ដោយ ៖ ប៊ី

ភ្នំពេញ ៖ ក្រុមហ៊ុន KrisEnergy បានប្រកាសថា ការសាងសង់ផ្លាតហ្វម ក្បាលអណ្ដូង ផលិតកម្ម (Mini-Platform) សម្រាប់ការអភិវឌ្ឍអណ្តូងប្រេងកាតអប្សរាក្នុងប្លុក A ស្ថិតនៅដែនសមុទ្រកម្ពុជា ត្រូវបានបានបញ្ចប់ហើយ ខណៈនេះជាការជោគជ័យដ៏សំខាន់មួយរបស់ក្រុមហ៊ុន ដើម្បីឈានទៅដល់ការទាញយកប្រេងនាពេលខាងមុខ។ 

បើយោងតាមសេចក្ដីប្រកាសព័ត៌មានរបស់ក្រុមហ៊ុនចេញផ្សាយនៅក្នុងសប្តាស៍នេះបានបញ្ជាក់ថា ផ្នែកខាងលើ និងជើងទម្រផ្លាតហ្វម ខ្នាតតូចនេះ កំពុងត្រូវបានដឹកជញ្ជូនទៅកាន់ដែនទឹកនៃប្រទេសកម្ពុជា ដែលស្ថិតក្នុងឈូងសមុទ្រថៃ ដើម្បីធ្វើការតម្លើង។ ការលើកដាក់ និងការដឹកចេញផ្លាតហ្វម ខ្នាតតូចនេះ បានបញ្ចាប់ នៅថ្ងៃទី២៥ ខែសីហា ឆ្នាំ២០២០ ។

ការកសាងផ្លាតហ្វមខ្នាតតូចសម្រាប់ការអភិវឌ្ឍអណ្ដូងប្រេងកាតដំបូងគេបង្អស់របស់ប្រទេសកម្ពុជា បានចាប់ផ្ដើមកាលពីដើមខែធ្នូ ឆ្នាំ២០១៩ នៅឯរោងចក្រមួយនៅកោះបាតាម (Batam Island) ប្រទេសឥណ្ឌូនេស៊ី ។

នាយកប្រតិបត្តិ និងជាប្រធានក្រុមហ៊ុន KrisEnergy ប្រចាំកម្ពុជា លោក Kelvin Tang បានថ្លែងថា “គិតចាប់ពីការរៀបចំកាត់ដែកដំបូងរហូតដល់ការដឹកចេញ ផ្លាតហ្វមខ្នាតតូចនេះ គឺមានរយៈពេល ៩ខែ ហើយសមិទ្ធផលនេះ រឹតតែវិសេសវិសាលថែមទៀត បើទោះបីជាមានការលំបាក និងបំរាមនានា ដែលក្រុមការងាររបស់យើង និងសហការីនៅឯ NOV Profab បានប្រឈមមុខតាំងពីដើមឆ្នាំ២០២០ ដោយសារតែជំងឺCOVID-19”។

លោកបានថ្លែងអំណរគុណ ដល់កិច្ចខិតខំប្រឹងប្រែងដ៍ធំធេងពីគ្រប់ភាគីពាក់ព័ន្ធទាំងអស់ រួមទាំងអ្នកផ្គត់ផ្គង់ និងអ្នកម៉ៅការ ដែលបានជំនះរាល់ឧបសគ្គ ផ្នែកភស្តុភារទាំងទ្បាយ ធ្វើយ៉ាងណាដើម្បីរក្សាការប្រគល់នូវឧបករណ៍ និងសម្ភារនានា ពីគ្រប់ទីកន្លែងលើសកលលោកមកឱ្យរោងចក្រនៅ Batam បានទាន់ពេលវេលា តាមកាលកំណត់ ដើម្បីឈានទៅរកគោលដៅនៃការផលិតប្រេងអប្សរាដំបូងឱ្យបានមុនដំណាច់ឆ្នាំនេះ”។

លោក Kim Lamb នាយកគ្រប់គ្រងក្រុមហ៊ុន NOV Profab បានថ្លែងថា “យើងខ្ញុំរីករាយក្នុងការរួមចំណែកដ៏សំខាន់នៅក្នុងគម្រោងដំបូងមួយនេះ សម្រាប់ប្រទេសកម្ពុជា។ ទាំងក្រុមការងាររបស់ក្រុមហ៊ុន NOV និងក្រុមហ៊ុន KrisEnergy សុទ្ធតែបានធ្វើការជាមួយគ្នាយ៉ាងជិតស្និទ្ធ ដោយប្រើប្រាស់វិធីសាស្ត្រធ្វើការរួមគ្នា ជាក្រុមដ៏ពេញលេញ ដើម្បីផលិតផ្លាតហ្វម ដែលមានគុណភាពមួយ ហើយនេះជាសក្ខីភាពពិតនៃការប្តេជ្ញាចិត្តរបស់អ្នកពាក់ព័ន្ធទាំងអស់”។ 

លោកបានបន្តថា “យើងទន្ទឹងរង់ចាំធ្វើការជាមួយក្រុមហ៊ុន KrisEnergy សាជាថ្មីម្តងទៀតនៅថ្ងៃខាងមុខនេះ”។

ដំណាក់កាលអភិវឌ្ឍន៍ Mini Phase 1A នេះ រួមមាន ផ្លាតហ្វមខ្នាតតូច និងអណ្តូងប្រេងអភិវឌ្ឍដំបូងចំនួន៥ ដែលនឹងត្រូវបានភ្ជាប់ទៅកាន់នាវាផលិតកម្ម Ingenium II សម្រាប់ដំណើរការប្រព្រឹត្តិកម្មប្រេង ឧស្ម័ន និងទឹក។ ដំណាក់កាលអភិវឌ្ឍន៍ Mini Phase 1A ត្រូវបានរំពឹងទុកថា នឹងឈានដល់អត្រា ផលិតកម្មខ្ពស់បំផុត ៧.៥០០ បារ៉ែលក្នុង១ថ្ងៃ៕

ដោយ ៖ វុត្ថា

ភ្នំពេញ ៖ ឯកអគ្គរដ្ឋទូត នៃសាធារណរដ្ឋប្រជាធិបតេយ្យទីម័រខាងកើត បានបង្ហាញពីក្ដីសាទរនៃភាពរីកចម្រើនរបស់ខេត្តព្រះសីហនុ ហើយជឿជាក់ថាថា ខេត្តព្រះសីហនុនឹងបន្តមានការអភិវឌ្ឍន៍យ៉ាងឆាប់រហ័ស ដែលទៅថ្ងៃអនាគតនឹងក្លាយទៅជាទីក្រុងហុងកុងថ្មី របស់ប្រទេសកម្ពុជា។

ឯកអគ្គរដ្ឋទូត នៃសាធារណរដ្ឋប្រជាធិបតេយ្យទីម័រខាងកើត លោក Ermenegildo Kupa Lopes នៅក្នុងជំនួបពិភាក្សាការងារជាមួយលោក គួច ចំរើន អភិបាលខេត្តព្រះសីហនុ នៅថ្ងៃទី ២៦ ខែសីហាឆ្នាំ ២០២០នេះ ឱ្យដឹងថា ទន្ទឹមនឹងការរីកចំរើនរបស់ខេត្តព្រះសីហនុ ក៏មានបរទេសមួយចំនួនមិនសប្បាយចិត្ត និងបានធ្វើការចោទប្រកាន់ថា រដ្ឋាភិបាលចិនបានយកខេត្តព្រះសីហនុធ្វើជាមូលដ្ឋានយោធារបស់ខ្លួន ដែលការលើកឡើងទាំងនេះមិនមែនជាការពិតនោះឡើយ។ លោកបន្តថាទំនាក់ទំនងរវាងប្រទេសទាំងពីរ កម្ពុជា និងទីម័រខាងកើត គឺមានជាយូរមកហើយ ព្រោះប្រទេសទាំងពីរគឺមានសាវតាស្រដៀងគ្នា។

លោក គួច ចំរើន អភិបាលខេត្តព្រះសីហនុ បានឱ្យដឹងដែរថា ប្រទេសកម្ពុជាមានការអភិវឌ្ឍន៍រីកចំរើននាពេលបច្ចុប្បន្ននេះគឺក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាល នៃព្រះរាជាណាចក្រ កម្ពុជា។

លោកបន្តថា ក្នុងនោះសម្រាប់ខេត្តព្រះសីហនុ គឺជាខេត្តប៉ូលសេដ្ឋកិច្ចពហុបំណង ដ៏សំខាន់របស់ប្រទេសកម្ពុជា ព្រោះខេត្តមានសក្តានុពលជាច្រើន រួមមានវិស័យឧស្សាហកម្មពាណិជ្ជកម្ម និងទេសចរណ៍។ល។ ខេត្តមានផ្លូវគោក ផ្លូវទឹក ផ្លូវអាកាស ផ្លូវដែក និងមានកំពង់ផែអន្តរជាតិទឹកជ្រៅតែមួយគត់របស់ព្រះរាជាណាចក្រកម្ពុជា ក្នុងការផ្លាស់ប្ដូរទំនិញឆ្លងកាត់ទៅកាន់បណ្ដាប្រទេសនៅទូទាំងពិភពលោក។

លោកអភិបាលខេត្តរូបនេះបញ្ជាក់ថា ទាំងអស់នេះហើយដែលធ្វើឱ្យខេត្តព្រះសីហនុមានការអភិវឌ្ឍន៍រីកចំរើនយ៉ាងឆាប់រហ័សគួរឲ្យកត់សម្គាល់ និងបានផ្តល់លទ្ធភាពឱ្យអ្នកវិនិយោគជាតិ និងអន្តរជាតិ មានភាពងាយស្រួលក្នុងការមកបណ្ដាក់ទុនរកស៊ីនៅក្នុងខេត្តព្រះសីហនុ។ ក្រៅពីនោះខេត្តក៏មានឆ្នេរសាច់សល្អស្អាត និងវែងជាងគេ ទាំងដីគោក និងនៅតាមតំបន់ឆ្នេរកោះ ដែលអាចទាក់ទាញភ្ញៀវ ទេសចរណ៍ជាតិអន្តរជាតិ អ្នកវិនិយោគ មកបណ្ដាក់ទុន និងលំហែកំសាន្ត៕

ដោយ ៖ រ៉ាណេត

ភ្នំពេញ ៖ កម្ពុជាបានស្នើសុំឱ្យរដ្ឋាភិបាលកូរ៉េជួយបង្កើតទីផ្សារបោះដុំផលិតផលកសិផលនៅក្នុងរាជធានីភ្នំពេញ និងនៅតាមបណ្តាខេត្តដែលមានសក្ដានុពលមួយចំនួន ដើម្បីជួយជំរុញ និងលើកកម្ពស់នៃការធ្វើពិពិធកម្មវិស័យកសិកម្មនៅកម្ពុជា។

រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានមានប្រសាសន៍នៅថ្ងៃទី២៦ ខែសីហា ឆ្នាំ២០២០នេះ បានស្នើដល់លោក Park Heung-kyeong ឯកអគ្គរដ្ឋទូតនៃសាធារណរដ្ឋកូរ៉េ ជួយបង្កើតទីផ្សារបោះដុំកសិផលជាពិសេសបន្លែ នៅរាជធានីភ្នំពេញ និងតាមបណ្តាខេត្តដែលមានសក្តានុពល។

តាមរយៈលោកឯកអគ្គរដ្ឋទូតកូរ៉េប្រចាំនៅកម្ពុជា លោករដ្ឋមន្ត្រី វេង សាខុន បានថ្លែងអំណរគុណជូនចំពោះប្រជាជន និងរដ្ឋាភិបាលកូរ៉េ ដែលបានជួយឧបត្ថម្ភគាំទ្រ ដល់ការអភិវឌ្ឍវិស័យកសិកម្មកម្ពុជា ក្នុងរយៈពេលកន្លងមក។ ជំនួយដ៏មានតម្លៃនេះ ពិតជាបានចូលរួមចំណែកក្នុងការកសាង និងអភិវឌ្ឍប្រទេសកម្ពុជា ឲ្យមានការរីកចម្រើន ដែលបានស្តែងចេញ ជាលទ្ធផលយ៉ាងជាក់ច្បាស់ ដូចយើងបានឃើញនាពេលបច្ចុប្បន្ន។

ជាក់ស្តែងគម្រោងចំនួន៣៦ បាននិងកំពុងអនុវត្ត និងមួយចំនួនត្រូវបានបញ្ចប់ ការបណ្តុះបណ្តាលធនធានមនុស្ស គម្រោងជួយលើកកំពស់ផលិតភាពផលិតកម្ម និងពូជដំឡូងបារាំង នៅខេត្តមណ្ឌលគីរី ដែលសហការអនុវត្តដោយសាកលវិទ្យាល័យភូមិន្ទកសិកម្ម គម្រោងបង្កាត់ពូជពោត នៅស្ថានីយបន្ទាយដែក សហការអនុវត្ត ដោយអគ្គនាយកដ្ឋានកសិកម្ម គម្រោងជំរុញផលិតកម្មបន្លែនៅខេត្តមណ្ឌលគីរី អគារអន្តេវាសិកដ្ឋានថ្មីនៅមជ្ឈមណ្ឌលបណ្តុះបណ្តាល និងផ្សព្វផ្សាយកសិកម្មតាស្អាង ខេត្តស្វាយរៀង -ល-។

បច្ចុប្បន្ននេះ ផលិតផលកសិផលរបស់កម្ពុជា ដែលបាននាំចេញទៅកាន់ទីផ្សារកូរ៉េមានចំនួន ១៨ប្រភេទ ហើយនៅមាន២មុខទៀត ដែលអគ្គនាយកដ្ឋានកសិកម្មកំពុងដាក់ពាក្យស្នើសុំ។

លោក Park Heung-kyeong បានមានប្រសាសន៍ថា វិស័យកសិកម្មបានដើរតួនាទីយ៉ាងសំខាន់ ក្នុងការជួយទ្រទ្រង់កំណើនសេដ្ឋកិច្ច ដូច្នេះក្នុងអាណត្តិរបស់លោក នឹងបន្តសហការ និងគាំទ្រនូវរាល់សកម្ម ភាពគម្រោងនានា ដែលបាននិងកំពុងអនុវត្តឲ្យដំណើរការទៅដោយរលូន និងសម្រេចទទួលបានជោគជ័យ និងជាពិសេសពិនិត្យពិចារណា លើគម្រោងថ្មីៗ ដែលជួយដល់ការអភិវឌ្ឍវិស័យកសិកម្ម ។

លោកបានបញ្ជាក់ថា រដ្ឋាភិបាលកូរ៉េ និងធ្វើការពិនិត្យលម្អិត ដើម្បីផ្តល់ការគាំទ្រជាជំហានៗ តាមការចាំបាច់ ក្នុងបំណងចូលរួមអភិវឌ្ឍវិស័យនេះ ឱ្យមានការរីកចម្រើនសមស្រប តាមបរិបទនៃការប្រកួតប្រជែងទីផ្សារ កំណើនប្រជាជន និងកំណើនសេដ្ឋកិច្ច។
កសិផលកម្ពុជាទាំង១៨ប្រភេទ ដែលបាននាំចេញទៅកាន់ទីផ្សារកូរ៉េរួមមាន៖ គ្រាប់ស្វាយចន្ទី ស្ករត្នោត ដូងប្រេង កក់ក្រៀម ដំណាប់ស្វាយ ស្វាយស្រស់ ចំណិតផ្លែ ញក្រៀម ម្សៅញ ជ័រកៅស៊ូ ម្រេច ពោត ដំណាប់ផ្លែម្នាស់ ផ្សិតលីងជឺ សណ្តែកផ្កាយ ស្លឹកទៀបបារាំង ម្សៅម្រុំ និងស្លឹកគ្រៃ៕

ដោយវុត្ថា

ភ្នំពេញ ៖ នៅក្នុងចំណោមផ្នែកវិស័យអចលទ្រព្យទាំងអស់នៅក្នុងប្រទេសកម្ពុជា អ្នកជំនាញបានមើលឃើញ វិស័យអចលនទ្រព្យផ្នែកចំនួន ២ គឺ វិស័យដីធ្លី និងលំនៅឋាន នៅតែមានសក្តានុពលខ្ពស់ និងទទួលបានផលចំណេញ។

លោក គាម សៀកឡុង ក្រុមហ៊ុន Century 21 Dream Property បានពន្យល់ប្រាប់គេហទំព័រ propertyarea.asia ថា ការវិនិយោគលើវិស័យអចលនទ្រព្យគ្រប់ប្រភេទនៅកម្ពុជា អាស្រ័យទៅលើលំហូសាច់ប្រាក់របស់អ្នកវិនិយោគ អ្នកខ្លះវិនិយោគលើ ខុនដូ អាផាតមិន និងអគារការិយាល័យជាដើម តែក្នុងចំណោមនេះ ការវិនិយោគលើវិស័យដីធ្លី និងលំនៅឋាននាពេលបច្ចុប្បន្ននៅតែមានសក្តានុពល។

លោកបន្តថា “នាពេលបច្ចុប្បន្ននេះ ការវិនិយោគលើវិស័យលំនៅឋាន និងដីធ្លីនៅតែពេញនិយមខ្លាំងពីសំណាក់អ្នកវិនិយោគ តែសម្រាប់វិស័យខុនដូ គឺហាក់ដូចជានៅកម្រិតយឺតជាង ដែលទាមទារពេលវេលាយូរបន្ថែមទៀត”។

លោកបន្ថែមថា “សម្រាប់តម្រូវការដីលំនៅឋាន បាននឹងកំពុងងាកទៅកាន់ជាយក្រុងកាន់តែឆ្ងាយទៅៗ ដែលធ្វើឱ្យមានការលំបាកក្នុងការធ្វើដំណើរចួលមកកាន់ទីក្រុង ខណៈការរស់នៅខុនដូមានភាពងាយស្រួល និងមានភាពស៊ីវិល័យព្រោះមានទាំងអាងហែលទឹក ក្លឹបហាត់ប្រាណ ផ្សារទំនើប និងអគារការិយាល័យជាដើម”។

លោក ច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា បានឱ្យដឹងដែរថា សម្រាប់ទីផ្សារដីធ្លី និងលំនៅឋាននាពេលពេលបច្ចុប្បន្ននេះ ត្រូវបានទទួលស្គាល់ថា មានការធ្លាក់ចុះបន្តិច ប៉ុន្តែសកម្មភាពទិញលក់នៅក្នុងទីផ្សារនៅតែបន្តមាន។

លោកបន្តថា “ជាក់ស្តែងនៅក្នុងរយៈពេល ៣ ខែចុងក្រោយនេះ កំណើននៃការ ទិញលក់ បានងាកមករកស្ថានភាពល្អប្រសើរឡើងបន្តិចម្តងៗ ហើយខ្ញុំជឿថា យ៉ាងយូនៅចុងឆ្នាំ ២០២០ នេះ ឬ ដើមឆ្នាំ ២០២១ វិស័យអចលនទ្រព្យនៅកម្ពុជា នឹងមានភាពល្អប្រសើរឡើងវិញ ខណៈដែលការសិក្សាថ្មីៗនៃគម្រោងមួយចំនួនក៏បានង្ហាញពីតម្រុយចូលមកកាន់កម្ពុជាផងដែរ”៕

ដោយ ហ្សូលី

ភ្នំពេញ៖ ចលនាទេសចរណ៍ក្នុងស្រុកក្នុងកំឡុងពេលឈប់សម្រាក ៥ ថ្ងៃ នាឱកាសបុណ្យចូលឆ្នាំខ្មែរនាពេលថ្មីៗនេះបានចំនូលជាទឹកប្រាក់ប្រមាណ ១០០ លានដុល្លារអាមេរិកទៅក្នុងវិស័យទេសចរណ៍។

តួលេខនេះត្រូវបានចេញផ្សាយនៅក្នុងកិច្ចប្រជុំមួយ ដើម្បីពិនិត្យឡើងវិញនូវសកម្មភាពទេសចរណ៍ក្នុងស្រុកក្នុងកំឡុងពេលឈប់សម្រាករយៈពេល ៥ ថ្ងៃដែលបានប្រារព្ធធ្វើឡើងនៅថ្ងៃទី ២៦ ខែសីហា ឆ្នាំ ២០២០នេះ ក្រោមអធិបតីភាពរបស់ក្រុមហ៊ុន លោក ថោង ខុន រដ្ឋមន្ត្រីក្រសួងទេសចរណ៍។

នេះជាតួលេខប៉ាន់ស្មានដែលត្រូវបានបង្កើតឡើងបន្ទាប់ពីមានភ្ញៀវទេសចរក្នុងស្រុកចំនួន ១,៤៥ លាននាក់ ដែលបានមកទស្សនាកម្សាន្តក្នុងប្រទេសនេះ គិតចាប់ពីថ្ងៃទី ១៧ រហូតដល់ថ្ងៃទី ២១ ខែសីហា ឆ្នាំ២០២០។

ក្រសួងទេសចរណ៍ក៏បានកត់ត្រាផងដែរថា ក្នុងចំណោមភ្ញៀវទេសចរក្នុងស្រុកសរុប មានចំនួន ១៤.០០០ នាក់ជាជនបរទេស។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានឱ្យដឹងថា តំបន់ទេសចរណ៍សំខាន់ៗចំនួន ៣ របស់កម្ពុជា នឹងទាក់ទាញភ្ញៀវទេសចរទៅលេងកម្សាន្តច្រើន រួមមានតំបន់ឆ្នេរ (កែប កំពត និងព្រះសីហនុ) តំបន់ភូមិឦសាន្ត និងខេត្តសៀមរាប ខណៈពេលនេះ មានភ្ញៀវកក់ផ្ទះសំណាក់ សណ្ឋាគារ និង បឹងហ្គាឡូច្រើន។

បើតាមឱ្យដឹងកាលពីថ្មីៗនេះ តាមរយៈសារព័ត៌មានអន្តរជាតិបានចុះផ្សាយថា កម្ពុជាឈរនៅលើកំពូលតារាងក្នុងបញ្ជីទិសដៅទេសចរណ៍មានសុវត្ថិភាពបំផុតនៅលើពិភពលោក ដោយសារមានបទប្បញ្ញត្តិសុខភាពអន្តរជាតិខ្ពស់ ហើយករណីឆ្លងជំងឺ COVID-19មានកម្រិតទាប៕