ពហុកីឡដ្ឋានជាតិមរតកតេជោតម្លៃ ១៦០លានដុល្លារសាងសង់សម្រេចបានប្រមាណ ៩០ភាគរយ

ដោយៈ រ៉ាណេត

ភ្នំពេញៈ ពហុកីឡដ្ឋានជាតិមរតកតេជោ ដែលមានតម្លៃជិត១៦០លានដុល្លារ ក្រោមហិរញ្ញប្បទានឥតសំណង់ពីរដ្ឋាភិបាលចិន នៅលើផ្ទៃដីទំហំជាង ១៦ហិកតា ត្រូវបានម ន្ត្រីជំនាញអះអាងថា ការសាងសង់សម្រេចបានប្រមាណ ៩០ភាគរយ និងគ្រោងបញ្ចប់ទាំងស្រុងនៅត្រឹមចុងខែមីនា ឆ្នាំ២០២១ខាងមុខនេះ។

លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍នៅថ្ងៃចុងសប្ដាហ៍កន្លងទៅនេះថា មកទល់ពេលនេះដំណើរការសាងសង់ពហុកីឡដ្ឋានជាតិមរតកតេជោ សម្រេចបានប្រមាណ ៩០ភាគរយហើយ ហើយការសាងសង់គ្រោងបញ្ចប់ជាស្ថាពរនៅអំឡុងខែមីនាឆ្នាំ២០២១ ។

សំណង់ពហុកីឡដ្ឋានជាតិមរតកតេជោនេះ បានបើកការដ្ឋានសាងសង់ នៅថ្ងៃទី៤ មេសា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់ របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអំឡុងពេលសម្ពោធដាក់ឱ្យប្រើប្រាស់សមិទ្ធផលដំណាក់កាលទី១ មានដូចជា មជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល , ទីលានបាល់បោះ និងអគារស្នាក់នៅរបស់អត្តពលិក ជាពិសេសសម្រាប់ត្រៀមបើកការប្រកួតកីឡាអាស៊ីអាគ្នេយ៍ (Sea Games) លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ។

លោកវ៉ាត់ ចំរើន បានបញ្ជាក់ថា ពីដំបូងគណៈកម្មការបានវាយតម្លៃថា ការសាងសង់នឹងត្រូវបញ្ចប់ ជាស្ថាពរនៅចុងឆ្នាំ២០២០នេះ។ ប៉ុន្តែដោយសារការរាតត្បាតនៃជំងឺ COVID-19 បានធ្វើឱ្យការសាងសង់ ត្រូវអូសបន្លាយរហូតដល់ខែមីនា ឆ្នាំ២០២១ ខណៈដែលគ្រោង នៃសំណង់ពហុកីឡដ្ឋានដ៏ធំប្រចាំប្រទេសមួយនេះ ត្រូវបានសាងសង់រួចរាល់១០០ភាគរយហើយ នៅសល់តែការបំពាក់សម្ភារមួយចំនួន ដូចជាកៅអី ដំបូល អំពូល ភ្លើង និងការធ្វើទីលានខាងក្នុងតែប៉ុណ្ណោះ។

សម្រាប់តែកៅអីអង្គុយបេតុង នៅក្នុងពហុកីឡដ្ឋានជាតិដ៏ទំនើបនេះ មានទម្ងន់ធ្ងន់ជាងគេរហូតដល់ទៅ៩.៧៤តោន ត្រូវបានផលិតឡើងយ៉ាងផ្ចិតផ្ចង់ និងបំពាក់ជាមួយប្រព័ន្ធQR Code ដើម្បីត្រួតពិនិត្យលក្ខណៈបច្ចេកទេសនៃកៅអី ពោលគឺដើម្បីត្រួតពិនិត្យគុណភាពបេតុងកៅអីនេះ ដូចជា ភាពស្មើក្នុងការលើកដាក់ជាដើម។ កៅអីបេតុងនៅក្នុងពហុកីឡដ្ឋានមានចំនួន៤៦២៤ដុំ កាំជណ្តើរចំនួន២៣៩២កាំ និងបង្កាន់ដៃចំនួន១៩២ សរុបចំនួន ៧.២០៨ដុំ ៕

ប្រធានសមាគមអចលនទ្រព្យសកល បង្ហើបពីឯកសារសំខាន់ដែលត្រូវដឹងមុនពេលទិញខុនដូ

ដោយៈ រ៉ាណេត

ភ្នំពេញៈ មិនខុសពីការទិញអចលនទ្រព្យដទៃទៀតដូចជាទិញដី ទិញផ្ទះ នោះទេ សម្រាប់ការទិញខុនដូ ដែលជាប្រភេទលំនៅដ្ឋានសហកម្មសិទ្ធិ ក៏ត្រូវទាមទារឱ្យមានភាពប្រាកដប្រជា និងច្បាស់លាស់ពីស្ថានភាពទូទៅនៃគម្រោងផងដែរ ជាពិសេសពិនិត្យទៅលើរាល់ឯកសារពាក់ព័ន្ធសំខាន់ៗមួយចំនួន មុនពេលសម្រេចចិត្តទិញ ជៀសវាងជួបការខាតបង់ទ្រព្យ។

ប្រធានសមាគមអចលនទ្រព្យសកល ហៅកាត់ (GRA) លោក សំ សុខនឿន និងជាប្រធានក្រុមហ៊ុន Kw Sam Sn Realty Co., Ltd បានមានប្រសាសន៍ឲ្យដឹងកាលពីចុងសប្តាហ៍មុនថា នៅក្នុងមុខអាជីពជាភ្នាក់ងារលក់អចលនទ្រព្យ គឺមានអ្នកត្រឹមត្រូវ ស្មោះត្រង់ និងមានវិជ្ជាជីវៈ ហើយក៏មានអ្នកគ្មានក្រមសីលធម៌ផងដែរ ដែលអាចអនុវត្តគ្រប់វិធីសាស្ត្រ ធកវើយ៉ាងណាអាចទទួលបានចំណែកទីផ្សារ។

លោកបញ្ជាក់ថា “សម្រាប់អ្នកដែលមានអាជីពពិតប្រាកដ មានក្រមសីលធម៌ និងភាពស្មោះត្រង់ ត្រឹមត្រូវជាមួយអតិថិជន ប៉ុន្តែសម្រាប់អ្នកដែលគ្មានវិជ្ជាជីវៈ គឺគេអាចប្រើទ្រឹស្ដី និងវិធីសាស្ត្រផ្សេងៗជាច្រើន ដែលធ្វើយ៉ាងណាអាចទាក់ចិត្តអតិថិជនទិញអចលនវត្ថុរបស់ពួកគេបាន ដែលវាជាគ្រោះថ្នាក់សម្រាប់អតិថិជន ដែលមិនបានយល់ច្បាស់ពីការទិញអចលនវត្ថុ” ។

លោកសំ សុខនឿន បានបន្តថា កាលពីពេលកន្លងទៅយើងធ្លាប់បានឃើញរួចមកហើយនូវការចាញ់បោកឈ្មួញមិនស្មោះត្រង់ ឬភ្នាក់ងារគ្មានវិជ្ជាជីវៈ ទៅលើការទិញគម្រោងខុនដូ ហើយចុងក្រោយអតិថិជនទទួលរងនូវការខាតបង់ទ្រព្យ ដែលទិញប៉ះចំគម្រោងខ្យល់។ ក្នុងន័យនេះជាការបញ្ចៀសនូវការខាតបង់ មុនពេលសម្រេចចិត្តទិញខុនដូ អ្នកដែលជាអតិថិជន ក៏ត្រូវតែដឹងច្បាស់នូវគម្រោងអភិវឌ្ឍន៍ទាំងមូល តាមរយៈការពិនិត្យទៅលើឯកសារសំខាន់ពាក់ព័ន្ធមួយចំនួនដូចជា

១. អាជ្ញាបណ្ណអភិវឌ្ឍន៍ ឬការសាងសង់ខុនដូពីក្រសួងសេ្ឋកិច្ច និងហិរញ្ញវត្ថុ

២. លិខិតអនុញ្ញាតសាងសង់ពីក្រសួង រៀបចំដែនដី នគរូបនីយកម្ម និងសំណង់

៣. លិខិតបើកការដ្ឋានសាងសង់ពីក្រសួងរៀបចំ ដែនដី នគរូបនីយកម្ម និងសំណង់។

៤. អាជ្ញាបណ្ណបើកការលក់ ពីក្រសួងសេដ្ឋកិច្ច និងហិរញ្ញវត្ថុ

៥. លិខិតបិទឬបញ្ចប់ការសាងសង់ពីក្រសួង រៀបចំដែនដី នគរូបនីយកម្ម និងសំណង់

៦. ប្លង់ដីដែលកំពុងសាងសង់ មិនជាប់បញ្ជាំ ឬម្ចាស់ដីត្រូវតែជាមនុស្សតែមួយនៃម្ចាស់ក្រុមហ៊ុនអភិវឌ្ឍន៍។

៧. ឯកសារដែលបង្ហាញពីគោលការណ៍ បញ្ជាក់ថាជាដីដែលជួលពីរដ្ឋរយៈពេលកំណត់ (Leasehold) ឬជាដីឯកជនកម្មសិទ្ធិអចិន្ត្រៃយ៍ (Freehold)។

លោកសំ សុខនឿន បានបញ្ជាក់ទៀតថា នៅពេលអ្នកដែលជាអតិថិជនពិនិត្យទៅលើរាល់ឯកសារ ដូចដែលបានបញ្ជាក់ជូនខាងលើនេះ ភាពប្រឈមនឹងការខាត់បង់ នឹងត្រូវបានកាត់បន្ថយ ហើយថែមទាំងមានទំនុកចិត្តខ្ពស់ ទៅលើគម្រោងដែលខ្លួនបានទិញថែមទៀតផង៕

តើប្រជាជនកម្ពុជាគួរមានទ្រព្យសម្បត្តិប៉ុណ្ណា ដើម្បីអាចនឹងអស់ក្តីបារម្ភពីបញ្ហាហិរញ្ញវត្ថុ

ដោយៈ រ៉ាណេត

ភ្នំពេញៈ អ្នកវិភាគសេដ្ឋកិច្ចឯករាជ្យកម្ពុជា លោក ង៉ែត ជូ បានបង្ហាញពីការសិក្សាស្រាវជ្រាវមួយ ទៅលើកម្រិតនៃទ្រព្យសម្បត្តិ ដែលគ្រួសាររបស់ប្រជាពលរដ្ឋនៅកម្ពុជាអាចនឹងអស់ពីក្ដីបារម្ភទៅលើបញ្ហាហិរញ្ញវត្ថុ ឬអាចនិយាយបានថាអាចគ្រប់គ្រង និងមានសុវត្ថិភាពហិរញ្ញវត្ថុបាន។

ជាមួយនឹងការវិភាគ តាមរយៈបណ្តាញទំនាក់ទំនងអេឡិចត្រូនិក កាលពីថ្ងៃចុងសប្ដាហ៍កន្លងទៅនេះ លោក ង៉ែត ជូ ក៏បានលើកសម្មតិកម្មសម្រាប់ជាការស្រាវជ្រាវបន្ត ដើម្បីបញ្ជាក់ថា តើសម្មតិកម្មពិតឬមិនពិត ដូចដែលបានបង្ហាញជូននៅខាងក្រោមនេះ ៖

យោងតាមការស្រាវជ្រាវ មុនពេលការផ្ទុះការរីករាលដាលនៃវីរុស Covid-19 បានបង្ហាញថា ប្រជាជនអាមេរិកកាំងម្នាក់ៗយល់ថា ខ្លួនអស់បារម្ភពីបញ្ហាហិរញ្ញវត្ថុ ប្រសិនបើខ្លួនមានទ្រព្យសម្បត្តិ (net worth) ចំនួន ៩៣ម៉ឺនបួនពាន់ដុល្លាអាមេរិក ឬជាង ១៤ដងនៃចំណូលជាមធ្យមប្រចាំឆ្នាំសំរាប់ប្រជាជនម្នាក់ (ចំណូលជាមធ្យមប្រចាំឆ្នាំគឺ៦៥១១៨ដុល្លា) ។

បើប្រៀបធៀបលទ្ធផលនៃការស្រាវជ្រាវខាងលើនេះ ជាមួយនឹងកំរិតសេដ្ឋកិច្ចរបស់កម្ពុជា ប្រជាជនកម្ពុជាម្នាក់ៗ នឹងអស់ក្តីបារម្ភពីបញ្ហាហិរញ្ញវត្ថុ ប្រសិនបើមានទ្រព្យសប្បត្តិចំនួន ២៣៥៦៥ដុល្លា (ជាង២ម៉ឺនដុល្លា) ។

នេះជារបៀបគណនា ដែលចំណូលជាមធ្យមប្រចាំឆ្នាំ របស់ប្រជាជនកម្ពុជា១នាក់ (១៦៤៣ដុល្លា) គុណនឹង១៤,៣ ។ ១៤,៣ គឺជាចំនួនដង នៃចំណូលជាមធ្យមប្រចាំឆ្នាំដែលប្រជាជនអាមេរិកកាំងយល់ថា ខ្លួនអស់បារម្ភពីបញ្ហាហិរញ្ញវត្ថុ។

យោងតាមលទ្ធផលនៃការគណនាចំនួនទ្រព្យសម្បត្តិ ដែលទំនងជាអាចធ្វើអោយប្រជាជនកម្ពុជាម្នាក់់ អស់បារម្ភពីបញ្ហាហិរញ្ញវត្ថុ យើងអាចគណនាចំនួនទ្រព្យសម្បត្តិដែលអាចធ្វើអោយគ្រួសារកម្ពុជា អស់បារម្ភពីបញ្ហាហិរញ្ញវត្ថុ ទៅតាមចំនួនសមាជិកគ្រួសារដូចខាងក្រោម៖

១) គ្រួសារដែលមានសមាជិក២នាក់ ត្រូវមានទ្រព្យសម្បត្តិជាង៤ម៉ឺន៧ពាន់ដុល្លា (២៣៥៦៥ដុល្លា គុណនឹង២) ។ ២) គ្រួសារដែលមានសមាជិក៣នាក់ ត្រូវមានទ្រព្យសម្បត្តិជាង៧ម៉ឺនដុល្លា (២៣៥៦៥ដុល្លា គុណនឹង៣) ។

៣) គ្រួសារដែលមានសមាជិក៤នាក់ ត្រូវមានទ្រព្យសម្បត្តិជាង៩ម៉ឺន៤ពាន់ដុល្លា (២៣៥៦៥ដុល្លា គុណនឹង៤) ។ ៤) គ្រួសារដែលមានសមាជិក៥នាក់ ត្រូវមានទ្រព្យសម្បត្តិជាង១១ម៉ឺន៧ពាន់ដុល្លា (២៣៥៦៥ដុល្លា គុណនឹង៥) ។

ការគណនាខាងលើគឺជាសម្មតិកម្ម តាមរយៈការប្រៀបធៀប ដោយផ្អែកលើកំរិតសេដ្ឋកិច្ចផ្សេងគ្នារវាងប្រជាជនកម្ពុជា និងប្រជាជនអាមេរិកកាំង។ ប្រជាជនកម្ពុជាយល់ឃើញយ៉ាងណា វាអាស្រ័យលើទម្លាប់នៃការចាយវាយ និងកំរិតនៃការគាំពារសង្គមដែលប្រជាជនកម្ពុជាទទួលបានពីរដ្ឋាភិបាល។

ប្រជាជនកម្ពុជាមិនមានសេវាគាំពារសង្គមល្អ ដូចអ្វីដែលប្រជាជនអាមេរិកកាំងទទួលបាននោះទេ។ (ប្រភពទិន្នន័យ ៖ ធនាគារពិភពលោក និង CNBC) ៕

ជប៉ុនគ្រោងសាងសង់អគារពាណិជ្ជកម្មខ្ពស់បំផុត នៅក្នុងប្រទេសរបស់ខ្លួន នាឆ្នាំ២០២៧

ដោយ វុត្ថា

តូក្យូៈ ជប៉ុនគ្រោងសាងសង់អគារកំពស់ ៣៩០ម៉ែត្រ ឬ៦៣ជាន់នៅក្នុងឆ្នាំ២០២៧ នាពេលខាងមុខនេះ ដែលនឹងក្លាយជាអគារខ្ពស់បំផុតនៅក្នុងប្រទេសជប៉ុន ខណៈបច្ចុប្បន្ននេះអគារខ្ពស់បំផុតមានត្រឹមតែ៣៣០ម៉ែត្រ។

អគារនេះត្រូវបានគេប្រសិទ្ធិនាមថា Torch Tower ដែលគ្រោងនឹងសាងសង់នៅមុខស្ថានីយ៍តូក្យូ (Tokyo Station) និងបោះទុនវិនិយោគដោយ ក្រុមហ៊ុន Mitsubishi Estate Co. ជាក្រុមហ៊ុនវិនិយោគអចលនទ្រព្យដ៏ធំបំផុតរបស់ប្រទេសជប៉ុន។

បើតាមក្រុមហ៊ុន Mitsubishi Estate Co. អគារខ្ពស់ជាងគេនេះ ត្រូវបានប្រើប្រាស់ចម្រុះ ដូចជា អគារការិយាល័យ ពាណិជ្ជកម្ម សណ្ឋាគារប្រណីត និងសាលដ៏ធំដែលអាចផ្ទុកមនុស្សបានប្រមាណ ២០០០នាក់។

ទោះជាយ៉ាងណាក៏ដោយក្រុមហ៊ុន មិនបញ្ជាក់ពីទំហំទុនដែលត្រូវវិនិយោគនោះទេ ខណៈកំពុងសិក្សាលើហេដ្ឋារចនាសម្ព័ន្ធសំណង់អគារ។

អាគារខ្ពស់ជាងគេនាពេលបច្ចុប្បន្ននេះ នៅក្នុងប្រទេសជប៉ុននេះ គឺអាគារ Abeno Harukas ដែលមានកំពស់៣០០ម៉ែត្រ ស្ថិតនៅភាគខាងលិចនៃប្រទេសជប៉ុន ក្នុងទីក្រុង Osaka ។

អាគារមួយទៀត គឺគម្រោងអគារខ្ពស់កប់ពពក ដែលកំពុងសាងសង់ដោយក្រុមហ៊ុន Mori Building Co. មានកម្ពស់៣៣០ ម៉ែត្រគ្រោងនឹងបញ្ចប់នៅក្នុងឆ្នាំ ២០២៣ ក្នុងទីក្រុងតូក្យូ៕

ក្រុមហ៊ុនចិនបានបង្ហាញជំរើសចំនួន៣ នៃគំរោងផ្លូវល្បឿនលឿនភ្នំពេញ បាវិត

ដោយ វុត្ថា

ភ្នំពេញៈ ក្រុមហ៊ុន China Railway International Group Co., Ltd បានបញ្ចប់ការសិក្សាលើគំរោងសាងសង់ផ្លូវល្បឿនលឿនភ្នំពេញ បាវិត ដែលនឹងសាងសង់នាពេលខាងមុខ ដើម្បីពង្រីកសក្តានុពលនៃការដឹកជញ្ជូន ក៏ដូចជាជំរុញកំនើនសេដ្ឋកិច្ចកម្ពុជា។

លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងកាលពីពេលថ្មីៗនេះថា បន្ទាប់ពីក្រុមហ៊ុនសិក្សារួចរាល់កាលពីពេលថ្មីៗ ក្រុមហ៊ុនក៏កំពុងសិក្សាពីទំហំថវិកាដែលត្រូវសាងសង់ គម្រោងផ្លូវល្បឿនលឿនភ្នំពេញបាវិតនេះផងដែរ។

លោកថ្លែងថា“គម្រោងផ្លូវល្បឿនលឿនភ្នំពេញ បាវិត យើងទទួលបានឯកសារសិក្សាពីក្រុមហ៊ុនឯកជនរួចហើយ ពាក់ព័ន្ធនឹងបច្ចេកទេសសាងសង់ ដែលបានសិក្សាចប់គ្រប់ ហើយយើងពិនិត្យឃើញថា មិនមានបញ្ហានោះទេ” ។ លោកបន្ថែមថា “យើងកំពុងតែរងចាំឯកសារពាក់ព័ន្ធ នឹងក្រុមហ៊ុនសម្រេចថាដាក់ទុនពេលណា សាងសង់ចំណេញ ឬខាត ចំពោះការសាងសាង់ផ្លូវល្បឿនលឿនភ្នំពេញបាវិតនេះ” ។

របាយការណ៍សិក្សារបស់ក្រុមហ៊ុនបានបង្ហាញថា គម្រោងសាងសង់ផ្លូវល្បឿនភ្នំពេញបាវិតនេះ នេះមានបីជម្រើស ផ្អែកតាមទីតាំងភូមិសាស្ត្រ និងផលប៉ះពាល់ ជាផ្លូវរចនាឡើងសម្រាប់ល្បឿនលឿន បំផុតត្រឹម ១២០គីឡូម៉ែត្រក្នុងមួយម៉ោង ស្របតាមអនុស្សរណៈយោគយល់រវាងកម្ពុជា និងវៀតណាម។

ក្រសួងសាធារណការ និងដឹកជញ្ជូន ក៏ដូចជារាជរដ្ឋាភិបាលត្រូវការសិក្សាពិនិត្យ ឱ្យបានគ្រប់ជ្រុងជ្រោយ លើជម្រើសផ្លូវទាំងបីនេះ មុននឹងធ្វើការសម្រេចថា តើត្រូវជ្រើសរើសយកជម្រើសផ្លូវមួយណា ជាពិសេស ក្រសួងរង់ចាំលទ្ធផលរបាយការណ៍សិក្សាផ្នែកហិរញ្ញវត្ថុ ពីក្រុមហ៊ុននៅពាក់កណ្ដាលខែតុលា ឆ្នាំ២០២០ខាងមុខនេះ ដើម្បីយកជាមូលដ្ឋានក្នុងការសម្រេចចិត្ត។

លោកសូរ វិចទ័រ រដ្ឋលេខាធិការក្រសួងសាធារណការ និងដឹកជញ្ជូនធ្លាប់បានឱ្យដឹងផងដែរថា ការជ្រើសរើសយកជម្រើសណាមួយនោះ ត្រូវផ្ដោតជាសំខាន់លើក្របខណ្ឌនៃផលប៉ះពាល់សង្គម សេដ្ឋកិច្ច និងថវិកាសម្រាប់សាងសង់៕

ចំណេះដឹង! តើអ្វីជាគោលនយោបាយជាតិអភិវឌ្ឍន៍វិស័យថាមពលនៅកម្ពុជា?

ដោយ វុត្ថា

ភ្នំពេញៈ រាជរដ្ឋាភិបាលកម្ពុជា បានកំណត់នូវគោលនយោបាយជាតិមួយ ក្នុងការអភិវឌ្ឍវិស័យថាមពលនៅកម្ពុជា ដែលនយោបាយនេះ កំពុងត្រូវបានធ្វើឲ្យចេញជារូបរាងពិតប្រាកដបន្តិចម្តង។

ខ្លឹមសារនៃគោលនយោបាយជាតិ ក្នុងការអភិវឌ្ឍវិស័យថាមពលនៅកម្ពុជា មានដូចជា ទី១ ជម្រុញការរុករក និងការអភិវឌ្ឍប្រភពថាមពល ដែលមានលក្ខណៈបរិស្ថានអនុគ្រោះ ដើម្បីផ្គត់ផ្គង់អគ្គិសនីឲ្យបានគ្រប់គ្រាន់ ដល់គ្រប់ផ្នែកនៃវិស័យសេដ្ឋកិច្ចកម្ពុជាទី២ ធានាការផ្គត់ផ្គង់អគ្គិសនីដែលមានសុវត្តិភាព និងស្ថិរភាពក្នុងថ្លៃមួយសមស្រប ដើម្បីសម្រួលដល់ការអភិវឌ្ឍផ្នែកវិនិយោគនៅកម្ពុជា និងការអភិវឌ្ឍសេដ្ឋកិច្ចជាតិ។

ទី៣ ជម្រុញការប្រើប្រាស់ថាមពលឲ្យមានប្រសិទ្ធភាព ព្រមទាំងបន្ថយនូវឥទ្ធិពលមិនល្អខាងផ្នែកបរិ-ស្ថានដែលបណ្តាលមកពីការផ្គត់ផ្គង់ និងការប្រើប្រាស់ថាមពលនេះ ទី៤-ជម្រុញការចូលរួមរបស់ផ្នែកឯកជននៅក្នុងការអភិវឌ្ឍវិស័យថាមពល។

ដើម្បីចូលរួមកាត់បន្ថយភាពក្រីក្រ និងបង្កើតសុខដុមនីយភាពនៃការរស់នៅរបស់ប្រជាជននៅតំបន់ជនបទ រាជរដ្ឋាភិបាលបានជំរុញការអភិវឌ្ឍ អគ្គិសនីភាវូបនីយកម្មជនបទជាបន្តទៀត ដើម្បីធ្វើយ៉ាងណាម្រេចឲ្យបាននូវគោលដៅជាយុទ្ធសាស្ត្រចំនួនពីរគឺ

១-ឆ្នាំ២០២០ ភូមិទាំងអស់ទូទាំងព្រះរាជាណាចក្រកម្ពុជា នឹងមានអគ្គិសនីប្រើប្រាស់ពីប្រភពអគិ្គសនីផ្សេងៗ និង២-ឆ្នាំ២០៣០ យ៉ាងហោច ៩០% នៃគ្រួសារទាំងអស់ទូទាំងព្រះរាជា-ណាចក្រកម្ពុជា នឹងមានអគ្គិសនីដែលមានគុណភាព ដូចអគិ្គសនីពីខ្សែបណ្តាញជាតិប្រើប្រាស់៕

តើអាស៊ាននឹងតភ្ជាប់ផែនការមេរបស់ខ្លួនយ៉ាងដូចម្តេចនៅឆ្នាំ២០២៥ខាងមុខ?

ដោយ វុត្ថា

ភ្នំពេញ៖ សហគមន៍សេដ្ឋកិច្ចអាស៊ាន និងមេដឹកនាំនៃប្លុកនេះមានមហិច្ឆតាដ៏ធំមួយ ដើម្បីតភ្ជាប់សហគមន៍នេះ ទៅកាន់កម្រិតថ្មីមួយ ដែលមានភាពប្រទាក់ក្រឡាជាងមុន ស៊ីជម្រៅជាងមុន ក្នុងគោលដៅកសាងសហគមន៍មួយ ដែលមានសុខដុមនីយកម្មរួម។

មេដឹកនាំអាស៊ាន មានផែនការមេស្តីពីការតភ្ជាប់អាស៊ាន ឆ្នាំ២០២៥ (SEAN Connectivity : Connecting a Region 2025) មានចក្ខុវិស័យ “ដើម្បីសម្រេចបាននូវសមាហរណកម្ម និងតភ្ជាប់សហគមន៍អាស៊ានគ្រប់ជ្រុងជ្រោយ និងដោយរលូន ដែលនឹងជំរុញការប្រកួតប្រជែង បរិយាបន្ន និងភាពជាសហគមន៍ក្នុងតំបន់អាស៊ាន”។

ផែនការមេនេះ នឹងធ្វើឱ្យប្រសើរឡើងនូវរបៀបនៃការរស់នៅ ការបំពេញការងារ និងការបំលាស់ទីនៃប្រជាជាតិអាស៊ាន ដោយជំរុញនូវការតភ្ជាប់នៃហេដ្ឋារចនាសម្ព័ន្ធរូបវ័ន្ធ ការតភ្ជាប់ស្ថាប័ន និងទំនាក់ទំនងរវាងប្រជាជននិងប្រជាជនក្នុងតំបន់ ដែលនឹងផ្តល់នូវក្របខ័ណ្ឌ ដែលអនុញ្ញាតឱ្យទាំងអស់គ្នា នឹងទទួលបានអត្ថប្រយោជន៍ពីផែនការមេនេះ។

អស់រយៈពេលជាង៥០ឆ្នាំមកនេះ តំបន់អាស៊ានមានការលូតលាស់យ៉ាងលឿនទាំងការរភ្ជាប់ហេដ្ឋារចនាសម្ព័ន្ធ សេដ្ឋកិច្ច និងកំណើនប្រជាពលរដ្ឋ។ បច្ចុប្បន្ននេះ មានប្រជាពលរដ្ឋនៅក្នុងតំបន់អាស៊ានមានចំនួនជាង៦០០លាននាក់ ដែលមានផលទុនជាតិសរុបរួម(GDP)កើនឡើងទ្វេដងគឺ ២.៦ ទ្រីលានដុល្លារសហរដ្ឋអាមេរិក ក្នុងឆ្នាំ២០១៦ និង ២០១៧ កន្លងទៅនេះ។

ទស្សនវិស័យការតភ្ជាប់អាស៊ាន សម្រាប់ឆ្នាំ ២០២៥ផ្តោតសំខាន់លើការផ្សព្វផ្សាយ ការប្រកួតប្រជែងនៅក្នុងសហគមន៍ទាំងមូលដែលនាំអោយមានគុណភាពនៃការរស់នៅរបស់ប្រជាពលរដ្ឋឪកាសការងារនិងការធ្វើដំណើរទៅវិញទៅមករបស់ប្រជាពលរដ្ឋ។

ជាមួយគ្នានោះ ហេដ្ឋារចនាសម្ព័ន្ធនៃតំបន់អាស៊ាន មានការលូតលាស់គួរអោយកត់សម្គាល់ ដោយតភ្ជាប់ពីប្រទេសមួយទៅប្រទេសមួយទៀត ដើម្បីគាំទ្រដល់កិច្ចសហប្រតិបត្តិការនៅតាមព្រំដែននានា ដែលជំរុញអោយមានទំនាក់ទំនងរវាងប្រជាជន និងប្រជនក្នុងសងហគមន៍ទាំងមូលមានភាពល្អប្រសើរ។

តំបន់អាស៊ានជាតំបន់ដែលមានវប្បធម៌និងប្រពៃណីចម្រុះហើយតំបន់នេះអាចនិយាយបានថាជាស្ពានដ៏រឹងមុំារបស់ប្រទេសនីមួយៗ។

ការវិនិយោគទៅលើហរដ្ឋារចនាសម្ព័ន្ធមានការរីកចម្រើនទាំងអគារនៅក្នុងទីក្រុងមានស្តង់ដារនិងបច្ចេកវិទ្យាដែលជម្រុញឲ្យមានសេដ្ឋកិច្ចលូតលាស់យ៉ាងលឿន។តំបន់អាស៊ានគឹជាទីផ្សារដ៏ធំបំផុតក្នុងពិភពលោកដែលជម្រុញអោយប្រទេសក្នុងតំបន់កាន់តែនៅជិតគ្នានាំមកនូវវិបុលភពនិងភាពរីកចម្រើន។

តាមការការទស្សទាយប្រជាប្រជាពលរដ្ឋ នៅក្នុងតំបន់អាស៊ាននឹងកើនឡើងរហូតដល់៩០០លាននាក់ នៅក្នុងឆ្នាំ២០៣០ ដែលធ្វើអោយតំបន់នេះ មានការប្រកួតប្រជែងទីផ្សារកាន់តែខ្លាំងថែមទៀត៕

តើតំបន់ចក្រអង្រែចាប់ផ្តើមប្រែក្លាយជាតំបន់ពាណិជ្ជកម្មបណ្តើរៗ ខណៈរោងចក្រ សហគ្រាសនានាត្រៀមចាកចេញ?

ដោយស៊ីវ ម៉េង

ភ្នំពេញ: ដោយសារការកើនឡើងនៃតម្លៃដីធ្លី និងការរីកចម្រើនសេដ្ឋកិច្ចសង្គម រយៈពេល៥ឆ្នាំខាងមុខទៀត តំបន់ចក្រអង្រែលើ និងចក្រអង្រែក្រោមស្ថិតនៅតាមបណ្តោយផ្លូវជាតិលេខ២ នឹងក្លាយជាតំបន់ពាណិជ្ជកម្មរសរវើក។

លោកយិនលាងគង់ស្ថាបនិកនិងជាអគ្គនាយកនៃគេហទំព័រpropertyarea.asia ដែលបានតាមដានវិស័យសេដ្ឋកិច្ច និងសង្គមជាច្រើនឆ្នាំនៅកម្ពុជាបានលើកឡើងថា នេះជានិន្នាការធម្មតារបស់ប្រទេសមួយ ដែលការវិវត្តន៍នានាបានផ្លាស់ប្តូរពីតំបន់មួយដែលធ្លាប់ជាដីស្រែក្លាយជាតំបន់លំនៅដ្ឋាន ហើយតំបន់លំនៅដ្ឋានមិនរៀបរយក្លាយជាតំបន់លំនៅដ្ឋាន និងពាណិជ្ជកម្ម។ ដូចគ្នានេះតំបន់ចក្រអង្រែលើ និងចក្រអង្រែក្រោម ស្ថិតក្នុងខ័ណ្ឌមានជ័យ ដែលជាបណ្តុំរោងចក្រ សហគ្រាសកាត់ដេរ និងផលិតស្បែកជើងតាំងពី ទសវត្សរទី៩០ មកនឹងក្លាយជាតំបន់លំនៅដ្ឋាន និងមជ្ឈមណ្ឌលពាណិជ្ជកម្មយ៉ាងផុសផុលនាពេលអនាគត។

លោកបន្តថា “រដ្ឋាភិបាលនឹងមិនទុកឲ្យរោងចក្រ សហគ្រាសនៅក្នុងទីក្រុងទៀតនោះទេនាពេលអនាគត ព្រោះវាមិនត្រឹមតែធ្វើឲ្យបាត់តម្លៃបន្ថែមក្នុងសេដ្ឋកិច្ចទេ តែក៏ធ្វើឲ្យមានការបំពុលផ្សែង ដែលបង្កការរំខានដល់ការរស់នៅរបស់ពលរដ្ឋផងដែរ”។លោកបន្តថា “ការកើនឡើងនូវតម្លៃដីធ្លី និងទំនោរនៃការអភិវឌ្ឍន៍នឹងរុញច្រានរោងចក្រ សហគ្រាសទាំងនោះចេញទៅជាយក្រុងភ្នំពេញ”។

លោកលាងគង់បានលើកពាក្យទំនៀមមួយថា “ចិនចេញខ្មែរ ខ្មែរដេញខ្មោច”ជាក់ស្តែងរឿងនេះ បាននិងកំពុងកើតឡើងនៅកម្ពុជា ពិសេសតំបន់ជាយក្រុងភ្នំពេញ ដែលដើមឡើយជាតំបន់កប់ខ្មោច ប៉ុន្តែពេលនេះតំបន់ទាំងនោះបានក្លាយជាតំបន់ពាណិជ្ជកម្ម និងលំនៅដ្ឋានយ៉ាងរៀបរយ។

អគ្គនាយកក្រុមហ៊ុនCentury21 Mekongលោកច្រឹក សុខនីមបានថ្លែងឲ្យដឹងផងដែរថា ពិតហើយគោលនយោបាយរបស់រដ្ឋាភិបាល នាពេលអនាគតនឹងរៀបចំតំបន់ឧស្សាហកម្មដាច់ដោយឡែកពីគ្នា និងមិនស្ថិតនៅក្នុងទីក្រុងនោះទេ។ គឺដូចគ្នានឹងតំបន់ចក្រអង្រែលើ និងចក្រអង្រែក្រោម ដែលបច្ចុប្បន្នសម្បូររោងចក្រ សហគ្រាស នឹងក្លាយជាតំបន់លំនៅដ្ឋាន និងមជ្ឈមណ្ឌលពាណិជ្ជកម្មនាពេលដ៏ខ្លីខាងមុខនេះ។

លោកបន្តថា “នេះជានិន្នាការធម្មតា ពេលប្រទេសមិនទាន់អភិវឌ្ឍន៍ អ្វីៗមិនសូវមានភាពរៀបរយទេ ប៉ុន្តែពេលប្រទេសអភិវឌ្ឍន៍កាន់តែច្រើន និន្នាការបែបនេះនឹងកើតឡើងជាស្វ័យប្រវត្តិ”។

រហូតមកទល់ពេលនេះមានរោងចក្រសហគ្រាសមួយចំនួនបានរើចាកចេញពីតំបន់នេះបណ្តើរៗហើយពិសេសតំបន់ស្ថិតក្នុងសង្កាត់ចក្រអង្រែលើនៃទឹកដីខ័ណ្ឌមានជ័យរាជធានីភ្នំពេញ៕

អ្នកជំនាញថាការពុះដីឡូត៍នៅតំបន់ជាយក្រុងផ្តល់ភាពល្អប្រសើរនាពេលបច្ចុប្បន្ន

ដោយ គង់ សូរិយា

ភ្នំពេញៈ នៅពេលបច្ចុប្បន្ននេះចំពោះការពុះដីឡូត៍នៅតាមតំបន់ជាយក្រុងរាជធានីភ្នំពេញគេសង្កេតឃើញថាកំពុងតែមានសកម្មភាពយ៉ាងពុះកញ្ជ្រោលនិងខ្លាំងក្លាបំផុតជាពិសេសនៅទិសខាងត្បូងឈាងខាងលិចតែម្ដងដូចជានៅតាមផ្លូវជាតិលេខ៣ផ្លូវជាតិលេខ៤ជាដើម។

នាយកទីផ្សារនិងផ្សព្វផ្សាយក្រុមហ៊ុន Gold Land Realestate លោកវិន ឈុនហ៊ាត ដែលកំពុងតែមមាញឹកក្នុងការលក់ដីឡូត៍នៅតំបន់អង្គស្នួល ផ្លូវជាតិ៤ បានប្រាប់ថា ពេលនេះមានអតិថិជនជាច្រើន បាន និងកំពុងតែមានការចាប់អារម្មណ៍ជាខ្លាំងជាមួយនឹងទីផ្សារដីឡូត៍មួយនេះ ព្រោះការទិញដីឡូត៍នេះ បានផ្តល់ភាពល្អប្រសើរជាច្រើនដល់ពួកគាត់ ដូចជាតម្លៃដីនៅទាប ដែលសមជាមួយលទ្ធភាពរបស់អ្នក ដែលមានចំណូលមធ្យម និងក្រោមមធ្យមជាពិសេសពួកគាត់អាចមានជម្រើសក្នុងការទិញដោយការបង់ផ្តាច់ជាមួយក្រុមហ៊ុនឬបង់រំលោះជាមួយធនាគារក្នុងរយៈពេលវែងប្រកបដោយទំនុកចិត្តខ្ពស់ដែលវាអាស្រ័យទៅនឹងចំណូលប្រចាំខែរបស់ពួកគាត់។

លោកបន្តថា ដោយឡែកចំពោះអ្នកដែលទិញ ដើម្បីទុកលក់យកចំណេញនៅពេលអនាគត ក៏មានឱកាសច្រើនក្នុងការទទួលបានភាគលាភផងដែរ។ ជាក់ស្ដែង ចំពោះដីឡូត៍ដែលក្រុមហ៊ុនរបស់លោក កំពុងដំណើរការលក់យ៉ាងសកម្មសព្វថ្ងៃនេះ ត្រឹមតែរយៈមួយខែ យ៉ាងហោចណាស់លក់ចេញបានមិនតិចជាង៧០ឡូត៍នោះទេ ខណៈដែលដីឡូត៍ដែលស្ថិតនៅជាប់ផ្លូវធំ (ផ្លូវរដ្ឋ) មានតម្លៃ១៩៥០០ដុល្លារ ហើយដីឡូត៍ដែលស្ថិតខាងក្នុងវិញមានតម្លៃត្រឹម ៩៨០០ដុល្លារ ។

យ៉ាងណាក៏ដោយលោកក៏បានព្រមាននិងផ្តាំផ្ញើដល់អ្នកដែលមានបំណង់ចង់ទិញដីឡូត៍មួយចំនួនផងដែរថា មុនពេលសម្រេចចិត្តទិញដីឡូត៍ គម្បីមានការត្រិះរិះពិចារណាឱ្យបានច្បាស់ដោយត្រូវមើលទំហំដីទីតាំងក៏ដូចជាប្រវត្តិរបស់ដីដើម្បីចៀសវាងមានបញ្ហាព្រោះដីឡូត៍ខ្លះលក់ក្នុងតម្លៃថោកប៉ុន្តែចំពោះគម្រោងអភិវឌ្ឍន៍ក៏ដូចជាការរៀបចំឯកសារមិនត្រូវធ្វើឡើងត្រឹមត្រូវនោះឡើយ។

ជាមួយនឹងភាពកញ្ជ្រោលនៃទីផ្សារពុះដីឡូត៍នេះលោកឧកញ៉ាបណ្ឌិតគីមហ៊ាងប្រធានសហមាគមន៍អ្នកវាយតម្លៃនិងភ្នាក់ងារអចលនវត្ថុកម្ពុជាបានទទួលស្គាល់ថាវាជាការល្អចំពោះទីផ្សារដីឡូត៍នាពេលបច្ចុប្បន្នប៉ុន្តែទីផ្សារដីឡូត៍វាក៏អាចបង្កជាបញ្ហាចំពោះការអភិវឌ្ឍហេដ្ឋារចនាសម្ព័ន្ធនាពេលអនាគត់ក៏អាចថាបាន។

លោកបញ្ជាក់ថា “ទិញដីឡូត៍ ល្អចំពោះអ្នកដែលមានចំណូលតិច និងប្រាថ្នាចង់បានដីសាងសង់លំនៅដ្ឋាន។ ទោះជាពួកគាត់មានចំណូលតិច ប៉ុន្តែក៏អាចមានជម្រើសក្នុងការទិញ ដើម្បីសាងសង់លំនៅដ្ឋាន ឬអាចទិញដើម្បីចង់លក់បន្តយកចំណេញ”។

លោកបណ្ឌិតបន្តថាតែវាក៏អាចបង្កជាបញ្ហានៅថ្ងៃខាងមុខដែរដែលផលប៉ះពាល់នេះវាអាចនឹងកើតមានឡើងនៅក្នុងរយៈពេលប្រមាណ១០ឆ្នាំខាងមុខជាពិសេសដីដែលស្ថិតនៅជាប់នឹងតំបន់ជាយក្រុងឬទីប្រជុំជនតែម្ដង។អាស្រ័យដូចនេះហើយទើបរដ្ឋាភិបាលចេញច្បាប់គ្រប់គ្រងការអភិវឌ្ឍដីនិងចេញជាសាចរណ៍ណែនាំកាលពីពេលកន្លងទៅថ្មីៗនេះ។

យ៉ាងណាក៏ដោយលោកឧកញ៉ាគីមហ៊ាងបានបង្ហាញក្ដីសង្ឃឹមថាតាមរយៈការបង្កើតច្បាប់ថ្មីនេះអាចនឹងជួយកាត់បន្ថយបញ្ហាដែលអាចនឹងកើតមានដោយសារការពុះដីឡូត៍នេះដ្បិតសកម្មភាពនៃការពុះដីឡូត៍បាននិងកំពុងកើតមានរួចមកហើយនោះ៕

ខេត្តចំនួន៥នៅប៉ែកឦសានចាប់ផ្ដើមអនុវត្តកម្មវិធីជំនាញដំណាក់កាលទី២ ដើម្បីពង្រឹងសមត្ថភាពទេសចរណ៍

ដោយៈ រ៉ាណេត

មណ្ឌលគីរីៈ ស្របទៅនឹងផែនការយុទ្ធសាស្ត្ររបស់រាជរដ្ឋាភិបាលកម្ពុជា តាមរយៈក្រសួងទេសចរណ៍ បានកំណត់និងចាប់ផ្តើមដាក់ឱ្យបណ្តាខេត្តចំនួន៥ នៅប៉ែកឦសានប្រទេស ដំណើរការនូវកម្មវិធីអភិវឌ្ឍន៍ជំនាញ(SDP) ដំណាក់កាលទី២ ឆ្នាំ២០២០–២០២៤ដើម្បីពង្រឹងលទ្ធភាពទេសចរណ៍កាន់តែល្អប្រសើរ។

ជាមួយនឹងគម្រោងនៃកម្មវិធីខាងលើនេះ ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីលីន បានមានប្រសាសន៍តាមទូរស័ព្ទនៅរសៀលថ្ងៃទី១៥ ខែកញ្ញា ឆ្នាំ២០២០កន្លងមកថា រដ្ឋាភិបាលបានកំណត់គោលដៅទេសចរណ៍ អាទិភាពយ៉ាងជាក់លាក់ជាមួយនឹងការដាក់ចេញនូវផែនការ និងកម្មវិធីអភិវឌ្ឍន៍ជាច្រើន ក្នុងគោលបំណងធ្វើយ៉ាងណាឱ្យវិស័យទេសចរណ៍នៅកម្ពុជាកាន់តែមានឧត្តមភាព។

លោកស្រីបញ្ជាក់ថា “ខេត្តទាំង៥ ដែលស្ថិតនៅប៉ែកឦសាននៃប្រទេសកម្ពុជា គឺសុទ្ធតែមានសក្ដានុពលទេសចរណ៍ ធម្មជាតិផ្សេងៗពីគ្នា ជាពិសេសមានភាពទាក់ទាញផ្នែកអេកូទេសចរណ៍ រួមផ្សំជាមួយវប្បធម៌នៃការរស់នៅរបស់ជនជាតិដើម ប្រចាំតំបន់ ដែលកាន់តែបង្កើនភាពទាក់ទាញ និងបម្រើដល់វិស័យទេសចរណ៍”។លោកស្រីបន្តថា “ ប៉ុន្តែអ្វីដែលសំខាន់ គឺការចូលរួមអភិវឌ្ឍន៍ និងអភិរក្សរួមគ្នារវាងអ្នកនៅក្នុងតំបន់ ព្រមទាំងវិស័យឯកជន ដើម្បីបង្កើនជាផលិតផលទេសចរណ៍ថ្មីបន្ថែម”។

នៅក្នុងឱកាសនេះ លោកស្រីឆាយ ស៊ីវលីន ក៏បានបញ្ជាក់ផងដែរថា ទោះបីជាតំបន់ប៉ែកខាងឦសានទាំង៥ខេត្ត ខាងលើនេះមានសក្ដានុពល និងភាពទាក់

ទាញក្នុងវិស័យទេសចរណ៍យ៉ាងណាក៏ដោយការអភិវឌ្ឍផ្នែកហេដ្ឋារចនាសម្ព័ន្ធរួមមានដូចជាផ្លូវថ្នល់និងស្ពានឱ្យមានភាពងាយស្រួលធ្វើដំណើរជាកត្តាសំខាន់ព្រោះនៅពេលមានភាពងាយស្រួលធ្វើដំណើរភាពទាក់ទាញទេសចរកាន់តែមានច្រើន។

ខេត្តទាំង៥ដែលត្រូវបានអនុវត្តនូវកម្មវិធីខាងលើនេះរួមមានខេត្តក្រចេះខេត្តស្ទឹងត្រង់ខេត្តមណ្ឌលគីរីខេត្តរតនគីរីនិងខេត្តព្រះវិហារ។

រដ្ឋលេខាធិការក្រសួងទេសចរណ៍លោក ប៉ាក់ សុខុមបានមានប្រសាសន៍ថា កម្មវិធីអភិវឌ្ឍជំនាញ (SDP) ដំណាក់កាលទី២នេះ ពិតជាមានសារៈសំខាន់ ដែលរាជរដ្ឋាភិបាលបានចាត់ទុកវិស័យទេសចរណ៍ ជាមាសបៃតងក្នុងការរួមចំណែក ដល់ការអភិវឌ្ឍសេដ្ឋកិច្ច–សង្គម តាមរយៈការបង្កើត និងបង្កើនឱកាសការងារ បង្កើនប្រាក់ចំណូលជូនប្រជាពលរដ្ឋដោយផ្ទាល់ និងរួមចំណែកដល់កាត់បន្ថយភាពក្រីក្រ។

ជាមួយគ្នានោះ លោកក៏បានជំរុញដល់អាជ្ញាធរខេត្ត និងភាគីពាក់ព័ន្ធទាំងអស់ ពិសេសប្រធានមន្ទីរទេសចរណ៍ខេត្តទាំង៥ និងមជ្ឈមណ្ឌលបណ្តុះបណ្តាល ត្រូវយកចិត្តទុកដាក់លើការបណ្តុះបណ្តាលធនធានមនុស្ស និងបន្តជួយគាំទ្រដល់កម្មវិធីអភិវឌ្ឍន៍ជំនាញរបស់អង្គការស្វីសខន់ថាក់ ឱ្យដំណើរការទៅដោយរលូន និងទទួលបានជោគជ័យ៕