ក្រុមហ៊ុន​ដឹក​ជ​ញ្ជួ​ន​ខ្នាត​យក្ស​លំដាប់​យក្ស​របស់​ប្រទេស​ចិន បានប្រកាសឈាន​ជើង​ចូល​កម្ពុជា

ដោយ ប៊ី

ភ្នំពេញៈ ក្រុមហ៊ុន BEST Inc., ផ្តល់​ដំណោះស្រាយ​ខ្សែសង្វាក់​ផ្គត់ផ្គង់​ឆ្លាត​វៃ​ឈានមុខ​គេ និង​ជា​អ្នកផ្តល់​សេវាកម្ម​ដឹក​ជ​ញ្ជួ​ន​នៅ​ប្រទេស​ចិន នៅ​ថ្ងៃ​ម្សិល​ម៉ិ​ញ​នេះ​បានប្រកាស​ពង្រីក​បន្ថែម​ទៀត​របស់ខ្លួន​ទៅកាន់​អាស៊ីអាគ្នេយ៍។ នេះ​បើ​យោងតាម​សេចក្តីប្រកាស​ព័ត៌មាន​របស់​ក្រុមហ៊ុន​នេះ ។

ការបើក​ដំណើរការ​សេវាកម្ម ដឹកជញ្ជូន​រហ័ស​រប​ស់​ក្រុមហ៊ុន នឹងធ្វើ​ឡើង​នៅ​ប្រទេស​ម៉ាឡេស៊ី កម្ពុជា និង​សឹង្ហ​បុរី បន្ទាប់ពី​ប្រទេស​ថៃ និង​វៀតណាម​កាលពី​ឆ្នាំមុន និង​ជាការ​បោះជំហាន​ទៅមុខ​ដ៏​សំខាន់​មួយទៀត នៅក្នុង​មហិច្ឆតា​របស់​ក្រុមហ៊ុន ក្នុង​ការកសាង​បណ្តាញ​ភ័ស្តុភារ​ដឹកជញ្ជូន ប្រកបដោយ​ប្រសិទ្ធភាព ជាមួយនឹង​ការ​គ្របដណ្តប់​យ៉ាង​ទូលំទូលាយ​នៅក្នុង​តំបន់​អាស៊ីអាគ្នេយ៍។

ក្រុមហ៊ុន​ក៏បាន​ប្រកាស​បង្កើន ដំណោះស្រាយ​ដឹក​ជ​ញ្ចូ​ន​អន្តរជាតិ ដោយ​បើក​ដំណើរការ​សេវាកម្ម​ឆ្លងកាត់​ព្រំដែន រវាង​ប្រទេស​ចិន និង​ទីផ្សារ​ចំនួន៥នៅ​អាស៊ីអាគ្នេយ៍​ក្នុង​ខែ​នេះ។

លោក Johnny Chou ស្ថាបនិក និង​ជា​ប្រធាន​នាយក​ប្រតិបត្តិ​នៃ​ក្រុមហ៊ុន Best Inc បាន​មានប្រសាសន៍ថា “យើង​មានការ​រំភើប​ក្នុងការ​អភិវឌ្ឍ បណ្តាញ​ភ័ស្តុភារ​របស់​យើង​នៅ​អាស៊ីអាគ្នេយ៍ ដែលជា​តំបន់​ផ្តោត​សំខាន់ នៃ​យុទ្ធសាស្ត្រ​សកល​របស់​យើង” ។ លោក​បាន​បន្តថា “ការផ្ទុះ​ឡើង​នៃ​ជំងឺ COVID-១៩ បាន​បង្កើនល្បឿន និង​ការពឹងផ្អែក​របស់​អតិថិជន​ទៅលើ ពាណិជ្ជកម្ម​តាម​ប្រព័ន្ធ​អេ​ឡិច​ត្រូ​និ​ច និង​បង្កើត​ឱកាស​សក្តានុពល​កាន់តែ​ធំ​នៅក្នុង​តំបន់” ។

លោក​បាន​ថ្លែងថា យើង​មាន​ទំនុកចិត្ត​ថា​សេវាកម្ម​ដឹក​ជ​ញ្ចូ​ន ដែល​ផ្តល់​ដោយ​បច្ចេកវិទ្យា​របស់​យើង និង​ជម្រើស​ដឹកជញ្ជូន ដែលមាន​គុណភាព​ខ្ពស់ នឹង​ក្លាយជា​សមាសធាតុ​សេវាកម្ម​ដ៏​សំខាន់​សម្រាប់​ទាំង​ពាណិជ្ជករ និង​អ្នកប្រើប្រាស់​ទាំង ក្នុងអំឡុងពេល​ដ៏​លំបាក​នេះ និង​លើសពីនេះ​ទៀត។

ដោយ​ប្រើ​គំរូ និង​បទពិសោធន៍​ជោគជ័យ​នៅក្នុង​ប្រទេស​ថៃ និង​វៀតណាម ក្រុមហ៊ុន គ្រោង​នឹង​ដំណើរការ​មជ្ឈមណ្ឌល​ត​ចំនួន១២ និង​ស្ថានីយ​សេវាកម្ម​ចំនួន៤០០កន្លែង​នៅ​ទូទាំងប្រទេស​ម៉ាឡេស៊ី កម្ពុជា និង​សឹង្ហ​បុរី​ក្នុង​រយៈពេល៣ឆ្នាំ​ខាងមុខ។ នេះ​រួមបញ្ចូល​ទាំង​មជ្ឈមណ្ឌល ទៅតាម​តម្រូវការ​ពីរ​នៅ​ទីក្រុង​គូ​ឡា​ឡាំ​ពួ និង​រាជធានី​ភ្នំពេញ ដែល​នឹងត្រូវ​បំពាក់​ដោយ​ឧបករណ៍​ស្វ័យប្រវត្តិកម្ម​ទំនើប ដូចជា ស្វ័យប្រវត្តិកម្ម​ល្បឿន​លឿន និង​ប្រព័ន្ធ​ស្កេ​ន​ទម្ងន់។

យោងតាម​ការស្រាវជ្រាវ​រួមគ្នា​របស់ Google, Temasek និង Bain & Company ដោយមាន​អ្នកប្រើប្រាស់​អ៊ី​ន​ធឺ​ណេ​ត តាម​ទូរស័ព្ទ​ចល័ត​មាន​ចំនួន៣៦០លាន​នាក់ វិស័យ​ពាណិជ្ជកម្ម​តាម​ប្រព័ន្ធ​អេឡិចត្រូនិក នៅ​អាស៊ីអាគ្នេយ៍​នឹងមាន​តម្លៃ​ដល់ ១៥០ពាន់​លាន​ដុល្លារ​នៅ​ឆ្នាំ២០២៥ កើនឡើង៣៨ពាន់​លាន​ដុល្លារ​អាមេរិក​ក្នុង​ឆ្នាំ ២០១៩ ។

ដើម្បី​ឆ្លើយតប​នឹង​ការកើនឡើង តម្រូវការ​ពាណិជ្ជកម្ម​តាម​ប្រព័ន្ធ​អេ​ឡិច​ត្រូ​និ​ច និង​ការវិវឌ្ឍ​តំរូវការ​របស់​អតិថិជន ក្រុមហ៊ុន BEST ផ្តល់ជូន​ជម្រើស​នៃ​ការ​ចែកចាយ​នៅ​ថ្ងៃក្រោយ​សំ​ម្រា​ប់​តំបន់សំខាន់ៗនៃ​ប្រទេស​ថៃ និង​ការ​ចែកចាយ​នៅ​ថ្ងៃ​តែមួយ​នៅ​ទីក្រុង​ហូជីមិញ និង​ហាណូយ​ប្រទេស​វៀតណាម។ បរិមាណ​កញ្ចប់​ដឹង​ជ​ញ្ជួ​ន​របស់​ក្រុមហ៊ុន​មកពី​អាស៊ីអាគ្នេយ៍ បាន​កើន​ដល់៨,៨លាន​កញ្ចប់​នៅក្នុង​ត្រីមាស​ទី១ ៕

ពលរដ្ឋ និង​អាជ្ញាធរខេត្ត​កំពង់​ឆ្នាំ កំពុង​ទន្ទឹង​រងចាំ​បើក​រដ្ឋា​ន​សាងសង់​ស្ពាន​ឆ្លងកាត់ទន្លេ​ពី​កំពង់ឆ្នាំង ទៅកាន់​ខេត្តកំពង់ធំ

ដោយៈ​វ​ឌ្ឍ​នា

ភ្នំពេញៈ ពលរដ្ឋ និង​អាជ្ញាធរខេត្ត​កំពង់ឆ្នាំង កំពុង​រងចាំ​ការបើក​ក​រដ្ឋា​ន​សាងសង់​ស្ពាន​ឆ្លង​កាន់​ទន្លេ​ត​ភ្ជាប់​ពី​កំពង់ឆ្នាំង ទៅកាន់​ខេត្តកំពង់ធំ បន្ទាប់ពី​ប្រមុខ​នៃ​រាជរដ្ឋាភិបាល​កម្ពុជា  សម្តេច​ជោ ហ៊ុន សែន បានប្រកាស​ពី​គម្រោង​សាងសង់​ស្ពាន​ដ៏​វែង​ជា​គេ​នេះ  ខណៈដែល​មន្ត្រីជាន់ខ្ពស់​របស់​ក្រសួង​សាធារណការ និង​ដឹកជញ្ជូន​បាន​អះអាងថា មិនទាន់​អាច​ដំណើ​ករ​សាងសង់ឆាប់ៗនេះ​បាន​នោះទេ។

លោក​ស្រ៊ន សំ​ឬ​ទ្ធី អ្នកនាំពាក្យ​រដ្ឋបាលខេត្ត​កំពង់ឆ្នាំង បានឱ្យដឹង​កាលពី​ម្សិលមិញ​ថា រដ្ឋបាលខេត្ត​កំពុងតែ​រងចាំ​ដំណឹង​ល្អ ពី​ការចាប់ផ្តើម​សាងសង់​ស្ពាន​នេះ ដើម្បី​សម្រួល ដល់​ការធ្វើដំណើរ​របស់​ប្រជាពលរដ្ឋ ប៉ុន្តែ​ប្រហែល​មកពី​បញ្ហា​ជំងឺ​កូ​វីដ១៩ បានធ្វើឱ្យ​មានការ​ផ្អាក់​បណ្តោះអាសន្ន។

លោក​បន្តថា លោក​បានឃើញ​ក្រុមការងារ​របស់​ក្រសួង​សាធារណការ និង​ដឹកជញ្ជូន​បាន​ចុះមក​សិក្សា​ជា​បន្តបន្ទាប់ ប៉ុន្តែ​ក្រុមការងារ​មិនទាន់​បង្ហាញ ពី​ពេលវេលា​ជាក់​នៅឡើយ​ទេ ប៉ុន្តែ​យ៉ាងណាក៏ដោយ​លោក ក្នុងនាម​រដ្ឋបាលខេត្ត និង​ប្រជាពលរដ្ឋ​មាន​ក្តី​រំពឹងថា គម្រោង​នេះ​នឺង​ចាប់ផ្តើម​ឆាប់​ខាងមុខនេះ ព្រោះ​ពលរដ្ឋ​កំពុងតែ​រងចាំ។

លោក​ថ្លែងថា “ព្រោះ​នៅពេល​មាន​ស្ពាន​នេះ វា​នឹង​ជួយ​កាត់បន្ថយ​ការ​ការធ្វើដំនើរ និង​លឿន​ជាង​មុ​នេះ ជាពិសេស​កាត់បន្ថយ​ការ​ការដឹកជញ្ជូន​ង​ផងដែរ” ។ លោក​បន្តថា “ខេត្ត​កំពង់​ឆ្នាំ មាន​សក្តានុពល​ខ្ពស់​លើ​វិស័យ​កសិកម្ម នៅតាម​ដង​ទន្លេ  និង​ជា​ខេត្ត​ឆ្លងកាត់​ពី​ភ្នំពេញ​ទៅ​បាត់​ដំ​ង ពោធិសាត់  បន្ទាយមានជ័យ និ​ប៉ោយប៉ែត​ជាដើម ហើយ​នៅពេលដែល​ស្ពាន​ត្រូវបាន​សាងសង់ឡើង ប្រជាពលរដ្ឋ​មកពី​សៀមរាប នឹង​កាត់បន្ថយ​ការធ្វើដំណើរ  ។

លោក​បន្តថា ស្ពាន​នេះ​នឹង​ជួយ​សម្រួល តាមរយៈ​ការកាត់បន្ថយ​ការចំណាយ​ពីមួយ​ម៉ោង​ទៅ២ម៉ោង បើ​ពលរដ្ឋ​មកពី​សៀមរាប ដែល​ប​ច្ច​ប្បន្ន​នេះ ពលរដ្ឋ​ត្រូវ​ធ្វើដំណើរ​ឆ្លងកាត់​ភ្នំពេញ​វាង​ឆ្ងាយ ហើយ​ខាត​ពេល​ទៀត។

លោក​គង់ វិមាន នាយក​ខុទ្ទកាល័យ​របស់​ក្រសួង​សាធារណការ និង​ដឹកជញ្ជូន បានឱ្យ​ប្រាប់​ឱ្យដឹងថា ចំពោះ​ដំណើរ​ការបើក​រដ្ឋា​ន សាងសង់​ស្ពាន​ឆ្លងទន្លេ​ត​ភ្ជាប់​ពី​ខេត្ត​កំពង់​ឆ្នាំ ទៅកាន់​ខេត្តកំពង់ធំ​នេះ មិនទាន់​អាច​ចាប់ផ្តើមឆាប់ៗ ព្រោះ​ការ​ទំលាក់​កញ្ចប់​ថវិកា​នៅ​ក្រសួង​សេដ្ឋកិច្ច និង​ហិរញ្ញវត្ថុ។

លោក​បន្តថា “លោក​ក៏​មិនទាន់​ដឹង​ពី​ពេលវេលា​ជាក់លាក់ ក្នុង​ការបើក​រដ្ឋា​ន​សាងសង់​ដែរ អាស្រ័យ​លើ​ក្រសួង​សេដ្ឋកិច្ច និង​ហិរញ្ញវត្ថុ​ជា​អ្នក​ទំលាក់​កញ្ចប់​ថវិកា​ឱ្យ​ក្រសួង​ដើម្បី​ដំណើរការ” ។

ទោះជា​យ៉ាងណា  លោក វ៉ា​ស៊ីម សូ​រី​យ៉ា អ្នកនាំពាក្យ​ក្រសួង​សាធារណៈការ និង​ដឹកជញ្ជូន​ធ្លាប់បាន​ឱ្យដឹងថា គម្រោង​សាងសង់​ស្ពាន​ត​ភ្ជាប់​ពី​កំពង់ឆ្នាំង ទៅកាន់​ខេត្តកំពង់ធំ អាច​នឹង​ចាប់ផ្តើម​សាងសង់​នៅក្នុង​ឆ្នាំ២០២៣ តែ​បច្ចុប្បន្ននេះ រដ្ឋាភិបាល​កំពុង​អនុវត្តន៍​គម្រោង​អាទិភាព​របស់ខ្លួន​មួយចំនួន។

លោក​បញ្ជាក់ថា “រដ្ឋាភិបាល​នៅតែ​សាងសង់​គម្រោង​ស្ពាន​នេះ មិន​បោះបង់ចោល​ទេ តែ​បច្ចុប្បន្ននេះ រដ្ឋាភិបាល​បង្វែរ​កញ្ចប់​ថវិកា​អនុវត្តន៍ លើ​គម្រោង​អាទិភាព​មួយចំនួន​ដូចជា​ផ្លូវជាតិ​លេខ១០ ផ្លូវជាតិ​លេខ​៧០C  និង ផ្លូវជាតិ៤១ ជាដើម មុននឹង​ចាប់ផ្តើម​អនុវត្ត​គម្រោង​សាងសង់​ស្ពាន​ឆ្លងកាត់​ទន្លេសាប​នេះ” ។

លោក​បន្តថា គម្រោង​សាងសង់​ស្ពាន​ឆ្លងកាត់​ទន្លេសាប ពី​កំពង់​ឆ្នាំ​ទៅកាន់​ខេត្តកំពង់ធំ​នេះ អាច​នឹង​ចាប់ផ្តើម​អនុវត្ត​នៅ​ឆ្នាំ២០២៣ខាងមុខនេះ។ រដ្ឋាភិបាល​អនុវត្តន៍​ទៅតាម​ដំណាក់កាល ឬ​កញ្ចប់​អាទិភាព​របស់ខ្លួន គឺ​មិនអាច​អនុវត្តបាន​គម្រោង​ទាំងអស់​នៅក្នុងពេល​តែមួយ​បាន​នោះទេ ព្រោះ​ត្រូវ​ចំណាយ​ថវិកា​ច្រើន។

លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណៈការ និង​ដឹកជញ្ជូន​ឱ្យដឹង​កន្លង​ល​មកនេះ​ថា គម្រោង​សាងសង់​ស្ពាន​ឆ្លងកាត់​ទន្លេ​វែង​ជាងគេ ត្រូវបាន​ដាក់ចូល​ទៅក្នុង​ផែនការ​អាទិភាព និង​ជា​ជំរើស​ទី១របស់​ក្រសួង សម្រាប់​សាងសង់​នៅក្នុង​ឆ្នាំ២០២០នេះ  តែ​យ៉ាងណា​វា​អាស្រ័យ​លើ​ក្រសួង​សេដ្ឋកិច្ច និង​ហិរញ្ញវត្ថុ​ជា​អ្នក​ដាក់​ជា​គម្រោង​អាទិភាព ឬ​យ៉ាងណា​ង​សម្រាប់​សាងសង់​នាពេលខាងមុខ។

លោក​បន្តថា គម្រោង​សាងសង់​ស្ពាន​ឆ្លង​កាន់​ទន្លេ​នេះ មាន​ប្រវែង​ប្រមាណ៤គីឡូម៉ែត្រ​ឆ្លង​ពី​ខេត្តកំពង់ឆ្នាំង ឆ្ពោះទៅកាន់​ខេត្តកំពង់ធំ​នេះ​គ្រោង​ចំណាយ​ថវិកា​ប្រមាណ២០០លាន​ដុល្លារ​អាមេរិក ត្រូវបាន​សិក្សា​ចប់សព្វគ្រប់​ព្រមទាំង​ក្រសួងបរិស្ថាន បានចេញ​លិខិតបញ្ជាក់​ដោយ​គ្មាន​ប៉ះពាល់​អ្វី​ទាំងអស់ ក្នុងការ​សាងសង់​ស្ពាន​នេះ។

សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា​នៅក្នុង​ពិធី​អញ្ជើញ​ជា​អធិបតី​ក្នុង​ពិធីបុណ្យ​ទន្លេ​លើក​ទី៥ កាលពី​ថ្ងៃទី ១៦មីនា ឆ្នាំ២០១៩ កន្លងមកនេះ បាន​មានប្រសាសន៍​ជំរុញ ឱ្យមាន​ការសាងសង់​ស្ពាន​ត​ភ្ជាប់​ពី​ខេត្តកំពង់ឆ្នាំង ទៅកាន់​ខេត្តកំពង់ធំ​នេះ​ឱ្យបាន​លឿន ដើម្បី​សម្រួល​ដល់​ការដឹកជញ្ជូន​ទំនិញ និង​ធ្វើដំណើរ​របស់​ប្រជាពលរដ្ឋ។

សម្តេច​តេ​ជោ​បន្តថា ស្ពាន​ត​ភ្ជាប់​ពី​ខេត្ត​កំពង់​ឆ្នាំ ឆ្ពោះទៅ​ខេត្តកំពង់ធំ​នេះ​មាន​ប្រវែង​រហូតដល់​ទៅ ៣,៩០០ម៉ែត្រ ដែល​នឹង​ក្លាយជា​ស្ពាន​វែង​ជាងគេ​បំផុត នៅក្នុង​ប្រទេស​កម្ពុជា ដោយ​ស្ពាន​នេះ​នឹង​សាងសង់​ឆ្លងកាត់​ដៃទន្លេ​ចំនួន៣ រួមមាន ទន្លេ​ផ្សារ​ក្រោម ទន្លេ​ជល់​មុខ និង​ទន្លេ​កំពង់​ហាវ” ។

សម្តេច​បន្តទៀតថា គម្រោង​ស្ពាន​នេះ នឹង​ជួយ​សម្រួល​ដល់​ការធ្វើដំណើរ ការដឹកជញ្ជូន កាត់បន្ថយ​ពេលវេលា ក៏ដូចជា កាត់បន្ថយ​ការចំណាយ​ក្នុងពេល​ធ្វើដំណើរ ដោយ​មិន​ចាំ​ធ្វើដំណើរ​វាង​ចូលទៅ​ខេត្តកណ្តាល កំពង់ចាម ទើប​ចូល​ទៅដល់​ខេត្តកំពង់ធំ​ទៀតឡើយ៕

ដំណឹង​ល្អ៖ ច្បាប់​វិនិយោគ​ថ្មី​នឹង​ទាក់ទាញ​ការវិនិយោគ​បរទេសថ្មីៗជាច្រើនទៀត​មកកាន់​កម្ពុជា

ដោយ​គង់ សូរិយា

ភ្នំពេញៈ រដ្ឋាភិបាល​កម្ពុជា​បាន និង​កំពុង​រៀបចំ​ច្បាប់​វិនិយោគ​ថ្មី ដើម្បី​ទាក់ទាញ​វិនិយោគ​បរទេសថ្មីៗបន្ថែមទៀត ខណៈដែល​កន្លងមកនេះ​កម្ពុជា បានដាក់​ចេញ​នូវ​គោលនយោបាយផ្សេងៗ ដើម្បី​ជួយ​សម្រួល​ដល់​ឱកាស​វិនិយោគ​នៅក្នុង​ប្រទេស និង​ទ្រទ្រង់​សេដ្ឋកិច្ចជាតិ ឱ្យមាន​លំនឹង​នៅក្នុង​វិបត្តិ​ជំងឺ Covid-19 ដែល​កំពុង​រាលដាល​ជា​សាកល។

រដ្ឋលេខាធិការ ក្រសួង​សេដ្ឋកិច្ច និង​ហិរញ្ញវត្ថុ លោក​ផាន់ ផល្លា បាន​មានប្រសាសន៍​ឲ្យ​ដឹង​នៅក្នុង​សន្និសីទ​ស្តីពី​វិធានការ​ទ្រទ្រង់​ស្តារ និង​ជំរុញ​កំណើនសេដ្ឋកិច្ច និង​កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ក្រីក្រ និង​ងាយ​រងគ្រោះ​កាលពីពេលថ្មីៗនេះ​ថា ច្បាប់​វិនិយោគ​ថ្មី ដែល​រាជរដ្ឋាភិបាល​បាន​នឹង​កំពុង​ធ្វើ​នេះ គឺ​ក្នុង​គោលបំណង​ទាក់ទាញ​វិនិយោគ​បន្ថែម ខណៈដែល​បច្ចុប្បន្ន មាន​ចលនា​រោងចក្រ​នៅក្នុង​ប្រទេស និង​ក្រៅប្រទេស។

លោក​បន្តថា “ច្បាប់​យើង​នេះ​យើង​ធ្វើ​យ៉ាងម៉េច​ឱ្យមាន​វិស័យថ្មីៗ ដូចជា​វិស័យ​មិនមែនជា​វិស័យ​កាត់ដេរ ក្នុងន័យ​នោះ​វិស័យ​កាត់ដេរ​ក៏​យើង​នៅតែ​ទាក់ទាញ វិស័យ​ទេសចរណ៍​ក៏​នៅតែ​ទាក់ទាញ តែ​វិស័យ​ផ្សេងទៀត​ដែល​យើង​មិនទាន់បាន​អភិវឌ្ឍន៍ យើង​ទាក់ទាញ​ពួកគាត់​ឱ្យ​វិនិយោគ​នៅក្នុង​ប្រទេស” ។

លោក​បន្ថែមថា “ច្បាប់​វិនិយោគ​ថ្មី​នេះ​ផងដែរ ក៏​នឹងចូលរួម​ដោះស្រាយ​បញ្ហា​ចាស់​ដែលមាន​ពី​កន្លងមកនេះ   ហើយ​មិនទាន់​ដោះស្រាយ ហើយ​នៅពេល​មានច្បាប់​ថ្មី​នេះ​ចេញទៅ​យើង​រំពឹងថា វា​នឹង​ផ្តល់​បរិយាកាស​ល្អ​ដល់​ធុរកិច្ច” ។ លោក​បន្តថា “ខ្ញុំ​គិតថា វិនិយោគិន នឹង​មិនមាន​បញ្ហា​ច្រើន​នោះទេ នៅពេលដែល​គេ​មក​វិនិយោគ​នៅក្នុង​ប្រទេស​កម្ពុជា​យើង” ។

សេដ្ឋកិច្ចពិភពលោក​កំពុង​ទទួលរង​ផលប៉ះពាល់​ធ្ងន់ធ្ងរ ពី​ការរីក​រាលដាល​ជំងឺ Covid-19 ហើយ​សេដ្ឋកិច្ចកម្ពុជា​ក៏បាន និង​កំពុង​ទទួល​ឥទ្ធិពល​អវិជ្ជមាន​នេះ​ផងដែរ ពិសេស​វិស័យ​ទេសចរណ៍ កម្មន្តសាល និង​សំណង់។

រាជរដ្ឋាភិបាល​ក្រោម​ការដឹកនាំ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​ដាក់ចេញ​វិធានការ ប្រកបដោយ​ប្រសិទ្ធភាព ក្នុងការ​ទប់ស្កាត់ ការឆ្លង​ជំងឺ​កូ​វីដ១។ ជាមួយគ្នានេះ វិធានការ​គាំទ្រ ចំពោះ​វិស័យ​ដែល​ប៉ះពាល់ និង​ប្រជាពលរដ្ឋ​ងាយ​រងគ្រោះ ត្រូវបាន​ដាក់​ជា​បន្តបន្ទាប់ ដែល​បាន​កាត់បន្ថយ​ផលប៉ះពាល់ និង​រក្សា​និរន្តរភាព​នៃ​អាជីវកម្ម ព្រមទាំង​ជីវភាព​រស់នៅ​របស់​ប្រជាពលរដ្ឋ។

អនុប្រធាន​សភាពាណិជ្ជកម្ម​កម្ពុជា លោក​ឧកញ៉ា​លឹម ហេង​បាន​មានប្រសាសន៍ថា ច្បាប់​វិនិយោគ​ថ្មី ដែល​បាននិងកំពុង​ធ្វើ​សមាហរណកម្ម និង​អនុម័ត​ឲ្យ​ប្រើប្រាស់​នាពេល​ខាង​ង​មុខ នឹង​ផ្តល់​បរិយាកាស​វិនិយោគ ពិសេស​លើកទឹកចិត្ត​អ្នកវិនិយោគ​ក្នុងស្រុក​ឲ្យ​ទទួលបាន​នូវ​ឳ​កាស​បន្ថែមទៀត ក្នុងការ​បង្កើត​អាជីវកម្ម និង​ពង្រីក​អាជីវកម្ម​របស់​ពួកគេ ពិសេស​កាត់បន្ថយ​ការិយាធិបតេយ្យ​នៅ​កម្ពុជា។

លោក​បន្តថា “ខ្ញុំ​បានស្នើ​រដ្ឋាភិបាល​ឲ្យ​អនុគណៈកម្មការវិនិយោគខេត្ត ឬ CDC ខេត្តអាច​អនុម័ត​គំរោង​វិនិយោគ​ពី២លាន​ដល់១០លាន​ដុល្លារ​អាមេរិក និង​មិនចាំបាច់​មកសុំ​ច្បាប់​នៅតាម​ស្ថាប័ន​ពាក់​ព័​ន្ឋ​ច្រើន​នោះទេ ដើម្បីលើកទឹកចិត្ត និងគាំទ្រឱ្យមានការវិនិយោគនៅតាមបណ្តាខេត្តឱ្យបានច្រើន បង្កើនឱកាសការងារ កាត់បន្ថយការចំណាក់ស្រុក ដែល​ការស្នើសុំ​នេះ​បានទទួល​ការយល់ព្រម​ពី​រដ្ឋាភិបាល​ហើយ។ លោក​បន្តថា “ច្បាប់​វិនិយោគ​ថ្មី ពិតជា​នឹង​ផ្តល់​ឳ​កាស​ដល់​អ្នកវិនិយោគ​ជា​តិ អន្តរជាតិ​កាន់​តែមាន​ភាពងាយស្រួល​ក្នុង​ការធ្វើ​ជំនួញ​នៅ​កម្ពុជា​បន្ថែមទៀត” ៕

តំបន់​ជុំវិញ​ព្រលានយន្តហោះ​អន្តរជាតិ​ភ្នំពេញ​ថ្មី ចាប់ផ្តើម​ទាក់ទាញ​ការអភិវឌ្ឍ​លំនៅដ្ឋាន និង​មជ្ឈមណ្ឌល​ពាណិជ្ជកម្ម​នានា

ដោយៈ​ស៊ីវ ម៉េង

កណ្តាលៈ ការសាងសង់​ព្រលានយន្តហោះ​អន្តរជាតិ-ភ្នំពេញ​ថ្មី​បាននិងកំពុង​បង្កើនល្បឿន ស្របពេល​អ្នកវិនិយោគ​ក្នុងស្រុក​ភាគច្រើន បានចាប់ផ្តើម​អភិវឌ្ឍន៍​បុរី លំនៅដ្ឋាន និង​មជ្ឈមណ្ឌល​ពាណិជ្ជកម្ម​នានា​ន ដើម្បី​ទទួលបាន​ផលប្រយោជន៍​ពី​អ្នកដំណើរ​ឆ្លងកាត់​តំបន់​នេះ។

អភិបាលខេត្ត​កណ្តាល លោក គង់ សោ​ភ័​ណ្ឌ បាន​មានប្រសាសន៍ប្រាប់​តាម​ទូរស័ព្ទ​កាលពីពេលថ្មីៗនេះ​ថា បច្ចុប្បន្ន​ក្រុមហ៊ុន​ទទួល​ម៉ៅការ បាននិងកំពុង​ព​ន្លឿ​ន​សកម្មភាព​សាងសង់​ទៅតាម​គម្រោង និង​ផែនការ​របស់​ពួកគេ ដោយ​ឃើញ​មាន​គ្រឿងចក្រ​ជាច្រើន​កំពុង​ធ្វើ​សកម្មភាព។

លោក​បន្តថា “ការអភិវឌ្ឍ​ក្នុង​វិស័យ​សំណង់​របស់​ឯកជន ដូចជា​ការសាងសង់​លំនៅដ្ឋានផ្សេងៗ ដូចជា បាន​ចាប់​ផ្ត​លម​សកម្មភាពបណ្តើរៗហើយ។ ប៉ុន្តែ​ខ្ញុំ​គិតថា​មិនយូរ​ទៀត​នោះទេ គម្រោង​អភិវឌ្ឍន៍​មួយចំនួន នឹង​លេចចេញ​ជា​រូបរាង​ជាក់​ជាមិនខាន បន្ទាប់ពី​ហេដ្ឋារចនាសម្ព័ន្ធ​មួយចំនួន​ត្រូវបាន​បង្ហាញ” ។

នាយិកា​ក្រុមហ៊ុន​ភ្នាក់ងារ​អចលនទ្រព្យ AMATAK Property Service លោកស្រី តាំង ហួរ បាន​មានប្រសាសន៍ថា សម្រាប់​ការអភិវឌ្ឍ​វិស័យ​លំនៅដ្ឋាន​នៅ​តំបន់​ជាប់ ឬ​ក្បែរ​គម្រោង​សាងសង់ ព្រលាន​យន្ត​អន្តរជាតិ-ភ្នំពេញ​ថ្មី ចាប់ផ្តើម​មាន​សកម្មភាព​នៅឡើយ​នោះទេ ដែល​វា​ត្រូវការ​ពេលវេលា​បន្តិចទៀត។

លោកស្រី​បាន​បន្តថា “យើង​ឃើញថា​កំណើន​នៃ​ការអភិវឌ្ឍ វិស័យ​លំនៅដ្ឋាន​នៅ​ប៉ែក​ខាងត្បូង​ក្រុងមាន​កំណើន​ច្រើន ខណៈ​ផ្ទៃដី​នៅ​តំបន់​នេះ​ភាគច្រើន​ត្រូវបាន​អ្នក​ភិ​វឌ្ឍន៍​ទិញ​ទុក ដែល​រង់ចាំតែ​ពេលវេលា​ល្អ មកដល់​ពួក​នឹង​ចាប់ផ្តើម​សកម្មភាព​សាងសង់​ជាមិនខាន” ។

លោកស្រី​តាំង ហួរ បាន​បញ្ជាក់ថា សព្វថ្ងៃនេះ សម្រាប់​វិស័យ​លំនៅដ្ឋាន​ភាគខាងត្បូង​ក្រុង គឺ​នៅតែ​បន្ត​មានការ​សាងសង់​ជា​បន្តបន្ទាប់ ហើយ​តម្រូវការ​ក៏​នៅតែមាន​ទៅលើ​ប្រភេទ​លំនៅដ្ឋាន ដែលមាន​តម្លៃ​ក្រោម ១០ម៉ឺន​ដុល្លារ ជាពិសេស​បណ្តុំ​លំនៅដ្ឋាន​ដែល​ស្ថិតនៅ​ផ្លូវធំ​នៃ​តំបន់​ជាយក្រុង។ ជាក់ស្ដែង​ដូចជា នៅ​ម្ដុំ​គួរ​ស្រូវ តំបន់​ព្រែក​កំ​ពឺ​ស និង​តំបន់​ព្រែក​ហូរ ជាដើម ដែល​កំពុងមាន​សកម្ម​ភាព​សាងសង់​ដ៏​មមាញឹក។

អគ្គនាយក​ក្រុមហ៊ុន​ភ្នាក់ងារ​អចលនទ្រព្យ Century21 Fortuna Investment លោក វ៉ា វីរៈ បាន​មាន​លើកឡើងថា ភាព​រីកចម្រើន​និង​តម្រូវការ​ទីផ្សារ​ដីធ្លី និង​លំនៅដ្ឋាន​នៅ​ភាគខាងត្បូង​រាជធានី​ភ្នំពេញ​ខាងលើនេះ គឺមាន​ភាពខុសគ្នា ហើយ​កម្រិត​នៃ​ការ​ឡើងថ្លៃ​ក៏​ខុសគ្នា​ដែរ ដែល​វា​អាស្រ័យ​ទៅតាម​គម្រោង​អភិវឌ្ឍន៍នីមួយ។

លោក​បន្តថា “នៅក្នុង​អំឡុង​ពេលនេះ បើ​ទោះ​ស្ថានភាព​នៃ​វិស័យ​ដីធ្លី​នៅ​តំបន់​ខាងលើ​មាន​ភាពល្អប្រសើរ​ក្ដី ប៉ុន្តែ​សម្រាប់​ការវិនិយោគ និង​អភិវឌ្ឍន៍​របស់​វិស័យ​ឯកជន​នៅមានកម្រិត​នៅឡើយ” ។ លោក​បន្តថា “អ្វីៗជាប់​ពាក់ព័ន្ធ​ទៅនឹង​វិបត្តិ​សេដ្ឋកិច្ច ដែល​កំពុង​កើតមាន ដែល​ក្នុងដំណាក់កាល​នេះ ទាំង​អ្នកវិនិយោគ ទាំង​អ្នក​អភិវឌ្ឍន៍ ពួកគេ​មិន​បញ្ចេញ​កញ្ចប់​ថវិកា​ដែលមាន​ទំហំ​នោះទេ” ។

គម្រោង​អាកាសយានដ្ឋាន​អន្តរជាតិ​ភ្នំពេញ​ថ្មី ស្ថាបនា​លើដី​ទំហំ​ប្រមាណ២៦០០ ហិកតា មាន​បណ្តោយ​ប្រមាណ៦គីឡូម៉ែត្រ និង​ទទឹង​ប្រមាណ៤គីឡូម៉ែត្រ ។ ដំណើការ នៃ​ការសាងសង់​ព្រលាន​យានដ្ឋាន​អន្តរជាតិ​ភ្នំពេញ​ថ្មី អាច​នឹង​រួចរាល់​នៅ​ឆ្នាំ២០២៣ខាងមុខនេះ។ ទុនវិនិយោគ​ព្រលានយន្ដហោះ​មួយ​នេះ មាន​ទំហំ​ទឹកប្រាក់​ប្រមាណ១៥០០លាន​ដុល្លារ ដែលជា​ប្រភេទ 4F អនុញ្ញាតឱ្យ​ប្រភេទ​ព្រលានយន្តហោះ​ធំ Airbus A380-800 និង យន្តហោះ Boeing 747-800 ហោះហើរ​ពី​ឆ្ងាយ​ឆ្លង​ទ្វីប​ចុះចត​បាន៕

តើវិស័យអាកាសចរណ៍កម្ពុជាមានការវិវត្តដូចម្តេចនាពេលបច្ចុប្បន្ននេះ?

        ដោយគង់ សូរិយា

        ភ្នំពេញៈ វិស័យអាកាសចរណ៍កម្ពុជា ក៏ដូចជាពិភពលោកនៅតែរងផលប៉ះពាល់ខ្លាំងពីវិបត្តិសេដ្ឋកិច្ច ដោយសារជំងឺកូវីដ១៩នៅឡើយ ដែលបញ្ហានេះបានជះឥទ្ឋិពលយ៉ាងខ្លាំងដល់សេដ្ឋកិច្ចជាតិ។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល លោកស៊ិន ចាន់សិរីវុត្ថាបានមានប្រសាសន៍ឲ្យដឹង តាមទូរស័ព្ទកាលពីថ្ងៃម្សិលម៉ិញថា វិស័យអាកាសចរណ៍នៅកម្ពុជា កំពុងតែមានផលប៉ះពាល់ធ្ងន់ធ្ងរនៅឡើយ ដោយសារជំងឺកូវីត១៩ ដែលបញ្ហានេះមិនត្រឹមតែប៉ះពាល់ដល់កម្ពុជានោះទេ ប៉ុន្តែប៉ះពាល់ដល់ពិភព​លោកទាំងមូល។

លោកបន្តថា “យើងមិនអាចទស្សន៍ទាយ ពីពេលវេលាល្អប្រសើរឡើងនោះទេ ដរា​បណាជំងឺនេះ នៅតែរីករាលដាល ប៉ុន្តែយើងរំពឹងថាអ្វីៗនឹងល្អប្រសើរ បន្ទាប់ពីវ៉ាក់សាំងកូវីដ១៩ ត្រូវបានចែកចាយទូលំទូលាយ ធ្វើឲ្យមនុស្សលែងភ័យខ្លាច ហើយហ៊ានធ្វើដំណើរឡើងវិញ”។

លោកស៊ិន ចាន់សិរីវុត្ថាបានបន្តទៀតថា វិស័យនេះនៅតែត្រូវការពេវេលា ព្រោះពេលនេះការធ្វើដំណើរទូទាំងពិភពលោក ត្រូវបានកាត់បន្ថយជាអតិបរិមា ដោយសារការភ័យខ្លាចជំងឺនេះ។

ជាមួយគ្នានេះ លោកឃាង ភារម្យអ្នកនាំពាក្យរដ្ឋបាលខេត្តព្រះសីហនុបានមានប្រសាសន៍ថា វិស័យអាកាសចរណ៍នៅខេត្តព្រះសីហនុ នៅតែមិនទាន់មានសកម្មភាពច្រើននៅឡើយ ដោយសារជំងឺកូវីដ១៩ ប៉ុន្តែយើងទទួលបានជើងហោះហើរចន្លោះពី៣ទៅ៤ក្នុងមួយសប្តាហ៍ ដែលភាគច្រើនហោះមកពីប្រទេសចិន និងប្រទេសមួយចំនួនទៀត។

លោកបន្តថា “នៅពេលជំងឺនេះបានបញ្ចប់ ខ្ញុំជឿថាសេដ្ឋកិច្ចនៅក្រុងព្រះសីហនុនឹងមានការរីកចម្រើនឡើងវិញច្រើន ដោយសារអ្នកវិនិយោគចិននឹងត្រលប់មកវិញ ព្រោះពួកគេមិនចាកចោលអាគារពួកគេ ដែលបានបោះទុនវិនិយោគរាប់លានដុល្លារនោះទេ”៕

ប្រតិបត្តិករ ៖ ត្រីមាសទី១ឆ្នាំ២០២១រំពឹងថាសកម្មភាពទិញលក់ដីឡូត៍មានកំណើនឡើងវិញ

ដោយ ៖ វុត្ថា

ភ្នំពេញ ៖ ចាប់តាំងពីពាក់កណ្តាលឆ្នាំ២០២០ដែលកំពុងវាយឡុកយ៉ាងខ្លាំងក្លាដោយវិបត្តិសេដ្ឋកិច្ចជាសាកល ទីផ្សារដីឡូត៏ក៏ទទួលនូវផលប៉ះពាល់មិនខុសពីទីផ្សារអចលនវត្ថុដទៃទៀតឡើយ ប៉ុន្តែសម្រាប់ដើមឆ្នាំ២០២១នេះ ប្រតិបត្តិករផ្នែកដីឡូត៍បានបង្ហាញពីក្ដីរំពឹងថាទីផ្សារមួយនេះអាចនឹងងើបឡើងវិញខណៈដែលភាពប្រឈមនៅក្នុងប្រទេសត្រូវបានកាត់បន្ថយ។

អគ្គនាយកក្រុមហ៊ុនភ្នាក់ងារអចលនទ្រព្យ Lucky Realty Co,.Ltd លោកឌិត ចណ្ណា បានមានប្រសាសន៍ឱ្យដឹងនៅថ្ងៃទី៥ ខែមករា ឆ្នាំ២០២១នេះថា នៅក្នុងឆ្នាំ ២០២០គឺជាឆ្នាំមួយដែលវិស័យអចលនទ្រព្យ ជាពិសេសផ្នែកដីធ្លីនៅតំបន់ខ្លះមានការប៉ះពាល់ព្រោះតែវិបត្តិ។ ដោយឡែកសម្រាប់ទីផ្សារដីឡូត៍ក៏មានសកម្មភាពថមថយដែរ ព្រោះប្រជាជនមួយចំនួនបានបាត់បង់ការងារ បាត់បង់ប្រាក់ចំណូល ធ្វើឱ្យការទិញដីឡូត៍មានការធ្លាក់ចុះ ជាពិសេសនៅតំបន់ដែលមានសក្ដានុពល។

លោកបន្តថា “មិនថាតែដីឡូត៍នោះទេ ដែលមានសកម្មភាពថយចុះ ផ្នែកផ្សេងទៀតនៃវិស័យអចលនទ្រព្យក៏មានបញ្ហាដែរ ដូចជាសកម្មភាពវិនិយោគ គម្រោងសាងសង់ និងការទិញលក់ផ្សេងៗជាដើម”។ លោបានបញញជាក់ថា “ដោយឡែកនៅឆ្នាំ២០២១នេះ ដោយសារតែវ៉ាក់សាំងប្រឆាំងកូវីដ១៩ កាន់តែមានពន្លឺ ជាពិសេសភាពភ័យខ្លាចរបស់ប្រជាជនកម្ពុជាត្រូវបានកាត់បន្ថយ មនុស្សជាច្រើនចាប់ផ្តើមចេញដើរ និងធ្វើអាជីវកម្មឡើងវិញ ដូច្នេះយើងសង្ឃឹមថាទីផ្សារមួយនេះ អាចនឹងមានការងើបឡើងវិញនៅពេលឆាប់ៗ”។

ភ្នាក់ងារអចលនវត្ថុមួយរូបប្រចាំខេត្តកំពត លោកសុខ គែន ក៏បានឱ្យដឹងដែរថា នៅក្នុងវិបត្តិឆ្នាំ២០២០ ការទិញលក់ដីធ្លីទូទៅ មិនថាចំពោះដីឡូត៍ ឬដីសម្រាប់អភិវឌ្ឍគម្រោងធំៗនោះទេ គឺមានការធ្លាក់ចុះ ប៉ុន្តែសកម្មភាពនៃការសាងសង់ និងអភិវឌ្ឍន៍គម្រោងសំណង់មួយចំនួន ជាពិសេសការសាងសង់ជាលំនៅដ្ឋានបែបលំហែរ និងការកែច្នៃជាតំបន់កម្សាន្តជាដើម។

លោកបន្តថា “ភ្ញៀវភាគច្រើនមកពីភ្នំពេញ មករកទិញដីនៅខេត្តកំពត ហើយគោលដៅរបស់ពួកគេគឺរកដីភូមិ ដីជាប់មាត់ព្រែក និងដីដែលមានសក្ដានុពលសម្រាប់សាងសង់លំនៅដ្ឋានលំហែកាយ តែសម្រាប់ដីពុះឡូត៍ ដែលមានក្រុមហ៊ុនជាច្រើនមកវិនិយោគនោះ មិនសូវមានសកម្មភាពប៉ុន្មាននោះទេ”។

អ្នកជំនាញនៅក្នុងវិស័យអចលនទ្រព្យបានលើកឡើងថា គ្រប់គម្រោងនៃការអភិវឌ្ឍពុះដីឡូត៍នៅតាមបណ្តាខេត្តនានាក្នុងប្រទេសកម្ពុជាបានផ្ដល់ចូលរួមផ្តល់ផលប្រយោជន៍សង្គមជាតិ និងសេដ្ឋកិច្ច ជាពិសេសផ្ដល់ភាពងាយស្រួលដល់ប្រជាពលរដ្ឋ ដែលមិនមានលទ្ធភាពគ្រប់គ្រាន់ក្នុងការទិញដីបង់ផ្ដាច់ ជាមួយនឹងលក្ខខណ្ឌនៃការបង់ជាដំណាក់កាលប្រចាំខែ។ សកម្មភាពនេះដែរ ក៏បានផ្ដល់ចំណូលមួយចំនួនរដ្ឋផងដែរ តាមរយៈការបង់ពន្ធប្រថាប់ត្រាទៅកាន់អគ្គនាយកដ្ឋានពន្ធដារផងដែរ៕

ដើមឆ្នាំ២០២១ ទីផ្សារលំនៅដ្ឋានជាប់ដីតម្លៃសមរម្យចាប់ផ្តើមកម្រើកសាជាថ្មី

ដោយ ៖ រ៉ាណេត

ភ្នំពេញ ៖ ឆ្លងផុតឆ្នាំ២០២០ ដែលប្រឈមទៅនឹងហានិភ័យខ្ពស់នៃការរាលដាលឆ្លងជំងឺក្នុងសង្គមនោះ សម្រាប់ដើមឆ្នាំ២០២១នេះ ត្រូវបានអ្នកអភិវឌ្ឍ និងភ្នាក់លក់លំនៅដ្ឋានជាប់ដីតម្លៃសមរម្យដែលស្ថិតនៅតាមតំបន់ជាយក្រុងអះអាងថាបានចាប់ផ្តើមមានសកម្មភាពឡើងវិញសាជាថ្មីក្រោយពីការប្រកាសបញ្ចប់ភាពភ័យខ្លាចនៃព្រឹត្តិការណ៍២៨វិច្ឆិកា។

អគ្គនាយកក្រុមហ៊ុន PREMIUM Group លោកម៉ាន់ ច័ន្ទឌីបានមានប្រសាសន៍នៅល្ងាចថ្ងៃទី៥ ខែមករា ឆ្នាំ២០២១នេះថា ចាប់តាំងពីរាជរដ្ឋាភិបាលប្រកាសបញ្ចប់ពីភាពភ័យខ្លាចក្នុងព្រឹត្តិការណ៍២៨វិច្ឆិកាកាលពីពេលកន្លងទៅថ្មីៗនេះ កំណើននៃការលក់លំនៅដ្ឋានតម្លៃសមរម្យដែលស្ថិតនៅតាមបណ្តាតំបន់ជាយក្រុងនានាចាប់ផ្តើមកម្រើកឡើងវិញ។

លោកបន្តថា “ការកើនឡើងនៃការលក់នេះ ក៏ព្រោះតែមនុស្សចាប់ផ្តើមចេញដើរសាជាថ្មី លែងមានការភ័យខ្លាច ដែលក្នុងរួមមានទាំងអ្នកតំណាងផ្នែកលក់ក៏ទៅកាន់ទីតាំងគម្រោង ទាំងអ្នកមានតម្រូវការទិញសម្រាប់ស្នាក់នៅជាក់ស្ដែង ក៏ដូចជាអ្នកដែលមានទុនគ្រប់គ្រាន់ទិញទុកសម្រាប់ជួល ឬវិនិយោគបន្តយកចំណេញផងដែរ”។

លោកបញ្ជាក់ទៀតថា “កំណើននៃការលក់ទាំងអស់នេះ ភាគច្រើនជាប្រភេទលំនៅដ្ឋានដែលមានតម្លៃសមរម្យ ឬក្រោម៧ម៉ឺនតែប៉ុណ្ណោះ ព្រោះអតិថិជនដែលមានតម្រូវការពិតភាគច្រើនពួកគាត់មានលទ្ធភាពសមស្របទៅនឹងលំនៅដ្ឋានប្រភេទនេះ ហើយរឹតតែបង្កភាពងាយស្រួលដល់ពួកគាត់ គឺមានឥណទានលំនៅដ្ឋានដែលពួកគាត់អាចទទួលបានពីធនាគារដែលជាដៃគូជាមួយក្រុមហ៊ុនអភិវឌ្ឍន៍រួមជាស្រេច ហើយថែមតាំងរួចផុតពីការបង់ពន្ធប្រថាប់ត្រាក្រោមការអនុគ្រោះពីសំណាក់រាជរដ្ឋាភិបាល ដែលកាន់តែជួយធ្វើឱ្យតម្លៃថ្លៃដើមនៃលំនៅដ្ឋានចុះទាប”។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យ CBRE Cambodia លោកស្រីអាន សុធីតា បានមានប្រសាសន៍ថា “ទីផ្សារលំនៅដ្ឋាននៅពេលពេលបច្ចុប្បន្ន គឺនៅតែមានភាពរឹងមាំខុសប្លែកពីវិស័យដទៃទៀតដោយសារតែទីផ្សារ និងតម្រូវការពិតប្រាកដគឺផ្តើមចេញពីអ្នកនៅក្នុងស្រុក”។

លោកស្រីបញ្ជាក់ថា “ការអភិវឌ្ឍន៍នានានៅក្នុងវិស័យលំនៅដ្ឋានគឺផ្តោតសំខាន់ទៅលើទីផ្សារក្នុងស្រុកមិនមែនមកពីក្រៅប្រទេសនោះទេ ហើយអ្នកអភិវឌ្ឍន៍ក៏បានសិក្សាយ៉ាងច្បាស់ទៅលើកម្រិតនៃតម្រូវការ រួមជាមួយលទ្ធភាពរបស់អតិថិជនគោលរបស់ពួកគេ ដូច្នេះរាល់គម្រោងអភិវឌ្ឍទាំងអស់ភាគច្រើនមិនជាប់គាំងនោះទេ ហើយមានអត្រាទទួលបានភាពជោគជ័យខ្ពស់”។

លោកស្រីបន្តថា “ខ្ញុំជឿជាក់ថា នៅឆ្នាំ២០២១ នេះ ទីផ្សារអចលនទ្រព្យរួមនឹងវិលត្រឡប់មករកភាពល្អប្រសើរវិញជាបណ្តើរ ខណៈដែលបច្ចុប្បន្ននេះលទ្ធផលនៃការប្រើប្រាស់ថ្នាំបង្ការ ឬវ៉ាក់សាំងការពារជំងឺឆ្លង ត្រូវបានចាប់ផ្តើមអនុវត្តនៅតាមបណ្តាប្រទេសមួយចំនួន ហើយរដ្ឋាភិបាលកម្ពុជាក៏បានត្រៀមខ្លួនរួចរាល់ក្នុងការនាំយកវ៉ាក់សាំងមកកាន់កម្ពុជាក្នុងពេលឆាប់ខាងមុខនេះផងដែរ”៕

អគារទីស្ដីការក្រសួងរៀបចំដែនដី នគរូបនីយកម្ម និងសំណង់បច្ចុប្បន្ន នឹងត្រូវប្រគល់ជូនក្រសួងអភិវឌ្ឍន៍ជនបទ

ដោយ ៖ រ៉ាណេត

ភ្នំពេញ ៖ អគារទីស្ដីការក្រសួងរៀបចំដែនដី នគរូបនីយកម្ម និងសំណង់ស្ថិតតាមបណ្តោយផ្លូវព្រះមុនីវង្សនាពេលបច្ចុប្បន្ន ត្រូវបានរាជរដ្ឋាភិបាលសម្រេចប្រគល់ជូនក្រសួងអភិវឌ្ឍន៍ជនបទ បន្ទាប់ពីទីស្ដីការក្រសួងរៀបចំដែនដី និងនគរូបនីយកម្ម និងសំណង់ថ្មី ស្ថិតនៅក្នុងតំបន់ក្រុងរណបហ្គ្រេនភ្នំពេញសាងសង់រួចរាល់ក្នុងពេលឆាប់ៗខាងមុខនេះ។

តាមរយៈសេចក្ដីជូនដំណឹងរបស់ទីស្ដីការគណៈរដ្ឋមន្ត្រីលេខៈ ០៤ សជណ ដែលបានធ្វើការផ្សព្វផ្សាយនៅរសៀលថ្ងៃទី៥ ខែមករា ឆ្នាំ២០២១នេះបានបញ្ជាក់ថា រាជរដ្ឋាភិបាលកម្ពុជាបានសម្រេចធ្វើការដោះដូរអគារទីស្ដីការក្រសួងរៀបចំដែនដីនគរូបនីយកម្ម និងសំណង់ ស្ថិតបណ្តោយផ្លូវព្រះមុនីវង្ស សង្កាត់បឹងត្របែង ខណ្ឌចំការមន រាជធានីភ្នំពេញ ប្រគល់ជូនក្រសួងអភិវឌ្ឍន៍បទ ជំនួសឱ្យគម្រោងដែលត្រូវការសាងសង់អគារទីស្ដីការនៅតំបន់បឹងតាមោកលើទំហំដី១៥ហិកតា ដែលត្រូវបានធ្វើការនិរាករណ៍។

នៅក្នុងលិខិតដដែលនេះបានបញ្ជាក់ថា ក្រោយពេលទីស្ដីការក្រសួងរៀបចំដែនដែនដី នគរូបនីកម្ម និងសំណង់ត្រូវបានរើទៅកាន់ទីតាំងថ្មីស្ថិតនៅក្រុងរណបហ្គ្រេនភ្នំពេញ ក្រសួងអភិវឌ្ឍន៍ជនបទនឹងត្រូវរើមកកាន់ទីស្ដីការក្រសួងរៀបចំដែនដីនៅផ្លូវព្រះមុនីវង្ស។ ដោយឡែកអគារទីស្ដីការក្រសួងអភិវឌ្ឍន៍ជនបច្ចុប្បន្នដែលស្ថិតនៅក្បែរទីស្ដីការគណៈរដ្ឋមន្ត្រីនឹងត្រូវប្រគល់ជូនមន្ទីររៀបចំដែនដី នគរូបនីយកម្ម និងសំណង់ និងសុរិយោដីរាជធានីភ្នំពេញវិញ។

សម្រាប់អគារទីស្ដីការក្រសួងរៀបចំដែនដី នគរូបនីយកម្ម និងសំណង់ថ្មី ដែលនឹងត្រូវបញ្ចប់ការសាងសង់ទាំងស្រុង និងដាក់ឱ្យដំណើរការនៅក្នុងពេលឆាប់ៗខាងមុខនេះ ស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ មានកម្ពស់ ៥ជាន់ សាងសង់នៅលើផ្ទៃដីទំហំ ៣ហិកតា មានផ្ទៃក្រឡាសំណង់សរុប ៤៩ ៣៨៩ម៉ែត្រក្រឡា និងក្រឡាផ្ទៃប្រើប្រាស់សរុបប្រមាណ ២៦ ៥៦៧ ម៉ែត្រក្រឡា មានផលធៀបក្រឡាផ្ទៃបាតសំណង់ ៣២.៥៣% និងមានទីចំណតរថយន្តប្រមាណ៤៥០កន្លែង ដែលមានរចនាបក្នុងទម្រង់ស្ថាបត្យកម្មជាខ្មែរ៕

រដ្ឋាភិបាលសម្រេចនិរាករណ៍លើលិខិតអនុញ្ញាតកាត់ផ្ទៃបឹងតាមោក៣០ហិកតា និងនិរាករណ៍លើការដោះដូរអគារមួយចំនួន


ដោយ ៖ រ៉ាណេត

ភ្នំពេញ ៖ រាជរដ្ឋាភិបាលបានសម្រេចនិរាករណ៍ទៅលើលិខិតអនុញ្ញាតកាត់ផ្ទៃបឹងតាមោកចំនួន៣០ហិកតា ដែលគ្រោងសាងសង់អគារទីស្ដីការក្រសួងអភិវឌ្ឍន៍ជនបទចំនួន១៥ហិកតា និងសម្រាប់សាងសង់អគារគណៈកម្មការជាតិគ្រប់គ្រងគ្រោះមហន្តរាយ អគារគណៈកម្មាធិការសិទ្ធិមនុស្សកម្ពុជា និងអគារអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការ ដោយសារមីន។ ដោយឡែកសម្រាប់ការដោះដូរអគារមួយចំនួនទៀតនៅក្នុងរាជធានីភ្នំពេញ ក៏ត្រូវបាននិរាករណ៍ផងដែរ។

តាមរយៈសេចក្ដីប្រកាសព័ត៌មានរបស់ទីស្ដីការគណៈរដ្ឋមន្ត្រីលេខៈ ០៤ សជណ ដែលបានធ្វើការផ្សព្វផ្សាយនៅរសៀលថ្ងៃទី៥ ខែមករា ឆ្នាំ២០២១នេះបានបញ្ជាក់ថា រដ្ឋាភិបាលបានសម្រេចធ្វើការនិរាករណ៍ទៅលើលិខិតអនុញ្ញាតកាត់ផ្ទៃបឹងតាមោកសរុបចំនួន៣០ហិកតា សម្រាប់សាងសង់អគារទីស្ដីការក្រសួងអភិវឌ្ឍន៍ជនបទ រួមជាមួយគម្រោងសាងសង់អគាររដ្ឋបាល និងអគារស្ថាប័នរដ្ឋមួយចំនួនទៀតផងដែរ។ នៅក្នុងលិខិតដដែលក៏បានបញ្ជាក់ពីការធ្វើនិរាករណ៍លើការដោះដូរអគារស្ថាប័នរដ្ឋមួយចំនួនទៀតផងដែរ។

សេចក្ដីលម្អិតបានបញ្ជាក់ថា រដ្ឋាភិបាលបានសម្រេចនិរាករណ៍លិខិតលេខ៧៩០ សជណ.មឃ ចុះថ្ងៃទី០១ ខែកញ្ញា ឆ្នាំ២០២០ របស់ទីស្ដីការគណៈរដ្ឋមន្ដ្រី ស្ដីពីសំណើសុំគោលការណ៍អនុញ្ញាតកាត់ផ្ទៃបឹងតាមោក (បឹងកប់ស្រូវ) ទំហំ១៥ហិកតា ស្ថិតនៅខណ្ឌព្រែកព្នៅ រាជធានីភ្នំពេញ សម្រាប់សាងសង់អគារទីស្ដីការក្រសួងអភិវឌ្ឍន៍ជនបទ។

ក្នុងលិខិតដដែលនោះ ទីស្ដីគណៈរដ្ឋមន្ដ្រី ក៏សម្រេចនិរាករណ៍សំណើសុំការអនុញ្ញាតដោះដូរទីតាំងអគារទីស្ដីការក្រសួងអភិវឌ្ឍន៍ជនបទបច្ចុប្បន្ន និងដីទំហំ១៥.៣៣ហិកតា របស់ក្រសួងអភិវឌ្ឍន៍ជនបទ ជាមួយក្រុមហ៊ុន ធីភី ម៉ូរ៉ាល់ គ្រុប ឯ.ក។ បន្ថែមពីនេះ ក៏និរាករណ៍សំណើសុំការអនុញ្ញាតដោះដូរ និងផ្ទេរកម្មសិទ្ធិទីតាំងអគារគណៈកម្មាធិការជាតិគ្រប់គ្រងគ្រោះហមន្ដរាយ, អគារគណៈកម្មាធិការសិទ្ធិមនុស្សកម្ពុជា និងអគារអាជ្ញាធរជាតិគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន និងដីចំនួន១៥ហិកតា ជូនក្រុមហ៊ុន ធីភី ម៉ូរ៉ាល់ គ្រុប ឯ.ក ជាថ្នូរនឹងការសាងសង់អគារថ្មី និងឃ្លាំង រួមជាមួយហេដ្ឋារចនាសម្ព័ន្ធនានាជូនអង្គភាពទាំង៣វិញ៕

បច្ចុប្បន្នភាព ៖ ផ្សារហ៊ុនអាមេរិកសម្រេចមិនដកក្រុមហ៊ុនចិនធំៗចេញពីបញ្ជីរបស់ខ្លួន

ដោយ ៖ សុខុម

ញូវយ៉ក ៖ ផ្សារភាគហ៊ុនសហរដ្ឋអាមេរិក New York Stock Exchange ហៅកាត់ NYSE បានប្រកាសកាលពីថ្ងៃច័ន្ទ ទី៤ ខែធ្នូ ឆ្នាំ២០២០ថា ខ្លួនលែងមានបំណងលុបក្រុមហ៊ុនទូរគមនាគមន៍ចិនធំៗចំនួន៣ ដែលកំណត់មុខសញ្ញាដោយរដ្ឋការជិតចប់អាណត្តិរបស់លោក ដូណាល់ ត្រាំ ចេញពីបញ្ជីផ្សារភាគហ៊ុនរបស់សហរដ្ឋអាមេរិកទៀតហើយ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី៥ ខែមករា ឆ្នាំ២០២១នេះ។

ការប្រកាសបែបនេះពិតជាគួរឱ្យភ្ញាក់ផ្អើលណាស់ ព្រោះខ្លួនទើបតែបានប្រកាសក្ដែងៗកាលពីសប្ដាហ៍មុនប៉ុណ្ណោះថា ខ្លួននឹងលុបក្រុមហ៊ុនទូរគមនាគមន៍ចិនធំៗទាំង៣ ចេញពីបញ្ជីផ្សារហ៊ុនអាមេរិក។

ផ្សារភាគហ៊ុនដដែលបានចេញសេចក្ដីថ្លែងការណ៍បកស្រាយថា ខ្លួនបានសម្រេចបែបនេះ ក្រោយពីបានពិគ្រោះយោបល់បន្ថែមជាមួយអាជ្ញាធរនិយ័តកម្មពាក់ព័ន្ធ។

កាលពីថ្ងៃព្រហស្បតិ៍ ទី៣១ ធ្នូ មុនដាច់ឆ្នាំ២០២០ ផ្សារភាគហ៊ុននេះបានប្រកាសថា ខ្លួននឹងលុបក្រុមហ៊ុនទូរគមនាគមន៍ចិន ធំៗចំនួន ៣ រួមមានក្រុមហ៊ុន China Mobile, China Telecom and China Unicom Hong Kong ចេញពីបញ្ជីផ្សារភាគហ៊ុនអាមេរិក ក្រោយរដ្ឋាភិបាលអាមេរិកចាត់វិធានការរារាំងការវិនិយោគលើក្រុមហ៊ុនចំនួន៣៥ ដែលគេជឿថាកាន់កាប់ ឬគ្រប់គ្រងដោយយោធាចិន។

ជាការឆ្លើយតប ចិន បានព្រមានខ្លាំងៗថានឹងសងសឹក ប្រសិនបើក្រុមហ៊ុនទូរគមនាគន៍ចិន ទាំងនេះត្រូវបានលុបចេញពីបញ្ជីផ្សារហ៊ុនអាមេរិកដូចការអះអាងមែននោះ។

ក្រសួងពាណិជ្ជកម្មចិន បានចេញសេចក្ដីថ្លែងការណ៍កាលពីថ្ងៃសៅរ៍ ទី២ ខែមករា ដើមឆ្នាំ២០២១ នេះដោយថ្កោលទោសថា ការលុបក្រុមហ៊ុនចិន ចេញពីបញ្ជីផ្សារភាគហ៊ុនសហរដ្ឋអាមេរិក គឺជាការរំលោភបំពានដល់សន្តិសុខជាតិ និងមិនស្របទៅតាមច្បាប់ទីផ្សារ ហើយថែមទាំងបានគំរាមថា ប្រទេសចិននឹង “ចាត់វិធានការចាំបាច់នានា” ដើម្បីការពារផលប្រយោជន៍របស់បណ្ដាក្រុមហ៊ុនចិន៕