ដោយ ៖ រ៉ាណេត

ភ្នំពេញ ៖ គិតត្រឹមពាក់កណ្តាលខែធ្នូ ឆ្នាំ២០២០កន្លងទៅនេះ សម្រាប់តែនាំចេញផលិតផលកសិ-ឧស្សាហកម្មទៅកាន់ទីផ្សារអន្តរជាតិមានការកើនឡើងរហូតដល់ជិត២ពាន់លានដុល្លារ ខណៈដែលរាជរដ្ឋាភិបាលកំពុងរៀបចំយុទ្ធសាស្ត្របន្ថែមក្នុងការធ្វើពិពិធកម្មវិស័យមួយនេះឱ្យបានកាន់តែទូលាយ។

តាមរយៈរបាយការណ៍បឋមស្តីពីវឌ្ឍនភាពនៃផលិតកម្មដំណាំកសិ-ឧស្សាហកម្មធំៗនៅឆ្នាំ២០២០ ដែលទើបធ្វើការផ្សព្វផ្សាយបានបង្ហាញពីទិសដៅនៃការនាំចេញ ដោយបានលើកឡើងថាមានក្រុមហ៊ុននាំចេញចំនួន៤៧។ ទន្ទឹមនឹងនេះ ក៏បានចង្អុលបង្ហាញថាមាន ៤៨ ផ្សេងទៀត (ក្រុមហ៊ុន៣៣ សហគមន៍៣ និងម្ចាស់កសិដ្ឋាន១២) បានដាក់ពាក្យស្នើសុំនាំចេញផ្លែស្វាយទៅកាន់ទីផ្សារអន្តរជាតិ ខណៈដែលទំហំនៃការនាំចេញបានកើនរហូតដល់ជិត២ពាន់លានដុល្លារ។

នៅក្នុងរបាយការណ៍ដដែលបានបង្ហាញថា ផលិតផលកសិ-ឧស្សាហកម្មកម្ពុជាដែលបាននាំចេញទៅកាន់ទីផ្សារអន្តរជាតិសំខាន់ៗមានចំនួន៦ប្រភេទ ដែលក្នុងនោះរួមមានដូចជាផលិតផលនៃដំណាំស្វាយស្រស់ ដំឡូងមី គ្រាប់ស្វាយចន្ទី ដំណាំមៀនប៉ៃលិន(តាង៉ែន) ដំណាំម្រេច និងដំណាំចេកអំបូងលឿង។

សម្រាប់ការនាំចេញផលិតផលកសិ-ឧស្សាហកម្មទាំងអស់រួមមាន ដំណាំដំឡុងមី បរិមាណនាំចេញគិតត្រឹមថ្ងៃទី១៥ ខែធ្នូ ឆ្នាំ២០២០ មានចំនួន ៧,០៧៥ ,៤៩៤តោន ដោយតម្លៃប៉ាន់ស្មានសរុបមានចំនួនប្រមាណជា ១,០២៦,២៣២,០០០ដុល្លារ។ ដំណាំស្វាយចន្ទីមានចំនួន ២១៨,៨៨៤.២៩តោន តម្លៃប៉ាន់ស្មានសរុបមានចំនួនប្រមាណជា ២៨៨,១១១,៧០០ដុល្លារ ដែលក្នុងនោះសិប្បកម្មកែច្នៃមានចំនួន ៦ និងក្រុមហ៊ុននាំចេញមានចំនួន២៦។

ដោយឡែក ដំណាំស្វាយ បរិមាណនាំចេញស្វាយស្រស់ គិតត្រឹមថ្ងៃទី១៥ ខែធ្នូ ឆ្នាំ២០២០ មានចំនួន ៩៤៥,២៧៤ តោន តម្លៃប៉ាន់ស្មានសរុបមានចំនួនប្រមាណជា ៤៧៣,២០៧,៧០០ដុល្លារ ដោយក្នុងនោះមានក្រុមហ៊ុននាំចេញមានចំនួន ៤៧ក្រុមហ៊ុន និងអ្នកដាក់ពាក្យស្នើសុំចុះបញ្ជី សម្រាប់នាំចេញទៅទីផ្សារអន្តរជាតិ មានចំនួន ៤៨ (ក្រុមហ៊ុន ៣៣ សហគមន៍ ៣ និងម្ចាស់ចម្ការ ១២)។

ដំណាំចេកអំបូងលឿង បរិមាណនាំចេញគិតត្រឹមថ្ងៃទី១៥ ខែធ្នូ ឆ្នាំ២០២០ មានចំនួន ៣១៣,៤១០.៩៤តោន តម្លៃប៉ាន់ស្មានសរុបមានចំនួន ប្រមាណជា ៤៥១,១២៥,៧០០ដុល្លារ ដោយក្រុមហ៊ុនដែលបានចុះបញ្ជីសម្រាប់នាំចេញមានចំនួន ១៥ ក្នុងនោះ ក្រុមហ៊ុនចំនួន ១១ បាន និងកំពុងប្រិតិបត្កិការនាំចេញ។

ដំណាំមៀនប៉ៃលិន បរិមាណនាំចេញគិតត្រឹមថ្ងៃទី១៥ ខែធ្នូ ឆ្នាំ២០២០ មានចំនួន ១៧៤.៥២តោន តម្លៃប៉ាន់ស្មានសរុបមានចំនួនប្រមាណជា ៥៧,៧៦៣,១០០ដុល្លារ ដែលមានក្រុមហ៊ុននាំចេញមានចំនួន២ និងសហគមន៍កសិកម្មផលិតមៀនប៉ៃលិន មានចំនួន ១៥។ ដោយឡែកសម្រាប់ដំណាំម្រេច បរិមាណនាំចេញគិតត្រឹមថ្ងៃទី១៥ ខែធ្នូ ឆ្នាំ២០២០ មានចំនួន ៥,០០៥.៦៥តោន តម្លៃប៉ាន់ស្មានសរុបមានចំនួនប្រមាណជា ២៥,៤៩០,២០០ដុល្លារ ដោយក្រុមហ៊ុននាំចេញមានចំនួន ៣០ក្រុមហ៊ុន៕

ដោយគង់ សូរិយា

        ភ្នំពេញៈ ផ្លួវជាតិសំខាន់ៗចំនួន១០ខ្សែ បាននិងកំពុងស្ថាបនា និងកំពុងត្រៀមចាប់ផ្តើមសាងសង់ និងពង្រីកនាពេលខាងមុខនេះ ខណៈរដ្ឋាភិបាលបានចំណាយទុនចន្លោះពី៦០០ ទៅ៧០០លានដុល្លារលើការកសាងហេដ្ឋារចនាសម្ព័ន្ឋប្រចាំឆ្នាំ។

អ្នកនាំពាក្យក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទ កាលពីចុងសប្តាហ៍កន្លងមកថា បច្ចុប្បន្នរដ្ឋាភិបាលបាននិងកំពុងសិក្សា និងស្ថាបនាផ្លូវជាតិជាច្រើន ដូចជាផ្លូវជាតិលេខ២ ផ្លូវជាតិលេខ២២ ផ្លូវជាតិលេខ៣ ផ្លូវជាតិលេខ៣៣ ផ្លួវជាតិលេខ៤១ ផ្លូវជាតិលេខ៥ ផ្លូវជាតិលេខ៦ ចេញពីក្រុងសៀមរាបឆ្ពោះទៅកាន់ព្រលានយន្តហោះថ្មី និងកំណាត់ផ្លូវជាតិពីស្គន់ ខេត្តកំពង់ចាម ទៅកាន់ក្រុងកំពង់ចាម ដោយត្រូវពង្រីកជាពីរគន្លង។

លើសពីនេះ រដ្ឋាភិបាលនឹងជួសជុលឡើងវិញនូវផ្លូវជាតិលេខ៧ ផ្លូវជាតិលេខ៨ ក៏ស្ថិតក្នុងការសិក្សាដើម្បីពង្រីកផងដែរ និងផ្លូវជាតិលេខ១០ កំពុងសាងសង់ ពិសេសផ្លូវល្បឿនលឿនភ្នំពេញ ព្រះសីហនុ ដែលជាផ្លូវល្បឿនលឿនក្នុងប្រវត្តិសាស្រ្តកម្ពុជា ក៏បាននិងកំពុងស្ថាបនាយ៉ាងសកម្មផងដែរ។

លោកវ៉ាស៊ីម សូរិយាបានបន្តថា ក្នុងមួយឆ្នាំរដ្ឋាភិបាលចំណាយទឹកប្រាក់ចន្លោះពី៤០០ទៅ៥០០ដុល្លារ ក្នុងការស្ថាបនា ពង្រីកផ្លូវជាតិថ្មីៗ និងចំណាយថវិកាចន្លោះពី១០០ទៅ២០០លានដុល្លារក្នុងមួយឆ្នាំ ដើម្បីជួសជុលផ្លូវជាតិនានានៅទូទាំងប្រទេស។

លោកបន្តថា “ហេដ្ឋារចនាសម្ព័ន្ឋជាសសៃឈាមនៃសេដ្ឋកិច្ចជាតិ វាប្រៀបដូចជាក្បាលរថភ្លើង ដើម្បីរុញសេដ្ឋកិច្ចឲ្យមានភាពរីកចម្រើន ហេតុនេះទើបរដ្ឋាភិបាលត្រូវវិនិយោគច្រើនទាំងផ្លូវជាតិ ស្ពាន កំពង់ផែ ផែស្ងួតជាដើម”។លោកបន្តថា “ដើម្បីជម្រុញកំនើនសេដ្ឋកិច្ច ត្រូវតែវិនិយោគលើហេដ្ឋារចនាសម្ព័ន្ឋជាអាទិភាព”៕

ដោយគង់ សូរិយា
ភ្នំពេញៈ ក្នុងគោលដៅសម្រួល ដល់ការធ្វើដំណើររបស់ភ្ញៀវជាតិ និងអន្តរជាតិ ក្រុមហ៊ុនOCIC គ្រោងនឹងវិនិយោគសាងសង់ផ្លូវអាកាស ចេញពីព្រលានយន្តហោះអន្តរជាតិភ្នំពេញថ្មី មកកាន់រាជធានីភ្នំពេញ។

យោងតាមគេហទំព័រក្នុងស្រុកមួយ ដែលបានសម្ភាសន៍ផ្តាច់មុខជាមួយ អ្នកឧកញ៉ាពុង ឃាវសែប្រធានក្រុមហ៊ុនOCICកាលពីថ្មីៗនេះបានឲ្យដឹងថា ក្រុមហ៊ុនកំពុងសិក្សាគម្រោងផ្លូវល្បឿនលឿន ពីអាកាសយានដ្ឋានភ្នំពេញថ្មី នៅខេត្តកណ្តាល មកកាន់រាជធានីភ្នំពេញ ដោយដំណាក់កាលទី១ គឺគ្រោងនឹងចាប់ផ្ដើមសាងសង់នៅឆ្នាំ ២០២១ ខាងមុខនេះ។

អ្នកឧកញ៉ាបានបន្តថា “គម្រោងផ្លូវល្បឿនលឿននេះ គឺមិនមែនជាHighway ដូចផ្លូវទៅកំពង់សោមទេ តែសាងសង់ជាស្ពានអាកាសផុតពីដី មានប្រវែងសរុបប្រមាណ ២១,៥ គីឡូម៉ែត្រ និងមាន២ដំណាក់កាល”។

លោកបន្តថា ដំណាក់ទី១ ប្រវែង១០គីឡូម៉ែត្រ សាងសង់តាមផ្លូវសម្ដេចហ៊ុន សែន និងផ្លូវ២៧១ ហើយចាប់ពីផ្ដុំស្ពានអាកាសក្បាលថ្នល់ រហូតទៅដល់ផ្លូវជាតិលេខ២។ ដោយឡែកដំណាក់កាលទី២ គឺមានប្រវែងប្រមាណ១១គីឡូម៉ែត្រ ដោយសាងសង់ចេញពីផ្លូវជាតិលេខ២ ទៅកាន់អាកាសយានដ្ឋានភ្នំពេញថ្មីផ្ទាល់តែម្ដង”។

គម្រោងនេះ នឹងត្រូវចំណាយទុនប្រមាណ៤០០លានដុល្លារអាមេរិក ដែលដំណាក់កាលទី១ អាចនឹងចាប់ផ្ដើមនៅឆ្នាំ២០២១ ហើយគ្រោងនឹងបញ្ចប់ក្រោយព្រលានយន្តហោះ ពោលគឺក្រោយឆ្នាំ២០២៣បន្ដិចបន្ដួច។

អ្នកឧកញ៉ាបានបន្តថា ផ្លូវលើអាកាសថ្មីនេះ នឹងជួយសម្រួលការធ្វើដំណើរពីក្នុងក្រុង ទៅព្រលានថ្មីបានយ៉ាងឆាប់រហ័ស និងងាយស្រួល ដោយអ្នកបើកបរអាចបើកដល់ទៅល្បឿន១០០គីឡូម៉ែត្រក្នុងមួយម៉ោង។

កាលពីថ្មីៗនេះក្រសួងសាធារណការ និងដឹកជញ្ជូន មានផែនការចង់សិក្សាលទ្ធភាពសាងសង់ផ្លូវរថភ្លើងតភ្ជាប់ពីរាជធានីភ្នំពេញ ទៅកាន់ព្រលានយន្តហោះភ្នំពេញថ្មីនៅខេត្តកណ្តាលផងដែរ។

គម្រោងព្រលានយន្តហោះអន្តរជាតិភ្នំពេញថ្មី ជាគម្រោងខ្នាតយក្សដែលមានតម្លៃជាង១៥០០លានដុល្លារ ដោយស្ថាបនានៅលើផ្ទៃដី២៦០០ហិកតា ដែលអាចទទួលអ្នកដំណើរបាន១៥លាននាក់នៅពេលបញ្ចប់ដំណាក់កាលទី១ និងអាចទទួលអ្នកដំណើរបាន៣០លាននាក់នៅដំណាក់កាលទី២៕

ដោយស៊ីវ ម៉េង

        ភ្នំពេញៈ អ្នកជំនាញអចលនទ្រព្យបានអះអាងថា សកម្មភាពទិញលក់ និងការដើរ​ហើររបស់ប្រជាពលរដ្ឋបានចាប់ផ្តើមកើនឡើង ដែលជាសញ្ញាវិជ្ជមានសំរាប់វិស័យអចល​នទ្រព្យនៅឆ្នាំ២០២១ខាងមុខនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍៍ឲ្យដឹងតាមទូរស័ព្ទនាព្រឹកថ្ងៃទី២៨ ធ្នូនេះថា ចាប់ពីសប្តាហ៍មុនមក យើងឃើញប្រជាពលរដ្ឋបានចាប់ផ្តើមសកម្មភាព ដើរហើរ និងសកម្មភាពទិញលក់អចលនទ្រព្យបានកើនឡើងវិញបណ្តើរៗហើយ ខណៈតំបន់ជាយក្រុងមានសកម្មភាពផុសផុលជាងគេ។

លោកបន្តថា “អចលនទ្រព្យ ពិសេសដីធ្លីនឹងកើនឡើងរយៈពេល៥ឆ្នាំទៀត ដោយតម្លៃដីធ្លីក្នុងក្រុងនឹងកើនឡើង១គុណនឹង៥ នៅតំបន់ជាយក្រុងនឹងកើនឡើង១គុណនឹងបី និងតំបន់តាមបណ្តាខេត្តនានានឹងកើនឡើងមួយគុណនឹងបី”។លោកបន្តថា “និន្នាការនេះ គាំទ្រដោយសូចនាករមួយចំនួនដូចជា ការរើតំបន់ឧស្សាហកម្មចេញពីទីក្រុង ទៅកាន់តំបន់ជាយក្រុង ពិសេសនៅក្នុងខេត្តកណ្តាល និងកំពង់ស្ពឺ”។

លោកច្រឹក សុខនីមបានបន្តថា ដីនៅតាមបណ្តាខេត្ត និងតំបន់ជាយក្រុង នៅមានតម្លៃទាបនៅឡើយ ដែលមានឳកាសឡើងបន្តទៀត ព្រោះតម្លៃបច្ចុប្បន្នឡើងមិនទាន់ដល់កម្រិតនោះទេ។លោកបន្តថា សក្តានុពលនៅតាមបណ្តាខេត្ត ទាមទារឲ្យមានការវិនិយោគច្រើន ពិសេសវិនិយោគិនក្នុងស្រុក ដើម្បីធ្វើឲ្យតម្លៃសេដ្ឋកិច្ច និងសកម្មភាពសេដ្ឋកិច្ចនៅតាមបណ្តាខេត្តមានភាពរីកចម្រើនលឿន។

លោកបន្តថា បើធៀបតម្លៃអចលនទ្រព្យកម្ពុជា ជាមួយនឹងប្រាក់ចំណូលសំរាប់ប្រជាជនម្នាក់ក្នុងមួយឆ្នាំ គឺខុសគ្នាឆ្ងាយណាស់ ប៉ុន្តែអ្វីដែលគេវាស់ គឺសេដ្ឋកិច្ចកម្ពុជា ជាសេដ្ឋកិច្ចទីផ្សាសេរី ហេតុនេះយើងត្រូវធៀបកម្ពុជាជាមួយបណ្តាប្រទេសក្នុងតំបន់ ដូច្នេះការកើនឡើងតម្លៃអចលនទ្រព្យ គឺនៅមានកម្រិត បើធៀបតម្លៃជាមួយប្រទេសក្នុងតំបន់៕

ដោយៈ រ៉ាណេត

ភ្នំពេញៈ រាជរដ្ឋាភិបាលកម្ពុជាបានសម្រេចកាត់ឆ្វៀដី បឹងតាមោក(បឹងកប់ស្រូវ)ទំហំជាង១៩៦ហិកតា ដើម្បីធ្វើប្រទានកម្មជូនវិស័យឯកជន សម្រាប់អភិវឌ្ឍន៍ក្នុងគម្រោ​ងនានា ដែលជួយជំរុញឱ្យកំណើនសេដ្ឋកិច្ចក្នុងតំបន់មានការកើនឡើង។

ទីស្ដីការគណៈរដ្ឋមន្ត្រីកាលពីថ្ងៃទី២៤ ខែធ្នូ ឆ្នាំ២០២០កាលពីសប្ដាហ៍មុនបានជម្រាបជូនរដ្ឋមន្ត្រីក្រសួងសេដ្ឋកិច្ច ហិរញ្ញវត្ថុ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រីក្រសួងធនធានទឹកនិងឧតុនិយម និងរដ្ឋបាលរាជធានីភ្នំពេញ តាមរយៈលិខិតលេខ ១១០២.សជណ.មយ អំពីករណីសំណើសុំឆ្វៀលផ្ទៃដីទំហំ២៧៥ហិកតា ស្ថិតនៅសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ចេញពីអនុក្រឹត្យលេខ២០ អនក្រ.បក ចុះថ្ងៃទី៣ ខែកុម្ភៈ ឆ្នាំ២០១៦ ស្ដីពីការកំណត់ផ្ទៃបឹងតាមោក(បឹងកប់ស្រូវ)ទំហំ៣២៣៩,៧ហិកតា ស្ថិតនៅក្នុងរាជធានីភ្នំពេញ ជាសម្បត្តិសាធារណៈរបស់រដ្ឋ ដើម្បីគ្រប់គ្រងជាកម្មសិទ្ធិ។

យោងតាមលិខិតដែលចុះហត្ថលេខា ដោយលោក កែន សត្ថា  រដ្ឋលេខាធិការទីស្តីការគណៈរដ្ឋមន្ត្រី បានសរសេរដោយយោងលិខិតលេខ០៦១/២០ លស.គ ចុះថ្ងៃទី២៦ ខែវិច្ឆិកា ឆ្នាំ២០២០ របស់រដ្ឋបាលរាជធានីភ្នំពេញ និងលិខិតលេខ៦៥៦ ខន/០២០ សជណ ចុះថ្ងៃទី១៧ ខែធ្នូ ឆ្នាំ២០២០ របស់ខុទ្ទកាល័យសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងយោងចំណារដ៏ខ្ពង់ខ្ពស់បំផុតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចុះថ្ងៃទី១៦ ខែធ្នូ ឆ្នាំ២០២០។

ករណីខាងលើនេះ ទីស្ដីការគណៈរដ្ឋមន្ត្រីសូមជម្រាបជូនថា រាជរដ្ឋាភិបាលបានសម្រេចយល់ព្រមអនុញ្ញាត ឱ្យឆ្វៀលផ្ទៃដីទំហំ១៩៦,៥៦៥៩ហិកតា(មួយរយកៅសិបប្រាំមួយហិកតា ហាសិបប្រាំមួយអា ហាសិបប្រាំបួនសង់ទីអា) ស្ថិតនៅសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ដូចមានក្នុងគំនូសប្លង់បង្ហាញទីតាំង និងនិយាមកាភ្ជាប់មកជាមួយចេញពីអនុក្រឹត្យលេខ២០ អនក្រ,បក ចុះថ្ងៃទី៣ ខែកុម្ភៈ ឆ្នាំ២០១៦ ស្ដីពីការកំណត់ផ្ទៃបឹងតាមោក(បឹងកប់ស្រូវ) ទំហំ៣២៣៩,៧ហិកតា ស្ថិតក្នុងរាជធានីភ្នំពេញជាសម្បត្តិសាធារណៈរបស់រដ្ឋ ដើម្បីធ្វើប្រទានកម្មជូនលោកស្រី អ៊ុយ បូវី និងលោកស្រី គង់ សុធី ដោយពន្ធជាបន្ទុករបស់រដ្ឋ និងលើកលែងសេវាអន្តរក្រសួង សេវាសុរិយោដីនានា៕