អ្នកវិនិយោគផ្នែកអចលនទ្រព្យពីររូបចូលរួមឧបត្ថម្ភស្រ្តីបំបៅដោះកូនរងការពិន័យនៅខេត្តស្ទឹងត្រែង

ដោយៈសហការី

ភ្នំពេញៈ អ្នកវិនិយោគផ្នែកអចលនទ្រព្យពីររូប បានសម្រេចចិត្តផ្តល់អំណោយដល់ស្រ្តីដែលបានបំបៅដោះកូនឈ្មោះស៊ីថង សុខា កំឡុងពេលបំពេញការងារ ដែលបានរងការពិន័យពីថ្នាក់ដឹកនាំរបស់ខ្លួន។

អ្នកវិនិយោគផ្នែកអចលនទ្រព្យទាំងពីររូប រួមមាន ឧកញ៉ាផន វណ្ណិត ដែលជាអ្នកវិនិយោគផ្នែកអចលនទ្រព្យល្បីឈ្មោះមួយរូប និងជាស្ថាបនិកក្រុមហ៊ុនរាជសន្តុសិត និងលោកលី សុខឆាយអគ្គនាយកក្រុមហ៊ុនអចលនទ្រព្យLSCG ។

លោកឧកញ៉ាផន វណ្ណិតបានឧបត្ថម្ភដល់ស្រ្តីរូបនោះចំនួន២លានរៀល ដល់ស្រ្តីរូបនោះ ។ ចំណែកលោកលី សុខឆាយអគ្គនាយកក្រុមហ៊ុនអចលនទ្រព្យLSCG បានចូលរួមឧបត្ថម្ភដល់ស្រ្តីស៊ីថង សុខាចំនួន៤០០,០០០រៀលផងដែរ៕

ក្រុមហ៊ុនឧស្ម័នដ៏ធំមួយរបស់សឹង្ហបុរីត្រៀមឈានជើងចូលទីផ្សារកម្ពុជា

ដោយៈ ប៊ី

ភ្នំពេញៈ ក្រុមហ៊ុន Union Gas Holdings ដែលមូលដ្ឋាននៅសិង្ហបុរីបានចុះហត្ថលេខាលើលិខិតបញ្ជាក់ពីបំណងដោយមិនចងភ្ជាប់កាតព្វកិច្ច (Non-Binding Letter of Intent) មួយក្រុមហ៊ុន Worldbridge Industrial Development (WBID) ដើម្បីបង្កើតក្រុមហ៊ុនបណ្តាក់ទុនរួមគ្នា (JVCo) សម្រាប់ការចែកចាយនិងផ្គត់ផ្គង់ឧស្ម័ន LPG នៅក្នុងប្រទេសកម្ពុជា។

សកម្មភាពអាជីវកម្ម និងប្រតិបត្តិការផ្គត់ផ្គង់ LPG នៅកម្ពុជាត្រូវបានរំពឹងថានឹងកើតឡើងនៅចុងឆ្នាំ ២០២១។ នេះបើយោងតាមការចេញផ្សាយរបស់សារព័ត៌មាន The Edge Singapore នៅថ្ងៃទី១១ ខែមីនា ឆ្នាំ២០២១។

ភាពជាដៃគូយុទ្ធសាស្រ្តនេះគឺជាការពង្រីកដំបូងបង្អស់នៅក្រៅប្រទេស សម្រាប់ក្រុមហ៊ុនផ្គត់ផ្គង់ហ្គាសដ៏ធំមួយរបស់សិង្ហបុរីី ហើយនឹងជួយដល់ក្រុមហ៊ុននេះ ក្នុងការពង្រីកប្រតិបត្តិការរបស់ខ្លួននៅក្រៅប្រទេស។

ក្រុមហ៊ុន Union Gas និង WBID ត្រូវបានរាយការណ៍ថា កំពុងពិភាក្សាដើម្បីស្វែងរកភាពជាដៃគូយុទ្ធសាស្រ្ត ដែលមានសក្តានុពលពីមុឆ្នាំន ប៉ុន្តែត្រូវបានបញ្ឈប់វិញ ដោយសារតែជំងឺរាតត្បាតកូវីដ១៩ នៅឆ្នាំ២០២០។

យោងតាមកិច្ចព្រមព្រៀងនេះ ក្រុមហ៊ុន Union Gas នឹងកាន់កាប់ភាគហ៊ុនចំនួន៥៥ភាគរយ នៅក្នុង JVCo ហើយនឹងបញ្ជូនបុគ្គលិកមានបទពិសោធពីការិយាល័យរបស់ខ្លួននៅប្រទេសសិង្ហបុរី ដើម្បីគាំទ្រដល់បុគ្គលិកកម្ពុជាក្នុងស្រុក។

ភាគហ៊ុនចំនួន៤៥ភាគរយនៅសល់នឹងត្រូវកាន់កាប់ដោយក្រុមហ៊ុន WBID ដែលនឹងធ្វើឱ្យក្រុមហ៊ុនបណ្តាក់ទុនរួមនេះ ពង្រីកបណ្តាញអាជីវកម្មក្នុងស្រុក និងបណ្តាញតភ្ជាប់នៅក្នុងប្រទេសកម្ពុជា។

ក្រុមហ៊ុន WBID គឺជាផ្នែកមួយនៃក្រុមហ៊ុន WorldBridge International Group ដែលជាក្រុមហ៊ុនធំមួយ ដែលធ្វើការយ៉ាងសកម្មក្នុងការវិនិយោគនៅក្នុងឧស្សាហកម្មជាតិនៅក្នុងប្រទេសកម្ពុជា។

យោងតាមក្រុមហ៊ុន Union Gas ក្រុមហ៊ុនបណ្តាក់ទុនរួមខាងលើ ដែលបានស្នើឡើង បង្ហាញពីឱកាសដ៏ធំមួយ…ដើម្បីចាប់ដៃគូជាមួយសហគ្រាសក្នុងស្រុកនៅកម្ពុជាជាមួយនឹងផលប័ត្រអភិវឌ្ឍន៍អចលនទ្រព្យ ដែលមានការរីកចម្រើនយ៉ាងឆាប់រហ័ស។

សេចក្តីថ្លែងការណ៍របស់ក្រុមហ៊ុននៅថ្ងៃទី១០ ខែមីនា បានបន្ថែមថា “ការធ្វើដូចនេះ ក្រុមហ៊ុននឹងមានឱកាសផ្តល់ជំនាញ និងបទពិសោធន៍របស់ខ្លួនក្នុងការផ្គត់ផ្គង់ និងចែកចាយហ្គាស LPG ដល់អ្នកទិញអចលនទ្រព្យដែលអភិវឌ្ឍដោយក្រុមហ៊ុន World Bridge International Group”។

ក្រុមហ៊ុនបានឱ្យដឹងថា ខ្លួនមានបំណងប្រកាន់យក “វិធីសាស្រ្តប្រុងប្រយ័ត្ន” ជាមួយនឹងការវិនិយោគដំបូងមុនពេលពង្រីកអាជីវកម្មនៅក្រៅប្រទេស ព្រោះនេះជាការវិនិយោគដំបូង និងពង្រីកទៅក្នុងទឹកដីភូមិសាស្ត្រផ្សេងគ្នា។

លោក Teo Hark Piang នាយកប្រតិបត្តិ និងប្រធានក្រុមហ៊ុន Union Gas មានប្រសាសន៍ថា “ការអភិវឌ្ឍនេះគឺជាការសំរេចគោលដៅរយៈពេលវែងរបស់ក្រុមយើងក្នុងការបណ្តាក់ទុននៅបរទេស។ យើងមានសេចក្តីសោមនស្សរីករាយ ដែលបានរកឃើញក្រុមហ៊ុនដៃគូ WBID ជំរុញការបោះជំហានដំបូងរបស់យើងក្នុងប្រទេសកំពុងរីកចម្រើនមួយននេះ”។

លោកបានថ្លែងទៀតថា “ទោះយ៉ាងណាយើងនៅតែគិតថា យើងនឹងត្រូវការពេលវេលា ដើម្បីស្វែងយល់ពីបទប្បញ្ញត្តិក្នុងស្រុក និងបរិយាកាសទីផ្សារ ដូច្នេះយើងបានខិតជិតការបណ្តាក់ទុននេះ ដោយប្រយ័ត្នប្រយែង រួមទាំងការចាប់ផ្តើមជាមួយនឹងការវិនិយោគដំបូង និងការជ្រើសរើសអាជីវកម្ម LPG ដែលជាការងារស្នូលរបស់យើង”៕

អ្នកជំនាញៈ គម្រោងអភិវឌ្ឍន៍លំនៅដ្ឋានបាននិងកំពុងរីកសាយភាយទៅគ្រប់ទិសទាំងអស់នៃទីក្រុងភ្នំពេញ

ដោយៈ ប៊ី

ភ្នំពេញៈ អ្នកជំនាញបានលើកឡើងថា គម្រោងអភិវឌ្ឍន៍លំនៅដ្ឋានបាននិងកំពុងរីកសាយភាយទៅគ្រប់ទិសទាំងអស់ នៃទីក្រុងភ្នំពេញ ហើយទីផ្សារលំនៅដ្ឋានតម្លៃចន្លោះពី៣ម៉ឺន ទៅដល់១០ម៉ឺនដុល្លារ នៅតែមានកំណើន និងពេញនិយមសម្រាប់ទីផ្សារក្នុងស្រុក នៅដើមឆ្នាំ២០២១នេះ ។

លោកស្រីអាន សុធីតានាយិកាគ្រប់គ្រងក្រុមហ៊ុន CBRE Cambodia បានថ្លែងប្រាប់Propertyarea.asiaកាលពីថ្មីៗនេះថា គម្រោងលំនៅដ្ឋានតម្លៃសមរម្យបាននិងកំពុងរីកសាយភាយទៅគ្រប់ទិសទាំងអស់នៃទីក្រុងភ្នំពេញ ពិសេសតំបន់ភាគខាងត្បូងទីក្រុងភ្នំពេញទទួលបានគម្រោងលំនៅដ្ឋានតម្លៃសមរម្យ។

លោកស្រីបាននិយាយថា “ទោះបីយ៉ាងក៏ដោយ វិបត្តិកូវីដ១៩ នៅបន្តប៉ះពាល់វិស័យអចលនទ្រព្យនៅកម្ពុជា និងនៅតែមិនទាន់មានភាពល្អប្រសើរ ដូចមុនសម័យកូវីដ១៩ ប៉ុន្តែដោយសារកម្លាំងទិញស្រុក បានធ្វើឱ្យទីផ្សារលំនៅដ្ឋានតម្លៃសមរម្យ មិនសូវជាទទួលរងផលប៉ះពាល់ខ្លាំងនោះទេ”។

លោកស្រីបានថ្លែងថា តម្រូវការលំនៅដ្ឋានតម្លៃចន្លោះពី៣ម៉ឺន ទៅដល់១០ម៉ឺនដុល្លារ ដែលជាតម្លៃសមរម្យមួយ សម្រាប់ប្រជាជនអាចមានលទ្ធភាពវិនិយោគ ឬទិញសម្រាប់រស់នៅ នៅតែមានកំណើន ធៀបនឹងលំនៅដ្ឋាន ដែលមានតម្លៃចាប់ពី១០ម៉ឺន ឡើងទៅ។

លោកស្រីបានរំពឹងថា ទីផ្សារអចលនទ្រព្យត្រូវការរយៈពេលពី៦ ដល់៩ខែទៀត ទើបវិស័យអាចវិលត្រឡប់ទៅរកភាពប្រសើរឡើងវិញ ព្រោះវាទាមទារឱ្យមានទំនុកចិត្តវិនិយោគឡើងវិញពីទាំងក្នុង និងក្រៅស្រុក។

អ្នកឧកញ៉ាលី ហួរបានមានប្រសាសន៍កាលពីថ្មីៗនេះថា នៅដើមឆ្នាំ២០២១គឺជាពេលវេលាដ៏ល្អសម្រាប់អ្នកវិនិយោគ និងអភិវឌ្ឍលំនៅដ្ឋានប្រភេទកម្រិតមធ្យមសម្រាប់ដាក់លក់នៅលើទីផ្សារនាចុងឆ្នាំ២០២១ខាងមុខនេះ ខណៈពេលដែលតម្រូវការទីផ្សារលំនៅដ្ឋានចាប់ផ្តើមឡើងខ្ពស់វិញ។

អ្នកឧកញ៉ាបន្តថា “ខ្ញុំគិតថា យ៉ាងយូរនៅត្រឹមចុងឆ្នាំ២០២១ ទីផ្សារលំនៅដ្ឋានកម្រិតមធ្យម និងក្រោមមធ្យមនឹងកើនឡើងវិញខ្លាំង ដោយសារតែកំណើននៃចំនួនប្រជាជនកើនឡើងជាបន្តបន្ទាប់ ហើយតម្រូវការលំនៅដ្ឋានរបស់ប្រជាពលរដ្ឋក្នុងស្រុកនៅមានច្រើន ដូច្នេះទីផ្សារមួយនេះនឹងងើបឡើងជាក់ជាមិនខាន។ នេះបើតាមការមើលឃើញរបស់ខ្ញុំ”៕

ក្រុមហ៊ុនយក្សអាមេរិកលក់ភាគហ៊ុនរបស់ខ្លួនបានតម្លៃជាង៣០ពាន់លានដុល្លារទៅឱ្យក្រុមហ៊ុនរបស់ប្រទេសអៀរឡង់

ដោយៈសុខុម

សហរដ្ឋអាមេរិកៈ ក្រុមហ៊ុនលំដាប់យក្សរបស់សហរដ្ឋអាមេរិក General Electric បានប្រកាសថាក្រុមហ៊ុនលំដាប់ពិភពលោក AerCap Holdings របស់ប្រទេសអៀរឡង់ នឹងទិញយកអាជីវកម្មដាក់ជួលយន្តហោះរបស់ខ្លួនក្នុងតម្លៃព្រមព្រៀងជាង៣០ពាន់លានដុល្លារអាមេរិក។

យោងតាមការចេញផ្សាយរបស់បណ្តាញសារព័ត៌មាន CNA (China News Asia) កាលពីថ្ងៃទី១០ ខែមីនា ឆ្នាំ២០២១ម្សិលមិញនេះបានបញ្ជាក់ថា អាជីវកម្ម GE Capital Aviation Services ឬហៅកាត់ថា GECAS នេះគឺជាក្រុមហ៊ុនមួយ ស្ថិតក្នុងចំណោមក្រុមហ៊ុនដាក់ជួលយន្តហោះធំៗបំផុតលើពិភពលោក ហើយដាក់ជួលយន្តហោះដឹកអ្នកដំណើរយ៉ាងច្រើន ដែលផលិតដោយក្រុមហ៊ុនល្បីៗ រួមមាន ក្រុមហ៊ុន Boeing របស់សហរដ្ឋអាមេរិក និងក្រុមហ៊ុន Airbus របស់សហភាពអឺរ៉ុបជាដើម។

កិច្ចព្រមព្រៀងនេះ រួមមានការបង់ជាសាច់ប្រាក់មុនប្រហែល២៤ ពាន់លានដុល្លារ ដែលស្មើនឹងភាគហ៊ុនប្រមាណ៤៦% នៅក្នុងក្រុមហ៊ុនដែលច្របាច់បញ្ចូលគ្នានេះ ហើយ ១ពាន់លានដុល្លារទៀត នឹងបង់ឱ្យតាមក្រោយនៅពេលបិទបញ្ចប់ការទិញលក់នេះ។

លោកLarry Culp ដែលជានាយកប្រតិបត្តិក្រុមហ៊ុន General Electric បានលក់ចេញទ្រព្យសកម្មជាបន្តបន្ទាប់ ចាប់តាំងពីលោកឡើងកាន់តំណែង ក្នុងឆ្នាំ២០២១៨ មក ហើយការលក់នេះគឺជាលើកចុងក្រោយ។ ក្រុមហ៊ុន General Electric មានផែនការកាត់បន្ថយបំណុល ឱ្យបានប្រមាណ៣០ពាន់លានដុល្លារ បន្ទាប់ពីបិទបញ្ចប់ការទិញលក់នេះ ដោយប្រើប្រាស់ប្រាក់បានពីការលក់នេះ និងប្រភពប្រាក់ដែលមានស្រាប់។

តាមការរំពឹងទុកថា កិច្ចព្រមព្រៀងទិញលក់នេះ នឹងបិទបញ្ចប់នៅក្នុងត្រីមាសទី៤ ចុងឆ្នាំ២០២១ ហើយក្រុមហ៊ុន ដែលត្រូវបានច្របាច់បញ្ចូលគ្នាខាងលើ នឹងមានយន្តហោះ សម្រាប់ដាក់ជួលរហូតដល់ទៅជាង២.០០០ គ្រឿង ដោយវ៉ាដាច់គូប្រជែង។

ប្រភពបានទម្លាយឱ្យដឹងថា ធនគារCitibank និងធនាគារGoldman Sachs បានផ្ដល់ប្រាក់កម្ចីចំនួន២៤ពាន់លានដុល្លារអាមេរិក ដល់ក្រុមហ៊ុន AerCap សម្រាប់ការទិញយកអាជីវកម្មដ៏ធំមួយនេះ៕

ចំណេះដឹងច្បាប់! វិធានសំខាន់ចំនួន៣ ដែលត្រូវរៀបចំមុនពេលបង្កើតគម្រោងវិនិយោគ

ដោយៈ រ៉ាណេត

ភ្នំពេញៈ ការបង្កើតគម្រោងវិនិយោគចាំបាច់ ត្រូវតែប្រកាសអំពីគម្រោងវិនិយោគដល់អាជ្ញាធរមានសមត្ថកិច្ច របស់រដ្ឋាភិបាលបានដឹងជាមុនផងដែរ ដើម្បីធ្វើការពិនិត្យ និងផ្ទៀងផ្ទាត់ លើគម្រោងវិនិយោគនោះឲ្យបានត្រឹមត្រូវថា តើតំបន់វិនិយោគនោះមានការអនុញ្ញាត្តិឲ្យវិនិយោគ ឬមិនអនុញ្ញាត្តិនៅលើដែនដីកាន់កាប់របស់ខ្លួន។

ដើម្បីអាចបង្កើតគម្រោងវិនិយោគបាន អ្នកវិនិយោគ ឬវិនិយោគិនត្រូវអនុវត្តវិធានវិធានទូទៅ (ក) វិធានពិសេស (ខ) និងបែបបទនៃការប្រកាសសុំ និងការសម្រេចជាមុន(គ)។

ក.វិធានទូទៅ

ជាទូទៅដើម្បីបង្កើត និងចុះបញ្ជីវិនិយោគ ត្រូវអនុវត្តន៍តាមគោលការណ៍ អនុញ្ញាត និងប្រកាសជាមុន។ អ្នកស្នើសុំត្រូវធ្វើការសុំចុះបញ្ជីរ នៅក្រសួងពាណិជ្ជកម្ម ក្នុងគោលបំណងបង្កើតឲ្យមាននីតិបុគ្គលជាមុនសិន តាមច្បាប់ស្តីពីវិធានពាណិជ្ជកម្ម និងចុះបញ្ជីពាណិជ្ជកម្ម និងច្បាប់ស្តីពីសហគ្រាសពាណិជ្ជកម្ម។

វិនិយោគិន ត្រូវរងចាំការចេញអជ្ញាប័ណ្ណ ដើម្បីស្របតាមគតិយិត្តបានត្រឹមត្រូវ។ វិធានទូទៅនេះ អនុវត្តចំពោះការវិនិយោគ ដែលមិនមានលក្ខណៈសម្បត្តិគ្រប់គ្រាន់។

ខ.វិធានពិសេស

វិធាននេះ សម្រាប់អនុញ្ញាតទៅលើគម្រោងវិនិយោគទុនណា ដែលមានលក្ខណៈសម្បត្តិគ្រប់គ្រាន់ ដែលអាចចុះបញ្ជី លើគម្រោងវិនិយោគបាន តាមរយៈច្រកចេញចូលតែមួយ នៃក្រុមប្រឹក្សាអភិវឌ្ឈន៍កម្ពុជា (CDC) ឬអនុគណៈកម្មាធិការរាជធានី ខេត្ត សម្រេចចុះបញ្ជីលើគម្រោងវិនិយោគ ដែលមានទុនចាប់ពី២លានដុល្លាអាមេរិកចុះក្រោម បានត្រឹមត្រូវតាមច្បាប់វិនិយោគឆ្នាំ១៩៩៤ ។

គ.បែបបទនៃការប្រកាសសុំ និងការសម្រេចជាមុន

ការដាក់ពាក្យសុំ និងការបង់ថ្លៃត្រូវអនុវត្តតាមគំរូ ដូចមាននៅក្នុងឧបសម្ព័ន្ធ២ នៃអនុក្រឹត្យស្តីពី វិសោធនកម្មច្បាប់ស្តីពីវិនិយោគ; និងត្រូវបង់ថ្លៃចុះបញ្ជី និងសេវាចំនួន៧លានរៀល។

ត្រូវបញ្ជាក់ពីសកម្មភាពអនុវត្តនន៍គម្រោងវិនិយោគ ដូចជា ការលើកលែងពន្ធលើប្រាក់ចំណេញ និងការស្នើសុំលើកទឹកចិត្តផងដែរ៕

ពាណិជ្ជកម្មរវាងកម្ពុជា និងប្រទេសចំនួន៣នេះ បង្ហាញសញ្ញាងើបឡើងវិញ ទោះជួបវិបត្តិកូវីដ១៩

ដោយៈ ប៊ី

ភ្នំពេញៈ ពាណិជ្ជកម្មទ្វេភាគីរវាងកម្ពុជា និងប្រទេសចំនួន៣ រួមមាន សហរដ្ឋអាមេរិក កូរ៉េខាងត្បូង និងវៀតណាម សម្រេចបាន១.០១៨,៥លានដុល្លារ នៅក្នុងពេញមួយខែមករា ឆ្នាំ២០២១ ខណៈទិសដៅនាំចេញរបស់កម្ពុជាទាំង៣នេះ បានបង្ហាញសញ្ញាវិជ្ជមាន ក្នុងការដោះដូរពាណិជ្ជកម្ម បើទោះបីមានវិបត្តិកូវីដ១៩ ។

កម្ពុជា-អាមេរិក

ពាណិជ្ជកម្មទ្វេភាគីរវាងកម្ពុជា -អាមេរិក សម្រេចបានទំហំទឹកប្រាក់៦១៥លានដុល្លារក្នុងខែមករា ឆ្នាំ២០២១ កើនឡើងជិត៥% ធៀបនឹងរយៈពេលដូចគ្នាកាលពីឆ្នាំមុន។ នេះបើតាមទិន្នន័យពីការិយាល័យជំរឿន របស់សហរដ្ឋអាមេរិក ចេញផ្សាយកាលពីពេលថ្មីៗនេះ។

ការនាំចេញទៅសហរដ្ឋអាមេរិក ខែមករាឆ្នាំ២០២១នេះ មានទំហំជាទឹកប្រាក់ ៥៨០.៦លានដុល្លារ និងការនាំទំនិញពីអាមេរិក មកកាន់កម្ពុជាវិញមានទំហំប្រមាណ៣៣.៩លានដុល្លារ។

កំណើននៃការដោះដូរពាណិជ្ជកម្មនេះ ត្រូវបានគេមើលឃើញថា ជាឱកាសសម្រា ប់ជំរុញកំណើនវិនិយោគ មកកាន់កម្ពុជាឲ្យកាន់តែច្រើន ដើម្បីផលិតនាំចេញទៅសហរដ្ឋអាមេរិក។

កម្ពុជា-កូរ៉េខាងត្បូង

ពាណិជ្ជកម្មទ្វេភាគីរវាងកម្ពុជា -កូរ៉េខាងត្បូង ចាប់ផ្តើមបង្ហាញសញ្ញាវិជ្ជមាន និងមានកំណើននៅដលដើមឆ្នាំនេះ បន្ទាប់ពីប្រទេសទាំងពីរបានបញ្ចប់ ការចរចាពាណិជ្ជកម្មសេរីកាលពីថ្មីៗនេះ ខណៈទំហំពាណិជ្ជកម្មរវាងប្រទេសទាំងពីរ សម្រេចបានប្រមាណ៨៤.៥លានដុល្លារ ក្នុងខែមករា ឆ្នាំនេះ។

យោងតាមរបាយការណ៍ ពីសមាគមពាណិជ្ជកម្មអន្តរជាតិកូរ៉េ (KITA) បានបង្ហាញថា កម្ពុជាបាននាំចេញផលិតផលទៅកាន់កូរ៉េខាងត្បូង មានទំហំទឹកប្រាក់៣២,៣លានដុល្លារ ក្នុងខែមករាកើនឡើង២ភាគរយ បើប្រៀបធៀបរយៈពេលដូចគ្នាកាលពីឆ្នាំមុន។

ទន្ទឹមនឹងនេះដែរ កម្ពុជាបាននាំចូលផលិតផល ពីប្រទេសកូរ៉េខាងត្បូងមានទំហំទឹកប្រាក់ប្រមាណ ៥២,២លានដុល្លារ កើនឡើង១២.៥ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

កម្ពុជា-វៀតណាម

ពាណិជ្ជកម្មទ្វេភាគីរវាងកម្ពុជា-វៀតណាម សម្រេចបានទំហំទឹកប្រាក់ ៣១៩លានដុល្លារក្នុងខែមករា ឆ្នាំ២០២១ ។ នេះបើយោងតាមរបាយការណ៍របស់ក្រសួងពាណិជ្ជកម្មចេញផ្សាយកាលពីថ្មីៗនេះ។

កម្ពុជាបាននាំចេញទៅកាន់ប្រទេសវៀតណាម មានទំហំទឹកប្រាក់ ៤៨លានដុល្លារនៅខែដំបូង ឆ្នាំ២០២១នេះ ហើយកម្ពុជាបាននាំចូលទំនិញពីវៀតណាម មានទំហំទឹកប្រាក់ ២៧១លានដុល្លារ។

តាមរបាយការណ៍បានឱ្យដឹងទៀតថា ផលិតផលសំខាន់ៗដែលវៀតណាមនាំចូលកម្ពុជា មានដូចជា ដែក និងដែកថែប ប្រេងសាំង ផលិតផលវាយនភណ្ឌ និងសម្លៀកបំពាក់ និងផលិតផលកសិកម្មជាច្រើនទៀត ដូចជាត្រីសាច់ និងបន្លែផ្លែឈើ ព្រមជាមួយនឹងសម្ភារៈប្រើប្រាស់ផ្សេងៗជាច្រើនទៀត៕

គម្រោងអភិវឌ្ឍន៍ផ្ទះល្វែង និងរោងចក្រធំៗកំពុងបង្ហាញវត្តមាននៅតំបន់ផ្លូវជាតិលខ3 កាន់តែច្រើន

ដោយៈ រ៉ាណេត

ភ្នំពេញៈ ខណៈដែលផ្លូវជាតិលេខ3 បានស្ថាបនាសារឡើងស្ទើររួចរាល់100ភាគរយទៅហើយនោះ គេសង្កេតឃើញមានគម្រោងអភិវឌ្ឍន៍ និងវិនិយោគសំណង់ផ្ទះល្វែង វីឡាកូនកាត់ រោងចក្រ សហគ្រាសធំៗ បាននិងកំពុងសម្រុកសាងសង់យ៉ាងសកម្ម ជាពិសេសនៅត្រឹមគីឡូម៉ែត្រលេខ៣០ គិតពីរង្វង់មូលចោមចៅ។

ប្រធានក្រុមប្រឹក្សាភិបាលក្រុមហ៊ុន DEYTHMEY REAL ESATATE លោក វិន ឈុនហ៊ាត បានមានប្រសាសន៍នៅល្ងាចថ្ងៃទី១០ ខែមីនា ឆ្នាំ២០២១នេះថា ដោយមើលឃើញសក្តានុពលផ្លូវជាតិលេខ3 ជាសរសៃឈាមយ៉ាងសំខាន់ ក្នុងការដឹកជញ្ជូនទំនិញទៅកាន់កំពង់ផែទឹកជ្រៅក្នុងខេត្តកំពត ក៏ដូចជា កំពង់ផែទឹកជ្រៅទៅនៅក្នុងខេត្តព្រះសីហនុ បានធ្វើឱ្យគម្រោងបណ្តុំផ្ទះល្វែង រោងចក្រ សហគ្រាស និងសួនឧស្សាហកម្ម កំពុងចាក់ដីសាងសង់សំណង់តូចធំជាច្រើន នៅតាមបណ្តោយផ្លូវជាតិ ដែលមានសក្ដានុពលមួយនេះគួរឱ្យកត់សម្គាល់។

លោកបញ្ចាក់ “បើនិយាយពីរង្វង់មូលចោមចៅ ទៅដល់ចំណុចផ្សារថ្នល់ព្រៃទទឹង ឬផ្លូវរថភ្លើង ឃើញថាគម្រោងរោងចក្រ សហគ្រាស ក៏ដូចជា សួនឧស្សាហកម្មមួយចំនួនបានដំណើរការជាច្រើនរួចជាស្រេច ហើយមួយចំនួនទៀតកំពុងដំណើរការសាងសង់” ។ លោកបន្តថា “ក្រៅពីនេះ ក៏មានគម្រោងអភិវឌ្ឍន៍ដីឡូត៍ និងផ្ទះល្វែងជាច្រើនគម្រោងផងដែរ ដូចជាបុរីឡេងណាវ៉ាត្រា គម្រោងផ្ទះល្វែង Shaw Up និងគម្រោងបណ្តុំផ្ទះល្វែងគីមហួតជាដើម” ។

លោកបន្តថា បើមើលចន្លោះពីគីឡូម៉ែត្រលេខ៣០ ដល់លេខ៣២ ហួសផ្លូវរថភ្លើងបន្តិចគេឃើញមានផ្ទះល្វែង និងរោងចក្រកំពុងសាងសង់បន្ថែមទៀត មានគម្រោងបុរីម៉ន ដានី លើផ្ទៃដីប្រមាណជា៣០០ហិកតា គម្រោងផ្សារទំនើបខ្នាតយក្សរបស់ចិន ហើយនៅជាប់គ្នានោះ ក៍មានគម្រោងផ្ទះល្វែងលឹម ឈាងហាក់ បុរីសួ សុវណ្ណ ជាពិសេសមានគម្រោងផែស្ងួតសូងួន ដែលកំពុងសាងសង់នៅទីនោះ លើផ្ទៃដីរាប់សិបហិកតា ជាពិសេសសួនឧស្សាហកម្ម MJ Park ដ៏ធំក្រោមការវិនិយោគរួមគ្នា រវាងមហាសេដ្ឋីក្នុងស្រុក និងក្រុមហ៊ុនវិនិយោគមកពីប្រទេសចិន។

ហេតុផលដែលអ្នកវិនិយោគទាំង ក្នុងវិស័យសំណង់លំនៅដ្ឋាន ក៏ដូចជា វិស័យឧស្សាហកម្មសម្រុកមកតំបន់នេះ ព្រោះនៅពេលដ៏ខ្លីខាងមុខនេះ តំបន់ផ្លូវជាតិលេខ៣ នឹងក្លាយជាតំបន់សួនឧស្សាហកម្ម និងតំបន់សេដ្ឋកិច្ចពិសេស ដោយសារកត្តាភូមិសាស្ត្រជាពិសេសផ្លូវថ្នល់អំណោយផលដល់ការដឹកជញ្ជូន។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ឲ្យដឹងតាមទូរស័ព្ទ កាលពីពេលកន្លងមកនេះថា ការចូលខ្លួនទៅវិនិយោគ និងអភិវឌ្ឍវិស័យលំនៅដ្ឋានផ្លូវជាតិលេខ៣នាពេលនេះ គឺមានឱកាសល្អច្រើន។

លោកបានបន្តទៀតថា “ជាធម្មតាទាល់តែគេសម្លឹងឃើញ ពីឱកាសទទួលបានប្រយោជន៍ និងចំណេញ ទើបគេបណ្តាក់ទុនវិនិយោគ” ។ លោកបានបន្តទៀតថា “ផ្លូវជាតិលេខ៣ពេលនេះ កាន់តែមានភាពល្អប្រសើរជាងពេលមុន ជាពិសេសក្រោយពេលរដ្ឋាភិបាលបានកសាងបណ្តាញហេដ្ឋារចនាសម្ព័ន្ធជាច្រើន” ។

លោកច្រឹក សុខនីម បន្តទៀតថា “តំបន់ដែលមានចម្ងាយប្រមាណ២០-៣០គីឡូម៉ែត្រពីរាជធានីភ្នំពេញ នៅតែមានភាពល្អប្រសើរលើការវិនិយោគទាំងអស់” ។ លោកបានបញ្ជាក់ទៀតថា “ហេតុផលដែលអ្នកវិនិយោគ សម្រុកទៅធ្វើការអភិវឌ្ឍនៅតំបន់ខាងលើនេះ ដោយសារតែកត្តាភូមិសាស្ត្រល្អ វិសាលភាពដីនៅទូលាយច្រើន ហើយតម្លៃដីនៅមានកម្រិតទាប ដែលអំណោយផលដល់គម្រោងអភិវឌ្ឍរបស់ពួកគេ” ៕

ភាពអំណោយផលនៃភូមិសាស្ត្របានធ្វើឲ្យខេត្តកណ្តាលស្រូបទាញគំរោងអភិវឌ្ឍផ្នែកលំនៅដ្ឋានច្រើន

ដោយៈ រ៉ាណេត

កណ្តាលៈ ហេដ្ឋារចនាសម្ព័ន្ធធំៗជាច្រើន បានបង្ហាញខ្លួននៅខេត្តកណ្តាល ដែលបានធ្វើឲ្យខេត្តមានភូមិសាស្ត្រព័ទ្ឋជុំវិញរាជធានីនេះ ទាក់ទាញគំរោងអភិវឌ្ឍន៍លំនៅដ្ឋាន និងមជ្ឈមណ្ឌលពាណិជ្ជកម្មកាន់តែច្រើន។

លោកអភិបាលខេត្តកណ្តាល លោក គង់ សោភ័ណ្ឌ បានមានប្រសាសន៍ឲ្យដឹងកាលពីពេលថ្មីៗនេះថា ស្ទើរតែគ្រប់តំបន់នៅក្នុងខេត្តកណ្តាល ជាពិសេសនៅតាមតំបន់មួយចំនួន ដែលស្ថិតនៅហ៊ុព័ទ្ធជុំវិញរាជធានីភ្នំពេញ គឺកំពុងតែមានសក្ដានុពលក្នុងការវិនិយោគ និងអភិវឌ្ឍក្នុងវិស័យសំណង់គួរឱ្យកត់សម្គាល់ ដែលក្នុងនោះវិស័យលំនៅដ្ឋានកម្រិតមធ្យម និងសមរម្យបានដើរតួឈានមុខគេ ស្របពេលដែលកំណើន នៃចំនួនប្រជាជនបានកើនឡើងរហូតដល់ជាង១លាននាក់។

លោកបន្តថា “ក្រៅពីក្រុងតាខ្មៅ ដែលជាមណ្ឌលពាណិជ្ជកម្មប្រចាំខេត្ត គម្រោងអភិវឌ្ឍន៍ក្នុងវិស័យលំនៅដ្ឋានជាច្រើន បានបង្ហាញវត្តមាននៅតាមតំបន់ ដែលមានសក្ដានុពលនានា ជាពិសេសតំបន់ដែលស្ថិតនៅព័ទ្ធជុំវិញរាជធានីភ្នំពេញ” ។ លោកបានបន្តទៀតថា “ភាពរីកចម្រើននិងអភិវឌ្ឍន៍ទាំងអស់នេះ កើតឡើងដោយសារតែភាពល្អប្រសើរនៃកំណើនសេដ្ឋកិច្ចជាតិ ក៏ដូចជាក្នុងតំបន់ជ្រកក្រោមម្លប់សន្តិភាព ដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា” ។

ជាក់ស្តែងបុរីថ្មី GB Resident ដែលគ្រោងសាងសង់លើផ្ទៃដីជាង១០ហិកតា បាននិងកំពុងបង្ហាញរូបរាងនៅតំបន់ផ្លូវក្រវ៉ាត់ក្រុងទី៣ ដែលជាតំបន់មានសក្តានុពល និងមានទីតាំងនៅជិតព្រលានយន្តហោះអន្តរជាតិភ្នំពេញថ្មី។

អគ្គនាយកក្រុមហ៊ុនអចលនទ្រព្យ R Investment Group លោកបណ្ឌិតតេង រិទ្ធី បានមានប្រសាសន៍ឲ្យដឹងផងដែរថា បច្ចុប្បន្ននេះ ស្ទើរតែគ្រប់តំបន់ទូទាំងខេត្តកណ្តាល សុទ្ធតែមានសក្ដានុពល ស្របពេលដែលគម្រោងនៃការអភិវឌ្ឍជាច្រើន ត្រូវបានចាប់អនុវត្ត។

លោកបណ្ឌិតបន្តថា “ក្រៅពីតំបន់កណ្តាលក្រុងតាខ្មៅ ដែលកំពុងតែមានសកម្មភាពអភិវឌ្ឍន៍ ទៅលើហេដ្ឋារចនាសម្ព័ន្ធរបស់រាជរដ្ឋាភិបាល និងគម្រោងអភិវឌ្ឍន៍វិស័យសំណង់ រួមមានគម្រោងលំនៅដ្ឋានកម្រិតមធ្យមនិងកម្រិតខ្ពស់ ក៏មានគម្រោងសាងសង់អគារពាណិជ្ជកម្មមួយចំនួនផងដែរ” ។

លោកបណ្ឌិតបានបន្តថា តំបន់ដែលត្រូវបានក្លាយជាគោលដៅវិនិយោគ ក្នុងវិស័យលំនៅដ្ឋាន រួមមានតំបន់ជាយក្រុងតាខ្មៅដូចជាតំបន់ព្រែកហូរ ព្រែកកំពឺស និងតំបន់ស្ថិតតាមបណ្តោយផ្លូវជាតិលេខ ២១A (ស្រុកស្អាង) ហើយក្រៅពីនេះនៅចមានតំបន់ផ្លូវជាតិលេខ២ (ម្ដុំរង្វង់មូលគួរស្រូវ) តំបន់ផ្លូវជាតិលេខ៣ ស្ថិតក្នុងស្រុកកណ្តាលស្ទឹង តំបន់ផ្លូវជាតិលេខ៤ ក្នុងស្រុកអង្គស្នួល តំបន់ផ្លូវជាតិលេខ៥ ស្រុកពញាឮ តំបន់ផ្លូវជាតិលេខ៦ ស្រុកមុខកំពូល និងតំបន់ផ្លូវជាតិលេខ១ ស្ថិតនៅក្នុងស្រុកកៀនស្វាយ” ។

ជាមួយគ្នានេះ លោកឧកញ៉ាឡាយ លន់ អគ្គនាយកក្រុមហ៊ុនអចលនទ្រព្យ Black Eagle International Co.,Ltd ធ្លាប់បានបង្ហាញពីសក្ដានុពល និងការអភិវឌ្ឍយ៉ាងលឿននៅទូទាំងខេត្តកណ្តាលកាលពីពេលកន្លងទៅថា ខេត្តកណ្តាកមានកត្តាភូមិសាស្ត្រល្អ ជាពិសេស បណ្តាស្រុកមួយចំនួនរបស់ខេត្ត គឺស្ថិតនៅព័ន្ធជុំវិញរាជធានីភ្នំពេញ ហើយនៅពេលបច្ចុប្បន្ននេះ មានតំបន់មួយចំនួនបានកាត់ចូលមកចំណុះរាជធានីភ្នំពេញ ហើយសល់ប៉ុន្មានបានក្លាយជាជាតំបន់ជាយក្រុង ដែលមានការអភិវឌ្ឍយ៉ាងឆាប់រហ័ស។

លោកឧកញ៉ាបន្តថា “ភាពរីកចម្រើន និងអភិវឌ្ឍន៍របស់ខេត្តកណ្តាល មានលក្ខណៈពិសេសខុសពីខេត្តផ្សេង ហើយតម្លៃក៏មានការកើនឡើងគួរឱ្យកត់សម្គាល់” ។ លោកបន្តថា “តម្លៃដីធ្លីដែលស្ថិតនៅក្នុងតំបន់មិនទាន់មានការអភិវឌ្ឍ គិតជាមធ្យមអាចឡើងក្នុងអត្រា១០ទៅ២៥ភាគរយ។ ដោយឡែកតម្លៃដី ដែលស្ថិតនៅក្នុងតំបន់មានការអភិវឌ្ឍ គិតជាមធ្យមមានកំណើនក្នុងចន្លោះចាប់ពី៥០-១២០ភាគរយក្នុងមួយឆ្នាំ” ៕

អាជ្ញាធរ និងអ្នកជំនាញ មានសុទិដ្ឋិនិយមពីគំរោងអភិវឌ្ឍន៍ និងកំនើនតម្លៃដីធ្លីនៅជើងភ្នំបូកគោ

ដោយៈ គង់ សូរិយា

ភ្នំពេញៈ អ្នកជំនាញ និងអាជ្ញាធរមូលដ្ឋានបានសម្តែងសុទិដ្ឋិនិយមថា គំរោងទីក្រុងឆ្លាតវៃនៅជើងភ្នំបូកគោកាលពីឆ្នាំមុន នឹងមានដំណើរការល្អនិងរលូនបន្ទាប់ពីវិបត្តិកូវីដ១៩បញ្ចប់។

លោកបណ្ឌិតគីម ហ៊ាង ប្រធាន KW Cambodia បានមានប្រសាសន៍ឲ្យដឹងតាមទូរស័ព្ទនាកាលពីពេលថ្មីៗនេះថា ជើងភ្នំបូកគោ ជាតំបន់មានទីតាំងល្អ អាកាសធាតុល្អ និងលក្ខខ័ណ្ឌបង់ប្រាក់មានភាពអំណោយផល ប៉ុន្តែដោយសារវិបត្តិកូវីដ១៩បានធ្វើឲ្យគំរោងនេះដំណើរការយឺត ហេតុនេះយើងត្រូវការពេលវេលាដែលកូវីដ១៩បញ្ចប់ នឹងធ្វើឲ្យតំបន់នេះមានការអភិវឌ្ឍ និងរីកចម្រើនលឿន។

លោកបន្តថា “ដើម្បីធ្វើឲ្យដីតំបន់នេះឡើងថ្លៃ អ្នកវិនិយោគដែលមានដី គេរៀបចំការអភិវឌ្ឍន៍នៅតំបន់នោះ ព្រោះដីនឹងមិនឡើងថ្លៃទេ បើផែនការអភិវឌ្ឍន៍មិនបានរៀបចំបានល្អ” ។ លោកបន្តថា “ឧទាហរណ៍អ្នកវិនិយោគម្នាក់មានដី១០០ហិកតា គេបានយក៥ហិកតាសាងសង់រោងចក្រ ដោយជួលឲ្យឯកជនមិនគិតប្រាក់ អ្នកវិនិយោគនឹងហូរចូលទៅតំបន់នោះ បន្ទាប់គេនឹងយកដី១ហិកតាសាងសង់ផ្សារ ដែលការរៀបចំបែបនេះនឹងធ្វើឲ្យមនុស្សទៅរស់នៅច្រើន មានសកម្មភាពសេដ្ឋកិច្ច នឹងធ្វើឲ្យដីតំបន់នោះឡើងថ្លៃជាស្វ័យប្រវត្តិ” ។

លោកបណ្ឌិតគីម ហ៊ាង បានបន្តថា សម្រាប់ផែនការអភិវឌ្ឈន៍របស់រដ្ឋាភិបាលប្រកាសនៅតំបន់ណាមួយ ដីនៅតំបន់នោះតែងតែឡើងថ្លៃ ប៉ុន្តែរដ្ឋាភិបាលមិនបានវិនិយោគច្រើនទេ គឺវិស័យឯកជនជាអ្នកវិនិយោគ ហេតុនេះមានតែអ្នកវិនិយោគក្នុងស្រុក និងបរទេសចូលមកទេ ទើបធ្វើឲ្យដីឡើងថ្លៃ និងការអភិវឌ្ឍនៅតំបន់ណាមួយដីនឹងឡើងថ្លៃលឿន។

លោកបន្តថា “សំរាប់ការរៀបចំទីក្រុងនៅជើងភ្នំបូកគោ វាត្រូវការពេលវេលាដែលកូវីដ១៩បញ្ចប់ ទើបតំបន់នេះមានការអភិវឌ្ឍលឿន ដោយសារលក្ខខ័ណ្ឌមួយចំនួនដែលបានលើកឡើងខាងលើ” ។

លោកបណ្ឌិតគីម ហ៊ាង បានបន្តដោយលើកឧទាហរណ៍ជាក់ស្តែង មកបញ្ជាក់ថា តំបន់បឹងកក់ អ្នកវិនិយោគគម្រោងនេះ បានលក់ដីក្នុងតម្លៃទាបនៅពេលដំបូង ដើម្បីទាក់ទាញអ្នកវិនិយោគ ចូលទៅវិនិយោគគំរោងច្រើននៅទីនោះ។

ជាមួយគ្នានេះ អភិបាលខេត្តកំពតលោកជាវ តាយបានមានប្រសាសន៍ឲ្យដឹងតាមទូរស័ព្ទកាលពីរសៀលថ្ងៃទី១០ មិនាកន្លងមកថា គំរោងអភិវឌ្ឍន៍ទាំងអស់នៅក្នុងខេត្តកំពតមិនបានផ្អាកដោយសារជំងឺកូវីដ១៩នោះទេ គឺនៅតែបន្តសកម្មភាពអភិវឌ្ឍន៍ជាធម្មតា ហើយខេត្តកំពុងគ្រប់គ្រងជំងឺកូវីដ១៩បានល្អ ដោយរហូតមកទល់ពេលនេះ មិនទាន់មានប្រជាពលរដ្ឋក្នុងខេត្តណាម្នាក់បានឆ្លងជំងឺនេះទេ។

លោកបន្តថា “ខេត្តកំពុងទាក់ទាញការវិនិយោគច្រើន ពីសំណាក់អ្នកវិនិយោគក្នុងស្រុក និងអន្តរជាតិ ពិសេសតំបន់ជើងភ្នំបូកគោកំពុងមានការអភិវឌ្ឍលឿនផងដែរ” ៕

គាំទ្រផលិតផលជាតិ៖ ចង់បានលំនៅដ្ឋានមានសោភ័ណភាពសូមកុំភ្លេច SUNDOOR

ដោយៈគង់ សូរិយា

ភ្នំពេញៈ ជាមួយនឹងការគិតគូរជាចម្បងលើគុណភាព ប្រណីតភាព ក្រុមហ៊ុន SUN DOOR ឯកទេសខ្ពស់ក្នុងការផលិត និងផ្គត់ផ្គង់ប្រភេទទ្វារ PVC និងពិដានបែបទាន់សម័យបាន និងកំពុងផ្តល់សេវាកម្មរបស់ខ្លួនលឿនរហ័ស និងមានគុណភាពខ្ពស់។

ក្រុមហ៊ុន SUNDOOR ត្រូវបានគេស្គាល់ថា ជាក្រុមហ៊ុនមានជំនាញខ្ពស់ក្នុងការផលិតពិដាន និងទ្វារប្រភេទ PVC សម្រាប់ដាក់បន្ទប់គេង ខុនដូ មន្ទីរពេទ្យ សាលារៀន វីឡា ផ្ទះល្វែង ដែលមានគុណភាពល្អ មិនរីករួម មិនស្រក អាចកម្មង់ទំហំទៅតាមតម្រូវការ ប្រកបដោយគុណភាព សោភ័ណភាព ដែលកំពុងមានប្រជាប្រិយភាពនៅក្នុងវិស័យសំណង់កម្ពុជានាពេលបច្ចុប្បន្ន។

ក្រុមហ៊ុនផលិត និងផ្គត់ផ្គង់ទ្វារ ពិដាន SUNDOOR មានក្រុមអ្នកជំនាញ សមត្ថភាព និងភាពម៉ឺងម៉ាត់ ដោយមានការត្រៀមខ្លួនរួចជាស្រេច ក្នុងការចូលប្រឡូក ប្រកួតប្រជែងនៅក្នុងទីផ្សារកម្ពុជា ដែលជាស្ថាប័នធំៗមានស្រាប់។ ក្រុមហ៊ុនមានក្ដីរំពឹង និងជឿជាក់យ៉ាងច្បាស់ក្នុងកិច្ចដំណើរការរបស់ខ្លួន ដែលនឹងឈានទៅរកភាពជោគជ័យក្នុងពេលដ៏ខ្លីខាងមុខនេះ។

ជាបទពិសោធន៍របស់ក្រុមហ៊ុន នៅក្នុងរយៈពេលដ៏ខ្លី នៃកិច្ចដំណើរការផ្គត់ផ្គង់ផលិតផល ក្នុងវិស័យសំណង់នៅកម្ពុជាកន្លងទៅនេះ ខ្សែសង្វាក់ផលិតកម្មរបស់ក្រុមហ៊ុនបានប្រព្រឹត្តទៅយ៉ាងរលូន ខណៈដែលក្រុមហ៊ុនមានការតាំងចិត្តខ្ពស់ ជាមួយនឹងការខិតខំប្រឹងប្រែង ក្នុងការជំនះនូវរាល់ឧបសគ្គដែលប្រឈម ហើយធ្វើការដោះស្រាយដោយសន្ដិវិធី ដើម្បីឈានទៅដល់ការគោលដៅ នៃភាពជោគជ័យយ៉ាងត្រចះត្រចង់។

គោលបំណងចម្បងរបស់ក្រុមហ៊ុន ក្នុងរយៈពេលនេះ គឺចាំបាច់បំផុតធ្វើគ្រប់មធ្យោបាយ ដើម្បីបំពេញនូវតម្រូវការរបស់អតិថិជន ធ្វើយ៉ាងណាពង្រីកវិសាលភាព និងចែកចាយនៅលើទីផ្សារគ្រប់បណ្តាខេត្តក្រុងនានានៅទូទាំងប្រទេសកម្ពុជា។

ក្រុមហ៊ុន SUNDOOR មានគោលដៅយ៉ាងមុតមាំ ដើម្បីក្លាយខ្លួនទៅជាក្រុមហ៊ុនឈានមុខគេមួយក្នុងការផ្គត់ផ្គង់ទ្វារ និងពិដាន ដែលមានលក្ខណៈទំនើប ទាន់សម័យ ប្រកបដោយគុណភាព ដែលជាតម្រូវការចាំបាច់ សម្រាប់វិស័យសំណង់នៅកម្ពុជា។

ជាមួយគ្នានេះ ក្រុមហ៊ុនក៏មានបេសកកម្មពិសេស ដើម្បីធ្វើការផ្តល់ជូននូវសេវាកម្ម រួមជាមួយនឹងផលិតផលមានគុណភាព ប្រកបដោយក្រមសីលធម៌របស់បុគ្គលិកជំនាញ មានសមត្ថភាព និងចំណេះដឹងយ៉ាងពិតប្រាកដ ដើម្បីបំពេញសេចក្ដីត្រូវការរបស់អតិថិជនគោលដៅរបស់ខ្លួន ដែលក្នុងនោះរួមមានជាអាទិ៍ អតិថិជនដែលជាអ្នកប្រើប្រាស់ផ្ទាល់ អ្នកចែកចាយបន្ត ក៏ដូចជា ចែកចាយទៅតាមបណ្តាទីផ្សារនៅទូទាំងប្រទេស ទៅតាមតម្រូវការ៕