កញ្ចប់ឥណទានរបស់វិស័យធនាគារនៅសល់ប្រមាណ ៧ពាន់លានដុល្លារ ដែលនឹងបញ្ចេញបន្តនៅឆ្នាំ២០២១នេះ

ដោយៈ រ៉ាណេត

ភ្នំពេញៈ តាមរបាយការណ៍របស់ធនាគារជាតិនៃកម្ពុជា បានឱ្យដឹងថា ឆ្នាំ ២០២០កន្លងទៅនេះ ការផ្តល់ឥណទានរបស់វិស័យធនាគារមានការធ្លាក់ចុះ ដោយសារការបារម្ភអំពីលទ្ធភាព នៃការបង់សងរបស់អតិថិជន ដែលធ្វើឲ្យកញ្ចប់ឥណទានរបស់វិស័យនេះនៅសល់ប្រមាណ ៧ពាន់លានដុល្លារ ដូច្នេះឥណទានទាំងនេះ អាចនឹងបញ្ចេញនៅឆ្នាំ ២០២១នេះ។

តាមរយៈរបាយការណ៍ដដែល ដែលបានផ្សព្វផ្សាយនៅក្នុងសប្ដាហ៍នេះបានបង្ហាញថា ជាមួយនឹងកញ្ចប់ឥណទានដែលនៅសល់ និងគ្រោងបញ្ចេញនៅឆ្នាំ២០២១នេះ ផ្គួបផ្សំជាមួយការបញ្ចេញកញ្ចប់ ថវិកាចំនួន២០០លានដុល្លាររបស់រាជរដ្ឋាភិបាល ដើម្បីធានាឥណទាន វិស័យធនាគារបានយ៉ាងតិច២ពាន់លានដុល្លារ និងការទម្លាក់ថវិកាទុន២៧០លានដុល្លារ ទៅធនាគារ SME និងធនាគារអភិវឌ្ឍន៍ជនបទ និងកសិកម្ម សម្រាប់បង្កើនឥណទានទៅវិស័យអទិភាព និងយុទ្ធសាស្ត្រដង្ហើមសេដ្ឋកិច្ច។

នៅឆ្នាំ២០២០ប្រាក់បញ្ញើអតិថិជនមានទំហំ ៣៣,៨ពាន់លានដុល្លារអាមេរិក មានកំណើន១៥,៥ភាគរយ ក្នុងនោះឥណទានអតិថិជនមានទំហំ៣៧,៣ពាន់លានដុល្លារអាមេរិក កើនឡើង១៤,៨ភាគរយ បើធៀបកាលពីឆ្នាំ២០១៩ ។

ដោយឡែកសម្រាប់ការរៀបចំ ឥណទានឡើងវិញមានជាង២៨ម៉ឺនគណនី ស្មើនឹង ៤,២ពាន់លានដុល្លារអាមេរិក ក្នុងនោះការរៀបចំឥណទានឡើងវិញ របស់គ្រឹះស្ថានធនាគារបានថយចុះក្នុងខែវិច្ឆិកា ហើយសមតុល្យឥណទានរៀបចំឡើងវិញ បានចាប់ផ្ដើមថយចុះចាប់ពីខែកញ្ញាមក។ ចំណែកឯគ្រឹះស្ថានមីក្រូហិរញ្ញវត្ថុវិញ គណនី និងសមតុល្យឥណទានរៀបចំឡើងវិញ បានថយចុះដល់កម្រិតទាបបំផុតក្នុងខែតុលា ប៉ុន្ដែបានកើនឡើងវិញនៅក្នុងខែវិច្ឆិកា ឆ្នាំ២០២០ ៕

ក្រុមហ៊ុនចំនួន២២បានទទួលអាជ្ញាប័ណពីរដ្ឋាភិបាលដើម្បីអភិវឌ្ឍន៍នៅតាមបណ្តាកោះនានាក្នុងក្រុងព្រះសីហនុ

ដោយ ៖ ស៊ីវ ម៉េង

ភ្នំពេញៈ ក្រុមហ៊ុនធំៗចំនួន២២បានទទួលអាជ្ញាប័ណ្ណពីរដ្ឋាភិបាល ដើម្បីអភិវឌ្ឈន៍នៅតាមបណ្តាកោះនានា នៅក្នុងក្រុងព្រះសីហនុ ប៉ុន្តែមានតែកោះតិចតួចប៉ុណ្ណោះត្រូវបានអភិវឌ្ឍន៍តាមផែនការ។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងតាមទូរស័ព្ទនាល្ងាចថ្ងៃទី២៨ មករានេះថា កន្លងមករាជរដ្ឋាភិបាលបានផ្តល់អាជ្ញាប័ណ្ណដល់ក្រុមហ៊ុនជាង២២ ដើម្បីអភិវឌ្ឍន៍នៅតាមបណ្តាកោះនានា ក្នុងនោះមានកោះមួយចំនួនបានកំពុងអភិវឌ្ឍន៍ដូចជា កោះសង្សារ ឬកោះអូន កោះបង កោះរ៉ុង កោះក្របី កោះឬស្សីជាដើម ប៉ុន្តែនៅមានក្រុមហ៊ុនមួយចំនួនទៀត បានទទួលអាជ្ញាប័ណ្ណពីក្រសួងបរិស្ថាន ដើម្បីអភិវឌ្ឍន៍គម្រោងមួយចំនួនផងដែរ។

លោកបន្តថា “បច្ចុប្បន្នភាពយឺតយ៉ាវរបស់ក្រុមហ៊ុនមួយចំនួន ដោយសារពួកគេកំពុងកែសម្រួលMaster Plan ដើម្បីរៀបចំផែនការអភិវឌ្ឍន៍ជាថ្មី ដូចជាករណីកោះពស់ជាដើម”។លោកបន្តថា “ខេត្តព្រះសីហនុមានកោះសរុបចំនួន៣២ ដែលសុទ្ឋតែជាកោះមានភាពស្រស់ស្អាត និងទាក់ទាញទេសចរណ៍”។

បច្ចុប្បន្ននេះក្រុមហ៊ុនRoyal Groupបានវិនិយោគលើកោះរ៉ុង ដែលសម្រេចបាននូវសមិទ្ឋផលមួយចំនួនផងដែរ ខណៈការសាងសង់ហេដ្ឋារចនាសម្ព័ន្ឋកោះរ៉ុង សម្រេចបានប្រមាណ៧០ភាគរយរួចហើយ។ ចំណែកការិយាល័យរដ្ឋបាលរបស់ក្រុម បានបញ្ចប់រួចហើយ ដើម្បីឲ្យក្រុមមន្រ្តីអាចធ្វើការបាន។

លោកឃាង ភារម្យក៏បានមានប្រសាសន៍ឲ្យដឹងកាលពីពេលថ្មីៗនេះផងដែរថា កោះពស់បាន និងកំពុងចាប់ផ្តើមអភិវឌ្ឍន៍ឡើងវិញហើយ ដោយក្រុមហ៊ុនចំនួនបីបាននិងកំពុងអភិវឌ្ឍន៍នៅលើកោះនេះ ដែលបច្ចុប្បន្នមានការសាងសង់ហេដ្ឋារចនាសម្ព័ន្ឋ លើកោះនេះ មានការរៀបចំឆ្នេរ និងក្រុមហ៊ុនទាំងនោះកំពុងរៀបចំMaster Plan អភិវឌ្ឍន៍ជាថ្មី៕

ក្បួនទិញដី ៖ អនុវត្តន៍វិធីសាស្រ្តមួយនេះ ដើម្បីទិញដីបានតម្លៃល្អ និងចំណេញច្រើន

ដោយគង់ សូរិយា

ភ្នំពេញៈ ការជ្រើសរើសវិនិយោគដីធ្លី ដែលមានវិធីសាស្រ្តត្រឹមត្រូវ នឹងធ្វើឲ្យយើងទិញដីបានល្អ តម្លៃល្អ និងអាចមានផលចំណេញលឿន ពិសេសអាចបញ្ចៀសហានិភ័យបាន។

អ្នកជំនាញអន្តរជាតិបានលើកជារូបមន្តមួយចំនួន ដើម្បីធ្វើឲ្យការវិនិយោគដីធ្លីទទួលបានផលចំណេញ ដោយក្បួនមួយចំនួនដូចជា

សិក្សាលើសក្តានុពលទីតាំង

នៅពេលនិយាយពីអចលនទ្រព្យ គឺនិយាយពីទីតាំង ទីតាំង និងទីតាំង ព្រោះទីតាំងមានសារៈសំខាន់ណាស់ សំរាប់កំណត់ភាពជោគជ័យរបស់គម្រោងណាមួយ ព្រោះតម្លៃអចលទ្រព្យពិសេសដីធ្លី ដែលមានតម្លៃឡើងថ្លៃលឿន។ ទីតាំងដែលគួរវិនិយោគគួរធ្វើនៅតំបន់ ដែលស្ថិតក្នុងផែនការអភិវឌ្ឍន៍របស់រដ្ឋាភិបាល តំបន់ព្រំដែន តំបន់ជាយក្រុង តំបន់ដែលមានការសាងសង់ហេដ្ឋារចនាសម្ព័ន្ឋរបស់រដ្ឋាភិបាលជាដើម។

ប័ណ្ណកម្មសិទ្ឋ

ប័ណ្ណកម្មសិទ្ឋច្បាស់លាស់នៅកម្ពុជា ហាក់ដូចជាមានបញ្ហាស្មុគ្រស្មាញមួយ ដោយសារមន្រ្តីមូលដ្ឋាន និងមានសមត្ថកិច្ចបានលួចេញប្លង់ត្រួតលើគ្នា ដើម្បីផលប្រយោជន៍ទោះបីពួកគេដឹងថាខុសច្បាប់ក៏ដោយ។ ហេតុនេះ ការសិក្សាលំអិតម្តងហើយម្តងទៀត ពីប័ណ្ណកម្មសិទ្ឋដីធ្លីឬអចលនទ្រព្យ វានឹងអាចបញ្ចៀសហានិភ័យ ដែលធ្វើឲ្យការវិនិយោគរបស់លោក អ្នកមានសុវត្ថិភាព និងមានឳកាសចំណេញខ្ពស់។

ប្រើរូបមន្តពិសេស

តាមធម្មតាដីតែងមានការដាក់លក់ច្រើន ហេតុនេះមុនសម្រេចជ្រើសរើសយកទីតាំងណាមួយ អ្នកវិនិយោគអន្តរជាតិបានផ្តល់ជាយោបល់ថា គួរជ្រើសរើសដី៥០ទៅ១០០ទីតាំង ហើយជ្រើសរើសយក១០ក្បាលដីឬទីតាំង ដើម្បីយកមកវិភាគពីតម្លៃ ពីសក្តានុពលទីតាំង ដើម្បីប្រាកដថាដីដែលខ្លួនបានជ្រើសរើសពិតជាល្អ។

បន្ទាប់មកគេជ្រើសរើសយកដី៣ទៅ៤ទីតាំង ដើម្បីសម្រេចចិត្តចុងក្រោយថាគួរជ្រើសរើសដីណាមួយ ដែលមានសក្តានុពល ដែលអ្នកវិនិយោគអាចដឹងថា ដីដែលខ្លួនបានជ្រើសរើសពិតជាល្អ មានទីតាំងល្អ មានប័ណ្ណកម្មសិទ្ឋត្រឹមត្រូវ និងមានឳកាសចំណេញខ្ពស់៕

ក្រុមហ៊ុនអចលនទ្រព្យ Century21 Cambodia និងធនាគារBRED Bank ដែលមានមូលដ្ឋាននៅប្រទេសបារាំង

ដោយៈគីមសាយ

ភ្នំពេញៈ ក្រុមហ៊ុនអចលនទ្រព្យCentury 21 Cambodia ដែលជាក្រុមហ៊ុនអចលនទ្រព្យយីហោដើម ពីសហរដ្ឋអាមេរិកនៅថ្ងៃព្រហស្បតិ៍ ទី២៨ ខែ មករា ឆ្នាំ ២០២១ បានចុះអនុស្សារណៈនៃការយោគយល់គ្នា(MOU) ជាមួយធនាគារBRED Bank (Cambodia) ដើម្បីសហការផ្តល់សេវាហិរញ្ញវត្ថុ ដល់អ្នកទិញអចលនទ្រព្យតាមបណ្តាញក្រុមហ៊ុន Century 21 Cambodia។

អនុស្សារណៈនៃការយោគយល់គ្នា(MOU)នេះ បានធ្វើឡើងនៅសណ្ឋាគារ Raffle Hotel Le Royal ហើយត្រូវបានចុះហត្ថលេខាដោយលោក Seraj Sutton នាយកប្រតិបត្តិនៃក្រុមហ៊ុន Century 21 Cambodia និងលោក Guillaume Perdon ប្រធាននាយកប្រតិបត្តិនៃធនាគារ BRED Bank (Cambodia)។

លោកSeraj Suttonបានមានប្រសាសន៍ថា លោកពិតជាមានក្តីសោមន្សសរីករាយ ដែលបានធ្វើជាដៃគូជាមួយធនាគារ BRED Bank ដែលជានបុត្រសម្ព័ន្ធរបស់ធនាគា BRED Banque Populaire ដ៏ល្បីល្បាញ និងជាធនាគារអឺរ៉ុបដំបូងគេនៅកម្ពុជា បើកដំណើរការនៅកម្ពុជាតាំងពីឆ្នាំ២០១៧។

លោក Seraj Sutton ថ្លែងថា “ខ្ញុំជឿជាក់ថាកិច្ចសហការនេះ នឹងមានតួនាទីយ៉ាងសំខាន់ក្នុងការបង្កើតឱកាស ឱ្យកាន់តែល្អប្រសើរទៅដល់អតិថិជន និងវិនិយោគិន ហើយទន្ទឹមគ្នានេះប្រជាជនកម្ពុជា ក៏អាចទទួលបានឱកាសដូចគ្នានេះ ដើម្បីអាចទិញអចលនទ្រព្យតាមក្តីប្រាថ្នារបស់ពួកគេ”។ លោកបញ្ជាក់ថា “អតិថិជនរបស់យើងមិនត្រឹមតែអាចក្លាយជាម្ចាស់កម្មសិទ្ធលំនៅដ្ឋានថ្មីរបស់ពួកគេទេ តែថែមទាំងអាចទទួលបានកម្ចីក្នុងអត្រាការប្រាក់សមរម្យ សេវាឆាប់រហ័ស ទំហំកម្ចីសមតាមតម្រូវការពីធនាគារ BRED Bank (Cambodia)”។

លោក Guillaume Perdon ប្រធាននាយកប្រតិបត្តិនៃធនាគារ BRED Bank (Cambodia) បានលើកឡើងសដៀងគ្នានេះថា យើងខ្ញុំមានក្តីសោមនស្សរីករាយដែលបានឈានដល់ការចុះអនុស្សារណៈយោគយល់គ្នា ជាមួយក្រុមហ៊ុន Century 21 Cambodia។ ធនាគារ BRED Bank Cambodia បានប្តេជ្ញាចិត្តយ៉ាងមុតមាំ ដើម្បីគាំទ្រដល់ការរីកម្រើនទីផ្សារអចលនទ្រព្យនៅកម្ពុជា។

លោកបន្តថា “យើងខ្ញុំផ្តល់សេវាកម្មធនាគារ ដែលមានស្តង់ដារអន្តរជាតិ ហេតុដូច្នេះហើយ យើងជឿជាក់ថាការផ្តល់សេវាកម្មកម្ចីទិញផ្ទះនេះ បង្ហាញពីគុណតម្លៃរបស់យើងក្នុងទីផ្សារនៅកម្ពុជា”។ លោកបន្តថា “តាមរយៈកិច្ចព្រមព្រៀងនេះ យើងនឹងធ្វើការឆ្ពោះទៅមុខរួមគ្នាយូរអង្វែង និងដោយក្តីរីករាយ”។

ក្រុមហ៊ុន Century 21 Cambodia គឺជាក្រុមហ៊ុនអចលនទ្រព្យ ដែលត្រូវបានផ្តល់សិទ្ធជាភ្នាក់ងារលក់ផ្តាច់មុខ របស់គម្រោងអភិវឌ្ឍន៍ជាច្រើននៅកម្ពុជា រួមមាន គម្រោង FOREST HARMONY, GOLF HARMONY, RESIDENCE HARMONY, LAGOON HARMONY និងគម្រោង LIVING HARMONY ដែលជាគម្រោងផ្ទះវីឡាលំហែកាយនិងខុនដូរប្រណីត រចនាឡើងតាមបែបអ៊ឺរ៉ុប ដែលទីតាំងនៅឃុំព្រៃថ្នង ស្រុកទឹកឈូ ចម្ងាយប្រហែល ១៨ គីឡូម៉ែត្រពីក្រុងកំពត។

សម្រាប់ព័ត៌មានបន្ថែម៖ សូមទាក់ទងលេខទូរស័ព្ទ 061555075៕

កម្ពុជារៀបចំវេទិកាអន្តរជាតិស្តីពីវិស័យទេសចរណ៍វៃឆ្លាត

ដោយ : គង់ សូរិយា

ភ្នំពេញៈ ក្រោមក្របខណ្ឌកម្មវិធីពង្រឹងសមត្ថភាពពាណិជ្ជកម្មក្នុងវិស័យទេសចរណ៍ (TCBP) ក្រសួងទេសចរណ៍ និងទីភ្នាក់ងារបារាំងសម្រាប់ការអភិវឌ្ឍ (AFD) សហការជាមួយអង្គការសហប្រជាជាតិ ទទួលបន្ទុកផែ្នកអភិវឌ្ឍឧស្សាហកម្ម (UNIDO) និងមជ្ឈមណ្ឌលកម្ពុជា៤.០ បានរៀបចំ “វេទិកាអន្តរជាតិស្តីពីវិស័យទេសចរណ៍វៃឆ្លាត នៅកម្ពុជា”។

រដ្ឋលេខាធិការក្រសួងទេសចរណ៍ លោកប៉ាក់ សុខុម និងលោកស្រី អូហ្វេលី ប៊ួរីស នាយិកាទីភ្នាក់ងារបារាំង សម្រាប់ការអភិវឌ្ឍប្រចាំកម្ពុជា ដោយមានការចូលរួមពីតំណាងក្រសួង-ស្ថាប័នពាក់ព័ន្ធ ផ្នែកឯកជនក្នុងវិស័យទេសចរណ៍ ដៃគូអភិវឌ្ឍន៍ អង្គការជាតិ-អន្តរជាតិ និងតំណាងគ្រឹះស្ថានបណ្តុះបណ្តាល និងស្រាវជ្រាវ។

វេទិកានេះក៏មានអ្នកចូលរួមពីចម្ងាយជាច្រើន តាមប្រព័ន្ធZoom អនឡាញ និង Facebook Page ផងដែរ។

លោកប៉ាក់ សុខុមបានគូសបញ្ជាក់ថា ស្របពេលជាមួយនឹងការវិវត្តយ៉ាងឆាប់រហ័សផ្នែកបច្ចេកវិទ្យា ការកើនឡើងនិងការប្រែប្រួលឥតឈប់ឈរ នៃតម្រូវការរបស់ភ្ញៀវទេសចរជាតិ និងអន្តរជាតិ បានធ្វើឱ្យការជម្រុញឌីជីថលរូបនីយកម្ម នៅក្នុងវិស័យទេសចរណ៍ កាន់តែមានភាពចាំបាច់ និងចំពេលវេលា សំដៅធានាឧត្តមភាពប្រកួតប្រជែងរបស់វិស័យទេសចរណ៍កម្ពុជា នៅក្នុងបរិបទនៃបដិវត្តន៍ឧស្សាហកម្ម៤.០។

លោកបន្តថា ជាងនេះទៅទៀត នៅក្នុងឆ្នាំ២០២០ កន្លងមកនេះ វិបត្តិជំងឺកូវីដ-១៩ ដែលបានជះឥទ្ធិពលអវិជ្ជមានយ៉ាងខ្លាំង មិនធ្លាប់មានក្នុងរយៈពេល២០ឆ្នាំចុងក្រោយនេះ លើវិស័យទេសចរណ៍កម្ពុជា បានតម្រូវឲ្យមានការគិតគូររកដំណោះស្រាយ ក្នុងការស្តារ និងលើកស្ទួយវិស័យនេះឡើងវិញ ដែលក្នុងនោះការប្រើប្រាស់បច្ចេកវិទ្យាអាចជាដំណោះស្រាយដ៏ល្អមួយទាំងក្នុង និងក្រោយដំណាក់កាលនៃវិបត្តិជំងឺកូវីដ-១៩។

ក្នុងបរិការណ៍នេះ ការធ្វើពិពិធកម្មកែច្នៃផលិតផល និងសេវាទេសចរណ៍ ដោយប្រើប្រាស់បច្ចេកវិទ្យាជាជំនួយ គឺជាគន្លឹះដ៏សំខាន់មួយ ក្នុងការទាក់ទាញទេសចរថ្មីៗ ជាពិសេសទាក់ទាញភ្ញៀវទេសចរឲ្យមកកម្សាន្តម្តងហើយម្តងទៀត។

នៅក្នុងវេទិកានេះ មានការចូលរួមចែករំលែកបទពិសោធន៍ និងគំរូអនុវត្តល្អៗ ជាមួយនឹងការអនុវត្តជាក់ស្តែងនាពេលបច្ចុប្បន្ន ក៏ដូចជាការពិភាក្សាលើចំណុចគន្លឹះ ជាយុទ្ធសាស្ត្រ និងយន្តការនានាក្នុងការជម្រុញការអភិវឌ្ឍ វិស័យទេសចរណ៍វៃឆ្លាត ឫទេសចរណ៍ឌីជីថល ដោយវាគ្មិនកិត្តិយស តំណាងអង្គការទេសចរណ៍ពិភពលោក (UNWTO), អង្គការ UNIDO, លេខាធិការដ្ឋានអាស៊ាន បណ្ឌិតសភាទេសចរណ៍ចិន, European Cities Marketing, ក្រុមហ៊ុន Google, ក្រុមហ៊ុន MDSG, មជ្ឈមណ្ឌលបណ្តុះធុរកិច្ចថ្មី “តេជោ”, Khmer Enterprise, ក្រុមហ៊ុន Cellcard, Impact Hub, ក្រុមហ៊ុន Unseentra, Uot App, Haystome ដែលជា Startups របស់កម្ពុជាផងដែរ៕

គម្រោងវីឡាមាស Grand Villa បើកលក់គម្រោងផ្ទះវីឡាទំនើបដំណាក់កាលទី១ ចំនួន២២ខ្នង

ដោយ ៖ គង់ ម៉ាលីន

ភ្នំពេញ ៖ គម្រោងវីឡាមាស Grand Villa បានបើកលក់គម្រោងទី១របស់ខ្លួនហើយ ដែលជាប្រភេទផ្ទះវីឡាទោលសរុបចំនួន២២ខ្នង ដែលត្រូវបានរចនាឡើងយ៉ាងទំនើប និងទាន់សម័យ មានទីតាំងនៅជិតតំបន់ហ្រ្គេនភ្នំពេញ។

គម្រោងទី១ របស់គម្រោងវីឡាមាស Grand Villa មានទីតាំងស្ថិតនៅភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ដែលមានចម្ងាយប្រហែល៩គីឡូម៉ែត្រពីវត្តភ្នំ និងប្រហែល១០នាទីពីផ្សារទំនើប Aeon Mall Sen Sok ។ គម្រោងនេះព័ទ្ធជុំវិញដោយអគារខុនដូ បុរីប្រណិតៗ អាគាររដ្ឋបាលក្រសួងរៀបចំដែនដីនគរូបនីយកម្ម និងសំណង់ថ្មី សាលារៀន មន្ទីរពេទ្យ ផ្សារទំនើប សំណង់ពាណិជ្ជកម្ម និងមជ្ឍមណ្ឌលកំសាន្តជាច្រើន ដែលជាតំបន់កំពុងអភិវឌ្ឍខ្លាំង មានផាសុកភាពល្អសម្រាប់ការរស់នៅ។

បន្ទាប់ពីធ្វើការសិក្សាពីតម្រូវការទីផ្សារផ្នែកអចលនទ្រព្យ និងលំនៅឋានយ៉ាងម៉ត់ចត់ជាមួយនឹងការរចនាប្លង់ស្ថាបត្យកម្មបែប Classic ប្រកបដោយភាពទាក់ទាញរួចមក គម្រោងទី១នេះ ត្រូវបានបើកការដ្ឋានសាងសង់ និងប្រកាសលក់ជាផ្លូវការនៅក្នុងខែមករា ឆ្នាំ២០២១នេះ។ ការសាងសង់នឹងប្រើរយៈពេល១៨ខែ ដែលគ្រោងនឹងបញ្ចប់ទាំងស្រុងនៅពាក់កណ្តាលឆ្នាំ២០២២។

គម្រោងលំនៅឋានបែបទំនើបនេះមានប្រភេទជាផ្ទះវីឡាទោល (King Villa) ចំនួន២២ខ្នង។ លក្ខណៈពិសេសរបស់គម្រោងនេះគឺក្រុមហ៊ុនអភិវឌ្ឍន៍បានគិតគូរយ៉ាងលម្អិតពីបរិវេនជុំវិញ ដោយបានស្ថាបនាប្រព័ន្ធផ្លូវ និងប្រព័ន្ធលូជុំវិញយ៉ាងធំទូលាយ ដែលបង្ការទឹកជំនន់ ការចតរថយន្ត និងការធ្វើចរាចរណ៍។

នៅជុំវិញគម្រោង មានប្រព័ន្ធផ្លូវខ្វាត់ខ្វែងទំហំចាប់ពី៨ម៉ែត្រ រហូតដល់១២ម៉ែត្រ និង៣០ម៉ែត្រ។ សំណង់ផ្ទះនីមួយៗត្រូវបានស្ថាបនាឡើងប្រកបដោយបច្ចេកទេសសាងសង់ច្បាស់លាស់ ដែលរាប់ចាប់ពីការស្ថាបនាគ្រឹះ រហូតដល់ប្រព័ន្ធទឹកភ្លើង និងប្រព័ន្ធការពារជម្រាបទឹកនៅក្នុងផ្ទះទាំងមូល។

ក្រៅពីការរចនានូវទីធ្លាមុខផ្ទះធំទូលាយ ហ៊ុមព័ទ្ធដោយសួនច្បារដ៏ស្រស់បំព្រង និងមានរបងព័ទ្ធជុំវិញ ដោយផ្ទះនីមួយៗមានរានហាលដ៏ធំទូលាយសម្រាប់ការប្រារព្ធពិធីផ្សេងៗ ខណៈក្រុមហ៊ុនសាងសង់បានប្រើប្រាស់សម្ភារៈសំណង់ដែលមានគុណភាពល្អ ដែលអាចធានាការប្រើប្រាស់រយៈពេលយូរ រួមទាំងទ្វារបន្ទប់គេង ទ្វារបន្ទប់ទឹក ទូរដាក់សម្ភារៈក្រោមចង្រ្កានបាយ និងប្រព័ន្ធការពារសត្វល្អិត។ ជាងនេះទៅទៀត ផ្ទះនីមួយៗត្រូវបានរចនាឡើងតាមរចនាបថវីឡាកូនកាត់បរទេសដ៏ទំនើប ដោយមានការដេគ័របន្ទប់គេង បំពាក់អំពូល LED អំពូលរាត្រី ទំហំបន្ទប់ធំខ្ពស់ស្រឡះបន្ទប់ទទួលភ្ញៀវ បន្ទប់ចង្រ្កានបាយ និងបន្ទប់ទឹកធំទូលាយដែលត្រូវខ្នាតហុងស៊ុយ។

សំណង់ផ្ទះវីឡាទោលទំនើបនេះ មានតម្លៃចាប់ពី ៣៥ ម៉ឺន រហូតដល់ ៤៥ ម៉ឺន ដែលអតិថិជនអាចជ្រើសរើសលក្ខខណ្ឌនៃការបង់ប្រាក់យ៉ាងងាយស្រួលជាច្រើន។ អតិថិជនអាចបង់ប្រាក់ ១០០ភាគរយ ដើម្បីទទួលបានការបញ្ចុះតម្លៃ ៨ភាគរយ ឫបង់ប្រាក់ ៥០ភាគរយ មុនដើម្បីទទួលបានការបញ្ចុះតម្លៃ៤ភាគរយ ឫ បង់ប្រាក់មុន ១០ភាគរយ ដើម្បីទទួលបានការបញ្ចុះតម្លៃ២ភាគរយ។ ជាពិសេសសម្រាប់ប្រូម៉ូសិន នាឱកាសពិធីបុណ្យចូលឆ្នាំចិនខាងមុខនេះ គម្រោងវីឡាមាស Grand Villa បញ្ចុះតម្លៃរហូតដល់ ៣០,០០០ ដុល្លារអាមេរិចភ្លាមៗ។

លក្ខណៈពិសេសរបស់គម្រោងរួមមាន៖

បន្ទប់គេង៤

បន្ទប់ទឹក ៥

បន្ទប់ទទួលភ្ញៀវធំទូលាយ

បន្ទប់ទទួលទានអាហារធំទូលាយ

បន្ទប់ចម្អិនអាហារ ១

រានហាលយ៉ាងធំទូលាយ

ចំណតរថយន្តពី ២ ទៅ ៥ គ្រឿង

សួនច្បារយ៉ាងស្រស់ស្អាត

ការបន្ថែមជូន៖ ប្លង់រឹងជូន ១០០% (ប័ណ្ណបំបែកក្បាលដី) ទូរចង្រ្កានបាយ ភ្ជាប់ប្រព័ន្ធអគ្គីសនី៣២ អំពែ ប្រព័ន្ធការពារសត្វល្អិត តម្លើងម៉ាស៊ីនត្រជាក់គ្រប់បន្ទប់គេង អំពូលរំយោលធំលំដាប់ផ្ទះវីឡាប្រណិត ប្រព័ន្ធអគ្គិសនី ម៉ាស៊ីនទឹកក្តៅ និងទឹកត្រជាក់។

លក្ខខណ្ឌគុណភាពជាសំណង់បុរី

ប្រើខ្សែភ្លើងលេខ1 របស់ប្រទេសសឹង្ហបុរី

ដែកគុណភាពលេខ1 VSD 390

បុកគ្រឹះរឹងមាំរហូតដល់ 350 N-450N

លាបថ្នាំការពារជម្រាបទឹកគុណភាពលេខ1ធានាគុណភាពថ្នាំពណ៌រយៈពេល5 ឆ្នាំ ដែលមានតែមួយនៅកម្ពុជាដែលធានាថា មិនប៉ោង មិនរបក មិនផ្ទាត់ មិនជក់ទឹក មិនផុយរបេះ មិនកាន់ស្លែ កាន់តែពិសេសជាងនេះទៀតនោះ អាចលាងទឹក ដុសសាប៊ូបាន និងមិនកាន់ធូលីដី

បង្អួចគុណភាពលេខ1 រឹងមាំសុវតិ្ថភាពខ្ពស់ (Galvanize Steel)

បង្កាន់ដៃដែកគុណភាពលេខ1 រឹងមាំល្អ (Galvanize Steel)

ដែកឡាំងកាំងគុណភាពលេខ1 រឹងមាំសុវតិ្ថភាពខ្ពស់ (Galvanize Steel)

អាងស្តុករៀបចំតាមប្រព័ន្ធស្តង់ដាមានអនាម័យខ្ពស់ (លាមក ទឹកកខ្វក់ ខ្លាញ់)

អំពូលភ្លើងគុណភាពខ្ពស់ LED ទាំងអស់ (ស៊ីភ្លើងតិច)

ការ៉ូបាត បន្ទប់ទឹកគុណភាពខ្ពស់ ប្រភេទការ៉ូស្ងួតអត់រអិល (សុវតិ្ថភាពដល់មនុស្សចាស់)

ការ៉ូជញ្ជាំងបន្ទប់ទឹកគុណភាពខ្នាតស្តង់ដា មាន៥ជាន់ងាយស្រួលសម្អាត

ការរចនាខាងក្នុងមានទម្រង់ដូចខុនដូ និងផ្ទះវិឡា

គ្រប់បន្ទប់គេងទាំងអស់មានភាពធំទូលាយ

សម្រាប់ព័ត៍មានបន្ថែម សូមទំនាក់ទំនងមក៖ 098 44 54 10 / 095 44 54 10

វីឡាមាសផ្តល់ជូនលោកអ្នកនូវគុណភាព ឧត្តមភាព និងសុភមង្គល៕

មន្ត្រីជាន់ខ្ពស់រាជរដ្ឋាភិបាលអះអាងថា ការនាំចេញរបស់កម្ពុជាទៅទីផ្សារអាមេរិកនៅតែមានកំណើនខ្ពស់

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុកម្ពុជា បានអះអាងថា ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកនឹងនៅតែអាចមានកំណើនខ្ពស់ បើទោះបីជាប្រព័ន្ធនុគ្រោះពន្ធ GSP ត្រូវបានផុតសុពលភាពក៏ដោយ។

រដ្ឋមន្ត្រីប្រតិភូអមនាយករដ្ឋមន្ត្រី លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានអះអាងនៅថ្ងៃទី២៧ ខែមករា ឆ្នាំ២០២១ថា នៅឆ្នាំ ២០២០កន្លងទៅនេះ ការនំាចេញរបស់កម្ពុជា ទៅកាន់ទីផ្សារសហរដ្ឋអាមេរិក នៅតែមានកំណើនគួរឲ្យកត់សម្គាល់ ទោះបីស្ថិតក្នុងកាលៈទេសៈនៃវិបត្តិជំងឺកូវីដ១៩ក្តី ហើយសហរដ្ឋអាមេរិក បានក្លាយជាទីផ្សារនាំចេញធំបំផុតរបស់កម្ពុជា ស្របពេលទីផ្សារសហភាពអឺរ៉ុប បានធ្លាក់មកនៅលេខរឿងទី២វិញ។

លោកបញ្ជាក់ថា ការអូសបន្លាយនៃការស្នើសុំបន្តអនុគ្រោះពន្ធទាំងស្រុងក្រោមប្រព័ន្ធ GSP សម្រាប់ផលិតផលការបូបធ្វើដំណើរទៅកាន់រដ្ឋាភិបាលសហរដ្ឋអាមេរិក ដោយសារតែការផ្លាស់ប្តូររដ្ឋបាលថ្មីរបស់សហរដ្ឋអាមេរិកដែលទើបធ្វើឡើងថ្មីៗនេះ។

លោកបន្តថា ចំពោះគម្រោងស្នើសុំបន្តសុពលភាពប្រព័ន្ធអនុគ្រោះពន្ធនេះ គឺមានភាគរយខ្ពស់ ក្នុងការទទួលបានសាជាថ្មីឡើងវិញ។ ប៉ុន្តែលោកថា ទោះបីមិនមានប្រព័ន្ធអនុគ្រោះពន្ធ GSP ក៏ការនាំចេញរបស់កម្ពុជា ទៅសហរដ្ឋអាមេរិក នៅតែមានកំណើនខ្ពស់ដែរ ព្រោះថា ការអនុគ្រោះនេះ គឺសម្រាប់តែផលិតផលកាបូបធ្វើដំណើរតែប៉ុណ្ណោះ ចំណែកផលិតផលផ្សេងទៀត នៅតែទទួលបានការអនុគ្រោះពន្ធក្រោមប្រព័ន្ធ MSN ដដែល។ ប្រសិនបើសហរដ្ឋអាមេរិក មិនបន្តផ្តល់ការអនុគ្រោះពន្ធទាំងស្រុងក្រោមប្រព័ន្ធ GSP សាជាថ្មីទេ គឺមិនមែនតែកម្ពុជាទេ ដែលមិនបាន គឺប្រទេសជាង ៩០ផ្សេងទៀត ក៏មិនបានដូចគ្នា ដូច្នេះវាមិនបារម្ភសម្រាប់ការប្រកួតប្រជែងនោះទេ ដែលមានន័យថា ផលិតផលត្រូវបង់ពន្ធទាំងអស់គ្នា។

របាយការណ៍របស់ក្រសួងពាណិជ្ជកម្មសហរដ្ឋអាមេរិក បានបង្ហាញថា ក្នុងរយៈពេល ១១ខែ ឆ្នាំ ២០២០ ការនាំចេញរបស់កម្ពុជា ទៅសហរដ្ឋអាមេរិក មានតម្លៃទឹកប្រាក់សរុបប្រមាណ ៦០៥៧លានដុល្លារ ដែលមានកំណើន ២២,២១ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩។ ចំណែកការនាំចេញរបស់សហរដ្ឋអាមេរិក ត្រឡប់មកកម្ពុជាវិញ មានតម្លៃទឹកប្រាក់ ៣១២លានដុល្លារ បានធ្លាក់ចុះ ៣៥,៦៧ភាគរយ បើធៀបនឹងរយៈពេលដូចគ្នាកាលពីឆ្នាំមុន។ សម្រាប់ផលិតផលដែលកម្ពុជាធ្វើការនាំទៅកាន់ទីផ្សារអាមេរិករួមមាន សម្លៀកបំពាក់កាត់ដេរ ស្បែកជើង កាបូបធ្វើដំណើរ គ្រឿងអេឡិចត្រូនិក កង់ ផលិតផលកសិកម្ម សូឡា និងគ្រឿងសង្ហារឹម៕

គម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែក្នុងក្រុងសៀមរាបសម្រេចបានជាង១៧.៥ភាគរយ

ដោយ ៖ រ៉ាណេត
សៀមរាប ៖ គម្រោងសាងសង់ និងស្ថាបនាហេដ្ឋារចនាសម្ព័ន្ធផ្លូវថ្នល់៣៨ខ្សែនៅទូទាំងក្រុងសៀមរាប ខេត្តសៀមរាប សម្រេចបាន១៧.៥ភាគរយហើយ ដោយអាចនឹងបញ្ចប់ទៅតាមផែនការដែលបានគ្រោងទុកនៅត្រឹមដំណាច់ឆ្នាំ២០២១ខាងមុខនេះ។

សម្ដេចពិជ័យសេនា ទៀ បាញ់ ប្រធានគណៈកម្មការអន្តរក្រសួង រួមជាមួយជានឹងរដ្ឋមន្ត្រីក្រសួងពាក់ព័ន្ធ នៅព្រឹកថ្ងៃទី២៨ ខែមករា ឆ្នាំ២០២១នេះ បានចុះពិនិត្យគម្រោងស្ថាបនាផ្លូវ ក្នុងខេត្តសៀមរាប ដើម្បីប្រសិទ្ធិភាព និងទទួលបានគុណភាពតាមស្តង់ដារបច្ចេកទេសត្រឹមត្រូវ ដោយមានការចូលរួមពីគ្រប់ផ្នែកពាក់ព័ន្ធនៃគណៈកម្មការអន្តរក្រសួង ដែលជាលទ្ធផលនៃការសាងសង់សម្រេចបានប្រមាណ១៧.៥ភាគរយហើយ។

ការចុះត្រួតពិនិត្យការស្ថាបនាផ្លូវនេះធ្វើឡើងក្នុងគោលបំណងដើម្បីពិនិត្យគុណភាពនៃការសាងសង់ ជំរុញឱ្យអង្គភាពសាងសង់ អនុវត្តតាមលក្ខណៈបច្ចេកទេស សៀវភៅបន្ទុកឱ្យបានត្រឹមត្រូវ និងស្តង់ដារ ដែលអាចទទួលយកបាន ពោលគឺធ្វើផ្លូវឱ្យមានគុណភាពរឹងមាំ អាចប្រើប្រាស់ជាប់បានយូរអង្វែង និងបញ្ចប់តាមផែនការគ្រោងទុក។

គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែក្នុងទីក្រុងសៀមរាប ខេត្តសៀមរាប ចំនួន៣៨ខ្សែនេះ មានប្រវែងសរុប១០៨,៧៤ គីឡូម៉ែត្រ គ្រោងប្រើប្រាស់ថវិកាជាតិសរុបប្រមាណជាង ១៤០ លានដុល្លារអាមេរិក និងថវិកាប្រមាណជាង៩លានដុល្លារអាមេរិកទៀត សម្រាប់ការងារចាំបាច់ ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោងសាងសង់ខ្សែផ្លូវទាំង៣៨នេះ ដោយប្រើប្រាស់រយៈពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១ ត្រូវបានសម្ពោធបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលថ្មីៗកន្លងទៅ នេះ។

គម្រោងនេះ អនុវត្តដោយអង្គភាពសាងសង់ចំនួន០៨រួមមាន៖ ១) កងវិស្វកម្មលេខ១៧៨ស្ពាន-ថ្នល់នៃ នាយកដ្ឋានវិស្វកម្ម ២) កងវិស្វកម្មសម្តេចតេជោ ខេត្តសៀមរាប ៣) កងវិស្វកម្មតេជោ ហ៊ុន សែន សៀមរាប ៤) អគ្គនាយកដ្ឋានសាធារណការ ៥) អគ្គនាយកដ្ឋានប្រព័ន្ធចម្រោះទឹកកខ្វក់ ៦) នាយកដ្ឋានគ្រឿងចក្រ និងស្ថាបនាផ្លូវ ៧) នាយកដ្ឋានជួសជុល និងថែទាំផ្លូវថ្នល់ និង ៨) មន្ទីរសាធារណការ និងដឹកជញ្ជូនខេត្តសៀមរាប។

គម្រោងនេះមានការរៀបចំលើគ្រប់ទិដ្ឋភាព ក្នុងនោះរួមមាន៖ ប្រព័ន្ធលូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវសម្រាប់ជនមានពិការភាព ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញា និងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាងចម្រោះទឹកកខ្វក់ និងការធ្វើសួននិងដាំដើមឈើ។

ក្រៅពីស្ថាបនាហេដ្ឋារចនាសម្ព័ន្ធផ្លូវ ៣៨ខ្សែហើយនោះ ក៏នៅមានការស្ដារ កែលម្អធ្វើឱ្យប្រសើរឡើងដងស្ទឹងសៀមរាបប្រវែងជាង ៨គីឡូម៉ែត្រ អនុវត្តដោយអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ដើម្បីលើកកម្ពស់សោភ័ណភាពបន្ថែមទៀត ឱ្យស័ក្កិសមជាទីក្រុងទេសចរណ៍ វប្បធម៌ ប្រវត្តិសាស្រ្ដ និងធម្មជាតិ ក៏ដូចជាដើម្បីជួយជំរុញដល់កំណើនសេដ្ឋកិច្ចជាតិផងដែរ៕

មន្រ្តីជាន់ខ្ពស់រដ្ឋាភិបានបង្ហាញសុទិដ្ឋិនិយមពីកំណើនសេដ្ឋកិច្ចកម្ពុជាល្អប្រសើរនៅឆ្នាំនេះ

ដោយ : ស៊ីវ ម៉េង

ភ្នំពេញៈ មន្រ្តីជាន់ខ្ពស់រដ្ឋាភិបាល បានបង្ហាញសុទិដ្ឋិនិយមអំពីកំនើនសេដ្ឋកិច្ចកម្ពុជានៅឆ្នាំនេះ ដែលអាចសម្រេចបានកំនើន៤ភាគរយ ឬអាចកើនឡើងខ្ពស់ជាងនេះ ដោយសារការងើបឡើងវិស័យសំខាន់ៗមួយចំនួន។

រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោកវង្សី វិស្សុតបានមានប្រសាសន៍ក្នុងវេទិកាសាធារណៈ កាលពីថ្ងៃម្សិលម៉ិញនេះថា នៅឆ្នាំ២០២១នេះកម្ពុជាមានឳកាសទីផ្សារធំ ខុសពីឆ្នាំមុន ដោយសារយើងបានចុះហត្ថលេខា លើកិច្ចព្រមព្រៀងពាណិជ្ជកម្មសេរីជាមួយចិនរួចហើយ ដែលជាការបើកទីផ្សារមួយធំណាស់ ដែលអ្នកវិនិយោគនឹងចូលមកច្រើន។

លោកបន្តថា “ជំងឺកូវីដ១៩យើងគ្រប់គ្រងបាន យើងមានស្ថេរភាពសង្គម ស្ថេរភាពសេដ្ឋកិច្ច យើងមានច្បាប់វិនិយោគថ្មី និងច្បាប់ភាពជាដៃគូរវាងវិស័យសាធារណៈ និងឯកជន និងការកែទម្រង់ដើម្បីបង្កើនភាពប្រកួតប្រជែង ដែលធ្វើឲ្យសេដ្ឋកិច្ចកម្ពុជាមានភាពល្អប្រសើរ”។ លោកបន្តថា “ជាមួយបរិការណ៍ខាងក្រៅ ដែលយើងមានកិច្ចព្រមព្រៀងពាណិជ្ជកម្មសេរីជាមួយចិន និងពេលខាងមុខយើងនឹងមានFTAជាមួយកូរ៉េ ដែលយើងនឹងមានផលល្អជាមួយកូរ៉េ មិនខុសពីចិនទេ”។

លោកវង្សី វិស្សុតបានបន្តថា កម្ពុជាយើងបានចុះកិច្ចព្រមព្រៀមRCEP ដែលរំពឹងប្រទេសទាំងអស់នឹងផ្តល់សច្ចាប័ណ្ណ ហើយយើងនឹងទទួលបន្តEBA ពីចក្រភពអង់គ្លេស និងទីផ្សារអាមេរិកងើបឡើងវិញលឿន ដោយសាររដ្ឋាភិបាលអាមេរិក បញ្ចេញកញ្ចប់ថវិកាសង្រ្គោះសេដ្ឋកិច្ចជិត២ទ្រីលានដុល្លារ។

លោកបន្តថា “ខ្ញុំមើលឃើញថាបរិការណ៍នេះ សេដ្ឋកិច្ចកម្ពុជាអាចកើនឡើងខ្ពស់ហើយបើយើងអាចចាក់វ៉ាក់សាំងបានលឿន គឺយើងអាចសម្រេចបានកំនើនសេដ្ឋកិច្ចខ្ពស់ជាង៤ភាគរយ៕

ប្រាសាក់ ផ្តល់សេវាទូទាត់វិក្កយបត្រថ្លៃប្រមូលសំរាមនិងសំណល់រឹង

ដោយ ស្រីនាង

ភ្នំពេញ៖ ប្រាសាក់ ដែលជាគ្រឹះស្ថានហិរញ្ញវត្ថុធំជាងគេនៅកម្ពុជា បានសហការជាមួយរដ្ឋាករស្វយ័តគ្រប់គ្រងសំរាមនិងសំណល់រឹងរាជធានីភ្នំពេញ ដើម្បីផ្តល់នូវសេវាទូទាត់វិក្កយបត្រថ្លៃប្រមូលសំរាមនិងសំណល់រឹងប្រកបដោយភាពងាយស្រួល ដែលជាផ្នែកមួយនៃការពង្រីកសេវារបស់ខ្លួនជូនដល់អតិថិជន បន្ថែមពីលើសេវាទូទាត់វិក្កយបត្រអគ្គិសនី វិក្កយបត្រទឹក វិក្កយបត្រសិក្សាសាលារៀនវ៉េស្ទឡាញន៍ និងសាលារៀនណត្សឡាញន៍។

អតិថិជនប្រាសាក់ទាំងអស់ នឹងអាចទូទាត់ថ្លៃសេវាប្រមូលសំរាមតាមរយៈ សេវាធនាគារចល័ត និងអេធីអឹមប្រាសាក់ បានយ៉ាងងាយស្រួល លឿនរហ័ស និងសុវត្ថិភាព ដោយចំណាយកម្រៃសេវាត្រឹមតែ 500 រៀល ឬ 0.12 ដុល្លារអាមេរិក ក្នុងមួយប្រតិបត្តិការ។

លោក សាយ សូនី នាយកប្រតិបត្តិនៃគ្រឹះស្ថានមីក្រូហិរញ្ញវត្ថុប្រាសាក់ បានមានប្រសាសន៍ថា «ប្រាសាក់ មានសេចក្តីរីករាយក្នុងការសហការជាមួយ រដ្ឋាករស្វយ័តគ្រប់គ្រងសំរាមនិងសំណល់រឹងរាជធានីភ្នំពេញ ក្នុងការនាំយកនូវសេវាទូទាត់វិក្កយបត្រថ្លៃប្រមូលសំរាមយ៉ាងងាយស្រួលជូនអតិថិជន។ ការបង់ថ្លៃប្រមូលសំរាម មានសារៈសំខាន់មិនអាចខ្វះបាន ដើម្បីចូលរួមធ្វើឱ្យរាជធានីភ្នំពេញស្អាត និងមានអនាម័យ។ ហើយជាមួយនឹងការផ្តួចផ្តើមដើម្បីផ្ដល់មធ្យោបាយងាយស្រួលនេះក្នុងការទូទាត់ថ្លៃសេវាប្រមូលសំរាមនេះ ប្រជាជនរស់នៅក្នុងរាជធានីភ្នំពេញ លែងមានកង្វល់ក្នុងចិត្តទៀតហើយ ដោយពួកគាត់អាចបំពេញកាតព្វកិច្ចនោះដោយគ្មានការខកខាន»។

លោក សូនី បានបន្ថែមទៀតថា «ជាមួយនឹងសេវាធនាគារចល័តប្រាសាក់ និងម៉ាស៊ីនអេធីអឹមជាច្រើនដែលមាននៅជិតអតិថិជនប្រាសាក់ ពួកគាត់អាចទូទាត់ថ្លៃប្រមូលសំរាមយ៉ាងលឿនរហ័ស ងាយស្រួល និងសុវត្ថិភាព ដោយអាចបង់ជារៀងរាល់ខែ ឬ ប្រចាំឆ្នាំតែម្ដង» ។

លោកបានបន្តទៀតថា «សូមអតិថិជនបើកគណនីសន្សំនៅប្រាសាក់នៅថ្ងៃនេះ ដើម្បីទទួលបានប័ណ្ណអេធីអឹមដ៏ស្រស់ស្អាតភ្លាមៗ និងរីករាយជាមួយការប្រើសេវាធនាគារចល័តប្រាសាក់ ដើម្បីទូទាត់វិក្កយបត្រនានាបានយ៉ាងងាយស្រួល» ។

សូមបញ្ជាក់ថា ប្រាសាក់ ជាគ្រឹះស្ថានហិរញ្ញវត្ថុមួយក្នុងចំណោមធនាគារធំៗទាំង 5 នៅកម្ពុជា។ ប្រាសាក់ ផ្ដល់សេវាហិរញ្ញវត្ថុច្រើនសម្បូរបែបជូនអតិថិជន ដូចជា៖ ទូទាត់វិក្កយបត្រថ្លៃប្រមូលសំរាមនិងសំណល់រឹង សេវាឥណទាន សេវាប្រាក់បញ្ញើសន្សំ សេវាទូទាត់វិក្កយបត្រទឹក ទូទាត់វិក្កយបត្រភ្លើង ផ្ទេរប្រាក់ឆ្លងធនាគារតាមប្រព័ន្ធបាគង និង រីធែលផេ (Retail Pay) ផ្ទេរប្រាក់រវាងគណនីទៅគណនីនៅក្នុងប្រាសាក់ ផ្ទេរប្រាក់តាមលេខសម្ងាត់ ឬ ដកប្រាក់ពីអេធីអឹមប្រាសាក់ទោះគ្មានប័ណ្ណអេធីអឹម ប្តូរប្រាក់ ទិញកាតទូរស័ព្ទ សេវាបញ្ជាក់សមតុល្យគណនី សេវាបើកប្រាក់បៀវត្ស សេវាទូទាត់រហ័ស ម៉ាស៊ីនអេធីអឹម ម៉ាស៊ីនដាក់ប្រាក់ ប្រាសាក់ម៉ូបាលប៊ែងឃីង (PRASAC Mobile Banking) ប្រាសាក់អ៊ីនធឺណែតប៊ែងឃីង (PRASAC Internet Banking) ម៉ាស៊ីនឆូតកាត សេវាខេមបូឌានស៊ែរស្វ៊ីច (CSS) ឬ សេវាដែលអាចឱ្យអតិថិជនធនាគារផ្សេងអាចដកប្រាក់តាមម៉ាស៊ីនអេធីអឹមប្រាសាក់បាន និងសេវាផ្សេងៗទៀត ជាមួយនឹងបណ្តាញការិយាល័យជិត 200 ទីតាំង ព្រមទាំងបុគ្គលិករង់ចាំបម្រើសេវាចំនួន 10,000 នាក់៕

1...2,0782,0792,080...3,260 Page 2,079 of 3,260