ក្រុមហ៊ុនយក្សMicrosoftកំពុងចូលរួមចំណែកលើកកម្ពស់បច្ចេកវិទ្យាឌីជីថលនៅកម្ពុជា

ដោយៈប៊ី
ភ្នំពេញៈ ក្រសួងប្រៃសណីយ៍និងទូរគមនាគមន៍ និងក្រុមហ៊ុនMicrosoft បានចុះហត្ថលេខាលើអនុស្សរណៈនៃការយោគយល់ (MOU) ដើម្បីបង្កើនសហប្រតិបត្តិការក្នុងការអភិវឌ្ឍធនធានមនុស្ស និងលើកកម្ពស់ការប្រើប្រាស់បច្ចេកវិទ្យាឌីជីថលនៅកម្ពុជា។ នេះយោងតាមការសេចក្តីប្រកាសព័ត៌មាន របស់ក្រសួងចេញផ្សាយកាលពីម្សិលមិញ។
ពិធីចុះហត្ថលេខាលើអនុស្សរណៈ នៃការយោគយល់នេះ ត្រូវបានធ្វើងរវាងលោកជា វ៉ាន់ដេត រដ្ឋក្រសួងប្រៃសណីយ៍និងទូរគមនាគមន៍ និងក្រុមហ៊ុនម៉ៃក្រូសូហ្វប្រចាំតំបន់អាស៊ី ដែលមានលោកស្រី Cairine HASLAM នាយកផ្នែកហិរញ្ញវត្ថុ និងជាតំណាងក្រុមហ៊ុន តាមរយៈប្រព័ន្ធវីដេអូ។

អនុស្សរណៈនៃការយោគយល់នេះ មានគោលបំណងលើកកម្ពស់បរិវត្តកម្មឌីជីថល (Digital Transformation) តាមរយៈកិច្ចសហប្រតិបត្តិការ លើការអភិវឌ្ឍធនធានមនុស្សជំនាញ ការស្រាវជ្រាវនិងការអភិវឌ្ឍ នវានុវត្តន៍និងសហគ្រិនភាព ក្នុងវិស័យបច្ចេកវិទ្យាគមនាគមន៍និងព័ត៌មាន ព្រមទាំងកិច្ចសហការរៀបចំគោលនយោបាយនិងផែនការអភិវឌ្ឍរដ្ឋាភិបាលឌីជីថល។

លោករដ្ឋមន្ត្រីមានប្រសាសន៍ថា ក្រសួងប្រៃសណីយ៍ និងទូរគមនាគមន៍ជឿជាក់ថា ការដាក់បញ្ចូលចំណេះដឹងបច្ចេកវិទ្យាគមនាគមន៍ និងព័ត៌មានចូលក្នុងកម្មវិធីសិក្សាថ្នាក់មធ្យមសិក្សាចំណេះទូទៅ និងថ្នាក់ឧត្តមសិក្សាគឺជាកត្តាសំខាន់ ដើម្បីជំរុញការចាប់យកនូវបច្ចេកវិទ្យាឌីជីថលនៅកម្ពុជា។

លោកបន្តទៀតថា “ក្រសួងប្រៃសណីយ៍ និងទូរគមនាគមន៍ សូមលើកទឹកចិត្តឱ្យសិស្ស-និស្សិត ពិចារណាជ្រើសរើសសិក្សាជំនាញបច្ចេកវិទ្យាឌីជីថល ឬបើទោះជាកំពុងរៀនជំនាញផ្សេង ក៏ត្រូវមានចំណេះដឹងផ្នែកឌីជីថល និងបច្ចេកវិទ្យាគមនាគមន៍និងព័ត៌មានជាមូលដ្ឋានផងដែរ ដើម្បីត្រៀមខ្លួនចូលរួមអភិវឌ្ឍសេដ្ឋកិច្ចនិងសង្គមឌីជីថល និងការមកដល់នៃបដិវត្តន៍ឧស្សាហកម្មជំនាន់ទី៤”។

លោកបានឱ្យដឹងទៀតថា ក្រសួងប្រៃសណីយ៍និងទូរគមនាគមន៍ នឹងសហការជាមួយក្រសួងអប់រំ យុវជន និងកីឡា ក្នុងការរៀបចំផែនការមេរដ្ឋាភិបាលឌីជីថល ដើម្បីជំរុញអក្ខកម្មឌីជីថលទាំងនៅថ្នាក់មធ្យមសិក្សាចំណេះទូទៅ និងថ្នាក់ឧត្តមសិក្សា៕

ការព្យាករណ៍ៈសេដ្ឋកិច្ចរបស់សហរដ្ឋអាមេរិករំពឹងនឹងហក់់ឡើងខ្ពស់ជាងការព្យាករណ៍

ដោយៈសុខុម
វ៉ាស៊ីនតោន: ធនាគារកណ្តាលសហរដ្ឋអាមេរិក Federal Reserve រំពឹងថា សេដ្ឋកិច្ចរបស់សហរដ្ឋអាមេរិក នៅក្នុងឆ្នាំ២០២១ នេះនឹងទទួលកំណើនខ្លាំងជាងការរំពឹងទុកឆ្ងាយ ខណៈអត្រាចាក់វ៉ាក់សាំងកូវីដ-១៩កើនឡើង ហើយជំនួយសង្គ្រោះរបស់រដ្ឋាភិបាលចាប់ផ្ដើមហូរចូលក្នុងសេដ្ឋកិច្ច។
យោងតាមសារព័ត៌មាន BBC ចុះផ្សាយនៅថ្ងៃទី១៨ មីនា នេះឱ្យដឹងថា ធនាគារកណ្តាលមួយនេះព្យាករថា សេដ្ឋកិច្ចរបស់សហរដ្ឋអាមេរិកនៅឆ្នាំនេះ នឹងទទួលបានកំនើនជាមធ្យម៦,៥% ដោយកើនឡើងពីកំណើន៤,២% ដែលខ្លួនបានព្យាករកាលពីខែធ្នូ ចុងឆ្នាំ២០២០។

ធនាគារនេះបញ្ជាក់ថា ទស្សនវិស័យសម្រាប់ការងើបឡើងវិញ ក្នុងទីផ្សារការងារក៏ចាប់ផ្ដើមមានពន្លឺល្អដែរ។ ទោះបីស្ថានភាពសេដ្ឋកិច្ច ចាប់ផ្ដើមប្រែជាល្អប្រសើរបណ្ដើរៗបែបនេះក្ដី ក៏ក្រុមមន្រ្តីធនាគារកណ្ដាលមិនបានដំឡើងអត្រាការប្រាក់នោះដែរ។

យោងតាមការព្យាករណ៍ ដែលធនាគារកណ្ដាលបានចេញផ្សាយ ក្រោយកិច្ចប្រជុំជាទៀងទាត់របស់ខ្លួនបង្ហាញថា សមាជិកភាគច្រើនរំពឹងថា នឹងបន្តរក្សាអត្រាការប្រាក់ឱ្យនៅជិតសូន្យ% រហូតដល់ក្រោយឆ្នាំ២០២៣។

ក្នុងសន្និសីទសារព័ត៌មានក្រោយកិច្ចប្រជុំ លោក Jerome Powell ទេសាភិបាលនៃធនាគារកណ្ដាលរបស់សហរដ្ឋអាមេរិក លើកឡើងថា “សេដ្ឋកិច្ចបានងើបឡើងវិញលឿនជាងការរំពឹងទុក។ ទន្ទឹងនឹងយើងស្វាគមន៍ការរីកចម្រើនជាវិជ្ជមានទាំងនេះ យើងក៏មិនគួរសប្បាយចិត្តភ្លេចខ្លួននោះដែរ”។

ការកែលម្អចក្ខុវិស័យនេះរួមបញ្ចូលទាំងការព្យាករថា អតិផរណាអាចនឹងកើនឡើងនៅឆ្នាំនេះ ពោលគឺកើនឡើងដល់២,៤% បើធៀបនឹងការកំណត់២% ជាប្រវត្តិសាស្ត្ររបស់ធនាគារកណ្ដាល។

ទោះជាយ៉ាងណា លោក Jerome Powell បានបញ្ជាក់ថា ការកើនឡើងអតិផរណានោះទំនងជាកើតឡើងតែ “មួយរយៈពេលខ្លី” ប៉ុណ្ណោះ។ ក្រោយការប្រកាសរបស់លោកបែបនេះ តម្លៃភាគហ៊ុននៅសង្កាត់ហិរញ្ញវត្ថុ Wall Street ក៏បានហក់ឡើងគួរឱ្យសាទរ៕

គំរោងD.I REVIERAបាននិងកំពុងផ្លាស់ប្តូរផែនការមេអភិវឌ្ឍន៍របស់ខ្លួន

ដោយស៊ីវ ម៉េង
ភ្នំពេញៈ ក្រុមហ៊ុនOCIC បានឲ្យដឹងថា គំរោងD.I REVIERA ដែលគ្រោងវិនិយោគ៧០០លានដុល្លារអាមេរិក ស្ថិតនៅលើទីក្រុងកោះពេជ្រ បាននិងកំពុងផ្លាស់ប្តូរផែនការមេអភិវឌ្ឍន៍របស់ខ្លួនហើយ។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា ក្រុមហ៊ុនបាននិងកំពុងផ្លាស់ប្តូរផែនការមេ លើការអភិវឌ្ឈន៍មជ្ឈមណ្ឌលពាណិជ្ជកម្ម លំនៅដ្ឋាន ដែលបច្ចុប្បន្នបាននិងកំពុងដំណើរការសាងសង់ឡើងវិញ នាពេលបច្ចុប្បន្ននេះ។ លោកបន្តថា អាគារមេក្នុងគំរោងនេះ ដែលដើមឡើយមានចំនួនបី និងគ្រោងសាងសង់អាងទឹកនៅពីខាងលើ ប្រវែងប្រមាណ២០០ម៉ែត្រ នឹងត្រូវផ្លាស់់ប្តូរ ដោយមិនមានការសាងសង់អាងទឹកពីលើអាគារនេះនោះទេ។

លោកបន្តថា “ជាមួយគ្នានេះ គម្រោងអាគារកំពស់៣៨ជាន់ នៅផ្នែកខាងក្រោយចំនួនបីនឹងលុបចោលមួយអាគារ ហើយយក្រុមហ៊ុននឹងបន្តការសាងសង់ តែអាគារចំនួនពីរប៉ុណ្ណោះ”។ លោកបន្តថា “ក្រុមហ៊ុនសហគ្រាសកាណាឌីយ៉ា បានយកគំរោងនេះ ត្រលប់មកវិញពីអ្នកវិនិយោគ ដោយសារពួកគេមានបញ្ហាទុនវិនិយោគ និងធ្វើឲ្យគំរោងនេះជាប់គាំង ហេតុនេះទើបយើងទទួលយកគំរោងនេះមកអភិវឌ្ឍន៍ឡើងវិញ”។

ដើមឡើយក្រុមហ៊ុនGreenland Groupដែលមានមូលដ្ឋាននៅប្រទេសចិន គ្រោងដាក់ទុន៧០០លានដុល្លារអាមេរិក ដើម្បីវិនិយោគលើគម្រោងនេះ ដែលរួមមានអាផាតម៉ិន សណ្ឋាគារផ្កាយ៥ ខុនដូ ផ្សារទំនើប។

លោកទូច សំណាងបានបន្តឲ្យដឹងទៀតថា ការសាងសង់គំរោងនេះកំពុងដំណើរការរលូនឆ្ពោះទៅមុខ ខណៈការលក់ខុនដូក្នុងគំរោងនេះកំពុងបន្តផងដែរ ដោយយើងរំពឹងថា ការលក់នឹងទទួលបានជោគជ័យ ដោយសារគំរោងនេះស្ថិតនៅលើទីក្រុងកោះពេជ្រ ដែលមានទន្លេព័ទ្ឋជុំវិញ ផ្តល់បរិយាកាសរស់នៅប្រកបដោយផាសុខភាព ពិសេសជាតំបន់ប្រមូលផ្តុំដោយមជ្ឈមណ្ឌលពាណិជ្ជកម្ម រួមមាន ផ្សារទំនើប សណ្ឋាគារ ការិយាល័យ ក៏ដូចជាកាស៊ីណូផងដែរ៕

អ្នកជំនាញប្រាប់ពីតំបន់អាទិភាពដែលគួរវិនិយោគអាចទទួលបានផលចំណេញ

ដោយៈ រ៉ាណេត
ភ្នំពេញៈ គ្រប់ការវិនិយោគនៅក្នុងទីផ្សារអចលនទ្រព្យទាំងអស់ សុទ្ធតែអាចមានឱកាសទទួលបានចំណេញ ប្រសិនបើការសម្រេចចិត្ត ស្ថិតនៅក្នុងកាលទេសៈត្រឹមត្រូវ និងចេះជ្រើសរើសប្រភេទអចលនទ្រព្យ រួមជាមួយនឹងទីតាំងដែលមានសក្ដានុពលល្អ។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារចលនវត្ថុកម្ពុជាបានប្រាប់ឱ្យដឹងនៅព្រឹកថ្ងៃទី១៨ ខែមីនា ឆ្នាំ២០២១នេះថា ជាទូទៅការវិនិយោគនៅក្នុងវិស័យអចលនទ្រព្យ ត្រូវបានធ្វើឡើងក្នុងរូបភាពផ្សេងគ្នា និងមានទិសដៅខុសពីគ្នា ដោយអ្នកខ្លះចូលចិត្តវិនិយោគ ហើយអាចទទួលបានចំណេញត្រឡប់មកវិញ ក្នុងរយៈពេលដខ្លីនបើទោះជាមានចំនួនតិចក៏ព្រមទទួលយក ប៉ុន្តែអ្នកវិនិយោគមួយប្រភេទទៀត គឺប្រាថ្នាផលចំណេញក្នុងទ្រង់ទ្រាយច្រើន ដែលតម្រូវឱ្យមានការប្រើពេលវេលាយូរ។

លោកបានបន្តថា “យើងអាចនិយាយបានថាការវិនិយោគ មាន២ប្រភេទសំខាន់ៗ គឺទី១ ការវិនិយោគក្នុងរយៈពេលយូរ និងទី២ វិនិយោគនៅក្នុងរយៈពេលខ្លី ប៉ុន្តែអ្វីដែលសំខាន់បំផុតដែលត្រូវសិក្សាមុនពេលសម្រេចចិត្ត បណ្តាក់ទុនវិនិយោគ គឺត្រូវកត្តាភូមិសា ស្ត្រ ឬអាចនិយាយបានតំបន់ដែលគួរវិនិយោគ”។ លោកបញ្ជាក់ថា “អ្នកខ្លះនិយាយថា ចង់ទិញដីទុកវិនិយោគត្រូវទិញនៅជាយក្រុង យើងអាចសួរថាតើជាយក្រុងនៅប៉ែកខាងណាឱ្យប្រាកដ? សម្រាប់ទស្សនៈរបស់ខ្ញុំ គឺស្ថិតនៅតំបន់ភាគខាងលិចឈៀងខាងជើង និងតំបន់ភាគខាងត្បូងក្រុង ព្រោះតំបន់ទាំង២នេះកំពុងមានសក្តានុពលខ្ពស់ ហើយនឹងបន្តទៅថ្ងៃខាងមុខទៀត”។

លោកសុខនីមបានពន្យល់ថា នៅតំបន់ទាំងនេះ នឹងមានការអភិវឌ្ឍន៍លឿន ដោយសារតែមានហេដ្ឋារចនាសម្ព័ន្ធ ដែលត្រូវបានកសាងឡើងស្រាប់ ពីសំណាក់រាជរដ្ឋាភិបាលហើយនៅមានដីទំហំធំៗ ដែលអាចអនុញ្ញាតឱ្យវិនិយោគិន ឬអ្នកអភិវឌ្ឍន៍ប្រភេទបណ្តុំលំនៅដ្ឋាន និងបុរីបានយ៉ាងគ្រប់គ្រាន់។

បន្ថែមពីនេះ នៅភាគខាងត្បូងនៃទីក្រុងភ្នំពេញ ក៏មានការអភិវឌ្ឍន៍ និងរីកចម្រើនលឿន ដោយសារមានគម្រោងធំបានទៅកាន់តំបន់នេះ ដូចមានគម្រោងជាច្រើនបាននឹងកំពុងមានវត្តមាននៅតាមបណ្តោយផ្លូវ៦០ ម៉ែត្រ និងគម្រោងព្រលានយន្តហោះអន្តរជាតិភ្នំពេញថ្មី និងផ្លូវក្រវ៉ាត់ក្រុងទី៣ជាដើម។ ដូច្នេះ នៅពេលខាងមុខដ៏ខ្លី តំបន់ទាំង២នេះនឹងក្លាយទៅជាបណ្តុំទីប្រជុំជន ដែលវាមិនខុសគ្នាពីតំបន់ខណ្ឌសែនសុខ កាលពីប៉ុន្មានឆ្នាំមុននោះទេ៕

ដំណឹងល្អ ៖ក្រុមហ៊ុនកូរ៉េជាច្រើនកំពុងសិក្សាលទ្ធភាពចូលមកវិនិយោគលើវិស័យធំៗចំនួន៣នៅកម្ពុជា

ដោយ ៖ រ៉ាណេត

ភ្នំពេញ ៖ បន្ថែមពីលើក្រុមហ៊ុនដែលមានស្រាប់ និងកំពុងដំណើរការនៅក្នុងប្រទេសកម្ពុជា បច្ចុប្បន្ននៅមានក្រុមហ៊ុនវិនិយោគ និងអភិវឌ្ឍន៍របស់កូរ៉េជាច្រើនវិស័យបាននិងកំពុងសិក្សាលម្អិតពីឱកាស និងពេលវេលាជាក់លាក់ក្នុងការជ្រើសយកម្ពុជាធ្វើជាគោលដៅរបស់ខ្លួន ដែលក្នុងនោះមានវិស័យចំនួន៣ឈានមុខរួមមាន វិស័យកសិ-ឧស្សាហកម្ម វិស័យកាត់ដេរ និងវិស័យអចលនទ្រព្យ។

លោកឧកញ៉ាលឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី១៨ ខែមីនា ឆ្នាំ២០២១នេះថា វាគឺជាដំណឹងល្អសម្រាប់កម្ពុជា ហើយវានឹងពិតជាអាចធ្វើទៅបានក្រោយពេលដែលកម្ពុជា-កូរ៉េបញ្ចប់កិច្ចព្រមព្រៀងពាណិជ្ជកម្មសេរីរវាងប្រទេសទាំង២ជាផ្លូវការ បន្ថែមពីលើកិច្ចព្រមព្រៀងពាណិជ្ជកម្មសេរីរវាងកម្ពុជា-ចិនដែលទើបចុះហត្ថលេខាកាលពីពេលថ្មីៗកន្លងទៅនេះ។

លោកឧកញ៉ាបានបន្តថា “កូរ៉េគាត់មានការចាប់អារម្មណ៍ខ្លាំងមកលើកម្ពុជាដោយសារតែបន្តិចទៀតយើងឈានដល់កិច្ចព្រមព្រៀងពាណិជ្ជកម្មសេរីរវាងប្រទេសទាំង២ដែលបានបង្កភាពងាយស្រួលដល់បណ្តាក្រុមហ៊ុនផលិត និងធ្វើការនាំចេញ ហើយអ្វីដែលល្អបន្ថែមពីលើនេះ កម្ពុជាបានក្លាយជាគោលដៅភ្នាក់ងារក្នុងការនាំចេញទំនិញទៅកាន់ទីផ្សារអន្តរជាតិដូចជាទីផ្សារអង់គ្លេស ជាពិសេសទីផ្សារចិនដែលមានរហូតដល់ប្រមាណ១៤០០លាននាក់ ហើយក៏មានទីផ្សារនៅតាមណ្តាប្រទេសផ្សេងមួយចំនួនទៀតដោយរួចពន្ធមួយចំនួនធំ”។

លោកឧកញ៉ាថា “មានវិស័យចំនួន៣សំខាន់ៗដែលកូរ៉េនឹងចូលមកវិនិយោគ រួមមានវិស័យអចលនទ្រព្យ វិស័យឧស្សាហកម្ម ជាពិសេសវិស័យកសិ-ឧស្សាហកម្ម ដែលរាជរដ្ឋាភិបាលកម្ពុជាកំពុងលើកទឹកចិត្តជាចម្បង ដូច្នេះជាមួយនឹងសកម្មភាពថ្មីនៃការចូលមកវិនិយោគ និងអភិវឌ្ឍន៍របស់ក្រុមហ៊ុនកូរ៉េគឺបានចូលរួមចំណែកយ៉ាងសំខាន់នៅក្នុងការគាំទ្រកំណើនសេដ្ឋកិច្ចកម្ពុជាក្រោយពេលបញ្ចប់វិបត្តិកូវីដ”។

លោកឧកញ៉ានួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ថា នៅពេលដែលមានការវិនិយោគ និងអភិវឌ្ឍន៍ពីសំណាក់ក្រុមហ៊ុនអន្តរជាតិតែងនាំមកនូវផលល្អសំខាន់ចំនួន៣ព្រមគ្នា ដែលក្នុងនោះរួមមានប្រយោជន៍ជាថវិកាសម្រាប់ជាតិ ចំណេះដឹងផ្នែកបច្ចេកទេស និងការផ្តល់ឱកាសការងារជូនដល់ពលរដ្ឋក្នុងស្រុក។

លោកឧកញ៉ាបានបន្តថា “កូរ៉េក៏ជាប្រទេសមួយក្នុងចំណោមប្រទេសសំខាន់ៗដទៃទៀតដែលបានជួយជ្រោមជ្រែងកម្ពុជាតាមរយៈការវិនិយោគ និងអភិវឌ្ឍន៍គម្រោងធំៗនៅកម្ពុជា ជាក់ស្ដែងយើងឃើញមានដូចជាគម្រោងទីក្រុងរណបកាំកូស៊ីធី គម្រោង ប៊ូយ៉ុងថោន និងគម្រោងអភិវឌ្ឍន៍ក្នុងវិស័យអចលនទ្រព្យផ្សេងៗជាច្រើនទៀត ហើយក្នុងនោះក៏មានវិស័យសុខាភិបាល និងវិធនាគារផងដែរ”។

លោកឧកញ៉ាបន្តថា “រាល់ការបណ្តាក់ទុនចូលមកវិនិយោគទាំងអស់ដែលមានកន្លងមក ក៏ដូចជាគម្រោងថ្មីដែលនឹងចូលមកបន្ថែមខាងមុខនេះក៏ព្រោះពួកគេបានសម្លឹងឃើញច្បាស់ពីកត្តាសន្តិសុខផ្នែកនយោបាយ កម្ពុជាមានសន្ដិភាព ជាពិសេសការលើកទឹកចិត្តពីសំណាក់រាជរដ្ឋាភិបាលដែលមានសម្ដេចតេជោ ហ៊ុន សែនជាប្រមុខដឹកនាំ ដែលកាន់តែផ្តល់ឱកាសល្អដល់ការវិនិយោគរបស់ពួកគេ។ ដូច្នេះខ្ញុំគិតថា បន្តិចទៀតកម្ពុជានឹងក្លាយជាគោលដៅវិនិយោគយ៉ាងសំខាន់របស់ក្រុមហ៊ុនអន្តរជាតិ ដែលក្រៅពីកូរ៉េក៏មានបណ្តាក្រុមហ៊ុនមកពីបណ្តាប្រទេសផ្សេងៗទៀតផងដែរ”៕

សញ្ញាវិជ្ជមាន! ការនាំចេញរបស់កម្ពុជាទៅទីផ្សាកូរ៉េបន្តហក់ឡើងពីរខែជាប់ៗគ្នា ទោះស្ថិតក្នុងវិបត្តិកូវីដ១៩

ដោយៈ ប៊ី

ភ្នំពេញៈ ការនាំចេញរបស់កម្ពុជាទៅកូរ៉េខាងត្បូងបន្តងើបឡើងវិញនៅឆ្នាំ២០២១ ដោយមានការកើនឡើងពីរខែជាប់គ្នា នៅដើមឆ្នាំនេះ។

ទិន្នន័យពីសមាគមពាណិជ្ជកម្មអន្តរជាតិកូរ៉េ (KITA) បានបង្ហាញថា ចាប់ពីខែមករា ដល់ខែកុម្ភៈ កម្ពុជាបាននាំចេញផលិតផលមានតម្លៃប្រមាណ៦៤លានដុល្លារ ទៅកាន់ទីផ្សារកូរ៉េខាងត្បូង កើនឡើងជាង២,៩ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

ក្នុងអំឡុងពេលរយៈពីរខែនេះដែរ ទិន្នន័យបានបង្ហាញថា កម្ពុជាបាននាំចូលទំនិញតម្លៃប្រមាណ៩៣លានដុល្លារ ពីកូរ៉េខាងត្បូង ធ្លាក់ចុះ៣,៨ភាគរយ ធៀបនឹងរយៈពេលដូចគ្នាកាលពីឆ្នាំមុន។

ពាណិជ្ជកម្មទ្វេភាគីរវាងប្រទេសទាំងពីរសម្រេចបានទំហំទឹកប្រាក់១៥៨លានដុល្លារ ថយចុះ១,១ភាគរយ ធៀបនឹងរយៈពេលដូចគ្នាកាលពីឆ្នាំមុន។

រដ្ឋមន្ត្រីក្រសួងពាណិជ្ជកម្មកម្ពុជា និងរដ្ឋមន្ត្រីក្រសួងពាណិជ្ជកម្មកូរ៉េខាងត្បូង បានប្រកាសបញ្ចប់ការចរចាជាផ្លូវការ នូវកិច្ចព្រមព្រៀងពាណិជ្ជកម្មសេរីកម្ពុជា និងប្រទេសកូរ៉េខាងត្បូង (CKTFA) កាលពីដើមខែកុម្ភៈ ឆ្នាំ២០២១។

លោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្មកម្ពុជា បានមានប្រសាសន៍ថា តាមរយៈកិច្ចព្រមព្រៀងពាណិជ្ជកម្មនេះ កម្ពុជា នឹងអាចនាំចេញទៅកាន់ប្រទេសកូរ៉េបានទំហំច្រើនជាងមុន ដោយរំពឹងថា នឹងកើនឡើងពី២០ ទៅ២៥ភាគរយ ក្នុងមួយឆ្នាំ ខណៈមុនកិច្ចព្រមព្រៀងពាណិជ្ជកម្មសេរី ក៏កំណើននាំចេញរបស់កម្ពុជា ទៅកាន់ប្រទេសកូរ៉េកើនឡើងប្រមាណ១៥ភាគរយរួចទៅហើយ។

លោកបន្តថា “កិច្ចព្រមព្រៀងពាណិជ្ជកម្មសេរីកម្ពុជា កូរ៉េគ្រោងនឹងចុះហត្ថលេខាជាផ្លូវការ នៅអំឡុងខែមិថុនា ឆ្នាំ២០២១នេះ ហើយកិច្ចព្រមព្រៀងនេះដែរ ក៏រំពឹងថានឹងចូលជាធរមានជាផ្លូវការ នៅក្នុងឆ្នាំ២០២១នេះដែរ ព្រោះថាកម្ពុជា និងកូរ៉េខាងត្បូង មានពេលវេលាយូរទៀត ដើម្បីធ្វើកិច្ចការនេះ”។

លោកប៉ាន សូរស័ក្តិបានថ្លែងថា តាមរយៈព្រមព្រៀងពាណិជ្ជកម្មនេះ កម្ពុជានឹងអាចចេញទៅកាន់ទីផ្សារប្រទេសកូរ៉េកាន់តែច្រើន ដែលអាចបង្កើនទំហំពាណិជ្ជកម្មបានមួយកម្រិតទៀត។

លោកបន្ថែមថា “វាជាមោទនភាពមួយរបស់កម្ពុជា ដែលអាចបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសធំៗ ដូចជា ប្រទេសចិន និងប្រទេសកូរ៉េជាដើម ព្រោះថាប្រទេសធំៗ គេតែងចង់បង្កើតកិច្ចព្រមព្រៀងពាណិជ្ជកម្មសេរី ជាមួយប្រទេសអភិវឌ្ឍន៍ ខណៈកម្ពុជាជាប្រទេសអភិវឌ្ឍន៍តិចតួចប៉ុណ្ណោះ”៕

បច្ចុប្បន្នភាពៈ ចុងត្រីមាសទី១ឆ្នាំ២០២១ ទីផ្សារទិញលក់ដីធ្លីមានការធ្លាក់ចុះខ្លាំង

ដោយៈ រ៉ាណេត

ភ្នំពេញៈ នៅត្រឹមចុងត្រីមាសទី១ ដើមឆ្នាំ២០២១នេះ ខុសប្លែកពីទីផ្សារលំនៅដ្ឋានកម្រិតមធ្យម ដែលនៅតែបន្តភាពវិជ្ជមាននៅទីផ្សារទាំងការទិញ ទាំងការសាងសង់នោះ សម្រាប់តែទីផ្សារដីធ្លីស្ទើរតែគ្រប់តំបន់ តាមបណ្តាខេត្តក្រុងមានការស្ងប់ស្ងាត់ ក្រោឥទ្ធិពលនៃព្រឹត្តិការណ៍២០កុម្ភៈ ដែលកំពុងបន្តរាត្បាតក្នុងសហគមន៍គួរឱ្យព្រួយបារម្ភ។

ប្រធានក្រុមប្រឹក្សាភិបាលក្រុមហ៊ុនភ្នាក់ងារអចលនទ្រព្យ DEYTHMEY Real Estate លោកវិន ឈុនហ៊ាត ដែលកំពុងកាន់គម្រោងអភិវឌ្ឍន៍ដីឡូតិ៍ នៅតំបន់ជាយក្រុងរាជធានីភ្នំពេញ និងតាមបណ្តាខេត្តមួយចំនួនទៀត បានមានប្រសាសន៍ប្រាប់នៅល្ងាចថ្ងៃទី១៧ ខែមីនា ឆ្នាំ២០២១ថា ស្ថានភាពនៃទីផ្សារដីធ្លី ជាពិសេសប្រភេទដីឡូតិ៍នៅចុងត្រីមាសទី១ ឆ្នាំ២០២១នេះ គឺមានភាពស្ងប់ស្ងាត់ខ្លាំង ដោយសារតែបញ្ហានៃវិបត្តិជំងឺកូវីដដែលកំពុងបន្តរាតត្បាត។

លោកបានលើកឡើងថា កាលពីអំឡុងខែមករា ដើមឆ្នាំ២០២១ បន្ទាប់ពីជួបភាពស្ងប់ស្ងាត់កាលពីចុងឆ្នាំ២០២០ ដែលបណ្តាលមកពីព្រឹត្តិការណ៍២៣វិច្ឆិកា ទីផ្សារដីឡូតិ៍បានចាប់ផ្តើមមានកម្រើកឡើងវិញបន្តិច ប៉ុន្តែនៅត្រឹមចុងខែកុម្ភៈ ដែលជាព្រឹត្តិការណ៍ទី៣ នៃការឆ្លងនៅក្នុងសហគមន៍ ទីផ្សារមួយនេះបានធ្លាក់ចុះវិញសាជាថ្មី ហើយកាន់តែមានសភាពធ្ងន់ធ្ងរជាងពេលមុន។

លោកវិន ឈុនហ៊ាត បានមានប្រសាសន៍បញ្ជាក់ថា “នៅក្នុងខែមករា និងពាក់ក ណ្តាលខែកុម្ភៈឆ្នាំនេះ មានភ្ញៀវមកមើលគម្រោង និងកក់លុយទិញគួរសម ប៉ុន្តែចាប់តាំងពីកើតមានពញរឹត្តិការណ៍២០កុម្ភៈ ការទិញលក់គឺធ្លាក់ចុះខ្លាំង” ។ លោកបន្តថា “រហូតមកដល់ពេលនេះគឺកាន់តែស្ងាត់ខ្លាំង។ ភាពស្ងប់ស្ងាត់ទីផ្សារដីឡូតិ៍នៅពេលនេះ បណ្តាលមកពីភាពភ័យខ្លាច ពីសុវត្ថិភាពរបស់មនុស្សទូទៅ ដែលកុំថាឡើយចេញដើរមើលគម្រោដីឡូតិ៍នៅតាមតំបន់នានា សូម្បីចេញប្រកបអាជីវកម្មប្រចាំគ្រួសារ ឬចេញដើរទទួលទាននៅតាមអាហារដ្ឋាននានាក៏ស្ទើរតែមិនហ៊ានចេញផង” ។

លោកបន្តថា ដូច្នេះវាមិនចម្លែកនោះទេ ដែលទីផ្សារដីធ្លីមានភាពស្ងប់ស្ងាត់នៅក្នុងដំណាក់កាលបែបនេះ។

ដោយឡែកលោក សុខ ប៊ុនធឿន ដែលជាអ្នកគ្រប់គ្រងទីផ្សារ និងការលក់គម្រោងដីឡូតិ៍នៅតំបន់ជាយក្រុងកំពត ដែលធ្លាប់តែទទួលបានអតិថិជនថ្មីៗ ជាហូរហែនោះបានលើកឡើងថា ស្ថានភាពទីផ្សារដីធ្លីនៅក្នុងខេត្តកំពត នៅពេលនេះក៏មិនខុសគ្នាឆ្ងាយពីតំបន់ជាយរាជធានីភ្នំពេញនោះទេ ពោលគឺមានភាពស្ងប់ស្ងាត់ដូចគ្នា។

លោកបញ្ជាក់ថា ក្រោយការផ្ទុះឡើងនូវព្រឹត្តិការណ៍ ឆ្លងក្នុងសហគមន៍ដែលគួរឱ្យបារម្ភនៅពេលនេះ មិនថាចំពោះអ្នកភ្នំពេញ ដែលជាទីផ្សារគោលដៅ របស់គម្រោងដីឡូតិ៍នានានៅក្នុងខេត្ត ក្រុងកំពតនោះទេ សូម្បីតែអ្នករស់នៅក្នុងខេត្តកំពតផ្ទាល់ ក៏មិនសូវចេញដើរក្រៅផ្ទះដូចកាលពីមិនទាន់ផ្ទុះជំងឺឆ្លងនោះដែរ។

លោកបន្តថា “ពេលនេះទាំងអ្នកលក់ ទាំងអ្នកទិញ គឺនៅរក្សាភាពស្ងប់ស្ងាត់រៀងខ្លួន ហើយអ្វីដែលជាសំខាន់ គឺស្ទើរគ្រប់តំបន់ដែលត្រូវធ្វើដំណើរ ឆ្លងកាត់ភាគច្រើនត្រូវឆ្លងកាត់ការត្រួពិនិត្យ ពីសុខភាពសុវត្ថិភាពជាមុន” ។ លោកបន្តថា“ដូច្នេះចង់មិនចង់ដំណើរនៃការចាកចេញពីលំនៅដ្ឋាន របស់មនុស្សភាគច្រើនគឺត្រូវបានកាត់បន្ថយ” ។

លោកបន្ថែមថា “ខ្ញុំយល់ថា ប្រសិនបើបញ្ហានៃការរាលដាល នៃជំងឺកូវីដក្នុងសហគមន៍នេះ នៅតែបន្តអូសបន្លាយពេលយូរទៀត នោះវានឹងពិបាកនិយាយថាទីផ្សារដីធ្លីអាចនឹងជួបស្ថានការណ៍ដល់កម្រិតណានោះទេ” ៕

អគារពាណិជ្ជកម្មខ្ពស់បំផុតនៅប្រទេសជប៉ុនតម្លៃរាប់ពាន់លានដុល្លារចាប់ផ្ដើមដំណើរការសាងសង់ហើយ

ដោយៈសុខុម

តូក្យូ: ក្រុមហ៊ុនអចលនទ្រព្យជប៉ុន Mori Building Co. បានទម្លាយឱ្យដឹងកាលពីពេលថ្មីៗនេះថា គម្រោងអគារខ្ពស់បំផុតនៅប្រទេសជប៉ុន បានចាប់ផ្ដើមដំណើរការសាងសង់ហើយដែលនៅចំកណ្ដាលទីក្រុងតូក្យូ។ នេះបើយោងតាមការចុះផ្សាយរបស់សារព័ត៌មាន Japan Times។

យោងតាមក្រុមហ៊ុនដដែលនេះឱ្យដឹងថា អគារកម្ពស់ ៣៣០ម៉ែត្រ នៅក្នុងសង្កាត់ Minato Ward ដែលសម្បូរដោយអគារការិយាល័យខ្ពស់ៗ និងខុនដូប្រណីតៗនេះគ្រោងសាងសង់រួចរាល់ជាស្ថាពរនៅឆ្នាំ២០២៣ ។

ដោយយោងទៅលើតម្លៃផ្ទះ ក្នុងតំបន់នោះនាពេលបច្ចុប្បន្ន ត្រូវបានគេប៉ាន់ប្រមាណថា យីនីតខុនដូដែលមើលទៅឃើញទេសភាព ដ៏ស្រស់ត្រកាលនៃទីក្រុងតូក្យូ មិនចាញ់អគារ Tokyo Tower នេះមានតម្លៃយ៉ាងហោចណាស់ ក៏ប៉ុន្មានពាន់លានយេនឬអាចចាប់ពីជាង២០លានដុល្លារអាមេរិក ឡើងទៅដែរក្នុងមួយយូនីត។

អគារដែលគេប្រសិទ្ធនាមថា “Aman Residences, Tokyo” នេះនឹងមានខុនដូចំនួន ៩១ យូនីតចាប់ពីជាន់ទី៥៤ ដល់ជាន់ទី៦៤ ក្នុងកម្ពស់ចាប់ពី២៦០ទៅ៣៣០ ម៉ែត្រ។

ទោះជាយ៉ាងណា ក្រុមហ៊ុន Mori Building មិនបានទម្លាយឱ្យដឹងថា តើខុនដូទាំងនេះសម្រាប់ជួល ឬក៏លក់នោះឡើយ។

ដើម្បីទាក់ទាញអ្នកជួលមានទ្រព្យស្ដុកស្ដម្ភ មកពីជុំវិញពិភពលោក ក្រុមហ៊ុនអភិវ ឌ្ឍន៍អគារនេះ នឹងសាងសង់សាលារៀនអន្តរជាតិមួយក្បែរនោះ ដែលស្ថិតនៅក្រោមគម្រោងអភិវឌ្ឍន៍ដ៏ធំរបស់ខ្លួន ដែលកំពុងដំណើរការសាងសង់ នៅក្នុងសង្កាត់ Toranomon-Azabudai កណ្តាលក្រុងតូក្យូ ជាទីក្រុងដែលមានមនុស្សរស់នៅច្រើនជាងគេលើពិភពលោកនេះ។

រហូតមកទល់ពេលនេះ អគារខ្ពស់បំផុតនៅប្រទេសជប៉ុនថ្មីនេះ នៅមិនទាន់មានឈ្មោះជាផ្លូវការនៅឡើយទេ ហើយក៏គ្មានការបញ្ជាក់ជាផ្លូវការ អំពីទំហំទុនវិនិយោគលើអគារនេះដែរ។ ប៉ុន្តែយើងអាចប៉ាន់ស្មានបានថា អគារនេះមានតម្លៃមិនក្រោមពាន់លានដុល្លារអាមេរិកនោះឡើយ។

អគារខ្ពស់បំផុតនៅប្រទេសជប៉ុន នាពេលបច្ចុប្បន្នគឺអគារ Abeno Harukas នៅក្រុងអូសាកា (Osaka) ៕

គេហទំព័រ Propertyarea ប្រកាសតែងតាំងកញ្ញា ងួន ច័ន្ទចរិយា ជាទូតសុឆន្ទៈ

ដោយស៊ីវ ម៉េង

ភ្នំពេញៈ គេហទំព័រ Propertyarea.asia និង Facebook Page ឈ្មោះ Property Area Asia មានកិត្តិយសសូមប្រកាសតែងតាំងកញ្ញា ងួន ច័ន្ទចរិយា ដែលជាតារាសម្តែងដ៏ស្រស់សោភា និងល្បីឈ្មោះមួយរូបជាទូតសុឆន្ទៈតំណាងឲ្យគេហទំព័រនេះ។

ការសម្រេចតែងតាំងនេះ ដោយសារកញ្ញាចរិយា កំពុងធ្វើការងារទាក់ទងនឹងវិស័យអចលនទ្រព្យ និងថតខ្សែភាពយន្ត នៅពេលទំនេរពីការងារ។ បច្ចុប្បន្នកញ្ញាកំពុងបំពេញការងារនៅក្រុមហ៊ុន SIHA Group ជាក្រុមហ៊ុនវិនិយោគដ៏ធំមួយ របស់ប្រទេសម៉ាឡេស៊ី ដែលកំពុងវិនិយោគលើគំរោងជាច្រើននៅកម្ពុជា។

ក្នុងតួនាទីជាទូតសុឆន្ទៈ តំណាងឲ្យគេហទំព័រ Propertyarea.asia កញ្ញានឹងដើរតួនាទីដូចជា៖

ទី១ ចូលរួមផ្សព្វផ្សាយពីកេរ្ត៍ឈ្មោះ និងកិត្តិនាមគេហទំព័រទាំងពីរឲ្យកាន់តែមានភាពល្បីល្បាញលើឆាកជាតិ និងអន្តរជាតិ។

ទី២ កញ្ញានឹងជួយផ្សព្វផ្សាយ និងជួយស្វែងរកចំណូលសម្រាប់ក្រុមហ៊ុន

ទី៣ កញ្ញានឹងទទួលបានប្រាក់លើកទឹកចិត្តជាក់ស្តែងពីក្រុមហ៊ុន

កញ្ញាងួន ច័ន្ទចរិយា បានសម្តែងក្តីសប្បាយរីករាយ និងមោទនភាព ដោយបានចូលរួមចំណែក ក្នុងការជំរុញភាពរីកចម្រើនរបស់គេហទំព័រ អចលននទ្រព្យឈានមុខគេនៅកម្ពុជានេះ ដែលគេហទំព័រនេះបានផ្សព្វផ្សាយព៌តមានពិត លឿន រហ័ស អាចទុកចិត្តបាន និងឈរលើ ក្រមសីលធ៌មវិជ្ជាជីវៈជាមូលដ្ឋាន។

កញ្ញាបន្តថា ខ្ញុំបានតាមដានគេហទំព័រនេះជាយូរមកហើយ ខ្ញុំឃើញព៌តមានដែលអង្គភាពនេះផ្សព្វផ្សាយមានសភាពលឿន រហ័ស អាចទុកចិត្តបាន ពិសេសផ្តល់ចំណេះដឹងជាច្រើនទាក់ទងនឹងវិស័យអចលនទ្រព្យ ក៏ដូចជាចំណេះដឹងផ្នែកច្បាប់ផ្សេង” ។ កញ្ញាបានបន្តថា “គេហទំព័រនេះកំពុងចូលរួមចំណែកយ៉ាងសកម្ម ក្នុងការផ្សព្វផ្សាយព៌តមានល្អៗ សម្រាប់ផ្តល់ជូនប្រជាពលរដ្ឋ និងអ្នកវិនិយោគជាតិ អន្តរជាតិអាចយកព៌តមានស្ថាប័ននេះ សម្រាប់ធ្វើជាមូលដ្ឋានវិភាគ ពិចារណាលើគម្រោងវិនិយោគ ក៏ដូចជាការវិវត្តនៃស្ថានភាពសេដ្ឋកិច្ចសង្គមកម្ពុជា” ។

ជាមួយគ្នានេះ លោកយិន លាងគង់ សហស្ថាបនិក និងជាអគ្គនាយកគេហទំព័រ Propertyarea.asia បានមានប្រសាសន៍ថា ក្រុមការងាររបស់យើងមានក្តីរីករាយ ដែលមានតារាដ៏ស្រស់សោភាមួយរូប បានធ្វើជាតំណាងទូតសុឆន្ទៈរបស់គេហំព័ររបស់យើង។ កញ្ញានឹងរួមចំណែកជួយចូលរួមជួយផ្សព្វផ្សាយ ដើម្បីលើកកំពស់កត្យានុភាព និងគុណតម្លៃគេហទំព័រនេះបន្ថែមទៀត។

លោកបន្តថា “ជាមួយដំណើរឆ្ពោះទៅមុខ និងការទទួលបានការគាំទ្រកើនឡើងជាប្រចាំ ចំនួនអ្នកអាន និងអ្នកបានឃើញកើនឡើងជារៀងរាល់ថ្ងៃ បានធ្វើឲ្យគេហទំព័ររបស់យើងក្លាយជាវេទិកា ក្នុងការផ្សព្វផ្សាយព៌តមានកម្រិតជាតិមួយ ដែលទទួលយកបានសម្រាប់ប្រជាពលរដ្ឋធម្មតា រហូតដល់អ្នកវិនិយោគជាតិ អន្តរជាតិនានា” ។ លោកបន្តថា “កញ្ញាងួន ច័ន្ទចរិយា នឹងជួយលើកកំពស់កិត្តិនាម របស់យើងបន្ថែម ដោយសារកញ្ញា ជាអ្នកប្រឡូកក្នុងវិស័យអចលនទ្រព្យ និងវិស័យសិល្បៈដែលទទួលបានការគាំទ្រយ៉ាងច្រើនក្នុងសង្គមផងដែរ” ។

លោកយិន លាងគង់ បានបន្តថា “យើងរីករាយក្នុងការសហការ និងឈរលើមូលដ្ឋានឈ្នះ ឈ្នះទាំងអស់គ្នា ដើម្បីលើកកំពស់វិស័យសារគមនាគមន៍កម្ពុជាឲ្យកាន់តែទទួលបានការគាំទ្រ និងប្រឆាំងរាល់ព៌តមានក្លែងក្លាយ” ៕

តំបន់រាមនឹងក្លាយជាទីក្រុងដ៏ស៊ីវិល័យមួយនៅរយៈពេល ៤ទៅ៥ឆ្នាំខាងមុខ

ដោយៈគង់ សូរិយា

ព្រះសីហនុៈ តំបន់រាម នាទឹកដីក្រុងព្រះសីហនុ នឹងក្លាយជាទីក្រុងដ៏ស៊ីវិល័យមួយនៅរយៈពេល៤ទៅ៥ឆ្នាំខាងមុខនេះ ខណៈបច្ចុប្បន្នគំរោងវិនិយោគធំៗចំនួនពីរ ដែលមានតម្លៃរាប់ពាន់លានដុល្លារបាន និងកំពុងចាប់ផ្តើមស្ថាបនា គំរោងរបស់ខ្លួន។

គំរោងដ៏លេចធ្លោមួយ ក្នុងចំណោមគំរោងធំៗជាច្រើនទៀត គឺការបង្កើតតំបន់ទេសចរណ៍នាគរាជតេជោ ដែលវិនិយោគដោយក្រុមហ៊ុនចិន Canopy Sands Development ដែលជាបុត្រសម្ព័ន្ធរបស់ក្រុមហ៊ុនយក្សចិន Prince Holding Group នៅលើផ្ទៃដីសរុបប្រមាណ ៨៣៤ហិចតា ជាមួយទុនវវិនិយោគ១៦ពាន់លានដុល្លារអាមេរិក និងគំរោង Cristalville Ream Beach តម្លៃ ១០០០លានដុល្លារ បាននិងកំពុងសាងសង់បណ្តើរៗផងដែរ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានបង្ហាញពីក្ដីសាទរទៅនឹងផែនការ លើគម្រោងរៀបចំបង្កើតជាទីក្រុងថ្មី ដែលមានតម្លៃរាប់សិបពាន់លានដុល្លារខាងលើនេះ ជាមួយនឹងការបង្ហើបពីឱកាសល្អ ក្នុងការវិនិយោគដីធ្លីនៅក្នុងពេលបច្ចុប្បន្ននេះផងដែរ។

លោកបញ្ជាក់ថា វាជារឿងល្អសម្រាប់កម្ពុជា ដែលទទួលបាននូវគម្រោងអភិវឌ្ឍន៍ធំៗពីសំណាក់ក្រុមហ៊ុនអន្តរជាតិ ដែលមានតម្លៃយ៉ាងសន្ធឹកសន្ធាប់ ដែលក្រៅពីអាចជួយដល់ការអភិវឌ្ឍន៍វិស័យអចលនទ្រព្យ និងសំណង់កម្ពុជា វាក៏បានក្លាយជាចំណុចពិសេសមួយ ក្នុងការជួយជ្រោមជ្រែងសេដ្ឋកិច្ចកម្ពុជាផងដែរ ហើយប្រសិនបើគម្រោងខាងលើនេះជាគម្រោងដែលនឹងត្រូវអភិវឌ្ឍន៍ពិតមែន វាគឺជារឿងល្អបំផុតសម្រាប់កម្ពុជា ជាពិសេសខេត្តព្រះសីហនុដែលកំពុងរៀបចំ និងអភិវឌ្ឍន៍ទៅជាប៉ូលសេដ្ឋកិច្ចប្រចាំប្រទេស និងជាមជ្ឈមណ្ឌលពាណិជ្ជកម្មពហុបំណង។

លោកបានបន្តថា “តំបន់ដែលស្ថិតនៅក្នុងគម្រោងអភិវឌ្ឍន៍ ខ្ញុំជឿថាក្រុមហ៊ុនអភិវឌ្ឍន៍បានទិញរួចរាល់ហើយ មុនពេលគេប្រកាសពីគម្រោង ប៉ុន្តែវានៅតែជាឱកាសសម្រាប់អ្នកដែលមានបំណងវិនិយោគដីធ្លី នៅក្បែរតំបន់អភិវឌ្ឍន៍ទាំងនេះនៅឡើយ” ។

លោកបន្តថា បច្ចុប្បន្នក្រៅពីគម្រោងអភិវឌ្ឍន៍បង្កើត មជ្ឈមណ្ឌលពាណិជ្ជកម្មពីវិស័យឯកជន រដ្ឋាភិបាលក៏បានយកចិត្តទុកដាក់ ក្នុងការអភិវឌ្ឍហេដ្ឋារចនាសម្ព័ន្ធនានាផងដែរ ដូចជាផ្លូវថ្នល់ជាដើម ដែលកាន់តែងាយស្រួលដល់ការធ្វើដំណើរ។ ដោយឡែកសម្រាប់អ្នកដែលចង់វិនិយោគក្នុងវិស័យដីធ្លី ក៏អាចស្វែងរកទិញនៅតំបន់ក្បែរទីតាំងគម្រោងអភិវឌ្ឍន៍ធំៗទាំងនោះ ជាពិសេសនៅក្នុងកាលទេសនេះតែម្ដង ដោយសារតែតម្លៃដីនៅមានកម្រិតនៅឡើយ បើរង់ចាំ២-៣ឆ្នាំទៀតតម្លៃអាចនឹងឡើងថ្លៃ និងបាត់បង់ឱកាសចំណេញ។

លោកឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានមានប្រសាសន៍ឲ្យដឹងកាលពីពេលថ្មីៗនេះថា ការបង្កើតតំបន់ទេសចរណ៍តេជោនាគរាជ នៅតំបន់រាមបាននិងកំពុងដំណើរការបណ្តើរៗហើយ ដោយបច្ចុប្បន្នក្រុមហ៊ុនកំពុងចាក់ដីចូលសមុទ្រ ដើម្បីកសាងទីក្រុងនេះឡើង។

លោកបន្តថា “គំរោងនេះនៅក្បែរព្រលានយន្តហោះកងកេង ខេត្តព្រះសីហនុដែលបាននិងកំពុងដំណើរការពង្រីកនាពេលបច្ចុប្បន្ននេះ” ៕