ដោយ ៖ វុត្ថា

ភ្នំពេញ ៖ ក្រុមហ៊ុនអាកាសចរណ៍ក្នុងស្រុកចំនួន ២ បានប្រកាសពីការចាប់ផ្តើមប្រតិបត្តិការហោះហើរទៅកាន់ប្រទេសចិនឡើងវិញ បន្ទាប់ពីទទួលបានការអនុញ្ញាត និង គោរពបាននូវស្តង់ដារវិធានការពារនៃជំងឺកូវីដCovid-19 ។

ក្រុមហ៊ុន Cambodia Airport នៅថ្ងៃទី១៥ ខែកញ្ញា ឆ្នាំ ២០២០នេះ បានឱ្យដឹងថា ក្រុមហ៊ុនកំពុងតែបន្ថែមជើងហោះហើរពីភ្នំពេញទៅហ្វូចូវនៅថ្ងៃព្រហស្បតិ៍ ខណៈពេលដែលក្រុមហ៊ុនអាកាសចរណ៍ JC Airlines កំពុងបើកជើងហោះហើរទៅកាន់ គុនមីង នៅថ្ងៃពុធនេះ។

ក្រុមហ៊ុន Cambodia Airport ពន្យល់ថា បញ្ជីនេះគឺជាការបង្ហាញអំពីជើងហោះហើរបច្ចុប្បន្នដែលអាចនឹងមានការប្រែប្រួលដោយសារតែការកែប្រែកម្មវិធីហោះហើរពីដៃគូក្រុមហ៊ុនអាកាសចរណ៍។ ដោយឡែក នៅសប្តាហ៍នេះយើងមានជើងហោះហើររបស់ក្រុមហ៊ុនអាកាសចរណ៍ SilkAir ដែលមានការភ្ជាប់ពីភ្នំពេញទៅសិង្ហបុរីនៅថ្ងៃអង្គារ និងថ្ងៃអាទិត្យផងដែរ។

អ្នកនាំពាក្យរដ្ឋលេខាធិការអាកាសចរណ៍ស៊ីវិល លោក ស៊ិន ចាន់សិរីវុត្ថា ធ្លាប់បានឱ្យដឹងថា កន្លងមកនេះ ក្រុមហ៊ុនអាកាសចរណ៍នៅក្នុងស្រុក បានជួបពិភាក្សាជាមួយនឹងរដ្ឋលេខាធិការអាកាសចរណ៍ស៊ីវិលដើម្បីសម្រួលដល់វិធានការការពារ ដើម្បីឱ្យមានលទ្ធភាពដំណើរប្រតិបត្តិការហោះហើរបណ្តើរៗឡើងវិញ ។

លោកបន្តថា អ្នកដំណើរភាគច្រើនដែលធ្វើដំណើរតាមជើងហោះហើរនាពេលនេះ ជាធុរជន និងក្រុមជំនាញការប៉ុណ្ណោះ ខណៈទេសចរធម្មតា មិនទាន់មាននោះទេ ដែលទាមទាពេលវេលាយូរបន្តិចទៀត ឬ ជំងឺកូវីដ១៩ ត្រូវបានគ្រប់គ្រង និងមានថ្នាំវាក់សាំងព្យាលពេញលេញ។

ក្រុមហ៊ុនអាកាសចរណ៍ក្នុងស្រុកកាលពីកន្លងមកថ្មីៗនេះ បានលើកយកបញ្ហាប្រឈមនានា ក្នុងកាលៈទេសៈនៃការរីករាលដាលនៃជំងឺកូវីដ-១៩ និងស្នើសុំដល់រដ្ឋាភិបាលឱ្យមានការហោះហើរជាបណ្តើរៗតាមដែលអាចធ្វើបានក្នុងបណ្តាប្រទេសអាស៊ាន និងប្រទេសមួយចំនួន បន្ទាប់ពីមានការផ្អាកមួយរយៈធំ។

ក្រុមហ៊ុនអាកាសចរណ៍នៅក្នុងស្រុកក៏ដូចក្រុមហ៊ុនអាកាសចរណ៍នានាទទួលរងនូវផលប៉ះពាល់ពីឥទ្ធិពលនៃជំងឺកូវីដ១៩ ផងដែរ តែរហូតមកដល់ពេលនេះ មិនទាន់មានក្រុមហ៊ុនក្នុងស្រុកណាមួយប្រកាសពីក្ស័យធននោះទេ ខណៈមានការជ្រោមជ្រែងពីរដ្ឋាភិបាលកម្ពុជា៕

ដោយ ៖ រ៉ាណេត

កំពត ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានស្នើឱ្យរដ្ឋបាលខេត្តកំពតបើកកិច្ចប្រជុំជាមួយមន្ត្រីជំនាញ សិក្សាទៅលើលទ្ធភាពនៃការបង្កើតតំបន់រដ្ឋបាលប្រមូលផ្តុំ និងគម្រោងសាងសង់ពហុកីឡាដ្ឋានថ្មីប្រចាំនៅក្នុងខេត្តកំពត ដើម្បីចូលរួមលើកកម្ពស់សក្ដានុពល និងសេដ្ឋកិច្ចខេត្តឱ្យកាន់តែរីកចម្រើន។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីចុងសប្ដាហ៍កន្លងទីនេះបានស្នើដល់រដ្ឋបាលខេត្តកំពតសិក្សាទៅលទ្ធភាពនៃការរៀបចំជាតំបន់រដ្ឋបាលប្រមូលផ្តុំ រួមជាមួយគម្រោងសាងសង់ជាពហុកីឡាដ្ឋានថ្មីមួយប្រចាំនៅក្នុងខេត្តបន្ថែមពីលើគម្រោងសិក្សាពីការសាងសង់ ស្ពានចំនួន២ផ្សេងទៀត។

លោក ជាវ តាយ អភិបាលខេត្តកំពត បានមានប្រសាសន៍ថា យោងតាមការណែនាំផ្ទាល់ពីសម្ដេចអគ្គមហាសេនាបតីតេជោ ហ៊ុន សែន ស្នើទៅឱ្យរដ្ឋបាលខេត្តកំពតសិក្សាពីលទ្ធភាពរៀបចំតំបន់រដ្ឋបាលប្រមូលផ្តុំ ដោយមានមន្ទីរអង្គភាពពាក់ព័ន្ធមានទីកន្លែងធ្វើការរួមគ្នា និងសាងសង់ពហុកីឡាដ្ឋានថ្មីមួយទៀត។

លោកអភិបាលខេត្តបានបញ្ជាក់ថា “ក្រៅពីនេះ បច្ចុប្បន្ន គម្រោងសិក្សាស្ពានឆ្លងព្រែកកំពង់បាយចាស់ សិក្សាដោយក្រុមហ៊ុន China Road និងគម្រោងសិក្សាស្ពានថ្មី សិក្សាដោយកងវិស្វកម្មក្រសួងការពារជាតិបានប្រមាណជា៧០ភាគរយ ដោយក្រោយពីសិក្សាចប់សព្វគ្រប់ នឹងដាក់គម្រោងទាំងនេះឆ្លងដល់ថ្នាក់ដឹកនាំមន្ត្រីរាជការខេត្តកំពត រួចហើយនឹងយកសំណើគម្រោងនេះដាក់ស្នើសុំគោលការណ៍ពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសម្រេច”។

នៅក្នុងឱកាសនោះផងដែរ លោក ជាវ តាយ ក៏បានកោតសរសើរដល់មន្ត្រីរាជការរបស់រដ្ឋបាលខេត្តទាំងអស់ ដែលបានខិតខំអនុវត្តការងារនាពេលកន្លងមកជាច្រើន ដែលធ្វើឱ្យរដ្ឋបាលខេត្តទទួលបាននូវសមិទ្ធផលផ្លែផ្កាជាច្រើន និងទទួលបាននូវការគាំទ្រគ្រប់មជ្ឈដ្ឋាន ដៃគូអភិវឌ្ឍន៍ វិនិយោគិន ពិសេសភ្ញៀវទេសចរជាតិ អន្តរជាតិ ដែលបានជ្រើសខេត្តកំពតជាគោលដៅទេសចរណ៍សម្រាប់ការលម្ហែកម្សាន្តដ៏ពេញនិយម៕

ដោយៈប៊ី

ភ្នំពេញៈក្រុមហ៊ុន Berli Jucker Plc (BJC) ដែលជាក្រុមហ៊ុនផលិតទំនិញប្រើប្រាស់បានចុះបញ្ជីថៃ និងជាម្ចាស់ផ្សារទំនើបBig C Supercenter នៅតែប្តេជ្ញាពង្រីកអាជី​វកម្មលក់រាយរបស់ខ្លួន ទោះបីមានវិបត្តិនៃជំងឺរីករាលដាលយ៉ាងនេះក្តី។

គម្រោងពង្រីកហាងរបស់ក្រុមហ៊ុន នៅក្នុងប្រទេសឡាវ កម្ពុជា និងភាគខាងត្បូងប្រទេសចិន គឺនៅតែស្ថិតនៅក្នុងផែនការពង្រីកអាជីវកម្មរបស់ក្រុមហ៊ុន។ នេះបើយោងតាមការចេញផ្សាយរបស់សារព័ត៌មាន Bangkok Post ក្នុងសប្តាហ៍នេះ។

ជាមួយគ្នានេះដែរក្រុមហ៊ុនបានឱ្យដឹងថា អាជីវកម្មលក់រាយរបស់ខ្លួនបង្កើតបានសាច់ប្រាក់លឿនជាងអាជីវកម្មផ្សេងទៀត និងមានឱកាសរីកចម្រើនគ្មានដែនកំណត់ នៅក្នុងទីផ្សារលក់រាយដែលមានទឹកប្រាក់៣,៦ ទ្រីលានបាតរបស់ថៃ ដរាបណាក្រុមហ៊ុនពឹងផ្អែកលើបណ្តាញចែកចាយផ្ទាល់ខ្លួន។

លោកAswin Techajareonvikul នាយកប្រតិបត្តិក្រុមហ៊ុនBJC មានប្រសាសន៍ថា “យើងផ្លាស់ប្តូរការពង្រីកអាជីវកម្មរបស់យើងរយៈពីរ បីឆ្នាំចុងក្រោយនេះ ហើយនឹងបង្កើ​នកិច្ចខិតខំប្រឹងប្រែងរបស់យើង នៅក្នុងអាជីវកម្មនេះនៅចុងឆ្នាំនេះ”។

នៅឆ្នាំ២០១៩ ក្រុមហ៊ុនBJC បានរាយការណ៍ពីប្រាក់ចំណូលសរុប១៧៤ពាន់លានបាត និងប្រាក់ចំណេញសុទ្ធ៧,២៧ ពាន់លានបាត។

ក្រុមហ៊ុនបានចូលរួម នៅក្នុងបណ្តាញផ្គត់ផ្គង់លក់រាយទំនើប ដោយប្រតិបត្តិការហាងលក់រាយទំនើប និងហាងលក់តាមInternet ។

ក្រុមហ៊ុន ក៏ប្រតិបត្តិការអង្គភាពអាជីវកម្មផ្សេងទៀត ដូចជា ការលក់រាយនៅអាស៊ីអាគ្នេយ៍ ហើយមានចំណាប់អារម្មណ៍ក្នុងការរួមបញ្ចូលគ្នា ការទិញយក និងការអភិវឌ្ឍអាជីវកម្មថ្មី។

លោកAswinបានទទួលស្គាល់ថា ក្រុមហ៊ុនបានពង្រីកការពង្រីកការលក់រាយរប​ស់ខ្លួនជាបណ្តោះអាសន្ន ក្នុងកំឡុងពេលផ្ទុះជំងឺCOVID-19 ដោយសារវាមិនច្បាស់ថាតើស្ថានភាពនឹងងើបឡើងវិញនៅត្រីមាសទី៣ឬយ៉ាងណា។

លោកមានប្រសាសន៍ថា “ដោយមានស្ថានភាពល្អប្រសើរ យើងនឹងបន្តការវិនិយោគជាមួយ នឹងបោះទុនវិនិយោគចំនួន១០ពាន់លានបាត ដែលភាគច្រើនគ្រោងនឹងពង្រីកអាជីវកម្មលក់រាយរបស់ក្រុមហ៊ុន”។

ក្រុមហ៊ុនគ្រោងនឹងបើកផ្សារទំនើបថ្មីពីរសាខា អាហារទីតាំង២ និងហាងមីនីខ្នាតធំ ២៤០នៅឆ្នាំនេះ។

នៅក្នុងឆមាសទីមួយនៃឆ្នាំនេះ ក្រុមហ៊ុនបានបើកហាងMini Big C ថ្មីចំនួន៤៦ កន្លែង និងBig C Depots ថ្មីចំនួន៤ដែលជាហាងលក់ដុំ ដែលផ្តោតលើអតិថិជនអាជីវក  ម្ម៕

ដោយ៖ ប៊ី
ភ្នំពេញ៖ ក្រុមហ៊ុនអាជីវកម្ម Fintech ដែលមានឈ្មោះ Lucy ត្រូវបានបង្កើតឡើង ដោយមានគោលបំណងជួយដល់សហគ្រិនស្ត្រី ដែលត្រូវបានគេមើលរំលង ការមើលស្រាល និងមិនសូវទទួលបានប្រាក់កម្ចី ខណៈក្រុមហ៊ុនគ្រោងនឹងពង្រីកអាជីវកម្មរបស់ខ្លួននៅក្នុងតំបន់អាស៊ីអាគ្នេយ៍ រួមមានកម្ពុជាផងដែរ។

បន្ទាប់ពីបើកដំណើរការសេវាកម្មរបស់ខ្លួននៅប្រទេសសិង្ហបុរីនៅថ្ងៃទី១៥ ខែកញ្ញា ក្រុមការងារនៅ Lucy គ្រោងនឹងពង្រីកពាសពេញអាស៊ីអាគ្នេយ៍។ ក្រុមហ៊ុនអាជីវកម្មថ្មីនេះ (startup) បានឱ្យដឹងថា ការផ្តោតអារម្មណ៍របស់ខ្លួនលើការប្រើប្រាស់បច្ចេកវិទ្យាដើម្បីធ្វើឱ្យការវិនិយោគមានឥទ្ធិពលសម្រាប់ម្ចាស់អាជីវកម្មជាស្ត្រីពង្រីកប្រតិបត្តិការរបស់ពួកគេ។

យោងតាមនាយកប្រតិបត្តិរបស់ក្រុមហ៊ុន Lucy លោក Debbie Watkins បានឱ្យដឹងថា ក្រុមហ៊ុននឹងផ្តោតការផ្តល់ជូនអតិថិជនរបស់ខ្លួនលើសេវាកម្មហិរញ្ញវត្ថុតាមរយៈកម្មវិធីទូរស័ព្ទ ដែលជួយតាមដានព័ត៌មានសំខាន់ៗ។

លោក បានបន្តថា “យើងនឹងផ្តល់សេវាកម្មហិរញ្ញវត្ថុជាច្រើនរាប់ចាប់ពីការរក្សាសុវត្ថិភាព និងសន្សំដល់ ការផ្ទេរប្រាក់ និងឥណទាន។ ទាំងនេះ សេវានីមួយៗនឹងក្លាយជាសំខាន់របស់អតិថិជន។ ពួកគេនឹងត្រូវបានផ្សារភ្ជាប់ ដើម្បីដោះស្រាយបញ្ហាប្រឈមជាក់លាក់នៃផ្នែកសេដ្ឋកិច្ចផ្សេងៗគ្នាដែលយើងនឹងកំពុងបម្រើ”។

ពួកគេក៏មានគម្រោងជួយជំរុញសហគមន៍ និងការតភ្ជាប់ទៅម្ចាស់អាជីវកម្មផ្សេងទៀតនៅទូទាំងតំបន់។
លោកស្រីបានបន្ថែមថា “ផ្នែកសំខាន់នៃក្រុមហ៊ុន Lucy ក៏ជាសហគមន៍ផងដែរ ដែលផ្សារភ្ជាប់សហគ្រិនស្ត្រីទៅនឹងគ្រប់ក្រុមសេដ្ឋកិច្ចសង្គម ដើម្បីឱ្យពួកគេអាចផ្តល់ដំបូន្មានជាក់ស្តែងដល់គ្នាទៅវិញទៅមក”៕ ASEAN Today

ដោយៈវុត្ថា

ប៉េកាំងៈ ទីផ្សារលក់រាយ (Retail) របស់ប្រទេសចិន បានចាប់ផ្តើមមានសន្ទុះឡើងវិញនៅក្នុងអំឡុងខែសីហា ឆ្នាំ២០២០កន្លងទៅនេះ   បន្ទាប់ពីប្រជាជននៅក្នុងប្រទេសនេះបានបង្កើនការចំណាយទៅលើការដើរផ្សារ ហើយក៏ជាសញ្ញាល្អមួយក្នុងការជំរុញកំណើនសេដ្ឋកិច្ចឱ្យងើបឡើងវិញផងដែរ។

យោងតាមរបាយការណ៍របស់ការិយាល័យស្ថិតិជាតិចិន ដែលបានចេញផ្សាយនៅថ្ងៃទី១៥ កញ្ញា ឆ្នាំ២០២០នេះបានឱ្យដឹងថា ការលក់រាយរបស់ចិនបានកើនឡើងវិញប្រមាណ០.៥ភាគរយ នៅក្នុងខែសីហាកន្លងមកនេះ បើធៀបនឹងឆ្នាំមុន ដែលជាសញ្ញាវិជ្ជមានសម្រាប់ឆ្នាំនេះ។ សម្រាប់ការលក់ឧបករណ៍ទំនាក់ទំនង បានកើនឡើង២៥,១ភាគរយ បើធៀបនឹងឆ្នាំមុន ហើយការលក់រថយន្តបានកើនឡើង១១,៨ ភាគរយ ។

របាយការណ៍ដដែលបន្តថា  ការលក់រាយក្នុងរយៈពេល៨ខែដំបូង នៃឆ្នាំនេះបានធ្លាក់ចុះ៨,៦ភាគរយ បើធៀបទៅនឹងឆ្នាំមុន ។ ដោយឡែកចំពោះការលក់រាយទំនិញតាមប្រព័ន្ធអ៊ីនធឺណិតបានកើនឡើង១៥,៨ ក្នុងអំឡុងពេលនេះ។ ចំពោះអត្រាគ្មានការងារធ្វើនៅក្នុងប្រទេសចិន ដែលត្រូវបានធ្វើការស្ទង់មតិផ្លូវជាផ្លូវការចំនួន៥,៦ភាគរយ ពោលគឺទាបជាងខែកក្កដា០,១ ភាគរយ។

របាយការណ៍ដដែលបញ្ជាក់ទៀតថា ចំពោះផលិតកម្មឧស្សាហកម្ម បានកើនឡើង ៥,៦ភាគរយ នៅក្នុងខែសីហាពីមួយឆ្នាំមុន ខណៈការវិនិយោគលើទ្រព្យសកម្មមានការធ្លាក់ចុះ០,៣ ភាគរយសម្រាប់រយៈពេល៨ខែដំបូងនៃឆ្នាំនេះ៕

ដោយ ៖ រ៉ាណេត

ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានសម្រេច និងចេញសារាចរណែនាំស្ដីពីការពន្យារពេលក្នុងការអនុវត្ដលើការពិន័យអន្ដរការណ៍ ចំពោះអំពើល្មើសទៅនឹងច្បាប់ស្ដីពីគណនេយ្យ និងសវនកម្ម ដើម្បីទុកពេលឱ្យវិស័យឯកជនរៀបចំខ្លួន និងត្រៀមលក្ខណៈឱ្យបានរួចរាល់ក្នុងការអនុវត្តស្របតាមច្បាប់ដែលបានកំណត់។

ក្រសួងសេដ្ឋកិច្ច និងហិរញ្ញវត្ថុ នៅព្រឹកថ្ងៃទី១៥ ខែកញ្ញា ឆ្នាំ២០២០នេះ បានសម្រេចចេញសារាចរណែនាំស្ដីពីការពន្យារពេលអនុវត្តការពិន័យអន្តរការណ៍ និងអំពើល្មើសទៅនឹងច្បាប់ស្ដីពីគណនេយ្យ និងសវនកម្ម។

នៅក្នុងសារាចរណែនាំដដែលនេះក៏បានបង្ហាញពីគោលបំណងដែលទុកលទ្ធភាព និងពេលវេលាឱ្យបានសមស្រប ដល់វិស័យឯកជន ក្នុងការរៀបចំខ្លួន និងត្រៀមលក្ខណៈឱ្យបានរួចរាល់អនុវត្តច្បាប់ស្ដីពីគណនេយ្យ និងសវនកម្ម និងលិខិតបទដ្ឋាន គតិយុត្តពាក់ព័ន្ធជាធរមានប្រកបដោយប្រសិទ្ធភាព និងស័ក្ដិសិទ្ធភាព។

ការពន្យារពេលនេះលើការអនុវត្តខាងលើនេះ ត្រូវបានធ្វើឡើងតែចំពោះសហគ្រាស ឬនីតិបុគ្គល ដែលបានចុះបញ្ជីនៅក្រសួងពាណិជ្ជកម្ម ឬនៅអគ្គនាយកដ្ឋានពន្ធដារជាសហគ្រាសអ្នកជាប់ពន្ធធំ និងសហគ្រាសអ្នកជាប់ពន្ធមធ្យម ក៏ដូចជាអង្គភាពមិនស្វែងរកប្រាក់ចំណេញ ដែលបានចុះបញ្ជីនៅក្រសួងនិងស្ថាប័នជំនាញរយៈពេល១ឆ្នាំ ដោយគិតចាប់ពីកាលបរិច្ឆេទចេញសារាចរណ៍ណែនាំនេះតទៅ។

ការពន្យាពេលនេះមិនមែនអនុវត្តចំពោះគណនេយ្យករ និងសវនករដែលជាសមាជិករបស់វិទ្យាស្ថានគណនេយ្យករជំនាញ និងសវនករកម្ពុជា ដែលទទួលបានអាជ្ញារបណ្ណប្រកបវិជ្ជាជីវៈគណនេយ្យ ឬសវនកម្មពី ក.ជ.គ នោះឡើយ ៕ សេចក្ដីលម្អិត សូមអានសារាចរណ៍ណែនាំទាំងស្រុងដូចខាងក្រោម ៖