅឋានទុកចោលជាប់ពន្ធដែរទេ?

ដោយ ៖ រ៉ាណេត

ភ្នំពេញៈ ឆ្លើយតបទៅនឹងចម្ងល់របស់ពលរដ្ឋ ដែលបានទិញដីឡូតិ៍ ឬលំនៅឋានទុកចោល ដោយមិនបានរស់នៅ ឬមិនមានការអភិវឌ្ឍន៍ ដែលកំពុងកើតមាននៅក្នុងប្រទេសកម្ពុជា ត្រូវបានមន្ត្រីជាន់ខ្ពស់ នៃអគ្គនាយកដ្ឋានពន្ធដារកម្ពុជាអះអាងថា បើជាប្រភេទដី ឬលំនៅឋានដែលជាប់ពន្ធ ត្រូវតែប្រកាសបង់ពន្ធ តែបើមិនជាប់ពន្ធគឺមិនត្រូវបង់នោះទេ។

ប្រធានការិយាល័យពន្ធអចលនទ្រព្យកម្ពុជា នៃអគ្គនាយកដ្ឋាន លោក រស់ សារ៉ាក់ នៅក្នុងកម្មវិធីឆ្លើយសំនួរស្តីពីពន្ធដារកម្ពុជា កាលពីកន្លងមកនេះពន្យល់ថា ចំពោះការទិញដីឡូត៍ ឬលំនៅឋានទុកចោលនេះ អាចនឹងជាប់ពន្ធក្នុងកម្មវត្ថុ ទៅលើដីមិនប្រើប្រាស់ ដែលម្ចាស់ទិញហើយ មិនអភិវឌ្ឍន៍ ឬការបង្កើតកម្លាំងសេដ្ឋកិច្ច ដែលជំរុញឱ្យមានពលកម្ម។

លោកពន្យល់ថា “ចំពោះរដ្ឋដែលប្រមូលពន្ធលើដី មិនបានប្រើប្រាស់នេះ គឺដើម្បីជំរុញឱ្យម្ចាស់ដីទាំងអស់ ធ្វើការអភិវឌ្ឍដើម្បីបង្កើនសេដ្ឋកិច្ច និងពលកម្មដល់ពលរដ្ឋកម្ពុជា។ ជាពិសេសការទិញដីឬ លំនៅឋាននេះក៏ជាកម្មវត្ថុនៃការជាប់ពន្ធផងដែរ ដោយសារបើសិនជាតម្លៃអលនទ្រព្យទាំងនោះលើស ១០០ លានរៀល” ។

យោតាមច្បាប់ពន្ធដារកម្ពុជាបង្ហាញថា ពន្ធនេះកំណត់លើដីដែលគ្មានសំណង់ និងដីដែលមានសំណង់បោះ បង់ស្ថិតក្នុងទីក្រុងនានា និងក្នុងតំបន់ទាំង ឡាយដែលកំណត់ដោយគណៈកម្មការវាយតម្លៃដីមិនបានប្រើប្រាស់។ ពន្ធដីធ្លីលើដីមិនបានប្រើប្រាស់ត្រូវបង់ដោយកម្មសិទ្ធិករ។

មូលដ្ឋានកំណត់ពន្ធ គឺជាថ្លៃដីគិតតាមថ្លៃទីផ្សារតាមទីក្រុង និងតាមតំបន់នីមួយៗដែលវាយតម្លៃទៅតាមតម្លៃគិត ក្នុងមួយម៉ែត្រក្រឡាកំណត់ ដោយគណៈកម្មការវាយតម្លៃដីមិនបានប្រើប្រាស់យ៉ាងយឺតបំផុត នៅថ្ងៃទី៣០ខែមិថុនា នៃឆ្នាំប្រមូលពន្ធ។

ពន្ធនេះត្រូវកំណត់តាមអត្រា២% លើមូលដ្ឋានកំណត់ពន្ធ ដែលបានចែងក្នុងមាត្រា៣។

កម្មសិទ្ធិករនៃដីធ្លីជាប់ពន្ធមានភារកិច្ច ត្រូវគណនាប្រាក់ពន្ធតាមគំរូលិខិតប្រកាសផ្តល់ដោយអង្គការពន្ធ និងត្រូវបង់ យ៉ាងយឺតបំផុតនៅថ្ងៃទី៣០ ខែកញ្ញា នៃឆ្នាំនីមួយៗជូនទៅផ្នែកពន្ធនៅកន្លែង ដែលដីធ្លីជាប់ពន្ធស្ថិតនៅ។ ដីធ្លីជាប់ពន្ធ នីមួយៗត្រូវធ្វើលិខិតប្រកាស១ច្បាប់៕

លោកឧបនាយករដ្ឋមន្ត្រី ជា សុផារ៉ា លើកទឹកចិត្តឱ្យស្ថាបត្យករភ្ជាប់រចនាបថខ្មែរទៅក្នុងគ្រប់ប្លង់គំរូនៃសំណង់

ដោយ ៖ រ៉ាណេត

ភ្នំពេញ ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានជំរុញ និងលើកទឹកចិត្តទៅដល់បណ្តាក្រុមហ៊ុន ជាពិសេសស្ថាបត្យករដែលមានជំនាញក្នុងការគូរប្លង់គំរូសំណង់ផ្សេងៗ គួរបញ្ចូល និងភ្ជាប់ជាមួយរចនាបថខ្មែរ ដើម្បីជាការចូលរួមគាំទ្រដល់អត្តសញ្ញាណជាតិ ក៏ដូចជាលើកកម្ពស់ប្រពៃណី និងវប្បធម៌ខ្មែរផងដែរ ជាក់ស្ដែងដូចស្ថាបត្យកម្មសំណង់អគារទីស្ដីការក្រសួងរៀបចំដែនដី នគរូបនីយកម្ម និងសំណង់ថ្មីដែលទើបបើកដំណើរការប្រើប្រាស់បណ្តោះអាសន្នកាលពីដើមសប្ដាហ៍កន្លងទៅនេះ។

ស្ថាបត្យកម្មសំណង់នៅកម្ពុជានាពេលបច្ចុប្បន្ននេះបានបង្ហាញពីភាពរីកចម្រើន និងគំនិតច្នៃប្រឌិតរបស់ស្ថាបត្យករជំនាញដោយមានរួមបញ្ចូលនូវការស្រមើលស្រមៃទៅតាមក្បួនខ្នាតយ៉ាងត្រឹមត្រូវ ដើម្បីបង្កើតបានគម្រោងសំណង់អគារនានាដែលមានភាពល្អឥតខ្ចោះ និងធានាបាននូវការចាប់អារម្មណ៍ក្នុងរយៈពេលវែង។

លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីពេលកន្លងទៅថ្មីៗនេះបានបង្ហាញពីការកោតសរសើរ និងគាំទ្រទៅលើភាពរីកចម្រើននៃគំនិតច្នៃប្រឌិតរបស់បណ្តាស្ថាបត្យករខ្មែរជំនាន់ក្រោយ ដោយក្នុងនោះលោកក៏បានជំរុញ និងលើកទឹកចិត្តឱ្យមានការភ្ជាប់រចនាបថខ្មែរទៅនឹងស្ថាបត្រកម្ម ក្នុងគោលបំណងចូលរួមគាំទ្របង្ហាញអត្តសញ្ញាណជាតិ និងវប្បធម៌ខ្មែរ។

លោកឧបនាយករដ្ឋមន្ត្រី បានបញ្ជាក់ថា ការបញ្ជូនរចនាបថខ្មែរជាមួយនឹង អគារសម័យទំនើបនេះ គឺនឹងធ្វើឱ្យអគារនោះកាន់តែមានសោភ័ណភាពស្រស់ស្អាត និងទាក់ទាញ ហើយជួយថែរក្សាតម្លៃវប្បធម៌ខ្មែរថែមទៀតផង។

លោកបានបញ្ជាក់ថា “យើងចង់បានឱ្យមានការផ្សារភ្ជាប់នូវអត្តសញ្ញាណជាតិរបស់យើង មានន័យថា ទាំងអ្នកគូរ ទាំងអ្នកត្រួតពិនិត្យ សូមអំពាវនាវជួយបំពាក់ខ្លះៗ មិនមែនទាំងស្រុងទេ ។ ក៏ប៉ុន្ដែអ្វីដែលជាផលប្រយោជន៍ គឺគាំទ្រទៅដល់អត្តសញ្ញាណជាតិ ការលើកកម្ពស់ទៅដល់វិស័យរបស់យើង កើតនៅក្នុងដីព្រះរាជាណាចក្រកម្ពុជា គឺផ្សារភ្ជាប់នូវអត្តសញ្ញាណណាមួយក៏បានដែរ មិនមែនទាំងស្រុង នឹងឱ្យមានការផ្សារភ្ជាប់ខ្លះ កុំឱ្យមើលទៅវាមិនមែនស្ថិតនៅក្នុងព្រះរាជាណាចក្រកម្ពុជា”។

លោកឧបនាយករដ្ឋមន្ដ្រី ក៏បានក្រើនរំលឹក ចំពោះវិស្វករទាំងអស់ នៅពេលបើកការដ្ឋានសាងសង់អគារ បញ្ហាចំបងត្រូវគិតគូរ គឺរឿងប្រព័ន្ធបង្ហូរទឹកកខ្វក់ សម្លាប់មេរោគ មុននឹងបង្ហូរចូលលូសាធារណៈ កុំឱ្យមានជាតិពុល ជាពិសេស ការពារបរិស្ថាន ដើម្បីសុខភាពប្រជាជន។ គ្រប់ការដ្ឋានសំណង់ទំាងអស់ ត្រូវមានវិស្វករប្រចាំការចំនួន២នាក់ក្នុងមួយការដ្ឋាន ដើម្បីបញ្ចៀសគ្រោះថ្នាក់ផ្សេងៗ ហើយបើសិនគ្មានវិស្វករ នៅប្រចាំការទេ ការដ្ឋាននោះនឹងប្រឈមការចុះបិទភ្លាមៗ ព្រោះតាមច្បាប់នៃវិស័យសំណង់ គឺត្រូវធានានូវសុវត្ថិភាព និងភាពរឹងមាំសម្រាប់សំណង់ដែលត្រូវសាង់សង ដែលធានាផលប្រយោជន៍ជាបុគ្គល ធានាផលប្រយោជន៍សាធារណៈ៕

រដ្ឋបាលរាជធានីភ្នំពេញកំពុងសម្រុកពន្លឿនការស្ដារហេដ្ឋារចនាសម្ព័ន្ធផ្លូវថ្នល់នៅទូទាំង១៤ខណ្ឌ

ដោយ ៖ រ៉ាណេត

ភ្នំពេញ៖ ឆ្លៀតនៅក្នុងឱកាសដែលមានការកាត់បន្ថយការធ្វើចរាចរណ៍នៅក្នុងរាជធានីភ្នំពេញដើម្បីទប់ស្កាត់ការរាតដាលនៃជំងឺឆ្លងកូវីដក្នុងសហគមន៍នាពេលបច្ចុប្បន្ន រដ្ឋបាលរាជធានីភ្នំពេញបាននិងកំពុងពន្លឿនការស្ដារហេដ្ឋារចនាសម្ព័ន្ធនានានៅទូទាំង១៤ខណ្ឌ ឱ្យមានភាពល្អប្រសើរ ដើម្បីជួយសម្រួលដល់ការធ្វើដំណើរ និងលើកសោភ័ណភាពក្រុង។

រដ្ឋបាលរាជធានីភ្នំពេញថាបានបញ្ជាក់ឱ្យដឹងថានៅក្នុងរដូវប្រាំងនេះ រដ្ឋបាលរាជធានីភ្នំពេញបានយកចិត្តទុកដាក់លើការជួសជុល និងស្ដារផ្លូវនានានៅតាមខណ្ឌទាំង១៤ រួមមានការឈូសឆាយ អ៊ុតកៅស៊ូ លុបជង្ហុកសំបុកមាន់ នៅតាមបណ្ដាមហាវិថីតូចធំនានា ក៏ដូចជាផ្លូវថ្នល់នៅតាមមូលដ្ឋាន ដើម្បីកាត់បន្ថយការកកស្ទះចរាចរណ៍ និងលើកសោភ័ណភាពរាជធានីភ្នំពេញផងដែរ។

ស្ថិតនៅក្នុងស្ថានភាពដែលកំពុងប្រឈមនឹងការឆ្លងជំងឺ ប្រជាពលរដ្ឋ អ្នកជំនួញ ក៏ដូចជាមន្ត្រីរាជការភាគច្រើនបានកាត់បន្ថយការចាកចេញក្រៅ ដោយបំពេញការងារពីផ្ទះ ដូច្នេះសកម្មភាពចរាចរណ៍នៅតាមផ្លូវថ្នល់មួយចំនួនមានភាពស្ងប់ស្ងាត់ ផ្តល់ភាពងាយស្រួលដល់រដ្ឋបាលរាជធានីភ្នំពេញធ្វើការកែលម្អផ្លូវថ្នល់។ ជាក់ស្ដែង នៅពេលនេះក្រុមការងារ បាននិងកំពុងធ្វើសកម្មភាពអ៊ុតកៅស៊ូAC នៅលើបណ្តោយផ្លូវសម្តេចប៉ាន មានប្រវែងជិត១គីឡូម៉ែត្រ ពោលគឺចាប់ពីក្រោយព្រះបរមរាជវាំងរហូតដល់ផ្លូវព្រះមុនីវង្ស(ស្តុបផ្លូវភ្លោះអូរប្ញស្សី)មានទទឹងចន្លោះពី១១ម៉ែត្រ ទៅ១៥ម៉ែត្រ ដោយសារតែស្ថានភាពផ្លូវខុសគ្នា។

ដោយឡែកផ្លូវកៅស៊ូដែលត្រូវអ៊ុតថ្មីនេះមានកម្រាស់ ៥សង់ទីម៉ែត្រ ទៅ ៦សង់ទីម៉ែត្រ តាមស្ថានភាពផ្លូវមានឡើងមានចុះ។ ការងារអ៊ុតកៅស៊ូលើកំណាត់ផ្លូវសម្តេចប៉ាននេះអាចនឹងរួចរាល់នៅថ្ងៃទី១៩ ខែមីនា ឆ្នាំ២០២១។ ក្រៅពីនេះនៅមានការអ៊ុតកៅស៊ូ AC កម្រាស់០.៥ និងលើកំណាត់ផ្លូវសម្តេចប៉ាន សង្កាត់បឹងរាំង ក្នុងមូលដ្ឋានខណ្ឌដូនពេញ ដើម្បីដាក់ឱ្យប្រជាពលរដ្ឋធ្វើដំណើរងាយស្រួលជាងមុន និងដើម្បីលើកសោភ័ណភាពរាជធានីភ្នំពេញ ឱ្យកាន់តែស្រស់បំព្រងផងដែរ។ ការអ៊ុតកៅស៊ូលើកំណាត់ផ្លូវនេះ ធ្វើឡើងក្រោយពីក្រុមការងារបានជួសជុលសំបុកមាន់ ធ្វើគ្រឹះរួចរាល់ ក្រោយពីខូចខាតដោយជំនន់ទឹកភ្លៀងនាពេលកន្លងមក។

សម្រាប់មូលដ្ឋានខណ្ឌដូនពេញ រដ្ឋបាលរាជធានីភ្នំពេញ បាននិងកំពុងដំណើរការអ៊ុតកៅស៊ូប្រភេទACចំនួន ១៦ខ្សែ ដែលរងការខូចខាតដោយជំនន់ទឹកភ្លៀងដែលត្រូវជួសជុល និងអ៊ុតកៅស៊ូឡើងវិញ។ គម្រោងជួសជុលផ្លូវអ៊ុតកៅស៊ូប្រភេទAC កម្រាស់ ០.៥សង់ទីម៉ែត្រ ជាគម្រោងរបស់រដ្ឋបាលរាជធានីភ្នំពេញក្រោមគំនិតផ្ដួចផ្ដើមរបស់លោកឃួង ស្រេងអភិបាលរាជធានីភ្នំពេញ ដែលលោកតែងតែយកចិត្តទុកដាក់អំពីការងារអភិវឌ្ឍន៍មូលដ្ឋានក្នុងគោលបំណងលើកកម្ពស់ជីវភាព និងការរស់នៅរបស់ប្រជាពលរដ្ឋឱ្យកាន់តែល្អប្រសើរឡើងមួយកម្រិតទៀត៕

តើអ្វីជាយុទ្ឋសាស្រ្តចំនួន៩នៃផែនការមេអភិវឌ្ឍន៍ខេត្តកែប ដើម្បីប្រែក្លាយជាតំបន់លំហែរកាយកម្រិតខ្ពស់

ដោយៈគង់ សូរិយា

ភ្នំពេញៈ រដ្ឋាភិបាលដែលមានក្រសួងទេសចរណ៍ជាសេនាធិការ បានបញ្ចប់ផែនការមេអភិវឌ្ឍន៍ទេសចរណ៍លំហែរកាយកម្រិតខ្ពស់ នៅខេត្តកែបរួចហើយ ដោយដាក់ចេញយុទ្ឋសាស្រ្តសំខាន់ៗចំនួន៩។

តើអ្វីជាយុទ្ឋសាស្រ្តសំខាន់ៗទាំងនោះ? យោងតាមលទ្ឋផលនៃកិច្ចប្រជុំរបស់ក្រសួងទេសចរណ៍ ដែលបានធ្វើឡើងកាលពីពេលថ្មីៗនេះបានឲ្យដឹងថា យុទ្ឋសាស្ត្រគោលចំនួន៩ នៅក្នុងឯកសារព្រាងផែនការមេ សម្រាប់ការអភិវឌ្ឍន៍វិស័យទេសចរណ៍ខេត្តកែប រួមមានទី១ យុទ្ធសាស្រ្តអភិវឌ្ឍន៍ប៉ូលទេសចរណ៍ខេត្តកែប ទី២ យុទ្ធសាស្រ្តវិនិយោគ និងអភិវឌ្ឍន៍របៀងទេសចរណ៍ខេត្តកែប ទី៣ យុទ្ធសាស្រ្តពង្រឹងគុណភាព និងសុវត្តិភាពទេសចរណ៍ ទី៤ យុទ្ធសាស្រ្តអភិវឌ្ឍធនធានមនុស្សក្នុងវិស័យទេសចរណ៍ ទី៥ យុទ្ធសាស្រ្តទីផ្សារ និងផ្សព្វផ្សាយទេសចរណ៍ខេត្តកែប។

ទី៦ យុទ្ធសាស្រ្តគ្រប់គ្រង និងអភិវឌ្ឍវិស័យពាក់ព័ន្ធនានា គាំទ្រដល់ការអភិវឌ្ឍវិស័យទេសចរណ៍ខេត្តកែប ទី៧ យុទ្ធសាស្រ្តពង្រឹងចង្វាក់ផលិតកម្ម ក្នុងវិស័យទេសចរណ៍ខេត្តកែប ទី៨ យុទ្ធសាស្រ្តអភិវឌ្ឍនវានុវត្តន៍នៃវិស័យទេសចរណ៍ខេត្តកែប និងទី៩ យុទ្ធសាស្រ្តពង្រឹងអភិបាលកិច្ច ត្រួតពិនិត្យ និងវាយតម្លៃសម្រាប់ការអភិវឌ្ឍវិស័យទេសចរណ៍ខេត្តកែប។

រដ្ឋមន្ត្រីក្រសួងទេសចរណ៍លោកបណ្ឌិតថោង ខុន បានមានប្រសាសន៍ថា គោលបំណងនៃការរៀបចំផែនការមេ សម្រាប់ការអភិវឌ្ឍវិស័យទេសចរណ៍ខេត្តកែបនេះ គឺដើម្បីអភិវឌ្ឍឱ្យខេត្តកែបក្លាយជា “គោលដៅទេសចរណ៍ធម្មជាតិ សម្រាកកម្សាន្តបែបប្រណីតកម្រិតខ្ពស់” ដោយគិតទៅលើភាពទាក់ទាញ ភាពប្រកួតប្រជែងនៅក្នុងតំបន់ និងពិភពលោក ពិសេសគឺត្រូវធានាឱ្យបាននូវសមភាព សមធម៌ តម្លាភាព ចីរភាព និងនវានុវត្តន៍។

លោករដ្ឋមន្ត្រីបានបន្តថា “ផែនការមេសម្រាប់ការអភិវឌ្ឍវិស័យ ទេសចរណ៍ខេត្តកែបនេះ គឺជាឯកសារយុទ្ធសាស្ត្រដ៏មានសារៈសំខាន់មួយ ដែលអាចជួយស្តារ និងលើកស្ទួយវិស័យទេសចរណ៍ខេត្តកែប ទាំងនៅក្នុងដំណាក់កាលវិបត្តិកូវីដ-១៩ ក៏ដូចជាក្នុងដំណាក់កាលក្រោយវិបត្តិកូវីដ-១៩ផងដែរ”៕

ក្រុមហ៊ុន ប៉េង ហួត គ្រុប ឧបត្ថម្ភរថយន្ដបោសសំរាម ០១គ្រឿង ជូនដល់រដ្ឋបាលខណ្ឌជ្រោយចង្វារ ដើម្បីបរិស្ថាន និងទីក្រុងស្អាត

ជីវិតមួយដែលរស់នៅដោយមានន័យ គឺនៅពេលលោកអ្នកទទួលបានជោគជ័យហើយមិនភ្លេចពីកំណើត និងសង្គមជុំវិញខ្លួន។ ការចែករំលែក ទោះតិចក្តីច្រើនក្តីក្នុងគ្រាលំបាក គឺជាគុណធម៌មួយដែលមិនអាចកាត់ថ្លៃបាន។ ហេតុនេះហើយ បានជាគេសង្កេតឃើញក្រុមហ៊ុនជាច្រើនបានចាប់ផ្តើមចូលរួមក្នុងការងារសង្គម។ ក្នុងនោះក៏មានក្រុមហ៊ុន ប៉េង ហួត គ្រុប ដែលមានឈ្មោះល្បីខាងអភិវឌ្ឍលំនៅឋានប្រណិត ដែលមានបរិស្ថានរស់នៅល្អជាមួយសួនស្រស់ស្អាត និងដើមឈើបៃតងស្រស់ធំៗម្លប់ត្រឈឹងត្រឈៃនោះ ក៏បានចូលរួមយ៉ាងសកម្មជាមួយកិច្ចការសង្គមតាមការចែករំលែកក្នុងរូបភាពផ្សេងៗ។

តួយ៉ាង កាលពីព្រឹកថ្ងៃទី១៧ ខែមីនា ឆ្នាំ២០២១ ក្រុមហ៊ុន ប៉េង ហួត គ្រុបបានឧបត្ថម្ភរថយន្តសម្អាតផ្លូវចំនួន ០១គ្រឿង ជូនដល់រដ្ឋបាលខណ្ឌជ្រោយចង្វារ ដើម្បីចូលរួមលើកកម្ពស់ទីក្រុងស្អាត និងបរិស្ថានល្អ ខណៈក្រុមហ៊ុនទើបបានចូលរួមបរិច្ចាគថវិកាចំនួន ៣លានដុល្លារអាមេរិកជូនសម្តេចតេជោ ដើម្បីចូលរួមសកម្មភាពទប់ស្កាត់ការរីករាលដាលនៃជំងឺឆ្លងកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ។

កន្លងមកដើម្បីចូលរួមក្នុងការទប់ស្កាត់ជំងឺឆ្លងកូវីដ-១៩ ក្រុមហ៊ុនបានបរិច្ចាគជាថវិកាជាង ៦លានដុល្លារ ហើយក្រុមហ៊ុនក៏បានឧបត្ថម្ភរថយន្តផ្ទុកទឹក និងរថយន្តបោសសំរាមជូនដល់រដ្ឋបាលខណ្ឌច្បារអំពៅផងដែរ។ ក្រៅពីនេះ ក្រុមហ៊ុនក៏បានបរិច្ចាគថវិកាជូនដល់មន្ទីរពេទ្យគន្ធបុប្ផា មន្ទីរពេទ្យកុមារអង្គរ មូលនិធីត្រីចក្រយានកម្ពុជា គ្រឿងឧបភោគបរិភោគដល់ប្រជាពលរដ្ឋ ដែលរងគ្រោះដោយសារទឹកជំនន់ ការសាងសង់អគារសកលវិទ្យាល័យទួនហ្វាដើម្បីចូលរួមបណ្តុះបណ្តាលធនធានមនុស្សនិងអភិវឌ្ឍប្រទេសឲ្យកាន់តែរីកចំរើន ជូនដល់កាកបាទក្រហមកម្ពុជា ក្នុងការបន្តប្រតិបត្តិការ ជួយដល់ប្រជាពលរដ្ឋខ្មែរ ដែលរងគ្រោះបំផុត នៅតាមសហគមន៍ ជនបទនានា អោយទាន់ពេលវេលា និងតាមតម្រូវការចាំបាច់។ល។

តំណាងក្រុមហ៊ុន ប៉េង ហួត គ្រុប លោក ចាន់ រដ្ឋា បានលើកឡើងថា៖ ” ការចូលរួមនូវរាល់សកម្មភាពសប្បុរសធម៌ និងការចែករំលែក តបស្នងដល់សង្គមគឺជាគុណតំលៃរបស់ស្ថាបនិកក្រុមហ៊ុន និងបុគ្គលិកគ្រប់ជាន់ថ្នាក់ ដែលលោកមិនដែលភ្លេចនូវកំណើត ឬប្រភពរបស់ខ្លួន។ ការងារសង្គមដែលក្រុមហ៊ុនបានចូលរួមយ៉ាងសកម្មកន្លងមក មានការងារអប់រំ ការងារបរិស្ថាន ការងារវប្បធម៌ប្រពៃណី ការងារសុខុមាលភាពសង្គម។ល។ ក្រុមហ៊ុនតែងតែលើកទឹកចិត្តដល់បុគ្គលិកគ្រប់រូបឲ្យចូលរួមការងារសង្គមតាមដែលអាចធ្វើទៅបានផងដែរ” ៕

អភិបាលខេត្តៈគំរោងសិក្សាសាងសង់រថភ្លើងល្បឿនលឿនភ្នំពេញ កំពតរបស់ក្រុមហ៊ុនចិនកំពុងធ្វើនៅឡើយ

ដោយៈគង់ សូរិយា

ភ្នំពេញៈ អភិបាលខេត្តកំពត លោកជាវ តាយបានមានប្រសាសន៍ឲ្យដឹងថា បច្ចុប្បន្ននេះ គំរោងសិក្សាដើម្បីសាងសង់ខ្សែរថភ្លើងល្បឿនលឿនភ្នំពេញ កំពតនៅបន្តសិក្សាដោយក្រុមហ៊ុនចិននៅឡើយ។

លោកបានមានប្រសាសន៍ឲ្យដឹងតាមទូរស័ព្ទកាលពីសប្តាហ៍មុនថា គំរោងនេះមិនបានលុបចោលនោះទេ ក្រុមហ៊ុនចិនកំពុងសិក្សានៅឡើយ ប៉ុន្តែការបញ្ចប់នាពេលណា លោកមិនទាន់ដឹងនៅឡើយទេ។ លោកបន្តថា ផែនការអភិវឌ្ឍន៍នេះ នឹងបន្តទៅមុខ ព្រោះការសិក្សាលំអិតបាននិងកំពុងធ្វើឡើង ប៉ុន្តែការចំណាយទុនវិនិយោគប៉ុន្មាន និងធ្វើជាលក្ខណៈបែបណា យើងមិនអាចបញ្ជាក់បាននៅឡើយទេ។

កន្លងមកក្រុមហ៊ុនចិនដ៏ធំមួយ គ្រោងបង្កើតទីក្រុងពាណិជ្ជកម្មធំមួយនៅខេត្តកំពត និងគ្រោងសាងសង់ព្រលានយន្តហោះផងដែរ ប៉ុន្តែការសិក្សារហូតមកទល់ពេលនេះ នឹងបញ្ចប់នៅពេលណាមិនទាន់ច្បាស់លាស់នៅឡើយទេ។

លោកជាវ តាយបានបន្តថា ទោះមានជំងឺកូវីដ១៩ កំពុងរីករាលដាលក្តី ប៉ុន្តែគំរោងអភិវឌ្ឍន៍ធំៗក្នុងខខេត្តមិនបានផ្អាកសកម្មភាពនោះទេ ហើយអ្នកវិនិយោគតូច ធំ នៅតែបន្តហូរចូលទៅវិនិយោគក្នុងខេត្ត ស្របពេលខេត្តត្រៀមកាត់ឃុំចំនួន៤ ពីស្រុកទឹកឈូរចូលមកក្នុងដែនរដ្ឋបាលក្រុងកំពត។

លោកបន្តថា “ខេត្តនឹងមានអាគារខ្ពស់ៗកំពស់១៨ ទៅ៤៥ជាន់ច្រើននាពេលខាងមុខ ខណៈគំរោងវិនិយោគទាំងនោះបានអនុម័តដោយរដ្ឋាភិបាលរួចហើយ”។

រដ្ឋាភិបាលៈសេដ្ឋកិច្ចកម្ពុជារំពឹងថានឹងសម្រេចបានកំនើនជាង៣,៥ភាគរយនៅឆ្នាំនេះទោះស្ថិតវិបត្តិកូវីដ-១៩

ដោយៈ ប៊ី

ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោកបណ្ឌិតអូន ព័ន្ឋមុនីរ័ត្នបានអះអាងជាថ្មីថា កំណើនសេដ្ឋកិច្ចកម្ពុជារំពឹងថានឹងងើបឡើងវិញ ក្នុងរង្វង់៣,៥ភាគរយនៅឆ្នាំ២០២១ ទោះបីជាព្រឹត្តិការណ៍២០កុម្ភៈ នៃការរីករាលដាលជំងឺកូវីដ១៩ កំពុងតែបន្តនៅកម្ពុជា។

ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងនៅក្នុងការចុះត្រួតពិនិត្យការងារគ្រប់គ្រង បង្ការ និងទប់ស្កាត់ការរីករាលដាលនៃជំងឺកូវីដ-១៩ ក្នុងខេត្តកណ្តាល កាលពីថ្ងៃទី១៧ ខែមីនា ឆ្នាំ២០២១ ថា កំណើននេះ គឺផ្អែកតាមនិន្នាការរួម ខណៈដែលពិភពលោក បានរកឃើញវ៉ាក់សាំងចាក់បង្ការជំងឺកូវីដ-១៩ ហើយបច្ចុប្បន្នមានប្រទេសមួយចំនួន កំពុងអនុវត្តន៍អំពីការចាក់វ៉ាក់សាំងបង្ការ ជាពិសេសប្រទេសនៅបែកអឺរ៉ុប។

លោកបានថ្លែងថា “រដ្ឋាភិបាលរំពឹងថា នៅក្នុងឆ្នាំ២០២១ នេះ សេដ្ឋកិច្ចត្រូវបានព្យាករណ៍ថានឹងនឹងងើបឡើងវិញ ខណៈនៅឆ្នាំ ២០២០ កំណើនសេដ្ឋកិច្ចធ្លាក់ចុះរង្វង់-៣,១ភាគរយ”។

លោកឧបនាយករដ្ឋមន្ត្រីបានថ្លែងបន្តថា រាជរដ្ឋាភិបាលរំពឹងថា នឹងងើបឡើងវិញនោះ ដោយអាស្រ័យផ្អែកតាមនិន្នាការរួម ខណៈដែលពិភពលោក បានរកឃើញវ៉ាក់សាំងចាក់បង្ការជំងឺកូវីដ-១៩ ក្នុងនោះប្រទេសមួយចំនួនកំពុងអនុវត្តន៍ ការចាក់វ៉ាក់សាំងបង្ការនេះ ជាពិសេសប្រទេសអង់គ្លេស សហរដ្ឋអាមេរិក និងប្រទេសនៅបែក អឺរ៉ុបមួយចំនួនទៀត បន្ទាប់ពីការអនុវត្តការចាក់វ៉ាក់សាំងបង្ការនេះ យើងសង្កេតឃើញថា អត្រាឆ្លង និងអត្រានៃការស្លាប់ បានធ្លាក់ចុះជាបណ្តើរៗ ដែលជាសញ្ញាណល្អនៃការងើបឡើងវិញនៃសេដ្ឋកិច្ចសកល ក៏ដូចជាសេដ្ឋកិច្ចក្នុងស្រុក។

លោកបណ្ឌិតឆេង គីមឡុងអ្នកជំនាញផ្នែកសេដ្ឋកិច្ច វិទ្យាស្ថានចក្ខុវិស័យអាស៊ី លើកឡើងថា កម្ពុជានឹងមិនអាចសម្រេចបានកំណើនសេដ្ឋកិច្ច៤ភាគរយ នៅឆ្នាំ២០២១ទេ ប្រសិនបើការផ្ទុះឡើង នៅក្នុងសហគមន៍ជាលើកទី៣ នៃ «ព្រឹត្តិការណ៍សហគមន៍២០កុម្ភៈ» នេះមិនបញ្ចប់ ហើយនៅអូសបន្លាយយូរនោះ។

លោកថ្លែងបន្តថា “កំណើនសេដ្ឋកិច្ចនៅឆ្នាំ២០២១នេះ អាចនឹងមិនបានដល់៤ភាគរយ ដូចដែលការរំពឹងទុករបស់រាជរដ្ឋាភិបាល និងក្រសួងសេដ្ឋកិច្ច ព្រោះថាប្រសិនបើព្រឹត្តិការណ៍២០កុម្ភៈនេះ នៅតែបន្តអូសបន្លាយ”។លោកបន្តថា “បើចំនួនឆ្លងមិនធូរស្បើយ ដែលធ្វើឲ្យមានការអាក់ខានដល់ខ្សែច្រវាក់ផលិតកម្ម និងការប្រកបរបររបស់ប្រជាជន នោះកំណើនសេដ្ឋកិច្ចកម្ពុជានៅឆ្នាំ២០២១នេះ អាចនឹងធ្លាក់ចុះក្នុងកំណើននៃការរំពឹងទុក៤ភាគរយនេះ វាអាចកើនត្រឹម៣ភាគរយវិញ”។

លោកថ្លែងបន្តទៀតថា មួយវិញទៀត វាអាចធ្លាក់ចុះជាងនេះ ប្រសិនបើព្រឹត្តិការណ៍នេះ បន្តទៅពាក់កណ្ដាលឆ្នាំនេះ ហើយធ្វើឲ្យរាជរដ្ឋាភិបាលបាត់បង់សមត្ថភាពក្នុងការគ្រប់គ្រង មានន័យថា ឥទ្ធិពលនៃការឆ្លងរាលដាលនៃជំងឺកូវីដ១៩នេះ មានទំហំធំ និងស្មុគស្មាញធ្វើឲ្យកំណើនសេដ្ឋកិច្ចកម្ពុជា ក្នុងឆ្នាំ២០២១ មានកម្រិតតិចជាងការរំពឹងទុក របស់រាជរដ្ឋាភិបាលផងដែរ។

លោកឆេង គឹមឡុងបានបញ្ជាក់ថា “ដើម្បីស្ដារឡើងវិញ នូវស្ថានភាពក៏លំបាកនេះ រាជរដ្ឋាភិបាល ក៏ដូចជាប្រជាពលរដ្ឋទាំងអស់ ត្រូវចូលរួមធ្វើយ៉ាងណាទប់ស្កាត់ ការរីករាលដាលឆ្លងជំងឺនេះ ឲ្យស្ថិតក្នុងការគ្រប់គ្រងបាន មានន័យថា ការឆ្លងនេះមិនស្ថិតនៅក្នុងទ្រង់ទ្រាយធំ និងមិននៅក្នុងភាពស្មុគស្មាញដល់បណ្ដាលខេត្ត-ស្រុក ឃុំ-ភូមិ និងតំបន់ប្រជុំជនផ្សេងៗទៀត ដែលជាកត្តាធ្វើឲ្យផ្អាករំខានទៅដល់ធុរកិច្ច សកម្មភាពវិនិយោគ និងការរស់នៅប្រចាំថ្ងៃផងដែរ”។

លោកបញ្ជាក់បន្តថា កត្តាទាំងអស់នេះហើយ ជាសកម្មភាពដែលអាចជួយជំរុញ និងជាកិច្ចការងារធំបំផុត ព្រោះការគ្រប់គ្រងនូវការឆ្លង នៃការរីករាលដាលជំងឺកូវីដ១៩នេះ គឺវាផ្ដល់ជាមូលដ្ឋាន និងផ្ដល់ជាកម្លាំងជំរុញ ដល់សេដ្ឋកិច្ចទាំងមូលបាន។ ដូច្នេះការចូលរួមពីប្រជាជន គឺសំខាន់ ហើយប្រជាជនគួរតែអនុវត្តន៍ តាមការណែនាំរបស់ក្រសួងសុខាភិបាល និងជាពិសេសនោះ គឺដាច់ខាតត្រូវអនុវត្តនូវការណែនាំរបស់រាជរដ្ឋាភិបាល ដែលបានដាក់ចេញមក គឺ៣កុំ និង៣ការពារ៕

ភ្នាក់ងារលក់អចលនទ្រព្យគួរធ្វើបែបណាដើម្បីបញ្ចៀសកំហុងឆ្គងក្នុងការ លក់តាមអនឡាញ

ដោយៈ រ៉ាណេត

ភ្នំពេញៈ ការផ្សព្វផ្សាយលក់អចលនវត្ថុតាមរយៈបណ្តាញសង្គម ឬតាមអនឡាញនាពេលបច្ចុប្បន្នបានក្លាយជាវិធីសាស្ត្រមួយ ដ៏មានប្រជាប្រិយភាពបំផុត ជាពិសេសក្នុងបរិបទនៃវិបត្តិកូវីដនេះតែម្ដង ហើយក្នុងនោះមានអ្នកខ្លះ ទទួលបានលទ្ធផលល្អពីការផ្សព្វផ្សាយ ហើយអ្នកខ្លះទៀតជួបភាពបរាជ័យ ដោយសារតែកំហុសឆ្គងមួយចំនួនដែលធ្វើឡើងដោយមិនដឹងខ្លួន។

អ្នកជំនាញនៅក្នុងវិស័យអចលនទ្រព្យកម្ពុជា លោកស្រីអាន សុធីតានាយិកាប្រចាំប្រទេសក្រមហ៊ុនភ្នាក់ងារអចលនទ្រព្យអន្តរជាតិ CBRE Cambodia បានមានប្រសាសន៍ប្រាប់ឱ្យដឹងនៅថ្ងៃទី១៨ ខែមីនា ឆ្នាំ២០២១នេះថា ការជ្រើសយកបច្ចេកវិទ្យា ធ្វើជាវិធីសាស្ត្រក្នុងផ្សព្វផ្សាយ ដើម្បីជំរុញការលក់អចលវត្ថុជាជម្រើសមួយដ៏ល្អបំផុត ជាពិសេសស្ថិតនៅក្នុងបរិបទ ដែលកំពុងរាតត្បាតដោយជំងឺឆ្លងកូវីដ១៩។

លោកស្រីបានបន្តថា “បច្ចេកវិទ្យាដែលត្រូវបានគេយកមក ធ្វើជាមធ្យោបាយផ្សព្វផ្សាយលក់អចលនវត្ថុ ត្រូវបានធ្វើឡើងច្រើនរូបភាព ក្នុងនោះមានដូចជាបណ្តាញទំនាក់ទំនងសង្គម facebook, line, linkedin, Telegram ជាដើម ប៉ុន្តែរាល់ការផ្សព្វផ្សាយទាំងនោះក៏ត្រូវធ្វើឡើងឱ្យត្រូវតាមក្បួន មានភាពឆ្លាតវៃស្គាល់ និងចេះពីការប្រើប្រាស់”។លោកស្រីបន្តថា “លើសពីនេះគឺការយល់ដឹងពីវិធីសាស្ត្រ នៃការបញ្ជូនទិន្នន័យ ក៏ដូចជាព័ត៌មានលម្អិតដែលពាក់ព័ន្ធរបស់ ដែលចង់លក់ទៅដល់អតិថិជនគោលដៅ ទើបអាចមានអត្រាជោគជ័យក្នុងការលក់”។

លោកស្រីអាន សុធីតា បានមានប្រសាសន៍បញ្ជាក់ថា ភាពជោគជ័យដែលទទួលបានពីការផ្សព្វផ្សាយតាមបច្ចេកវិទ្យា មានចំណុចគួបផ្សំជាមួយគ្នា ត្រូវមានទាំងចំណេះដឹង ចំណេះធ្វើ និងភាពឆ្លាតវៃ ក្នុងការប្រើប្រាស់ប្រព័ន្ធផ្សាយ តាមបែបបច្ចេកវិទ្យាទាំងនេះ។ អ្នកខ្លះគាត់បានយល់ ស្គាល់ និងចេះពីរបៀបប្រើប្រាស់ ប៉ុន្តែបែរជាមានកំហុសឆ្គងទៅលើការផ្តល់ព័ត៌មានលម្អិតពីអ្វីដែលខ្លួនចង់លក់។ ត្រូវបង្ហាញពីលក្ខណៈពិសេសរបស់គម្រោង ភាពលេចធ្លោខុសពីគម្រោងដទៃ ជាពិសេសបង្ហាញពីអត្ថប្រយោជន៍បន្ថែមដល់អតិថិជនក្រោយពេលសម្រេចចិត្តទិញគម្រោង។

ឧទាហរណ៍ គាត់ចង់លក់គម្រោងខុនដូ គាត់បានថតរូបភាពខុនដូ និងភាពប្រណីត និងលេចធ្លារបស់គម្រោងបង្ហោះផ្សព្វផ្សាយ ប៉ុន្តែបែរជាសរសេរជាអក្សរអង់គ្លេស នៅពេលដែលប្រភេទខុនដូ ដែលគាត់កំពុងដាក់លក់ ត្រូវបានផ្តោតសំខាន់ទៅលើជនជាតិខ្មែរ។ យើងដឹងថា ភាគច្រើនប្រជាជនខ្មែរដែលមានលទ្ធភាពទិញ និងចង់រស់នៅក្នុងខុនដូភាគច្រើនក៏មានចំណេះដឹងផ្នែកភាសា ប៉ុន្តែវាអាចជាចំណុចចន្លោះប្រហោងមួយ ដែលយើងគិតមិនដល់។

លោកស្រីអាន សុធីតាបានបន្តថា មិនប្រាកដថា គាត់ដែលជាភ្នាក់ងារសរសេរមិនលម្អិតពីគម្រោង ឬក៏អតិថិជនគោលដៅគាត់មិនយល់ច្បាស់ពីអ្វី ដែលភ្នាក់ងារបានសរសេរ។ ដូច្នេះជាជម្រើសល្អ គួរតែមានការបែងចែក និងការបញ្ជូនព័ត៌មានលម្អិតឱ្យបានច្បាស់លាស់ ទៅកាន់អតិថិជនគោលដៅរបស់ខ្លួន បើជាជនជាតិខ្មែរគួរសរសេរជាភាសាខ្មែរ សំដីអតិថិជនជាជនបរទេស គួរសរសេរជាភាសាបរទេស ព្រោះចំណុចនេះក៏អាចជាកំហុសឆ្គងមួយដែលធ្វើឡើងដោយមិនដឹងខ្លួន។

ដូច្នេះនិយាយជារួម គម្បីមានភាពវៃឆ្លាតក្នុងការបញ្ជ្រាបព័ត៌មានលម្អិត ពីគម្រោងទៅដល់អតិថិជនគោលដៅ និងស្គាល់ពីចំណុចពិសេសរបស់គម្រោង ឱ្យបានច្បាស់មុនពេលទទួលយក និងប្រកាសលក់៕

ធនាគារហត្ថាផ្តល់រង្វាន់យ៉ាងច្រើនមហាសាល និងអត្ថប្រយោជន៍ជាច្រើនជូនអតិថិជនបើកគណនីចរន្ត

ដោយៈ សហការី
ភ្នំពេញៈ កាន់តែអស្ចារ្យជាមួយនឹងកម្មវិធី “បើកគណនីចរន្តបានរង្វាន់មហាសាល” របស់ធនាគារហត្ថា ដែលផ្តល់រង្វាន់យ៉ាងច្រើនសន្ធឹកសន្ធាប់ ជូនដល់អតិថិជនគណនីចរន្ត។

រង្វាន់ដែលផ្តល់ជូនអតិថិជនទាំងនោះ រួមមាន៖ iPhone 12 Pro Max ចំនួន១០រង្វាន់ម៉ូតូម៉ាក Honda PCX ចំនួន៣រង្វាន់ និងរង្វាន់ធំរថយន្តម៉ាក Ford Ranger XLT 2021 ចំនួន១រង្វាន់។ គួររម្លឹកផងដែរថា កម្មវិធី “បើកគណនីចរន្ត បានរង្វាន់មហាសាល” បានចាប់ផ្តើមដំណើរការតាំងពីថ្ងៃទី១ ខែមីនា ឆ្នាំ២០២១មកម្ល៉េះ និងបន្តរហូតដល់ថ្ងៃទី៣០ ខែមិថុនា ឆ្នាំ២០២២ ដើម្បីផ្តល់ឱកាសឈ្នះរង្វាន់កាន់តែច្រើន ជូនអតិថិជនទាំងអស់ដែលបានបើកគណនីចរន្តជាមួយធនាគារហត្ថា។

ការចាប់រង្វាន់នឹងប្រព្រឹត្តទៅរៀងរាល់៤ខែម្តង ហើយការចាប់រង្វាន់លើកទី១ នឹងប្រព្រឹត្តទៅនៅខែកក្កដា ឆ្នាំ២០២១ខាងមុខនេះ។ ប្រញាប់បើកគណនីចរន្តឥឡូវនេះដើម្បីមានឱកាសមុនគេក្នុងការឈ្នះរង្វាន់ ហើយបើប័ណ្ណផ្សងសំណាងរបស់អ្នកមិនមានសំណាងក្នុងការចាប់លើកទី១ទេ នោះក្រុមហ៊ុននឹងរក្សាទុក សម្រាប់ការចាប់លើកក្រោយៗទៀត។

អ្វីដែលពិសេសជាងនេះទៅទៀត ក្រៅពីការចាប់រង្វាន់ អតិថិជនគណនីចរន្តទាំងអស់នឹងទទួលបានអត្ថប្រយោជន៍ជាច្រើនដូចជា ទទួលបានអត្រាការប្រាក់ពីគណនីចរន្តរហូតដល់ ២.២៥% ក្នុងមួយឆ្នាំ ព្រមទាំងទទួលបានសៀវភៅមូលប្បទាន ប្រើប្រាស់កម្មវិធី Hattha Mobile ប្រើប្រាស់កាតអេធីអឹមដោយឥតគិតថ្លៃ និងអាចប្រើប្រាស់សេវាហិរញ្ញវត្ថុផ្សេងៗទៀតជាមួយធនាគារ ហត្ថា បានយ៉ាងងាយស្រួល ។

សំណាងមើលមិនឃើញ ដាក់ប្រាក់មានសុវត្ថិភាពហើយ ទទួលបានអត្ថប្រយោជន៍ជាច្រើន ព្រមទាំងមានឱកាសឈ្នះរង្វាន់ទៀត។ កុំបង្អង់យូរទំនាក់ទំនងក្រុមការងារធនាគារ ហត្ថាឥឡូវនេះ តាមរយៈ១៨០០ ២១២ ២២២ (ឥតគិតថ្លៃ) ឬ០២៣ ៩៩៩ ២៦៦។

អំពីធនាគារហត្ថា
ធនាគារហត្ថា មានបទពិសោធន៍ជាង២៦ឆ្នាំ ក្នុងការផ្តល់សេវាហិរញ្ញវត្ថុក្នុងប្រទេសកម្ពុជា ដោយចាប់ផ្តើមដំបូងជាគម្រោង សន្តិសុខ ស្បៀង ដោយបានវិវឌ្ឍខ្លួនឥតឈប់ឈរ និងបានកម្លាយខ្លួនជាធនាគារពាណិជ្ជនៅខែសីហា ឆ្នាំ២០២០។ បច្ចុប្បន្នធនាគារ ហត្ថា មានដើមទុនចុះបញ្ជីនៅធនាគារជាតិ នៃកម្ពុជាចំនួន១១៥លានដុល្លារអាមេរិកមានការិយាល័យសាខាចំនួន១៧៧ ជាមួយនឹងម៉ាស៊ីនអេធីអឹមចំនួន១៣៧ ទូទាំងប្រទេស បាននិងកំពុងផ្តល់សេវាកម្មហិរញ្ញវត្ថុ យ៉ាងសម្បូរបែបដល់អតិថិជន ដូចជា សេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាផ្ទេរប្រាក់ឆ្លងធនាគារ សេវាអេធីអឹម សេវាធនាគារចល័ត សេវាបើកប្រាក់បៀវត្ស ជាភ្នាក់ងារណែនាំលក់សេវាធានារ៉ាប់រង និងត្រៀមដាក់ជូនឱ្យប្រើប្រាស់នូវសេវាថ្មីៗបន្ថែមទៀតនាពេលអនាគតដ៏ខ្លី។

បច្ចុប្បន្នធនាគារហត្ថា គឺជាបុត្រសម្ព័ន្ធរបស់ធនាគារក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅព្រះរាជាណាចក្រថៃឡង់ដ៏ និងជាសមាជិករបស់សម្ព័ន្ធហិរញ្ញវត្ថុអន្តរជាតិ Mitsubishi UFJ Financial Group (MUFG) ដែលជាសម្ព័ន្ធហិរញ្ញវត្ថុធំជាងគេបំផុតនៅប្រទេសជប៉ុន ព្រមទាំងជាសម្ព័ន្ធសេវាហិរញ្ញវត្ថុដ៏ធំមួយក្នុងចំណោមសម្ព័ន្ធហិរញ្ញវត្ថុធំជាងគេលើសកលលោក៕

1...2,0662,0672,068...3,313 Page 2,067 of 3,313