លោកហ៊ុន ម៉ានីៈ ការអភិវឌ្ឍផ្លូវ៣៨ខ្សែនៅក្រុងសៀមរាបនឹងជួយស្តារសេដ្ឋកិច្ចពលរដ្ឋ និងជាការត្រៀមទទួលភ្ញៀវទេសចរ

ដោយ ៖ ស៊ីវ ម៉េង

សៀមរាប ៖ លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការទី៧នៃរដ្ឋសភាបានថ្លែងថា ការអភិវឌ្ឍផ្លូវទាំង៣៨ខ្សែ នៅក្រុងសៀមរាប គឺជាការជួយស្តារសេដ្ឋកិច្ចរបស់ប្រជាពលរដ្ឋក្នុងខេត្ត និងជាការត្រៀមទទួលភ្ញៀវទេសចរមកកាន់ខេត្តសៀមរាបក្រោយវិបត្តិកូវីដ១៩។

លោក ហ៊ុន ម៉ានីបានមានប្រសាសន៍ដូច្នេះ ក្នុងឱកាសដែលលោករួមជាមួយលោក ទៀ សីហា អភិបាលខេត្តសៀមរាប កាលពីចុងសប្តាហ៍មុន ដោយលោកបានមានប្រសាសន៍ថា ទិដ្ឋភាពនៃការសាង់សង់ផ្លូវនេះបានសបញ្ជាក់ថា ទោះបីជាពិភពលោកកំពុងជួបវិបត្តិនៃការរីករាលដាលជំងឺកូវីដ១៩ យ៉ាងណាក៏ដោយ ក៏ការណ៍នេះមិនបានធ្វើឲ្យមានការប៉ះពាល់ធ្ងន់ធ្ងរ ដល់ការអភិវឌ្ឍប្រទេសកម្ពុជាឡើយ។ ផ្ទុយទៅវិញ ការអភិវឌ្ឍនេះគឺជាការជួយស្តារសេដ្ឋកិច្ច របស់ប្រជាពលរដ្ឋនៅខេត្តសៀមរាប និងជាការត្រៀមទទួលទេសចរមកកាន់ខេត្តសៀមរាបក្រោយវិបត្តិកូវីដ១៩។

ផ្លូវទាំង៣៨ខ្សែនេះមានប្រវែងសរុប ១០៨.៧៤គីឡូម៉ែត្រ ដោយគ្រោងប្រើប្រាស់ថវិកាជាតិសរុបប្រមាណ១៤០លានដុល្លារអាមេរិក និងថវិកាជាង៩លានដុល្លារអាមេរិកទៀតសម្រាប់ការងារចាំបាច់ ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោងសាងសង់ខ្សែផ្លូវទាំង៣៨នេះ។

តាមរយៈគម្រោងសាងសង់ផ្លូវទាំង៣៨ខ្សែនេះ នឹងធ្វើឲ្យទីក្រុងសៀមរាបប្រែក្លាយរូបរាងជាទីក្រុងទំនើប និងទេសចរណ៍ដ៏មានសក្តានុពល ដែលត្រូវបានរាជរដ្ឋាភិបាលកម្ពុជាកំណត់ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរដល់ការការពារ និងកែលម្អបរិស្ថាន ផាសុកភាពរបស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។

លោកហ៊ុន ម៉ានីបានមានប្រសាសន៍ថា ក្រោយពីបញ្ចប់ការស្ថាបនាទៅ គម្រោងនេះនឹងដើរតួជាហេដ្ឋារចនាសម្ព័ន្ធប្រទាក់ក្រឡាគ្នា តភ្ជាប់ទីប្រជុំជនទៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា សំដៅកាត់បន្ថយការកកស្ទះចរាចរណ៍ក្នុងទីក្រុង ជំរុញកំណើនដឹកជញ្ជូន ទាក់ទាញវិនិយោគិន ធុរជន និងភ្ញៀវទេសចរជាតិ-អន្តរជាតិ ដែលជាការរួមចំណែកក្នុងការជំរុញកំណើនសេដ្ឋកិច្ចជាតិឱ្យកាន់តែរីកចម្រើននៅក្រោយវិបត្តិនៃជំងឺកូវីដ-១៩។

គម្រោងស្ថាបនាហេដ្ឋារចនាសម្ព័ន្ធផ្លូវទំាង ៣៨ខ្សែ ក្នុងក្រុងសៀមរាបនេះបានធ្វើឡើង បន្ទាប់ពីប្រមុខរាជរដ្ឋាភិបាល សម្តេចតេជោហ៊ុន សែន នាយករដ្ឋមន្រ្តីនៃកម្ពុជា បានប្រកាសបញ្ចេញកញ្ចប់ថវិកាប្រមាណ១៥០ លានដុល្លារអាមេរិក កាលពីថ្ងៃទី៤ ខែកញ្ញា ឆ្នាំ២០២០ កន្លងទៅ៕

ដំណឹងល្អ ៖ រដ្ឋាភិបាលបានជំរុញ និងចុះបញ្ជីផលិតផលចំនួន១២ជាទំនិញសំគាល់ភូមិសាស្រ្ត

ដោយ ៖ គង់ សូរិយា

ភ្នំពេញៈ ក្នុងគោលដៅលើកកំពស់អត្តសញ្ញាណផលិតផលខ្មែរ និងជម្រុញទីផ្សារដើម្បីនាំចេញក្រសួងពាណិជ្ជកម្មបានរៀបចំ និងចុះបញ្ជីរផលិតផលល្បីៗកម្ពុជាចំនួន១២មុខ ដើម្បីចុះបញ្ជីរ ដែលមានការទទួលស្គាល់ជាអន្តរជាតិ។

រដ្ឋមន្រ្តីក្រសួងពាណិជ្ជកម្មលោកប៉ាន សូរស័ក្តិបានមានប្រសាសន៍ក្នុងពិធីសំណេះសំណាលជាមួយ មន្រ្តីពាណិជ្ជកម្មនៅខេត្តឧត្តរមានជ័យនៅពីថ្ងៃទី២៥ មករានេះថា ក្រសួងពាណិជ្ជកម្មបានរៀបចំការចុះបញ្ជីម៉ាកវិញ្ញាតកម្ម “MALYS ANGKOR” ម៉ាកសម្គាល់ភូមិសាស្ត្រ “ម្រេចកំពត” បានចូលជាសមាជិកនៃច្បាប់ទីក្រុងហ្សឺណែវ នៃកិច្ចព្រមព្រៀងលីស្បោន ស្តីពីម៉ាកសម្គាល់ភូមិសាស្រ្តទំនិញ និងបានសម្របសម្រួលចុះបញ្ជីសម្គាល់ភូមិសាស្ត្រទំនិញ “ទឹកឃ្មុំព្រៃមណ្ឌលគិរី” “អំបិលនិងផ្កាអំបិលកំពត” ក្រូចពោធិ៍សាត់-ខេត្តពោធិ៍សាត់”។

ជំរុញការប្រើប្រាស់រូបសញ្ញាជាតិ នៃម៉ាកសម្គាល់ភូមិសាស្រ្តទំនិញ “ម្រេចកំពត” “ស្ករត្នោតកំពង់ស្ពឺ” ក្រូចថ្លុងកោះទ្រង់” និងម៉ាកសមូហភាព “គុយទាវភ្នំពេញ” ព្រមទាំងរៀបចំចុះបញ្ជីម៉ាកសមូហភាព “អំបុកកំពង់ធំ” “ពងទាកូនខេត្តតាកែវ” “នំបញ្ចុកខេត្តសៀមរាប” “ចម្លាក់ប្រាក់-ស្ពាន់ ខេត្តកណ្តាល” “ស្មូនឆ្នាំងដី” កំពង់ឆ្នាំង។

លោកបន្តថា ក្រសួងពាណិជ្ជកម្មសម្រេចបានលទ្ធផលល្អប្រសើរ ទាំងការងារផ្តល់សេវាសាធារណៈ និងការងារពាណិជ្ជកម្មក្រៅប្រទេស និងរកទីផ្សារ។ ជាក់ស្ដែងការងារផ្តល់សេវាសាធារណៈ ក្រសួងបានអនុវត្តការចេញវិញ្ញាបនបត្រ ប្រភពដើមទំនិញជាអេឡិចត្រូនិក សម្រាប់ការធ្វើពាណិជ្ជកម្មក្នុងតំបន់អាស៊ាន និងការផ្តល់អាជ្ញាបណ្ណនាំចេញ នាំចូលវិញ្ញាបនបត្រត្បូងពេជ្រមិនទាន់កែច្នៃ(គឹមប័រលីប្រូសេស) ក៏ដូចជាបានចូលរួមចុះបញ្ជីពាណិជ្ជកម្មតាមថ្នាលបច្ចេកវិទ្យារួម(CAM DX) ដែលអាចភ្ជាប់ព័ត៌មានជាមួយអគ្គនាយកដ្ឋានពន្ធដារ ក្រសួងការងារ និងបណ្តុះបណ្តាលវិជ្ជាជីវៈ ដោយទទួលបានការចុះបញ្ជីតែក្នុងរយៈពេល៣ថ្ងៃប៉ុណ្ណោះ។

ចំណែកឯការងារពាណិជ្ជកម្មក្រៅប្រទេស និងរកទីផ្សារវិញ ក្រសួងបានចុះកិច្ចព្រមព្រៀងពាណិជ្ជកម្មសេរីកម្ពុជា-ចិន នៅខែតុលា ឆ្នាំ២០២០ និងកិច្ចព្រមព្រៀងភាពជាដៃគូគ្រប់ជ្រុងជ្រោយតំបន់ (RCEP) នាថ្ងៃទី១៥ ខែវិច្ឆិកា ឆ្នាំ២០២០។ ជាមួយនោះដែរ ការចរចាកិច្ចព្រមព្រៀងពាណិជ្ជកម្មសេរី ជាមួយសាធារណរដ្ឋកូរ៉េ ក៏បានដំណើរការយ៉ាងរលូនផងដែរ។

ជាមួយគ្នានេះ លោកប៉ាន សូរស័ក្តិក៏បាន កោតសរសើរចំពោះសមិទ្ធផល និងស្នាដៃជាច្រើនដែលមន្ទីរពាណិជ្ជកម្ម និងសាខា ក.ប.ប. ខេត្តឧត្តរមានជ័យ សម្រេចបានកន្លងមកគួរជាទីមោទនៈ ដែលឆ្លុះបញ្ចាំងឱ្យឃើញពីការបំពេញភារកិច្ច ប្រកបដោយស្មារតីទទួលខុសត្រូវ ជាពិសេសកិច្ចសហការល្អជាមួយរដ្ឋបាលខេត្ត និងអង្គភាពមន្ទីរពាក់ព័ន្ធក្នុងខេត្ត។

លោកបន្តថា “ក្រោមការដឹកនាំដ៏ឈ្លាសវៃ និងប៉ិនប្រសព្វរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឱ្យសេដ្ឋកិច្ចកម្ពុជាមានកំណើនជាមធ្យម៧ភាគរយជារៀងរាល់ឆ្នាំ ក្នុងនោះវិស័យពាណិជ្ជកម្មបានចូលរួមចំណែកយ៉ាងសំខាន់ដល់ការរក្សានូវកំណើនសេដ្ឋកិច្ចនេះ”៕

លោកឧកញ៉ាបណ្ឌិតគីម ហ៊ាង៖ យុវជនមិនទាន់រៀបការគួរទិញដីឱ្យបានពីរឡូត៍

ដោយ ៖ លក្ខិណា

ភ្នំពេញៈ លោកឧកញ៉ាបណ្ឌិត គីម ហ៊ាង បានផ្ដល់ជាយោបល់ដល់ពលរដ្ឋ ដែលមានជីវភាពសមរម្យ ជាពិសេសយុវជនដែលមិនទាន់រៀបការ គួរទិញដីឱ្យបានយ៉ាងហោចណាស់ពីរឡូត៍ទុកសម្រាប់នៅពេលអនាគត។

លោកបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹតតាមទូរស័ព្ទកាលពីចុងសប្តាហ៍មុនថា យុវជនដែលមិនទាន់រៀបការ គួរតែទិញដីទុកឱ្យបានពីរឡូត៍ ព្រោះថាដីអត់កើនទេ តែមនុស្សកើន ហើយតម្លៃដីនឹងឡើងជាប្រចាំពីរមួយឆ្នាំទៅមួយឆ្នាំ ។ លោកបន្តថា នៅពេលយុវជនទិញដីបានពីរឡូត៍ នៅពេលអនាគត ពេលពួកគេត្រូវការរៀបការប្រពន្ធ គេអាចលក់មួយឡូត៍ ដើម្បីបានលុយរៀបការ ហើយទុកមួយឡូត៍ទៀតសម្រាប់សង់ផ្ទះពេលរៀបការរួច។

លោកបន្តថា “ខ្ញុំចេះទិញដីឡូត៍តាំងពី១៦ឆ្នាំមកម្ល៉េះ ហើយសកម្មភាពលក់ដីឡូត៍ក៏មិនទាន់មានសកម្មភាពផុសផុសដូចពេលនេះដែរ។ សកម្មភាពអាជីវកម្មដីឡូត៍ ផុសផុលបែបនេះ គឺជាអ្វីដែលប្រទេសគេរីកចម្រើនបានធ្វើតាំងពីម្ភៃ សាមសិបឆ្នាំមុនម្ល៉េះ”។ លោកបន្តថា “អ្វីដែលគេកំពុងតែមាន គឺយើងនឹងមាននៅពេលក្រោយដូចគ្នា ដោយសារតែរីកចម្រើនមុនយើង ដូច្នេះគេត្រូវដើរមុនយើង១០-២០ឆ្នាំ”។

លោកបណ្ឌិតបានបន្ថែមថា ការអភិវឌ្ឍដីធ្លីមានផ្នែកជាច្រើនដែលដើរទន្ទឹមគ្នា ក្នុងនោះមានដីឡូត៍ ការសាងសង់បុរី និងការសាងសង់ខុនដូជាដើម ។ បច្ចុប្បន្ននេះ តម្រូវការលំនៅឋាន និងដីសម្រាប់សាងសង់លំនៅឋានកំពុងតែមានកំណើនខ្ពស់។ ជាក់ស្ដែងនៅភ្នំពេញ មានប្រជាពលរដ្ឋជាច្រើនពុំទាន់មានលំនៅឋាន សម្រាប់ស្នាក់នៅផ្ទាល់ខ្លួននៅឡើយ ដោយមួយចំនួនធំ គឺកំពុងជួលផ្ទះស្នាក់នៅ។ ដូច្នេះដើម្បីបំពេញនូវចំណុចខ្វះខាតទាំងនេះ គឺត្រូវការពង្រីកដីសម្រាប់រាជធានី និងសង់ផ្ទះសម្រាប់ស្នាក់នៅ។

កន្លងមកបញ្ហាដីឡូត៍ ត្រូវបានរងការរិះគន់ពីអ្នកជំនាញមួយចំនួនផងដែរ ដោយសារសកម្មភាពពុះដីឡូត៍របស់អ្នកអភិវឌ្ឍន៍ដីឡូត៍មួយចំនួន មិនបានគោរពតាមស្តង់ដាត្រឹមត្រូវ ដូចជា មិនមានបណ្តាញហេដ្ឋារចនាសម្ព័ន្ឋច្បាស់លាស់ ទំហំដដីមិនមានស្តង់ដា ដែលអាចសាងសង់លំនៅដ្ឋានសមរម្យបានជាដើម៕

ពាណិជ្ជកម្មកម្ពុជា-អាមេរិកសម្រេចបានទំហំទឹកប្រាក់ជាង២០ពាន់លានដុល្លារក្នុងរយៈពេល៦ឆ្នាំចុងក្រោយ

ដោយ៖ ប៊ី

ភ្នំពេញ៖ ទំហំពាណិជ្ជកម្មទ្វេភាគីកម្ពុជា និងអាមេរិក សម្រេចបានសរុបប្រមាណ២០,៩២ពាន់លានដុល្លារអាមេរិក ក្នុងរយៈពេល៦ឆ្នាំចុងក្រោយ គិតចាប់តាំងពីឆ្នាំ២០១៥ រហូតដល់ឆ្នាំ២០២០។ នេះបើយោងតាមទិន្ន័យ របស់ក្រសួងពាណិជ្ជកម្មកម្ពុជា។

យោងតាមទិន្ន័យរបស់ក្រសួងពាណិជ្ជកម្មកម្ពុជា ដែលចេញផ្សាយកាលថ្មីៗនេះបានឱ្យដឹងថា ទំនាក់ទំនងពាណិជ្ជកម្ម កម្ពុជា-អាមេរិក មានកំណើនគួរឲ្យកត់សម្គាល់ក្នុងរយៈពេល៦ឆ្នាំចុងក្រោយនេះ។

ឆ្នាំ២០១៥ ទំហំពាណិជ្ជកម្ម កម្ពុជា-អាមេរិក មានទឹកប្រាក់២ ៣៦៥លានដុល្លារ ក្នុងនោះ កម្ពុជានាំចេញបាន២,១៣៦លានដុល្លារអាមេរិក ខណៈអាមេរិកនាំចូលមកកម្ពុជាវិញមានតែ២២៨លានដុល្លារប៉ុណ្ណោះ។

ឆ្នាំ២០១៦ ទំហំពាណិជ្ជកម្ម កម្ពុជា-អាមេរិក ហាក់ថមថយបន្តិច មានទឹកប្រាក់២ ៣២០លានដុល្លារ ប៉ុន្តែការនាំចេញរបស់កម្ពុជាទៅអាមេរិក នៅតែបន្តកើនឡើង ដោយនាំចេញបាន២ ១៤៧លានដុល្លារអាមេរិក ខណៈអាមេរិកនាំចូលមកកម្ពុជាវិញ មានតែ១៧៣លានដុល្លារប៉ុណ្ណោះ។

ឆ្នាំ២០១៧ ទំហំពាណិជ្ជកម្ម កម្ពុជា-អាមេរិក មានទឹកប្រាក់២,៦០៥លានដុល្លារ ក្នុងនោះ កម្ពុជានាំចេញ បាន២ ៤០៨លានដុល្លារអាមេរិក ខណៈអាមេរិកនាំចូលមកកម្ពុជាវិញ មានតែ១៩៦លានដុល្លារប៉ុណ្ណោះ។

ឆ្នាំ២០១៨ ទំហំពាណិជ្ជកម្ម កម្ពុជា-អាមេរិក មានទឹកប្រាក់៣ ៤៣៨លានដុល្លារ ក្នុងនោះកម្ពុជានាំចេញបាន៣ ០៥១លានដុល្លារអាមេរិក ខណៈអាមេរិក នាំចូលមកកម្ពុជាវិញមានតែ៣៨៦លានដុល្លារប៉ុណ្ណោះ។

ឆ្នាំ២០១៩ ទំហំពាណិជ្ជកម្ម កម្ពុជា-អាមេរិក មានទឹកប្រាក់ជាង៤ ៧១៣លានដុល្លារ ក្នុងនោះកម្ពុជានាំចេញ បាន៤ ៤០២លានដុល្លារអាមេរិក ខណៈអាមេរិក នាំចូលមកកម្ពុជាវិញមានតែជាង៣១១លានដុល្លារប៉ុណ្ណោះ។

សម្រាប់រយៈពេញមួយឆ្នាំ២០២០ ទំហំពាណិជ្ជកម្ម កម្ពុជា-អាមេរិក សម្រេចបានសរុបចំនួនជាង៥ ៥០៩លានដុល្លារអាមេរិក កើនឡើង១៦.៨៩ភាគរយ បើប្រៀបធៀបនឹងឆ្នាំ២០១៩ មានចំនួនជាង៤ ៧១៣លានដុល្លារអាមេរិក។

ផលិតផលសំខាន់ៗ ដែលកម្ពុជា នាំចេញទៅអាមេរិក មានសម្លៀកបំពាក់ សម្ភារសម្រាប់ការធ្វើដំណើរ (វ៉ាលី កាបូប) កង់ និងសម្ភារប្រើប្រាស់មួយចំនួនទៀត។ ចំណែកកម្ពុជា នាំចូលពីអាមេរិកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនីអេឡិចត្រូនិក និងសម្ភារប្រើប្រាស់មួយចំនួនទៀត៕

អ្នកជំនាញ៖ គម្រោងអភិវឌ្ឍក្រុងរណបផ្តល់អត្ថប្រយោជន៍យ៉ាងច្រើនដល់ប្រជាជន

ដោយ៖ ម៉ាណេត

ភ្នំពេញ៖ អ្នកជំនាញអះអាងថា ការអភិវឌ្ឍទីក្រុងរណបគឺរឿងចាំបាច់មួយដើម្បីឆ្លើយតបនឹងតម្រូវការ និងកំណើនប្រជាជន ខណៈអ្នករកទទួលទានក្នុងវិស័យអចលនទ្រព្យអាចទាញយកប្រយោជន៍បានច្រើនពីគម្រោងអភិវឌ្ឍន៍ក្រុងរណបនានា។

លោកឌឹត ចណ្ណា នាយកប្រតិបត្តិក្រុមហ៊ុនអចលនទ្រព្យ ឡាក់គី រៀលធី បានប្រាប់គេហទំព័រ Propertyarea.asia កាលចុងសប្តាហ៍កន្លងមកនេះថា ការអភិវឌ្ឍទីក្រុងរណបគឺជាការអភិវឌ្ឍមួយចាំបាច់ ដោយសារនៅពេលមួយមានការអភិវឌ្ឍឆ្អែត ហើយចំនួនប្រជាជនកើនឡើងច្រើននៅកណ្តាលក្រុង វាទាមទារឱ្យមានការអភិវឌ្ឍន៍បែបនេះ ដើម្បីឆ្លើយតបនឹងតម្រូវការរបស់ប្រជាជន។

លោកបានបន្តថា ចំនួនប្រជាជនកើនឡើងច្រើន ធ្វើឱ្យតំបន់នៅកណ្តាលក្រុងមានភាពចង្អៀត ដូច្នេះការវិនិយោគលើគម្រោងអភិវឌ្ឍន៍ទីក្រុងរណបគឺត្រូវការជាចាំបាច់ ហើយវាក៏ជាឱកាសសម្រាប់អ្នកវិនិយោគទីក្រុងរណបដើម្បីរកប្រាក់ចំណេញ។

លោកបញ្ជាក់ថា “តំបន់ណាមានការអភិវឌ្ឍ ប្រជាពលរដ្ឋទទួលបានអត្ថប្រយោជន៍ ដូចជាការជួយដល់អាជីវកម្មរបស់ពួកគាត់បង្កើតកំលាំងការងារ និងការរៀបហេដ្ឋរចនាសម្ព័ន្ធបានល្អ ហើយមួយវិញទៀតធ្វើឱ្យដីតំបន់នោះ មានការឡើងថ្លៃ”។

លោកសាស្ត្រាចារ្យទួស សាភឿនអគ្គលេខាធិការរងនៃគណៈស្ថាបត្យករកម្ពុជាបានថ្លែងថា ភ្នំពេញគឺជាបណ្តុំនៃសេដ្ឋកិច្ច ហើយជាចំណុចកណ្តាលមួយ ដែលមានការវិនិយោគ ការរស់នៅ និងការធ្វើពាណិជ្ជកម្មច្រើន ដូច្នេះនឹងមានតម្រូវការទីផ្សារខ្ពស់។

លោកបានថ្លែងថា “យើងគិតថា ទីក្រុងភ្នំពេញមានទំហំធំ ប៉ុន្តែសម្រាប់ខ្ញុំគិតថា វាមិនធំនោះទេ។ ពីមួយថ្ងៃទៅមួយថ្ងៃ ឥទ្ធិពលនៃទីក្រុងភ្នំពេញ បានរីកសាយទៅតំបន់ជិតខាង ដែលនឹងធ្វើឱ្យទីក្រុងភ្នំពេញ ត្រូវការពង្រីកខ្លួនបន្ថែម ដើម្បីឆ្លើយតបនឹងតម្រូវការទាំងអស់ទាំងនេះ”។ លោកលើកបែបនេះ សំដៅកាន់តម្រូវការទីផ្សារ កំណើនប្រជាជន និងកំណើនសេដ្ឋកិច្ច។

លោកបានថ្លែងទៀតថា ក្នុងរយៈពេលចុងក្រោយនេះ ការសាងសង់អាគារខ្ពស់ៗ បានកើតឡើងច្រើន ហើយទោះបីជាមានវិបត្តិកូវីដ១៩ ការសាងសង់អាគារខ្ពស់ៗ នៅតែកើតឡើង ប៉ុន្តែមិនច្រើនដូចមុនសម័យកូវីដនោះទេ៕

ក្រុងព្រះសីហនុនឹងសាងសង់ផ្លូវមួយខ្សែទៀតតភ្ជាប់ឆ្នេរសុខា និងឆ្នេរអូរឈើទាល

ដោយ ៖ រ៉ាណេត

ភ្នំពេញ ៖ បន្ថែមពីលើគម្រោងសាងសង់ហេដ្ឋារចនាសម្ព័ន្ធសំខាន់ៗទាំង៣៤ខ្សែនៅទូទាំងក្រុងព្រះសីហនុ ដែលសម្រេចបានស្ទើរតែ១០០ភាគរយទៅហើយ ពេលនេះរដ្ឋបាលខេត្តបានបង្ហាញពីគម្រោងសាងសង់ផ្លូវថ្មីចំនួនមួួយខ្សែទៀតតភ្ជាប់ពីឆ្នេរសុខាមកកាន់ឆ្នេរអូរឈើទាល់ដើម្បីបង្កើនភាពទាក់ទាញ និងកាន់តែងាយស្រួលក្នុងដំណើរទេសចរណ៍នៅតំបន់ឆ្នេរ។

តាមរយៈមន្ត្រីជាន់ខ្ពស់រដ្ឋបាលខេត្តព្រះសីហនុបានបង្ហើបប្រាប់នៅព្រឹកថ្ងៃទី២៥ ខែមករា ឆ្នាំ២០២១នេះថា រដ្ឋបាលខេត្តព្រះសីហនុបានរៀបចំគម្រោងសាងសង់ផ្លូវថ្មីចំនួនមួយខ្សែទៀតដោយធ្វើការតភ្ជាប់ពីឆ្នេរសុខាទៅកាន់ឆ្នេរអូរឈើទាល់ ឆ្លងកាត់តំបន់ពយតាមួយនៃតំបន់កន្ទុយនាគ ដែលមានសរុប១០៣៤ម៉ែត្រ ហើយទទឹងមានទំហំ ១០.២៥ម៉ែត្រ។

ជាមួយនឹងគម្រោងនៃការសាងសង់ផ្លូវថ្មីចំនួនមួយខ្សែនេះវានឹងក្លាយជាសមិទ្ធផលថ្មីនៃប្រវត្តិសាស្ត្ររបស់ខេត្តព្រះសីហនុ ដែលក្រៅពីបង្កើនសោភ័ណភាពនៅក្នុងក្រុងដែលជាតំបន់ទេសចរណ៍ឆ្នេរលំដាប់ខ្ពស់ប្រចាំប្រទេស ដែមទាំងបានបង្កភាពងាយស្រួលដល់បណ្តាទេសចរជាតិ និងអន្តរជាតិ ដោយមិនចាំបាច់ចំណាយពេលធ្វើដំណើរវាងផ្លូវពីឆ្នេរសុខា ទៅកាន់ឆ្នេរអូរឈើទាល់ទៀតនោះទេ ពោលគឺអាចធ្វើដំណើរតភ្ជាប់រវាងឆ្នេរទាំងពីរស្របតាមឆ្នេរសមុទ្រដ៏ស្រស់ស្អាតតែម្ដង។

យ៉ាងណាក៏ដោយប្រភពដដែលមិនបានបង្ហើបពីខ្ទង់ថវិកាចំណាយលើការសាងសង់នៅឡើយ ហើយក៏មិនទាន់កំណត់ពីពេលវេលាជាក់លាក់នៃការចាប់ផ្តើមសាងសង់ប្រាកដនោះដែរ គ្រាន់បញ្ជាក់ថា គម្រោងនេះនឹងត្រូវចាប់អនុវត្តក្នុងពេលឆាប់ៗខាងមុខនេះ ខណៈដែលប្លង់នៃផែនការមេត្រូវបានបញ្ចប់ការសិក្សា និងកំណត់រួចរាល់៕

ការសិក្សាទីផ្សារច្បាស់លាស់ និងប្លង់ស្ថាបត្យកម្មបានធ្វើឲ្យបុរី Krek City Garden លក់បានជាង ២០ភាគរយហើយ

ដោយស៊ីវ ម៉េង

ត្បូងឃ្មុំៈ ជាមួយនឹងដំណើរឆ្ពោះទៅមុខ លើវឌ្ឍនភាពនៃការសាងសង់ បុរី Krek City Garden បានទទួលការគាំទ្រ បន្ទាប់ពីអ្នកវិនិយោគបានសិក្សាពីទីផ្សារ តម្រូវការ និងរៀបចំប្លង់ស្ថាបត្យកម្មរបស់គំរោង ប្រកបដោយការគិតគូរពីសុខមាលភាព ដល់អ្នករស់នៅ។

លោកបណ្ឌិតតេង រិទ្ឋី អ្នកអភិវឌ្ឍន៍បុរី Krek City Garden ដែលបានបោះទុនជាង៣០លានដុល្លារលើផ្ទៃដីជិត២០ហិកតា លើគំរោងនេះបានមានប្រសាសន៍ឲ្យដឹងកាលពីចុងសប្តាហ៍មុនថា មុនពេលវិនិយោគលើបុរីនៅទីរួមស្រុកពញ្ញាក្រែកនេះ ក្រុមហ៊ុនបានសិក្សាពីសក្តានុពលរបស់តំបន់នេះ ច្បាស់លាស់រួចហើយ ទាក់ទងនឹងកម្រិតជីវភាព សក្តានុពលសេដ្ឋកិច្ច និងកត្តាប្រជាសាស្ត្រនៅតំបន់នេះ។

លោកបន្តថា “ខ្ញុំបានសិក្សាពីតំបន់នេះកាលពី៣ឆ្នាំមុន លើកត្តាសេដ្ឋកិច្ច និងប្រាក់ចំណូលរបស់ប្រជាពលរដ្ឋនៅតំបន់នេះ ដោយយើងបានគិតពីតម្លៃដែលយើងបានដាក់ចេញ គឺយើងគិតថាអាចធ្វើទៅបាន ទើបយើងវិនិយោគគំរោងនេះតែម្តង។ លោកបន្ថែមថា “តាមពិតខេត្តត្បូងឃ្មុំជាខេត្តថ្មីមែនទែន ប៉ុន្តែជាខេត្តមានសក្តានុពល ដោយមានមនុស្សរស់នៅប្រមាណ៨០ទៅ៩០ម៉ឺននាក់ ដែលធ្វើឲ្យមានតម្រូវការលំនៅដ្ឋានស្តង់ដា ប៉ុន្តែមិនទាន់មានអ្នកវិនិយោគណាចាប់អារម្មណ៍ ទើបខ្ញុំសម្រេចចិត្តវិនិយោគនៅទីនោះ” ។

លោកបណ្ឌិតតេង រិទ្ឋី ដែលជាស្ថាបត្យករល្បីឈ្មោះមួយរូប បានមានប្រសាសន៍ឲ្យដឹងទៀតថា ជាមួយគ្នានេះ អាជ្ញាធរមូលដ្ឋានថ្នាក់ឃុំ ស្រុក និងថ្នាក់ខេត្តបានរីករាយសហការជាមួយយើង បានធ្វើឲ្យយើងកាន់តែមានទឹកចិត្ត និងមានភាពងាយស្រួលធ្វើការសហការគ្នា ពិសេសប្រជាជនមូលដ្ឋានបានរីករាយនឹងគំរោងនេះ ដោយសារពួកគេចង់មានគេហដ្ឋានល្អ មានផ្សារទំនើប ដែលបើកលក់ពីព្រឹករហូតដល់យប់ជ្រៅ ដែលវានឹងធ្វើឲ្យសេដ្ឋកិច្ចនៅមូលដ្ឋានមានការរីកចម្រើន។

លោកបន្តថា “អ្វីដែលយើងធ្វើ គឺរៀបចំលំនៅដ្ឋាន ផ្លួវ និងហេដ្ឋារចនាសម្ព័ន្ឋដទៃទៀតមានស្តង់ដាលំដាប់អន្តរជាតិ ដូចបុរីមួយចំនួននៅរាជធានីភ្នំពេញផងដែរ” ។ លោកបន្តថា “យើងសង្ឃឹមជឿជាក់ថាគំរោងនេះនឹងជោគជ័យ ដោយសារយើងបានសិក្សាច្បាស់លាស់ទាំងម៉ូតផ្ទះ តម្លៃ និងតម្រូវការរបស់អតិថិជន ហើយរហូតមកទល់ពេលនេះ យើងមិនទាន់បើកលក់ជាផ្លូវការផង ប៉ុន្តែយើងលក់អស់ជាង២០ភាគរយហើយ” ។

លោកបណ្ឌិតតេង រិទ្ឋី បានបន្តទៀតថា បច្ចុប្បន្នក្រុមហ៊ុនយើងកំពុងរៀបចំបុកគ្រឹះសាងសង់ និងរៀបចំហេដ្ឋារចនាសម្ព័ន្ឋ ពិសេសទុនវិនិយោគយើងមានគ្រប់គ្រាន់ ដែលមិនមានអ្វីគួរឲ្យបារម្ភទេ។ ឥលូវនេះសេដ្ឋកិច្ចនៅតាមបណ្តារាជធានី ខេត្តទាំង២៥មានការរីកចម្រើនល្អ ជាពិសេសតំបន់ទីប្រជុំជនស្រុកពញ្ញាក្រែក ដែលមានមនុស្សរស់នៅប្រមាណ៣០,០០០នាក់ និងកៀកនឹងព្រំដែនអន្តរជាតិត្រពាំងផ្លុង ដែលជាច្រកទ្វារអន្តរជាតិធំទី២ជាមួយប្រទេសវៀតណាម។

បុរី Krek City Garden ត្រូវបានគិតគូរយ៉ាងម៉ត់ចត់ ទៅលើប្លង់ស្ថាបត្យកម្ម ហេដ្ឋារចនាសម្ព័ន្ឋ ដូចជាផ្លូវ សួនច្បារ ការដាំដើមឈើ និងការបន្សល់ទុកដីមុខផ្ទះចន្លោះពី១៥ទៅ៣៥ម៉ែត្រ ដែលមានភាពអំណោយផលដល់ការរស់នៅ ផ្តល់បរិយាកាសស្រស់ស្រាយ និងខ្យល់ចេញចូលស្រួល ដែលផ្តល់ផាសុខភាពដល់អ្នករស់នៅក្នុងបុរីនេះ៕

វិនិយោគិនអចលនទ្រព្យថ្មីៗនៅតែបន្តដាក់ទុនវិនិយោគលើវិស័យដីឡូត៍ជាមួយក្ដីរំពឹងខ្ពស់

ដោយៈលក្ខិណា

ភ្នំពេញៈ បើទោះបីជាបច្ចុប្បន្ននេះ ទីផ្សារដីឡូត៍ត្រូវបានមើលឃើញថា ហាក់មានសន្ទុះស្ទើរតែដល់កំពូលហើយក្ដី ក៏វិនិយោគិនអចលនទ្រព្យថ្មីៗ បន្តដាក់ទុនជាមួយនឹងគម្រោងដីឡូត៏ ដោយរំពឹងថានឹងទទួលបានជោគជ័យ ខណៈអ្នកជំនាញអចលនទ្រព្យក៏ជំរុញឱ្យយុវជនគួរទិញដីទុកសម្រាប់អនាគត។

អ្នកស្រី ប៊ី ឧដ្ឋានវត្តី អគ្គនាយិកាក្រុមហ៊ុន MT Property ជាម្ចាស់គម្រោងដីឡូត៍មួយកន្លែងនៅប៉ែកខាងលិច រាជធានីភ្នំពេញបានឱ្យដឹងថា អ្នកស្រីបានចាប់ផ្ដើមអភិវឌ្ឍន៍គម្រោងដីឡូត៏នេះ នៅចំពេលដែលពិភពលោកជួបប្រទះនឹងបញ្ហា ធ្ងន់ធ្ងរគឺកូវីដ១៩ ក៏ប៉ុន្តែអ្វីដែលអ្នកស្រី ទទួលបានមកវិញគឺមិនគួរជឿ ជាពិសេសនៅអំឡុងខែតុលា ឆ្នាំ២០២០នេះ កម្ពុជាក៏ជួបប្រទះនឹងគ្រោះទឹកជំនាន់ធ្ងន់ធ្ងរ តែការលក់គម្រោងដីឡូត៏នៅពេលនោះ ទទួលបានការគាំទ្រពីប្រជាពលរដ្ឋជាច្រើន ដោយក្នុងរយៈពេលខ្លីមួយសោះ លក់អស់ជាពាក់កណ្ដាលភ្លាមៗ ។

អ្នកស្រីបន្តថា ការគាំទ្របែបនេះ អ្នកស្រីក៏បង្កើតគម្រោងដីឡូត៍ ជាបន្តបន្ទាប់ទៀត ដើម្បីបំពេញតម្រូវការដល់អតិថិជន ដែលត្រូវការដីពិត និងទទួលបានឯកសារពិតៗពីក្រុមហ៊ុន ។

អ្នកស្រីនិយាយថា “បច្ចុប្បន្ននេះ យើងទទួលស្គាល់ថាអាជីវកម្មដីឡូត៍ ពិតជាមានច្រើន និងមានការប្រកួតប្រជែងទាំងតម្លៃនិងទីតាំង ប៉ុន្តែក៏មានជនមួយក្រុមធ្វើអាជីវកម្មមិនស្មោះត្រង់ ដោយដីខ្យល់ទៅអតិថិជន ទើបអតិថិជន ត្រូវការអ្នកអភិវឌ្ឍដែលមានភាពស្មោះត្រង់ មានដីពិតប្រាកដ និងមានឯកសារច្បាស់លាស់” ។

បើតាមលោកឧកញ៉ាបណ្ឌិត គីម ហ៊ាង ប្រធានក្រុមហ៊ុនKW Cambodia បានមានប្រសាសន៍ផងដែរថា មនុស្សកើតជារៀងរាល់ថ្ងៃ រៀងរាល់ឆ្នាំ តែដីអត់មានកើតតទៅទៀតទេ ដូច្នេះការទិញដីទុកសម្រាប់អភិវឌ្ឍជាលំនៅឋាន នៅពេលអនាគតនឹងមិនខុសបំណងឡើយ ហើយជាមនុស្សឆ្លាតទៀតផងដែរ ។

លោកបន្តថា “គ្រាន់តែនៅភ្នំពេញមួយ មានមនុស្សចំណូលថ្មីចូលមករស់នៅរាប់ម៉ឺននាក់ក្នុងមួយឆ្នាំៗ ដូច្នេះរដ្ឋបាលរាជធានី ត្រូវការពង្រីកផ្ទៃដីកាន់តែធំជាងមុន ដោយកាត់ផ្នែកខ្លះនៃខេត្តជាប់ភ្នំពេញ ស្ថិតក្រោមការគ្រប់គ្រងរបស់រដ្ឋបាល រាជធានីភ្នំពេញ ហើយតំបន់ដីធ្លី ដែលកំពុងពុះឡូត៍នៅជាយៗរាជធានី ក៏អាចកាត់ចូលឱ្យស្ថិតក្រោមការគ្រប់គ្រងរបស់រាជធានីផងដែរ “ ។

លោកបន្ថែមថា យុវជនដែលកំពុងធ្វើការនៅភ្នំពេញ និងនៅជិតៗភ្នំពេញ គួរទិញដីឡូត៏ឱ្យបានពីរឡូត៏ សម្រាប់អនាគត ជាពិសេសយុវជនមិនទាន់រៀបការ ។ នៅពេលដីឡូត៍នោះមានតម្លៃខ្ពស់ ពួកគេអាចលក់មួយឡូត៏ដើម្បីបានលុយរៀបការ ហើយទុកមួយឡូត៏ដើម្បីសង់ផ្ទះរស់នៅក្រោយរៀបការ ។

បើតាមអ្នកជំនាញវិស័យអចលនទ្រព្យដទៃទៀត ក៏បាននិយាយផងដែរថា សកម្មភាពពុះដីឡូត៍ ត្រូវបានមើលឃើញថា កំពុងពុះកញ្ច្រោលនៅតំបន់ប៉ែកខាងលិច ហើយតំបន់នេះ នឹងកាន់តែមានសក្ដានុពលបន្ថែមទៀត ក្នុងពេលឧស្សាហកម្មរោងចក្រ ក៏ត្រូវបានកំពុងរុះរើ ទៅដាក់ទីតាំងថ្មីនៅតំបន់នោះបណ្ដើរៗ ដូច្នេះប៉ែកខាងលិចរាជធានីភ្នំពេញ នឹងក្លាយជាតំបន់ឧស្សាហកម្ម និងលំនៅឋានដ៏មានសក្ដានុពល នៅពេលអនាគតខាងមុខនេះ៕

សម្តេចតេជោ ហ៊ុន សែន៖ តំបន់ផ្លូវ ៦០ម៉ែត្រ កំពុងក្លាយជាទីក្រុងថ្មីដ៏ទាក់ទាញ

ដោយៈ រ៉ាណេត

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានលើកឡើងថា តំបន់ផ្លូវ៦០ម៉ែត្រ ស្ថិតនៅភាគខាងត្បូងនៃទីក្រុងភ្នំពេញ បាននឹងកំពុងប្រែក្លាយទៅជាទីក្រុងថ្មីស្របតាមផែនការអភិវឌ្ឍន៍របស់រាជរដ្ឋាភិបាលកម្ពុជា។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីចុងសប្តាហ៍កន្លងមកនេះបានមានប្រសាសន៍ថា មនុស្សមួយចំនួនបានរិះគន់ និងមិនឱ្យមានការអភិវឌ្ឍន៍តំបន់ភាគខាងត្បូងនេះនោះទេ ព្រោះជាតំបន់ដីសើម ប៉ុន្តែជាក់ស្តែងវាបាននឹងកំពុងមានការីករចំរើន និងអភិវឌ្ឍន៍ទៅជាទីក្រុងថ្មីរបស់រាជធានីភ្នំពេញ។

សម្តេចតេជោបានមានប្រសាសន៍ថា “ឥឡូវភាគខាងត្បូងផ្លូវ៦០ម៉ែត្រ កំពុងក្លាយជាទីក្រុងមួយថ្មីហើយ ភាគខាងជើងក៏រីក ភាគខាងត្បូងក៏រីក ភាគខាងលិចក៏រីក ហើយបន្តិចទៀតទៅខាងកើតតំបន់អរិយក្សត្រក៏រីកដែរ” ។

សម្ដេចតេជោបានបញ្ជាក់ថា បន្តិចទៀតក្រោយពេលមានការនាំយកវ៉ាក់សាំងមកចាក់ជូនប្រជាពលរដ្ឋកម្ពុជា ក្រោមគោលការណ៍ស្ម័គ្រចិត្ត កម្ពុជានឹងបង្កើនភាពទាក់ទាញដល់បណ្តាអ្នកវិនិយោគអន្តរជាតិបន្ថែមទៀត នៅពេលដែលពួកគេដឹងច្បាស់ថា កម្ពុជាមិនមែនជាតំបន់ដែលប្រឈមខ្ពស់ ឬជាប្រទេសងាយឆ្លងជំងឺនោះទេ។សម្តេចបន្តថា នៅពេលដែលកម្ពុជា អាចទប់ស្កាត់ស្ថានភាពប្រឈមបាន មានការចាក់វ៉ាក់សាំងការពារបានល្អ វានឹងបង្កើនទំនុកចិត្តដល់ពួកវិនិយោគិន ដែលនឹងចូលមកកាន់កម្ពុជាបន្ថែមទៀត។

លោកស្រី តាំង ហួរ នាយិកាក្រុមហ៊ុន Amatak Property Service បានឱ្យដឹងថា ដូចទៅនឹងប្រសាសន៍របស់ប្រមុខ នៃរាជរដ្ឋាភិបាលកម្ពុជា តំបន់ផ្លូវ៦០ម៉ែត្រ បាននិងកំពុងក្លាយជាតំបន់ពាណិជ្ជកម្ម និងលំនៅឋានកម្រិតខ្ពស់ ដែលអ្នកមានធនធានល្មមៗ គឺមិនអាចទៅទិញលំនៅដ្ឋាននៅទីនេះបាននោះទេ ហើយសម្រាប់ការភិវឌ្ឍវិញគឺមានគម្រោងធំៗ និងទំនើប។

លោកស្រីបន្តថា សម្រាប់ទីផ្សារដីធ្លីនៅតំបន់នេះគឺមានទំហំធំ ហើយមានតម្លៃខ្ពស់ ដែលអ្នកទិញភាគច្រើន ទិញយកទៅអភិវឌ្ឍន៍សាងសង់បណ្តុំលំនៅឋាន អគារពាណិជ្ជកម្ម សាលារៀន និងមន្ទីរពេទ្យកំរិតខ្ពស់ ពោលគឺគេមិនមែនអភិវឌ្ឍន៍លើគម្រោងតូចតាចនោះទេ។

លោកស្រី អាន សុធិតា នាយិកាប្រចាំប្រទេសរបស់ក្រុមហ៊ុន CBRE Cambodia ឱ្យដឹងដែរថា តំបន់ផ្លូវ ៦០ ម៉ែត្រមានតម្លៃដីខ្ពស់ មិនមែនទើបតែមានពេលនេះទេ ពោលគឺវាបានឡើងចាប់តាំងពីសម្ពោធផ្លូវនេះមកម្លេះ។ ដីដែលមានតម្លៃល្អ គឺនៅជាប់នឹងផ្លូវធំ និងក្បែរគម្រោងអភិវឌ្ឍន៍ធំ។

លោកស្រីបន្តថា ផ្លូវ៦០ម៉ែត្រ នឹងក្លាយទៅជាតំបន់ពាណិជ្ជកម្មកម្រិតខ្ពស់ របស់ទីក្រុងភ្នំពេញនាពេលខាងមុខ ខណៈតំបន់នេះកំពុងទាក់ទាញ គម្រោងវិនិយោគធំៗចូលទៅយ៉ាងច្រើន ដូចជាគម្រោងបុរីលំនៅឋានកម្រិតខ្ពស់ អគារការិយាល័យ និងអគារពាណិជ្ជកម្ម ផ្សារទំនើបជាដើម ដែលនឹងប្រែក្លាយតំបន់នេះ ទៅជាតំបន់អភិវឌ្ឍ៍កម្រិតខ្ពស់មួយដ៏សំខាន់ ហើយក្នុងរយៈពេល៥ឆ្នាំខាងមុខ នឹងក្លាយជាតំបន់ដ៏ពេញនិយមសម្រាប់ការរស់នៅបែបទំនើប និងការធ្វើពាណិជ្ជកម្មរបស់ទីក្រុងភ្នំពេញ៕

ប្រធាន CVEA ថា អ្នកជំនួញក្នុងវិស័យអចលនទ្រព្យពូកែ ត្រូវប្រើធនធានអ្នកដទៃដើម្បីទទួលបានជោគជ័យ

ដោយៈ រ៉ាណេត

ភ្នំពេញៈ ការធនធានអ្នកដទៃ ដើម្បីអាចទទួលបាននូវផលប្រយោជន៍ និងឈានទៅរកការសម្រេចបាននូវភាពជោគជ័យ លើគម្រោងរបស់ខ្លួន ជាសកម្មភាពមួយដែលគួរតែពិចារណា និងយកមកអនុវត្តប្រកបដោយភាពត្រឹមត្រូវ និងមានវិជ្ជាជីវៈខ្ពស់បំផុត។ នេះបើតាមការលើកឡើងរបស់ប្រធាន CVEA កាលពីពេលថ្មីៗកន្លងទៅនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកច្រឹក សុខនីម បានមានប្រសាសន៍កាលពីល្ងាច ថ្ងៃចុងសប្ដាហ៍កន្លងទៅនេះថា ការចេះប្រើធនធានអ្នកដទៃ ដើម្បីអាចសម្រេចបានភាពជោគជ័យ ទៅលើគម្រោងរបស់ខ្លួនគឺជាវិធីសាស្ត្រ ដែលអ្នកជំនួញនៅក្នុងវិស័យអចលនទ្រព្យ យកមកប្រើជាញឹកញាប់ ហើយជាពិសេសវិនិយោគិនបរទេសដែលជានាយកក្រុមហ៊ុនធំ។

លោកបានបញ្ជាក់ថា “ក្នុងន័យនេះខ្ញុំចង់បញ្ជាក់ ទៅលើការទទួលប្រើសេវារបស់បណ្តាក្រុមហ៊ុនភ្នាក់ងារ ដែលមានជំនាញត្រឹមត្រូវ និងស្របច្បាប់” ។ លោកបន្តថា “ខ្ញុំឧទាហរណ៍ថា ប្រសិនបើអ្នកចង់រកទិញដី សម្រាប់អភិវឌ្ឍន៍អាជីវកម្មអ្វីមួយ ដែលប្រាកដថាជាតំបន់ដែលមានសក្ដានុពល អំណោយផលដល់អាជីវកម្ម នោះគឺត្រូវតែពឹងទៅលើក្រុមហ៊ុនភ្នាក់ងារ ដែលពួកគេមានជំនាញ មានព័ត៌មានជាច្រើននៅក្នុងដៃស្រាប់ងាយស្រួលក្នុងណែនាំ” ។

លោកបានបន្តថា ភ្នាក់ងារជំនាញដែលមានក្រមសីលធម៌ មានវិជ្ជាជីវៈឆ្លងកាត់ការបណ្តុះបណ្តាលត្រឹមត្រូវ នឹងផ្តល់ប្រឹក្សាជាមួយអ្នកពាក់ព័ន្ធ ទៅនឹងការជ្រើសរើសដីនៅទីតាំងណាមួយ ដែលអាចស្របទៅនឹងប្រភេទអាជីវកម្ម យល់ដឹងពីតម្លៃដីធ្លីនៅលើទីផ្សារក្នុងតំបន់ច្បាស់លាស់ ហើយមានភាពច្បាស់លាស់ ក្នុងការរៀបចំឯកសារច្បាប់ផ្សេងៗដែលអាចជៀសផុតពីហានិភ័យ ឬការខាតបង់ក្រោយសម្រេចចិត្តទិញ។ ផ្ទុយទៅវិញបើអ្នក មិនប្រើសេវាភ្នាក់ងារស្របច្បាប់នោះ អាចនឹងប្រឈមបញ្ហាច្រើន ដូចជាត្រូវចំណាយពេលច្រើនក្នុងការស្វែងរកទីតាំងល្អ ប្រឈមនឹងការចាញ់បោកឈ្មួ្ញញកណ្តាល ឬអ្នកគួកជេរដី ឬអាចជ្រើសរើសទីតាំងខុសពីប្រភេទអាជីវកម្មរបស់ខ្លួនក៏អាចថាបាន” ។

លោកច្រឹក សុខនីមបានបញ្ជាក់ថា អ្នកវិនិយោគ និងអភិវឌ្ឍន៍អន្តរជាតិជាច្រើន ដែលមានក្រុមហ៊ុនធំៗ មានគម្រោងតម្លៃរាប់សិបលានដុល្លារ ពួកគេសុទ្ធតែជ្រើសរើសការប្រើក្រុមហ៊ុនភ្នាក់ងារជាដៃគូ ពួកគេជឿជាក់ថា ការប្រើសេវារបស់ក្រុមហ៊ុនភ្នាក់ងារ ដែលជាការប្រើប្រាស់ធនធានរបស់អ្នកដទៃ សម្រាប់សម្រេចបានភាពជោគជ័យ ទៅលើគម្រោងអភិវឌ្ឍន៍របស់ពួកគេ គឺអាចទទួលបានអត្រាខ្ពស់ ទាំងការស្វែងរកទីតាំងសម្រាប់អភិវឌ្ឍន៍គម្រោង ក៏ដូចជាការលក់គម្រោងទាំងមុនពេល និងក្រោយពេលបញ្ចប់ការសាងសង់ផងដែរ៕