ដោយ ៖ ប៊ី

ភ្នំពេញ ៖ កិច្ចចរចាពាណិជ្ជកម្មចុងក្រោយរវាងអង់គ្លេស និងអឺរ៉ុបបានបញ្ចប់ដោយគ្មានការវិវឌ្ឍន៍ទេ ដោយទុកឱ្យអ្នកចរចាទាំងសងខាងរយៈពេលពីរខែទៀត ដើម្បីឈានដល់កិច្ចព្រមព្រៀង ហើយចៀសវាងការខូចខាតបន្ថែមទៀតដល់អាជីវកម្ម ដែលត្រូវបានបំផ្លាញដោយវិបត្តិសេដ្ឋកិច្ច និងជំងឺ Covid-19។

មន្រ្តីអង់គ្លេស និងសហភាពអឺរ៉ុបបាននិយាយកាលពីថ្ងៃសុក្រថា មានការរីកចម្រើនតិចតួចនៅក្នុងការចរចា ដើម្បីកំណត់លក្ខខណ្ឌពាណិជ្ជកម្មថ្មី មុនពេលការរៀបចំ Brexit (ការចាកចេញរបស់អង់គ្លេសពីសហភាពអឺរ៉ុប) ឆ្លងកាត់ផុតកំណត់នៅចុងឆ្នាំ ២០២០។ កិច្ចពិភាក្សាក៏បានផ្លាស់ប្តូរទៅរកបញ្ហាសំខាន់ៗ រួមមានសិទ្ធិនេសាទពាណិជ្ជកម្ម។

លោក Michel Bernard Barnier ប្រធានការិយាល័យអឺរ៉ុបផ្នែកទំនាក់ទំនងជាមួយអង់គ្លេស បានប្រាប់អ្នកយកព័ត៌មាននៅទីក្រុងប្រ៊ុចសែលថា “ក្នុងដំណាក់កាលនេះ កិច្ចព្រមព្រៀងរវាងចក្រភពអង់គ្លេស និងសហភាពអឺរ៉ុបហាក់ដូចជាមិនទំនងទេ។ ខ្ញុំមិនយល់សោះថាហេតុអ្វីបានជាយើងខ្ជះខ្ជាយពេលវេលាដ៏មានតម្លៃ។ ពេលវេលាកំពុងដើរទៅមុខ”។

ប្រធានក្រុមអ្នកចរចាអង់គ្លេស លោក David Frost បាននិយាយថា កិច្ចព្រមព្រៀងនៅតែអាចធ្វើទៅបាន ប៉ុន្តែលោកបានព្រមានថា វានឹងមិនងាយស្រួលក្នុងការសម្រេចបានទេ។

លោក Frost បាននិយាយនៅក្នុងសេចក្តីថ្លែងការណ៍មួយថា “យើងមានការពិភាក្សាមានប្រយោជន៍នៅសប្តាហ៍នេះ ប៉ុន្តែមានការរីកចម្រើនតិចតួចទេ។
ចក្រភពអង់គ្លេសបានចាកចេញពីសហភាពអឺរ៉ុបកាលពីខែមករា ប៉ុន្តែលក្ខខណ្ឌពាណិជ្ជកម្មជាមួយទីផ្សារនាំចេញធំបំផុតរបស់ខ្លួននៅតែមិនផ្លាស់ប្តូរក្នុងអំឡុងពេលអន្តរកាល ដែលនឹងផុតកំណត់នៅចុងឆ្នាំ ២០២០។ ប្រសិនបើអ្នកចរចាបរាជ័យក្នុងកិច្ចព្រមព្រៀងថ្មី ក្រុមហ៊ុនអង់គ្លេសនឹងប្រឈមនឹងថ្លៃដើមពាណិជ្ជកម្មខ្ពស់ ក្នុងពេលដែលមនុស្សជាច្រើនបានរងនូវវិបត្តិសេដ្ឋកិច្ចជាប្រវត្តិសាស្រ្ត។
កំណើនសេដ្ឋកិច្ចអង់គ្លេសធ្លាក់ចុះ ២០,៤ភាគរយ ក្នុងត្រីមាសទី ២ ឆ្នាំ ២០២០ ដែលជំរុញឱ្យប្រទេសធ្លាក់ចូលក្នុងវិបត្តិសេដ្ឋកិច្ចជ្រៅបំផុត។ ការងារប្រហែល ៧៣០,០០០ ត្រូវបានបញ្ឈប់ ចាប់តាំងពីការឆ្លងរាលដាលនៃជំងឺ Covid-19 បានបិទទ្វារអាជីវកម្មអង់គ្លេសនៅខែមីនា។

រហូតមកដល់ពេលនេះរដ្ឋាភិបាលអង់គ្លេសក៏បានបរាជ័យក្នុងការធ្វើកិច្ចព្រមព្រៀងពាណិជ្ជកម្មអឺរ៉ុបរាប់សិបលើក ជាមួយប្រទេសទីបី ដោយមិនចាំបាច់ធ្វើកិច្ចព្រមព្រៀងថ្មីជាមួយសហរដ្ឋអាមេរិក មានន័យថា ក្រុមហ៊ុនអង់គ្លេសអាចប្រឈមនឹងឧបសគ្គក្នុងការធ្វើជំនួញនៅក្នុងទីផ្សារបរទេសភាគច្រើន ដែលខ្លួនធ្លាប់ធ្វើជាមួយ៕ CNN

ដោយ ៖ គង់ សូរិយា
ភ្នំពេញ ៖ នៅក្នុងឱកាសនៃថ្ងៃឈប់សម្រាករយៈពេល៥ថ្ងៃកន្លងទៅនេះ ភ្ញៀវទេសចរជាតិ និងអន្តរជាតិសរុបជាង១.៤លាននាក់បានចេញដើរលេងកម្សាន្តនៅតាមតំបន់រមណីយដ្ឋាននានាទូទាំងប្រទេស។

លោកបណ្ឌិត ថោង ខុន រដ្ឋមន្រ្តីក្រសួងទេសចរណ៍ បានមានប្រសាសន៍ប្រាប់ដឹងកាលពីយប់ថ្ងៃទី២១ ខែសីហា ឆ្នាំ២០២០ថា ថ្ងៃឈប់សម្រាកសងពិធីបុណ្យចូលឆ្នាំប្រពៃណីជាតិខ្មែររយៈពេល៥ថ្ងៃនេះ ភ្ញៀវទេសចរដែលបានដើរលេងកម្សាន្តតាមគោលដៅនានាទូទាំងប្រទេសមានចំនួន ១,៤៥៩,៣៨៦នាក់ ក្នុងនោះភ្ញៀវជាតិមានចំនួនប្រមាណ ១.៤៤៥.២៣៨នាក់ និងភ្ញៀវអន្តរជាតិមានចំនួនប្រមាណ ១៤.១៤៨នាក់។

លោករដ្ឋមន្ត្រីមានបញ្ជាក់ឱ្យដឹងថែមទៀតថា សម្រាប់ចំនួនភ្ញៀវទេសចរតាមថ្ងៃនីមួយៗគឺបន្តមានកំណើនដូចគ្នា ដែលក្នុងនោះរួមមានដូចជា ថ្ងៃទី១ ប្រមាណ ២៣៣.៣២៩ នាក់, ថ្ងៃទី២ ប្រមាណ ២៨១.៨៥៥ នាក់, ថ្ងៃទី៣ ប្រមាណ ៣២៥.០៧៧ នាក់ , ថ្ងៃទី៤ ប្រមាណ ៣៣៤.៣៩១ នាក់ និងថ្ងៃទី៥ ប្រមាណ ២៨៤.៧៣៤ នាក់។

ជាការកត់សម្គាល់បន្ថែម លោករដ្ឋមន្រ្តីបានបញ្ជាក់ឲ្យដឹងដូចខាងក្រោមថា ៖

* រាជធានីខេត្តទាំងអស់ បានខិតខំរៀបចំគោលដៅទេសចរណ៍ និងបង្ហាញផលិតផលទេសចរណ៍ថ្មីៗ ក៏ដូចជារៀបចំព្រឹត្តិការណ៍ទាក់ទាញទេសចរ ពិសេសការរៀបចំព្រឹត្តិការណ៍ «សម្រាកសៀមរាប» ដែលបានទាក់ទាញទេសចររាប់ម៉ឺននាក់ទៅកម្សាន្តនៅខេត្តសៀមរាប ខណៈរដ្ឋបាលខេត្ត បានខិតខំអនុវត្តតាមវិធានសុវត្ថិភាពទេសចរណ៍ ក្នុងការទប់ស្កាត់ជំងឺកូវីដ១៩ ពិសេសនៅកន្លែងប្រារព្វពិធី និងនៅផាប់ស្រ្ទីតជាដើម។

* ភ្ញៀវទេសចរភាគច្រើន បានដើរកម្សាន្តជាក្រុមគ្រួសារ និងជាច្រើនគោលដៅដោយភ្ជាប់គ្នាពីខេត្តមួយទៅខេត្តមួយ ហើយខ្លះបានរៀបចំម្ហូបអាហារដោយខ្លួនឯងសម្រាប់ហូបចុកក្នុងដំណើរកម្សាន្ត។

* តាមការអង្កេតជាក់ស្តែង មិនមានបញ្ហាធំដុំណាមួយកើតឡើងទេ ជាពិសេសការតំឡើងថ្លៃហួសហេតុលើសេវាស្នាក់នៅ និងម្ហូបអាហារ។ យ៉ាងណាក៏ដោយ នៅតាមគោលដៅទេសចរណ៍មួយចំនួន មានការខ្វះខាតបន្ទប់ស្នាក់នៅ ដោយសារលំហូរភ្ញៀវមានច្រើនក្នុងពេលតែមួយ ប៉ុន្តែមិនមានការតំឡើងតំលៃសេវាស្នាក់នៅហួសហេតុពេកទេ។ ភ្ញៀវទេសចរមួយចំនួនបានជ្រើសរើសការបោះតង់ និងការស្នាក់នៅផ្ទះរបស់បងប្អូន ឬជួលផ្ទះរបស់បងប្អូនប្រជាជនក្នុងខេត្តផ្ទាល់ ខណៈដែលការស្នាក់នៅតាមសណ្ឋាគារលំដាប់ផ្កាយ (ផ្កាយ ៤ និងផ្កាយ៥) នៅមិនទាន់មានចំនួនច្រើននៅឡើយ។

* ប៉ុន្តែសំរាមនៅតែជាបញ្ហាស្មុគ្រស្មាញ ដោយនៅតាមគោលដៅមួយចំនួន ភ្ញៀវទេសចរមានការទុកដាក់សំរាមមិនបានត្រឹមត្រូវ ជាពិសេសបោះចោលសំរាម ឬទុកចោលនៅកន្លែងដែលពួកគាត់បានទទួលទានអាហារ។

* គ្រប់គោលដៅទេសចរណ៍ បានខិតខំអនុវត្តតាមគោលណែនាំរបស់ក្រសួងសុខាភិបាល និងវិធានសុវត្ថិភាពទេសចរណ៍របស់ ក្រសួងទេសចរណ៍ដើម្បីទប់ស្កាត់ការរីករាលដាលនៃជំងឺកូវីដ១៩ ក្រោមការណែនាំ និងចុះពិនិត្យផ្ទាល់ដល់មូលដ្ឋានរបស់គណៈអភិបាល រាជធានីខេត្ត ដែលមានមន្ទីរទេសចរណ៍ជាសេនាធិការ ជាពិសេសការស្កេនកំដៅ លាងដៃ និងការកត់ត្រាពត៌មានភ្ញៀវ។

យ៉ាងណាក៏ដោយ ការពាក់ម៉ាស់របស់ភ្ញៀវ នៅមិនទាន់មានភាពពេញលេញ ហើយការរក្សាគំលាតសុវត្ថិភាពនៅពុំទាន់អនុវត្តបានល្អប្រសើរ ជាពិសេសនៅតាមគោលដៅទេសចរណ៍ ដែលមានលក្ខណៈប្រមូលផ្តុំច្រើន។

លោករដ្ឋមន្រ្តី បានបញ្ជាក់បន្ថែមថា ប្រជាជននៅតាមមូលដ្ឋាន និងវិស័យឯកជនមានភាពរីករាយជាមួយលំហូរភ្ញៀវទេសចរនៅគ្រប់គោលដៅ ទេសចរណ៍ ខណៈដែលការចំណាយរបស់ភ្ញៀវ បានហូរចូលដោយផ្ទាល់ទៅក្នុងចរន្តសេដ្ឋកិច្ចមូលដ្ឋាន បើទោះបីជាការចំណាយរបស់ភ្ញៀវមាន កម្រិតតិចជាងពេលមានវិបត្តិកូវីដ១៩ក៏ដោយ។ មូលដ្ឋានអាជីវកម្មទេសចរណ៍ភាគច្រើន បានបើកទទួលភ្ញៀវ រាប់តាំងពីសេវាស្នាក់នៅ និងម្ហូបអាហារ ខណៈដែលមគ្គុទេសមួយចំនួនក៏បានទទួលការងារពីលំហូរភ្ញៀវទេសចរដ៏ច្រើននេះជាពិសេសនៅខេត្តសៀមរាប៕

ដោយ ហ្សូលី

ហាណូយ៖ លោកនាយករដ្ឋមន្រ្តីប្រទេសវៀតណាមបានចេញនូវផែនការអនុវត្តអនុស្សរណៈនៃការយោគយល់គ្នាស្តីពីការអភិវឌ្ឍនិងការតភ្ជាប់ហេដ្ឋារចនាសម្ព័ន្ធពាណិជ្ជកម្មតាមព្រំដែនរវាងប្រទេសវៀតណាមនិងប្រទេសកម្ពុជា ដើម្បីបង្កើនទំនាក់ទំនងពាណិជ្ជកម្មឱ្យកាន់តែជិតស្និទ្ធ។

ការអនុវត្តនេះបានចាប់ផ្តើមកាលពីសប្តាហ៍មុនកន្លងទៅ ដែលវាអាចនិងមានរយៈពេលវែងរហូតដល់ខែតុលាឆ្នាំ ២០២២។ ប្រសិនបើការចុះអនុស្សារណៈយោគយល់នេះត្រូវបានពង្រីកផែនការ នឹងបន្តអនុវត្តសម្រាប់រយៈពេល ៣ ឆ្នាំទៀត។

ក្នុងរយៈពេលពីរឆ្នាំ គឺឆ្នាំ២០២១ និង ២០២២ រដ្ឋាភិបាលនឹងចាប់ផ្តើមការអនុវត្តចុះស្ទង់មតិសម្រាប់ការសាងសង់ផ្សារព្រំដែន យ៉ាងហោចណាស់ឱ្យបានមួយ ក្នុងគោលបំណងបើកសកម្មភាពជំនួញ លើកទឹកចិត្តដល់ពាណិជ្ជករវៀតណាមនិងកម្ពុជាឱ្យវិនិយោគលើហេដ្ឋារចនាសម្ព័ន្ធពាណិជ្ជកម្មតាមព្រំដែន។

លើសពីនេះ ក៏មានការបង្កើតព្រឹត្តិការណ៍ទាក់ទងនឹងការជំរុញពាណិជ្ជកម្មនិងវិនិយោគ និងគាំទ្រក្រុមហ៊ុនដែលទើបតែចាប់ផ្តើមដំណើរការ ណែនាំនិងចែកចាយទំនិញនៅផ្សារព្រំដែន មានមជ្ឈមណ្ឌលពាណិជ្ជកម្មនិងពិព័រណ៍ពាណិជ្ជកម្ម។

យោងតាមផែនការ ក្រសួង វិស័យ និងតំបន់ដែលពាក់ព័ន្ធ ត្រូវបានកំណត់រៀបចំយុទ្ធនាការទំនាក់ទំនងលើកកម្ពស់ការយល់ដឹងលើខ្លឹមសារនៃអនុស្សរណៈយោគយល់គ្នានេះ ដើម្បីអភិវឌ្ឍហេដ្ឋារចនាសម្ព័ន្ធពាណិជ្ជកម្មតាមព្រំដែនរវាងវៀតណាម-កម្ពុជា។ ជាពិសេស ជួយជំរុញពាណិជ្ជកម្មជាមួយប្រទេសកម្ពុជា ចែករំលែកព័ត៌មាន និងបើកវគ្គបណ្តុះបណ្តាល។

ប្រទេសវៀតណាមនិងប្រទេសកម្ពុជាមានខ្សែព្រំដែនមានចម្ងាយជិត ១.១៣៧ គីឡូម៉ែត្រដោយឆ្លងកាត់ខេត្តចំនួន ១០ របស់ប្រទេសវៀតណាមគឺខុនទុំ, ជីឡៃ, ដាកឡាក់, ដាកណុង, ប៊ិញភឿក, តានិញ, ឡុងអាន, ដុងថាប, អានយ៉ាង, កៀនយ៉ាង និង ខេត្តចំនួន៩របស់កម្ពុជាមានដូចជា ខេត្តរតនគីរី មណ្ឌលគីរី ក្រចេះ ត្បូងឃ្មុំ ស្វាយរៀង ព្រៃវែង កណ្តាល តាកែវ និងកំពត៕ VNA

ដោយ៖ ប៊ី

ភ្នំពេញ៖ វិធានការបិទទ្វារប្រទេស និងការធ្លាក់ចុះនៃសេដ្ឋកិច្ចប្រទេសជិតខាង បានធ្វើឱ្យពាណិជ្ជកម្មឆ្លងដែនរបស់ថៃបានធ្លាក់ចុះ ៩,១៨% នៅក្នុងឆមាសទី១ ឆ្នាំ២០២០នេះ។

ប៉ុន្តែទោះបីយ៉ាងណាក៏ដោយ មានតែប្រទេសកម្ពុជាទេ ដែលជាប្រទេសមួយក្នុងចំណោមប្រទេសទាំងបួន មានព្រំដែនគោកជាប់នឹងប្រទេសថៃ ហើយការផ្លាស់ប្តូរពាណិជ្ជកម្មមានកំណើន ២,២៧ ភាគរយក្នុងឆមាសទី១នៃឆ្នាំនេះ។
នាយកដ្ឋានពាណិជ្ជកម្មក្រៅប្រទេស បានរាយការណ៍ពីការធ្វើពាណិជ្ជកម្មឆ្លងកាត់ព្រំដែន រួមទាំងពាណិជ្ជកម្មឆ្លងកាត់ដ៏ទៅទៀត មានចំនួនសរុប ៦២៧ ពាន់លានបាត ពីខែមករាដល់ខែមិថុនា ខណៈប្រទេសម៉ាឡេស៊ីជាដៃគូធំជាងគេ។
ការធ្វើពាណិជ្ជកម្មឆ្លងកាត់ ពាក់ព័ន្ធនឹងទំនិញ ឆ្លងកាត់ប្រទេសច្រើនជាងមួយ។

ក្នុងចំណោមតួលេខសរុប ការនាំចេញមានចំនួន ៣៦៥ ពាន់លានបាតធ្លាក់ចុះ ៨,៦% ពីមួយឆ្នាំទៅមួយឆ្នាំ ខណៈពេលដែលការនាំចូលបានធ្លាក់ចុះ ៩,៩៨% មកត្រឹម ២៦២ ពាន់លានដុល្លារ ដែលធ្វើឱ្យអតិរេកពាណិជ្ជកម្មមានចំនួន ១០៣ ពាន់លានដុល្លារ។
ពាណិជ្ជកម្មតាមព្រំដែនជាមួយប្រទេសជិតខាងចំនួន៤ មានចំនួន ៣៧០ ពាន់លានបាត ធ្លាក់ចុះ ១៣,៧% ពីមួយឆ្នាំទៅមួយឆ្នាំ។ សរុបការនាំចេញមានចំនួន ២១៩ ពាន់លានបាតធ្លាក់ចុះ ១១,៩% និងការនាំចូល ២៦២ ពាន់លានធ្លាក់ចុះ ៩,៩៨% ។ ប្រទេសថៃបានរក្សាអតិរេកពាណិជ្ជកម្មចំនួន ៦៨,១ ពាន់លានបាត។

ពាណិជ្ជកម្មទ្វេភាគីជាមួយម៉ាឡេស៊ីមានចំនួនសរុប ១០៩ ពាន់លានបាត (ធ្លាក់ចុះ ២៦,៨%) បន្ទាប់មកពាណិជ្ជកម្មជាមួយប្រទេសឡាវ (៩២,៣ ពាន់លានបាត ធ្លាក់ចុះ ៧,០៩%) មីយ៉ាន់ម៉ា (៨៦,៧ ពាន់លានបាត ធ្លាក់ចុះ ១៣,៧%)។
ពាណិជ្ជកម្មឆ្លងកាត់ ជាពិសេសនៅសឹង្ហបុរី វៀតណាម និងភាគខាងត្បូងប្រទេសចិន បានធ្លាក់ចុះ ១,៧% នៅឆមាសទី១ មកត្រឹមតម្លៃពាណិជ្ជកម្ម ២៥៧ពាន់លានបាត។

លោក Keerati Rushchano អគ្គនាយកនៃនាយកដ្ឋានពាណិជ្ជកម្មបរទេស បាននិយាយថា ជំងឺCovid-19 និងវិធានការបិទប្រទេស ដើម្បីទប់ស្កាត់ការរីករាលដាល បានជះឥទ្ធិពលយ៉ាងខ្លាំងដល់ពាណិជ្ជកម្ម និងទេសចរណ៍ ក៏ដូចជាសេដ្ឋកិច្ចទាំងមូលទាំងនៅក្នុងប្រទេសថៃ និងប្រទេសជិតខាង៕ BangkokPost