ដោយ៖ ប៊ី
ភ្នំពេញ៖ អ្នកជំនាញ លើកឡើងថា ដើម្បីអាចដឹងពីតម្លៃអចលនទ្រព្យមួយបានគឺត្រូវឆ្លងកាត់ការរាយតម្លៃច្បាស់លាស់ពីអ្នកជំនាញ ខណៈវិធីសាស្ត្រវាតម្លៃចំនួន៤ត្រូវបានប្រើប្រាស់ភាគច្រើនក្នុងឥវិយាបទទីផ្សារអចលនទ្រព្យនៅកម្ពុជា។

លោក ប៉ូ អ៊ាវគង់ នាយកប្រតិបត្តិក្រុមហ៊ុន Advance Real Estate បានថ្លែងក្នុងកម្មវិធីស្តីពីការផ្តល់ប្រឹក្សាអាជីវកម្មចលនវត្ថុ នៅថ្ងៃទី២៧ ខែសីហា ឆ្នាំ២០២០ថា មូលដ្ឋានគោលនៃការវាយតម្លៃអចលនទ្រព្យ មានវិធីសាស្ត្រចំនួន៤ នៅក្នុងប្រើប្រាស់ដើម្បីវាយតម្លៃ។

លោក បានថ្លែងថា “ពេលខ្លះវាយតម្លៃអចលនទ្រព្យ យើងអាចប្រើប្រាស់មួយវិធីសាស្ត្របាន ប៉ុន្តែអចលនទ្រព្យមួយចំនួន ដោយសារឥរិយាបទទីផ្សារមានការប្រែប្រួល យើងត្រូវប្រើរូបមន្តនៃការវាយតម្លៃ ដែលវិធីសាស្ត្រនៃការវាយតម្លៃចំនួន២ ឬ៣ ដើម្បីឆ្លុះបញ្ចាំង ព្រោះវិធីសាស្ត្រទាំង៤ យើងប្រើទៅតាមកាលៈទេសៈ និងប្រភេទនៃទីតាំងអចលនទ្រព្យ”។

លោក បានបន្តថា “ក្នុងករណីខ្លះ ការប្រើប្រាសវិធីសាស្ត្រនេះអាចជំនួបគ្នា ក្នុងករណីប្រមូលព័ត៌មានក្នុងការប្រើប្រាស់ វាមានភាពចាំបាច់ហើយវាអាចគាំទ្រដល់វិសាស្ត្រមួយទៀត ធ្វើបង្កើតសមហេតុសមផងសម្រាប់ការវិភាគរបស់យើង”
វិធីសាស្ត្រទាំង៤ រួមមានទី១ Comparable Method (វិធីសាស្ត្រប្រៀបធៀប) គឺរូបមន្តគោលយើងប្រើប្រាស់ច្រើនជាងគេ ទី២ វិធីសាស្ត្រ Cost Method (វិធីសាស្ត្រថ្លៃដើម) ទី៣ វិនិសាស្ត្រផ្តោតលើ Investment ការវាយតម្លៃអចលនទ្រព្យដោយផ្អែកទៅលើចំណូលត្រឡប់មកវិញ ដែលពាក់តម្លៃនៃការជួល និងការវិនិយោគអីផ្សេងៗក្នុងការវិភាគផ្តល់តម្លៃឱ្យអចលនទ្រព្យនោះវិញ។

វិធីសាស្ត្រចុងក្រោយគឺវិធីសាស្ត្រសំណល់ ត្រូវបានប្រើប្រាស់ដើម្បីវិភាគរឹះរកតម្លៃដី ដែលគេទិញ ដើម្បីធ្វើគម្រោងវិនិយោគ ដោយសារស្រុកខ្មែយើងសព្វថ្ងៃ យើងមានគម្រោងវិនិយោគអគារខុនដូ អគារពាណិជ្ជកម្ម និងShopping Center ជាដើម វិធីសាស្ត្រសំណល់អាចប្រើប្រាស់ច្រើនដែរ នៅក្នុងពេលឥរិយាបទទីផ្សារយើងសព្វថ្ងៃ។

លោក បានថ្លែងថា ជារួម អ្នកវាយតម្លៃត្រូវដឹងពីនិយមន័យ និងវិធីសាស្ត្រនីមួយៗឱ្យបានច្បាស់លាស់ក្នុងការវាយតម្លៃ មុនពេលពួកគាតធ្វើរបាយការណ៍ និងចុះទៅវាយតម្លៃ។ គោលបំណង នៃការប្រើប្រាស់វិធីសាស្ត្រក្នុងការវាយតម្លៃអចលនទ្រព្យគឺភាគច្រើន ដើម្បីរាយតម្លៃអចលនទ្រព្យសម្រាប់ការទទួលបានឥណទានពីធនាគារ ព្រោះភាគច្រើនយើងជួបជាមួយអតិថិជនប្រភេទនេះ”៕

ដោយៈ រ៉ាណេត

ភ្នំពេញៈ ឯកអគ្គរដ្ឋទូតចិនប្រចាំនៅកម្ពុជាបានអះអាង និងបញ្ជាក់សាជាថ្មីថា រដ្ឋាភិបាលកម្ពុជានិងចិន បានបង្កើនចំណងមិត្តភាពយ៉ាងស្អិតល្មួត ព្រម​ទាំងបានបង្កើតកិច្ចស​ហប្រតិបត្តិការ យ៉ាងស៊ីជម្រៅរួមគ្នា រហូតបង្កើតបានជាគំរូសម្រា​ប់សហគមន៍អន្តរជាតិ។

លោក Wang Wentian ឯកអគ្គរដ្ឋទូតចិនប្រចាំនៅកម្ពុជាបានមានប្រសាសន៍នាថ្ងៃទី២៧ ខែសីហា ឆ្នាំ២០២០នេះថា ចាប់តាំងពីមានការផ្ទុះឡើងនូវជំងឺវីរុសCOVID-19នេះមក ប្រទេសទាំងពីរ (ចិន និងកម្ពុជា)បានជួយយកអាសារគ្នាទៅវិញទៅមក និងបានជម្នះរាល់ឧបសគ្គជាមួយគ្នា បង្កើតបានជាគំរូនៃកិច្ចសហប្រតិបត្តិការ ទប់ស្កាត់នឹងជំងឺវីរុស សម្រាប់សហគមន៍អន្តរជាតិ ហើយចំណងមិត្តភាពជាប្រពៃណី រវាងប្រទេសទាំងពីរនេះ ត្រូវបានលើកកម្ពស់ថែមមួយកម្រិតទៀតបន្ទាប់ពីឆ្លងកាត់ការលំបាកទាំងនេះ។

លោកបានបង្ហាញថា“ជំងឺវីរុសគ្មានព្រំដែន វាជាបញ្ហាប្រឈមជាទូទៅមួយសម្រាប់មនុស្សជាតិទាំងឡាយ។ នៅចំពោះមុខការផ្ទុះឡើងភ្លាមៗ របស់ជំងឺវីរុសមួយនេះ ការសិក្សាពីគ្នា និងជួយគ្នាទៅវិញទៅមក គឺជាអត្ថន័យដែលមាននៅក្នុងកិច្ចទប់ស្កាត់នឹងជំងឺវីរុសមួយនេះ សម្រាប់កិច្ចសហប្រតិបត្តិការសហគមន៍អន្តរជាតិ”។ លោកបន្តថា“ការសហការសាមគ្គីគ្នារវាងប្រទេសទាំងពីរ ក្នុងដំណើរកិច្ចទប់ស្កាត់នឹងជំងឺវីរុស គឺជាសក្ខីភាពដ៏ល្អប្រសើរបំផុត សម្រាប់សហគមន៍ជោគវាសនារួម និងការរួមសុខទុក្ខលើក្បូនតែមួយ របស់មនុស្សជាតិទាំងឡាយ”។

លោកបានសង្កត់ធ្ងន់ថា ឆ្នាំនេះគឺជាខួបអនុស្សាវរីយ៍លើកទី១ នៃការចុះហត្ថលេខាអនុវត្តផែនការសកម្មភាព កសាងសហគមន៍ជោគវាសនារួមរវាងចិន និងកម្ពុជា។ភាគីចិនរីករាយបន្តខិតខំប្រឹងប្រែងជាមួយភាគីកម្ពុជា ដើម្បីសម្របសម្រួលជំរុញកិច្ចការពារសម្រា​ប់ជំងឺវីរុសមួយនេះ និងដំណើរការសាជាថ្មីនៃសកម្មភាពផលិតកម្ម បន្តអនុវត្តផែនការសក​ម្មភាពកសាងសហគមន៍ជោគវាសនារួមរវាងចិន និងកម្ពុជា ជំរុញកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ នៃប្រទេសទាំងពីរ ដើម្បីទទួលបានការអភិវឌ្ឍន៍កាន់តែធំនិងកាន់តែឆាប់រហ័សក្នុងយុគសម័យថ្មីនេះ។

ថ្មីៗនេះកម្ពុជាទើបតែបញ្ចប់កិច្ចចរចា បង្កើតកិច្ចព្រមព្រៀងពាណិជ្ជកម្មសេរីកម្ពុជា-ចិន (FTA) និងរង់ចាំពេលវេលាចុះហត្ថលេខា នាពេលខាងមុខនេះ ខណៈដែលកិច្ចព្រមព្រៀងនេះ នឹងផ្ដល់ផលប្រយោជន៍យ៉ាងច្រើនដល់កម្ពុជា។ បន្ទាប់ពីកិច្ចព្រមព្រៀងនេះចូលជាធរមាន ទំនិញជាច្រើនមុខ នឹងត្រូវទម្លាក់ពន្ធនាំចូលដោយស្វ័យប្រវត្តិ ហើយនោះ ចលនានៃចរន្តវិនិយោគដីធ្លី និងលំនៅឋាននៅក្នុងប្រទេសកម្ពុជា ក៏នឹងទទួលបានផលប្រយោជន៍ជាច្រើនផងដែរតាមរយៈការជួល និងទិញវិនិយោគបង្កើតរោងចក្រ សហគ្រា​សនានាដល់បណ្តាក្រុមហ៊ុន និងវិនិយោគិននៅក្នុងប្រទេសកម្ពុជា ដែលមានគោលដៅនាំយកផលិតផលរបស់ខ្លួនឆ្ពោះទៅកាន់ទីផ្សារចិន៕

ដោយ ៖ រ៉ាណេត

កូរ៉េ ៖ ក្រុមហ៊ុនធំៗរបស់កូរ៉េមួយចំនួនដែលកំពុងមានដំណើរការផលិត និងផ្គត់ផ្គង់សម្ភារៈពេទ្យ ព្រមទាំងគ្រឿងបច្ចេកទេសនៅក្នុងប្រទេសកូរ៉េ បានបង្ហាញពីគោលដៅវិនិយោគ និងត្រៀមរើទីតាំងរោងចក្ររបស់ខ្លួនមកកាន់ប្រទេសកម្ពុជាក្នុងពេលឆាប់ៗខាងមុខនេះ។

ឯកអគ្គរាជទូតកម្ពុជាប្រចាំប្រទេសកូរ៉េ លោក ឡុង ឌីម៉ង់ បានឱ្យដឹងតាមរយៈប្រព័ន្ធទំនាក់ទំនងអេឡិចត្រូនិកនៅថ្ងៃទី២៧ ខែសីហា ឆ្នាំ២០២០នេះថា មួយរយៈពេលចុងក្រោយនេះ មានបណ្តាក្រុមហ៊ុនកូរ៉េជាច្រើន ដែលក្រៅពីបង្កើនកិច្ចទំនាក់ទំនងជាដៃគូក្នុងការទទួលយកផលិតផលរបស់កម្ពុជាទៅចែកចាយនៅលើទីផ្សារ ថែមទាំងមានបំណងរើទីតាំងរោងចក្ររបស់ខ្លួនមកកាន់ប្រទេសកម្ពុជាថែមទៀតផង ជាពិសេសក្រោយពេលកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដែលគ្រោងនឹងបញ្ចប់ក្នុងពេលឆាប់ៗខាងមុខនេះ។

លោក ឡុង ឌីម៉ង់ បានបញ្ជាក់ថា “ជាមួយនឹងសកម្មភាពការទូតសេដ្ឋកិច្ចរបស់ស្ថានទូតយើង ក្រុមហ៊ុនកូរ៉េមួយដែលបាន និងកំពុងផលិតម៉ាស៊ីនប្ដូរសម្ពាធខ្យល់, ម៉ាស៊ីនបន្សុទ្ធខ្យល់ និងសម្ភារៈបរិក្ខាពេទ្យមួយចំនួនទៀត បានត្រៀមខ្លួនលើករោងចក្ររបស់ខ្លួនទៅតាំងនៅប្រទេសកម្ពុជា ហើយនឹងត្រៀមធ្វើការស្រាវជ្រាវផលិតបរិក្ខាពេទ្យថ្មីៗបន្ថែមទៀត ដើម្បីជាការប្រកួតប្រជែងជាមួយនឹងផលិតផលពីបណ្តាប្រទេសនៅអឺរ៉ុប”។

លោកបានបន្តថា “នេះនឹងមិនគ្រាន់តែជាឱកាសក្នុងការផ្ដល់ការងារដល់ប្រជាពលរដ្ឋខ្មែរទេ ប៉ុន្តែជាការផ្ទេរបច្ចេកវិទ្យា ចំណេះដឹង ចំណេះធ្វើ ដល់ប្រទេសយើងផងដែរ។ ក្រុមហ៊ុននឹងត្រៀមចេញទៅប្រទេសកម្ពុជាដើម្បីសិក្សាឱ្យស៊ីជម្រៅបន្ថែមទៀត ដោយស្ថានទូតនឹងរៀបចំឱ្យស្ថាប័នជាតិពាក់ព័ន្ធផ្ដល់នូវកិច្ចសហការផ្សេងៗ”។

ប្រទេសកម្ពុជាក្នុងប៉ុន្មានឆ្នាំចុងក្រោយនេះ បាននិងកំពុងលេចឡើងជាដៃគូពាណិជ្ជកម្មដ៏សំខាន់សម្រាប់ប្រទេសកូរ៉េ។ ការនាំចេញរបស់ខ្លួនមកកាន់កម្ពុជាបានកើនឡើង ៥,៥ ភាគរយ ឬ ៦៩៦ លានដុល្លារកាលពីឆ្នាំមុន ខណៈការនាំចូលពីប្រទេសកម្ពុជាកើន ៦,៨ ភាគរយ ដោយក្នុងនោះ ផ្នែកវាយនភ័ណ្ឌ និងសម្លៀកបំពាក់ ជាមុខជំនួញសំខាន់ៗ។

ថ្មីៗនេះ រដ្ឋាភិបាលកូរ៉េបានកត់សម្គាល់ឃើញថា ប្រទេសកម្ពុជាដែលជាដៃគូពាណិជ្ជកម្មដ៏មានសក្តានុពល និងជាសមាជិកអាស៊ានបានប្រកាសកំណើនសេដ្ឋកិច្ចប្រចាំឆ្នាំប្រមាណ ៧ ភាគរយចាប់តាំងពីឆ្នាំ២០១១ រហូតមក ខណៈពេលដែលប្រទេសកូរ៉េមានកិច្ចព្រមព្រៀងពាណិជ្ជកម្មសេរី ដែលមានស្រាប់ជាមួយអាស៊ានវា បាន និងកំពុងពិភាក្សាអំពីកិច្ចព្រមព្រៀងគ្នាជាមួយប្រទេសជាសមាជិកដទៃទៀត៕

ដោយ ហ្សូលី

ភ្នំពេញ៖ វិស័យលំនៅដ្ឋាននៅទូរទាំងប្រទេសកម្ពុជា កំពុងទទួលបានគាំទ្រនិងមានការចាប់អារម្មណ៍ច្រើនជាងគេ បើប្រៀបធៀបជាមួយប្រភេទអចលនទ្រព្យដទៃ ទោះបីជាពិភពលោក រួមទាំងកម្ពុជាកំពុងធ្លាក់ក្នុងវិបត្តិសេដ្ឋកិច្ចសកលក្តី។

អ្នកជំនាញអចលនទ្រព្យជាតិ-អន្តរជាតិ បានបង្ហើបឱ្យដឹងថា អតិថិជននិងអ្នកវិនិយោគច្រើនតែសំដៅទៅរកប្រភេទលំនៅដ្ឋានព្រោះតែក្រុមហ៊ុនអភិវឌ្ឍមានភាពច្បាស់លាស់ សម្បូរអតិថិជនក្នុងដៃស្រាប់ និងមិនងាយប្រឈមហានិភ័យខ្ពស់។

មូលហេតុសំខានៗចំនួន៣យ៉ាងដែលបណ្តាលឱ្យអ្នកវិនិយោគនិងអ្នកទិញអចលនទ្រព្យសម្រេចចិត្តទិញលំនៅដ្ឋានមានដូចជា៖

ងាយស្រួលក្នុងការបង្វិលប្រាក់
កត្តានេះសង្កេតឃើញថា នៅកម្ពុជាពោរពេញទៅដោយក្រុមហ៊ុនអភិវឌ្ឍជាច្រើនដែលផ្តល់ជូនអតិថិជនជាមួយលក្ខខណ្ឌងាយស្រួល មិនរឹតបន្តឹង និងមិនស្មុគស្មាញ។ លើសពីនេះ ក្រុមហ៊ុនអភិវឌ្ឍមួយចំនួនសន្យាថានឹងមានការបង្វិលទិញមកវិញទៀតផង ប្រសិនអ្នកវិនិយោគលក់មិនចេញ។ ក្រៅពីនេះ អាចដាក់ជួលដើម្បីរកប្រាក់កម្រៃមកវិញ ដែលមានន័យថា លំហូរសាច់ប្រាក់ក្នុងការវិនិយោគលើវិស័យនេះនឹងហូរឥតឈប់ឈរមិនជាប់គាំង។

តម្លៃពោរពេញដោយសក្តានុពលខ្ពស់ពេលលក់ចេញវិញ
ក្នុងន័យនេះ នរណាៗក៏បានជ្រាបច្បាស់ដេរថាទីផ្សារលំនៅដ្ឋានក្នុងប្រទេសកម្ពុជាមិនដែលធ្លាក់ថ្លៃឡើយ ផ្ទុយទៅវិញមានតែកើនឡើងជាលំដាប់ គ្រាន់តែតិចឬច្រើនអាស្រ័យទៅលើទីតាំង និងស្ថានភាពសេដ្ឋកិច្ចតែប៉ុណ្ណោះ។
អគ្គនាយកក្រុមហ៊ុនអចលនទ្រព្យអន្តរជាតិ Land Station លោក កាង សុធី ធ្លាប់បានលើកឡើងថា ស្ថិតក្នុងដំណាក់វិបត្តិសេដ្ឋកិច្ចដោយសារជំងឺរាតត្បាតនេះ ការអភិវឌ្ឍគម្រោងលំនៅដ្ឋានក៏កើនឡើងស្របពេលដំណាលគ្នាដែរ ដែលបានធ្វើឱ្យកំណើនលំនៅដ្ឋានថ្មីមានការកើនឡើងច្រើន។ ទោះជាចំនួនលំនៅដ្ឋានថ្មីកើនឡើងច្រើន តែតម្លៃមិនមានការធ្លាក់ចុះនោះឡើយ។

ជាជម្រើសនិងការសម្រេចចិត្តដ៏ឆ្លាតវៃ
វាជាឱកាសដ៏ល្អសម្រាប់អ្នកដែលមានធនធានស្រាប់ ខណៈពេលដែលក្រុមហ៊ុនអភិវឌ្ឍមានការផ្តល់ជូនតម្លៃពិសេស ទាំងអត្រាការប្រាក់ ការបញ្ចុះតម្លៃ និងការថែមជូនផ្សេងៗ។ យុទ្ធសាស្រ្តឈ្នះៗទាំងក្រុមហ៊ុនដែលចង់ឱ្យមានចរន្តលក់ចេញ និងអតិថិជនដែលប្រាថ្នាចង់បានលំនៅដ្ឋានមានតម្លៃទាប និងសម្លឹងឃើញពីផលចំណេញរយៈពេលវែងទៅមុខ៕

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា បានធ្វើការលើកទឹកចិត្ត និងជំរុញដល់បណ្តាវិស្វករជំនាន់ក្រោយរបស់កម្ពុជា ត្រូវបង្កើនសមត្ថភាពឱ្យស្របតាមគោលការណ៍ស្ដងដារ ដើម្បីក្លាយជាស្ពានសម្រាប់តភ្ជាប់បច្ចេកវិទ្យា វិទ្យាសាស្ត្រ នវានុវត្តន៍ ដោយផ្សារភ្ជាប់ទៅនឹងការអភិវឌ្ឍជីវភាពសង្គម ជាមួយបណ្តាទីផ្សារអាស៊ាន និងពិភពលោក។

រដ្ឋមន្ត្រីក្រសួងការងារ បណ្តះបណ្តាល និងវិជ្ជាជីវៈ លោក អ៊ិត សំហេង នៅក្នុងកិច្ចប្រជុំពាក់កណ្តាលអាណត្តិក្រុមប្រឹក្សាភិបាលនៃអង្គការសហព័ន្ធវិស្វកម្មអាស៊ាន (AFEO) លើកទី១៩ នាព្រឹកថ្ងៃទី២៧ ខែសីហា ឆ្នាំ២០២០នេះ បានមានប្រសាសន៍ថា វិស្វករជាស្ពានសម្រាប់តភ្ជាប់បច្ចេកវិទ្យា វិទ្យាសាស្ត្រ នវានុវត្តន៍ ដោយផ្សារភ្ជាប់ទៅនឹងការអភិវឌ្ឍជីវភាពសង្គម និងតម្លៃវប្បធម៌ ។

លោករដ្ឋមន្ត្រីបានមានប្រសាសន៍បញ្ជាក់ថា វិស្វករត្រូវតែចូលរួមយ៉ាងសកម្មក្នុងការផ្លាស់ប្ដូរយោបល់ និងបទពិសោធន៍ជាមួយវិស្វករដទៃទៀត ជាពិសេសវិស្វករអាស៊ាន និងវិស្វករពិភពលោក ដើម្បីបង្កើនសមត្ថភាពយល់ដឹងរបស់ខ្លួនទាំងទ្រឹស្ដី និងការអនុវត្ត ដោយសង្ឃឹមថា វិស្វករនៃបណ្ដាប្រទេសជាសមាជិកអាស៊ានទាំងអស់ ដូចពេលប្រជុំ AFEO Mid-Term នាពេលនេះ ឬក៏សន្និសីទនៃអង្គការសហព័ន្ធវិស្វកម្មអាស៊ាន(CAFEO) តាមប្រទេសនីមួយៗ នឹងមានឱកាសធ្វើការជាមួយគ្នា ក្នុងការលើកកម្ពស់សមត្ថភាព ក៏ដូចជាការលើកស្ទួយការអភិវឌ្ឍសេដ្ឋកិច្ចសង្គម និងបង្កើនបាននូវភាពសុខដុមរមនា ក្នុងតំបន់ជាលក្ខណៈមហាគ្រួសារតែមួយ។

នៅក្នុងកិច្ចប្រជុំ លោករដ្ឋមន្ត្រីក្រសួងការងារបានស្នើដល់អង្គការសហព័ន្ធវិស្វកម្មអាស៊ាន បន្តវប្បធម៌ចែករំលែកបទពិសោធន៍ដ៏ប្រពៃនេះ ដើម្បីជំរុញឱ្យវិស្វករនៅក្នុងតំបន់មានសមត្ថភាពទៅតាមស្ដង់ដារអន្តរជាតិ និងអាចដើរទាន់ការអភិវឌ្ឍផ្នែកវិទ្យាសាស្ត្រ នៃបណ្ដាប្រទេសជឿនលឿនក្នុងសកលលោក។ តាមរយៈកិច្ចសហប្រតិបត្តិការល្អរវាងសមាជិកនៃអង្គការសហព័ន្ធវិស្វកម្មអាស៊ាន នឹងក្លាយជាកម្លាំងចលករ ប្រកបដោយប្រសិទ្ធភាពខ្ពស់ និងមានសក្ដានុពលក្នុងការជំរុញឱ្យវិស័យសេវាវិស្វកម្មនៅក្នុងតំបន់បោះជំហានទៅមុខ ប្រកបដោយភាពជោគជ័យ។

ក្នុងនាមជាប្រធានក្រុមប្រឹក្សានៃគណៈវិស្វករកម្ពុជា លោក អ៊ិត សំហេង បានលើកទឹកចិត្តដល់យុវវិស្វករអាស៊ានអំពីការគិតគូរដល់ការបង្កើតសហគ្រិនភាព ការផ្តល់បរិយាកាសឱ្យបានសមស្របដើម្បីអត្ថប្រយោជន៍ វិបុលភាពសេដ្ឋកិច្ច និងសង្គម និងគាំទ្រចំពោះការខិតខំប្រឹងប្រែងរបស់យុវវិស្វករដែលមានស្នាដៃឆ្នើម ដើម្បីទទួលបានវិញ្ញាបនបត្រ និងមេដាយកិត្តិយសសម្រាប់ការប្រកួតប្រជែងប្រចាំឆ្នាំរបស់យុវវិស្វករអាស៊ាន។

គណៈវិស្វករកម្ពុជា ជាអាជ្ញាធរវិស្វកម្មជាតិដែលមានកិច្ចសហប្រតិបត្តិការជាមួយនឹងអង្គការ AFEO និងគណៈកម្មាធិការសម្របសម្រួលវិស្វករអាជីពឆ្នើមអាស៊ាន (ACPECC)។ កម្ពុជាធ្លាប់បានធ្វើជាម្ចាស់ផ្ទះរៀបចំសន្និសីទនៃអង្គការសហព័ន្ធវិស្វកម្មអាស៊ានចំនួន២លើករួចមកហើយ៖ លើកទី១ CAFEO-20 ដែលប្រារព្ធធ្វើឡើងនៅថ្ងៃទី០២-០៤ ខែកញ្ញា ឆ្នាំ២០០២ ក្រោមប្រធានបទ “ វិស្វកម្មសម្រាប់ការកាត់បន្ថយភាពក្រីក្រនៅក្នុងប្រទេសជាសមាជិកអាស៊ាន” ។ លើកទី២ CAFEO-30 ដែលប្រារព្ធធ្វើឡើងនៅថ្ងៃទី១៦-១៩ ខែធ្នូ ឆ្នាំ២០១២ ក្រោមប្រធានបទស្តីពី “ អត្ថប្រយោជន៍នៃសមាហរណកម្មសេវាវិស្វកម្ម សម្រាប់បណ្តាប្រទេសជាសមាជិកអាស៊ាន ដែលមានការអភិវឌ្ឍតិចតួច ” ។

សន្និសីទទាំងពីរលើកកន្លងមក និងកិច្ចប្រជុំក្នុងថ្ងៃនេះ គឺជាព្រឹត្តិការណ៍ដ៏មានសារៈសំខាន់ដែលចូលរួមពន្លឿនការអភិវឌ្ឍប្រកបដោយចីរភាព មានចក្ខុវិស័យឆ្ពោះទៅតាមផែនការសហគមន៍សេដ្ឋកិច្ចអាស៊ានឆ្នាំ២០២៥ (ASEAN ECONOMIC COMMUNITY BLUEPRINT 2025) និងជាចក្ខុវិស័យដើម្បីបង្កើតឱ្យមានការយល់ដឹងលក្ខណៈស៊ីជម្រៅ អំពីអត្ថប្រយោជន៍នៃការធ្វើសមាហរណកម្មសម្រាប់បណ្តាប្រទេសជាសមាជិកអាស៊ាន៕

ដោយ ហ្សូលី

អន្តរជាតិ៖ ស្ថាបនិកក្រុមហ៊ុនអន្តរជាតិ Amazon គឺលោក Jeff Bezos បានក្លាយជាសេដ្ឋីដំបូងគេបង្អស់លើពិភពលោកដែលមានទ្រព្យសម្បត្តិជាង ២០០ពាន់លានដុល្លារ។ នេះបើតាមការចុះផ្សាយរបស់ទស្សនាវដ្តី Forbes នៅថ្ងៃទី ២៧ ខែ សីហា ឆ្នាំ ២០២០នេះ។

ចំនួនទ្រព្យសម្បត្តិនេះបានក្លាយឱ្យលោកក្លាយទៅជា មនុស្សដែលមានទ្រព្យសប្បត្តិច្រើនជាងគេលើលោក។ Forbes បានតាមដានទ្រព្យសម្បត្តិ និងរកឃើញមូលហេតុធំ ជាមួយនឹងភាគហ៊ុនរបស់ក្រុមហ៊ុន Amazon ឃើញថា ភាគហ៊ុនបានកើនឡើង ២ ភាគរយគិតត្រឹមរសៀលថ្ងៃពុធនេះ។ ទ្រព្យសម្បត្តិសុទ្ធរបស់ លោក Bezos កើនឡើង ៤,៩ ពាន់លានដុល្លារ ដែលធ្វើឱ្យបុរសវ័យ ៥៦ ឆ្នាំរូបនេះក្លាយជា មនុស្សដំបូងគេនៅលើពិភពលោកដែលទទួលបានទ្រព្យសម្បត្តិ ២០០ ពាន់លានដុល្លារ។

ដោយសារតែការផ្លាស់ប្តូរទម្លាប់អ្នកប្រើប្រាស់ដែលបណ្តាលមកពីការឆ្លងរាលដាលនៃជំងឺឆ្លងវីរុសនេះភាគហ៊ុនរបស់ក្រុមហ៊ុន Amazon បានកើនឡើងជិត ៨០% ចាប់តាំងពីដើមឆ្នាំហើយទ្រព្យសម្បត្តិសុទ្ធរបស់ Bezos ដែលមានចំនួនប្រហែល ១១៥ ពាន់លានដុល្លារកាលពីថ្ងៃទី ១ ខែមករា បានកើនឡើងជាលំដាប់។ ភាគហ៊ុន ១១ ភាគរយរបស់ Bezos នៅក្នុងក្រុមហ៊ុន Amazon រកបានជាង ៩០% នៃទ្រព្យសម្បត្តិរបស់គាត់។ គាត់ក៏ជាម្ចាស់កាសែតវ៉ាស៊ីនតោនប៉ុស្តិ៍ក្ រុមហ៊ុនអាកាសចរណ៍ Blue Origin និងការវិនិយោគឯកជនផ្សេងទៀត។

Bezos ក៏នឹងក្លាយជាអ្នកមានផងដែរប្រសិនបើគាត់មិនបានឆ្លងកាត់ការដោះស្រាយការលែងលះថ្លៃបំផុតនៅក្នុងប្រវត្តិសាស្ត្រកាលពីឆ្នាំមុន។ នៅពេលដែលគាត់បែកពីអតីតភរិយាគឺ Mackenzie Scott កាលពីខែកក្កដា ដោយគាត់បានយល់ព្រមផ្តល់ឱ្យនាង ២៥ ភាគរយនៃភាគហ៊ុនអាម៉ាហ្សូនដែលជាចំណែកភាគហ៊ុនឥឡូវនេះមានតម្លៃ ៦៣ ពាន់លានដុល្លារ។

សូម្បីតែការកែសម្រួលអតិផរណា Forbes ជឿជាក់ថាទ្រព្យសម្បត្តិរបស់ Bezos គឺធំជាងគេបំផុត។ មនុស្សដែលមកស្ថិតក្នុងលេខរៀងក្បែរលោកបំផុតគឺ លោក Bill Gates ដែលជាមហាសេដ្ឋីពាន់លានដំបូងគេនៅលើពិភពលោក៕