ស្រុកកៀនស្វាយខេត្តកណ្តាលទទួលបានគម្រោងវិនិយោគ៣ និងមានទុនវិនិយោគ សរុបជិត១១០លានដុល្លារ

ដោយៈ រ៉ាណេត

កណ្តាលៈ ស្រុកកៀនស្វាយ ដែលជាចំណុះខេត្តកណ្តាល មានព្រំប្រទល់ជាប់រាជធានីភ្នំពេញ ទទួលបានគម្រោងវិនិយោគធំៗចំនួន៣ព្រមគ្នា ដែលមានទុនសរុបរហូតដល់ជិត១១០លានដុល្លារ លើការសាងសង់រោងចក្រផលិតស្រាបៀរ រោងចក្រផលិតជីកសិកម្ម និងរោងចក្រផលិតផលិតផលពីប្លាស្ទិក។

តាមរយៈសេចក្ដីប្រកាសជាផ្លូវការ របស់ក្រុមប្រឹក្សាអភិវឌ្ឍន៍កម្ពុជា នៅថ្ងៃចុងស ប្ដាហ៍នេះបានឲ្យដឹងថា រាជរដ្ឋាភិបាលកម្ពុជាបានសម្រេចគាំទ្រ និងអនុម័តទាំងស្រុកទៅលើគម្រោងវិនិយោគធំៗចំនួន៣ស្ថិតនៅក្នុងស្រុកកៀន ជាមួយទុនសរុបជិត១១០លានដុល្លារ និងបង្កើតការងារជូនប្រជាពលរដ្ឋបានជិត៨០០នាក់។

គម្រោងទាំង៣ ដែលទើបតែទទួលបានការអនុម័ត ពីសំណាក់រាជរដ្ឋាភិបាលកម្ពុជា រួមមានក្រុមហ៊ុន SING FU SUN (CAMBODIA) PLASTIC CO., LTD ជាគម្រោងបង្កើតរោងចក្រផលិតផលិតផលពីប្លាស្ទិក (Preform, Cap, Bottle) មានទីតាំងស្ថិតនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល មានទុនវិនិយោគប្រមាណ១១,៧លានដុល្លារ អាចបង្កើតការងារបានចំនួន៥២កន្លែង។

ក្រុមហ៊ុន RUIZEXING CHEMICAL TECHNOLOGY CO., LTD ជាគម្រោងបង្កើតរោងចក្រផលិតថ្នាំកសិកម្មមានទីតាំង ស្ថិតនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល មានទុនវិនិយោគប្រមាណ២០,១លានដុល្លារ បង្កើតការងារបានចំនួន១៧៤កន្លែង។

ក្រុមហ៊ុន INTER-MATTRID BEVERAGE (CAMBODIA) CO., LTD ជាគម្រោងដែលធំជាងគេ គឺបង្កើតរោងចក្រផលិតស្រាបៀរ មានទីតាំងស្ថិតនៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគចំនួន៧៨លានដុល្លារអាមេរិក និងអាចបង្កើតការងារបានចំនួន៥៥០កន្លែង។

ជាមួយនឹងការសម្រេចគាំទ្រ ទៅលើគម្រោងទាំងអស់ខាងលើនេះ រាជរដ្ឋាភិបាលក៏បានកំណត់ និងតម្រូវឱ្យក្រុមហ៊ុនអភិវឌ្ឍន៍ និងវិនិយោគ ធ្វើរបាយការណ៍ពីផលប៉ះពាល់នានានៃគម្រោង ដល់ប្រជាពលរដ្ឋ សង្គម និងបរិស្ថាន ដើម្បីអាចធ្វើឱ្យគម្រោងមានដំណើរដោយរលូន។

បច្ចុប្បន្ននៅក្នុងស្រុកកៀនស្វាយ ជាពិសេសនៅតាមតំបន់ផ្លូវជាតិលេខមួយ បាន និងកំពុងមានការអភិវឌ្ឍគួរឱ្យកត់សម្គាល់ ដែលក្នុងនោះវិស័យលំនៅដ្ឋាន បានបង្ហាញពីភាពលេចធ្លោ ជាមួយនឹងគម្រោងបុរីលំនៅដ្ឋានជាច្រើន ដូចជា គម្រោងបណ្ដុំកៀនស្វាយផ្លាហ្សា បុរីកៀនស្វាយផាក ជាពិសេសគម្រោងអភិវឌ្ឍន៍សួនកម្សាន្ត ដែលមានតម្លៃរាប់រយលានដុល្លារ។ បន្ថែមពីនេះ នៅមានគម្រោងពង្រីកកំពង់ផែភ្នំពេញ រួមជាមួយនឹងគម្រោងបង្កើតកំពង់ផែទេសចរណ៍ផងដែរ ដែលជំរុញឱ្យតំបន់កាន់តែមានសក្ដានុពល៕

ខេត្តកំពតនឹងមានរដ្ឋបាលប្រមូលផ្តុំនាពេលខាងមុខនេះ និងលើកទី១សំរាប់បណ្តាខេត្តជាប់តំបន់ឆ្នេរ

ដោយៈវុត្ថា

ភ្នំពេញៈ ខេត្តកំពត នឹងមានរដ្ឋបាលប្រមូលផ្តុំនាពេលខាងមុខនេះ ស្របតាមបំណងរបស់ប្រមុខនៃរាជរដ្ឋាភិបាលកម្ពុជា ដើម្បីបង្កភាពងាយស្រួលក្នុងការផ្តល់សេវានានាជូនប្រជាពលរដ្ឋនៅក្នុងខេត្តទាំងមូល។

លោកជាវ តាយ អភិបាលខេត្តកំពត បានឱ្យដឹងកាលពីពេលថ្មីៗនេះថា ប្រមុខរាជរដ្ឋាភិបាលឱ្យខេត្តរៀបចំរដ្ឋបាល ប្រមូលផ្តុំដើម្បីបង្កភាពងាយស្រួល ក្នុងការបំរើសេវាសំខាន់ៗនានាជូន ខណៈដែលរដ្ឋបាលប្រមូលផ្តុំនេះ បណ្តុំទៅដោយមន្ទីរស្ថាប័នគ្រប់ជំនាញ។

លោកបន្តថា “ផែនការនេះបង្កើតឱ្យមានរដ្ឋបាលប្រមូលផ្តុំនេះ ត្រូវការទាមទាឱ្យមានការសិក្សាលម្អិត និងពេលវេលាបន្ថែមទៀត ខណៈដែលរដ្ឋបាលប្រមូលផ្តុំនេះ មានគ្រប់សេវាទាំងអស់ពីអង្គភាពគ្រប់ស្ថាប័ន និងមន្ទីរជំនាញ ដោយប្រជាពលរដ្ឋមិនបាច់ទៅរកនៅទីន្លែងផ្សេងនោះទេ” ។ លោកន្ថែមថា “រឿងបង្កើតរដ្ឋបាលប្រមូលផ្តុំនេះ គឺជាការគិតរបស់ប្រមុខនៃរាជរដ្ឋាភិបាលទៅមុខទៀត យើងត្រៀមធ្វើវា ខ្ញុំមិនទាន់ឆ្លើយតបភ្លាមៗនោះទេ គឺត្រូវការគិតគូរ និងពេលវេលាបន្ថែម” ។

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន កាលពីកន្លងមកនេះ បានស្នើឱ្យរដ្ឋបាលខេត្តកំពត បើកកិច្ចប្រជុំជាមួយមន្ត្រីជំនាញ សិក្សាទៅលើលទ្ធភាពនៃការបង្កើតតំបន់រដ្ឋបាលប្រមូលផ្តុំ និងគម្រោងសាងសង់ពហុកីឡាដ្ឋានថ្មី ប្រចាំនៅក្នុងខេត្តកំពត ដើម្បីចូលរួមលើកកម្ពស់សក្ដានុពល និងសេដ្ឋកិច្ចខេត្តឱ្យកាន់តែរីកចម្រើន។

រដ្ឋាភិបាលបានកំណត់យកទីក្រុងកំពត ជាទិសដៅទេសចរណ៍ សំខាន់បំផុតមួយ និងជាកន្លែងប្រមូលផលិតផលកសិកម្ម សម្រាប់ការនាំចេញទៅទីផ្សារអន្តរជាតិ ខណៈហេដ្ឋារចនាសម្ព័ន្ធរូបវ័ន្ត ក្នុងទីក្រុបឆ្នេរសមុទ្រមួយនេះ កំពុងត្រូវបានកសាង និងអភិវឌ្ឍន៍។

យោងតាមចក្ខុវិស័យដល់ឆ្នាំ២០៣០ នៃប្លង់គោលប្រើប្រាស់ដីក្រុងកំពតគឺ រដ្ឋាភិបាលកំពុងសំដៅរៀបចំ និងអភិវឌ្ឍ ក្រុងកំពតជាក្រុងគុជបៃតង ឆ្នេរសមុទ្រ ធម្មជាតិ វប្បធម៍ និងពាណិជ្ជកម្ម តាមរយៈការអភិវឌ្ឍន៍ជាទីក្រុង រមណីយដ្ឋានគុជទេសចរណ៍ឆ្នេរសមុទ្រ ធម្មជាតិ វប្បធ៌ម ដែលស្អាតបំផុតលើសកលលោក។

តាមរយៈចក្ខុវិស័យនគររូបនីយកម្មនេះ ទីក្រុងកំពតនឹងអភិវឌ្ឍទៅជាមជ្ឈមណ្ឌលកែច្នៃផលិផល កសិកម្ម ឧស្សាហកម្ម ទីផ្សារអន្តរជាតិសម្រាប់ផលិតផលកសិកម្ម និងចែកចាយទំនិញ និងជាទីក្រុងទំនើប ដែលមានហេដ្ឋារចនាសម្ព័ន្ធ សេវាកម្មទីក្រុង និងគុណភាពបរិស្ថានរស់នៅប្រសើរ៕

ក្រុមហ៊ុនថៃធំៗចំនួន៤ចុះកិច្ចព្រមព្រៀងអភិវឌ្ឍសួនឧស្សាហកម្មខ្នាតយក្សនៅមីយ៉ាន់ម៉ា

ដោយៈសុខុម

អន្តរជាតិៈក្រុមហ៊ុនថៃធំៗចំនួន៤ រួមមានក្រុមហ៊ុន B.Grimm Group ក្រុមហ៊ុន Amata Corporation ក្រុមហ៊ុន PTT និងក្រុមហ៊ុន Global Power Synergy បានចុះកិច្ចព្រមព្រៀងលើ គម្រោងអភិវឌ្ឍន៍សួនឧស្សាហកម្មខ្នាតយក្សមួយ លើផ្ទៃដីរហូតដល់ទៅ ៨០០គីឡូម៉ែត្រការ៉េក្នុងប្រទេសមីយ៉ាន់ម៉ា។

លោកហារ៉ល លីង (Harald Link) ប្រធានក្រុមហ៊ុន B.Grimm បានថ្លែងថា តាមការរំពឹងទុក អនុស្សរណៈនៃការយោគយល់ (MoU) មួយអាចនឹងត្រូវចុះហត្ថលេខានៅដើមឆ្នាំ២០២១ ដ៏ខ្លីខាងមុខ។

លោកបានបន្តថា “តួនាទីសំខាន់របស់ក្រុមហ៊ុន B.Grimm នៅក្នុងការចាប់ដៃសហការនេះ គឺដំណើរការរោងចក្រផលិតថាមពលអគ្គិសនីមួយ នៅក្នុងសួនឧស្សាហកម្មនេះ សម្រាប់ផ្គត់ផ្គង់ ដល់សួនឧស្សាហកម្មនេះទាំងមូល ហើយសល់ប៉ុន្មានលក់ទៅឱ្យរដ្ឋាភិបាលមីយ៉ាន់ម៉ា” ។

ទោះជាយ៉ាងណា លោកមិនបានផ្ដល់ព័ត៌មានលម្អិតបន្ថែមទៀត ទាក់ទិននឹងគម្រោងអភិវឌ្ឍន៍ខ្នាតយក្សនេះឡើយ។

លោកលើកឡើងថា អាជីវកម្មផលិតថាមពលអគ្គិសនីរបស់ក្រុមហ៊ុន B.Grimm Group នឹងក្លាយជាកម្លាំងចលករដ៏សំខាន់ ក្នុងការស្វែងរកប្រាក់ចំណូល ក្នុងរយៈពេល៨ ឆ្នាំបន្ទាប់ ដោយកំណត់គោលដៅប្រាក់ចំណូល សរុបរហូតដល់ទៅ១៥០ពាន់លានបាត (ប្រមាណ ៥ ពាន់លានដុល្លារ) នៅត្រឹមឆ្នាំ២០២៨ ។

នៅឆ្នាំនេចំនួន ៧០% នៃប្រាក់ចំណូលប៉ាន់ស្មានសរុបរបស់ក្រុមហ៊ុននេះ (៦០ ពាន់លានបាត ឬប្រមាណ២ពាន់លានដុល្លារ) បានពីក្រុមហ៊ុនផលិតថាមពលអគ្គិសនី B.Grimm Power Plc. ដែលជាក្រុមហ៊ុនបុត្រសម្ព័ន្ធរបស់ខ្លួន។

ក្រុមហ៊ុន B.Grimm ដំណើរការអាជីវកម្មថាមពលអគ្គិសនី ដែលមានសមត្ថភាពផ្គត់ផ្គង់អគ្គិសនីសរុប ៣.០១៩ មេហ្គាវ៉ាត់នៅក្នុងប្រទេសជាច្រើន រួមមាន ប្រទេសថៃ ប្រទេសឡាវ និងប្រទេសវៀតណាម ដែលចែកចាយបន្តមកប្រទេសកម្ពុជាយើងផងដែរ៕

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- “CHUNTENG INDUSTRIAL (CAMBODIA) CO., LTD” គម្រោងបង្កើតរោងចក្រផលិតសម្ភារៈពីក្រណាត់ សម្រាប់សត្វចិញ្ចឹម (ឆ្កែ និងឆ្មា) ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,៦លានដុល្លារអាមេរិក និងអាចបង្កើតការងារបានចំនួន ៣៥៨កន្លែង។

២- “BLISSFULL CAPITAL CO., LTD” គម្រោងបង្កើតមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅដីឡូតិ៍៥៣២ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មានទុនវិនិយោគប្រមាណ ៩,៥លានដុល្លារអាមេរិក និងអាចបង្កើតការងារបានចំនួន ២០០កន្លែង។

៣- “SING FU SUN (CAMBODIA) PLASTIC CO., LTD” គម្រោងបង្កើតរោងចក្រផលិតផលិតផលពីប្លាស្ទិក (Preform, Cap, Bottle) ដែលមានទីតាំងវិនិយោគស្ថិតនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល មានទុនវិនិយោគប្រមាណ ១១,៧លានដុល្លារអាមេរិក និងអាចបង្កើតការងារបានចំនួន ៥២កន្លែង។

៤- “RUIZEXING CHEMICAL TECHNOLOGY CO., LTD” គម្រោងបង្កើតរោងចក្រផលិតថ្នាំកសិកម្ម ដែលមានទីតាំងវិនិយោគស្ថិតនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល មានទុនវិនិយោគប្រមាណ ២០,១លានដុល្លារអាមេរិក និងអាចបង្កើតការងារបានចំនួន ១៧៤កន្លែង។

៥- “INTER-MATTRID BEVERAGE (CAMBODIA) CO., LTD” គម្រោងបង្កើតរោងចក្រផលិតស្រាបៀរ ដែលមានទីតាំងវិនិយោគស្ថិតនៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគចំនួន ៧៨លានដុល្លារអាមេរិក និងអាចបង្កើតការងារបានចំនួន ៥៥០កន្លែង។

ខេត្តព្រះសីហនុ ទទួលបានចំណូលជាង ២,២២លានដុល្លារ ពីការប្រមូលពន្ធលើមធ្យោបាយដឹកជញ្ជូន

ដោយ ៖ វត្ថា

ព្រះសីហនុ ៖ លទ្ធផលនៃការប្រមូលពន្ធលើមធ្យោបាយដឹកជញ្ជូនគ្រប់ប្រភេទនៅក្នុងខេត្តព្រះសីហនុ សម្រេចបានជិត៨៩០០លានរៀល ស្មើនឹងជាង ២,២២លានដុល្លារនៅក្នុងឆ្នាំ២០២០ ជាមួយចំនួនយានយន្តសរុប ១៦,២៥០គ្រឿង។

ប្រធានសាខាពន្ធដារខេត្តព្រះសីហនុ លោក សន ស៊ីផល បានឱ្យដឹងនៅថ្ងៃទី៤ ខែធ្នូ ឆ្នាំ២០២០នេះថា ការប្រមូលពន្ធលើមធ្យោបាយដឹងជញ្ជូនគ្រប់ប្រភេទប្រចាំឆ្នាំ២០២០ ត្រូវបានបិទបញ្ចប់កាលពីថ្ងៃទី៣០ ខែវិច្ឆិកា ឆ្នាំ២០២០ កន្លងមក ដោយសាខាពន្ធដារខេត្តព្រះសីហនុប្រមូលថវិកាលើមធ្យោបាយដឹកជញ្ជូនគ្រប់ប្រភេទមានចំនួន ១៦,២៥០គ្រឿង និងប្រមូលថវិកាបានចំនួន ៨,៨៩៦,៥១០,០០០រៀល បើធ្វើការប្រៀបធៀបរយៈពេលដូចគ្នាក្នុងឆ្នាំ២០១៩ មានយានយន្តកើនឡើងចំនួន ៣,១៨១គ្រឿង និងប្រាក់ពន្ធកើនឡើង ១,៨២៦,៩៨០,០០០រៀល ស្មើនឹង២៥ភាគរយ។

លោកបានបន្តឱ្យដឹងបន្ថែមទៀតថា ការប្រមូលពន្ធលើមធ្យោបាយដឹកជញ្ជូនគ្រប់ប្រភេទមានការកើនឡើងក្នុងឆ្នាំ២០២០នេះ ដោយសារតែបងប្អូនប្រជាពលរដ្ឋមានការយល់ដឹង និងភ្ញាក់រលឹកពីកាតព្វកិច្ចបង់ពន្ធចូលមកបង់ពន្ធ នៅតាមសាខាពន្ធដារ និងតាមធនាគារនានាបានទាន់ពេលវេលាមានការកើនឡើងជាបន្ត បន្ទាប់ជារៀងរាល់ឆ្នាំ ទោះបីកម្ពុជា និងពិភពលោកកំពុងរួមគ្នាប្រយុទ្ធប្រឆាំង នឹងជំងឺឆ្លង កូវីដ-១៩ យ៉ាងណាក៏ដោយ។

លោកប្រធានសាខាពន្ធដារបានបញ្ជាក់ថា ដោយមានការចង្អុលបង្ហាញពីប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារ ក្នុងការបើកសិក្ខា សាលាផ្សព្វផ្សាយអំពីច្បាប់លិខិតបទដ្ឋានគតិយុត្តនានាដល់អាជ្ញាធរ និងប្រជាពលរដ្ឋក្នុងក្រុង ស្រុក ឃុំ សង្កាត់ ស្តីពីកាតព្វកិច្ចបង់ពន្ធជូនដល់បងប្អូនប្រជាពលរដ្ឋ។

បច្ចុប្បន្នប្រជាពលរដ្ឋមានការយល់ដឹងអំពីកាតព្វកិច្ចបង់ពន្ធជូនរដ្ឋកាន់តែច្រើន ពួកគាត់បាននាំគ្នាចូលមកបង់ពន្ធជូនរដ្ឋនៅតាមស្នាក់ការសាខាពន្ធដារក្រុង ស្រុក និងតាមធនាគារដែលបានសហការចុះកិច្ចព្រមព្រៀង (MOU) ជាមួយអគ្គនាយកដ្ឋានពន្ធដារក្នុងការប្រមូលពន្ធនៅតាមធនាគារ មានដូចជាធនាគារអេស៊ីលីដា ធនាគារការណាឌីយ៉ា ធនាគារវឌ្ឍនៈ ធនាគារកម្ពុជា សាធារណៈ និងធនាគារ ANZ រ៉ូយ៉ាល់ជាដើម៕

ការព្យាករណ៍ៈប្រាក់ដុល្លារនឹងបន្តធ្លាក់ថ្លៃរហូតដល់ពាក់កណ្ដាលឆ្នាំ២០២១

ដោយៈសាខុម

អន្តរជាតិៈ ការព្យាករណ៍ថ្មីមួយបានរកឃើញថា តម្លៃប្រាក់ដុល្លារទំនងជានឹងបន្តធ្លាក់ចុះរយៈពេលយ៉ាងតិច៦ខែទៀត ស្របពេលបណ្ដាវិនិយោគិន បន្តងាកទៅវិនិយោគលើទ្រព្យសកម្មមានហានិភ័យ (Risky asset) ដែលផ្ដល់ផលចំណេញខ្ពស់។ នេះបើយោងតាមលទ្ធផលស្ទង់មតិរបស់ទីភ្នាក់ព័ត៌មាន Reuters ដែលបានសាកសួរក្រុមអ្នកជំនាញខាងរូបិយប័ណ្ណ។

ក្រុមអ្នកជំនាញបានឲ្យដឹងថា ក្រោយភាគហ៊ុនឡើងថ្លៃឡើងវិញ កាលពីខែវិច្ឆិកា រូបិយប័ណ្ណដុល្លារ បានធ្លាក់ថ្លៃប្រមាណ៣,០សេនកាលពីខែមុន ហើយបន្តធ្លាក់ថ្លៃជិត៦សេននៅឆ្នាំនេះ ធ្វើឱ្យរូបិយប័ណ្ណមួយនេះសំយ៉ុងក្បាលចុះ ឆ្ពោះទៅរកលទ្ធផលប្រចាំឆ្នាំដ៏អាក្រក់បំផុត របស់ខ្លួនចាប់តាំងពីឆ្នាំ២០១៧មក។

ថ្វីបើពលរដ្ឋអាមេរិករហូតដល់ទៅប្រមាណ១៤លាននាក់ បានឆ្លងវីរុសកូវីដ-១៩ យ៉ាងណាក្ដី ក៏គេនៅតែមានក្ដីសង្ឃឹមថា ស្ថានភាពនឹងល្អប្រសើរឡើងក្នុងឆ្នាំសារពើពន្ធថ្មី ហើយវ៉ាក់សាំងកូវីដ-១៩ នឹងជួយជំរុញឱ្យភាគហ៊ុនពិភពលោកឡើងថ្លៃ ខណៈរូបិយប័ណ្ណដុល្លារ បន្តធ្លាក់ថ្លៃក្នុងរយៈពេលវែងគួរសម។

តាមការព្យាករណ៍ ធនាគារកណ្ដាលរបស់អាមេរិក ឬFederal Reserve នឹងផ្ដល់ការតម្រង់ទិសកាន់តែប្រសើរថា តើរយៈពេលយូរប៉ុណ្ណា ដែលខ្លួននឹងបន្តទិញប័ណ្ណបំណុល ដើម្បីជួយស្ដារសេដ្ឋកិច្ចរបស់សហរដ្ឋអាមេរិក ដែលអាចធ្វើឱ្យប៉ះពាល់ដល់រូបិយប័ណ្ណដុល្លារ។

ជាង២ភាគ៣នៃក្រុមអ្នកវិភាគ ពោលគឺចំនួន៥១រូបក្នុងចំណោម៧២រូប ដែលបានឆ្លើយសំណួរដាច់ដោយឡែកពីគ្នា របស់ទីភ្នាក់ព័ត៌មាន Reuters ពួកគេបានរំពឹងថា ការធ្លាក់ថ្លៃនៃរូបិយប័ណ្ណដុល្លារ ទំនងជានឹងបន្តយ៉ាងហោចណាស់ ដល់ពាក់កណ្ដាលឆ្នាំ២០២១។ ចំណែកឯអ្នកវិភាគចំនួន២១រូបទៀតនិយាយថា រូបិយប័ណ្ណដុល្លារនឹងឡើងថ្លៃវិញឆាប់ជាងនេះ៕

រមណីយដ្ឋានកំពតឋានសួគ៌កំពុងបង្កើនភាពទាក់ទាញជាមួយសួនផ្កាឈូករ័ត្ន ដ៏ធំល្វឹងល្វើយលើកដំបូងនៅក្នុងខេត្ត

ដោយៈ រ៉ាណេត

កំពតៈ គម្រោងអភិវឌ្ឍន៍តំបន់កម្សាន្ត និងលំហែរកម្រិតខ្ពស់ប្រចាំខេត្ត “កំពតឋានសួគ៌” ក្រោមទុនវិនិយោគជាច្រើនលានដុល្លារ ដែលគ្រោងបើកដំណើរជាផ្លូវការនៅត្រឹមថ្ងៃទី១ខែមករា ឆ្នាំ២០២០ឆាប់ៗខាងមុខនេះ កាន់តែបង្កើនភាពទាក់ទាញយ៉ាងខ្លាំងជាមួយនឹងសួនចំការផ្កាឈូករ័ត្នដ៏ធំល្វឹងល្វើយ មិនធ្លាប់មានពីមុនមកបន្ថែមពីលើតំបន់កម្សាន្ត និងលំហែរជាច្រើនកន្លែងទៀត។

លោកឧកញ៉ានួន អក ម្ចាស់អភិវឌ្ឈន៍គំរោងនេះបានមានប្រសាសន៍នៅរសៀលថ្ងៃទី៤ ខែធ្នូ ឆ្នាំ២០២០នេះថា ស្ថិតនៅក្នុងដំណាក់កាលដំបូង នៃការអភិវឌ្ឍជាទីកម្សាន្តកម្រិតខ្ពស់ប្រចាំខេត្ត បច្ចុប្បន្នក្រុមការងារជំនាញបាន និងកំពុងរៀបចំនូវទីតាំងកម្សាន្តប្លែកៗជាច្រើន ដែលក្នុងនោះរួមមានដូចជាទីតាំងជិះទូកកម្សាន្តតាមមាត់ព្រែក កន្លែងថតរូបអនុស្សាវរីយ៍ តំបន់សួនផ្កាចំរុះ ជាពិសេសសួនផ្កាឈូករ័ត្នដ៏ធំល្វឹងល្វើយលើកដំបូងប្រចាំខេត្តកំពតដែលកំពុងមានភាពទាក់ទាញយ៉ាងខ្លាំង។

លោកឧកញ៉ាបានបន្តថា “តាមរយៈភាពល្អប្រសើរនៃកត្តាភូមិសាស្ត្រ ជាពិសេសភាពអំណោយផលពីធម្មជាតិ ទៅលើវិស័យទេសចរណ៍ ខ្ញុំជឿជាក់ថានៅថ្ងៃអនាគតខាងមុខដ៏ខ្លីនេះ ខេត្តកំពតនឹងទាក់ទាញទេសចរជាតិ និងអន្តរជាតិយ៉ាងច្រើនជាក់ជាមិនខាន ខណៈដែលបច្ចុប្បន្ននេះមានអ្នកវិនិយោគ និងអភិវឌ្ឍន៍ជាច្រើនចំណាយដើមទុនជាច្រើនលានដុល្លារលើការវិនិយោគ និងកែច្នៃជាតំបន់កម្សាន្តបែបធម្មជាតិជាច្រើនទីតាំង” ។

គម្រោងអភិវឌ្ឍន៍ដែលស្ថិតនៅភូមិអង្គ ឃុំត្រពាំងព្រីង ស្រុកទឹកឈូ ខេត្តកំពតមួយនេះគឺមានទំហំធំធេង និងត្រូវបានបែងចែកជាតំបន់កម្សាន្តផ្សេងៗគ្នាជាច្រើន មិនតិចជាង៥នោះទេ ដូចជា តំបន់កម្សាន្តសួនផ្កាឈូករ័ត្ន តំបន់កម្សាន្ត និងលំហែរព្រៃកោងកាង ព្រៃអំពិលអំពែក ភោជនីយដ្ឋាន តំបន់ផ្ទះលំហែរ និងសណ្ឋាគារ ដែលនៅថ្ងៃអនាគត អាចសាងសង់រហូតដល់ប្រមាណ១០០០បន្ទប់។

លោកឧកញ៉ានួន អកបានបញ្ជាក់ថា “ជាគោលដៅនៃភាពជោគជ័យរបស់គម្រោងគឺការប្រមូលផ្តុំនូវមនុស្ស ឱ្យទៅរស់នៅក្នុងតំបន់ដ៏ស្រស់ស្អាតមួយនេះ ឱ្យបានកាន់តែច្រើន រួមជាមួយនឹងការបង្កើតជាទីប្រជុំជន ដែលក្រៅពីជាតំបន់កម្សាន្ត ថែមទាំងអាចអនុញ្ញាតឱ្យបងប្អូនប្រជាជនមានការងារធ្វើ កាត់បន្ថយការចំនាកស្រុក ហើយអាចផ្តល់ប្រាក់ចំណូលចូលគ្រួសារ យ៉ាងហោចណាស់១០០០ដុល្លារក្នុងមួយខែ ក៏ដូចជាអាចផ្តល់ចំណូលដល់រាជរដ្ឋាភិបាលកម្ពុជាផងដែរ”។

នៅក្នុងគំរោងដ៏ធំទីនេះ ត្រូវបានហ៊ុព័ទ្ធ ទៅដោយខ្សែទឹកសមុទ្រទាំងរដូវប្រាំង ទាំងរដូវវស្សា មានហ្វូងសត្វស្លាបទឹក ជាពិសេសមានដើមរុក្ខជាតិ ព្រៃកោងកាងនៅជុំយ៉ាងស្រស់ស្អាត ដែលនៅពេលអនាគត កំពតឋាន អាចនឹងកា្លយជាតំបន់ទេសចរណ៍ឈានមុខគេ ដែលអាចផ្តល់អត្ថប្រយោជន៍ដល់ប្រជាជនក្នុងតំបន់ ក៏ដូចជាផ្តល់ការងារជូនដល់ប្រជាពលរដ្ឋទូទៅប្រមាណ១០០០នាក់ ខណៈដែលគម្រោងដ៏អស្ចារ្យប្រចាំ ខេត្តកំពតមួយនេះ នឹងបើកសម្ពោធដំណើរការជាផ្លូវការនៅត្រឹមថ្ងៃទី១ ខែមករា ឆ្នាំ២០២១ខាងមុខនេះ៕

បុរីKC ផ្តល់ជូននូវលក្ខខ័ណ្ឌបង់ប្រាក់កាន់តែល្អប្រសើរសំរាប់អតិថិជន

ដោយគង់ សូរិយា

ភ្នំពេញៈ ក្នុងគោលដៅលើទឹកចិត្ត និងផ្តល់លំនៅដ្ឋានតម្លៃសមរម្យដល់ប្រជាពលរដ្ឋកម្ពុជា បុរីKCបាននិងកំពុងវិនិយោគ លើលំនៅដ្ឋានតម្លៃមធ្យមដល់ប្រជាពលរដ្ឋ ដែលមានជីវភាពមធ្យម។

បុរីដែលមានទីតាំងនៅក្បែរផ្សារព្រែកព្នៅថ្មីនេះ បាននិងងកំពុងសាងសង់លំនៅដ្ឋានតម្លៃមធ្យម និងខុនដូតម្លៃសមរមន្យផងដែរ។

បុរីខេ ស៊ី អំណោយផលដល់ការរស់នៅ និងប្រកអាជីវកម្មគ្រប់ប្រភេទ ដោយសារតែស្ថិតនៅជាប់ផ្លូវធំទំហំ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤។

បន្ថែមពីនេះ ទីតាំងរបស់បុរី ខេ ស៊ី មានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន បន្ថែមដោយគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូ នៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាពរបស់រដ្ឋបាលរាជធានីភ្នំពេញផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។

សម្រាប់ព័ត៌មានបន្ថែម លោកអ្នកអាចទំនាក់ទំនងបានតាមរយៈទូរស័ព្ទលេខ ៖ ០៨៩ ៧៨៧ ៧២១ / ០៨៧ ៣៦ ៩៥ ៣៦ / ០១៦ ៦៨៥ ៨៥៨ ៕

ក្រុមហ៊ុន SUNDOOR កំពុងរួមចំណែកយ៉ាងសកម្មក្នុងវិស័យសំណង់នៅកម្ពុជា

ភ្នំពេញ ៖ ក្រុមហ៊ុន SUN DOOR ផលិត និងផ្គត់ផ្គង់ពិដាន និងទ្វារ PVC នៅពេលបច្ចុប្បន្ន បាននិងកំពុងបំបែកទីផ្សារកាន់តែទូលាយ និងមានប្រជាប្រិយភាពខ្ពស់ក្នុងវិស័យសំណង់នៅកម្ពុជា។

វត្តមានរបស់ក្រុមហ៊ុនផលិតពិដាន និងទ្វារ PVC ម៉ាក SUNDOOR នៅលើទីផ្សារសំណង់កម្ពុជានាពេលបច្ចុប្បន្ន ត្រូវបានក្រុមហ៊ុនអភិវឌ្ឍន៍ជាច្រើនទទួលស្គាល់ និងជឿជាក់ទៅលើគុណភាព សោភ័ណភាព និងភាពទាក់ទាញយ៉ាងខ្លាំង សម្រាប់ការបំពាក់ដាក់បន្ទប់គេង ខុនដូ មន្ទីរពេទ្យ សាលារៀន វីឡា ផ្ទះល្វែង ដែលមានគុណភាពល្អ មិនរីករួម ស្រក អាចកម្មង់ទំហំទៅតាមតម្រូវការបែបទំនើបទាន់សម័យ។

អ្នកតំណាងក្រុមហ៊ុន SUNDOOR បានបញ្ជាក់ថា នៅក្នុងរយៈពេលដ៏ខ្លីនៃកិច្ចដំណើរការផ្គត់ផ្គង់ផលិតផលក្នុងវិស័យសំណង់នៅកម្ពុជាកន្លងទៅនេះ ខ្សែសង្វាក់ផលិតកម្មរបស់ក្រុមហ៊ុនបានប្រព្រឹត្តទៅយ៉ាងរលូន ខណៈដែលក្រុមហ៊ុនមានការតាំងចិត្តខ្ពស់ជាមួយនឹងការខិតខំប្រឹងប្រែងក្នុងការជំនះនូវរាល់ឧបសគ្គដែលប្រឈម ហើយធ្វើការដោះស្រាយដោយសន្ដិវិធី ដើម្បីឈានទៅដល់ការគោលដៅនៃភាពជោគជ័យយ៉ាងត្រចះត្រចង់។

គោលបំណងចម្បងរបស់ក្រុមហ៊ុនក្នុងរយៈពេលនេះ គឺចាំបាច់បំផុត ធ្វើគ្រប់មធ្យោបាយ ដើម្បីបំពេញនូវតម្រូវការរបស់អតិថិជន ធ្វើយ៉ាងណាពង្រីកវិសាលភាព និងចែកចាយនៅលើទីផ្សារគ្រប់បណ្តាខេត្តក្រុងនានានៅទូទាំងប្រទេសកម្ពុជា ដោយការផ្តល់ជូននូវផលិតផលថ្មីៗប្រកបដោយគុណភាពខ្ពស់ទៅកាន់ទីផ្សារកម្ពុជា ដែលកំពុងមានកំណើនសេដ្ឋកិច្ច និងកាលានុវត្តភាពនៃវិស័យពាណិជ្ជកម្មនៅពេលបច្ចុប្បន្ន និងបន្តទៅថ្ងៃអនាគត។

ជាមួយគ្នានេះ ក្រុមហ៊ុនក៏មានបេសកកម្មពិសេស ដើម្បីធ្វើការផ្តល់ជូននូវសេវាកម្ម រួមជាមួយនឹងផលិតផលមានគុណភាព ប្រកបដោយក្រមសីលធម៌របស់បុគ្គលិកជំនាញ មានសមត្ថភាព និងចំណេះដឹងយ៉ាងពិតប្រាកដ ដើម្បីបំពេញសេចក្ដីត្រូវការរបស់អតិថិជនគោលដៅរបស់ខ្លួន ដែលក្នុងនោះរួមមានជាអាទិ៍ ៖ អតិថិជនដែលជាអ្នកប្រើប្រាស់ផ្ទាល់ អ្នកចែកចាយបន្ត ក៏ដូចជាចែកចាយទៅតាមបណ្តាទីផ្សារនៅទូទាំងប្រទេសទៅតាមតម្រូវការ។
សម្រាប់ព័ត៌មានលម្អិតសូមទាក់ទងតាមរយៈទូរស័ព្ទលេខ ៖ 077 555 554 / 077 783 168 / 087 783 168

ចិនបានផ្តល់សម្បទានហិរញ្ញប្បទានជិត ៣០០០ លានដុល្លារក្នុងការកសាងហេដ្ឋារចនាសម្ព័ន្ធនៅកម្ពុជា

ដោយ ៖ វុត្ថា

ភ្នំពេញ ៖ រហូតមកដល់ពេលនេះ ប្រទេសចិនបានជួយអភិវឌ្ឍន៍កម្ពុជាឱ្យមានការរីកចំរើន តាមរយៈការផ្តល់សម្បទានហិរញ្ញប្បទានប្រមាណជិត ៣០០០លានដុល្លារអាមេរិក ក្នុងការកសាងសង់ប្រព័ន្ធហេដ្ឋារចនាសម្ព័ន្ធនៅក្នុងប្រទេសកម្ពុជា ។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន តាមប្រព័ន្ធវីដេអូពីចម្ងាយ ក្នុងវេទិកាវិនិយោគហេដ្ឋារចនាសម្ព័ន្ធ និងសំណង់លើកទី១១ ដែលបានប្រារព្ធធ្វើនៅទីក្រុងម៉ាកាវនៃចិន រយៈពេលពីរថ្ងៃ២-៣ ខែធ្នូ ឆ្នាំ២០២០បញ្ជាក់ថា ក្រៅតែពីការផ្តល់ជំនួយសម្បទានហិរញ្ញប្បទាននេះ ក្រុមហ៊ុនចិនក៏បានចូលរួមស្ថាបនាប្រព័ន្ធហេដ្ឋារចនាសម្ព័ន្ធនៅកម្ពុជាផងដែរ ដែលមានប្រវែងជាង ៣០០០ គីឡូម៉ែត្រនៅទូទាំងប្រទេស និងស្ពានធំៗចំនួន ៨ ដែលមានប្រវែង ៨គីឡូម៉ែត្រសម្រាប់ប្រទេសកម្ពុជាផងដែរ។

លោកបន្តថា “បន្ថែមពីនេះ គម្រោងសាងសង់ផ្លូវល្បឿនលឿនពីភ្នំពេញទៅកាន់ខេត្តព្រះសីហនុ ដែលជាផ្លូវល្បឿនលឿនលើកដំបូងនៅកម្ពុជា ក៏កំពុងត្រូវបានសាងសង់ដោយក្រុមហ៊ុនចិន China Road and Bridge ដែលមានតម្លៃវិនិយោគប្រមាណ ២០០០លានដុល្លារអាមេរិក” ។

លោកបន្ថែមថា “ជាមួយគ្នានេះ ក្រុមហ៊ុននេះ បានសិក្សាសមិទ្ធិលទ្ធភាពក្នុងការសាងសង់ផ្លូវល្បឿនលឿនពីភ្នំពេញទៅកាន់ក្រុងបាវិត នៃព្រំដែនកម្ពុជា-វៀតណាម ដោយតភ្ជាប់ទៅកាន់ទីក្រុងហូជីមិញ”។

បើតាមលោក ស៊ុន ចាន់ថុល ក្រៅពីការទទួលបានសម្បទានហិរញ្ញប្បទានពីប្រទេសចិន កម្ពុជាក៏ទទួលពីសប្បទានហិរញ្ញប្បទាន និង ជំនួយឥតសំណង ពីប្រទេសជប៉ុន កូរ៉េ ធនាគារពិភពលោក ធនាគារអភិវឌ្ឍន៍ហេដ្ឋារចនាសម្ព័ន្ធអាស៊ាន និង ដៃគូអភិវឌ្ឍន៍លើប្រព័ន្ធហេដ្ឋារចនាសម្ព័ន្ធជាច្រើនខ្សែផងដែរ។

លោក ស៊ុន ចាន់ថុល បញ្ជាក់ថា មូលនិធិទាំងអស់នេះទាំងពីវិស័យឯកជន និងសាធារណៈត្រូវបានយកមកស្តារ និងលើកកម្ពស់គុណភាពនូវបណ្តាញហេដ្ឋារចនាសម្ព័ន្ធនៅទូទាំងប្រទេសកម្ពុជាដោយតភ្ជាប់ពីភ្នំពេញទៅកាន់បណ្តាខេត្តនានានៅទូទាំងប្រទេស ដើម្បីបង្កើនការដឹកជញ្ជូនៅក្នុងស្រុក និងធ្វើពាណិជ្ជកម្មអន្តរជាតិ ព្រមទាំងការវិនិយោគ។

លោក ស៊ុន ចាន់ថុល ក៏បានលើកឡើងពីសគម្រោងផ្លូវដែកពីភ្នំពេញទៅកាន់ខេត្តព្រះសីហនុ និងពីភ្នំពេញទៅកាន់ព្រំដែនកម្ពុជា-ថៃក៏ត្រូវបានកែលម្អឱ្យកាន់តែប្រសើរសម្រាប់ធ្វើការដឹកជញ្ជូន។ ជាមួយគ្នានេះ កំពង់ផែកទឹកជ្រៅនៅក្រុងព្រះសីហនុដែលអាចធ្វើពាណិជ្ជកម្មបានប្រមាណ៧០ ភាគរយក៏ត្រូវបានពង្រីក និងធ្វើទំនើបកម្ម។ ក្រៅពីនេះ កំពង់ផែស្វាយ័តភ្នំពេញថ្មីនៅតាមដងទន្លេមេគង្គ ព្រលានយន្តហោះអន្តរជាតិភ្នំពេញថ្មី និងព្រលានយន្តហោះអន្តរជាតិក៏កំពុងត្រូវបានសាងសង់យ៉ាងសកម្មនាពេលបច្ចុប្បន្ននេះ ។

លោករដ្ឋមន្ត្រីរូបនេះបញ្ជាក់ថា ការអភិវឌ្ឍន៍ប្រព័ន្ធហេដ្ឋារចនាសម្ព័ន្ធនៅកម្ពុជាបានជួយឱ្យសេដ្ឋកិច្ចមានការរីកចំរើនក្នុងរង្វង់៧ភាគរយអស់រយៈពេលជាង២ទសវត្សកន្លងមកនេះ ហើយនឹងអាចជួយឱ្យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០៕

1...2,1512,1522,153...3,259 Page 2,152 of 3,259