ដោយ ៖ ប៊ី

ភ្នំពេញ ៖ សហរដ្ឋអាមេរិក និងចិន បាននិយាយថា ពួកគេមានសុទិដ្ឋិនិយមកិច្ចព្រមព្រៀងពាណិជ្ជកម្មរបស់ពួកគេ បើទោះបីជាប្រទេសមហាអំណាចទាំងពីរកំពុងមានបញ្ហាមួយចំនួនផ្សេងទៀតរួមទាំងបច្ចេកវិទ្យា និងសន្តិសុខជាតិ។

អាជ្ញាធរជាន់ខ្ពស់មកពីប្រទេសទាំងពីររួមទាំងរដ្ឋមន្ត្រីរតនាគារសហរដ្ឋអាមេរិកលោក Steven Mnuchin អ្នកតំណាងពាណិជ្ជកម្មអាមេរិកលោក Robert Lighthizer និងឧបនាយករដ្ឋមន្ត្រីចិន Liu He បាននិយាយតាមទូរស័ព្ទកាលពីថ្ងៃច័ន្ទកន្លងមកនេះ។ នេះបើយោងតាមសេចក្តីថ្លែងការណ៍ ដែលចេញផ្សាយដោយរដ្ឋាភិបាលរបស់ពួកគេ។

ការិយាល័យរបស់លោក Lighthizer បានឱ្យនៅក្នុងសេចក្តីថ្លែងការណ៍មួយ ដែលសំដៅលើកិច្ចព្រមព្រៀងពាណិជ្ជកម្ម“ តំណាក់កាលមួយ” ដែលបានសម្រេចដើមឆ្នាំនេះថា “ភាគីទាំងពីរមើលឃើញពីវឌ្ឍនភាព ហើយប្តេជ្ញាចាត់វិធានការចាំបាច់ដើម្បីធានាបាននូវជោគជ័យនៃកិច្ចព្រមព្រៀង”។

ក្រសួងពាណិជ្ជកម្មចិនបានហៅកិច្ចពិភាក្សានេះថាជា “ការសន្ទនាប្រកបដោយការស្ថាបនា” នៅក្នុងសេចក្តីថ្លែងការណ៍របស់ខ្លួន ដោយបន្ថែមថា ប្រទេសទាំងពីរបានព្រមព្រៀងបង្កើតលក្ខខណ្ឌ និងបរិយាកាស ដើម្បីបន្តជំរុញទៅរកកិច្ចព្រមព្រៀងនេះ។
ព័ត៌មាននៃកិច្ចចរចានេះកើតឡើងមួយសប្តាហ៍ បន្ទាប់ពីអ្នកចរចាពាណិជ្ជកម្មអាមេរិក និងចិនត្រូវបានរំពឹងថានឹងជួបគ្នាតាមរយៈវីដេអូ ដើម្បីពិភាក្សាអំពីកិច្ចព្រមព្រៀង ដែលសម្រេចបានកាលពីខែមករា។ ប៉ុន្តែប្រធានាធិបតីអាមេរិក លោក ដូណាល់ ត្រាំ បាននិយាយថា លោកបានបញ្ឈប់ការប្រជុំនោះ ពីព្រោះលោកមិនសប្បាយចិត្តនឹងទីក្រុងប៉េកាំង។

លោក Trump បានប្រាប់អ្នកយកព័ត៌មានកាលពីសប្តាហ៍មុនថា “ខ្ញុំបានលុបចោលការពិភាក្សាជាមួយប្រទេសចិន។ ខ្ញុំមិនចង់និយាយជាមួយចិនទេឥឡូវនេះ”។
កាលពីសប្តាហ៍មុនភាគីចិន បាននិយាយថា កិច្ចពិភាក្សាពាណិជ្ជកម្មនឹងចាប់ផ្តើមឡើងវិញនៅប៉ុន្មានថ្ងៃខាងមុខ។
ភាពតានតឹងរវាងសហរដ្ឋអាមេរិក និងចិនបានកើនឡើងយ៉ាងកាលពីពេលថ្មីៗនេះ។ ប្រទេសទាំងពីរបានស្តីបន្ទោសគ្នាទៅវិញទៅមកជុំវិញការរីករាលដាលនៃជំងឺ Covid-19 និងបានបិទស្ថានកុងស៊ុលមួយចំនួនជុំវិញបញ្ហាសន្តិសុខជាតិ។ អាជ្ញាធរអាមេរិក ក៏បានផ្តោតលើក្រុមហ៊ុនបច្ចេកវិទ្យាចិនមួយចំនួន ហើយបានគំរាមហាមឃាត់កម្មវិធីពេញនិយម TikTok និង WeChat ។ ប៉ុន្តែកិច្ចព្រមព្រៀងពាណិជ្ជកម្មកាលពីខែមករា នៅតែមានដដែល។

ក្រុមអ្នកវិភាគបានប្រាប់ CNN Business ថា បណ្តាប្រទេសទាំងពីរមានបំណងក្នុងការរក្សាទំនាក់ទំនងសេដ្ឋកិច្ចមានស្ថេរភាព និងមានការបន្តទំនាក់ទំនង បើទោះបីប្រឈមមុខនឹងបញ្ហាផ្សេងទៀត។
កាលពីដើមខែនេះ ទីប្រឹក្សាសេតវិមានលោក Larry Kudlow បានប្រាប់អ្នកយកព័ត៌មាននៅឯសេតវិមានថា ប្រទេសចិនបានបង្កើនការទិញទំនិញរបស់សហរដ្ឋអាមេរិកយ៉ាងច្រើន។ លោក បន្ថែមថា ពាណិជ្ជកម្មគឺល្អ “ឥឡូវនេះ៕

ដោយ ៖ រ៉ាណេត

ភ្នំពេញ ៖ ផ្សារទំនើបតូចធំដែលកំពុងដាក់ដំណើរការ និងបំពេញសេចក្ដីត្រូវការរបស់អតិថិជននៅកម្ពុជានាពេលបច្ចុប្បន្ននេះ មានចំនួន២៦ នៅទូទាំងប្រទេស ដែលក្នុងនោះមានចំនួន២៣ នៅក្នុងរាជធានីភ្នំពេញ ខណៈពេលដែលផ្សារទំនើបថ្មីៗចំនួន៣ គ្រោងនឹងដាក់បញ្ចូលទីផ្សារនៅត្រឹមចុងឆ្នាំ២០២០ខាងមុខនេះ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យ CBRE Cambodia លោកស្រី អាន សុធីតា បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី២៦ ខែសីហា ឆ្នាំ២០២០នេះថា នៅពេលបច្ចុប្បន្ននេះមនុស្សជាច្រើនចាប់ផ្តើមមានទំនោរទៅលើផ្សារទំនើប ដែលក្នុងនោះរួមមានការទិញសម្ភារៈប្រើប្រាស់ប្រចាំថ្ងៃ ការកម្សាន្ត និងការទទួលទានចំណីអាហារជាដើម។

លោកស្រី អាន សុធីតា បានមានប្រសាសន៍ថា “បើនិយាយតម្រូវការ គឺនៅតែមានមិនអត់នោះទេ ប៉ុន្តែវាបានធ្លាក់ចុះជាងកាលពីឆ្នាំកន្លងទៅដោយសារតែបញ្ហានៃជំងឺសាកលដែលកំពុងបន្តគំរាមកំហែង”។ នៅក្នុងឆ្នាំ២០២០នេះ កំណើនផ្សារទំនើបនៅតែបន្តកើនឡើង ហើយរហូតដល់ចុងឆ្នាំ២០២០អាចនឹងមានចំនួន៣ទៀតគ្រោងដាក់ដំណើរការ”។

យោងតាមរបាយការណ៍ដែលចេញដោយក្រុមហ៊ុនភ្នាក់ងារ និងជំនាញស្រាវជ្រាវអចលនទ្រព្យអន្តរជាតិ CBRE Cambodia កាលពីចុងសប្ដាហ៍កន្លងទៅនេះបានបង្ហាញថា ទីផ្សារជួលតូបនៅក្នុងផ្សារទំនើប (Retail) នៅកម្ពុជា គិតត្រឹមចុងឆមាសទី១ (ចុងខែមិថុនា) គឺមានភាពអវិជ្ជមានខ្លាំង ពោលគឺធ្លាក់រហូតដល់ដក១៩ភាគរយ ក្រោមបន្ទាត់គោល ប៉ុន្តែទីផ្សារនេះត្រូវបានព្យាករណ៍ថា នឹងមានសន្ទុះឡើងវិញបន្តិចបន្តួចនៅក្នុងឆមាសទី២ នៃឆ្នាំ២០២០។

របាយការណ៍ដដែលបានបង្ហាញទៀតថា បើទោះជាទីផ្សារមួយនេះស្ថិតក្រោមបន្ទាត់គោលរហូតដល់ដក ១៩ភាគរយ ក៏ដោយ សម្រាប់ឆមាសទី២ នៃឆ្នាំដដែលនេះ តម្រូវការជួលតូបនឹងអាចមានកំណើនឡើងវិញមានប្រមាណ ១០,២ភាគរយ ប៉ុន្តែបើធៀបទៅនឹងឆ្នាំ២០១៩ គឺមានកំណើនប្រមាណ ០,១ភាគរយប៉ុណ្ណោះ ហើយកំណើននៃតម្រូវការជួលនេះ កើតឡើងដោយសារមនុស្សជាច្រើនចាប់ផ្តើមមានសកម្មភាពចេញដើរ និងប្រកបអាជីវកម្មប្រចាំថ្ងៃឡើងវិញ ក៏ដូចជាចេញដើរតាមផ្សា។

លោកស្រី អាន សុធីតា បានមានប្រសាសន៍បញ្ជាក់ថា “ចំនួនផ្សារទំនើបគ្រប់ប្រភេទដែលកំពុងដំណើរការនៅក្នុងប្រទេសកម្ពុជានាពេលបច្ចុប្បន្ននេះមានចំនួន២៦ទីតាំង ដែលក្នុងផ្សារចំនួន២៣ នៅក្នុងរាជធានីភ្នំពេញ ហើយគម្រោងផ្សារទំនើបថ្មីៗចំនួន៣ទៀតគ្រោងនឹងដាក់ដំណើរការនៅចុងឆ្នាំ២០២០ខាងមុខនេះ”។

ជាមួយនឹងកំណើននៃផ្សារទំនើបទាំងអស់នេះ លោកស្រី អាន សុធីតា បានអះអាងថា មិនអាចលុបបំបាត់ ឬលេបបណ្តាផ្សារប្រពៃណីចាស់ៗបាននោះទេ ប៉ុន្តែការរីកចម្រើន និងការកើនឡើងនូវចំនួនផ្សារទំនើប នឹងចូលរួមកែប្រែនូវរបៀបសណ្តាប់ធ្នាប់ ការបង្កើនសោភ័ណភាពនៅតាមបណ្តាផ្សារប្រពៃណីឱ្យកាន់តែមានភាពល្អប្រសើរជាងមុន៕

ដោយ ៖ វុត្ថា

ភ្នំពេញ ៖ ព្រលានយន្តហោះអន្តរជាតិតារាសាគរខេត្តកោះកុងដែលវិនិយោគដោយក្រុមហ៊ុន Union Development Group Co,td តម្លៃជាង ២០០លានដុល្លារអាមេរិក នឹងបញ្ចប់សាងសង់នៅដំណាក់កាលទី១ ក្នុងចុងឆ្នាំ២០២០ ខាងមុខនេះ ។

នេះ បើយោងតាមលទ្ធផលនៃជំនួបពិភាក្សាការងារជាមួយ លោកនាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរស៊ីវិល និងលោក Li TAO ប្រធានក្រុមប្រឹក្សាភិបាលក្រុមហ៊ុន Union Development អភិវឌ្ឍអាកាសយានដ្ឋានអន្តរជាតិតារាសាគរខេត្តកោះកុងនាថ្ងៃទី២៦ ខែសីហា ឆ្នាំ២០២០នេះ ។

លោក Li Tao ប្រធានក្រុមប្រឹក្សាភិបាលក្រុមហ៊ុន Union Development បានរាយការណ៍អំពីវឌ្ឍភាពការងារសាងសង់អាកាសយានដ្ឋានអន្តរជាតិបានប្រព្រឹត្តទៅតាមផែនការ និងស្នើសុំគាំទ្រពីឯកឧត្តមរដ្ឋមន្ត្រី បន្តជួយដល់គម្រោងសាងសង់បន្ថែមទៀត។

លើសពីនេះទៅទៀត លោក Li បានកោតសរសើរ ចំពោះរដ្ឋលេខាធិការដ្ឋានអាកាសចរស៊ីវិលដែលបានគាំទ្រដល់គម្រោងសាងសង់កន្លងមក និងចុងឆ្នាំអាកាសយានដ្ឋានតារាសាគរនឹងបញ្ចប់ការសាងសង់នៅដំណាក់កាលទី១ ។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការរដ្ឋានអាកាសចរស៊ីវិល បានអបអរសាទរចំពោះក្រុមហ៊ុន ដែលបានបញ្ចប់ការសាងសង់តាមផែនការ និងបន្តគាំទ្រសហការជាមួយក្រុមហ៊ុនធ្វើយ៉ាងណាឱ្យការសាងសង់បញ្ចប់ដោយជោគជ័យ ក្នុងការចូលរួមចំណែកអភិវឌ្ឍប្រទេសកម្ពុជា ជម្រុញកំណើនសេដ្ឋកិច្ច និងទាក់ទាញភ្ញៀវទេសចរ។

ក្រុមហ៊ុន UNION Development បានសម្រេចបោះទុនវិនិយោគសរុបចំនួន២០០លានដុល្លារសាងសង់ព្រលានយន្តហោះនេះ រួមមានការស្ថាបនាផ្លូវសម្រាប់យន្តហោះរត់ ដែលមានប្រវែងបណ្តោយ ៣២០០ម៉ែត្រ និងទទឹង៦០ម៉ែត្រ និងស្ថានីយ៍អ្នកដំណើរ ហើយក្រោយការសាងសង់រួច អាកាសយានដ្ឋានអន្តរជាតិតារាសាគរ នឹងអនុញ្ញាតឲ្យយន្តហោះធុនយក្ស ប្រភេទប៊ូអីង៧៧៧ និងអ៊ែរបើស A៣៤០ ចុះចតបាន។

ក្រុមហ៊ុនចិន UNION Development Group Co., Ltd. បានចុះកិច្ចសន្យាជាមួយរាជរដ្ឋាភិបាលកម្ពុជា នៅថ្ងៃទី៩ ខែឧសភា ឆ្នាំ២០០៨ ដើម្បីធ្វើការអភិវឌ្ឍគម្រោងតារាសាគរ លើផ្ទៃដីសរុបទំហំ ៣៦,០០០ហិកតា។ គិតមកទល់បច្ចុប្បន្ន ក្រុមហ៊ុនបានកំពុងសម្រុកអនុវត្តន៍ គម្រោងទៅតាមផែនការ ដោយបានបណ្តាក់ទុនវិនិយោគជាង ១,៥០០លានដុល្លារ លើការសាងសង់អគារ និងហេដ្ឋារចនាសម្ព័ន្ធចាំបាច់មួយចំនួនដូចជា ៖ ប្រព័ន្ធគមនាគមន៍, ក្លឹបវាយកូនហ្គោល, ព្រលានយន្តហោះ, កំពង់ផែទឹកជ្រៅអន្តរជាតិ, សួនលម្អ, បណ្តាញទឹកស្អាត និងប្រព័ន្ធអគ្គិសនី ជាដើម៕

ដោយ ៖ វុត្ថា

សៀមរាប ៖ រដ្ឋបាលខេត្តសៀមរាបបានអនុម័តទៅលើផែនការយុទ្ធសាស្ត្រ សម្រាប់ការគ្រប់គ្រងថវិកាចំណូល និងចំណាយរបស់រដ្ឋបាលខេត្ត (ឆ្នាំ២០២០-២០២៣) ) ក្នុងកិច្ចអភិវឌ្ឍន៍របស់ខេត្តសៀមរាបបន្ថែមទៀត ។

លោក សោម សមស័ក្តិ នាយកទីចាត់ការហិរញ្ញវត្ថុ សាលាខេត្តសៀមរាប នៅក្នុងកិច្ចប្រជុំវិសាមញ្ញរបស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃទី ២៥ ខែសីហា ឆ្នាំ ២០២០ ឱ្យដឹងថា ផែនការយុទ្ធសាស្ត្រខេត្ត សម្រាប់ការគ្រប់គ្រងថវិការដ្ឋបាលខេត្តសៀមរាប (ឆ្នាំ២០២០-២០២៣) ព្រមទាំងលើកឡើងពីការគ្រោងចំណូល និង ចំណាយរបស់រដ្ឋបាលខេត្តទៀតផង។

លោកបន្តថា រដ្ឋបាលខេត្តបានលើកគម្រោងផែនការឆ្នាំមាន ៥គម្រោង តែដោយជួបនូវបញ្ហាវិបត្តិកូវិដ១៩ រដ្ឋបាលខេត្ត យកមួយគម្រោងយកទៅបម្រើលើសេវាសង្គម ក្នុងពេលដែលជួបវិបត្តិកូវីដ១៩នេះ ។

លោក អ៊ឹង ហឿន នៅក្នុងកិច្ចប្រជុំវិសាមញ្ញរបស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃទី ២៥ ខែសីហា ឆ្នាំ ២០២០ បានលើកនូវអនុសាសន៍មួយចំនួន ដើមី្បជាប្រទីតសម្រាប់សមាជិកក្រុមប្រឹក្សាខេត្ត ធ្វើការពិនិត្យលើគម្រោងផែនការថវិកា ដែលទីចាត់ការហិរញ្ញវត្ថុ នៃសាលាខេត្តសៀមរាប បានលើកផែនការយុទ្ធសាស្ត្រ លើគម្រោងចំណូល ចំណាយរបស់ខេត្ត(ឆ្នាំ២០២០. ២០២៣) ក្នុងកិច្ចអភិវឌ្ឍន៍របស់ខេត្តសៀមរាប។

លោកបន្តថា ពេលនេះខេត្តសៀមរាបក៏ពុំមានចំណោទបញ្ហាពីផ្លូវថ្នល់ទៀតឡើយ គឺបានផ្តោតទៅលើបញ្ហា អនាម័យ បរិស្ថាន នៅតាមដងស្ទឹងសៀមរាប និង តាមដងវិថីក្នុងក្រុងទៀតផង

លោក ទៀ សីហា អភិបាលខេត្តសៀមរាប ក៏បានធ្វើការកោតសរសើរពីកិច្ចខិតខំប្រឹងប្រែងរបស់មន្ត្រីរាជការ ទាំងក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ កងកម្លាំងទាំងបី រួមទាំងប្រជាពលរដ្ឋ បានចូលរួមសហការបានល្អ ក្នុងការប្រយុទ្ធប្រឆាំងបង្កា ទប់ស្កាត់នូវជំងឺកូវីដ ១៩ មិនឲ្យមានការរីករាលដាលនៅតាមសហគម ដោយអនុវត្តតាមសេចក្តីណែនាំរបស់ក្រសួងសុខាភិបាលបានជាប្រចាំ ។

លោកបន្តទៀតថា ដោយមានកិច្ចសហការបានល្អ ក្នុងពេលដែលរាជរដ្ឋាភិបាល បានអនុញ្ញាតឲ្យមន្ត្រីរាជការ កម្មករ វិយោជិក ឈប់សម្រាក៥ថ្ងៃ ស្របទៅនឹងការរៀបចំនូវព្រឹត្តិការណ៍សម្រាកសៀមរាប ដែលរៀបចំឡើងដោយរដ្ឋបាលខេត្ត និង សហភាពសហព័ន្ធយុវជនកម្ពុជាខេត្ត ក៏បានធ្វើការទាក់ទាញដល់ភ្ញៀវទេសចរណ៍ជាតិ អន្តរជាតិ ចូលមកកាន់ខេត្តប្រវត្តិសាស្ត្រសៀមរាប មានចំនួនប្រមាណជាង ២១ម៉ឺននាក់ ដែលបង្ហាញឲ្យឃើញការចាប់កម្រើកឡើងវិញក្នុងវិស័យទេសចរ នៅខេត្តសៀមរាប ដែលបានបាត់បង់អស់រយៈពេល៧ខែមកនេះ។

លោកបន្ថែមថា ជាក់ស្តែងក្នុងរយៈពេលឈប់សម្រាក៥ថ្ងៃមកនេះ ភ្ញៀវដែលចូលមកចាយវាយនៅខេត្តសៀមរាប ដែលប្រជាពលរដ្ឋយើងទទួលបានប្រមាណជាង៩លានដុល្លា ហើយនេះក៏ជាភាពជោគជ័យមួយផងដែរ ក្នុងពេលដែលកំពុងជួបវិបត្តិកូវិដនេះ ។ លោកបន្តទៀតថា ពាក់ព័ន្ធថវិកា ទៅលើគម្រោងចំណូល ចំណាយប្រចាំឆ្នាំនេះ ខេត្តគឺត្រូវការថវិកាបន្ថែមទៀត ទៅលើការចំណាយទៅលើគម្រោងផ្សេងៗ ដូចជាពិធីបុណ្យប្រពៃណីជាតិជាដើម។

លោកបញ្ជាក់ទៀតថា ពាក់ព័ន្ធទៅការអភិវឌ្ឍន៍ស្ទឹងសៀមរាប ដោយស្ទឹងសៀមរាបស្ថិតក្នុងការគ្រប់គ្រងរបស់ (អាយស៊ីស៊ី) យើងមិនអាចធ្វើការអភិវឌ្ឍន៍អ្វីបានឡើយ គឺបានត្រឹមធ្វើការថែរក្សា សម្អាតអនាម័យ បរិស្ថានប៉ុណ្ណោះ ព្រោះស្ទឹងសៀមរាបជាបេះដូងរបស់ខេត្តយើង ៕

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈក្រសួងពាណិជ្ជកម្ម និងមន្ត្រីតំណាងសភាពាណិជ្ជកម្មកម្ពុជា បាន និងកំពុងត្រៀមរៀបចំកិច្ចប្រជុំកំពូលអាស៊ី-អឺរ៉ុបខាងកើតដែលមានសមាជិកចំនួន៥ប្រទេស ដើម្បីបង្កើនកិច្ចទំនាក់ទំនង និងពង្រីកវិស័យពាណិជ្ជកម្ម។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍នៅព្រឹកថ្ងៃទី២៦ ខែសីហា ឆ្នាំ២០២០នេះថា រដ្ឋាភិបាលកម្ពុជា បាន និងកំពុងត្រៀមរៀបចំកិច្ចប្រជុំកំពូលលើកទី៣ នៃក្រុមការងាររួមកម្ពុជា-គណៈកម្មការសេដ្ឋកិច្ចអឺរ៉ុប-អាស៊ី ដែលគ្រោងនឹងប្រារព្ធធ្វើនៅខែតុលា ឬ ខែវិច្ឆិកា ឆ្នាំ២០២០ ខាងមុខនេះ។
លោកឧកញ៉ាបានមានប្រសាសន៍បន្តទៀតថា “តាមរយៈកិច្ចប្រជុំនេះ កម្ពុជាអាចនឹងទទួលបានផលចំណេញច្រើន ដែលក្រៅពីបង្កើនកិច្ចទំនាក់ទំនង បង្ហាញពីសក្ដានុពល និងឱកាសវិនិយោគនៅកម្ពុជា ថែមទាំងអាចបង្កើនទំហំពាណិជ្ជកម្មរបស់កម្ពុជាតាមរយៈកិច្ចចរចាព្រមព្រៀងពាណិជ្ជកម្មសេរី”។ លោកឧកញ៉ាបន្តថា “បច្ចុប្បន្ននេះមានប្រទេសមិនតិចជាង១០នោះទេ ដែលព្យាយាមភ្ជាប់កិច្ចទំនាកទំនងជាគណៈកម្មការសេដ្ឋកិច្ចអឺរ៉ុប-អាស៊ីខាងកើត ដែលផ្តួចផ្តើមបង្កើតឡើងដោយសហព័ន្ធរុស្សី មានសមាជិកចំនួន៥ប្រទេស និងមានចំណែកទីផ្សារជាង១០០លានអ្នក”។

ជាមួយនឹងការរៀបចំកិច្ចប្រជុំខាងលើនេះ កម្ពុជាអាចឆក់យកឱកាសនេះដើម្បីបង្កើនភាពទាក់ទាញក្នុងការវិនិយោគក្រោមការបង្ហាញពីគោលនយោបាយផ្លូវមួយខ្សែក្រវាត់មួយរបស់ចិន ជាពិសេសការទទួលបានកិច្ចព្រមព្រៀងពាណិជ្ជកម្មសេរីកម្ពុជា-ចិន រួមជាមួយនឹងការឈានទៅរកកិច្ចចរចាពាណិជ្ជកម្មសេរីជាមួយប្រទេសកូរ៉េ និងប្រទេសឥណ្ឌាផងដែរ៕

ដោយ ៖ វុត្ថា

ភ្នំពេញ ៖ ក្រុមហ៊ុនអាកាសចរណ៍នៅក្នុងស្រុកបានស្នើសុំរដ្ឋាភិបាលកម្ពុជា ហោះហើរទៅកាន់គោលដៅរបស់ខ្លួនឡើងវិញនៅក្នុងប្រទេសតំបន់អាស៊ាន និងពិភពលោក បន្ទាប់ពីផ្អាកការហោះហើរចាប់តាំងពីមានការផ្ទុះឡើងនូវជំងឺ Covid-19 កន្លងមកនេះ។

សំណើរបស់ក្រុមហ៊ុនអាកាសចរណ៍នៅក្នុងស្រុកទាំង៥ នេះ ត្រូវបានធ្វើឡើងនៅក្នុងជំនួបពិភាក្សាការងា និង សម្តែងការគួរសមជាមួយលោកនាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរស៊ីវិល កាលពីល្ងាចថ្ងៃទី ២៥ ខែសីហា ឆ្នាំ២០២០ ម្សិលមិញនេះ។

ក្នុងជំនួបកិច្ចប្រជុំតំណាងក្រុមហ៊ុនអាកាសចរណ៍ក្នុងស្រុកទាំង៥ បានលើកយកបញ្ហាប្រឈមនានា ក្នុងកាលៈទេសៈនៃការរីករាលដាលនៃជំងឺកូវីដ-១៩ និងស្នើសុំឱ្យមានការហោះហើរជាបណ្តើរៗតាមដែលអាចធ្វើបាន ក្នុងបណ្តាប្រទេសអាស៊ាន មករដ្ឋលេខាធិការដ្ឋានអាកាសចរស៊ីវិល។

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានប្រាប់ឱ្យដឹងថា តាមសំណើររបស់ក្រុមហ៊ុនអាកាសចរណ៍នេះ រដ្ឋាភិបាលេខាធិការអាកាសចរណ៍ស៊ីវិលនឹងពិនិត្យឡើងវិញ និងដាក់សំណើរទៅកាន់គណៈកម្មការប្រយុទ្ធប្រឆាំងជំងឺកូវីដ ១៩ ដើម្បីពិនិត្យនឹងសម្រេចទៅលើការសម្រួលនិតិវិធីមូយចំនួន។

លោកបន្តថា តំណាងក្រុមហ៊ុនអាកាសចរណ៍ក្នុងស្រុក នៅក្នុងជំនួបកាលពីម្សិលមិញនេះ បានពិភាក្សាគ្នាលើការស្វែងរកនិតិវិធីដើម្បីបង្កឱ្យមានភាពងាយស្រួយក្នុងការហោះហើរកាន់តែមានភាពល្អប្រសើរ និងគោរពឱ្យបាននូវវិធានការការពារនៃការឆ្លងជំងឺកូវី១៩ ។

លោកពន្យល់ថា និតិវិធីរបស់យើងមានការលំបាកបន្តិច ដែលតម្រូវឱ្យមានការត្រួតពិនិត្យទៅលើអ្នកបើកបរយន្តហោះ និងអ្នកបំរើតាមយន្តហោះ ដែលបណ្តាប្រទេសមួយចំនួន មិនមានតម្រូវការបែបនេះ ខណៈដែលខាងក្រុមហ៊ុនអាកាសចរណ៍គេមានវិធានការការពារពីការឆ្លងជំងឺកូវីដ ១៩គ្រប់គ្រាន់។

ក្រុមហ៊ុនអាកាសចរណ៍នៅក្នុងស្រុកក៏ដូចក្រុមហ៊ុនអាកាសចរណ៍នានាទទួលរងនូវផលប៉ះពាល់ពីឥទ្ធិពលនៃជំងឺកូវីដ ១៩ ផងដែរ តែរហូតមកដល់ពេលនេះ មិនមានក្រុមហ៊ុនណាមួយប្រកាសពីក្ស័យធននោះទេ ខណៈមានការជ្រោមជ្រែងពីរដ្ឋាភិបាលកម្ពុជា៕

ដោយ៖ ប៊ី
ភ្នំពេញ៖ ក្រុមហ៊ុន KTIS មានគោលបំណងវិនិយោគលើការបង្កើតរោងចក្រផលិតសារធាតុអេតាណុល និងស្រាវីស្គីនៅកម្ពុជា ខណៈក្រុមហ៊ុន CP ALL បានបង្ហាញចំណាប់អារម្មណ៍លើការវិនិយោគបង្កើតរោងចក្រកែឆ្នៃម្ហូបអាហារ ដើម្បីដាក់លក់នៅតាមសាខាហាង 7-Eleven នៅក្នុងប្រទេសកម្ពុជា ព្រមទាំងទទួលទិញផលិតផលខ្មែរ ដើម្បីយកមកដាក់លក់នៅក្នុងប្រទេសថៃ។

ការបង្ហាញបំណងវិនិយោគនៅកម្ពុជា ត្រូវបានធ្វើឡើង អំឡុងពេលលោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ បានដឹកនាំមន្ត្រីការទូត ចុះធ្វើទស្សនកិច្ចសិក្សា កាលពីពេលថ្មីៗនេះ នៅសហគ្រាស KTIS Group ដែលជាក្រុមហ៊ុនកសិឧស្សាហកម្មដ៏ធំមួយរបស់ប្រទេសថៃ ដើម្បីស្វែងយល់អំពីការអភិវឌ្ឍខ្សែសង្វាក់ផលិតកម្មស្ករស និងសារធាតុអេតាណុលដែលចម្រាញ់ចេញពីដើមអំពៅ។

ដំណើរទស្សនកិច្ចសិក្សានេះ ក៏មានការចូលរួមពីលោក ប៉ាផាន់ សេរីវិរិយ:កុល (Parphan Siriviriyakul) នាយកប្រតិបត្តិក្រុមហ៊ុន KTIS Group និងលោក ករសាក់ ឆៃរស្មីសាក់ (Korsak Chairasmisak) អគ្គនាយកក្រុមហ៊ុន CP ALL Public Company Limited រួមជាមួយទីប្រឹក្សា និងសហការីប្រមាណជាង ១០រូប ផងដែរ។

នៅក្នុងឱកាសនោះ លោក អ៊ូក សោភ័ណ បានជម្រាបជូនអង្គពិធីអំពីយុទ្ធសាស្ត្រថៃបូកមួយ (Thai Plus-One) និងបានស្នើតំណាងក្រុមហ៊ុនសាជីវកម្មយក្សទាំងពីរ ដែលមានក្រុមហ៊ុនបុត្រសម្ព័ន្ធជាង ៤០ ធ្វើការពង្រីកប្រតិបត្តិការធុរកិច្ចនៅកាន់ប្រទេសកម្ពុជា ដើម្បីទាញយកអត្ថប្រយោជន៍ពីតំបន់សេដ្ឋកិច្ចពិសេស និងកិច្ចព្រមព្រៀងពាណិជ្ជកម្មសេរី (FTA) កម្ពុជា-ចិន ដែលនឹងត្រូវចុះហត្ថលេខានៅក្នុងឆ្នាំនេះ។

ស្ថានទូតកម្ពុជាប្រចាំប្រទេសថៃ បានឱ្យដឹងថា “តំណាងក្រុមហ៊ុន KTIS បានបង្ហាញចំណាប់អារម្មណ៍វិនិយោគលើការបង្កើតរោងចក្រផលិតសារធាតុអេតាណុល និងស្រាវីស្គីនៅកម្ពុជា ចំណែកឯតំណាងក្រុមហ៊ុន CP ALL បានបង្ហាញចំណាប់អារម្មណ៍លើការវិនិយោគបង្កើតរោងចក្រកែឆ្នៃម្ហូបអាហារ ដើម្បីដាក់លក់នៅតាមសាខាហាង 7-Eleven នៅក្នុងប្រទេសកម្ពុជា ព្រមទាំងទទួលទិញផលិតផលខ្មែរ ដើម្បីយកមកដាក់លក់នៅក្នុងប្រទេសថៃវិញផងដែរ”៕