ចំណេះដឹង! តើស្ថាប័នណាជាអ្នកផ្សះផ្សា និងដោះស្រាយវិវាទក្នុងវិស័យអលចនទ្រព្យ?

ដោយ វុត្ថា

ភ្នំពេញ៖ វិវាទរវាងអ្នកអភិវឌ្ឍអចលនវត្ថុ និងអ្នកទិញពាក់ព័ន្ធកិច្ចសន្យាលក់ ទិញអចលនវត្ថុ អាចជាកម្មវត្ថុនៃការសម្រុះសម្រួល និងផ្សះផ្សាដោយក្រសួង ឬមន្ទីរ។ ក្រសួង ឬមន្ទីរសម្រុះសម្រួល និងផ្សះផ្សាវិវាទ តាមការស្នើសុំរបស់ភាគីវិវាទក្នុងរយៈពេល ០២(ពីរ) ខែ យ៉ាងយូរ។

ការផ្សះផ្សាវិវាទ អាចឈានទៅដល់ការចុះកិច្ចព្រមព្រៀងផ្សះផ្សា ដែលត្រូវចុះហត្ថលេខាដោយគូភាគីវិវាទ និងមានការទទួលដឹងឮដោយនាយកដ្ឋាន ឬមន្ទីរ។ កិច្ចព្រមព្រៀងផ្សះផ្សា មានអានុភាពអនុវត្តភ្លាមៗ ចំពោះគូភាគី។

គូភាគីវិវាទ ដែលមិនពេញចិត្តចំពោះសេចក្តីសម្រេច ឬវិធានការផ្សេងៗរបស់ក្រសួង ឬមន្ទីរ មានសិទ្ធិដាក់ពាក្យបណ្តឹងតវ៉ាមកក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុ មុន នឹងអនុវត្តដីតិវិធីបណ្តឹងទៅតុលាការ លើកលែងតែរឿងព្រហ្មទណ្ឌ។

ក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុ ត្រូវដោះស្រាយបណ្ដឹងក្នុងរយៈពេល ៩០ថ្ងៃ នៃថ្ងៃធ្វើការ ក្រោយពីទទួលបានពាក្យបណ្តឹងតវ៉ា ឬក្នុងរយៈពេលមួយសមស្រប។ក្នុងការដោះស្រាយវិវាទ ក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ អាចអញ្ជើញភាគីពាក់ព័ន្ធវិវាទ ដើម្បីសាកសួរ ឬផ្តល់ភស្តុតាង តាមការចាំបាច់។

សេចក្តីសម្រេចស្តីពីការដោះស្រាយវិវាទ ត្រូវធ្វើឡើងជាលាយលក្ខណ៍អក្សរ ដោយមានបញ្ជាក់អំពីអង្គហេតុ សំអាងហេតុ និងការសន្និដ្ឋាន។ក្នុងករណីមិនពេញចិត្តនឹងសេចក្តីសម្រេចរបស់ក្រុមប្រឹក្សានីតិកម្ម ភាគីវិវាទអាចដាក់ពាក្យបណ្តឹងតវ៉ាទៅតុលាការមានសមត្ថកិច្ច ដោយអនុលោមតាមបទប្បញ្ញត្តិជាធរមាន៕

គណៈកម្មការបែងចែកដីធ្លី ព្រមានដកហូតដីពីពលរដ្ឋដែលទទួលបានសម្បទានវិញ បើមិនមានការប្រើប្រាស់

ដោយ ៖ រ៉ាណេត

ក្រចេះ ៖ គណៈកម្មការបែងចែក និងប្រើប្រាស់ដីធ្លីថ្នាក់ខេត្តក្រចេះបានធ្វការព្រមានដល់ពលរដ្ឋទាំងឡាយដែលទទួលបានដីសម្បទានពីរាជរដ្ឋាភិបាល ហើយទុកដីចោលមិនបានប្រើប្រាស់ នោះត្រូវបានដកហូតយកវិញដើម្បីប្រគល់ជូនពលរដ្ឋក្រីក្រដែលមានតម្រូវការពិតប្រាកដ។

តាមរយៈសេចក្ដីជូនដំណឹងដែលចេញដោយរដ្ឋបាលខេត្តក្រចេះ ដែលចុះហត្ថលេខាដោយលោក វ៉ា ថន អភិបាលខេត្ត កាលពីល្ងាចថ្ងៃទី១១ ខែកញ្ញា ឆ្នាំ២០២០ម្សិលមិញនេះបានបញ្ជាក់ថា គណៈកម្មការបែងចែក និងប្រើប្រាស់ដីសម្បទានខេត្តក្រចេះ នឹងចុះត្រួតពិនិត្យដល់ទីតាំងជាក់ស្ដែងមួយចំនួនដែលទទួលបានដីសម្បទានពីរាជរដ្ឋាភិបាលកម្ពុជា ស្ថិតនៅក្នុងស្រុកចំនួន៤ នៃស្រុកចិត្របុរី ដើម្បីដឹងពីលទ្ធភាពនៃការប្រើប្រាស់ដីសម្បទានរបស់ប្រជាពលរដ្ឋដែលទទួលបាន។

ក្នុងន័យនេះ រដ្ឋបាលខេត្តក្រចេះបានបញ្ជាក់ដល់សម្បទានិកដែលទទួលបានដីសម្បទានសង្គមកិច្ចពីគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ស្ថិតនៅក្នុងឃុំសំបុក ឃុំចង្រ្កង់ ឃុំដារ និងឃុំថ្មី ស្រុកចិត្របុរី ខេត្តក្រចេះ ដោយកំណត់ឱ្យបងប្អូនសម្បទានិកចូលប្រើប្រាស់ដីលំនៅឋាន និងដីកសិកម្មគិតចាប់ពីពេលជូនដំណឹងនេះរហូតដល់ថ្ងៃទី២៣ ខែកញ្ញា ឆ្នាំ២០២០។

ក្នុងករណីសម្បទានិកនៅតែមិនចូលមកប្រើប្រាស់ដីរបស់ខ្លួនបានន័យថា សម្បទានិកបានបោះបង់សិទ្ធិក្នុងការទទួលយកដី ហើយគណៈកម្មការបែងចែក និងប្រើប្រាស់ដីថ្នាក់ខេត្តនឹងរៀបចំនីតិវិធី ដើម្បីបែងចែកដីនោះទៅប្រជាពលរដ្ឋក្រីក្រខ្វះដីដើម្បីសង់លំនៅឋានសមរម្យ និងបង្កបង្កើនផល។ អាស្រ័យហេតុនេះ សូមបងប្អូនសម្បទានិកដែលមិនទាន់បានចូលរទៅប្រើប្រាស់ដីនៅក្នុងទីតាំងទាំង៤កន្លែងខាងលើ មេត្តារួសរាន់ចូលទៅប្រើប្រាស់ដីតាមការកំណត់កុំបីខាន៕

តំបន់ជ្រោយចង្វារនឹងបន្តទាក់ទាញការវិនិយោគខុនដូ ខណៈលក្ខខ័ណ្ឌភូមិសាស្រ្តមានភាពអំណោយផល

ដោយស៊ីវ ម៉េង

ភ្នំពេញៈលក្ខខ័ណ្ឌភូមិសាស្រ្ត ភាពអំណោយផលនៃបរិស្ថាន និងហេដ្ឋារចនាសម្ព័ន្ឋបាននិងកំពុងក្លាយជាមេដែកឆក់ដ៏សំខាន់ ក្នុងការទាក់ទាញអ្នកវិនិយោគជាតិ អន្តរជាតិសម្លឹងទៅកាន់តំបន់នេះ។

ជាមួយនឹងទន្លេព័ទ្ឋជុំវិញនិងស្ពានតភ្ជាប់មានភាពងាយស្រួលពិសេសទេសភាពដ៏ស្រស់ត្រកាលបាននិងកំពុងធ្វើឲ្យតំបន់នេះកាន់តែមានភាពរីកចម្រើននិងក្លាយជាតំបន់ស៊ីវិល័យមួយនាពេលអនាគត។

វិនិយោគិនដែលបាន និងកំពុងជិតបញ្ចប់គមរោងខុនដូរបស់ខ្លួន បាននិយាយក្នុងលក្ខខ័ណ្ឌមិនបញ្ចេញឈ្មោះថា តំបន់នេះត្រូវបានមនុស្សគ្រប់គ្នាពេញចិត្តចំពោះលក្ខខ័ណ្ឌជាច្រើន ពិសេសអាកាសធាតុមានភាអំណោយផល ដែលមិនរងការបំពុល និងផ្តល់នូវបរិយាកាសធម្មជាតិដ៏ស្រស់ស្រាយនៅគ្រប់រដូវកាល ពិសេសពេលព្រឹកព្រលឹម ដែលអ្នកភ្ញាក់ពីគេងនឹងមានអារម្មណ៍ស្រស់ស្រាយ និងកាត់បន្ថយអស់នូវស្រ្តេសទាំងឡាយ។

លោកបន្តថា “SH Condoរង់ចាំស្វាគមន៍អតិថិជន និងអ្នកវិនិយោគដែលអាចទិញយកចំណេញពីការវិនិយោគ ដោយអាចជួលបានជាមួយម្ចាស់គម្រោង ដែលមានសណ្ឋាគារនៅក្នុងគំរោងនេះ”។

ខុនដូប្រណីត និងមានតម្លៃសមរម្យបំផុត ស្ថិតនៅតំបន់ជ្រោយចង្វារ SH Condo បានត្រៀមផ្តល់កូនសោចូលស្នាក់នៅដល់អតិថិជន និងលក់បញ្ចប់យូនីតជាមួយនឹងតម្លៃពោរពេញដោយភាពប្រកួតប្រជែង។

អ្នកជំនាញអចលនទ្រព្យជាតិ និងអន្តរជាតិសុទ្ឋតែបានលើកឡើងពីការវិនិយោគនៅកម្ពុជា ជាការវិនិយោគល្អបំផុតសំរាប់ការទាញប្រាក់ចំណេញ បើធៀបជាមួយនឹងបណ្តាប្រទេសនានាក្នុងតំបន់អាស៊ាន។

អ្នកវិនិយោគខុនដូSH បានបន្តថា ជាមួយនឹងភាពរីកចម្រើន និងអភិវឌ្ឍន៍យ៉ាងឆាប់រហ័សនៃតំបន់ជ្រោយចង្វារ ដែលប្រែក្លាយពីតំបន់ក្រៅក្រុងមកជាក្រុងរណប ដ៏ទាក់ទាញ សំណង់លំនៅដ្ឋានសហកម្មសិទ្ធិនៃគម្រោងខុនដូ SH ជ្រោយចង្វារ បាននិងកំពុងទាក់ទាញការចាប់អារម្មណ៍យ៉ាងខ្លាំង ពីសំណាក់អតិថិជនដែលប្រាថ្នា ការរស់នៅបែបស៊ីវិល័យ។

ក្នុងចំណោមគម្រោងអភិវឌ្ឍន៍ជាច្រើន គម្រោងខុនដូតម្លៃសមរម្យជាងគេនៅតំបន់ជ្រោយចង្វារ SH Condo កំពស់ ២៨ជាន់ បាន និងកំពុងស្វាគមន៍អតិថិជន ដែលប្រាថ្នាចង់បានជីវិត និងការរស់នៅប្រកបដោយភាពកក់ក្ដៅ ទំនើប ទាន់សម័យ ជាមួយការលក់ក្នុងតម្លៃសមរម្យ និងមានលក្ខខណ្ឌបង់ប្រាក់ល្អប្រសើរបំផុត។

ជាមួយនឹងតម្លៃទាក់ទាញបំផុត អ្នកវិនិយោគខុនដូនេះបាន និងផ្តល់ឱកាសពិសេស លោកអ្នកកក់តែ ៥០០ដុល្លារ នឹងទទួលបានការ បញ្ចុះតម្លៃកាន់តែពិសេស បូករួមទាំង ការផ្តល់ជូននូវសម្ភារៈប្រើប្រាស់ប្រចាំថ្ងៃជាច្រើន រួមមានដូចជា –ទូរទឹកកក –ទូរទស្សន៏ (Smart TV ) ទូរចង្ក្រានលើក្រោម ម៉ាស៊ីនទឹកក្តៅ (Water Heater 32L)- និងគ្រឿងបរិក្ខារក្នុងបន្ទប់ទឹកដ៏ទាន់សម័យចំនួនមួយឈុតថែមទៀតផង។

អគ្គនាយកក្រុមហ៊ុនអចលនទ្រព្យ ERA Cambodia លោក ខន គង្គា ធ្លាប់បានប្រាប់គេហទំព័រ Propertyasia.area តាមទូរស័ព្ទកាលពីពេលកន្លងទៅនេះថា តំបន់ជ្រោយចង្វារវានឹងក្លាយជាតំបន់អភិវឌ្ឍចំរុះ ស្របពេលតំបន់នេះមានការទាក់ទាញច្រើន ហើយគម្រោងអភិវឌ្ឍធំនៅតំបន់នេះច្រើន។

លោកបានឲ្យដឹងថា “តំបន់ជ្រោយចង្វាក្នុងពេលនេះ និងអនាគតជាតំបន់ល្អសម្រាប់អ្នកវិនិយោគ និងអ្នកដែលចង់រស់នៅ ព្រោះតំបន់នេះហុំព័ទ្ធដោយទន្លេ” ។ លោកបន្តថា “សម្រាប់អ្នកដែលចង់គិតគូពីផាសុខភាព អាចផ្លាស់ប្តូរទៅរស់នៅ មកកាន់តំបន់ជ្រោយចង្វារ ដោយសារតំបន់ជ្រោយចង្វាមានការទាក់ទាញច្រើន ហើយគម្រោងអភិវឌ្ឍធំនៅតំបន់នេះច្រើន” ។

សម្រាប់ការសាកសួរព័ត៌មានបន្ថែមពីគម្រោងខុនដូ SH លោកអ្នកអាចទាក់ទងតាមរយៈទូរស័ព្ទលេខ 089 787 721 ។ Smart 010 725 168 (គីមឈាង) 096 505 6666 ។ 017 725 168 ចិន្តា។ 077 725 168 ម៉ារីណែត ៕

-Video Advertisement –

គេហទំព័រ Propertyarea.asia ចាប់ដៃគ្នាជាមួយ Realestate.com.kh លក់អចលនទ្រព្យតាមអនឡាញ

ដោយ៖ ប៊ី

ភ្នំពេញៈ ដើម្បីសម្រួលដល់ការទិញលក់អចលនទ្រព្យនៅកម្ពុជា គេហទំព័រ Propertyarea.asia បានសហការជាមួយគេហទំព័រ realestate.com.kh ក្នុងការដាក់លក់អចលនទ្រព្យតាមប្រព័ន្ឋអនឡាញ (Property Listing) ដែលវាជាផ្នែកដ៏សំខាន់នៃការពង្រីកការធ្វើអាជីវកម្មតាមប្រព័ន្ឋឌីជីថល។

ស្របពេលការវិស័យអចលនទ្រព្យការធ្វើអាជីវកម្មតាមប្រព័ន្ឋឌីជីថលបាននិងកំពុងចូលចំណែកយ៉ាងសំខាន់ដល់វិស័យអចលនទ្រ្យ ខណៈប្រព័ន្ឋឌីជីថល ការធ្វើពាណិជ្ជកម្មតាមប្រព័ន្ឋបច្ចេកវិទ្យា បានក្លាយជាម៉ូដែលថ្មីមួយនៃបដិវត្តន៍ឧស្សាហកម្មទី៤.០ ដែលកំពុងពង្រីកការគ្របដណ្តប់ទូទាំងសាកលលោក។

អតិថិជនចាប់អារម្មណ៍ទិញ ជួល លក់អចលនទ្រព្យអាចចូលមើល តាមរយៈវេបសាយ Propertyarea.asia បានជារៀងរាល់ថ្ងៃ។

លោក យិន លាងគង់ ស្ថាបនិកនិងជាអគ្គនាយកគេហទំព័រ Propertyarea.asia និងលោក Tom Osullivanអគ្គនាយកនៃគេហទំព័រ Realestate.com.kh បានសម្តែងនូវក្តីសាទរចំពោះកិច្ចសហការនេះ ដែលធ្វើឡើងក្នុងរូបភាពឈ្នះ ឈ្នះទាំងអស់គ្នា។

លោក យិន លាងគង់ បានបន្តថា “បច្ចេកវិទ្យាជាផ្នែកមួយយ៉ាងសំខាន់នៅតាមបណ្តាប្រទេសរីកចម្រើននានា ក្នុងការផ្តល់សេវាកម្មទិញលក់ ជួលអចលនទ្រព្យ ពិសេសការបង្ហាញពីគម្រោងនានា”។

លោកបន្តថា “ការទាន់សម័យកាលស៊ីវិល័យនៃប្រព័ន្ឋបច្ចេកវិទ្យា នឹងជួយឲ្យក្រុមហ៊ុនឬភ្នាក់ងារអចលនទ្រព្យនានា ទទួលបានជោគជ័យលើសេវាកម្មរបស់ខ្លួន”៕

កម្ពុជាស្នើឱ្យក្រុមហ៊ុនអាមេរិកមកសាងសង់ហេដ្ឋារចនាសម្ព័ន្ធនានានៅកម្ពុជា

ដោយវុត្ថា

ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន បានបានស្នើ និងលើកទឹកចិត្តឱ្យមានការចូលរួមវិនិយោគពីក្រុមហ៊ុនសាងសង់របស់អាមេរិក ក្នុងគម្រោងសាងសង់ហេដ្ឋារចនា សម្ព័ន្ធនានានៅកម្ពុជា ខណៈកម្ពុជាកំពុងមានតម្រូវការសាងសង់ហេដ្ឋារសម្ព័ន្ធនៅទូទាំងប្រទេស។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងជំនួបពិភាក្សាការងារជាមួយលោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាកាលពីម្សិលមិញនេះក៏លើកឡើងអំពីកំណាត់ផ្លូវជាតិលេខ៤ ដែលបានសាង សង់ក្នុងអំឡុងទសវត្សរ៍ទី៦០ ដែលមានសភាពរឹងមាំជាប់បានល្អដល់សព្វថ្ងៃ និងបានស្នើសុំឱ្យបញ្ជូនជំនាញការមកជួយបណ្តុះបណ្តាលផ្នែកវិស្វកម្មសំណង់ស៊ីវិលនៅកម្ពុជា។

លោកទេសរដ្ឋមន្ត្រីក៏បានអំពីសកម្មភាពការងារថ្មីៗរបស់ក្រសួងដែលបានអនុវត្តកន្លងមក រួមមានការចុះពិនិត្យ និងពិភាក្សាអំពីបញ្ហាប្រឈម និងដំណោះស្រាយជាមួយក្រសួងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិនៅច្រកទ្វារព្រំដែន “ព្រៃវល្លិ៍” និងការបើកការចរចាជាមួយសឹង្ហបុរី ដែលមានក្រុមហ៊ុនពីរបានចូលរួម គឺ YCH និង Infrastructure Asia (IA) ដើម្បីសិក្សា និងអភិវឌ្ឍន៍គម្រោងមជ្ឈមណ្ឌលភស្តុភារកម្មភ្នំពេញ។

លោកទេសរដ្ឋមន្ត្រីថ្លែងថា ទោះបីក្នុងស្ថានភាពដែលពិភពលោកកំពុងរាតត្បាតដោយ Covid-19 ក៏ក្រសួងនៅតែបន្តអនុវត្តនូវការងាររបស់ខ្លួនយ៉ាងសស្រាក់សស្រាំគ្មានបង្អង់ដៃ ជាក់ស្តែងសកម្មភាពនៃការសាងសង់ផ្លូវ ស្ពាន និងប្រព័ន្ធចម្រោះទឹកកខ្វក់ ជាដើម នៅទូទាំងប្រទេស។

លោកPatrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានធ្វើការកត់សម្គាល់ និងស្ងើចសរសើរចំពោះសមិទ្ធិផលនានារបស់ក្រសួង និងទទួលយកទៅពិចារណាសំណើដែលបានលើកឡើង ដើម្បីឈានទៅដល់ការពង្រីកបន្ថែមទៀតនូវកិច្ចសហប្រតិបត្តិការរវាងប្រទេសទាំងពីរលើវិស័យទាំងនេះ។

លោកបន្តថា ខែកញ្ញានេះ ត្រូវនឹងប្រធានបទពាណិជ្ជកម្មនិងវិនិយោគ ដែលនឹងមានការធ្វើទស្សនកិច្ចការងារនៅកម្ពុជាពីក្រុមប្រឹក្សាធុរកិច្ចអាស៊ាន-អាមេរិកនៅថ្ងៃទី២១ ខែកញ្ញានេះ។

លោកទេសរដ្ឋមន្ត្រី ស៊ុន ចាន់ថុល បានសម្តែងនូវការស្វាគមន៍ចំពោះក្រុមប្រឹក្សាធុរកិច្ច និងត្រៀមផ្តល់ នូវកិច្ចសហការដើម្បីឱ្យទស្សនកិច្ចការងារនេះប្រព្រឹត្តទៅដោយរលូន និងប្រកបដោយផ្លែផ្កា៕

ក្រុមហ៊ុនតម្លើងរថយន្តដ៏ធំមួយនឹងបង្ហាញវត្តមាននៅលើកំណាត់ផ្លូវជាតិលេខ៤៤ក្នុងពេលឆាប់ៗនេះ

ដោយ ៖ រ៉ាណេត

កំពង់ស្ពឺ ៖ ក្រុមហ៊ុនឯកទេស និងជំនាញក្នុងការផលិតគ្រឿងបង្គុំ និងតម្លើងរថយន្តធុនធំថ្មីមួយទៀត នឹងបង្ហាញវត្តមានរបស់ខ្លួនជាមួយនឹងការបង្កើតរោងចក្រផ្ទាល់ខ្លួនចំនួន២សម្រាប់បម្រើដល់ដំណើរការនៃសង្វាក់ផលិតកម្មស្ថិតនៅលើកំណាត់ផ្លូវជាតិលេខ៤៤ នៃទឹកដីស្រុកសំរោងទង ខេត្តកំពង់ស្ពឺ។

គិតមកដល់ត្រឹមថ្ងៃសៅរ៍ ទី១២ ខែកញ្ញា ឆ្នាំ២០២០ ចុងសប្ដាហ៍នេះ តំណាងក្រុមហ៊ុន និងមន្ត្រីជំនាញរបស់រដ្ឋបាលខេត្តបានចុះធ្វើការសិក្សារួចរាល់ និងឈានទៅរៀបចំរបាយការណ៍វាយតម្លៃទៅលើផលប៉ះពាល់នានាដែលអាចកើតមានដោយសារគម្រោងវិនិយោគ និងអភិវឌ្ឍន៍បង្កើតរោងចក្រផលិតគ្រឿងបង្គុំ និងតម្លើងរថយន្តធុនធំមួយនេះ។

ក្រុមហ៊ុនដែលកំពុងត្រៀមខ្លួនបង្ហាញវត្តជាលើកដំបូងនៅកម្ពុជាមួយនេះមានឈ្មោះថា ហ្សុង ណាន បូ យូ (ខេមបូឌា) អូតូម៉ូបាល មេនូហ្វេកឆឺរីង ឯ.ក បានបណ្តាក់ទុនវិនិយោគសរុបប្រមាណជាង ៣១លានដុល្លារសហរដ្ឋអាមេរិក ហើយបង្កើតឱកាសការងារសរុបជាង៧០០កន្លែង។ វត្តមាននៃគម្រោងទាំង២នេះ បានសរបញ្ជាក់ឱ្យឃើញថា ខេត្តកំពង់ស្ពឺនៅតែទីកន្លែងដ៏ទាក់ទាញមួយរបស់កម្ពុជា នៃការវិនយោគមកពីក្រៅប្រទេស។

អភិបាលខេត្តកំពង់ស្ពឺ លោក វ៉ី សំណាង បានបង្ហាញពីក្ដីសាទរចំពោះការសម្រេចចិត្តដ៏ត្រឹមត្រូវរបស់ក្រុមហ៊ុនវិនិយោគ ដែលជ្រើសរើសយកប្រទេសកម្ពុជាធ្វើជាទីតាំងអភិវឌ្ឍន៍របស់ខ្លួន។

លោកអភិបាលខេត្តបានមានប្រសាសន៍ថា “ស្ទើរតែគ្រប់សប្ដាហ៍ គឺតែងមានការទទួលជួបតំណាងធុរៈកិច្ចជន ជាពិសេសជនជាតិចិន។ ជាក់ស្ដែងនៅថ្ងៃចុងសប្ដាហ៍នេះ ក្រៅពីមានក្រុមហ៊ុនវិនិយោគលើការបង្កើតរោងចក្រផលិតគ្រឿងបង្គុំ និងតម្លើងរថយន្តធុនធំខាងលើនេះ ក៏មានតំណាងក្រុមហ៊ុនចិនដែលវិនិយោគ ក្នុងវិស័យឧស្សាហកម្មផងដែរ”។

លោកបានបញ្ជាក់ថា អ្នកតំណាងក្រុមហ៊ុនជំនាញផ្នែកសាងសង់នៅក្នុងប្រទេសចិនមួយចំនួនក៏បានមកជួបពិភាក្សា និងបង្ហាញពីគម្រោងអភិវឌ្ឍន៍ក្នុងវិស័យសំណង់ និងអចលនទ្រព្យរបស់ខ្លួនចូលមកវិនិយោគនៅក្នុងខេត្តកំពង់ស្ពឺ ដោយសារតែពួគគេបានឃើញពីសន្ទុះនៃភាពរីកចម្រើន ជាពិសេសជាតំបន់ដែលប្រមូលផ្តុំទៅដោយរោងចក្រ សហគ្រាសធំៗ ហើយពួកគេជឿជាក់ថា នៅថ្ងៃអនាគតកំពង់ស្ពឺនឹងក្លាយទៅជាខេត្តពាណិជ្ជកម្មដ៏ធំនៅកម្ពុជាបន្ទាប់ពីរាជធានីភ្នំពេញ និងក្រុងព្រះសីហនុ៕

រដ្ឋបាលខេត្តកំពតសម្រេចបង្កើតក្រុមការងារចម្រុះសិក្សាផលប៉ះពាល់លើគម្រោង មជ្ឈមណ្ឌលពាណិជ្ជកម្មតម្លៃជាង២៤លានដុល្លារ

ដោយវុត្ថា

កំពតៈ រដ្ឋបាលខេត្តកំពត បានសម្រេចបង្កើតក្រុមការងារចម្រុះ ដែលមានមន្ទីរជំនាញពាក់ព័ន្ធ និងអាជ្ញាធរមូលដ្ឋានចុះសិក្សា ទីតាំងជាក់ស្តែងសិក្សាផលប៉ះពាល់ វាយតម្លៃលក្ខណៈភូមិសាស្ត្រ លើគម្រោងសាងសង់មជ្ឈមណ្ឌលពាណិជ្ជកម្ម សណ្ឋាគារកម្រិតផ្កាយ៤ អាគារផ្សារទំនើប មណ្ឌលកំសាន្ត ខុនដូរ និងសេវាទេសចរណ៍តម្លៃ២៤,៨លានដុល្លារអាមេរិក។

លោកជាវ តាយ អភិបាលខេត្តកំពត កិច្ចប្រជុំអនុគណៈកម្មាធិការវិនិយោគខេត្តលើកទី២ ពិនិត្យលើគម្រោងស្នើសុំវិនិយោគរបស់ក្រុមហ៊ុន Gold Coast International Development Co.,LTD កាលពីថ្ងៃទី ១១ ខែកញ្ញា ឆ្នាំ ២០២០ម្សិលមិញនេះ បានស្នើឲ្យក្រុមហ៊ុនសហការ ជាមួយអង្គភាពជំនាញ ធ្វើការលើការងារបច្ចេកទេស ផ្លូវច្បាប់ និងឯកសារពាក់ព័ន្ធ ដើម្បីស្នើសុំទៅក្រុមប្រឹក្សាអភិវឌ្ឍន៍កម្ពុជា និងរាជរដ្ឋាភិបាល ដើម្បីពិនិត្យ និងសម្រេចលើគម្រោងវិនិយោគនេះ។

គម្រោងស្នើសុំវិនិយោគសាងសង់មជ្ឈមណ្ឌលពាណិជ្ជកម្ម សណ្ឋាគារកម្រិតផ្កាយ៤ អាគារផ្សារទំនើប មណ្ឌលកំសាន្ត ខុនដូរ និងសេវាទេសចរណ៍ ដោយគ្រោងបោះទុនវិនិយោគប្រហែល២៤,៨ លានដុល្លាអាមេរិករបស់ក្រុមហ៊ុន Gold Coast International Development Co.,LTD បានដាក់សំណើសុំវិនិយោគលើផ្ទៃដីទំហំ៤២ហិកតា ជាតំបន់ជាប់មាត់សមុទ្រ មានទីតាំងស្ថិតនៅភូមិថ្កូវ ឃុំឬស្សីស្រុកខាងលិច ស្រុកកំពង់ត្រាច ខេត្តកំពត ។

ខេត្តកំពតជាខេត្តមួយ ដែលមានកំពុងមានសក្តានុពលខ្ពស់ លើការវិនិយោគ និងទាក់ទាញភ្ញៀវទេសចរ មកពីគ្រប់ទិសទីទាំងជាតិ និងអន្តរជាតិឱ្យមកលេងកម្សាន្តនៅក្នុងខេត្តមួយនេះ ដោយសារតែខេត្តមួយនេះ មានអំណោយផលផ្នែកធម្មជាតិ សមុទ្រ ព្រែក ភ្នំ និងសក្តានុពលផ្សេងទៀត ហើយនៅមិនឆ្ងាយពីរាជធានីភ្នំពេញ ដោយចំណាយពេលធ្វើដំណើរប្រមាណតែ២ ទៅ៣ម៉ោងពីភ្នំពេញ។

ខេត្តកំពត បើទោះបីកម្ពុជាជួបវិបត្តិសេដ្ឋកិច្ចសកល ដោយសារការរាតត្បាតជំងឺកូវីដ ១៩យ៉ាងណាក្តី កន្លងមកនេះ បានទតទទួលនៅគម្រោងវិនិយោគជាច្រើន តាមរយៈការបោះទុនពីអ្នកវិនិយោគក្នុងស្រុក លើរមណីយដ្ឋាន តំបន់ទេសចរណ៍ វិស័យបដិសណ្ឋារកិច្ច និង អគារពាណិជ្ជកម្មជាច្រើនផ្សេងទៀត៕

ក្រុមហ៊ុនចិនធំមួយកំពុងកែសម្រួលផែនកាមេអភិវឌ្ឍន៍តំបន់ឆ្នេរមាស ឆ្នេរប្រាក់នៅក្រុងព្រះសីហនុ

ដោយវឌ្ឈៈ

ព្រះសីហនុៈ ក្រុមហ៊ុនចិនដ៏ធំមួយបាន និងកំពុងធ្វើការកែសម្រួលប្លង់មេសម្រាប់ផែនកាមេនៃតំបន់ឆ្នេរមាស ឆ្នេរប្រាក់ មកជាទម្រង់អភិវឌ្ឍន៍រចនាសម្ព័ន្ធ”ទីក្រុងជាយ” នៃផែនការដើមតំបន់ឆ្នេរប្រាក់ បានកែសម្រួលមកជាទម្រង់អភិវឌ្ឍន៍គ្រប់ជ្រុងជ្រោយ “អ័ក្ស១ ខ្សែតំបន់២ អនុតំបន់៤” ។

លោក Fu Xian Ting អគ្គនាយកក្រុមហ៊ុន យិះចៀ ធូរីហ្សីម ឌីរេឡុបមេន ខមភេនី បានមានប្រសាសន៍ឲ្យដឹង នៅក្នុងពិធីបង្ហាញរបាយការណ៍របស់ក្រុមហ៊ុន ជូនលោក គួច ចំរើន អភិបាលខេត្តព្រះសីហនុ នៅថ្ងៃទី១១ ខែកញ្ញា ឆ្នាំ ២០២០កន្លងមកបានបញ្ជាក់ថា ដីប្រើប្រាស់សម្រាប់ការអភិវឌ្ឍ បែងចែកជាប្រភេទផែនការ នៃប្រទេសជឿនលឿនដោយបែងចែកជា៨ប្រភេទធំៗ និង២៦ប្រភេទបន្ទាប់បន្សំ ដើម្បីងាយស្រួលក្នុងការគ្រប់គ្រងការអភិវឌ្ឍ។

លោកបន្ថែមថា “ការរៀបចំបណ្តាញផ្លូវត្រូវបានធ្វើឡើង ដោយផ្អែកលើការវិភាគភូមិសាស្ត្រយ៉ាងត្រឹមត្រូវ ក្រុមហ៊ុនបានប្តូរបណ្ដាញផ្លូវដែល” ចេញពីចំណុចកណ្ដាល”មកជា” បណ្តាញផ្លូវហ៊ុមព័ទ្ធតំបន់ភ្នំធម្មជាតិ” មានប្រវែងសរុបកើនឡើង៤០ភាគរយ បើធៀបនឹងផែនការដើម” ។

លោកគួច ចំរើន អភិបាលខេត្តព្រះសីហនុបានឱ្យដឹងថា រដ្ឋបាលខេត្តចង់ឃើញគម្រោងអភិវឌ្ឍន៍របស់ក្រុមហ៊ុន។ ក្រុមហ៊ុនត្រូវរៀបចំប្លង់គោល នូវហេដ្ឋារចនាសម្ព័ន្ធតភ្ជាប់គ្នា ពីក្រុមហ៊ុនមួយទៅក្រុមហ៊ុនមួយ ផ្តល់សក្តានុពលដល់ការអភិវឌ្ឍ ដើម្បីប្រើប្រាស់ប្រយោជន៍រួម ទន្ទឹមនោះត្រូវពិនិត្យសាវតារអ្នកកាន់កាប់ដីឱ្យបានត្រឹមត្រូវ។

លោកអភិបាលខេត្តស្នើថា ក្រុមហ៊ុនត្រូវគោរពតាមប្លង់មេ របស់ខេត្តព្រះសីហនុ ព្រោះការអភិវឌ្ឍត្រូវពិនិត្យមើលប្រភពទឹក ភ្លើង ផ្លូវ និងអាងប្រព្រឹត្តកម្ម ដើម្បីបំរើឱ្យការងារអភិវឌ្ឍន៍ប្រកបដោយតម្លាភាព រក្សាធនធានធម្មជាតិ និងបរិស្ថានល្អក្នុងតំបន់៕

ស្ថេរភាពអចលនទ្រព្យជាកត្តាជម្រុញកំណើនសេដ្ឋកិច្ចរបស់ប្រទេសចិន

ដោយ ហ្សូលី

ប៉េកាំងៈ ក្រុមអ្នកវិភាគបាននិយាយថា បន្ទាប់ពីមានការលូតលាស់យ៉ាងលឿនអស់រយៈពេលជាច្រើនឆ្នាំ ទីផ្សារអចលនទ្រព្យរបស់ប្រទេសចិន កំពុងឈានចូលដល់ដំណាក់កាល នៃការអភិវឌ្ឍប្រកបដោយស្ថេរភាព និងចីរភាព ហើយនឹងបន្តជំរុញសេដ្ឋកិច្ច។

ទិន្នន័យចុងក្រោយពីការិយាល័យស្ថិតិជាតិបានបង្ហាញថា ទីផ្សារលំនៅដ្ឋាននៅប្រទេសចិនបន្តមានស្ថេរភាព។ ជាទូទៅតម្លៃផ្ទះនៅក្នុងទីក្រុងធំៗ ចំនួន៧០បានចុះបញ្ជីកំណើនពីមួយខែទៅមួយខែ។

ទិន្នន័យបានបង្ហាញថាតម្លៃផ្ទះថ្មី នៅក្នុងទីក្រុងលំដាប់ចំនួនបួន គឺទីក្រុងប៉េកាំង សៀងហៃ ក្វាងចូវ និងស៊ិនជិន បានកើនឡើង០,៥ភាគរយ ពោលគឺទាបជាងខែមុន០,១ ភាគរយ។

លោក Guo Shuqing ប្រធានគណៈកម្មាធិការធានារ៉ាប់រងចិន បាននិយាយនៅក្នុងបទសម្ភាសន៍នាពេលថ្មីៗនេះថា ប្រទេសចិនបានស្តារឡើងវិញ ដោយជោគជ័យនូវសក្តានុពលនៃទីផ្សារអចលនទ្រព្យ។

វិស័យអចលនទ្រព្យនៅតែបន្តដើរតួនាទីយ៉ាងសំខាន់ ក្នុងការគាំទ្រសេដ្ឋកិច្ចរបស់ប្រទេសចិន ដែលការវិនិយោគអចលនទ្រព្យកើនឡើង៣,៤ភាគរយ ពីមួយឆ្នាំទៅមួយឆ្នាំ។

របាយការណ៍ស្រាវជ្រាវមួយផ្សេងទៀតបាននិយាយថា វិស័យអចលនទ្រព្យនៅតែមានចន្លោះ គ្រប់គ្រាន់សម្រាប់ការអភិវឌ្ឍន៍ ខណៈដែលរដ្ឋាភិបាល កំពុងជំរុញនូវនគរូបនីយកម្មប្រភេទថ្មី។

តាមការប៉ាន់ស្មានរបស់អ្នកជំនាញបានឲ្យដឹងថា ប្រជាជនចិនត្រូវការផ្ទះចំនួន១,១៧ពាន់លានម៉ែត្រក្រឡា សម្រាប់ការរស់នៅជារៀងរាល់ឆ្នាំចាប់ពីឆ្នាំ ២០១៩ ដល់ឆ្នាំ ២០៣០ ៕

កម្ពុជាទទួលបានភ្ញៀវទេសចរអន្តរជាតិចំនួន ១,២លាននាក់ក្នុងរយៈពេល ៧ខែដំបូងឆ្នាំនេះ

ដោយៈប៊ី

ភ្នំពេញៈ កម្ពុជាទទួលបានភ្ញៀវទេសចរអន្តរជាតិ១,២លាននាក់ ក្នុងរយៈពេល៧ ខែដំបូងនៃឆ្នាំ២០២០ ធ្លាក់ចុះ ៦៨,៧ភាគរយបើធៀបរយៈពេលដូចគ្នានឹងឆ្នាំមុន។នេះបើយោងតាមរបាយការណ៍ចុងក្រោយ ចេញផ្សាយដោយក្រសួងទេសចរណ៍កាលពីថ្ងៃទី១១ ខែកញ្ញា ឆ្នាំ២០២០កន្លងមកនេះ។

របាយការណ៍បាននិយាយថា ប្រទេសចិន វៀតណាម និងថៃ គឺជាប្រភពធំបំផុតនៃអ្នកទេសចរណ៍ដែលមកកាន់កម្ពុជា ក្នុងអំឡុងពេលពីខែមករា ដល់ខែកក្កដា ឆ្នាំនេះ។

របាយការណ៍បានឱ្យដឹងថា ភ្ញៀវទេសចរណ៍ជនជាតិចិនចំនួន២៨៣.០៦៣បានមកធ្វើទស្សនាកម្ពុជា ក្នុងរយៈពេល៧ខែដំបូងនៃឆ្នាំនេះ ធ្លាក់ចុះ៨១ភាគរយ វៀតណាមមានចំនួន១៧៩.៧៨៤នាក់ ធ្លាក់ចុះ៦២ភាគរយ និងថៃចំនួន១៧១.៦៧៧ ធ្លាក់ចុះ១៤ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

នៅក្នុងខែកក្កដា កម្ពុជាបានទទួលភ្ញៀវទេសចរបរទេស២០.៦៨៩នាក់ប៉ុណ្ណោះ ដែលជាការធ្លាក់ចុះ៩៦ភាគរយ ពី៥០២.៤២១ នាក់ក្នុងរយៈពេលដូចគ្នាកាលពីឆ្នាំមុន។

ការធ្លាក់ចុះដ៏ធំនៃចំនួនភ្ញៀវអន្តរជាតិមកទស្សនាកម្ពុជា ដោយសារតែជំងឺរាតត្បាត COVID-19 ដែលបានធ្វើឱ្យប្រទេសកម្ពុជា ដាក់កម្រិតលើការធ្វើដំណើរអ្នកដំណើរបរទេសទាំងអស់ចាប់តាំងពីខែមីនា។

លោកថោង ខុន រដ្ឋមន្ត្រីក្រសួងទេសចរណ៍បានព្យាករណ៍ថា កម្ពុជាអាចខាតបង់ចំណូលពីវិស័យទេសចរណ៍ ប្រមាណ៣ពាន់លានដុល្លារអាមេរិកនៅឆ្នាំនេះ ដោយសារការធ្លាក់ចុះនៃចំនួនភ្ញៀវអន្តរជាតិ។

លោកបានមានប្រសាសន៍ថា“សម្រាប់ឆ្នាំ២០២០ដោយសារវិបត្ដិ COVID-19 ចំនួនភ្ញៀវទេសចរបរទេសមកកម្ពុជា អាចនឹងធ្លាក់ចុះ៧០ភាគរយ”៕ Xinhua៕