ដោយៈសហការី
ភ្នំពេញៈ អ្នកជំនាញភាគច្រើនបានយល់ស្របគ្នាថា វិបត្តិជំងឺកូវីដ១៩ នៃព្រឹត្តិការណ៍៍២០កុម្ភៈ បាននិងកំពុងជះឥទ្ឋិពលអវិជ្ជមានដល់វិស័យអចលនទ្រព្យ ក៏ដូចជាទិដ្ឋភាពទូទៅនៃសេដ្ឋកិច្ចកម្ពុជា។

លោកឧកញ៉ាផន វណ្ណិត ស្ថាបនិកក្រុមហ៊ុនរាជសន្តុសិត និងជាប្រធានគណៈកម្មការសម្របសម្រួលនិងសិក្សាវិវាទ នៃសមាគមអ្នកអភិវឌ្ឍន៍ដីឡូត៍កម្ពុជាបានមានប្រសាសន៍ថា ជំងឺកូវីដ-១៩ បានធ្វើឲ្យរាំងស្ទះជាសកល ដែលប៉ះពាល់ដល់ដំណើរការអភិវឌ្ឍន៍ ក៏ដូចជាការធ្វើពាណិជ្ជកម្ម ការវិនិយោគ និងសេដ្ឋកិច្ចសង្គម ដោយហេតុថា ប្រជាពលរដ្ឋមានការភ័យខ្លាច និងទុកលុយដើម្បីបំរុងក្នុងសម័យកាលកូវីដនេះដែរ។

លោកបន្តថា “បើប៉ះពាល់ដល់ប្រជាពលរដ្ឋហើយ ប្រាដកជាប៉ះពាល់ដល់សេដ្ឋកិច្ច និងការអភិវឌ្ឍន៍ជាក់ជាមិនខានឡើយ”។

លោកឧកញ៉ាបានបន្ថែមថា វិស័យអចលនទ្រព្យអាចនឹងប្រសើរឡើងវិញ ព្រោះប្រទេសកម្ពុជាកំពុងធ្វើការអភិវឌ្ឍលើវិស័យនេះ ហើយព្រឹត្តិការណ៍២០កុម្ភៈ គ្រាន់មកបង្អាក់ នៃដំណើរការអភិវឌ្ឍអចលនទ្រព្យមួយពេលតែប៉ុណ្ណោះ។

លោកបន្តទៀតថា ក្រុងកាន់តែរីក មនុស្សកាន់តែកើន ដីកាន់តែថ្លៃ យ៉ាងណាមិញប្រជាពលរដ្ឋប្រាកដជាយល់ដឹងច្បាស់អំពីតម្លៃអចលនទ្រព្យ។

និយាយបែបនេះ ពីព្រោះ អ្នកជំនួញ និងពាណិជ្ជករទាំងឡាយ គឺត្រូវការដីជាបឋមក្នុងការចាប់ផ្តើមអភិវឌ្ឍន៍។

ជាមួយគ្នានេះ លោកឧកញ៉ាសឿ សុវណ្ណ ដែលជាប្រធានក្រុមប្រឹក្សាភិបាលនៃក្រុមហ៊ុន ឃុន សឿរៀលធី និងជាសមាជិកសមាគមអ្នកអភិវឌ្ឍន៍ដីឡូត៍កម្ពុជា បានលើកឡើងថា ការទិញលក់ជួលអចលនទ្រព្យទូទាំងប្រទេស មានសកម្មភាពថយចុះខ្លាំង ដោយសារមានការបារម្ភពីការរីករាលដាលឆ្លងជំងឺកូវីដ-១៩ ប៉ុន្តែក្នុងតំបន់ខេត្តមួយចំនួននៅតែមានសកម្មភាពល្អប្រសើរ ដូចជា ខេត្តកំពង់ស្ពឺ ខេត្តកណ្តាល ខេត្តកំពត និងខេត្តសៀមរាបជាដើម។

លោកបន្តថា “មនុស្សជាច្រើនគិតពីសុខុមាលភាពហិរញ្ញវត្ថុបម្រុង និងមិនហ៊ានជួបគ្នាផ្ទាល់ ខណៈជំងឺបានរីករាលដាលខ្លាំងឡើងៗ ដោយពុំទាន់មានសញ្ញាវិជ្ជមានល្អនៅឡើយ ជាហេតុធ្វើអោយការទិញលក់ ឬជួលអចលនទ្រព្យ មានការថមថយខ្លាំង”។លោកបន្តថា “ទីផ្សារអចលនទ្រព្យអាចនឹងមានភាពល្អប្រសើរឡើងវិញ គឺមើលទៅលើទំនុកចិត្តខ្ពស់របស់អ្នកទិញ អ្នកលក់ និងអ្នកវិនិយោគអចលនទ្រព្យ បន្ទាប់ពីបញ្ចប់ព្រឹត្តិការណ៍សហគមន៍ ២០ កុម្ភៈ”។

ដោយសារតែជម្ងឺ កូវីដ១៩ ជាជម្ងឺរាតត្បាតជាសាកល ហេតុដូចនេះចរន្តរបស់អ្នកវិនិយោគបរទេសខាងក្រៅលើវិស័យអចលនទ្រព្យ ហាក់មិនទាន់បានបង្កើនល្បឿនក្នុងប្រទេសកម្ពុជាយើងនៅឡើយ ជាហេតុធ្វើអោយយើងពឹងផ្អែកខ្លាំងពីអ្នកវិនិយោគ និងអ្នកអភិវឌ្ឍក្នុងស្រុកខ្លាំងនាពេលបច្ចុប្បន្ននេះ៕

ដោយៈ រ៉ាណេត
ព្រះសីហនុៈ អ្នកជំនាញផ្នែកសេដ្ឋកិច្ចនៃរាជបណ្ឌិតសភាកម្ពុជា បានចុះសិក្សាស្រាវជ្រាវពីស្ថានភាពសេដ្ឋកិច្ច និងអចលនទ្រព្យនៅក្រុងព្រះសីហនុ ជាពិសេសសម្រាប់ទីផ្សារនៃការជួល ដែលកំពុងមានភាពស្ងប់ស្ងាត់ ក្នុងអំឡុងពេលវិបត្តិកូវីដ១៩ ដែលអាចធ្វើឱ្យម្ចាស់អគារទទួលការខាតបង់។

ផ្អែកតាមការស្រាវជ្រាវថ្មីរបស់មជ្ឈមណ្ឌលសិក្សាចិន នៃរាជបណ្ឌិត្យកម្ពុជាដែលបង្ហាញលទ្ធផល នៅក្នុងសប្ដាហ៍នេះបានឱ្យដឹងថា ភាពស្ងប់ស្ងាត់នៃចរន្តទីផ្សារអចលនទ្រព្យនៅក្នុងក្រុងព្រះសីហនុ ក្រោយការចាកចេញពីសំណាក់ជនជាតិចិន ចាប់តាំងពីដើមឆ្នាំ២០២០ បន្ទាប់ពីរដ្ឋាភិបាលប្រកាសបិទល្បែងអនឡាញ រួមជាមួយនឹងវិបត្តិនៃជំងឺកូវីដ១៩ ដែលបន្តរហូតមកដល់ពេលបច្ចុប្បន្ននេះ បានធ្វើឱ្យអ្នកជំនួញនៅក្នុងទីផ្សារអចលនទ្រព្យមួយចំនួនខាតបង់ ប៉ុន្តែការខាតបង់ទាំងនេះភាគច្រើន កើតមានតែចំពោះតែម្ចាស់អគារតូចៗ ឬអ្នកដែលចាប់ផ្តើមវិនិយោគត្រឹមដើមឆ្នាំ២០២០តែប៉ុណ្ណោះ។

លោកបណ្ឌិតគី សេរីវឌ្ឍន៍ ប្រធានមជ្ឈមណ្ឌលសិក្សាចិននៃរាជបណ្ឌិត្យសភាកម្ពុជាបានមានប្រសាសន៍ ប្រាប់តាមទូរស័ព្ទនៅព្រឹកថ្ងៃទី១៩ ខែមីនា ឆ្នាំ២០២១នេះថា ចាប់តាំងពីដើមឆ្នាំ២០២០ ទីផ្សារអចលនទ្រព្យនៅក្នុងក្រុងព្រះសីហនុ មានការធ្លាក់ចុះយ៉ាងគំហុកបន្ទាប់ពីការចាកចេញរបស់ជនជាតិចិន ហើយបន្ថែមពីនេះវិបត្តិ ដែលកើតមានដោយសារជំងឺកូវីដ១៩ ក៏ជាមូលហេតុដែលសំខាន់ក្នុងការរួមចំណែកផងដែរ។

លោកបញ្ជាក់ថា “ជាធម្មតានៅពេលទីផ្សារវិស័យណាមួយ មានការធ្លាក់ចុះគឺតែងជះឥទ្ធិពលអាក្រក់ដល់អ្នកពាក់ព័ន្ធ ជាពិសេសវិនិយោគតែម្ដង”។ លោកបន្តថា “ជាក់ស្ដែងទីផ្សារអចលនទ្រព្យនៅក្នុងក្រុងព្រះសីហនុ ដែលមានកំណើនទីផ្សារខ្ពស់ហួសពីការរំពឹងទុកកាលពីឆ្នាំ២០១៨-២០១៩ ដែលជំរុញឱ្យតម្លៃឡើខ្ពស់ ប៉ុន្តែបច្ចុប្បន្នបានធ្លាក់មកវិញដោយសារតែបាត់បង់តម្រូវការ”។

លោកបណ្ឌិតបានលើកឡើងថា តាមការសិក្សាថ្មីៗនេះបានបង្ហាញថា អ្នកវិនិយោគ និងអភិវឌ្ឍន៍ក្នុងវិស័យអចលនទ្រព្យកម្រិតមធ្យម មួយចំនួនបានជួបការខាតបង់ ដែលក្នុងនោះមានប្រមាណ៤៥ភាគរយ កំពុងជាប់បំណុលធនាគារឯកជន ដោយសារខ្ចីលុយយកមកធ្វើជាដើមទុនសាងសង់អគារ ក្នុងគោលបំណងជួលឱ្យជនជាតិចិន។ ប៉ុន្តែបំណងនេះត្រូវបានបរាជ័យ ក្រោយការចាកចេញរបស់ជនជាតិចិនយ៉ាងឆាប់រហ័ស កាលពីដើមឆ្នាំ២០២០។

លោកបណ្ឌិតគី សេរីវឌ្ឍន៍បានបញ្ជាក់ថា ភាគច្រើនអ្នកដែលខាតបង់ គឺអ្នកទើបតែចាប់វិនិយោគ និងអភិវឌ្ឍន៍សំណង់នៅដើមឆ្នាំ២០២០ ដែលមានទ្រង់ទ្រាយតូច និងមធ្យម ប៉ុន្តែសម្រាប់អ្នកដែលជាម្ចាស់គម្រោងអគារធំៗ និងបានវិនិយោគតាំងពីមុនឆ្នាំ២០១៩ ភាគច្រើននៅមិនទាន់ទទួលរងនូវការខាតបង់នោះទេ ក្រោមហេតុផលថា អគារធំៗដែលជួលឱ្យក្រុមហ៊ុនវិនិយោគបន្តភាគច្រើន មានកុងត្រាជួលក្នុងរយៈពេលយូរចាប់ពី១៥ឆ្នាំ ឬ២០ឆ្នាំ ឬយូរជាងនេះ ដោយមានការកក់ប្រាក់ចាប់ពូ៣ឆ្នាំ ឬ៥ឆ្នាំមុនក៏មាន ដូច្នេះនៅក្នុងវិបត្តិប្រមាណ១ឆ្នាំកន្លងកមនេះ ពួកគេនៅមិនមានការខាតប្រយោជន៍នោះទេ។

លោកបន្តថា ទោះជាយ៉ាងណាភាពស្ងប់ស្ងាត់ នៃតម្រូវការជួលអគារទាំងនេះអាចនៅបន្ត ឬមានតម្រូវការឡើងវិញនៅពេលណានោះ នៅមិនអាចកំណត់បាននោះទេ ដែលវាអាស្រ័យទៅលើស្ថានការជាក់ស្ដែង នៃការទប់ស្កាត់ការរាលដាល នៃជំងឺឆ្លងមានប្រសិទ្ធភាពបានកម្រិតណា ខណៈដែលការប្រើប្រាស់វ៉ាក់សាំង នៅតាមបណ្តាប្រទេសលើសាកលចាប់ផ្តើមអនុវត្តជាបណ្តើរៗទៅហើយនោះ៕

ដោយៈ ប៊ី
ភ្នំពេញៈ អ្នកជំនាញបានលើកឡើងថា វិស័យអចលនទ្រព្យ គួរជំរុញការប្រើប្រាស់បច្ចេកវិទ្យាឌីជីថលបន្ថែម ដើម្បីជំរុញប្រត្តិបត្តិការទិញលក់ក្នុងវិស័យនេះ អំឡុងពេលវិបត្តិកូវី ខណៈការប្រើបាស់បច្ចេកវិទ្យាឌីជីថល ជួយកាត់ពេលវេលា និងហានិភ័យឆ្លងជំងឺរាតត្បាតនេះ មុនឈានដល់សម្រេចទិញលក់ដោយផ្ទាល់។

លោកប៉ូ អ៊ាវគង់អគ្គនាយកក្រុមហ៊ុន អ៊ែតវ៉ានស៍ រៀលអេស្ទេតបានថ្លែងប្រាប់នៅថ្ងៃទី១៩ ខែមីនា ឆ្នាំ២០២១នេះថា ទីផ្សារអចលនទ្រព្យ កំពុងធ្វើដំណើរទៅកាន់ការប្រើប្រាស់ប្រព័ន្ធឌីជីថល អំឡុងវិបត្តិកូវីដ១៩ ដែលអូសបន្លាយពេលជាងមួយឆ្នាំកន្លងមកនេះ ហើយវិស័យបាននិងកំពុងរៀបចំកិច្ចការងារនេះ ដើម្បីឆ្លើយតបនឹងស្ថានភាពនាបច្ចុប្បន្ន។

លោកបានថ្លែងថា “ការទិញលក់តាមប្រព័ន្ធឌីជីថល គ្រាន់តែសម្រួលប្រតិបត្តិការការងាររបស់យើង កាន់តែចំណាយពេលតិច ហើយការកាត់បន្ថយការជួបជុំគ្នា តាមរយៈការប្រើប្រាស់ទំរង់ប្រព័ន្ធឌីជីថល។ ឧទាហរណ៍ យើងអាចធ្វើបទបង្ហាញពីគម្រោងរបស់យើង តាមរយៈវីដេអូខល ឬប្រព័ន្ធឌីជីថលជាដើម”។

លោកបានបន្តទៀតថា បច្ចេកវិទ្យាឌីជីថល នឹងជួយជំរុញដល់ការទិញលក់អចលនទ្រព្យនាពេលបច្ចុប្បន្ន ក្នុងសម័យកូវីដ១៩ ព្រោះការប្រាស្រ័យទាក់ទងគា្នតាមរយៈវីដេអូខល និងប្រព័ន្ធឌីជីថលផ្សេងនឹងកាត់បន្ថយពេលវេលា និងការជួបជុំផ្ទាល់ ប៉ុន្តែការពេលចាំបាច់មួយ ដូចការសម្រេចទិញចុងក្រោយតម្រូវការអ្នកទិញ អ្នកលក់ជួបគ្នាដោយផ្ទាល់ ដើម្បីសម្រេចបាននូវការទិញលក់នេះ។

ទោះបីជាយ៉ាងក៏ដោយ លោកបានលើកឡើងថា ប្រទេសយើងជាប្រទេសកំពុងអភិវឌ្ឍន៍ ដូច្នេះលក្ខខណ្ឌមួយចំនួននៅមានកម្រិត។ ប្រត្តិបត្តិការទិញលក់អចលនទ្រព្យតាមប្រព័ន្ធឌីជីថលនេះ នៅតែទាមទារធនធានមនុស្សច្រើន ប៉ុន្តែភ្នាក់ងារអចលនទ្រព្យ និងអ្នកទិញបាន និងកំពុងសម្របខ្លួនទៅតាមស្ថានភាពបច្ចុប្បន្ន ដោយបត់បែនទៅរកការប្រើប្រាស់ប្រព័ន្ធ ដើម្បីជំរុញអាជីវកម្មអចលនទ្រព្យរបស់ពួកគេ។

ការធ្វើទំនើបកម្មបច្ចេកវិទ្យាឌីជីថល នៃដំណើរការផ្ទេរអចលនទ្រព្យនៅកម្ពុជានឹងធ្វើឲ្យមានការផ្លាស់ប្តូរថ្មីមួយ ដល់វិស័យអចលនទ្រព្យ ដែលធ្វើឱ្យមានដំណើរការដោយមានសុវត្ថិ ភាពតម្លាភាព និងលឿនជាងមុនដើម្បីលើកទឹកចិត្ត ការវិនិយោគអចលនទ្រព្យនៅក្នុងប្រទេសកម្ពុជា។

ជាមួយគ្នានេះដែរ ក្រសួងរៀបចំដែនដី បានចាត់វិធានការសំខាន់ៗក្នុងការបញ្ចូលបច្ចេកវិទ្យាអនឡាញទៅក្នុងវិស័យអចលនទ្រព្យ។ ក្រសួងបានដាក់ចេញកម្មវិធីជាច្រើនដើម្បីធ្វើបច្ចុប្បន្នភាពដល់កម្មសិទ្ធិដីធ្លីតាម Internet ដោយប្រើ QR Code ហើយក៏បានចាប់ផ្តើមកម្មវិធីទូរស័ព្ទចល័ត ជាក់ស្តែងលើគម្រោងសាងសង់ ដែលបានអនុម័ត ហើយផ្គត់ផ្គង់ឯកសាររូបភាពរបស់រដ្ឋាភិបាល ដើម្បីធានានូវតម្លាភាពនៅថ្នាក់រដ្ឋបាល។

ការធ្វើទំនើបកម្មឌីជីថល នៃដំណើរការផ្ទេរកម្មសិទ្ធិនឹងផ្លាស់ប្តូរ វិស័យអចលនទ្រព្យ និងបង្កើនទំនុកចិត្តដល់ អ្នកវិនិយោគ និងមានដំណើរការលឿន។
ការធ្វើទំនើបកម្មឌីជីថល អនុញ្ញាតឱ្យភាគីពាក់ព័ន្ធក្នុងការផ្ទេរកម្មសិទ្ធិ ដើម្បីទទួលបានព័ត៌មានចាំបាច់ទាំងអស់តាម Internet ហើយបញ្ជូន និងតាមដានការដាក់ស្នើរកម្មសិទ្ធិបស់ពួកគេជាមួយ នឹងការិយាល័យសុរិយោដី ដែលអាចដើរតួជា ច្រកតែមួយ សម្រាប់ការផ្ទេរកម្មសិទ្ធិអចលនទ្រព្យ៕

ដោយៈគង់ សូរិយា
ភ្នំពេញៈ ទីក្រុងកោះពេជ្របាន និងកំពុងដើរតាមផែនការមេរបស់ខ្លួន ខណៈការសាងសង់អាគារពាណិជ្ជកម្ម ខុនដូបាននិងកំពុងកើនឡើង ស្របពេលគំរោងអភិវឌ្ឍន៍៍ធំៗរបស់ទីក្រុងនេះកំពុងបន្ត។

បើតាមថ្នាក់ដឹកនាំជាន់ខ្ពស់ក្រុមហ៊ុនOCIC លោកទូច សំណាងអគ្គនាយករងក្រុមហ៊ុននេះបានមានប្រសាសន៍ឲ្យដឹងកាលពីពេលថ្មីៗនេះថា ការអភិវវឌ្ឍទីក្រុងកោះពេជ្រដែលមានផ្ទៃដីជាង៨០ហិកតា កំពុងដើរតាមផែនការមេរបស់ខ្លួន ដោយបច្ចុប្បន្នទីក្រុងនេះកំពុងរៀបចំផ្លូវដើរព័ទ្ឋជុំវិញ មានផ្សាររាត្រី និងគំរោងអភិវឌ្ឍន៍ជាច្រើនកំពុងសាងសង់។លោកបន្តថា “បច្ចុប្បន្នការប្រើប្រាស់ដីលើទីក្រុងនេះ ទើបសម្រេចបាន៥០ភាគរយ ខណៈសំណង់អាគារដែលសាងសង់លើទីក្រុងនេះ ទើបសម្រេចបានប្រមាណ២៥ភាគរយប៉ុណ្ណោះ”។លោកបន្តថា “ទីក្រុងនេះកំពុងមានភាពរីកចម្រើន ហើយដើរតាមផែនការមេដែលបានគ្រោងទុក”។

បច្ចុប្បន្នគំរោងធំៗចំនួន៤បាន និងកំពុងសាងសង់រួចមាន The Morgan Tower, Mesong Tower, The D.I RIVIERA និងគំរោងសាងសង់មជ្ឈមណ្ឌលពាណិជ្ជកម្មលំដាប់ពិភពលោករបស់ក្រុមហ៊ុនចិន ដែលគ្រោងសាងសង់អាគារមេរបស់ខ្លួនកំពស់៤០០ម៉ែត្រ ស្ថិតនៅអតីតទីតាំងផ្សាររាត្រី ដែលបានផ្លាស់ប្តូរទៅកាន់ទីក្រុងរណបជ្រោយចង្វារ។

បច្ចុប្បន្នគំរោងអាគារខ្ពស់ៗ ដែលបានសាងសង់ចប់នៅលើទីក្រុងនេះ រួមមាន គម្រោងDiamond Twin Tower, Casa Meridian ការិយាល័យកណ្តាលរបស់ក្រុមហ៊ុនយក្សPrince Real Estate Group និងគំរោងThe Elysee កំពុងត្រៀមបញ្ចប់ការសាងសង់ផងដែរ។

សហស្ថាបនិកនិងជាអគ្គនាយកគេហទំព័រPropertyarea.asiaដែលជាគេហទំព័រឈានមុខគេ លើការផ្សព្វផ្សាយព៌តមានអចលនទ្រព្យ និងសេដ្ឋកិច្ចនៅកម្ពុជាបានមានប្រសាសន៍ថា ភាពអំណោយផលនៃទីតាំងភូមិសាស្រ្ត បានធ្វើឲ្យទីក្រុងនេះ ជាគ្រាប់ពេជ្រមួយ ដូចគ្នានឹងឈ្មោះទីក្រុងនេះ ដែលអ្នកវិនិយោគជាតិ អន្តរជាតិតែងតែសម្លឹងមើល និងចង់ចូលមកវិនិយោគ ដោយសារទីក្រុងនេះមានទន្លេព័ទ្ឋជុំវិញ ដែលផ្តល់បរិយាកាសល្អក្នុងការរស់នៅ មានខ្យល់អាកាសបរិសុទ្ឋ និងជាទីតាំងមានហុងស៊ុយខ្ពស់ បើតាមជំនឿរបស់ជនជាតិចិន។

លោកបន្តថា“ទីក្រុងនេះ និងតំបន់ជុំវិញនឹងក្លាយជាមជ្ឈមណ្ឌល ពាណិជ្ជកម្មលំដាប់អន្តរជាតិនាពេលអនាគត ហើយវាគួរតែជាតំបន់ថ្មើជើងមួយ សម្រាប់ភ្ញៀវទេសចរណ៍ ដើរទស្សនាកម្សាន្តនិងទិញទំនិញនាពេលអនាគត”។លោកបន្តថា “តំបន់នេះនឹងមានផ្សារទំនើបយ៉ាងតិចណាស់ចំនួន៤ នាពេលអនាគត ហេតុនេះបើសិនអ្នកអភិវឌ្ឍន៍លើកោះនេះ និងតំបន់ជុំវិញរៀបចំបានល្អ តំបន់នេះនឹងក្លាយជាកន្លែងដើរទិញទំនិញ និងកំសាន្តដ៏រសរវើក”។
ព័ទ្ឋជុំវិញតំបន់នេះ យើងឃើញមានគំរោងជាច្រើនបានសាងសង់ ដាក់ឲ្យដំណើរការ និងត្រៀមដាក់ដំណើរការនាពេលឆាប់ៗខាងមុខ ដូចជា ផ្សារទំនើបលំដាប់អន្តរជាតិAEON Mall1, The Bridge, The Peak, Naga World 1, Naga World2, Naga World3 ដែលជាមជ្ឈមណ្ឌលកំសាន្តធំជាងគេនៅក្នុងតំបន់ សម្រាប់ពេលអនាគត។

លោកយិន លាងគង់បានបន្តថា ការប្រសូត្រថ្មីនៃទីក្រុងរណបកោះនរា ដែលបាននិងកំពុងកសាងហេដ្ឋារចនាសម្ព័ន្ឋយ៉ាងសកម្ម នឹងជម្រុញធ្វើឲ្យទីក្រុងកោះពេជ្រកាន់តែមានភាពរសរវើក និងមានការអភិវឌ្ឍន៍កាន់តែលឿនបន្ថែមទៀតនាពេលអនាគត ខណៈស្ពានតភ្ជាប់ទីក្រុងទាំងពីរនេះបាន និងកំពុងដំណើរការសាងសង់ និងសមិទ្ឋផលជាច្រើនទៀតត្រៀមនឹងបង្ហាញខ្លួនលើទីក្រុងកោះពេជ្រ៕