ដោយៈ ប៊ី

ភ្នំពេញៈ រដ្ឋបាលDonald Trump បានប្រកាសពីភាពជាដៃគូមេគង្គ– អាមេរិកប្រកបដោយមហិច្ឆតា ដែលមានគោលបំណងទប់ស្កាត់ឥទ្ធិពល កាន់តែខ្លាំងឡើងរបស់ចិននៅអាស៊ីអាគ្នេយ៍ និងលើកកម្ពស់ឯករាជ្យភាពសេដ្ឋកិច្ចរបស់បណ្តាប្រទេសជាដៃគូ។

ក្រៅពីសហរដ្ឋអាមេរិក សម្ព័ន្ធភាពនេះរួមមានប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម មកពីអាស៊ីអាគ្នេយ៍។ សម្ព័ន្ធភាពនេះ ត្រូវបានដាក់ឱ្យដំណើរការជាផ្លូវការបន្ទាប់ពីកិច្ចប្រជុំតាមVideo Conference នៅថ្ងៃទី១១ ខែកញ្ញា។

លោក Mike Pompeo រដ្ឋមន្រ្តីការបរទេសសហរដ្ឋអាមេរិក បាននិយាយកាលពីថ្ងៃចន្ទថា ភាពជាដៃគូមេគង្គ–អាមេរិក ឆ្លុះបញ្ចាំងពីសារសំខាន់នៃតំបន់មេគង្គ ចំពោះសហរដ្ឋអាមេរិក។

លោកបានមានប្រសាសន៍ថា “កិច្ចខិតខំប្រឹងប្រែងទាំងនេះ នឹងរួមបញ្ចូលទាំងការធ្វើការយ៉ាងជិតស្និទ្ធជាមួយប្រទេសជប៉ុន អូស្រ្តាលី កូរ៉េខាងត្បូង ឥណ្ឌា និងដៃគូដែលមានគំនិតដូចគ្នា”។

ឈ្មោះសហប្រតិបត្តិការនេះ បានដកមកពីទន្លេមេគង្គ ដែលចាប់ផ្តើមនៅទីបេ និងហូរកាត់ចម្ងាយ៤.១៨០ គីឡូម៉ែត្រភាគអាគ្នេយ៍ឆ្លងកាត់ ប្រទេសចិន ឡាវ កម្ពុជា និងវៀតណាម ដែលបញ្ចប់នៅសមុទ្រចិនខាងត្បូង។ វាបង្កើតជាព្រំដែនរវាងប្រទេសឡាវ ភូមា និងថៃ។

លោកបានមានប្រសាសន៍ថា “ទំនាក់ទំនងរបស់យើង ជាមួយបណ្តាប្រទេសជាដៃគូមេគង្គ គឺជាផ្នែកសំខាន់មួយនៃចក្ខុវិស័យឥណ្ឌូប៉ាស៊ីហ្វិក និងភាពជាដៃគូយុទ្ធសាស្ត្ររបស់យើងជាមួយអាស៊ាន”។

លោករដ្ឋមន្រ្តីការបរទេសអាមេរិកបានបន្ថែមថា ជាមួយទឹកប្រាក់ជាង១៥០លានដុល្លារអាមេរិក នៅក្នុងការវិនិយោគដំបូងនៅក្នុងកម្មវិធីថ្នាក់តំបន់ យើងនឹងពង្រឹងលើការ​ងារល្អរបស់គម្រោងផ្តួចផ្តើមមេគង្គក្រោម (LMI) និងថវិកាចំនួន៣,៥ពាន់លានដុល្លារអាមេរិកជាជំនួយក្នុងតំបន់ ក្នុងអំឡុងពេល១១ឆ្នាំចុងក្រោយនេះ។ LMI គឺជាកម្មវិធីសហប្រតិបត្តិការក្នុងតំបន់ ដែលមានស្រាប់របស់សហរដ្ឋអាមេរិក។

លោក Pompeo បាននិយាយថា ភាពជាដៃគូមេគង្គ–អាមេរិកនឹងបន្តពង្រឹងសន្តិសុខទឹក និងការងាររបស់គណៈកម្មការទន្លេមេគង្គ។ លោកបបន្ថែមថា ឥឡូវនេះទឹកប្រាក់ចំនួន៥៥លានដុល្លារ នឹងត្រូវបានបែងចែកដើម្បីប្រយុទ្ធប្រឆាំង នឹងឧក្រិដ្ឋកម្មឆ្លងដែន ការរត់ពន្ធមនុស្ស ការរត់ពន្ធគ្រឿងញៀន អាវុធ និងហាមឃាត់ផលិតផលសត្វព្រៃ។

លោក Pompeo បានមានប្រសាសន៍ថា “យើងចាំបាច់ត្រូវមានភាពស្មោះត្រង់អំពីបញ្ហាប្រឈមដែលយើងប្រឈមមុខ រាប់បញ្ចូលទាំងសមាជិកមកពីបក្សកុម្មុយនិស្តចិន (CCP) ដែលកំពុងគំរាមកំហែងបរិស្ថានធម្មជាតិ និងស្វ័យភាពសេដ្ឋកិច្ចរបស់មេគង្គ”។

ការសម្រេចចិត្តជាឯកតោភាគីរបស់បក្សកុម្មុយនិស្តចិន (CCP) ក្នុងការទប់ទឹកហូរបានធ្វើឱ្យមានគ្រោះរាំងស្ងួតជាប្រវត្តិសាស្រ្ត។

លោកPompeo បាននិយាយថា សហរដ្ឋអាមេរិកឈរជាមួយតំបន់ និងគណៈកម្មការទន្លេមេគង្គ ក្នុងការអំពាវនាវឱ្យចែករំលែកទិន្នន័យប្រកបដោយតម្លាភាព។

លោកបានលើកឡើងថា “យើងលើកទឹកចិត្តដល់បណ្តាប្រទេស នៅតំបន់មេគង្គឱ្យCCP ទទួលខុសត្រូចំពោះការសន្យារបស់ខ្លួន ក្នុងការចែករំលែកទិន្នន័យទឹករបស់ខ្លួន”។

ទិន្នន័យនោះគួរតែត្រូវបានផ្សព្វផ្សាយជាសាធារណៈ។ វាគួរតែត្រូវបានចេញផ្សាយពេញមួយឆ្នាំ។ វាគួរតែរួមបញ្ចូលទាំងទិន្នន័យទាក់ទងនឹងទឹក ក៏ដូចជាប្រើប្រាស់ដី និងសាងសង់ទំនប់វារីអគ្គិសនី។ វាគួរតែត្រូវបានចែករំលែក តាមរយៈគណៈកម្មការទន្លេមេគង្គ ដែលជាអង្គការ បម្រើផលប្រយោជន៍របស់ប្រទេសក្នុងតំបន់មេគង្គ មិនមែនចំពោះទីក្រុងប៉េកាំងទេ។

លោកបាននិយាយថា សហរដ្ឋអាមេរិកក៏មានការព្រួយបារម្ភផងដែរ អំពីបំណុលដែលទាក់ទងនឹងហេដ្ឋារចនាសម្ព័ន្ធ និងការអនុវត្តអាជីវកម្ម ដែលមានលក្ខណៈអវិជ្ជមាន និងមិនច្បាស់លាស់របស់តួអង្គ គ្រប់គ្រងដោយរដ្ឋរបស់ទីក្រុងប៉េកាំង ដូចជាក្រុមហ៊ុនសំណង់ចិន (China Communications Construction Company) ។

ក្រសួងការបរទេសអាមេរិកបាននិយាយថា ភាពជាដៃគូនេះគឺបំពេញបន្ថែមទៅនឹងយុទ្ធសាស្ត្រសហប្រតិបត្តិការសេដ្ឋកិច្ច Ayeyawady-Chao Phraya-Mekong Economic Cooperation Strategy (ACMECS) អាស៊ានគណៈកម្មការទន្លេមេគង្គ និងជាមួយដៃគូអភិវឌ្ឍន៍មេគង្គផ្សេងទៀត និងយន្តការសហប្រតិបត្តិការស្របតាមតម្លៃទាំងនេះ។

ក្នុងចំណោមកិច្ចការផ្សេងៗទៀត ភាពជាដៃគូរួមមានការពង្រឹងអភិបាលកិច្ច ក្នុងតំបន់ និងលើកកម្ពស់តម្លាភាពជាមួយទឹកប្រាក់៦លានដុល្លារ ដើម្បីគាំទ្រសំលេងក្នុងតំប​ន់និងផ្តល់នូវវេទិកា ដើម្បីជំរុញការស្រាវជ្រាវ និងស្វែងរកទស្សនវិស័យចម្រុះ ដើម្បីអភិ​វ ឌ្ឍការតភ្ជាប់ផ្នែកដឹកជញ្ជូន នៅភាគខាងលិចឆៀងខាងលិចជាមួយឥណ្ឌា និងបង់ក្លាដែស ដើម្បីលើកកម្ពស់ស្ត្រី និងបន្តកម្មវិធីបណ្តុះបណ្តាលប្រទេសទីបីជាមួយសឹង្ហបុរី។

ភាពជាដៃគូមេគង្គ–អាមេរិក កើតឡើង ដោយសារឥទ្ធិពលផ្នែកយោធា និងសេដ្ឋកិច្ចដែលកំពុងកើនឡើងរបស់ចិននៅក្នុងតំបន់ឥណ្ឌូ–ប៉ាស៊ីហ្វិក។

ប្រទេសចិនបានធ្វើការទាមទារទឹកដីនៅសមុទ្រចិនខាងត្បូង និងសមុទ្រចិនខាងកើត ដែលមានជម្លោះដោយប្រទេសមេគង្គ។ តំបន់ទាំងពីរត្រូវបានបញ្ជាក់ថា សំបូរទៅដោយរ៉ែប្រេង និងធនធានធម្មជាតិផ្សេងទៀត ហើយជាចំណុចសំខាន់នៅក្នុងពាណិជ្ជកម្មពិភពលោក៕ Outlook៕

ដោយវុត្ថា

ភ្នំពេញៈ អ្នកជំនាញបានមើលឃើញថា ខេត្តកំពត ជាទិសដៅបន្ទាប់នៃការអភិវឌ្ឍន៍ហេដ្ឋារចនាសម្ព័ន្ធលក្ខណៈទ្រង់ទ្រាយធំ  របស់រដ្ឋាភិបាល បន្ទាប់ពីខេត្តសៀមរាបដែលនឹងជំរុញឱ្យវិស័យអចលនទ្រព្យនៅក្នុងខេត្តមួយនេះ កាន់តែរីកចំរើនបន្ថែមទៀត។

ប្រធានសមគមអ្នកវាយតម្លៃ និងភ្នាក់ងារអវលចនត្ថុកម្ពុជា បានប្រាប់គេហទំព័រ Propertyarea.asia នៅថ្ងៃទី១៥ ខែកញ្ញាឆ្នាំ ២០២០នេះ ឱ្យដឹងថា  នៅក្នុងមួយរយៈចុងក្រោយនេះរដ្ឋាភិបាលបានចាប់ផ្តើមអភិវឌ្ឍន៍ហេដ្ឋារចនាសម្ព័ន្ធជាលក្ខណៈទ្រង់ទ្រាយធំនៅតាមខេត្តគោលដៅជាខេត្តដែលមានសក្តានុពលខ្ពស់។

លោកបន្តថា “រដ្ឋាភិបាលបាននិងកំពុងដើរតាម Model Pickup  ដោយជ្រើសរើសខេត្តធំៗ និងមានសក្តានុពលសេដ្ឋកិច្ច អភិវឌ្ឍហេដ្ឋារចនាសម្ព័ន្ធ ដូចជា ខេត្តព្រះសីហនុ ខេត្តសៀមរាប ហើយខេត្តបន្ទាប់អាចជាខេត្តកំពត និងមានខេត្តបន្តបន្ទាប់ទៀត”។

លោកបន្ថែមថា “ខេត្តទំាង៣នេះ ជាខេត្តអទិភាពរបស់រដ្ឋាភិបាល ក្នុងការអភិវឌ្ឍន៍ហេដ្ឋារចនាសម្ព័ន្ធ ទ្រង់ទ្រាយធំៗដែលជំរុញឱ្យប្រព័ន្ធដឹកជញ្ជូន សេដ្ឋកិច្ច ពាណិជ្ជកម្ម និងវិនិយោគ នឹងមានការកើនឡើង រួមជាមួយនឹងវិស័យអចលនទ្រព្យ ក៏នឹងមានតម្រូវការខ្លាំងផងដែរ”។

ជាមួយគ្នានេះលោកឡុង គឹមសួគ៌ អគ្គនាយកក្រុមហ៊ុន Century 21 Advance បានឱ្យដឹងដែរថា នៅពេលដែលមានការអភិវឌ្ឍន៍ហេដ្ឋារសម្ព័ន្ធបានល្អ ស្អាតរបស់រដ្ឋាភិបាល មិនថានៅកន្លែងណា ឬទីណានោះទេ វិស័យអចលនទ្រព្យក៏នឹងមានសន្ទុះរីកចំរើន និងមានតម្រូវការកាន់តែខ្លាំង នៅក្នុងតំបន់នោះ។

លោកបន្តថា “ជាមួយនឹងការដាក់ចេញអភិវឌ្ឍន៍ ហេដ្ឋារចនាសម្ព័ន្ធនៅតាមខេត្តគោលដៅ ឬខេត្តដែលមានសក្តានុពល គឺជាសញ្ញាល្អក្នុងការទាក់ទាញវិនិយោគិន ទាំងនៅក្នុងស្រុក និងក្រៅស្រុក ព្រោះហេដ្ឋារចនាសម្ព័ន្ធនេះជួយសម្រួលដល់ចរាណ៍ និងការដឹកជញ្ជូកាន់តែមានភាពល្អប្រសើរ”។

រដ្ឋាភិបាលបានសម្រេច ទំលាក់កញ្ចប់ថវិការាប់រយលានដុល្លារ ដែលជាប្រាក់សន្សំក្នុងការកសាងហេដ្ឋារចនាសម្ព័ន្ធលក្ខណៈទ្រង់ទ្រាយធំ នៅក្នុងក្រុងព្រះសីហនុ ដែលរហូតមកដល់ពេលនេះសម្រេចបានជិត១០០ភាគរយ ហើយកាលពីពេលថ្មីៗនេះប្រមុខរដ្ឋាភិបាលបានទំលាក់កញ្ចប់ថវិកា១៥៨លានដយល្លារ ដើម្បីកសាងហេដ្ឋារចនាសម្ព័ន្ធនៅក្នុងក្រុងសៀមរាបផងដែរ៕

ដោយ៖ វុត្ថា

ភ្នំពេញ៖ រដ្ឋាភិបាលចិន បានចង្អុលបង្ហាញឲ្យក្រុមហ៊ុនដ៏ធំមួយដែលមានបទពិសោធន៍រៀបចំព្រឹត្តិការណ៍អូឡាំពិក និងព្រឹត្តិការណ៍កីឡាធំៗជាច្រើននៅចិន ពិសេសអ្នកផលិតកម្មវិធីបើក-បិទដ៏មានឥទ្ធិពល ដើម្បីមកជួយដល់កម្ពុជា ក្នុងការត្រៀមរៀបចំពិធីបើក-បិទព្រឹត្តិការណ៍ស៊ីហ្គេម លើកទី៣២ ឆ្នាំ២០២៣។

នេះ បើយោងតាមកិច្ចប្រជុំប្រចាំសប្ដាហ៍របស់គណៈអចិន្ដ្រៃយ៍ នៃគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) កាលពីថ្ងៃទី ១៥ ខែកញ្ញា ឆ្នាំ ២០២០ម្សិលមិញនេះ ក្រោមការដឹកនាំរបស់លោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC។

លោក វ៉ាត់ ចំរើន អគ្គលេខាធិការ CAMSOC ឱ្យដឹងថា កិច្ចប្រជុំនេះ ផ្ដោតលើរបៀបវារៈ២ ទី១-ពិភាក្សាពីប្រតិទិនការងារ ដែលគណៈកម្មការជំនាញនីមួយៗ ត្រូវរៀបចំឲ្យហើយ ដើម្បីត្រៀមអនុវត្តចាប់ពីឥលូវ និងនៅដើមឆ្នាំ២០២០ ។ ទី២-ជជែកពីការត្រៀមរៀបចំពិធីបើក-បិទ ដែលជាពិធីដ៏មានសារៈសំខាន់ ដើម្បីបង្ហាញពីសក្ដានុពលជាតិ ទៅលើឆាកអន្ដរជាតិ ក្នុងនោះក៏មានការចូលរួមសហការជួយពីភាគីចិនផងដែរ។

លោកបន្តថា “ពិធីបើក-បិទរបស់យើង នឹងធ្វើការជាមួយភាគីចិន ដែលរដ្ឋាភិបាលចិន និងគណៈកម្មាធិការជាតិអូឡាំពិកចិន បានចង្អុលបង្ហាញឲ្យក្រុមហ៊ុនមួយ ដែលធ្លាប់រៀបចំអូឡាំពិក និងព្រឹត្តិការណ៍កីឡាធំៗ នៅសាធារណរដ្ឋប្រជានិតចិន ពិសេសយើងបានអ្នកផលិតកម្មវិធីបើក-បិទដ៏មានឥទ្ធិពល និងមានបទពិសោធន៍នៅចិន នឹងចូលរួមរៀបចំឲ្យកម្ពុជា ហើយជាអ្នកផលិតកម្មវិធីមួយ ដែលពិភពលោកទទួលស្គាល់ និងល្បីល្បាញនៅចិន”។

លោកបន្ថែមថា “គាត់(អ្នកផលិតកម្មវិធីបើក-បិទ) មិនងាយចេញមកក្រៅប្រទេសទេ ប៉ុន្ដែសម្រាប់កម្ពុជា ខាងភាគីចិន បានផ្ដល់គាត់ឲ្យមកជួយកម្ពុជា ក្នុងការរៀបចំ ប៉ុន្ដែគាត់គ្រាន់តែមក ដើម្បីបញ្ចូលនូវបទពិសោធន៍របស់គាត់ទេ តែអ្នកធ្វើពិតប្រាកដ អ្នកដែលរៀបចំរចនាបថពិតប្រាកដ គឺកម្ពុជាយើង ពិសេសគឺពាក់ព័ន្ធនឹងវប្បធម៌ អរិយធម៌ខ្មែរ គឺយើងត្រូវការជាមួយក្រសួងវប្បធម៌ និងវិចិត្រសិល្បៈរបស់យើង”។ តាមគម្រោងអ្នកជំនាញនេះ នឹងមកកម្ពុជា ចន្លោះខែតុលា ដល់ខែធ្នូខាងមុខ។

ទន្ទឹមជាមួយគ្នា លោកបណ្ឌិត ថោង ខុន ក៏បានជំរុញឲ្យការរៀបចំកម្មវិធីការងារលម្អិត ដើម្បីដាក់ឆ្លងថ្នាក់ដឹកនាំ CAMSOC ក៏ដូចជាការងារត់ភ្លើងគប់ និងពិធីផ្សេងៗ ដែលទាក់ទងជាមួយព្រះបរមរាជវាំង ដើម្បីសុំគោលការណ៍សម្ដេចតេជោនាយករដ្ឋមន្ដ្រី ក្នុងការអនុញ្ញាតឲ្យពាក់ព័ន្ធជាមួយព្រះបរមរាជវាំង ឬក្រសួងការបរទេស និងស្ថានទូតកម្ពុជា តាមបណ្ដាប្រទេសអាស៊ាន ដែលត្រូវត្រៀមជួយក្នុងពិធីរត់ភ្លើងគប់ស៊ីហ្គេម ក៏ដូចជាអាជ្ញាធរគ្រប់រាជធានី-ខេត្ត ដើម្បីគាំទ្រក្នុងការរៀបចំផងដែរ៕

ដោយស៊ីវ ម៉េង

ភ្នំពេញ ការសិក្សាថ្មីមួយដែលធ្វើឡើងដោយក្រសួងរៀបចំដែនដី នគរូបនីយកម្មនិងសំណង់បានរកឃើញថា ប្រជាជនរស់នៅទីក្រុង និងតាមទីប្រជុំជននានានឹងកើនដល់​៧លាននាក់នៅឆ្នាំ២០៣០ខាងមុខ។

តាមរបាយការណ៍របស់ក្រសួងរៀបចំដែនដីនរគរូបនីយកម្ម និងសំណង់ដែលបា​ន​ចេញផ្សាយកាលពីពេលកន្លងមកបានឲ្យដឹងថា បើគិតចាប់ពីឆ្នាំ២០១៥ដល់ឆ្នាំ២០៣០ចំនួនប្រជាជននៅតាមទីប្រជុំជន និងទីក្រុងធំៗ និងកើនពី៤ទៅ៧លាននាក់។​ កំណើនប្រជាសាស្រ្តនេះ នឹងទាមទារឲ្យមានការផ្តត់ផ្គង់លំនៅដ្ឋានដ៏ច្រើន រហូតដល់៨៥ម៉ឺនខ្នងដល់ឆ្នាំ២០៣០ ពោលគឺការផ្គត់ផ្គង់ប្រចាំឆ្នាំត្រូវមានប្រមាណជាង៥​ម៉ឺនខ្នង។

ជាមួយគ្នានេះយោងតាមការសិក្សារបស់ក្រុមហ៊ុនUrban Living Solutionកាលពីឆ្នាំ២០១៨ក៏បានរកឃើញផងដែរថា នៅឆ្នាំ២០២៥ប្រជាពលរដ្ឋរស់នៅក្រុងភ្នំពេញ នឹងកើនដល់៤,៥លាននាក់ ជាពេលវេលាដែលធ្វើឲ្យប្រជាជនកាន់តែច្រើន នឹងរស់នៅតាមខុនដូ ដោយសារទី១ កំនើនប្រជាសាស្រ្តធ្វើឲ្យមានការកកស្ទះចរាចរណ៍ខ្លាំង ទី២ តម្លៃអ​ចលនទ្រព្យ ពិសេសលំនៅដ្ឋាននឹងមានតម្លៃខ្ពស់ ដែលប្រជាពលរដ្ឋថ្នាក់កណ្តាលមិនមាន​លទ្ឋភាពទិញលំនៅដ្ឋាននៅក្នុងទីក្រុងបាន តែពួកគេអាចទិញនៅជាយក្រុង ដែលលំបាកក្នុងការធ្វើដំណើរ។

ទី៣ ការរីកចម្រើនបច្ចេកវិទ្យា នឹងធ្វើឲ្យគុណភាពជីវិតប្រសើរឡើង ដោយអ្នករស់នៅតាមខុនដូ ឬលំនៅដ្ឋាននានាអាចកុំម៉ង់អាហារ ទទួលទានកាន់តែ​ងាយស្រួល និងទី៤ លក្ខខ័ណ្ឌកន្លែងការងារ ដែលប្រជាពលរដ្ឋមិនចង់រស់នៅឆ្ងាយពីការងារ ហើយពួកគេ​ងាកមករស់នៅខុនដូ ដែលស្ថិតនៅជិតកន្លែងការងាររបស់ពួកគេ។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមានប្រសាសន៍ថា ប្រជាពលរដ្ឋរស់នៅក្រុងភ្នំពេញ មិនមានចំនួនច្រើននោះទេ គឺមួយគីឡូម៉ែត្រ មានតង់ស៊ីតេត្រឹមជាង២០០០នាក់ ប៉ុន្តែបញ្ហាកកស្ទះចរាចរណ៍មានការកើនឡើងខ្ពស់ ខុសពីបណ្តាប្រទេសក្នុងតំបន់ដូចជាទីក្រុងបាងកក ប្រទេសថៃ ទីក្រុងហូជីម៉ិញ​ប្រទេសវៀតណាម ដែលមានប្រជាជនរស់នៅចន្លោះ៤០០០ ទៅ៥០០០នាក់ក្នុងមួយគីឡូម៉ែត្រ តែបញ្ហាចរាចរណ៍ហាក់មិនអាក្រក់ណាស់ណានោះទេ។

អ្នកនាងបន្តថា “រដ្ឋាភិបាលគួរចាត់វិធានការណ៍ ទៅលើបញ្ហាសណ្តាប់ធ្នាប់ចរាចរ ណ៍ តាមរយៈការដាក់ចេញវិធានការណ៍អប់រំ និងជំរុញឲ្យអ្នកបើកបរគោរពច្បាប់ តាមរយៈការធ្វើយ៉ាងណាឲ្យពួកគេយល់ដឹងពីច្បាប់”៕

ដោយៈ រ៉ាណេត

ភ្នំពេញៈ តបតាមសំណើស្នើសុំវិនិយោគរបស់ក្រុមហ៊ុនចំនួន២ដែលមានទុនវិនិយោគសរុបជាង៨លានដុល្លារស្ថិតនៅក្នុងវិស័យឧស្សាហកម្មគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនប័ត្រចុះបញ្ជីជាស្ថាពរ។

តាមរយៈបណ្តាញផ្សព្វផ្សាយអេឡិចត្រូនិក ផ្លូវការរបស់ក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា ក្រុមហ៊ុនដែលទទួលបានការគាំទ្រ ខាងលើនេះរួមមានដូចខាងក្រោម ៖

ទី១ ក្រុមហ៊ុនJIN XINSHENG (CAMBODIA) CO., LTD.  គម្រោងបង្កើតរោងចក្រផលិតក្រដាសទ្រនាប់ពុម្ព ទ្រនាប់កអាវ ស្កុត និងខារអំបោះ ដែលមានទីតាំងវិនិយោគស្ថិតនៅក្នុងសួនឧស្សាហកម្ម វៀលស៊ុនអគារA ផ្លូវជាតិលេខ៤ ភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន១៩៨នាក់។

ទី២ ក្រុមហ៊ុន G.C.H INTERNATIONAL TRADE CO., LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ៣,២លានដុល្លារអាមេរិក និងអាចបង្កើតការងារបានចំនួន ១.០២៨នាក់៕