ក្រុមហ៊ុនកាស៊ីណូរបស់ហុងកុងប្តូរទិសដៅវិនិយោគពីខេត្តព្រះសីហនុទៅកាន់ខេត្តកោះកុង

ដោយ ៖ ហ្សូលី

ភ្នំពេញ ៖ ក្រុមហ៊ុនវិនិយោគកាស៊ីណូរបស់ហុងកុង Century Entertainment International Holdings បានបង្ហាញព័ត៌មានច្បាស់ការណ៍ថា ក្រុមហ៊ុនសម្រេចចិត្តប្តូរទិសដៅវិនិយោគរបស់ខ្លួនពីក្រុងព្រះសីហនុ សម្តៅទៅខេត្តកោះកុងជំនួសវិញ។

ក្រុមហ៊ុន Century Entertainment នឹងផ្លាស់ប្ដូរតំបន់ប្រតិបត្តិការតុល្បែងពីទីតាំងកំណើតរបស់ខ្លួនស្ថិតនៅក្នុងខេត្តព្រះសីហនុ ឆ្ពោះទៅកាន់សណ្ឋាគារមួយនៅក្នុងស្រុកតារាសាគរ ខេត្តកោះកុងវិញ។

ជាមួយនឹងគោលបំណងនៃការផ្លាស់ប្តូរនេះ ប្រធានក្រុមហ៊ុន និងជាស្ថាបនិកក្រុមហ៊ុន Century Entertainment លោក Ng Man Sun ធ្លាប់បានបង្ហាញពីផែនការផ្លាស់ប្តូរទីតាំងពីសណ្ឋាគារ Sunshine Bay Hotel នៅក្នុងខេត្តព្រះសីហនុ ទៅកាន់សណ្ឋាគារ Ming Guan ដែលស្ថិតនៅក្នុងខេត្តព្រះសីហនុដូចគ្នា។

ផ្ទុយទៅវិញ ម្ចាស់កាស៊ីណូរូបនេះទទួលបានការផ្តល់ជូនដ៏ពិសេសពីអចលនទ្រព្យនៅស្រុកតារាសាគរ ខេត្តកោះកុងជំនួសវិញ។ ទីតាំងថ្មីនេះមានផ្ទៃក្រឡាសរុប ១០,៥០០ ម៉ែត្រការ៉េ ដែលអាចតម្លើងតុល្បែងចំនួន ៤០ តុ លំដាប់វីអាយភីចំនួន ៥៥ និងស្លុតម៉ាស៊ីន ៨០ ដោយក្នុងនោះក៏មានការបង្កើតភោជនីយដ្ឋានចិន ស្ប៉ា និងក្លឹបរាត្រី។ កាស៊ីណូនេះគ្រោងនឹងបើកដំណើរការនៅថ្ងៃទី ៣១ ខែមករា ឆ្នាំ ២០២១ ខាងមុខនេះ។

ក្រុមហ៊ុន Century Entertainment បានបង្ហាញកាលពីឆ្នាំមុនថា ខ្លួនបានចុះហត្ថលេខាលើកិច្ចព្រមព្រៀងរយៈពេល ៥ ឆ្នាំជាមួយក្រុមហ៊ុន Lion King Entertainment Company Ltd ដែលជាក្រុមហ៊ុនគ្រប់គ្រងទាំងស្រុងដោយនាយកប្រតិបត្តិរបស់ខ្លួនដែលក្នុងនោះក្រុមហ៊ុនត្រូវបានគេផ្តល់សិទ្ធិឱ្យធ្វើតារាងតុល្បែងរយៈពេល ៥ ឆ្នាំដោយគិតជាទឹកប្រាក់ចំនួន ១២០ លានដុល្លារហុងកុង។ ។ ក្រោយមកស្ថាបនិកក៏បានជូនដំណឹងទៅក្រុមហ៊ុនថា ការសម្រេចផ្លាស់ប្តូរទីលំនៅនឹងមិនប៉ះពាល់ដល់កិច្ចព្រមព្រៀងនោះទេ។

គម្រោងដំបូងដែលត្រូវបានបង្កើតឡើងជា គម្រោងទេសចរណ៍ដ៏ធំមួយនៅពេលត្រូវបានផ្តល់ទៅឱ្យក្រុមហ៊ុន TianJin Union Development របស់ប្រទេសចិនក្នុងឆ្នាំ ២០០៨។ ផែនការមហិច្ឆិតារយៈពេលវែងនៅក្នុងស្រុកតារាសាគររួមបញ្ចូលទាំងបណ្តាញផ្លូវដែកទៅកាន់ទីក្រុងភ្នំពេញ និងខេត្តសៀមរាប ចំណតសម្រាប់នាវាកម្សាន្តអាកាសយានដ្ឋាន សណ្ឋាគារ និងទីលានវាយកូនហ្គោលផងដែរ៕

កម្ពុជា ទទួលបានចំណូលជាង ១៨លានដុល្លារ ពីការលក់សំបុត្រចូលទស្សនាតំបន់អង្គរក្នុងរយៈពេល៩ខែកន្លងទៅនេះ

ដោយ ៖ ចរិយា

ភ្នំពេញ ៖ រមណីយដ្ឋានអង្គរវត្ត នៃខេត្តសៀមរាបបានស្វាគមន៍ភ្ញៀវទេសចរបរទេសសរុប ៣៩៦ ២៤១នាក់ក្នុងរយៈពេល៩ខែក្នុងឆ្នាំ២០២០នេះ ដោយរកចំណូលបាន ១៨ ៤៥៦ ០៣៧ ដុល្លារអាមេរិក។

តាមរយៈការបង្ហាញតួលេខពីគ្រឹះស្ថានអង្គរ ដែលជាស្ថាប័នគ្រប់គ្រងដោយរដ្ឋស្ថិតក្នុងបន្ទុកផ្នែកគ្រប់គ្រងប្រាក់ចំណូលអង្គរកាលពីម្សិលមិញ បានឱ្យដឹងថា ចំនួននៃអ្នកទេសចរបរទេសបានធ្លាក់យ៉ាងខ្លាំងរហូតដល់ ៧៦.១៧ភាគរយ ខណ:ដែលប្រាក់ចំណូលក៏បានធ្លាក់ចុះ ៧៥.១៧ភាគរយ បើប្រៀបធៀបទៅនឹងឆ្នាំមុន។

សម្រាប់ប្រាក់ចំណូល ដែលបានមកពីខាងលើ មកទល់ពេលនេះ ត្រូវបានបរិច្ចាកទៅកាន់មូលនិធិគន្ធបុប្ផាចំនួន ៧៩២.៤៨២ដុល្លាររួចទៅហើយ ដើម្បីគាំទ្រសកម្មភាពមនុស្សធម៌។

នៅក្នុងខែកញ្ញា ឆ្នាំ២០២០ នេះ ច្រកលក់សំបុត្រចូលទស្សនាប្រាសាទអង្គរ បាន ចំនួន២៩៤៨សំបុត្រទៅកាន់ភ្ញៀវទេសចរបរទេស ដោយទទួលបានប្រាក់ចំណូល ១២៤,២៩៦ដុល្លារ បានធ្លាក់ចុះប្រមាណ ៩៧.៣៤ភាគរយ ប្រៀបធៀបទៅនឹងរយៈពេលដូចគ្នាកាើពីឆ្នាំមុន។

លើសពីនេះទៅទៀត នៅក្នុងរយៈពេល៩ខែកន្លងទៅនេះ ភ្ញៀវទេសចរបរទេសចំនួន ៨ ៩១៤នាក់បានចូលទស្សនាប្រាសាទកោះកែស្ថិតនៅក្នុងខេត្តព្រះវិហារ ដោយរកចំណូលបាន ៩៨ ១៤០ដុល្លារពីការលក់សំបុត្រ៕

អាជ្ញាធរខេត្តកណ្តាល រំលឹកជាថ្មីចំពោះអ្នកទិញដីឡូតិ៍ត្រូវបង្កើនការប្រុងប្រយ័ត្ន

ដោយ ៖ រ៉ាណេត

កណ្តាល ៖ ជាថ្មីម្ដងទៀត អាជ្ញាធរខេត្តកណ្តាលបានធ្វើការក្រើនរំលឹកដល់ប្រជាពលរដ្ឋដែលមានបំណងទិញដីឡូតិ៍ទុកសម្រាប់សាងសង់លំនៅដ្ឋាននៅតាមតំបន់មួយចំនួន ត្រូវមានការប្រុងប្រយ័ត្នឱ្យបានខ្ពស់ ជៀសវាងទទួលរងនូវការខាតបង់ថវិកា ក្រោមការចាញ់បោកជនឆបោក។

អភិបាលរងខេត្តកណ្តាល លោក គីម រិទ្ធី នៅក្នុងកិច្ចប្រជុំផ្សព្វផ្សាយសេចក្ដីប្រកាសរបស់លក្រសួងសេដ្ឋកិច្ច និងហិរញ្ញវត្ថុស្ដីពីការគ្រប់គ្រងអាជីវកម្មអភិវឌ្ឍអចលនវត្ថុ កាលពីពេលថ្មីៗនេះ បានអំពាវនាវដល់សាធារណជនត្រូវយល់ដឹងនូវព័ត៌មានសំខាន់ៗមួយចំនួនមុនធ្វើការសម្រេចចិត្តទិញលំនៅឋាន ឬការទិញដីឡូត៍។

លោកបានបញ្ជាក់ថា “ការទិញដីឡូតិ៍ ឬគម្រោងផ្ទះល្វែងដោយការបង់រំលោះ គឺជាវិធីសាស្ត្រមួយដែលត្រូវបានអ្នកអភិវឌ្ឍន៍យកមកប្រើយ៉ាងទូលាយ ហើយក៏ជាការផ្តល់ឱកាសដល់អ្នកដែលមានធនធានតិច ប៉ុន្តែចង់មានដី និងផ្ទះកម្មសិទ្ធិរសប់ខ្លួន។ ប៉ុន្តែអ្វីដែលជារឿងសំខាន់ គឺត្រូវបង្កើនការប្រុងប្រយ័ត្នឱ្យបានខ្ពស់ និងសិក្សាអំពីប្រវត្តិរបស់ក្រុមហ៊ុនអភិវឌ្ឍន៍ ក៏ដូចជាគម្រោងឱ្យបានច្បាស់ជៀសវាងនូវការចាញ់បោកជនខិតខូចមួយចំនួនដែលលក់គម្រោងខ្យល់ ឬលក់គម្រោងដែលជាប់ពាក់ព័ន្ធទៅនឹងបញ្ហានៅមិនទាន់ដោះស្រាយចប់”។

ជាការទប់ស្កាត់នូវបញ្ហាមួយចំនួនដែលតែងកើតមាននៅលើទីផ្សារទិញ-លក់ អចនទ្រព្យ ជាពិសេសគម្រោងអភិវឌ្ឍន៍លំនៅដ្ឋាន និងការទិញដីឡូតិ៍ ក្រសួងសេដ្ឋកិច្ច និងហិរញ្ញវត្ថុ បានចេញច្បាប់ស្ដីពីការគ្រប់គ្រងអាជីវកម្មអភិវឌ្ឍអចលនវត្ថុ ដែលអាចជួយពង្រឹងសុវត្ថិភាពនៃការទិញ-លក់អចលវត្ថុនានា ជៀសវាងហានិភ័យជាយថាហេតុដែលបង្កឡើងដោយជនខិលខូច។ ដូច្នេះ សម្រាប់សាធារណជនទាំងអស់ មេត្តាយល់ដឹងនូវព័ត៌មានសំខាន់ៗមួយចំនួនពីគម្រោងឱ្យបានច្បាស់ មុនធ្វើការសម្រេចចិត្តទិញលំនៅឋាន ឬការទិញដីឡូតិ៍។

នៅក្នុងសេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុលេខ០៨៩ សហវ.ប្រក ចុះថ្ងៃទី២០ មករា ដែលចុះហត្ថលេខាដោយលោកឧបនាយករដ្ឋមន្រ្តី អូន ព័ន្ឋមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មានគោលបំណងសំខាន់ៗចំនួន៥។ គោលបំណងទី១ ធានាប្រសិទ្ឋភាពនៃការគ្រប់គ្រង និងត្រួតពិនិត្យអាជីវកម្មអភិវឌ្ឍន៍អចលនវត្ថុ ទី២ ធានាសមធ៌ម និងតុល្យភាពនៃផលប្រយោជន៍រវាងអ្នកអភិវឌ្ឍន៍ រវាងអ្នកត្រួតពិនិត្យ និងអ្នកប្រើប្រាស់ ទី៣ បង្ការទប់ស្កាត់ហានិភ័យហិរញ្ញវត្ថុ ក្នុងវិស័យអចលនវត្ថុ ទី៤ ធានាចីរភាពនៃការអភិវឌ្ឍអចលនវត្ថុ សំដៅបង្កើនជំនឿទុកចិត្ត ដើម្បីជម្រុញកំនើនសេដ្ឋកិច្ច និងទី៥ រួមចំណែកទប់ស្កាត់សកម្មភាពលាងសំអាតប្រាក់ ក្នុងវិស័យអាជីវកម្មអភិវឌ្ឍន៍អចលនវត្ថុ៕

ផ្សារទំនើបថ្មីមួយទៀត សម្ពោធដាក់ឱ្យដំណើរការនៅខេត្តព្រះសីហនុ

ដោយវុត្ថា

ភ្នំពេញ៖ ផ្សារទំនើប Prince Mall ដែលមានទីតាំងសង្កាត់លេខ៣ ក្រុងព្រះសីហនុ ខេត្តព្រះសីហនុ ត្រូវបានសម្ពោធដាក់ឱ្យដំណើរសាកល្បង ដើម្បីឆ្លើយតបទៅនឹងតម្រូវការទីផ្សារ និងការរីករចំរើនយ៉ាងឆាប់រហ័យនៃខេត្តព្រះសីហនុនៅក្នុងរយៈពេលប៉ុន្មានឆ្នាំកន្លងមកនេះ ។

លោក Zhang Rui Jun នាយកប្រតិបត្តិក្រុមហ៊ុន ព្រីនស៍ហ័នយូ រៀលអ៉ីស្ទេត មានប្រសាសន៍ កាលពីម្សិលមិញនេះ ឱ្យដឹងថា ដើម្បីឆ្លើយតបនិងយុទ្ធសាស្ត្រចតុកោណរបស់រាជរដ្ឋាភិបាលកម្ពុជាក្រុមហ៊ុនព្រីនស៍ ហ័នយូ រៀលអ៉ីស្ទេតគ្រុប ជាមជ្ឈមណ្ឌលទិញទំនិញបែបចម្រុះដំបូងបង្អស់នៅខេត្តព្រះសីហនុ ហើការបើកសម្ពោធសាកល្បងថ្ងៃនេះគឺទទួលបានការជួយជ្រោមជ្រែង និងការយកចិត្តទុកដាក់ពីរដ្ឋបាលខេត្តព្រះសីហនុ ព្រមទាំងស្ថាប័នពាក់ព័ន្ធ។

លោកបន្តថា នេះជាជំហានដំបូងយើងសង្ឃឹមយ៉ាងមុតមាំថារដ្ឋបាលខេត្ត ក៏ដូចជារាជរដ្ឋាភិបាលបន្តយកចិត្តទុកដាក់គាំទ្រប្រតិបត្តិការរបស់ក្រុមហ៊ុន និងផ្ដល់នូវផលិតផលដែលមានគុណភាព និងសេវាកម្មល្អ ធ្វើឲ្យខេត្តព្រះសីហនុ ទទួលបាននូវមជ្ឈមណ្ឌលទិញទំនិញបែបចម្រុះមួយ និងចូលរួមចំណែកក្នុងការបង្កើតឱកាសការងារ និងចំណូលពន្ធជូនរដ្ឋ ។

លោក គង់ វិតាណ: អភិបាលរងខេត្តព្រះសីហនុ បានថ្លែងសម្តែងការគាំទ្រសម្រាប់ការដាក់ឱ្យដំណើរការសាកល្បងផ្សារទំនើបព្រីនស៍ ម៉ល ក្នុងក្រុងព្រះសីហនុ ក្រោមគោលនយោបាយបើកចំហរ និងស៊ីជម្រៅរបស់ប្រទេសទាំងពីរ (កម្ពុជា-ចិន) ធ្វើឱ្យប្រទេសទាំងពីរមានទំនាក់ទំនងល្អ មានការអភិវឌ្ឍន៍រីកចំរើនយ៉ាងឆាប់រហ័ស ពិសេសគឺការអភិវឌ្ឍន៍នៅខេត្តព្រះសីហនុ នាពេលបច្ចុប្បន្ន ។

លោកបន្តថា ជាក់ស្ដែងយើងឃើញមានអ្នកវិនិយោគអន្តរជាតិយ៉ាងច្រើនមកវិនិយោគក្នុងខេត្តព្រះសីហនុ លើវិស័យឧស្សាហកម្ម ពាណិជ្ជកម្ម សំណង់ ដឹកជញ្ជូន និងទេសចរណ៍ជាដើម ។ភាពរីកចម្រើនលើវិស័យទាំងនេះបានចូលរួមចំណែកដល់កំណើនចំណូលរបស់ប្រជាពលរដ្ឋ និងកំណើនសេដ្ឋកិច្ចខេត្ត ។

លោកអភិបាលរងខេត្តបានបន្តថា ការសម្ពោធដាក់ឱ្យដំណើរការសាកល្បងផ្សារទំនើបព្រីនស៍ ម៉ល ដែលវិនិយោគដោយក្រុមហ៊ុន Prince Huan You Real Estate Cambodia Group Co. Ltd កំពុងបណ្ដាក់ទុនលើគម្រោងអភិវឌ្ឍន៍ក្នុងវិស័យជាច្រើនក្នុងប្រទេសកម្ពុជា ពិសេសនៅខេត្តព្រះសីហនុ ។

លោកបញ្ជាក់ទៀតថា នេះគឺជាសកម្មភាពបង្ហាញពីការជឿជាក់របស់អ្នកពីនិយោគទុនមកលើរាជរដ្ឋាភិបាលក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីរួមចំណែកក្នុងការជំរុញកំណើនសេដ្ឋកិច្ចកាត់បន្ថយភាពក្រីក្រ ផ្តល់ការងារជូនប្រជាពលរដ្ឋខេត្តព្រះសីហនុ ៕

តើអចលនទ្រព្យនៅក្រុងបាត់ដំបងកំពុងបង្ហាញសក្តានុពលសម្រាប់វិនិយោគ?

ដោយប៊ី

បាត់ដំបងៈ ជាខេត្តមានសេដ្ឋកិច្ចរីកចំរើនជាងគេ ខេត្តបាត់ដំបងចាប់ផ្តើមបង្ហាញសញ្ញាវិជ្ជមានលើផ្នែកអចលនទ្រព្យ ដោយខេត្តបង្ហាញសក្តានុពលសម្រាប់វិនិយោគ ខណៈអ្នកវិនិយោគចាប់ផ្តើម ទៅវិនិយោគនៅទីក្រុងបាត់ដំបងបណ្តើរៗ នាពេលបច្ចុប្បន្ននេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីម បានថ្លែងប្រាប់នៅល្ងាចទី១ ខែតុលា ឆ្នាំ២០២០កន្លងមកថា វិស័យអចលនទ្រព្យនៅក្នុងក្រុងបាត់ដំបង ចាប់ផ្តើមបង្ហាញសក្តានុពលសម្រាប់វិនិយោគ ហើយទីក្រុងនេះទទួលបានការវិនិយោគលើគម្រោងអចលនទ្រព្យជាបណ្តើរ។

លោកបានលើកឡើងថា“ខេត្តបាត់ដំបងជាមួយខេត្តមួយ ដែលភ្ជាប់ទំនាក់ទំនងជាមួយនឹងទីក្រុងភ្នំពេញ និងបណ្តាខេត្តផ្សេងៗដូចជា ខេត្តកោះកុង និងខេត្តសៀមរាប ហើយខេត្តជាខេត្ត ដែលសម្បូរដោយប្រជាជនមានជីវភាពធូរធា ដូច្នេះការប្រកបរបរមួយចំនួនក៏មានភាពធូរដែរ” ។

លោកបានថ្លែងថា វិស័យអចលនទ្រព្យនៅខេត្តបាត់ដំបង ចាប់ផ្តើមរីកចម្រើននៅក្នុងតំបន់នេះដែរ ជាពិសេសតំបន់នៅជាយក្រុងបាត់ដំបងតែម្តង ហើយអ្នកវិនិយោគិនមួយចំនួនចាប់ផ្តើមវិនិយោគនៅក្នុងខេត្ត។ លោកបន្តថា “ផ្ទះល្វែងនៅកៀកទីក្រុងបាត់ដំបងអាចតម្លៃចន្លោះពី៧ ទៅ៨ម៉ឺនដុល្លារ ហើយតម្លៃផ្ទះល្វែង ក្នុងក្រុងអាចមានតម្លៃជាង ១០ម៉ឺនដុល្លារ ហើយវានៅជាតម្លៃសមរម្យ។

លោកច្រឹក សុខនីម បានឱ្យដឹងទៀតថា “អ្នកវិនិយោគចាប់ផ្តើមទៅវិនិយោគនៅទីក្រុងបាត់ដំបងបណ្តើរៗនាពេលបច្ចុប្បន្ននេះ ប៉ុន្តែគ្រាន់ល្បឿននៃការវិនិយោគមិនទាន់លឿន ហើយវិនិយោគិនភាគច្រើនជាអ្នកមកក្នុងស្រុក” ។

អភិបាលខេត្តបាត់ដំបងលោកងួន រតនៈបានឱ្យដឹងកន្លងមកនេះថា ខេត្តបាត់ដំបងកាលពីកន្លងមកនេះ បានទាក់ទាញចំពោះការធ្វើអាជីវកម្ម និងអភិវឌ្ឍន៍នៅក្នុងវិស័យអចលនទ្រព្យ ប៉ុន្តែមានគម្រោងមួយចំនួនបានអនុវត្តន៍ បំពានលើច្បាប់ដែនដី ដូចជា ការចាក់ដីលុបស្ទឹង លុបប្រឡាយរបស់រដ្ឋជាដើម ដើម្បីទទួលបានផលប្រយោជន៍ខ្ពស់ ដែលសកម្មភាពនេះត្រូវតែជៀសវាងជាដាច់ខាត។

លោកបញ្ជាក់ថា “អ្នកធ្វើអាជីវកម្មវិស័យអចលនទ្រព្យ មុននឹងចង់វិនិយោគលើអាជីវកម្មរបស់ខ្លួន ត្រូវសិក្សាស្វែងយល់ពីតំបន់នីមួយៗ ឱ្យបានច្បាស់លាស់ មុននឹងដាក់ទុនវិនិយោគ ជៀសវាងមានផលប៉ះពាល់” ។

លោកបានបន្តថា អាជ្ញាធរខេត្តនឹងផ្ដល់លទ្ធភាព លើកទឹកចិត្ត ឱ្យមានការវិនិយោគផ្នែកអចលនាទ្រព្យក្នុងខេត្ត តាមរយៈការផ្ដល់ឯកសាររដ្ឋបាល ដោយមានគណនេយ្យភាព តម្លាភាព លឿនរហ័ស ប៉ុន្តែខាងម្ចាស់អាជីវកម្ម ក៏ត្រូវសិក្សាពីប្រព័ន្ធលូ បណ្ដាញអគ្គិសនី ទឹក និងផ្លូវជាដើម ដោយអនុវត្តឱ្យត្រឹមត្រូវតាមកិច្ចសន្យា និងផ្នែកច្បាប់៕

ក្រុមអ្នកជំនាញអចលនទ្រព្យជាតិ-អន្តរជាតិ នឹងបើកវគ្គបណ្តុះបណ្តាលពីការលក់ខុនដូនៅ Urban Village

ដោយៈ រ៉ាណេត

ភ្នំពេញៈ ក្រុមអ្នកជំនាញនៅក្នុងវិស័យអចលនទ្រព្យជាតិ និងអន្តរជាតិជាច្រើននាក់ នឹងឡើងធ្វើបទបង្ហាញយ៉ាងលម្អិតពីទីផ្សារអចលនទ្រព្យ ក៏ដូចជា ទីផ្សារខុនដូនៅកម្ពុជានាពេលបច្ចុប្បន្ន ជាពិសេសអធិប្បាយបញ្ជាក់ទៅលើផលចំណេញ ពីការទិញគម្រោងខុនដូប្រណីត តម្លៃសមរម្យ Urban Village ដែលកំពុងមានប្រជាប្រិយភាពខ្ពស់។

នាយកក្រុមហ៊ុនភ្នាក់ងារអចលនទ្រព្យ DNZ Realty លោក រិន ច័ន្ទរិទ្ធិ បានមានប្រសាសន៍ប្រាប់នៅល្ងាចថ្ងៃទី១ ខែតុលា ឆ្នាំ២០២០នេះថា កម្មវិធីនៃការបណ្តុះបណ្តាល និងបង្ហាញពីទីផ្សារអចលនទ្រព្យនៅកម្ពុជា ជាពិសេសការបង្ហាញពីឱកាសចំណេញពីការទិញគម្រោងខុនដូប្រណីត Urban Village នឹងត្រូវធ្វើឡើនៅរសៀលថ្ងៃទី៣ ខែតុលា ឆ្នាំ២០២០ចុងសប្ដាហ៍នេះ នៅទីតាំងអភិវឌ្ឍន៍គម្រោងខុនដូ Urban Village តែម្ដង ក្រោមប្រធានបទ “ការវិនិយោគលើគម្រោងខុនដូ” ។

លោកបានបន្តថា “នៅក្នុងកម្មវិធីនេះ នឹងមានការចូលរួមបកស្រាយ ទៅលើប្រធានបទសំខាន់ៗផ្សេងទៀត ដែលពាក់ព័ន្ធទៅនឹងទីផ្សារអចលនទ្រព្យ និងឱកាសនៃការវិនិយោគពីសំណាក់បណ្តាអ្នកជំនាញ នៅក្នុងវិស័យអចលនទ្រព្យជាតិ និងអន្តរជាតិ ដូចជា លោក ALAN NEO នាយកក្រុមហ៊ុនភ្នាក់ងារអចលនទ្រព្យ CSA លោក SOTH JOHNNY លោក BEN LI អ្នកនាង NIKA TENG រួមជាមួយនឹងរូបខ្ញុំផងដែរ” ។

សម្រាប់កម្មវិធីបណ្តុះបណ្តាល លើគម្រោងខុនដូក្រោមប្រធានបទ “ការវិនិយោគលើគម្រោងខុនដូ” ក្រោមកិច្ចសហការរៀបចំឡើង ដោយក្រុមហ៊ុនភ្នាក់ងារអចលនទ្រព្យ DNZ Realty និងក្រុមហ៊ុនភ្នាក់ងារអចលនទ្រព្យ CSA នឹងត្រូវបានបើកយ៉ាងទូលាយសម្រាប់សាធារណៈជន ដែលចង់ចូលរួមជាមួយនឹងកម្មវិធី ដោយមិនមានចំណាយថវិកានោះទេ។ នៅក្នុងឱកាសជាមួយគ្នានេះ ក៏នឹងមានការធ្វើបទបង្ហាញពីគោលបំណងនៃកិច្ចសហការរវាងក្រុមហ៊ុនទាំង២ ទៅលើការលក់គម្រោងខុនដូ Urban Ville ផងដែរ។

បន្ថែមពីនេះ គ្រប់អ្នកដែលបានចូលរួម នឹងទទួលបានចំណេះដឹងបន្ថែមថ្មីៗពាក់ព័ន្ធទៅនឹងប្រណីតភាព និងលក្ខណៈពិសេសនៃគម្រោងខុនដូ Urban Village ជាពិសេសការជ្រាប់កាន់តែច្បាស់ពីឱកាស នៃការវិនិយោគជាមួយគម្រោងប្រណីត ដែលស្ថិតនៅទីតាំងដ៏មានសក្ដានុពលរបស់ Urban Village ផងដែរ។

សូមចូលរួមទាំងអស់គ្នាចាប់ពីម៉ោង ២៖៣០នាទី និងទទួលទានអាហារពេលល្ងាចទាំងអស់៕
ទំនាក់ទំនងលេខ៖ 012/010 570 571

ឧកញ៉ាលឹម ហេង៖ វិស័យសំខាន់ៗចំនួន២របស់កម្ពុជាកំពុងមានសក្តានុពលខ្ពស់នាពេលបច្ចុប្បន្ន

ដោយៈវុត្ថា

ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមើលពីសក្តានុពលសំខាន់ៗចំនួន២ ដែលកំពុងមានសក្តានុពលខ្ពស់ និងមានការទាក់លើការវិនិយោគិនអន្តរជាតិនាពេលបច្ចុប្បន្នេះ បើទោះបីកម្ពុជាកំពុងប្រឈមនឹងវិបត្តិនៃជំងឺកូវីដ១៩។

លោកឧកញ៉ា លឹម ហេង បានប្រាប់គេហទំព័រ Propertyarea.asia នៅថ្ងៃទី ១ ខែតុលា ឆ្នាំ ២០២០កន្លងមកឱ្យដឹងថា នាពេលបច្ចុប្បន្ននេះ វិស័យសំខាន់ៗដែលកំពុងសក្តានុពលសេដ្ឋកិច្ចខ្លាំងរបស់កម្ពុជា រួមមាន វិស័យឧស្សាហកម្ម ដូចកាបូប ស្បែកជើង និង កង់ និងជាពិសេសវិស័យកសិកម្ម ដែលកំពុងមានការចាប់អារម្មណ៍លើកវិនិយោគទាំងវិនិយោគិនជាតិ និងអន្តរជាតិ។

លោកថ្លែងថា “នៅក្នុងសម័យកូវីដនេះ យើងឃើញវិស័យកសិកម្ម កំពុងកំរើកខ្លាំង ហើយនេះ គឺជាក្តីសង្ឃឹមរបស់កម្ពុជា” ។ លោកបន្តថា “ខ្ញុំបានជួបក្រុមហ៊ុនអាមេរិកជាច្រើន បានបង្ហាញបំណងពីការវិនិយោគលើវិស័យនេះនៅកម្ពុជា ទាំងក្រុមហ៊ុនកូរ៉េ ក្រុមហ៊ុនជប៉ុន ជាពិសេសក្រុមហ៊ុនចិន ដែលបង្ហាញឆន្ទះក្នុងការវិនិយោគជាងគេ” ។

លោកបន្តថា ក្រៅពីនេះយើងឃើញវិស័យឧស្សាហកម្ម ដែលកំពុងមានការកំរើកខ្លាំងដែរនោះ ដូចជា ផលិតកាបូប (ផលិតផលធ្វើដំណើរ) ស្បែកជើង និងកង់ ដែលមានការនាំចេញទៅទីផ្សារក្រៅប្រទេសបានច្រើន ក្នុងចំណោមវិស័យផ្សេងទៀត ។

លោកបញ្ជាក់ទៀតថា “អ្វីដែលប៉ះពាល់ខ្លាំង នៅក្នុងអំឡុងពេលមានវិបត្តិនេះ វិស័យទេសចរណ៍ បានទទួលរងនូវផលប៉ះពាល់យ៉ាងខ្លាំង ដោយសារគ្មានលំហូរភ្ញៀវទេសចរពីក្រៅប្រទេស តែសម្រាប់ទេសចរណ៍ក្នុងស្រុក មានកំណើនឡើងវិញដោយសារអ្នកដែលមានធនធាន មិនអាចទៅដើរលេងនៅស្រុកក្រៅបាន។ អ៊ីចឹង មានតែដើរលេងនៅក្នុងស្រុក ដែលជំរុញឱ្យវិស័យនេះ មានកំណើនឡើងវិញ” ។

បើទោះបីវិស័យមួយចំនួនមានសក្តានុពលខ្ពស់ ដូចជា វិស័យកសិកម្មជាដើមរបស់កម្ពុជា ប្រមុខរាជរដ្ឋាភិបាល សម្ដេចតេជោ ហ៊ុន សែនកាលពីពេលថ្មីនេះ បានដាក់ចេញវិធានការបន្ថែម ដើម្បីបន្តគ្រប់គ្រង ផលប៉ះពាល់លើវិស័យសំខាន់ៗ នៃសេដ្ឋកិច្ចនៅក្នុង បរិការណ៍នៃវិបត្តិ និងការស្ដារជំរុញកំណើនសេដ្ឋកិច្ចកម្ពុជា ក្រោយពីវិបត្តិនៃជំងឺកូវីដ-១៩ ។

រដ្ឋាភិបាលបញ្ជាក់ថា មកដល់បច្ចុប្បន្នការខិតខំ អភិវឌ្ឍន៍វ៉ាក់សាំងបង្ការកំពុងមាន វឌ្ឍនភាពល្អគួរជាទីសង្ឃឹម ប៉ុន្តែគ្មាននរណាដឹងថា ពេលណាវិបត្តិនៃជំងឺកូវីដ-១៩ នេះ នឹងបញ្ចប់ហើយក៏គ្មាននរណា អាចទស្សន៍ទាយ អំពីផលប៉ះពាល់មកលើគ្រប់ទិដ្ឋភាព នៃជីវភាពរស់នៅរបស់សង្គមជាតិនីមួយៗ បានជាក់ច្បាស់នោះដែរ។

រាជរដ្ឋាភិបាលបន្ដថា នៅកម្ពុជាវិបត្តិកូវីដ-១៩ នៅតែបន្តមានបង្កផលប៉ះពាល់អវិជ្ជមានមកលើស្ថានភាពសង្គម-សេដ្ឋកិច្ច ទោះបីជារាជរដ្ឋាភិបាលបាន និងកំពុងគ្រប់គ្រងការរីករាលដាលនៃជំងឺនេះ ប្រកបដោយប្រសិទ្ធភាពក៏ដោយ។ ក្រោមស្មារតីបុរេសកម្ម និងកិច្ចសហការយ៉ាងជិតស្និទ្ធពីសំណាក់ ប្រជាជន វិស័យឯកជន និងដៃគូអភិវឌ្ឍន៍នានា វិធានការចំនួន៥ជុំត្រូវបានដាក់ចេញ និងបានផ្តល់លទ្ធផលវិជ្ជមាន ដូចដែលបានព្រាងទុក។

ជាក់ស្តែង លំនឹងជីវភាពរបស់ប្រជាជន ក៏ដូចជាសកម្មភាពផលិតកម្ម និងអាជីវកម្មក្នុងវិស័យដែលបាន រងផលប៉ះពាល់ ក៏ចាប់ផ្តើមមានស្ថិរភាព និងប្រតិបត្តិការឡើងវិញ។ទោះបីជាយ៉ាងនេះក្ដី វិស័យសំខាន់ ៗមួយចំនួន រួមមានដូចជា៖ វិស័យកាត់ដេរ-វាយនភណ្ឌ ,វិស័យទេសចរណ៍ និងវិស័យអាកាសចរណ៍ជាដើម នៅតែរងផលប៉ះពាល់ ខ្លាំងជាងគេ ពីវិបត្តិនៃជំងឺកូវីដ-១៩ នេះ ។ ស្របពេលនេះដែរ គ្រួសារក្រីក្រ និងងាយរងគ្រោះមួយចំនួនក៏នៅកំពុងបន្តប្រឈមនឹងបញ្ហាលំបាក ក្នុងជីវភាពរស់នៅប្រចាំថ្ងៃផងដែរ។

រាជរដ្ឋាភិបាលនឹងបន្តតាមដាន ជាប្រចាំនូវស្ថានភាពនៃជំងឺកូវីដ-១៩ , ស្ថានភាពសេដ្ឋកិច្ច និងហិរញ្ញវត្ថុ ក្នុងក្របខណ្ឌតំបន់ និងសកលលោក ដើម្បីពិនិត្យ និងវាយតម្លៃពីផលប៉ះពាល់នៃជំងឺកូវីដ-១៩ មកលើវិស័យសំខាន់ៗនៃសេដ្ឋកិច្ចកម្ពុជា ក្នុងទិសដៅធ្វើបច្ចុប្បន្នភាពសម្រាប់វិធានការចាំបាច់ ដែលបានដាក់ចេញ ព្រមទាំងត្រៀមដាក់ចេញនូវវិធានការថ្មីៗប ក្រោមក្របខណ្ឌយុទ្ធសាស្ត្រស្តារសេដ្ឋកិច្ចឡើងវិញ ក្រោយវិបត្តិ ជំងឺកូវីដ-១៩ ៕

អ្នកជំនាញ៖ ទីផ្សារខុនដូចាប់ផ្តើមបង្ហាញសញ្ញាវិជ្ជមាន ប៉ុន្តែអ្នកទិញក៏ត្រូវបង្កើនការប្រុងប្រយ័ត្ន

ដោយៈ រ៉ាណេត

ភ្នំពេញៈ ចាប់តាំងពីដើមត្រីមាសទី៣ ជាពិសេសនៅដើមត្រីមាសទី៤នេះ ទីផ្សារខុនដូដែលផ្នែកមួយ នៅក្នុងវិស័យអចលនទ្រព្យបានបង្ហាញ ពីភាពពុះកញ្ជ្រោលជាងគេបើប្រៀបធៀបទៅនឹងផ្នែកដទៃទៀត ដូចជា ផ្នែកដីធ្លី និងលំនៅដ្ឋានជាដើម។

ប៉ុន្តែទោះជាយ៉ាងណា អ្នកជំនាញនៅក្នុងវិស័យអចលនទ្រព្យកម្ពុជា បានលើកឡើងថានេះគ្រាន់តែជាចាប់ផ្តើមតែប៉ុណ្ណោះ។

ប្រធានសមាគមអចលនទ្រព្យសកល លោក សំ សុខនឿន បានមានប្រសាសន៍តាមទូរស័ព្ទនៅរសៀលថ្ងៃទី១ ខែតុលា ឆ្នាំ២០២០នេះថា ភាពពុះកញ្ជ្រោលនៃទីផ្សារខុនដូពេល គឺគ្រាន់តែជាការចាប់ផ្តើមតែប៉ុណ្ណោះ ប៉ុន្តែវាជាសញ្ញាល្អដែលបង្ហាញពីស្ថានភាពវិជ្ជមាននៃវិស័យអចលនទ្រព្យ ងាកមករកភាពល្អប្រសើរវិញជាបណ្តើរ។

លោកបញ្ជាក់ថា “នៅចុងត្រីមាសទី៣នេះ ស្ថានភាពទីផ្សារអចលនទ្រព្យបានបង្ហាញសញ្ញាវិជ្ជមានជាបណ្តើរៗ ប៉ុន្តែវាគ្រាន់តែជាការចាប់ផ្តើមតែប៉ុណ្ណោះ ដែលភាពល្អប្រសើរនឹងបង្ហាញកាន់ច្បាស់នៅដើមឆ្នាំបន្ទាប់” ។ លោកបន្តថា “ភាពកល្អប្រសើរនៃវិស័យអចលនទ្រព្យកម្ពុជានៅពេលនេះ ត្រូវបានចែកដាច់ពីគ្នា ដែលក្នុងនោះផ្នែកទីផ្សារដីធ្លីនៅតែទទួលរងនូវផលប៉ះពាល់ ជាពិសេសគម្រោងអភិវឌ្ឍន៍ដីឡូតិ៍ បន្ទាប់មកទីផ្សារលំនៅដ្ឋានមានភាពល្អប្រសើរបន្តិច ដែលទាំងសកម្មភាពសាងសង់ និងសកម្មភាពទិញលក់នៅតែបន្តមានតម្រូវការពីអ្នកក្នុងស្រុក។

ដោយឡែកសម្រាប់តែទីផ្សារខុនដូ ឬលំនៅដ្ឋានសហកម្មសិទ្ធិ ហាក់មានភាពល្អប្រសើរ និងលេចធ្លោជាងគេបន្តិច។

លោកបានបន្តទៀតថា “អ្វីដែលជម្រុញឱ្យមានកំណើនតម្រូវការទីផ្សារខុនដូ ក៏ព្រោះតែភាពរីកចម្រើន និងការអភិវឌ្ឍនៅក្នុងក្រុងកាន់តែធំ ចំនួនមនុស្សកាន់តែច្រើន ហើយរុញច្រានផ្នែកទីផ្សារលំនៅដ្ឋាន ចេញទៅក្រៅក្រុង ដូច្នេះចង់មិនចង់ ការទិញខុនដូសម្រាប់រស់នៅរបស់មនុស្សជំនាន់ថ្មី និងទើបតែរៀបការ ជាពិសេសអ្នកដែលបម្រើការងារនៅក្នុងក្រុងត្រូវតែចាប់យកទីផ្សារសម្រាប់ស្នាក់នៅជាក់ស្ដែង ឬជាផ្ទះទី២របស់ខ្លួន” ។

លោកសំ សុខនឿនបានថា ទោះជាកំណើននៃតម្រូវការ ទីផ្សារខុនដូតម្លៃមធ្យមមានភាពពុះកញ្ជ្រោលយ៉ាងណាក៏ដោយ សម្រាប់អតិថិជនដែលជាអ្នកទិញសម្រាប់ស្នាក់នៅ ក៏ដូចជាទិញសម្រាប់វិនិយោគបន្តគួរតែពិចារណា និងសិក្សាពីគម្រោងឱ្យល្អិតល្អន់ ជៀសវាងជួបគម្រោងគាំង ឬគម្រោងពន្យាពេលសាងសង់ ដែលប្រឈមទៅនឹងការខកចិត្ត និងខាតបង់ថវិកា។

នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានទទួលស្គាល់ពីកំណើន នៃទីផ្សារខុនដូក្នុងមួយរយៈពេលខ្លីចុងក្រោយនេះ ដោយលោកស្រីអះអាងថា ភាគច្រើនជាតម្រូវការរបស់យុវជនជំនាន់ក្រោយ។

លោកស្រីបន្តថា “ពួកគាត់ដែលទើបតែរៀបការរួច ហើយមិនមានលទ្ធភាពគ្រប់គ្រាន់ ក្នុងការទិញលំនៅដ្ឋានជាប់ដីដែលមានតម្លៃថ្លៃ ដូច្នេះក្រោយពេលគាត់កកើតជាគ្រួសារថ្មី ពួកគាត់អាចទិញខុនដូដែលមានតម្លៃត្រឹមជាង៥ម៉ឺន ឬជាង៨ម៉ឺនដុល្លារ ដែលជាតម្លៃសមរម្យសម្រាប់ពួកគាត់” ។

ក្រៅពីនេះ ក៏មានតម្រូវការពីអ្នក ដែលមានផ្ទះជាន់ផ្ទាល់ដីរួចហើយ ដែលស្ថិតនៅជាយក្រុងផងដែរ ប៉ុន្តែបម្រើការងារ ឬធ្វើអាជីវកម្មប្រចាំថ្ងៃនៅក្នុងក្រុង ដូច្នេះពួកគាត់អាចជ្រើសរើសខុនដូណានៅទីតាំងណាមួយ ដើម្បីធ្វើជាផ្ទះទី២របស់ពួកគាត់ ដើម្បីងាយស្រួលក្នុងការធ្វើដំណើរបំពេញការងារ។

លោកស្រី អាន សុធីតាបានបញ្ជាក់់ថា “ខ្ញុំគិតថា ក្នុងរយៈពេលប្រមាណ១០ឆ្នាំទៅមុខទៀត ប្រជាជនខ្មែរអាចផ្លាស់ប្ដូរ ឥរិយាបទនៃការរស់នៅក្នុងខុនដូ អាចចន្លោះពី៣០-៤៥ភាគរយ ខណៈដែលពេលបច្ចុប្បន្ននេះ ទើបតែមានប្រមាណ១០ភាគរយតែប៉ុណ្ណោះ” ៕

តើការនាំចូលទំនិញក្រោមក្របខ័ណ្ឌជំនួយឥតសំណង ឥណទាន និងជំនួយមនុស្សធម៌ត្រូវមាននិតិវិធីបែបណា?

ដោយ វុត្ថា

ភ្នំពេញៈ ការនាំចូលទំនិញត្រូវធ្វើក្នុងក្របខ័ណ្ឌផ្សេងៗគ្នា ប៉ុន្តែការនាំចូលទំនិញក្នុងក្របខ័ណ្ឌមនុស្សធ៌ម ជាឥណទាន ជំនួយឥតសំណងជាដើម ត្រូវមាននិតិវិធីដាច់ដោយឡែកពីគ្នាផងដែរ។

តាមពិត ការនាំចូលទំនិញក្រោមក្របខ័ណ្ឌជំនួយឥតសំណង (ទ្វេភាគី ពហុភាគី អង្គការមិនមែន រដ្ឋាភិបាល) មុនការស្នើសុំលិខិតអនុញ្ញាតគយនាំចូល ដើម្បីនាំចូលឧបករណ៍ សម្ភារ គ្រឿងចក្រ យានយន្ត និង ផលិតផលតេលសិលាដោយពន្ធ និងអាករជាបន្ទុករបស់រដ្ឋ ក្នុងក្របខ័ណ្ឌហិរញ្ញប្បទានឥតសំណងសម្រាប់ អនុវត្តគម្រោងឬបម្រើក្នុងការិយាល័យរបស់ភ្នាក់ងារសហប្រតិបត្តិការអភិវឌ្ឍន៍ ភ្នាក់ងារអនុវត្តគម្រោង (រួមមាន ក្រសួងនិងស្ថាប័នរបស់រដ្ឋាភិបាលកម្ពុជា និង/ឬ ស្ថាប័នផ្តល់ហិរញ្ញប្បទានឥតសំណងនៃដៃគូ អភិវឌ្ឍន៍ អង្គការអន្តរជាតិ និងអង្គការមិនមែនរដ្ឋាភិបាល) ។

អ្នកអនុវត្តគម្រោង ត្រូវស្នើសុំការអនុញ្ញាតឲ្យ នាំចូលដោយពន្ធនិងអាករជាបន្ទុករបស់រដ្ឋ ពីក្រុមប្រឹក្សាអភិវឌ្ឍន៍កម្ពុជា/ គណៈកម្មាធិការនីតិសម្បទានិងអភិវឌ្ឍន៍ (ក.អ.ក/គ.ជ.នា) ។

បន្ទាប់ពីទទួលបានការអនុញ្ញាតឲ្យនាំចូលទំនិញ ដោយពន្ធ និងអាករជាបន្ទុករបស់រដ្ឋ ពីក.អ.ក/គ.ជ.នា អ្នកនាំចូលខាងលើ ត្រូវស្នើសុំលិខិតអនុញ្ញាតគយនៅ អគរ (នាយកដ្ឋានរបបគយ) ដោយភ្ជាប់មកជាមួយ នូវឯកសារចាំបាច់នានារួមមាន៖

លិខិតអនុញ្ញាតឲ្យនាំចូលទំនិញដោយពន្ធ និងអាករជាបន្ទុករបស់រដ្ឋពីក.អ.ក/គ.ជ.នា
លិខិតស្នើសុំការអនុញ្ញាតឲ្យនាំចូលដោយពន្ធ និងអាករជាបន្ទុករបស់រដ្ឋពីក.អ.ក/គ.ជ.នា។
វិក្កយបត្រទំនិញ បញ្ជីវេចខ្ចប់ និង ឯកសារដឹកជញ្ជូន លិខិតប្រគល់សិទ្ធិសម្រាប់អ្នកតំណាង និងឯកសារពាក់ព័ន្ធផ្សេងទៀតក្នុងករណីចាំបាច់៕

រដ្ឋាភិបាលអនុម័តបង្កើតរោងចក្រចំនួន ២នៅក្នុងរាជធានីភ្នំពេញក្នុងទំហំទុនជិត ៥លានដុល្លារ

ដោ៖យ វុត្ថា

ភ្នំពេញ ៖ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគបង្កើតរោងចក្រកាត់ដេរសម្លៀកបំពាក់ចំនួន ២នៅក្នុងរាជធានីភ្នំពេញ ដែលផ្តល់ឱកាសការងារដល់ពលរដ្ឋជាង ១០០០នាក់

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី ១ ខែតុលា ឆ្នាំ ២០២០នេះ បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១. AWTEX GARMENT CO., LTD គម្រោងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ មានទុនវិនិយោគប្រមាណ ២,២លានដុល្លារអាមេរិក និងអាចបង្កើតការងារបានចំនួន ៥៧៩កន្លែង។

២. HERMO (CAMBODIA) CO., LTD គម្រោងកាត់ដេរសម្លៀកបំពាក់ និងស្រោមដៃ ដែលមានទីតាំងវិនិយោគស្ថិតនៅភូមិជំរៅ សង្កាត់គោករកា ខណ្ឌព្រែកភ្នៅ រាជធានីភ្នំពេញ មានទុនវិនិយោគប្រមាណ ២,៧លានដុល្លារអាមេរិក និងអាចបង្កើតការងារបានចំនួន ៩៣៤កន្លែង៕