ដោយ ៖ រ៉ាណេត​

កោះកុង ៖ ដោយមានការគាំទ្រពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ខេត្តកោះកុងបានទទួលសមិទ្ធិផលថ្មីនៃហេដ្ឋារចនាសម្ព័ន្ធខ្សែបញ្ជូន និងអនុស្ថានីយ ២៣០គីឡូវ៉ុល ត្រូវបានដាក់ឱ្យដំណើរការបម្រើការប្រើប្រាស់ និងផ្គត់ផ្គង់ស្រុកចំនួន៤។

លោក កែវ រតនៈ រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយកអគ្គិសនីកម្ពុជា បានថ្លែងប្រាប់ឱ្យដឹងនៅថ្ងៃទី១៤ ខែសីហា ឆ្នាំ២០២០ថា អគ្គិសនីកម្ពុជាបានដាក់ឲ្យដំណើរការខ្សែបញ្ជូន ២៣០គីឡូវ៉ុលពីអនុស្ថានីយ៍ចម្ការហ្លួង ស្រុកកំពង់សីលា (ផ្លូវបំបែកស្រែអំបិល) មកស្រុកបូទុមសាគរ ប្រវែង ៥៤គីឡូម៉ែត្រ ព្រមទាំងដាក់ឲ្យដំណើរការអនុស្ថានីយ ២៣០គីឡូវ៉ុលនៅក្នុងស្រុកបូទុមសាគរនេះ។ ហេដ្ឋារចនាសម្ព័ន្ធថ្មីនេះ នឹងដើរតួយ៉ាងសំខាន់ក្នុងការបញ្ជូននិងការផ្គត់ផ្គង់ចែកចាយអគ្គិសនី ជូនបងប្អូនប្រជាពលរដ្ឋក្នុងស្រុកបូទុមសាគរ គីរីសាគរ កោះកុង និងស្រុកស្រែអំបិល នៃខេត្តកោះកុង។

លោក កែវ រតនៈ បានមានប្រសាសន៍បន្ថែមថា ខ្សែបញ្ជូន និងអនុស្ថានីយថ្មីនេះស្ថិតនៅក្នុងក្របខណ្ឌកិច្ចសហប្រតិបត្តិការរវាងព្រះរាជាណាចក្រកម្ពុជា ជាមួយសាធារណរដ្ឋបារាំង តាមរយៈទីភ្នាក់ងារអភិវឌ្ឍន៍បារាំង ដែលបានផ្តល់ឥណទានសម្បទានដល់អគ្គិសនីកម្ពុជា ដើម្បីបង្កើនវិសាលភាពនៃការបញ្ជូនផ្គត់ផ្គង់អគ្គិសនីប្រកបដោយគុណភាព ស្ថិរភាព និងនិរន្តរភាព។

គម្រោងនេះត្រូវបានសិក្សាត្រួតពិនិត្យដោយវិស្វកររបស់អគ្គិសនីកម្ពុជាតាំងពីចាប់ផ្តើមដំបូងនៅឆ្នាំ២០១៤ ដោយមានការជួយពីទីប្រឹក្សាបច្ចេកទេសអន្តរជាតិ របស់ក្រុមហ៊ុនអគ្គិសនីបារាំង EDF ហើយសាងសង់ដោយក្រុមហ៊ុនធំៗរបស់ប្រទេសចិន រួមមាន ZTT សម្រាប់ខ្សែបញ្ជូន ១១៥ គីឡូវ៉ុល និង២៣០គីឡូវ៉ុល និង TBEA សម្រាប់អនុស្ថានីយ ១១៥ គីឡូវ៉ុល និង២៣០គីឡូវ៉ុល។

គម្រោងនេះមិនត្រឹមតែឲ្យយើងទទួលបាននូវមួយផ្នែក នៃហេដ្ឋារចនាសម្ព័ន្ធជាតិបញ្ជូនអគ្គិសនីប៉ុណ្ណោះទេ គឺបានផ្តល់និងផ្ទេរចំណេះដឹង (Capacity Building) នូវបច្ចេកវិជ្ជាទំនើបពីបណ្តាជំនាញបច្ចេកទេសដែលមានបទពិសោធន៍ខ្ពស់ទាំងពីប្រទេសបារាំង ក៏ដូចជាប្រទេសចិន ដល់វិស្វករ និងក្រុមហ៊ុនម៉ៅការសាងសង់បន្តរបស់ប្រទេសកម្ពុជា ដើម្បីមានលទ្ធភាពសាងសង់ដោយខ្លួនឯងនៅពេលអនាគត។ ខ្សែបញ្ជូននេះជាផ្នែកមួយនៃប្រព័ន្ធជាតិបញ្ជូនអគ្គិសនីភាគខាងត្បូង ដែលគ្រោងនឹងភ្ជាប់ជាមួយខេត្តកោះកុងនៅចុងឆ្នាំ២០២០នេះ ដើម្បីបង្កើតបានជាប្រព័ន្ធកងបញ្ជូនធំមួយទៀតឆ្លងកាត់ខេត្តព្រះសីហនុ កោះកុង ពោធិ៍សាត់ កំពង់ឆ្នាំង កណ្តាល រាជធានីភ្នំពេញ និងខេត្តកំពង់ស្ពឺ ដែលអាចបញ្ជូនថាមពលជួយគ្នាទៅវិញទៅមកដោយយកប្រភពពីរោងចក្រធ្យូងថ្មខេត្តព្រះសីហនុ និងបណ្តាវារីអគ្គិសនីភាគខាងលិច ក្នុងខេត្តកោះកុង និងពោធិសាត់។

លោក កែវ រតនៈ បានបញ្ជាក់ថា ចាប់ពីពេលនេះតទៅ ប្រជាពលរដ្ឋអ្នកប្រើប្រាស់នៅក្នុងតំបន់ស្រុកបូទុមសាគរ គីរីសាគរ និងភាគខ្លះនៃស្រុកស្រែអំបិល និងស្រុកកោះកុង នឹងទទួលបាននូវការផ្គត់ផ្គង់ថាមពលអគ្គិសនីដែលមានគុណភាព និងស្ថិរភាព ល្អប្រសើរជាងមុន ពីប្រភពផ្គត់ផ្គង់ថ្មីនេះជំនួសការយកថាមពលពីប្រភពអនុស្ថានីយ៍ឆ្ងាយៗដូចពីមុន បញ្ជូនតាមបណ្តាញតង់ស្យុងមធ្យមដែលជារឿយៗតែងជួបប្រទះការរអាក់រអួលដោយសារមែកឈើប៉ះ បណ្ដាលពីខ្យល់ព្យុះ ភ្លៀងខ្លាំង មកលើបង្គោលបេតុងតូចៗដែលដាំតាមផ្លូវជាដើម។

ជាមួយគ្នានេះដែរ ខ្សែបញ្ជូនតង់ស្យុងខ្ពស់ថ្មីនេះអាចផ្តល់លទ្ធភាពបញ្ជូនថាមពលរហូតដល់៦០០មេហ្កាវ៉ាត់ ដែលអាចពង្រីកបន្ថែមការអភិវឌ្ឍន៍តាមរបៀង មាត់សមុទ្ររបស់ប្រទេសយើងតាមផ្លូវជាតិលេខ ៤៨ ដែលនឹងជួយបង្កើនកំណើនសេដ្ឋកិច្ចជាតិយ៉ាងឆាប់រហ័ស៕

ដោយ៖ ម៉ាណេត

ភ្នំពេញៈ ក្រុមហ៊ុនអាកាសចរណ៍Silk Air របស់ប្រទេសសឹង្ហបុរី ដែលមានទិសដៅហោះហើរសឹង្ហបុរី–ភ្នំពេញ–សឹង្ហបុរីត្រូវបានរំពឹងថានឹងចាប់ផ្តើមសេវាកម្មហោះហើរឡើងវិញនៅខែកញ្ញាខាងមុខនេះ។

ក្រុមហ៊ុនអាកាសចរណ៍នេះ បានទទួលការយល់ព្រម ក្នុងការបន្តជើងហោះហើររបស់ខ្លួនឡើងវិញ ហើយក៏ទទួលបានការយល់ព្រមសម្រាប់អ្នកដំណើរ ដែលធ្វើដំណើរពីប្រទេសកម្ពុជាឆ្លងកាត់នៅសិង្ហបុរីផងដែរ។ ការវិវឌ្ឍវិជ្ជមាននេះកើតឡើង បន្ទាប់ពីប្រទេ​សកម្ពុជាផ្អាកជើងហោះហើរពីគោលដៅចំនួន៣ដូចជាប្រទេសម៉ាឡេស៊ីឥណ្ឌូនេស៊ីនិងហ្វីលីពីន។

ទន្ទឹមនឹងនេះ នៅក្នុងការវិវត្តផ្សេងទៀត ប្រទេសជប៉ុន នឹងសិង្ហបុរីបានព្រមព្រៀងកាលពីថ្ងៃព្រហស្បតិ៍ ដើម្បីបន្ធូរបន្ថយការរឹតបន្តឹងការធ្វើដំណើរ ដើម្បីឆ្លើយតបទៅនឹងជំងឺកូវីដ១០ ចាប់ពីខែកញ្ញាខាងមុខនេះ។

រដ្ឋមន្រ្តីក្រសួងការបរទេសជប៉ុនលោកToshimitsu Motegi បាននិយាយថា លោកបានឯកភាពជាមួយភាគីសឹង្ហបុរី លោក Vivian Balakrishnan ថាប្រទេសទាំងពីរនឹងចាប់ផ្តើមធ្វើទស្សនកិច្ចទៅវិញទៅមករបស់អ្នកជំនួញនិងជនបរទេសចាប់ពីខែកញ្ញាខាងមុខនេះប្រសិនបើពួកគេចាត់វិធានការប្រុងប្រយ័ត្នជាមុន។

ប្រទេសជប៉ុនបច្ចុប្បន្នបានហាមឃាត់១៤៦ប្រទេស ក្នុងការចូលក្នុងប្រទេសរបស់​ខ្លួនជាគោលការណ៍បានឱ្យដឹងកាលពីចុងខែកក្កដាថាខ្លួននឹងបើកការពិភាក្សាថ្មីជាមួយប្រទេស១២រួមទាំងប្រទេសសឹង្ហបុរីផងដែរអំពីវិធីសាស្រ្តក្នុងការធ្វើដំណើរឡើងវិញ។

រដ្ឋមន្រ្តីទាំងពីររូបនៅក្នុងជំនួបផ្ទាល់លើកដំបូងចាប់តាំងពីខែវិច្ឆិកាឆ្នាំមុនក៏មានផែនការពិភាក្សាអំពីស្ថានភាពបច្ចុប្បន្ននៅសមុទ្រចិនខាងត្បូងដែលចិនកំពុងបង្កើនការទាមទារដែនសមុទ្រនិងមធ្យោបាយដើម្បីរារាំងមហិច្ឆតានុយក្លេអ៊ែរនិងមីស៊ីលរបស់កូរ៉េខាងជើង។

ក្រុមរដ្ឋមន្រ្តីទាំងពីរត្រូវបានរំពឹងថា នឹងផ្លាស់ប្តូរទស្សនគ្នាស្តីពី កិច្ចសហប្រតិបត្តិការក្នុងការឆ្លើយតបនឹងជំងឺរាតត្បាត ដែលអាចប៉ះពាល់ដល់ការបង្កើត មជ្ឈមណ្ឌលអាស៊ាន៕ KT/BangkokPost

ដោយ ៖ ប៊ី

អន្តរជាតិ ៖ សហរដ្ឋអាមេរិកមានគោលដៅវាយប្រហារក្រុមហ៊ុនបច្ចេកវិទ្យាធំៗបំផុតរបស់ប្រទេសចិន ដូចជា ក្រុមហ៊ុន Huawei និងក្រុមហ៊ុន ByteDance ដែលមានកម្មវិធីTikTok ក្រុមហ៊ុន Tencent ដែលមានកម្មវិធីWeChat ។ ក្រុមហ៊ុន Alibaba ដែលជាក្រុមហ៊ុនលក់រាយ និងលក់ទំនិញតាមអនឡាញធំជាងគេបំផុតនៅលើពិភពលោកអាចនឹងក្លាយជាក្រុមហ៊ុនបន្ទាប់ក្នុងគោលដៅវាយប្រហាររបស់អាមេរិក។

សកម្មភាពប្រឆាំងនឹងក្រុមហ៊ុនចិន កំពុងបង្កើនកម្តៅយ៉ាងខ្លាំង នៃការរុញច្រានរបស់រដ្ឋបាល Trump ប្រឆាំងនឹងសមត្ថភាពបច្ចេកវិទ្យាកំពុងរីកចម្រើនរបស់ទីក្រុងប៉េកាំង ដែលបង្ខំឱ្យអ្នកពាក់ព័ន្ធសកលជ្រើសរើសរវាងចិន និងសហរដ្ឋអាមេរិក។

លោក Alex Capri អ្នកស្រាវជ្រាវមកពីមូលនិធិ Hinrich Foundation និងជាសាស្ត្រាចារ្យជាន់ខ្ពស់នៅសាកលវិទ្យាល័យជាតិសឹង្ហបុរី បានមានប្រសាសន៍ថា “យើងកំពុងស្ថិតក្នុងដំណើរផ្លាស់ប្តូរគំរូមួយ ហើយភូមិសាស្ត្រនយោបាយកំពុងឆ្លងកាត់ការផ្លាស់ប្តូរជាប្រវត្តិសាស្ត្រនាពេលបច្ចុប្បន្ននេះ”។

លោកបានបន្ថែមថា ក្រុមមន្ត្រីក្រុងវ៉ាស៊ីនតោនកំពុងធ្វើការចោទប្រកាន់បន្ថែមទៀតប្រឆាំងនឹងក្រុមហ៊ុនបច្ចេកវិទ្យាចិន ដែលជាការបង្ហាញថា រដ្ឋបាលពិតជាកំពុងសំឡឹងរកការធ្វើឱ្យឧស្សាហកម្មបច្ចេកវិទ្យាបែកបាក់”។

មិនដូចក្រុមហ៊ុន ByteDance ឬក្រុមហ៊ុន Huawei ទេដែលការពង្រីកពិភពលោកត្រូវបានធ្វើឱ្យរអាក់រអួល បន្ទាប់ពីទីក្រុងវ៉ាស៊ីនតោនបានផ្តាច់ក្រុមហ៊ុនទាំងពីរនេះពីប្រើប្រាស់លើទឹកដីអាមេរិក។ ក្រុមហ៊ុន Alibaba (BABA) មិនមានជោគជ័យច្រើនទេក្នុងការពង្រីកទីផ្សារនៅបស្ចិមប្រទេស ប៉ុន្តែការពិតដែលថា ក្រុមហ៊ុន Alibaba ជាក្រុមហ៊ុនដ៏ធំបំផុតមួយរបស់ប្រទេសចិនអាចជាហេតុផលគ្រប់គ្រាន់សម្រាប់ទីក្រុងវ៉ាស៊ីនតោនដើម្បីកំណត់គោលដៅវាយប្រហារ។

ក្រុមហ៊ុន Alibaba មិនទាន់ត្រូវបានគំរាមកំហែងជាមួយនឹងការដាក់ទណ្ឌកម្មដូចគ្នាជាមួយនឹងក្រុមហ៊ុនខាងនោះទេ ដែលប្រធានាធិបតីអាមេរិកលោក ដូណាល់ ត្រាំ បានប្រឆាំងនឹងក្រុមហ៊ុនបច្ចេកវិទ្យាចិនទាំងនេះ ហើយលោក Trump ក៏បាននិយាយដោយឥតលាក់លៀមចំពោះស្ថាបនិកក្រុមហ៊ុនលោក Jack Ma ដោយបានហៅលោកថាជា “មិត្តភក្តិរបស់ខ្ញុំ” កាលពីដើមឆ្នាំនេះ បន្ទាប់ពីមហាសេដ្ឋីចិនរូបនេះបាននិយាយថា លោកនឹងបរិច្ចាគសំភារៈសម្រាប់ប្រយុទ្ធប្រឆាំងនឹងជំងឺរាតត្បាតCOVID-19។
ប៉ុន្តែក្រុមហ៊ុននេះគឺស្ថិតនៅក្នុងគោលដៅរបស់មន្រ្តីអាមេរិក។

រដ្ឋមន្រ្តីក្រសួងការបរទេសលោក Mike Pompeo បានត្រួតពិនិត្យឈ្មោះក្រុមហ៊ុន Alibaba កាលពីសប្តាហ៍មុន នៅពេលដែលលោកបានជំរុញឱ្យក្រុមហ៊ុនអាមេរិកដកបច្ចេកវិទ្យា ដែលគ្រប់គ្រងដោយជនជាតិចិន ដោយមិនទុកចិត្តពីបណ្តាញឌីជីថលរបស់ពួកគេ។
លោក Pompeo បាននិយាយថា ទីក្រុងវ៉ាស៊ីនតោនចង់ការពារ “ព័ត៌មានផ្ទាល់ខ្លួន របស់ជនជាតិអាមេរិក និងកម្មសិទ្ធិបញ្ញាដ៏មានតំលៃបំផុតរបស់អាជីវកម្មរបស់យើង – រួមទាំងការស្រាវជ្រាវវ៉ាក់សាំង Covid-19 ពីការចូលប្រើប្រព័ន្ធអេឡិចត្រនិក ដែលគ្រប់គ្រងដោយក្រុមហ៊ុន” ដូចជា Alibaba និង Tencent (TCEHY) ក្នុងចំណោមក្រុមហ៊ុនដទៃទៀត ។

លោក Capri “ក្រុមហ៊ុនអន្តរជាតិធំៗ កំពុងត្រូវបានជ្រើសរើសជាក្រុមហ៊ុនជាតិ សម្រាប់យុទ្ធសាស្រ្ត ហើយកំពុងត្រូវបានប្រើប្រាស់ ដោយមិនគិតពីថាតើពួកគេចូលចិត្តឬអត់”។
ក្រុមហ៊ុនដូចជា Alibaba ត្រូវបានចិញ្ចឹមបីបាច់ថែរក្សាដោយប្រទេសចិន ហើយពួកគេកាន់កាប់ចំណែកទីផ្សារដោយមិនចាំបាច់ប្រកួតប្រជែងជាមួយក្រុមហ៊ុនបរទេស”៕ CNN

ដោយ ៖ វុត្ថា

ភ្នំពេញ ៖ ឧបនាយករដ្ឋមន្ត្រីនៃកម្ពុជា លោក ហោ ណាំហុង បានជម្រុញដល់រដ្ឋាភិបាលអូស្ត្រាលី បង្កើនទំហំពាណិជ្ជកម្មទ្វេភាគីជាមួយកម្ពុជាបន្ថែមទៀត ខណៈពាណិជ្ជកម្មនៃប្រទេសទាំងពីរ នៅមានកម្រិត និងមិនសមស្រប ទៅនឹងសក្ដានុពល ដោយនៅឆ្នាំ២០១៩ មានត្រឹមតែ២៤៩លានដុល្លារអាមេរិកប៉ុណ្ណោះ។

លោក ហោ ណាំហុង ឧបនាយករដ្ឋមន្ត្រីនៃកម្ពុជា នៅក្នុងជំនួបជាមួយ លោក Pablo Kang ឯកអគ្គរដ្ឋទូតអូស្រ្តាលីប្រចាំនៅកម្ពុជា កាលពីថ្ងៃទី ១៣ ខែសីហា ឆ្នាំ ២០២០ម្សិលមិញនេះ បានស្នើឲ្យជញ្ជីងពាណិជ្ជកម្មរវាងប្រទេសទាំងពីមានសកម្ម និងមានទំហំធំជាងនេះ។

លោកឧបនាយករដ្ឋមន្ត្រីក៏អំពាវនាវឲ្យសហគ្រាសអូស្ដ្រាលីដាក់ទុនវិនិយោគនៅកម្ពុជា ជាពិសេស លើវិស័យកសិកម្ម និងទេសចរណ៍ក្រោយពីជំងឺ Covid-19 បានស្ងប់ស្ងាត់ទៅនាពេលខាងមុខមុខនេះផងដែរ។

លោកឧបនាយករដ្ឋមន្ត្រីបានបន្ថែមថា ទំនាក់ទំនងការទូតកម្ពុជា-អូស្ដ្រាលីបានភ្ជាប់តាំងពីឆ្នាំ១៩៥២ គឺមុនកម្ពុជាទទួលបានឯករាជ្យពីបារាំង។ លោក ហោ ណាំហុងបន្តថា តាំងពីនោះមកអូស្ដ្រាលីតែងតែបានផ្ដល់ជំនួយមកកម្ពុជាជារៀងរាល់ឆ្នាំព្រមទាំងផ្ដល់អាហារូបករណ៍ឲ្យនិស្សិត និងមន្ត្រីកម្ពុជាទៅសិក្សា និងកម្មសិក្សានៅអូស្ដ្រាលី។

ឯកអគ្គរដ្ឋទូតអូស្រ្តាលីប្រចាំនៅកម្ពុជា លោក Pablo Kang បានឱ្យដឹងថា អូស្រ្ដាលីបានផ្ដល់ជំនួយដល់ក្រសួងសុខាភិបាលនូវសម្ភារៈ និងរថយន្ដពេទ្យ ដើម្បីទប់ស្កាត់នឹងជំងឺ Covid-19 និងបានថ្លែងសរសើររាជរដ្ឋាភិបាលកម្ពុជា ចំពោះកម្មវិធីឧបត្ថម្ភសាច់ប្រាក់ដល់ប្រជាជនក្រីក្រ កម្មករ និងកម្មការិនី។

ឆ្លើយតបទៅនឹងការស្នើរបស់លោកឧបនាយករដ្ឋមន្ត្រី ហោ ណាំ ហុង លោក Pablo Kang ឱ្យដឹងថា អូស្ត្រលីចង់ជំរុញការវិនិយោគលើវិស័យថាមពល និងការនាំយកអង្ករក្រអូបកម្ពុជាទៅអូស្ដ្រាលី ខណៈកម្ពុជាមានសក្តានុពលចំពោះវិស័យកសិកម្ម៕